EUR-Lex Access to European Union law
This document is an excerpt from the EUR-Lex website
Document 52014DC0122
REPORT FROM THE COMMISSION TO THE EUROPEAN PARLIAMENT AND THE COUNCIL on the quality of fiscal data reported by Member States in 2013
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar il-kwalità tad-dejta fiskali rrappurtata mill-Istati Membri fl-2013
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar il-kwalità tad-dejta fiskali rrappurtata mill-Istati Membri fl-2013
/* COM/2014/0122 final */
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar il-kwalità tad-dejta fiskali rrappurtata mill-Istati Membri fl-2013 /* COM/2014/0122 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL dwar il-kwalità
tad-dejta fiskali rrappurtata mill-Istati Membri fl-2013 WERREJ 1............ Sfond. 4 2............ Is-sejbiet ewlenin dwar ir-rappurtar
tal-2013 dwar il-livelli tad-defiċit u d-dejn tal-gvernijiet 4 2.1......... Puntwalità, affidabbiltà u kompletezza. 4 2.1.1...... Puntwalità. 4 2.1.2...... Affidabbiltà. 5 2.1.3...... Il-kompletezza tat-tabelli u
tal-informazzjoni ta' sostenn. 5 2.1.4...... Tabelli supplimentari relatati
mal-kriżi finanzjarja. 6 2.1.5...... Kwestjonarju dwar is-self intergovernattiv. 7 2.2......... Il-konformità mar-regoli tal-kontabilità
u l-konsistenza tad-dejta tal-istatistika. 7 2.2.1...... Skambju ta' informazzjoni u kjarifiki 7 2.2.2...... Żjarat ta' djalogu u metodoloġija. 8 2.2.3...... Parir speċifiku minn Eurostat 9 2.2.4...... Kwistjonijiet metodoloġiċi
riċenti 9 2.2.5...... Konsistenza mal-kontijiet korrispondenti
tal-gvern. 10 2.3......... Pubblikazzjoni 11 2.3.1...... Il-pubblikazzjoni taċ-ċifri
ewlenin u t-tabelli dettaljati ta' rappurtar 11 2.3.2...... Riżervi dwar il-kwalità tad-dejta. 11 2.3.3...... Emendi fid-dejta rrappurtata. 12 2.3.4...... Il-pubblikazzjoni tal-metadejta (inventarji) 12 3............ Konklużjonijiet 12 1. Sfond L-Artikolu 8(3) tar-Regolament tal-Kunsill (KE)
Nru 479/2009 (kif emendat bir-Regolament (KE) Nru 679/2010), dwar
l-applikazzjoni tal-Protokoll dwar il-proċedura tad-defiċit
eċċessiv (EDP) anness mat-Trattat li jistabbilixxi l-Komunità Ewropea[1] jirrikjedi
lill-Kummissjoni (Eurostat) (minn hawn 'il quddiem "Eurostat") li
tirrapporta b'mod regolari lill-Parlament Ewropew u lill-Kunsill dwar
il-kwalità tad-dejta reali rrapportata mill-Istati Membri. Dan ir-rapport
annwali jipprovdi valutazzjoni kumplessiva tal-puntwalità, l-affidabbiltà,
il-kompletezza u l-konformità mar-regoli tal-kontabbiltà u l-konsistenza
tad-dejta. Ir-rapport preċedenti (dwar in-notifiki tal-2012) ġie
adottat mill-Kummissjoni fl-20 ta’ Frar 2013[2]. Eurostat jevalwa regolarment il-kwalità tad-dejta
reali rrappurtata mill-Istati Membri u tal-kontijiet sottostanti tas-setturi
tal-amministrazzjoni pubblika miġbura skont ir-Regolament tal-Kunsill (KE)
Nru 2223/96 tal-25 ta' Ġunju 1996 dwar is-sistema
Ewropea tal-kontijiet nazzjonali u reġjonali fil-Komunità (ESA95)[3]. Dan ix-xogħol
jikkonċentra fuq il-fatturi li jispjegaw id-defiċit/il-bilanċ
pożittiv tal-amministrazzjoni pubblika u l-bidla fid-dejn
tal-amministrazzjoni pubblika. L-Istati Membri jibagħtu din
l-informazzjoni lil Eurostat darbtejn fis-sena. Din tinkludi wkoll
informazzjoni supplimentari bħall-"Kwestjonarju relatat mat-tabelli
tan-notifika tal-EDP”, “It-Tabella supplimentari għall-kriżi
finanzjarja” u kjarifiki bilaterali mill-Istati Membri. Eurostat iżomm
ukoll djalogu permanenti mal-Istati Membri billi jwettaq żjarat ta’
djalogu regolari dwar il-EDP. Dan ir-rapport jissejjes fuq is-sejbiet u
r-riżultati ewlenin tar-rappurtar tal-EDP fl-2013, b'konċentrazzjoni
fuq l-aktar eżerċizzju riċenti ta' Ottubru 2013. Fejn jixraq,
isir tqabbil mar-rappurtar ta’ April 2013, u anki mar-rappurtar tal-2012. 2. Is-sejbiet ewlenin dwar ir-rappurtar tal-2013 dwar
il-livelli tad-defiċit u d-dejn tal-gvernijiet 2.1. Puntwalità, affidabbiltà u kompletezza 2.1.1. Puntwalità L-Istati Membri għandhom jirrapportaw
id-dejta reali u ppjanata tal-EDP lil Eurostat darbtejn fis-sena, qabel l-1 ta’
April u l-1 ta’ Ottubru[4].
