This document is an excerpt from the EUR-Lex website
Document 52017DC0239
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS 2016 Report on the Application of the EU Charter of Fundamental Rights
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Ir-Rapport tal-2016 dwar l-Applikazzjoni tal-Karta tad-Drittijiet Fundamentali tal-UE
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Ir-Rapport tal-2016 dwar l-Applikazzjoni tal-Karta tad-Drittijiet Fundamentali tal-UE
COM/2017/0239 final
IL-KUMMISSJONI EWROPEA
Brussell, 18.5.2017
COM(2017) 239 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Ir-Rapport tal-2016 dwar l-Applikazzjoni tal-Karta tad-Drittijiet Fundamentali tal-UE
{SWD(2017) 162 final}
1. Introduzzjoni
Fl-2016, id-drittijiet fundamentali u l-valuri li fuqhom l-Unjoni Ewropea hija mibnija għaddew minn prova. L-iżviluppi fl-Istati Membri urew li r-rispett għall-valuri u d-drittijiet stabbiliti fil-Karta tad-Drittijiet Fundamentali tal-UE ma għandux jittieħed qisu ma hu xejn.
L-UE ħabbtet wiċċha ma’ diversi sfidi: il-konsegwenzi tal-wasla bla preċedent tar-refuġjati fil-fruntieri esterni tagħha, l-iżbilanċi ekonomiċi u sensiela ta’ attakki terroristiċi. Il-persuni li jintlaqtu minn diversi kriżijiet ma jkunux fiduċjużi li uliedhom se jkunu f'qagħda aħjar minnhom. Huma jistaqsu jekk l-istituzzjonijiet għadhomx kapaċi jipproteġuhom mill-isfidi u mit-theddida tal-migrazzjoni, tat-taqlib finanzjarju u tat-terroriżmu. F’dan il-kuntest, in-nazzjonaliżmu, il-populiżmu u l-intolleranza jsibu art fertili fejn jaqbdu, u jiffavorixxu l-esklużjoni u iżolament bħala l-uniku mod kif l-isfidi attwali jistgħu jingħelbu.
F’kuntest fejn l-intolleranza qed tiżdied, huwa importanti ukoll li l-UE tafferma mill-ġdid u tippromwovi bis-saħħa l-istess drittijiet għal kulħadd. Fl-2017, it-tielet Kollokju Annwali dwar id-Drittijiet Fundamentali se jiffoka fuq il-promozzjoni tad-drittijiet tan-nisa u l-ugwaljanza bejn is-sessi. Din se tkun opportunità sabiex jiġu indirizzati t-tisħiħ tal-pożizzjoni ekonomika u politika tan-nisa, id-drittijiet tan-nisa fl-isferi tal-ħajja pubblika u privata kif ukoll il-ġlieda kontra l-vjolenza fuq in-nisa fil-forom kollha tagħha, u din tal-aħħar matul is-sena se tkun ukoll is-suġġett ta’ azzjonijiet iffukati.
Ix-xenarju globali jħalli impatt fuq id-drittijiet fundamentali fl-UE. L-UE trid b’determinazzjoni tagħmel sforz biex tiddefendi l-valuri komuni tagħha tad-demokrazija, tad-drittijiet fundamentali u tal-istat tad-dritt, kontra l-forzi li qed jippruvaw jippolarizzaw is-soċjetajiet tagħna u jipperikolaw il-mudell tagħna ta’ ftuħ il-moħħ u ta’ solidarjetà. L-istituzzjonijiet Ewropej u nazzjonali jridu jerġgħu jiksbu l-fiduċja taċ-ċittadini billi juru li kapaċi jiggarantixxu l-libertà, is-sigurtà u l-prosperità. F’dan l-isforz se jkun ċentrali s-suċċess fil-protezzjoni u fil-promozzjoni tad-drittijiet fundamentali taċ-ċittadini u tal-valuri komuni tal-UE, u l-istituzzjonijiet tal-UE għandhom imexxu bl-eżempju. F’dan ir-rigward, il-Karta hija għodda li ma għandhiex prezz, u għandu jintuża l-potenzjal kollu tagħha.
2. L-applikazzjoni tal-Karta tal-UE
2.1 Il-promozzjoni u l-protezzjoni tad-drittijiet fundamentali
It-twassil tad-drittijiet fundamentali għal kulħadd fl-Unjoni Ewropea kollha
Fl-2016, l-UE ħadet diversi inizjattivi sabiex id-drittijiet tal-Karta jkollhom effett għall-benefiċċju taċ-ċittadini fl-UE. Uħud minnhom kellhom l-għan biex jiġu żgurati l-korrettezza u l-ġustizzja soċjali. Il-Kummissjoni impenjat ruħha, pereżempju, f’konsultazzjoni pubblika għall-iżvilupp ta’ “pilastru Ewropew tad-drittijiet soċjali” 1 . Imfassal fuq id-drittijiet soċjali tal-Karta, il-pilastru jappoġġa s-swieq tax-xogħol ġusti u li jaħdmu sew, kif ukoll is-sistemi ta’ protezzjoni soċjali. Għall-individwu, jindirizza wkoll kwistjonijiet ta’ importanza ewlenija, bħall-opportunitajiet indaqs u l-aċċess għas-suq tax-xogħol, kundizzjonijiet tax-xogħol ġusti kif ukoll protezzjoni soċjali adegwata u sostenibbli.
Twaqqfet ukoll pjattaforma Ewropea sabiex tissaħħaħ il-kooperazzjoni ħalli jiġi indirizzat ix-xogħol mhux iddikjarat 2 , u b’hekk jiġi żgurat li d-dritt għal kundizzjonijiet tax-xogħol korretti u ġusti jiġu rrispettati (l-Artikolu 31 tal-Karta).
Ittieħdu passi fl-2016 sabiex jiġi promoss id-dritt għall-ħajja tal-familja (l-Artikolu 7 tal-Karta):
-Il-Kummissjoni pproponiet regoli ġodda skont ir-Regolament Brussell IIa, li ġaladarba jiġi adottat, se jtejjeb il-protezzjoni tat-tfal f’tilwim transfruntier dwar ir-responsabbiltà tal-ġenituri marbuta mal-kustodja 3 ;
-żewġ regolamenti ġodda ġew adottati sabiex il-koppji internazzjonali, kemm jekk ikunu fi żwieġ u kemm jekk ikunu fi sħubija rreġistrata, jiġu megħjuna biex ta’ kuljum jiġġestixxu l-proprjetà tagħhom u biex jaqsmuha jekk jaslu għal divorzju jew xi ħadd minnhom imut 4 .
Id-dritt għal proċess ġust (l-Artikoli 47 u 48 tal-Karta) daħal fis-seħħ b’mod konkret permezz tal-adozzjoni ta’ sensiela ta’ direttivi: dwar il-preżunzjoni tal-innoċenza u d-dritt li l-persuna tkun preżenti waqt il-proċess 5 ; dwar l-għajnuna legali 6 u s-salvagwardji proċedurali għat-tfal 7 . Dawn tal-aħħar, u r-regoli Brussell IIa l-ġodda se jkollhom ukoll impatt pożittiv fuq id-drittijiet tat-tfal (l-Artikolu 24 tal-Karta).
