EUR-Lex Access to European Union law
This document is an excerpt from the EUR-Lex website
Document 52014PC0085
Proposal for a COUNCIL RECOMMENDATION on European Tourism Quality Principles
Proposta għal RAKKOMANDAZZJONI TAL-KUNSILL dwar il-Prinċipji tal-Kwalità tat-Turiżmu Ewropew
Proposta għal RAKKOMANDAZZJONI TAL-KUNSILL dwar il-Prinċipji tal-Kwalità tat-Turiżmu Ewropew
/* COM/2014/085 final - 2014/0043 (NLE) */
Proposta għal RAKKOMANDAZZJONI TAL-KUNSILL dwar il-Prinċipji tal-Kwalità tat-Turiżmu Ewropew /* COM/2014/085 final - 2014/0043 (NLE) */
MEMORANDUM TA’ SPJEGAZZJONI 1. IL-KUNTEST TAL-PROPOSTA 1.1. Sfond It-turiżmu jirrappreżenta t-tielet l-akbar
attività soċjoekonomika fl-UE f’dak li jikkonċerna l-kontribuzzjoni għall-PDG u
l-impjiegi, wara s-setturi tal-kummerċ u tad-distribuzzjoni u tal-kostruzzjoni.
Huwa wieħed mill-ftit setturi ekonomiċi li jirreġistraw tkabbir kontinwu,
minkejja diffikultajiet ekonomiċi u finanzjarji, u li għaldaqstant għandu
potenzjal kbir biex jikkontribwixxi għal “Ewropa 2020”, l-istrateġija
tat-tkabbir tal-UE għal ekonomija tal-UE li tkun intelliġenti, sostenibbli u
inklużiva. B’madwar 1.8 miljun negozju, fil-parti l-kbira
tagħhom SMEs, dan is-settur[1]
jimpjega madwar 3.3 % tal-forza tax-xogħol tal-UE (madwar 8 miljun
impjieg) u jiġġenera madwar 2.9 % tal-PDG tal-UE. Meta wieħed iqis
is-setturi marbuta miegħu[2],
il-kontribuzzjoni indiretta tiegħu hija saħansitra akbar: huwa stmat li
jipprovdi madwar 8.5 % tal-impjiegi kollha (kważi hemm 18.8 miljun
impjegat) u jiġġenera madwar 7.9 % tal-PDG tal-Unjoni Ewropea[3]. Minkejja
l-kompetizzjoni li dejjem tiżdied minn reġjuni oħra tad-dinja, l-UE tinsab
fl-ewwel post bħala destinazzjoni tat-turisti, bi 384.8 miljun wasla
internazzjonali fl-2011[4]. Bl-adozzjoni tat-Trattat ta' Liżbona, l-UE
issa ngħatat il-kompetenza li tikkumplimenta l-azzjoni tal-Istati Membri
fis-settur tat-turiżmu, b’mod partikolari billi tippromwovi l-kompetittività
tal-impriżi tal-Unjoni f’dan is-settur[5]. B’reazzjoni għas-setgħat il-ġodda li
ngħatawlha u l-bżonn li hemm għal miżuri ġodda biex jistimulaw it-tkabbir
tal-UE, il-Kummissjoni adottat Komunikazzjoni fl-2010 dwar qafas politiku
ġdid għat-turiżmu fl-Ewropa.[6]
Dan il-qafas jiddeskrivi sett ambizzjuż ta' azzjonijiet li għandhom l-għan li
(a) jistimulaw il-kompetittività fis-settur tat-turiżmu Ewropew; (b) jippromovu
l-iżvilupp ta’ turiżmu sostenibbli, responsabbli u ta’ kwalità għolja; (c)
isaħħu d-dehra u l-profil tal-Ewropa bħala l-post għal destinazzjonijiet
sostenibbli u ta' kwalità għolja; u (d) iżidu l-potenzjal tal-politiki tal-UE u
tal-istrumenti finanzjarji għall-iżvilupp tat-turiżmu. L-Azzjoni 13
tal-Komunikazzjoni b’mod espliċitu tipprevedi l-iżvilupp tat-Tikketta
Ewropea tat-Turiżmu ta' Kwalità, “ibbażat fuq l-esperjenza nazzjonali
eżistenti, biex tiżdied is-sigurtà u l-fiduċja tal-konsumatur fil-prodotti
tat-turiżmu u jiġu ppremjati l-isforzi rigorużi mill-professjonisti fit-turiżmu
li l-għan tagħhom huwa l-kwalità tas-servizz tat-turiżmu għas-sodisfazzjon
tal-konsumatur”. Fir-reazzjoni tiegħu għal din il-Komunikazzjoni,
il-Parlament Ewropew talab lill-Kummissjoni "[…] biex tevalwa,
b'kooperazzjoni mal-partijiet interessati fit-turiżmu, il-fattibilità ta'
tikketta Ewropea tat-turiżmu ta' kwalità, […] sabiex toħloq tikketta ġenerika
li tkun komplementari għat-tikketti nazzjonali u tkun rikonoxxuta fuq bażi ta'
inklużjoni fakultattiva." [7]
L-istudju tal-2009 dwar il-kompetittività tal-industrija tat-turiżmu
tal-UE sab li għalkemm l-għadd totali tal-wasliet internazzjonali fl-Ewropa
għadu qed jikber, dan l-aħħar l-Ewropa bdiet titlef is-sehem tas-suq minħabba
destinazzjonijiet emerġenti ġodda madwar id-dinja. Barra minn hekk,
il-globalizzazzjoni, l-internet u l-imġiba tal-konsumatur li qed tinbidel
b'pass mgħaġġel, kif ukoll it-tħassib li dejjem jiżdied dwar l-impronta
ambjentali tal-attivitajiet turistiċi għandhom impatt qawwi fuq l-industrija.[8] F’suq bħal dan li kull ma jmur isir dejjem aktar
kompetittiv, is-sinifikat tal-kwalità twessa’ għan-negozji tat-turiżmu, li
qegħdin isiru dejjem aktar konxji mill-importanza tal-kwalità bħala sors ta’
vantaġġ kompetittiv. Għaldaqstant, l-aċċess għal informazzjoni affidabbli,
aġġornata, preċiża u rilevanti dwar il-kwalità ta' servizz partikolari
tat-turiżmu huwa importanti għat-turisti sabiex ikunu jistgħu jiddistingwu bejn
prodotti konkorrenti u sabiex jagħmlu għażla infurmata. Dan jista’ jkun aċċentwat b’mod partikolari fil-każ ta’
turisti li jaslu minn Stat Membru ieħor tal-UE, fejn jista' jkun hemm aktar
inċertezzi minħabba diffikultajiet lingwistiċi, meta l-informazzjoni ma tkunx
disponibbli f’lingwa li jifhem il-konsumatur. Barra minn hekk, minħabba l-kriżi ekonomika attwali, l-UE
għandha tagħmel dak kollu li tista' sabiex tattira viżitaturi minn pajjiżi
terzi. Li jiġi żgurat li dawn il-viżitaturi jistgħu joqogħdu fuq livell ta'
servizz ta' ċertu kwalità madwar l-UE kollha kemm hi huwa ta' importanza kbira. L-informazzjoni pprovduta lill-konsumaturi dwar il-kwalità
tas-servizzi tat-turiżmu għandha rwol biex tattira viżitaturi minn pajjiżi
terzi; din għandha potenzjal enormi u li s'issa mhuwiex sfruttat biex tagħti
spinta lill-wasliet tat-turisti fid-destinazzjonijiet tal-UE u li ttejjeb
il-kompetittività tat-turiżmu tal-UE. Fl-2011 l-infiq tal-viżitaturi barranin
ammonta għal EUR 330.44 biljun. Skont l-aħħar stimi dawn iċ-ċifri x'aktarx
li jiżdiedu sa 20.4 miljun impjieg u EUR 427.31 biljun fl-2022[9]. Għaldaqstant, l-inizjattiva attwali għandha titqies ukoll
