52014PC0628

MEMORANDUM TA’ SPJEGAZZJONI

1.           IL-KUNTEST TAL-PROPOSTA

Ir-raġunijiet għall-proposta u l-għanijiet tagħha

Il-proposta tikkonċerna l-applikazzjoni tar-Regolament tal-Kunsill (KE) Nru 1005/2008 tad-29 ta' Settembru 2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat (IUU), u li jemenda r-Regolamenti (KEE) Nru 2847/93, (KE) Nru 1936/2001 u (KE) Nru 601/2004 u li jħassar ir-Regolamenti (KE) Nru 1093/94 u (KE) Nru 1447/1999[1] (ir-Regolament IUU).

Il-kuntest ġenerali

Din il-proposta qiegħda ssir fil-kuntest tal-implimentazzjoni tar-Regolament IUU u hija r-riżultat ta' proċeduri ta’ investigazzjoni u ta' djalogu li saru skont ir-rekwiżiti sostantivi u proċedurali stabbiliti fir-Regolament IUU li jipprevedi inter alia li l-pajjiżi kollha għandhom jaqdu dawk li huma l-obbligi tagħhom skont id-dritt internazzjonali bħala Stat tal-bandiera, tal-port, kostali jew tas-suq biex jimpedixxu, jiskoraġġixxu u jeliminaw is-sajd IUU.

Id-dispożizzjonijiet eżistenti fil-qasam tal-proposta

Id-Deċiżjoni tal-Kummissjoni tal-15 ta’ Novembru 2012 (ĠU C 354 17.11.2012, p.1-47) dwar in-notifika lill-pajjiżi terzi li l-Kummissjoni tqis bħala possibbli li jiġu identifikati bħala pajjiżi terzi li ma jikkooperawx, skont ir-Regolament tal-Kunsill (KE) Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat.

Id-Deċiżjoni ta' Implimentazzjoni tal-Kummissjoni DATE MONTH 2014 (ĠU C XXXX, XX.XX.2014, p …) li tidentifika l-pajjiżi terzi li l-Kummissjoni tqis bħala pajjiżi terzi li ma jikkooperawx skont ir-Regolament tal-Kunsill (KE) Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat.

Il-konsistenza ma’ politiki u miri oħra tal-Unjoni

Mhux applikabbli.

2.           IR-RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Konsultazzjoni mal-partijiet interessati

Il-partijiet interessati kkonċernati fil-proċediment kellhom il-possibbiltà li jiddefendu l-interessi tagħhom matul il-proċeduri ta' investigazzjoni u ta' djalogu, skont id-dispożizzjonijiet tar-Regolament IUU.

Il-ġbir u l-użu ta' għarfien espert

Ma kienx hemm bżonn ta’ għarfien espert estern.

Valutazzjoni tal-impatt

Din il-proposta hi r-riżultat tal-implimentazzjoni tar-Regolament IUU.

Ir-Regolament IUU ma jinkludix dispożizzjonijiet għall-valutazzjoni ġenerali tal-impatt iżda fih lista eżawrjenti ta’ kundizzjonijiet li jridu jiġu vvalutati.

3.           ELEMENTI LEGALI TAL-PROPOSTA

Sommarju tal-azzjoni proposta

Fil-15 ta’ Novembru 2012 il-Kummissjoni, bid-Deċiżjoni tal-Kummissjoni, innotifikat tmien pajjiżi terzi (il-Beliże, ir-Renju tal-Kambodja, ir-Repubblika tal-Gżejjer Fiġi, ir-Repubblika tal-Ginea, ir-Repubblika tal-Panama, ir-Repubblika Demokratika Soċjalista tax-Sri Lanka, ir-Repubblika tat-Togo u r-Repubblika tal-Vanwatu) li l-Kummissjoni tikkunsidra bħala possibbli li jiġu identifikati bħala pajjiżi li ma jikkooperawx skont ir-Regolament IUU.

