52014DC0294

1. Introduzzjoni

L-istrumenti għad-difiża tan-negozju (TDI) – l-antidumping, il-kumpens u s-salvagwardja – huma għodda importanti permessi skont ir-regoli tad-WTO biex jitneħħew danni ekonomiċi kkawżati minn prattiki kummerċjali inġusti jew, fil-każ tas-salvagwardji, jipprovdu serħan temporanju minn żieda mhux prevista u sinifikanti fl-importazzjonijiet. Madankollu, jekk ma jiġux applikati b’mod strett skont ir-regoli tad-WTO, dawn jistgħu jsiru għodda ta’ politiki ta' protezzjoni li jfixklu l-iżvilupp kummerċjali u ekonomiku dinji.

Għaldaqstant, filwaqt li tirrikonoxxi d-dritt ta’ pajjiżi terzi li jagħmlu użu mit-TDI, il-Kummissjoni ddefiniet il-promozzjoni ta’ standards xierqa u azzjoni kontra l-użu abbużiv minn pajjiżi terzi ta’ dawn l-istrumenti kontra l-esportaturi tal-UE bħala għanijiet tal-politika tal-kummerċ li qed jgħinu biex jittejjeb l-aċċess għas-suq għall-esportaturi tal-UE. F’każijiet ta’ ksur serju tar-regoli tad-WTO u nuqqas ta’ mezzi oħra biex jissolvew il-problemi, li jitressaq każ għas-soluzzjoni tat-tilwim tad-WTO jibqa’ possibbiltà iżda l-approċċ preferut tal-Kummissjoni huwa li jinkisbu l-objettivi msemmija hawn fuq permezz ta’ monitoraġġ komprensiv tal-attività tat-TDI ta’ pajjiżi terzi u interventi fil-qafas ta' investigazzjonijiet li għaddejjin fejn ir-regoli tad-WTO mhumiex irrispettati.

Il-promozzjoni ta’ standards xierqa tinkludi mhux biss il-monitoraġġ tal-attivitajiet tat-TDIs ta’ pajjiżi terzi, iżda wkoll skrutinju kostanti u titjib tal-mod li bih il-Kummissjoni nnifisha twettaq investigazzjonijiet għad-difiża tan-negozju u tapplika l-miżuri. L-UE hija diġà utent prudenti ħafna tat-TDI, li huwa spjegat mill-fatt li tali miżuri jaffettwaw biss parti żgħira ħafna tal-importazzjonijiet tal-UE. Barra minn hekk, minħabba li l-leġiżlazzjoni tal-UE tistabbilixxi standards li huma saħansitra aktar eżiġenti mir-regoli tad-WTO, jiġifieri, l-hekk imsejħa "WTO pluses", l-investigazzjonijiet tagħha mhux neċessarjament jirriżultaw fl-applikazzjoni ta’ miżuri u, f’każijiet fejn il-miżuri huma applikati, il-livell tagħhom huwa normalment aktar baxx minn miżuri imposti minn pajjiżi oħra f’każijiet simili. F’dawn l-aħħar snin il-Kummissjoni tat bidu għal proċess ta’ modernizzazzjoni tal-istrumenti għad-difiża tan-negozju tagħha permezz ta’ bidliet leġiżlattivi u dokumenti relatati skedati għall-adozzjoni fl-2014. Il-Kummissjoni tħeġġeġ lil pajjiżi terzi biex huma wkoll janalizzaw kontinwament il-leġiżlazzjoni u l-prattika tat-TDIs tagħhom bil-għan li jtejbuhom u jiżguraw il-konformità sħiħa tagħhom mar-regoli tad-WTO.

