This document is an excerpt from the EUR-Lex website
Document 52014DC0709
REPORT FROM THE COMMISSION TO THE EUROPEAN PARLIAMENT AND THE COUNCIL on the implementation in 2011-2012 of Regulation (EC) No 561/2006 on the harmonisation of certain social legislation relating to road transport and of Directive 2002/15/EC on the organisation of the working time of persons performing mobile road transport activities (27th report from the Commission on the implementation of the social legislation relating to road transport)
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni fl-2011-2012 tar-Regolament (KE) Nru 561/2006 dwar l-armonizzazzjoni ta' ċerta leġiżlazzjoni soċjali li għandha x'taqsam mat-trasport bit-triq u tad-Direttiva 2002/15/KE dwar l-organizzazzjoni tal-ħin tax-xogħol ta’ ħaddiema li jwettqu attivitajiet mobbli tat-trasport fit-toroq
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni fl-2011-2012 tar-Regolament (KE) Nru 561/2006 dwar l-armonizzazzjoni ta' ċerta leġiżlazzjoni soċjali li għandha x'taqsam mat-trasport bit-triq u tad-Direttiva 2002/15/KE dwar l-organizzazzjoni tal-ħin tax-xogħol ta’ ħaddiema li jwettqu attivitajiet mobbli tat-trasport fit-toroq
/* COM/2014/0709 final */
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni fl-2011-2012 tar-Regolament (KE) Nru 561/2006 dwar l-armonizzazzjoni ta' ċerta leġiżlazzjoni soċjali li għandha x'taqsam mat-trasport bit-triq u tad-Direttiva 2002/15/KE dwar l-organizzazzjoni tal-ħin tax-xogħol ta’ ħaddiema li jwettqu attivitajiet mobbli tat-trasport fit-toroq /* COM/2014/0709 final */
I.
Introduzzjoni Dan ir-rapport
janalizza l-implimentazzjoni, min-naħa tal-Istati Membri, tal-erba' atti
leġiżlattivi interrelatati li jistabilixxu regoli soċjali
fil-qasam tat-trasport bit-triq u s-sistema ta' infurzar tagħhom. Dawn
l-atti leġiżlattivi huma: Ir-Regolament (KE) Nru 561/2006[1], li
jistabbilixxi regoli dwar il-ħinijiet tas-sewqan, il-pawżi u
l-perjodi ta’ mistrieħ għal xufiera professjonali; Id-Direttiva
2006/22/KE[2],
li tistabbilixxi r-rekwiżiti minimi għall-infurzar ta’ dawk
ir-regoli; Ir-Regolament tal-Kunsill (KEE) Nru 3821/85[3] dwar
apparat ta’ reġistrazzjoni, jiġifieri l-għodda prinċipali
għall-kontroll tal-konformità tax-xufiera mar-regoli soċjali u
d-Direttiva 2002/15/KE[4],
li tistabbilixxi dispożizzjonijiet komplementari dwar l-organizzazzjoni
tal-ħin tax-xogħol ta’ ħaddiema li jwettqu attivitajiet mobbli
tat-trasport fit-toroq (minn hawn ’il quddiem imsejħa “id-Direttiva dwar
il-Ħin tax-Xogħol għat-Trasport fit-Toroq"). L-Artikolu 17
tar-Regolament (KE) Nru 561/2006 jistipula li kull sentejn l-Istati Membri
għandhom jikkomunikaw l-informazzjoni meħtieġa biex jippermettu
li l-Kummissjoni tfassal rapport dwar l-applikazzjoni ta’ dak ir-Regolament u
dwar l-iżviluppi li jkunu saru fl-oqsma inkwistjoni. L-Artikolu 13
tad-Direttiva 2002/15/KE jistipula li l-Istati Membri għandhom
jippreżentaw rapporti lill-Kummissjoni fir-rigward tal-implimentazzjoni
ta’ din id-Direttiva, filwaqt li jindikaw ukoll l-opinjonijiet
taż-żewġ naħat tal-industrija. Ir-rapporti dwar id-Direttiva
2002/15/KE u r-Regolament (KE) Nru 561/2006 jistgħu jiġu
ppreżentati f’dokument wieħed, peress li ż-żewġ atti
leġiżlattivi jkopru l-istess perjodu ta’ rappurtar ta’ sentejn u
jistabbilixxu regoli komplementari għax-xufiera professjonali. Dan ir-rapport
ikopri l-perjodu 2011-2012. Dan huwa bbażat prinċipalment fuq
ir-rapporti nazzjonali, li l-iskadenza għas-sottomissjoni tagħhom
għalqet fit-30 ta’ Settembru 2013. L-għan tiegħu hu li
jagħti ħarsa ġenerali lejn kif l-Istati Membri implimentaw
is-sensiela ta’ atti leġiżlattivi msemmija hawn fuq, u li jenfasizza
l-isfidi ewlenin fil-qasam tal-infurzar u l-applikazzjoni tar-regoli
fis-seħħ. Ir-rapport jinkludi dejta kemm kwantitattiva kif ukoll
kwalitattiva dwar il-kontrolli mwettqa mal-ġenb tat-triq kif ukoll
fil-post tan-negozju, dwar il-kontravvenzjonijiet identifikati, kif ukoll
informazzjoni dwar l-implimentazzjoni tad-Direttiva dwar il-Ħin
tax-Xogħol għat-Trasport fit-Toroq. Ir-rapport tal-Kummissjoni huwa
kkumplimentat b'Dokument ta' Ħidma tal-Persunal tal-Kummissjoni li
jinkludi informazzjoni supplimentari dwar il-penali, il-kooperazzjoni bejn
l-Istati Membri, kummenti mingħand l-awtoritajiet tal-infurzar u
statistika dettaljata. Ir-rapport huwa
maqsum f'erba’ taqsimiet li jkopru diversi aspetti tal-implimentazzjoni
tal-leġiżlazzjoni soċjali. It-Taqsima I tipprovdi sommarju dwar
il-kwalità u l-puntwalità tas-sottomissjoni ta' dejta nazzjonali. It-Taqsima II
tipprevedi analiżi sħiħa tad-dejta kwantitattiva nazzjonali
pprovduta fir-rigward tal-kontrolli u l-infrazzjonijiet, filwaqt li t-Taqsima
III tagħti deskrizzjoni fil-qosor dwar l-implimentazzjoni min-naħa
tal-Istati Membri tad-Direttiva 2002/15/KE. Fit-Taqsima IV jiġu
ppreżentati l-konklużjonijiet ewlenin li ntlaħqu. L-għanijiet
u d-dispożizzjonijiet ewlenin tal-leġiżlazzjoni soċjali
fit-trasport bit-triq, kif ukoll aspetti oħra u l-istatistika dettaljata
dwar ir-riżultati tal-kontrolli li twettqu, huma deskritti fid-Dokument
ta’ Ħidma tal-Persunal tal-Kummissjoni li jakkumpanja dan ir-rapport. Preżentazzjoni
tad-dejta Ir-rapporti
nazzjonali dwar l-implimentazzjoni tad-dispożizzjonijiet tad-Direttiva
2002/15/KE u tar-Regolament (KE) Nru 561/2006 għandhom jitressqu
permezz tal-formola standard stabbilita fid-Deċiżjoni tal-Kummissjoni
2009/810/KE[5].