Il-Kummissjoni nediet pjattaforma għas-soluzzjonijiet online għat-tilwim 8 , li tgħin lill-konsumaturi jsolvu barra mill-qorti t-tilwim tagħhom man-negozjanti tal-UE, dwar ix-xiri online, b’mod irħis, sempliċi, malajr u f’kull lingwa uffiċjali tal-UE, biex b’hekk tissaħħaħ il-protezzjoni tal-konsumatur (l-Artikolu 38 tal-Karta).
Il-protezzjoni tad-dejta personali tal-persuni, fl-UE u kullimkien
Qasam ta’ prijorità ewlieni ieħor fl-2016 kien il-protezzjoni tad-dejta personali (l-Artiolu 8 tal-Karta). L-adozzjoni tar-Regolament Ġenerali dwar il-Protezzjoni tad-Dejta (GDPR) 9 u tad-Direttiva tal-Protezzjoni tad-Dejta għall-Awtoritajiet tal-Pulizija u tal-Ġustizzja Kriminali 10 kienet pass kbir ’il quddiem f’dan ir-rigward.
Il-GDPR isaħħaħ u jimmodernizza r-regoli eżistenti: il-persuni se jkollhom aċċess aktar faċli għad-dejta personali tagħhom, id-dritt għat-trasferibbiltà tad-dejta, “id-dritt li jkunu minsija” ċċarat u ċerti drittijiet applikabbli f’każ li jseħħ ksur tad-dejta personali. Il-GDPR jobbliga ukoll lill-kumpaniji u lill-organizzazzjonijiet biex jinnotifikaw lill-awtorità ta’ sorveljanza nazzjonali dwar ksur serju tad-dejta mill-aktar fis possibbli, sabiex l-utenti jkunu jistgħu jieħdu miżuri adegwati. Il-GDPR, barra minn hekk, bħala l-uniku strument legali tal-UE jistabbilixxi ġabra waħda ta’ regoli sabiex l-individwi jkollhom l-istess livell ta’ protezzjoni, irrispettivament minn fejn ikunu jinsabu fl-UE.
Id-Direttiva (UE) 2016/680 għandha l-għan li tistabbilixxi l-iskambju effiċjenti tal-informazzjoni bejn l-awtoritajiet nazzjonali ta’ infurzar, u li tiżgura li d-dejta tal-vittmi, tax-xhieda u tal-persuni ssuspettati b’reati tkun protetta adegwatament fil-kuntest ta’ investigazzjoni kriminali jew ta’ azzjoni ta’ eżekuzzjoni tal-liġi. L-ipproċessar kollu għall-eżekuzzjoni tal-liġi fl-Unjoni se jkollu jikkonforma mal-prinċipji tan-neċessità, tal-proporzjonalità u tal-legalità, u joffri salvagwardji xierqa għall-individwi.
Fl-ambitu tal-protezzjoni msaħħa fl-UE, il-Kummissjoni żgurat ukoll protezzjoni adegwata tad-dejta mhux fl-UE. F’Lulju 2016 hija adottat id-deċiżjoni ta’ adegwatezza dwar it-Tarka tal-Privatezza UE-US, li tiżgura l-fluss ħieles ta’ dejta personali ċċertifikat skont it-Tarka tal-Privatezza għal skopijiet kummerċjali bejn kumpaniji tal-UE u tal-Istati Uniti, filwaqt li tiżgura d-dritt fundaamentali tal-protezzjoni tad-dejta.
Il-konklużjoni, f’Diċembru, kienet stadju importanti tal-Ftehim Komprensiv 11 bejn l-UE u l-Istati Uniti, li jagħti livell għoli ta’ protezzjoni tad-dejta għal kull trasferiment ta’ dejta personali bejn l-UE u l-Istati Uniti fil-kuntest tal-kooperazzjoni ġudizzjarja jew tal-pulizija f'materji kriminali.
Il-protezzjoni tad-drittijiet ta’ dawk l-aktar vulnerabbli
Bosta drabi, fi żminijiet diffiċli, l-agħar li jintlaqtu huma dawk l-aktar vulnerabbli. Għall-UE, fl-2016 qasam ta’ prijorità prinċipali ieħor kien li tiġi indirizzata s-sitwazzjoni tal-migrazzjoni filwaqt li b’mod partikolari jiġi żgurat id-dritt għall-ażil (l-Artikolu 18 tal-Karta) u jiġi rrispettat il-prinċipju ta’ non-refoulement (l-Artikolu 19 tal-Karta). Il-Kummissjoni, wara l-Komunikazzjoni tagħha dwar ir-riforma tas-Sistema Ewropea Komuni tal-Ażil (SEKA), 12 f’April 2016 ipproponiet emendi għar-regoli eżistenti li għandhom l-għan li:
(i) jistabbilixxu sistema aktar ġusta u sostenibbli sabiex jitqassmu l-applikanti għall-ażil fost l-Istati Membri (proposta għal riformulazzjoni tar-Regolament ta’ Dublin) 13 u sabiex tiġi żgurata l-implimentazzjoni effettiva tagħha (proposta għal riformulazzjoni tar-Regolament Eurodac) 14 ;
(ii) jarmonizzaw aktar il-proċeduri tal-ażil u l-istandards internazzjonali ta’ protezzjoni sabiex jiġu żgurati livelli għoljin ta’ protezzjoni u ta’ akkoljenza kif ukoll salvagwardji adegwati għall-persuni li jfittxu ażil fl-UE kollha, u sabiex jitnaqqsu l-movimenti sekondarji irregolari (proposta għal Regolament dwar il-Proċeduri tal-Ażil 15 , għal Regolament dwar Standards għall-Kwalifika 16 u għal Direttiva dwar il-Kundizzjonijiet ta' Akkoljenza riformulata 17 );
(iii) jiffaċilitaw approċċ komuni għall-wasliet sikuri u legali fl-UE għall-persuni li jeħtieġu l-protezzjoni internazzjonali, f’solidarjetà ma’ pajjiżi li jilqgħu għadd kbir ta’ persuni spostati (proposta għal regolament li jistabbilixxi Qafas ta' Risistemazzjoni tal-Unjoni 18 );
(iv) jibdlu lill-Uffiċċju Ewropew ta’ Appoġġ fil-qasam tal-Ażil f'Aġenzija vera u proprja tal-UE b’mandat aktar b’saħħtu sabiex jiġu indirizzati d-dgħufijiet strutturali fis-Sistema ta’ Ażil tal-UE (proposta għal regolament dwar Aġenzija tal-Unjoni Ewropea għall-Ażil 19 ).
Il-promozzjoni u l-protezzjoni tad-drittijiet tat-tfal (l-Artiklu 24 tal-Karta) kienu fil-qalba ta’ din l-azzjoni leġiżlattiva. Ingħatat attenzjoni partikolari lit-tfal mhux akkumpanjati f’oqsma ewlenin bħal dawk għall-valutazzjoni tal-aħjar interessi tat-tfal, id-dritt tat-tfal li jinstemgħu fi proċeduri tal-ażil u li jiġu żgurati kundizzjonijiet ta’ akkoljenza adegwati u tutela effikaċi. 20 L-approċċ komprensiv tal-Kummissjoni biex it-tfal migranti jiġu protetti kien iċ-ċentru tal- 10 Forum Ewropew Annwali dwar id-Drittijiet tat-Tfal f’Novembru 21 . F’Diċembru 2016, il-Kummissjoni pproponiet li s-Sistema ta' Informazzjoni ta' Schengen tiġi msaħħa 22 , sabiex tissaħħaħ il-kapaċità tal-uffiċjali tal-infurzar tal-liġi u tal-gwardji tal-fruntiera biex isibu t-tfal li għebu, inkluż fil-kuntest tal-migrazzjoni.