Il-Kummissjoni bdiet démarches fir-rigward tat-tmien pajjiżi. Dawn id-démarches kienu jikkonsistu inter alia minn azzjonijiet li jipprovdu raġunijiet għall-azzjonijiet tagħha, opportunità għall-pajjiżi biex iwieġbu u jirrifjutaw, id-dritt li jitolbu u jipprovdu informazzjoni addizzjonali, il-pjanijiet ta' azzjoni proposti bħala rimedju għas-sitwazzjoni kif ukoll żmien biżżejjed biex iwieġbu u żmien raġonevoli biex jirranġaw is-sitwazzjoni.

Fil-DATE MONTH 2014 il-Kummissjoni, bid-Deċiżjoni ta’ Implimentazzjoni tal-Kummissjoni, identifikat lis-Sri Lanka bħala pajjiż terz li l-Kummissjoni tqis bħala pajjiżi terz li ma jikkooperax skont ir-Regolament IUU.

Il-proposta mehmuża għal Deċiżjoni ta’ Implimentazzjoni tal-Kunsill hija bbażata fuq is-sejbiet li kkonfermaw li s-Sri Lanka naqset milli taqdi dawk li huma l-obbligi tagħha skont id-dritt internazzjonali bħala Stat tal-bandiera, tal-port, kostali jew tas-suq.

Għalhekk, qed ikun propost li l-Kunsill jadotta l-proposta mehmuża għal Deċiżjoni.

Il-bażi legali

Ir-Regolament tal-Kunsill (KE) Nru 1005/2008 tad-29 ta' Settembru 2008 jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat (IUU).

Il-prinċipju tas-sussidjarjetà

Il-proposta taqa' fil-kompetenza esklussiva tal-Unjoni Ewropea. Għalhekk, il-prinċipju tas-sussidjarjetà ma japplikax.

Il-prinċipju tal-proporzjonalità

Il-proposta hija konformi mal-prinċipju tal-proporzjonalità għar-raġunijiet li ġejjin:

Il-forma ta' azzjoni hi deskritta fir-Regolament IUU u ma tħalli l-ebda ambitu għal deċiżjoni nazzjonali.

L-indikazzjoni ta' kif il-piż finanzjarju u amministrattiv li jkollha ġġor l-Unjoni, il-gvernijiet nazzjonali, l-awtoritajiet reġjonali u lokali, l-operaturi ekonomiċi u ċ-ċittadini jitnaqqas kemm jista' jkun u jkun proporzjonat mal-mira tal-proposta mhux applikabbli.

L-għażla tal-istrumenti

Strumenti proposti: deċiżjoni.

Mezzi oħra ma jkunux adegwati għar-raġuni li ġejja:

Mezzi oħra ma jkunux adegwati minħabba li r-Regolament bażiku ma jipprevedix għażliet alternattivi.

4.           IMPLIKAZZJONI BAĠITARJA

Il-proposta ma għandha l-ebda implikazzjoni għall-baġit tal-Unjoni.

2014/0294 (NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

li temenda l-lista ta’ pajjiżi terzi li ma jikkooperawx fil-ġlieda kontra s-sajd IUU skont ir-Regolament (KE) Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (KE) Nru 1005/2008 tad-29 ta’ Settembru 2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat, li jemenda r-Regolamenti (KEE) Nru 2847/93, (KE) Nru 1936/2001 u (KE) Nru 601/2004 u li jirrevoka r-Regolamenti (KE) Nru 1093/94 u (KE) Nru 1447/1999[2], u b’mod partikolari l-Artikolu 33 tiegħu,

Wara li kkunsidra l-proposta mressqa mill-Kummissjoni Ewropea,

Billi:

1.           INTRODUZZJONI

(1)       Ir-Regolament (KE) Nru 1005/2008 (ir-Regolament IUU) jistabbilixxi sistema tal-Unjoni li tipprevjeni, tiskoraġġixxi u telimina sajd illegali, mhux irrappurtat u mhux irregolat (IUU).