Fl-2013 iż-żieda sinifikanti fl-għadd ta’ investigazzjonijiet miftuħa u l-miżuri imposti kontra l-esportazzjonijiet tal-UE minn pajjiżi terzi kienet teħtieġ li l-Kummissjoni ssaħħaħ l-attivitajiet tagħha f’dan il-qasam. Il-pressjoni addizzjonali fuq ir-riżorsi tagħha f’dan il-qasam ġie mill-komplessità li dejjem qed tiżdied tal-każijiet, l-introduzzjoni ta’ pajjiżi ġodda li bdew jagħmlu użu mill-istrumenti għad-difiża tan-negozju li jaffettwaw l-esportazzjonijiet tal-UE u, b’mod partikolari, il-parteċipazzjoni attiva meħtieġa f'investigazzjonijiet tad-dazju kompensatorju ta' pajjiżi terzi dwar l-allegati skemi ta’ sussidju tal-UE, pereż., l-investigazzjoni taċ-Ċina dwar l-inbid li jinvolvi madwar 5000 esportatur tal-inbid tal-UE.

Dan ir-rapport jiddeskrivi x-xejriet ġenerali fl-2013 fl-użu ta' TDIs minn pajjiżi terzi kontra esportazzjonijiet tal-UE u l-attivitajiet li l-Kummissjoni wettqet sabiex tindirizza problemi li hija identifikat. L-anness jipprovdi analiżi dettaljata ħafna aktar għal kull pajjiż li titfa' dawl fuq ix-xejriet tal-attività għad-difiża tan-negozju tal-iktar utenti importanti tal-istrument, problemi sistemiċi u żviluppi li jikkonċernaw każijiet speċifiċi.

2. Xejriet kumplessivi

Fi tmiem l-2013 kien hemm total ta’ 152 miżura fis-seħħ kontra l-UE jew l-Istati Membri tal-UE, li hija żieda ta’ 14-il miżura meta mqabbel ma’ tmiem l-2012 meta l-għadd ta’ miżuri kien 138. Il-grafika li ġejja turi li t-tnaqqis fl-għadd ta’ miżuri fis-seħħ fl-2012 kien eċċezzjoni u li x-xejra kumplessiva mill-2010 hija żieda sinifikanti fl-attività għad-difiża tan-negozju:

Wara l-bidu tal-kriżi finanzjarja u ekonomika globali fi tmiem l-2008, ħafna pajjiżi bdew investigazzjonijiet għad-difiża tan-negozju ġodda. Pereżempju, bħala medja, infetħu 40 investigazzjoni ġdida kull sena fil-perjodu 2008-2010, meta mqabbel ma’ 19-il investigazzjoni biss bħal dawn fl-2007. Fil-maġġoranza tal-każijiet, l-investigazzjoni ġiet konkluża bl-impożizzjoni ta’ miżuri u b’hekk l-għadd totali ta’ miżuri fis-seħħ mill-2010 żdied b’mod sinifikanti. Għandu jiġi nnutat li filwaqt li fl-2010-2011 iż-żieda fl-għadd totali ta’ miżuri fis-seħħ kienet l-aktar minħabba miżuri ġodda ta’ salvagwardja (16 minn 23 miżura ġdida), fl-2013 iż-żieda hija l-iktar minħabba miżuri ġodda tal-antidumping (10 minn 14-il miżura ġdida). F’dan il-kuntest, għandu jiġi mfakkar li japplikaw salvagwardji lill-pajjiżi kollha ta' oriġini u jidhru fl-istatistiċi anke meta l-UE ma tkunx milquta direttament.  Dan huwa f’kuntrast ma’ miżuri tal-antidumping li huma speċifiċi għall-pajjiż u b’hekk jaffettwaw direttament l-esportazzjonijiet tal-UE. Għalhekk, iż-żieda riċenti fl-għadd totali ta’ miżuri fis-seħħ jidher li għandha effett dirett fuq l-esportazzjonijiet tal-UE.

L-ispjegazzjoni ta' dawn il-miżuri skont it-tip tikxef sitwazzjoni simili għal snin preċedenti: il-maġġoranza ta' dawn il-miżuri huma azzjonijiet tal-antidumping (104 miżura), filwaqt li s-salvagwardji għadhom jirrappreżentaw madwar terz tat-total. Fir-rigward ta’ dawn tal-aħħar, madankollu, għandu jiġi mfakkar li s-salvagwardji kollha ġew inklużi fl-istatistiċi peress li japplikaw għal importazzjonijiet tal-oriġini kollha, iżda xi wħud minnhom jista’ jkollhom impatt ekonomiku żgħir fuq l-UE minħabba li l-UE għandha ftit jew l-ebda esportazzjoni tal-prodott partikolari.

