IL-KUMMISSJONI EWROPEA

Brussell, 29.10.2019

COM(2019) 549 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar l-attivitajiet tal-Fondazzjoni IFRS, l-EFRAG u l-PIOB fl-2018 u l-kisbiet tal-programm tal-Unjoni.

1.L-għan u l-kamp ta’ applikazzjoni tar-rapport

Skont ir-Regolament Nru 258/2014 1 tal-Parlament Ewropew u tal-Kunsill dwar l-istabbiliment ta’ programm tal-Unjoni għas-sostenn ta’ attivitajiet speċifiċi fil-qasam tar-rappurtar finanzjarju u l-awditjar kif emendat bir-Regolament 2017/827 2 , il-Kummissjoni għandha tħejji rapport annwali dwar l-attivitajiet tal-benefiċjarji tal-programm.

L-objettiv ta’ dan il-programm tal-Unjoni huwa li jtejjeb il-kundizzjonijiet għall-funzjonament effiċjenti tas-suq intern billi jappoġġja l-iżvilupp trasparenti u indipendenti ta’ standards internazzjonali ta’ kwalità għolja tar-rapportar finanzjarju u tal-awditjar.

Dan ir-rapport ikopri l-attivitajiet tal-Fondazzjoni għall-Istandards Internazzjonali tar-Rapportar Finanzjarju (IFRSF), tal-Grupp Konsultattiv Ewropew għar-Rapportar Finanzjarju (EFRAG) u tal-Bord tas-Sorveljanza tal-Interess Pubbliku (PIOB) fl-2018. Ċerti avvenimenti li seħħew fl-2019 issemmew ukoll meta tqis li kien utli għall-finijiet ta’ dan ir-rapport.

Bħala segwitu tar-rapport Stolojan 3 u kif meħtieġ fil-Premessa (9) tar-Regolament li jemenda r-Regolament Nru 258/2014, dan jipprovdi wkoll valutazzjoni mill-Kummissjoni tal-governanza ta’ dawn it-tliet korpi, b’mod partikolari f’termini ta’ prevenzjoni tal-kunflitt ta’ interess, trasparenza, diversità ta’ esperti, diversità ta’ finanzjament, akkontabbiltà pubblika u aċċess pubbliku għad-dokumenti.

Fl-aħħar nett, skont l-Artikolu 9(8) tar-Regolament Nru 258/2014, valutazzjoni tal-kisbiet tal-programm ta’ finanzjament li tkopri l-perjodu 2014-2019 hija ppreżentata fl-anness ta’ dan ir-rapport.

1.1.Struttura tar-Rapport

Ir-Rapport huwa strutturat kif ġej:

·Taqsima 2: Fondazzjoni għall-Istandards Internazzjonali tar-Rapportar Finanzjarju - tipprovdi ħarsa ġenerali lejn l-attivitajiet tal-fondazzjoni u valutazzjoni tal-governanza tagħha fl-2018;

·Taqsima 3: Grupp Konsultattiv Ewropew għar-Rapportar Finanzjarju - tipprovdi ħarsa ġenerali lejn l-attivitajiet tal-EFRAG u valutazzjoni tal-governanza tiegħu fl-2018;

·Taqsima 4: Bord tas-Sorveljanza tal-Interess Pubbliku - tipprovdi ħarsa ġenerali lejn l-attivitajiet tal-PIOB u valutazzjoni tal-governanza tiegħu fl-2018;

·Taqsima 5: Konklużjonijiet - tippreżenta sommarju tal-konklużjonijiet fir-rigward tar-rilevanza tal-programm ta’ finanzjament;

·Anness: Valutazzjoni interim tal-programm – fiha valutazzjoni tal-Kummissjoni tal-progress tal-programm ta’ finanzjament biex jilħaq l-objettivi tiegħu matul il-perjodu 2014-2019.

2.Fondazzjoni għall-Istandards Internazzjonali tar-Rapportar Finanzjarju

2.1.Ħarsa ġenerali lejn l-attivitajiet tal-IFRS

2.1.1.L-istipular tal-istandards

Ħarsa ġenerali lejn l-attivitajiet tal-istipular tal-istandards li wettaq il-Bord dwar l-Istandards Internazzjonali tal-Kontabbiltà (IASB), inkluża l-ħidma tal-Kumitat tal-Interpretazzjonijiet tal-IFRS (IFRIC), u proċeduri ta’ approvazzjoni li għaddejjin hija ppreżentata fl-Appendiċi 1 ta’ dan ir-rapport.

Fl-2018, il-Fondazzjoni tal-IFRS wettqet attivitajiet sinifikanti ta’ sensibilizzazzjoni sabiex tappoġġja u timmonitorja l-implimentazzjoni tal-IFRS 17 Kuntratti tal-Assigurazzjoni. F’Novembru 2018, l-IASB qies lista komprensiva ta’ sfidi operattivi li jirriżultaw mill-implimentazzjoni tal-istandard u ddeċieda li jqis emendi potenzjali biex jiffaċilita l-applikazzjoni. Il-Bord iddeċieda b’mod tentattiv li jipposponi d-data tal-applikazzjoni tal-IFRS 17 mill-1 ta’ Jannar 2021 għall-1 ta’ Jannar 2022 u li jestendi d-differiment fakultattiv tal-IFRS 9 mogħti lill-industrija tal-assigurazzjoni. F’Ġunju 2019 inħareġ għall-pubbliku abbozz ta’ espożizzjoni bil-għan li jiġi ffinalizzat standard rivedut sa nofs l-2020. Sadanittant, il-proċedura ta’ approvazzjoni tal-UE tal-IFRS 17 ġiet sospiża.

2.1.2.Proġetti ta’ riċerka

Wara konsultazzjoni mwettqa fl-2015, il-pjan ta’ ħidma tal-2017-2021 tal-IASB jimmira li jtejjeb u jappoġġja l-istandards eżistenti, jippromwovi komunikazzjoni aħjar u jappoġġja l-implimentazzjoni. Fl-2018, fir-rigward tal-proġett tiegħu “Komunikazzjoni Aħjar”, l-IASB kompla d-deliberazzjonijiet tiegħu dwar it-titjib potenzjali fl-istruttura u fil-kontenut tar-rapporti finanzjarji primarji b’enfasi fuq ir-rapport tal-introjtu. Bħala parti mir-rieżami tiegħu tar-rekwiżiti ta’ divulgazzjoni fl-IFRS, huwa ħareġ emenda biex itejjeb ir-rilevanza billi applika l-prinċipju tal-materjalità u wettaq żewġ inizjattivi ġodda inkluż rieżami fil-livell ta' standard tar-rekwiżit ta’ divulgazzjoni ta’ żewġ standards eżistenti.

L-IASB temm ir-rieżami ta’ wara l-implimentazzjoni tal-IFRS 13 Kejl tal-Valur Ġust bil-konklużjoni li l-istandard kien tejjeb ir-rapportar finanzjarju mingħajr ma qajjem inkonsistenzi kbar fl-implimentazzjoni jew kostijiet mhux mistennija. Madankollu, b’konsistenza mal-ittra ta’ kummenti mill-EFRAG, l-IASB iddeċieda li jinkludi l-IFRS 13 fl-ambitu tar-rieżami tar-rekwiżit ta’ divulgazzjoni fil-livell ta' standard msemmi hawn fuq.

Fl-2018, il-Bord nieda proġett ġdid sabiex iqis l-implikazzjonijiet tar-riforma tal-parametri referenzjarji tar-rati tal-imgħax fuq il-kontabbiltà għall-iħħeġġjar. F’Mejju 2019, l-IASB ippubblika abbozz ta’ espożizzjoni sabiex jindirizza l-konsegwenzi tar-relazzjonijiet ta’ ħħeġġjar eżistenti fuq it-trattament kontabilistiku. Bħala t-tieni pass il-proġett se jqis l-implikazzjonijiet tas-sostituzzjoni tal-parametri referenzjarji tar-rati tal-imgħax. L-IASB wettaq ukoll proġett ta’ riċerka ġdid dwar l-attivitajiet estrattivi sabiex iqis il-possibbiltà li jtejjeb l-istandard eżistenti l-IFRS 6.

Barra minn hekk, l-IASB wettaq konsultazzjoni pubblika dwar il-proposta tiegħu li jtejjeb l-IAS 32 Strumenti Finanzjarji sabiex tiġi ċċarata d-distinzjoni bejn l-obbligazzjonijiet finanzjarji u l-ekwitajiet (Strumenti Finanzjarji b’karatteristiċi ta’ ekwità). Fl-aħħar nett, bħala parti mis-segwitu tiegħu tar-rieżami ta’ wara l-implimentazzjoni tal-IFRS 3 Kombinament ta’ Negozji, il-Bord iddeċieda li jesplora simplifikazzjonijiet possibbli għall-kontabbiltà tal-avvjament u esplora wkoll t-titjib immirat għat-test tal-indeboliment.

Fl-aħħar nett, il-Fondazzjoni tal-IFRS wettqet aġġornament tat-tassonomija tal-IFRS sabiex tirrifletti l-implikazzjonijiet tal-istandards u l-emendi l-ġodda 4 .

2.1.3.Il-Qafas Kunċettwali rivedut

L-IASB ħareġ il-Qafas Kunċettwali għar-Rapportar Finanzjarju rivedut f’Marzu 2018. Il-bidliet ewlenin ġew deskritti fir-Rapport Annwali tal-Kummissjoni tal-2017 dwar l-attivitajiet tal-Fondazzjoni tal-IFRS. Il-Qafas Kunċettwali jipprovdi gwida mhux vinkolanti lill-Bord tal-IAS fl-iżvilupp tal-Istandards tal-IFRS u jgħin lil dawk li jippreparaw u lill-awdituri fl-interpretazzjoni tal-istandards eżistenti. Dan ma ġiex adottat mill-Unjoni Ewropea minħabba li l-IAS 1 Preżentazzjoni ta’ Rapporti Finanzjarji diġà jgħid li l-applikazzjoni ta’ Standards u Interpretazzjonijiet Internazzjonali tal-Kontabbiltà […], b’divulgazzjoni addizzjonali meta meħtieġ, huwa preżunt li jirriżulta f’rapporti finanzjarji li jilħqu preżentazzjoni ġusta. Għalhekk, fl-2003 il-Kummissjoni Ewropea vvalutat li l-approvazzjoni tal-Qafas Kunċettwali ma kinitx meħtieġa.

2.2.Il-prinċipji ġenerali li abbażi tagħhom ġew żviluppati Standards ġodda

2.2.1.Prinċipji ġenerali

Ir-rekwiżiti tal-proċess dovut tal-IASB huma deskritti fil-Manwal ta’ Proċess Dovut. L-applikazzjoni tiegħu fil-prattika hija sorveljata minn kumitat apposta tal-Fiduċjarji magħrufa bħala l-Kumitat tas-Sorveljanza tal-Proċess Dovut (DPOC). Fl-2018, ir-rekwiżiti ta’ Proċess dovut baqgħu l-istess. Madankollu, f’Novembru 2017, il-Kumitat tas-Sorveljanza tal-Proċess Dovut beda rieżami tal-Manwal ta’ Proċess Dovut li mistenni jitlesta sal-2020. Il-kamp ta’ applikazzjoni tar-rieżami jinkludi r-riflessjoni tal-iżviluppi tal-proċess tal-Analiżi tal-Effetti. Abbozz ta’ Espożizzjoni (AE) ġie ppubblikat f’April 2019 biex issir konsultazzjoni dwar il-bidliet proposti. Emenda waħda inkluża fl-Abbozz ta’ Espożizzjoni tissuġġerixxi li l-IASB ikun jista’ jippubblika materjali ta’ spjegazzjoni sabiex jindirizza l-mistoqsijiet ta’ implimentazzjoni li jirriżultaw minn standard maħruġ iżda qabel id-data ta’ applikazzjoni. L-objettiv huwa li tiġi appoġġjata implimentazzjoni konsistenti qabel id-data effettiva tal-applikazzjoni.

2.2.2.Proċess dovut, analiżi tal-effetti u kunsiderazzjonijiet speċifiċi tal-mudelli ta’ negozju, il-konsegwenzi fuq it-tranżazzjonijiet ekonomiċi, il-kumplessità, il-perspettiva għal terminu qasir u l-volatilità

Ma kien hemm l-ebda standard ewlieni maħruġ fl-2018 li jirrikjedi l-pubblikazzjoni ta’ rapport separat dwar l-analiżi tal-effetti. Madankollu, l-Abbozz ta’ Espożizzjoni (AE) ta’ Manwal ta’ Proċess Dovut tal-2019 imsemmi hawn fuq jissuġġerixxi li jiġi emendat il-Manwal ta’ Proċess Dovut tal-Fondazzjoni biex jiġi enfasizzat li l-analiżijiet tal-effetti tal-IASB għandhom jiffokaw fuq it-titjib għar-rapportar finanzjarju filwaqt li jitqiesu l-kostijiet ta’ implimentazzjoni filwaqt li jitqiesu wkoll kif żieda fit-trasparenza tista’ taffettwa l-istabbiltà finanzjarja. L-Abbozz ta’ Espożizzjoni jipproponi wkoll li l-analiżi tal-effetti tkun integrata fil-proċess kollu tal-istipular tal-istandards. Fir-rigward tal-impatti ekonomiċi usa’ tar-rekwiżiti ġodda ta’ rapportar finanzjarju, l-emendi proposti jenfasizzaw li l-valutazzjonijiet kwantitattivi ġeneralment ma jkunux prattiċi iżda li l-Bord jista’ jivvaluta l-effetti ekonomiċi speċifiċi fejn rilevanti. Dan l-abbozz ta’ emenda ma jissodisfax bis-sħiħ l-aspettattiva espressa mill-Kummissjoni Ewropea bħala membru tal-Bord ta’ Monitoraġġ peress li jista’ ma jnaqqasx b’mod suffiċjenti d-distakk bejn il-kamp limitat ta’ applikazzjoni tal-valutazzjoni tal-impatt tal-IASB u l-kriterji tal-approvazzjoni tal-Ġid Pubbliku Ewropew stabbiliti fir-Regolament dwar l-Istandards Internazzjonali tal-Kontabbiltà (IAS).

2.3.Il-governanza, l-integrità u l-akkontabbiltà

2.3.1.Ħarsa Ġenerali

Il-Fondazzjoni tal-IFRS hija korporazzjoni mhux għall-profitti skont il-Liġi Korporattiva Ġenerali tal-Istat ta’ Delaware (l-Istati Uniti) u topera fir-Renju Unit bħala kumpanija barranija. L-għażla ta’ entità legali tal-Istati Uniti saret minħabba kunsiderazzjonijiet tat-taxxa fi żmien meta parti sostanzjali mill-finanzjament u l-appoġġ kienu jiġu mill-partijiet ikkonċernati tal-Istati Uniti. Skont dan l-istatus legali, il-Fondazzjoni għandha l-kapaċità li tillokalizza fi kwalunkwe ġurisdizzjoni fid-dinja, filwaqt li xorta tgawdi mill-benefiċċji ta’ status ta’ mhux għall-profitti fl-Istati Uniti, u mit-trattati dwar it-taxxa tal-Istati Uniti ma’ bosta ġurisdizzjonijiet.

Il-Fondazzjoni tal-IFRS hija regolata minn Bord ta’ 22 Fiduċjarju kollettivament responsabbli għal sorveljanza ġenerali u għall-ħatriet tal-IASB. Il-Fiduċjarji ltaqgħu tliet darbiet fl-2018. Il-ħatra tal-Fiduċjarji hija soġġetta għat-tqassim skont l-oriġini ġeografika u għall-approvazzjoni minn qabel mill-Bord ta’ Monitoraġġ, li huwa magħmul b’mod li jipprovdi rabta mal-Awtoritajiet Pubbliċi. Il-Kummissjoni Ewropea hija membru tal-Bord ta’ Monitoraġġ. Il-Bord ta’ Monitoraġġ iltaqa’ darbtejn fl-2018. L-IASB għandu 14-il membru maħtura mill-fiduċjarji soġġetti għar-rekwiżiti tal-bilanċ ġeografiku. Il-membri tal-IASB huma maħtura għal mandat ta’ ħames snin li jista’ jiġġedded darba. L-IASB huwa responsabbli biex jistipula l-istandards. Matul l-2018 huwa kellu 11-il laqgħa tal-bord. Il-Fiduċjarji jaħtru wkoll l-14-il membru tal-Kumitat tal-Interpretazzjoni tal-IFRS (IFRIC) iddedikati għall-interpretazzjoni tal-applikazzjoni tal-Istandards IFRS u li jipprovdu gwida dwar kwistjonijiet ta’ rapportar finanzjarju. Barra minn hekk, il-Kunsill Konsultattiv tal-IFRS jipprovdi forum għal parteċipazzjoni minn organizzazzjonijiet u individwi. Il-membri tiegħu jinħatru minn fiduċjarji u għandhom jiġu kkonsultati mill-Bord dwar deċiżjonijiet li jikkonċernaw proġetti maġġuri.

2.3.2.Regoli dwar it-trasparenza

Il-laqgħat tal-Bord u l-Kumitat tal-Interpretazzjoni huma miftuħa għall-pubbliku, l-aġendi jiġu ppubblikati u l-laqgħat jiġu trażmessi permezz ta’ webcast.

Fir-rigward tar-reġistri ta’ trasparenza, minn Diċembru 2019 il-Fondazzjoni tal-IFRS se tippubblika, kull tliet xhur, reġistru ta’ involviment tal-partijiet ikkonċernati. Ir-reġistru se jkopri l-involvimenti kollha tal-Membri tal-Bord tal-IASB ma’ partijiet esterni ta’ aktar minn 30 minuta, inklużi laqgħat fiżiċi, ibbażati fuq l-internet u bit-telefon.

2.3.3.Rappreżentazzjoni tal-partijiet ikkonċernati

Wara r-“Rieżami mill-Fiduċjarji tal-Istruttura u tal-Effettività” li sar fl-2015, id-distribuzzjoni ġeografika tal-Fiduċjarji għandha tkun rappreżentattiva tas-swieq kapitali dinjija u soġġetta għal rekwiżit tal-bilanċ ġeografiku biex tinżamm rappreżentazzjoni ugwali bejn l-Asja u l-Oċeanja, l-Ewropa u l-Amerika.

Il-kostituzzjoni tal-Fondazzjoni tal-IFRS tirrikjedi l-ħatra ta’ 6 fiduċjarji minn kull wieħed mit-tliet reġjuni flimkien ma’ Fiduċjarju wieħed mill-Afrika u tliet fiduċjarji minn kwalunkwe żona basta jinżamm il-bilanċ ġeografiku ġenerali. Bl-istess mod, il-kriterji għall-ħatra bħala membru tal-Bord tal-IASB jirrikjedu erba’ membri minn kull reġjun, membru mill-Afrika u membru minn kwalunkwe żona.

