27.5.2015   

MT

Il-Ġurnal Uffiċjali tal-Unjoni Ewropea

C 172/8

1.

L-Istrateġija Ewropa 2020 u l-inizjattivi ewlenin tagħha, li jenfasizzaw il-ħtieġa li ż-żgħażagħ jingħataw il-ħiliet u l-kompetenzi neċessarji u li jiġu indirizzati l-livelli għoljin ta’ qgħad fost iż-żgħażagħ fl-Ewropa, kif ukoll ir-Rapport ta’ sinteżi dwar ir-reviżjoni ta’ nofs it-term tal-Istrateġija Ewropa 2020 (1), li jelenka fost l-eżiti ewlenin tiegħu r-rwol siewi tas-settur tal-isport bħala strument ta’ koeżjoni u inklużjoni soċjali.

2.

Il-Pjan ta’ Ħidma tal-Unjoni Ewropea għall-Isport għall-2014-2017 (2), li jenfasizza l-kontribut importanti tal-isport għall-għanijiet ġenerali tal-Istrateġija Ewropa 2020, minħabba l-potenzjal kbir tas-settur li jikkontribwixxi għal tkabbir intelliġenti, sostenibbli u inklużiv. Waħda mit-tliet prijoritajiet tal-Pjan ta’ Ħidma - “L-isport u s-soċjetà” - tenfasizza r-rabtiet tal-isport mal-impjieg, l-edukazzjoni u t-taħriġ.

3.

Ir-Riżoluzzjoni tal-Kunsill tal-20 ta’ Lulju 2006 dwar ir-rikonoxximent tal-valur tat-tagħlim mhux formali u informali fil-qasam taż-żgħażagħ Ewropej (3) tenfasizza li t-tagħlim mhux formali u informali jista’ jgħin liż-żgħażagħ jiksbu għarfien, ħiliet u kompetenzi addizzjonali u jikkontribwixxi għall-iżvilupp personali, l-inklużjoni soċjali u ċ-ċittadinanza attiva tagħhom, u b’hekk itejjeb il-prospettivi tagħhom għall-impjieg; u li rikonoxximent akbar ta’ dawn għandu jingħata l-kunsiderazzjoni dovuta mill-impjegaturi, l-edukazzjoni formali u s-soċjetà ċivili inġenerali.

4.

Ir-Rakkomandazzjoni tal-Kunsill tal-20 ta’ Diċembru 2012 dwar il-validazzjoni tat-tagħlim mhux formali u informali (4), li tidentifika opportunitajiet u mekkaniżmi li jgħinu biex l-għarfien, il-ħiliet u l-kompetenzi miksuba permezz ta’ tagħlim mhux formali u informali jkollhom rwol importanti fit-tisħiħ tal-impjegabbiltà u l-mobbiltà, kif ukoll biex tiżdied il-motivazzjoni għal tagħlim tul il-ħajja.

5.

Il-parteċipazzjoni fl-isport tal-massa (5), filwaqt li l-ewwel u qabel kollox hija attività ta’ rikreazzjoni fiżika, iġġib magħha valur miżjud addizzjonali fir-rigward ta’ soċjetà fl-Ewropa aktar b’saħħitha u b’mod ġenerali aktar inklużiva u sostenibbli. Din tista’ tiżviluppa attitudnijiet u valuri soċjali pożittivi, kif ukoll il-ħiliet u l-kompetenzi tal-individwi, inklużi l-ħiliet trasversali (6) bħall-abbiltà tal-ħsieb kritiku, it-teħid ta’ inizjattivi, is-soluzzjoni tal-problemi u l-ħidma kollaborattiva (7).

6.

Jeħtieġ li nirreaġixxu għar-rekwiżiti li qed jiżdiedu ta’ ekonomija tal-għarfien avvanzata, b’mod partikolari fir-rigward tal-iżvilupp tal-ħiliet trasversali u l-abbiltà li dawn il-ħiliet jiġu applikati bejn diversi setturi; fi żmien fejn dak li jitlob is-suq tax-xogħol qed jinbidel spiss, l-impjegaturi jagħtu valur kbir lill-ħiliet trasversali, iżda spiss jindikaw li l-impjegati ġodda huma neqsin minn ħiliet bħal dawn.

7.

Fir-rigward tal-kontribut tal-isport għall-iżvilupp tal-ħiliet trasversali, hemm potenzjal li għadu ma ġiex sfruttat, speċjalment għaż-żgħażagħ, peress li l-ħiliet li ġew akkwistati permezz tat-tagħlim mhux formali (8) u informali (9) huma siewja għall-iżvilupp personali u professjonali, inkluż fis-suq tax-xogħol u fit-tagħlim tul il-ħajja (10).

8.

Fir-rigward tar-rikonoxximent tal-valur tal-ħiliet trasversali miksuba b’tagħlim mhux formali u informali permezz tal-isport tal-massa, l-ewwel passi huma s-sensibilizzazzjoni u l-viżibilità primarjament fost il-parteċipanti nfushom, ġenituri, voluntiera u persunal, iżda wkoll fis-soċjetà inġenerali, inklużi impjegaturi.