Iż-żieda kumplessiva tal-għadd ta’ miżuri fis-seħħ fl-2013 irriżultat mill-iskadenza jew it-tmiem ta’ 13-il miżura u l-impożizzjoni ta’ 27 miżura ġdida. Dan l-għadd tal-aħħar huwa konformi mal-għadd medju ta’ miżuri ġodda imposti kull sena f’dawn l-aħħar snin u l-ispjegazzjoni skont it-tip – żewġ terzi antidumping u terz salvagwardji – jikkorrispondi wkoll ma' xejriet medji. F’termini ta’ pajjiżi, iċ-Ċina imponiet aktar miżuri ġodda minn kull pajjiż ieħor. Pajjiżi terzi oħra li imponew mill-anqas żewġ miżuri ġodda jinkludu l-Brażil, il-Kolombja, l-Unjoni Doganali tal-Ewrażja (li tikkonsisti mir-Russja, il-Bjelorussja u l-Każakistan), l-Indja, l-Afrika t’Isfel u t-Turkija. Minħabba l-volum għoli tal-flussi tan-negozju, il-miżuri imposti miċ-Ċina u l-Unjoni Doganali tal-Ewrażja jista' jkollhom l-aktar impatt negattiv fuq l-esportazzjonijiet tal-UE.

F’termini ta’ miżuri fis-seħħ, b’21 miżura fis-seħħ, l-Indja tibqa’ l-aktar utenti li juża t-TDI kontra l-UE jew l-Istati Membri tal-UE, iżda hija segwita mill-qrib miċ-Ċina b’19-il miżura. It-tkabbir kostanti u rapidu tal-għadd ta’ miżuri li ċ-Ċina imponiet kontra l-UE jew l-Istati Membri tal-UE huwa tassew impressjonanti, peress li l-għadd ta’ tali miżuri kien disgħa biss fl-2008. L-Istati Uniti tal-Amerika li storikament kienu mexxejja f’din il-klassifikazzjoni ta’ pajjiżi terzi waqgħu għat-tielet post bi 17-il miżura fis-seħħ. L-użu estensiv sew ta’ salvagwardji tat-Turkija u tal-Indoneżja qiegħed dawn il-pajjiżi fost l-ewwel ħamsa f’din il-lista.

Inbdew 43 investigazzjonijiet ġodda fl-2013, meta mqabbla ma’ 37 fl-2012, jiġifieri żieda sinifikanti. L-Indja kienet bil-bosta l-aktar pajjiż attiv segwit miċ-Ċina, il-Kolombja, l-Awstralja, il-Brażil, il-Kanada, u l-Afrika t’Isfel. Meta mqabbla mas-sena ta’ qabel, iż-żieda fl-attività mill-Indja (erba' investigazzjonijiet ġodda tal-antidumping u tlieta ġodda ta’ salvagwardja) u l-Kolombja (erba' investigazzjonijiet ġodda ta’ salvagwardja) hija partikolarment notevoli. Kif imsemmi hawn fuq, filwaqt li fil-passat riċenti l-maġġoranza ta’ dawn l-investigazzjonijiet il-ġodda kienu salvagwardji, fl-2013 l-istrument tal-antidumping kien sar aktar popolari.

3. Problemi Kurrenti

Hemm għadd ta’ problemi persistenti fl-użu tat-TDI minn pajjiżi terzi li l-Kummissjoni identifikat u spjegat diġà fir-rapporti preċedenti tagħha. Filwaqt li l-interventi tal-Kummissjoni għenu biex jissolvew problemi f'għadd ta’ każijiet individwali, mill-perspettiva kumplessiva ħafna mill-kwistjonijiet jibqgħu l-istess.