Fil-31 ta’ Diċembru 2018, il-Kunsill Konsultattiv tal-IFRS kien magħmul minn 46 organizzazzjoni bi 48 membru individwali. Il-Kummissjoni Ewropea tipparteċipa bħala osservatur.

F’Ottubru 2018, is-Sur Erkki Liikanen inħatar bħala President tal-Fondazzjoni tal-IFRS.

2.3.4.Responsabbiltà quddiem il-Parlament Ewropew

Bħala parti mir-Regolament 2017/827 5 għandu jiġi pprovdut rendikont sħiħ tal-iżvilupp tal-IFRS lill-Parlament Ewropew. L-iskambju annwali ta’ fehmiet bejn il-Kumitat għall-Affarijiet Ekonomiċi u Monetarji (ECON) tal-Parlament Ewropew u s-Sur Hoogervorst, il-President tal-IASB u s-Sur Prada, il-President tal-fiduċjarji tal-Fondazzjoni tal-IFRS, sar fid-19-20 ta’ Marzu 2018. Il-Kumitat għall-Affarijiet Ekonomiċi u Monetarji (ECON) kellu wkoll skambju annwali ta’ fehmiet fis-26 ta’ Frar 2019, fejn is-Sur Hoogervorst u s-Sur Liikanen irrapportaw dwar l-emendi li għadhom għaddejjin għall-IFRS 17 Kuntratti tal-Assigurazzjoni u l-involviment tal-Fondazzjoni tal-IFRS fir-rapportar dwar is-sostenibbiltà u t-trasparenza tat-taxxa.

Il-Fondazzjoni tal-IFRS ikkonsultat lill-Bord ta’ Monitoraġġ dwar ir-Rapportar Pajjiż b’Pajjiż (CBCR) dwar it-taxxi u kkonkludiet li ma kienx hemm appoġġ politiku dinji wiesa’ biżżejjed għall-introduzzjoni ta’ rekwiżiti ta’ divulgazzjoni obbligatorji addizzjonali dwar it-trasparenza tat-taxxa. Madankollu, l-IASB huwa lest li jqis id-divulgazzjonijiet dwar l-istrateġiji tat-taxxa bħala parti mill-proġett li għaddej bħalissa biex jirrevedi u jaġġorna d-dikjarazzjoni ta’ prattika mhux vinkolanti dwar il-Kummentarju tal-Maniġment, li jipprovdi l-kuntest li fih għandhom jiġu interpretati r-rapporti finanzjarji.

F’dak ir-rigward, f’April 2016 il-Kummissjoni adottat proposta leġiżlattiva aktar ambizzjuża 6 dwar id-divulgazzjoni tal-informazzjoni dwar it-taxxa fuq l-introjtu minn kumpaniji multinazzjonali kbar, imsejħa wkoll ir-Rapportar Pajjiż b’Pajjiż (CBCR) tal-informazzjoni dwar it-taxxa. Il-proposta kellha l-għan li tiżgura li kumpaniji multinazzjonali kbar bi dħul ta’ aktar minn EUR 750 miljun) jippubblikaw il-ħlasijiet tat-taxxa korporattiva tagħhom b’diżaggregazzjoni għal kull pajjiż. Il-Parlament Ewropew approva l-ewwel pożizzjoni tiegħu fis-27 ta’ Marzu 2019. Madankollu, il-Kunsill Ewropew għadu ma adottax pożizzjoni.

Bl-istess mod, bħala parti mill-iskambji ta’ fehmiet, is-Sur Hoogervorst irrapporta li l-objettivi politiċi ta’ sostenibbiltà kellhom enfasi usa’ mir-rapportar finanzjarju u jistgħu jiġu indirizzati aħjar permezz ta’ inċentivi finanzjarji jew tassazzjoni aktar milli permezz ta’ divulgazzjonijiet pubbliċi. Madankollu, huwa enfasizza li l-impatt ta’ kwistjonijiet ta’ sostenibbiltà fuq ir-redditi futuri ta’ kumpaniji se jitqies ukoll bħala parti mid-Dikjarazzjoni mhux vinkolanti dwar il-Prattika tal-Kummentarju tal-Maniġment.

Il-Kummissjoni se tesplora jekk għandhiex titqies azzjoni alternattiva biex jiġu stipulati l-istandards. B’mod speċjali, bħala parti mill-Pjan ta’ Azzjoni tagħha dwar il-Finanzjament tat-Tkabbir Sostenibbli, il-Kummissjoni impenjat ruħha li tivvaluta kemm huma b’saħħithom ir-rekwiżiti ta’ rapportar tas-sostenibbiltà inkorporati fid-Direttiva dwar l-Informazzjoni Mhux Finanzjarja 7 fil-kuntest tal-Kontroll tal-Idoneità tagħha tal-leġiżlazzjoni tal-UE dwar ir-rapportar korporattiv pubbliku. Skont is-sejbiet, jistgħu jitqiesu inizjattivi ġodda mill-Kummissjoni biex tiżdied it-trasparenza korporattiva dwar kwistjonijiet ta’ sostenibbiltà u l-ħolqien ta’ valur fit-tul. Barra minn hekk, fl-2019 il-Kummissjoni ssupplimentat il-linji gwida mhux vinkolanti dwar ir-rapportar mhux finanzjarju 8 bil-linji gwida dwar ir-rapportar ta’ informazzjoni relatata mal-klima 9 sabiex tintegra r-rakkomandazzjonijiet tat-Task Force tal-Bord għall-Istabbiltà Finanzjarja dwar Divulgazzjonijiet Finanzjarji relatati mal-Klima.

2.3.5.Prevenzjoni tal-kunflitti ta’ interess

Il-Fiduċjarji tal-Fondazzjoni tal-IFRS jinħatru għal mandat ta’ tliet snin li jista’ jiġġedded darba u jridu jimpenjaw ruħhom li jaġixxu fl-interess pubbliku. Wara talba mill-Bord ta’ Monitoraġġ, fl-2018 ġiet adottata politika riveduta dwar il-kunflitt ta’ interess. Din tintroduċi l-prinċipju li Fiduċjarju u Membru tal-Bord ta’ Monitoraġġ ma jistgħux jiġu impjegati mill-istess organizzazzjoni. Madankollu, din tagħti s-setgħa wkoll lill-President tal-Fiduċjarji biex jidderoga minn dan il-prinċipju f’ċirkostanzi eċċezzjonali.

Tliet membri tal-IASB biss jistgħu jkunu membri part-time. Il-membri full-time tal-Bord huma meħtieġa mill-kostituzzjoni tal-Fondazzjoni tal-IFRS li jaqtgħu r-relazzjonijiet u r-rabtiet kollha ta’ impjieg li jistgħu jaffettwaw l-indipendenza tagħhom. La huwa permess is-sekondar minn min iħaddem u lanqas id-drittijiet ta’ integrazzjoni mill-ġdid mal-impjegatur preċedenti.

2.3.6.Diżaggregazzjoni tal-finanzjament

Fl-2018, il-Fondazzjoni tal-IFRS rċeviet għotja ta’ EUR 4,7 miljun mill-Unjoni Ewropea li tirrappreżenta 18,5 % tal-finanzjament totali rċevut.

Il-kontribuzzjonijiet irrapportati naqsu b’10,6 % fl-2018 (9,7 % wara li tqies l-impatt tal-flutwazzjonijiet fir-rati tal-kambju). L-iżviluppi l-aktar sinifikanti kienu xprunati min-netwerks internazzjonali tal-awditjar (-32 %), iċ-Ċina (+25 %) u l-Istati Uniti 10 (-13%). Diżaggregazzjoni tal-finanzjament skont iż-żoni ġeografiċi ewlenin hija deskritta fl-Appendiċi 2. Din tenfasizza b’mod speċjali li minkejja rappreżentazzjoni ugwali tal-UE u tal-Istati Uniti fil-Bord tal-Fiduċjarji (6 Fiduċjarji kull wieħed) u fl-IASB (4 membri tal-bord kull wieħed), iż-żona tal-“Kontinent Amerikan” tikkontribwixxi biss sa 6 % tal-finanzjament tal-Fondazzjoni filwaqt li l-Ewropa u l-Asja u l-Oċeanja għamlu rispettivament 35,7 % u 32,7 % tal-kontribuzzjonijiet totali. Is-sehem relattiv tal-baġit tal-UE u tal-Istati Membri żdied meta mqabbel mal-2017 (minn 32,4 % għal 35,7 %). It-tnaqqis fil-kontribuzzjonijiet irrapportati min-netwerks internazzjonali tal-awditjar kien paċut parzjalment minn arranġament kummerċjali li wassal għal żieda fid-dħul mil-liċenzji

Il-Fondazzjoni tal-IFRS irrapportat surplus nett ta’ GBP 2,9 Miljun. Is-surplus totali miżmum fil-31 ta’ Diċembru 2018 kien jammonta għal GBP 34,4 Miljun.

3.Il-Grupp Konsultattiv Ewropew għar-Rapportar Finanzjarju

3.1.Ħarsa ġenerali lejn l-attivitajiet tal-EFRAG

3.1.1.Attivitajiet ta’ approvazzjoni

Ir-rwol primarju tal-EFRAG huwa li jagħti pariri lill-Kummissjoni Ewropea dwar jekk standards IFRS ġodda jew riveduti jissodisfawx il-kriterji ta’ approvazzjoni stabbiliti mir-Regolament tal-IAS dwar l-applikazzjoni tal-istandards internazzjonali tal-kontabbiltà. Dawk il-kriterji għandhom jinkludu ż-żamma tar-rekwiżit ta’ “stampa vera u ġusta”, u tal-ġid pubbliku Ewropew. It-testijiet fuq il-post, il-valutazzjonijiet tal-impatt u l-attitivtajiet ta’ sensibilizzazzjoni jifformaw parti sinifikanti mix-xogħol dwar l-approvazzjoni tal-EFRAG biex jiġġudika jekk standard huwiex favorevoli għall-ġid pubbliku Ewropew.

Fl-2018, l-EFRAG kien involut fil-parir ta’ approvazzjoni tal-IFRS 17 Kuntratti tal-Assigurazzjoni. Huwa wettaq analiżi tal-impatt kbira fuq l-impatt antiċipat tal-IFRS 17 li tikkonsisti minn studju ta’ każ estensiv bi 11-il assiguratur, studju ta’ każ simplifikat b’49 assiguratur; u sensibbilizzazzjoni dettaljata tal-utent.

Barra minn hekk, l-EFRAG ikkummissjona studju ekonomiku biex tinkiseb analiżi ekonomika f’oqsma bħax-xejriet tal-industrija, kwalunkwe impatt potenzjali fuq il-kompetizzjoni għall-kapital u l-konsumaturi, u kwalunkwe impatt potenzjali fuq l-offerti ta’ prodotti u servizzi minn assiguraturi. Dan l-istudju jikkontribwixxi għall-analiżi tal-impatt tal-EFRAG. F’Ottubru 2018, il-Parlament Ewropew adotta Mozzjoni għal Riżoluzzjoni dwar l-IFRS 17 li qajmet xi tħassib dwar l-impatti usa’ tal-IFRS 17 fuq l-istabbiltà finanzjarja, l-investiment ta’ terminu twil u s-suq Ewropew tal-assigurazzjoni u enfasizza kwistjonijiet tekniċi speċifiċi biex jitqiesu fil-parir ta’ approvazzjoni. L-EFRAG inkorpora l-kwistjonijiet identifikati mill-Parlament fil-pjan ta’ ħidma tiegħu sabiex iqishom bħala parti mill-abbozz ta’ parir dwar l-approvazzjoni.

L-iskeda oriġinali tal-EFRAG talbet għal għoti ta’ pariri lill-Kummissjoni sal-aħħar tal-2018 iżda minn dak iż-żmien ’l hawn il-proġett ħa rotta differenti. L-attivitajiet ta’ studju ta’ każ u ta’ sensibilizzazzjoni tal-EFRAG identifikaw diversi tħassib u l-Bord tal-EFRAG iddeċieda li jikteb lill-IASB biex jenfasizza xi aspetti tal-IFRS 17 li, fil-fehma tal-EFRAG, kien jistħoqqilhom aktar kunsiderazzjoni. Minn dak iż-żmien l-IASB b’mod tentattiv iddeċieda li jemenda l-Istandard u ħareġ Abbozz ta’ Espożizzjoni f’Ġunju 2019 sabiex jindirizza xi tħassib identifikat mill-EFRAG. L-EFRAG adotta l-abbozz ta’ ittra ta’ kummenti tiegħu f’Lulju 2019 u nieda konsultazzjoni pubblika sabiex jinġabru l-fehmiet tal-kostitwenti Ewropej. L-abbozz ta’ ittra ta’ kummenti jenfasizza b’mod speċjali li r-rekwiżiti ta’ tranżizzjoni tal-IFRS 17 u l-livell ta’ aggregazzjoni applikati għall-kejl tal-kuntratti tal-assigurazzjoni xorta waħda joħolqu sfidi operattivi sinifikanti. Iż-żewġ punti ta’ tħassib ġew identifikati fil-Mozzjoni għal Riżoluzzjoni tal-2018 mill-Parlament Ewropew dwar l-IFRS 17.

Matul l-2018, l-EFRAG ħa sehem fil-proċess ta’ konsultazzjoni tal-IASB, u ħareġ ittri ta’ kummenti wara konsultazzjoni pubblika, dwar il-proposti kollha tal-IASB (abbozzi ta’ espożizzjoni u dokumenti ta’ diskussjoni). F’Ġunju 2019, l-EFRAG ħareġ l-ittra ta’ kummenti finali tiegħu dwar ir-Riforma tal-Parametri Referenzjarji tar-Rati tal-Imgħax li enfasizzat l-urġenza li jiġu indirizzati l-konsegwenzi tagħha fuq ir-relazzjonijiet tal-kontabbiltà għall-iħħeġġjar sabiex tkun tista’ tiġi approvata mill-Unjoni Ewropea fil-ħin. Oqsma oħra ta’ fokus kienu jinkludu l-proġetti tal-IASB dwar l-Attivitajiet irregolati mir-Rata, u Rapporti Finanzjarji Primarji.

3.1.2.Talbiet oħra għal parir tekniku

B’segwitu għal riżoluzzjoni mill-Parlament Ewropew dwar l-IFRS 9, u bi tweġiba għat-talbiet tal-Kummissjoni biex tqis l-effetti potenzjali tal-IFRS 9 fuq investiment ta’ terminu twil fi strumenti ta’ ekwità (li kienu enfasizzati wkoll fil-Pjan ta’ Azzjoni tal-Kummissjoni dwar Il-Finanzjament tat-Tkabbir Sostenibbli), l-EFRAG ippubblika Dokument ta’ Diskussjoni dwar Strumenti Azzjonarji - Indeboliment u Riċiklaġġ għal konsultazzjoni pubblika. L-EFRAG wettaq ukoll analiżi ta’ letteratura akkademika dwar l-IFRS 9 u l-investiment ta’ terminu twil. F’Novembru 2018, l-EFRAG ta l-parir tiegħu dwar it-trattament kontabilistiku tal-istrumenti ta’ ekwità skont l-IFRS 9 bil-konklużjoni li ma kienx ġabar biżżejjed evidenza li hemm xi effett detrimentali fuq deċiżjonijiet ta’ investiment ta’ ekwità (fuq terminu twil) biex jirrakkomanda emenda għall-istandard fuq terminu qasir. Madankollu, l-EFRAG beda jaħdem ukoll fuq it-tieni talba tal-Kummissjoni biex jesplora trattamenti kontabilistiċi alternattivi potenzjali għall-kejl tal-valur ġust għal portafolli ta’ investiment ta’ terminu twil ta’ strumenti ta’ ekwità u tat-tip ekwità.

Ukoll fuq talba tal-Kummissjoni u b’konformità mal-iskeda prevista fil-Pjan ta’ Azzjoni ta’ Marzu 2018 dwar il-Finanzjament tat-Tkabbir Sostenibbli, l-EFRAG stabbilixxa l-Laboratorju@EFRAG ta’ Rapportar Korporattiv Ewropew (Laboratorju Ewropew). Il-Laboratorju Ewropew huwa mfassal biex jistimola l-innovazzjoni fir-rapportar korporattiv permezz tal-kondiviżjoni ta’ prattiki tajba. Il-Grupp ta’ Tmexxija tal-Laboratorju Ewropew kellu l-ewwel laqgħa tiegħu f’Novembru 2018 u kkonferma l-ewwel proġett dwar ir-rapportar relatat mal-klima. Wara sejħa għall-kandidati f’Diċembru, ġie stabbilit l-ewwel task force tal-proġett dwar ir-rapportar relatat mal-klima u beda ħidmietu fi Frar 2019. Id-deċiżjoni biex jiżdied proġett mal-aġenda tal-Laboratorju Ewropew issir mill-Grupp ta’ Tmexxija tal-Laboratorju Ewropew, filwaqt li jitqies il-kontribut mill-partijiet ikkonċernati f’konsultazzjoni pubblika ppubblikata f’Lulju bi skadenza fit-30 ta’ Settembru 2019.

3.1.3.L-attivitajiet ta’ riċerka

Fl-2018, l-EFRAG wettaq konsultazzjoni pubblika dwar l-aġenda ta’ riċerka tiegħu sabiex jiżgura li l-EFRAG iwettaq proġetti ta’ riċerka li huma l-aktar rilevanti għall-Ewropa. Il-konsultazzjoni pubblika pprovdiet għarfien dwar il-prijoritajiet fost il-kostitwenti Ewropej għal din il-parti essenzjali tal-attivitajiet tal-EFRAG. Minn din il-konsultazzjoni l-EFRAG beda tliet proġetti ta’ riċerka ġodda fl-aħħar tal-2018 dwar Informazzjoni Aħjar dwar Assi Intanġibbli; Assi Kripto; u Pagamenti Varjabbli u Kontinġenti. Bħala parti mix-xogħol ta’ riċerka tiegħu l-EFRAG ippubblika wkoll Dokument ta’ Diskussjoni bl-isem ta’ Trasferimenti mhux ta’ Skambju: Rwol għall-Benefiċċju tas-Soċjetà? u avvanza l-ħidma tiegħu fuq il-pjanijiet ta’ pensjoni bl-appoġġ tal-Grupp Konsultattiv tal-Pjan tal-Pensjonijiet tiegħu. Permezz tal-Bord Akkademiku u n-Netwerk Akkademiku tiegħu l-EFRAG saħħaħ il-kooperazzjoni tiegħu mal-akkademiċi.

