L-għan tal-Konvenzjoni tal-Aja tal-25 ta' Ottubru 1980 dwar l-Aspetti Ċivili tal-Ħtif Internazzjonali ta' Minuri (minn hawn 'il quddiem: "il-Konvenzjoni tal-1980"), sal-lum irratifikata minn 93 pajjiż, inklużi l-Istati Membri kollha tal-UE, huwa li jerġa' jiġi stabbilit l-istatus quo permezz tar-ritorn immedjat ta' tfal li jittieħdu jew li jinżammu b'mod inġust permezz ta' sistema ta' kooperazzjoni fost awtoritajiet ċentrali maħtura mill-Partijiet Kontraenti tagħha.

Minħabba li l-prevenzjoni tal-ħtif tat-tfal hija parti essenzjali mill-politika tal-UE biex tippromwovi d-drittijiet tat-tfal, l-Unjoni Ewropea hija attiva fil-livell internazzjonali biex ittejjeb l-applikazzjoni tal-Konvenzjoni tal-1980 u tinkoraġġixxi lil stati terzi biex jaċċedu għaliha.

Ir-Repubblika tal-Korea ddepożitat l-istrument tal-adeżjoni mal-Konvenzjoni tal-1980 fit-13 ta' Diċembru 2012. Il-Konvenzjoni daħlet fis-seħħ fir-Repubblika tal-Korea fl-1 ta' Marzu 2013.

L-Artikolu 38(4) tal-Konvenzjoni tal-1980 jistipula li l-Konvenzjoni tapplika bejn il-pajjiż aderenti u dawk l-Istati Kontraenti li jkunu ddikjaraw li aċċettaw l-adeżjoni.

Minħabba li l-kwistjoni tal-ħtif internazzjonali tat-tfal hija fil-kompetenza esterna esklużiva tal-Unjoni Ewropea, id-deċiżjoni dwar jekk tiġix aċċettata l-adeżjoni tar-Repubblika tal-Korea għandha tittieħed fil-livell tal-UE permezz ta' Deċiżjoni tal-Kunsill. B'hekk l-Istati Membri għandhom jagħmlu d-dikjarazzjoni ta' aċċettazzjoni tagħhom fir-rigward tal-adeżjoni tar-Repubblika tal-Korea fl-interess tal-Unjoni Ewropea.

L-eżistenza tal-kompetenza esklużiva tal-UE fil-kwistjoni tal-aċċettazzjoni tal-adeżjoni ta' stat terz mal-Konvenzjoni tal-1980 tabilħaqq kienet ikkonfermata mill-Qorti tal-Ġustizzja tal-Unjoni Ewropea, li ġiet ikkonsultata fuq l-inizjattiva tal-Kummissjoni.

Fl-14 ta' Ottubru 2014, l-Opinjoni 1/13 tal-Qorti tal-Ġustizzja tal-Unjoni Ewropea kkonfermat li l-kompetenza esklużiva tal-Unjoni Ewropea tkopri l-aċċettazzjoni tal-adeżjoni ta' stat terz mal-Konvenzjoni tal-Aja tal-1980 dwar l-Aspetti Ċivili tal-Ħtif Internazzjonali ta' Minuri.

Il-Qorti saħqet b'mod partikolari dwar il-ħtieġa għal uniformità fil-livell tal-UE f'dan ir-rigward, sabiex tiġi evitata ġeometrija varjabbli fost l-Istati Membri. L-għan ta' din id-deċiżjoni huwa li l-Konvenzjoni tal-1980 tidħol fis-seħħ bejn ir-Repubblika tal-Korea u l-Istati Membri kollha tal-UE.

F'dak li jirrigwarda l-ħtif tat-tfal minn ġenitur, il-Konvenzjoni tal-Aja tal-1980 hija l-kontroparti internazzjonali tar-Regolament tal-Kunsill Nru 2201/2003 (magħruf bħala r-Regolament Brussell IIa) li huwa l-bażi tal-kooperazzjoni ġudizzjarja tal-UE fi kwistjonijiet matrimonjali u ta' responsabbiltà tal-ġenituri 1 .