Il-problemi ewlenin li riċentement ġew identifikati huma dawn li ġejjin:

3.1. Użu mhux xieraq tal-istrumenti

L-użu mhux xieraq tal-istrumenti għad-difiża tan-negozju jibqa’ l-aktar problema importanti. Din is-sena għal darba oħra kien hemm indikazzjonijiet qawwija li l-investigazzjonijiet kontra l-UE ġew mibdija b’reazzjoni għal azzjonijiet għad-difiża tan-negozju li ttieħdu mill-UE nnifisha. Fl-2012 iċ-Ċina fetħet investigazzjoni magħquda ta’ antidumping u antisussidji kontra importazzjonijiet tal-polisiliċju mill-UE wara li l-UE kienet bdiet investigazzjoni kontra l-importazzjonijiet ta’ pannelli solari Ċiniżi. Kien hemm għajdut li b’reazzjoni għall-investigazzjoni tal-UE dwar pannelli solari, iċ-Ċina għandha wkoll tibda każ kontra importazzjonijiet tal-inbid tal-UE. Dawn l-għajdut seħħew meta fl-2013 iċ-Ċina tabilħaqq tat bidu għal investigazzjoni antidumping u antisussidji kontra importazzjonijiet tal-inbid tal-UE.

Il-Kummissjoni tirrikonoxxi d-drittijiet ta’ pajjiżi terzi li jibdew investigazzjonijiet ibbażati fuq ilmenti ġenwini mressqa minn industrija domestika, iżda hija tikkundanna bil-qawwa l-każijiet li huma mibdija għal kwalunkwe raġuni oħra.

Il-Kummissjoni tittratta din il-kwistjoni bħala prijorità minħabba n-natura sistemika tagħha u l-impatt ekonomiku negattiv sinifikanti. Fil-passat il-Kummissjoni diġà kkontestat b’suċċess każ simili fid-WTO (ara hawn taħt) u se tkompli tiddefendi l-interessi tal-Unjoni Ewropea.

3.2. Użu ta' salvagwardji

Filwaqt li l-għadd ta’ miżuri ġodda ta’ salvagwardja impost din is-sena għadu ħafna iktar baxx mill-2011, l-għadd ta’ tnedijiet ġodda ta’ investigazzjonijiet ta’ salvagwardja xorta jibqa' għoli wisq.

Fl-2013, ġew imposti 10 miżuri ġodda ta’ salvagwardja, li huwa konsiderevolment inqas mill-għadd ta’ investigazzjonijiet kurrenti f’dawn l-aħħar snin (medja ta’ madwar 20). Mil-lat pożittiv, dan ifisser li l-miżuri ta’ salvagwardja ġew evitati f’xi investigazzjonijiet fejn il-Kummissjoni u l-Istati Membri tal-UE kienu intervjenew b’mod attiv. Fuq naħa aktar negattiva, dan jerġa’ juri l-prattika sfortunata minn diversi pajjiżi terzi biex jibdew investigazzjonijiet ta’ salvagwardja fuq bażi dgħajfa. Anki jekk il-miżuri ma jiġux fl-aħħar mill-aħħar imposti, is-sempliċi fatt ta’ tnedija joħloq inċertezzi lill-importaturi matul iż-żmien tal-investigazzjonijiet u b’hekk jaffettwa b’mod negattiv il-flussi tal-kummerċ.

Il-Kummissjoni għadha wkoll imħassba li xi pajjiżi jkomplu jniedu investigazzjonijiet antidumping u ta’ salvagwardja paralleli fuq l-istess prodott. Barra minn hekk, pajjiż wieħed b’mod partikolari jibqa’ kważi awtomatikament jestendi l-applikazzjoni tal-miżuri ta’ salvagwardja tiegħu sal-perjodu massimu permess skont il-Ftehim dwar is-Salvagwardji tad-WTO.

Il-Kummissjoni tkompli tagħti attenzjoni mill-qrib ħafna lil din il-kwistjoni u tibqa’ taħdem favur standards ogħla fit-tnedija ta’ investigazzjonijiet ta’ salvagwardja u l-applikazzjoni ta' miżuri.

