EUR-Lex Access to European Union law
This document is an excerpt from the EUR-Lex website
Document 52018AE2960
Opinion of the European Economic and Social Committee on ‘Proposal for a Regulation of the European Parliament and of the Council on the alignment of reporting obligations in the field of environment policy and thereby amending Directives 86/278/EEC, 2002/49/EC, 2004/35/EC, 2007/2/EC, 2009/147/EC and 2010/63/EU, Regulations (EC) No 166/2006 and (EU) No 995/2010, and Council Regulations (EC) No 338/97 and (EC) No 2173/2005’ (COM(2018) 381 final — 2018/0205 (COD))
Opinjoni tal-Kumitat Ekonomiku u Soċjali Ewropew dwar il-“Proposta għal Regolament tal-Parlament Ewropew u tal-Kunsill dwar l-allinjament tal-obbligi ta’ rapportar fil-qasam tal-politika ambjentali u b’hekk jemenda d-Direttivi 86/278/KEE, 2002/49/KE, 2004/35/KE, 2007/2/KE, 2009/147/KE u 2010/63/UE, ir-Regolamenti (KE) Nru 166/2006 u (UE) Nru 995/2010, u r-Regolamenti tal-Kunsill (KE) Nru 338/97 u (KE) Nru 2173/2005” (COM(2018) 381 final — 2018/0205 (COD))
Opinjoni tal-Kumitat Ekonomiku u Soċjali Ewropew dwar il-“Proposta għal Regolament tal-Parlament Ewropew u tal-Kunsill dwar l-allinjament tal-obbligi ta’ rapportar fil-qasam tal-politika ambjentali u b’hekk jemenda d-Direttivi 86/278/KEE, 2002/49/KE, 2004/35/KE, 2007/2/KE, 2009/147/KE u 2010/63/UE, ir-Regolamenti (KE) Nru 166/2006 u (UE) Nru 995/2010, u r-Regolamenti tal-Kunsill (KE) Nru 338/97 u (KE) Nru 2173/2005” (COM(2018) 381 final — 2018/0205 (COD))
EESC 2018/02960
ĠU C 110, 22.3.2019, p. 99–103
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
22.3.2019 |
MT |
Il-Ġurnal Uffiċjali tal-Unjoni Ewropea |
C 110/99 |
Opinjoni tal-Kumitat Ekonomiku u Soċjali Ewropew dwar il-“Proposta għal Regolament tal-Parlament Ewropew u tal-Kunsill dwar l-allinjament tal-obbligi ta’ rapportar fil-qasam tal-politika ambjentali u b’hekk jemenda d-Direttivi 86/278/KEE, 2002/49/KE, 2004/35/KE, 2007/2/KE, 2009/147/KE u 2010/63/UE, ir-Regolamenti (KE) Nru 166/2006 u (UE) Nru 995/2010, u r-Regolamenti tal-Kunsill (KE) Nru 338/97 u (KE) Nru 2173/2005”
(COM(2018) 381 final — 2018/0205 (COD))
(2019/C 110/19)
Relatur: |
Vladimír NOVOTNÝ (CZ-I) |
Konsultazzjonijiet |
Parlament Ewropew, 11.6.2018 Kunsill, 22.6.2018 |
Bażi ġuridika |
Artikoli 114, 192(1), 207 u 304 tat-Trattat dwar il-Funzjonament tal-Unjoni Ewropea |
Deċiżjoni tal-Bureau |
17.4.2018 (bi stennija tal-konsultazzjoni) |
Sezzjoni Kompetenti |
Sezzjoni Speċjalizzata għall-Agrikoltura, Żvilupp Rurali u Ambjent |
Adottata fis-sezzjoni |
5.10.2018 |
Adottata fil-plenarja |
12.12.2018 |
Sessjoni plenarja Nru |
359 |
Riżultat tal-votazzjoni (favur/kontra/astensjonijiet) |
208/1/2 |
1. Konklużjonijiet u rakkomandazzjonijiet
1.1. |
Il-KESE jilqa’ bi pjaċir il-proposta tal-Kummissjoni Ewropea għall-allinjament tal-obbligi ta’ rapportar dwar il-politika ambjentali u jistenna li tirriżulta f’żieda fit-trasparenza tar-rapporti u l-abbozzar tagħhom, il-provvista ta’ bażi empirika biex titkejjel l-effikaċja tal-politiki ambjentali, proċeduri semplifikati u inqas piż amministrattiv kemm għall-Kummissjoni kif ukoll għall-Istati Membri. |
1.2. |
