IL-KUMMISSJONI EWROPEA

Brussell, 4.9.2019

COM(2019) 394 final

KOMUNIKAZZJONI TAL-KUMMISSJONI

Il-finalizzazzjoni tat-tħejjijiet għall-ħruġ tar-Renju Unit mill-Unjoni Ewropea fl-1 ta’ Novembru 2019

KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL EWROPEW, LILL-KUNSILL, LILL-BANK ĊENTRALI EWROPEW, LILL-KUMITAT EKONOMIKU U SOĊJALI, LILL-KUMITAT TAR-REĠJUNI U LILL-BANK EWROPEW TAL-INVESTIMENT

Il-finalizzazzjoni tat-tħejjijiet għall-ħruġ tar-Renju Unit mill-Unjoni Ewropea fl-1 ta’ Novembru 2019

1.Introduzzjoni

Fid-29 ta’ Marzu 2017, ir-Renju Unit innotifika l-intenzjoni tiegħu li joħroġ mill-Unjoni Ewropea permezz tal-invokazzjoni tal-proċedura fl-Artikolu 50 tat-Trattat dwar l-Unjoni Ewropea (TUE). Fil-11 ta’ April 2019, wara t-talba min-naħa tar-Renju Unit, il-Kunsill Ewropew (l-Artikolu 50) qabel 1 li jestendi ulterjorment il-perjodu previst fl-Artikolu 50(3) tat-TUE sal-31 ta’ Ottubru 2019. Sakemm ir-Renju Unit ma jirratifikax il-Ftehim dwar il-Ħruġ 2 sal-31 ta’ Ottubru 2019 jew ma jitlobx għat-tielet estensjoni li tkun trid tiġi miftiehma b’mod unanimu mill-Kunsill Ewropew (l-Artikolu 50), mill-1 ta’ Novembru 2019 ir-Renju Unit se jkun pajjiż terz mingħajr ftehim li jiżgura ħruġ ordnat.

Mill-bidu nett tan-negozjati, il-Kummissjoni kienet tal-fehma ċara li l-aħjar eżitu jkun ħruġ ordnat tar-Renju Unit mill-Unjoni Ewropea fuq il-bażi tal-Ftehim dwar il-Ħruġ. Kif ġie enfasizzat mill-Kummissjoni b’mod konsistenti, ħruġ mingħajr ftehim se joħloq diżordni sinifikanti kemm fir-Renju Unit kif ukoll fl-UE27. Il-miżuri ta’ kontinġenza jistgħu biss itaffu t-tfixkil l-aktar sinifikanti kkawżat minn ħruġ mingħajr ftehim.

L-iskadenza tal-31 ta’ Ottubru 2019 tinsab biss tmien ġimgħat ’il bogħod. Il-ftit żmien li għad fadal u s-sitwazzjoni politika fir-Renju Unit żiedu r-riskju li r-Renju Unit joħroġ f’dik id-data mingħajr ftehim. B’konformità mal-approċċ li l-Kunsill Ewropew (l-Artikolu 50) enfasizza matul il-proċess, l-atturi kollha jridu jissoktaw it-tħejjija għall-eżiti kollha possibbli. Għaldaqstant, issa l-atturi kollha jridu jagħmlu l-aġġustamenti kollha neċessarji għall-pjani tagħhom fir-rigward ta’ ħruġ mingħajr ftehim fl-1 ta’ Novembru 2019. Jenħtieġ li huma ma jiddependux fuq is-suppożizzjoni li r-Renju Unit se jitlob it-tielet estensjoni u li din tintlaqa’ mill-Kunsill Ewropew (l-Artikolu 50) qabel il-31 ta’ Ottubru.

2.Id-Drittijiet taċ-Ċittadini

Il-Kummissjoni konsistentement għamlitha ċara li l-ħarsien taċ-ċittadini tal-UE fir-Renju Unit, kif ukoll iċ-ċittadini tar-Renju Unit fl-Unjoni Ewropea huma prijorità. Kif ġie ddikjarat fil-ħames Komunikazzjoni dwar it-Tħejjija għall-Brexit tat-12 ta’ Ġunju 2019 3 , l-Istati Membri tal-UE27 daħħlu fis-seħħ miżuri ta’ kontinġenza li jiżguraw li ċ-ċittadini tar-Renju Unit u l-membri tal-familja tagħhom mhux mill-UE jkunu jistgħu jibqgħu jirrisjedu legalment fil-perjodu immedjatament wara ħruġ mingħajr ftehim. Il-Kummissjoni ħadmet mal-Istati Membri tal-UE27 sabiex tiżgura l-koerenza tal-approċċ globali, filwaqt li rrikonoxxiet il-fatt li l-Istati Membri jeħtieġ li jkunu flessibbli. Il-Kummissjoni tipprovdi ħarsa ġenerali aġġornata tal-miżuri ta’ kontinġenza nazzjonali kollha b’rabta mad-drittijiet ta’ residenza fil-paġni web tagħha dwar it-Tħejjija għall-Brexit 4 .

Iċ-ċittadini tal-UE li jirrisjedu fir-Renju Unit jistgħu jsibu informazzjoni dwar id-drittijiet ta’ residenza tagħhom fir-Renju Unit fis-sit web tal-Gvern tar-Renju Unit 5 . Minbarra l-isforzi tar-rappreżentanzi diplomatiċi tal-Istati Membri fir-Renju Unit, l-Uffiċċji ta’ Rappreżentanza tal-Kummissjoni fir-Renju Unit u s-servizzi rilevanti fi Brussell se jkomplu jsegwu mill-qrib il-passi meħuda mir-Renju Unit biex iċ-ċittadini tal-UE jibqgħu jirrisjedu fir-Renju Unit. Dawn se jagħtu informazzjoni u għarfien liċ-ċittadini interessati f’dan ir-rigward.

Filwaqt li l-jeddijiet tas-sigurtà soċjali fir-rigward tar-Renju Unit qabel il-ħruġ huma mħarsa mir-Regolament ta’ kontinġenza rilevanti 6 , xi Stati Membri qegħdin idaħħlu fis-seħħ ukoll miżuri ta’ kontinġenza unilaterali fil-livell nazzjonali għall-perjodu ta’ wara l-ħruġ. Dawn il-miżuri jikkumplimentaw il-ħarsien tal-jeddijiet tas-sigurtà soċjali li huma garantiti fil-livell tal-UE, pereżempju billi wara l-ħruġ fir-Renju Unit jiġi applikat il-prinċipju ta’ aggregazzjoni għall-perjodi ta’ xogħol, assigurazzjoni u residenza jew billi l-jeddijiet tas-sigurtà soċjali ta’ dawk iċ-ċittadini wara l-ħruġ jitħarsu aktar. Il-Kummissjoni tipprovdi ħarsa ġenerali aġġornata tal-miżuri nazzjonali ta’ kontinġenza kollha fil-qasam tal-jeddijiet tas-sigurtà soċjali fil-paġni web tagħha dwar it-Tħejjija għall-Brexit 7 .

3.Il-finalizzazzjoni tat-tħejjijiet f’setturi partikolari

F’kull waħda mill-ħames Komunikazzjonijiet preċedenti tal-Kummissjoni dwar it-Tħejjija għall-Brexit 8 hija ħeġġet lill-partijiet ikkonċernati biex jitħejjew. Hija se żżomm il-kuntatt mal-partijiet ikkonċernati kollha biex tagħtihom informazzjoni u pariri. L-Istati Membri u l-entitajiet privati, fosthom l-assoċjazzjonijiet u l-kmamar tal-kummerċ, ukoll jenħtieġ li jkomplu jagħtu informazzjoni u jgħinu liċ-ċittadini u lin-negozji jiffinalizzaw it-tħejjijiet tagħhom, inkluż permezz tal-bosta fora li nħolqu speċifikament għal dan.