3.3. Attività għad-difiża tan-negozju f’ekonomiji emerġenti Meta japplikaw miżuri għad-difiża tan-negozju, il-pajjiżi ta’ spiss jużawhom primarjament kontra s-sħab kummerċjali li jkollhom l-akbar flussi tal-kummerċ bilaterali li jkunu qed jiżdiedu b'mod sostanzjali u/jew rapidu. Għalhekk mhuwiex anormali li l-esportaturi tal-UE dejjem qed jaffaċċjaw iktar miżuri għad-difiża tan-negozju f’ekonomiji emerġenti li magħhom ir-relazzjonijiet kummerċjali tal-UE qed jiżviluppaw b’rata mgħaġġla. Madankollu, huwa importanti ħafna li l-investigazzjonijiet jinbdew u l-miżuri jiġu imposti biss fejn tassew ikunu ġustifikati, li mhuwiex dejjem il-każ.

Il-Kummissjoni hija mħassba li diversi investigazzjonijiet għad-difiża tan-negozju jiġu mnedija f’sitwazzjonijiet fejn l-importazzjonijiet jammontaw għal parti żgħira ħafna tas-suq domestiku. Pereżempju, fl-2013 l-Afrika t’Isfel nediet tliet investigazzjonijiet għad-difiża tan-negozju dwar l-istess prodott, inkluża investigazzjoni ta' salvagwardja u ta’ antidumping. F’dawn il-każijiet l-industrija domestika lmentat l-iktar dwar it-telf tas-sehem mis-suq tagħhom li ftit snin ilu kien 98 % (sic). Bl-istess mod, il-Marokk qed jikkontempla l-impożizzjoni ta’ miżuri ta’ salvagwardja f’każ fejn is-sehem mis-suq tal-importazzjonijiet tal-prodott ikkonċernat ikun żdied minn 2,5 % għal 5 % biss.

Il-Kummissjoni hija mħassba wkoll dwar għadd ta’ miżuri li ttieħdu mill-Unjoni Doganali tal-Ewrażja stabbilita reċentement li minħabba d-daqs tas-suq, il-viċinanza ġeografika u l-flussi kummerċjali storiċi għandhom impatt negattiv sinifikanti fuq l-UE. Skont l-analiżi tagħna, il-ġustifikazzjoni ta’ dawn il-miżuri tibqa' insuffiċjenti.

4. Kisbiet ewlenin

F’dawn l-aħħar snin l-UE kienet solviet xi każijiet importanti billi rrikorriet għal sistema għas-soluzzjoni ta' tilwim tad-WTO, pereż. it-tilwima maċ-Ċina dwar il-prassi inaċċettabbli tar-ritaljazzjoni (ara hawn taħt). Xi drabi ma jkunx hemm alternattiva għajr li tintuża s-soluzzjoni ta' tilwim tad-WTO. Madankollu, din tibqa’ bħala l-aħħar għażla, peress li l-proċeduri għas-soluzzjoni ta' tilwim tad-WTO jieħdu żmien twil u sadanittant il-miżuri mhux permessi jibqgħu fis-seħħ.

Għal dawn ir-raġunijiet, il-Kummissjoni kemm jista’ jkun tintervjeni sa mill-investigazzjoni sabiex tikkonvinċi l-awtoritajiet investigattivi ta' pajjiżi terzi biex jew itejbu l-analiżi tagħhom jew ma jimponux il-miżuri. L-interventi tal-Kummissjoni kienu ta’ suċċess f’numru ta’ każijiet individwali jew tal-inqas parzjalment ta' suċċess jew fil-prevenzjoni tal-impożizzjoni ta’ miżuri jew fil-limitazzjoni tal-impatt negattiv ta’ tali miżuri.

Fl-2013 il-Kummissjoni għenet ukoll ħafna esportaturi tal-UE li kienu lesti li jikkooperaw f’investigazzjonijiet ta’ pajjiżi terzi. L-industriji u l-Istati Membri tal-UE faħħru b’mod pożittiv tali gwida u għajnuna anke fejn din ma kinitx evitat l-impożizzjoni ta’ miżuri.

Fl-aħħar nett, wieħed għandu jinnota li hemm diversi investigazzjonijiet importanti ħafna li talbu ħafna xogħol u attenzjoni min-naħa tal-Kummissjoni diġà fl-2013, iżda li ma jistgħux jiġu elenkati bħala kisbiet, peress li dawn għadhom għaddejjin fil-bidu tal-2014 u r-riżultati tagħhom għadhom m’humiex magħrufa.