9.

L-isport jagħti kontribut għall-objettivi strateġiċi tal-Unjoni ta’ tkabbir, impjiegi u koeżjoni soċjali, inklużi l-isfidi urġenti li l-Ewropa qed tiffaċċja attwalment bħar-rati għolja persistenti ta’ qgħad fost iż-żgħażagħ (11) fl-Ewropa. Sabiex l-isport ikompli jiżviluppa l-potenzjal kollu tiegħu f’dan ir-rigward, huwa importanti li ssir ħidma biex jittieħed approċċ transsettorjali li jinvolvi oqsma ta’ politika oħrajn bħall-edukazzjoni u t-taħriġ, iż-żgħażagħ u l-impjieg, l-affarijiet soċjali u s-saħħa pubblika.

10.

L-isport mhux tradizzjonali (12) huwa ta’ spiss partikolarment attraenti għaż-żgħażagħ, inklużi dawk b’inqas opportunitajiet, u l-possibiltajiet li dan joffri jistgħu jiġu esplorati aktar.

11.

Persunal kompetenti, inklużi l-voluntiera, fl-isport tal-massa huma essenzjali għas-sensibilizzazzjoni, biex jiġu sfruttati l-valur miżjud u l-benefiċċji li dan jista’ joffri fir-rigward tal-iżvilupp ta’ ħiliet trasversali.

12.

Joħolqu aktar sensibilizzazzjoni fost il-partijiet ikkonċernati fl-isport tal-massa, fis-soċjetà u fost l-impjegaturi li l-ħiliet trasversali miksuba permezz tal-parteċipazzjoni fl-isport tal-massa għandhom valur miżjud personali, soċjali u ekonomiku li jista’ jintuża f’setturi.

13.

Jikkooperaw u jiskambjaw prattika tajba ma’ setturi rilevanti oħrajn u fost l-Istati Membri tal-UE dwar il-benefiċċji pożittivi tal-ħiliet miksuba barra mill-edukazzjoni formali permezz ta’ tagħlim mhux formali u informali fl-isport tal-massa.

14.

Jinkoraġġixxu l-iżvilupp tal-għarfien, il-ħiliet u l-kompetenzi tal-persunal kompetenti, inklużi l-voluntiera, fl-isport tal-massa bil-ħsieb li jissaħħu l-valuri soċjali u edukattivi, kif ukoll il-ħiliet trasversali, permezz tal-isport tal-massa.

15.

Jinkoraġġixxu sħubiji innovattivi bejn il-fornituri tat-tagħlim formali u mhux formali, kif ukoll bejn is-settur taż-żgħażagħ u dak tal-isport, sabiex jiġu żviluppati approċċi ta’ tagħlim li jistgħu jkunu adattati fis-settur tal-isport tal-massa.

16.

Jippromwovu l-awtovalutazzjoni tal-ħiliet, speċjalment fost iż-żgħażagħ, li tinkludi l-ħiliet trasversali miksuba permezz tal-isport tal-massa, kif ukoll l-użu ta’ passaporti ta’ ħiliet u l-mudelli ta’ CV l-aktar komuni, speċjalment il-Europass.

17.

Jagħmlu użu minn arranġamenti eżistenti li għandhom l-għan li jippermettu l-validazzjoni ta’ ħiliet u esperjenzi miksuba f’tagħlim mhux formali u informali fl-isport.

18.

Ikomplu jtejbu l-parteċipazzjoni ġenerali taż-żgħażagħ fl-isport tal-massa, inklużi dawk b’inqas opportunitajiet, f’livell nazzjonali u dak lokali, u jisfruttaw il-potenzjal pożittiv tal-isport mhux tradizzjonali f’dan ir-rigward.

19.

Jippromwovu l-valur tal-ħiliet trasversali miksuba permezz tal-isport tal-massa minn dawk li qed jitgħallmu sabiex ikunu jistgħu jintużaw b’mod effettiv fis-setturi kollha għall-finijiet tal-impjieg, il-mobbiltà fit-tagħlim jew it-tagħlim tul il-ħajja.

20.

Jirrikonoxxu u jintegraw l-eżiti pożittivi tal-ħiliet trasversali żviluppati permezz tas-settur tal-isport tal-massa fil-politiki nazzjonali u Ewropej u fi strateġiji dwar l-isport, iż-żgħażagħ, l-affarijiet soċjali, is-saħħa, l-edukazzjoni u l-impjieg.

21.

Jirrikonoxxu u jappoġġaw il-kontributi tal-organizzazzjonijiet tal-isport tal-massa fl-għoti ta’ opportunitajiet ta’ tagħlim mhux formali.

22.

Jesploraw il-potenzjal għal kooperazzjoni mas-settur taż-żgħażagħ, b’mod speċjali fir-rigward ta’:

23.