fil-kuntest tal-inizjattiva tal-Kummissjoni li timmarka lill-Ewropa f’pajjiżi
terzi[10]
u fi ħdan din l-inizjattiva “Destinazzjoni Ewropa 2020”[11], kif ukoll il-politika
tal-viża tal-UE[12]
li tiffaċilita l-ivvjaġġar ta' persuni mhux nazzjonali tal-UE lejn l-UE[13] biex tgħin lill-Ewropa
tibqa’ fl-ewwel post fid-dinja bħala destinazzjoni tat-turisti. 1.2 Il-qagħda
attwali Bħalissa m’hemm l-ebda leġislazzjoni speċifika fil-livell
tal-UE li tirregola l-informazzjoni pprovduta lill-konsumaturi dwar il-kwalità
tas-servizzi tat-turiżmu.[14] Ċerti għodod ta’ informazzjoni eżistenti, bħal websajts ta'
evalwazzjoni u ta' tqabbil li jinsabu onlajn, jistgħu jgħinu lill-konsumaturi
fil-proċess tat-teħid tad-deċiżjonijiet tagħhom kemm-il darba dawn ikollhom
informazzjoni trasparenti u affidabbli. Ċerti Stati Membri jħaddmu skemi ta' kwalità pubbliċi
nazzjonali, subnazzjonali jew reġjonali fit-territorji tagħhom fuq bażi
volontarja. Hemm ukoll varjetà wiesgħa ta’ inizjattivi tal-industrija
fil-livelli reġjonali, nazzjonali jew transnazzjonali, li jiffokaw l-iktar fuq
l-aspetti tal-kwalità tas-servizz li huma speċifiċi għas-subsetturi tat-turiżmu
rispettivi jew għaż-żona ġeografika tagħhom. Kif ġie kkonfermat mill-analiżi tas-suq li twettqet
fil-kuntest tal-valutazzjoni tal-alternattivi tal-politika li takkumpanja din
il-proposta[15],
dawn l-iskemi tal-kwalità juru diversità sinifikanti u għaldaqstant ftit li
xejn konsistenza meta mqabbla mal-ambitu settorjali, il-kopertura ġeografika,
il-governanza, il-metodoloġija tal-valutazzjoni u l-kriterji tal-evalwazzjoni
tagħhom. L-għadd kbir u d-diversità tal-iskemi ta' kwalità privati u
pubbliċi jirriżultaw f’suq frammentat ħafna f’dak li jirrigwarda l-evalwazzjoni
tal-kwalità tas-servizz tat-turiżmu. B'konsegwenza ta’ din il-frammentazzjoni,
it-turisti transkonfinali ma jingħatawx informazzjoni konsistenti sabiex jifhmu
b'mod faċli x'jirrappreżentaw id-diversi skemi tal-kwalità u jiddistingwu bejn
is-servizzi konkorrenti. Dan iwassal għal konfużjoni. Min-naħa tagħha, din
il-konfużjoni tillimita l-kapaċità tal-iskemi tal-kwalità biex jinfurmaw b’mod
effettiv lill-konsumaturi dwar il-livell tal-kwalità tas-servizzi tat-turiżmu
offruti, u dan idgħajjef l-abbiltà tal-konsumaturi li jagħmlu għażliet
infurmati b'mod partikolari meta jivvjaġġaw lejn Stat Membru ieħor jew minn
pajjiżi terzi. Għalhekk, dan ma jippremjax (possibilment b’għażliet aktar
favorevoli jew b'reputazzjoni aħjar) lil dawk in-negozji li jinvestu
fil-kwalità. Din is-sitwazzjoni tiskoraġġixxi lill-industrija, b’mod
partikolari l-SMEs b’riżorsi finanzjarji limitati, jagħmlu dan. B’riżultat ta’
dan, l-industrija tat-turiżmu tal-UE ma tistax tisfrutta bis-sħiħ il-vantaġġ
kompetittiv tagħha fil-kwalità tas-servizz u tissodisfa l-potenzjal ekonomiku
tagħha billi żżid il-viżibbiltà tal-kwalità tas-servizz tagħha. Il-partijiet
interessati tat-turiżmu s’issa ma rnexxilhomx jikkooperaw fuq il-livell tal-UE
biex inaqqsu l-inkonsistenza madwar l-UE bejn l-iskemi tal-kwalità eżistenti
jew dawk tal-ġejjieni u m’hemmx indikazzjonijiet li se titfaċċa xi inizjattiva
privata jew pubblika li ttejjeb din is-sitwazzjoni. Għaldaqstant
hemm bżonn urġenti li l-frammentazzjoni tas-suq tiġi indirizzata f'bosta
livelli. Il-frammentazzjoni eżistenti fost is-sistemi tal-evalwazzjoni
tal-kwalità tiġġenera konfużjoni u tista' taffettwa b’mod negattiv
il-kompetittività tat-turiżmu Ewropew. 2. IR-RIŻULTATI TA’
KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT 2.1. Proċess
ta’ konsultazzjoni Wara l-adozzjoni tal-Komunikazzjoni tal-2010,
il-Kummissjoni bdiet tiġbor l-informazzjoni dwar l-iskemi tal-kwalità eżistenti
bl-għajnuna tal-Istati Membri u tal-partijiet interessati tal-industrija. Ġew
organizzati żewġ sessjonijiet ta' ħidma matul l-2011 għall-iskambju ta’
informazzjoni dwar l-esperjenzi eżistenti u għall-iskambju ta' ideat dwar
il-prinċipji komuni possibbli tal-kwalità għas-servizzi tat-turiżmu. Kmieni
fl-2011, il-Kummissjoni waqqfet grupp informali ta' esperti bil-parteċipazzjoni
ta’ maniġers ta’ skemi tal-kwalità pubbliċi u privati eżistenti u
rappreżentanti tal-konsumaturi biex jipprovdi għajnuna fl-iżvilupp ta’ kunċett
ta' abbozz. Il-maġġoranza l-kbira tal-partijiet interessati li ħadu sehem fis-sessjonijiet
ta' ħidma u l-grupp informali ta' esperti qablet li l-inizjattiva tal-UE
għandha ssegwi approċċ minn isfel għal fuq, u li filwaqt li tirrikonoxxi
l-inizjattivi eżisteni u dawk tal-ġejjieni tal-Istati Membri u tal-industrija,
tkompli tibni fuqhom. Madankollu, fir-rigward ta’ x'għandhom jinkludu
l-prinċipji komuni, il-partijiet interessati esprimew opinjonijiet varji. Barra
minn hekk, l-inklużjoni ta’ kwistjonijiet ta’ sostenibbiltà ambjentali
fil-prinċipji kkawżat ukoll xi reazzjonijiet differenti fost il-partijiet
interessati. Saret konsultazzjoni mmirata
f’Settembru-Ottubru 2011, li kellha l-għan li tara x'inhuma l-opinjonijiet ta’
ċirku usa’ tal-partijiet interessati, li jinkludi l-assoċjazzjonijiet u
l-federazzjonijiet tat-turiżmu ewlenin Ewropej, l-assoċjazzjonijiet
tal-industrija relatati, l-organizzazzjonijiet tal-konsumaturi kif ukoll
l-awtoritajiet tal-Istati Membri. Din il-konsultazzjoni pproduċiet l-istess
riżultati f'dak li jirrigwarda l-pożizzjonijiet tal-partijiet interessati bħas-sessjonijiet
ta' ħidma deskritti hawn fuq. L-Istati Membri ġew ikkonsultati wkoll matul
il-laqgħat regolari tal-Kumitat Konsultattiv tat-Turiżmu u esprimew