(2)       Il-Kapitolu VI tar-Regolament IUU jistabbilixxi l-proċedura fir-rigward tal-identifikazzjoni ta’ pajjiżi terzi li ma jikkooperawx, proċeduri fir-rigward ta’ pajjiżi identifikati bħala pajjiżi terzi li ma jikkooperawx, l-istabbiliment ta’ lista ta’ pajjiżi li ma jikkooperawx, it-tneħħija mil-lista ta’ pajjiżi li ma jikkooperawx, il-pubbliċità tal-lista ta’ pajjiżi li ma jikkooperawx u kwalunkwe miżura ta’ emerġenza.

(3)       Skont l-Artikolu 32 tar-Regolament IUU il-Kummissjoni nnotifikat permezz ta’ Deċiżjoni tal-15 ta’ Novembru 2012[3] (“Deċiżjoni tal-15 ta’ Novembru 2012”) tmien pajjiżi terzi dwar il-possibbiltà li huma jiġu identifikati bħala pajjiżi terzi li l-Kummissjoni tikkunsidra bħala pajjiżi terzi li ma jikkooperawx.

(4)       Fid-Deċiżjoni tal-15 ta’ Novembru 2012, il-Kummissjoni inkludiet l-informazzjoni dwar il-fatti u l-konsiderazzjonijiet essenzjali li fuqhom hija bbażata tali identifikazzjoni.

(5)       Ukoll fil-15 ta’ Novembru 2012, il-Kummissjoni nnotifikat it-tmien pajjiżi terzi permezz ta’ ittri separati bil-fatt li kienet qed tqis il-possibbiltà li tidentifikahom bħala pajjiżi terzi li ma jikkooperawx.

(6)       Il-Kummissjoni, f’dawk l-ittri enfasizzat li sabiex jevitaw li jiġu identifikati u proposti għal iskrizzjoni formali bħala pajjiżi terzi li ma jikkooperawx kif previst fl-Artikoli 31 u 33 tar-Regolament IUU, il-pajjiżi terzi kkonċernati, f’koperazzjoni mill-qrib mal-Kummissjoni, kienu mistiedna jistabbilixxu pjan ta’ azzjoni biex in-nuqqasijiet identifikati fid-Deċiżjoni tal-15 ta’ Novembru 2012 jiġu rettifikati.

(7)       Konsegwenza ta' dan, il-Kummissjoni stiednet lit-tmien pajjiżi terzi kkonċernati: (i) biex jieħdu l-miżuri meħtieġa kollha għall-implimentazzjoni tal-azzjonijiet inklużi fil-pjanijiet ta’ azzjoni ssuġġeriti mill-Kummissjoni; (ii) biex jivvalutaw l-implimentazzjoni tal-azzjonijiet inklużi fil-pjanijiet ta’ azzjoni ssuġġeriti mill-Kummissjoni; u (iii) biex kull sitt xhur jibagħtu rapporti dettaljati lill-Kummissjoni li jivvalutaw l-implimentazzjoni ta’ kull azzjoni fir-rigward, fost l-oħrajn, tal-effettività individwali u/jew kumplessiva tagħhom sabiex jiżguraw sistema ta’ kontroll tas-sajd li hija konformi b’mod sħiħ.

(8)       It-tmien pajjiżi terzi kkonċernati ngħataw l-opportunità biex iwieġbu bil-miktub dwar kwistjonijiet indikati espliċitament fid-Deċiżjoni tal-15 ta’ Novembru 2012 kif ukoll fuq informazzjoni rilevanti oħra. Dan ippermettielhom li jissottomettu evidenza sabiex jiċħdu jew ilestu l-fatti invokati fid-Deċiżjoni tal-15 ta’ Novembru 2012 jew li jadottaw, kif xieraq, pjan ta’ azzjoni għal titjib u l-miżuri meħuda biex is-sitwazzjoni tiġi rettifikata. It-tmien pajjiżi kienu żgurati dwar id-dritt tagħhom li jitolbu, jew jipprovdu informazzjoni addizzjonali.

(9)       Fil-15 ta’ Novembru 2012, il-Kummissjoni fetħet proċess ta’ djalogu mat-tmien pajjiżi terzi u indikat li tqis perjodu ta’ sitt xhur bħala fil-prinċipju suffiċjenti biex jintlaħaq ftehim.