Din il-formola standard tgħaqqad flimkien ir-rekwiżiti ta’ rappurtar
ta’ dawn iż-żewġ atti leġiżlattivi u, permezz ta’
format ta' rappurtar interattiv, tiġbor dejta kwantitattiva u kwalitattiva
li tikkostitwixxi fatturi li huma kruċjali għal dan ir-rapport. Il-Kummissjoni
tinnota li, b’mod ġenerali, l-Istati Membri pprovdew rapporti nazzjonali
ta’ kwalità aħjar u b'mod aktar puntwali minn dawk tas-snin
preċedenti, u tħeġġiġhom biex ikomplu f’din it-triq.
Dan japplika b’mod partikolari għad-dejta dwar l-implimentazzjoni
tar-Regolament (KE) Nru 561/2005. Id-Dokument ta’ Ħidma tal-Persunal
tal-Kummissjoni li jakkumpanja dan ir-rapport (minn hawn ’il quddiem
imsejjaħ “id-dokument ta' akkumpanjament”) fih deskrizzjoni aktar
dettaljata dwar it-tressiq tad-dejta. II.
Analiżi tad-dejta dwar l-implimentazzjoni
tar-Regolament (KE) Nru 561/2006 1.
Kontrolli Skont
l-Artikolu 2 tad-Direttiva 2006/22/KE, l-għadd minimu ta’ verifiki
fl-2011 u l-2012 għandu jkopri mill-inqas 3 % tal-ġranet li
jkunu nħadmu mis-sewwieqa tal-vetturi li jaqgħu fi ħdan il-kamp
ta’ applikazzjoni tar-Regolamenti (KE) Nru 561/2006 u (KEE) Nru 3821/85[6]. Grafika 1
- Għadd totali ta’ jiem ta’ xogħol ikkontrollati, għal kull Stat
Membru Il-Grafika 1
tagħti ħarsa ġenerali lejn l-għadd ta’ jiem ta’ xogħol
li ġew ikkontrollati f’kull Stat Membru, fil-perjodi ta' rappurtar attwali
u f'dawk preċedenti. Bħala medja, fl-għadd totali ta’ jiem
ta’ xogħol ikkontrollati fl-UE ġiet irreġistrata żieda ta’
8.7 %, minn kważi 146 miljun għal madwar 158.6 miljun jiem ta'
xogħol ikkontrollati. Din iż-żieda tikkonferma l-impenn
ġenerali fost l-Istati Membri favur it-titjib tal-kontrolli ta’ konformità
mar-regoli soċjali fit-trasport bit-triq. Ta’ min jinnota li l-kontrolli
kollha twettqu minn għadd iżgħar, b’mod sinifikanti, ta’
uffiċjali ta’ infurzar għall-Istati Membri kollha. Ħarsa
mill-qrib lejn l-għadd ta’ jiem ta' xogħol li ġew ikkontrollati
b’mod effettiv fir-rigward tal-għadd minimu ta’ jiem ta' xogħol li
għandhom jiġu kkontrollati (Grafika 2) turi li l-biċċa
l-kbira tal-Istati Membri wettqu aktar kontrolli minn kemm meħtieġ
mid-Direttiva 2006/22/KE. Stati Membri li ma laħqux il-livell limitu,
bħall-Greċja, il-Pajjiżi l-Baxxi, id-Danimarka, l-Italja u
l-Latvja, intalbu jieħdu azzjoni korrettiva xierqa biex jirrimedjaw din
is-sitwazzjoni. Il-Kummissjoni se tevalwa l-ħtieġa li tittieħed
azzjoni sabiex jiġi żgurat li d-Direttiva 2006/22/KE tiġi
applikata b'mod korrett. Id-dokument ta’
akkumpanjament jinkludi deskrizzjoni dettaljata dwar il-konformità mal-livell
limitu. Grafika 2:
Perċentwal ta’ jiem ta' xogħol li ġew ikkontrollati għal
kull Stat Membru Rigward it-tip
ta’ kontrolli, l-Artikolu 2 tad-Direttiva 2006/22/KE jistabbilixxi
l-proporzjon bejn l-għadd ta’ kontrolli mal-ġenb tat-triq (f’termini
ta’ jiem ta' xogħol li għandhom jiġu kkontrollati) u l-kontrolli
li jsiru fil-post tan-negozju, li għandhom jammontaw għal mill-inqas
30 % u 50 % rispettivament. Għandu jiġi enfasizzat li,
skont l-Artikolu 2 tad-Direttiva 2006/22/KE, il-kalkolu ta’ dan
il-proporzjon huwa bbażat fuq l-għadd ta’ kontrolli mwettqa b'mod
effettiv minn kull Stat Membru u mhux fuq in-numru minimu ta’ jiem ta'
xogħol li għandhom jiġu kkontrollati. Madankollu,
għall-perjodu ta’ rapportar attwali, il-biċċa l-kbira
tal-kontrolli jitwettqu mal-ġenb tat-triq. Bħala medja, 80 %
tal-kontrolli kollha saru mal-ġenb tat-triq, u dan juri titjib
żgħir mit-82 % li ġie rreġistrat għall-perjodu
ta’ rappurtar preċedenti. L-Irlanda biss kienet taħt il-livell
limitu għall-kontrolli mal-ġenb tat-triq. 1.1
Kontrolli mal-ġenb tat-triq B’kollox, matul
il-perjodu ta’ bejn l-2011 u l-2012, iktar minn 8.6[7] miljun
vettura u madwar 8.7 miljun xufiera ġew ikkontrollati waqt kontrolli
mal-ġenb tat-triq. Dawn il-valuri juru tnaqqis ta’ 11.3 % u
19.4 % rispettivament meta mqabbla mal-perjodu ta’ rappurtar preċedenti,
u jirriżultaw minn żidiet korrispondenti fil-kontrolli fil-post
tan-negozju. Ir-raġuni għall-għadd akbar ta’ sewwieqa
mill-għadd ta’ vetturi għandha żewġ aspetti
prinċipali: ekwipaġġi doppji tas-sewqan, kif ukoll informazzjoni
nieqsa dwar din il-kwistjoni min-naħa tad-Danimarka rigward l-għadd
ta’ vetturi li jsirulhom il-kontrolli mal-ġenb tat-triq. Fil-biċċa
l-kbira tagħhom, il-kontrolli fl-Istati Membri ikkonċernaw vetturi
nazzjonali u sewwieqa nazzjonali, li jirrappreżentaw 69 % u 68 %
rispettivament tal-vetturi jew tas-sewwieqa kollha li sarulhom kontrolli
mal-ġenb tat-triq. Kien biss fi tmien Stati Membri, jiġifieri
fl-Awstrija, Franza, l-Ungerija, il-Belġju, il-Litwanja, il-Lussemburgu,
Malta u s-Slovenja, li x-xejra kienet differenti u aktar vetturi jew sewwieqa
