52015DC0090

1. Introduzzjoni

Ir-Regolament (KE) Nru 177/2008[1] (minn hawn ’il quddiem imsejjaħ “ir-Regolament BR”) jistabbilixxi qafas komuni għar-reġistri kummerċjali għal finijiet tal-istatistika. Dan daħal fis-seħħ fil-25 ta’ Marzu 2008 u ħassar ir-Regolament (KEE) Nru 2186/93[2] (minn hawn ’il quddiem imsejjaħ “Ir-Regolament BR imħassar”).

L-għan tar-Regolament BR huwa li:

· fl-Istati Membri jkun hemm reġistri kummerċjali għall-istatistika ta' kwalità għolja u armonizzati;

· u statistika mtejba li għandha x’taqsam mal-globalizzazzjoni.

Għal dawn ir-raġunijiet, ir-Regolament BR jitlob lill-Istati Membri:

· jieħdu l-miżuri kollha meħtieġa sabiex jiżguraw il-kwalità tar-reġistri kummerċjali tagħhom;

· jittrażmettu lill-Eurostat id-dejta dwar il-gruppi ta’ intrapriżi multinazzjonali u l-unitajiet kostitwenti tagħhom.

Fuq medda twila ta’ żmien, it-titjib fil-kwalità tar-reġistri kummerċjali għall-istatistika huwa mistenni li jnaqqas l-ispejjeż għall-produzzjoni tal-istatistika tan-negozju u l-piż amministrattiv fuq dawk li jwieġbu. Madankollu, fuq perjodu ta’ żmien qasir u medju, l-implimentazzjoni ta’ dan ir-Regolament BR timplika xi spejjeż inizjali għal Istituti Nazzjonali tal-Istatistika u xi żieda modesta fil-piż amministrattiv, sabiex jintlaħqu l-livelli ta’ kwalità u ta’ armonizzazzjoni meħtieġa biex jinkisbu l-benefiċċji mixtieqa.

Skont l-Artikolu 6 tar-Regolament BR qed jintalab rapport mill-Kummissjoni lill-Parlament Ewropew u lill-Kunsill dwar l-implimentazzjoni ta' dan ir-Regolament, “li jkun jitratta b'mod partikolari l-ispiża għas-sistema statistika, il-piż fuq il-kummerċ u l-benefiċċji”.

Dan ir-rapport jeżamina l-iktar aspetti importanti tal-implimentazzjoni tar-Regolament BR fir-rigward tal-miżuri meħuda mill-Kummissjoni (Eurostat) u l-impatt tar-Regolament BR dwar:

· l-ispiża għall-Istituti Nazzjonali tal-Istatistika u l-Eurostat (is-sistema tal-istatistika);

· il-piż amministrattiv fuq dawk li jwieġbu;

· il-benefiċċji f’dak li għandu x'jaqsam mal-kwalità tar-reġistri kummerċjali għall-istatistika u għall-kejl imtejjeb statistiku tal-fenomenu tal-globalizzazzjoni.

It-twaqqit tar-rapport huwa relatat mat-tħejjija li għaddejja bħalissa ta' Regolament Qafas simplifikat u inklużiv li Jintegra l-Istatistika tan-Negozju u l-pjanijiet konsegwenti li jiġu mħassra diversi Regolamenti, fosthom ir-Regolament BR.

2. Ir-Regolament BR f’daqqa t’għajn

L-Istati Membri kollha tal-Unjoni Ewropea (UE) iżommu reġistri kummerċjali għall-finijiet tal-istatistika. Ir-Regolament BR jistabbilixxi qafas komuni għal dawn ir-reġistri billi identifika mod unitarju ta' kif għandhom jiġu avviċinati, fost l-oħrajn, l-aspetti li ġejjin: id-definizzjoni ta’ unitajiet, il-kopertura, l-aġġornament, il-karatteristiċi, u l-kwalità tar-reġistri kummerċjali.

L-aspetti li ġejjin għandhom jiġu kkunsidrati meta jkun qed jiġi analizzat dan is-suġġett:

· Ir-reġistri kummerċjali jikkostitwixxu riżorsa kruċjali għall-ippjanar adegwat, it-tmexxija u l-koordinazzjoni ta’ stħarriġ statistiku, minħabba li għal għażla effiċjenti ta’ kampjuni jinħtieġ qafas ta’ stħarriġ kummerċjali aġġornat;

· L-iżvilupp u l-istandardizzazzjoni tar-reġistri kummerċjali, li barra li jiżgura l-kwalità tagħhom, jista' jikkontribwixxi b’mod sinifikanti għat-titjib tal-kwalità tar-riżultati tal-istatistika;

· Hemm bżonn ta' qafas komuni għall-armonizzazzjoni tar-reġistri kummerċjali għall-istatistika nazzjonali sabiex tiġi prodotta statistika kummerċjali u ekonomika uffiċjali, li hija konsistenti u kumparabbli kemm madwar il-pajjiżi kollha u kif ukoll madwar id-dominji tal-istatistika kollha;

· L-istandardizzazzjoni tar-reġistri kummerċjali u tal-użu tagħhom huwa prerekwiżit indispensabbli għall-integrazzjoni tad-dejta.