opinjonijiet differenti: xi Stati Membri esprimew appoġġ qawwi
għall-inizjattiva, filwaqt li ma qablux li l-amministrazzjonijiet pubbliċi
għandhom jiġu obbligati jipparteċipaw fil-governanza ta' inizjattiva tal-UE
bħal din, l-aktar minħabba n-nonkonformità mal-prinċipju tas-sussidjarjetà u
r-restrizzjonijiet tal-bażi legali, kif ukoll minħabba riżorsi limitati
tal-awtoritajiet nazzjonali. Sabiex titwessa' aktar il-konsultazzjoni
mal-partijiet interessati u jkun hemm aktar speċjalizzazzjoni, f'Jannar 2013,
il-Kummissjoni organizzat konferenza miftuħa. Id-dokumentazzjoni u r-rapport
ta' din il-konferenza huma disponibbli fuq il-websajt tal-Kummissjoni[16]. Id-diskussjonijiet
fil-Konferenza ma rriflettew l-ebda bidla fl-opinjonijiet u l-pożizzjonijiet
tal-partijiet interessati pubbliċi u dawk privati. Saret konsultazzjoni pubblika bejn Mejju u
Lulju 2012 permezz ta’ “Leħnek fl-Ewropa” (Your Voice in Europe), il-websajt
tad-DĠ Intrapriża u Industrija fuq Europa u l-posta elettronika mibgħuta lil
firxa wiesgħa ta’ partijiet interessati privati u pubbliċi kif ukoll
rappreżentanti mill-Istati Membri. L-assoċjazzjonijiet u l-federazzjonijiet
professjonali u l-amministrazzjonijiet pubbliċi kienu jammontaw għal 90 %
tal-parteċipanti li wieġbu, aktar minn 150 parteċipant. L-10 % l-oħra
kienu l-intrapriżi tat-turiżmu, li żewġ terzi minnhom ipparteċipaw fi skema
tal-kwalità. It-trejdjunjins tat-turiżmu u r-rappreżentanti tal-konsumaturi
kienu involuti wkoll b’mod attiv fil-proċess ta’ konsultazzjoni. Il-parti
l-kbira ta’ dawk li wieġbu qablu mad-definizzjoni tal-Kummissjoni tal-problema
u mal-bżonn li jkun hemm inizjattiva mill-UE f’dan il-qasam. Ir-riżultati
tal-konsultazzjoni pubblika huma ppubblikati fuq il-websajt tal-Kummissjoni[17]. Fil-qafas tal-valutazzjoni tal-alternattivi
tal-politika, sar studju ta' sfond fuq l-esperjenza tan-negozji
fil-parteċipazzjoni fi skema tal-kwalità, fejn l-input tal-maniġers ta' kampjun
rappreżentattiv tal-iskemi tal-kwalità eżistenti u n-negozji membri tagħhom
ipprova għarfien utli għall-valutazzjoni tal-impatti tal-inizjattiva proposta.[18] 2.2 Valutazzjoni
tal-alternattivi tal-politika Il-Kummissjoni vvalutat id-diversi
alternattivi tal-politika bil-għan li ttejjeb il-konsistenza fost l-iskemi
tal-kwalità eżistenti u dawk tal-ġejjjieni u b'konsegwenza t'hekk
l-informazzjoni li tiġi pprovduta lill-konsumaturi. B’kollox ġew ikkunsidrati seba’ alternattivi
tal-politika u fosthom erbgħa ġew eżaminati fil-valutazzjoni. Dawn jinkludu
l-alternattiva tal-ebda bidla fil-politika, l-aternattiva awtoregolatorja
mmexxija mill-industrija u żewġ alternattivi li jinvolvu l-intervent mill-UE.
L-aħħar żewġ alternattivi eżaminaw l-impatti tal-possibbiltà li fil-kunċett
jiġu inklużi ċerti prinċipji, bħal dawk relatati ma’ aspetti ta’ sostenibbiltà
ambjentali. L-impatti ekonomiċi, soċjali u ambjentali stmati ta' kull
alternattiva ġew ivvalutati abbażi tal-effikaċja tagħhom biex jissodisfaw
l-objettivi tal-politika, il-kosteffiċjenza tagħhom u l-konsistenza tagħhom ma’
politiki oħra tal-UE. Il-valutazzjoni tat attenzjoni partikolari
għall-fatt li, l-parteċipazzjoni mill-industrija kemm fl-alternattiva li
tipproponi l-awtoregolamentazzjoni kif ukoll f'dik li tipproponi l-intervent
mill-UE tista’ tkun volontarja. Ingħatat ukoll attenzjoni bir-reqqa
lill-konservazzjoni tal-uniċità u d-diversità li joffri t-turiżmu Ewropew,
speċjalment fid-dawl tal-varjetà kbira tas-subsetturi tat-turiżmu li għalihom
jistgħu japplikaw il-prinċipji tal-kwalità tas-servizz Ewropew. Il-valutazzjoni ma tikkonkludix dwar
alternattiva favorevoli waħda biss peress li t-tqabbil tal-alternattivi wera li
l-effikaċja, l-effiċjenza u l-konsistenza kemm għall-alternattiva li tinkludi
biss prinċipji relatati mal-kwalità tas-servizz kif ukoll għall-alternattiva li
testendi l-informazzjoni għal aspetti oħra, bħas-sostenibbiltà ambjentali kienu
ugwali. 3. L-ELEMENTI LEGALI
TAL-PROPOSTA 3.1 Bażi legali Il-proposta hija bbażata fuq
l-Artikoli 195 u 292 tat-TFUE. 3.2 Prinċipji tas-sussidjarjetà u
tal-proporzjonalità L-Artikolu 195 tat-TFUE jistipula li l-UE
għandha “tikkomplimenta l-azzjoni tal-Istati Membri fis-settur tat-turiżmu,
b’mod partikolari billi tippromwovi l-kompetittività tal-impriżi tal-Unjoni
f’dan is-settur”. B’konformità mal-prinċipju tas-sussidjarjetà, l-azzjoni
tal-UE proposta tkun ta’ natura volontarja. L-inizjattiva proposta ma telimina
l-ebda inizjattiva eżistenti li ġiet stabbilita mill-Istati Membri jew
mill-industrija. Ir-raġuni għalfejn tinħtieġ azzjoni tal-UE
hija minħabba n-natura transnazzjonali tal-problema. Dan iseħħ f'ambjent
transkonfinali fejn is-servizz tat-turiżmu jiġi pprovdut f’pajjiż fejn
it-turist mhuwiex resident, biex b'hekk jiġi llimitat il-valur miżjud li
l-iskemi tal-kwalità jistgħu jipprovdu għall-vjaġġaturi transkonfinali, aktar u
aktar meta dawn il-vjaġġaturi jkunu ġejjin minn barra l-UE. Is-sitwazzjoni attwali (deskritta taħt 1.2)
dwar l-evalwazzjoni tas-servizz tal-kwalità tat-turiżmu fl-Ewropa mhijiex tgħin
biex ikun hemm kundizzjonijiet ekwi fl-industrija tal-UE. L-inkonsistenza
tal-iskemi ta' evalwazzjoni tal-kwalità għas-servizzi tat-turiżmu fil-livell
nazzjonali u dak reġjonali qiegħda tħawwad (tikkonfondi?) lill-konsumaturi u
qed toħloq ostakoli għas-suq intern. Il-poter u l-ambitu huma limitati u ma
jippermettux lill-Istati Membri individwali jaġixxu waħidhom sabiex jippruvaw
itejbu l-konsistenza tal-kwalità tas-servizzi tat-turiżmu offruti madwar l-UE.