Fir-rigward tal-influwenza tal-EFRAG fid-dibattitu dwar l-Istandards Internazzjonali tar-Rapportar Finanzjarju, ta’ min isemmi li qabel id-Dokument ta’ Diskussjoni tal-IASB Strumenti Finanzjarji b’Karatteristiċi ta’ Ekwità (FICE), is-Segretarjat tal-EFRAG wettaq bħala proġett pilota analiżi fi stadju bikri b’segwitu għas-sejħa tiegħu li l-analiżijiet tal-impatt għandhom jitwettqu matul il-proċess kollu tal-istipular tal-istandards minflok fl-aħħar biss. L-EFRAG wettaq sensibilizzazzjoni estensiva ma’ Korpi Nazzjonali ta’ Standardizzazzjoni u sensibilizzazzjoni orjentata lejn l-utent bħala parti mill-konsultazzjoni dwar l-Abbozz ta’ Ittra ta’ Kummenti biex jiġu vvalutati l-effetti usa’ u l-konsegwenzi mhux intenzjonati potenzjali tal-bidliet fir-regoli dwar ir-rapportar dwar l-FICE, sabiex jitnaqqas ir-riskju ta’ problemi li jinħolqu fil-fażi ta’ approvazzjoni jekk l-IASB ikollu jipproċedi għal standard. Is-Segretarjat tal-EFRAG ippubblika dokument ta’ ħidma dwar l-analiżi fi stadju bikri fl-aħħar ta’ Frar 2019.

3.2.Il-governanza, it-trasparenza u l-akkontabbiltà pubblika

3.2.1.Governanza tal-EFRAG wara rakkomandazzjoni tar-rapport Maystadt

Ir-riforma tal-governanza tal-EFRAG, li ġiet implimentata fil-31 ta’ Ottubru 2014, żiedet il-leġittimità u r-rappreżentattività tal-organizzazzjoni u wasslet għal proċess aktar koeżiv rigward il-parteċipazzjoni tal-UE fil-proċess għall-istipular tal-istandards tal-IASB.

Ir-riforma tal-governanza tlestiet f’Lulju 2016 bil-ħatra uffiċjali mill-Assemblea Ġenerali tal-EFRAG ta’ Jean-Paul Gauzès, eks Membru tal-Parlament Ewropew, bħala President tal-Bord tal-EFRAG wara li ġie nnominat mill-Kummissjoni u kif approvat mill-Parlament Ewropew u l-Kunsill. Il-mandat tas-Sur Gauzès ġie mġedded għal perjodu ieħor ta’ tliet snin, li jibda mill-1 ta’ Lulju 2019.

L-Awtoritajiet Superviżorji Ewropej u l-Bank Ċentrali Ewropew għażlu li jkunu osservaturi uffiċjali bid-dritt li jitkellmu fil-Bord tal-EFRAG. Il-kontribut tagħhom tqies bir-reqqa meta ttieħdu l-pożizzjonijiet tal-EFRAG u taw kontribut importanti għall-analiżi tal-impatt tal-EFRAG b’mod partikolari fil-qasam tal-istabbiltà finanzjarja.

Ta’ min jenfasizza li l-Bord tal-EFRAG wasal għall-konklużjonijiet kollha tiegħu fl-2018 abbażi ta’ kunsens, mingħajr ma kien hemm bżonn li jirrikorri għall-votazzjoni. Fl-2017 saret l-ewwel rotazzjoni tal-Bord tal-EFRAG u nħatar Bord ġdid. Fl-ispirtu tar-rapport Maystadt 11 inħoloq sit ta’ osservatur għall-organizzazzjonijiet Ewropej li jirrappreżentaw l-investituri privati (“utenti finali”).

Il-Bord tal-EFRAG iwettaq rieżami tal-prestazzjoni u l-effettività tal-membri tiegħu stess taħt is-sorveljanza tal-Assemblea Ġenerali tal-EFRAG fuq bażi annwali. Ir-rieżami tal-2018, li kopra taħlita ta’ kwistjonijiet strateġiċi, operattivi u ta’ governanza, wriet li kollox ma’ kollox, l-istruttura ta’ governanza ħadmet sew, u dan irriżulta f’aktar kredibbiltà għall-organizzazzjoni. Xi rakkomandazzjonijiet ġew adottati biex fil-ġejjieni l-effettività tal-attivitajiet tal-EFRAG tkompli titjieb.

Fl-2017, l-EFRAG ikkummissjona awditu tal-perċezzjonijiet tal-partijiet ikkonċernati esterni tal-viżibbiltà u tal-effettività tal-EFRAG li twettqet mill-aġenzija indipendenti FleishmanHillard. Ir-rapport finali tagħhom ippubblikat f’Marzu 2018 ikkonferma l-influwenza pożittiva tax-xogħol tal-EFRAG fuq il-partijiet ikkonċernati, il-progress li ġab fuq il-viżibbiltà u l-kredibbiltà tal-EFRAG mit-tim ta’ komunikazzjoni mwaqqaf taħt it-tmexxija tal-President tal-Bord tal-EFRAG u identifika l-viżibbiltà bħala waħda mill-oqsma għal titjib kontinwu.

Fir-rigward tas-sitwazzjoni potenzjali ta’ kunflitti ta’ interess, m’hemm l-ebda kwistjoni x’tissemma. Ir-Regoli Interni tal-EFRAG jistabbilixxu rekwiżiti dwar kunflitti ta’ interess u l-Bord tal-EFRAG għandu Politika dwar il-Kunflitti ta’ Interess tal-membri tal-Bord li hija ppubblikata fuq is-sit web tal-EFRAG. L-objettiv tal-politika huwa li jiżgura l-kredibbiltà tal-EFRAG bħala organizzazzjoni li taħdem fl-interess tal-pubbliku Ewropew. Il-politika hija maħsuba biex tevita sitwazzjonijiet fejn jistgħu jinqalgħu kunflitti jew perċezzjonijiet ta’ kunflitti, li jistgħu: jiskoraġġixxu d-diskussjoni ħielsa; jirriżultaw f’deċiżjonijiet jew azzjonijiet li ma jkunux fl-aħjar interess tal-pubbliku Ewropew ġenerali jew tal-EFRAG; jew jagħtu l-perċezzjoni li l-EFRAG aġixxa b’mod mhux xieraq. Il-membri tal-Bord tal-EFRAG u l-persunal tal-EFRAG jiffirmaw dikjarazzjonijiet annwali.

3.2.2.Regoli dwar it-trasparenza

Sa mit-twaqqif tiegħu, l-EFRAG daħħal fis-seħħ proċess dovut pubbliku trasparenti li maż-żmien ġie żviluppat aktar. Dan il-proċess dovut jippermetti lill-kostitwenti Ewropej kollha jressqu l-opinjonijiet tagħhom biex jitqiesu mill-EFRAG u jiżgura li d-diversità tal-mudelli kontabilistiċi u ekonomiċi u tal-fehmiet fl-Ewropa titqies fil-pożizzjonijiet tal-EFRAG. Dan huwa essenzjali biex jiġi żgurat li l-IFRS il-ġodda jwieġbu għall-ħtiġijiet tal-Ewropa.

Il-leġittimità tal-EFRAG hija mibnija fuq it-trasparenza, il-governanza, il-proċess dovut (li jistgħu jinkludu testijiet fuq il-post, analiżijiet tal-impatt u sensibilizzazzjoni), l-akkontabbiltà pubblika u t-tmexxija tal-ħsieb. Bħala parti mill-proċess dovut tiegħu l-EFRAG jippubblika abbozz tal-pożizzjonijiet għall-konsultazzjoni pubblika, iwettaq testijiet fuq il-post u forom oħra ta’ analiżijiet tal-effetti, jorganizza avvenimenti ta’ sensibilizzazzjoni (li xi wħud minnhom huma speċjalment immirati lejn l-utenti tar-rapporti finanzjarji), iwettaq stħarriġiet speċjali, u jippubblika r-riżultati f’dikjarazzjonijiet ta’ feedback u jippubblika l-pożizzjonijiet aħħarija. L-EFRAG jikkontribwixxi għall-istipular ta’ standards ibbażati fuq l-evidenza permezz ta’ studji kwantitattivi li jinformaw id-diskussjoni dwar l-ittri ta’ kummenti u l-pariri ta’ approvazzjoni tal-EFRAG u li gradwalment qegħdin isiru parti aktar importanti mix-xogħol ta’ riċerka tal-EFRAG.

Il-laqgħat tal-Bord tal-EFRAG, tal-Grupp ta’ Esperti Tekniċi tal-EFRAG (TEG tal-EFRAG) u tal-Forum Konsultattiv ta’ Dawk li Jistipulaw l-Istandards tal-EFRAG (CFSS tal-EFRAG) isiru fil-pubbliku u ilhom disponibbli permezz ta’ webcast minn Marzu 2018. L-aġenda u s-sommarji tal-laqgħat jiġu ppubblikati fuq is-sit web tal-EFRAG. Barra minn hekk, id-dokumenti ta’ sostenn tal-aġenda għal-laqgħat tal-Bord tal-EFRAG, tat-TEG tal-EFRAG u tas-CFSS tal-EFRAG huma disponibbli pubblikament. Sa minn Marzu 2018, dawn il-laqgħat pubbliċi jistgħu jiġu vvalutati permezz ta’ webcast u jippermettu lill-partijiet ikkonċernati jaraw id-diskussjonijiet mhux biss f’ħin reali iżda wkoll wara li jsiru l-laqgħat. Id-diskussjonijiet tat-TEG tal-EFRAG huma appoġġjati permezz tal-kontribut mis-CFSS tal-EFRAG (il-forum ta’ dawk li jistipulaw l-istandards nazzjonali tal-kontabbiltà) u tal-Gruppi ta’ Ħidma u l-Bordijiet Konsultattivi speċjalizzati tal-EFRAG.

Il-Bord tal-EFRAG jirċievi rapport regolari tal-laqgħat kollha bejn il-persunal tal-EFRAG u partijiet oħra (minbarra laqgħat amministrattivi ta’ rutina). Dawn ir-rapporti f’forma aggregata huma inklużi fir-rapporti finali dwar l-għotjiet li l-EFRAG jibgħat lill-Kummissjoni.

L-EFRAG jippubblika rieżami annwali li jipprovdi trasparenza sħiħa dwar il-governanza u l-istruttura finanzjarja tiegħu u l-attivitajiet ewlenin fis-sena kkonċernata. Ir-Rieżami Annwali tal-2018 ġiet ippubblikata fil-25 ta’ April 2019.

B’mod ġenerali, il-Governanza tal-EFRAG hija mmarkata bi trasparenza tajba tal-fluss ta’ informazzjoni fost il-partijiet ikkonċernati ewlenin. L-EFRAG wera wkoll l-impenn tiegħu li jaħdem mal-Kummissjoni biex jikseb standards ta’ trasparenza saħansitra ogħla milli kien qed japplika fil-passat. Bħala evidenza tal-impenn tagħhom għal dan il-kompitu, fid-9 ta’ Lulju 2019, il-Bord tal-EFRAG approva Politika dwar ir-Reġistru ta’ Trasparenza Pubblika għall-EFRAG li tikkonsisti mill-pubblikazzjoni fuq is-sit web tiegħu tal-laqgħat u tal-konferenzi kollha tal-President tal-Bord, il-President tat-TEG u s-CEO tal-EFRAG. Ir-Reġistru ta’ Trasparenza beda fl-1 ta’ Settembru u l-ewwel verżjoni se titqiegħed fuq is-sit web tagħhom aktar tard fil-ħarifa tal-2019. L-EFRAG wiegħed lill-Kummissjoni li se jżomm reġistru pubbliku fuq is-sit web tiegħu li jiġi aġġornat regolarment u jkopri s-sena kalendarja.

3.2.3.Rappreżentazzjoni wiesgħa u l-akkontabbiltà pubblika tal-istruttura ta’ governanza tal-EFRAG

B’mod ġenerali l-approċċ għall-istruttura ta’ governanza tal-EFRAG fejn jidħlu r-rappreżentanza wiesgħa tal-interessi u l-akkontabbiltà pubblika kien pożittiv.

Il-Bord tal-EFRAG jirċievi rapport regolari tal-laqgħat kollha bejn il-persunal tal-EFRAG u partijiet oħra (minbarra laqgħat amministrattivi ta’ rutina). Dawn ir-rapporti f’forma aggregata huma inklużi fir-rapporti finali dwar l-għotjiet li l-EFRAG jibgħat lill-Kummissjoni. L-EFRAG huwa lest li jaħdem mal-Kummissjoni biex jasal għal standards ta’ trasparenza saħansitra ogħla milli qed japplika attwalment biex jagħti aktar għarfien waqt il-laqgħat tat-tmexxija tal-EFRAG mal-partijiet ikkonċernati esterni fil-kuntest tal-missjoni ta’ interess pubbliku tal-EFRAG.

L-EFRAG jagħmel ħiltu biex jilħaq bilanċ ġeografiku, tal-isfond professjonali u tal-ġeneri xieraq fil-Bord tiegħu, fil-Grupp ta’ Esperti Tekniċi (TEG tal-EFRAG) u fil-Gruppi ta’ Ħidma u fil-Bordijiet Konsultattivi tiegħu u fil-Grupp ta’ Tmexxija tal-Laboratorju Ewropew u t-task forces tal-proġett tiegħu. Ir-rekwiżiti huma inklużi fir-Regoli Interni tal-EFRAG għal għadd massimu ta’ membri tal-istess nazzjonalità fil-Bord tal-EFRAG u fit-TEG tal-EFRAG u dawn ir-rekwiżiti ġew applikati wkoll għat-twaqqif tal-ewwel Grupp ta’ Tmexxija tal-Laboratorju Ewropew. Barra minn hekk, hemm rekwiżiti għal bilanċ xieraq f’termini ta’ sfond professjonali u tal-ġeneri.

Il-membri tal-Bord tal-EFRAG jiġu nnominati mill-Organizzazzjonijiet Membri tal-EFRAG skont sistema stabbilita wara r-rakkomandazzjonijiet ta’ Maystadt. Għat-TEG tal-EFRAG u għall-Gruppi ta’ Ħidma u għall-Bordijiet Konsultattivi tiegħu u tal-Grupp ta’ Tmexxija tal-Laboratorju Ewropew u għat-task forces tal-proġett tiegħu jinħarġu sejħiet għal kandidati u dawn is-sejħiet jiġu mxerrda b’mod wiesgħa.

In-numru ta’ applikazzjonijiet huwa differenti ħafna iżda hemm b’mod partikolari nuqqas ta’ kandidati nisa u ta’ kandidati mill-Ewropa Ċentrali u tal-Lvant. Madankollu, l-EFRAG kien kapaċi jattira għall-Grupp ta’ Tmexxija tal-Laboratorju Ewropew u għat-task force tal-proġett tiegħu għadd akbar ta’ kandidati nisa u kandidati mill-Ewropa Ċentrali u tal-Lvant (ara s-sitwazzjoni fid-dettalji fil-31 ta’ Diċembru 2018 fl-Appendiċi 4).

Madankollu, għalkemm ir-riżultati ġenerali ta’ dawn l-azzjonijiet kienu pożittivi ħafna, jibqa’ xi riżervi rigward il-ħila li tinġabar il-firxa kollha tal-opinjonijiet tal-partijiet ikkonċernati fl-Ewropa. L-EFRAG għandu jibqa’ proattiv fit-tiftix ta’ feedback mill-partijiet ikkonċernati inqas involuti mill-qrib fix-xogħol tal-EFRAG iżda li huma affettwati minnu, jew minn gruppi ta’ partijiet ikkonċernati barra l-isfera immedjata tal-EFRAG.

3.2.4.L-involviment fi stadju bikri tal-Parlament Ewropew u tal-Kunsill

L-EFRAG jiskambja fehmiet mal-Grupp Permanenti ECON tal-IFRS tal-Parlament Ewropew biex jippermetti lill-Membri tal-Parlament Ewropew jagħtu kontribut għall-attivitajiet tal-EFRAG u biex jaġġornawhom dwar l-attivitajiet ewlenin tal-EFRAG fl-istadji kollha tal-proċess. F’Marzu 2018 saret laqgħa waħda biex isir skambju ta’ fehmiet dwar l-attivitajiet tal-EFRAG u b’mod partikolari dwar l-IFRS 17. Il-Parlament Ewropew ħareġ Riżoluzzjoni fit-3 ta’ Ottubru 2018 dwar l-IFRS 17. Skambju ta’ fehmiet li sar mal-President tal-Bord tal-EFRAG u mal-President tal-Grupp ta’ Esperti Tekniċi tal-EFRAG (TEG tal-EFRAG) mal-ECON fil-laqgħa pubblika tiegħu fis-17 ta’ Mejju 2018.

L-EFRAG dejjem jiġi mistieden mill-Kummissjoni biex jattendi l-laqgħat tal-Kumitat Regolatorju dwar il-Kontabbiltà (ARC) u fuq talba tal-Kummissjoni, jagħti preżentazzjonijiet f’kull waħda minn dawn il-laqgħat ta’ ħidma li jkunu għaddejjin u l-opinjonijiet tiegħu dwar suġġetti partikolari. Dan jippermetti lill-ARC jagħmel skambju ta’ fehmiet mal-EFRAG u jagħti kontribut bikri. L-ARC jiddiskuti l-ittri ta’ talbiet għal parir ta’ approvazzjoni qabel ma jiġu ppreżentati lill-EFRAG sabiex jiżgura li l-interessi Ewropej kollha jiġu indirizzati.

Ir-riċeviment ta’ kontribut mill-Parlament u l-ARC fi stadju bikri jippermetti lill-EFRAG biex jinkludi l-kwistjonijiet fl-abbozz ta’ ittra ta’ kummenti jew l-abbozz ta’ pariri dwar l-approvazzjoni tiegħu għall-konsultazzjoni pubblika.

3.2.5.Diversifikazzjoni u bilanċ tal-istruttura ta’ finanzjament tal-EFRAG

L-EFRAG huwa organizzazzjoni ffinanzjata pubblikament u privatament li taħdem fl-interess tal-pubbliku Ewropew. L-EFRAG għandu l-forma legali ta’ AISBL (Organizzazzjoni internazzjonali mingħajr skop ta’ qligħ Belġjana).

L-Organizzazzjonijiet Membri tal-EFRAG jinkludu tmien Organizzazzjonijiet Ewropej tal-Partijiet Ikkonċernati, disa’ Organizzazzjonijiet Nazzjonali, flimkien mal-Kummissjoni Ewropea.

Id-diżaggregazzjoni tal-kontribuzzjonijiet fi flus mill-organizzazzjonijiet membri hija rapportata fl-Appendiċi 3. 

Minbarra finanzjament bi flus, l-EFRAG jirċievi kontribuzzjonijiet in natura pprovduti mill-membri tat-TEG tal-EFRAG, il-Bord tal-EFRAG, il-Gruppi ta’ Ħidma u l-Bordijiet Konsultattivi kif ukoll fil-forma ta’ ssekondar liberu.