mhux nazzjonali ġew soġġetti għal kontroll. F’ċerti
każijiet, dan jista' jiġi spjegat mid-daqs jew mill-pożizzjoni
ġeografika ta’ dawn l-Istati Membri. Ir-rati dettaljati ġew inkorporati
fid-dokument ta' akkumpanjament. Billi n-nondiskriminazzjoni hija wieħed
mill-prinċipji fundamentali tat-Trattati tal-UE, il-Kummissjoni tista’
tikkunsidra li tieħu l-miżuri xierqa sabiex jiġi żgurat li
jkun hemm trattament ugwali ta’ xufiera u operaturi fl-Istati Membri fejn
il-kontrolli jsiru b’mod aktar frekwenti fir-rigward ta’ sewwieqa u operaturi
mhux residenti. 1.2
Kontrolli fil-post tan-negozju Kien hemm
progress ċar fl-għadd ta’ impriżi li sarulhom kontrolli
mill-Istati Membri. Dan il-proġress ġie rreġistrat f'livelli li
jaqbżu d-doppju tal-livelli li ġew irrappurtati fil-perijodu ta’
rappurtar 2007-2008. Fis-snin 2011-2012, dawn il-livelli kienu ammontaw
għal 146 000[8],
u żdiedu b’42 % meta mqabbel maċ-ċifra ta' 103 000 li
ġiet irrappurtata għall-perjodu ta' rappurtar preċedenti. Aktar
minn 31.7 miljun jum ta’ xogħol ġew ikkontrollati fil-post
tan-negozju, li jfisser li r-rata ta’ tkabbir naqset minħabba li
ż-żieda bejn il-perjodu ta’ rappurtar tal-2007-2008 u dak
tal-2009-2010 kienet ta’ 79 %, filwaqt li żdiedet b’20 % bejn
il-perjodu kurrenti u l-perjodu preċedenti. Id-dinamika ta’ dawn
l-iżviluppi għandha titqies f’korrelazzjoni ma’ żidiet
fil-livelli limitu minimi li seħħew matul il-perjodi ta’ rappurtar
preċedenti[9].
Għalhekk iż-żieda ġenerali b’8.7 % fl-għadd ta’
jiem ta’ xogħol li ġew ikkontrollati kemm mal-ġenb tat-triq kif
ukoll fil-post tan-negozju, u t-tnaqqis fl-għadd ta' vetturi u xufiera li
ġew ikkontrollati mal-ġenb tat-triq, ikkontribwixxew flimkien lejn
l-attivitajiet li twettqu b'mod aktar intensiv fil-post tan-negozju. 2.
Kontravvenzjonijiet L-Istati Membri
kollha pprovdew dejta dwar il-kontravvenzjonijiet li ġew identifikati,
minkejja li dan għamluh b'livell diverġenti ta’ dettalji. Wara
żieda sinifikanti u kostanti fl-għadd ta' konravvenzjonijiet li
ġew irrappurtati tul l-aħħar 6 snin fil-livell Ewropew, li hija
marbuta ma’ żidiet fl-għadd minimu ta’ jiem ta' xogħol li
għandhom jiġu kkontrollati, hemm inverżjoni fix-xejra
għall-perjodu ta’ rappurtar attwali li wasslet għal tnaqqis ta’ 14 %
meta mqabbel mal-aħħar perjodu fir-rigward tal-għadd ta'
kontravvenzjonijiet li ġew individwati. Dan in-numru għandu
jitqies flimkien maż-żieda ta’ 8.7 % fl-għadd ta’ jiem ta’
xogħol ikkontrollati. F’valuri reali dan juri tnaqqis minn 4.5 miljun
kontravvenzjoni rrappurtati fl-2009-2010 għal madwar 3.9 miljun
kontravvenzjoni rrappurtati fil-perjodu ta’ rappurtar attwali. Din il-bidla
tista’ tiġi interpretata bħala konformità aħjar
mad-dispożizzjonijiet tal-leġiżlazzjoni soċjali grazzi
għal prattiki ta’ infurzar stabbiliti sew u għarfien akbar dwar
ir-regoli soċjali fost ix-xufiera. Dan huwa bbażat fuq
is-suppożizzjoni li l-prattiki ta’ manipulazzjoni tat-takografi ma fixklux
b’mod sinifikanti is-sejbiet li rriżultaw mill-kontrolli. It-tabella ta'
hawn taħt turi li l-proporzjonijiet bejn il-kategoriji ta’
kontravvenzjonijiet għandhom livelli simili meta mqabbla mal-perjodi
preċedenti ta’ rappurtar. It-tnaqqis żgħir li ġie osservat
fir-rigward tal-kontravvenzjonijiet relatati ma' pawżi fil-ħin
tas-sewqan u n-nuqqas ta' reġistri għal xogħol ieħor huma
kontrobilanċjati minn żidiet fir-reġistri dwar il-ħin
tas-sewqan u minn żidiet f'kontravvenzjonijiet relatati mal-apparat ta'
reġistrazzjoni. Perjodu || Pawżi || Perjodi ta' mistrieħ || Ħin ta' sewqan || Reġistri tal-ħinijiet ta' sewqan || Apparat ta' reġistrazzjoni || Nuqqas/disponibbiltà ta’ reġistri għal xogħol ieħor 2011-2012 || 26% || 24% || 19% || 17% || 8% || 6% 2009-2010 || 29% || 23% || 18% || 15% || 5% || 8% 2007-2008 || 30% || 25% || 20% || 14% || 10% || 1% Tabella 1 -
Kategoriji ta’ kontravvenzjonijiet osservati mal-ġenb tat-triq u
fil-post tan-negozju Grafika
3 - Kategoriji ta’ kontravvenzjonijiet osservati mal-ġenb tat-triq u
fil-post tan-negozju Il-kategoriji
ta’ kontravvenzjonijiet osservati mal-ġenb tat-triq u fil-post tan-negozju
huma deskritti b’mod separat fid-dokument ta’ akkumpanjament. Meta mqabbla
mal-perjodu ta’ rappurtar ta’ qabel, bejn l-2011 u l-2012 ir-rata medja ta’
kontravvenzjonijiet identifikati naqset b’mod sinifikanti bi 22 %, u
rriżultat fi 2.43 kontravvenzjonijiet għal kull 100 ġurnata ta'
xogħol li sarulhom il-kontrolli. Jidher li l-kontrolli fil-post
tan-negozju huma aktar effikaċi mill-kontrolli ad hoc mal-ġenb
tat-triq minħabba li r-rata ta’ detezzjoni fil-post tan-negozju hija 3
darbiet ogħla minn dik għall-kontrolli mal-ġenb tat-triq.