Matul l-2013, ir-rappurtar tal-EDP kopra s-snin mill-2009 sal-2013.
Iċ-ċifri għall-2013 huma dawk ippjanati mill-awtoritajiet
nazzjonali, filwaqt li ċ-ċifri mill-2009 sal-2012 huma dejta reali
(din tfisser ċifri finali, semi finalizzati, proviżorji jew stmati).
Skont l-Artikolu 8(1) tar-Regolament (KE) Nru 479/2009, Eurostat
jevalwa d-dejta reali rrapportata mill-Istati Membri, iżda mhux id-dejta
ppjanata. . Il-konformità mad-dati tal-iskadenza tar-rappurtar
normalment tkun tajba ħafna. Fl-2013, l-Istati Membri kollha rrappurtaw
id-dejta reali tagħhom qabel l-iskadenza legali fiż-żewġ
nofitiki tal-EDP. Il-Kroazja rrappurtat għall-ewwel darba f’Ottubru 2013.
Fir-rigward tad-dejta ppjanata, fl-eżerċizzju ta’ rappurtar ta’
Ottubru 2013, xi pajjiżi taw id-dejta ppjanata għas-sena 2013 aktar
tard. 2.1.2. Affidabbiltà Ir-reviżjonijiet bejn in-notifiki ta' April
2013 u Ottubru 2013 kienu prinċipalment minħabba
aġġornamenti tad-dejta tas-sors u bidliet metodoloġiċi,
bħall-klassifikazzjoni mill-ġdid ta’ xi tranżazzjonijiet.
Bħas-soltu, id-dejn ġie rivedut anqas mid-defiċit bejn April u
Ottubru. L-akbar reviżjonijiet fid-defiċit
seħħew fil-Greċja u l-Irlanda. Fil-Greċja, id-defiċit
ġie rivedut ‘l isfel bejn in-notifiki tal-EDP ta’ April u Ottubru 2013
għas-sena 2012 minħabba d-disponibilità tad-dejta awditjata dwar
l-ammonti li jistgħu jiġu rkuprati mill-Fond Elleniku ta’ Stabilità
Finanzjarja (HFSF) f’każijiet ta’ riżoluzzjoni bankarja. Fl-Irlanda,
it-tnaqqis fid-defiċit għas-sena 2009 kien prinċipalment
minħabba l-inklużjoni ta’ dejta aktar dettaljata tal-karta
tal-bilanċ dwar id-dħul/l-infiq tad-dipartimenti tal-gvern.
Iż-żieda fid-defiċit Irlandiż għas-sena 2012 kienet
minħabba l-ħin tar-reġistrazzjoni mibdul ta’ bejgħ ta'
liċenzja tal-UMTS u minħabba aġġornamenti tad-dejta
tas-sors għal taxxi, dħul/infiq tad-dipartimenti tal-gvern u
l-fornitur tal-kura tas-saħħa nazzjonali. Fil-każ tad-dejn, l-akbar reviżjonijiet
bejn April u Ottubru ġew osservati fir-Repubblika Ċeka, id-Danimarka
u l-Portugall. Fir-Repubblika Ċeka, id-dejn irrappurtat għas-snin
2009-2012 żdied minħabba korrezzjoni fil-valwazzjoni ta’ strumenti
ta’ dejn iħħeġġjat denominat f’valuta barranija.