Meta mqabbel mar-Regolament BR imħassar, ir-Regolament BR jitratta b'mod aktar profond il-konsolidazzjoni ta’ qafas komuni għall-armonizzazzjoni ta’ reġistri nazzjonali. Huwa jestendi wkoll ir-rekwiżiti biex il-varjabbli addizzjonali jiġu koperti, notevolment fuq livell ta’ grupp ta’ intrapriżi, u b’hekk jirrifletti l-ħolqien tas-suq uniku u l-globalizzazzjoni dejjem għaddejja tal-ekonomija kif ukoll l-approfondiment tal-integrazzjoni ta’ attivitajiet f’setturi differenti.

Ir-Regolament BR ippermetta l-ħolqien tar-Reġistru tal-EuroGroups (EGR) bħala għodda ta’ statistika utli li tipprovdi informazzjoni dwar ir-relazzjonijiet ta’ kontroll kollha fi ħdan gruppi multinazzjonali ta’ intrapriżi.

Il-proċess EGR jikkonsisti fi fluss kumpless ta’ settijiet ta’ dejta differenti bejn l-Eurostat u l-Istati Membri, li jinvolvi l-Istituti Nazzjonali tal-Istatistika, il-Banek Ċentrali Nazzjonali u l-Bank Ċentrali Ewropew.

Barra minn hekk, ir-Regolament BR jintroduċi dispożizzjonijiet relatati mal-iskambju ta’ dejta kunfidenzjali dwar il-gruppi ta’ intrapriżi multinazzjonali u l-unitajiet kostitwenti tagħhom bejn il-Kummissjoni (Eurostat) u l-Istituti Nazzjonali tal-Istatistika tal-Istati Membri, u bejn il-Kummissjoni (Eurostat) u l-banek ċentrali.

Il-Regolament BR jestendi l-kopertura tar-reġistri kummerċjali għall-istatistika sabiex kemm jista' jkun possibbli, ikun jista’ jaqbad lill-intrapriżi kollha li huma attivi fl-ekonomija nazzjonali. Din hija r-raġuni għala r-Regolament BR jintroduċi l-inklużjoni obbligatorja ta’ dawn is-sezzjonijiet tan-NACE Rev. 2 fir-reġistri kummerċjali:

· A – Agrikoltura, forestrija u sajd

· O – Amministrazzjoni pubblika u difiża; assigurazzjoni soċjali obbligatorja

Id-definizzjoni ta’ unitajiet tal-istatistika fir-Regolament BR hija l-istess waħda li tingħata fir-Regolament tal-Kunsill (KEE) Nru 696/93 tal-15 ta’ Marzu 1993 dwar l-unitajiet tal-istatistika għall-osservazzjoni u l-analiżi tas-sistema ta’ produzzjoni fil-Komunità[3] (minn hawn ’il quddiem "ir-Regolament dwar l-Unitajiet tal-Istatistika"). Ir-Regolament BR jelenka l-unitajiet tal-istatistika li jridu jiġu rreġistrati fir-reġistri kummerċjali: unità legali, unità lokali, intrapriża, grupp ta’ intrapriżi. Id-definizzjonijiet tar-Regolament dwar l-Unitajiet tal-Istatistika ma ġewx implimentati b’mod korrett fl-Istati Membri kollha. L-Eurostat u l-Istituti Nazzjonali tal-Istatistika qed ikomplu jaħdmu id f'id biex jiksbu implimentazzjoni armonizzata tal-unitajiet tal-istatistika.

3. Miżuri li jiffaċilitaw l-implimentazzjoni

Sabiex l-implimentazzjoni tar-Regolament BR żgur isseħħ, ġie żviluppat sett ta’ miżuri biex l-Istati Membri jkollhom appoġġ matul il-proċess.

Regolamenti li jappoġġjaw l-implimentazzjoni

Żewġ Regolamenti tal-Kummissjoni ġew adottati biex jikkontribwixxu għall-implimentazzjoni tar-Regolament BR:

(1) Ir-Regolament tal-Kummissjoni (KE) Nru 192/2009 tal-11 ta' Marzu 2009 li jimplimenta r-Regolament (KE) Nru 177/2008 tal-Parlament Ewropew u tal-Kunsill li jistabbilixxi qafas komuni għar-reġistri kummerċjali għall-finijiet tal-istatistika fir-rigward tal-iskambju ta' dejta kunfidenzjali bejn il-Kummissjoni (Eurostat) u l-Istati Membri[4]: li jistabbilixxi l-format, il-miżuri ta' sigurtà u kunfidenzjalità kif ukoll il-proċedura għat-trażmissjoni tad-dejta dwar unitajiet individwali lill-Kummissjoni (Eurostat) u d-dejta dwar gruppi ta' intrapriżi multinazzjonali lill-awtoritajiet nazzjonali kompetenti. Id-dejta se tiġi trażmessa b’mezzi elettroniċi u l-Kummissjoni (Eurostat) se tapplowdjaha permezz tal-punt ta’ dħul tad-dejta uniku tagħha. Il-Kummissjoni (Eurostat) u l-awtoritajiet nazzjonali kompetenti jżommu l-informazzjoni kunfidenzjali kif speċifikat mill-awtoritajiet nazzjonali, f'żona kkontrollata sikura u b’aċċess ristrett.