Il-KESE jappoġġja bis-sħiħ l-approċċ ġdid tal-Kummissjoni Ewropea għar-rapportar ambjentali, li huwa bbażat fuq l-immodernizzar totali tal-proċeduri għall-ġbir tad-data, ir-rapportar u l-valutazzjoni ambjentali sussegwenti permezz tas-sistemi INSPIRE u Copernicus, it-trażmissjoni tad-data f’ħin reali u l-ipproċessar elettroniku tagħha. Il-KESE jemmen li l-proposta tal-Kummissjoni tikkonforma mal-approċċ ta’ regolamentazzjoni aħjar u mal-programm REFIT. |
1.3. |
Il-KESE jirrakkomanda li l-bażijiet ta’ data ċentrali tal-Aġenzija Ewropea għall-Ambjent (EEA) jintużaw biex id-data u l-informazzjoni dwar l-ambjent jiġu konnessi mad-data ġeografika, ekonomika u soċjali u biex din tiġi interpretata b’mod sħiħ. |
1.4. |
Il-KESE jerġa’ jħeġġeġ il-ħtieġa li l-organizzazzjonijiet tas-soċjetà ċivili jiġu involuti fl-abbozzar u d-diskussjoni ta’ rapporti ambjentali fl-Istati Membri. |
1.5. |
Il-KESE huwa tal-fehma li l-adattament għal bidliet fir-rekwiżiti speċifiċi ta’ rapportar ambjentali jaħdem aħjar minn approċċ “wieħed tajjeb għal kulħadd”, sakemm il-kwalità għolja ta’ data u rapporti tinżamm. |
1.6. |
Il-KESE jinsab konvint li l-aġġornar tar-rapportar ambjentali u l-ipproċessar u l-valutazzjoni sussegwenti tad-data ambjentali jagħtu kontribut kbir biex jinkisbu l-għanijiet tal-Konvenzjoni dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta’ Deċiżjonijiet u l-Aċċess għall-Ġustizzja fi Kwistjonijiet Ambjentali (il-Konvenzjoni ta’ Aarhus). |
1.7. |
Il-KESE jistieden lill-gvernijiet tal-Istati Membri tal-UE, l-awtoritajiet u l-aġenziji tagħhom, il-Kummissjoni Ewropea u l-Aġenzija Ewropea għall-Ambjent biex iżidu l-isforzi biex jittejbu l-aċċessibbiltà, iċ-ċarezza u l-valur informattiv tar-rapporti u l-informazzjoni ambjentali għal firxa wiesgħa tas-soċjetà ċivili u l-organizzazzjonijiet tagħha f’dawn il-kwistjonijiet. |
1.8. |
Il-KESE jirrakkomanda li l-acquis rigward l-akkwist tad-data, l-informazzjoni u r-rapportar ambjentali jkomplu jiġu evalwati u riveduti fil-futur b’mod regolari, li l-intervall bejn l-akkwist, l-ipproċessar u l-publikazzjoni tad-data jitnaqqas u li l-aċċessibbiltà, it-trasparenza u ċ-ċarezza tagħhom jiżdiedu. |
1.9. |
Il-KESE jistieden lill-organizzazzjonijiet ambjentali biex ikunu aktar attivi fit-trawwim ta’ sensibilizzazzjoni pubblika tas-sitwazzjoni ambjentali fil-pajjiżi u r-reġjuni tagħhom. Huwa jħeġġeġ lill-Kummissjoni biex tinkoraġġihom u tiffinanzjahom f’dan. |
2. Id-dokument tal-Kummissjoni
2.1. |
Fl-2017, il-Kummissjoni ppubblikat evalwazzjoni komprensiva tal-Kontroll tal-Idoneità dwar ir-rapportar ambjentali. Din l-evalwazzjoni kopriet 181 obbligu ta’ rapportar minquxa fi 58 att ta’ leġislazzjoni ambjentali tal-UE. |
2.2. |
Din l-analiżi trażversali u komprensiva ta’ obbligi ta’ rapportar (1) twettqet biex iżżid it-trasparenza, tipprovdi bażi empirika għal evalwazzjonijiet fil-futur, u tissemplifika u tnaqqas il-piżijiet amministrattivi għall-Istati Membri u l-Kummissjoni. |
2.3. |
Valutazzjoni individwali tal-atti ta’ leġislazzjoni msemmija uriet li kien hemm lok għal titjib fir-rapportar stabbilit f’dan li ġej:
Bħalissa għaddej proċess biex jiġu allinjati l-proposti attwali tal-Kummissjoni Ewropea – ippreżentati fl-2018 – dwar l-ilma tajjeb għax-xorb, sustanzi niġġiesa organiċi persistenti, l-użu mill-ġdid ta’ ilma mormi u prodotti tal-plastik li jintużaw darba. |
2.4. |