Madankollu, għandu jiġi nnutat li fil-perjodu ta’ rappurtar
preċedenti r-rata ta’ detezzjoni fil-post tan-negozju kienet 5 darbiet
ogħla minn dik ta' mal-ġenb tat-triq. Din il-bidla hija dovuta b'mod
prinċipali għal tnaqqis konsiderevoli fir-rati ta’ detezzjoni fil-post
tan-negozju minn 8.65 fis-snin 2009-2010 għal 5.29 f’dan il-perjodu ta’
rappurtar. Hemm inugwaljanzi kbar fid-detezzjoni tal-kontravvenzjonijiet
fil-post tan-negozju għal kull 100 jum li għalilhom saru l-kontrolli
bejn l-Istati Membri, li jvarjaw minn 0.01 fil-Bulgarija sa 22.38
fil-Ġermanja. Jidher li l-bidla fil-medja tar-rata ta' detezzjoni
tal-kontravvenzjonijiet tal-UE hija affettwata minn tnaqqis sinifikanti (ta'
27 %) fl-għadd ta’ kontravvenzjonijiet irrappurtati fil-post
tan-negozju fil-Ġermanja, li f’dan il-perjodu ta’ rappurtar xorta
waħda kellha l-akbar sehem ta' kontravvenzjonijiet identifikati fl-Ewropa
(53.9 %). Grafika 4
- Għadd ta’ kontravvenzjonijiet individwati għal kull 100 jum ta’
xogħol ikkontrollati fl-2007-2008, l-2009-2010 u l-2011-2012 Minkejja l-fluttwazzjonijiet
diverġenti fi Stati Membri differenti fir-rigward tan-numru ta’
kontravvenzjonijiet individwati għal kull perjodu ta’ rappurtar[10],
bħala medja hemm tnaqqis ċar fl-għadd ta' kontravvenzjonijiet
irrappurtati, li saħansitra jidher b'mod aktar ċar meta titqies
iż-żieda fl-għadd ta’ jiem ta’ xogħol ikkontrollati.
Id-dokument ta' akkumpanjament jinkludi deskrizzjoni dettaljata tar-rati ta’
detezzjoni fl-Istati Membri. Dawn id-differenzi fir-rati ta’ detezzjoni juru
li l-Unjoni Ewropea għadha ‘l bogħod milli twaqqaf żona
armonizzata ta' infurzar minħabba riżorsi u prattiki ta’ infurzar
diverġenti fil-kontroll tal-konformità mal-leġiżlazzjoni
tat-trasport bit-triq, u minħabba sistemi ta’ penalizzazzjoni
diverġenti. 2.1
Kontravvenzjonijiet identifikati mal-ġenb tat-triq Fil-perjodu
2011-2012 ġew individwati 2.2 miljun kontravvenzjoni mal-ġenb
tat-triq fil-livell Ewropew, li kienu jikkostitwixxu 58 %
tal-kontravvenzjonijiet kollha li ġew individwati kemm mal-ġenb
tat-triq kif ukoll fil-post tan-negozju. Dan jindika tnaqqis f’termini
kwantitattivi ta' kważi 50 000, li jfisser tnaqqis ta' 2 % meta
mqabbel mal-perjodu ta’ rappurtar preċedenti. Għal kull 100 jum ta’
xogħol ikkontrollat ġew individwati 1.74 kontravvenzjoni meta mqabbel
mal-1.9 li ġew individwati fil-perjodu ta' rappurtar preċedenti. Bħala
medja, 64 % tal-kontravvenzjonijiet ġew individwati fuq vetturi ta’
persuni nazzjonali[11],
u dan jikkorrelata mar-rata ta’ 69 % tal-vetturi ta’ persuni nazzjonali li
sarulhom il-kontrolli fl-Ewropa. Madankollu, hemm Stati Membri fejn
l-għadd ta’ offiżi li ġew individwati kienu relatati ma’ persuni
mhux nazzjonali, jiġifieri l-Lussemburgu (75 %), il-Belġju
(72 %), il-Litwanja (59 %), l-Isvezja (57 %), il-Bulgarija (56 %),
is-Slovenja (55 %), l-Awstrija (55 %), Franza (54 %) u r-Renju
Unit (53 %). Din ix-xejra tista’ tiġi spjegata mill-fatt li l-Istati
Membri msemmija hawn fuq wettqu aktar kontrolli fuq vetturi ta’ persuni mhux
nazzjonali, bl-eċċezzjoni tal-Bulgarija, l-Isvezja u r-Renju Unit.
Fil-każ ta’ dawn it-tliet Stati Membri, il-kontravvenzjonijiet minn
persuni mhux residenti li ġew individwati huma ħafna iktar frekwenti,
saħansitra b'mod mhux proporzjonat. Dan b’mod partikolari fil-każ
tal-Bulgarija, fejn 25 % tal-vetturi ta’ persuni mhux nazzjonali wassal
għal 56 % tal-kontravvenzjonijiet li saru, u fil każ
tal-Isvezja, li wettqet 34 % tal-kontrolli fuq vetturi ta' persuni mhux
nazzjonali, li wassal għad-detezzjoni ta' 57 %
tal-kontravvenzjonijiet individwati. Iż-żieda fil-kontravvenzjonijiet
imwettqa minn persuni mhux residenti tista' tkun allarmanti fl-Isvezja meta
jitqies li, meta mqabbel mal-perjodu ta’ rappurtar preċedenti, ir-rata
żdiedet minn 31 % għal 57 %. Ta’ min isemmi wkoll li din
ix-xejra għadha għaddejja mill-perjodu ta’ rappurtar preċedenti
fl-Istati Membri tal-Belġju, il-Bulgarija, Franza, il-Lussemburgu,
is-Slovenja u r-Renju Unit. 2.2
Kontravvenzjonijiet identifikati fil-post tan-negozju Matul
il-perijodu ta’ rappurtar attwali, b’kollox l-Istati Membri rrappurtaw
id-detezzjoni ta' madwar 1.6 miljun kontravvenzjoni fil-post tan-negozju fuq
il-proprjetà ta' impriżi, li jikkostitwixxu 42 % tal-għadd
globali tal-kontravvenzjonijiet. Dan jindika tnaqqis ta’ 26 % meta mqabbel
mal-perjodu biennali preċedenti. Dawn iċ-ċifri għandhom
jitqiesu b’korrelazzjoni mal-għadd ta’ impriżi li sarulhom
il-kontrolli, u li żdied bi 42 %[12].
