IL-KUMMISSJONI EWROPEA

Brussell, 20.12.2016

COM(2016) 812 final

RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

Il-Fondi Strutturali u ta’ Investiment Ewropej 2014-2020
Rapport ta’ sinteżi għall-2016 tar-rapporti annwali ta’ implimentazzjoni tal-programm
b’kopertura tal-implimentazzjoni fl-2014-2015

Il-Fondi Strutturali u ta’ Investiment Ewropej 2014-2020
Rapport ta’ sinteżi għall-2016 tar-rapporti annwali ta’ implimentazzjoni tal-programm
b’kopertura tal-implimentazzjoni fl-2014-2015

1.Daħla

Fil-kuntest ta’ sinjali ta’ rkupru ekonomiku, bosta Stati Membri u reġjuni għadhom qegħdin iħabbtu wiċċhom ma’ tkabbir fraġli u ma’ dgħufijiet strutturali. Id-diżugwaljanzi ekonomiċi u soċjali bejn u fl-Istati Membri għadhom hemm filwaqt li l-livell kumplessiv tal-investiment għadu taħt il-livelli ta’ qabel il-kriżi. Il-ġenerazzjoni l-ġdida ta’ programmi taħt il-Fondi Strutturali u ta’ Investiment Ewropej (Fondi SIE) 2014-2020 toffri opportunitajiet sinifikanti biex l-investiment pubbliku u privat jappoġġja t-tkabbir, l-impjiegi u t-trasformazzjoni strutturali.

Sforz ta’ investiment kumplessiv li jiswa EUR 638 biljun bejn l-2014 u l-2020; madwar miljun proġett magħżula li jiswew EUR 58,8 biljun (li diġà żdiedu għal EUR 128,8 biljun sal-ħarifa 2016); 274 000 intrapriża li tirċievi appoġġ; 2,7 miljun ruħ li ngħataw appoġġ biex ifittxu impjieg, taħriġ jew edukazzjoni; u investiment biex tittejjeb il-bijodiversità ta’ 11,1-il miljun ettaru ta’ art agrikola. Dawn huma wħud mir-riżultati preliminari li joħorġu mir-Rapporti Annwali ta’ Implimentazzjoni (RAI) għall-2016 sottomessi mill-Istati Membri dwar l-implimentazzjoni tal-Fondi SIE fl-ewwel sentejn taċ-ċiklu ta’ programmazzjoni.

F’Diċembru 2015, il-Komunikazzjoni “Ninvestu f’impjiegi u tkabbir - nimmassimizzaw il-kontribuzzjoni tal-Fondi Strutturali u ta’ Investiment Ewropej” issinteżizzat l-eżiti tan-negozjati mal-Istati Membri kollha dwar il-programmi u l-Ftehimiet ta’ Sħubija 1 . Enfasizzat ukoll il-kontribuzzjoni mistennija tal-ħames Fondi SIE 2 għall-istrateġija ta’ tkabbir tal-UE, għall-Pjan ta’ Investiment għall-Ewropa u għall-indirizzar tal-isfidi strutturali u tar-riformi fl-Istati Membri. Il-Fondi SIE jagħtu wkoll kontribuzzjonijiet diretti lill-prijoritajiet politiċi tal-Kummissjoni.

Dan ir-rapport huwa l-ewwel wieħed minn sensiela ta’ rapporti annwali lill-istituzzjonijiet tal-UE dwar l-implimentazzjoni tal-Fondi SIE. Din l-analiżi tas-sitwazzjoni ssir fil-kuntest ta’ novitajiet kbar introdotti fl-2014 sabiex itejbu l-kwalità tal-infiq, bħall-konċentrazzjoni tematika, rabtiet aktar qawwijin mal-governanza ekonomika, kundizzjonalitajiet ex ante, iffukar fuq ir-riżultati mtejba u mekkaniżmi ta’ kejl tal-prestazzjoni. Din twieġeb għal żewġ rekwiżiti formali: (a) sabiex ir-rapporti annwali ta’ implimentazzjoni għall-2016 dwar il-533 programm provdut mill-Istati Membri u mir-reġjuni li jkopru l-perjodu 2014-2015 jinġabru fil-qosor u (b) sabiex l-evalwazzjonijiet disponibbli ta’ dawk il-programmi jkunu ssinteżizzati 3 .

Din tiġbor fil-qosor informazzjoni dwar l-għażla tal-proġetti u l-kisbiet tal-indikaturi fil-post u dwar kif qegħdin jinbnew il-mekkaniżmi ta’ eżekuzzjoni mill-Istati Membru u mir-reġjuni. Tikkumplimenta l-analiżi teknika ta’ Mejju 2016 mill-perspettiva tal-baġit tal-UE tal-implimentazzjoni baġitarji tal-Fondi SIE 4 .

It-Taqsima 2 ta’ hawn taħt tipprovdi ħarsa ġenerali tal-progress fl-implimentazzjoni sa tmiem l-2015 u tiddeskrivi l-isforzi sabiex jiġu żviluppati strateġiji u mekkaniżmi sodi biex iwettqu investimenti effettivi. It-Taqsima 3 tippreżenta f’aktar dettall il-progress fl-oqsma tematiċi ewlenin. It-Taqsima 4 tippreżenta ġabra fil-qosor tal-ħidma li tinsab għaddejja sabiex titwettaq evalwazzjoni robusta tal-implimentazzjoni tal-politika.

2.Ħarsa ġenerali tal-isforzi fl-ipprogrammar tal-Fondi SIE u biex jingħata bidu għall-investiment

Matul l-2014 u l-2015 l-awtoritajiet nazzjonali u reġjonali kellhom tliet objettivi primarji (a) li jlestu n-negozjati u jiżguraw l-adozzjoni tal-programmi l-ġodda, (b) li jniedu l-programmi l-ġodda u (c) li jlestu b’suċċess l-implimentazzjoni tal-programmi 2007-2013.

L-adozzjoni tard tal-qafas finanzjarju pluriennali għall-perjodu 2014-2020 kellha effett indirett fuq l-adozzjoni tal-leġiżlazzjoni li tirregola l-Fondi SIE. Il-proċess għal qbil dwar il-programmi 2014-2020, flimkien mal-kisbiet mistennija ta’ dawk il-programmi, ġie ppreżentat f’Diċembru 2015 5 . Sa tmiem l-2014, ġew adottati 220 programm. Madankollu, il-maġġoranza – 313-il programm –ġew iffinalizzati fl-2015, u 181 iffinalizzati unikament fit-tieni semestru. Minħabba f’hekk, filwaqt li l-maġġoranza tal-programmi adottati fl-2015 irrapportaw progress, ħafna kienu għadhom qegħdin jaħdmu biex jagħżlu l-ewwel proġetti tagħhom sa tmiem l-2015.

