IL-KUMMISSJONI EWROPEA

Brussell, 27.6.2016

COM(2016) 418 final

2016/0193(COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament (UE) Nru 1303/2013 fir-rigward ta’ ċerti dispożizzjonijiet relatati mal-ġestjoni finanzjarja għal ċerti Stati Membri li qed jesperjenzaw jew jinsabu mhedda minn diffikultajiet serji fir-rigward tal-istabbiltà finanzjarja tagħhom

MEMORANDUM TA’ SPJEGAZZJONI

1.KUNTEST TAL-PROPOSTA

Raġunijiet u għanijiet tal-proposta

Il-kriżi finanzjarja u ekonomika sostnuta poġġiet ir-riżorsi finanzjarji nazzjonali taħt pressjoni filwaqt li l-Istati Membri qegħdin iwettqu politiki meħtieġa ta’ konsolidazzjoni fiskali. F’dan il-kuntest, l-iżgurar ta’ implimentazzjoni mingħajr xkiel ta' programmi appoġġati mill-Fondi Strutturali u ta' Investiment Ewropej (FSIE) huwa ta’ importanza partikolari għall-investiment fit-tkabbir u l-impjiegi.

L-implimentazzjoni tal-programmi spiss hija diffiċli, mhux l-anqas minħabba l-problemi ta’ likwidità li jirriżultaw mill-konsolidazzjoni fiskali. Dan huwa b’mod partikolari l-każ ta’ dawk l-Istati Membri li ġew l-aktar affettwati mill-kriżi, u li rċevew għajnuna finanzjarja taħt programm ta’ aġġustament.

Sabiex jiġi żgurat li dawn l-Istati Membri jkomplu jimplimentaw il-programmi FSIE fil-prattika u joħorġu l-fondi għall-proġetti, l-Artikolu 24 tar-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013 1 jippermetti lill-Kummissjoni tagħmel aktar pagamenti ("top-up") mill-1 ta’ Jannar 2014 sat-30 ta’ Ġunju 2016 lil dawk il-pajjiżi li bbenefikaw minn assistenza finanzjarja wara l-21 ta’ Diċembru 2013.

Ħames pajjiżi kienu eliġibbli għad-dispożizzjoni "top-up" fil-perjodu msemmi , jiġifieri Ċipru, il-Greċja, l-Irlanda, il-Portugall u r-Rumanija.

Barra minn hekk, l-Artikolu 120 tar-Regolament (UE) Nru 1303/2013 jistipula li mill-1 ta’ Jannar 2014 sat-30 ta’ Ġunju 2017, ir-rata massima ta’ kofinanzjament fil-livell ta’ kull prijorità għall-programmi operazzjonali kollha appoġġati mill-FEŻR u l-FSE f’Ċipru għandha tkun ta’ 85 % minflok ta’ 50 % applikabbli għal reġjuni aktar żviluppati 2 . Din ir-rata ta’ kofinanzjament eċċezzjonali ngħatat lil Ċipru minħabba s-sitwazzjoni fraġli tal-ekonomija tiegħu. Din tgħin biex tgħaqqad perjodu ta’ ħtiġijiet ta’ investiment għoli pubbliku minn naħa, u sforzi ta’ konsolidazzjoni fiskali sostnuti min-naħa l-oħra, billi żżid l-ispazju fiskali meħtieġ għal investimenti appoġġati minn finanzjament tal-politika ta’ Koeżjoni.

L-Artikolu 24(3) u l-Artikolu 120(3) tar-Regolament (UE) Nru 1303/2013 jeħtieġu lill-Kummissjoni tagħmel rieżami ta' dawn iż-żewġ dispożizzjonijiet finanzjarji u, jekk meħtieġ, tagħmel proposta leġiżlattiva qabel it-30 ta’ Ġunju 2016 bil-ħsieb ta' estensjoni possibbli tagħhom.

Il-proposta attwali tippermetti lill-Kummissjoni tkompli tagħmel pagamenti ikbar għal kull Stat Membru li se jibbenefika minn għajnuna finanzjarja wara t-30 ta’ Ġunju 2016 għall-perjodu li fih ikun taħt dan il-mekkaniżmu ta’ appoġġ, mingħajr ma tiġi modifikata l-allokazzjoni ġenerali tal-FSIE 2014-2020. Barra minn hekk, il-proposta tippermetti li Ċipru japplika r-rata massima ta’ kofinanzjament ta’ 85 % għal Ċipru sal-għeluq tal-programm.

Il-miżuri jkunu jipprovdu riżorsi finanzjarji addizzjonali jew il-flessibilità baġitarja meħtieġa biex tiġi ffaċilitata l-implimentazzjoni tal-programmi tal-FSIE fil-post.