(2) Ir-Regolament tal-Kummissjoni (KE) Nru 1097/2010 tas-26 ta' Novembru 2010 li jimplimenta r-Regolament (KE) Nru 177/2008 tal-Parlament Ewropew u tal-Kunsill li jistabbilixxi qafas komuni għar-reġistri kummerċjali għall-finijiet tal-istatistika fir-rigward tal-iskambju ta' dejta kunfidenzjali bejn il-Kummissjoni (Eurostat) u l-Istati Membri[5]: li jistabbilixxi l-format, il-miżuri ta’ sigurtà u ta’ kunfidenzjalità u l-proċedura għat-trażmissjoni ta’ dejta, esklussivament għall-finijiet tal-istatistika, bejn il-Kummissjoni (Eurostat) u l-banek ċentrali nazzjonali, u bejn il-Kummissjoni u l-Bank Ċentrali Ewropew. L-iskambju tad-dejta jrid jiġi awtorizzat b'mod espliċitu mill-awtorità nazzjonali kompetenti.

Derogi

L-Artikolu 14 tar-Regolament BR jistipola li meta r-reġistri kummerċjali jkunu jeħtieġu bidliet kbar, il-Kummissjoni tista’ tagħti deroga fuq talba ta' Stat Membru għal perjodu tranżitorju li ma għandux jeċċedi l-25 ta’ Marzu 2010. Għall-agrikoltura, forestrija u sajd, għall-amministrazzjoni pubblika u għad-difiża, u għas-sigurtà soċjali obbligatorja, u għall-karatteristiċi addizzjonali relatati ma’ gruppi ta’ intrapriża, il-Kummissjoni tista’ tagħti deroga fuq talba ta’ Stat Membru għal perjodu tranżitorju li ma għandux ikun itwal mill-25 ta’ Marzu 2013. B’kollox, ingħataw derogi lil 15-il Stat Membru li t-talbiet tagħhom kienu ġġustifikati u bbażati fuq bżonn leġittimu. Dan iż-żmien addizzjonali ppermetta lill-Istati Membri jadattaw aktar is-sistemi tagħhom ta’ statistika nazzjonali biex dawn jibdew jikkonformaw aktar ma’ dan ir-Regolament BR.

Manwal ta' Rakkomandazzjonijiet BR

B’konformità mal-Artikolu 7 tar-Regolament BR, il-Kummissjoni ppubblikat Manwal ta' Rakkomandazzjonijiet għar-reġistri kummerċjali, li jispjega r-raġunament li fuqu huma bbażati d-dispożizzjonijiet tar-Regolament BR biex ikun hemm interpretazzjoni korretta u konsistenti fl-Istati Membri kollha. Għal dan il-għan, il-Manwal ta' Rakkomandazzjonijiet BR li diġà jeżisti ġie aġġornat b’kooperazzjoni mill-qrib bejn l-Eurostat u l-Istati Membri, u l-verżjoni l-ġdida tiegħu ġiet ippubblikata fil-1 ta’ Marzu 2010. Dan jinkludi:

(i) Il-punti bażiċi: L-objettivi, l-unitajiet, il-kontenut u l-aċċess (il-Kapitoli 1-10);

(ii) Id-demografija tal-unità: Il-bidliet u l-kontinwità (il-Kapitoli 11-16, 21-22);

(iii) Il-kontenut: L-aġġornamenti u l-iżvilupp (il-Kapitoli 17-20);

(iv) Il-linji gwida għal oqsma speċifiċi (il-Kapitoli 23-24);

(v) L-ispeċifikazzjonijiet għall-iskambju tad-dejta bejn l-Eurostat u l-Istati Membri;

(vi) Il-glossarju għar-reġistri kummerċjali.

Billi tidentifika u tirrakkomanda prattiki tajba, il-verżjoni l-ġdida tal-Manwal ta' Rakkomandazzjonijiet BR hija għodda li permezz tagħha se jinkisbu soluzzjonijiet aħjar għall-interpretazzjoni korretta u konsistenti tar-Regolament.

Sostenn finanzjarju għall-Istati Membri

Sabiex tiġi ffaċilitata l-implimentazzjoni ta’ dan ir-Regolament BR, l-Eurostat ta appoġġ lill-Istati Membri fil-forma ta' għotjiet biex huma jkunu jistgħu jiżviluppaw is-sistemi nazzjonali tagħhom.

Taħriġ għall-Istati Membri

Programmi ta’ taħriġ dwar ir-reġistri kummerċjali għall-istatistika organizzati mill-Eurostat kienu mezz ieħor ta' kif l-Istati Membri ġew appoġġati matul il-proċess ta’ implimentazzjoni.