Il-ġenerazzjoni ta’ programmi tal-Fondi SIE 2014-2020 jiffukaw b’aktar qawwa fuq ir-riżultati, it-trasparenza u l-obbligu ta’ rendikont: sal-2023, il-programmi kollha se jissottomettu RAI li għandhom jippreżentaw kwantifikazzjoni dettaljata tal-progress f’rabta mal-finanzi, l-outputs u r-riżultati mistennija. Dan jallinja l-programmi b’mod ċar mal-inizjattiva “Baġit tal-UE ffukat fuq ir-Riżultati” 6 .

2.1.Ħarsa ġenerali tal-progress fl-implimentazzjoni

Il-Pjattaforma ta’ Dejta Miftuħa tal-Fondi SIE 7 ġiet aġġornata biex jintwera l-volum finanzjarju tal-għażla tal-proġetti u t-tbassir u l-kisbiet għall-indikaturi komuni kif irrapportat mill-programmi fir-RAI tal-2016.

2.1.1.Ħarsa ġenerali finanzjarja

F’termini ta’ pagamenti tal-UE lill-Istati Membri, tħallas total ta’ EUR 15,4 biljun sa tmiem l-2015. Dan irrappreżenta 13,8 % tal-impenji tal-UE għall-2014 u l-2015 8 u fil-biċċa l-kbira kien jikkonsisti f’pagamenti ta’ prefinanzjament.

Fir-RAI tal-2016, li jkopru s-snin 2014 u 2015, l-Istati Membri nnotifikaw lill-Kummissjoni bl-allokazzjonijiet finanzjarji għall-proġetti magħżula. Il-volum totali tal-proġetti magħżula għall-appoġġ kien EUR 58,8 biljun li jirrappreżentaw 9,2 % tal-volum totali tal-investiment ippjanat għall-perjodu 2014–2020. Il-kontribuzzjoni tal-UE għall-proġetti magħżula hija stmata li tammonta għal EUR 41,8 biljun. Ir-rendikont tal-volum tal-għażla ta’ proġetti skont l-objettiv tematiku, innotifikat mill-Istati Membri fi tmiem l-2015, huwa ppreżentat fit-Tabella 1 hawn taħt.

Tabella 1: Kost totali tal-proġetti magħżula skont l-Objettiv Tematiku (f’miljuni ta’ EUR) u r-rata tal-għażla tal-proġetti sa tmiem l-2015

Sors: Il-Kummissjoni, abbażi tad-dejta rrapportata mill-programmi

Abbażi ta’ l-aktar dejta finanzjarja reċenti rrapportata sal-ħarifa 2016, hemm indikazzjoni ta’ aċċellerazzjoni qawwija f’termini tal-volum tal-għażla ta’ proġetti. Il-volum finanzjarju totali tal-proġetti magħżula kien żdied b’aktar mid-doppju f’disa’ xhur minn EUR 58,8 biljun għal EUR 128,8 biljun (20,2 % tal-investiment ippjanat).

Id-dejta finanzjarja mill-2014 sal-2015 tagħti l-ewwel stampa indikattiva tal-progress fl-istadju bikri. Hemm indikazzjonijiet li, kumplessivament, il-progress fl-istadju bikri fl-għażla effettiva tal-proġetti huwa bejn wieħed u ieħor paragunabbli mal-progress fi tmiem l-2009 (matul il-perjodu 2007-2013) meta l-għażla tal-proġetti tal-Politika ta’ Koeżjoni kienet f’livelli simili. Madankollu, bħal dak f’dak iż-żmien, il-progress fl-għażla tal-proġetti u l-progress lejn il-miri tal-indikaturi jvarjaw skont l-Istat Membru u skont il-programm. Dan jirriżulta minn taħlita taż-żmien tal-obbligu ta’ rapportar u tal-fatt li ħafna programmi ġew adottati biss fl-2015 u kienu għadhom iridu jibdew l-implimentazzjoni.

Billi d-dejta tal-2015 hija parzjali ħafna, mhijiex tajba bħala bażi għal konklużjonijiet sodi b’mod globali dwar is-suċċess jew il-probabbiltà ta’ suċċess tat-tnedija tal-ipprogrammar fl-Istati Membri. Evidentement, l-istampa indikattiva tal-2015 ma tirrappreżentax l-attività ta’ sena sħiħa. Huwa mistenni li d-dejta sat-tmiem l-2016 se tippreżenta stampa aktar rappreżentattiva tal-progress bl-attivitajiet ta’ implimentazzjoni jkunu ta’ attività ta’ sena sħiħa jew kważi, f’termini ta’ għażla tal-proġetti, nefqa u ksib tal-benefiċċji.

L-Annessi 1.1 u 1.2 juru r-rendikont skont il-fond tal-volumi tal-għażla tal-proġetti fi tmiem l-2015 u fil-ħarifa 2016, rispettivament. L-Anness 2.1 u 2.2 jippreżentaw l-istess dejta finanzjarja kif irrapportata minn kull Stat Membru. Mill-ipparagunar taż-żewġ stampi indikattivi diġà jista’ jidher li x-xejriet ta’ implimentazzjoni fi stadju bikri huma dinamiċi u sal-ħarifa tal-2016, b’rati tal-għażla tal-proġetti aktar omoġenji bejn l-Istati Membri u l-objettivi tematiċi. Filwaqt li l-Kummissjoni hija konxja minn xi nuqqas ta’ rapportar tal-għażla tal-proġetti f’xi programmi sal-ħarifa tal-2016, hemm ukoll indikazzjonijiet skont l-aktar dejta reċenti ta’ progress kajman f’oqsma speċifiċi.

2.1.2.Il-Progress lejn objettivi speċifiċi

Ir-RAI tal-2016 jipprovdu informazzjoni dwar il-progress lejn l-objettivi tal-programmi. Il-progress jitkejjel bl-għadd ta’ proġetti magħżula u l-kontribuzzjoni mistennija tagħhom lejn dawk l-objettivi.

Sa tmiem l-2015, l-Istati Membri u r-reġjuni għażlu 989 000 proġett, li jvarjaw minn investimenti f’infrastruttura kbira għal appoġġ individwali lil azjendi agrikoli. Iċ-ċifri prinċipali rrapportati sa tmiem l-2015 fost id-diversi miżuri tal-prestazzjoni tal-programmi huma:

-Fl-ambitu tal-proġetti magħżula sa issa, 274 000 ditta qegħdin jirċievu appoġġ minn fost il-Fondi SIE;

-2,7 miljun parteċipant ibbenefikaw minn proġetti appoġġjati mill-FSE;

-11,1-il miljun ettaru ta’ art agrikola jew 6 % tal-Erja Agrikola Utilizzata (EAU) huma magħżula għal appoġġ għall-ġestjoni tat-territorju sabiex ikun hemm ħarsien aħjar tal-bijodiversità;

-24 % tal-popolazzjoni totali rurali (69 miljun abitant) huma koperti minn Gruppi ta’ Azzjoni Lokali (GAL) LEADER magħżula;

-Aktar minn 10 % tal-Gruppi ta’ Azzjoni Lokali tas-Sajd (GALS) huma operattivi u l-istrateġiji ta’ żvilupp lokali huma magħżula.

