This document is an excerpt from the EUR-Lex website
Document 52016DC0476
REPORT FROM THE COMMISSION TO THE COUNCIL AND THE EUROPEAN PARLIAMENT Progress Report on the implementation of the EU Strategy and Action Plan for customs risk management
RAPPORT TAL-KUMMISSJONI LILL-KUNSILL U LILL-PARLAMENT EWROPEW Rapport ta' Progress dwar l-implimentazzjoni tal-Istrateġija u l-Pjan ta' Azzjoni tal-UE għall-immaniġġjar tar-riskju doganali
RAPPORT TAL-KUMMISSJONI LILL-KUNSILL U LILL-PARLAMENT EWROPEW Rapport ta' Progress dwar l-implimentazzjoni tal-Istrateġija u l-Pjan ta' Azzjoni tal-UE għall-immaniġġjar tar-riskju doganali
COM/2016/0476 final
IL-KUMMISSJONI EWROPEA
Brussell, 19.7.2016
COM(2016) 476 final
RAPPORT TAL-KUMMISSJONI LILL-KUNSILL U LILL-PARLAMENT EWROPEW
Rapport ta' Progress dwar l-implimentazzjoni tal-Istrateġija u l-Pjan ta' Azzjoni tal-UE għall-immaniġġjar tar-riskju doganali
{SWD(2016) 242 final}
WERREJ
1Introduzzjoni
2Valutazzjoni globali
2.1Skop u metodoloġija
2.2L-ewwel għan — It-titjib tal-kwalità tad-dejta u s-sistemi ta' arkivjar
2.3It-tieni għan — L-iżgurar tad-disponibbiltà tad-dejta fil-katina tal-provvista, il-kondiviżjoni ta' informazzjoni rilevanti tar-riskju u r-riżultati ta' kontroll
2.4It-tielet għan — L-implimentazzjoni ta' miżuri ta' kontroll u mitigazzjoni tar-riskju fejn meħtieġ ("valutazzjoni antiċipata — kontroll fejn meħtieġ")
2.5Ir-raba' għan — It-tisħiħ tal-kapaċità biex tiġi żgurata implimentazzjoni effettiva tal-Qafas Komuni ta’ Mmaniġġjar tar-Riskju u żieda fir-rispons għal riskji ġodda identifikati
2.6Il-ħames għan — Il-promozzjoni tal-kooperazzjoni bejn l-aġenziji u l-kondiviżjoni ta' informazzjoni bejn l-awtoritajiet doganali u oħrajn fil-livell tal-Istati Membri u tal-UE
2.7Is-sitt għan — It-titjib tal-kooperazzjoni mal-kummerċ
2.8Is-seba' għan — L-użu tal-potenzjal offrut mill-kooperazzjoni doganali internazzjonali
3. Konklużjonijiet preliminari
1Introduzzjoni
Il-konklużjonijiet tal-Kunsill tal-4 ta' Diċembru 2014 li japprovaw l-Istrateġija u l-Pjan ta' Azzjoni tal-UE tal-2014 għall-immaniġġjar tar-riskju doganali 1 (minn hawn 'il quddiem imsejħa "l-Istrateġija" u "l-Pjan ta' Azzjoni") jitolbu lill-Kummissjoni tirrapporta lill-Kunsill, fi żmien 18-il xahar, dwar l-implimentazzjoni tal-Istrateġija u l-Pjan ta' Azzjoni u dwar ir-riżultati miksuba.
Dan ir-Rapport ta' Progress (minn hawn 'il quddiem imsejjaħ "ir-Rapport"), jikkostitwixxi r-rispons tal-Kummissjoni għal dik it-talba.
L-għan ġenerali tal-Istrateġija huwa li jinkiseb approċċ ta' kwalità għolja u b'ħafna livelli għalimmaniġġjar tar-riskju li fl-istess ħin ikun effettiv u effiċjenti. L-Istrateġija tidentifika seba' għanijiet prinċipali, jiġifieri:
I.it-titjib tal-kwalità tad-dejta u s-sistemi ta' arkivjar;
II.l-iżgurar tad-disponibbiltà tad-dejta fil-katina tal-provvista u l-kondiviżjoni ta' informazzjoni rilevanti tar-riskju fost l-awtoritajiet doganali;
III.l-implimentazzjoni ta' miżuri ta' kontroll u mitigazzjoni tar-riskju fejn meħtieġ;
IV.it-tisħiħ tal-kapaċità;
V.il-promozzjoni tal-kooperazzjoni bejn is-setturi u l-kondiviżjoni ta' informazzjoni bejn l-awtoritajiet doganali u oħrajn fuq il-livell tal-Istati Membri u tal-UE;
VI.it-tijib tal-kooperazzjoni man-negozju; kif ukoll
VII.l-użu tal-potenzjal offrut mill-kooperazzjoni doganali internazzjonali.