Wieħed mill-objettivi ewlenin tar-Regolament hu li jiskoraġġixxi l-ħtif tat-tfal bejn l-Istati Membri billi jistabbilixxi proċeduri li jiżguraw ir-ritorn minnufih tat-tfal lejn l-Istat Membru tar-residenza abitwali tagħhom. Għal dan l-għan, ir-Regolament Brussell IIa jinkludi fl-Artikolu 11 tiegħu, il-proċedura stabbilita fil-Konvenzjoni tal-Aja tal-1980 u jikkumplimentaha billi jiċċara xi aspetti tagħha, b'mod partikolari fir-rigward tas-smigħ tat-tfal, il-perjodu ta' żmien biex tingħata deċiżjoni wara li ssir applikazzjoni għal ritorn u r-raġunijiet biex ma jsirx ir-ritorn tat-tfal. Huwa jintroduċi wkoll dispożizzjonijiet li jirregolaw ordnijiet ta' ritorn u ta' nuqqas ta' ritorn konfliġġenti maħruġa fi Stati Membri differenti.

Fil-livell internazzjonali, l-Unjoni Ewropea tappoġġa l-adeżjoni ta' stati terzi mal-Konvenzjoni tal-1980 sabiex l-Istati Membri tagħha jibbażaw ruħhom fuq qafas ġuridiku komuni biex jittrattaw il-ħtif internazzjonali tal-minuri.

Fil-21 ta' Diċembru 2011, il-Kummissjoni adottat tmien proposti għal Deċiżjonijiet tal-Kunsill sabiex tiġi aċċettata l-adeżjoni mal-Konvenzjoni tal-Aja tal-1980 dwar il-Ħtif Internazzjonali ta' Minuri ta' tmien pajjiżi terzi (il-Marokk, Singapore, il-Federazzjoni Russa, l-Albanija, Andorra, is-Seychelles, il-Gabon u l-Armenja) 2 .

Bejn Ġunju u Diċembru tal-2015, seba' Deċiżjonijiet, ibbażati fuq il-proposti msemmija hawn fuq, ġew adottati mill-Kunsill tal-Unjoni Ewropea 3 .

Din il-proposta tieħu f'kunsiderazzjoni pajjiż terz (ir-Repubblika tal-Korea) li aċċeda għall-Konvenzjoni tal-1980 wara l-adozzjoni tal-proposti tal-2011.

Minbarra l-objettiv ġenerali tal-iżvilupp ta' kooperazzjoni ġudizzjarja f'materji ċivili li jkollhom implikazzjonijiet transfruntieri skont l-Artikolu 81 tat-TFUE, din il-proposta hija marbuta mal-objettiv imnaqqax fl-Artikolu 3 tat-Trattat dwar l-Unjoni Ewropea li jiġu protetti d-drittijiet tat-tfal. Is-sistema tal-Konvenzjoni tal-Aja tal-1980 hija mfassla biex tipproteġi lit-tfal mill-effetti ta' ħsara ta' ħtif mill-ġenituri u biex tiżgura li t-tfal ikunu jistgħu jżommu kuntatt maż-żewġ ġenituri, pereżempju billi tiżgura l-eżerċizzju effettiv tad-drittijiet ta' aċċess.