S'issa l-Istati Membri għadhom ma bdew l-ebda koordinazzjoni transkonfinali
tal-prinċipji tal-kwalità tat-turiżmu u ma hemm l-ebda indikazzjoni li se
jagħmlu dan fil-futur. Minħabba l-għadd baxx ta' skemi pubbliċi eżistenti
fil-livell nazzjonali fil-preżent, din il-kooperazzjoni xorta kieku? ma
tirriżultax f’kooperazzjoni transkonfinali fuq skala kbira. Barra minn hekk,
bħalissa l-Istati Membri individwali mhux qegħdin f'pożizzjoni li jtejbu
l-konsistenza bejn skemi privati minn Stati Membri oħrajn. Għaldaqstant,
l-azzjoni tal-UE hija meħtieġa u ġustifikata. Barra minn hekk,
l-azzjonijiet imwettqa mill-industrija, anke fil-livell transnazzjonali huma
limitati għal subsetturi speċifiċi (jew forsi għal dawk il-ftit li huma
relatati), iżda ma għandhomx ambitu li huwa orizzontali fil-veru sens
tal-kelma. Dan iwassal biex tingħata informazzjoni inkonsistenti
lill-konsumaturi u jillimita s-setgħa informattiva tal-iskemi tal-kwalità u
n-negozji membri tagħhom f'kuntest transkonfinali intra-UE u fir-rigward ta'
vjaġġaturi minn pajjiżi terzi. Din is-sitwazzjoni mhijiex mistennija tinbidel,
u teħtieġ azzjoni fil-livell tal-UE. Għal raġunijiet ta’ kobor, l-UE tinsab
f’pożizzjoni aħjar biex tindirizza l-problemi ta’ frammentazzjoni settorjali u
ġeografika deskritti hawn fuq. Qafas tal-UE li jfittex l-interess ġenerali li
jippromwovi l-kompetittività tat-turiżmu tal-Unjoni jkun aktar effettiv f’dak
li jirrigwarda l-viżibbiltà u l-kredibbiltà transkonfinali. Dan jista’ jinkiseb
billi jiġi kkomplementat ix-xogħol li diġà sar mill-atturi pubbliċi u privati
tat-turiżmu, u jinħoloq u jiġi nkoraġġut ambjent favorevoli għalihom biex
jikkombinaw l-isforzi tagħhom. Il-Prinċipji tal-Kwalità tat-Turiżmu Ewropew
jistgħu jiġu promossi aħjar b’azzjoni tal-UE, kemm fl-Istati Membri kif ukoll fir-rigward
tal-vjaġġaturi minn pajjiżi terzi, bħala parti minn strateġija globali
promozzjonali tal-UE fil-qasam tat-turiżmu. Il-valur miżjud ta’ azzjoni
koordinata fuq skala kbira fil-livell tal-UE ġie kkonfermat minn maġġoranza
kbira tal-partijiet interessati. Finalment, il-proposta
tikkonforma mal-prinċipju tal-proporzjonalità. L-inizjattiva ġiet żviluppata
bl-għan li tillimita l-ispejjeż għal dak li hu neċessarju biex jinkisbu
l-objettivi tal-politika. L-applikazzjoni tal-prinċipji ta’ kwalità proposti prinċipalment
teħtieġ bidla organizzattiva, li tinvolvi investimenti limitati, li huma
mistennija li jiġu bbilanċjati mill-benefiċċji li jirriżultaw minn konsumaturi
aktar sodisfatti u minn azzjonijiet kumplimentari tal-UE. Sabiex jiġi żgurat li
l-kompetenzi tal-Istati Membri jkunu rrispettati, huwa rrakkomandat li l-Istati
Membri jikkoordinaw, jimmonitorjaw u jippromwovu l-applikazzjoni tal-Prinċipji
tal-Kwalità tat-Turiżmu Ewropew fit-territorji rispettivi tagħhom,
f’kooperazzjoni mal-Kummissjoni. Ma’ dawn il-miżuri l-proposta debitament
tirrispetta l-prinċipju tas-sussidjarjetà. 3.3 Deskrizzjoni qasira
tal-proposta 3.3.1 Suġġett
u Objettivi Il-Prinċipji tal-Kwalità tat-Turiżmu Ewropew
stipulati f'din il-proposta huma applikabbli għas-servizzi tat-turiżmu offerti
fl-Unjoni direttament lill-konsumaturi u huwa rrakkomandat li jiġu segwiti
mill-organizzazzjonijiet pubbliċi u privati li jipprovdu servizzi fil-qasam
tat-turiżmu. L-inizjattiva għandha l-għan
li ttejjeb l-informazzjoni pprovduta lill-konsumaturi, speċjalment lil dawk li
jivvjaġġaw lejn Stat Membru ieħor jew li jiġu minn pajjiż terz, dwar il-kwalità
tas-servizzi tat-turiżmu, u b'hekk tagħti l-opportunità lil dawk il-konsumaturi
li jagħtu importanza lill-kwalità sabiex jagħmlu għażliet informati aħjar. Din
min-naħa tagħha ssaħħaħ l-inċentivi għan-negozji tat-turiżmu tal-UE, b'mod
partikolari għall-SMEs, biex ikomplu jinvestu fil-kwalità. Għandha l-għan li
ttejjeb il-konsistenza fil-kwalità tas-servizzi tat-turiżmu fil-livell tal-UE
billi tistabbilixxi prinċipji Ewropej li l-organizzazzjonijiet tat-turiżmu
jkollhom jikkonformaw magħhom. Dawn il-prinċipji joriġinaw mill-kriterji
proposti mill-partijiet interessati u ġew ivvalutati fil-konsultazzjoni
miftuħa. F’termini operattivi, l-għan huwa li sa meta
tiġi riveduta l-inizjattiva jkun hemm għadd sinifikanti ta' organizzazzjonijiet
tat-turiżmu fl-UE li jsegwu l-Prinċipji tal-Kwalità tat-Turiżmu Ewropew. Il-valur miżjud tal-inizjattiva se jkun fuq
diversi livelli: a) l-organizzazzjonijiet tat-turiżmu li jsegwu dawn
il-Prinċipji jkunu jistgħu jibbenefikaw minn azzjoni ta' promozzjoni u ta'
sensibilizzazzjoni mwettqa mill-Kummissjoni. Dan iwassal għal aktar viżibilità,
li jtejjeb il-kapaċità tagħhom biex jilħqu lill-konsumaturi u jipprovdulhom
il-possibbiltà li jestendu l-attivitajiet tagħhom għal swieq li kieku ma
setgħux jilħqu, b’mod partikolari f’pajjiżi terzi; b) Għall-konsumaturi,
il-valur miżjud se jkun is-serħan tal-moħħ li ċerti prinċipji tal-kwalità Ewropej
se jkunu ssodisfati, ikun liema jkun l-Istat Membru li jmorru jżuru. Fl-aħħar