2.2.L-iżvilupp ta’ mekkaniżmi ta’ eżekuzzjoni tal-programmi

L-effettività u l-kwalità tal-programmi tiddependi fuq tliet pilastri: (a) proċeduri u strutturi fis-sod, (b) l-issodisfar tal-prerekwiżiti sabiex jingħelbu l-ostakli għall-investiment li jeżistu, u (c) allinjament ċar mal-prijoritajiet tas-Semestru Ewropew.

L-ewwel nett, tnedija b’suċċess ta’ programm skont il-ġestjoni kondiviża tirrikjedi li l-awtoritajiet ta’ ġestjoni nazzjonali jew reġjonali jistabbilixxu l-istrutturi u l-proċessi tal-programm biex jiżguraw investimenti sodi u ta’ kwalità tajba matul il-ċiklu ta’ ħajja tal-programm. L-attivitajiet ewlenin jinkludu:

Il-ħatra ta’ awtoritajiet responsabbli;

Il-mobilizzazzjoni tal-partijiet ikkonċernati, tal-korpi ta’ implimentazzjoni, u tal-benefiċjarji potenzjali;

It-twaqqif ta’ kumitati ta’ monitoraġġ (l-għażla tal-membri u l-iżvilupp ta’ regoli u proċeduri);

L-adattament jew l-iżvilupp ta’ applikazzjonijiet tal-IT (inkluża l-koeżjoni elettronika biex tkun iffaċilitata l-komunikazzjoni mal-benefiċjarji) u ta’ sistemi ta’ monitoraġġ tal-proġetti (inkluża dejta dwar il-parteċipanti individwali, f’xi każijiet);

Id-definizzjoni tal-kriterji tal-għażla u t-tnedija ta’ sejħiet għall-oqsma differenti ta’ investiment, filwaqt li l-applikanti jingħataw biżżejjed żmien biex jiżviluppaw proposti u jissottomettu applikazzjoni u jevalwawha, u dan segwit mill-iffinalizzar tal-offerti u mill-qbil dwar l-informazzjoni fiżika (dwar l-indikaturi) fir-rigward tal-operazzjonijiet magħżula.

Dawn l-elementi kollha kienu ta’ tħassib kbir għall-awtoritajiet tal-programmi fl-2014 u fl-2015 u jissemmew spiss fir-RAI. It-twettiq ta’ dawn l-elementi kien importanti għat-tnedija b’suċċess tal-programmi iżda wkoll jirfed l-isforz meħtieġ fuq terminu medju u twil sabiex jitwettqu investimenti ta’ kwalità iffukati fuq ir-riżultati bl-appoġġ ta’ diversi partijiet ikkonċernati f’kull programm.

It-tieni nett, l-Istati Membri u r-reġjuni jridu jissodisfaw il-prerekwiżiti għall-investimenti effettivi u effiċjenti kofinanzjati mill-Fondi SIE – l-hekk imsejħa kundizzjonalitajiet ex ante.

Fil-waqt tal-adozzjoni tal-programmi, madwar 75 % tal-kundizzjonalitajiet ex ante kollha kienu ssodisfati. Għall-bqija, il-Kummissjoni qablet dwar pjanijiet ta’ azzjoni speċifiċi, li l-maġġorparti tal-Istati Membri jridu jlestu sa tmiem l-2016. Sal-31 ta’ Ottubru 2016, il-Kummissjoni kkonfermat li terz mill-pjanijiet ta’ azzjoni kienu tlestew. Sar progress sinifikanti fir-rigward ta’ ħafna mill-bqija tal-pjanijiet ta’ azzjoni. L-Istati Membri huma obbligati li jinkludu informazzjoni dwar it-tlestija tal-pjanijiet ta’ azzjoni b’kundizzjonalità ex ante fir-RAI jew fir-rapporti ta’ progress nazzjonali li għandhom ikunu ppreżentati f’nofs l-2017.

Il-Kummissjoni se tipproduċi dokument ta’ ħidma tal-persunal dwar il-valur miżjud tal-kundizzjonalitajiet ex ante fir-rebbiegħa 2017. Analiżi finali tal-issodisfar tal-kundizzjonalitajiet ex ante fost il-Fondi SIE se tiġi ppreżentata fir-Rapport Strateġiku sa tmiem l-2017. Sa nofs l-2017, komunikazzjoni dwar l-ispeċjalizzazzjoni intelliġenti (EAC 1.1) se tiddeskrivi l-kisbiet, l-isfidi, it-tagħlimiet meħuda u l-azzjonijiet tal-Kummissjoni fil-ġejjieni sabiex tkun ta’ għajnuna għal aktar minn 120 strateġija nazzjonali u reġjonali ta’ speċjalizzazzjoni intelliġenti biex jiksbu riżultati dwar it-tkabbir u l-impjiegi xprunati mill-innovazzjoni. B’mod partikolari se tiddeskrivi kif dawn l-istrateġiji jistgħu jgħaqqdu approċċ territorjali minn isfel għal fuq mal-prijoritajiet u l-politiki tal-Kummissjoni u jkattru sinerġiji bejn fondi tal-UE ġestiti b’mod dirett u kondiviż li jappoġġjaw l-innovazzjoni, ir-riċerka u l-kompetittività.

It-tielet nett, fir-rigward tal-qawwa akbar fir-rabta mal-governanza ekonomika tal-UE u mas-Semestru Ewropew, aktar minn żewġ terzi tar-Rakkomandazzjonijiet Speċifiċi għall-Pajjiżi (CSRs) fl-2014 kienu ta’ rilevanza għall-investiment tal-Fondi SIE (b’mod partikolari l-FEŻR u l-FSE) u għaldaqstant ġew integrati fil-prijoritajiet tal-programmi tal-Istati Membri. Dawn ikopru riformi f’sitt oqsma prinċipali: ir-riċerka u l-innovazzjoni, l-enerġija u t-trasport, il-kura tas-saħħa, is-sehem fis-suq tax-xogħol, l-edukazzjoni, l-inklużjoni soċjali u r-riforma tal-amministrazzjoni pubblika. Fir-rebbiegħa 2017, il-Kummissjoni se tiffinalizza l-istudju “L-appoġġ tal-Fondi SIE għall-implimentazzjoni tar-Rakkomandazzjonijiet Speċifiċi għall-Pajjiżi u għar-riformi strutturali fl-Istati Membri”. Se tanalizza kif is-CSRs rilevanti għall-investiment tas-snin li wasslu għall-adozzjoni tal-programmi tqiesu fil-programmi ffinanzjati mill-Fondi SIE. Ir-rapporti ta’ progress nazzjonali mistennija għall-2017 se jipprovdu valutazzjoni u jistabbilixxu wkoll informazzjoni dwar kif il-programmi qegħdin jikkontribwixxu għall-istrateġija ta’ tkabbir tal-Unjoni u għas-CSRs rilevanti.