Sabiex in-negozji jiġu megħjuna jivverifikaw l-istat tat-tħejjija tagħhom u jidentifikaw l-azzjonijiet li għad iridu jieħdu biex jiffinalizzaw it-tħejjijiet tagħhom fid-dawl tal-ħruġ mingħajr ftehim fl-1 ta’ Novembru 2019, il-Kummissjoni ħejjiet “Lista ta’ kontroll għat-tħejjija għall-Brexit” li hija disponibbli fil-paġni web tagħha dwar it-Tħejjija għall-Brexit 9 . Barra minn hekk il-Kummissjoni ppubblikat avviżi lill-partijiet ikkonċernati speċifiċi għal kull settur dwar għadd ta’ kwistjonijiet 10 . Għodod simili tħejjew fil-livell nazzjonali u minn diversi assoċjazzjonijiet tan-negozju. L-operaturi ekonomiċi kollha ġew mistiedna jużaw għodod ta’ dan it-tip.

Din it-taqsima tiffoka fuq oqsma partikolari fejn hemm il-ħtieġa li tkompli tingħata attenzjoni partikolari fix-xhur li ġejjin.

3.1.Il-formalitajiet tal-fruntiera u l-kummerċ

Is-setturi kollha li jagħmlu negozju mar-Renju Unit, kemm fil-merkanzija kif ukoll fis-servizzi, se jintlaqtu mill-ħruġ. Partikolarment dwar il-kummerċ fil-merkanzija, jekk ir-Renju Unit joħroġ mill-Unjoni mingħajr ftehim, l-operaturi ekonomiċi jeħtieġ li jħejju ruħhom għal konsegwenzi sinifikanti fl-oqsma tal-formalitajiet tad-dwana, tat-tassazzjoni indiretta u, fejn applikabbli, tal-kontrolli sanitarji u fitosanitarji mill-1 ta’ Novembru 2019. Dawn il-konsegwenzi jinkludu, fost l-oħrajn, l-applikazzjoni ta’  formalitajiet tad-dwana. Se jkollhom jiġu ppreżentati dikjarazzjonijiet u l-awtoritajiet tad-dwana jistgħu jitolbu garanziji fir-rigward ta’ djun doganali potenzjali jew eżistenti. Jista’ jkun li jibdew japplikaw projbizzjonijiet jew restrizzjonijiet fil-konfront ta’ xi merkanzija li tidħol fl-UE mir-Renju Unit jew viċi versa, li jfisser li jista’ jkun hemm il-bżonn ta’ liċenzji tal-importazzjoni jew tal-esportazzjoni.

Mill-1 ta’ Novembru 2019, il-merkanzija tar-Renju Unit li tidħol fl-UE se tkun suġġetta wkoll għal dazji 11 doganali u l-merkanzija tal-UE tista’ tkun suġġetta għal dazji doganali tar-Renju Unit. It-tariffi medji tal-UE huma ta’ madwar 2,7 % għall-prodotti mhux agrikoli importati fl-Unjoni u 8,1 % għall-prodotti agrikoli 12 . Pereżempju, bħala medja l-prodotti tal-ħalib jiġu ntaxxati b’rata ta’ 44,8 %, il-laħam b’rata ta’ 11,4%, il-ħwejjeġ b’rata ta’ 11,5 % u l-karozzi b’rata ta’ 10 % 13 . L-operaturi ekonomiċi tal-UE27 jenħtieġ li jivvalutaw il-ktajjen tal-provvista u jiżguraw li l-pjanijiet ta’ direzzjoni tan-negozju tagħhom iqisu dawn id-dazji doganali. L-Istati Membri se jimponu wkoll Taxxa fuq il-Valur Miżjud fuq il-merkanzija importata lejn l-UE mir-Renju Unit.

Sabiex it-tfixkil fuq il-kummerċ tal-merkanzija li taqsam il-fruntiera jitnaqqas kemm jista’ jkun, mill-ewwel jum ta’ wara l-ħruġ, l-operaturi tas-suq, it-trasportaturi u l-ispedituri minn madwar l-Ewropa li biħsiebhom jittrasportaw merkanzija mir-Renju Unit jew lejn ir-Renju Unit jeħtieġ li jkunu lesti li jissodisfaw il-formalitajiet li jintalbu. Jeħtieġ li jagħmlu dawn it-tħejjijiet irrispettivament minn fejn ikunu stabbiliti. Din mhijiex biss kwistjoni għal dawk li huma bbażati fir-reġjuni ġirien tar-Renju Unit jew li jkollhom volumi għolja ta’ negozju mar-Renju Unit.

Il-partijiet kollha li huma involuti fil-katina tal-provvista jeħtieġ li jkunu konxji mir-responsabbiltajiet tagħhom biex jissodisfaw il-formalitajiet neċessarji kollha u jenħtieġ li jiżguraw li d-dokumentazzjoni u ċ-ċertifikazzjonijiet meħtieġa jkunu organizzati sew. It-tħejjija għall-formalitajiet rilevanti tista’ tieħu ż-żmien u tinvolvi kuntatti mal-awtoritajiet rilevanti fuq iż-żewġ naħat tal-fruntiera. It-trasport tal-merkanzija skont il-proċedura komuni ta’ tranżitu se jnaqqas il-formalitajiet fil-punt ta’ qsim tal-fruntiera 14 . Meta titqies il-possibbiltà ta’ diżordni fil-fruntieri fi żmien il-ħruġ, l-operaturi tas-suq, it-trasportaturi u l-ispedituri jenħtieġ li jivverifikaw is-sitwazzjoni tar-rotta kummerċjali preferuta tagħhom u jieħdu l-azzjoni meħtieġa.

L-esportazzjonijiet ta’ merkanzija li toriġina fl-UE trid tissodisfa r-rekwiżiti meħtieġa sabiex wieħed jibbenefika mill-preferenzi kummerċjali li jingħataw skont il-Ftehimiet Kummerċjali 15 . Il-materjali, il-partijiet u l-komponenti li joriġinaw fir-Renju Unit u huma inkorporati fi prodotti manifatturati fl-UE mhumiex se jikkwalifikaw bħala li joriġinaw fl-UE. Għaldaqstant l-operaturi jridu jadattaw il-ktajjen tal-provvista tagħhom u jiggarantixxu li l-merkanzija esportata u d-dokumenti u l-formalitajiet kollha jkunu konformi mar-rekwiżiti tar-regoli ta’ oriġini skont il-Ftehimiet Kummerċjali rilevanti.

Il-Kummissjoni ħejjiet għadd ta’ avviżi u dokumenti ta’ gwida dettaljati fil-qasam tad-dwana, tal-oriġini, tat-Taxxa fuq il-Valur Miżjud u tas-sisa li kollha kemm huma jinsabu online 16 . Kors ta’ tagħlim elettroniku qasir dwar il-konsegwenzi tal-Brexit fl-oqsma tad-dwana u tat-tassazzjoni u fajls ta’ introduzzjoni prattika dwar il-kunċetti doganali essenzjali wkoll jinsabu online 17 .

Fil-ħames Komunikazzjoni tagħha tat-12 ta’ Ġunju 2019 dwar it-Tħejjija għall-Brexit 18 , il-Kummissjoni enfasizzat li l-ewwel fażi tal-kampanja ta’ komunikazzjoni diġà ħarġet fid-dieher li xi negozji kienu ħadu azzjoni, iżda l-isforzi f’dan ir-rigward iridu jibqgħu għaddejjin fl-Istati Membri kollha sad-data tal-ħruġ. Issa l-Kummissjoni se tintensifika l-kampanja ta’ komunikazzjoni tagħha b’diversi ilsna 19 , li tnediet fit-18 ta’ Frar 2019, biex il-messaġġ tagħha jilħaq lin-negozji tal-UE u li l-informazzjoni marbuta tagħha hija disponibbli fid-dominju pubbliku 20 .