Il-proposta hija wkoll konsistenti mal-promozzjoni tal-użu tal-medjazzjoni fis-soluzzjoni ta' tilwim familjari transfruntieri. Id-Direttiva dwar ċerti aspetti ta' medjazzjoni f'materji ċivili u kummerċjali 4 , tapplika, fost affarijiet oħra, għal-liġi tal-familja fiż-żona komuni ġudizzjarja Ewropea. Il-Konvenzjoni tal-Aja tal-1980 tinkoraġġixxi wkoll soluzzjoni ta' ħbiberija għal tilwim familjari. Waħda mill-Gwidi għall-Prattika Tajba skont il-Konvenzjoni tal-Aja tal-1980 ppubblikati mill-Konferenza tal-Aja dwar id-Dritt Internazzjonali Privat hija ddedikata għall-użu tal-medjazzjoni għar-riżoluzzjoni ta' tilwim internazzjonali tal-familja li jirrigwarda t-tfal li jaqa' fil-kamp ta' applikazzjoni tal-Konvenzjoni. Fuq inizjattiva tal-Kummissjoni Ewropea, din il-Gwida ġiet tradotta fil-lingwi kollha tal-UE minbarra l-Ingliż u l-Franċiż u wkoll fl-Għarbi sabiex jiġi sostnut id-djalogu ma' Stati li għadhom ma rratifikawx il-Konvenzjoni u tingħata għajnuna sabiex jinstabu mezzi konkreti kif jiġu indirizzati l-problemi ppreżentati mill-ħtif internazzjonali tat-tfal ma' pajjiżi mhux ratifikanti 5 .

Minħabba l-fatt li d-deċiżjoni tirrigwarda ftehim internazzjonali, il-bażi ġuridika applikabbli hija l-Artikolu 218 tat-Trattat dwar il-Funzjonament tal-Unjoni Ewropea flimkien mal-Artikolu 81(3). Il-Kunsill għandu jaġixxi b'mod unanimu wara li jikkonsulta mal-Parlament Ewropew.

Ir-Renju Unit u l-Irlanda huma marbutin bir-Regolament (KE) Nru 2201/2003 u għalhekk qegħdin jieħdu sehem fl-adozzjoni u l-applikazzjoni ta' din id-Deċiżjoni.

B'konformità mal-Artikoli 1 u 2 tal-Protokoll Nru 22, dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qiegħda tieħu sehem fl-adozzjoni ta' din id-Deċiżjoni, u mhijiex marbuta biha jew soġġetta għall-applikazzjoni tagħha.

•    Sussidjarjetà

Din il-proposta hija mfassla fuq il-mudell tad-Deċiżjonijiet tal-Kunsill diġà adottati dwar l-istess suġġett u ma tmurx lil hinn minn dak li huwa meħtieġ biex jintlaħaq l-għan ta' azzjoni koerenti tal-UE fil-qasam tal-ħtif internazzjonali tat-tfal billi tiżgura li l-Istati Membri kollha tal-UE jaċċettaw l-adeżjoni tar-Repubblika tal-Korea mal-Konvenzjoni tal-Aja tal-1980 f'perjodu ta' żmien stabbilit.

Sabiex l-UE tkun tista' tieħu deċiżjoni infurmata dwar jekk taċċettax jew le l-adeżjoni ta' pajjiż terz mal-Konvenzjoni tal-1980, jinħtieġ li ssir il-ħidma ta' tħejjija xierqa.

Matul laqgħa tal-esperti tal-20 ta' Jannar 2015, il-Kummissjoni u l-Istati Membri tal-UE ftiehmu fuq sett ta' kriterji biex tiġi vvalutata s-sitwazzjoni tal-pajjiż terz. Il-kwestjonarju jistabbilixxi lista indikattiva ta' parametri ta' referenza sabiex jgħin fil-valutazzjoni tal-pajjiż terz li aderixxa mal-Konvenzjoni. Il-konsultazzjoni li saret mal-Istati Membri u d-diskussjonijiet li saru waqt laqgħa tal-esperti tal-15 ta' Jannar 2016 urew li - f'dan l-istadju - ma hemm l-ebda oġġezzjoni min-naħa tal-Istati Membri għall-aċċettazzjonin tal-adeżjoni tar-Repubblika tal-Korea mal-Konvenzjoni tal-1980.