Il-kuntest ġenerali u dispożizzjonijiet fis-seħħ fl-isfera politika tal-proposta

L-Artikolu 24 tar-Regolament (UE) Nru 1303/2013 jipprovdi li fuq talba ta’ Stat Membru b’diffikultajiet baġitarji temporanji, jiġifieri dawk il-pajjiżi li rċevew assistenza finanzjarja taħt programm ta’ aġġustament wara l-21 ta’ Diċembru 2013, il-pagamenti interim jistgħu jiżdiedu b’10 punti perċentwali aktar mir-rata ta' kofinanzjament applikabbli għal kull prijorità għall-FEŻR, l-FSE u l-Fond ta’ Koeżjoni jew għal kull miżura għall-FAEŻR u l-FEMS, bil-kundizzjoni li l-Istat Membru jressaq talba korrispondenti. Attwalment din id-dispożizzjoni tapplika sat-30 ta’ Ġunju 2016.

L-Artikolu 120(3) tar-Regolament (UE) 1303/2013 jistipula li mill-1 ta’ Jannar 2014 sat-30 ta’ Ġunju 2017, ir-rata massima ta’ kofinanzjament fil-livell ta’ kull prijorità għall-programmi operazzjonali kollha appoġġati mill-FEŻR u l-FSE f’Ċipru għandha tkun ta’ 85 % minflok ta’ 50 % applikabbli għal reġjuni aktar żviluppati.

Konsistenza ma' politiki oħra tal-Unjoni

Il-proposta hija konsistenti ma' proposti u inizjattivi oħra adottati mill-Kummissjoni Ewropea b'rispons għall-kriżi finanzjarja.

2.BAŻI ĠURIDIKA, IS-SUSSIDJARJETÀ U L-PROPORZJONALITÀ

Bażi ġuridika

Ir-Regolament (UE) Nru 1303/2013 jiddefinixxi r-regoli komuni applikabbli għall-Fondi SIE. Abbażi tal-prinċipju ta’ ġestjoni kondiviża bejn il-Kummissjoni Ewropea u l-Istati Membri, dan ir-Regolament jinkludi dispożizzjonijiet għall-proċess ta’ programmazzjoni kif ukoll arranġamenti għall-ġestjoni tal-programmi (inkluża dik finanzjarja), il-monitoraġġ, il-kontroll finanzjarju u l-evalwazzjoni ta' proġetti.

L-Artikolu 24(3) u l-Artikolu 120(3) tar-Regolament (UE) Nru 1303/2013 jeħtieġu li l-Kummissjoni tirrevedi iż-żewġ dispożizzjonijiet finanzjarji msemmija qabel u jekk meħtieġ, tagħmel proposta leġiżlattiva qabel it-30 ta’ Ġunju 2016 bil-ħsieb ta' estensjoni possibbli tagħhom.

Sussidjarjetà (għal kompetenza mhux esklużiva)

Il-proposta tikkonforma mal-prinċipju ta' sussidjarjetà sal-punt li tfittex li tkompli tipprovdi appoġġ akbar permezz tal-FSIE lil ċerti Stati Membri li jesperjenzaw diffikultajiet serji, notevolment bi problemi fit-tkabbir ekonomiku u l-istabilità finanzjarja tagħhom, u b'defiċit u sitwazzjoni tad-dejn li qed imorru għall-agħar, ħtija wkoll tal-ambjent ekonomiku u finanzjarju internazzjonali. F'dan il-kuntest, huwa neċessarju li jiġi stabbilit fuq livell ta' Unjoni Ewropea mekkaniżmu temporanju li jippermetti lill-Kummissjoni Ewropea żżid ir-rimborż tan-nefqa ċċertifikata skont il-FSIE u li tipprovdi rata ta' kofinanzjament ogħla għall-progammi operazzjonali kollha appoġġati mill-FEŻR u l-FSE f'Ċipru.

Proporzjonalità

Il-proposta tikkonforma mal-prinċipju tal-proporzjonalità:

L-estensjoni tal-perjodu li matulu huma dovuti l-pagamenti interim miżjuda huwa proporzjonali fir-rigward tal-kriżi ekonomika sostnuta u tal-isforzi oħra meħuda biex jiġu megħjuna l-Istati Membri b’diffikultajiet baġitarji li jibbenefikaw minn għajnuna finanzjarja taħt programm ta’ aġġustament.

L-estensjoni tal-applikazzjoni tar-rata ta’ kofinanzjament miżjuda għal Ċipru hija proporzjonali fir-rigward tas-sitwazzjoni fraġli tal-ekonomija Ċiprijotta. Hija se tgħin biex tgħaqqad perjodu ta’ ħtiġijiet għolja ta’ investiment pubbliku minn naħa, u sforzi ta’ konsolidazzjoni fiskali sostnuti min-naħa l-oħra, billi żżid l-ispazju fiskali meħtieġ għall-investimenti.