3.Ħarsa ġenerali lejn l-implimentazzjoni skont temi ewlenin

Il-volumi tal-investimenti ppjanati u l-kisbiet mistennija mill-Fondi SIE ġew ippreżentati f’Diċembru 2015 10 . Dan ir-rapport jipprovdi ħarsa ġenerali lejn il-progress fl-istadju bikri fl-implimentazzjoni tal-programmi fl-2014 u fl-2015 f’termini tal-volum finanzjarju tal-proġetti magħżula u tal-progress fl-intermedjar u t-twettiq tal-outputs u tar-riżultati komuni filwaqt li jiffoka fuq il-kontenut tar-rapporti annwali ta’ implimentazzjoni tal-programmi għall-2016.

It-Tabella 1 hawn fuq tipprovdi ħarsa ġenerali tal-volum finanzjarju u tar-rata tal-għażla tal-proġetti rrapportati skont l-objettiv tematiku kif kienu jinsabu fi tmiem l-2015 għall-Fondi SIE. Fir-rigward tal-indikaturi, dan ir-rapport jiddependi fuq it-tbassir tal-kontribuzzjoni mistennija mill-proġetti magħżula u fuq il-kisbiet irrapportati skont l-indikaturi komuni għal kull fond. Jingħataw ukoll eżempji ta’ proġetti li diġà huma appoġġjati.

3.1.Ir-Riċerka u l-Innovazzjoni, l-ICT u l-kompetittività tal-SMEs

Kumplessivament, madwar EUR 181 biljun jappoġġjaw l-investimenti f’dan il-qasam, prinċipalment mill-FEŻR u mill-FAEŻR. Intgħażlu proġetti li jammontaw għal madwar 7 % ta’ dan l-ammont (aktar minn EUR 11,5-il biljun 11 ) u fi tmiem l-2015 bosta kienu diġà jinsabu fil-fażi tal-implimentazzjoni.

Daqs EUR 3,4 biljun allokati għal proġetti ta’ riċerka u innovazzjoni speċifiċi taħt il-FEŻR u l-FAEŻR jirrappreżentaw 5,7% tat-total ippjanat għall-2014–2020. Sa tmiem l-2015, 19 000 ditta kienu previsti li kienu se jibbenefikaw mill-iskemi tal-FEŻR magħżula li jippromwovu l-kooperazzjoni mal-istituti tar-riċerka (15 % tal-mira), filwaqt li 5 000 riċerkatur huma previsti li se jibbenefikaw minn infrastruttura mtejba tar-Riċerka u l-Iżvilupp Teknoloġiku (7 % tal-mira).

Diġà ġew stabbiliti daqs 200 grupp operazzjonali taħt is-Sħubija Ewropea għall-Innovazzjoni għall-Produttività u s-Sostenibbiltà Agrikola (EIP-AGRI). Dawn il-proġetti ffinanzjati mill-FAEŻR għandhom l-għan li jippromwovu soluzzjonijiet innovattivi għal settur tal-biedja u l-forestrija kompetittiv u sostenibbli.

L-ammont ta’ EUR 737 miljun li ġew allokati għal proġetti fl-ambitu tat-temi ta’ ekonomija diġitali fi tmiem l-2015 kien ta’ 4 % mit-total ippjanat. Għall-FEŻR, din l-attività kienet prinċipalment relatata mal-għażla tal-proġetti fl-EE, l-FI, FR, l-IT, il-PL, l-SE u s-SK. Ħafna mill-attivitajiet magħżula sa issa mhumiex marbuta mal-indikaturi komuni tal-fondi li huma disponibbli taħt din it-tema.

Dawn ta’ hawn taħt huma xi eżempji ta’ progress fi stadju bikri.

Il-Kompetittività tal-SMEs hija prijorità skont il-programmi tal-FEŻR, tal-FAEŻR u tal-FEMS. Ġie allokat appoġġ mill-UE ta’ EUR 7,5 biljun għal proġetti speċifiċi sa tmiem l-2015 (8,9 % tat-total ippjanat).

Il-finanzjament mill-FEŻR ingħata lil proġetti li jagħtu appoġġ lil 113 000 SMEs. Tmien Stati Membri (DE, ES, FI, FR, IE, PT, SE, UK) u diversi programmi Interreg jipprovdu 95 % tat-tbassir segwenti; 85 000 minn dawk il-kumpaniji se jkunu appoġġjati permezz ta’ pariri u konsulenza; huma previsti 25 000 start-up; F’dan l-istadju bikri, 65 000 impjieg huma mistennija li se jinħolqu direttament fid-ditti appoġġjati.

Aktar minn 30 000 azjenda agrikola ntgħażlu sabiex l-operazzjonijiet ta’ investiment itejbu l-kompetittività (9 % tal-mira kumplessiva). Daqs 10 000 bidwi ntgħażlu biex jirċievu appoġġ biex jieħdu sehem fi skemi ta’ kwalità (8 % tal-mira).

Madwar 8 % tal-proġetti FEMS, previsti matul il-perjodu, għandhom l-għan li jsaħħu lill-SMEs u jżidu l-kompetittività tal-flotta u tal-intrapriżi tal-akkwakultura. Il-bidu tal-implimentazzjoni kien relattivament kajman billi 10 % biss tal-proġetti magħżula sa tmiem l-2015 jiffukaw fuq l-iżvilupp tal-SMEs.

3.2.Ekonomija b’livell baxx ta’ emissjonijiet ta’ karbonju, it-tibdil fil-klima, l-ambjent u t-trasport u n-netwerks tal-enerġija

Il-Fondi SIE jinvestu aktar minn EUR 260 biljun fl-oqsma li jindirizzaw l-iżvilupp sostenibbli. Fi tmiem l-2015, aktar minn EUR 20 biljun 12 diġà kienu allokati għal proġetti speċifiċi, li jirrappreżentaw madwar 9 % tal-ammont totali (li jvarja minn 4,3 % għal 10,5 %) tal-fondi kollha li jikkontribwixxu direttament (il-FEŻR, il-FK, il-FAEŻR u l-FEMS) 13 .

Fir-rigward tal-prijoritajiet tal-Ekonomija b’livell baxx ta’emissjonijiet ta’ karbonju, ġie appoġġjat daqs EUR 2,3 biljun f’investiment (4,3 % tal-investiment ippjanat). Il-proġetti tal-FAEŻR li ntgħażlu pprevedew kopertura ta’ miljun ettaru ta’ art agrikola jew għall-forestrija għal azzjonijiet ta’ sekwestru jew konservazzjoni (25 % tal-mira kumplessiva li jikkorrispondu għal 2,4 % tal-Erja Agrikola Utilizzata (EAU) kumplessiva) u 1,6 miljun ettaru ta’ art agrikola tinsab taħt kuntratti ta’ ġestjoni fid-dawl tat-tnaqqis tal-emissjonijiet tal-gassijiet b’effett ta’ serra u tal-ammonijaka (31 % tal-mira li jikkorrispondu għal 3 % tal-EAU kumplessiva).

Fir-rigward tal-klima u l-prevenzjoni tar-riskju, ġew irrapportati EUR 6,6 biljun f’għażla tal-proġetti (17,3 % tat-total ippjanat). Il-FAEŻR sa issa appoġġja 11,1-il miljun ettaru ta’ art agrikola għal ġestjoni speċifika tal-art bl-għan li jkun hemm ħarsien aħjar tal-bijodiversità (36 % tal-erja agrikola maħduma għandha tingħata appoġġ) u 1,6 miljun ettaru kienu qegħdin jiġu appoġġjati sabiex jikkonvertu/jżommu l-biedja organika (15,7 % tal-erja agrikola maħduma għandha tingħata appoġġ).