Min-naħa tagħhom, l-Istati Membri, u partikolarment dawk li huma l-punti ewlenin ta’ dħul u ħruġ tal-kummerċ tal-Unjoni Ewropea mar-Renju Unit, għamlu investimenti sinifikanti f’dak li għandu x’jaqsam mar-riżorsi umani u l-infrastruttura, kemm fiżiċi (inkluż fil-Postijiet ta’ Spezzjonijiet tal-Fruntiera) kif ukoll teknoloġiċi, biex jiffaċilitaw il-moviment ta’ merkanzija fil-fruntieri tagħhom mar-Renju Unit. Barra minn hekk, dawk l-Istati Membri impenjaw ruħhom u se jissoktaw jimpenjaw ruħhom fix-xhur li ġejjin f’kampanji ta’ informazzjoni u komunikazzjoni li jispjegaw lill-atturi kollha kkonċernati l-formalitajiet kollha meħtieġa b’rabta mad-dwana 21 u l-kontrolli sanitarji u fitosanitarji 22 . L-operaturi tas-suq, it-trasportaturi u l-ispedituri huma mistiedna jiffamiljarizzaw ruħhom mal-formalitajiet rilevanti, u mal-flussi tax-xogħol u mal-infrastruttura teknoloġika li jintużaw fir-rotta kummerċjali li biħsiebhom jużaw 23 .

3.2.Il-prodotti mediċinali, l-apparat mediku u s-sustanzi kimiċi

Filwaqt li t-tħejjijiet għall-ħruġ tar-Renju Unit fl-oqsma tal-prodotti mediċinali, tal-apparat mediku u tas-sustanzi kimiċi aċċelleraw fl-aħħar ta’ Marzu u fil-bidu t’April 2019, għad hemm bżonn li jsir sforz finali sinifikanti 24 . Flimkien mal-Aġenzija Ewropea għall-Mediċini, man-netwerk tal-Kapijiet tal-Aġenziji tal-Mediċini, mal-Awtoritajiet Kompetenti dwar in-Netwerk tal-Apparat Mediku u mal-Aġenzija Ewropea għas-Sustanzi Kimiċi, il-Kummissjoni qiegħda tkompli tikkomunika mal-partijiet ikkonċernati kollha biex tfakkarhom dwar il-ħtieġa li jitħejjew qabel il-31 ta’ Ottubru 2019. Xorta jibqa' l-fatt li li sakemm il-prodotti mediċinali, l-apparat mediku u s-sustanzi kimiċi ma jkunux konformi mar-regoli tal-UE, dawn ma jkunux jistgħu jitpoġġew fus-suq tal-UE wara dik id-data. Il-Kummissjoni tqis li l-estensjoni attwali tal-perjodu li hija prevista fl-Artikolu 50(3) tipprovdi biżżejjed żmien biex dan jinkiseb u ma hija qiegħda tippjana ebda miżura ta’ kontinġenza oħra.

Prodotti mediċinali

Il-prodotti mediċinali tal-bniedem u dawk veterinarji jew jiġu awtorizzati ċentralment mill-Kummissjoni jew jiġu awtorizzati fil-livell nazzjonali mill-Istati Membri. Iż-żewġ kategoriji ta’ prodotti mediċinali jintlaqtu mill-ħruġ tar-Renju Unit. Kif ġie enfasizzat fil-Ħames Komunikazzjoni dwar it-Tħejjija għall-Brexit tat-12 ta’ Ġunju 2019 25 , f’April 2019 l-Aġenzija Ewropea għall-Mediċini kienet diġà qrib li tiżgura l-konformità regolatorja għal kważi l-prodotti kollha li huma awtorizzati ċentralment, filwaqt li kienet meħtieġa aktar ħidma fir-rigward tal-prodotti li huma awtorizzati fil-livell nazzjonali. Minn dakinhar sar progress sinifikanti, u aktar minn 80 % tal-prodotti li huma awtorizzati fil-livell nazzjonali jinsabu mixjin sew biex jiksbu l-konformità regolatorja sal-31 ta’ Ottubru 2019. Parzjalment, il-progress inkiseb minħabba eżenzjoni temporanja li tagħti lill-kumpaniji sal-aħħar tal-2019 biex jittrasferixxu l-faċilitajiet tagħhom ta’ ttestjar tal-lottijiet mir-Renju Unit lejn l-UE27. Filwaqt li dawn l-iżviluppi huma pożittivi, l-industrija qiegħda tiġi mħeġġa ħafna biex tiżgura li l-prodotti awtorizzati kkonċernati kollha jkunu konformi mar-regoli sal-31 ta’ Ottubru 2019 u li t-trasferiment tal-faċilitajiet tagħhom tal-ittestjar tal-lottijiet jitlesta sal-31 ta’ Diċembru 2019, sabiex jiġi żgurat li l-prodotti rilevanti jkunu jistgħu jibqgħu jitpoġġew fis-suq tal-UE. Barra minn hekk, fid-dawl tal-isfidi partikolari li qegħdin jiġu ffaċċjati minn dawk l-Istati Membri li fil-passat kienu jiddependu ferm fuq l-awtorizzazzjoni tal-kummerċjalizzazzjoni tar-Renju Unit, l-industrija għandha r-responsabbiltà li taħdem ma’ dawk l-Istati Membri biex tiżgura li dawk il-prodotti mediċinali jibqgħu disponibbli.

Apparat mediku

Id-data mill-korpi notifikati tar-Renju Unit tindika li t-trasferiment lill-korpi notifikati tal-UE27 ta’ ċertifikati ta’ appart mediku li jitpoġġa fis-suq tal-UE27 jinsab għaddej sew u qed isir progress tajjeb sabiex il-maġġoranza vasta tal-apparat jiġi ffinalizzat sal-31 ta’ Ottubru 2019. It-Task Force tal-Brexit tan-netwerk tal-Awtoritajiet Kompetenti dwar l-Apparat Mediku, b’assoċjazzjoni fil-qrib mal-Kummissjoni, qiegħda tivverifika l-progress li qiegħed isir fir-rigward taċ-ċertifikati li għad fadal fuq il-bażi tar-rispons għal stħarriġ li sar fis-sajf 2019 u li kien jikkonċerna l-manifatturi u l-korpi notifikati. Ir-riżultati jindikaw li għad hemm xi manifatturi li għadhom ma ħadux il-miżuri kollha meħtieġa sabiex jittrasferixxu lil korp notifikat tal-UE27. Il-manifatturi li għad fadal u l-korpi notifikati tal-UE huma mħeġġa ħafna li jiżguraw li jikkonkludu t-trasferiment taċ-ċertifikati rilevanti kollha u tal-adattamenti neċessarji tat-tikketti tal-prodotti sad-data tal-ħruġ biex il-manifatturi jkunu jistgħu jibqgħu jpoġġu l-prodotti tagħhom fis-suq tal-UE wara l-ħruġ. Il-Kummissjoni u n-netwerk tal-Awtoritajiet Kompetenti dwar l-Apparat Mediku se jkomplu jsegwu kif tevolvi s-sitwazzjoni f’Settembru u f’Ottubru.

Is-sustanzi kimiċi

Fil-qasam tas-sustanzi kimiċi, huma biss 52 % tar-reġistranti kkonċernati tar-REACH 26 li kienu ttrasferixxew ir-reġistrazzjonijiet tagħhom lill-UE27 sa nofs Awwissu 2019. L-Aġenzija Ewropea tas-Sustanzi Kimiċi fetħet “perjodu għall-Brexit” fir-REACH-IT li jippermetti lir-reġistranti jieħdu l-passi meħtieġa biex jittrasferixxu r-reġistrazzjoni tagħhom fir-REACH qabel id-data tal-ħruġ. Dan il-perjodu se jibqa’ miftuħ sal-31 ta’ Ottubru 2019. Fir-rigward tal-awtorizzazzjonijiet tar-REACH, id-detenturi ta’ awtorizzazzjonijiet tar-Renju Unit, l-applikanti mir-Renju Unit għal awtorizzazzjonijiet u l-utenti downstream li jfornu sustanzi jew taħlitiet fl-UE27 bħala parti mill-ktajjen ta’ provvista eżistenti huma mħeġġa jieħdu l-passi meħtieġa biex jiżguraw il-konformità regolatorja għall-utenti downstream tal-UE27. Min-naħa tagħhom, l-utenti downstream tal-UE27 ta’ reġistranti mir-Renju Unit, id-detenturi ta’ awtorizzazzjoni mir-Renju Unit, l-applikanti tar-Renju Unit għal awtorizzazzjonijiet u l-utenti downstream tar-Renju Unit qed jingħataw il-pariri li jivverifikaw mal-fornituri tagħhom dwar jekk il-prodotti rilevanti hux se jkunu konformi mar-regoli sal-31 ta’ Ottubru 2019 u jieħdu miżuri għal rashom kif xieraq billi jużaw il-gwida disponibbli 27 . Il-konformità regolatorja hija essenzjali biex il-kimiki jibqgħu jipoġġew fis-suq tal-UE wara d-data tal-ħruġ.