Hawn taħt hawn lista tar-riżultati pożittivi individwali miksuba fl-2013.

4.1. Iċ-Ċina - Implimentazzjoni tar-rapport tal-bord tad-WTO fuq skaners tar-raġġi-X.

Fit-23 ta’ Jannar 2011, iċ-Ċina ddeċidiet li timponi dazji tal-antidumping fuq importazzjonijiet ta’ tagħmir għall-ispezzjoni tas-sigurtà tar-raġġi-X li joriġina mill-UE (miżuri li jvarjaw minn 33,5 % sa 71,8 %). Il-Kummissjoni ddeċidiet li tisfida dawn id-dazji peress li kien ikkunsidrat li dawn il-miżuri ma kinux f’konformità mar-regoli tad-WTO u li kienu ġew imposti b’ritaljazzjoni kontra l-każ tal-UE stess dwar skaners tal-merkanzija miċ-Ċina.

Fl-24 ta’ April 2013, id-WTO ppubblikat r-rapport tal-bord tad-WTO li jikkonferma li ċ-Ċina aġixxiet b’mod inkonsistenti ma’ diversi dispożizzjonijiet tal-ftehim dwar l-antidumping tad-WTO. Bħala riżultat, iċ-Ċina ħabbret it-tmiem tal-miżura fid-19 ta’ Frar 2014.

4.2. Ir-Russja-il-Bjelorussja-il-Każakistan – tmiem mingħajr miżuri.

L-investigazzjoni ta’ salvagwardja fuq drappijiet minsuġa nbdiet mill-Kommissjoni Ekonomika tal-Ewrażja (KEEA) fl-1 ta’ Ottubru 2012. Il-każ kien ekonomikament importanti peress li l-esportazzjonijiet annwali tal-UE ammontaw għal EUR 65 miljun. Matul il-kors tal-investigazzjoni, il-Kummissjoni identifikat bosta inkonsistenzi tad-WTO, b’mod partikolari fir-rigward tat-tifsira tal-ambitu tal-prodott, l-aspetti tal-ħsara u l-kawżalità. Il-Kummissjoni għamlet interventi f’dan ir-rigward u l-investigazzjoni kienet finalment mitmuma fit-2 ta’ Ottubru 2013 mingħajr l-impożizzjoni ta’ miżuri.

Wara xi snin ta’ użu attiv tat-TDI u s-salvagwardji b’mod partikolari, fl-2013 il-KEEA ma bdiet l-ebda investigazzjoni ġdida u rrevediet żewġ miżuri eżistenti (pajpijiet tal-azzar inossidabbli u karamella) bir-riżultat finali li jkun xi grad ta’ liberalizzazzjoni jew xi tnaqqis tal-ambitu tal-prodott tal-applikazzjoni tal-miżura. Kif imsemmi hawn fuq, madankollu l-Kummissjoni hija kkonċernata mill-applikazzjoni ta’ azzjonijiet għad-difiża tan-negozju tal-Kommissjoni Ekonomika tal-Ewrażja.

4.3. L-Ukraina - użu limitat ta’ strumenti għad-difiża tan-negozju.

Mill-2009 sal-2011 l-Ukraina bdiet numru għoli ħafna ta’ investigazzjonijiet ta’ salvagwardja. Matul dawk is-snin, il-Kummissjoni intervjeniet f’kull wieħed minn dawn il-każijiet ta' salvagwardja kif ukoll ikkritikat lill-Ukraina għall-użu eċċessiv tal-istrument ta’ salvagwardja b’mod ġenerali. Meta mqabbel mal-2012, meta l-ebda każ ma kien inbeda, fl-2013 l-Ukraina nediet biss investigazzjoni ta’ salvagwardja waħda dwar prodotti tal-porċellana li jintużaw fuq il-mejda u fil-kċina. Madankollu, l-ottimiżmu dwar it-trażżin osservat dwar l-użu ta’ salvagwardji jista’ jkun biss limitat għax minkejja t-tħassib u l-bosta interventi tal-Kummissjoni, fl-14 ta’ April 2013 l-Ukraina imponiet miżuri ta’ salvagwardja kontra importazzjonijiet ta’ karozzi, li jolqtu interessi ekonomiċi tal-UE importanti ħafna. Il-Kummissjoni kienet attiva ħafna f’dan il-proċediment u ngħaqdet, bħala parti terza, fil-konsultazzjonijiet mad-WTO mitluba mill-Ġappun.