Jinkoraġġixxu inizjattivi, fejn xieraq, inkluż taħt il-Ġimgħa Ewropea tal-Isport, dwar il-valur edukattiv tal-isport, kif ukoll dak dwar it-tisħiħ tal-komunitajiet soċjalment inklużivi.

24.

Jikkooperaw biex jogħlew l-istandards fit-taħriġ u l-ikkowċjar u fl-edukazzjoni ta’ dawk li jħarrġu u l-kowċijiet kif ukoll il-voluntiera, billi jiffaċilitaw l-iskambju ta’ informazzjoni u esperjenza bejn dawk li jfasslu l-politika u l-partijiet kkonċernati fl-isport;

25.

Jinkoraġġixxu l-volontarjat fl-isport u l-ħolqien ta’ sensibilizzazzjoni dwar il-valur tal-volontarjat fl-isport, b’mod partikolari fil-kisba ta’ ħiliet trasversali, jiġi rikonoxxut il-volontarjat bħala forma importanti ta’ tagħlim mhux formali u tiżdied il-mobbiltà nazzjonali u transkonfinali ta’ voluntiera żgħażagħ.

26.

Jinkoraġġixxu l-użu effettiv tal-istrumenti ta’ finanzjament tal-UE bħall-Programm Erasmus+ bħala opportunità għall-iżvilupp ta’ ħiliet trasversali, speċjalment fost iż-żgħażagħ, biex jiżdiedu wkoll l-inklużjoni soċjali, iċ-ċittadinanza attiva kif ukoll il-parteċipazzjoni fl-isport tal-massa.

27.

Jagħmlu użu mill-proċess ta’ segwitu tar-Rakkomandazzjoni tal-Kunsill tal-20 ta’ Diċembru 2012 dwar il-validazzjoni tat-tagħlim mhux formali u informali biex tiġi indirizzata l-kwistjoni tal-ħiliet trasversali miksuba permezz tal-isport.

28.

Twettaq studju dwar il-kontribut tal-isport għall-impjegabbiltà taż-żgħażagħ fil-kuntest tal-Istrateġija Ewropa 2020, inklużi aspetti tal-ħiliet trasversali miksuba permezz tal-parteċipazzjoni fl-isport tal-massa.

29.

Tintegra d-dimensjoni tal-isport fid-diskussjonijiet u l-avvenimenti dwar il-politiki eżistenti dwar il-ħiliet, sabiex tinħoloq sensibilizzazzjoni u jiġu esplorati modi aktar konkreti biex jinkisbu ħiliet trasversali fl-isport u permezz tiegħu.

30.

Tkompli, inkluż fi ħdan il-mandat tal-gruppi ta’ esperti stabbiliti bil-Pjan ta’ Ħidma tal-UE għall-Isport, bil-ġbir ta’ data, l-aħjar prattika u l-analiżi tal-importanza soċjali u ekonomika tal-isport u ta’ kif l-isport tal-massa jikkontribwixxi għall-oqsma bħall-impjieg, l-edukazzjoni u t-taħriġ, inkluż enfasi fuq l-iżvilupp tal-ħiliet personali u trasversali.

31.

Tiffaċilita l-iskambju ta’ informazzjoni u l-prattika tajba, it-tagħlim effettiv bejn il-pari u n-netwerking fost l-Istati Membri, speċjalment fir-rigward tal-iżvilupp ta’ sport tal-massa li huwa aktar aċċessibbli, attraenti, diversifikat, b’mod partikolari għaż-żgħażagħ.

32.

Il-ħolqien ta’ sensibilizzazzjoni, speċjalment fost iż-żgħażagħ u l-ġenituri tagħhom, li l-ħiliet miksuba fl-isport u permezz tiegħu jistgħu jkunu ta’ valur speċjali li jista’ jintuża f’oqsma oħra.

33.

L-investiment f’persunal kompetenti li qed juża l-aktar metodi aġġornati fil-ħidma tiegħu biex dan ikun jista’ jibbenefika b’mod sħiħ mill-valuri addizzjonali li l-isport jista’ jagħti, inklużi dawk tal-kisba tal-ħiliet.

34.

Il-ħolqien ta’ sensibilizzazzjoni fost il-persunal fl-isport dwar il-benefiċċji pożittivi tal-ħiliet trasversali miksuba f’attivitajiet sportivi permezz ta’ tagħlim mhux formali u informali u l-valur miżjud soċjali u ekonomiku ġenerali tal-isport tal-massa.

35.

L-esplorazzjoni tal-potenzjal għall-kooperazzjoni u l-iskambju ta’ prattika tajba ma’ organizzazzjonijiet taż-żgħażagħ, b’mod partikolari f’dak li jirrigwarda l-applikazzjoni ta’ metodi u għodod ta’ tagħlim mhux formali fil-qasam tal-isport.

36.

L-iskambju tal-aħjar prattika dwar kif jitrawwem u jiġi ddiversifikat il-moviment tal-isport tal-massa, u l-iskambju ta’ prattika tajba fir-rigward tal-iżvilupp ta’ tipi ġodda ta’ sport tal-massa, eż l-isport mhux tradizzjonali.