(10)     Il-Kummissjoni kompliet tfittex u tivverifika l-informazzjoni kollha li qieset meħtieġa. Il-kummenti orali u miktuba sottomessi min-naħa tat-tmien pajjiżi wara d-Deċiżjoni tal-15 ta’ Novembru 2012 ġew ikkunsidrati u meqjusa. It-tmien pajjiżi nżammu informati bil-fomm jew bil-miktub dwar il-kunsiderazzjonijiet tal-Kummissjoni.

(11)     Fl-24 ta' Marzu 2014 ġiet adottata d-Deċiżjoni ta’ Implimentazzjoni tal-Kunsill 2014/170/UE li tistabbilixxi lista ta’ pajjiżi terzi li ma jikkooperawx fil-ġlieda kontra s-sajd IUU skont ir-Regolament (KE) Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat.[4] Tlieta mit-tmien pajjiżi li tikkonċernahom id-Deċiżjoni tal-15 ta’ Novembru 2012 ġew iskritti bħala pajjiżi li ma jikkooperawx peress li, minkejja li ħadu xi miżuri, xorta naqsu milli, fil-qadi tal-obbligi tagħhom skont id-dritt internazzjonali bħala Stati tal-bandiera u kostali, jieħdu azzjoni biex jipprevjenu, jiskoraġġixxu u jeliminaw is-sajd IUU.

(12)     Permezz ta’ Deċiżjoni ta’ Implimentazzjoni DATE MONTH 2014[5], il-Kummissjoni identifikat lir-Repubblika Soċjalista Demokratika tas-Sri Lanka (is-Sri Lanka) bħala pajjiż terz li ma jikkooperax fil-ġlieda kontra s-sajd IUU. B’konformità mar-Regolament IUU, il-Kummissjoni pprovdiet ir-raġunijiet li għalihom hi qieset li s-Sri Lanka, fil-qadi tal-obbligi tagħha skont id-dritt internazzjonali bħala Stat tal-bandiera, tal-port, kostali jew tas-suq, naqset milli tieħu azzjoni biex tipprevjeni, tiskoraġġixxi u telimina s-sajd IUU.

(13)     Deċiżjoni ta’ Implimentazzjoni tal-Kunsill li tqiegħed lis-Sri Lanka fuq il-lista ta’ pajjiżi terzi li ma jikkooperawx fil-ġlieda kontra s-sajd IUU, għandha għalhekk titqies fil-kuntest tal-implimentazzjoni tar-Regolament IUU bħala riżultat ta’ proċeduri ta’ investigazzjoni u ta’ djalogu mwettqa skont ir-rekwiżiti sostantivi u proċedurali stabbiliti fir-Regolament IUU. Din id-Deċiżjoni hija bbażata fuq dawk il-proċeduri ta’ investigazzjoni u ta’ djalogu, inkluż il-korrispondenza li ġiet skambjata u l-laqgħat li saru, u fuq id-Deċiżjoni tal-15 ta’ Novembru 2012 u d-Deċiżjoni tal-DATE MONTH 2014. Ir-raġunijiet li fuqhom huma bbażati dawn il-proċeduri u atti huma l-istess bħal dawk li fuqhom hija bbażata din id-Deċiżjoni. Din id-Deċiżjoni li tqiegħed lis-Sri Lanka fuq il-lista ta’ pajjiżi terzi li ma jikkooperawx fil-ġlieda kontra s-sajd IUU għandha tinvolvi l-konsegwenzi ddikjarati fl-Artikolu 38 tar-Regolament IUU.

(14)     Meta tiġi adottata d-Deċiżjoni ta’ Implimentazzjoni tal-Kunsill li tqiegħed lis-Sri Lanka fuq il-lista ta’ pajjiżi terzi li ma jikkooperawx skont l-Artikolu 33 tar-Regolament IUU, id-Deċiżjoni tal-DATE MONTH 2014 li tidentifika lis-Sri Lanka bħala pajjiż terz li ma jikkooperax ma tibqax valida.

