EUR-Lex Access to European Union law
This document is an excerpt from the EUR-Lex website
Document 52015AA0007
Opinion No 7/2015 (pursuant to Articles 287(4), second subparagraph, and 322(2) of the TFEU) concerning a proposal for a Council Regulation amending Regulation (EU, Euratom) No 609/2014 on the methods and procedure for making available the traditional, VAT and GNI-based own resources and on the measures to meet cash requirements
Opinjoni Nru 7/2015 (skont l-Artikolu 287(4), it-tieni subparagrafu, u l-Artikolu 322(2) tat-TFUE) dwar proposta għal Regolament tal-Kunsill li jemenda r-Regolament (UE, Euratom) Nru 609/2014 dwar il-metodi u l-proċedura li jintużaw biex jitqiegħdu għad-dispożizzjoni r-riżorsi proprji tradizzjonali, dawk ibbażati fuq il-VAT u dawk ibbażati fuq l-ING u dwar il-miżuri li jissodisfaw il-ħtiġijiet fi flus kontanti
Opinjoni Nru 7/2015 (skont l-Artikolu 287(4), it-tieni subparagrafu, u l-Artikolu 322(2) tat-TFUE) dwar proposta għal Regolament tal-Kunsill li jemenda r-Regolament (UE, Euratom) Nru 609/2014 dwar il-metodi u l-proċedura li jintużaw biex jitqiegħdu għad-dispożizzjoni r-riżorsi proprji tradizzjonali, dawk ibbażati fuq il-VAT u dawk ibbażati fuq l-ING u dwar il-miżuri li jissodisfaw il-ħtiġijiet fi flus kontanti
ĠU C 5, 8.1.2016, p. 1–5
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
|
8.1.2016 |
MT |
Il-Ġurnal Uffiċjali tal-Unjoni Ewropea |
C 5/1 |
OPINJONI Nru 7/2015
(skont l-Artikolu 287(4), it-tieni subparagrafu, u l-Artikolu 322(2) tat-TFUE)
dwar proposta għal Regolament tal-Kunsill li jemenda r-Regolament (UE, Euratom) Nru 609/2014 dwar il-metodi u l-proċedura li jintużaw biex jitqiegħdu għad-dispożizzjoni r-riżorsi proprji tradizzjonali, dawk ibbażati fuq il-VAT u dawk ibbażati fuq l-ING u dwar il-miżuri li jissodisfaw il-ħtiġijiet fi flus kontanti
(2016/C 5/01)
WERREJ
|
|
Paragrafu |
Paġna |
|
INTRODUZZJONI |
1 — 4 |
2 |
|
RIMARKI ĠENERALI |
5 |
2 |
|
RIMARKI SPEĊIFIĊI |
6 — 23 |
3 |
|
Il-bilanċ riportat kull xahar ta' wieħed mill-porzjon ta' tnax mir-riżorsi proprji bbażati fuq il-VAT u fuq l-ING |
6 — 8 |
3 |
|
Simplifikazzjoni tal-aġġustamenti annwali tar-riżorsi proprji bbażati fuq il-VAT u fuq l-ING |
9 — 11 |
3 |
|
Tiġi posposta l-preskrizzjoni tad-data tal-ING fir-raba' sena wara sena finanzjarja partikolari |
12 — 14 |
3 |
|
Bidliet fl-imgħax fuq l-ammonti li jkunu saru disponibbli tard |
15 — 17 |
4 |
|
L-Istati Membri jkunu jistgħu jinħelsu mir-responsabbiltà finanzjarja f'każijiet ta' dħul differit fil-kontijiet jew notifika differita tad-dejn doganali sabiex ma jiġux ippreġudikati l-investigazzjonijiet kriminali |
18 — 20 |
4 |
|
Żieda fil-livell limitu għall-ammonti irrekuperabbli li għandhom jiġu rrappurtati |
21 — 23 |
4 |
|
KONKLUŻJONI |
24 |
5 |
IL-QORTI TAL-AWDITURI TAL-UNJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea (TFUE), u b'mod partikolari l-Artikolu 287(4), it-tieni subparagrafu, u l-Artikolu 322(2) tiegħu,
Wara li kkunsidrat il-proposta tal-Kummissjoni (1),