Għażla tal-istrument

L-istrument propost: emenda tar-regolament attwali.

Il-Kummissjoni eżaminat il-marġini kollha ta’ manuvra stipulati mill-qafas legali u tqis li hu neċessarju, fid-dawl tal-esperjenza sa issa, li tipproponi emendi għar-Regolament Ġenerali.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET TAL-PARTIJIET IKKONĊERNATI U TAL-VALUTAZZJONIJIET TAL-IMPATT

Evalwazzjonijiet ex post/kontrolli tal-idoneità tal-leġiżlazzjoni eżistenti

Ma kien hemm l-ebda valutazzjoni ex post/kontrolli tal-idoneità tal-leġiżlazzjoni eżistenti.

Konsultazzjonijiet mal-partijiet ikkonċernati

Ma kienx hemm konsultazzjoni ma' partijiet interessati esterni

Ġbir u użu tal-kompetenzi

L-użu ta’ għarfien espert estern ma kienx meħtieġ.

Valutazzjoni tal-impatt

Il-proposta tkun tippermetti lill-Kummissjoni żżid il-pagamenti lil Stat Membru taħt programm ta’ aġġustament wara t-30 ta’ Ġunju 2016. Din tkun tkopri l-perjodu sat-30 ta’ Ġunju tas-sena ta’ wara s-sena kalendarja li fiha l-Istat Membru ma jibqax jirċievi l-assistenza finanzjarja. Dan l-approċċ huwa konformi mas-sena fiskali tal-Fondi SIE li tkopri l-perjodu mill-1 ta’ Lulju sat-30 ta’ Ġunju. Dan jestendi l-perjodu ta’ eliġibbiltà sa massimu ta' 18-il xahar.

Iż-żieda tkun ammont ikkalkulat billi tiġi applikata żieda ta' għaxar punti perċentwali fuq ir-rati ta' kofinanzjament applikabbli għall-prijoritajiet (skont il-FERŻ, il-FSE u l-Fond ta' Koeżjoni) jew miżuri (skont il-FAEŻR u l-FEMS) tal-programmi man-nefqa ċertfikata ppreżentata waqt il-perjodu inkwistjoni sakemm jintlaħaq il-limitu għall-pagamenti.

Barra minn hekk, il-proposta tkun tippermetti li l-Kummissjoni testendi r-rata ta’ kofinanzjament eċċezzjonali ta’ 85 % għall-FEŻR u l-FSE f'Ċipru sal-għeluq tal-programm.

L-allokazzjoni finanzjarja totali għall-perjodu mill-Fondi għall-pajjiżi u l-programmi kkonċernati mhix se tinbidel.

Idoneità regolatorja u simplifikazzjoni

Din mhijiex inizjattiva fi ħdan il-Programm dwar l-Idoneità u l-Prestazzjoni tar-Regolamentazzjoni (REFIT).

Drittijiet fundamentali

Il-proposta ma għandhiex konsegwenzi għall-ħarsien tad-drittijiet fundamentali.

4.IMPLIKAZZJONIJIET GĦALL-BAĠIT

Il-proposta mhu se jkollha l-ebda impatt fuq l-approprjazzjonijiet ta' impenn, billi mhi qed tiġi proposta l-ebda bidla fl-ammonti massimi tal-finanzjament FSIE previsti fil-programmi operazzjonali għall-perjodu ta' programmazzjoni 2014-2020.

Għal approprjazzjonijiet ta’ pagament relatati mal-estensjoni tal-provvediment supplimentari skont l-Artikolu 24, il-proposta tista’ tirriżulta f’rimborż ogħla lill-Istati Membri kkonċernati. L-approprjazzjonijiet ta’ pagament addizzjonali għal din il-proposta jistgħu jimplikaw żieda temporanja ta’ approprjazzjonijiet ta’ pagament, li tiġi kkumpensata minn livell aktar baxx ta’ pagamenti fi tmiem iċ-ċiklu tal-ħajja tal-programmi 2014–2020. Għandu jiġi nnutat li l-modifika proposta ma timplika l-ebda tibdil fil-limiti massimi annwali tal-Qafas Finanzjarju Pluriennali għal impenji u pagamenti, li huma stabbiliti fl-Anness I tar-Regolament (UE) Nru 1311/2013.