(15)     Skont l-Artikolu 34(1) tar-Regolament IUU, il-Kunsill, filwaqt li jaġixxi b’maġġoranza kwalifikata fuq proposta mill-Kummissjoni, għandu jneħħi pajjiż terz mil-lista ta’ pajjiżi terzi li ma jikkooperawx jekk dak il-pajjiż terz juri li s-sitwazzjoni li tat lok għall-iskrizzjoni tiegħu tkun ġiet rettifikata. Deċiżjoni għat-tneħħija għandha tikkunsidra wkoll jekk il-pajjiżi terzi iskritti kkonċernati ħadux miżuri konkreti li jistgħu jiksbu titjib tas-sitwazzjoni li jdum fit-tul.

2.           PROĊEDURA FIR-RIGWARD TAS-SRI LANKA

(16)     Fil-15 ta’ Novembru 2012, il-Kummissjoni nnotifikat lis-Sri Lanka skont l-Artikolu 32 tar-Regolament IUU li hi qieset il-possibbiltà li tidentifika lis-Sri Lanka bħala pajjiż terz li ma jikkooperax u stiednet lis-Sri Lanka biex f’kooperazzjoni mill-qrib mas-servizzi tagħha tistabbilixxi pjan ta’ azzjoni biex jiġu rettifikati n-nuqqasijiet identifikati fid-Deċiżjoni tal-15 ta’ Novembru 2012. Matul il-perjodu ta’ Diċembru 2012 sa Ġunju 2014, is-Sri Lanka ressqet bil-miktub l-opinjonijiet tagħha u ltaqgħet mal-Kummissjoni biex tiddiskuti l-punti rilevanti. Il-Kummissjoni pprovdiet lis-Sri Lanka b'informazzjoni rilevanti bil-miktub. Il-Kummissjoni kompliet tfittex u tivverifika l-informazzjoni kollha li qieset bħala meħtieġa. Il-kummenti bil-fomm u bil-miktub mibgħuta mis-Sri Lanka wara d-Deċiżjoni tal-15 ta’ Novembru 2012 ġew ikkunsidrati u meqjusa, filwaqt li s-Sri Lanka nżammet infurmata bil-fomm jew bil-miktub dwar il-kunsiderazzjonijiet tal-Kummissjoni. Il-Kummissjoni kienet tal-fehma li l-oqsma ta’ tħassib u n-nuqqasijiet kif deskritti fid-Deċiżjoni tal-15 ta’ Novembru 2012 ma kinux ġew indirizzati b’mod suffiċjenti mis-Sri Lanka. Barra minn hekk, il-Kummissjoni kkonkludiet li l-miżuri li ġew proposti fi pjan ta’ azzjoni ma kinux ġew implimentati bis-sħiħ.

3.           IDENTIFIKAZZJONI TAS-SRI LANKA BĦALA PAJJIŻ TERZ LI MA JIKKOOPERAX

(17)     Fid-Deċiżjoni tal-15 ta’ Novembru 2012, il-Kummissjoni analizzat id-dmirijiet tas-Sri Lanka u evalwat il-konformità tagħha mal-obbligi internazzjonali tagħha bħala Stat tal-bandiera, tal-port, kostali jew tas-suq. Għall-fini ta’ dak l-eżami, il-Kummissjoni qieset il-parametri elenkati fl-Artikolu 31(4) sa (7) tar-Regolament IUU.

(18)     Il-Kummissjoni rrevediet il-konformità tas-Sri Lanka b’konformità mal-konklużjonijiet tad-Deċiżjoni tal-15 ta’ Novembru 2012, u wara li kkunsidrat l-informazzjoni rilevanti pprovduta minn hemm 'il quddiem mis-Sri Lanka, il-pjan ta’ azzjoni ssuġġerit, kif ukoll il-miżuri meħuda biex is-sitwazzjoni tiġi rettifikata.