Il-Pjan ta' Azzjoni jistabbilixxi sensiela ta' azzjonijiet (li jammontaw għal total ta' 22 azzjoni u 54 azzjoni sekondarja) li jridu jittieħdu għal kull għan. Ġie żviluppat pjan direzzjonali għall-implimentazzjoni tal-azzjonijiet, li jidentifika 64 riżultat. Il-maġġoranza tal-azzjonijiet jitwettqu minn jew inkella taħt ir-responsabbiltà tal-Kummissjoni.
Il-Kummissjoni hija megħjuna fl-implimentazzjoni tal-Istrateġija mill-Grupp ta' Koordinazzjoni tal-Implimentazzjoni tal-Istrateġija għall-Immaniġġjar tar-Riskju, li huwa magħmul minn rappreżentanti mill-Istati Membri kollha. Dan il-grupp ikkontribwixxa għall-preparazzjoni ta' dan ir-Rapport.
2Valutazzjoni globali
2.1Skop u metodoloġija
Dan ir-Rapport jagħti valutazzjoni kwalitattiva ġenerali tal-implimentazzjoni tal-Istrateġija 2 . Dan jenfasizza l-progress li sar taħt kull wieħed mis-seba' għanijiet prinċipali u jagħti xi konklużjonijiet preliminari. Minħabba l-perjodu qasir li għadda sa mit-tnedija tal-azzjonijiet, dan ir-Rapport ma jfittixx li jivvaluta l-impatt tagħhom.
L-informazzjoni ppreżentata f'dan ir-Rapport inkisbet permezz ta' stħarriġ imwettaq fil-Kummissjoni u fl-Istati Membri. Din kopriet l-implimentazzjoni tal-azzjonijiet individwali (kemm dawk li nbdew diġà kif ukoll dawk li għadhom iridu jiġu mnedija), u ppermettiet lill-Kummissjoni tidentifika kemm l-istejjer ta' suċċess kif ukoll l-isfidi ffaċċjati, u tiġbor kummenti u suġġerimenti dwar il-proċess ta' implimentazzjoni globalment 3 .
L-istħarriġ juri li, meta kien qed jitħejja dan ir-Rapport, jiġifieri 18-il xahar fil-proċess ta' implimentazzjoni, il-maġġoranza l-kbira tal-azzjonijiet u l-azzjonijiet sekondarji stabbiliti fil-Pjan ta' Azzjoni tnedew diġà u qed jitwettqu 4 .
Id-Dokument ta' Ħidma tal-Persunal tal-Kummissjoni, anness ma' dan ir-rapport, jagħti informazzjoni ulterjuri dwar il-progress li sar fuq l-azzjonijiet u l-azzjonijiet sekondarji individwali.
2.2L-ewwel għan — It-titjib tal-kwalità tad-dejta u s-sistemi ta' arkivjar
L-Istrateġija u l-Pjan ta' Azzjoni jitolbu li jiġi stabbilit qafas legali li jiżgura li dejta ta' kwalità għolja dwar informazzjoni antiċipata dwar il-merkanzija relatata mal-movimenti fil-katina ta' provvista hija disponibbli u tintuża korrettament mill-awtoritajiet doganali u mill-awtoritajiet kompetenti oħrajn għall-iskop ta' immaniġġjar tar-riskju. L-introduzzjoni ta' "arkivjar multiplu" huwa ċentrali biex tiġi żgurata l-kwalità tad-dejta — jiġifieri l-arkivjar ta' informazzjoni relatata mal-istess kompitu speċifiku minn operaturi differenti — u t-tneħħija tal-eżenzjonijiet eżistenti għal kunsinni postali u ta' valur baxx. Il-qafas legali jikkonsisti mill-Kodiċi Doganali tal-Unjoni 5 u r-regoli dettaljati li hemm fl-atti delegati 6 u ta' implimentazzjoni 7 .Din il-leġiżlazzjoni l-ġdida tibda tapplika mill-1 ta' Mejju 2016 u l-iżvilupp u l-ammeljorament tas-sistemi rilevanti tal-IT meħtieġa għall-implimentazzjoni tagħha ser jitwettqu fil-perjodu ta' żmien stabbilit fil-Programm ta' Ħidma għall-Kodiċi Doganali tal-Unjoni 8 .
L-għan ta' qafas legali komplut li jipprovdi rekwiżiti għal arkivjar multiplu u titjib tal-kwalità tad-dejta b'hekk twettaq u baqa' biss l-implimentazzjoni tiegħu.
2.3It-tieni għan — L-iżgurar tad-disponibbiltà tad-dejta fil-katina tal-provvista, il-kondiviżjoni ta' informazzjoni rilevanti tar-riskju u r-riżultati ta' kontroll
It-titjib tal-kwalità tad-dejta u s-sistemi ta' arkivjar u l-iżgurar tad-disponibbiltà u l-kondiviżoni tad-dejta fil-katina tal-provvista u l-informazzjoni rilevanti tar-riskju bejn l-awtoritajiet doganali jiddependu fuq l-iżvilupp u d-disponibbiltà tas-sistemi tal-IT meħtieġa, jiġifieri, b'mod partikolari s-Sistema ta' Kontroll tal-Importazzjoni l-ġdida.