5.ELEMENTI OĦRA

Il-pjanijiet għall-implimentazzjoni u l-arranġamenti ta’ monitoraġġ, ta’ evalwazzjoni u ta’ rapportar

Mhux applikabbli. Is-sistemi ta’ konsenja eżistenti tal-FSIE jistgħu jintużaw biex jissorveljaw l-implimentazzjoni ta’ din il-proposta.

Dokumenti ta’ spjegazzjoni (għad-direttivi)

Mhux applikabbli

Spjegazzjoni dettaljata tad-dispożizzjonijiet speċifiċi tal-proposta

Minħabba li l-Greċja, Ċipru, l-Irlanda, ir-Rumanija u l-Portugall kienu taħt programm ta’ aġġustament wara l-21 ta’ Diċembru 2013, kif definit fl-Artikolu 24(1) tar-Regolament (UE) Nru 1303/2013, ħames pajjiżi kienu eliġibbli għall-pagament supplimentari ta' 10 % fuq pagamenti interim imressqa qabel it-30 ta’ Ġunju 2016. Minn dak iż-żmien 'l hawn il-programmi ta’ assistenza finanzjarja għal Ċipru, l-Irlanda, il-Portugall u r-Rumanija skadew. Dan ifisser li l-Greċja hija l-uniku pajjiż taħt programm ta’ aġġustament fit-30 ta’ Ġunju 2016.

Rieżami ulterjuri tal-eliġibbiltà għall-pagament supplimentari fl-2014–2020 ma jidhirx neċessarju peress li pajjiżi suġġetti għal programmi ta’ aġġustament irid ikollhom iċ-ċertezza dwar iż-żmien u l-livell ta’ pagamenti tal-UE.

Minħabba li Ċipru ffirma programm ta’ aġġustament mal-UE f’Marzu 2013, l-Artikolu 120(3) tar-Regolament (UE) Nru 1303/2013 jipprovdi għal rata ta’ kofinanzjament eċċezzjonali ta’ 85 % għall-programmi operazzjonali kollha appoġġati mill-FEŻR u l-FSE f’Ċipru mill-1 ta’ Jannar 2014 sat-30 ta’ Ġunju 2017.

Ċipru ħareġ mill-programm ta’ aġġustament tiegħu fl-aħħar ta’ Marzu 2016. Madankollu, is-sitwazzjoni ekonomika ta’ Ċipru għadha fraġli, kif jidher mir-rata ta’ tkabbir kajmana tiegħu, it-tnaqqis fl-investiment, il-qgħad għoli u s-settur finanzjarju taħt pressjoni.

Biex titnaqqas il-pressjoni fuq il-baġit nazzjonali u jiġu aċċellerati l-investimenti ferm meħtieġa, huwa propost li tiġi estiża r-rata ta’ kofinanzjament ta’ 85 % għall-programmi operazzjonali kollha appoġġati mill-FEŻR u l-FSE f’Ċipru sal-għeluq tal-programm.

2016/0193 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament (UE) Nru 1303/2013 fir-rigward ta’ ċerti dispożizzjonijiet relatati mal-ġestjoni finanzjarja għal ċerti Stati Membri li qed jesperjenzaw jew jinsabu mhedda minn diffikultajiet serji fir-rigward tal-istabbiltà finanzjarja tagħhom

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 177 tiegħu,

Wara li kkunsidraw il-proposta mill-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 3 ,

Wara li kkunsidraw l-opinjoni tal-Kumitat tar-Reġjuni 4 ,

Filwaqt li jaġixxu skont il-proċedura leġiżlattiva ordinarja,

Billi:

(1)L-Artikolu 24(3) tar-Regolament (KE) Nru 1303/2013 jipprovdi li l-Kummissjoni għandha teżamina ż-żieda ta’ pagamenti interim mill-FSIE b’ammont li jikkorrispondi għal għaxar punti perċentwali fuq ir-rata ta’ kofinanzjament attwali għal kull prijorità/miżura għall-Istati Membri li kienu taħt programm ta’ aġġustament wara l-21 ta’ Diċembru 2013 u li talbu biex jibbenefikaw minn din il-miżura sat-30 ta’ Ġunju 2016 prevista f'din id-dispożizzjoni u biex tissottometti lill-Parlament Ewropew u lill-Kunsill rapport 5 bil-valutazzjoni tagħha u, jekk meħtieġ, proposta leġiżlattiva qabel it-30 ta’ Ġunju 2016.