(19)     In-nuqqasijiet ewlenin identifikati mill-Kummissjoni fil-pjan ta’ azzjoni ssuġġerit kienu relatati ma’ diversi nuqqasijiet fl-implimentazzjoni tal-obbligi tad-dritt internazzjonali, marbuta b’mod partikolari man-nuqqas li jiġi adottat qafas legali adegwat, in-nuqqas ta’ sistema ta' monitoraġġ adegwata u effiċjenti, in-nuqqas ta’ skema ta’ osservatur, in-nuqqas ta’ sistema ta’ sanzjonijiet ta’ deterrent, u n-nuqqas ta’ implimentazzjoni korretta tal-iskema ta’ ċertifikazzjoni tal-qbid. B’mod aktar ġenerali, nuqqasijiet oħra identifikati jikkonċernaw il-konformità mal-obbligi internazzjonali, fosthom rakkomandazzjonijiet u riżoluzzjonijiet tal-Organizzazzjonijiet Reġjonali tal-Ġestjoni tas-Sajd (RFMOs) u l-kundizzjonijiet għar-reġistrazzjoni ta’ bastimenti skont id-dritt internazzjonali. Ġie identifikat ukoll nuqqas ta’ konformità ma’ rakkomandazzjonijiet u riżoluzzjonijiet minn korpi rilevanti bħall-Pjan Internazzjonali ta’ Azzjoni kontra s-sajd Illegali, Mhux Iddikjarat u Mhux Irregolat tan-Nazzjonijiet Uniti (IPOA-IUU). Madankollu, in-nuqqas ta’ konformità ma’ rakkomandazzjonijiet u riżoluzzjonijiet mhux vinkolanti tqies biss bħala prova ta’ sostenn u mhux bħala bażi għall-identifikazzjoni.

(20)     Fid-Deċiżjoni ta’ Implimentazzjoni tal-DATE MONTH 2014, il-Kummissjoni identifikat lis-Sri Lanka bħala pajjiż terz li ma jikkooperax skont ir-Regolament IUU.

(21)     Fir-rigward tar-restrizzjonijiet possibbli fuq is-Sri Lanka bħala pajjiż li qed jiżviluppa, għandu jiġi nnotat li l-istatus ta’ żvilupp speċifiku u l-prestazzjoni globali tas-Sri Lanka rigward is-sajd mhumiex imdgħajfin minħabba l-livell ġenerali ta’ żvilupp tagħha.

(22)     Wara li ġew ikkunsidrati d-Deċiżjoni tal-15 ta’ Novembru 2012, id-Deċiżjoni ta’ Implimentazzjoni tal-DATE MONTH 2014, u l-proċess ta’ djalogu mas-Sri Lanka mwettaq mill-Kummissjoni u l-eżitu tiegħu, jista’ jiġi konkluż li l-azzjonijiet meħuda mis-Sri Lanka fid-dawl tal-obbligi tagħha bħala Stat tal-bandiera huma insuffiċjenti biex ikun hemm konformità mal-Artikoli 94, 117 u 118 tal-Konvenzjoni tan-Nazzjonijiet Uniti dwar id-Dritt tal-Baħar (UNCLOS) u mal-Artikoli 18, 19, 20 tal-Ftehim tan-Nazzjonijiet Uniti dwar l-Istokkijiet tal-Ħut (UNFSA).

(23)     B’hekk, is-Sri Lanka naqset milli taqdi l-obbligi tagħha skont id-dritt internazzjonali bħala Stat tal-bandiera biex tieħu azzjoni biex tipprevjeni, tiskoraġġixxi u telimina s-sajd IUU, u għalhekk għandha tiġi inkluża fil-lista tal-Unjoni ta’ pajjiżi terzi li ma jikkooperawx.

4.           STABBILIMENT TA' LISTA TA' PAJJIŻI TERZI LI MA JIKKOOPERAWX

(24)     Fid-dawl tal-konklużjonijiet milħuqa hawn fuq fir-rigward tas-Sri Lanka, dak il-pajjiż għandu jiġi inkluż fil-lista ta’ pajjiżi terzi li ma jikkooperawx stabbilita bid-Deċiżjoni tal-24 ta' Marzu 2014 skont l-Artikolu 33 tar-Regolament IUU. Għalhekk, l-Anness tad-Deċiżjoni ta’ Implimentazzjoni 2014/170/UE għandu jiġi emendat skont dan.