nett, l-iffukar u l-enfasi fuq il-kwalità għolja tas-servizzi tat-turiżmu
Ewropew se jikkontribwixxu għall-istrateġija ġenerali tal-UE għat-titjib
tal-flussi tat-turiżmu ta' vjaġġaturi fi ħdan l-Ewropa u barra minnha, u
jikkomplementaw l-isforzi għall-iffaċilitar tar-rekwiżiti tal-viża għal turisti
minn pajjiżi terzi kif ukoll l-immarkar tal-Ewropa bħala pakkett ta’
destinazzjonijiet sostenibbli u ta’ kwalità għolja. Fl-aħħar nett, dan se jikkontribwixxi
għall-kompetittività mtejba tas-settur u se jagħti spinta 'l quddiem
lill-kapaċità tiegħu biex joħloq tkabbir ekonomiku u impjiegi, għall-benefiċċju
tal-Istati Membri u tal-ekonomija globali tal-UE. 3.3.2 L-applikazzjoni tal-Prinċipji tal-Kwalità tat-Turiżmu Ewropew Ambitu
settorjali u ġeografiku Sabiex tinkiseb konsistenza aħjar tal-kwalità
tas-servizzi tat-turiżmu madwar l-UE, il-Prinċipji tal-Kwalità tat-Turiżmu
Ewropew jistgħu jiġu applikati, mingħajr restrizzjoni subsettorjali, għal dawk
l-organizzazzjonijiet pubbliċi jew privati kollha tat-turiżmu li joperaw
f'livell nazzjonali, reġjonali, lokali jew transnazzjonali, li joffru servizzi
tat-turiżmu lill-konsumaturi fl-Unjoni. Koordinazzjoni, monitoraġġ, u
promozzjoni B'konformità mal-prinċipju tas-sussidjarjetà,
l-Istati Membri se jiġu mistiedna jikkoordinaw, jissorveljaw u jippromovu
l-Prinċipji tal-Kwalità tat-Turiżmu Ewropew fir-rigward tat-territorji tagħhom.
L-Istati Membri se jiġu rrakkomandati wkoll li
jikkoperaw bejniethom fir-rigward ta’ organizzazzjonijiet tat-turiżmu
transnazzjonali. Huma se jiġu mistiedna wkoll biex jikkooperaw mal-Kummissjoni
fil-qafas ta’ Kumitat Konsultattiv tat-Turiżmu, sabiex jiffaċilitaw
il-monitoraġġ u l-valutazzjoni tal-inizjattiva, li tista’ ssir, fost l-oħrajn,
permezz ta' stħarriġiet apposta fost l-Istati Membri, ir-rappreżentanti
tal-industrija u l-konsumaturi. Il-Programm għall-Kompetittività
tal-Intrapriżi u l-SMEs (COSME) 2014-2020, jistabbilixxi l-objettiv speċifiku
li jtejjeb il-kundizzjonijiet tal-qafas tal-kompetittività u tas-sostenibbiltà
tal-intrapriżi tal-Unjoni fis-settur tat-turiżmu. Bl-objettiv li jtejjeb
l-immaġni u l-profil tal-Ewropa bħala destinazzjoni sostenibbli, responsabbli u
ta' kwalità għolja, il-Kummissjoni se twettaq attivitajiet ta' informazzjoni,
komunikazzjoni u promozzjoni, inkluż il-ħolqien ta’ websajt apposta li
tipprovdi informazzjoni dwar il-Prinċipji tal-Kwalità tat-Turiżmu Ewropew.
Il-Kummissjoni se tiffaċilita wkoll l-iskambju tal-aħjar prassi u esperjenzi. 3.3.3 Evalwazzjoni Evalwazzjoni tal-implimentazzjoni ta’ din
ir-Rakkomandazzjoni hija prevista tliet snin wara li tiġi ppubblikata
fil-Ġurnal Uffiċjali. Il-Kummissjoni se tivvaluta wkoll jekk humiex meħtieġa
miżuri ulterjuri sabiex tittejjeb il-kwalità konsistenti tas-servizz fil-qasam
tat-turiżmu. 4. IMPLIKAZZJONIJIET BAĠITARJI Tista' tiġi prevista allokazzjoni baġitarja
xierqa għall-promozzjoni tal-Prinċipji ta' Kwalità tat-Turiżmu Ewropew, permezz
tal-Programm għall-Kompetittività tal-Intrapriżi u l-SMEs (COSME)[19]. 2014/0043 (NLE) Proposta għal RAKKOMANDAZZJONI TAL-KUNSILL dwar il-Prinċipji tal-Kwalità tat-Turiżmu
Ewropew IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b'mod partikolari l-Artikoli 195 u
292 tiegħu, Wara li kkunsidra l-proposta tal-Kummissjoni
Ewropea, Billi: (1) Fil-Komunikazzjoni tagħha
tat-30 ta' Ġunju 2010 "Europe, the world’ s No 1
tourist destination – a new political framework for Europe"[20] il-Kummissjoni tagħraf
il-bżonn li jiġi promoss l-iżvilupp ta' turiżmu sostenibbli, responsabbli u ta'
kwalità għolja, bħala parti mill-objettiv ġenerali li l-Unjoni tiġi promossa
fil-pajjiżi terzi bħala ġabra ta' destinazzjonijiet ta' kwalità għolja. (2) Il-promozzjoni ta'
prestazzjonijiet ambjentali tajbin tal-akkomodazzjonijiet tat-turiżmu u ta'
s-siti tal-kampjiet u l-aħjar prassi ambjentali tal-maniġment tas-settur
tat-turiżmu huma diġà speċifikament indirizzati fil-livell tal-Unjoni permezz
tal-applikazzjoni tar-Regolament (KE) Nru 66/2010 tal-Parlament Ewropew u
tal-Kunsill[21]
u permezz tar-Regolament (KE) Nru 1221/2009 tal-Parlament Ewropew u
tal-Kunsill[22]. (3) Fl-Unjoni diġà teżisti
varjetà wiesgħa ta’ skemi ta’ kwalità pubbliċi u privati, bil-għan li
l-konsumaturi jiġu pprovduti b'informazzjoni dwar il-kwalità tas-servizzi
tat-turiżmu u l-professjonisti fil-qasam tat-turiżmu tingħatalhom gwida. Dawn
l-iskemi juru diversità sinifikanti fl-ambitu, fil-governanza, fil-metodoloġija
u fil-kriterji. Barra minn hekk, il-ħidma tagħhom hija limitata għal ċerti
subsetturi jew żoni ġeografiċi, u dan jirriżulta f’ambjent frammentat ħafna
fir-rigward tal-evalwazzjoni tal-kwalità tas-servizz tat-turiżmu. (4) Minħabba din
il-frammentazzjoni u n-nuqqas ta’ valutazzjoni konsistenti fl-iskemi tal-kwalità
eżistenti, il-konsumaturi li jivvjaġġaw b'mod transkonfinali fi ħdan l-Unjoni