(2)Ħames Stati Membri kienu eliġibbli għal żieda fil-pagament skont l-Artikolu 24 tar-Regolament (UE) Nru 1303/2013, jiġifieri r-Rumanija, l-Irlanda, il-Portugall, Ċipru u l-Greċja. Ir-Rumanija, l-Irlanda, il-Portugall u Ċipru lestew il-programmi ta’ aġġustament ekonomiku rispettivi tagħhom. Hija biss il-Greċja li għadha taħt programm ta’ aġġustament u tibbenefika minn assistenza finanzjarja relatata sat-tielet kwart tal-2018. Peress li l-Greċja għadha qed tiffaċċja diffikultajiet serji fejn tidħol l-istabbiltà finanzjarja tagħha, it-tul tal-applikazzjoni ta’ żieda fil-pagamenti għall-Istati Membri b’diffikultajiet baġitarji temporanji għandu jiġi estiż.

(3)Madankollu, il-possibbiltà għal pagamenti miżjuda għandha tintemm fit-30 ta’ Ġunju tas-sena ta’ wara s-sena kalendarja li fiha Stat Membru ma jibqax jirċievi assistenza finanzjarja taħt programm ta’ aġġustament.

(4)L-Artikolu 120(3) tar-Regolament (UE) Nru 1303/2013 jitlob li l-Kummissjoni twettaq rieżami biex tivvaluta l-ġustifikazzjoni għaż-żamma ta’ rata massima ta’ kofinanzjament ta’ 85 % fil-livell ta’ kull prijorità għall-programmi operazzjonali kollha appoġġati mill-FEŻR u l-FSE f’Ċipru wara t-30 ta’ Ġunju 2017 u biex tagħmel, jekk meħtieġ, proposta leġiżlattiva qabel it-30 ta’ Ġunju 2016.

(5)Ċipru ħareġ mill-programm ta’ aġġustament tiegħu fl-aħħar ta’ Marzu 2016. Madankollu, is-sitwazzjoni ekonomika ta’ Ċipru għadha fraġli, kif jidher mir-rata ta’ tkabbir kajmana tiegħu, it-tnaqqis fl-investiment, il-qgħad għoli u s-settur finanzjarju taħt pressjoni. Biex titnaqqas il-pressjoni fuq il-baġit nazzjonali u jiġu mħaffa l-investimenti ferm meħtieġa, ir-rata ta’ kofinanzjament ta’ 85 % għall-programmi operazzjonali kollha appoġġati mill-FEŻR u l-FSE f’Ċipru għandha għalhekk tiġi estiża sal-għeluq tal-programm.

(6)Sabiex tkun tista' ssir applikazzjoni fil-pront tal-miżuri previsti f'dan ir-Regolament, jinħtieġ li dan ir-Regolament jidħol fis-seħħ fil-jum ta' wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea,

ADOTTAW DAN IR-REGOLAMENT:

Artikolu 1

Ir-Regolament (UE) Nru 1303/2013 huwa emendat kif ġej:

1.L-Artikolu 24 huwa sostitwit b’dan li ġej:

"Żieda fil-pagamenti għall-Istati Membri b'diffikultajiet baġitarji temporanji

1. Fuq it-talba ta' Stat Membru, il-pagamenti interim u l-pagamenti tal-bilanċ finali jistgħu jiżdiedu b'10 punti perċentwali aktar mir-rata ta' kofinanzjament applikabbli għal kull prijorità għall-FEŻR, il-FSE u l-Fond ta' Koeżjoni jew għal kull miżura għall-FAEŻR u l-FEMS.

Jekk Stat Membru jissodisfa waħda mill-kundizzjonijiet li ġejjin wara l-21 ta’ Diċembru 2013, ir-rata miżjuda, li ma tistax taqbeż il-100 %, tapplika għat-talbiet tiegħu għal pagamenti għall-perjodu sat-30 ta' Ġunju 2016:

(a) fejn l-Istat Membru kkonċernat jirċievi self mill-Unjoni skont ir-Regolament tal-Kunsill (UE) Nru 407/2010;

(b) fejn l-Istat Membru kkonċernat jirċievi għajnuna finanzjarja fuq perjodu ta’ żmien medju skont ir-Regolament (KE) Nru 332/2002 taħt il-kondizzjoni tal-implimentazzjoni ta' programm ta' aġġustament makroekonomiku;

(c) fejn l-għajnuna finanzjarja ssir disponibbli għall-Istat Membru kkonċernat taħt il-kondizzjoni tal-implimentazzjoni ta' programm ta' aġġustament makroekonomiku kif speċifikat fir-Regolament (UE) Nru 472/2013.

Jekk Stat Membru jissodisfa waħda mill-kundizzjonijiet stabbiliti fit-tieni subparagrafu wara t-30 ta’ Ġunju 2016, ir-rata miżjuda tapplika għall-applikazzjonijiet għal pagamenti tiegħu għall-perjodu sat-30 ta’ Ġunju tas-sena ta’ wara s-sena kalendarja li matulha l-assistenza finanzjarja relatata tasal fi tmiemha.