(25)     L-azzjonijiet fir-rigward tas-Sri Lanka huma elenkati fl-Artikolu 38 tar-Regolament IUU fil-forma ta’ miżuri li għandhom jiġu applikati. Il-projbizzjoni tal-importazzjoni tkopri l-prodotti kollha tas-sajd, kif definit fl-Artikolu 2(8) tar-Regolament IUU, billi l-identifikazzjoni bħala pajjiż terz li ma jikkooperax mhijiex ir-riżultat ta' nuqqas ta’ miżuri xierqa adottati fir-rigward ta’ sajd IUU li jaffettwa stokk jew speċi partikolari.

(26)     Is-sajd IUU, inter alia, jeżawrixxi l-istokkijiet tal-ħut, jeqred il-ħabitats tal-baħar, jimmina l-konservazzjoni u l-użu sostenibbli tar-riżorsi tal-baħar, ifixkel il-kompetizzjoni, jipperikola s-sigurtà tal-ikel, iqiegħed lis-sajjieda onesti fi żvantaġġ inġust, u jdgħajjef il-komunitajiet kostali. Fid-dawl tal-kobor tal-problemi relatati mas-sajd IUU, huwa meqjus bħala neċessarju li l-Unjoni timplementa malajr l-azzjonijiet fir-rigward tas-Sri Lanka bħala pajjiż li ma jikkooperax. Fid-dawl ta’ dak li ntqal qabel, din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

(27)     Jekk is-Sri Lanka turi li s-sitwazzjoni li tat lok għall-iskrizzjoni tagħha tkun ġiet rettifikata, il-Kunsill, filwaqt li jaġixxi b’maġġoranza kwalifikata fuq proposta mill-Kummissjoni, ineħħi s-Sri Lanka mil-lista ta’ pajjiżi terzi li ma jikkooperawx skont l-Artikolu 34(1) tar-Regolament IUU. Kwalunkwe deċiżjoni għat-tneħħija għandha tqis ukoll jekk is-Sri Lanka ħaditx miżuri konkreti biex ikun jista' jinkiseb titjib tas-sitwazzjoni li jdum fit-tul,

JIDDEĊIEDI KIF ĠEJ:

Artikolu 1

L-Anness tad-Deċiżjoni ta’ Implementazzjoni 2014/170/UE għandu jiġi mibdul bit-test stabbilit fl-Anness ta’ din id-Deċiżjoni.

Artikolu 2

Din id-Deċiżjoni għandha tidħol fis-seħħ l-għada tal-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 286, 29.10.2008, p. 1.

[2]               ĠU L 286, 29.10.2008, p. 1.

[3]               Deċiżjoni tal-Kummissjoni tal-15 ta’ Novembru 2008 dwar in-notifika lill-pajjiżi terzi li l-Kummissjoni tqis bħala possibbli li jiġu identifikati bħala pajjiżi terzi li ma jikkooperawx skont ir-Regolament tal-Kunsill (KE) Nru 1005/2012 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat (ĠU C 354, 17.11.2012, p. 1).

[4]               ĠU L 91, 27.3.2014, p. 43

[5]               Deċiżjoni ta’ Implimentazzjoni tal-Kummissjoni tal-DATE MONTH 2014 li tidentifika l-pajjiżi terzi li l-Kummissjoni tqis li huma pajjiżi terzi li ma jikkooperawx skont ir-Regolament tal-Kunsill (KE) Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat (ĠU C XX, dd.mm.2014, p.X).

ANNESS

Lista ta’ pajjiżi terzi li ma jikkooperawx fil-ġlieda kontra sajd Illegali, mhux Irrappurtat u mhux Irregolat (IUU)

tal-

Proposta għal DEĊIŻJONI TA’ IMPLIMENTAZZJONI TAL-KUNSILL

li temenda l-lista ta’ pajjiżi terzi li ma jikkooperawx fil-ġlieda kontra s-sajd IUU skont ir-Regolament (KE) Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat

Il-Beliże

Ir-Renju tal-Kambodja

Ir-Repubblika tal-Ginea

Ir-Repubblika Demokratika Soċjalista tas-Sri Lanka