Wara li kkunsidrat it-talba tal-Kunsill għal opinjoni dwar il-proposta msemmija hawn fuq, li waslet għand il-Qorti tal-Awdituri fit-22 ta' Settembru 2015,
Wara li kkunsidrat l-opinjonijiet preċedenti li l-Qorti tal-Awdituri tat dwar is-sistema tar-riżorsi proprji tal-Komunitajiet Ewropej (2),
ADOTTAT L-OPINJONI LI ĠEJJA:
INTRODUZZJONI
|
1. |
Fl-14 ta' Settembru 2015, il-Kummissjoni adottat proposta għal Regolament tal-Kunsill, li jemenda r-Regolament tal-Kunsill (UE, Euratom) Nru 609/2014 (3) dwar il-metodi u l-proċedura li jintużaw biex jitqiegħdu għad-dispożizzjoni r-riżorsi proprji tradizzjonali, dawk ibbażati fuq il-VAT u dawk ibbażati fuq l-ING u dwar il-miżuri li jissodisfaw il-ħtiġijiet fi flus kontanti. |
|
2. |
Ir-Regolament (UE, Euratom) Nru 609/2014 se jissostitwixxi r-Regolament tal-Kunsill (KE, Euratom) Nru 1150/2000 (4) u se jidħol fis-seħħ fl-istess jum tad-dħul fis-seħħ tad-Deċiżjoni tal-Kunsill 2014/335/UE, Euratom (5), ladarba din id-Deċiżjoni tkun ġiet approvata mill-Istati Membri kollha skont ir-rekwiżiti kostituzzjonali rispettivi tagħhom (6). Għalhekk, il-modifiki proposti ma jirreferux għar-regoli li huma attwalment fis-seħħ u lanqas ma għandhom impatt fuqhom. |
|
3. |
Ir-Regolament (UE, Euratom) Nru 609/2014 jistabbilixxi r-regoli li jintużaw biex jitqiegħdu għad-dispożizzjoni r-riżorsi proprji (inklużi ż-żmien speċifiku għad-disponibbiltà, l-aġġustamenti, l-imgħax fuq l-ammonti li jkunu saru disponibbli tard u l-ammonti irrekuperabbli) u l-miżuri li jissodisfaw il-ħtiġijiet tal-Kummissjoni fi flus kontanti. Huwa jinkludi wkoll arranġamenti prattiċi oħra rigward il-konservazzjoni tad-dokumenti ta' sostenn mill-Istati Membri, il-kooperazzjoni amministrattiva fir-rigward tal-informazzjoni pprovduta mill-Istati Membri u r-regoli dwar il-kontijiet li għandhom jinżammu mill-Istati Membri għar-riżorsi proprji. |
|
4. |
Il-bidliet l-aktar sinifikanti proposti mill-Kummissjoni huma dawn li ġejjin:
|
RIMARKI ĠENERALI
|
5. |
Fl-Opinjonijiet Nru 7/2014, Nru 2/2012, Nru 2/2008 u Nru 2/2006 tagħha, il-Qorti esprimiet tħassib dwar il-kumplessità u n-nuqqas ta' trasparenza tas-sistema tar-riżorsi proprji għall-finanzjament tal-baġit tal-UE. Il-modifiki proposti ma jbiddlux b'mod sinifikanti s-sistema stabbilita; huma sempliċiment jindirizzaw elementi tal-proċess li jintuża biex jitqiegħdu għad-dispożizzjoni l-ammonti mitluba. Xi wħud mill-bidliet proposti jistgħu jindirizzaw il-ħtiġijiet tal-Kummissjoni fir-rigward ta' likwidità u ta' ġestjoni ta' flus kontanti. Il-Qorti tinnota wkoll li xi wħud mill-bidliet proposti jindirizzaw punti li tqajmu mill-Qorti fl-opinjonijiet, ir-rapporti annwali u r-rapporti speċjali preċedenti tagħha. |
RIMARKI SPEĊIFIĊI
Il-bilanċ riportat kull xahar ta' wieħed mill-porzjon ta' tnax mir-riżorsi proprji bbażati fuq il-VAT u fuq l-ING
|
6. |