3.3.Is-servizzi finanzjarji

Fil-qasam tas-servizzi finanzjarji, il-Kummissjoni tinkoraġġixxi bil-ħerqa lid-ditti tal-assigurazzjoni u lil operaturi oħrajn tas-servizzi finanzjarji li għadhom ma għamlux dan biex jiffinalizzaw il-miżuri ta’ tħejjija sal-31 ta’ Ottubru 2019.

Fid-19 ta’ Diċembru 2018, il-Kummissjoni adottat għadd limitat ta’ miżuri ta’ kontinġenza, fosthom żewġ deċiżjonijiet ta’ ekwivalenza limitati biż-żmien, li jippermettu lill-operaturi tal-UE27 jittrasferixxu r-relazzjonijiet kuntrattwali lil fornituri ta’ servizzi li jkollhom il-permess iwettqu l-attivitajiet tagħhom fl-UE27. L-ewwel waħda minn dawn id-deċiżjonijiet tippermetti lill-Awtorità Ewropea tat-Titoli u s-Swieq tirrikonoxxi temporanjament il-kontropartijiet ċentrali li bħalissa huma stabbiliti fir-Renju Unit u tippermettilhom ikomplu jipprovdu servizzi fl-Unjoni. Din tiskadi fit-30 ta’ Marzu 2020. It-tieni waħda tippermetti temporanjament lid-depożitorji ċentrali tat-titoli tar-Renju Unit li jkomplu jipprovdu servizzi notarili u ta’ manutenzjoni ċentrali lil operaturi fl-Unjoni. Din tiskadi fit-30 ta’ Marzu 2021. Barra minn hekk, il-Kummissjoni adottat żewġ Regolamenti Delegati li jippermettu lill-operaturi tal-UE27 b’kuntratti tad-derivattivi mhux ikklirjati pendenti jissostitwixxu l-kontropartijiet tar-Renju Unit ma’ kontrapartijiet tal-UE fi żmien 12-il xahar mill-ħruġ tarRenju Unit, mingħajr ma jitilfu t-trattament prudenzjali li japplika għal dawn il-kuntratti bħalissa. Il-valutazzjoni tal-Kummissjoni hija li fil-parti l-kbira d-ditti tħejjew għal ħruġ mingħajr ftehim, fosthom billi jinnovaw il-kuntratti pendenti tagħhom biex jissostitwixxu l-kontrapartijiet fir-Renju Unit, u li issa jridu jiffinalizzaw it-tħejjijiet tagħhom fil-perjodu ta’ żmien stipulat f’dawn il-miżuri ta’ kontinġenza. Għaldaqstant il-Kummissjoni mhijiex tqis li hemm il-ħtieġa li jiġu adottati aktar miżuri ta’ kontinġenza. Hija se tkompli tivvaluta s-sitwazzjoni fis-swieq wara d-data tal-ħruġ u mbagħad tiddeċiedi dwar x’azzjoni xierqa l-aħjar tieħu abbażi tal-leġiżlazzjoni tal-UE fis-seħħ fl-istadju rilevanti, b’kunsiderazzjoni tal-qafas partikolari li huwa introdott fir-Regolament dwar l-Infrastruttura tas-Suq Ewropew b’rabta mar-rekwiżiti tar-rikonoxximent ta’ kontropartijiet ċentrali ta’ pajjiżi terzi.

3.4.Is-sajd

Minbarra l-leġiżlazzjoni ta’ kontinġenza (ara t-taqsima 3.2), fil-qasam tas-sajd il-Kummissjoni ssoktat bil-konsultazzjonijiet tagħha mal-Istati Membri fir-rigward ta’ approċċ koordinat biex jitħejja għal xenarju fejn il-bastimenti tal-UE mhux se jibqa’ jkollhom aċċess għall-ibħra tar-Renju Unit. F’dan is-settur hemm impenn favur kooperazzjoni u koordinazzjoni mill-qrib, fosthom permezz ta’ qafas komuni għall-monitoraġġ tat-tibdil jew tad-distorsjonijiet fl-attivitajiet tas-sajd fl-ibħra tal-UE. Din il-ħidma se tintensifika fil-perjodu li ġej u l-Kummissjoni tinsab lesta li tiffaċilita aktar analiżi u diskussjonijiet. Fit-18 ta’ Lulju 2019 is-servizzi tal-Kummissjoni ppubblikaw ukoll dokument ta’ mistoqsijiet u tweġibiet dwar il-konsegwenzi fuq l-attivitajiet tas-sajd fil-każ ta’ ħruġ mingħajr ftehim 28 . Minbarra s-suġġetti tal-aċċess għall-ibħra (u l-kontroll ta’ dak l-aċċess) u l-opportunitajiet tas-sajd, id-dokument jagħti informazzjoni prattika dwar il-firxa ta’ suġġetti speċifiċi bħala kontrolli sanitarji u d-dwana. L-awtoritajiet u l-assoċjazzjonijiet tas-sajd tal-Istati Membri huma mistiedna jiċċirkolaw din l-informazzjoni b’mod mifrux.

4.L-aġġustament tekniku tal-miżuri ta’ kontinġenza u l-adozzjoni ta’ atti oħrajn li ġew imħabbra qabel

Kif inhu ddikjarat fil-ħames Komunikazzjoni dwar it-Tħejjija għall-Brexit tat-12 ta’ Ġunju 2019 29 , il-Kummissjoni se tevalwa l-miżuri kollha fil-livell tal-UE li jkunu ġew adottati bħala tħejjija għall-ħruġ tar-Renju Unit, u kkonkludiet li dawn l-atti leġiżlattivi u mhux leġiżlattivi tal-UE għadhom jissodisfaw l-għanijiet maħsuba tagħhom. Għaldaqstant ma hemm l-ebda ħtieġa li jiġu emendati fis-sustanza. Min-naħa l-oħra, fid-dawl tal-iskeda l-ġdida li tirriżulta mill-estensjoni kurrenti, hemm il-ħtieġa li jsiru xi aġġustamenti tekniċi mmirati f’setturi speċifiċi. Dawn huma spjegati fit-taqsimiet li ġejjin.

B’rabta mal-atti ta’ kontinġenza mhux leġiżlattivi adottati mill-Kummissjoni fil-qasam tal-leġiżlazzjoni sanitarja tal-UE fid-dawl tad-data tal-ħruġ preċedenti tat-12 ta’ April 2019, li ma baqgħux rilevanti minħabba l-estensjoni tal-perjodu previst fl-Artikolu 50(3) tat-TUE, il-Kummissjoni se tirrivaluta s-sitwazzjoni qrib id-data tal-ħruġ u, jekk ir-Renju Unit jibqa’ jagħti l-assigurazzjonijiet neċessarji, se tadotta l-miżuri mill-ġdid biex tiżgura li jibdew japplikaw fl-1 ta’ Novembru 2019.

4.1.It-trasport

Fil-qasam tat-trasport, iddaħħlu miżuri ta’ kontinġenza biex jitħarsu l-konnessjonijiet tat-trasport essenzjali għall-modi tat-trasport li jkunu affettwati l-aktar: L-avjazzjoni, il-ferrovija u t-trasport bit-triq għall-passiġġieri u l-merkanzija.