Dan il-paragrafu ma japplikax għall-programmi skont ir-Regolament KTE.

2. Minkejja l-paragrafu 1, l-appoġġ tal-Unjoni permezz tal-pagamenti interim u l-pagamenti tal-bilanċ finali ma jkunx ogħla min-nefqa pubblika jew l-ammont massimu ta’ appoġġ mill-Fondi SIE għal kull prijorità għall-FEŻR, l-FSE u l-Fond ta' Koeżjoni, jew għal kull waħda mill-miżuri tal-FAEŻR u l-FEMS, kif stabbilit fid-deċiżjoni tal-Kummissjoni li tapprova l-programm, skont liem wieħed ikun l-inqas.";

2.L-Artikolu 120(3) huwa emendat kif ġej:

It-tieni subparagrafu jiġi ssostitwit b'dan li ġej:

"Għall-perjodu mill-1 ta' Jannar 2014 sal-għeluq tal-programm, ir-rata ta' kofinanzjament fil-livell ta' kull prijorità għall-programmi operazzjonali kollha f'Ċipru m'għandhiex tkun ogħla minn 85 %".

Artikolu 2

Dan ir-Regolament jidħol fis-seħħ l-għada tal-jum tal-pubblikazzjoni tiegħu f' Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri kollha.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.ISEM IL-PROPOSTA:

Proposta għal Regolament tal-Parlament Ewropew u tal-Kunsill li jemenda r-Regolament (UE) Nru 1303/2013 tal-Parlament Ewropew u tal-Kunsill dwar ċerti dispożizzjonijiet marbuta mal-ġestjoni finanzjarja għal ċerti Stati Membri li qed jesperjenzaw jew huma mhedda b’diffikultajiet serji fir-rigward tal-istabilità finanzjarja tagħhom.

2.QAFAS ABM / ABB

Qasam/oqsma ta' politika kkonċernat/i u l-Attività/Attivitajiet assoċjati:

Politika Reġjonali; Attività ABB 13.03

Impjiegi u Affarijiet Soċjali; Attività ABB 04.02

Il-Fond ta' Koeżjoni, ABB 13.04

Żvilupp Rurali, attività ABB 05.04

Sajd, attività ABB 11.06

3.LINJI BAĠITARJI

3.1.Linji baġitarji (linji operazzjonali u linji relatati tal-assistenza teknika u amministrattiva (li qabel kienu l-linji B.A)):

L-azzjoni l-ġdida proposta se tkun implimentata fuq il-linji baġitarji li ġejjin:

13.036000 Reġjuni inqas żviluppati (FEŻR)

13.036100 Reġjuni fi tranżizzjoni (FEŻR)

13.036200 Reġjuni iktar żviluppati (FEŻR)

13.036300 Allokazzjoni addizzjonali għal reġjuni ultraperiferiċi u sottopopolati (FEŻR)

13.046000 Fond ta' Koeżjoni

04.026000 Reġjuni inqas żviluppati (FSE)

04.026100 Reġjuni fi tranżizzjoni (FSE)

04.026200 Reġjuni iktar żviluppati (FSE)

04.026400 Inizjattiva favur l-Impjieg taż-Żgħażagħ (FSE)

05.046001 Żvilupp rurali (FAEŻR)

11.066000 Sajd u akkwakultura (FEMS)

3.2.Tul ta’ żmien tal-azzjoni u tal-impatt finanzjarju:

3.3.    Karatteristiċi baġitarji:

4.SOMMARJU TAR-RIŻORSI

4.1.Riżorsi Finanzjarji

4.1.1.Sommarju tal-approprjazzjonijiet ta' impenn (AI) u tal-approprjazzjonijiet ta' pagament (AP)

It-tabelli li ġejjin juru l-impatt stmat tal-miżuri proposti fl-2016 sal-2020. Ġaladarba ma huma proposti l-ebda riżorsi finanzjari ġodda għall-approprjazzjonijiet ta' impenn, l-ebda ċifra ma hija mdaħħla fit-tabelli iżda hija indikata m.a. (mhux applikabbli). Il-proposta hija għaldaqstant konformi mal-qafas finanzjarju pluriennali għall-perjodu 2014-2020.

Għal pagamenti, il-proposta tista' tirriżulta f'rimborż ogħla lill-Istati Membri kkonċernati.