Sistemi tal-IT għal proċeduri doganali oħrajn għandhom jiġu żviluppati wkoll jew aġġornati bħala parti mill-Kodiċi Doganali tal-Unjoni.
Is-Sistema tal-Kontroll tal-Importazzjoni
Azzjoni prijoritarja waħda identifikata mill-Istrateġija hija l-iżvilupp u l-implimentazzjoni ta' soluzzjonijiet tal-IT xierqa għat-titjib tal-kwalità tad-dejta, is-sistemi tal-arkivjar u d-disponibbiltà tad-dejta għall-iskoperta ta' riskji tas-sigurtà u s-sikurezza fil-punt tad-dħul tal-prodotti. L-iżvilupp ta' Sistema ta' Kontroll tal-Importazzjoni ġdida huwa r-riżultat ewlieni taħt din il-prijorità. Il-Kummissjoni, bl-appoġġ tal-Istati Membri, ippreparat każ ta' negozju u dokument ta' viżjoni fuq il-bażi ta' analiżi tal-ispejjeż u l-benefiċċji u studji ta' fattibbiltà esterni 9 .
Is-Sistema ta' Kontroll tal-Importazzjoni ġdida se tirriżulta f'titjib sinifikanti għall-immaniġġjar tar-riskju doganali tal-UE. Repożitorju komuni ta' informazzjoni antiċipata dwar il-merkanzija huwa importanti ħafna għat-titjib meħtieġ fil-kwalità u d-disponibbiltà tad-dejta u jikkostitwixxi prerekwiżit fundamentali. Bl-introduzzjoni tal-arkivjar multiplu u ż-żieda mistennija fil-volum ta' informazzjoni antiċipata dwar il-merkanzija — minn madwar 40 miljun dikjarazzjoni fis-sena fis-sistema attwali għal madwar 400 miljun taħt is-Sistema ta' Kontroll tal-Importazzjoni l-ġdida — approċċ deċentralizzat ser ikollu piż kbir għad-dwana u l-kummerċ. Analiżi tal-ispejjeż u l-benefiċċji mwettqa fl-2013 u analiżi ulterjuri tal-opzjonijiet possibbli diġà identifikaw li huwa biss approċċ ċentralizzat li jista' jkopri l-ħtieġa għal livell għoli ta' disponibbiltà tas-sistema, u ser jiżgura approċċ armonizzat lejn l-immaniġġjar tar-riskju doganali fuq l-informazzjoni antiċipata dwar il-merkanzija. Ir-repożitorju komuni ser jippermetti l-ħażna u l-ipproċessar tal-volum miżjud ta' informazzjoni antiċipata dwar il-merkanzija u ser jippermetti lill-Istati Membri kollha fi kwalunkwe katina tal-provvista biex iwettqu valutazzjoni tar-riskju effettiva u effiċjenti direttament u simultanjament bl-użu tal-informazzjoni fir-repożitorju. Dan ser jippermetti wkoll li l-informazzjoni rilevanti għar-riskju u r-riżultati tal-kontroll jiġu kondiviżi bejn l-Istati Membri.
It-tnedija tal-fażi ta' elaborazzjoni formali għall-ICS 2.0 ġiet imdewma, iżda għaddejja l-ħidma biex jiġu solvuti l-kwistjonijiet pendenti relatati mal-baġit, il-governanza, l-istrateġija u l-ippjanar tal-kunsinna, il-modalità operattiva u att ta' implimentazzjoni ddedikat għas-sistema tal-IT u l-kapaċità tal-proġett. Għandu jiġi segwit approċċ pragmatiku gradwali (bl-użu ta' "blokki tal-bini") għall-iżvilupp ulterjuri u l-implimentazzjoni tiegħu.
2.4It-tielet għan — L-implimentazzjoni ta' miżuri ta' kontroll u mitigazzjoni tar-riskju fejn meħtieġ ("valutazzjoni antiċipata — kontroll fejn meħtieġ")
Il-progress li sar f'dan il-qasam huwa, l-aktar, minħabba l-progress li sar fuq l-attivitajiet li diġà qed jitwettqu fiż-żmien tal-adozzjoni tal-Istrateġija, jiġifieri dawk relatati mal-projbizzjonijiet u r-restrizzjonijiet. Tħejja sett ta' skedi informattivi (f'kooperazzjoni mal-Istati Membri) għal biċċiet magħżula ta' leġiżlazzjoni li jistabbilixxu projbizzjonijiet u restrizzjonijiet fuq l-importazzjonijiet u l-esportazzjonijiet tal-prodotti, li jridu jiġu kkontrollati fil-fruntiera esterna tal-UE. L-iskedi informattivi jagħtu deskrizzjoni tal-qafas leġiżlattiv, ir-rwol tad-dwana u l-kontrolli tad-dokumenti u fiżiċi li jridu jiġu applikati. Dawn jipprovdu bażi li fuqha jiġi ddeterminat it-twaqqit tal-kontrolli doganali u jekk humiex meħtieġa rakkomandazzjonijiet ulterjuri għall-awtoritajiet doganali u oħrajn.