Fl-2019, l-EFRAG qed jipprova li jwessa’ l-bażi ta’ sħubija tiegħu u li jwessa’ r-rappreżentanza ġeografika tiegħu. B’mod partikolari, se jkun qed jirrevedi l-istruttura finanzjarja tiegħu li timmira lejn struttura finanzjarja sostenibbli fit-tul wara talba minn Accountancy Europe biex tnaqqas il-kontribuzzjoni tas-sħubija tagħha mill-2019 ’il quddiem u l-implikazzjonijiet finanzjarji possibbli jekk il-Financial Reporting Council, ir-regolatur fir-Renju Unit u l-Irlanda għal awdituri, kontabilisti u attwarji kellu jirtira minħabba l-Brexit.

1.Bord tas-Sorveljanza tal-Interess Pubbliku

4.1.Ħarsa ġenerali lejn l-attivitajiet

L-arkitettura globali tal-istipular tal-istandards fil-qasam tal-awditjar, l-assigurazzjoni, l-etika u l-edukazzjoni tikkonsisti fi struttura fuq tliet livelli magħmula minn bordijiet tal-istipular tal-istandards (SSB) appoġġjati mill-Federazzjoni Internazzjonali tal-Kontabilisti (IFAC), is-sorveljanza indipendenti (PIOB), u l-akkontabbiltà għal korp ta’ monitoraġġ tal-awtoritajiet pubbliċi ( Grupp ta’ Monitoraġġ ).

Il-PIOB huwa korp estern indipendenti, magħmul minn 10 membri inkluż il-President tiegħu (il-Kummissjoni nnominat żewġ membri tal-UE mill-10) li jissorvelja l-istipular tal-istandards fuq l-awditjar, l-etika u l-edukazzjoni għall-kontabilisti. L-istandards rilevanti huma l-Istandards Internazzjonali tal-Awditjar (ISA), l-Istandards tal-Etika għall-kontabilisti, u l-Istandards Internazzjonali tal-Edukazzjoni (IESs). L-istruttura tal-istipular tal-istandards hija riżultat tar-Riformi tal-IFAC tal-2003 12 , li żviluppaw bħala tweġiba għall-kollass korporattiv ta’ profil għoli u għall-fallimenti fir-rapportar finanzjarju u tal-awditjar f’għadd ta’ pajjiżi. Riforma ewlenija kienet l-istabbiliment tal-PIOB, immirata biex iżżid il-fiduċja tal-investituri u oħrajn billi tissorvelja li l-attivitajiet tal-Bordijiet tal-istipular tal-istandards relatati mal-awditjar jirrispondu b’mod xieraq għall-interess pubbliku.

Il-kompitu ġenerali tal-PIOB huwa li jiggarantixxi li l-proċess, is-sorveljanza u t-trasparenza dovuti jiġu rrispettati u li l-interess pubbliku jiġi ssalvagwardjat tul il-proċess kollu li jinkludi l-proposta, l-iżvilupp u l-adozzjoni tal-istandard internazzjonali għall-awdituri fil-qafas tal-Federazzjoni Internazzjonali tal-Kontabilisti. Dan jibqa’ ta’ importanza kritika, kif juru wkoll l-iskandli riċenti tal-awditjar (pereżempju l-falliment ta’ Carillion fir-Renju Unit).

Il-PIOB japprova wkoll in-nomini tal-membri tal-bordijiet tal-istipular tal-istandards, jaqbel mal-istrateġiji u l-pjanijiet ta’ ħidma tagħhom, jimmonitorja l-iżvilupp tal-istandards u jivverifika li l-elementi kollha msemmija fil-konsultazzjonijiet pubbliċi jitqiesu kif xieraq. Fejn meħtieġ, il-PIOB jirrakkomanda passi biex jiżgura li l-istandards jirrispondu b’mod effettiv għall-interess pubbliku.

Fl-2018, il-PIOB 13 ikkomunika regolarment mal-bordijiet tal-istipular tal-Istandards taħt is-sorveljanza tiegħu (il-Bord tal-Istandards Internazzjonali tal-Awditjar u l-Aċċertament (IAASB); il-Bord tal-Istandards Internazzjonali tal-Edukazzjoni tal-Kontabbiltà (IAESB) u l-Bord tal-Istandards Internazzjonali tal-Etika għall-Kontabilisti (IESBA), it-tliet Gruppi Konsultattivi ta’ Konsulenza tagħhom, il-Bord Konsultattiv tal-Konformità u l-Kumitat Nominattiv u t-tmexxija tal-IFAC.

Il-PIOB ipparteċipa wkoll b’mod attiv fid-diskussjonijiet tal-Grupp ta’ Monitoraġġ dwar ir-riforma tal-mudell attwali tal-governanza u tas-sorveljanza tal-istandards internazzjonali relatati mal-awditjar u kkontribwixxa għall-iżvilupp ta’ “Qafas ta’ Interess Pubbliku” li għandu l-għan li jipprovdi mekkaniżmu aħjar għall-valutazzjoni ta’ kif l-interess pubbliku jiġi kopert matul il-proċess li fih jiġu stipulati l-istandards. Ir-riforma prevista kienet is-suġġett ta’ konsultazzjoni pubblika estensiva 14 mill-Grupp ta’ Monitoraġġ u l-feedback 15 juri appoġġ wiesa’ fost il-partijiet ikkonċernati għar-riforma sabiex jiżdiedu l-akkontabbiltà u t-trasparenza meta jiġu stipulati l-istandards relatati mal-awditjar. Hemm ukoll appoġġ mill-gruppi tal-partijiet ikkonċernati kollha għal qafas ta’ interess pubbliku li jkun inkorporat fil-proċess tal-istipular tal-istandards kollha.

Il-kisbiet ewlenin matul is-sena kienu l-approvazzjoni tal-“ISA 540, L-Awditjar ta' Stimi Kontabilistiċi, Inkluż Stimi Kontabilistiċi ta’ Valur Ġust, u Divulgazzjonijiet Relatati, il-ħruġ tal-Kodiċi ta’ Etika Ristrutturat u Rivedut, u t-tlestija tal-aħħar biċċa tiegħu: Inċentivi. L-istandards kollha approvati mill-PIOB fl-2018 jidhru fit-tabella hawn taħt.

4.2.Il-governanza u l-akkontabbiltà

Il-membri tal-PIOB huma maħtura mill-Grupp ta’ Monitoraġġ li huwa fl-aħħar mill-aħħar responsabbli għall-arranġamenti kumplessivi tal-governanza fil-qasam tal-istandards internazzjonali tal-awditjar, l-assigurazzjoni, l-etika u l-edukazzjoni.

Il-Grupp ta’ Monitoraġġ, li l-Kummissjoni Ewropea hija membru tiegħu, jimmonitorja kif il-PIOB iwettaq ir-rwol tiegħu ta’ interess pubbliku b’attenzjoni partikolari għas-sorveljanza tal-PIOB tal-proċess għall-istipular tal-istandards.

Fir-rigward ta’ sitwazzjoni potenzjali ta’ kunflitti ta’ interess, il-membri tal-PIOB u l-persunal jeħtieġ li jikkonformaw mal-Kodiċi ta’ Kondotta tal-PIOB. L-ewwel prinċipju tal-Kodiċi ta’ Kondotta tal-PIOB jgħid li l-membri tal-Bord u l-persunal ma għandhom jiġu involuti fl-ebda kwistjoni li fir-rigward tagħha l-ġudizzju tagħhom jista’ jiġi affettwat minn kunflitt ta’ interess. Kull sena, kull membru tal-Bord jiffirma dikjarazzjoni ta’ nuqqas ta’ kunflitti ta’ interess. Fl-2018, ma ġie rrapportat l-ebda kunflitt ta’ interess minn l-ebda membru tal-Bord tal-PIOB.

Il-Kodiċi jirrikjedi wkoll li l-membri tal-Bord u l-persunal jaġixxu b’mod li jkun jaqbel mal-istatus tagħhom bħala membri ta’ organizzazzjoni internazzjonali li hija ffokata fuq il-protezzjoni tal-Interess Pubbliku billi jaġixxu b’mod konsistenti b’integrità, imparzjalità u diskrezzjoni.

4.3.L-iżviluppi fid-diversifikazzjoni tal-finanzjament fl-2018

Il-finanzjament tal-PIOB huwa mfassal biex jippreserva l-indipendenza tiegħu fil-fatt u fid-dehra. Biex jintlaħaq l-objettiv ta’ interess pubbliku, id-diversifikazzjoni xierqa ta’ sorsi stabbli ta’ finanzjament tgħin mhux biss biex tinżamm il-kontinwità tiegħu iżda wkoll biex tiġi garantita l-indipendenza tal-PIOB. L-importanza tad-diversifikazzjoni tal-finanzjament diġà kienet ġiet rikonoxxuta fir-riforma tal-IFAC (Federazzjoni Internazzjonali tal-Kontabilisti) tal-2003 li kienet wasslet biex tinħoloq is-sistema tal-istipular tal-istandards internazzjonali attwali, inkluż il-PIOB.

Sa mill-ħolqien tiegħu fl-2005 sal-2010, meta l-programm ta’ finanzjament Komunitarju stabbilit bid-Deċiżjoni 716/2009/KE daħal fis-seħħ, il-PIOB ġie ffinanzjat esklussivament mill-IFAC (minbarra xi kontribuzzjoni in natura minn Spanja (jiġifieri l-kiri tal-uffiċċju ta’ Madrid, li fl-2018 ġie vvalutat li jiswa EUR 128 154).

Il-fondi magħmula disponibbli mill-IFAC f’sena partikolari jikkostitwixxu l-kontribuzzjoni massima garantita li tkun disponibbli għall-PIOB mingħajr l-ebda interferenza oħra mill-IFAC. Il-kontribuzzjonijiet li mhux ġejjin mill-IFAC jissostitwixxu, u għalhekk inaqqsu, il-kontribuzzjonijiet tal-IFAC għal dik is-sena speċifika. Idealment il-porzjon ta’ finanzjament mill-IFAC tal-ispejjeż annwali totali tal-PIOB għandu jkun inqas minn nofs it-total, iżda kien diffiċli ħafna li jinstabu sponsors pubbliċi oħra.

L-UE hija t-tieni l-akbar donatur għall-PIOB. Fis-sena 2017, id-dħul tal-PIOB (kontribuzzjonijiet monetarji u in natura) ammonta għal EUR 1 784 154. L-IFAC ipprovda EUR 1 059 807 jew 59,40 %, filwaqt li l-kontribuzzjoni tal-UE kienet ta’ EUR 325 000 jew 18,21 %

Fis-sena 2018, id-dħul tal-PIOB (kontribuzzjonijiet monetarji u in natura) ammonta għal EUR 1 825 620 u l-kontribuzzjoni tal-UE kienet ta’ EUR 331 000 jew 18,13 %. L-IFAC ikkontribwixxa EUR 1 135 302 jew 62,18 %.

It-tqassim tal-kontribuzzjonijiet monetarji tal-organizzazzjonijiet huwa rrapportat fl-Appendiċi 5.

L-Artikolu 9.5 tar-Regolament jistipula li jekk il-finanzjament mill-IFAC f’sena partikolari jilħaq aktar minn żewġ terzi tal-ammont totali tal-finanzjament annwali tal-PIOB, il-Kummissjoni trid tipproponi li l-kontribuzzjoni annwali tagħha għal dik is-sena tkun limitata għal massimu ta’ EUR 300 000. Fis-sena 2018 (bħal fl-2014 u fl-2016), dan ma kienx il-każ. Għalhekk, peress li l-limitu kritiku stipulat fir-Regolament (66,66 %) ma ntlaħaqx mill-finanzjament tal-IFAC, il-Kummissjoni ma għandhiex għalfejn tirrevedi l-kontribuzzjoni tagħha tal-2018 lill-PIOB.

5.Konklużjonijiet

Fl-2018, il-programm ta’ finanzjament tal-Unjoni jibqa’ kompletament ġustifikat fil-kuntest tal-isforzi tal-UE biex tiġi stabbilita Unjoni tas-Swieq Kapitali u biex tiġi ssalvagwardjata l-istabbiltà finanzjarja. It-tliet benefiċjarji (l-EFRAG, l-IFRSF u l-PIOB) kienu konformi mal-programm ta’ ħidma annwali stabbilit fl-anness għad-Deċiżjoni ta’ Implimentazzjoni tal-Kummissjoni tal-2018. F’dan il-punt m’hemm l-ebda raġuni biex jitqajjem dubju dwar ir-rilevanza tal-programm għall-perjodu li jifdal mill-perspettiva finanzjarja attwali.

Fir-rigward tal-EFRAG, il-Kummissjoni apprezzat b’mod partikolari l-analiżi komprensiva tal-effetti mibdija mill-EFRAG sabiex tappoġġja l-parir ta’ approvazzjoni futura tiegħu dwar l-IFRS 17 Kuntratti tal-Assigurazzjoni u r-rwol ewlieni tiegħu li jinfluwenza d-diskussjoni dwar Strumenti Finanzjarji b’Karatteristiċi ta’ Ekwità fl-IASB. Barra minn hekk, il-ħolqien tal-Laboratorju Ewropew ta’ Rapportar Korporattiv fuq talba tal-Kummissjoni jirrappreżenta estensjoni loġika tal-mandat tiegħu biex jipprovdi kontributi siewja lill-Kummissjoni Ewropea dwar l-aħjar prattiki fir-rigward tar-rapportar mhux finanzjarju.

Fir-rigward tal-Fondazzjoni tal-IFRS, il-Bord tal-Istandards Internazzjonali tal-Kontabbiltà ħa azzjonijiet biex jindirizza t-tħassib li jirriżulta mill-fażi ta’ qabel l-implimentazzjoni tal-IFRS 17 permezz ta’ differiment tad-data tal-implimentazzjoni u emendi mmirati lejn l-istandard. Fir-rigward ta’ divulgazzjonijiet dwar is-sostenibbiltà u t-trasparenza fiskali, il-Fondazzjoni qiegħda jxaqleb lejn approċċ mhux vinkolanti bħala parti mill-proġett tagħha dwar Kummentarji tal-Maniġment għar-rapporti finanzjarji. Fl-aħħar nett, id-diżaggregazzjoni tal-finanzjament tal-2018 tal-Fondazzjoni jenfasizza li d-differenza bejn il-kontribuzzjonijiet finanzjarji u r-rappreżentazzjoni ta’ ġurisdizzjonijiet fi ħdan il-bord ta’ Fiduċjarji u l-bord tal-IASB kompliet titwessa’ minn sitwazzjoni diġà żbilanċjata b’sehem speċjalment baxx ta’ finanzjament mir-reġjun tal-“Kontinent Amerikan” li fl-2018 kompla jonqos b’10 %.

Il-funzjoni indipendenti ta’ sorveljanza tal-PIOB teżisti biex tipprovdi aċċertament lill-investituri u lil oħrajn li l-istipular tal-istandards relatati mal-awditjar seħħ fl-interess pubbliku. Għalkemm il-kompożizzjoni u r-rwol tal-PIOB x’aktarx li se jiżviluppaw fis-snin li ġejjin skont il-proċess ta’ riforma mniedi mill-Grupp ta’ Monitoraġġ, is-sorveljanza indipendenti se tibqa’ waħda mill-karatteristiċi ewlenin ta’ kwalunkwe mudell ta’ governanza futur. Barra minn hekk, sadanittant l-isforzi biex jiġi diversifikat il-finanzjament tal-PIOB għandhom ikomplu.

Appendiċi 1 — Sommarju tal-attivitajiet tal-IFRS fl-2018

Appendiċi 2 — Diżaggregazzjoni tal-finanzjament tal-2018 tal-Fondazzjoni tal-IFRS

Sors: Il-Fondazzjoni tal-IFRS

Appendiċi 3 — Diżaggregazzjoni tal-finanzjament tal-2018 tal-EFRAG

Sors: EFRAG

Appendiċi 4 : Informazzjoni dwar il-bilanċ bejn il-ġeneri fl-EFRAG fil-31 ta’ Diċembru 2018

Sors: EFRAG

Appendiċi 5

Diversifikazzjoni tal-Baġit tal-PIOB

Fl-2012, il-PIOB wettaq eżerċizzju ta’ ġbir ta’ fondi b’koordinazzjoni mill-qrib mal-Grupp ta’ Monitoraġġ u l-IFAC. B’konsegwenza ta’ dan, fis-snin ta' wara, il-PIOB kiseb bażi ta’ finanzjament diversifikata li tinkludi sorsi oħra minbarra l-IFAC. Fl-2018, il-PIOB irċieva kontribuzzjonijiet li ammontaw għal EUR 1 636 302 mill-kontributuri li ġejjin:

·Federazzjoni Internazzjonali tal-Kontabilisti: EUR 1 135 302

·Kummissjoni Ewropea: EUR 331 000

·Organizzazzjoni Internazzjonali tal-Kummissjonijiet tat-Titoli (IOSCO) EUR 100 000

·Kunsill għar-Rapportar Finanzjarju: EUR 40 000

·Bank għall-Ħlasijiet Internazzjonali: EUR 30 000

Anness

Valutazzjoni interim tal-programm

1.Sommarju eżekuttiv

Dan l-anness jirrappreżenta valutazzjoni interim tal-programm ta’ finanzjament għall-appoġġ ta’ attivitajiet speċifiċi fil-qasam tar-rapportar finanzjarju u tal-awditjar. Huwa jivvaluta l-progress tal-programm lejn l-objettivi tiegħu matul il-perjodu 2014-2019.

Jivvaluta l-pertinenza u l-koerenza kumplessiva tal-Programm, l-effettività tal-eżekuzzjoni tiegħu u l-effettività kumplessiva u individwali tal-programm ta’ ħidma tal-benefiċjarji f’termini tal-ilħuq tal-objettiv imsemmi fl-Artikolu 2 tar-Regolament 258/2014 biex jittejbu l-kundizzjonijiet għal funzjonament effiċjenti tas-suq intern billi jiġi appoġġjat l-iżvilupp trasparenti u indipendenti ta’ standards internazzjonali tar-rapportar finanzjarju u tal-awditjar.

Il-valutazzjoni ssib li l-programm ta’ finanzjament ikkontribwixxa għall-objettiv maħsub matul il-perjodu li qed jiġi rieżaminat u jibqa’ kemm rilevanti fid-dawl tal-bidliet fil-qafas Ewropew għar-rapportar korporattiv kif ukoll konsistenti ma’ prijoritajiet politiċi oħrajn segwiti mill-Unjoni Ewropea.