Abbażi ta’ din l-evalwazzjoni, ġew abbozzati proposta għall-allinjament tal-atti individwali ta’ leġislazzjoni relatati ma’ rapporti ambjentali u pjan iddettaljat għall-implimentazzjoni tal-emendi proposti. |
2.5. |
L-għan tal-proposta huwa li jiġu ottimizzati l-obbligi eżistenti relatati mar-rapportar, it-trasparenza u l-monitoraġġ tal-implimentazzjoni kif stabbiliti fid-dritt tal-Unjoni, filwaqt li fl-istess ħin jiġu rrispettati l-prinċipji tan-neċessità, is-sussidjarjetà u l-proporzjonalità. Il-proposta tfittex ukoll li tallinja r-rekwiżiti tal-leġislazzjoni kkonċernata u li ttejjeb il-bażi empirika għall-implimentazzjoni tal-politika tal-UE. |
2.6. |
Il-proposta tinkludi passi biex jittejbu t-trasparenza u s-sussidjarjetà (fi tmien atti legali), tissemplifika jew teskludi obbligi ta’ rapportar (f’seba’ atti legali), tallinja skadenzi ta’ rapportar (fi tliet atti legali), tissemplifika l-ħarsiet ġenerali għall-UE kollha u tiċċara r-rwol tal-istituzzjonijiet tal-UE (fi tmien atti legali) u tħejji għal evalwazzjonijiet futuri (f’ħames atti legali). |
2.7. |
Il-proposta tgħin biex ikun żgurat li l-pubbliku jkollu aċċess għal informazzjoni ambjentali ċara f’livell nazzjonali. Dan se jiżgura wkoll li l-pubbliku jkollu ħarsa ġenerali dwar dak li qed jiġri fil-qasam ambjentali fl-Ewropa kollha kemm hi u jgħin lill-awtoritajiet pubbliċi nazzjonali jittrattaw kwistjonijiet transfruntiera. Barra minn hekk, il-proposta għandha tnaqqas il-piż fuq l-Istati Membri, tappoġġja s-sussidjarjetà u tagħmel l-informazzjoni dwar l-implimentazzjoni aktar disponibbli għall-pubbliku. |
3. Kummenti Ġenerali
3.1. |
Il-KESE jilqa’ bi pjaċir il-proposta għal Regolament tal-Parlament Ewropew u tal-Kunsill dwar l-allinjament tal-obbligi ta’ rapportar ambjentali (19) bħala pass fundamentali lejn l-immodernizzar ġenerali tal-mod kif jiġu abbozzati u ppreżentati r-rapporti ambjentali. Jappoġġja l-użu tas-sistemi INSPIRE u Copernicus, l-għodod tal-ipproċessar tad-data elettronika, it-trażmissjoni tad-data f’ħin reali u, f’termini ta’ komunikazzjoni, il-bidla minn rapporti formali bil-miktub lejn il-bini ta’ bażijiet ta’ data ċentrali dinamiċi fil-livell tal-Kummissjoni Ewropea u tal-Aġenzija Ewropea għall-Ambjent. Filwaqt li jtenni l-fehma tal-Kummissjoni u t-test tal-proposta għal regolament, il-KESE jinnota wkoll li dawn huma bidliet ta’ natura purament proċedurali u mhux sostantiva fid-diversi dokumenti legali li jikkonċernaw l-għażla ta’ indikaturi ambjentali, il-lista ta’ sustanzi regolati u l-limiti tagħhom. |
3.2. |
Fl-opinjoni tal-KESE, is-semplifikazzjoni u l-allinjament ta’ dawn il-proċeduri għall-abbozzar u l-preżentazzjoni ta’ rapporti ambjentali se jagħmlu dawn ir-rapporti aktar effettivi u trasparenti. Il-KESE jistenna li l-proposta tirriżulta f’piż imnaqqas u spejjeż imnaqqsa fir-rigward tar-rekwiżiti tar-rapportar kif stabbiliti fil-leġislazzjoni ambjentali tal-UE u fi tnaqqis sinifikanti fl-intervall bejn l-akkwist u l-pubblikazzjoni tad-data. |
3.3. |
Il-KESE huwa tal-fehma li huwa essenzjali li mhux biss tiżdied id-disponibbiltà ta’ rapporti, iżda anke ċ-ċarezza ta’ dawn ir-rapporti u ta’ informazzjoni għal sezzjonijiet kbar tas-soċjetà ċivili. Itenni r-rwol essenzjali tas-soċjetà ċivili mhux biss bħala utent tal-informazzjoni ambjentali, iżda anke bħala parteċipant attiv fil-ġbir u d-diskussjoni ta’ din l-informazzjoni u dawn ir-rapporti. F’dan ir-rigward, il-KESE jenfasizza l-importanza li jiġu vvalutati l-impatti ambjentali u l-involviment tas-soċjetà ċivili fid-diskussjonijiet dwar dan. |