Fir-rigward tal-prijoritajiet tal-ambjent u l-effiċjenza fir-riżorsi, ġie allokat l-ammont totali ta’ EUR 7,6 biljun f’investiment għall-proġetti (10,5 % tat-total ippjanat). Dak jinkludi l-proġetti tal-FAEŻR magħżula li jammontaw għal aktar minn 420 miljun f’nefqa pubblika totali li jindirizzaw l-objettivi tal-enerġija rinnovabbli u tal-effiċjenza fl-enerġija u fl-ilma. Taħt il-FEŻR u l-FK ma kien għadu ġie rrapportat l-ebda valur sinifikanti għall-indikaturi komuni li jkejlu l-kapaċità ta’ riċiklaġġ tal-iskart, it-trattament imtejjeb tal-ilma mormi jew it-titjib tal-outputs tal-provvista tal-ilma, minkejja li l-programmi rrapportaw valuri għall-indikaturi speċifiċi. Madwar 90 % tal-proġetti kollha magħżula għall-appoġġ mill-FEMS sa tmiem l-2015 jippromwovu l-effiċjenza fir-riżorsi u l-ħarsien tal-ambjent. Ħafna minn dawn il-proġetti għandhom l-għan li jħarsu u li jreġġgħu lura l-bijodiversità tal-baħar billi jżidu b’mod sostanzjali l-kontroll fiżiku tal-ħatt l-art u jnaqqsu l-volum tal-qabdiet inċidentali u b’hekk jappoġġjaw l-implimentazzjoni tal-Politika Komuni tas-Sajd.

Fir-rigward tal-investiment fin-netwerks strateġiċi, huma ppjanati investimenti sinifikanti tat-TEN-T u ta’ trasport ieħor, taħt il-FEŻR u l-Fond ta’ Koeżjoni. Kumplessivament, l-għażla tal-proġetti sa tmiem l-2015 kienet tammonta għal EUR 4,1 biljun (6,2 % ta’ dak li kien ippjanat). Fil-każ tal-proġetti ta’ trasport, l-eżempji ta’ proġetti ta’ min isemmihom huma:

3.3.L-impjiegi, l-inklużjoni soċjali u l-edukazzjoni

F’dan il-qasam huwa ppjanat aktar minn EUR 168 biljun f’appoġġ, b’mod partikolari mill-FSE, bil-FEŻR, il-FAEŻR u l-FEMS li wkoll se jkunu qegħdin jinvestu. Intgħażlu proġetti li jammontaw għal aktar minn 12 % ta’ dan l-ammont (aktar minn EUR 11,5-il biljun 15 ) u fi tmiem l-2015 ħafna minnhom kienu diġà provdew appoġġ lill-persuni.

Il-FSE huwa l-fond prinċipali tal-UE li qiegħed jinvesti fl-impjiegi, l-inklużjoni soċjali u l-edukazzjoni, flimkien mal-YEI, il-FEŻR, il-FAEŻR u l-FEMS.

Kumplessivament, l-implimentazzjoni tal-FSE sa tmiem l-2015 uriet rata medja tal-għażla tal-proġetti tal-FSE ta’ 13,3 %, li twitti t-triq għall-kontribuzzjoni qawwija tal-Fondi SIE għall-objettivi Ewropa 2020 f’dawn l-oqsma. Ir-rendikont tar-rata tal-għażla tal-proġetti skont l-objettiv tematiku għall-Fondi SIE kollha kemm huma huwa provdut fit-Tabella 1 hawn fuq.

F’termini aggregati, l-azzjonijiet tal-FSE u tal-YEI ssarrfu fi:

2,7 miljun parteċipant 16 , inklużi 1,6 miljun persuna qiegħda u 700 000 persuna mhux attiva;

Fost dawn il-parteċipanti, 235 000 kellhom impjieg b’segwitu għal operazzjoni appoġġjata mill-FSE jew mill-YEI, 181 000 kienu kisbu kwalifika hekk kif ħarġu minn operazzjoni appoġġjata mill-FSE jew mill-YEI;

100 000 parteċipant kienu qegħdin isegwu kors edukattiv jew ta’ taħriġ bis-saħħa tal-appoġġ tal-FSE jew tal-YEI;

275 000 parteċipant żvantaġġat f’operazzjonijiet iffinanzjati mill-FSE jew mill-YEI kienu involuti fi tfittix għal impjieg, kors edukattiv jew ta’ taħriġ, kisbu kwalifika jew kellhom impjieg, inkluż impjieg indipendenti.

Sa tmiem l-2015, l-implimentazzjoni tal-operazzjonijiet fil-qasam tal-impjiegi (TO8) kienet tinsab għaddejja fl-Istati Membri kollha anke jekk fir-rigward tal-prijoritajiet differenti ta’ investiment kienet tinsab f’livelli varji. L-interventi tal-FSE bl-għan li jżidu l-aċċess għas-suq tax-xogħol diġà qegħdin jilħqu kif suppost lill-persuni qiegħda (1,1 miljun) u lill-individwi mhux attivi (230 000). L-implimentazzjoni tal-operazzjonijiet rigward l-impjieg indipendenti u t-tixjiħ f’saħħtu u attiv kellha bidu relattivament kajman.

Wara t-TO 10 L-Edukazzjoni u t-Taħriġ Vokazzjonali, il-qasam tal-Inklużjoni Soċjali (TO9) huwa dak li fih jidher l-aktar progress evidenti għall-FSE. Id-dejta inizjali dwar l-implimentazzjoni hija promettenti. Minn 631 000 parteċipant fil-FSE, 39,8 % kienu ġejjin minn familji mingħajr impjieg u 32,1 % kienu migranti, b’oriġini barranija jew parti minn xi minoranza – u dan jixħet l-attenzjoni fuq dawk li l-aktar jeħtieġu appoġġ. Daqs 55 000 parteċipant diġà sabu impjieg.

Taħt il-FEŻR, il-progress sa tmiem l-2015 fir-rigward tal-appoġġ għall-infrastruttura tas-saħħa kien wieħed marġinali. L-appoġġ għall-istrateġiji integrati ta’ żvilupp urban li ġew magħżula jkopri 1,7 miljun ruħ (5 % tal-mira stabbilita).

L-investimenti fl-Edukazzjoni u t-Taħriġ Vokazzjonali (TO10) urew ukoll progress sinifikanti fl-implimentazzjoni b’539 000 parteċipant, li minnhom minn tal-anqas 47 % kellhom biss livell edukattiv primarju u tal-ewwel snin tas-sekondarja u 83 000 parteċipant kienu diġà kisbu kwalifika bis-saħħa tal-appoġġ tal-FSE sa tmiem l-2015.