Il-promozzjoni ta’ soċjetajiet miftuħin u tolleranti, ħielsa mir-razziżmu
It-tendenza attwali wasslet għal żieda fir-razziżmu u fl-intolleranza kontra minoritajiet etniċi, reliġjużi u minoritajiet oħra fl-Ewropa. 23 Dan jaffettwa bosta mid-drittijiet fundamentali tal-Karta, inkluż id-dritt għan-nondiskriminazzjoni (l-Artikolu 21), id-dritt għad-dinjità (l-Artikolu 1), u d-dritt għall-integrità tal-persuna (l-Artikolu 3) kif ukoll id-dritt għall-ħajja (l-Artikolu 2)
Il-Kummissjoni pprovdiet pjattaforma għas-soċjetajiet ċivili tal-Istati Membri, għall-aġenziji tal-UE u għall-organizzazzjonijiet internazzjonali 24 , sabiex jaħdmu fuq rispons aħjar għar-reati ta’ mibegħda u għad-diskorsi ta’ mibegħda. Saret enfasi fuq
-ir-reġistrazzjoni u l-ġbir ta’ dejta dwar inċidenti li jirrigwardaw ir-reati ta’ mibegħda fl-Istati Membri kollha;
- it-tisħiħ tal-appoġġ lill-vittmi; kif ukoll
-il-ġlieda kontra d-diskors ta’ mibegħda illegali online.
Fl-ambitu ta’ dan l-appoġġ għall-politika, il-Kummissjoni kompliet ukoll bi djalogi bilaterali ma’ Stati Membri dwar lakuni kbar fit-traspożizzjoni tagħhom tad-dritt tal-UE 25 . Uħud minnhom emendaw il-liġijiet kriminali b’riżultat ta’ dan.
Sabiex jiġi kkontrollat id-diskors ta’ mibegħda online u biex l-atturi l-ġodda tal-mezzi tal-informazzjoni jingħataw setgħa, il-Kummissjoni fil-31 ta’ Mejju waslet għal qbil ma’ Facebook, Twitter, YouTube u Microsoft dwar kodiċi ta’ kondotta għall-ġlieda kontra d-diskors ta’ mibegħda illegali online 26 . Il-kumpaniji impenjaw ruħhom, inter alia, li:
-jirrieżaminaw f’anqas minn 24 siegħa l-biċċa l-kbira tan-notifiki validi li jaslu miċ-ċittadini u mis-soċjetà ċivili biex jitneħħa l-kontenut illegali li pubblikament iqanqal il-vjolenza u l-mibegħda; kif ukoll
-jivvalutawhom ukoll fid-dawl tal-liġijiet nazzjonali kriminali li ġew trasposti mil-liġi tal-UE.
Il-Kummissjoni qiegħda żżomm taħt monitoraġġ mill-qrib il-progress fil-kooperazzjoni mas-soċjetà ċivili, l-Istati membri u l-kumpaniji tal-IT, u ppreżentat l-ewwel riżultati f’Diċembru. 27
Il-promozzjoni tal-litteriżmu fil-media, tal-ħsieb kritiku u tal-argumenti bbilanċjati fil-livell bażiku soċjali huma azzjonijiet oħra importanti li l-UE qed tappoġġa, id f’id mal-edukazzjoni, sabiex tagħmel tajjeb għall-intolleranza online u dik li mhix online.
2.2. Ir-rispett tad-drittijiet fundamentali
L-istituzzjonijiet, il-korpi, l-uffiċċji u l-aġenziji tal-Unjoni jridu jikkonformaw mal-Karta fl-azzjonijiet kollha tagħhom; kull każ li ma jikkonformax jista’ jitressaq quddiem il-Qorti tal-Ġustizzja tal-Unjoni Ewropea (QtĠ ). Il-Kummissjoni taħdem ħafna sabiex id-drittijiet fundamentali jiġu integrati, jiġifieri jiġi żgurat li jkunu rrispettati bis-sħiħ fil-proposti leġiżlattivi u ta’ politika kollha tagħha.
Id-Direttiva dwar il-ġlieda kontra t-terroriżmu l-ġdida, li f’Diċembru 2016 qablu dwarha l-Parlament Ewropew u l-Kunsill, 28 hija eżempju tajjeb ta’ din l-integrazzjoni. Tinkludi klawsola espliċita dwar id-drittijiet fundamentali – l-ewwel waħda ta’ dan it-tip – filwaqt li ġew ikkunsidrati diversi aspetti tad-drittijiet fundamentali fil-proċess tal-abbozzar u ta’ negozjar, inklużi l-ħtieġa u l-proporzjonalità tal-interferenzi mad-drittijiet tal-moviment liberu, tal-protezzjoni tad-dejta u tal-libertà tal-espressjoni (l-Artikoli 45, 8 u 11 tal-Karta). Tqiesu wkoll kif dovut il-prinċipji tal-legalità u tal-proporzjonalità tar-reati u tal-pieni (l-Artikolu 49 tal-Karta) kif ukoll id-drittijiet tal-vittmi, inkluż id-dritt għal rimedju effettiv (l-Artikolu 47 tal-Karta). Il-valutazzjoni ex post tad-Direttiva tkopri wkoll l-impatt tagħha fuq id-drittijiet fundamentali u l-libertajiet.
Fl-2016 ġiet adottata proposta mill-Kummissjoni sabiex jiġi aġġornat ir-Regolament dwar il-Kontroll tal-Esportazzjonijiet tal-UE għal oġġetti (b’użu doppju) sensittivi 29 . Ir-regolament jipprevedi qafas sod biex tiġi kkontrollata l-esportazzjoni tat-teknoloġija tas-sorveljanza ċibernetika meta jkun hemm ir-riskju li din tintuża b’mod ħażin biex iseħħ il-ksur tad-drittijiet tal-bniedem jew tad-dritt umanitarju internazzjonali. Barra minn hekk, abbażi ta’ proposta tal-Kummissjoni, permezz tal-adozzjoni f’Novembru ta’ emenda fir-Regolament ta’ Kontra t-Tortura 30 , ġew imsaħħin ir-regoli tal-UE li jipprojbixxu l-esportazzjoni u l-importazzjoni ta’ oġġetti li jistgħu jintużaw għall-piena kapitali jew għat-tortura f’pajjiżi oħra.
L-integrazzjoni testendi ruħha għal oqsma oħra bħal fl-użu tal-finanzjament mill-UE. Fl-2016, il-Kummissjoni adottat gwida biex tiżgura li l-Karta tiġi rrispettata meta l-Istati Membri jkunu qed jimplimentaw il-Fondi Strutturali u ta' Investiment Ewropej 31 .
