This document is an excerpt from the EUR-Lex website
Document 52015PC0549
Proposal for a COUNCIL DECISION on the position to be adopted, on behalf of the European Union, in the European Committee for drawing up standards in the field of inland navigation (CESNI) and at the plenary session of the Central Commission for the Navigation on the Rhine (CCNR) on the adoption of a standard concerning technical requirements for inland waterways vessels
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata, f’isem l-Unjoni Ewropea, fil-Kumitat Ewropew għat-tfassil ta' standards fin-navigazzjoni interna (CESNI) u fis-sessjoni plenarja tal-Kummissjoni Ċentrali għan-Navigazzjoni fuq ir-Renu (is-CCNR) rigward l-adozzjoni ta’ standard dwar ir-rekwiżiti tekniċi għall-bastimenti tal-passaġġi fuq l-ilma interni
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata, f’isem l-Unjoni Ewropea, fil-Kumitat Ewropew għat-tfassil ta' standards fin-navigazzjoni interna (CESNI) u fis-sessjoni plenarja tal-Kummissjoni Ċentrali għan-Navigazzjoni fuq ir-Renu (is-CCNR) rigward l-adozzjoni ta’ standard dwar ir-rekwiżiti tekniċi għall-bastimenti tal-passaġġi fuq l-ilma interni
COM/2015/0549 final - 2015/0255 (NLE)
IL-KUMMISSJONI EWROPEA
Brussell, 27.10.2015
COM(2015) 549 final
2015/0255(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata, f’isem l-Unjoni Ewropea, fil-Kumitat Ewropew għat-tfassil ta' standards fin-navigazzjoni interna (CESNI) u fis-sessjoni plenarja tal-Kummissjoni Ċentrali għan-Navigazzjoni fuq ir-Renu (is-CCNR) rigward l-adozzjoni ta’ standard dwar ir-rekwiżiti tekniċi għall-bastimenti tal-passaġġi fuq l-ilma interni
MEMORANDUM TA’ SPJEGAZZJONI
1.KUNTEST TAL-PROPOSTA
Din il-proposta tal-Kummissjoni tikkonċerna l-istabbiliment tal-pożizzjoni tal-Unjoni fil-laqgħa tal-Kumitat Ewropew għat-tfassil ta' standards fin-navigazzjoni interna (CESNI) tas-26 ta’ Novembru 2015 u waqt il-laqgħa tas-sessjoni plenarja tal-Kummissjoni Ċentrali għan-Navigazzjoni fuq ir-Renu (CCNR) fir-rigward ta’ standard Ewropew li jistabbilixxi r-rekwiżiti tekniċi għal bastimenti tal-passaġġi fuq l-ilma interni.
1.1.CESNI
Is-CCNR, fis-sessjoni Plenarja tagħha tar-rebbiegħa fit-3 ta’ Ġunju 2015 adottat ir-Riżoluzzjoni CCNR 2015-I-3 dwar il-ħolqien u l-funzjonament ta’ Kumitat Ewropew għat-tfassil ta' standards fin-navigazzjoni interna (CESNI). Il-missjoni tagħha tinkludi l-adozzjoni ta’ standards tekniċi f’oqsma diversi, b’mod partikolari fir-rigward tal-bastimenti, it-teknoloġija tal-informazzjoni u l-ekwipaġġ, l-interpretazzjoni uniformi ta’ dawn l-istandards u l-proċeduri korrispondenti kif ukoll id-deliberazzjonijiet dwar is-sikurezza tan-navigazzjoni, il-protezzjoni tal-ambjent jew oqsma oħra tan-navigazzjoni.
Is-CESNI huwa magħmul minn esperti li jirrappreżentaw lill-Istati Membri tas-CCNR u tal-UE.