3.4.It-tisħiħ tal-kapaċità istituzzjonali u l-amministrazzjoni pubblika effiċjenti

Kumplessivament, madwar EUR 6 biljun ġew ipprogrammati għat-tisħiħ tal-kapaċità istituzzjonali u tal-iskop ta’ amministrazzjoni pubblika effiċjenti, prinċipalment mill-FSE b’appoġġ ippjanat ukoll mill-FEŻR. Aktar minn 11 % tal-baġit totali ġie allokat għall-proġetti sa tmiem l-2015. 

L-operazzjonijiet magħżula sa tmiem l-2015 għandhom valur totali ta’ EUR 680 miljun. Il-proġetti jinsabu fil-BG, l-EE, FR, il-HR, l-IT, il-PL u taħt l-Interreg. Daqs 97 000 membru tal-persunal tal-amministrazzjoni pubblika kien appoġġjat mill-FSE b’31 proġett li kellhom l-amministrazzjonijiet pubbliċi jew is-servizzi pubbliċi fil-mira tagħhom fil-livell nazzjonali, reġjonali jew lokali li kienu ġew irrapportati mill-Istati Membri. Taħt l-appoġġ mill-FEŻR ippjanat, il-programmi Interreg ukoll kienu għamlu progress sinifikanti fl-għażla tal-proġetti għall-appoġġ.

3.5.Il-progress fl-implimentazzjoni tal-istrumenti finanzjarji

Ir-RAI tal-2016 kienu jinkludu wkoll l-ewwel rapportar dettaljat dwar l-istrumenti finanzjarji (SF) sa tmiem l-2015. Il-prospettiva kumplessiva hija tajba b’21 Stat Membru li rrapportaw progress dwar l-SF. Il-volum totali tal-kontribuzzjonijiet tal-programmi impenjati għall-SF jammonta għal EUR 5 737 miljun (li minnhom EUR 5 163 miljun mill-FSIE). Madwar 20 % tal-ammonti impenjati tħallsu lill-SF (kważi esklużivament taħt il-FEŻR u l-FK). Hemm differenzi sinifikanti bejn l-Istati Membri fir-rigward tat-tnedija tal-SF f’dan l-istadju bikri, li jvarja minn pajjiżi li qegħdin jieħdu passi biex iwettqu valutazzjonijiet ex-ante għal SF li diġà taw xhieda ta’ riżultati konkreti f’termini ta’ ritorn ta’ riżorsi u ingranaġġ għal investimenti ulterjuri.

Il-progress sa tmiem l-2015 fl-implimentazzjoni tal-istrumenti finanzjarji skont il-Fond u t-tema, ġie ppreżentat f’ġabriet fil-qosor ta’ dejta ppubblikati mill-Kummissjoni fit-30 ta’ Novembru 2016 18 .

3.6.L-Interreg

Il-programmi Interreg iffinanzjati mill-FEŻR li jaqgħu taħt l-għan tal-Kooperazzjoni Territorjali kienu ġġeneraw volum finanzjarju ta’ EUR 900 miljun ta’ proġetti magħżula sa tmiem l-2015 (7,4 % ta’ dak li kien ippjanat). Eżempji ta’ evidenza fi stadju bikri ta’ progress fiżiku taħt l-Interreg huma riflessi fl-indikaturi aggregati (ara hawn fuq), f’uħud mill-eżempji mogħtija taħt it-temi ewlenija ta’ investiment u fil-paġna tal-Interreg tal-“pajjiżi” fuq il-Pjattaforma ta’ Dejta Miftuħa tal-Fondi SIE.

4.It-tisħiħ tal-evalwazzjoni tal-programmi

Għall-2014–2020 titpoġġa enfasi aktar qawwija fuq il-ħtieġa li jiġu evalwati l-effetti tal-politiki kofinanzjati permezz tal-programmi tal-Fondi SIE. Il-programmi jiddefinixxu objettivi li huma speċifiċi u jgħidu b’mod ċar il-bidla li qegħdin jipprovaw jiksbu l-investimenti. L-evalwazzjonijiet huma essenzjali biex jikkonfermaw jekk dawk il-bidliet sarux u jekk il-kontribuzzjonijiet li saru mill-programmi jikkontribwixxux għall-objettivi speċifiċi tagħhom.

Sa tmiem l-2015 kien hemm ftit evalwazzjonijiet tar-riżultati u tal-impatti marbuta mal-perjodu 2014–2020, l-aktar minħabba li ma kienx hemm biżżejjed volum ta’ proġetti lesti. L-eċċezzjoni prinċipali tirrigwarda l-Inizjattiva favur l-Impjieg taż-Żgħażagħ li fl-ambitu tagħha tlestew 19-il evalwazzjoni nazzjonali sa Ġunju 2016. L-istudji u l-evalwazzjonijiet li twettqu skont il-programmi matul l-2014–2015 iffukaw fuq l-evalwazzjoni ex-post tal-programmi matul l-2007–2013 u fuq il-kwistjonijiet ta’ implimentazzjoni relatati mal-2014–2020. Skont il-pjanijiet ta’ evalwazzjoni din is-sekwenza x’aktarx li terġa’ tkun ripetuta fl-2016 u fl-2017.

Filwaqt li l-evalwazzjonijiet li twettqu fil-verità kienu loġikament ftit bħala numru, il-programmi tal-Politika ta’ Koeżjoni kienu attivi fit-tħejjija ta’ pjanijiet ta’ evalwazzjoni f’konformità mal-obbligi għall-2014–2020. Filwaqt li l-pjanijiet ta’ evalwazzjoni tal-FAEŻR u tal-FEMS ġew adottati bħala parti mill-programmi operazzjonali, il-pjanijiet ta’ evalwazzjoni għall-fondi tal-Politika ta’ Koeżjoni jridu jkunu definiti fi żmien 12-il xahar mill-adozzjoni tal-programmi. Il-pjanijiet ta’ evalwazzjoni issa jinsabu fil-biċċa l-kbira tagħhom fis-seħħ sabiex jonoraw dan l-obbligu. Il-Kummissjoni eżaminat il-pjanijiet ta’ evalwazzjoni li rċeviet sat-30 ta’ Ġunju 2016 li jikkonfermaw li għaddejja ħidma bla preċedent fil-programmi sabiex tkun provduta evalwazzjoni aktar robusta tal-implimentazzjoni u tal-kisbiet.

Il-pjanijiet ta’ evalwazzjoni huma ċari dwar il-governanza tal-evalwazzjoni u dwar il-komunikazzjoni tar-riżultati. Madankollu huma aktar dgħajfa dwar it-tfassil u l-metodi tal-evalwazzjoni kif ukoll dwar is-sistemi u d-disponibbiltà tad-dejta. Il-Kummissjoni hija tal-fehma li l-pjanijiet għall-programmi tal-Politika ta’ Koeżjoni għandhom ikunu rieżaminati fuq bażi regolari u se jkollhom bżonn ta’ titjib ulterjuri speċjalment fir-rigward ta’ dawk l-aspetti li jirrikjedu għarfien espert aktar speċifiku fl-ippjanar u t-twettiq tal-evalwazzjonijiet, tal-ikkonsolidar tal-għadd ta’ evalwazzjonijiet u l-forniment aktar kmieni milli ppjanat attwalment ta’ evidenza tal-impatti f’ċertu każijiet sabiex isservi ta’ informazzjoni għat-tfassil tal-politika fil-futur.