4. Evalwazzjoni tal-implimentazzjoni tar-Regolament BR

Is-sors ewlieni ta’ informazzjoni dwar l-implimentazzjoni tar-Regolament BR huwa l-istħarriġ annwali li l-Eurostat iwettaq fi 30 pajjiż (l-Istati Membri u ż-żewġ pajjiżi tal-EFTA – CH u NO). B’mod ġenerali, l-istħarriġ annwali jkopri l-aktar l-aspetti kwalitattivi tal-implimentazzjoni u b’mod partikolari l-oqsma li ġejjin:

· Is-sorsi użati għall-aġġornament tar-reġistri kummerċjali;

· It-tipi ta’ unitajiet irreġistrati (b’mod partikolari l-unità legali, l-intrapriża, l-unità lokali u l-grupp ta' intrapriżi);

· L-għadd ta’ unitajiet irreġistrati;

· Il-kopertura f’dak li għandu x'jaqsam ma' NACE Rev.2;

· Ir-reġistrazzjoni tal-“karatteristiċi” (varjabbli wżati fir-reġistri kummerċjali u elenkati fl-Anness tar-Regolament BR).

Kien previst li t-titjib importanti fil-kwalità, li huwa l-objettiv ewlieni tar-Regolament BR, se jżid l-ispejjeż għal Istituti Nazzjonali tal-Istatistika u l-piż amministrattiv fuq dawk li jwieġbu. Kien mistenni li dan l-effett jista’ jkun differenti ħafna minn pajjiż għal ieħor, minħabba l-istadju ta’ żvilupp differenti ta’ kull reġistru nazzjonali.

Fl-2013, fil-kwestjonarju ġew inklużi mistoqsijiet ad hoc addizzjonali dwar l-ispejjeż għas-sistema tal-istatistika u l-piż fuq in-negozji relatati mal-implimentazzjoni tar-Regolament BR.

Sakemm ma jiġix indikat mod ieħor, il-kontenut tas-sezzjonijiet li ġejjin jirriżulta mill-istħarriġijiet annwali (it-tweġibiet taż-żewġ pajjiżi tal-EFTA inklużi) kif ukoll minn xi dokumenti amministrattivi dwar l-għotjiet li ġew mogħtija mill-Eurostat għall-Istati Membri.

4.1. Spejjeż għas-sistema tal-istatistika

4.1.1. L-ispejjeż imġarrba mill-Istituti Nazzjonali tal-Istatistika tal-pajjiżi li wieġbu

L-ispejjeż għas-Sistema Ewropea tal-Istatistika biex topera r-reġistri kummerċjali tagħha għal sena waħda, u l-ispejjeż supplimentari li jirriżultaw mill-bidliet tar-Regolament BR jistgħu jiġu stmati biss b'mod approssimattiv u ħafna mill-pajjiżi jew ipprovdew biss informazzjoni parzjali jew ma setgħu jipprovdu ebda ċifra.

Dan huwa spjegat, fost l-oħrajn, mill-fatt li l-armonizzazzjoni tar-reġistri kummerċjali għall-istatistika huwa proċess twil u gradwali li kien inbeda bir-Regolament BR imħassar u li għadu għaddej s'issa.

Għal ħafna pajjiżi (18) ma kienx possibbli li l-ispejjeż assoċjati mal-implimentazzjoni ta’ dan ir-Regolament BR jiġu iżolati b’mod preċiż minn ġabra akbar ta’ spejjeż ġenerali (eż. id-disinn mill-ġdid b'mod globali tas-sistema tal-IT, persunal kondiviż bejn diversi dominji eċċ.). Xi pajjiżi kienu diġà wettqu l-iżviluppi ta’ reġistri kummerċjali nazzjonali b'mod individwali u għalhekk kienu diġà konformi mar-Regolament BR meta dan daħal fis-seħħ.

Skont l-Istitut Nazzjonali tal-Istatistika, in-nefqiet prinċipali jirreferu kemm għall-iżviluppi tal-IT meħtieġa sabiex tinkiseb konformità mar-Regolament BR kif ukoll għal spejjeż addizzjonali tal-persunal.

Inkisbet indikazzjoni aħjar f'dak li għandu x'jaqsam mal-kwalità. It-30 pajjiż kollha wieġbu u r-riżultati globali wrew li f’madwar 75 % tal-każijiet l-ispiża ta' implimentazzjoni tar-Regolament BR ġiet stmata bħala jew xejn, jew negliġibbli jew moderata, filwaqt li l-impatt kien deskritt bħala sostanzjali f’madwar kwart tal-każijiet biss. Xi Stati Membri indikaw li l-implimentazzjoni tar-Regolament BR ma rriżultat f'ebda spiża addizzjonali minħabba li huma kienu diġà ssodisfaw ir-rekwiżiti qabel ma saret din l-implimentazzjoni.

Tabella 1: L-istimi tal-ispejjeż mill-Istituti Nazzjonali tal-Istatistika

Stima tal-ispejjeż || Għadd ta’ pajjiżi || Perċentwal ta’ unitajiet legali koperti (stħarriġ tal-2013)

Xejn jew negliġibbli || 16 || 54.0%

Moderati || 7 || 18.8 %

Sostanzjali || 7 || 27.2 %

Ħafna pajjiżi ħassew li l-implimentazzjoni tar-Regolament BR la naqqset l-ispejjeż għat-tnedija tal-istħarriġ (28 minn 30 pajjiż) u lanqas il-ħin meħtieġ għal dan l-istħarriġ (29 pajjiż).