B’konformità mal-prinċipji sottostanti tal-miżuri ta’ kontinġenza kollha, ir-Regolamenti ta’ kontinġenza li jippermettu t-tkomplija tal-konnettività huma unilaterali, b’kamp ta’ applikazzjoni limitat and japplikaw għal perjodu limitati ta’ żmien. Ir-Regolament jiggarantixxi l-konnettività tal-merkanzija u tal-passiġġieri 30 bit-triq ġie adottat ftit ta’ żmien wara l-ewwel estensjoni qasira tal-perjodu ta’ żmien imsemmi fl-Artikolu 50(3) tat-TUE, sat-12 ta’ April 2019, bl-applikazzjoni li tintemm fil-31 ta’ Diċembru 2019, u dan anke fid-dawl tal-arranġamenti possibbli għall-konnettività bażika li jridu jsiru fil-kuntest tas-sistema ta’ kwoti multilaterali tal-Konferenza Ewropea tal-Ministri tat-Trasport (l-ECMT). Għal raġunijiet simili, il-perjodu ta’ applikazzjoni tar-Regolament li jiggarantixxi l-konnettività bażika bl-ajru 31 ġie allinjat mat-tmiem tal-istaġun tax-xitwa tal-2019/2020 tal-Assoċjazzjoni Internazzjonali tat-Trasport bl-Ajru (il-IATA) u għaldaqstant se jiskadi fit-30 ta’ Marzu 2020.

Sabiex jiġi garantit li dawn ir-Regolamenti ta’ kontinġenza jiksbu l-għanijiet tagħhom kif ġew definiti inizjalment, fosthom fir-rigward tal-perjodu ta’ applikazzjoni, u fid-dawl tal-posponiment tad-data tal-ħruġ tar-Renju Unit b’seba’ xhur, illum il-Kummissjoni adottat proposta li testendi l-perjodu ta’ validità tar-Regolamenti (UE) 2019/501 u (UE) 2019/502 bl-istess perjodu ta’ żmien. Għaldaqstant qed issir il-proposta li l-perjodu ta’ applikazzjoni tar-Regolament li jiggarantixxi l-konnettività bażika bit-triq għall-merkanzija u l-passiġġieri jiġi estiż sal-31 ta’ Lulju 2020. Mingħajr preġudizzju għall-kompetenza esklużiva tal-Unjoni, l-Istati Membri jenħtieġ li jissoktaw bil-ħidma tagħhom biex iżidu l-għadd ta’ permessi tal-ECMT disponibbli għal trasport lejn ir-Renju Unit fil-ġejjieni. Qed jiġi propost ukoll li l-perjodu ta’ applikazzjoni tar-Regolament ta’ kontinġenza li jiggarantixxi l-konnettività bażika bl-ajru jiġi estiż sal-24 ta’ Ottubru 2020, u għaldaqstant jinżamm l-allinjament mal-istaġuni tal-IATA.

Fil-qasam tat-trasport bl-ajru, ir-Regolament ta’ kontinġenza (UE) 2019/502 jinkludi wkoll mekkaniżmu speċifiku biex il-linji tal-ajru tal-UE jikkonformaw mar-rekwiżiti ta’ sjieda u kontroll maġġoritarji wara l-ħruġ tar-Renju Unit. Issa l-awtoritajiet nazzjonali ffinalizzaw l-analiżi tagħhom tal-pjanijiet li tressqu mil-linji tal-ajru milquta u infurmaw lil-linji tal-ajru kkonċernati u lill-Kummissjoni dwar ir-riżultati pożittivi tal-valutazzjoni tagħhom. Il-Kummissjoni kkuntattjat lill-awtoritajiet nazzjonali responsabbli u f’ċerti każijiet uriet id-dubji tagħha dwar jekk il-pjanijiet imressqa jiggarantux il-konformità mar-rekwiżiti tal-UE. Il-linji tal-ajru milquta jridu jiżguraw konformità sħiħa mar-rekwiżit tal-UE dwar is-sjieda u kontroll maġġoritarji sa mhux aktar tard minn tmiem il-perjodu previst fir-Regolament (UE) 2019/502. Jekk l-applikazzjoni tar-Regolament (UE) 2019/502 tiġi estiża b’konformità mal-proposta tal-lum, dak il-perjodu jintemm fit-30 ta’ April 2020 32 . L-awtoritajiet nazzjonali huma responsabbli milli jiggarantixxu l-konformità mad-dritt tal-UE u l-infurzar effettiv ta’ dan id-dritt sa dik id-data.

Filwaqt li ma ġiet adottata l-ebda miżura ta’ kontinġenza fir-rigward tat-trasport tal-passiġġieri okkażjonali bix-xarabank, saru t-tħejjijiet meħtieġa biex il-konnettività f’dan il-qasam tiġi żgurata mid-data tal-ħruġ abbażi ta’ strument internazzjonali, il-Ftehim Interbus 33 . Ir-Renju Unit iddepożita l-istrument ta’ adeżjoni tiegħu għal dak il-ftehim, li se jissieħeb fih bħala parti għalih innifsu.

4.2.L-attivitajiet tas-sajd

Meta wieħed iqis ir-riskju ta’ ħruġ mingħajr ftehim fl-1 ta’ Novembru 2019, l-importanza tas-sajd għall-għajxien ekonomiku ta’ bosta komunitajiet kostali, u sabiex jiġi garantit is-sajd sostenibbli fl-ibħra rilevanti, huwa tassew importanti li jiġu previsti l-arranġamenti li jippermettu l-issoktar tal-aċċess reċiproku għas-sajd tal-bastimenti tal-UE u tar-Renju Unit fl-ibħra ta’ xulxin, b’konformità mal-kundizzjonijiet stipulati fir-Regolament tal-Kunsill rilevanti li jistabbilixxu l-opportunitajiet tas-sajd, sakemm dawk l-opportunitajiet tas-sajd stabbiliti miż-żewġ partijiet flimkien ikunu konformi mal-ġestjoni sostenibbli mal-istokkijiet rilevanti. Għal dan il-għan, illum il-Kummissjoni adottat proposta biex testendi r-Regolament ta’ kontinġenza dwar l-awtorizzazzjonijiet għas-sajd li ġie adottat f’Marzu 2019 34 sa tmiem l-2020. Dan iżomm fis-seħħ qafas legali ssimplifikat li jippermetti lill-Unjoni Ewropea tkompli tagħti awtorizzazzjonijiet lill-bastimenti tar-Renju Unit li jidħlu fl-ibħra tal-UE u li tamministra t-talbiet għal awtorizazzjonijiet minn bastimenti tal-UE biex jidħlu fl-ibħra tar-Renju Unit, dejjem jekk jiġu ssodisfati l-kundizzjonijiet dwar l-aċċess reċiproku u s-sostenibbiltà. Dan il-qafas temporanju, li jipprovdi ċertezza legali għas-sajjieda u jiggarantixxi l-konservazzjoni tal-istokkijiet tal-ħut, huwa neċessarju fin-nuqqas ta’ ftehim dwar is-sajd mar-Renju Unit fl-istatus il-ġdid tiegħu bħala pajjiż terz. Abbażi ta’ dan, u abbażi ta’ koordinazzjoni minn qabel mal-Istati Membri, il-Kummissjoni tinsab lesta li lir-Renju Unit tippreżentalu t-talbiet għal awtorizzazzjoni tal-bastimenti tal-UE minnufih hekk kif ir-Renju Unit joħroġ mill-Unjoni Ewropea. Il-proposta żżomm il-possibbiltà ta’ skambji ta’ kwoti mar-Renju Unit fl-2020, li permezz tagħhom il-Kummissjoni tkun tista’ teżegwixxi l-iskambji ta’ kwoti mar-Renju Unit b’konformità mal-proċedura stipulata fil-proposta.