Il-partijiet tas-CCNR (il-Ġermanja, Franza, in-Netherlands, il-Belġju u l-Iżvizzera) u l-bqija tal-Istati Membri tal-UE għandhom drittijiet ta’ vot fuq il-bażi ta’ vot wieħed għal kull Stat. L-UE mhix parti tas-CCNR jew tas-CESNI. Madankollu, tista’ tipparteċipa fil-ħidma tas-CESNI, flimkien ma’ organizzazzjonijiet internazzjonali li l-missjoni tagħhom tkopri l-oqsma kkonċernati mis-CESNI, iżda mingħajr drittijiet tal-vot.
Il-Kumitat tas-CESNI jadotta standards b’unanimità tal-voti tas-CCNR u l-Istati Membri tal-UE preżenti. Fin-nuqqas ta’ kunsens rigward id-deċiżjoni li l-adozzjoni ta’ standards titqiegħed fuq l-aġenda, is-CESNI tiddeċiedi b’maġġoranza ta’ żewġ terzi tal-voti tal-membri preżenti fil-laqgħa. Barra minn hekk, is-CESNI tadotta l-istandards b’unanimità tal-voti tal-Istati Membri tas-CCNR u tal-UE preżenti. Ladarba jiġu deċiżi, l-istandards jingħataw numru ta’ referenza uniku u jiġu ppubblikati.
Is-CCNR sawret esperjenza sinifikanti fl-istabbiliment tar-rekwiżiti tekniċi għall-bastimenti tal-passaġġi fuq l-ilma interni. Is-CESNI, li hija stabbilita fil-qafas tas-CCNR u bil-parteċipazzjoni tal-Istati Membri kollha tal-UE, għalhekk għandha l-għarfien espert meħtieġ u r-rappreżentanza ġeografika sabiex tfassal standards komuni għan-netwerk kollu tal-passaġġi fuq l-ilma interni fl-Unjoni Ewropea.
1.2.L-istandard Ewropew li jistabbilixxi r-rekwiżiti tekniċi għall-bastimenti tal-passaġġi fuq l-ilma interni
Il-ħidma preparatorja dwar standard tekniku uniformi għall-bastimenti tal-passaġġi fuq l-ilma interni li għandu jiġu applikat kemm fl-UE kif ukoll fis-CCNR bdiet fil-qafas tal-Grupp Konġunt ta’ Ħidma eżistenti li jappoġġa l-implimentazzjoni tad-Direttiva tal-Parlament Ewropew u tal-Kunsill 2006/87/KE li tistabbilixxi r-rekwiżiti tekniċi għall-bastimenti tal-passaġġi fuq l-ilma interni u li tħassar id-Direttiva tal-Kunsill 82/714/KEE 1 .
Il-Grupp Konġunt ta’ Ħidma qabbel ir-rekwiżiti tekniċi eżistenti applikabbli skont il-leġiżlazzjoni tal-UE u fil-qafas tas-CCNR u żviluppa soluzzjonijiet uniformi fl-oqsma fejn hemm differenzi.
Is-CESNI kompla ħidmet il-Grupp Konġunt ta' Ħidma u biħsiebu jadotta standard għal rekwiżiti tekniċi għall-bastimenti tal-passaġġi fuq l-ilma interni.