Meta jiġu kkunsidrati dawn iż-żewġ aspetti, jista'
jiġi nnutat it-titjib proprju li seħħ b'konformità mar-regoli
soċjali. F’termini ta’
frekwenza ta’ kontravvenzjonijiet irrappurtati għal kull 100 jum ta’
xogħol ikkontrollat, il-medja Ewropea wriet xejra pożittiva u naqset
minn 8.65 għal 5.29. Meta jiġu analizzati b’mod parallel mat-tnaqqis
żgħir f’termini ta’ frekwenza tal-kontravvenzjonijiet identifikati
mal-ġenb tat-triq, jista’ jiġi konkluż li l-attivitajiet kollha
mmirati lejn konformità aqwa mal-leġiżlazzjoni soċjali
fit-trasport bit-triq bdew jipproduċu r-riżultati. III. Analiżi tad-dejta dwar
l-implimentazzjoni ta’ Direttiva dwar il-Ħin tax-Xogħol
għat-Trasport fit-Toroq (Direttiva 2002/15/KE) 1.
Introduzzjoni Dan il-kapitolu
jittratta l-implimentazzjoni tad-Direttiva 2002/15/KE, imsejħa wkoll
id-“Direttiva dwar il-Ħin tax-Xogħol għat-Trasport fit-Toroq”,
mill-Istati Membri fil-perjodu 2011-2012. Skont l-Artikolu 13 ta’ din
id-Direttiva, l-Istati Membri għandhom l-obbligu li jippreżentaw
rapport dwar l-implimentazzjoni tad-Direttiva lill-Kummissjoni kull sentejn,
filwaqt li jindikaw l-opinjonijiet ta’ min iħaddem u tal-impjegati
fil-livell nazzjonali. Id-dokument ta' akkumpanjament jinkludi partijiet
deskrittivi dwar it-traspożizzjoni ta’ din id-Direttiva fl-Istati Membri,
u l-opinjonijiet tal-partijiet ikkonċernati dwar l-implimentazzjoni u
l-monitoraġġ, l-arranġamenti għal-kontrolli fl-Istati
Membri u l-kwistjonijiet relatati mal-infurzar. 2.
Id-Direttiva 2002/15/KE Id-Direttiva
tistabbilixxi r-regoli li jirregolaw, fost l-oħrajn, pawżi xierqa
waqt il-perjodu tax-xogħol, il-medja ta’ sigħat massimi
f’ġimgħa ta’ xogħol u l-medja ta’ sigħat massimi ta'
xogħol ta’ bil-lejl. Id-dispożizzjonijiet tagħha jissupplimentaw
ir-regoli dwar il-ħinijiet tas-sewqan, il-pawżi u l-perjodi ta’
mistrieħ stabbiliti bir-Regolament (KE) Nru 561/2006. Billi din
id-Direttiva tistabbilixxi ċerti dispożizzjonijiet dwar
is-sigħat ta’ xogħol li huma speċifiċi għas-settur
tat-trasport bit-triq, din hija meqjusa bħala lex specialis
għad-Direttiva 2003/88/KE[13]
dwar il-ħinijiet tax-xogħol, li tistabbilixxi rekwiżiti
bażiċi għall-organizzazzjoni tal-ħinijiet tax-xogħol
għall-ħaddiema kollha. Madankollu, fl-Artikolu 31 tagħha l-Karta
tad-Drittijiet Fundamentali tal-Unjoni Ewropea tinkludi dispożizzjonijiet dwar
il-ħinijiet tax-xogħol u l-kundizzjonijiet tax-xogħol, li
għandhom jiġu rispettati meta jiġu implimentati l-liġijiet
tal-UE. Għadd ta’ dispożizzjonijiet ta’ protezzjoni bażika
tad-direttiva ġenerali dwar il-ħinijiet tax-xogħol, inklużi
regoli dwar il-liv annwali u l-eżami mediku bla ħlas
għall-ħaddiema ta’ bil-lejl, huma applikabbli wkoll
għall-ħaddiema mobbli tat-trasport bit-triq. 3.
Il-preżentazzjoni u l-kwalità ta'
rapporti nazzjonali Il-Kummissjoni
stabbilixxiet format komuni ta’ rappurtar sabiex jiġu ffaċilitati
l-isforzi tar-rappurtar tal-Istati Membri, sabiex jitnaqqas il-piż
amministrattiv u sabiex jiġi evitat kull dewmien eċċessiv
fil-preżentazzjoni tar-rapporti tal-Istati Membri. Madankollu, il-kwalità
tas-sottomissjonijiet tvarja b’mod sinifikanti. Il-Pajjiżi l-Baxxi ma
pprovdew ebda tagħrif, filwaqt li indikaw li ma kien hemm ebda bidliet
meta mqabbel mal-perjodu preċedenti. Ħafna mis-sottomissjonijiet
tal-Istati Membri[14]
ma kinux kompluti. Il-biċċa l-kbira tar-rapporti nazzjonali inkludew
informazzjoni dwar l-implimentazzjoni tad-Direttiva 2002/15/KE, u informazzjoni
dwar l-evalwazzjoni tal-effikaċja tagħha. Madankollu, minħabba
s-sottomissjonijiet mhux kompluti, ir-riżultati ta’ din l-analiżi ma
jistgħux jitqiesu rappreżentattivi għall-Unjoni Ewropea kollha
kemm hi. 4.