jew lejn l-Unjoni minn pajjiżi terzi jistgħu jsibuha diffiċli li jitqabblu
s-servizzi koperti minn skemi ta’ kwalità differenti. Dan in-nuqqas ta’
konsistenza jillimita l-kapaċità tal-konsumaturi li jagħmlu għażliet
kompletament infurmati. (5) Minħabba n-nuqqas ta’
valutazzjoni konsistenti tal-iskemi tal-kwalità eżistenti, in-negozji
tat-turiżmu s’issa kellhom kapaċità limitata biex jiksbu l-viżibbiltà vis-à-vis
il-konsumaturi u biex jibbenefikaw minn azzjonijiet koordinati. Dan huwa
speċjalment veru fil-każ tal-intrapriżi mikro u dawk żgħar li ta' spiss ma
jkollhomx l-għodod u riżorsi adegwati biex jippromwovu lilhom infushom u
s-servizz ta’ kwalità għolja li jipprovdu. (6) Sabiex tingħata spinta
lill-kompetittività tal-industrija tat-turiżmu, huwa meħtieġ li n-negozji
tat-turiżmu tal-Unjoni jsiru attraenti għal ċittadini ta' pajjiżi terzi. (7) Għaldaqstant huwa xieraq li
jiġi definit sett ta' Prinċipji tal-Kwalità tat-Turiżmui Ewropew rikonoxxut
mill-konsumaturi u l-industrija. (8) Sabiex jiġi żgurat li jkun
hemm koperatura tal-akbar firxa possibbli tas-subsetturi tat-turiżmu u
fl-istess ħin titħares id-diversità li joffri t-turiżmu tal-Unjoni,
il-Prinċipji tal-Kwalità tat-Turiżmu Ewropew għandhom ikunu ta’ natura
ġenerali, iżda joffru valur miżjud skont l-aspettattivi tal-konsumaturi għal
servizzi tat-turiżmu ta' kwalità għolja. (9) Sabiex jiġi żgurat
il-forniment sodisfaċenti tas-servizzi tat-turiżmu, huwa meħtieġ li jingħata taħriġ
adegwat lill-impjegati rilevanti dwar il-kompiti ddelegati lilhom. L-istess
raġuni teħtieġ li t-taħriġ li l-impjegati jkunu attendew jiġi rreġistrat
f’reġistru ta’ taħriġ. (10) Sabiex jiġi ffaċilitat
it-titjib kontinwu tal-kwalità tas-servizz tat-turiżmu biex jiġu sodisfati
r-rekwiżiti tal-konsumaturi, huwa importanti li jsiru stħarriġiet fost
il-konsumaturi u jiġi żgurat li l-ilmenti jiġu ttrattati. (11) Sabiex jiġu promossi
l-awtentiċità u d-diversità li joffri t-turiżmu tal-Unjoni, huwa meħtieġ li l-konsumaturi
jingħataw informazzjoni aġġornata dwar id-dwana lokali, il-patrimonju,
it-tradizzjonijiet, is-servizzi u l-prodotti. (12) Sabiex titjieb
is-sensibilizzazzjoni dwar il-Prinċipji tal-Kwalità tat-Turiżmu Ewropew, u
b'konsegwenza t'hekk tinkiseb il-fiduċja tal-konsumaturi, huwa importanti li
l-organizzazzjonijiet tat-turiżmu jipprovdu lill-konsumaturi informazzjoni u
gwida relatati ma' dawk il-Prinċipji. (13) Sabiex tiġi ffaċilitata
l-applikazzjoni tal-Prinċipji tal-Kwalità tat-Turiżmu Ewropew fit-territorji
tagħhom kif ukoll il-koordinazzjoni tal-azzjonijiet tagħhom, l-Istati Membri
għandhom jikkoordinaw, jimmonitorjaw u jippromwovu l-Prinċipji tal-Kwalità
tat-Turiżmu Ewropew b’mod trasparenti. (14) Sabiex jiġi żgurat li
l-Prinċipji tal-Kwalità tat-Turiżmu Ewropew jiġu applikati fuq bażi volontarja
mill-organizzazzjonijiet tat-turiżmu li joperaw f'aktar minn Stat Membru wieħed
(organizzazzjonijiet transnazzjonali), huwa neċessarju li l-Istati Membri
jikkooperaw flimkien fid-dawl tal-applikazzjoni tal-Prinċipji tal-Kwalità
tat-Turiżmu Ewropew minn dawk l-organizzazzjonijiet. (15) Sabiex tiġi ffaċilitata
l-applikazzjoni konsistenti tal-Prinċipji tal-Kwalità tat-Turiżmu Ewropew u
tal-koordinazzjoni, monitoraġġ u promozzjoni tagħhom fl-Unjoni kollha kemm hi,
l-Istati Membri huma mistiedna jagħmlu skambju tal-informazzjoni u
tal-esperjenzi. Il-Kummissjoni għandha tiffaċilita dan l-iskambju ta’
informazzjoni. (16) Sabiex tiġi kkomplementata
l-azzjoni tal-Istati Membri fil-promozzjoni tal-kompetittività tas-settur
tat-turiżmu, huwa importanti li l-konsumaturi jiġu infurmati u ssensibilizzati
dwar il-Prinċipji tal-Kwalità tat-Turiżmu Ewropew permezz ta' azzjonijiet ta'
promozzjoni u ta' informazzjoni fi ħdan l-Unjoni, iżda wkoll u b'mod
partikolari f'pajjiżi terzi, fid-dawl tal-objettiv li l-Unjoni tiġi promossa
bħala ġabra ta' destinazzjonijiet ta' kwalità għolja. Barra minn hekk, sabiex
jiġi mħeġġeġ il-ħolqien ta’ ambjent favorevoli għall-iżvilupp tas-settur
tat-turiżmu, huwa wkoll importanti li l-Prinċipji tal-Kwalità tat-Turiżmu
Ewropew jsiru attraenti għal organizzazzjonijiet tat-turiżmu. Għaldaqstant,
huwa importanti li l-Istati Membri u l-Kummissjoni jikkooperaw f’dan
ir-rigward. (17) Sabiex jiġu ffaċilitati
l-monitoraġġ u l-valutazzjoni tal-applikazzjoni tal-Prinċipji tal-Kwalità
tat-Turiżmu Ewropew, l-Istati Membri għandhom rwol b’saħħtu li jinforma
lill-Kummissjoni bl-applikazzjoni tal-Prinċipji tal-Kwalità tat-Turiżmu Ewropew
fit-territorji tagħhom, b’mod partikolari fil-qafas tal-laqgħat tal-Kumitat Konsultattiv
tat-Turiżmu. (18) Sabiex tirreaġixxi
għall-kundizzjonijiet tas-suq li qegħdin jinbidlu b'pass mgħaġġel fil-qasam
tat-turiżmu u sabiex tiżgura l-valur miżjud tal-Prinċipji tal-Kwalità
tat-Turiżmu Ewropew fit-tul, il-Kummissjoni għandha timmonitorja
l-applikazzjoni tagħhom u għandha tevalwa l-implimentazzjoni ta’ din