4.3.Il-baġit tal-UE

Fil-każ ta’ ħruġ mingħajr ftehim, f’bosta każi r-Renju Unit u l-benefiċjarji mir-Renju Unit mhumiex se jkunu jistgħu japplikaw għal finanzjament ġdid u mhumiex se jibqgħu eliġibbli li jirċievu finanzjament jew se jħabbtu wiċċhom mat-terminazzjoni tal-parteċipazzjoni kurrenti tagħhom fil-programmi tal-UE. Għaldaqstant il-pagamenti jkollhom jiġu sospiżi, u jkunu jistgħu jsiru biss jekk u meta jiġi miftiehem saldu finanzjarju bejn l-Unjoni Ewropea u r-Renju Unit. F’ċerti każijiet, jista’ jkun hemm il-ħtieġa li jiġu terminati xi kuntratti jekk dawn ma jkunux għadhom jissodisfaw r-rekwiżiti ta’ eliġibbiltà tal-programmi tal-UE, jew ikun hemm bżonn li jsir tibdil sabiex tiġi garantita l-kompatibbiltà mar-rekwiżiti ta’ eliġibbiltà 35 . Biex id-diżordni maħluq minn dak l-eżitu jiġi minimizzat, fid-9 ta’ Lulju 2019 il-Kummissjoni Ewropea adottat Regolament ta’ kontinġenza għall-baġit tal-UE 36 li jżomm l-eleġibbiltà tar-Renju Unit u tal-benefiċjarji mir-Renju Unit għall-ispejjeż li jġarrbu fl-2019, sakemm ir-Renju Unit jissodisfa sensiela ta’ kundizzjonijiet, partikolarment li tħallas sehemha mill-baġit tal-UE għall-2019 qabel ċertu data u li tippermetti l-awditjar u l-kontrolli meħtieġa, fosthom fit-territorju tagħha, kif inhu previst fir-regoli rilevanti tal-UE. Flimkien ma’ din il-Komunikazzjoni, il-Kummissjoni qiegħda tikkonsulta ma’ esperti tal-Istati Membri, b’konformità mal-proċeduri applikabbli, dwar abbozz tar-regolament delegat li jadatta l-iskadenzi fir-Regolament ta’ kontinġenza, fid-dawl tal-estensjoni tal-perjodu previst fl-Artikolu 50(3) tat-TUE.

Fis-segwitu tal-estensjoni tal-perjodu previst fl-Artikolu 50(3) tat-TUE sal-31 ta’ Ottubru 2019, il-miżura kif inhi bħalissa tkopri perjodu ta’ xahrejn biss. Għal din ir-raġuni, illum il-Kummissjoni adottat proposta li tirreplika r-Regolament ta’ kontinġenza kurrenti għall-2019 għall-2020. Għaldaqstant ir-Renju Unit u l-benefiċjarji mir-Renju Unit jibqgħu eliġibbli li jipparteċipaw fi programmi taħt il-baġit tal-UE u li jirċievu finanzjament sa tmiem l-2020 jekk ir-Renju Unit jaċċetta u jissodisfa l-kundizzjonijiet tar-Regolament ta’ kontinġenza tal-2019, iħallas il-kontribuzzjonijiet baġitarji għall-2020 u jippermetti li jsiru l-awditjar u l-kontrolli meħtieġa.

4.4.Appoġġ finanzjarju ta’ kontinġenza

Kif tħabbar fir-raba’ Komunikazzjoni dwar it-Tħejjija għall-Brexit tal-10 ta’ April 2019 37 , il-Kummissjoni esplorat kif il-programmi u l-istrumenti eżistenti jkunu jistgħu jintużaw bħala appoġġ għall-aktar setturi milquta, partikolarment l-agrikoltura u s-sajd, ir-reġjuni u l-awtoritajiet nazzjonali, li se jintlaqtu minn diżordni minkejja t-tħejjijiet. L-iskop ta’ dan il-pakkett ta’ appoġġ finanzjarju huwa li jagħti, fil-limiti tar-riżorsi disponibbli, appoġġ lil dawk li se jintlaqtu l-aktar minn ħruġ mingħajr ftehim.

Fis-settur agrikolu, il-firxa sħiħa tal-istrumenti eżistenti għal appoġġ għas-suq u appoġġ finanzjarju dirett lill-bdiewa se jkunu disponibbli biex jittaffa l-agħar impatt li xenarju ta’ ebda ftehim jista’ jkollu fuq is-swieq agroalimentari. L-appoġġ finanzjarju nazzjonali għandu jkun paragunabbli mal-miżuri eċċezzjonali tas-suq tal-UE sabiex jimmultiplika l-impatt tal-intervent tal-Unjoni Ewropea.

Illum il-Kummissjoni adottat proposta li testendi l-kamp ta’ applikazzjoni tal-Fond ta’ Solidarjetà Ewropew sabiex ikopri l-piż finanzjarji serju li se jitpoġġa fuq l-Istati Membri u li jkun ikkaġunat direttament minn ħruġ mingħajr ftehim u li ma jkunx seta’ jiġi evitat minn qabel. Dan jinvolvi appoġġ għal skemi ta’ għajnuna Statali għan-negozji, miżuri li jippreservaw l-impjiegi eżistenti u jiżguraw il-funzjonament tal-fruntiera, tad-dwana u tal-kontrolli sanitarji u fitosanitarji.

Illum il-Kummissjoni adottat ukoll proposta li tiżgura li l-Fond Ewropew għall-Aġġustament tal-Globalizzazzjoni jkun disponibbli biex jingħata appoġġ lill-ħaddiema li jispiċċaw qiegħda bħala konsegwenza ta’ ħruġ mingħajr ftehim, suġġett għal ċerti kundizzjonijiet.

Minbarra ż-żewġ miżuri leġiżlattivi msemmija aktar ’il fuq, jistgħu jsiru interventi oħrajn mingħajr il-ħtieġa li tiġi emendata ebda leġiżlazzjoni. Il-Kummissjoni tinsab lesta li taġixxi malajr jekk l-Istati Membri jiddeċiedu li jemendaw il-programmi tagħhom tal-fondi strutturali u ta’ investiment 38 sabiex talloka parti mir-riżorsi disponibbli, fil-limitu tal-pakketti nazzjonali tagħhom, biex jiġ indirizzati l-isfidi kkawżati minn ħruġ mingħajr ftehim.. Il-Kummissjoni se taġixxi malajr ukoll fil-każ li l-Istati Membri jkunu jridu jbiddlu l-allokazzjoni tal-pakketti nazzjonali tagħhom fir-rigward tal-Fond Marittimu u tas-Sajd Ewropew. Fl-aħħar nett, il-Kummissjoni tinsab lesta li tipproponi emendi għall-ftehim bejn l-Unjoni Ewropea u l-Fond Ewropew tal-Investiment sabiex tippermetti l-użu tal-programm għall-Kompetittività tal-Intrapriżi Żgħar u Medji (COSME) sabiex jiġi ffaċilitat l-aċċess għall-finanzjament tal-intrapriżi żgħar u medji li jkollhom bżonn jinvestu biex jimmodifikaw l-organizzazzjoni tan-negozju tagħhom bħala konsegwenza tal-ħruġ tar-Renju Unit mingħajr ftehim, suġġett għal kundizzjonijiet xierqa u d-disponibbiltà baġitarja.

Għal appoġġ aktar immedjat lill-partijiet ikkonċernati milquta, pereżempju għall-kumpaniji żgħar u medji b’esponiment sinifikanti għar-Renju Unit, ir-regoli tal-UE dwar l-Għajnuna mill-Istat joffru soluzzjonijiet flessibbli għal miżuri nazzjonali ta’ appoġġ.

5.L-Irlanda

Fin-nuqqas ta’ Ftehim dwar il-Ħruġ, it-tluq tar-Renju Unit mill-UE se jwassal għal żewġ żoni fiskali u regolatorji distinti fuq il-gżira tal-Irlanda. Skont il-liġi internazzjonali, u b’mod partikolari ir-regoli tal-Organizzazzjoni Dinjija tal-Kummerċ, mill-1 ta’ Novembru 2019 kemm l-UE kif ukoll ir-Renju Unit se jkunu obbligati li jimponu t-tariffi applikabbli għall-prodotti minn kwalunkwe membru ieħor tal-Organizzazzjoni Dinjija tal-Kummerċ fuq il-prodotti ta’ xulxin, mingħajr ebda arranġament preferenzjali. Barra minn hekk, id-dritt tal-UE se jirrekjedi li l-merkanzija kollha li tidħol fl-Irlanda mir-Renju Unit trid tkun suġġetta għall-verifiki u l-kontrolli rilevanti għall-protezzjoni tas-sikurezza u tas-saħħa taċ-ċittadini tal-UE, għall-ħarsien tal-integrità tas-suq intern u għall-infurzar tal-kompatibbiltà mal-obbligi fiskali (id-dazji, it-taxxi indiretti).