Il-Kummissjoni ddikjarat, fir-rigward tal-migrazzjoni, fil-kuntest tal-inkjesta konġunta mill-Ombudsman Ewropew marbuta mal-valutazzjoni tal-impatt dwar id-drittijiet tal-bniedem tad-Dikjarazzjoni UE-Turkija tat-18 ta’ Marzu 2016, li hija se tkompli żżomm taħt monitoraġġ mill-qrib l-implimentazzjoni tad-Dikjarazzjoni, kemm fl-UE kif ukoll fit-Turkija, inkluż fir-rigward tar-rispett għad-drittijiet tal-bniedem. 32
L-adeżjoni tal-UE mal-Konvenzjoni Ewropea dwar id-drittijiet tal-bniedem tibqa’ prijorità għall-Kummissjoni, speċjalment fid-dawl tal-obbligu legali tagħha skont it-Trattat. L-adeżjoni se ssaħħaħ il-valuri komuni tagħna, ittejjeb l-effikaċja tad-dritt tal-UE, u tqawwi l-koerenza tal-protezzjoni tad-drittijiet fundamentali fl-UE. Madankollu, l-opinjoni tal-QtĠ tal-UE ta’ Diċembru 2014 (li tiddikjara li l-abbozz tal-Ftehim ta’ Adeżjoni tal-2013 huwa inkompatibbli mat-Trattati) qajmet għadd ta’ kwistjonijiet sinifikanti u kumplessi li jirrikjedu li l-abbozz jiġi nnegozjat mill-ġdid dwar diversi punti. Il-Kummissjoni, fil-kapaċità tagħha ta’ negozjatur tal-UE, qed tesplora soluzzjonijiet biex tindirizza l-kwistjonijiet varji mqajma mill-Qorti fil-grupp ta' ħidma tal-Kunsill.
2.3. Is-sensibilizzazzjoni dwar il-Karta
Sabiex iċ-ċittadini jgawdu kemm huwa possibbli mid-drittijiet fundamentali tagħhom, iċ-ċittadini jeħtieġ li jkunu jafu x’inhuma d-drittijiet fundamentali tagħhom. Jeħtieġ li jkunu jafu ukoll lejn min għandhom iduru meta jinkisru d-drittijiet tagħhom. F’Ottubru 2016, il-Kummissjoni nediet il-wizard tad-drittijiet fundamentali 33 , għodda online li tgħin lin-nies f’dan ir-rigward.
Waqt konferenza organizzata mill-Presidenza Olandiża fi Frar 2016 dwar “l-applikazzjoni tal-Karta tad-Drittijiet Fundamentali tal-UE fil-politika nazzjonali", tressqu ’l quddiem għadd ta’ għodod u l-aħjar prattiki sabiex l-awtoritajiet nazzjonali jiġu megħjuna jivvalutaw meta u kif għandhom japplikaw il-Karta waqt li jkunu qed jiżviluppaw il-politiki u l-leġiżlazzjoni nazzjonali.
Barra minn hekk, il-Kummissjoni tuża l-finanzjament mill-UE biex tappoġġa l-proġetti u n-netwerks li janalizzaw il-każistika nazzjonali li tirreferi għall-Karta u biex tipprovdi lill-operaturi fil-qasam tal-ġustizzja bit-taħriġ dwar l-applikazzjoni tagħha.
Bħala segwitu għar-Rapport dwar il-Karta tal-Kummissjoni tal-2015, il-Kunsill adotta konklużjonijiet dwar l-applikazzjoni tal-Karta f’Ġunju 34 , u l-Parlament Ewropew adotta riżoluzzjoni dwar is-sitwazzjoni tad-drittijiet fundamentali fl-Unjoni Ewropea f’Diċembru 35 . Id-diskussjonijiet fil-Kunsill u fil-Parlament Ewropew ikkontribwew għal aktar sensibilizzazzjoni dwar l-iżvilupp u l-isfidi fl-UE tad-drittijiet fundamentali.
2.4 L-iskrutinju mill-Qorti tal-Ġustizzja fuq l-istituzzjonijiet tal-UE
Fil-każijiet konġunti Ledra Advertising u Mallis and Malli 36 l-qorti ċaħdet, fuq appell, ir-rikors għall-annullament u l-kumpens imressaq miċ-ċittadini u n-negozji kontra t-tnaqqis fil-valur tad-depożiti tagħhom f’żewġ banek f’Ċipru. Kien hemm ftehim dwar dan fil-memorandum ta’ qbil tal-2013 bejn l-awtoritajiet Ċiprijotti u l-Mekkaniżmu Ewropew ta' Stabbiltà. Il-Qorti enfasizzat li l-Karta tapplika għall-istituzzjonijiet tal-UE anki meta dawn jaġixxu barra mill-qafas legali tal-UE. Osservat ukoll li l-Kummissjoni trid tiżgura li l-memorandum ta’ qbil ikun konsistenti mad-drittijiet fundamentali tal-Karta. Ir-restrizzjoni dwar id-dritt għall-proprjetà (l-Artikolu 17 tal-Karta) kienet ġustifikata fid-dawl tal-objettiv mixtieq, jiġifieri li tiġi żgurata l-istabbiltà tas-sistema bankarja kollha fiż-żona tal-euro, u fid-dawl tar-riskju imminenti ta’ telf finanzjarju li kienu jiġu esposti għalih id-depożitanti li kieku ż-żewġ banek fallew. Għaldaqstant ikkonkludiet li l-Kummissjoni ma setgħetx tiġi kkunsidrata li kkontribwiet għall-ksur tal-Karta.
3. L-applikazzjoni tal-Karta fl-Istati Membri u mill-Istati Membri
3.1 Id-drittijiet fundamentali u l-iżviluppi tal-istat tad-dritt
Il-Karta tapplika biss għall-Istati Membri meta dawn ikunu qed jimplimentaw il-liġi tal-UE. Il-proċeduri ta’ ksur kontra l-Istati Membri, rigward il-ksur tal-Karta, jistgħu għaldaqstant jinbdew biss meta tiġi stabbilita rabta suffiċjenti mad-dritt tal-UE.
Madankollu l-Istati Membri, anki meta jkunu qed jaġixxu barra mill-ambitu ta’ implimentazzjoni tad-dritt tal-UE, huma obbligati jirrispettaw il-valuri li fuqhom l-Unjoni hija stabbilita. B’mod partikolari, l-istat tad-dritt huwa prekundizzjoni għall-protezzjoni tad-drittijiet fundamentali. Fl-2014, il-Kummissjoni introduċiet Qafas li kellu l-għan jindirizza s-sitwazzjonijiet ta’ theddid sistemiku emerġenti għall-istat tad-dritt li ma setgħux jiġu indirizzati b’mod effettiv mis-salvagwardji ta’ livell nazzjonali jew mill-istrumenti eżistenti (b’mod partikolari l-proċeduri ta’ ksur) fil-livell tal-UE 37 .