Dokument ta’ Ħidma tal-Persunal 19 separat jipprovdi ħarsa ġenerali dettaljata lejn l-evalwazzjonijiet li saru sa issa u tal-isforz ippjanat fir-rigward tal-evalwazzjonijiet matul il-perjodu 2014–2020. Dan jiddeskrivi wkoll il-fergħat differenti ta’ ħidma li wettqet il-Kummissjoni biex tappoġġja l-ħidma tal-programmi (netwerking, għoti ta’ gwida, helpdesks, eċċ.) u x-xogħol ta’ evalwazzjoni li huwa ppjanat mill-Kummissjoni fis-snin li ġejjin.

Separatament, l-evalwazzjonijiet ex-post tal-Kummissjoni stess għall-perjodu 2007–2013 huma ffinalizzati jew se jiġu ffinalizzati dalwaqt 20 .

5.Konklużjonijiet

Il-programmi tal-Fond SIE jirrappreżentaw strument ta’ investiment kbir tal-Unjoni Ewropea u kull reġjun u pajjiż fl-Unjoni Ewropea jibbenefika mill-politika. Il-qafas legali msaħħaħ tiegħu għall-perjodu ta’ programmazzjoni 2014–2020 iġib miegħu innovazzjoni sinifikanti fil-politika u jikkontribwixxi għall-inizjattiva Baġit tal-UE ffukat fuq ir-Riżultati. Bħala parti mir-riforma ġew introdotti sensiela ta’ elementi moderni sabiex iwasslu għal investimenti ta’ kwalità għolja. Biex dan l-approċċ ambizzjuż il-ġdid seta’ jiġi implimentat fl-Istati Membri u fir-reġjuni kien hemm bżonn ta’ żmien u ta’ riżorsi fil-fażi tal-bidu sabiex ikun żgurat li l-kundizzjonijiet neċessarji għall-infiq effettiv ikunu fis-seħħ. Dan inzerta sar flimkien mal-isforz biex jitlestew il-programmi għall-2007–2013 sabiex l-opportunitajiet ta’ investiment li dawn joffru jkunu sfruttati għal kollox.

Issa huwa imperattiv li l-implimentazzjoni tal-programmi l-ġodda titħaffef madwar l-Unjoni Ewropea kollha. B’mod partikolari, l-għażla ta’ proġetti ta’ kwalità tajba u l-implimentazzjoni effettiva tagħhom iridu jitħaffu sabiex jonoraw l-ambizzjonijiet ta’ investiment u l-benefiċċji soċjoekonomiċi mistennija għaċ-ċittadini u għad-ditti tagħna. L-Istati Membri jridu wkoll jippreżentaw b’mod aktar f’waqtu l-evidenza tal-infiq lill-Kummissjoni sabiex il-baġit tal-UE jkun jista’ jiġi eżegwit kif suppost.

L-għażla tal-proġetti u l-infiq effettiv jipprovdu stampa aktar preċiża tal-implimentazzjoni milli mill-eżekuzzjoni tal-pagamenti tal-UE. L-evidenza mill-monitoraġġ finanzjarju tal-2016 tindika li l-implimentazzjoni diġà bdiet titħaffef b’EUR 128,8 biljun ta’ investimenti – 20,2 % tat-total għall-perjodu – allokati għal proġetti speċifiċi sal-ħarifa 2016 meta mqabbla ma’ EUR 58,8 biljun sa tmiem l-2015. Din id-dejta aktar reċenti turi progress aktar omoġenju fost ħafna mill-Istati Membri u t-temi. L-iżvilupp ta’ dawn ix-xejriet se jkun ivvalutat ulterjorment fil-kuntest taċ-ċiklu ta’ rapportar għall-2017.

F’nofs l-2017, iċ-ċiklu ta’ rapportar tal-programmi, li jinvolvi rapporti komprensivi dwar il-programmi sa Ġunju 2017 u rapporti ta’ progress nazzjonali sal-aħħar ta’ Awwissu 2017, se jipprovdi stampa aktar kompluta tal-implimentazzjoni, tal-progress lejn l-investiment u l-objettivi tal-politika u se jwassal għal rapportar aktar kwalitattiv. Dawn ir-rapporti b’mod partikolari se jkun fihom aktar informazzjoni u se jivvalutaw l-implimentazzjoni vis-à-vis lista ta’ kwistjonijiet strateġiċi 21 , inkluż pereżempju dwar:

Valutazzjoni tal-kontribuzzjoni għall-kisba tal-objettivi Ewropa 2020, għall-missjonijiet speċifiċi għall-Fondi, inkluż għall-implimentazzjoni tar-rakkomandazzjonijiet rilevanti speċifiċi għall-pajjiżi fl-ambitu tas-Semestru Ewropew;

L-ewwel rapport dwar il-progress lejn l-istadji finanzjarji u fiżiċi importanti fl-ambitu tal-oqfsa ta’ prestazzjoni li għandhom jintużaw għall-għoti tar-riżerva tal-prestazzjoni fl-2019;

Rendikont tas-sitwazzjoni dwar it-tlestija tal-pjanijiet ta’ azzjoni marbuta mal-kundizzjonalitajiet ex ante pendenti. (F’każ ta’ nuqqas ta’ tlestija tal-pjanijiet ta’ azzjoni biex ikunu ssodisfati l-kundizzjonijiet ex ante, il-Kummissjoni tista’ tissospendi l-pagamenti għall-programm(i) inkwistjoni fl-2017.);

L-implimentazzjoni ta’ mekkaniżmi sabiex tkun żgurata l-koordinazzjoni bejn il-Fondi SIE u strumenti oħra ta’ finanzjament tal-Unjoni jew nazzjonali u mal-BEI (biex ikunu inklużi s-sinerġiji u l-komplementarjetà mal-Fond Ewropew għall-Investimenti Strateġiċi).

Dawn ir-rapporti mill-Istati Membri se jiġu ssinteżizzati mill-Kummissjoni f’rapport strateġiku sa tmiem l-2017.

ANNESSI

Anness 1.1: Fondi SIE – implimentazzjoni finanzjarja skont l-objettiv tematiku rrapportata skont il-programmi (l-għażla tal-proġetti)
il-31 ta’ Diċembru 2015 (f’miljuni ta’ EUR)

Sors: Il-Kummissjoni, abbażi tad-dejta rrapportata mill-programmi

Anness 1.2: Fondi SIE – implimentazzjoni finanzjarja skont l-objettiv tematiku rrapportata skont il-programmi (l-għażla tal-proġetti)
Il-ħarifa 2016 (f’miljuni ta’ EUR)

Sors: Il-Kummissjoni, abbażi tad-dejta rrapportata mill-programmi    Noti: (1) Għal aktar informazzjoni dwar is-sors ta’ din id-dejta ara n-noti f’qiegħ il-paġna fl-Anness 2.2    
(2) Ir-rapportar ad-hoc mill-programmi tal-FEMS se jintemm f’Ottubru 2016.