Madankollu, il-valutazzjoni interim tidentifika wkoll sfidi ġodda li tfaċċaw bħala parti mill-Pjan ta’ Azzjoni Ewropew dwar il-Finanzjament tat-Tkabbir Sostenibbli, li se jirrikjedu skrutinju aktar strett tal-impatti fuq is-sostenibbiltà bħala parti mill-attivitajiet ta’ approvazzjoni tal-EFRAG. Dan biex jikkumpensa għall-fatt li l-Fondazzjoni tal-IFRS tillimita l-kunsiderazzjonijiet tagħha fuq l-istipular tal-istandards IFRS għar-rapportar tal-prestazzjoni finanzjarja mingħajr valutazzjoni obbligatorja tal-impatt usa’ tal-IFRS fuq l-ekonomija, jew is-sostenibbiltà.

Il-valutazzjoni interim tosserva li dan l-objettiv politiku ġdid diġà wessa’ l-kamp ta’ applikazzjoni tal-attivitajiet ta’ approvazzjoni u ta’ riċerka tal-EFRAG li reċentement wettaq żewġ proġetti ad hoc kbar fuq talba tal-Kummissjoni sabiex jivvaluta l-konsegwenzi tal-istandards IFRS fuq l-investmenti ta’ ekwità fit-tul u jidentifika t-titjib possibbli sabiex titrawwem il-perspettiva fit-tul fl-imġiba tal-investiment. Fir-rigward tal-PIOB, is-servizzi tal-Kummissjoni jiġbdu l-attenzzjoni dwar il-ħtieġa li wieħed jasal għal bażi ta’ fondi aktar diversifikata.

Bħala konklużjoni, is-Servizzi tal-Kummissjoni sabu li l-kofinanzjament attwali tal-UE, s’issa, laħaq l-aspettattivi u għandu jitkompla fil-qafas finanzjarju pluriennali li jmiss tal-2021-2027. Dan għandu jiżgura b’mod speċjali finanzjament xieraq biex l-EFRAG ikun jista’ jwettaq il-missjoni addizzjonali ġdida tiegħu dwar is-sostenibbiltà.

2.Daħla

2.1.Għan tal-valutazzjoni interim

L-Artikolu 9(8) tar-Regolament 258/2014 jirrikjedi li l-Kummissjoni tippreżenta lill-Parlament Ewropew u lill-Kunsill rapport dwar il-kisbiet tal-Programm tal-Unjoni biex tappoġġja attivitajiet speċifiċi fil-qasam tar-rapportar finanzjarju u tal-awditjar għall-perjodu 2014-2020. Ir-rapport għandu jivvaluta mill-inqas il-pertinenza u l-koerenza kumplessiva tal-programm, l-effettività tal-eżekuzzjoni tiegħu u l-effettività kumplessiva u individwali tal-programmi ta’ ħidma tal-benefiċjarji fl-appoġġ għall-iżvilupp trasparenti u indipendenti ta’ standards internazzjonali tar-rapportar finanzjarju u tal-awditjar.

2.2.Il-Programm tal-Unjoni Ewropea għall-appoġġ ta’ attivitajiet speċifiċi fil-qasam tal-awditjar u r-rapportar finanzjarju

Il-programm qed jikkofinanzja l-attivitajiet ta’ tliet organizzazzjonijiet: il-Fondazzjoni għall-Istandards Internazzjonali tar-Rapportar Finanzjarju (Fondazzjoni tal-IFRS), il-Grupp Konsultattiv Ewropew għar-Rapportar Finanzjarju (EFRAG) u l-Bord tas-Sorveljanza tal-Interess Pubbliku (PIOB). Huwa jikkontribwixxi għall-kisba tal-objettivi politiċi tal-Unjoni fir-rigward tar-rapportar finanzjarju u tal-awditjar. Il-Fondazzjoni tal-IFRS tiżviluppa standards internazzjonali tar-rapportar finanzjarju (IFRSs) permezz tal-Bord dwar l-Istandards Internazzjonali tal-Kontabbiltà (IASB) tagħha, filwaqt li l-EFRAG jipprovdi lill-Kummissjoni Ewropea parir ta’ approvazzjoni dwar standards ġodda jew modifikati u jimmonitorja l-attivitajiet tal-istipular tal-istandards imwettqa mill-IASB biex jiżgura li jiġu ssalvagwardjati l-interessi Ewropej. Il-PIOB iwettaq sorveljanza ta’ tliet Bordijiet tal-Istipular tal-Istandards appoġġjati mill-Federazzjoni Internazzjonali tal-Kontabilisti (IFAC) fl-oqsma tal-awditjar u l-assigurazzjoni, l-edukazzjoni u l-etika.

Fil-qasam tar-rapportar finanzjarju, il-programm jikkomplementa r-Regolament tal-IAS, li jirrikjedi li kumpaniji b’titoli elenkati f’suq regolat tal-UE jħejju r-rapporti finanzjarji kkonsolidati tagħhom skont l-Istandards Internazzjonali tar-Rapportar Finanzjarju.

Il-programm għandu pakkett finanzjarju ta’ EUR 57 007 000 għall-perjodu 2014-2020, imqassam kif ġej:

§Il-Fondazzjoni tal-IFRS:    EUR 31 632 000

§EFRAG:        EUR 23 134 000

§PIOB:            EUR 2 241 000

Il-finanzjament huwa pprovdut lit-tliet benefiċjarji permezz ta’ għotjiet operattivi li huma implimentati permezz ta’ ġestjoni diretta bi programmi ta’ ħidma annwali.

2.3.Objettivi tal-programm

Fil-qasam tar-rapportar finanzjarju, l-objettivi operattivi ewlenin deskritti fil-premessi tar-Regolament 258/2014 li jistabbilixxi l-programm jinkludu:

§L-iżgurar tal-komparabbiltà u t-trasparenza tal-kontijiet tal-kumpaniji madwar l-Unjoni kollha;

§It-trawwim tal-konverġenza tal-istandards tal-kontabbiltà użati internazzjonalment bl-objettiv aħħari li jintlaħaq sett wieħed ta’ standards tal-kontabbiltà;

§L-iżgurar li l-interessi tal-Unjoni jitqiesu b’mod adegwat fil-proċess internazzjonali għall-istipular tal-istandards. Dawk l-interessi għandhom jinkludu l-kunċett ta’ prudenza, iż-żamma tar-rekwiżit ta’ stampa vera u ġusta u jqisu l-impatt tal-istandards fuq l-istabbiltà finanzjarja u l-ekonomija.

§Żieda fl-indipendenza finanzjarja tal-benefiċjarji mis-settur privat u minn sorsi ad hoc, biex b’hekk tiżdied il-kapaċità u l-kredibbiltà tagħhom.

§Sorveljanza tal-proċess li jwassal għall-adozzjoni ta’ Standards Internazzjonali tal-Awditjar u attivitajiet oħra ta’ interess pubbliku tal-Federazzjoni Internazzjonali tal-Kontabilisti.

§It-trawwim tat-trasparenza u l-involviment tal-partijiet ikkonċernati fil-proċess għall-istipular tal-istandards u l-proċess ta’ approvazzjoni 17 .

2.4.Implimentazzjoni tal-Programm tal-Unjoni

Il-Kummissjoni hija responsabbli għall-kontenut tal-programmi ta’ ħidma tal-Programm tal-Unjoni Ewropea biex tappoġġja attivitajiet speċifiċi fil-qasam tal-awditjar u tar-rapportar finanzjarju.

Madankollu, skont il-kostituzzjoni tal-Fondazzjoni tal-IFRS, il-Bord tal-Istandards Internazzjonali tal-Kontabbiltà għandu diskrezzjoni sħiħa fl-iżvilupp u t-twettiq tal-aġenda teknika tiegħu soġġett għall-konsultazzjoni mal-Fiduċjarji u mal-Kunsill Konsultattiv tal-Fondazzjoni u għat-twettiq ta’ konsultazzjoni pubblika kull ħames snin. Dan jimplika li l-Kummissjoni Ewropea tista’ biss issegwi l-programm ta’ ħidma stabbilit mill-IASB.

Kull sena, il-Kummissjoni timmonitorja l-implimentazzjoni tal-programm tal-Unjoni kif ukoll l-użu tal-għotjiet mogħtija, billi:

(I)Tħejji rapporti annwali dwar l-attivitajiet tal-Fondazzjoni tal-IFRS għall-benefiċjarji, l-EFRAG u l-PIOB u

(II)Tieħu deċiżjonijiet finanzjarji annwali, li jipprovdu valutazzjoni tal-programmi ta’ ħidma tal-benefiċjarji bbażati fuq ir-regoli dettaljati stabbiliti mill-Artikolu 110 tar-Regolament (UE, Euratom) 2018/1046 (“ir-Regolament Finanzjarju”),

3.Il-kamp ta’ applikazzjoni tal-valutazzjoni interim

Il-valutazzjoni interim tindirizza l-mistoqsijiet li ġejjin skont l-Artikolu 9.8 tar-Regolament 258/2014:

·Effettività: kemm kellhom suċċess il-programm kumplessiv u l-programm ta’ ħidma ta’ kull benefiċjarju individwali fil-kisba jew fil-progress lejn l-objettivi tagħhom?

·Pertinenza: l-objettivi tal-programm għadhom rilevanti, kemm f’termini ta’ kompletezza (ħtiġijiet ġodda), jew ta’ preċiżjoni (bidliet fi, jew għajbien ta’ ħtiġijiet)?

·Koerenza: sa liema punt il-programm huwa konsistenti ma’ politiki oħra tal-UE, jew hemm xi inkonsistenzi bejn l-attivitajiet imwettqa mill-benefiċjarji?

Il-valutazzjoni kienet ibbażata fuq is-sorsi ta’ data li ġejjin:

·rapporti annwali kif ukoll dokumenti ta’ sostenn li l-benefiċjarji jipprovdu lill-Kummissjoni Ewropea fuq bażi annwali;

·id-data u l-input miġbura mill-Kummissjoni fid-diversi laqgħat tal-Bord Superviżorju, fejn il-Kummissjoni tipparteċipa bħala osservatur, biex jiġu diskussi u ċċarati kwistjonijiet ta’ finanzjament;

·ir-rapporti finanzjarji u r-rapporti tal-awditur tal-benefiċjarji;

·saru żjarat fil-postijiet tat-tliet benefiċjarji sabiex jiġu vverifikati s-sistemi u l-kontrolli finanzjarji.

·kontroll li ser isir tal-idoneità tal-qafas tal-UE għar-rapportar pubbliku mill-kumpaniji fl-2019

·evalwazzjoni tar-Regolament 1606/2002 (“ir-Regolament tal-IAS”) fl-2015 18

·evalwazzjoni ex-ante tal-Programm tal-Unjoni fl-2012 19 .

Approċċ

Din il-valutazzjoni ssegwi r-rekwiżiti tal-Artikolu 9.8 tar-Regolament 258/2014. Din tkopri l-perjodu mill-2014 sal-2019, iżda mhux il-perjodu li jifdal (jiġifieri sal-aħħar tal-2020).

Ir-rapport jadotta approċċ retrospettiv. Din ma tqisx alternattivi ta’ politika possibbli. Dan sar bħala parti mill-valutazzjoni tal-impatt li tappoġġja l-Proposta tal-Kummissjoni għal Programm għas-Suq Uniku 2021-2027 20 .

4.Ir-riżultati tal-valutazzjoni

4.1.L-effettività tal-programm kumplessiv

Filwaqt li fir-rapporti annwali tal-Kummissjoni jingħataw valutazzjonijiet dettaljati tal-progress, din it-taqsima għandha l-għan li tipprovdi għarfien dwar jekk l-attivitajiet tal-Fondazzjoni tal-IFRS, l-EFRAG u l-PIOB baqgħux jikkontribwixxu biex jintlaħqu l-objettivi tal-programm matul il-perjodu evalwat.

Sejbiet ewlenin

Il-programm ta’ finanzjament ippermetta li t-tliet benefiċjarji jiżviluppaw standards li jtejbu t-trasparenza u l-komparabbiltà tal-informazzjoni finanzjarja dwar l-istrumenti finanzjarji, ir-rikonoxximent tad-dħul u l-kuntratti ta’ lokazzjoni. Il-proġett li għaddej “Komunikazzjoni Aħjar” tal-Fondazzjoni tal-IFRS huwa eżempju biex titjieb aktar il-komparabbiltà billi tissaħħaħ il-konsistenza fid-definizzjoni ta’ indikaturi ewlenin tal-prestazzjoni u fil-preżentazzjoni ta’ rapporti finanzjarji.

Il-programm ikkontribwixxa għall-aċċettazzjoni globali tal-IFRS bħala sett ta’ referenza ta’ standards tal-kontabbiltà ta’ kwalità għolja.

L-EFRAG ipprovda lill-Kummissjoni Ewropea parir ta’ approvazzjoni kwalitattiv dwar standards ġodda jew modifikati u jimmonitorja l-attivitajiet tal-istipular tal-istandards, imwettqa mill-IASB biex jiġu ssalvagwardjati l-interessi Ewropej. F’dak ir-rigward il-programm tal-Unjoni kkontribwixxa għat-tisħiħ tal-kapaċità tal-EFRAG li jwettaq valutazzjonijiet tal-impatt fl-UE kollha tal-konsegwenzi ekonomiċi usa’ ta’ standards IFRS ġodda.

Fir-rigward tal-indipendenza finanzjarja tal-benefiċjarji, id-diversifikazzjoni tal-finanzjament tagħhom żiedet il-kredibbiltà u l-kapaċità teknika tagħhom. Madankollu, l-objettiv li jiġu żgurati reġimi nazzjonali ta’ finanzjament proporzjonati mal-prodott domestiku gross ta’ pajjiż biex tiġi ffinanzjata l-Fondazzjoni tal-IFRS ma ntlaħaqx. L-implimentazzjoni tar-riforma ta’ Maystadt wessgħet il-kostitwenza tal-EFRAG u kkontribwixxiet għal koordinazzjoni aħjar bejn il-partijiet ikkonċernati Ewropej fil-qasam tar-rapportar finanzjarju.

Il-benefiċjarji IFRSF u EFRAG implimentaw regoli robusti ta’ proċessi dovuti u jinsabu fit-triq it-tajba biex jistabbilixxu reġistri ta’ trasparenza.

Fir-rigward tal-PIOB, l-għotja tal-UE għenet biex tattira sponsors pubbliċi oħra u biex jiġi żgurat livell minimu ta’ indipendenza mill-IFAC u l-professjoni tal-awditjar.

4.2.Effettività individwali tal-benefiċjarji

Il-Fondazzjoni tal-IFRS

4.2.1.Kisbiet ewlenin tal-Fondazzjoni tal-IFRS

Wara konsultazzjoni pubblika, il-Programm ta’ Ħidma 2015-2020 stabbilit mill-Bord tal-Istandards Internazzjonali tal-Kontabbiltà jimmira li jtejjeb u jappoġġja l-implimentazzjoni tal-istandards eżistenti u jsaħħaħ il-mod kif l-informazzjoni tiġi ddivulgata fir-rapporti finanzjarji. Matul il-perjodu ta’ bejn l-2014 u l-2018, il-Fondazzjoni tal-IFRS ħarġet erba’ standards ewlenin inklużi: l-IFRS 15 - Dħul minn Kuntratti ma’ Klijenti, l-IFRS 9 - Strumenti Finanzjarji, l-IFRS 16 - Lokazzjonijiet u l-IFRS 17 - Kuntratti tal-Assigurazzjoni. Barra minn hekk, f’Diċembru 2018, fuq il-bażi tat-tassonomija miżmuma mill-Fondazzjoni tal-IFRS, il-Kummissjoni Ewropea adottat l-Istandard Tekniku Regolatorju dwar l-ispeċifikazzjoni ta’ format uniku Ewropew għar-rapportar elettroniku (ESEF) li mill-2020 ’il quddiem jirrikjedi li l-emittenti tat-titoli elenkati f’suq regolat tal-UE jħejju r-Rapporti Finanzjarji tagħhom f’format iXBRL.

4.2.2.Kemm kienet effettiva l-Fondazzjoni tal-IFRS biex tikseb jew tagħmel progress lejn l-objettivi intenzjonati s’issa?

Sejbiet ewlenin

L-iżgurar tal-komparabbiltà u tat-trasparenza tal-kontijiet tal-kumpaniji madwar l-Unjoni kollha

Ir-rapport tal-2015 mill-Kummissjoni lill-Parlament Ewropew u lill-Kunsill dwar l-evalwazzjoni tar-Regolament Nru 1606/2002 (ir-“Regolament tal-IAS”), ikkonkluda li l-introduzzjoni tal-IFRS fl-Unjoni Ewropea żiedet it-trasparenza tar-rapporti finanzjarji permezz ta’ kwalità u divulgazzjonijiet imtejba u wasslet għal komparabbiltà akbar bejn ir-rapporti finanzjarji fl-industriji u bejniethom.

Matul il-perjodu ta’ bejn l-2014 u l-2018, il-Fondazzjoni tal-IFRS ħarġet standards ewlenin u segwiet proġetti ta’ riċerka mfassla biex itejbu l-komparabbiltà u t-trasparenza tar-rapporti finanzjarji tal-IFRS.

L-IFRS 15 Dħul minn Kuntratti ma’ klijenti nħareġ f’Mejju 2014 u ġie emendat fl-2015 sabiex jipprovdi kjarifiki addizzjonali u jiffaċilita l-implimentazzjoni operattiva tiegħu. L-istandard inizjali ġie żviluppat b’mod konġunt mal-Bord tal-Istandards tal-Kontabbiltà Finanzjarja tal-Istati Uniti bil-għan li jiġi ssimplifikat mudell wieħed għar-rikonoxximent tad-dħul applikabbli għall-kuntratti kollha mal-klijenti u jiġu ċċarati r-rekwiżiti tal-istandards preċedenti IAS 8 Dħul u IAS 11 Kuntratti tal-kostruzzjoni billi tiġi introdotta gwida addizzjonali għall-implimentazzjoni. L-istandard ilu applikabbli fl-Ewropa mill-1 ta’ Jannar 2018 u huwa mistenni li jsaħħaħ il-komparabbiltà bejn l-IFRS u l-GAAP tal-Istati Uniti filwaqt li jtejjeb l-implimentazzjoni konsistenti mill-kumpaniji permezz tal-gwida għall-implimentazzjoni.