Ċirkostanzi fil-Polonja li jirrigwardaw b’mod partikolari t-Tribunal Kostituzzjonali wasslu biex il-Kummissjoni toħroġ Rakkomandazzjoni f’Lulju 2016 38 u Rakkomandazzjoni kumplimentari f’Diċembru 2016 39 permezz ta’ dan il-Qafas. Il-fatt li l-leġittimità, l-integrità u l-funzjonament tajjeb tat-Tribunal Kostituzzjonali huma milquta ħażin, dan jimpedixxi rieżami kostituzzjonali effettiv. L-indirizzar ta’ din is-sitwazzjoni hija kwistjoni ta’ interess komuni. Il-funzjonament proprju tal-Unjoni huwa pperikolat jekk l-istat tad-dritt ma jibqax jiġi rrispettat f’wieħed mill-Istati Membri tagħha.
F’Ottubru 2016, il-Parlament Ewropew adotta Riżoluzzjoni dwar it-twaqqif ta’ mekkaniżmu tal-UE għad-demokrazija, l-istat tad-dritt u d-drittijiet fundamentali 40 . Il-Kummissjoni laqgħet b’sodisfazzjon l-objettiv ġenerali tar-riżoluzzjoni, li huwa li jiġi żgurat li l-valuri komuni tal-UE jiġu rrispettati u eżegwiti 41 . Il-Kummissjoni madankollu tqis li jenħtieġ li jsir l-aħjar użu possibbli tal-istrumenti eżistenti, waqt li tiġi evitata d-duplikazzjoni. Firxa ta’ għodod eżistenti u atturi diġà jipprovdu sensiela ta’ mezzi komplementari u effikaċi biex jiġu promossi u mħarsa l-valuri komuni. Il-Kummissjoni se tkompli tivvalorizza u tibni fuq dawn il-mezzi. Waħda mill-ideat sottostanti tal-Parlament kienet biex il-varjetà ta’ dejta u rapporti eżistenti dwar is-sitwazzjoni tad-drittijiet fundamentali fl-Istati Membri ssir aktar aċċessibbli u viżibbli, anki fil-livell nazzjonali. Il-Kummissjoni laqgħet b’sodisfazzjon dan, peress li għadd ta’ atturi oħra - inkluż il-Kunsill tal-Ewropa u l-Kummissjoni ta’ Venezja tiegħu, l-Aġenzija tal-UE għad-Drittijiet Fundamentali (EU Agency for Fundamental Rights, FRA) u l-NGOs - jiġbru informazzjoni dwar l-istat tad-dritt, id-demokrazija u d-drittijiet fundamentali fl-Istati Membri.
3.2 Il-gwida tal-Qorti tal-Ġustizzja għall-Istati Membri
Il-QtĠ tal-UE kompliet (skont is-sistema ta’ riferiment għad-deċiżjonijiet preliminari) tiggwida lill-imħallfin nazzjonali dwar l-applikabbiltà u l-interpretazzjoni tal-Karta.
Fil-kawżi magħquda Tele2 Sverige AB 42 u Tom Watson e.a 43 , il-Qorti eżaminat il-liġijiet f’żewġ Stati Membri li kienu jeħtieġu ż-żamma ġenerali u mingħajr distinzjoni tad-dejta dwar it-traffiku u dwar il-lok tal-abbonati u tal-utenti rreġistrati kollha li kienet relatata mal-mezzi kollha ta’ komunikazzjoni elettronika. Sabet li dawn il-liġijiet jirrestrinġu d-drittijiet fundamentali għall-ħajja privata u l-protezzjoni tad-dejta personali (l-Artikoli 7 u 8 tal-Karta) Minħabba l-firxa wiesgħa tar-restrizzjonijiet u s-salvagwardji limitati, l-ebda waħda minn dawn ir-restrizzjonijiet ma tqieset ġustifikata, anki meta l-objettiv kien li tiġi miġġielda l-kriminalità serja. Madankollu, objettiv bħal dan jista’ jiġġustifika ż-żamma tad-dejta dwar it-traffiku u l-lok, dment li tkun limitata għal dak li hu strettament meħtieġ fir-rigward tal-kategoriji ta’ dejta li għandhom jinżammu, il-mezzi ta’ komunikazzjoni affettwati, il-persuni kkonċernati u l-perjodu taż-żamma.
Dwar GS Media BV 44 , il-Qorti ddeċidiet rigward it-tqegħid ta’ hyperlinks fil-kuntest tad-dritt fundamentali għal-libertà tal-espressjoni (l-Artikolu 11 tal-Karta). Kumpanija tal-media qiegħdet fuq is-sit web tagħha hyperlink li tieħu lil osservaturi lejn siti web fejn kien hemm disponibbli ritratti, meħuda mill-magazine Playboy, ta’ persuna famuża. Peress li d-detentur tad-drittijiet tal-awtur ma awtorizzax il-pubblikazzjoni tar-ritratti fuq dawn is-siti web, l-editur tal-magazine sostna li t-tqegħid kien jikser id-drittijiet tal-awtur. Il-kumpanija tal-media ħalliet disponibbli l-hyperlinks jew oħrajn simili, fejn uħud minn dawk preċedenti ma baqgħux disponibbli. Fid-dawl tad-Direttiva applikabbli dwar id-Drittijiet tal-Awtur 45 , il-Qorti ddeċidiet li kull komunikazzjoni mal-pubbliku ta’ xi xogħol kellha tiġi awtorizzata mid-detentur tad-drittijiet tal-awtur. Hija sostniet li t-tqassim, mingħajr l-awtorizzazzjoni tal-proprjetarju tad-drittijiet tal-awtur, tal-hyperlinks għal xogħlijiet, fuq is-siti web inkwistjoni, kienu jikkostitwixxu "komunikazzjoni lill-pubbliku". Hija madankollu tirrikonoxxi li, f’każijiet individwali, jista’ jkun diffiċli għall-persuna li tkun qiegħdet il-link biex tivvaluta jekk kienx hemm awtorizzazzjoni. F’dan il-kuntest, irid jintlaħaq bilanċ ġust bejn id-dritt tad-detentur tad-drittijiet tal-awtur u d-dritt għal-libertà tal-espressjoni tal-persuna li tqiegħed il-link. Madankollu, meta din tal-aħħar kienet konxja mill-ksur tad-drittijiet tal-awtur jew kellha tkun konxja, bħalma huwa dan il-każ, l-azzjonijiet tagħha jikkostitwixxu “komunikazzjoni lill-pubbliku” mingħajr il-kunsens tad-detentur tad-drittijiet tal-awtur.
Is-sentenza fil-każijiet magħquda Aranyosi u Caldararu 46 kienet tirrigwarda l-obbligu tal-Istati Membri biex jirrispettaw id-drittijiet fundamentali skont il-Karta, b’mod partikolari l-projbizzjoni tat-tortura u tat-trattament jew tal-pieni inumani u degradanti , meta jiġi eżegwit Mandat ta' Arrest Ewropew (MAE). Il-Qorti ddeċidiet li skont l-Artikolu 4 (li jistabbilixxi d-dritt assolut), jekk l-awtoritajiet ta’ eżekuzzjoni jkollhom informazzjoni li turi riskju reali ta’ trattament inuman jew degradanti minħabba l-kundizzjonijiet ta’ detenzjoni fl-istat emittenti, iridu jevalwaw ir-riskju fir-rigward tal-persuna inkwistjoni meta jiddeċiedu jekk jeżegwux il-MAE. Meta jiġi stabbilit li hemm riskju rigward dik il-persuna, l-eżekuzzjoni tal-MAE trid tiġi rrappurtata u tista’ ma sseħħx, jekk fi żmien raġonevoli ma jkunx possibbli li dan jiġi miċħud. Meta jiġi vvalutat ir-riskju, l-awtorità responsabbli għall-eżekuzzjoni għandha tqis id-dritt fundamentali għal-libertà tal-persuna u l-prinċipju tal-preżunzjoni tal-innoċenza (l-Artikoli 6 u 48 tal-Karta).