Fid-Danimarka, id-dejn ġie rivedut ‘l isfel għall-2012 minħabba
dejta tas-sors aġġornata għall-unitajiet tal-gvern ċentrali
u lokali u l-fondi tas-sigurtà soċjali. Fil-Portugall, iż-żieda
fid-dejn kienet dovuta għar-riklassifikazzjoni ta’ unità waħda
fis-settur tal-amministrazzjoni pubblika fir-reġjun ta’ Madeira u
minħabba r-riklassifikazzjoni bħala self ta’ xi ħlasijiet
bil-quddiem magħmula minn korporazzjoni pubblika lill-Istat. Bejn April u Ottubru, kien hemm reviżjonijiet
evidenti fil-PDG tal-Estonja għas-snin 2009, 2011 u 2012 u tal-Lussemburgu
għas-snin 2009-2012. Fir-rigward tar-reviżjonijiet li
seħħew fi żmien il-perjodu ta’ notifika, il-biċċa
l-kbira tal-Istati Membri rrevedew ir-rappurtar tagħhom wara l-ewwel
sottomissjoni f'Ottubru 2013. Intbagħtu 30 reviżjoni minn 18-il
pajjiż, filwaqt li f'April 2013, intbagħtu 46 sottomissjoni riveduta
minn 24 pajjiż. L-Istati Membri bagħtu l-biċċa l-kbira
tas-sottomissjonijiet riveduti b’rispons għall-kummenti, il-mistoqsijiet
tekniċi jew ir-rimarki ta' Eurostat, u dawn ikkonċernaw
il-kompletezza ta’ xi dejta nieqsa, korrezzjonijiet ta’ żbalji
tekniċi, inkonsistenzi interni, aġġustamenti pprovduti
fit-tabelli ta’ nofitika jew fil-kwestjonarju relatat jew dokumentazzjoni mhux
xierqa fit-tabelli. Fl-2013, is-sottomissjonijiet riveduti fil-perjodu
tan-notifika ma biddlux sostanzjalment il-livelli tad-defiċit u d-dejn li
kienu ġew oriġinarjament irrapportati mill-Istati Membri, għajr
għar-rappurtar ta' Ottubru, fejn iċ-ċifri tad-defiċit
ġew riveduti b'+0,2 punti perċentwali (pp) tal-PDG matul il-perjodu
tan-notifika fil-każ tal-Kroazja u l-Irlanda. 2.1.3. Il-kompletezza tat-tabelli u tal-informazzjoni ta' sostenn Il-kompletezza tat-tabelli tar-rappurtar hija
obbligu legali u hija essenzjali għall-valutazzjoni xierqa tal-kwalità
tad-dejta minn Eurostat. L-Artikolu 8(2) tar-Regolament (KE) Nru 479/2009 kif
emendat, jispeċifika li l-Istati Memrbi għandhom jipprovdu lil
Eurostat bl-informazzjoni statistika rilevanti, li "(...) b'mod
partikolari (...) tfisser: (a) dejta minn
kontijiet nazzjonali (b) inventarji; (c) tabelli
ta' notifika tal-EDP (d) kwestjonarji
u kjarifiki addizzjonali relatati man-notifiki." Hemm erba’ tabelli ewlenin tan-notifika tal-EDP.
It-tlestija tat-Tabelli 1 sa 3 tal-EDP hija obbligu legali, filwaqt li
r-rappurtar tat-Tabella 4 tal-EDP nqabel bejn l-Istati Membri[5]. It-Tabelli 1 u 2A
(gvern ċentrali) ikopru s-snin mill-2009 sal-2013, filwaqt li t-tabelli
l-oħrajn ikopru s-snin mill-2009 sal-2012[6]. Il-biċċa l-kbira tal-Istati Membri
lestew it-tabelli ta' notifika kollha tal-EDP[7].