Is-servizzi tal-Kummissjoni ppreparaw gwida biex tappoġġja l-preparazzjoni jew ir-reviżjoni tal-atti legali tal-UE dwar kif għandu jiġi previst l-involviment tad-dwana li jinkludi kif l-immaniġġjar tar-riskju doganali għandu jiġi kkunsidrat.
2.5Ir-raba' għan — It-tisħiħ tal-kapaċità biex tiġi żgurata implimentazzjoni effettiva tal-Qafas Komuni ta’ Mmaniġġjar tar-Riskju u żieda fir-rispons għal riskji ġodda identifikati
Il-progress kien bil-mod minkejja d-diversi azzjonijiet li kienu għaddejjin maħsuba għat-tkattir tal-kapaċità tal-Istati Membri u tal-UE biex jimplimentaw il-qafas kurrenti ta' mmaniġġjar tar-riskju doganali. Filwaqt li l-Istati Membri kienu attivi fl-identifikazzjoni ta' inkonsistenzi fl-implimentazzjoni tal-qafas komuni ta’ mmaniġġjar tar-riskju fil-livell nazzjonali u fis-sejba ta' modi ta' kif għandhom jiġu indirizzati dawn id-dgħufijiet, hemm kwistjonijiet relatati mal-kapaċità tal-Istati Membri biex jimplimentaw soluzzjonijiet u l-kapaċità tal-UE biex tipprovdi appoġġ ta' kapaċità xierqa ta' analiżi tar-riskju lill-Istati Membri permezz tal-inizjattiva ta' Sistema ta' Kontroll tal-Importazzjoni l-ġdida.
Fl-2015, l-esperti tal-Kummissjoni u tal-Istati Membri vvalutaw u identifikaw il-ħtieġa għal sistema tal-IT imtejba biex jaqsmu l-informazzjoni dwar ir-riskji, jiġifieri Sistema ta' Mmaniġġjar tar-Riskji Doganali tal-ġenerazzjoni li jmiss.
Ġew evalwati l-kriterji tar-riskju komuni kemm fil-livell tal-Istati Membri kif ukoll tal-UE. Tnedew proġetti pilota mill-Istati Membri sabiex tiġi vvalutata u ttestjata l-implimentazzjoni tal-kriterji tar-riskju komuni. B'mod parallel, l-għodda tal-estrazzjoni tad-dejta u d-disinji għall-analiżi tad-dejta ġew ittestjati fuq id-dejta disponibbli fil-livell tal-UE. L-għan ta' dawn it-testijiet kien l-identifikazzjoni ta' kapaċitajiet possibbli ulterjuri għall-immaniġġjar tar-riskju u t-titjib tal-immirar, b'mod partikolari għat-trasport ikkontejnerizzat.
Bħala parti mill-proċess kontinwu ta' żvilupp ta' kriterji komuni għas-sensiela sħiħa ta' riskji, il-Kummissjoni u l-Istati Membri bdew jaħdmu fuq id-definizzjonijiet tar-riskji finanzjarji differenti u jirrevedu l-kriterji tar-riskju eżistenti għas-sigurtà u s-sikurezza, b'mod partikolari fir-rigward tas-sigurtà tal-merkanzija bl-ajru.
Il-Kummissjoni u l-Istati Membri wkoll ħadu passi biex jiżguraw l-implimentazzjoni armonizzata tal-kriterji tar-riskju.
Fil-monitoraġġ u l-evalwazzjoni tal-implimentazzjoni, dawn diġà rnexxilhom jiksbu sinerġiji bl-eżerċizzju tal-Prestazzjoni tal-Unjoni Doganali.
2.6Il-ħames għan — Il-promozzjoni tal-kooperazzjoni bejn l-aġenziji u l-kondiviżjoni ta' informazzjoni bejn l-awtoritajiet doganali u oħrajn fil-livell tal-Istati Membri u tal-UE
Il-kooperazzjoni bejn l-aġenziji tjiebet b'mod ġenerali, b'mod partikolari fl-oqsma tal-politika mhux doganali.
Pereżempju, ġiet żviluppata metodoloġija għall-iskambju ta' informazzjoni dwar ir-riskju bejn l-awtoritajiet doganali u dawk tas-sorveljanza tas-suq fil-qasam tas-sikurezza tal-prodotti. Ħarsa ġenerali lejn din il-metodoloġija ġiet kondiviża mal-Istati Membri f'Diċembru 2015 10 .
It-titjib jista' jinkiseb f'kooperazzjoni bejn l-awtoritajiet doganali u awtoritajiet tal-fruntieri oħrajn dwar l-aspett tal-kondiviżjoni tal-informazzjoni relatata mal-kontrolli tal-merkanzija mwettqa mill-vjaġġaturi jew mill-membri tal-ekwipaġġ. Il-kwistjoni kienet enfasizzata fil-komunikazzjoni ta' April 2016 Sistemi ta' Informazzjoni aktar b'saħħithom u aktar intelliġenti għall-Fruntieri u s-Sigurtà 11 .