Għal pagamenti, il-proposta tista' tirriżulta f'rimborż ogħla lill-Istati Membri kkonċernati. Abbażi tat-tbassir tal-pagamenti mill-Istati Membri rivedut mill-Kummissjoni u l-approprjazzjonijiet ta' pagament inklużi fil-baġit 2016 u l-Abbozz tal-Baġit 2017, il-bżonn ta' approprjazzjonijiet ta' pagament huma stmati li se jkunu bejn wieħed u ieħor EUR 544 miljun. L-approprjazzjonijiet ta' pagament addizzjonali għal din il-proposta se jimplikaw żieda fl-approprjazzjonijiet ta' pagament fl-2016 u l-2017 li se jiġu kkumpensati sal-aħħar tal-perjodu ta' pprogrammar. Il-modifika proposta ma timplika l-ebda tibdil fil-limiti massimi annwali tal-Qafas Finanzjarju Pluriennali għal impenji u pagamenti, li huma stabbiliti fl-Anness I tar-Regolament (UE) Nru 1311/2013.

Quddiem it-talba ta' Stat Membru sabiex jibbenifika mill-azzjoni u waqt li tikkunsidra l-iżvilupp tas-sottomissjonijiet tal-pagamenti interim, fl-2016 u fl-2017 il-Kummissjoni ser terġa’ tevalwa il-ħtieġa ta’ krediti ta’ pagament addizzjonali u ser tipproponi, jekk ikun meħtieġ, l-azzjonijiet neċessarji lill-Awtorità Baġitarja.

L-ebda stima ma ġiet ikkalkulata għas-snin 2018 'il quddiem u kull tip ta' konsegwenza se tittieħed inkonsiderazzjoni fil-proċeduri tal-baġit għas-snin konċernati.

EUR miljun (sa 3 punti deċimali)

Kost finanzjarju indikattiv totali tal-intervent

Dettalji tal-kofinanzjament

EUR miljun (sa 3 punti deċimali)

4.1.2.Kompatibbiltà mal-Programmar Finanzjarju

Il-proposta hija kompatibbli mal-programmar finanzjarju eżistenti.

◻    ◻Il-proposta ser tkun teħtieġ programmar mill-ġdid tal-intestatura rilevanti fil-perspettiva finanzjarja.

◻    ◻Il-proposta tista’ tkun teħtieġ l-applikazzjoni tad-dispożizzjonijiet tal-Ftehim Interistituzzjonali 9 (jiġifieri l-istrument ta’ flessibbiltà jew ir-rieżami tal-perspettiva finanzjarja).

4.1.3.Impatt finanzjarju fuq id-Dħul

⌧    ⌧Il-proposta ma għandha l-ebda implikazzjoni finanzjarja fuq id-dħul

◻    ◻Il-proposta għandha impatt finanzjarju - l-effett fuq id-dħul huwa dan li ġej:

Miljuni ta' EUR (sa pożizzjoni deċimali waħda)

(Semmi kull linja tal-baġit ta’ dħul ikkonċernata, billi żżid l-għadd xieraq ta’ ringieli fit-tabella jekk hemm effett fuq aktar minn linja tal-baġit waħda.)

4.2.Ir-Riżorsi Umani FTE (inklużi l-uffiċjali, u l-persunal temporanju u estern) – ara d-dettalji fil-punt 8.2.1.

5.KARATTERISTIĊI U GĦANIJIET

5.1.Il-ħtieġa li għandha tintlaħaq fuq żmien qasir jew twil

Il-kriżi finanzjarja u ekonomika sostnuta qed iżżid il-pressjoni fuq ir-riżorsi finanzjarji nazzjonali hekk kif l-Istati Membri qed inaqqsu l-bagits tagħhom. F'dan il-kuntest, l-iżgurar ta' implimentazzjoni bla tfixkil ta' programmi tal-FSIE huwa ta' importanza partikolari bħala għodda biex jiġu injettati l-fondi fl-ekonomija. Sabiex jiġi żgurat li dawn l-Istati Membri jkomplu bl-implimentazzjoni tal-programmi tal-FSIE u li l-fondi jiġu żburżati għal proġetti, il-proposta tippermetti lill-Kummissjoni żżid il-pagamenti lill-Istati Membri sakemm dawn jibbenefikaw minn għajnuna finanzjarja taħt programm ta’ aġġustament.

5.2.Valur miżjud tal-involviment tal-Komunità u l-koerenza tal-proposta ma’ strumenti finanzjarji oħrajn u s-sinerġija possibbli

Il-proposta se tippermetti li titkompla l-implimentazzjoni tal-programmi, li jiġu injettati flus fl-ekonomija filwaqt li tgħin biex fl-istess ħin jitnaqqas il-piż fuq l-infiq pubbliku.

5.3.L-għanijiet, ir-riżultati mistennija u l-indikaturi relatati mal-proposta fil-kuntest tal-qafas tal-ABM

L-għan huwa li dawk l-Istati Membri l-iktar milquta mill-kriżi finanzjarja jiġu megħjuna biex ikunu jistgħu jkomplu bl-implimentazzjoni tal-programmi fil-post, u b'hekk jiġu injettati l-fondi fl-ekonomija.