Il-Kummissjoni u l-Irlanda qed ikompli jaħdmu id f’id, fil-kuntest tas-sitwazzjoni unika tal-gżira tal-Irlanda u taż-żewġ għanijiet tagħhom li jħarsu l-integrità tas-suq intern filwaqt li jevitaw fruntiera fiżika, li jidentifikaw arranġamenti kemm għal soluzzjonijiet ta’ kontinġenza għal perjodu immedjat ta’ wara ħruġ mingħajr ftehim u għal soluzzjoni aktar stabbli għal wara. Il-garanzija ta’ kontinġenza prevista fil-Ftehim dwar il-Ħruġ hija l-unika soluzzjoni li ġiet identifikata li tissalvagwardja l-Ftehim tal-Ġimgħa l-Kbira, tiżgura l-konformità mal-obbligi tal-liġi internazzjonali u tħares l-integrità tas-suq intern.

6.Ir-rispons għad-diżordni wara ħruġ mingħajr ftehim

Jekk ir-Renju Unit joħroġ mill-Unjoni Ewropea mingħajr ftehim, ħafna atturi huma mistennija jesperjenzaw diżordni, partikolarment fl-ewwel jiem. Il-Kummissjoni u l-Istati Membri se jibqa’ f’kuntatt mill-qrib biex jikkoordinaw ir-rispons tagħhom għal kwalunkwe kwistjoni li tista’ tinqala’ u biex jidentifikaw l-aħjar mod kif jindirizzawhom. Għall-perjodu minnufih wara ħruġ mingħajr ftehim, il-Kummissjoni fetħet ċentru telefoniku għall-amministrazzjonijiet tal-Istati Membri, li jagħtihom aċċess rapidu għall-għarfien espert tas-servizzi tal-Kummissjoni permezz tal-ħolqien ta’ kanal ta’ komunikazzjoni dirett, anke għall-finijiet li tiġi ffaċilitata l-koordinazzjoni meħtieġa bejn l-awtoritajiet nazzjonali. Iċ-ċittadini, in-negozji u l-partijiet ikkonċernati tal-UE jistgħu jikkuntattjaw l-amministrazzjonijiet nazzjonali jew lokali tagħhom permezz tal-kanali li jużaw is-soltu. Huma jistgħu jikkuntattjaw ukoll iċ-Ċentru Telefoniku tal-Europe Direct rigward kwalunkwe mistoqsija (Telefonati mingħajr ħlas fuq 00 800 6 7 8 9 10 11 minn fejn ikun fl-Unjoni Ewropea). Fil-perjodu ta’ wara l-ħruġ is-sigħat tal-ftuħ taċ-Ċentru Telefoniku Europe Direct se jiġu estiżi.

7.Konklużjonijiet

Filwaqt li l-għan tal-UE huwa l-ħruġ ordnat tar-Renju Unit, il-Kummissjoni ttenni li kulħadd jeħtieġ li jitħejja għall-possibbiltà ta’ ħruġ mingħajr ftehim tar-Renju Unit fl-1 ta’ Novembru 2019. Il-Kummissjoni tissokta bl-appell tagħha lill-partijiet ikkonċernati kollha biex jiffinalizzaw it-tħejjijiet tagħhom u tenfasizza partikolarment il-ħtieġa li l-industrija taġixxi f’oqsma bħala mediċini, l-apparat mediku u s-settur kimiku. Hija tħeġġeġ ukoll lill-operaturi kollha tal-UE li se jkunu qed jagħmlu negozju jew jittrasportaw merkanzija lejn ir-Renju Unit wara l-ħruġ biex jikkunsidraw il-ħtieġa ta’ verifiki u proċeduri doganali, sanitarji u fitosanitarji kif ukoll il-problemi loġistiċi li wieħed ikun jistenna fil-kuntest legali ġdid b’rabta mal-qsim tal-fruntieri lejn jew mir-Renju Unit.

Fl-istess ħin ta’ din il-Komunikazzjoni, il-Kummissjoni adottat tliet proposti leġiżlattivi biex jiġi kkunsidrat il-posponiment tad-data tal-ħruġ permezz tal-estensjoni, jekk dan ikun meħtieġ, tad-dewmien tal-miżuri ta’ kontinġenza eżistenti fl-oqsma tat-trasport u tas-sajd jew li jipprovdu qafas għall-2020 fil-kuntest tal-baġit tal-UE. Hija adottat ukoll żewġ proposti leġiżlattivi oħrajn bħala parti minn pakkett li jippermetti appoġġ finanzjarju ta’ kontinġenza jekk dan ikun meħtieġ. Fl-aħħar nett, hija bagħtet tikkonsulta ma’ esperti tal-Istati Membri, b’konformità mal-proċeduri applikabbli, att delegat li jadatta l-iskadenzi previsti mir-Regolament ta’ kontinġenza dwar il-baġit tal-UE għall-2019 39 għad-data tal-ħruġ kurrenti. Il-Kummissjoni ssejjaħ lill-koleġiżlaturi biex jiżguraw l-adozzjoni rapida tal-atti leġiżlattivi proposti sabiex, fejn meħtieġ, dawn ikunu fis-seħħ sad-data tal-ħruġ tar-Renju Unit.

Qrib id-data tal-ħruġ, il-Kummissjoni se testendi s-sigħat taċ-ċentru telefoniku tagħha għaċ-ċittadini u n-negozji u se tiftaħ ċentru telefoniku apposta biex l-awtoritajiet tal-Istati Membri jipprovdu l-għarfien u jiffaċilitaw il-koordinazzjoni meħtieġa bejn l-awtoritajiet nazzjonali. Il-Kummissjoni ssejjaħ ukoll lill-Istati Membri biex isaħħu l-attivitajiet ta’ komunikazzjoni li kienu għaddejjin aktar kmieni din is-sena u biex jikkomunikaw mal-partijiet ikkonċernati nazzjonali u jieħdu l-miżuri meħtieġa biex ikunu jistgħu jieħdu azzjoni għal kull diżordni eventwali, partikolarment fil-perjodu minnufih wara ħruġ mingħajr ftehim.

(1)

     Id-Deċiżjoni tal-Kunsill Ewropew (UE) 2019/584, ĠU L 101, 11.4.2019, p. 1. Id-Deċiżjoni tipprevedi wkoll li jekk ir-Renju Unit jirratifika l-Ftehim dwar il-Ħruġ qabel il-31 ta’ Ottubru, il-ħruġ ser iseħħ fl-ewwel jum tax-xahar wara l-finalizzazzjoni tal-proċedura ta’ ratifika. Preċedentement, fuq talba li saret mir-Renju Unit, il-Kunsill Ewropew kien iddeċieda l-ewwel estensjoni fit-22 ta’ Marzu 2019 (id-Deċiżjoni tal-Kunsill Ewropew (UE) 2019/476, ĠU L 80I, 22.3.2019, p. 1).

(2)

     Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika, ĠU, C 144I, 25.4.2019, p. 1.

(3)

     COM(2019) 276 final.

(4)

      https://ec.europa.eu/info/files/overview-table-residence-rights-uk-nationals-eu27-member-states_en .

(5)

      https://www.gov.uk/eusettledstatus .

(6)

     Ir-Regolament (UE) 2019/500 tal-Parlament Ewropew u tal-Kunsill tal-25 ta’ Marzu 2019 li jistabbilixxi miżuri ta’ kontinġenza fil-qasam tal-koordinazzjoni tas-sigurtà soċjali wara l-ħruġ tar-Renju Unit mill-Unjoni Ewropea, ĠU L 85I, 27.3.2019, p. 35.

(7)

      https://ec.europa.eu/info/files/overview-national-measures-area-social-security-coordination_en .

(8)

     19.7.2018: COM(2018) 556 final/2; 13.11.2018: COM(2018) 880 final; 19.12.2018: COM(2018) 890 final; 10.4.2019: COM (2019) 195 final; 12.06.2019: COM(2019) 276 final.