ir-Rakkomandazzjoni tliet snin wara li tiġi ppubblikata f'Il-Ġurnal
Uffiċjali tal-Unjoni Ewropea. Għall-istess raġuni, il-Kummissjoni għandha
tivvaluta wkoll jekk humiex meħtieġa miżuri addizzjonali biex jiżguraw il-kisba
tal-objettivi riflessi f’din ir-Rakkomandazzjoni, B'DAN JIRRAKKOMANDA: 1. Suġġett u kamp ta’
applikazzjoni Din
ir-Rakkomandazzjoni tistipula sett ta’ Prinċipji tal-Kwalità tat-Turiżmu
Ewropew (minn hawn’ il quddiem msejħa “Prinċipji”) li għandhom jiġu applikati
minn organizzazzjonijiet tat-Turiżmu. 2. Definizzjonijiet Għall-finijiet ta'
din ir-Rakkomandazzjoni, għandhom japplikaw id-definizzjonijiet li ġejjin: (a)
“organizzazzjoni tat-turiżmu” tfisser
organizzazzjoni pubblika jew privata, stabbilita fl-Unjoni u li tipprovdi
servizzi lill-konsumaturi fil-qasam tat-turiżmu fil-livell lokali, reġjonali,
nazzjonali jew transnazzjonali; (b)
“organizzazzjoni tat-turiżmu transnazzjonali”
tfisser organizzazzjoni tat-turiżmu li twettaq attivitajiet fit-territorju, jew
partijiet minnu, ta’ aktar minn Stat Membru wieħed. 3. Prinċipji
tal-Kwalità tat-Turiżmu Ewropew Fejn xieraq
għad-daqs u l-kunċett tan-negozju, l-organizzazzjonijiet tat-turiżmu huma
rrakkomandati li japplikaw il-Prinċipji li ġejjin fl-attivitajiet tagħhom: (a)
Jiżguraw it-taħriġ tal-impjegati, inklużi dawn li
ġejjin: i) it-taħriġ
tal-impjegati kollha involuti fl-għoti ta’ servizzi direttament
lill-konsumaturi biex jiżguraw li dawn iwettqu b'mod sodisfaċenti l-kompiti
delegati lilhom; ii) ir-reġistrar
tat-taħriġ li jattendu l-impjegati f’reġistru tat-taħriġ stabbilit għal dan
il-għan; iii) il-ħatra
ta’ koordinatur tal-kwalità sabiex jiżgura approċċ koerenti għall-maniġment
tal-kwalità tas-servizzi pprovduti u l-involviment tal-impjegati rilevanti
fil-proċess tal-kwalità; (b)
Japplikaw politika għas-sodisfazzjon
tal-konsumatur, inklużi dawn li ġejjin: i) it-twaqqif
ta' mekkaniżmu biex jiġu ttrattati l-ilmenti tal-konsumaturi fuq il-post
tal-kunsinna tas-servizz jew permezz tal-Internet; ii) l-iżgurar
li l-ilmenti jiġu ttrattati mingħajr dewmien; iii) it-twettiq
ta' stħarriġiet dwar is-sodisfazzjon tal-konsumatur u l-konsiderazzjoni
tar-riżultati tagħhom għat-titjib tal-kwalità tas-servizz; (c)
Ikollhom u jimxu ma' pjan iddokumentat għat-tindif
u l-manutenzjoni għall-faċilitajiet jew għat-tagħmir fejn xieraq; (d)
Jagħmlu l-informazzjoni disponibbli
għall-konsumaturi, inklużi dawn li ġejjin: i) informazzjoni
dwar id-dwana lokali, il-wirt, it-tradizzjonijiet, is-servizzi u l-prodotti; ii) informazzjoni
dwar l-aċċessibbiltà fir-rigward tas-servizzi pprovduti; iii) informazzjoni
dwar l-aspetti tas-sostenibbiltà fir-rigward tas-servizzi pprovduti; iv) informazzjoni
dwar il-Prinċipji; (e)
Jiżguraw li din l-informazzjoni tkun korretta,
affidabbli, ċara u aċċessibbli f’minn tal-inqas lingwa barranija li tkun
l-aktar relevanti, jekk xieraq għall-kunċett tal-post u tan-negozju. 4. L-attivitajiet
tal-Istati Membri 4.1. L-Istati
Membri għandhom jikkoordinaw, jissorveljaw u jippromovu l-applikazzjoni tal-Prinċipji
fit-territorji rispettivi tagħhom. Għal dawn il-finijiet, l-Istati Membri huma
mistiedna: (a)
jissorveljaw l-applikazzjoni tal-Prinċipji
stipulati fil-punt 3 minn organizzazzjonijiet tat-turiżmu; (b)
jikkoordinaw mal-Istati Membri l-oħra,
l-attivitajiet marbuta mal-Prinċipji u mal-applikazzjoni tagħhom; (c)
jippromwovu l-Prinċipji fost l-organizzazzjonijiet
tat-turiżmu; (d)
jiżguraw, f’koperazzjoni mal-Istati Membri l-oħra,
li jkunu disponibbli għall-organizzazzjonijiet tat-turiżmu informazzjoni u
gwida adegwati; (e)
jikkooperaw ma’ xulxin sabiex jiffaċilitaw
l-applikazzjoni tal-Prinċipji minn organizzazzjonijiet tat-turiżmu
transnazzjonali. 4.2. Huwa rakkomandat
ukoll li l-imġiba tal-attivitajiet tal-Istat Membru tiggarantixxi
t-trasparenza. 5. Il-kooperazzjoni
bejn l-Istati Membri u l-Kummissjoni L-Istati Membri
huma mistiedna jgħarrfu lill-Kummissjoni dwar l-attivitajiet imsemmija
fil-punt 4 u jikkooperaw mal-Kummissjoni fid-dawl tal-monitoraġġ u
l-valutazzjoni tagħhom, kif ukoll tal-inizjattivi tagħhom għas-sensibilizzazzjoni
u l-promozzjoni. 6. Monitoraġġ u
valutazzjoni 6.1. Il-Kummissjoni għandha tivvaluta
l-implimentazzjoni ta’ din ir-Rakkomandazzjoni sa [id-data
għandha tiġi definita 3 snin wara l-pubblikazzjoni tar-Rakkomandazzjoni
fil-Ġurnal Uffiċjali] 6.2. Il-Kummissjoni
għandha tivvaluta wkoll jekk għandhomx jiġu proposti miżuri oħrajn biex itejbu
l-konsistenza tal-kwalità tas-servizz tat-turiżmu fl-Istati Membri riflessi
f’din ir-Rakkomandazzjoni. 7. Dispożizzjonijiet
finali Din
ir-Rakkomandazzjoni għandha tiġi ppubblikata f'Il-Ġurnal Uffiċjali
tal-Unjoni Ewropea. Magħmul fi Brussell, Għall-Kunsill Il-President [1] Il-fornituri tradizzjonali tas-servizzi tal-ivvjaġġar u
tat-turiżmu (lukandi, ristoranti, aġenziji tal-ivvjaġġar, kiri ta’ karozza,
kumpaniji tal-ajru charter, kowċis tat-turisti, bastimenti tal-kruċieri, eċċ.)