Qed titwettaq evalwazzjoni kontinwa tal-kooperazzjoni bejn il-gwardjani doganali u tal-fruntieri, li tinkludi l-implimentazzjoni tal-linji gwida ta' April 2013 12 . Ir-riżultati inizjali juru livell tajjeb ta' kooperazzjoni b'mod ġenerali u ġie identifikat sett ta' prattiki tajbin.
Mis-7 sa 8 ta' Mejju 2015, f'Riga ġie organizzat seminar ta' livell għoli dwar il-kontrolli tal-passiġġieri għat-titjib tal-ġestjoni integrata tal-fruntieri bejn l-awtoritajiet doganali u awtoritajiet oħrajn. Is-seminar identifika aġenda għal ħidma u kooperazzjoni ulterjuri bejn l-awtoritajiet doganali u awtoritajiet tal-fruntieri oħrajn, li tinkludi d-disponibbiltà ta' dejta antiċipata dwar il-passiġġieri għall-użu mid-dwana. Sabiex titjieb il-kooperazzjoni mal-Frontex 13 , tnieda djalogu formali li jiffoka fuq il-funzjonijiet li jaqgħu fil-qafas tal-aġenzija u dawk tad-dwana, li jinkludi l-immaniġġjar tar-riskju doganali.
It-taqsima tal-immaniġġjar tar-riskju tal-Kumitat tal-Kodiċi Doganali vvalutat l-implikazzjonijiet fir-rigward tad-dwana, tal-kondiviżjoni tal-informazzjoni prevista skont id-Direttivi tar-Reġistru tal-Ismijiet tal-Passiġġieri (PNR) u tal-Informazzjoni Antiċipata dwar il-Passiġġieri (API). Li tiġi żgurata l-parteċipazzjoni tad-dwana fl-Unitajiet tal-Informazzjoni dwar il-Passiġġieri (PIUs) u/jew l-aċċess tad-dwana għal din id-dejta, skont id-Direttiva (UE) 2016/681 14 , huwa importanti għal superviżjoni doganali effettiva u effiċjenti tal-merkanzija fit-traffiku tal-passiġġieri. Id-dejta hija meqjusa ta' valur kbir għall-identifikazzjoni tar-riskji relatati mal-bagalji tal-passiġġieri (jew il-flus kontanti li jġorru l-passiġġieri) u tippermetti lid-dwana twettaq kontrolli mmirati u bbażati fuq ir-riskju mal-wasla, u b'hekk tikkontribwixxi għall-ġlieda kontra l-kriminalità organizzata, it-terroriżmu u l-finanzjament tat-terroriżmu filwaqt li jiġu rispettati l-protezzjoni tad-dejta u s-salvagwardji tal-privatezza.
L-iżgurar tal-kooperazzjoni ma' awtoritajiet oħrajn tal-infurzar tal-liġi jibqa' sfida (inkluż, f'ċertu każijiet, bejn id-dipartimenti responsabbli għall-kontrolli doganali/l-immaniġġjar tar-riskju u dawk responsabbli mill-investigazzjonijiet f'amministrazzjoni doganali). Matul il-perjodu ta' rapportar, ingħatat attenzjoni partikolari lit-titjib tal-komunikazzjoni u l-ispjegazzjoni tar-rwol tal-immaniġġjar tar-riskju, u l-kapaċitajiet tad-dwana eżistenti u dawk possibbli fil-futur. B'riżultat ta' dan, ittejjeb il-fehim reċiproku tar-responsabbiltajiet differenti tal-awtoritajiet tad-dwana u awtoritajiet tal-infurzar tal-liġi oħrajn, iżda huma meħtieġa sforzi ulterjuri.
Il-kamp ta' applikazzjoni tal-iskambju ta' informazzjoni għall-finijiet ta' għajnuna reċiproka bejn l-awtoritajiet doganali tal-Istati Membri u bejn dawk l-awtoritajiet u l-Kummissjoni ġie estiż bl-emendar tar-Regolament dwar l-għajnuna reċiproka 15 . Ir-Regolament emendat joffri bażi legali usa' għal għadd ta' azzjonijiet li għandhom l-għan li jkun hemm konformità aħjar mill-operaturi ekonomiċi mal-leġiżlazzjoni doganali u agrikola. L-aċċess għad-dejta miġbura skont ir-Regolament emendat għall-immaniġġjar tar-riskju jtejjeb l-immaniġġjar tar-riskju doganali fil-livell tal-Istati Membri u tal-UE.