(9)

      https://ec.europa.eu/info/files/brexit-preparedness-checklist .

(10)

      https://ec.europa.eu/info/brexit/brexit-preparedness/preparedness-notices_mt .

(11)

     It-tariffi applikabbli għall-merkanzija li tidħol mir-Renju Unit fit-territorju doganali tal-Unjonimid-data tal-ħruġ se jkunu l-istess bħal dawk applikabbli għall-merkanzija litoriġina minn pajjiżi terzi li l-UE ma għandhiex ftehimiet kummerċjali preferenzjali magħhom. It-tariffi applikabbli jinsabu fil-bażi ta’ data TARIC ( https://ec.europa.eu/taxation_customs/dds2/taric/taric_consultation.jsp?Lang=en ).

(12)

      https://www.wto.org/english/res_e/booksp_e/tariff_profiles19_e.pdf .  

(13)

     Sors: WTO World Tariff profile 2019.

(14)

      https://ec.europa.eu/taxation_customs/business/customs-procedures/what-is-customs-transit/common-union-transit_en .

(15)

     Ara l-avviż tal-Kummissjoni lill-partijiet ikkonċernati dwar dan is-suġġett: https://ec.europa.eu/info/files/preferential-rules-origin_mt .

(16)

      https://ec.europa.eu/taxation_customs/uk_withdrawal_en#heading_2 .

(17)

      https://ec.europa.eu/taxation_customs/eu-training/general-overview_en .

(18)

     COM(2019) 276 final.

(19)

      https://ec.europa.eu/taxation_customs/uk_withdrawal_en# .

(20)

      https://ec.europa.eu/taxation_customs/uk_withdrawal_en#heading_4 .

(21)

     Pereżempju, għall-Belġju l-informazzjoni dwar il-formalitajiet doganali b’rabta mal-Brexit tinsab hawnhekk: https://finance.belgium.be/en/customs_excises/enterprises/brexit ; għall-Franza: http://douane.gouv.fr/articles/c957-entreprises-preparez-vous-au-brexit ; għan-Netherlands: https://www.getreadyforbrexit.eu/en .

Barra minn hekk, l-informazzjoni għal min juża il-portijiet tar-Renju Unit u l-Eurotunnel tinsab hawnhekk: https://www.gov.uk/government/publications/communications-pack-roll-on-roll-off-ports-and-eurotunnel-in-the-event-of-a-no-deal-eu-exit/information-for-users-of-roll-on-roll-off-ports-and-eurotunnel-in-a-no-deal-scenario .

(22)

     Pereżempju, għall-Belġju l-informazzjoni dwar il-kontrolli sanitarji u fitosanitarji b’rabta mal-Brexit tinsab hawnhekk: http://www.favv-afsca.fgov.be/brexit/ ; għall-Franza: https://agriculture.gouv.fr/le-brexit-et-les-controles-sanitaires-et-phytosanitaires and for the Netherlands at: https://www.nvwa.nl/onderwerpen/brexit/ .

(23)

     Ara, pereżempju, l-informazzjoni dwar il-“fruntiera intelliġenti” li ġiet imfasslat mid-Dwana Franċiża (disponibbli hawnhekk: http://www.douane.gouv.fr/articles/a16171-the-smart-border ) ; dwar is-Sistema Komunitarja tal-Portijiet tan-Netherlands (disponibbli hawnhekk: https://www.portbase.com/en/ ); U dwar is-sistemi li qegħdin jintużaw fil-portijiet Belġjani ta’ Zeebrugge (disponibbli hawnhekk: https://rxseaport.eu/en/ ) u ta’ Antwerp (disponibbli hawnhekk: https://www.nxtport.com/ ).

(24)

     Iċ-ċifri li ngħatawrigward prodotti li għadhom ma jissodisfawxil-konformità regolatorja li ssemmiet huma stimi prudenti li ma jikkunsidrawx li jista’ jkun li diversi prodotti minnhom ma humiex se jkunu jeħtieġu azzjoni ta’ tħejjija għall-Brexit għal raġunijiet kummerċjali li ma humiex magħrufin mill-Kummissjoni. Pereżempju, xi prodotti jistgħu jiġu kkumerċjalizzati biss fir-Renju Unit, ma jkunux għadhom fis-suq jew ikunu fil-proċess li jiġu sostitwiti minn prodott ieħor.

(25)

     COM(2019) 276 final.

(26)

     Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta’ Diċembru 2006 dwar ir-Reġistrazzjoni, il-Valutazzjoni, l-Awtorizzazzjoni u r-Restrizzjoni ta’ Sustanzi Kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE tal-Kummissjoni, ĠU L 396, 30.12.2006, p. 1.

(27)

      https://ec.europa.eu/info/brexit/brexit-preparedness/preparedness-notices_mt ; and https://echa.europa.eu/uk-withdrawal-from-the-eu .

(28)

      https://ec.europa.eu/info/sites/info/files/fisheries-qanda_en.pdf .

(29)

     COM(2019) 276 final.

(30)

     Ir-Regolament (UE) 2019/501 tal-Parlament Ewropew u tal-Kunsill tal-25 ta’ Marzu 2019 dwar regoli komuni li jiżguraw il-konnettività bażika tat-trasport tal-merkanzija bit-triq u tal-passiġġieri bit-triq fir-rigward tal-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni, ĠU L 85I, 27.3.2019, p. 39.

(31)

     Ir-Regolament (UE) 2019/502 tal-Parlament Ewropew u tal-Kunsill tal-25 ta’ Marzu 2019 dwar regoli komuni biex tiġi żgurata konnettività bażika fit-trasport bl-ajru fir-rigward tal-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni ĠU L 85I, 27.3.2019, p. 49.

(32)

     L-Artikolu 7(1) tar-Regolament (UE) 2019/502.

(33)

     Ftehim dwar it-trasport internazzjonali okkazjonali ta’ passiġġieri bil-kowċ u x-xarabank (il-Ftehim Interbus), ĠU L 321, 26.11.2002, p. 13.

(34)

     Ir-Regolament (UE) 2019/498 tal-Parlament Ewropew u tal-Kunsill tal-25 ta’ Marzu 2019 li jemenda r-Regolament (UE) 2017/2403 fir-rigward tal-awtorizzazzjonijiet tas-sajd għall-bastimenti tas-sajd tal-Unjoni fl-ilmijiet tar-Renju Unit u għall-operazzjonijiet tal-bastimenti tas-sajd tar-Renju Unit fl-ilmijiet tal-Unjoni ĠU L 85I, 27.3.2019, p. 25.

(35)

     Pereżempju, id-detenturi ta’ għotjiet mill-Kunsill Ewropew tar-Riċerka taħt il-programm Orizzont 2020 għadnhom il-possibbiltà li jirrilokaw l-għotjiet tagħhom lejn pajjiż ieħor. Se tinħareġ gwida dwar il-kompatibbiltà mar-rekwiżiti ta’ eliġibbiltà rilevanti.

(36)

     Ir-Regolament tal-Kunsill (UE, Euratom) 2019/1197 tad-9 ta’ Lulju 2019 dwar miżuri li jikkonċernaw l-implimentazzjoni u l-finanzjament tal-baġit ġenerali tal-Unjoni fl-2019 fir-rigward tal-ħruġ tar-Renju Unit mill-Unjoni, ĠU L 189, 15.7.2019, p. 1.

(37)

     COM(2019) 195 final.

(38)

     Il-Fond Ewropew għall-Iżvilupp Reġjonali, il-Fond Agrikolu Ewropew għall-Iżvilupp Rurali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd.

(39)

     Ir-Regolament tal-Kunsill (UE, Euratom) 2019/1197 tad-9 ta’ Lulju 2019 dwar miżuri li jikkonċernaw l-implimentazzjoni u l-finanzjament tal-baġit ġenerali tal-Unjoni fl-2019 fir-rigward tal-ħruġ tar-Renju Unit mill-Unjoni, ĠU L 189, 15.7.2019, p. 1.