L-IFRS 9 Strumenti Finanzjarji huwa mfassal biex itejjeb it-trattament kontabilistiku tal-istrumenti tas-self u biex jiżgura rikonoxximent f’waqtu tat-telf ta’ kreditu mistenni billi jiġi implimentat mudell ta’ indeboliment li jħares ’il quddiem. Dan għandu wkoll l-għan li jallinja aħjar ir-rekwiżiti tal-kontabbiltà għall-iħħeġġjar mal-prattiki tal-immaniġġjar tar-riskju tal-kumpaniji filwaqt li jtejjeb ukoll id-divulgazzjonijiet. Dan huwa mistenni li jnaqqas l-informazzjoni mhux skont il-GAAP u li jtejjeb it-trasparenza dwar l-użu ta’ strumenti finanzjarji għall-fini tal-mitigazzjoni tar-riskji. L-istandard huwa applikabbli għal perjodu annwali li jibda wara l-1 ta’ Jannar 2018.

L-IFRS 16 Kuntratti ta’ Lokazzjoni jespandi b’mod sinifikanti l-kamp ta’ applikazzjoni tal-kuntratti ta’ lokazzjoni li għalihom huwa meħtieġ rikonoxximent separat tal-assi u l-obbligazzjonijiet tal-lokazzjoni fir-rapporti finanzjarji tal-lokatorju. L-istandard ġie mfassal bil-għan li tissaħħaħ il-komparabbiltà tal-ingranaġġ finanzjarju bejn il-kumpaniji u t-trasparenza tal-flussi tal-flus li jirriżultaw mill-kuntratti ta’ lokazzjoni. L-applikazzjoni obbligatorja fl-Ewropa bdiet fl-1 ta’ Jannar 2019.

L-IFRS 17 Kuntratti tal-Assigurazzjoni għandhom l-għan li jipprovdu trattament kontabilistiku armonizzat għall-kuntratti tal-assigurazzjoni u b’hekk itejbu b’mod sinifikanti l-komparabbiltà tar-rapporti finanzjarji bejn il-kumpaniji tal-assigurazzjoni u tar-riassigurazzjoni. L-istandard jirrikjedi wkoll l-użu ta’ stimi attwali u r-rikonoxximent f’waqtu ta’ telf mistenni bil-għan li tissaħħaħ it-trasparenza dwar l-assigurazzjoni u r-riskji finanzjarji inkorporati fil-kuntratti tal-assigurazzjoni. Dan għandu wkoll l-għan li jissimplifika mudell għar-rikonoxximent tad-dħul simili għall-IFRS 15 sabiex titjieb il-komparabbiltà inkroċata bejn l-industriji.

Finalment bħala parti mill-proġett ta’ Komunikazzjoni Aħjar, il-Fondazzjoni tal-IFRS qiegħda tqis titjib possibbli għall-preżentazzjoni ta’ Rapporti Finanzjarji tal-IFRS sabiex titjieb il-komparabbiltà tal-indikaturi tal-prestazzjoni. Konsultazzjoni pubblika li tispjega l-proposti tal-IASB hija mistennija fl-2019.

Għalhekk, is-servizzi tal-Kummissjoni jivvalutaw li l-attivitajiet tal-istipular tal-istandards tal-Fondazzjoni tal-IFRS ikkontribwixxew għat-titjib tat-trasparenza u l-komparabbiltà tar-rapporti finanzjarji u b’hekk saħħew il-funzjonament effiċjenti tas-suq kapitali tal-UE.

It-trawwim tal-konverġenza tal-istandards tal-kontabbiltà użati internazzjonalment bl-objettiv aħħari li jintlaħaq sett wieħed ta’ standards tal-kontabbiltà

Mill-2014 sal-2018, l-użu u l-aċċettazzjoni internazzjonali tal-IFRS baqgħu jiżdiedu, bi tletin ġurisdizzjoni ġodda, prinċipalment mill-Afrika, li bdew jirrikjedu l-użu tal-IFRSs. L-istħarriġ tal-2018 li twettaq mill-Fondazzjoni tal-IFRS dwar l-użu tal-Istandards IFRS madwar id-dinja jenfasizza li minn 166 ġurisdizzjoni mistħarrġa, 87 % jirrikjedu l-użu tal-IFRS mill-inqas għall-kumpaniji li huma akkontabbli għall-pubbliku. Madankollu, xi swieq kapitali kbar (il-Ġappun, l-Istati Uniti) ma jirrikjedux l-IFRS iżda sempliċiment jippermettuhom għal emittenti nazzjonali jew barranin filwaqt li ġurisdizzjonijiet ewlenin oħrajn bħaċ-Ċina u l-Indja implimentaw biss programm ta’ konverġenza tal-istandards nazzjonali tal-kontabbiltà lejn l-IFRS li jista’ ma jiżgurax konsistenza sħiħa mal-istandards kif maħruġa mill-IASB. Barra minn hekk, għalkemm il-programm konġunt tal-istipular tal-istandards bejn l-IASB u l-FASB kiseb konverġenza sostanzjali fuq ir-rikonoxximent tad-dħul u l-kuntratti ta’ lokazzjoni, ma baqax jintuża għall-istrumenti finanzjarji u għall-kuntratti tal-assigurazzjoni.

B’konsegwenza ta’ dan, minkejja xi limitazzjonijiet, il-programm tal-Unjoni kkontribwixxa għall-aċċettazzjoni internazzjonali tal-IFRS bħala mudell ta’ referenza dinji għar-rapportar finanzjarju.

L-iżgurar li l-interessi tal-Unjoni jitqiesu b’mod adegwat fil-proċess tal-istipular tal-istandards internazzjonali. Dawk l-interessi għandhom jinkludu l-kunċett ta’ prudenza, iż-żamma tar-rekwiżit ta’ stampa vera u ġusta u jqisu l-impatt tal-istandards fuq l-istabbiltà finanzjarja u l-ekonomija.

Skont il-kostituzzjoni tal-Fondazzjoni tal-IFRS, il-Bord tal-Istandards Internazzjonali tal-Kontabbiltà għandu diskrezzjoni sħiħa fl-iżvilupp u t-twettiq tal-aġenda teknika tiegħu soġġett għall-konsultazzjoni tal-Fiduċjarji u tal-Kunsill Konsultattiv tal-Fondazzjoni u għat-twettiq ta’ konsultazzjoni pubblika kull ħames snin. L-Unjoni Ewropea hija rrappreżentata fil-Fondazzjoni tal-IFRS biss bħala membru tal-Bord ta’ Monitoraġġ u bħala osservatur tal-Kunsill Konsultattiv tal-Istandards li jimplika li ma għandha l-ebda influwenza diretta fl-għażliet tal-istipular tal-istandards.

B’konsegwenza ta’ dan, l-opinjonijiet tal-partijiet ikkonċernati Ewropej għandhom jiġu rrapportati skont il-proċeduri stabbiliti fil-Manwal ta’ Proċess Dovut (DPH) tal-Fondazzjoni tal-IFRS, li jirrikjedi b’mod speċjali li l-Bord tal-Istandards Internazzjonali tal-Kontabbiltà jikseb għarfien dwar l-effetti probabbli tal-proposti tiegħu għall-istipular tal-istandards u jippubblika analiżi tal-effetti għal kull abbozz ta’ espożizzjoni jew standard finali. Madankollu, ir-rekwiżiti tal-Manwal ta’ Proċess Dovut jiffokaw fuq it-titjib fir-rapportar finanzjarju u fuq il-valutazzjoni tal-kostijiet probabbli tal-konformità kemm għall-utenti kif ukoll għal dawk li jippreparaw, b’hekk ma jkoprux l-impatti usa’ tal-IFRS fuq l-istabbiltà finanzjarja, l-ekonomija, jew is-sostenibbiltà.

Fl-2013, il-Fondazzjoni tal-IFRS waqqfet korp konsultattiv (il-Grupp Konsultattiv għall-Analiżi tal-Effetti) biex jgħin lill-IASB isaħħaħ il-metodoloġija tiegħu għall-analiżi tal-effetti. F’dak ir-rigward, sar xi progress fl-“Analiżi tal-Effetti” u dan appoġġja l-ħruġ tal-IFRS 16 Lokazzjonijiet, li qies speċifikament it-tħassib ekonomiku dwar l-impatt tal-istandard fuq il-kost tas-self għall-kumpaniji, patti ta’ dejn (billi kkapitalizza fuq is-sejbiet minn studju mwettaq mill-EFRAG), ir-rekwiżiti kapitali regolatorji tal-banek u l-aċċess għall-finanzjament għal kumpaniji iżgħar. Fl-2019, il-Fondazzjoni tal-IFRS nediet konsultazzjoni pubblika bħala parti mir-rieżami tal-Manwal ta’ Proċess Dovut tagħha li jissuġġerixxi li għandu jiġi ċċarat li l-Analiżi tal-Effetti għandha tkun espliċitament inkorporata fil-proċess kollu tal-istipular tal-istandards tal-IASB u tqis il-benefiċċji probabbli ta’ standards IFRS ġodda fuq l-istabbiltà finanzjarja fit-tul. Madankollu, hija ma tirrikjedix li l-Bord jivvaluta l-konsegwenzi ekonomiċi usa’ possibbli jew konsegwenzi oħrajn ta’ bidla fir-rapportar finanzjarju.

Fir-rigward tal-prinċipju ta’ stampa vera u ġusta, f’Marzu 2018, l-IASB ħareġ il-Qafas Kunċettwali rivedut għar-Rapportar Finanzjarju li jipprovdi gwida mhux vinkolanti lill-Bord fl-iżvilupp tal-Istandards IFRS. Għalkemm mhux approvat mill-Unjoni Ewropea, il-Qafas Kunċettwali jiddefinixxi l-karatteristiċi kwalitattivi ta’ informazzjoni finanzjarja utli u għalhekk jipprovdi sfond kunċettwali li jwassal għall-prinċipju ta’ stampa vera u ġusta. Il-qafas rivedut jiċċara li l-informazzjoni pprovduta għandha tgħin lill-utenti biex jivvalutaw l-amministrazzjoni tal-maniġment tar-riżorsi ekonomiċi ta’ entità u jispeċifika li l-eżerċizzju tal-prudenza (definit bħala l-eżerċizzju ta’ kawtela meta jsiru ġudizzji f’kundizzjonijiet ta’ inċertezza) jappoġġja l-fedeltà tar-rapportar finanzjarju.

Żieda fl-indipendenza finanzjarja tal-benefiċjarji mis-settur privat u minn sorsi ad hoc, biex b’hekk tiżdied il-kapaċità u l-kredibbiltà tagħhom.

Il-finanzjament tal-Fondazzjoni tal-IFRS jinkiseb primarjament permezz ta’ kontribuzzjonijiet volontarji minn ġurisdizzjonijiet (normalment determinati bħala perċentwal tal-prodott domestiku gross) u minn ditti internazzjonali tal-kontabbiltà. Dan il-mekkaniżmu jiġġenera volatilità fid-dħul tal-Fondazzjoni. B’hekk l-istabbiltà tal-kontribuzzjonijiet totali rrapportati bejn l-2014 u l-2018 toskura tnaqqis sinifikanti tal-kontribuzzjonijiet mill-Istati Uniti (minn 15 % fl-2014 għal 6,1 % tal-finanzjament totali fl-2018) li parzjalment paċut minn żieda fl-appoġġ finanzjarju mill-Unjoni Ewropea (minn 13,5 għal 18,5 %) u miċ-Ċina (minn 8 sa 11 %).    Matul il-perjodu ta’ bejn l-2014 u l-2018, il-Fondazzjoni rrapportat b’mod kostanti qligħ pożittiv u b’hekk saħħet il-pożizzjoni finanzjarja tagħha b’riżerva akkumulata ta’ GBP 21 miljun. Hija żiedet ukoll b’mod sinifikanti d-dħul tagħha ġġenerat minnha stess mill-attivitajiet ta’ pubblikazzjoni u ta’ liċenzjar. Madankollu, għadha tiddependi fuq il-kontribuzzjonijiet min-netwerks internazzjonali tal-kontabbiltà biex tikseb pożizzjoni finanzjarja bilanċjata.

Titrawwem it-trasparenza u l-involviment tal-partijiet ikkonċernati fil-proċess għall-istipular tal-istandards u tal-proċess tal-approvazzjoni

Id-Dokument ta’ Ħidma tal-Persunal tal-Kummissjoni tal-2015 li jappoġġja r-rapport dwar l-evalwazzjoni tar-Regolament Nru 1606/2002 rigward l-applikazzjoni tal-Istandards Internazzjonali tal-Kontabilità, sab li l-Fondazzjoni tal-IFRS topera taħt proċeduri żviluppati sew u trasparenti fir-rigward tal-attivitajiet tagħha ta’ stipular ta’ standards 21 . Ħarsa ġenerali lejn il-proċeduri hija spjegata fir-rapport annwali mill-Kummissjoni dwar l-attivitajiet tal-Fondazzjoni tal-IFRS. Reviżjoni sinifikanti tal-Manwal ta’ Proċess Dovut tal-Fondazzjoni ġiet adottata fi Frar 2013.

Matul il-perjodu ta’ bejn l-2014 u l-2018, ir-rekwiżiti ta’ proċess dovut baqgħu sostanzjalment l-istess. Madankollu, l-IASB temm it-tieni u t-tielet rieżamijiet tiegħu ta’ wara l-implimentazzjoni tal-Istandards IFRS bl-IFRS 3 Kombinamenti ta’ Negozji u l-IFRS 13 Kejl tal-Valur Ġust. Ir-rieżamijiet enfasizzaw xi sfidi ta’ implimentazzjoni li joriġinaw mill-IFRS 3 speċjalment fir-rigward tal-kumplessità tal-kontabbiltà tal-avvjament kif ukoll xi tħassib dwar ir-rekwiżiti tad-divulgazzjoni fl-IFRS 13. Dawk is-sejbiet bħalissa huma indirizzati permezz ta’ proġetti ta’ riċerka mmirati inklużi fil-pjan ta’ ħidma tal-Fondazzjoni. Fl-2017, il-Fiduċjarji tal-Fondazzjoni tal-IFRS ikkummissjonaw studju estern dwar il-perċezzjoni tal-fondazzjoni mill-partijiet ikkonċernati. Ir-riżultati enfasizzaw valutazzjoni qawwija għall-indipendenza u għat-trasparenza tagħha 22 .

Fir-rigward tar-reġistri ta’ trasparenza, minn Diċembru 2019 il-Fondazzjoni tal-IFRS se tippubblika reġistru ta’ involviment tal-partijiet ikkonċernati kull tliet xhur. Ir-reġistru se jkopri l-involvimenti kollha ta’ aktar minn 30 minuta tal-Membri tal-Bord tal-IASB ma’ partijiet esterni.

EFRAG

4.2.3.Kisbiet ewlenin tal-EFRAG

Mill-2014 sal-2018, l-EFRAG implimenta r-riforma interna tiegħu f’konformità mar-rakkomandazzjoni mir-rapport Maystadt ta’ Ottubru 2013, li tlestiet f’Lulju 2016 bil-ħatra ta’ Jean-Paul Gauzes bħala President tal-Bord tal-EFRAG. L-EFRAG kompla jwettaq ukoll valutazzjonijiet ta’ approvazzjoni dwar jekk l-IFRS jissodisfawx il-kriterji tekniċi tar-Regolament tal-IAS, inkluż il-prinċipju ta’ stampa vera u ġusta, u saħħaħ ukoll il-valutazzjoni tiegħu dwar jekk ir-rekwiżiti ta’ rapportar finanzjarju ġodda jew proposti jwasslux għall-ġid pubbliku. B’mod partikolari, ta’ min isemmi l-kisbiet ewlenin li ġejjin:

·Ix-xogħol tal-EFRAG dwar il-parir ta’ approvazzjoni dwar l-IFRS 17 Kuntratti tal-assigurazzjoni sostnut minn analiżi tal-impatt fil-fond li tikkonsisti minn studju ta’ każ estensiv ma’ 11-il assiguratur; studju ta’ każ simplifikat ma’ 49 assiguratur; u sensibbilizzazzjoni tal-utent;

·parir ta’ approvazzjoni dwar l-IFRS 16 Lokazzjonijiet fl-2017;

·l-analiżi tal-impatt tal-EFRAG (bħala proġett pilota) tad-Dokument ta’ Diskussjoni tal-IASB Strumenti Finanzjarji b’Karatteristiċi ta’ Ekwità (FICE);

·Proġett ta’ Riċerka dwar il-konsegwenzi tal-IFRS 9 dwar investimenti ta’ terminu twil, u

·l-istabbiliment ta’ Laboratorju Ewropew f’Settembru 2018 biex fl-attivitajiet tiegħu u l-implikazzjoni tiegħu fl-iżviluppi fir-rapportar korporattiv, iqis id-diġitalizzazzjoni u ż-żoni finanzjarji sostenibbli.

Fl-2019, sal-lum, il-programm ta’ ħidma tal-EFRAG kien motivat l-aktar mill-aġenda tal-istipular ta’ standards tal-IASB. L-attività ta’ approvazzjoni tal-EFRAG tibqa’ importanti, speċjalment fid-dawl tad-deċiżjoni tal-IASB li jqis emendi fl-IFRS 17 li tirrikjedi li l-EFRAG joħroġ ittra ta’ kummenti dwar l-emendi filwaqt li jqis l-implikazzjonijiet fuq l-abbozz tiegħu ta’ parir dwar l-approvazzjoni tal-istandard. Barra minn hekk, iżomm il-kontribut attiv tiegħu għall-Pjan ta’ Azzjoni dwar Tkabbir Sostenibbli billi jwettaq l-attivitajiet ta’ riċerka tiegħu dwar it-trattament kontabilistiku tal-istrumenti ta’ ekwità bil-għan li jiġu identifikati trattamenti kontabilistiċi alternattivi possibbli għall-kejl tal-valur ġust ta’ portafolli ta’ strumenti ta’ ekwità u tat-tip ekwità. Fl-aħħar nett, l-EFRAG isegwi mill-qrib l-attivitajiet ta’ riċerka tal-IASB fir-rigward tal-avvjament u l-indeboliment, il-preżentazzjoni tar-rapporti finanzjarji u r-rekwiżiti tad-divulgazzjoni.

Il-Laboratorju Korporattiv Ewropew stabbilit fl-2018 se jistimola l-innovazzjoni fil-qasam tar-rapportar korporattiv fid-dawl tal-pjan ta’ azzjoni tal-Kummissjoni Ewropea dwar il-Finanzjament tat-Tkabbir Sostenibbli. Wara sejħa għall-kandidati f’Diċembru 2018, l-ewwel task force tal-proġett ġiet stabbilita u kienet operattiva fi Frar 2019.

4.2.4.Kemm kien effettiv l-EFRAG biex jikseb jew jagħmel progress lejn l-objettivi tiegħu s’issa?

Anke jekk diffiċli jissarraf kompletament f’indikaturi li jistgħu jitkejlu, il-progress tal-EFRAG huwa reali fit-twettiq tal-mandat tiegħu li jipprovdi pariri rrispettati lill-Kummissjoni Ewropea u jirrappreżenta l-opinjoni Ewropea dwar ir-rapportar finanzjarju fl-arena internazzjonali.