3.3. Il-każistika nazzjonali li tikkwota l-Karta
L-imħallfin nazzjonali għad għandhom rwol prinċipali f’dak li għandu x’jaqsam mal-ħarsien tad-drittijiet fundamentali u tal-istat tad-dritt. L-Aġenzija tal-UE għad-Drittijiet Fundamentali 47 sabet li l-qrati nazzjonali fl-2016 baqgħu jirreferu għall-Karta biex tiggwidahom u tispirahom, anki f’għadd sostanzjali ta’ każijiet li jaqgħu barra mill-applikazzjoni tad-dritt tal-UE.
Id-drittijiet tat-tfal (l-Artikolu 24 tal-Karta) kienu partikolarment ċentrali. Kawża quddiem it-tribunal tar-Renju Unit 48 kienet tirrigwarda ċittadin Niġerjan li kien ilu joqgħod fir-Renju Unit għal 25 sena. It-tfal bniet tiegħu (li għandhom 13 u 11-il sena) kienu ċittadini Brittaniċi. Huwa appella kontra l-ordni ta' deportazzjoni fuq raġunijiet ta' politika pubblika. It-tribunal biddel id-deċiżjoni tal-qorti tal-ewwel istanza, peress li din naqset milli tirrikonoxxi d-dritt tat-tfal li jżommu fuq bażi regolari relazzjoni personali u kuntatt dirett maż-żewġ ġenituri, dment li dan ma jmurx kontra l-interessi tagħhom (l-Artikolu 24). Din id-dispożizzjoni tal-Karta ġiet interpretata bħala “dritt awtonomu” fil-kuntest tal-liġi dwar l-immigrazzjoni.
F’kawża oħra, qorti Żvediża użat l-Artikolu 24 tal-Karta bħala l-uniku sors legali biex tinterpreta l-liġi kriminali nazzjonali b’mod adattat għat-tfal 49 . Is-sentenza standard għall-persuni li bi ħlas jgħinu lil xi barrani jidħol fl-Iżvezja hija minn tliet xhur ħabs sa erbgħa. Madankollu, f’dan il-każ, il-qorti rrikonoxxiet li l-persuna kkonċernata kienet immotivata mix-xewqa li tgħin lit-tfal. Hija tat biss sentenza kondizzjonali, flimkien ma’ servizzi fil-komunità, fid-dawl tal-Artikolu 24 tal-Karta u obbligat lill-awtoritajiet tal-Istat jieħdu inkonsiderazzjoni l-aħjar interessi tal-wild.
4. It-tema ċentrali: Il-Kollokju Annwali tal-2016 “il-Pluraliżmu fil-media u d-demokrazija” dwar id-Drittijiet Fundamentali
Il-Kollokju Annwali dwar id-Drittijiet Fundamentali huwa spazju uniku għad-djalogu li jiffavorixxi l-kooperazzjoni reċiproka u l-impenn politiku għall-promozzjoni u l-protezzjoni tad-drittijiet fundamentali fl-UE. Hija opportunità biex jiġu identifikati u mwassla azzjonijiet konkreti u ta’ politika dwar kwistjonijiet ta’ interess attwali marbutin mad-drittijiet fundamentali.
It-tieni Kollokju Annwali (mis-17 sat-18 ta’ Novembru) għarbel, mill-perspettiva tad-drittijiet fundamentali, id-diversi rabtiet li hemm bejn il-media ħielsa u pluralistika u d-demokrazija 50 . Il-persuni li jfasslu l-politiki nazzjonali u tal-UE, l-organizzazzjonijiet tas-soċjetà ċivili u dawk internazzjonali, l-edituri kapijiet, il-ġurnalisti, ir-regulaturi nazzjonali, ir-rappreżentanti ta’ assoċjazzjonijiet tal-ġurnalisti, tal-media u ta’ kumpaniji tal-IT differenti, professuri, imħallfin u professjonisti legali oħra pproponew suġġerimenti dwar azzjonijiet importanti għal dawk kollha involuti, li ntwerew fil-konklużjonijiet tal-Kollokju li ġew ippubblikati mill-Kummissjoni ftit wara l-attività. 51
Suġġett minnhom kien il-protezzjoni tal-libertà u tal-indipendenza tal-media minn pressjoni politika u finanzjarja. Il-parteċipanti enfasizzaw l-importanza tal-indipendenza tar-regolaturi tal-media u sejħu għal adozzjoni b’ħeffa tal-proposta leġiżlattiva tal-Kummissjoni li temenda d-Direttiva dwar is-Servizzi tal-Media Awdjoviżiva 52 .
Qasam ieħor għad-diskussjoni kien l-għoti tas-setgħa lill-ġurnalisti u l-ħarsien tagħhom minn pressjoni, theddid, vjolenza fiżika u diskors ta’ mibegħda. Il-parteċipanti enfasizzaw l-importanza li tiġi miġġielda l-impunità għar-reati u għar-reazzjonijiet ta’ mibegħda kontra l-ġurnalisti, b’mod partikolari n-nisa. Azzjoni ta’ segwitu tinkludi l-finanzjament tal-UE għal proġetti dwar il-pluraliżmu fil-media, għall-protezzjoni tal-ġurnalisti u biex jiġi miġġieled id-diskors ta’ mibegħda online. F’Novembru 2016 il-Kummissjoni nediet kampanja fl-UE kollha u għamlet sena tiffoka l-azzjoni tagħha fuq il-ġlieda u l-prevenzjoni tal-vjolenza fuq in-nisa, 53 inkluż fil-media.
Il-parteċipanti ħarsu wkoll lejn l-isfidi u l-opportunitajiet li jistgħu jqumu fil-kuntest ta’ media konverġenti. Ġie diskuss ir-rwol tal-ġurnaliżmu etiku u tal-litteriżmu fil-media, kif ukoll is-sostenibbiltà finanzjarja tal-istampa ta’ kwalità u tal-ġurnaliżmu investigattiv. Ġie kopert ukoll l-impatt li l-użu ta’ alogaritmi jew t-tixrid ta’ aħbarijiet foloz jista’ jkollhom fuq il-pluraliżmu tal-media u fuq id-dibattiti demokratiċi msejjsin fuq l-informazzjoni. L-azzjonijiet ta’ segwitu jinkludu l-finanzjament għal-litteriżmu fil-media, l-appoġġ għall-identifikazzjoni tal-aħjar prattiki etiċi sabiex tiġi promossa l-informazzjoni ta’ kwalità kif ukoll it-tnedija ta’ valutazzjoni tal-impatt tal-Kummissjoni u ta’ konsultazzjoni pubblika 54 dwar il-protezzjoni tal-informaturi.