Skont ir-Regolament (UE, Euratom) Nru 609/2014 il-Kummissjoni tista' tistieden lill-Istati Membri iressqu 'l quddiem b'xahar jew xahrejn fl-ewwel tliet xhur tas-sena finanzjarja d-dħul ta' parti waħda minn tnax tal-ammonti fil-baġit għar-riżorsa proprja bbażata fuq il-VAT u r-riżorsa proprja bbażata fuq l-ING. Fil-prattika dan ifisser li l-Kummissjoni tista' tressaq 'il quddiem żewġ partijiet minn tnax matul l-ewwel tliet xhur. Il-Kummissjoni għandha tinnotifika lill-Istati Membri bil-quddiem, mhux aktar tard minn ġimagħtejn qabel id-dħul rikjest. |
|
7. |
Il-Kummissjoni tipproponi li żżid l-ammont li jista' jitressaq 'il quddiem minn żewġ partijiet minn tnax għal tliet partijiet minn tnax, u li testendi l-perjodu mill-ewwel tliet xhur għall-ewwel sitt xhur tas-sena finanzjarja. Qed jinżamm il-limitu ta' ġimagħtejn għan-notifika lill-Istati Membri. Fil-prattika, il-Kummissjoni se tkun tista' tressaq 'il quddiem sa tliet partijiet minn tnax fi kwalunkwe żmien matul l-ewwel sitt xhur tas-sena finanzjarja, b'notifika minima ta' ġimagħtejn għall-Istati Membri. |
|
8. |
Il-Qorti tqis li l-Kummissjoni għandha tkun tista' titlob il-flus kontanti meħtieġa biex tiffinanzja t-talbiet għal pagament fi żmien debitu. Madankollu, billi talbiet bħal dawn jistgħu joħolqu diffikultajiet fil-likwidità fl-Istati Membri, il-Kummissjoni għandha tiżviluppa sistema biex tippjana aħjar il-ħtiijiet tagħha fi flus kontanti u żżid iż-żmien minimu ta' notifika għal talbiet ta' partijiet addizzjonali minn tnax. |
Simplifikazzjoni tal-aġġustamenti annwali għar-riżorsi proprji bbażati fuq il-VAT u fuq l-ING
|
9. |
Skont l-Artikolu 10 tar-Regolament (KE, Euratom) Nru 1150/2000, l-aġġustament (7) għar-riżorsi proprji bbażati fuq il-VAT u fuq l-ING iseħħ kull sena fl-ewwel jum tax-xogħol ta' Diċembru. Dawn l-aġġustamenti jvarjaw minn sena għal oħra u jistgħu jkunu pożittivi (pagamenti addizzjonali meħtieġa mill-Istati Membri) jew negattivi (ammonti li jridu jitħallsu lura lill-Istati Membri). Dawn l-aġġustamenti jistgħu jirriżultaw f'ammonti għolja ħafna. Għalhekk, il-Kunsill adotta r-Regolament (UE, Euratom) Nru 1377/2014, li jemenda r-Regolament (KE, Euratom) Nru 1150/2000, li jippermetti li, f'ċirkostanzi eċċezzjonali, l-Istati Membri (b'effett retroattiv mit-30 ta' Novembru 2014) jagħmlu disponibbli l-aġġustamenti sal-ewwel jum tax-xogħol ta' Settembru tas-sena ta' wara. Fl-Opinjoni Nru 7/2014 tagħha l-Qorti nnutat li din il-modifika tista' żżid il-kumplessità tas-sistema tar-riżorsi proprji. |
|
10. |
Skont din il-proposta, il-Kummissjoni se tikkalkula l-aġġustamenti tal-VAT u tal-ING (8) u se tinnotifika formalment l-ammonti finali lill-Istati Membri f'Jannar tas-sena n + 1. Fl-istess ħin il-Kummissjoni se tipprovdi kalkolu għar-ridistribuzzjoni tal-ammont totali tal-aġġustamenti fost l-Istati Membri, skont is-sehem rispettiv tagħhom tal-ING tal-Istati Membri kollha tal-baġit tas-sena n + 1. |
|
11. |