Kontribuzzjoni waħda li saret mid-dwana għall-implimentazzjoni tal-Aġenda Ewropea dwar is-Sigurtà 16 hija l-iżvilupp ta' regoli speċifiċi dwar ir-riskju (kriterji ta' riskju komuni) għas-sigurtà tal-merkanzija bl-ajru. Intlaħaq qbil dwar sett preliminari ta' kriterji ta' riskju komuni. Minħabba li l-kriterji komuni fid-dominju tal-merkanzija tal-ajru jikkonċernaw mhux biss l-awtoritajiet tad-dwana iżda anke awtoritajiet oħrajn, is-servizzi rilevanti tal-Kummissjoni, iċ-Ċentru ta' Analiżi tal-Intelligence tal-Unjoni Ewropea, l-awtoritajiet doganali nazzjonali, u l-esperti tal-avjazzjoni ċivili u kontra t-terroriżmu għalhekk kienu involuti fl-iżvilupp tagħhom. Il-kriterji tar-riskju komuni għall-merkanzija tal-ajru għalhekk huma bbażati fuq reazzjonijiet transettorjali u multidixxiplinari mill-partijiet kollha rilevanti u ser jikkumplimentaw il-miżuri tas-sigurtà eżistenti tal-avjazzjoni ċivili għall-merkanzija u l-posta bħala livell addizzjonali ta' sigurtà. Minħabba li r-regoli l-ġodda dwar ir-riskju se jibdew japplikaw biss abbażi tas-Sistema ta' Kontroll tal-Importazzjoni l-ġdida, dawn mhumiex sejrin jiġu implimentati qabel it-tmiem tal-2020.
L-Istrateġija tappoġġja wkoll l-implimentazzjoni tal-Istrateġija Ewropea għas-Sigurtà Marittima u l-pjan ta' azzjoni tagħha, adottat mill-Kunsill fis-16 ta' Diċembru 2014. B'mod partikolari, l-implimentazzjoni tal-Ambjent Komuni għall-Qsim tal-Informazzjoni (CISE) li ġie żviluppat bħala meta-proġett għat-titjib tal-kooperazzjoni u l-iskambju tal-informazzjoni bejn l-awtoritajiet ċivili u militari bil-għan li jissaħħu aktar is-sensibilizzazzjoni tas-sitwazzjoni marittima komuni u l-iskambju ta’ data. Bil-għan li tissaħħaħ is-sigurtà tal-katina tal-provvista u li tiġi appoġġjata s-sorveljanza bbażata fuq ir-riskju tal-moviment tal-merkanzija fid-domunju marittimu, is-CISE jippromwovi l-iskambju tal-informazzjoni bejn l-awtoritajiet differenti involuti fil-ġlieda kontra l-kriminalità terrorista u organizzata (eż. il-kuntrabandu tal-oġġetti, it-traffikar tal-armi u n-narkotiċi u l-movimenti transfruntieri tad-dħul tal-flus kontanti mill-kummerċ illegali). L-aġenziji rilevanti tal-UE 17 huma mistiedna jinfurzaw il-kooperazzjoni bejn l-aġenziji. Il-proġett ta' Validazzjoni Preoperazzjonali "EUCISE2020" ser jittestja s-CISE fuq skala kbira sal-2017-18, segwit minn implimentazzjoni gradwali sal-2020.
Kwalunkwe kondiviżjoni tal-informazzjoni msemmija hawn fuq sejra tirrispetta d-drittijiet fundamentali, u b'mod partikolari d-drittijiet għall-privatezza u l-protezzjoni tad-dejta personali.
2.7Is-sitt għan — It-titjib tal-kooperazzjoni mal-kummerċ
Il-kooperazzjoni bejn id-dwana u l-kummerċ diġà tjiebet permezz tat-tisħiħ tal-kunċett tal-Operatur Ekonomiku Awtorizzat (AEO). Bidliet fil-kunċett tal-AEO ġew introdotti mill-Kodiċi Doganali tal-Unjoni u l-atti ta' delega u ta' implimentazzjoni tiegħu u dawn il-bidliet kienu jeħtieġu aġġornament tal-linji gwida tal-AEO 18 .
Il-Grupp tan-Netwerk tal-AEO, maħluq fl-2007 biex jissorvelja l-implimentazzjoni tal-kunċett tal-AEO, nieda t-tieni inizjattiva tiegħu ta' monitoraġġ fl-2013, imfassla biex tiżgura applikazzjoni korretta u uniformi tar-regoli tal-AEO. L-eżerċizzju tal-monitoraġġ ikkonferma li l-kunċett tal-AEO huwa sod u affidabbli. L-Istati Membri żviluppaw proċeduri robusti li jiggarantixxu mmaniġġjar ta' kwalità għolja, effiċjenti u konsistenti tal-kunċett.
Fl-2015, inħolqu żewġ gruppi fil-mira speċifiċi fis-Sistema ta' Mmaniġġjar tar-Riskji Doganali għall-iskambju ta' informazzjoni dwar ir-riskju relatat mal-proċessi u l-proċeduri tal-AEO: grupp wieħed għall-iskambju ta' informazzjoni sensittiva fil-proċess tal-AEO u grupp ieħor għall-iskambju ta' informazzjoni dwar l-irregolaritajiet li jinvolvu pajjiż sieħeb tal-AEO.