joffru oġġetti u servizzi direttament lil viżitaturi. [2] B’mod partikolari, il-kumpaniji tad-distribuzzjoni,
tal-kostruzzjoni u tat-trasport b’mod ġenerali (l-ivvjaġġar bl-ajru,
bil-ferrovija, bil-baħar, bix-xarabank jew bil-kowċ, eċċ.) u s-settur kulturali
(inklużi l-industriji kulturali u dawk kreattivi). [3] WTTC 2012
http://www.wttc.org/site_media/uploads/downloads/european_union2012.pdf [4] UNWTO World Tourism Barometer, Mejju 2012. [5] L-Artikolu 6(d) tat-"Trattat dwar
il-Funzjonament tal-Unjoni Ewropea". Barra minn hekk, l-Artikolu 195
tat-TFUE jipprevedi għall-UE li "Għal dan il-għan, l-azzjoni tal-Unjoni
għandu jkollha l-għan li (a) tinkoraġġixxi l-ħolqien ta' ambjent favorevolii
għall-iżvilupp tal-impriżi f'dan is-settur; (b) li tippromwovi l-kooperazzjoni
bejn l-Istati Membri, b'mod partikolari bl-iskambju tal-prassi t-tajba". [6] L-Ewropa, fl-ewwel post fid-dinja bħala destinazzjoni
tat-turisti – qafas politiku ġdid għat-turiżmu fl-Ewropa (Europe, the
world's N°1 tourist destination - a new political framework for tourism in
Europe) COM(2010) 352
finali. [7] P7_TA-PROV(2011)0407 –
Ir-Reżoluzzjoni tal-Parlament Ewropew ta' 2709/2011 dwar l-Ewropa,
id-destinazzjoni li tinsab fl-ewwel post fid-dinja – qafas politiku ġdid
għat-turiżmu fl-Ewropa. [8] Ecorys (2009), p. 2. [9] http://europa.eu/rapid/press-release_IP-12-1177_mt.htm [10] COM (2010)352 finali jipprevedi l-ħolqien ta’ marka
"Ewropa”, biex tikkumplimenta l-isforzi promozzjonali fil-livell nazzjonali
u dak reġjonali u biex tippermetti lid-destinazzjonijiet Ewropej jiddistingwu lilhom
infushom minn destinazzjonijiet internazzjonali oħrajn (Azzjoni 18) [11] Din titwettaq taħt għotja ad-hoc f'kooperazzjoni
mal-Kummissjoni Ewropea għat-Turiżmu, bl-objettiv ġenerali li tiġi ddefinita
strateġija ta' mmarkar u ta' kummerċjalizzazzjoni għad-Destinazzjoni Ewropa
http://ec.europa.eu/enterprise/sectors/tourism/international/index_en.htm [12] COM(2012) 649 finali [13] Attwalment hemm 42 pajjiż u entità li ċ-ċittadini tagħhom
ma għandhomx bżonn viża biex jivvjaġġaw lejn l-UE. Iċ-ċittadini minn 16-il Stat
gżira tal-Karibew u Stati gżejjer tal-Paċifiku dalwaqt se jkunu jistgħu
jivvjaġġaw lejn iż-żona ta' Schengen mingħajr ma jkollhom bżonn viża. L-għan
huwa s-simplifikazzjoni tal-ivvjaġġar lejn iż-żona ta' Schengen, kif ukoll lejn
Ċipru, il-Bulgarija u r-Rumanija għaċ-ċittadini ta’ dawn il-pajjiżi.
Il-proposta tal-Kummissjoni tipprevedi li l-eżenzjoni mill-viża tkun
reċiprokata permezz tal-ftehimiet dwar ir-rinunzja tal-viża, sabiex jiġi żgurat
reġim sħiħ mingħajr viża għaċ-ċittadini kollha tal-UE li jixtiequ jivvjaġġaw
lejn dawn il-pajjiżi.
http://europa.eu/rapid/press-release_IP-12-1179_en.htm?locale=en [14] Diġà teżisti protezzjoni ġenerali tal-konsumatur tal-UE,
pereżempju d-Direttiva 2011/83/UE dwar id-Drittijiet tal-Konsumatur. [15] L-Impatti Stmati tal-Alternattivi possibbli u
tal-Istrumenti Legali tat-Tikketta Ġenerika Ewropea tat-Turiżmu ta' Kwalità,,
CEPS, Settembru 2012, disponibbli onlajn fuq: http://ec.europa.eu/enterprise/newsroom/cf/_getdocument.cfm?doc_id=7655,
minn hawn 'il quddiem CEPS (2012). [16] http://ec.europa.eu/enterprise/newsroom/cf/itemdetail.cfm?item_id=5642 [17] http://ec.europa.eu/enterprise/sectors/tourism/public-consultation-etq/index_en.htm [18] CEPS (2012) [19] Ir-Regolament li jistabbilixxi Programm
għall-Kompetittività tal-Intrapriżi u għall-SMEs 2014-2020, Ir-Regolament (UE)
Nru 1287/2013, ĠU L 347, p 33 [20] COM(2010) 352 finali. [21] Ir-Regolament (KE) Nru 66/2010 tal-Parlament Ewropew u
tal-Kunsill tal-25 ta’ Novembru 2009 dwar skema ta' Ekotikketta
tal-UE (ĠU L 27, 30.1.2010, p. 1). [22] Ir-Regolament (KE) Nru 1221/2009 tal-Parlament
Ewropew u tal-Kunsill tal-25 ta’ Novembru 2009 dwar
il-parteċipazzjoni volontarja ta’ organizzazzjonijiet fi skema Komunitarja ta’
ġestjoni u verifika ambjentali (EMAS), li jħassar ir-Regolament (KE)
Nru 761/2001 u d-Deċiżjonijiet tal-Kummissjoni 2001/681/KE u 2006/193/KE (ĠU L 342, 22.12.2009, p. 1).