Skont din il-proposta mhuwiex meħtieġ baġit emendatorju u l-Kummissjoni tnaqqas l-impatt fuq il-ħtiġijiet tal-Istati Membri fi flus kontanti rigward il-ħlas tal-ammonti relatati mal-aġġustamenti (9). Hija tippermetti wkoll li jkun hemm aħtar żmien bejn id-data tan-notifika (qabel l-1 ta' Frar) u l-mument meta l-Istati Membri jkollhom jagħmlu disponibbli l-ammonti (l-1 ta' Ġunju), biex b'hekk titnaqqas l-inċertezza baġitarja u tal-likwidità fl-Istati Membri. Il-Qorti tqis li din il-proposta hija pass 'il quddiem fis-simplifikazzjoni tas-sistema tar-riżorsi proprji. |
Tiġi posposta l-preskrizzjoni tad-data tal-ING fir-raba' sena wara sena finanzjarja partikolari
|
12. |
Skont ir-Regolament (UE, Euratom) Nru 609/2014, bidliet fid-data tal-ING jistgħu jitqiesu biss sat-30 ta' Settembru tar-raba' sena wara sena finanzjarja partikolari. |
|
13. |
Il-Kummissjoni tipproponi li testendi din l-iskadenza sat-30 ta' Novembru tar-raba' sena wara sena finanzjarja partikolari. |
|
14. |
Billi d-data tal-ING tiġi pprovduta mill-Istati Membri fit-22 ta' Settembru (10), il-Kummissjoni jista' ma jkollhiex biżżejjed żmien biex tivvalutaha qabel ma din issir preskritta. Għalhekk il-Qorti tilqa' l-estensjoni proposta. |
Bidliet fl-imgħax fuq l-ammonti li jkunu saru disponibbli tard
|
15. |
Ir-Regolament (UE, Euratom) Nru 609/2014 jipprevedi rata bażika (rata prinċipali ta' finanzjament mill-ġdid tal-BĊE — jew ta' banek ċentrali nazzjonali li mhumiex fiż-żona tal-euro), miżjuda b'2 punti perċentwali bl-addizzjoni ta' żieda varjabbli ta' 0,25 punti perċentwali għall kull xahar ta' dewmien. Ir-rata hija applikabbli għall-perjodu kollu ta' dewmien (mid-data dovuta sad-data meta l-ammont jiġi finalment ikkreditat fil-kontijiet tal-Kummissjoni). |
|
16. |
Il-proposta tal-Kummissjoni tgħolli ż-żieda minn 2 punti perċentwali għal 3,5 filwaqt li żżomm iż-żieda ta' kull xahar ta' 0,25 punti perċentwali. Minbarra dan, hija tipproponi li tillimita l-massimu tat-total taż-żidiet għal 20 punt perċentwali. |
|
17. |
Il-Qorti tqis li għandu jinstab bilanċ bejn l-inċentiv għall-Istati Membri biex jikkonformaw mal-obbligi ta' pagament tagħhom u l-prinċipju tal-proporzjonalità fl-applikazzjoni tal-imgħax fuq l-ammonti li jkunu saru disponibbli tard. Għalhekk, il-Qorti tilqa' l-proposta li jkun hemm limitu fuq iż-żieda massima tar-rata tal-imgħax. |
L-Istati Membri jkunu jistgħu jinħelsu mir-responsabbiltà finanzjarja f'każijiet ta' dħul differit fil-kontijiet jew notifika differita tad-dejn doganali sabiex ma jiġux ippreġudikati l-investigazzjonijiet kriminali
|
18. |
Skont l-Artikolu 13(2) tar-Regolament (UE, Euratom) Nru 609/2014 l-Istati Membri għandhom jinħelsu mill-obbligu li jpoġġu għad-dispożizzjoni tal-Kummissjoni l-ammonti li jikkorrispondu għal intitolamenti stabbiliti ta' riżorsi proprji tradizzjonali li jirriżultaw bħala irrekuperabbli minħabba (a) raġunijiet ta' force majeure jew (b) raġunijiet oħra li ma jistgħux jiġu attribwiti lilhom. |
|
19. |
Il-Kummissjoni tipproponi li jiżdied paragrafu addizzjonali li jgħid li l-Istati Membri għandhom ukoll jinħelsu mill-obbligu li jpoġġu l-ammonti għad-dispożizzjoni tagħha f'sitwazzjonijiet fejn ikun meħtieġ li d-dħul fil-kontijiet jew in-notifika tad-dejn jiġu ddifferiti sabiex ma tiġix ippreġudikata investigazzjoni kriminali. Dan il-ħelsien mill-obbligu għandu jsir biss meta jiġu ssodisfati tliet kundizzjonijiet (11). |