Anness 2.1: Il-Fondi SIE – l-implimentazzjoni finanzjarja Skont l-Istati Membri rrapportata skont il-programmi (l-għażla tal-proġetti) – il-31 ta’ Diċembru 2015 (f’miljuni ta’ EUR)

Sors: Il-Kummissjoni, abbażi tad-dejta rrapportata mill-programmi

Anness 2.2: Il-Fondi SIE – l-implimentazzjoni finanzjarja skont l-Istati Membri rrapportata skont il-programmi (l-għażla tal-proġetti) – il-ħarifa 2016 (f’miljuni ta’ EUR)

Sors: Il-Kummissjoni, abbażi tad-dejta rrapportata mill-programmi

Noti:

Fl-Annessi 1.2 u 2.2, il-perjodu kopert mid-dejta finanzjarja rrapportata skont il-Fond hija kif ġej:

1.Għall-programmi tal-Politika ta’ Koeżjoni, l-aktar dejta reċenti dwar l-għażla tal-proġetti tirrigwarda t-30 ta’ Settembru 2016. Għal ES, kien irrapportat ammont ta’ EUR 4 500 miljun kif allokat sal-ħarifa 2016 taħt il-FEŻR (rapportar ad-hoc).

2.Għall-programmi tal-FAEŻR, l-aktar dejta reċenti dwar l-għażla tal-proġetti tirrigwarda l-31 ta’ Awwissu 2016.

3.Għall-programmi tal-FEMS, l-aktar dejta reċenti rrapportata formalment dwar l-għażla tal-proġetti tirrigwarda l-31 ta’ Diċembru 2015. Rapportar ad-hoc addizzjonali huwa miżjud separatament fi tmiem it-tabella ta’ hawn fuq.

Id-dejta finanzjarja preżentata hawn fuq hija stampa indikattiva tad-dejta nnotifikata mill-programmi kif kienet tinsab fid-9 ta’ Novembru 2016 u sussegwentement tista’ tiġi kkoreġuta jew ikkompletata mill-programmi fejn ikun meħtieġ.

L-iskadenza ta’ rapportar li jmiss għall-programmi tal-Politika ta’ Koeżjoni hija l-31 ta’ Jannar 2017 (għad-dejta finanzjarja sa tmiem l-2016).

(1)  Il-Komunikazzjoni COM(2015) 639 tal-14 ta’ Diċembru 2015 skont l-Artikolu 16.3 tar-Regolament dwar Dispożizzjonijiet Komuni (CPR – Common Provisions Regulation) – ir-Regolament (UE) Nru 1303/2013 tas-17 ta’ Diċembru 2013.

(2)  Il-ħames Fondi SIE huma l-Fond Ewropew għall-Iżvilupp Reġjonali (FEŻR), il-Fond Soċjali Ewropew (FSE); il-Fond ta’ Koeżjoni (FK), il-Fond Agrikolu Ewropew għall-Iżvilupp Rurali (FAEŻR), il-Fond Ewropew għall-Affarijiet Marittimi u s-Sajd (FEMS). Il-politika ta’ koeżjoni tinkludi l-FEŻR, l-FSE u l-FK.

(3)  L-Artikolu 53.1, CPR.

(4)   http://ec.europa.eu/budget/library/biblio/documents/2015/analysis-of-the-budgetary-implementation-of-the-european-structural-and-investment-funds-in-2015_en.pdf  

(5)  Il-Komunikazzjoni COM(2015) 639 – ara n-nota 1 f’qiegħ il-paġna.

(6)  L-inizjattiva “Baġit tal-UE ffukat fuq ir-Riżultati” tnediet fl-2015: http://ec.europa.eu/budget/budget4results/index_en.cfm  

(7)  Il-Pjattaforma ta’ Dejta Miftuħa tal-Fondi SIE: https://cohesiondata.ec.europa.eu/  

(8)  Impenji li jkopru l-allokazzjoni prinċipali tal-programmi (li ma tinkludix l-impenji li saru fir-rigward tar-riżerva tal-prestazzjoni).

(9)  Ir-rapportar tad-dejta finanzjarja skont l-Istat Membru għall-FEŻR, il-FK u l-FSE ma jipprovdix rendikont komplut skont l-OT, b’mod partikolari għal assi prijoritarji li jkopru OT multipli. Minħabba f’hekk, l-investiment ippjanat u l-kost totali tal-proġetti magħżula skont l-OT kif ippreżentati hawn fuq, huma sottostmati b’parti mill-ammonti fl-intestatura “Objettivi Tematiċi Multipli”.

(10)  Il-Komunikazzjoni COM(2015) 639 – ara n-nota 1 f’qiegħ il-paġna.

(11)  Parti mill-volum tal-għażla taħt l-“objettivi multitematiċi” taqa’ taħt dawn l-oqsma – ara t-Tabella 1 (Ara n-nota 9 f’qiegħ il-paġna).

(12)  Ara n-nota 11 f’qiegħ il-paġna.

(13)  Il-FSE jikkontribwixxi għall-objettivi ta’ żvilupp sostenibbli, jiġifieri l-ħiliet ekoloġiċi, permezz tal-objettivi sekondarji ta’ appoġġ fl-ambitu tal-objettivi tematiċi 8 u 10 b’mod partikolari.

(14)  Ir-Regolament ta’ Implimentazzjoni tal-Kummissjoni (UE) Nru 215/2014 tas-7 ta’ Marzu 2014

(15)  Ara n-nota 11 f’qiegħ il-paġna.

(16)

     minn dawn 96 % huma rrapportati minn 10 Stati Membri (ES, FR, IT, DE, BE, IE, PL, GR, NL, PT).

(17)

     Il-Komunikazzjoni COM(2016) 646 final tal-4 ta’ Ottubru 2016, Il-Garanzija għaż-Żgħażagħ u l-Inizjattiva favur l-Impjieg taż-Żgħażagħ: tliet snin wara

(18)  Ġabriet fil-qosor ta’ dejta għall-2016 taħt l-Artikolu 46.4 CPR: http://ec.europa.eu/regional_policy/sources/thefunds/fin_inst/pdf/summary_data_fi_1420_2015.pdf  

(19)  SWD(2016) 447 disponibbli f’din il-paġna web: http://ec.europa.eu/regional_policy/mt/policy/how/stages-step-by-step/strategic-report/  

(20) http://ec.europa.eu/regional_policy/sources/docgener/evaluation/pdf/expost2013/wp1_swd_report_en.pdf http://ec.europa.eu/social/main.jsp?langId=mt&catId=701 Għall-evalwazzjoni ex-post tal-FEŻR/FK għall-2007–2013 – SWD(2016) 318 tad-19 ta’ Settembru 2016: Għall-FSE, l-evalwazzjoni ex post għall-2007–2013 li jmiss, se tkun disponibbli hawnhekk:  

(21)  Ara l-Artikolu 52 CPR