4.4. Il-Perù – tneħħija ta' miżuri.

Mindu l-awtoritajiet Peruvjani bdew proċediment antisussidjarju u imponew miżuri f’Diċembru 2010 dwar importazzjonijiet ta’ żejt taż-żebbuġa minn Spanja u l-Italja, il-Kummissjoni kif ukoll l-Istati Membri tal-UE b'mod attiv kienu qed jiddefendu l-interessi tal-UE f’dan il-każ. L-inkompatibbiltajiet tal-proċedimenti u miżuri mad-WTO ġew żvelati f’għadd kbir ta’ sottomissjonijiet, seduti u interventi kemm fuq livell tekniku kif ukoll fuq livell politiku u kif ukoll permezz tat-tnedija ta’ proċedura ta’ appell amministrattiva. Fl-aħħar nett, f’Marzu 2013, dawn l-interventi rriżultaw fit-tħassir ta’ dawn il-miżuri.

4.5. Il-Marokk – tnaqqis tal-impatt negattiv ta' miżuri.

Il-Kummissjoni intervjeniet bil-qawwa fl-investigazzjoni ta' salvagwardja Marokkina dwar importazzjonijiet ta’ prodotti tal-azzar. Il-Kummissjoni intervjeniet bil-miktub kif ukoll matul is-seduta pubblika u ġew organizzati diversi laqgħat ad hoc sabiex tiżgura l-aħjar riżultat għall-esportaturi tal-UE. Dawn l-interventi wasslu għal miżura iktar flessibbli peress li l-kwota proposta għal prodott wieħed ġiet irduppjata wara l-interventi tal-Kummissjoni. Għalkemm din hija kisba pożittiva, xorta għadu ta’ dispjaċir li l-miżuri ġew meħuda dwar dan il-prodott minħabba nuqqasijiet ovvji. L-investigazzjonijiet Marokkini jibqgħu jiġu sorveljati mill-qrib peress li s’issa ġew identifikati nuqqasijiet sistemiċi.

4.6. L-Afrika t'Isfel – sospensjoni ta' miżuri ta' salvagwardja.

L-Afrika t’Isfel imponiet miżura ta’ salvagwardja provviżorja projbittiva ta’ 60 % kontra importazzjonijiet ta’ chips iffriżati, ibbażata fuq raġunijiet dgħajfa ħafna, u l-Kummissjoni ukoll għamlet interventi konsiderevoli f’dan il-każ. Ġew organizzati bosta laqgħat ad hoc f’livelli differenti sabiex l-awtoritajiet tal-Afrika t’Isfel jiġu konvinti biex ma jimponux miżuri definittivi. Bħala riżultat ta’ dan, id-deċiżjoni li jiġu imposti dawn il-miżuri s’issa ġiet posposta, li jippermetti l-miżuri provviżorji jiskadu. L-esportazzjonijiet tal-UE ma setgħux jibqgħu jaċċessaw is-suq tal-Afrika t'Isfel b’dazju ta’ 60 %. Madankollu għandu jiġi nnotat li l-Afrika t’Isfel kienet nediet każ tal-antidumping (kontra l-Belġju u l-Pajjiżi l-Baxxi) u imponiet miżuri provviżorji fuq l-istess prodott minkejja analiżi dgħajfa tad-danni. L-investigazzjoni għadha għaddejja u dazji provviżorji jvarjaw minn 0 % sa madwar 30 % għal esportaturi li ma jikkooperawx.