|
20. |
Fil-fehma tal-Qorti din l-introduzzjoni hija konformi ma' referenza simili fil-Kodiċi Doganali tal-Unjoni (12) u tista' tippermetti li l-Istati Membri jipproteġu aħjar l-interess finanzjarju tal-UE. Madankollu, ma hemm l-ebda armonizzazzjoni dwar id-definizzjoni ta' reat (u għalhekk ta' investigazzjoni kriminali) fl-Istati Membri. Barra minn hekk, il-Qorti tqis li l-kundizzjonijiet proposti iħallu wisq lok għal interpretazzjoni. |
Żieda fil-livell limitu għall-ammonti irrekuperabbli li għandhom jiġu rrappurtati
|
21. |
Skont ir-Regolament (UE, Euratom) Nru 609/2014, l-Istati Membri għandhom jipprovdu lill-Kummissjoni b'rapport li jinkludi informazzjoni dwar il-każijiet li jitqiesu irrekuperabbli għal intitolamenti stabbiliti li jaqbżu l-EUR 50 000 (13). |
|
22. |
Il-Kummissjoni tipproponi li sabiex jitnaqqas il-piż amministrattiv fuq is-servizzi tagħha u fil-livell tal-Istati Membri, il-livell limitu għandu jiġi rduppjat għal EUR 100 000. |
|
23. |
Il-Qorti tilqa' din il-bidla u tinnota li l-livell limitu ilu ma jiġi rivedut mill-2004 'l hawn (14). Il-Kummissjoni kkalkulat il-livell limitu l-ġdid ibbażat fuq data storika, bil-ħsieb li jitnaqqas il-piż amministrattiv mingħajr ma jiġu pperikolati żżejjed l-ammonti involuti. Il-Qorti tinnota wkoll li l-Kummissjoni tkun għadha tista' tivvaluta każijiet matul l-ispezzjonijiet annwali fl-Istati Membri. |
KONKLUŻJONI
|
24. |
Il-bidliet proposti għar-Regolament (UE, Euratom) Nru 609/2014 għandhom itejbu s-sitwazzjoni attwali fir-rigward tal-proċeduri li jintużaw biex jitqiegħdu għad-dispożizzjoni l-ammonti tar-riżorsi proprji. |
Din l-opinjoni ġiet adottata mill-Awla IV, immexxija mis-Sur Milan Martin CVIKL, Membru tal-Qorti tal-Awdituri, fil-Lussemburgu fil-laqgħa tagħha tal-11 ta' Novembru 2015.
Għall-Qorti tal-Awdituri
Vítor Manuel da SILVA CALDEIRA
President
(1) COM(2015) 447 final tal-14 ta' Settembru 2015.
(2) L-Opinjonijiet Nru 7/2014 (ĠU C 459, 19.12.2014, p. 1), Nru 2/2012 (ĠU C 112, 18.4.2012, p. 1), Nru 2/2008 (ĠU C 192, 29.7.2008, p. 1), Nru 2/2006 (ĠU C 203, 25.8.2006, p. 50), Nru 4/2005 (ĠU C 167, 7.7.2005, p. 1) u Nru 7/2003 (ĠU C 318, 30.12.2003, p. 1).
(3) Ir-Regolament tal-Kunsill (UE, Euratom) Nru 609/2014 tas-26 ta' Mejju 2014 dwar il-metodi u l-proċedura li jintużaw biex jitqiegħdu għad-dispożizzjoni r-riżorsi proprji tradizzjonali, dawk ibbażati fuq il-VAT u dawk ibbażati fuq l-ING u dwar il-miżuri li jissodisfaw il-ħtiġijiet fi flus kontanti (ĠU L 168, 7.6.2014, p. 39).
(4) Ir-Regolament tal-Kunsill (KE, Euratom) Nru 1150/2000 tat-22 ta' Mejju 2000 li jimplimenta d-Deċiżjoni 2007/436/KE, Euratom dwar is-sistema tar-riżorsi proprji tal-Komunitajiet Ewropej (ĠU L 130, 31.5.2000, p. 1) kif emendat l-aħħar bir-Regolament (UE, Euratom) Nru 1377/2014 (ĠU L 367, 23.12.2014, p. 14).