Sejbiet ewlenin

L-iżgurar tal-interessi tal-Unjoni

Meta wieħed iħares lejn il-kwalità u l-influwenza tar-riżultati li nkisbu s’issa mill-EFRAG, hemm indikazzjonijiet tal-kwalità għolja tal-attivitajiet imwettqa. F’dawn l-aħħar ħames snin, l-EFRAG għamel valutazzjonijiet pubbliċi sħaħ tajbin u analiżijiet tal-impatt dwar standards ewlenin. Ix-xogħol ta’ riċerka tal-EFRAG kien essenzjali għall-parti tal-kontribut tal-Ewropa għall-iżvilupp tal-istandards internazzjonali tal-kontabbiltà billi jitqiesu l-prijoritajiet tal-partijiet ikkonċernati. Matul l-aħħar għaxar snin, l-EFRAG ippubblika aktar minn 700 dokument biex itejjeb l-IFRS. Il-partijiet ikkonċernati kkonfermaw il-valur u l-effettività tal-EFRAG.

L-influwenza tal-UE fuq l-istipular tal-istandards tal-IASB

Il-kwalità tal-proċess dovut tal-EFRAG sostnut mill-aġenda ta’ riċerka tiegħu bbażata fuq l-evidenza, l-impenn tiegħu għall-konsultazzjoni u r-rispons tiegħu għall-proġetti kollha tal-IASB sa mill-bidu nett komplew iżidu l-influwenza tiegħu fid-dibattitu dwar ir-Rapportar Finanzjarju Internazzjonali matul il-perjodu vvalutat. Lil hinn mill-kontributi fl-aġenda tal-IASB, l-EFRAG wettaq aktar xogħol fuq inizjattiva tiegħu stess u b’hekk ipprovda opportunità għal riflessjoni dwar id-direzzjoni futura tal-istipular tal-istandards u tar-rapportar finanzjarju. L-EFRAG irnexxilu jiżgura li ċ-ċirkostanzi Ewropej speċifiċi tqiesu kif xieraq qabel ma ttieħdu deċiżjonijiet ewlenin mill-IASB. Il-proġetti ta’ ħidma tal-EFRAG dwar l-immaniġġar tar-riskju dinamiku 23 u l-kontabbiltà għall-avvjament 24 huma illustrazzjonijiet tajbin tal-influwenza tal-EFRAG fuq l-IASB (minkejja li għadhom ma wasslux għal attivitajiet konkreti ta’ stipular ta’ standards mill-IASB).

Indipendenza tal-EFRAG

L-istruttura ta’ finanzjament tal-EFRAG hija bbażata fuq mudell ta’ finanzjament privat pubbliku bil-maġġoranza tal-kontribut li jiġi mill-KE. Fuq perjodu ta’ ħames snin, il-finanzjament tal-Kummissjoni Ewropea biss jinbidel xi ftit. Dan il-finanzjament huwa għal massimu ta’ 60 % tal-ispejjeż eliġibbli iżda l-kostijiet reali ddikjarati mill-EFRAG huma differenti kull sena u b’hekk il-finanzjament totali jinbidel. Il-kontribuzzjonijiet minn organizzazzjonijiet nazzjonali jammontaw għal madwar terz tal-finanzjament totali tal-EFRAG. Minn dan l-ammont, 82 % joħorġu minn erba’ Stati Membri iżda dawn ma wasslux għal influwenza dominanti fuq l-EFRAG. Kollox ma’ kollox, l-istruttura l-ġdida ta’ governanza u d-diversifikazzjoni tal-finanzjament tagħha li jirriżulta mir-riforma ta’ Maystadt ħadmu sew u rriżultaw f’żieda fil-kredibbiltà u fil-pożizzjoni mingħajr ma ġiet imfixkla l-indipendenza tal-organizzazzjoni.

Titrawwem it-trasparenza u titjieb il-governanza tal-EFRAG

Dan huwa qasam ta’ titjib kontinwu. Ir-riżultati ġenerali tal-azzjonijiet meħuda mill-EFRAG fir-rigward tat-trasparenza u l-governanza kienu pożittivi ħafna.

Sejbiet ewlenin

aIl-Bord tal-EFRAG laħaq il-konklużjonijiet kollha tiegħu abbażi ta’ kunsens mingħajr ma kien hemm bżonn li jirrikorri għall-votazzjoni b’maġġoranza.

aIt-trasparenza tal-proċess dovut pubbliku li kompla jiżviluppa.

aIl-kompożizzjoni aktar diversifikata tal-Bord tal-utenti kif ukoll tal-Bord tal-EFRAG u tat-TEG tal-EFRAG, kemm f’termini ta’ sfond ġeografiku kif ukoll dak professjonali tiżgura li ħafna perspettivi differenti jitqiesu adegwatament mill-EFRAG.

aRieżami tal-prestazzjoni u l-effettività tal-membri tiegħu stess taħt is-sorveljanza tal-Assemblea Ġenerali tal-EFRAG fuq bażi annwali wriet li, kollox ma’ kollox, l-istruttura ta’ governanza ħadmet sew.

aMa kien hemm l-ebda kwistjoni osservata fir-rigward ta’ kunflitti ta’ interess.

aIl-laqgħat kollha tal-Bord tal-EFRAG, tal-Grupp ta’ Esperti Tekniċi tal-EFRAG (TEG tal-EFRAG) u tal-Forum Konsultattiv ta’ Dawk li Jistipulaw l-Istandards tal-EFRAG (CFSS tal-EFRAG) isiru fil-pubbliku u ilhom jixxandru permezz ta’ webcast minn Marzu 2018.

aAġenda, sommarji tal-laqgħat u dokumenti ta’ sostenn tal-aġenda għal laqgħat importanti jiġu ppubblikati fuq is-sit web tal-EFRAG.

aL-EFRAG jippubblika abbozz tal-pożizzjonijiet għal konsultazzjonijiet pubbliċi, iwettaq testijiet fuq il-post u forom oħra ta’ analiżijiet tal-effetti, u jorganizza avvenimenti ta’ sensibilizzazzjoni.

·Madankollu, għad hemm żewġ riżervi:

origward il-kapaċità li tiġi kopruta l-firxa sħiħa tal-fehmiet tal-partijiet ikkonċernati fl-Ewropa (pereżempju l-utenti ż-żgħar);

oreġistru ta’ trasparenza obbligatorju dwar il-laqgħat ma’ partijiet ikkonċernati esterni għadu ma ġiex stabbilit iżda kważi lest.

Il-PIOB

4.2.5.Kisbiet ewlenin tal-PIOB

Matul il-perjodu kollu, il-PIOB ħadem mill-qrib mal-bordijiet tal-istipular tal-istandards taħt is-sorveljanza tiegħu, it-tliet Gruppi Konsultattivi ta’ Konsulenza tagħhom, il-Bord Konsultattiv tal-Konformità u t-tmexxija tal-Kumitat Nominattiv u tal-IFAC. Il-kontribut kritiku mill-PIOB iffoka aħjar id-diskussjonijiet dwar l-iżvilupp ta’ standards internazzjonali ġodda tal-awditjar u b’hekk ikkontribwixxa għal standards li jirrispondu aktar għall-interess pubbliku milli kieku kien ikun il-każ.

4.2.6.Kemm kien effettiv il-PIOB biex jikseb jew jagħmel progress lejn l-objettivi tiegħu s’issa?

L-għotja tal-UE lill-PIOB kienet essenzjali biex tiżgura livell minimu ta’ indipendenza vis-à-vis l-IFAC u l-professjoni tal-awditjar b’mod ġenerali.

4.3. L-objettivi tal-programm għadhom rilevanti, kemm f’termini ta’ kompletezza (ħtiġijiet ġodda), jew ta’ preċiżjoni (bidliet fi, jew għajbien ta’ ħtiġijiet)?

Sejbiet ewlenin

L-objettivi tal-programm jibqgħu fil-parti l-kbira validi għalkemm il-kisba ta’ sett wieħed ta’ standards internazzjonali tal-kontabbiltà ma jidhirx li jista’ jintlaħaq aktar fit-terminu qasir u medju. Madankollu, is-Servizzi tal-Kummissjoni jivvalutaw li l-garanzija tal-aċċettazzjoni internazzjonali tal-Istandards IFRS tibqa’ ta’ benefiċċju għall-entitajiet li jixtiequ jiġbru l-kapital f’ġurisdizzjonijiet barranin jew li għandhom attivitajiet transfruntiera sinifikanti. Barra minn hekk, il-ħtieġa li tittejjeb l-effiċjenza tal-allokazzjoni tas-swieq kapitali għall-finanzjament tat-tkabbir sostenibbli tenfasizza li l-finanzjament fit-tul tal-EFRAG għandu jiġi aċċertat sabiex dan ikun jista’ jwettaq valutazzjonijiet ta’ sostenibbiltà tal-istandards IFRS u jrawwem l-aħjar prattiki fil-qasam tar-rapportar korporattiv u tal-informazzjoni extrafinanzjarja.

L-iżgurar tal-komparabbiltà u t-trasparenza tal-kontijiet tal-kumpaniji madwar l-Unjoni;

Ir-rilevanza tal-programm ta’ finanzjament primarjament toħroġ mir-Regolament tal-IAS adottat fl-2002 bħala parti mill-Istrateġija għar-Rapportar Finanzjarju tal-UE. Il-Komunikazzjoni tal-2000 mill-Kummissjoni lill-Kunsill u lill-Parlament Ewropew 25 enfasizzat li d-Direttivi dwar il-Kontabbiltà eżistenti ma kinux jissodisfaw il-ħtiġijiet tal-kumpaniji li jixtiequ jiġbru l-kapital minn swieq tat-titoli pan-Ewropej jew internazzjonali minħabba d-diversità tal-approċċi tal-kontabbiltà bħala riżultat tal-opzjonijiet inkorporati fid-Direttivi dwar il-Kontabbiltà kif ukoll tal-livelli differenti ta’ infurzar madwar fl-UE kollha.

F’dak ir-rigward, l-evalwazzjoni tal-2015 tar-Regolament 1606/2002 (“ir-Regolament tal-IAS”), enfasizzat li l-IFRS għamlu s-swieq kapitali tal-UE aktar effiċjenti billi għamlu r-rapporti finanzjarji tal-kumpaniji aktar trasparenti u aktar faċli biex jiġu mqabbla. Barra minn hekk, mill-2013 id-Direttivi dwar il-Kontabbiltà ma ġewx emendati filwaqt li skont ir-Regolament tal-IAS, l-UE adottat l-istandards IFRS ġodda, l-IFRS 15 Dħul minn kuntratti ma’ klijenti, l-IFRS 9 Strumenti Finanzjarji u l-IFRS 16 Lokazzjonijiet. B’konsegwenza ta’ dan, ir-rilevanza tal-istandard IFRS bħala sett wieħed ta’ standards tal-kontabbiltà għall-entitajiet elenkati f’suq regolat kompliet tiżdied meta mqabbla mad-Direttivi tal-Kontabbiltà. Għalhekk, is-servizzi tal-Kummissjoni jivvalutaw li l-objettivi tal-programm ta’ finanzjament Ewropew jibqgħu validi.

It-trawwim tal-konverġenza tal-istandards tal-kontabbiltà użati internazzjonalment mal-objettiv aħħari li jintlaħaq sett wieħed ta’ standards tal-kontabbiltà

Meta wieħed iqis il-limitazzjonijiet deskritti fit-taqsima preċedenti dwar l-effettività u speċjalment id-diskontinwità tal-programm konġunt għall-istipular tal-istandards bejn il-Bord tal-Istandards Internazzjonali tal-Kontabbiltà u l-Bord tal-Istandards tal-Kontabbiltà Finanzjarja tal-Istati Uniti, l-objettivi li jinkiseb sett wieħed ta’ standards internazzjonali tal-kontabbiltà ma jidhrux li jistgħu jintlaħqu fil-futur prevedibbli. Madankollu, fl-2016, il-Kummissjoni dwar it-Titoli u l-Kambju tal-Istati Uniti ppermettiet madwar lil 525 emittent barrani (li minnhom madwar 125 emittent mill-UE 26 ) jippreżentaw ir-rapporti finanzjarji annwali mħejjija skont l-IFRS, u dan jikkontribwixxi għall-aċċettazzjoni internazzjonali tal-IFRS f’ġurisdizzjonijiet oħra. Barra minn hekk, l-objettiv li titrawwem il-konverġenza tal-istandards tal-kontabbiltà jibqa’ rilevanti għall-ġurisdizzjonijiet li għażlu li jikkonverġu b’mod sostanzjali l-istandards nazzjonali tal-kontabbiltà tagħhom mal-IFRS, bħar-Repubblika tal-Poplu taċ-Ċina.

Għalhekk, is-Servizzi tal-Kummissjoni jirrikonoxxu li aktar progress fl-użu tal-IFRS x’aktarx li mhux se jseħħ fuq perjodu qasir. Madankollu, l-iżgurar tal-aċċettazzjoni internazzjonali tal-IFRS jibqa’ ta’ benefiċċju għall-kumpaniji tal-UE li jixtiequ jiġbru l-kapital f’ġurisdizzjonijiet barranin jew b’operazzjonijiet barranin sinifikanti f’ġurisdizzjonijiet li jirrikjedu jew li jawtorizzaw l-użu tal-IFRS.

L-iżgurar li l-interessi tal-Unjoni jitqiesu b’mod adegwat fil-proċess internazzjonali għall-istipular tal-istandards.

Dan l-objettiv politiku joħroġ direttament mill-għażla li tiġi ddelegata r-responsabbiltà għall-istabbiliment tar-rekwiżiti tar-rapportar finanzjarju lil organizzazzjoni mhux governattiva indipendenti mingħajr ma jingħata rendikont dirett lill-Unjoni Ewropea. Il-governanza tal-Fondazzjoni tal-IFRS tiddependi fuq tqassim strett tas-sħubija fil-Bord tal-Fiduċjarji u fil-Bord tal-Istandards Internazzjonali tal-Kontabbiltà abbażi ta’ kriterji ġeografiċi. Fl-2015, il-Fondazzjoni wettqet konsultazzjoni pubblika dwar id-distribuzzjoni ġeografika tal-governanza tagħha. Xi partijiet ikkonċernati inkluża l-Kummissjoni Ewropea argumentaw li s-sħubija għandha tirrifletti l-impenn li jiġu adottati l-IFRS u s-sehem relattiv fil-kontribuzzjoni finanzjarja lill-Fondazzjoni. Madankollu, il-Fondazzjoni affermat mill-ġdid li s-sħubija għandha tkun rappreżentattiva tas-swieq kapitali dinjija u soġġetta għar-rekwiżiti tal-bilanċ ġeografiku biex tinżamm rappreżentanza ekwivalenti bejn l-Asja u l-Oċeanja, l-Ewropa u l-Amerika.

B’konsegwenza ta’ dan, meta jitqies in-nuqqas ta’ progress lejn l-istabbiliment ta’ struttura ta’ governanza li tirrifletti l-użu reali tal-IFRS mill-ġurisdizzjonijiet u l-kontribuzzjonijiet tagħhom għall-finanzjament tal-Fondazzjoni, is-Servizzi tal-Kummissjoni jivvalutaw li l-objettiv politiku li tkun żgurata superviżjoni aktar xierqa tal-attivitajiet tal-Fondazzjoni jibqa’ essenzjali kemm qabel l-adozzjoni kif ukoll matul il-proċess kollu għall-istipular tal-istandards. Dan jimplika b’mod speċjali li biex id-dibattitu dwar l-Istandards Internazzjonali tar-Rapportar Finanzjarju jiġi influwenzat upstream, il-mandat tal-EFRAG jibqa’ pedament tal-programm bil-għan li jikkontribwixxi għall-istipular ta’ standards ibbażati fuq l-evidenza permezz ta’ valutazzjonijiet tal-impatt kwantitattivi.

Żieda fl-indipendenza finanzjarja tal-benefiċjarji mis-settur privat u minn sorsi ad hoc, biex b’hekk tiżdied il-kapaċità u l-kredibbiltà tagħhom.

Matul il-perjodu kopert mill-valutazzjoni, il-Fondazzjoni tal-IFRS irrapportat b’mod kostanti profitti u riżervi akkumulati suffiċjenti biex ikopru ħmistax-il xahar ta’ spejjeż operattivi 27 . Hija żiedet ukoll id-dħul rikorrenti tagħha ġġenerat minnha stess mill-ftehimiet tal-liċenzji. Madankollu, il-Fiduċjarji tal-Fondazzjoni tal-IFRS ma kellhomx suċċess fl-implimentazzjoni ta’ skema ta’ kontribuzzjoni stabbli bbażata fuq il-prodott domestiku gross tal-ġurisdizzjonijiet. B’konsegwenza ta’ dan, il-maġġoranza tal-finanzjament tal-Fondazzjoni jkompli jiddependi fuq il-finanzjament annwali volontarju. Barra minn hekk, matul il-perjodu l-Kummissjoni dwar it-Titoli u l-Kambju tal-Istati Uniti temmet l-appoġġ finanzjarju tagħha lill-Fondazzjoni, u b’hekk żiedet is-sehem relattiv tal-finanzjament min-netwerks internazzjonali tal-kontabbiltà, li kienu jirrappreżentaw kważi terz tal-finanzjament totali tal-Fondazzjoni bejn l-2015 u l-2017 u 24 % fl-2018 28 .

Fir-rigward tal-EFRAG, id-diversifikazzjoni tal-finanzjament tiegħu u l-istruttura ta’ governanza tiegħu li jirriżultaw mir-riforma Maystadt żiedu l-kredibbiltà tal-EFRAG bħala organizzazzjoni li taħdem fl-interess pubbliku Ewropew. S’issa kellhom impatt pożittiv fuq il-mod li bih l-EFRAG jinfluwenza l-IFRS. Illum, l-istruttura ta’ finanzjament tiegħu hija bbażata prinċipalment fuq il-kontribuzzjonijiet mill-UE u mill-organizzazzjonijiet nazzjonali li jirrappreżentaw 85 % tar-riżorsi finanzjarji tiegħu. Madankollu, bi Brexit u bl-irtirar potenzjali tar-regolatur tar-Renju Unit (FRC), l-indipendenza finanzjarja tal-EFRAG se ssir aktar rilevanti biex tiżgura l-kapaċità tiegħu li jwettaq il-mandat tiegħu.

Fir-rigward tal-PIOB, hemm diversifikazzjoni ta’ sorsi ta’ finanzjament, b’kontribuzzjoni sostanzjali mill-IFAC iżda taħt il-limitu ta’ żewġ terzi, kif stipulat fir-Regolament.