Aspetti ta’ implimentazzjoni fl-Istati
Membri Il-ħarsa
ġenerali lejn l-atti leġiżlattivi li jittrasponu d-Direttiva
2002/15/KE fil-livell nazzjonali hija inkluża fid-dokument ta'
akkumpanjament. Matul dan il-perjodu ta’ rappurtar, bosta Stati Membri
infurmaw dwar emendi għall-qafas leġiżlattiv tagħhom sabiex
dan jinkludi s-sewwieqa li jaħdmu għal rashom fil-kamp ta’
applikazzjoni tiegħu; jiġifieri l-Bulgarija, id-Danimarka,
il-Ġermanja, l-Irlanda, il-Lussemburgu, Malta (għaddejjin),
il-Polonja, il-Portugall, l-Isvezja, ir-Renju Unit. Fir-rigward
tal-ftehimiet kollettivi, ġew osservati sistemi diverġenti fl-Unjoni
Ewropea. Dawn ivarjaw minn nuqqas ta' konklużjoni ta' ftehimiet kollettivi
(bħal fil-każ ta' Malta) għall-ħolqien ta' ftehimiet
kollettivi li jistgħu jipprevedu deroga fuq il-limitu tal-ħinijiet
tax-xogħol (bħal fil-każ tal-Italja). Fi Spanja ġie
nnegozjat qafas ta' ftehim kollettiv dwar it-trasport bit-triq f'livell
governattiv, u ġew konklużi 26 ftehim kollettiv f'livell ta' komunità
awtonoma jew ta' provinċja. Fil-Lussemburgu ġew konklużi
ftehimiet kollettivi għax-xufiera tal-karozzi tal-linja u
għall-impjegati addizzjonali ta’ intrapriżi privati tal-karozzi
tal-linja, kif ukoll għas-settur tat-trasport u tal-loġistika. Il-Portugall
semma l-aspetti pożittivi tat-traspożizzjoni bis-saħħa ta'
kjarifika ta’ perjodi ta’ disponibbiltà u permezz tal-organizzazzjoni
tal-ħinijiet tax-xogħol tal-ħaddiema mobbli. Il-Litwanja u
l-Estonja żguraw li ma ltaqgħu ma' ebda diffikultajiet fir-rigward
tal-implimentazzjoni tad-Direttiva 2002/15/KE, billi l-Litwanja pprovdiet
taħriġ u konsultazzjoni għal min iħaddem u
għar-rappreżentanti awtorizzati tagħhom. Id-Direttiva
2002/15/KE ġiet meqjusa bħala sett tajjeb ta’ akkordji li għenu
biex tiġi ttrattata d-definizzjoni tal-ħinijiet tax-xogħol u tal-limiti
tagħhom. Madankollu, il-Greċja indikat li ċerti
dispożizzjonijiet ta’ din id-Direttiva jirkbu fuq dawk tar-Regolament (KE)
Nru 561/2006, u dan qed joħloq il-problemi għan-negozji u
l-ħaddiema. Spanja identifikat għadd ta' kwistjonijiet waqt l-implimentazzjoni
tar-regoli dwar l-ikkalkular tal-perjodi ta’ disponibbiltà tax-xufiera.
Ir-Repubblika Ċeka semmiet l-istess kwistjoni. Hemm konfużjoni
fir-rigward tal-applikazzjoni tad-dispożizzjoni dwar il-ħinijiet
tax-xogħol, b’mod partikolari meta x-xufiera jridu jqattgħu
ċertu ħin jistennew bejn żewġ vjaġġi u
l-ħinijiet ikunu magħrufa minn qabel[15].
B’mod
ġenerali, sabiex tiġi ffaċilitata l-implimentazzjoni prattika
tad-Direttiva 2002/15/KE, l-Irlanda u l-Isvezja żviluppaw u qassmu
materjal ta’ gwida għall-operaturi dwar kif għandha tintlaħaq
konformità mad-dispożizzjonijiet ta’ din id-Direttiva. 4.1
Ksur tar-regoli dwar il-ħinijiet
tax-xogħol Kienu biss ftit
l-Istati Membri[16]
li pprovdew statistika dwar il-każijiet ta' ksur li ġew identifikati,
u dan mhuwiex biżżejjed biex wieħed jasal għal
konklużjonijiet globali. Meta mqabbel mal-perjodu ta’ rappurtar
preċedenti, l-istess numru ta’ Stati Membri pprovdew dejta dwar
każijiet ta' ksur. L-Istati Membri kollha huma mistiedna jinkludu din
l-informazzjoni fir-rapporti li jmiss. 5.
L-opinjonijiet tal-partijiet ikkonċernati dwar l-implimentazzjoni
tad-Direttiva 2002/15/KE Sittax-il Stat
Membru[17]
kkonfermaw li l-partijiet ikkonċernati kienu ġew ikkonsultati, kif
stipulat mid-Direttiva 2002/15/KE, u dan juri titjib meta mqabbel mal-perjodu
ta’ rappurtar 2007-2008, meta kienu biss disa’ Stati Membri li indikaw li
osservaw dan l-obbligu. B’mod
ġenerali, kien hemm kunsens fost min iħaddem u fost l-impjegati dwar
il-fatt li d-Direttiva 2002/15/KE ikkontribwixxiet lejn il-protezzjoni
tas-saħħa u s-sikurezza tax-xufiera. Fl-Irlanda, l-impjegaturi
esprimew l-opinjoni li l-limitazzjonijiet fuq il-ħinijiet tax-xogħol
iżidu l-attrattività tal-professjoni tas-sewqan. Għadd ta'
msieħba soċjali nazzjonali wrew it-tħassib tagħhom rigward
in-nuqqas ta’ konsistenza fl-infurzar u l-applikazzjoni tar-regoli
fis-seħħ, u esprimew il-ħtieġa għal kjarifika ta’
ċerti aspetti speċifiċi, bħal pereżempju kumpens
għal xogħol ta' bil-lejl. Opinjonijiet aktar dettaljati tal-partijiet
ikkonsultati huma inklużi fid-dokument ta' akkumpanjament. IV.
Konklużjonijiet Dan ir-rapport
janalizza l-iżviluppi fl-implimentazzjoni u l-infurzar tul il-perjodu
2011-2012 fl-Istati Membri kollha, fid-dawl tal-osservanza tar-regoli
soċjali tal-UE. Il-kamp ta’
applikazzjoni ta’ dan id-dokument huwa stabbilit bid-Direttiva 2006/22/KE u
d-Deċiżjoni tal-Kummissjoni 2009/810/KE, li jiddefinixxu dejta
standard dwar ir-Regolament (KE) Nru 561/2006 u d-Direttiva 2002/15/KE li
għandha tiġi ppreżentata; prinċipalment l-għadd u t-tip
tal-kontrolli mwettqa, u l-għadd u t-tip ta’ offiżi li ġew
individwati. F’dan il-perjodu ta’ rappurtar, il-kwalità u l-prontezza
tas-sottomissjonijiet tjiebu, u dan ippermetta lill-Kummissjoni tasal għal
konklużjonijiet aktar affidabbli fir-rigward tal-applikazzjoni ta’ regoli
soċjali fil-livell Ewropew. Ir-rapport juri
li ġie osservat ċertu titjib fl-infurzar u l-implimentazzjoni
tal-leġiżlazzjoni dwar ir-regoli soċjali. Bħala medja,
l-għadd totali ta’ jiem ta’ xogħol ikkontrollati fl-UE żdied bi
8.7 %, minn kważi 146 miljun għal madwar 158.6 miljun jum ta'
xogħol ikkontrollati, filwaqt li l-livell limitu minimu ta' kontrolli ta'
3 % baqa' l-istess. Ta’ min jinnota li l-kontrolli kollha twettqu minn
għadd iżgħar, b’mod sinifikanti, ta’ uffiċjali ta’ infurzar
għall-Istati Membri kollha. Din iż-żieda tikkonferma l-impenn
ġenerali fost l-Istati Membri favur it-titjib tal-kontrolli ta’ konformità
mar-regoli soċjali fit-trasport bit-triq. Madankollu, bħal
fl-aħħar żewġ rapporti, il-biċċa l-kbira
tal-Istati Membri naqsu milli jilħqu l-livell limitu minimu ta’ mill-inqas
50 % tal-ammont totali ta’ jiem ta’ xogħol ikkontrollati fil-post
tan-negozju, u l-biċċa l-kbira tal-kontrolli saru mal-ġenb
tat-triq. Il-Kummissjoni se timmonitorja l-iżviluppi li jsiru f’dan il-qasam.