4.1.2. Appoġġ finanzjarju mogħti mill-Eurostat

Il-Kummissjoni pprovdiet fondi ta' appoġġ lill-Istati Membri wara li qieset l-istadji differenti tal-iżvilupp tar-reġistri kummerċjali għall-istatistika fl-Istati Membri u l-ispejjeż involuti fl-implimentazzjoni ta’ dan ir-Regolament BR. Dawn għandhom jittieħdu inkunsiderazzjoni meta tiġi evalwata l-ispiża globali tas-sistema tal-istatistika.

Il-biċċa l-kbira tal-proġetti kienu mmirati lejn l-istabbiliment jew it-tfassal mill-ġdid tar-reġistru kummerċjali, u/jew it-titjib tal-kopertura tiegħu.

Il-fokus tal-għotjiet tal-2008 – 2013 kien fuq l-iżvilupp tar-reġistri kummerċjali nazzjonali sabiex itejbu l-komunikazzjoni tagħhom mal-EGR. L-għanijiet ġenerali ta’ dawn l-għotjiet kienu kif ġej:

· L-iżvilupp u l-ittestjar tat-tqabbil tad-dejta tal-EGR mar-reġistri kummerċjali nazzjonali;

· Definizzjoni ta’ preferenzi nazzjonali u r-regoli ta’ prijorità għall-EGR;

· L-interazzjoni bejn ir-reġistru tal-EGR ċentrali u l-ambjenti tar-reġistri nazzjonali tal-istatistika kummerċjali;

· L-iżvilupp u l-implimentazzjoni ta’ metodi u għodda għall-EGR fuq livell nazzjonali.

Ammonti totali ta’ għotjiet mogħtija lill-Istati Membri[6]:

Is-sena || Ammont imħallas (EUR) || Qasam prinċipali fejn ingħata l-appoġġ

2008 || 352 850 || Il-kwalità, l-iżvilupp tas-sistema (sors u proċessi)

2009 || 370 793 || Il-kwalità, l-iżvilupp tas-sistema (proċessi)

2010 || 440 579 || L-iżvilupp tas-sistema (proċessi)

2011 || 354 765 || Il-kopertura, l-iżvilupp tas-sistema (sors u proċessi)

2012 || 66 937 || L-iżvilupp tas-sistema (proċessi)

2013 || 606 366 || L-iżvilupp tas-sistema (sors u proċessi)

Ammont totali mħallas || 2 192 290

L-ammonti msemmija hawn fuq ikkontribwixxew għat-titjib tal-kapaċità tar-reġistri kummerċjali nazzjonali li jipprovdu informazzjoni dwar il-gruppi ta’ intrapriżi multinazzjonali lill-EGR.

L-Istati Membri rċevew ukoll appoġġ biex jimplimentaw mod aktar effiċjenti ta' kif għandha tintuża d-dejta li diġà teżisti fl-ekonomija permezz tas-simplifikazzjoni tal-ġbir tad-dejta sabiex jiġi evitat piż doppju fuq in-negozji u t-titjib fil-kwalità tal-informazzjoni statistika. Dan sar permezz ta’: ġbir ta’ dejta onlajn, l-integrazzjoni awtomatizzata tad-dejta minn reġistri differenti, esportazzjoni awtomatika tad-dejta statistika mill-kontijiet tal-kumpaniji għall-kwestjonarji elettroniċi eċċ.

4.2. Piż fuq in-negozji

Iż-żieda inizjali mistennija f'termini ta' piż fuq in-negozji varjat ħafna minn pajjiż għal ieħor u kien pjuttost diffiċli li titkejjel. L-aktar sejba importanti u inkoraġġanti kien li l-piż fl-ebda każ ma laħaq livell li jiġġenera problemi kbar għal dawk li jwieġbu.

Il-maġġoranza l-kbira tal-Istituti Nazzjonali tal-Istatistika li wieġbu kienu kapaċi jipprovdu biss valutazzjonijiet kwalitattivi.

L-Istituti Nazzjonali tal-Istatistika ma rrapportaw ebda żieda fil-piż amministrattiv fuq in-negozji, għal madwar 70 % tal-unitajiet legali koperti mill-istħarriġ. Ir-Regolament BR saħansitra naqqas il-piżijiet għal żewġ pajjiżi.

L-istitut nazzjonali tal-istatistika ħassew li għal madwar 30 % tal-unitajiet legali l-implimentazzjoni tar-Regolament BR żiedet il-piż fuq in-negozji b'mod moderat.

Kien hemm każijiet ta’ pajjiżi fejn il-piż żdied fl-ewwel snin ta’ implimentazzjoni tar-Regolament, minħabba l-fatt li l-kopertura settorjali ġiet estiża u kif ukoll minħabba l-bżonn li jiġu koperti varjabbli addizzjonali fuq livell tal-gruppi tal-intrapriżi.