B’konsegwenza ta’ dan, b’mod ġenerali s-servizzi tal-Kummissjoni jivvalutaw li l-aċċertament tal-indipendenza finanzjarja tal-benefiċjarji tibqa’ objettiv rilevanti.

Sorveljanza tal-proċess li jwassal għall-adozzjoni tal-Istandards Internazzjonali tal-Awditjar u attivitajiet oħra ta’ interess pubbliku tal-Federazzjoni Internazzjonali tal-Kontabilisti.

Il-PIOB huwa responsabbli għall-monitoraġġ tal-proċess dovut tal-proċess għall-istipular tal-istandards internazzjonali fl-oqsma tal-awditjar u tal-assigurazzjoni, tal-edukazzjoni u tal-etika.

L-ISAs jintużaw - direttament jew indirettament - fl-Istati Membri kollha tal-UE. Hemm bżonn ta’ PIOB li jiffunzjona tajjeb biex jissorvelja l-bordijiet li jistipulaw l-istandards sabiex jiżgura li jiġu żviluppati standards ġodda, jew emendati, fl-interess pubbliku, jiġifieri li jirrispondu għall-ħtiġijiet tal-partijiet ikkonċernati, akkontabbli u trasparenti kif ukoll li jallinja l-prijoritajiet tal-professjoni tal-awditjar ma’ dawk tal-partijiet ikkonċernati kollha (inklużi l-investituri u utenti oħrajn tar-rapporti finanzjarji).

Titrawwem it-trasparenza u l-involviment tal-partijiet ikkonċernati fil-proċess għall-istipular tal-istandards u l-proċess ta’ approvazzjoni.

Is-Servizzi tal-Kummissjoni jivvalutaw li l-iżgurar ta’ konsultazzjoni ġusta u trasparenti mal-partijiet ikkonċernati jibqa’ pedament tal-proċessi tal-istipular tal-istandards u tal-approvazzjoni biex jiġi żgurat li l-fehmiet mill-partijiet ikkonċernati Ewropej kollha jitqiesu b’mod adegwat fl-istadju kollu tal-proċess dovut tal-benefiċjarji.

Tfaċċaw ħtiġijiet ġodda?

Is-Servizzi tal-Kummissjoni identifikaw żewġ ħtiġijiet ewlenin ġodda rilevanti għall-Programm tal-Unjoni: id-domanda dejjem akbar għal aċċess elettroniku għall-informazzjoni finanzjarja u l-ħtieġa li tittejjeb l-effiċjenza tal-allokazzjoni tas-swieq kapitali għall-finanzjament tat-tkabbir sostenibbli.

It-talba għal aċċess elettroniku għall-informazzjoni finanzjarja

Fl-2013, id-Direttiva dwar it-Trasparenza ġiet emendata biex sal-1 ta’ Jannar 2020 tirrikjedi t-tħejjija ta’ rapporti finanzjarji annwali f’format uniku tar-rapportar elettroniku bil-għan li jiġi ffaċilitat l-investiment transfruntier u biex l-investituri jkunu jistgħu jaċċessaw faċilment informazzjoni regolata. L-Istandard Tekniku Regolatorju dwar il-Format Elettroniku Uniku Ewropew ġie adottat fid-29 ta’ Mejju 2019 mill-Kummissjoni Ewropea u jistabbilixxi li t-tassonomija li għandha tintuża biex jiżdiedu r-rapporti finanzjarji kkonsolidati tal-IFRS għandha tkun estensjoni tat-tassonomija tal-IFRS miżmuma mill-Fondazzjoni tal-IFRS.

It-tassonomija tal-IFRS tirrifletti r-rekwiżiti ta’ preżentazzjoni u divulgazzjoni tal-IFRS u tiġi aġġornata kull sena mill-Fondazzjoni. Wara konsultazzjoni pubblika li saret fl-2015, f’Ġunju 2016, il-Fiduċjarji ħarġu anness tal-Manwal ta’ Proċess Dovut tal-Fondazzjoni biex jirrifletti ż-żamma meħtieġa tat-tassonomija tal-IFRS. Huwa jipprevedi b’mod speċjali li l-aġġornamenti tat-tassonomija jitwettqu mal-adozzjoni ta’ standard ġdid, jew emenda, wara konsultazzjoni pubblika mnedija mhux aktar tard mill-pubblikazzjoni tal-istandard finali.

 It-titjib tal-effiċjenza tal-allokazzjoni tas-swieq kapitali għall-finanzjament tat-tkabbir sostenibbli

Matul il-perjodu meqjus mill-valutazzjoni, il-ftehim dwar l-Għanijiet ta’ Żvilupp Sostenibbli tan-NU (2015) u l-Ftehim ta’ Pariġi dwar it-tibdil fil-klima (2016) poġġew it-tranżizzjoni għal ekonomija sostenibbli fuq quddiem nett tal-aġenda politika, u kkontribwew għal fokus dejjem akbar fuq is-sostenibbiltà tan-negozji u l-investimenti. Dan imbagħad għamel enfasi fuq it-titjib tat-trasparenza korporattiva fuq il-kwistjoni tas-sostenibbiltà u qajjem tħassib ġdid dwar l-impatt tal-Istandards IFRS. B’mod speċjali, ir-rapport tal-2018 tal-Grupp ta’ Esperti ta’ Livell Għoli dwar il-finanzjament ta’ ekonomija Ewropea sostenibbli enfasizza li l-istandards IFRS jista' jkun li ma jwasslux għal investiment ta’ terminu twil.

B’konsegwenza ta’ dan, bħala parti mill-Pjan ta’ Azzjoni tal-2018 tagħha dwar il-Finanzjament tat-Tkabbir Sostenibbli, il-Kummissjoni Ewropea talbet lill-EFRAG biex iqis titjib possibbli għat-trattament kontabilistiku tal-investimenti ta’ terminu twil fl-istrumenti ta’ ekwità u kkommettiet ruħha, li titlob valutazzjoni tal-impatt tal-istandards IFRS ġodda jew riveduti fuq l-investimenti sostenibbli, fejn xieraq. Din l-inizjattiva għandha l-għan li tipprevjeni li t-trattamenti kontabilistiċi tal-IFRS jikkontribwixxu biex jiddiżinċentivaw l-allokazzjoni meħtieġa tal-finanzjament fuq terminu twil għat-tranżizzjoni lejn ekonomija sostenibbli.

Fl-2019, il-President tal-IASB enfasizza li l-Fondazzjoni tal-IFRS ma kinitx mgħammra sabiex tidħol fil-qasam tar-rapportar tas-sostenibbiltà u għandha tiffoka fuq il-ħtiġijiet tal-informazzjoni finanzjarja tal-investituri. Madankollu huwa rrikonoxxa li l-kwistjonijiet ta’ sostenibbiltà jista’ jkollhom impatt fuq ir-rapportar finanzjarju u ssuġġerixxa li, meta jkun finanzjarjament materjali, il-kunsiderazzjonijiet tas-sostenibbiltà jistgħu jiġu indirizzati permezz ta’ reviżjoni sħiħa tad-Dikjarazzjoni dwar il-Prattika tal-Kummentarju tal-Maniġment. Id-dikjarazzjoni ta’ prattika tipprovdi gwida mhux vinkolanti dwar l-informazzjoni ta’ sfond li fiha jiġu interpretati r-rapporti finanzjarji. Dan jinkludi b’mod speċjali informazzjoni dwar l-istrateġija tal-kumpanija u tal-progress li sar lejn l-implimentazzjoni tagħha.

B’konsegwenza ta’ dan, id-deċiżjoni mill-IASB li ma jqisx l-impatti tas-sostenibbiltà fl-iżvilupp tal-Istandards IFRS timplika li l-kamp ta’ applikazzjoni tal-attivitajiet ta’ approvazzjoni mwettqa mill-EFRAG se jitwessa’ sabiex jiġi żgurat li din id-dimensjoni tal-Ġid Pubbliku Ewropew tiġi ssalvagwardjata b’mod xieraq. F’dak ir-rigward, fl-2018, l-EFRAG diġà ħareġ żewġ pariri tekniċi dwar titjib possibbli fir-rekwiżiti tal-IFRS 9 Strumenti Finanzjarji għal investimenti ta’ terminu twil fi strumenti ta’ ekwità u se jkompli jaħdem fuq trattamenti kontabilistiċi alternattivi possibbli għall-kejl tal-valur ġust ta’ ekwità u strumenti simili ta’ ekwità fil-futur.

Barra minn hekk, peress li l-attivitajiet tal-EFRAG fir-rigward ta’ rapportar ta’ informazzjoni mhux finanzjarja se jirrappreżentaw estensjoni loġika tal-mandat tiegħu fil-futur, dawn għandu jkollhom finanzjament adegwat. Għalhekk, ikun utli li l-Programm tas-Suq Uniku (SMP) futur, li jiddependi fuq in-negozjati tal-QFP li jmiss, jinkludi arranġamenti ta’ finanzjament flessibbli li jiżguraw li dawn l-attivitajiet ikunu koperti wkoll.

4.4.Sa liema punt il-programm kien konsistenti ma’ politiki oħra tal-UE jew hemm inkonsistenzi bejn l-attivitajiet imwettqa mill-benefiċjarji (Koerenza)?

Sejbiet ewlenin

L-attivitajiet tal-benefiċjarji huma konsistenti u konformi bis-sħiħ mal-objettiv tal-UE li ssaħħaħ l-Unjoni tas-Swieq Kapitali.

Konsistenza bejn l-attivitajiet imwettqa mill-benefiċjarji

Fil-qasam tar-rapportar finanzjarju, il-programm ta’ Finanzjament tal-UE huwa mfassal sabiex jiżgura l-promozzjoni ta’ sett uniku ta’ standards internazzjonali tar-rapportar finanzjarju u biex jissalvagwardja l-interessi taċ-ċittadini Ewropej u l-objettivi politiċi pubbliċi tal-UE. Il-konsistenza bejn dawn iż-żewġ objettivi potenzjalment kontradittorji għalhekk tiddependi fuq l-abbiltà tal-EFRAG li jaħdem mal-IASB kmieni kemm jista’ jkun fil-proċess tal-istipular tal-istandards sabiex jindirizza t-tħassib tal-partijiet ikkonċernati Ewropej. F’dak ir-rigward, ir-rapport jivvaluta li l-EFRAG kiseb suċċess fil-mandat tiegħu biex jinfluwenza fil-ħin lill-IASB qabel ma jiġi approvat standard ġdid. Madankollu, huwa jenfasizza wkoll li l-mandat tal-EFRAG jista’ jkun ta’ sfida dejjem akbar fil-ġejjieni minħabba li l-IASB ma jqisx b’mod espliċitu l-kwistjonijiet tas-sostenibbiltà fl-iżvilupp tal-Istandards IFRS u mhuwiex meħtieġ li jivvaluta sistematikament il-konsegwenzi tal-introduzzjoni ta’ standard ġdid tal-kontabbiltà lil hinn mit-titjib fir-rapportar finanzjarju u l-kostijiet probabbli tal-implimentazzjoni.

Abbażi tal-analiżi tagħna, għandha tingħata kunsiderazzjoni xierqa lid-differenza fil-fokus bejn il-kunċett ta’ “ġid pubbliku” usa’ tal-Unjoni stabbilit fir-Regolament tal-IAS u l-fokus aktar strett tal-IASB fuq it-titjib kwalitattiv tal-finanzi, speċjalment meta mqabbel mal-objettiv usa’ tat-tranżizzjoni tal-UE lejn ekonomija aktar sostenibbli. Dan jista’ jiġġustifika ċerta flessibbiltà addizzjonali fil-proċedura tal-approvazzjoni tal-Istandards IFRS maħruġa mill-IASB billi f’ċirkostanzi definiti tajjeb jippermetti li jiġu emendati dispożizzjonijiet speċifiċi ta’ standard jew ta’ interpretazzjoni ġodda li jikkontradixxu l-objettivi politiċi usa’ tal-UE.

Konsistenza ma’ objettivi politiċi pubbliċi oħra

Fil-qasam tar-rapportar finanzjarju, il-programm tal-Unjoni huwa mfassal biex jikkomplementa r-Regolament tal-IAS u biex jiżgura li l-istandards ġodda tal-kontabbiltà maħruġa mill-Fondazzjoni tal-IFRS jissodisfaw il-kriterji tal-approvazzjoni qabel l-adozzjoni mill-Unjoni Ewropea. B’konsegwenza ta’ dan, huwa jikkontribwixxi wkoll indirettament għall-objettivi usa’ tas-salvagwardja tal-funzjonament effiċjenti u kosteffettiv tas-swieq kapitali tal-Unjoni u għat-tisħiħ tal-libertà tal-moviment tal-kapital fis-suq intern. Barra minn hekk, l-analiżi fit-taqsima dwar ir-rilevanza tenfasizza li l-programm jibqa’ kompletament konsistenti mal-arkitettura tal-oqfsa tal-UE għar-rapportar pubbliku minn kumpaniji, li hija bbażata fuq differenzazzjoni fundamentali bejn ir-rekwiżiti applikabbli għall-entitajiet elenkati u dawk mhux elenkati. Il-kisba u ż-żamma b’mod effettiv ta’ qafas armonizzat ta’ rapportar finanzjarju għall-kumpaniji orjentati lejn is-suq kapitali jibqgħu essenzjali biex jinħoloq suq integrat għas-servizzi finanzjarji fil-kuntest tal-Unjoni tas-Suq Kapitali.

L-eżistenza ta’ korp indipendenti ta’ sorveljanza tal-awditjar offra lill-investituri (u lill-pubbliku ġenerali) serħan il-moħħ dwar il-fatt li l-istandards tal-awditjar huma ta’ kwalità għolja u żviluppati fl-interess pubbliku. L-għotja tal-UE hija ġġustifikata bl-użu wiesa’ tal-istandards internazzjonali tal-awditjar tal-IAASB fl-Istati Membri tal-UE. Madankollu, minkejja xi progress inizjali u titjib fid-diversità fil-finanzjament tal-PIOB, il-fatt li l-għadd ta’ sponsors pubbliċi oħra baqa’ limitat u aktar reċentement saħansitra naqas bi ftit joħloq tħassib. Għalhekk tibqa’ sfida biex jiġi żgurat mudell ta’ finanzjament diversifikat għall-PIOB li jista’ jiddependi fuq il-finanzjament mhux biss mill-awdituri, iżda wkoll mill-utenti/investituri, mir-regolaturi u mill-organizzazzjonijiet internazzjonali, sabiex ikun sostenibbli fil-futur medju u fit-tul. Fl-istess ħin, mingħajr l-għajnuna kontinwa tal-UE u sponsors pubbliċi oħra, il-PIOB jerġa’ lura għas-sitwazzjoni ta’ qabel l-2010, meta kien finanzjarjament dipendenti kompletament fuq l-IFAC. Dan ikun pass serju lura, idgħajjef il-kredibbiltà tas-sistema kollha tal-governanza u tas-sorveljanza u jirriskja li jnaqqas il-fiduċja tal-pubbliku fl-istandards tal-awditjar tal-IAASB.

(1)

ĠU, L 105, 8.4.2014, p.1.

(2)

ĠU, L 129, 19.5.2017, p.24.

(3)

A8-0172/2016 Rapport dwar l-evalwazzjoni tal-Istandards Internazzjonali tal-Kontabbiltà u l-attivitajiet tal-Fondazzjoni għall-Istandards Internazzjonali tar-Rapportar Finanzjarju (IFRS), tal-Grupp Konsultattiv Ewropew għar-Rapportar Finanzjarju (EFRAG) u tal-Bord tas-Sorveljanza tal-Interess Pubbliku (PIOB)

(4)

Il-finanzjament ipprovdut mill-Unjoni Ewropea jappoġġja wkoll l-aġġornament f’waqtu tat-tassonomija tal-IFRS li min-naħa tagħha sservi bħala kontribut għall-Format Elettroniku Uniku Ewropew.

(5)

Premessa 7

(6)

Proposta għal Direttiva tal-Parlament Ewropew u tal-Kunsill li temenda d-Direttiva 2013/34/UE fir-rigward tad-divulgazzjoni tal-informazzjoni dwar it-taxxa fuq l-introjtu minn ċerti intrapriżi u fergħat 2016/0107/COD

(7)

Id-Direttiva 2014/95/UE fir-rigward tad-divulgazzjoni ta’ informazzjoni mhux finanzjarja u dwar id-diversità minn ċerti impriżi u gruppi kbar

(8)

C/2017/4234

(9)

C/2019/4490

(10)

Mill-2015 il-Kummissjoni dwar is-Sigurtajiet u l-Kambji ma baqgħetx tikkontribwixxi aktar għall-finanzjament tal-Fondazzjoni tal-IFRS. Il-finanzjament mill-Istati Uniti jiġi biss minn kontribuzzjonijiet volontarji minn organizzazzjonijiet privati.

(11)

Should IFRS Standards be more “European”? Ir-rapport ta’ Philippe Maystadt – Ottubru 2013

(12)

IFAC huwa l-korp privat li jirrappreżenta l-kontabilisti u l-awdituri madwar id-dinja.

(13)

L-14-il Rapport Pubbliku tal-PIOB approvat fl-2018:
http://www.ipiob.org/media/files/attach/2018PIOB_Report.pdf

(14)

https://www.iosco.org/

(15)

https://www.iosco.org/about/monitoring_group/pdf/2018-05-31-Monitoring-Group-Summary-of-Feedback.pdf

(16)

Kontribuzzjonijiet ta’ għotja kif kienu fil-31 ta’ Lulju 2019 (proviżorju għall-kontribuzzjoni ta’ għotja tal-2018).

(17)

Il-Premessa 15 tar-Regolament 258/2014

(18)

COM (2015) 301 final

(19)

COM (2012) 782 final

(20)

SWD (2018) 320 final appendiċi 8    

(21)

SWD (2015) 120 final paġna 58

(22)

  https://www.ifrs.org/-/media/feature/groups/trustees/ifrs-reputation-research-report-jul-2017.pdf?la=en

(23)

Immaniġġjar Riskju Dinamiku – Il-banek kif jimmaniġġjaw ir-riskji tar-rati tal-imgħax? Jannar 2017

(24)

Test tal-avvjament għall-indeboliment : Jista’ jittejjeb? Dikjarazzjoni ta’ feedback ta’ Marzu 2018

(25)

COM (2000) 359 final

(26)

https://www.sec.gov/divisions/corpfin/internatl/foreigngeographic2015.pdf

(27)

Skont ir-rapporti finanzjarji tagħha tal-2018.

(28)

Dan it-tnaqqis fl-2018 jirriżulta b’mod sinifikanti minn arranġament ġdid tal-liċenzjar li jwassal għal rikonoxximent ta’ dħul mil-liċenzji minflok kontribuzzjoni finanzjarja volontarja