Jekk fil-perjodu ta' rappurtar 2013-2014 li jmiss ma jiġi osservat ebda
titjib fl-Istati Membri rispettivi, il-Kummissjoni se tniedi inkjesta
uffiċjali ma’ dawk l-Istati Membri li jonqsu milli jikkonformaw
mar-rekwiżit għal kontrolli fil-post tan-negozju. Skont
l-Artikolu 2 tad-Direttiva 2006/22/KE, il-livell limitu minimu
tal-kontrolli minimi tal-għadd ta’ jiem maħduma mix-xufiera
tal-vetturi se jiżdied għal 4 % ladarba 90 % tal-vetturi
kollha li jsirulhom il-kontrolli jkunu mgħammra b’takografu diġitali.
F’dan il-perjodu ta’ rappurtar, 56 % tal-vetturi li sarulhom il-kontrolli
mal-ġenb tat-triq kienu mgħammra bit-takografu diġitali.
Għalhekk, ma hemm l-ebda bażi biex il-livell limitu minimu
tal-kontrolli jiżdied għal 4 % tal-jiem maħduma mis-sewwieqa.
Huwa importanti
li l-awtoritajiet nazzjonali jiggarantixxu li l-kontrolli jitwettqu
mingħajr diskriminazzjoni abbażi taċ-ċittadinanza
tax-xufiera/tal-Istat Membru ta' reġistrazzjoni tal-vetturi. L-Istati
Membri għandhom jeżaminaw id-dejta tagħhom bir-reqqa, u
għandhom jagħtu struzzjonijiet lill-awtoritajiet ta’ kontroll b'mod
xieraq sabiex jiġi evitat it-trattament mhux ugwali ta’ persuni mhux
nazzjonali. Wara żieda
sinifikanti u kostanti fl-għadd ta' konravvenzjonijiet li ġew
irrappurtati tul l-aħħar 6 snin fil-livell Ewropew, li hija marbuta
ma’ żidiet fl-għadd minimu ta’ jiem ta' xogħol li għandhom
jiġu kkontrollati, hemm inverżjoni fix-xejra għall-perjodu ta’
rappurtar attwali li wasslet għal tnaqqis meta mqabbel mal-aħħar
perjodu fir-rigward tal-għadd ta' kontravvenzjonijiet li ġew
individwati. Meta tiġi meqjusa flimkien maż-żieda fl-għadd
ta' jiem ta' xogħol li ġew ikkontrollati, din il-bidla tista’
tiġi interpretata bħala konformità aħjar mad-dispożizzjonijiet
tal-leġiżlazzjoni soċjali grazzi għal prattiki ta’ infurzar
stabbiliti sew u għarfien akbar dwar ir-regoli soċjali fost
ix-xufiera. Għal dan l-għan, l-isforzi tal-Istati Membri u
tal-Kummissjoni, bħal pereżempju noti ta’ gwida, taħriġ
għal min jinforza, eċċ. bdew jipproduċu r-riżultati
tagħhom. L-analiżi
tar-rati ta’ detezzjoni mal-ġenb tat-triq u fil-post tan-negozju tindika
li l-kontrolli fil-post tan-negozju huma u għadhom aktar effiċjenti
mill-kontrolli li jsiru mal-ġenb tat-triq. Id-differenzi fir-rati ta’
detezzjoni juru li l-Unjoni Ewropea għadha ‘l bogħod milli twaqqaf
żona armonizzata ta' infurzar minħabba riżorsi u prattiki ta’
infurzar diverġenti fil-kontroll tal-konformità
mal-leġiżlazzjoni tat-trasport bit-triq, u minħabba sistemi ta’
penalizzazzjoni diverġenti. Kważi
l-Istati Membri kollha pprovdew informazzjoni dwar il-kontrolli miftiehma, u
dan juri titjib meta mqabbel mal-perjodu ta' qabel mhux biss f’termini ta’
kwalità ta' rappurtar, iżda wkoll fl-għadd ta’ inizjattivi ta’
kooperazzjoni mwettqa. Il-kooperazzjoni sseħħ l-aktar bejn Stati
Membri ġirien, u hija kumplimentata minn azzjonijiet fi ħdan il-qafas
tal-Euro Contrôle Route (ECR), li tqiegħed fis-seħħ
il-kollaborazzjoni fuq skala akbar. Minħabba li
mhumiex kompluti, ir-rapporti nazzjonali dwar l-implimentazzjoni tad-Direttiva
2002/15/KE ma jippermettux li ssir analiżi fil-fond tal-impatti ta’ dan
l-att leġiżlattiv fuq is-saħħa u s-sikurezza tax-xufiera
jew fuq is-sikurezza fit-toroq. Bosta Stati Membri inkludew ix-xufiera li
jaħdmu għal rashom fil-kamp ta' applikazzjoni tal-oqfsa
leġiżlattivi tagħhom, avolja dan ġieli jiġi
pperċepit li joħloq kwistjonijiet relatati mal-infurzar. Il-biċċa
l-kbira tal-Istati Membri kkonfermaw li saru konsultazzjonijiet mal-partijiet
ikkonċernati. B’mod ġenerali, l-imsieħba soċjali rrikonoxxew
li l-infurzar xieraq tad-Direttiva 2002/15/KE huwa prekondizzjoni biex
jiġu żgurati kundizzjonijiet tax-xogħol xierqa u kompetizzjoni
mhux imxekkla. Sabiex tevalwa
aspetti importanti oħra tal-implimentazzjoni tar-regoli soċjali
tat-trasport bit-triq, inkluża l-applikazzjoni tal-ġurisprudenza
tal-Qorti tal-Ġustizzja tal-Unjoni Ewropea, l-implimentazzjoni ta’
eċċezzjonijiet u ta' penali fid-dawl tal-Karta tad-Drittijiet
Fundamentali tal-Unjoni Ewropea, il-Kummissjoni se tniedi evalwazzjoni
komprensiva tal-funzjonament tal-leġiżlazzjoni soċjali
tat-trasport fit-toroq. [1] Ir-Regolament (KE)
Nru 561/2006 tal-Parlament Ewropew u tal-Kunsill tal- 15 ta’ Marzu 2006
dwar l-armonizzazzjoni ta’ ċerta leġiżlazzjoni soċjali li
għandha x’taqsam mat-trasport bit-triq u li jemenda r-Regolamenti
tal-Kunsill (KEE) Nru 3821/85 u (KE) Nru 2135/98 u li jħassar
ir-Regolament tal-Kunsill (KEE) Nru 3820/85 (ĠU L 102, 11.4.2006, p.