Tabella 2: Valutazzjoni mill-Istituti Nazzjonali tal-Istatistika tal-bidla fil-piż:

Valutazzjoni globali mill-Istituti Nazzjonali tal-Istatistika dwar il-bidla fil-piż fuq in-negozji || Bidla fil-piż fuq in-negozji || Għadd ta’ pajjiżi || Perċentwal ta’ unitajiet legali koperti

- (piż imnaqqas) || 2 || 5.7 %

0 (ebda bidla) || 18 || 63.5 %

+ (piż li żdied b’mod moderat) || 10 || 30.7 %

+ + (piż li żdied b’mod sostanzjali) || 0 || -

Kważi fil-pajjiżi kollha (29) ir-Regolament BR ma kellu ebda impatt fuq l-għadd ta’ stħarriġ indirizzati lin-negozji u fuq is-simplifikazzjoni ta’ dawk eżistenti. 23 pajjiż wieġbu li l-ebda mistoqsija addizzjonali ma kellha tiġi inkluża fl-istħarriġ eżistenti.

4.3. Il-benefiċċji tar-Regolament BR (fil-livell nazzjonali u fil-livell tal-ESS)

L-implimentazzjoni tar-Regolament BR sfat ta' benefiċċju għall-kwalità tar-reġistri kummerċjali għall-istatistika u ppermettiet avvanz importanti lejn il-kejl statistiku tal-globalizzazzjoni.

Il-benefiċċji ewlenin fil-livell nazzjonali rrapportati mill-Istituti Nazzjonali tal-Istatistika jistgħu jitqassru kif ġej:

· aktar preċiżjoni tad-dejta fid-dominji individwali tal-istatistika (9 pajjiżi)

· koordinazzjoni bejn id-diversi oqsma tal-istatistika (13-il pajjiż)

· stampa aktar kompleta dwar l-intrapriżi pubbliċi (7 pajjiżi)

· kontribut għal reġistru ta’ gruppi ta’ intrapriżi nazzjonali (19-il pajjiż)

· armonizzazzjoni fil-qasam tal-gruppi ta’ intrapriżi (15-il pajjiż)

· għodod imtejba għal skopijiet analitiċi (7 pajjiżi)

· għodod imtejba għat-tqassim tad-dejta (żewġ pajjiżi)

Barra minn hekk, l-implimentazzjoni tar-Regolament BR implikat użu aktar effiċjenti ta’ sorsi amministrattivi għal 15-il pajjiż, wasslet għal użu aktar estensiv ta’ sorsi kummerċjali għal 7 pajjiżi, u rriżultat f'użu ta’ riżorsi amministrattivi addizzjonali għal 13-il pajjiż.

Xi pajjiżi enfasizzaw il-fatt li minħabba l-informazzjoni dwar gruppi ta’ intrapriżi kien possibbli li tiġi kkumpilata statistika kummerċjali dwar affiljati barranin interni abbażi ta’ dejta li kienet diġà disponibbli, u b'hekk ma kienu meħtieġa ebda stħarriġ/mistoqsijiet addizzjonali.

L-aktar benefiċċju rilevanti tar-Regolament BR kien fil-livell tas-Sistema Ewropea tal-Istatistika kollha kemm hi. L-iżvilupp tal-EGR huwa pass kruċjali għall-iżvilupp ta’ statistika preċiża u komparabbli dwar l-intrapriżi Ewropej u għall-produzzjoni ta’ statistika dwar il-globalizzazzjoni.

Minħabba f'dan ir-Regolament BR u l-inklużjoni ta’ informazzjoni dwar il-kontroll tal-unitajiet legali fir-reġistri kummerċjali wasalna f'punt fejn l-istruttura ta’ gruppi ta' intrapriżi multinazzjonali li joperaw fl-UE u l-partijiet nazzjonali tagħhom bħalissa qiegħdha mmapjata jew fir-reġistri kummerċjali nazzjonali jew fir-Reġistri tal-EuroGroups reġistri, u l-Istati Membri stabbilixxew proċeduri biex jikkooperaw biex itejjbu l-kwalità tad-dejta.

Benefiċċji oħra rriżultaw minn żieda fil-koerenza u fl-armonizzazzjoni fil-livell tas-Sistema Ewropea tal-Istatistika. Abbażi tar-Regolament BR passi importanti tal-iżvilupp jinkludu l-ħidma fuq proġetti għall-irbit tal-mikrodejta u l-ħażna tad-dejta, u t-tnedija tal-European Profiling (Analiżi Ewropea) ta’ gruppi ta’ intrapriżi kbar u kumplessi.

Kwistjonijiet addizzjonali

Meta tiddefinixxi intrapriża (il-biċċa l-kbira tal-istatistika kummerċjali tirreferi għall-unità statistika), il-biċċa l-kbira tal-Istati Membri jiffukaw fuq l-unità legali biss. Din il-prattika għandha impatt negattiv fuq ir-rilevanza, l-eżattezza u l-komparabbiltà tal-istatistika Ewropea kummerċjali minħabba li tirriżulta f'diskrepanza dejjem tikber bejn ir-realtà ekonomika u d-deskrizzjoni statistika tagħha (eż. l-għadd ta’ intrapriżi huwa stmat iżżejjed).