3.4. |
Il-proposta biex jiġu rriveduti numru ta’ atti ta’ leġislazzjoni eżistenti taqa’ fi ħdan il-programm tal-Kummissjoni dwar l-idoneità u l-prestazzjoni regolatorja tar-regolamentazzjoni (REFIT (20)). Il-KESE adotta Opinjoni dwar il-Programm REFIT (21), li fiha wera tħassib dwar in-nuqqasijiet identifikati fil-valutazzjonijiet tal-impatt ambjentali u enfasizza l-ħtieġa għal valutazzjoni integrata u bbilanċjata tad-dimensjonijiet soċjali, ekonomiċi u ambjentali. |
3.5. |
Fl-Opinjoni tiegħu dwar L-Analiżi tal-Implimentazzjoni Ambjentali tal-UE (22), il-KESE enfasizza l-importanza li s-soċjetà ċivili tiġi involuta fit-teħid u l-analiżi tad-deċiżjonijiet, u din hija rilevanti wkoll fir-rigward tal-analiżi tal-leġislazzjoni dwar ir-rapportar ambjentali. |
3.6. |
Il-proposta tal-Kummissjoni Ewropea tinkludi kontroreferenzi għad-Direttiva 2003/4/KE tal-Parlament Ewropew u tal-Kunsill (23) dwar l-aċċess pubbliku għat-tagħrif ambjentali u d-Direttiva 2007/2/KE dwar l-informazzjoni ġeografika, u tiżgura konsistenza mar-rekwiżiti ta’ dawn id-Direttivi. Il-KESE adotta l-Opinjoni dwar L-aċċess għall-ġustizzja f’livell nazzjonali b’rabta ma’ miżuri li jimplimentaw il-liġi ambjentali tal-UE (24), li fiha enfasizza l-importanza tal-Konvenzjoni dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta’ Deċiżjonijiet u l-Aċċess għall-Ġustizzja fi Kwistjonijiet Ambjentali (il-Konvenzjoni ta’ Aarhus). |
3.7. |
Il-KESE jiġbed l-attenzjoni għall-fatt li, filwaqt li l-proposta tal-Kummissjoni Ewropea tirreferi biss għar-rapportar ambjentali kif mitlub mil-leġislazzjoni tal-UE, ammont sinifikanti ta’ rapportar ambjentali huwa pprovdut fuq bażi volontarja fil-livell tan-negozji, it-trade unions, l-ibliet, il-muniċipalitajiet, organizzazzjonijiet oħra u organizzazzjonijiet tas-soċjetà ċivili. |
3.7.1. |
Eżempji ta’ dawn l-attivitajiet volontarji li jinkludu rapporti ambjentali huma: l-Inizjattiva Globali ta’ Rapportar (GRI) irrapportata fil-livell korporattiv; ir-rapporti ta’ assoċjazzjoni kummerċjali, bħall-Inizjattiva Responsible Care (CEFIC) fl-industrija kimika; u r-rapporti CSR (Responsabbiltà Soċjali Korporattiva), li ħafna drabi jinkludi element ambjentali. |
3.7.2. |
Lill-pubbliku jingħataw ukoll valutazzjonijiet tal-impatt ambjentali u informazzjoni relatata bħala parti mis-sistemi ta’ ġestjoni ambjentali tal-EMS u l-EMAS. |
3.7.3. |
Ir-rwol attiv tal-organizzazzjonijiet tas-soċjetà ċivili fl-analiżi ta’ rapporti f’dawn il-kuntesti ilu li wera s-siwi tiegħu, billi jsaħħaħ il-fiduċja tas-soċjetà ċivili min-naħa waħda u n-negozju min-naħa l-oħra. Fil-livell lokali u internazzjonali, qed jiġu applikati wkoll proċeduri tal-valutazzjoni tal-impatt ambjentali fil-qasam tal-informazzjoni ambjentali. |
4. Kummenti speċifiċi
4.1. It-titjib tat-trasparenza u tas-sussidjarjetà
Il-KESE jemmen li l-proposta tal-Kummissjoni Ewropea ttejjeb it-trasparenza u tippermetti aċċess pubbliku għal informazzjoni ambjentali aktar faċli għall-utent, filwaqt li tippreserva s-sussidjarjetà.