Il-progress kien aktar bil-mod fl-oqsma bħat-titjib tal-għarfien tal-ktajjen tal-provvista.
Il-ħolqien ta' qafas legali li jiżgura d-disponibbiltà ta' dejta ta' kwalità għolja għal skopijiet ta' mmaniġġjar tar-riskju wassal għall-kwistjoni jekk u kif id-dejta sottomessa mill-kummerċjanti u inkluża fid-dikjarazzjonijiet doganali għall-pakketti tal-posta (jiġifieri d-dikjarazzjoni CN23) tistax tkun disponibbli u tistax tintuża mill-ġdid għas-sottosmissjoni ta' dikjarazzjoni sommarja tad-dħul għas-sigurtà u s-sikurezza u tad-dikjarazzjoni doganali. Din id-diskussjoni hija pertinenti wkoll minħabba l-volum dejjem jiżdied ta' kunsinni żgħar li jintbagħtu bħala riżultat tal-kummerċ elettroniku. L-awtoritajiet doganali tal-Istati Membri, l-operaturi tal-posta, l-assoċjazzjonijiet tal-kummerċ u l-imsieħba internazzjonali (l-Istati Uniti, il-Kanada u ċ-Ċina) kienu involuti fl-analiżi tal-għażliet disponibbli fil-mudell globali tal-posta tal-Unjoni Postali Universali. Tkun xi tkun l-opzjoni li tintgħażel, huwa importanti li din tkun tista' topera fis-Sistema ta' Kontroll tal-Importazzjoni l-ġdida.
2.8Is-seba' għan — L-użu tal-potenzjal offrut mill-kooperazzjoni doganali internazzjonali
Tnedew għadd ta' attivitajiet u dawn għadhom għaddejjin bil-għan li jitjieb l-immaniġġjar tar-riskju tal-katina tal-provvista permezz tal-kooperazzjoni internazzjonali.
Is-suċċessi jinkludu r-reviżjoni tal-Qafas tal-Istandards SAFE tal-Organizzazzjoni Dinjija Doganali(WCO) 19 , l-iżvilupp ta' standards internazzjonali, eż. dwar informazzjoni ta' qabel it-tagħbija tal-merkanzija tal-ajru 20 , u l-iżvilupp tar-rikonoxximent reċiproku tal-kunċetti tal-Operatur Ekonomiku Awtorizzat (AEO) 21 . Qed jitwettqu għadd ta' proġetti relatati mal-iskambju ta' informazzjoni mal-pajjiżi mhux tal-UE (eż. fil-kuntest tal-proġett pilota tar-Rotot Kummerċjali Intelliġenti u Sikuri maċ-Ċina 22 ). Madankollu, sabiex jirnexxu, dawn il-proġetti sejrin jeħtieġu li jinħolqu sistemi tal-IT affidabbli.
3. Konklużjonijiet preliminari
Ir-riforma tal-immaniġġjar tar-riskju doganali hija eżerċizzju li jeħtieġ ħafna riżorsi. L-ilħuq tar-riżultati jeħtieġ iż-żmien. Għalkemm tnedew għadd kbir ta' azzjonijiet, il-progress ma kienx wieħed bilanċjat.
Il-progress kien jispikka l-aktar fir-rigward tal-azzjonijiet li jaqgħu taħt ir-responsabbiltà tad-dwana, filwaqt li kien aktar bil-mod għal dawk l-azzjonijiet li jeħtieġu żieda fil-kooperazzjoni bejn l-awtoritajiet doganali u awtoritajiet oħrajn, b'mod partikolari l-kooperazzjoni mal-awtoritajiet tal-infurzar tal-liġi u tas-sigurtà.
F'dan l-istadju tal-proċess ta' implimentazzjoni, l-isfida ewlenija hija relatata mal-IT. Filwaqt li nstabu soluzzjonijiet fattibbli, eż l-iżgurar tad-disponibbiltà tad-dejta, l-iskambju ta' informazzjoni u analiżi awtomatizzata tar-riskju, is-suċċess tal-implimentazzjoni jiddependi kemm fuq l-ammeljorament ta' sistemi tal-IT eżistenti kif ukoll fuq l-iżvilupp u t-tnedija ta' sistemi ġodda (jew mill-Istati Membri bl-appoġġ tal-Kummissjoni jew mingħajru, jew mill-Kummissjoni).
In-nuqqas ta' finanzjament għall-iżvilupp tas-sistemi tal-IT meħtieġa huwa kwistjoni ewlenija li tostakola l-progress, b'mod partikolari fir-rigward tas-Sistema ta' Kontroll tal-Importazzjonijiet il-ġdida. Filwaqt li hija rikonoxxuta bħala Sistema tal-Informazzjoni Ewropea fir-Regolament dwar id-Dwana 2020, il-baġit tal-programm Dwana 2020 mhuwiex biżżejjed biex ikopri l-ispejjeż tal-implimentazzjoni tal-IT.