Ir-Regolament BR beda proċess kollaborattiv, li estenda lil hinn mill-interazzjoni tas-soltu bejn il-Kummissjoni (Eurostat) u l-Istati Membri; Tinħtieġ wkoll koordinazzjoni u kooperazzjoni b’saħħitha fost l-Istati Membri fl-oqsma tal-komunikazzjoni, il-kondiviżjoni ta’ esperjenzi u l-prattiki ta’ ħidma. Barra minn hekk, ir-Regolament witta t-triq għal użu aktar effiċjenti u estensiv ta’ sorsi amministrattivi u l-esplojtazzjoni ta’ sorsi amministrattivi u kummerċjali addizzjonali.

Riżultat ieħor tal-implimentazzjoni tar-Regolament BR kien il-pubblikazzjoni tal-'Manwal ta’ rakkomandazzjonijiet BR' bħala għodda li tinkoraġġixxi t-titjib fil-kwalità, fil-konsistenza u fil-komparabbiltà tal-prinċipji u l-kontenut tar-reġistri kummerċjali fl-Istati Membri. Il-manwal ġie aġġornat b'koperazzjoni mill-qrib mal-Istati Membri.

Żviluppi oħrajn

Bħalissa għaddejja ħidma fi ħdan is-Sistema Ewropea tal-Istatistika għall-promozzjoni ta' implimentazzjoni konsistenti tar-Regolament dwar l-Unitajiet tal-Istatistika madwar l-Istati Membri kollha. Dan jinkludi ħidma fuq approċċ komuni għat-trattament ta’ gruppi ta’ intrapriżi multinazzjonali.

Ir-Regolament BR stabbilixxa l-bażi għal sistema aktar preċiża u komparabbli ta’ reġistri kummerċjali għall-istatistika, u dan ikkontribwixxa għal żieda fil-konsistenza u fil-kwalità tal-informazzjoni mogħtija. Dan ix-xogħol għadu ma tlestiex imma għadu għaddej bit-tisħiħ tal-funzjonijiet kruċjali tar-reġistri kummerċjali previsti fir-Regolament Qafas li Jintegra l-Istatistika tan-Negozju. L-għan huwa li jingħataw il-prerekwiżiti għal integrazzjoni orizzontali u vertikali ta’ dejta statistika dwar in-negozji u li titwitta t-triq għal tnaqqis tal-piż għan-negozji u l-ispejjeż għall-Istituti Nazzjonali tal-Istatistika.

5. Konklużjonijiet

Minkejja li d-diffikultajiet li jinqalgħu f'dak li għandu x'jaqsam mal-implimentazzjoni tad-definizzjoni tal-intrapriża skont ir-Regolament dwar l-Unitajiet tal-Istatistika jaffettwaw l-implimentazzjoni ta’ dan ir-Regolament BR, ir-riżultat ġenerali huwa valutazzjoni pożittiva tal-implimentazzjoni tar-Regolament BR meta wieħed iqis il-bilanċ bejn il-benefiċċji rilevanti fuq naħa u l-ispejjeż moderati għas-sistema u l-piż fuq in-negozju fuq in-naħa l-oħra.

[1]               Ir-Regolament (KE) Nru 177/2008 tal-Parlament Ewropew u tal-Kunsill tal-20 ta' Frar 2008 li jistabbilixxi qafas komuni għar-reġistri kummerċjali għall-finijiet tal-istatistika u li jħassar ir-Regolament tal-Kunsill (KEE) Nru 2186/93. ĠU L 61, 5.3.2008, p. 6.

[2]               Ir-Regolament tal-Kunsill (KEE) Nru 2186/93 tat-22 ta' Lulju 1993 dwar il-koordinament tal-Komunità fit-tfassil tar-reġistri kummerċjali għall-finijiet tal-istatistika ĠU L 196, 5.8.1993, p.1.

[3]               ĠU L 76, 30.3.1993, p.1.

[4]               ĠU L 67, 12.3.2009, p. 14.

[5]               ĠU L 312, 27.11.2010, p. 1.

[6]               Għal aktar informazzjoni dettaljata dwar l-Istati Membri li rċevew appoġġ finanzjarju mill-Eurostat u dwar l-ammonti eżatti mħallsa, jekk jogħġbok irreferi għall-Anness ta' dan ir-rapport

ANNESS

Ħarsa ġenerali lejn l-appoġġ finanzjarju lill-Istati Membri fil-perjodu 2008-2013

Pajjiż || Is-sena || Ammont (f’EUR) || Qasam prinċipali ta’ appoġġ

Il-Belġju || 2009 || 30,950 || żvilupp tas-sistema (proċessi)

|| 2010 || 118,803 || żvilupp tas-sistema (proċessi)

|| 2011 || 52,849 || żvilupp tas-sistema (proċessi)

|| Total || 202,602 ||

Il-Bulgarija || 2008 || 6,379 || kwalità

|| 2009 || 7,142 || kwalità u żvilupp tas-sistema (proċessi)

|| 2011 || 42,244 || kopertura u żvilupp tas-sistema (proċessi)

|| Total || 55,765 ||

Ċipru || 2008 || 6,166 || żvilupp tas-sistema (proċessi)

Ir-Repubblika Ċeka || 2008 || 12,948 || kwalità u żvilupp tas-sistema (proċessi)