(5) Id-Deċiżjoni tal-Kunsill 2014/335/UE, Euratom tas-26 ta' Mejju 2014 dwar is-sistema tar-riżorsi proprji tal-Unjoni Ewropea (ĠU L 168, 7.6.2014, p. 105).
(6) Id-Deċiżjoni 2014/335/UE, Euratom u r-Regolament (UE, Euratom) Nru 609/2014 se japplikaw b'mod retroattiv mill-1 ta' Jannar 2014.
(7) Kull sena l-Istati Membri jridu jipprovdu aġġornamenti tad-data tagħhom tal-VAT u l-ING għas-snin li jkunu għadhom suġġetti għal bidla (erba' snin) jew jindirizzaw il-punti li jkunu taħt riżerva. Il-Kummissjoni tuża din l-informazzjoni biex tikkalkola mill-ġdid il-kontribuzzjonijiet tal-VAT u tal-ING mill-Istati Membri għas-snin preċedenti.
(8) Abbażi tad-data tal-VAT u l-ING għas-sena n – 1 u snin preċedenti trażmessa mill-Istati Membri lill-Kummissjoni fis-sena n skont l-Artikolu 7(1) tar-Regolament tal-Kunsill (KEE, Euratom) Nru 1553/89 tad-29 ta' Mejju 1989 dwar l-arranġamenti uniformi definittivi għall-ġbir ta' riżorsi proprji li jakkumulaw mit-taxxa tal-valur miżjud (ĠU L 155, 7.6.1989, p. 9) u l-Artikolu 2(2) tar-Regolament tal-Kunsill (KE, Euratom) Nru 1287/2003 tal-15 ta' Lulju 2003 fuq l-armonizzazzjoni tad-dħul gross nazzjonali bi prezzijiet tas-suq (Regolament GNI) (ĠU L 181, 19.7.2003, p. 1).
(9) Ma jkun hemm l-ebda impatt fil-baġit u fil-kontijiet tal-Kummissjoni. L-Istati Membri jkunu jeħtieġu jħallsu (jew jirċievu) biss l-ammonti kkalkulati b'kont meħud tas-sehem rispettiv tal-ING.
(10) Ara l-Artikolu 2(2) tar-Regolament (KE, Euratom) Nru 1287/2003.
(11) Il-kundizzjonijiet huma dawn li ġejjin:
|
(a) |
l-investigazzjonijiet kriminali jkunu ġustifikati sabiex jipproteġu l-interessi finanzjarji tal-Unjoni; |
|
(b) |
l-investigazzjonijiet kriminali jsiru b'mod diliġenti; |
|
(c) |
taxxi u dazji nazzjonali ma jkunux suġġetti għal trattament aktar favorevoli mill-intitolamenti irrekuperabbli. |
(12) Ara l-Artikolu 102(3) u l-Artikolu 105(6)tar-Regolament (UE) Nru 952/2013 tal-Parlament Ewropew u tal-Kunsill tad-9 ta' Ottubru 2013 li jistabbilixxi l-Kodiċi Doganali tal-Unjoni (ĠU L 269, 10.10.2013, p. 1).
(13) Dan jirreferi għall-entrati fil-kotba li jitħassru mill-kontijiet tar-riżorsi proprji tradizzjonali bħala irrekuperabbli. Il-Kummissjoni tanalizza l-każijiet u tivvaluta jekk il-kundizzjonijiet tal-Artikolu 13(2) tar-Regolament (UE, Euratom) Nru 609/2014 japplikawx biex l-Istati Membri jkunu jistgħu jinħelsu mill-obbligu li jqiegħdu l-ammonti kkonċernati għad-dispożizzjoni tal-Kummissjoni.
(14) Ara l-Artikolu 1(13) tar-Regolament tal-Kunsill (KE, Euratom) Nru 2028/2004 tas-16 ta' Novembru 2004 li jemenda r-Regolament (KE, Euratom) Nru 1150/2000 li jimplimenta d-Deċiżjoni 94/728/KE, Euratom dwar is-sistema tar-riżorsi proprji tal-Komunitajiet (ĠU L 352, 27.11.2004, p. 1).