5.4.Il-Metodu ta’ Implimentazzjoni (indikattiv)

Uri hawn taħt il-metodu(i) magħżul(a) għall-implimentazzjoni tal-azzjoni.

Mal-Istati Membri

6.MONITORAĠĠ U EVALWAZZJONI

6.1.Sistema ta' monitoraġġ

Mhux neċessarja, għax taqa' taħt il-monitoraġġ stabbilit tal-Fondi Strutturali u ta' Investiment Ewropej.

6.2.Evalwazzjoni

6.2.1.Evalwazzjoni ex ante

Mhux applikabbli

6.2.2.Il-miżuri meħuda wara evalwazzjoni intermedja/ex-post (tagħlimiet miksuba permezz ta’ esperjenza simili fl-imgħoddi)

Mhux applikabbli

6.2.3.It-termini u l-frekwenza tal-evalwazzjoni fil-ġejjieni

Mhux applikabbli

7.MIŻURI KONTRA L-FRODI

M.A.

8.DETTALJI TAR-RIŻORSI

8.1.Għanijiet tal-proposta f’termini tal-kost finanzjarji tagħhom

L-approprjazzjonijiet għall-impenji f’miljuni ta’ EUR (sa 3 punti deċimali)

8.2.Nefqa Amministrattiva

8.2.1.Għadd u tip ta’ riżorsi umani

8.2.2.Deskrizzjoni tal-kompiti li jirriżultaw mill-azzjoni

Mhux applikabbli

8.2.3.Sorsi tar-riżorsi umani (statutarji)

(Fejn ikun iddikjarat aktar minn sors wieħed, jekk jogħġbok indika l-għadd ta’ karigi li joriġinaw minn kull sors).

◻    ◻Karigi li bħalissa huma allokati għall-ġestjoni tal-programm li għandhom jinbidlu jew jiġu estiżi

◻    Karigi allokati minn qabel fl-eżerċizzju SPA/APB għas-sena n

◻    ◻Karigi li għandhom jintalbu fil-proċedura SPA/APB li jmiss

◻    ◻Karigi li jridu jerġgħu jiġu assenjati bl-użu ta' riżorsi eżistenti fl-ambitu tas-servizz ta’ ġestjoni (riallokazzjoni interna)

◻    ◻Karigi meħtieġa għas-sena n, għalkemm mhux previsti fl-eżerċizzju SPA/APB tas-sena kkonċernata

8.2.4.Nefqa oħra Amministrattiva inkluża fl-ammont ta’ referenza (XX 01 04/05 - Nefqa għall-immaniġġjar amministrattiv)

EUR miljun (sa 3 punti deċimali)

8.2.5.Il-kost finanzjarju tar-riżorsi umani u l-kostijiet assoċjati mhux inklużi fl-ammont ta' referenza

EUR miljun (sa 3 punti deċimali)

8.2.6.Nefqa amministrattiva oħra mhux inkluża fl-ammont ta’ referenza

(1) Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006, ĠU L 347, 20.12.2013, p. 320.

(2) Ara l-Artikolu 120(3) tar-Regolament (UE) Nru 1303/2013. Ċipru huwa kklassifikat bħala reġjun aktar żviluppat għall-perjodu ta’ programmazzjoni 2014–2020. Ara: L-Anness III tad-Deċiżjoni ta’ Implimentazzjoni tal-Kummissjoni tat-18 ta’ Frar 2014 li tistabbilixxi l-lista ta’ reġjuni eliġibbli għal finanzjament mill-Fond Ewropew għall-Iżvilupp Reġjonali u l-Fond Soċjali Ewropew u ta’ Stati Membri eliġibbli għall-finanzjament mill-Fond ta’ Koeżjoni għall-perjodu 2014-2020 (notifikata bid-dokument C(2014) 974), ĠU L 50,20.2.2014, p. 22.

(3) ĠU C , , p. .

(4) ĠU C , , p. .

(5) COM (2016) 414 finali

(6) Nefqa li ma taqax taħt il-Kapitolu xx 01 tat-Titolu xx konċernat

(7) Nefqa skont l-artikolu xx 01 04 tat-Titolu xx.

(8) Nefqa fi ħdan il-kapitolu xx 01 għajr għall-artikoli xx 01 04 jew xx 01 05.

(9) Ara l-punti 19 u 24 tal-Ftehim Interistituzzjonali.

(10) Għandhom jiġu miżjuda kolonni addizzjonali jekk ikun meħtieġ, jiġifieri, jekk it-tul tal-azzjoni jaqbeż is-6 snin.