Limitazzjonijiet simili tar-riżorsi jeżistu fil-livell tal-Istati Membri. F'ċertu Stati Membri, jista' jkun diffiċli li jkunu ġġustifikati r-riżorsi addizzjonali meħtieġa għall-iżvilupp tas-sistemi tal-IT meħtieġa minħabba n-numru ta' dikjarazzjonijiet li jridu jiġu pproċessati.
Fin-nuqqas ta' riżorsi addizzjonali, numru ta' azzjonijiet mhux ser ikunu jistgħu jiġu implimentati sal-aħħar tal-2020, kif previst fl-Istrateġija u l-Pjan ta' Azzjoni. Id-dewmien jista' jaffettwa wkoll l-implimentazzjoni tal-impenji għal aspetti relatati mad-dwana fil-Kuntest tal-Aġenda Ewropea dwar is-Sigurtà.
Hija meħtieġa wkoll analiżi ulterjuri tal-impatt tal-leġiżlazzjoni l-ġdida tal-UE dwar il-protezzjoni tad-dejta, b'mod partikolari fir-rigward tal-awtoritajiet tal-infurzar tal-liġi.
F'dan l-istadju tal-proċess ta' implimentazzjoni, il-Kummissjoni tissuġġerixxi li ma jsir ebda tibdil għall-Istrateġija u l-Pjan ta' Azzjoni.
L-avvenimenti u l-iżviluppi esterni 23 li mhumiex inklużi fil-pjan direzzjonali għall-implimentazzjoni tal-Istrateġija u l-Pjan ta' Azzjoni jistgħu, madankollu, jkollhom impatt fuq l-implimentazzjoni u jistgħu jeħtieġu bidliet għal azzjonijiet speċifiċi u l-prijoritizzazzjoni ta' ċerti azzjonijiet sekondarji. Il-pjan direzzjonali għalhekk jeħtieġ li jiġi aġġornat.
Ir-rakkomandazzjonijiet mill-Kunsill u mill-Parlament Ewropew, u l-impatt fuq id-drittijiet fundamentali ser jiġu kkunsidrati.
Id-disponibbiltà tar-riżorsi għal implimentazzjoni sħiħa tal-ħtiġijiet għall-immaniġġjar tar-riskju doganali identifikati fl-Istrateġija u l-Pjan ta' Azzjoni, inkluż bħala appoġġ għall-analiżi tar-riskju transnazzjonali fil-proċeduri kollha tad-dwana, ser teħtieġ kunsiderazzjoni fil-fond.
Ir-Regolament Delegat tal-Kummissjoni (UE) 2015/2446 tat-28 ta' Lulju 2015 li jissupplimenta r-Regolament (UE) Nru 952/2013 tal-Parlament Ewropew u tal-Kunsill fir-rigward ta' regoli dettaljati li jikkonċernaw uħud mid-dispożizzjonijiet tal-Kodiċi Doganali tal-Unjoni (ĠU L 343, 29.12.2015, p. 1). Ir-Regolament Delegat tal-Kummissjoni (UE) 2016/341 tas-17 ta' Diċembru 2015 li jissupplimenta r-Regolament (UE) Nru 952/2013 tal-Parlament Ewropew u tal-Kunsill fir-rigward ta' regoli tranżizzjonali għal ċerti dispożizzjonijiet tal-Kodiċi Doganali tal-Unjoni fejn is-sistemi elettroniċi rilevanti għadhom mhux operazzjonali u li jemenda r-Regolament Delegat (UE) 2015/2446, (ĠU L 69, 15.3.2016, p. 1).
Iċ-ċiklu ta' reviżjoni tal-Qafas SAFE tal-WCO, approvat mill-Kunsill tal-WCO f'Ġunju 2015, introduċa emenda għall-Qafas SAFE tal-WCO, inkluż dwar l-informazzjoni ta' qabel it-tagħbija tal-merkanzija tal-ajru.
Jeżistu ftehimiet dwar ir-rikonoxximent reċiproku tal-AEU fin-Norveġja, l-Iżvizzera, Andorra, l-Istati Uniti, il-Ġappun u ċ-Ċina. in-negozjati għadhom għaddejjin mal-Kanada. Teżisiti sistema ta' skambju ta' dejta awtomatizzat għar-rikonoxximent reċiproku maċ-Ċina, il-Ġappun, l-Iżvizzera u l-Istati Uniti.
Il-proġett pilota tar-Rotot Kummerċjali Intelliġenti u Sikuri, li tneda fl-2006, għandu l-għan li jittestja r-rakkomandazzjonijiet speċifiċi relatati mas-sigurtà u s-sikurezza maħruġa taħt il-Qafas SAFE tal-WCO fil-kummerċ bejn l-UE u ċ-Ċina. Fl-2014, il-grupp ta' esperti tal-IT tal-SSTL beda jiżviluppa għodda ġdida tal-IT għall-iskambju tad-dejta li ser jippermetti l-iskambju ta' volumi ikbar, u konsegwentement aktar siewja ta' dejta.