Dan l-istandard jistabbilixxi r-rekwiżiti tekniċi uniformi meħtieġa biex jiżguraw is-sigurtà tal-bastimenti tal-passaġġi fuq l-ilma interni. Jinkludi dispożizzjonijiet dwar il-bini tal-bastimenti, l-armar u t-tagħmir għal bastimenti tal-passaġġi fuq l-ilma interni, dispożizzjonijiet speċjali fir-rigward ta’ kategoriji speċifiċi ta’ bastimenti bħal bastimenti tal-passiġġieri, konvojs imbuttati u bastimenti tal-kontejners, dispożizzjonijiet dwar l-identifikazzjoni tal-bastiment, il-mudell taċ-ċertifikati u tar-reġistru, id-dispożizzjonijiet tranżitorji kif ukoll l-istruzzjonijiet għall-applikazzjoni ta’ standard tekniku. Fil-laqgħa tiegħu tat-28 ta’ Settembru 2015, is-CESNI ddeċieda b’mod unanimu li jiskeda l-adozzjoni tal-istandard Ewropew li jistabbilixxi rekwiżiti tekniċi għal bastimenti tal-passaġġi fuq l-ilma interni għal-laqgħa tas-26 ta’ Novembru 2015. L-istandard se jkun ippreżentat għall-validazzjoni finali waqt il-laqgħa organizzata taħt l-awspiċi tas-CESNI fis-6 ta’ Novembru 2015 bil-ħsieb li jiġi adottat ftit wara. Huwa mistenni li jsir biss xi tibdil żgħir u formali fit-test. L-istandard se jkun ippubblikat permezz ta’ sit web iddedikat għal dan (cesni.eu).
Wara din l-adozzjoni, l-istandard ma jkunx ta' natura li torbot. Madankollu, dan se jservi bħala punt ta’ referenza għas-CCNR, u għal organizzazzjonijiet internazzjonali oħra, biex isir applikabbli skont l-oqfsa legali rispettivi tagħhom.
Konsegwentement, wara l-adozzjoni tas-CESNI, is-CCNR se tadatta l-qafas leġiżlattiv (ir-Regolamenti għall-Ispezzjoni ta’ Bastimenti tar-Renu) bil-ħsieb li tirreferi għall-istandard CESNI u se tiddeċiedi li tagħmel dan l-istandard mandatorju fis-sessjoni plenarja tas-CCNR.
2.LEĠIŻLAZZJONI U KOMPETENZI RILEVANTI TAL-UE
Id-Direttiva 2006/87/KE tiżgura li ċ-ċertifikati tal-Unjoni għan-navigazzjoni tal-passaġġi fuq l-ilma internti jinħarġu għal inġenji li huma konformi mar-rekwiżiti tekniċi għal bastimenti tal-passaġġi fuq l-ilma interni stabbiliti fl-Anness II ta' din id-Direttiva li għalihom ġiet stabbilita l-ekwivalenza mar-rekwiżiti tekniċi stipulati fl-applikazzjoni tal-Konvenzjoni Riveduta għan-Navigazzjoni fuq ir-Renu.
Iċ-ċertifikati maħruġa skont l-Artikolu 22 tal-Konvenzjoni Riveduta għan-Navigazzjoni fuq ir-Renu u ċ-ċertifikati għan-navigazzjoni tal-passaġġi fuq l-ilma interni tal-Unjoni huma meqjusa bħala ekwivalenti mill-aspett tar-rekwiżiti tekniċi għall-bastimenti, b’mod partikolari billi r-rekwiżiti tekniċi fi ħdan il-qafas legali tal-UE kienu bbażati fuq ir-rekwiżiti tekniċi tar-Regolamenti għall-Ispezzjoni ta’ Bastimenti tar-Renu.
Barra minn hekk, l-Artikolu 20 tad- Direttiva 2006/87/KE jipprevedi li kwalunkwe emenda tal-Anness II abbażi tal-progress tekniku jew tal-iżviluppi f’dan il-qasam li jirriżultaw minn xogħlijiet ta’ organizzazzjonijiet internazzjonali, b’mod partikolari s-CCNR, għandha tiżgura li ċ-ċertifikati maħruġa skont l-oqfsa regolatorji rispettivi jibqgħu ekwivalenti biex jiggarantixxu livell ekwivalenti ta’ sikurezza.
Għaldaqstant, kwalunkwe żvilupp li ġej minn emendi tar-rekwiżiti tekniċi fil-qafas tas-CCNR jista' jaffettwa d-Direttiva 2006/87/KE.