5. Konklużjoni
L-iżviluppi reċenti fl-UE u f’imkejjen oħra huma theddida serja għad-drittijiet fundamentali. Il-Kummissjoni tibqa’ għassa u impenjata biex id-drittijiet fundamentali tal-UE jkollhom livell għoli ta’ protezzjoni. Hija se żżid l-azzjonijiet tagħha sabiex tiżgura li l-proposti leġiżlattivi tal-UE u l-azzjonijiet kollha jkunu kompatibbli bis-sħiħ mal-Karta. Hija beħsiebha tiggarantixxi li l-korpi kollha marbutin bil-Karta jkomplu jirrispettawha.
L-importanza tas-sistema ta’ kontrokontrolli f’soċjetajiet demokratiċi, b’mod partikolari r-rwol ewlieni tal-qrati supremi u tal-qrati kostituzzjonali fil-ħarsien tal-valuri komuni tal-UE ma tistax tiġi enfasizzata biżżejjed; dan ir-rwol jenħtieġ li jiġi appoġġat, u li jkun jirrispetta bi sħiħ l-indipendenza tal-ġudikatura. Is-sorveljanza indipendenti esterna (anki permezz tal-Konvenzjoni Ewropea dwar id-Drittijiet tal-Bniedem) hija essenzjali f’soċjetajiet demokratiċi. Ir-rwol ewlieni tal-organizzazzjonijiet tas-soċjetà ċivili fit-tiġdid tal-impenn għad-demokrazija, għall-istat tad-dritt u għad-drittijiet fundamentali jenħtieġ li jiġi mgħożż u ppreservat.
Ir-riżultati tal-konsultazzjoni, li seħħet bejn Marzu u Diċembru tal-2016 bħalissa qed jiġu analizzati u se jikkontribwixxu għall-inizjattiva tal-Kummissjoni dwar il-Pilastru Ewropew tad-Drittijiet Soċjali. Aktar informazzjoni tinsab fuq: https://ec.europa.eu/commission/priorities/deeper-and-fairer-economic-and-monetary-union/towards-european-pillar-social-rights_en
Id-Deċiżjoni (UE) 2016/344 tal-Parlament Ewropew u tal-Kunsill tad-9 ta' Marzu 2016 dwar l-istabbiliment ta' Pjattaforma Ewropea biex tissaħħaħ il-kooperazzjoni fl-indirizzar ta' xogħol mhux iddikjarat, ĠU L 65, 11.3.2016, p. 12–20.
Proposta għal Regolament tal-Kunsill dwar il-ġurisdizzjoni, ir-rikonoxximent u l-eżekuzzjoni ta' deċiżjonijiet fi kwistjonijiet matrimonjali u kwistjonijiet ta' responsabbiltà tal-ġenituri, u dwar sekwestru internazzjonali ta' minuri (riformulazzjoni), COM/2016/0411 final, 30.06.2016.
Ir-Regolament tal-Kunsill (UE) 2016/1103 tal-24 ta’ Ġunju 2016 li jimplimenta kooperazzjoni msaħħa fil-qasam tal-ġurisdizzjoni, il-liġi applikabbli u r-rikonoxximent u l-eżekuzzjoni ta’ deċiżjonijiet f’materji ta’ reġimi ta’ proprjetà matrimonjali, ĠU L 183, 8.7.2016, p. 1–29; jew ir-Regolament tal-Kunsill (UE) 2016/1104 tal-24 ta’ Ġunju 2016 li jimplimenta kooperazzjoni msaħħa fil-qasam tal-ġuriżdizzjoni, il-liġi applikabbli u r-rikonoxximent u l-eżekuzzjoni ta’ deċiżjonijiet f’materji tal-konsegwenzi patrimonjali ta’ sħubijiet reġistrati, ĠU L 183, 8.7.2016, p. 30–56.
Id-Direttiva (UE) 2016/343 tal-Parlament Ewropew u tal-Kunsill tad-9 ta’ Marzu 2016 dwar it-tisħiħ ta’ ċerti aspetti tal-preżunzjoni tal-innoċenza u tad-dritt li wieħed ikun preżenti waqt il-proċess fil-proċedimenti kriminali, ĠU L 65, 11.3.2016, p. 1–11
Id-Direttiva (UE) 2016/1919 tal-Parlament Ewropew u tal-Kunsill tas-26 ta’ Ottubru 2016 dwar għajnuna legali għal persuni ssuspettati u akkużati fi proċedimenti kriminali u għal persuni rikjesti fi proċedimenti ta’ mandat ta’ arrest Ewropew, ĠU L 297, 4.11.2016, p. 1–8.
Id-Direttiva (UE) 2016/800 tal-Parlament Ewropew u tal-Kunsill tal-11 ta’ Mejju 2016 dwar il-garanziji proċedurali għal tfal li huma ssuspettati jew li huma persuni akkużati fi proċedimenti kriminali, ĠU L 132, 21.5.2016, p. 1–20.
Tinsab fuq: https://webgate.ec.europa.eu/odr/main/index.cfm?event=main.home.chooseLanguage
Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ dejta personali u dwar il-moviment liberu ta’ tali dejta, u li jħassar id-Direttiva 95/46/KE (ir-Regolament Ġenerali dwar il-Protezzjoni tad-Dejta), ĠU L 119, 4.5.2016, p. 1–88.
Ftehim bejn l-Istati Uniti tal-Amerika u l-Unjoni Ewropea dwar il-protezzjoni ta' informazzjoni personali marbuta mal-prevenzjoni, l-investigazzjoni, is-sejbien u l-prosekuzzjoni ta' reati kriminali;
http://ec.europa.eu/justice/data-protection/files/dp-umbrella-agreement_en.pdf
.
Komunikazzjoni tal-Kummissjoni lill-Parlament Ewropew u lill-Kunsill għar-riforma tas-Sistema Ewropea Komuni tal-Ażil u għat-tisħiħ ta' rotot legali lejn l-Ewropa, COM(2016) 197 final, 6.4.2016.
COM(2016) 270
COM(2016) 272
COM(2016) 467
COM(2016) 466
COM(2016) 465
COM(2016) 468
COM(2016) 271
Ħarsa ġenerali tad-dispożizzjonijiet emendati u proposti għall-protezzjoni tat-tfal fil-proposti leġiżlattivi msemmijin hawn fuq jinsabu: http://ec.europa.eu/justice/fundamental-rights/files/rights_child/ceas_provision_on_children_table_updated.pdf .