4.2. Is-semplifikazzjoni jew l-esklużjoni ta’ obbligi ta’ rapportar
Il-KESE jemmen li sabiex jitnaqqsu l-piżijiet amministrattivi, ikun utli li jiġi ssemplifikat il-proċess tal-għoti ta’ informazzjoni bbażata fuq test jew jinstab sostitut xieraq għalih, u li ssir enfasi fuq aċċess pubbliku aħjar għal informazzjoni. Il-KESE jitlob lill-Kummissjoni Ewropea biex tibda ħidma sabiex tistabbilixxi għadd ta’ indikaturi ambjentali komposti ewlenin li jkunu ċari għall-pubbliku ġenerali fil-pajjiżi kollha tal-UE. Din tagħmilha aktar faċli sabiex tikseb opinjoni dwar il-protezzjoni ambjentali fi ħdan il-pajjiżi jew ir-reġjuni u tagħti lok għal inizjattivi mmirati biex isibu tibdil għall-aħjar.
4.3. L-allinjament tal-iskeda taż-żmien għar-rapportar
Il-KESE jappoġġja s-semplifikazzjoni tal-iskadenzi għall-preżentazzjoni ta’ mapep tal-ħsejjes u pjani ta’ azzjoni skont id-Direttiva 2002/49/KE (25), il-ħolqien ta’ żmien suffiċjenti għal konsultazzjoni pubblika u t-tisħiħ tal-parteċipazzjoni tas-soċjetà ċivili waqt l-analiżi jew ir-reviżjoni ta’ pjani ta’ azzjoni. Il-KESE jappoġġja arranġamenti simili f’leġislazzjoni oħra, sakemm ma jkun hemm ebda tnaqqis fil-kwalità u d-disponibbiltà ta’ data u rapporti ambjentali.
4.4. Is-semplifikazzjoni tal-ħarsiet ġenerali għall-UE kollha/il-kjarifika tar-rwoli tal-istituzzjonijiet
Fl-opinjoni tal-KESE, hemm bżonn li jiġi ċċarat u speċifikat aktar ir-rwol tal-Kummissjoni u tal-Aġenzija Ewropea għall-Ambjent fil-proċessi ta’ rapportar rilevanti.
4.5. It-tħejjija għal evalwazzjonijiet futuri
Il-KESE jilqa’ bi pjaċir il-fatt li l-evalwazzjoni mwettqa mill-Kummissjoni Ewropea żvelat numru ta’ duplikazzjonijiet, rabtiet neqsin u rekwiżiti mhux essenzjali kemm fid-data u l-istruttura ta’ rapportar kif ukoll fir-rekwiżiti dwar il-frekwenza, kif ukoll nuqqasijiet oħra fl-effettività tagħhom. Il-KESE jinsab konvint li fil-futur se jinstabu wkoll aktar nuqqasijiet. Huwa għalhekk jirrakkomanda li titwettaq evalwazzjoni regolari tal-funzjonament tal-acquis f’dan il-qasam. Il-Kummissjoni għandha twettaq evalwazzjonijiet u titlob lill-Istati Membri jipprovdu l-informazzjoni meħtieġa għal dawn l-evalwazzjonijiet. Fl-Opinjoni tiegħu SC/045 dwar Leġislazzjoni valida għall-futur (26), il-KESE għamel rakkomandazzjonijiet dwar kif wieħed għandu jipproċedi f’leġislazzjoni futura.