Barra minn hekk, fl-10 ta’ Settembru 2013, il-Kummissjoni adottat proposta għal Direttiva li tistabbilixxi r-rekwiżiti tekniċi għall-bastimenti tal-passaġġi fuq l-ilma interni u li tħassar id-Direttiva 2006/87/KE 2 attwali bħala parti mill-pakkett NAIADES II 3 . Kif imsemmi fil-premessi ta’ din il-proposta, iż-żamma ta' żewġ settijiet ta’ regoli separati għal rekwiżiti tekniċi għal bastimenti taħt żewġ sistemi legali differenti (tas-CCNR u tal-UE) li joperaw skont ir-regoli u l-proċeduri proprji tagħhom, hija diffiċli u ma tiżgurax iċ-ċertezza legali u s-sikurezza.
Il-proċedura leġiżlattiva tal-proposta msemmija hawn fuq, għamlet progress sostanzjali kemm fil-Kunsill kif ukoll fil-Parlament Ewropew. F’dan il-kuntest, feġġ kunsens kbir dwar il-ħtieġa li jiġu ssimplifikati r-regoli tekniċi li japplikaw għan-navigazzjoni tal-passaġġi fuq l-ilma interni u biex jiġu evitati duplikazzjonijiet mhux meħtieġa. L-idea li fid-Direttiva futura tiġi inkorporata referenza għal standard tekniku stabbilit taħt l-awspiċji tas-CCNR bħala mezz biex jinkisbu dawn l-objettivi ġiet aċċettata b'mod estensiv.
Il-Parlament Ewropew adotta l-pożizzjoni tiegħu fl-ewwel qari fil-15 ta’ April 2014, biex b’mod ġenerali appoġġa l-proposta tal-Kummissjoni.
Fil-Kunsill, intlaħaq l-approċċ ġenerali fil-Kunsill tat-Trasport tal-11 ta’ Ġunju 2015 li jirristruttura t-test tal-proposta tal-Kummissjoni biex tkun iżjed ċara. B’mod partikolari, l-approċċ ġenerali jipprevedi s-sostituzzjoni tal-Anness II tal-proposta li fih ir-rekwiżiti tekniċi b’referenza għal standard tekniku żviluppat fil-qafas tas-CCNR.
In-negozjati interistituzzjonali għadhom għaddejjin bil-ħsieb li jintlaħaq qbil fl-ewwel qari.
Bħala konklużjoni, l-adozzjoni tal-istandard fil-qafas tas-CCNR hija rilevanti wkoll għall-futur prevedibbli tal-iżvilupp tal-acquis f’dan il-qasam.
3.IR-RIŻULTATI TAL-KONSULTAZZJONIJIET MAL-PARTIJIET INTERESSATI
L-istandard tekniku kien is-suġġett ta’ tħejjija intensiva fil-livell tal-UE u tas-CCNR. Firxa kbira ta’ esperti mis-settur pubbliku u privat ġew ikkonsultati f’dan ir-rigward. Matul l-iżvilupp ta’ dan l-istandard saru l-laqgħat tekniċi li ġejjin:
–Fil-livell tal-Grupp ta’ Ħidma Konġunt (UE-CCNR): il-laqgħat tas-17 sal-20 ta’ Frar 2014, tat-3 sal-5 ta’ Ġunju 2014, tad-9 sal-11 ta’ Settembru 2014, tad-9 sal-11 ta’ Diċembru 2014, tas-17 sad-19 ta’ Frar 2015, tas-16 sat-18 ta’ Ġunju 2015 u tat-22 sat-23 ta’ Settembru 2015.
–Fil-livell tas-CNNR: il-laqgħat mal-Kumitat tar-Regolamenti ta’ Spezzjoni (RV) tad-9 ta’ April 2014, tal-15 ta’ April 2014 u tat-22 ta’ April 2015 kif ukoll fil-laqgħat tal-Kumitat ta’ Tħejjija (PRE) tal-11 ta’ Ġunju 2014, tat-8 ta’ Ottubru 2014, tat-3 ta’ Diċembru 2014, tal-25 ta’ Marzu 2015 u tat-3 ta’ Ġunju 2015.