1) [2] Id-Direttiva 2006/22/KE
tal-Parlament Ewropew u tal-Kunsill tal-15 ta Marzu 2006 dwar il-kondizzjonijiet
minimi għall-implimentazzjoni tar-Regolamenti tal-Kunsill (KEE) Nri
3820/85 u 3821/85 dwar il-leġiżlazzjoni soċjali li għandha
x'taqsam ma' attivitajiet tat-trasport bit-triq u li tħassar id-Direttiva
tal-Kunsill 88/599/KEE (ĠU L 102, 11.4.2006, p. 36) [3] Ir-Regolament
tal-Kunsill (KeE) Nru 3821/85 tal-20 ta' Diċembru 1985 dwar apparat ta'
reġistrazzjoni għat-trasport bit-triq (ĠU L 370, 31.12.1985, p.
8), li ġie mħassar bir-Regolament (UE) Nru 165/2014 tal-Parlament
Ewropew u tal-Kunsill tal-4 ta' Frar 2014 dwar takografi fit-trasport
bit-triq, li jħassar ir-Regolament tal-Kunsill (KEE) Nru 3821/85 dwar
apparat ta' reġistrazzjoni għat-trasport bit-triq u li jemenda
r-Regolament (KE) Nru 561/2006 tal-Parlament Ewropew u tal-Kunsill dwar
l-armonizzazzjoni ta' ċerta leġiżlazzjoni soċjali li
għandha x'taqsam mat-trasport bit-triq (ĠU L 60, 28.2.2014, p. 1) [4]
Id-Direttiva 2002/15/KE tal-Parlament Ewropew u tal-Kunsill
tal-11 ta’ Marzu 2002 dwar l-organizzazzjoni tal-ħin
tax-xogħol ta’ ħaddiema li jwettqu attivitajiet mobbli tat-trasport
fit-toroq (ĠU L 80, 23.3.2002, p. 35) [5] Id-Deċiżjoni
tal-Kummissjoni 2009/810/KE tat-22 ta' Settembru 2008 li tfassal l-formola
standard għar-rappurtar imsemmija fl-Artikolu 17 tar-Regolament (KE) Nru
561/2006 tal-Parlament Ewropew u tal-Kunsill (ĠU L 289, 5.11.2009, p. 9) [6] Ir-rata minima hija
kkalkulat b'mod separat għal kull Stat Membru, fuq il-bażi tan-numru
totali tal-ġranet li jkunu nħadmu minn kull sewwieq tul il-perjodu
ta’ sentejn u l-għadd totali ta’ vetturi soġġetti għal dawn
ir-Regolamenti. Dawn iż-żewġ elementi jiġu multiplikati, u
dan huwa ekwivalenti għall-għadd totali ta’ ġranet li jkunu
nħadmu mis-sewwieqa ta’ vetturi li jaqgħu fi ħdan il-kamp ta’
applikazzjoni ta' dawn ir-Regolamenti. Minn dan l-ammont tiġi kkalkulata
ċifra ta' 3 %, li tikkostitwixxi l-għadd minimu ta’ kontrolli li
għandhom jitwettqu f’kull Stat Membru. [7] Id-Danimarka naqset
milli tipprovdi l-għadd ta’ vetturi li sarulhom il-kontrolli mal-ġenb
tat-triq [8] Il-Finlandja ma
pprovdietx dejta dwar l-għadd ta’ impriżi li sarulhom kontrolli
fil-post tan-negozju għall-perjodu ta’ rappurtar 2011-2012.
Għall-perjodu 2009-2010, il-Finlandja, il-Lussemburgu, Spanja u l-Isvezja
ma pprovdewx dejta dwar in-numru ta’ impriżi li sarulhom kontrolli. [9] Fl-2008 l-livell limitu
żdied minn 1 % għal 2 %, u fl-2010 żdied għal
3 %, filwaqt li ma ġew introdotti ebda tibdiliet fil-livell limitu
fil-perjodu ta’ rappurtar attwali. [10] Id-dokument ta' akkumpanjament jinkludi informazzjoni dettaljata dwar
bidliet fi Stati Membri partikolari. [11] Fid-Danimarka,
l-għadd ta' kontravvenzjonijiet identifikati li huma relatati ma’ persuni
mhux nazzjonali ammonta għal 90 %. Madankollu dan ir-riżultat
mhuwiex wieħed rappreżentattiv, u dan minħabba l-ammont
sostanzjali ta’ dejta nieqsa li fuqha kien ibbażat dan il-kalkolu.
Għal dan l-għan, in-numru ma ġiex magħdud fil-medja
Ewropea. [12] Ara n-nota 12 ta'
qiegħ il-paġna [13] Id-Direttiva 2003/88/KE
tal-Parlament Ewropew u tal-Kunsill tal-4 ta' Novembru 2003 li tikkonċerna
ċerti aspetti tal-organizzazzjoni tal-ħin tax-xogħol (ĠU L
299, 18.11.2003, p. 9) [14] Il-Belġju,
Ċipru, l-Ungerija, il-Latvja, il-Pajjiżi l-Baxxi, ir-Rumanija u
l-Isvezja [15] L-Artikolu 3(a)
tad-Direttiva 2002/15/KE tiddefinixxi l-“ħin tax-xogħol” bħala
"il-ħin mill-bidu sat-tmiem tax-xogħol, li matulu
l-ħaddiem mobbli jkun fil-post tax-xogħol tiegħu,
għad-dispożizzjoni ta’ min jimpjegah u jeżerċita
l-funzjonijiet jew l-attivitajiet tiegħu, jiġifieri: il-ħin
iddedikat għall-attivitajiet kollha tat-trasport fit-toroq u l-ħinijiet
li matulhom hu ma jkunx jista’ jiddisponi b’libertà mill-ħin tiegħu u
jkun meħtieġ li jkun preżenti fil-post tax-xogħol
tiegħu, lest biex jibda bix-xogħol normali, b’ċerti doveri
assoċjati billi jkun fuq ix-xogħol, partikolarment matul perjodi ta’
stennija għat-tagħbija u l-ħatt meta t-tul ta’ żmien
għal dawn ma jistgħax ikun previst bil-quddiem". [16] L-Awstrija,
il-Bulgarija, Ċipru, ir-Repubblika Ċeka, il-Greċja, il-Polonja,
Spanja [17] Il-Bulgarija,
ir-Repubblika Ċeka, il-Ġermanja, id-Danimarka, l-Estonja,
il-Greċja, Spanja, il-Finlandja, Franza, l-Irlanda, il-Litwanja, Malta,
il-Polonja, is-Slovakkja, is-Slovenja, ir-Renju Unit