4.6. Id-data f’kuntest
Il-KESE jirrakkomanda li l-bażijiet ta’ data ċentrali tal-Aġenzija Ewropea għall-Ambjent jinbnew b’tali mod li d-data u l-informazzjoni ambjentali jiġu marbuta ma’ data ġeografika, ekonomika u soċjali biex ikunu jistgħu jiġu interpretati b’mod komprensiv u oġġettiv. Il-KESE jilqa’ bi pjaċir l-isforzi tal-Kummissjoni Ewropea lejn l-introduzzjoni ta’ regolamentazzjoni aħjar biex jitnaqqas il-piż amministrattiv fir-rigward tar-reviżjoni tal-obbligi ta’ rapportar skont ir-Regolament (KE) Nru 166/2006 dwar Reġistru Ewropew dwar ir-Rilaxx u t-Trasferiment (E-PRTR) rigward obbligi li huma ta’ importanza limitata. Fl-istess ħin, il-KESE jindika l-ħtieġa li jiġi rrispettat il-prinċipju tal-kunfidenzjalità fir-rigward ta’ ċerti sigrieti kummerċjali, għalkemm dan m’għandux joħloq ostaklu għat-trasparenza u d-disponibbiltà ta’ rapporti u data ambjentali.
4.7. Xi tibdil selettiv
Il-KESE jaħseb li l-bidliet proposti fil-futur għandhom jiġu adattati għall-ispeċifiċitajiet ta’ dispożizzjonijiet legali partikolari li jintroduċu obbligi ta’ rappurtar ambjentali u li ma jkunux irregolati minn approċċ “wieħed tajjeb għal kulħadd”. Il-KESE jappoġġja wkoll l-allinjament tal-iskadenzi ta’ rapportar bejn id-Direttiva 2009/147/KE (id-Direttiva dwar l-Għasafar) u d-Direttiva 92/43/KEE (id-Direttiva dwar il-Ħabitats).
4.8. L-inkoraġġiment ta’ involviment pubbliku attiv f’kwistjonijiet ambjentali
Il-KESE jistieden lill-organizzazzjonijiet ambjentali biex ikunu aktar attivi fit-trawwim ta’ sensibilizzazzjoni pubblika tas-sitwazzjoni ambjentali fil-pajjiżi u r-reġjuni tagħhom. Huwa jħeġġeġ lill-Kummissjoni biex tinkoraġġihom u tiffinanzjahom f’dan.
Brussell, it-12 ta’ Diċembru 2018.
Il-President tal-Kumitat Ekonomiku u Soċjali Ewropew
Luca JAHIER
(1) SWD(2017) 230.
(2) ĠU L 189, 18.7.2002, p. 12.
(3) SWD(2016) 454.
(4) ĠU L 143, 30.4.2004, p. 56.
(5) SWD(2016) 121.
(6) ĠU L 108, 25.4.2007, p. 1.
(7) COM(2016) 478 u SWD(2016) 273.
(9) ĠU L 206, 22.7.1992, p. 7.
(10) SWD(2016) 472 final.
(11) ĠU L 276, 20.10.2010, p. 33.
(12) COM(2017) 631 u SWD(2017) 353.
(14) SWD(2017) 711.
(15) ĠU L 181, 4.7.1986, p. 6.
(16) ĠU L 295, 12.11.2010, p. 23.
(18) ĠU L 347, 30.12.2005, p. 1.
(19) COM(2018) 381 final – 2018/0205 (COD).
(20) https://ec.europa.eu/info/law/law-making-process/evaluating-and-improving-existing-laws/refit-making-eu-law-simpler-and-less-costly_en
(21) Opinjoni tal-KESE dwar Il-Programm REFIT (ĠU C 230, 14.7.2015, p. 66).
(22) Opinjoni tal-KESE dwar Rieżami tal-Governanza Ekonomika (ĠU C 345, 13.10.2017, p. 114).
(23) ĠU L 41, 14.2.2003, p. 26.
(24) Opinjoni tal-KESE dwar L-aċċess għall-ġustizzja f’livell nazzjonali b’rabta ma’ miżuri li jimplimentaw il-liġi ambjentali tal-UE (ĠU C 129, 11.4.2018, p. 65).
(25) Id-Direttiva 2007/2/KE.
(26) Opinjoni tal-KESE dwar Leġislazzjoni valida għall-futur (ĠU C 487, 28.12.2016, p. 51).