–Fil-livell tas-CESNI: il-laqgħa tat-28 ta’ Settembru 2015.
Huma ppjanati aktar laqgħat tekniċi fil-21-22 ta’ Ottubru 2015 u fis-6 ta’ Novembru 2015.
Dawn il-laqgħat jippermettu li jintlaħaq ftehim fil-livell ta’ esperti dwar ir-rekwiżiti tekniċi għall-bastimenti tal-passaġġi fuq l-ilma interni.
4.IL-ĦTIEĠA GĦAL DEĊIŻJONI SKONT IT-TFUE 218(9)
L-Artikolu 218(9) tat-TFUE jistabbilixxi li "Il-Kunsill, fuq proposta tal-Kummissjoni (...) għandu jadotta deċiżjoni (...) li tistabbilixxi l-pożizzjonijiet li għandhom jiġu adottati f' isem l-Unjoni f' sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.".
Fir-rigward tal-applikabbiltà tal-Artikolu 218(9) tat-TFUE, il-proċedura ta' hemmhekk trid tiġi rispettata hekk kif il-kundizzjonijiet t'hemmhekk jiġu ssodisfati. Dawn il-kundizzjonijiet huma: (a) il-qasam rilevanti jaqa’ taħt il-kompetenza tal-Unjoni, (b) il-pożizzjoni tal-Unjoni hija espressa f’sede stabbilita bi ftehim internazzjonali meta dik is-sede tintalab tadotta (c) atti li jkollhom effetti legali. Ġie ċċarat permezz tal-ġurisprudenza li s-sħubija tal-Unjoni fis-sede relevanti mhix prerekwiżit għall-applikazzjoni tal-Artikolu 218(9) tat-TFUE.
Huwa evidenti f’dan il-każ li r-rekwiżiti tekniċi għall-bastimenti tal-passaġġi fuq l-ilma interni mhux biss jaqgħu taħt il-kompetenza tal-Unjoni (is-sikurezza tan-navigazzjoni) iżda aktar minn hekk, l-Unjoni eżerċitat il-kompetenza tagħha permezz tad-Direttiva 2006/87/KE u l-qasam tar-rekwiżiti tekniċi għall-bastimenti tal-passaġġi fuq l-ilma interni huwa rregolat fil-parti l-kbira minn regoli komuni tal-Unjoni.
Kemm is-CESNI kif ukoll is-CCNR jissodisfaw it-tieni kriterju, peress li huma korpi stabbiliti skont ftehim internazzjonali.
Għalkemm ir-regoli adottati mis-CESNI mhumiex vinkolanti fihom infushom, huwa ċar li dawn isiru vinkolanti għall-membri tas-CCNR ladarba s-CCNR tadatta l-qafas leġiżlattiv tagħha (ir-Regolamenti għall-Ispezzjoni ta’ Bastimenti tar-Renu) b'referenza għall-istandard adottat mis-CESNI u tagħmel dan l-istandard mandatorju fil-qafas tal-applikazzjoni tal-Konvenzjoni Riveduta għan-Navigazzjoni fuq ir-Renu. Il-karattru vinkolanti ta’ dan ir-Regolament fost il-membri tas-CCNR huwa stabbilit skont il-Konvenzjoni ta’ Mannheim tas-17 ta’ Ottubru 1868 4 .
Barra minn hekk, huwa ċar ukoll mill-każistika tal-Qorti tal-Ġustizzja li att mhux vinkolanti ta’ organizzazzjoni internazzjonali jista’ jiġi kkunsidrat bħala “att li jkollu effetti legali” għall-finijiet tal-applikazzjoni tal-Artikolu 218(9) tat-TFUE meta dan l-att ikun kapaċi li b’mod deċiżiv jinfluwenza l-kontenut tal-leġiżlazzjoni adottata mil-leġiżlatura tal-Unjoni. Kif spjegat hawn fuq, il-qafas applikabbli skont il-Konvenzjoni Riveduta għan-Navigazzjoni fuq ir-Renu għandu jitqies għal kull emenda tad-Direttiva 2006/87/KE. Barra minn hekk, huwa previst li l-leġiżlazzjoni tal-UE tinkludi r-Rekwiżiti Tekniċi għall-Bastimenti tal-Passaġġi fuq l-Ilma Interni adottati mis-CESNI.