4.7.             It-Turkija – tnaqqis tal-impatt negattiv ta' miżuri

It-Turkija kkonkludiet żewġ investigazzjonijiet tal-antidumping kurrenti fl-2013 (ħġieġ float u ħiters tal-ilma elettriċi). Fiż-żewġ każijiet it-Turkija ddeċidiet li timponi l-miżuri. Madankollu, bis-saħħa ta’ interventi konġunti attivi tal-Kummissjoni u l-industrija tal-UE, ir-rati tad-dazju definittivi kienu sinifikament aktar baxxi minn dawk proposti fi stadji aktar bikrin tal-investigazzjonijiet. Fil-każ tal-ħġieġ float id-dazju provviżorju kien ta’ 41 %, filwaqt li d-dazju definittiv għall-kumpanija li kkooperat naqas għal 16 %. Fil-każ tal-ħiters tal-ilma elettriċi l-awtoritajiet Torok qablu li jbiddlu l-metodu ta’ kalkolu sabiex jirrifletti aħjar is-sitwazzjoni reali għal esportatur wieħed. Bil-metodu l-ġdid, id-dazju naqas minn 19,82 % li kien propost oriġinarjament għal 9 %.

4.8. L-Eġittu – tmiem mingħajr miżuri

Barra mill-isforzi qawwija tal-Kummissjoni li inkludew interventi rigward in-nuqqasijiet tal-każ fil-Kumitat dwar Salvagwardji tad-WTO u konsultazzjonijiet tad-WTO bilaterali, l-Eġittu ma imponiex miżuri definittivi u impenja ruħu biex jirrifondi d-dazji provviżorji mħallsa preċedentement fil-każ taz-zokkor mhux maħdum u abjad. F’Novembru 2013 l-Eġittu temm ukoll l-investigazzjoni dwar vireg tal-azzar mingħajr l-impożizzjoni ta’ kwalunkwe miżuri definittivi.

4.9. L-Awstralja – tmiem tal-investigazzjonijiet ta' salvagwardja mingħajr miżuri

F'Diċembru 2013 l-Awstralja ddeċidiet li ttemm żewġ investigazzjonijiet ta' salvagwardja – kontra importazzjonijiet ta' prodotti tat-tadam ipproċessat u kontra importazzjonijiet ta' prodotti ta' frott ipproċessat – mingħajr l-impożizzjoni ta' kwalunkwe miżuri. Dan segwa għadd ta’ interventi inklużi sottomissjonijiet bil-miktub u l-parteċipazzjoni f’seduti orali mill-Kummissjoni, l-Istati Membri tal-UE u l-industrija tal-UE.

5. Konklużjoni

L-attività għad-difiża tan-negozju kontra l-UE jew l-Istati Membri tagħha reġa’ żdied fl-2013. Mhuwiex biss l-għadd totali tal-miżuri fis-seħħ li żdied b’mod sinifikanti fl-2013 meta mqabbel mal-2012, imma wkoll l-importanza u l-kumplessità tal-kwistjonijiet involuti.

Ġew żviluppati sforzi u riżorsi sinifikanti sabiex tiġi żgurata applikazzjoni korretta tar-regoli u l-aħjar riżultat possibbli għall-esportaturi tal-UE. B’riżultat ta’ dan, kien hemm għadd ta’ riżultati, li wħud minnhom ġew elenkati hawn fuq.

Sfortunatament, ħafna problemi għadhom jippersistu u, sabiex dawn jiġu indirizzati, il-Kummissjoni se tkompli tissorvelja mill-qrib l-attivitajiet għad-difiża tan-negozju ta' pajjiżi terzi u tintervjeni b'mod attiv fejn meħtieġ.

Il-Kummissjoni se tkompli wkoll kuntatti bilaterali mal-awtoritajiet investigattivi ta' pajjiżi terzi u tibqa' tagħtihom pariri/taħriġ bl-għan li timpedixxi t-tnedija ta’ każijiet mhux meħtieġa jew applikazzjoni inkorretta tar-regoli.

L-UE tapplika r-regoli li jirregolaw l-użu ta’ strumenti għad-difiża tan-negozju b’mod strett u trasparenti ħafna u tistenna li pajjiżi oħra jagħmlu l-istess. F’dan ir-rigward, wieħed mill-għanijiet ewlenin tal-Kummissjoni fil-qasam tal-kummerċ huwa li tiżgura aċċess għas-suq sħiħ u ġust f’pajjiżi terzi. Il-ġlieda kontra miżuri għad-difiża tan-negozju mhux ġustifikati hija b’mod ċar parti minn dan l-għan.