L-informazzjoni rilevanti dwar il-livell ta' implimentazzjoni tal-Konvenzjoni fil-Korea nġabret minn diversi sorsi. L-ewwel nett, l-informazzjoni kienet miġbura mid-Delegazzjoni tal-UE fir-Repubblika tal-Korea, li kkunsidrat, b'mod partikolari l-introduzzjoni tal-leġiżlazzjoni ta' implimentazzjoni, l-eżistenza ta' ġuriżdizzjoni kkonċentrata biex tittratta każijiet ta' ħtif, u l-possibbiltà għal persuni barranin biex ikollhom aċċess għall-għajnuna ġuridika. Ir-riżultati tal-inkjesta kienu sodisfaċenti, u, ukoll jekk hemm xi tħassib dwar il-livell li għadu baxx ta' għarfien tal-Konvenzjoni minn professjonisti ġuridiċi u n-nuqqas ta' miżuri speċifiċi ta' infurzar, dawn mhumiex tali li jimpedixxu l-aċċettazzjoni tal-adeżjoni tar-Repubblika tal-Korea.

L-Istati Membri wkoll ġabru informazzjoni dwar is-sitwazzjoni fir-Repubblika tal-Korea u r-riżultat kien diskuss waqt il-laqgħa tal-esperti tal-15 ta' Jannar 2016.

Aktar informazzjoni ġiet mill-Uffiċċju Permanenti tal-Konferenza tal-Aja dwar id-Dritt Internazzjonali Privat. Ir-Repubblika tal-Korea kkompletat kemm il- Kwestjonarju Standard għal stati li jkunu għadhom kemm aderew u Profil tal-Pajjiż 6 . Barra minn hekk, ir-Repubblika tal-Korea ħatret żewġ imħallfin għan-Netwerk Internazzjonali tal-Imħallfin tal-Aja. Fl-aħħar nett, l-imħallfin mir-Repubblika tal-Korea li ġew sekondati għall-Bureau Permanenti fil-passat (sekondar ta' sena kull darba) kienu strumentali lura f'pajjiżhom fir-rigward tal-implimentazzjoni tal-Konvenzjoni tal-1980.

Il-proposta preżenti ma għandhiex impatti ekonomiċi, soċjali jew ambjentali li jkunu jeħtieġu valutazzjoni tal-impatt fil-kamp ta' applikazzjoni tal-Linji Gwida tar-Regolamentazzjoni Aħjar tal-Kummissjoni Ewropea. B'mod simili għas-seba' Deċiżjonijiet tal-Kunsill diġà adottati fl-2015 dwar l-aċċettazzjoni tal-adeżjoni ta' ċerti stati terzi mal-Konvenzjoni tal-Aja tal-1980, ma hija meħtieġa l-ebda valutazzjoni tal-impatt għal din il-proposta minħabba n-natura ta' dan l-att leġiżlattiv. Fil-fatt, ma hemm l-ebda għażliet oħrajn għajr Deċiżjoni tal-Kunsill biex tiġi aċċettata l-adeżjoni ta' stat terz mal-Konvenzjoni tal-1980.

Madankollu, valutazzjoni speċifika tas-sitwazzjoni fir-Repubblika tal-Korea sabiex jiġi vverifikat jekk hijiex kapaċi timplimenta l-Konvenzjoni tal-1980 b'mod sodisfaċenti twettqet mill-Kummissjoni u mill-Istati Membri flimkien fuq il-linji deskritti hawn fuq.

Peress li l-proposta tikkonċerna biss l-awtorizzazzjoni lill-Istati Membri biex jaċċettaw l-adeżjoni tar-Repubblika tal-Korea mal-Konvenzjoni tal-1980, il-monitoraġġ tal-implimentazzjoni tagħha huwa limitat għar-rispett mill-Istati Membri għall-kliem tad-dikjarazzjoni u l-iskeda taż-żmien biex jiddepożitawha u jikkomunikaw id-depożitu tagħha lill-Kummissjoni kif stabbilit fid-Deċiżjoni tal-Kunsill.