http://ec.europa.eu/newsroom/just/item-detail.cfm?item_id=34456 . Dan ix-xogħol kien segwit mill-adozzjoni tal-Komunikazzjoni dwar "Il-protezzjoni tat-tfal migranti" tat-12 ta’ April 2017 (COM(2017) 211 final)
Stħarriġ imwettaq fl-2013 mill-FRA wera li f’pajjiżi bħall-Ungerija, Franza u l-Belgju, sa 48 % ta’ dawk li wieġbu kienu qed jikkunsidraw jemigrawx għaliex bħala Lhud ma kienx għadhom qed iħossuhom sikuri http://fra.europa.eu/en/publication/2013/discrimination-and-hate-crime-against-jews-eu-member-states-experiences-and . Il-moskej bdew jirċievu l-protezzjoni tal-pulizija f’diversi Stati Membri filwaqt li żieda qawwija f’inċidenti kontra l-Musulmani ġiet irrappurtata minn organizzazzjonijiet tas-soċjetà ċivili fl-2014 u fl-2015 f’pajjiżi bħal Franza, ir-Renju Unit, l-Iżvezja u l-Belġju, inklużi attakki vjolenti fuq nisa Misilmin lebsin l-għata tar-ras. L-attakki u l-inċidenti marbutin mad-diskors ta’ mibegħda li jkollhom fil-mira lill-persuni li jfittxu ażil u lill-migranti qed jiżdiedu, kif ukoll l-attakki u l-attentati ta’ ħruq tal-postijiet għar-refuġjati li joffru kenn. Wara r-referendum tar-Renju Unit f’Ġunju 2016, ġiet osservata mewġa ta’ mibegħda li kienet tiffoka fuq individwi u gruppi abbażi tal-oriġini nazzjonali jew etnika tagħom, filwaqt li organizzazzjonijiet tas-soċjetà ċivili rrappurtaw żieda fl-ostilitajiet kontra r-Roma u l-persuni ta’ dixxendenza Afrikana f’għadd ta’ Stati Membri. Fl-2017, l-FRA se tippubblika l-Istħarriġ 2 tal-Unjoni Ewropea dwar il-Minoranzi u d-Diskriminazzjoni (EU-MIDIS 2) li permezz tiegħu jistgħu jitqabblu x-xejriet tal-esperjenzi ta’ diversi gruppi minoritarji.
il-Grupp ta' Livell Għoli tal-UE għall-Ġlieda kontra r-Razziżmu, il-Ksenofobija u forom oħra ta' intolleranza; ara: http://ec.europa.eu/newsroom/just/item-detail.cfm?item_id=51025 .
Id-Deċiżjoni Qafas tal-Kunsill 2008/913/ĠAI tat-28 ta’ Novembru 2008 dwar il-ġlieda kontra ċerti forom u espressjonijiet ta’ razziżmu u ksenofobija permezz tal-liġi kriminali.
Jinsab fuq: http://ec.europa.eu/justice/fundamental-rights/files/hate_speech_code_of_conduct_en.pdf .
L-ewwel valutazzjoni tal-kodiċi ta’ kondotta l-ġdid huwa disponibbli fuq: http://ec.europa.eu/information_society/newsroom/image/document/2016-50/factsheet-code-conduct-8_40573.pdf
Id-Direttiva (UE) 2017/541 tal-15 ta’ Marzu 2017.
Proposta għal Regolament tal-Parlament Ewropew u tal-Kunsill tat-28 ta’ Settembru li jistabbilixxi reġim tal-Unjoni għall-kontroll tal-esportazzjonijiet, it-trasferiment, is-senserija, l-assistenza teknika u t-transitu ta’ oġġetti b’użu doppju, COM(2016) 616 final.
Ir-Regolament (UE) 2016/2134 tal-Parlament Ewropew u tal-Kunsill tat-23 ta' Novembru 2016 li jemenda r-Regolament tal-Kunsill (KE) Nru 1236/2005 dwar il-kummerċ ta' ċerti oġġetti li jistgħu jintużaw għall-piena kapitali, it-tortura jew trattament jew pieni krudili, inumani jew degradanti oħra, ĠU L 338, 13.12.2016, p.1.
ĠU C 269 tat-23.7.2016, p. 1
Fis-sentenza (tat-28 ta’ Frar 2017) tal-Kawżi T-192/16, T-193/16 u T-257/16, il-Qorti Ġenerali sostniet li “d-Dikjarazzjoni UE-Turkija ma tistax titqies bħala miżura adottata mill-Kunsill Ewropew, jew inkella, minn xi istituzzjoni, korp, uffiċċju jew aġenzija oħra tal-Unjoni Ewropea” (il-para. 71).
Din l-għodda, mibnija fuq l-għodda “Clarity” li ġiet żviluppata mill-Aġenzija tal-UE għad-Drittijiet Fundamentali, issa hija parti mill-portal tal-ġustizzja elettronika, https://e-justice.europa.eu/content_where_to_turn_for_help-459-en.do
Jinsabu fuq: http://data.consilium.europa.eu/doc/document/ST-10005-2016-INIT/en/pdf
Ir-riżoluzzjoni tal-Parlament Ewropew tat-13 ta’ Diċembru 2016 dwar is-sitwazzjoni tad-drittijiet fundamentali fl-Unjoni Ewropea fl-2015 ( 2016/2009(INI) ).
Il-kawżi C-8-10/15P u C-105-109/15P.
Il-Komunikazzjoni “Qafas ġdid tal-UE biex jissaħħaħ l-Istat tad-Dritt”, COM(2014) 158 final, 19.3.2014.
Ir-Rakkomandazzjoni tal-Kummissjoni (UE) 2016/1374 tas-27 ta’ Lulju 2016 dwar l-istat tad-dritt fil-Polonja; C/2016/570; ĠU L 217, 12.8.2016, p. 53–68.
Ir-Rakkomandazzjoni tal-Kummissjoni (UE) 2017/146 tal-21 ta' Diċembru 2016 dwar l-istat tad-dritt fil-Polonja
kumplimentari għar-Rakkomandazzjoni tal-Kummissjoni (UE) 2016/1374; C/2016/ 8950; ĠU L 22, 27.1.2017, p. 65–81.
Ir-Riżoluzzjoni tal-Parlament Ewropew tal-25 ta’Ottubru 2016 dwar it-twaqqif ta’ mekkaniżmu tal-UE għad-demokrazija, l-istat tad-dritt u d-drittijiet fundamentali.
Dibattitu fil-plenarja tal-Parlament Ewropew fil-25 ta’Ottubru 2016.
C-203/15.
C-698/15.
C-160/15.
Id-Direttiva 2001/29/KE tal-Parlament Ewropew u tal-Kunsill tat-22 ta’ Mejju 2001 dwar l-armonizzazzjoni ta’ ċerti aspetti ta’ drittijiet tal-awtur u drittijiet relatati fis-soċjetà tal-informazzjoni, ĠU L 167, 22.6.2001, p. 10–19.
C-404/15, C-659/15.
Ir-rapport annwali FRA 2016, li għandu jiġi ppubblikat f'Mejju 2017.
It-Tribunal Superjuri (l-Awla tal-Immigrazzjoni u l-Ażil) Adebayo Abdul vs is-Segretarju tal-Istat għad-Dipartiment tal-Affarijiet Interni, [2016] UKUT 106 (IAC).
Skåne and Blekinge, il-Qorti tal-Appell, il-Kawża B 7426-15 id-deċiżjoni tal-5 ta’ Diċembru 2016.
http://ec.europa.eu/newsroom/just/item-detail.cfm?item_id=31198
Proposta għal Direttiva tal-Parlament Ewropew u tal-Kunsill li temenda d-Direttiva 2010/13/UE dwar il-koordinazzjoni ta' ċerti dispożizzjonijiet stabbiliti bil-liġi, b'regolament jew b'azzjoni amministrattiva fi Stati Membri dwar il-forniment ta' servizzi tal-media awdjoviżiva fid-dawl tar-realtajiet tas-suq li qed jinbidlu, COM/2016/0287 final, 25.5.2016.
http://ec.europa.eu/newsroom/just/item-detail.cfm?item_id=54254 .