Għaldaqstant, il-Kunsill adotta deċiżjoni skont l-Artikolu 218(9) tat-TFUE li tistabbilixxi l-pożizzjoni li għandha tiġi adottata f'isem l-Unjoni, l-ewwel fi ħdan is-CESNI qabel l-adozzjoni ta' standard dwar ir-rekwiżiti tekniċi għall-bastimenti tal-passaġġi fuq l-ilma interni u t-tieni fi ħdan is-CCNR qabel l-emenda tar-Regolamenti għall-Ispezzjoni tal-Bastimenti tar-Renu.
2015/0255 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata, f’isem l-Unjoni Ewropea, fil-Kumitat Ewropew għat-tfassil ta' standards fin-navigazzjoni interna (CESNI) u fis-sessjoni plenarja tal-Kummissjoni Ċentrali għan-Navigazzjoni fuq ir-Renu (is-CCNR) rigward l-adozzjoni ta’ standard dwar ir-rekwiżiti tekniċi għall-bastimenti tal-passaġġi fuq l-ilma interni
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 91(1) flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1)L-azzjoni mill-Unjoni fis-settur tan-navigazzjoni interna għandu jkollha l-għan li tiżgura uniformità fl-iżvilupp tar-rekwiżiti tekniċi għall-bastimenti tal-passaġġi fuq l-ilma interni li għandhom jiġu applikati fl-Unjoni.
(2)Il-Kumitat Ewropew għat-tfassil ta' standards fin-navigazzjoni interna (CESNI) inħoloq fit-3 ta’ Ġunju 2015 fil-qafas tal-Kummissjoni Ċentrali għan-Navigazzjoni fuq ir-Renu (is-CCNR) biex jiżviluppa standards tekniċi għall-passaġġi fuq l-ilma interni f’diversi oqsma, b’mod partikolari f’dak li jirrigwarda l-bastimenti, it-teknoloġija tal-informazzjoni u l-ekwipaġġ.
(3)Is-CESNI huwa mistenni li jadotta standard dwar ir-rekwiżiti tekniċi għall-bastimenti tal-passaġġi fuq l-ilma interni fil-laqgħa tiegħu tas-26 ta’ Novembru 2015. Is-sessjoni plenarja tas-CCNR se temenda l-qafas leġiżlattiv tagħha (ir-Regolamenti għall-Ispezzjoni ta’ Bastimenti tar-Renu) biex isir jirreferi għal dan l-istandard u se tagħmel dan l-istandard mandatorju fil-qafas tal-applikazzjoni tal-Konvenzjoni Riveduta għan-Navigazzjoni fuq ir-Renu.