Id-Danimarka || 2008 || 14,962 || kwalità u żvilupp tas-sistema (sors u proċessi)

|| 2009 || 25,460 || kwalità u żvilupp tas-sistema (proċessi)

|| 2010 || 28,847 || żvilupp tas-sistema (proċessi)

|| 2011 || 57,740 || żvilupp tas-sistema (proċessi)

|| Total || 127,009 ||

L-Estonja || 2008 || 3,840 || kwalità u żvilupp tas-sistema (proċessi)

Il-Finlandja || 2008 || 25,542 || żvilupp tas-sistema (proċessi)

|| 2009 || 38,118 || kwalità u żvilupp tas-sistema (proċessi)

|| 2010 || 36,470 || żvilupp tas-sistema (proċessi)

|| 2011 || 43,164 || żvilupp tas-sistema (proċessi)

|| Total || 143,295 ||

Franza || 2008 || 18,762 || żvilupp tas-sistema (proċessi)

|| 2009 || 5,883 || żvilupp tas-sistema (proċessi)

|| 2010 || 18,247 || żvilupp tas-sistema (proċessi)

|| 2013 || 209,271 || żvilupp tas-sistema (sors u proċessi)

|| Total || 252,163 ||

Il-Ġermanja || 2008 || 101,182 || kwalità u żvilupp tas-sistema (sors u proċessi)

|| 2009 || 47,317 || żvilupp tas-sistema (proċessi)

|| 2010 || 46,467 || żvilupp tas-sistema (proċessi)

|| 2012 || 66,937 || żvilupp tas-sistema (proċessi)

|| 2013 || 90,309 || żvilupp tas-sistema (sors u proċessi)

|| Total || 352,212 ||

L-Ungerija || 2009 || 18,794 || żvilupp ta’ sistema (proċessi)

|| 2011 || 49,298 || żvilupp tas-sistema (sors u proċessi)

|| Total || 68,092 ||

L-Irlanda || 2009 || 12,996 || żvilupp tas-sistema (proċessi)

Il-Latvja || 2008 || 5,941 || żvilupp tas-sistema (proċessi)

|| 2009 || 6,962 || żvilupp tas-sistema (proċessi)

|| Total || 12,903 ||

Il-Litwanja || 2008 || 2,686 || żvilupp tas-sistema (proċessi)

|| 2009 || 8,843 || żvilupp tas-sistema (proċessi)

|| Total || 11,529 ||

Matla || 2008 || 3,134 || żvilupp tas-sistema (proċessi)

Il-Pajjiżi l-Baxxi || 2008 || 20,411 || kwalità u żvilupp tas-sistema (sors u proċessi)

|| 2009 || 43,283 || żvilupp tas-sistema (proċessi)

|| Total || 63,695 ||

Il-Polonja || 2008 || 14,366 || kwalità u żvilupp tas-sistema (proċessi)

|| 2010 || 24,126 || żvilupp tas-sistema (proċessi)

|| 2013 || 25,070 || żvilupp tas-sistema (proċessi)

|| Total || 63,561 ||

Il-Portugall || 2008 || 32,501 || kwalità u żvilupp tas-sistema (sors u proċessi)

|| 2009 || 36,724 || żvilupp tas-sistema (proċessi)

|| 2010 || 102,814 || żvilupp tas-sistema (proċessi)

|| 2013 || 69,861 || żvilupp tas-sistema (proċessi)

|| Total || 241,900 ||

Ir-Rumanija || 2008 || 8,723 || żvilupp tas-sistema (proċessi)

|| 2009 || 6,062 || żvilupp tas-sistema (proċessi)

|| 2011 || 33,491 || żvilupp tas-sistema (proċessi)

|| Total || 48,276 ||

Is-Slovakkja || 2008 || 7,687 || żvilupp tas-sistema (proċessi)

|| 2009 || 20,712 || żvilupp tas-sistema (proċessi)

|| 2013 || 151,242 || żvilupp tas-sistema (proċessi)

|| Total || 179,641 ||

Is-Slovenja || 2011 || 59,511 || żvilupp tas-sistema (sors u proċessi)

|| 2013 || 22,017 || żvilupp tas-sistema (proċessi)

|| Total || 81,528 ||

Spanja || 2008 || 5,851 || kwalità u żvilupp tas-sistema (proċessi)

|| 2013 || 38,597 || żvilupp tas-sistema (proċessi)

|| Total || 44,448 ||

L-Isvezja || 2008 || 25,179 || żvilupp tas-sistema (proċessi)

|| 2009 || 45,311 || żvilupp tas-sistema (proċessi)

|| 2010 || 64,805 || żvilupp tas-sistema (proċessi)

|| Total || 135,295 ||

Ir-Renju Unit || 2008 || 36,590 || kwalità u żvilupp tas-sistema (sors u proċessi)

|| 2009 || 16,235 || żvilupp tas-sistema (proċessi)

|| 2011 || 16,468 || żvilupp tas-sistema (proċessi)

|| Total || 69,293 ||

Total tal-UE || 2008 || 352,850 ||

|| 2009 || 370,793 ||

|| 2010 || 440,579 ||

|| 2011 || 354,765 ||

|| 2012 || 66,937 ||

|| 2013 || 606,366 ||

|| Total || 2,192,290 ||