(4)Dan l-istandard jistabbilixxi r-rekwiżiti tekniċi uniformi meħtieġa biex jiżguraw is-sigurtà tal-bastimenti tal-passaġġi fuq l-ilma interni. Dan jinkludi dispożizzjonijiet dwar il-bini tal-bastimenti, l-armar u t-tagħmir għal bastimenti tal-passaġġi fuq l-ilma interni, dispożizzjonijiet speċjali fir-rigward ta’ kategoriji speċifiċi ta’ bastimenti bħal bastimenti tal-passiġġieri, konvojs imbuttati u bastimenti tal-kontejners, dispożizzjonijiet dwar l-identifikazzjoni tal-bastiment, mudell ta’ ċertifikati u reġistru, dispożizzjonijiet tranżitorji kif ukoll struzzjonijiet għall-applikazzjoni ta’ standard tekniku. Id-Direttiva 2006/87/KE tal-Parlament Ewropew u tal-Kunsill 5 tiżgura li ċ-ċertifikati tal-Unjoni għan-navigazzjoni tal-passaġġi fuq l-ilma interni jinħarġu għal inġenji li huma konformi mar-rekwiżiti tekniċi għal bastimenti tal-passaġġi fuq l-ilma interni stabbiliti fl-Anness II ta' din id-Direttiva li għalihom ġiet stabbilita l-ekwivalenza mar-rekwiżiti tekniċi stipulati fl-applikazzjoni tal-Konvenzjoni Riveduta għan-Navigazzjoni fuq ir-Renu. Barra minn hekk, il-Kummissjoni, fl-10 ta’ Settembru 2013, adottat proposta għal Direttiva tal-Parlament Ewropew u tal-Kunsill li tistabbilixxi r-rekwiżiti tekniċi għall-bastimenti tal-passaġġi fuq l-ilma interni u li tħassar id-Direttiva 2006/87/KE 6 , li tipprevedi li jitqiesu l-iżviluppi li jirriżultaw f’dan il-qasam minn organizzazzjonijiet internazzjonali, b’mod partikolari dawk tas-CCNR fl-applikazzjoni tar-rekwiżiti tekniċi għall-bastimenti tal-passaġġi fuq l-ilma interni.
(5)Għalhekk, l-istandard dwar ir-rekwiżiti tekniċi għal bastimenti tal-passaġġi fuq l-ilma interni li għandu jiġi adottat taħt l-awspiċi tas-CCNR se jaffettwa d-Direttiva 2006/87/KE , kif ukoll l-iżvilupp prevedibbli tal-acquis f’dan il-qasam.
(6)L-Unjoni la hija membru tas-CESNI u lanqas tas-CCNR. Għalhekk jenħtieġ li l-Kunsill jawtorizza lill-Istati Membri biex jesprimu l-pożizzjoni tal-Unjoni fir-rigward ta’ dan l-istandard f’dawn il-korpi.
ADOTTA DIN ID-DEĊIŻJONI:
Artikolu 1
1.Il-pożizzjoni li għandha tiġi adottata f’isem l-Unjoni fil-laqgħa tas-CESNI tas-26 ta’ Novembru 2015 għandha tkun li taqbel mal-adozzjoni tal-istandard Ewropew li jistabbilixxi rekwiżiti tekniċi għall-bastimenti tal-passaġġi fuq l-ilma interni.
2.Il-pożizzjoni li għandha tiġi adottata f’isem l-Unjoni fil-laqgħa tas-sessjoni plenarja tas-CCNR tkun li taqbel mal-emenda tar-Regolamenti għall-Ispezzjoni tal-Bastimenti tar-Renu intiża li tirreferi għall-istandard Ewropew li jistabbilixxi r-rekwiżiti tekniċi għall-bastimenti tal-passaġġi fuq l-ilma interni adottat mis-CESNI.
Artikolu 2
1.Il-pożizzjoni tal-Unjoni kif stipulata fl-Artikolu 1(1) għandha tiġi espressa mill-Istati Membri li huma membri tas-CESNI billi jaġixxu b’mod konġunt fl-interess tal-Unjoni.
2.Il-pożizzjoni tal-Unjoni kif stipulata fl-Artikolu 1(2) għandha tiġi espressa mill-Istati Membri li huma membri tas-CCNR, billi jaġixxu b’mod konġunt fl-interess tal-Unjoni.
Artikolu 3
Bidliet minuri għal din il-pożizzjoni kif imniżżla fl-Artikolu 1 jistgħu jiġu miftiehma mingħajr il-bżonn ta' emendi.
Artikolu 4
Din id-Deċiżjoni tidħol fis-seħħ fil-jum tal-adozzjoni tagħha.
Magħmul fi Brussell,
Għall-Kunsill
Il-President