Fir-rappurtar ta’ Ottubru 2013, għat-Tabella 2 tal-EDP, l-Istati
Membri kollha pprovdew dettalji dwar ir-rabta bejn il-bilanċ ta'
ħidma u l-bilanċ pożittiv/id-defiċit tal-EDP
għas-sottosetturi kollha. Fir-Renju Unit, il-bilanċ ta’ ħidma
huwa meqjus li huwa fuq bażi tal-ESA95. Għaldaqstant, ġew
irrappurtati ftit aġġustamenti biex jittrasformaw il-bilanċ ta'
ħidma fid-defiċit/il-bilanċ pożittiv skont l-ESA. Xi
pajjiżi oħra wkoll irrapportaw biss għadd limitat ta’ partiti
ta’ tranżizzjoni. Għat-Tabella 3 tal-EDP, mhux l-Istati
Membri kollha pprovdew id-dettalji kollha. B'mod partikolari, id-dettalji
għat-temi "self" u "ekwità" mhux dejjem ġew
irrappurtati. Barra minn hekk, xi ftit pajjiżi jużaw il-prassi li
jirraportaw diskrepanza statistika ta' żero, li normalment tkun tfisser li
d-diskrepanza hija inkluża skorrettement taħt “kontijiet oħra
riċevibbli/pagabbli”. Minkejja t-titjib miksub f’xi Stati Membri,
il-kopertura ġenerali tat-Tabella 4 tal-EDP baqgħet inadegwata
f’bosta każijiet. B’mod partikolari, għadd ta' pajjiżi mhux qed
jipprovdu dejta kompluta għall-istokk ta' obbligazzjonijiet ta' krediti u
avvanzi kummerċjali. Il-kompletezza tat-tabelli tal-EDP għad
tista’ tittejjeb. Mandankollu, il-kwistjonijiet li fadal mistennija jkollhom
impatt minimu fuq il-kwalità tad-dejta. L-Istati Membri kollha ppreżentaw
it-tweġibiet tagħhom għall-"Kwestjonarju relatat
mat-tabelli ta' notifika"[8].
Minkejja li l-kopertura u l-kwalità tat-tweġibiet baqgħu jitjiebu
meta mqabbla mas-snin l-imgħoddija, għad hemm il-ħtieġa ta’
progress, peress li xi pajjiżi ma rrapportawx id-dettalji kollha mitluba
fil-kwestjonarju. Dan japplika b'mod notevoli għad-dejta dwar
il-pretensjonijiet tal-gvern ċentrali u l-kanċellazzjonijiet
tad-dejn, id-dettalji ta' kontijiet oħra riċevibbli/pagabbli,
id-dokumentazzjoni ta' garanziji tal-gvern (l-aktar il-kopertura
tas-sottosettur tal-gvern lokali) u d-dejta dwar l-injezzjonijiet kapitali. 2.1.4. Tabelli supplimentari relatati mal-kriżi finanzjarja Eurostat ilu jiġbor sett ta' dejta dwar
il-kriżi finanzjarja f’tabella supplimentari mill-15 ta' Lulju 2009.
Id-dejta fil-Parti 1 tat-tabella supplimentari hija dik dwar
it-tranżazzjonijiet li jitniżżlu fil-kont tad-dħul/infiq
tal-gvern u li jkollhom impatt reali fuq id-defiċit/il-bilanċ
pożittiv tal-EDP. Id-dejta fil-Parti 2 tat-tabella supplimentari hija
marbuta mal-istokks ta’ assi finanzjarji u obbligazzjonijiet li
jirriżultaw mill-appoġġ lill-istituzzjonijiet finanzjarji. Din
tiddistingwi bejn l-attivitajiet li jkunu effettivament ikkontribwew
għall-obbligazzjonijiet tal-gvern (inklużi fid-dejn tal-gvern) u
l-attivitajiet li jistgħu potenzjalment jikkontribwixxu
għall-obbligazzjonijiet tal-gvern fil-ġejjieni, iżda li
għalissa jitqiesu li jiddependu minn avvenimenti fil-ġejjieni (mhux
inklużi fid-dejn tal-gvern). Dawn it-tabelli juru interventi tal-gvern
marbuta direttament mal-appoġġ għall-istituzzjonijiet
finanzjarji. Il-miżuri ta' sostenn għal istituzzjonijiet mhux
finanzjarji jew miżuri ta' sostenn ekonomiku ġenerali mhumiex
inklużi. Id-dejta miġbura fl-2013 imsemmija
fil-perjodu 2007-2012. Il-Membri Kollha għajr tmienja (il-Bulgarija,
ir-Repubblika Ċeka, l-Estonja, il-Kroazja, Malta, il-Polonja, ir-Rumanija
u s-Slovakkja) irrappurtaw għadd ta’ interventi meħuda mill-gvern
fil-kuntest tal-kriżi finanzjarja matul il-perjodu 2007-2012. Eurostat ippubblika
nota flimkien mal-Istqarrija għall-Istampa dwar il-EDP li tanalizza din
id-dejta[9].
2.1.5. Kwestjonarju dwar is-self intergovernattiv L-Istati Membri pprovdew ukoll dejta dwar is-self
intergovernattiv bilaterali, normalment fil-kuntest tal-programmi. L-istqarrija
għall-istampa dwar il-EDP tinkludi din l-informazzjoni kif ukoll
informazzjoni dwar is-self intergovernattiv fil-kuntest tal-Faċilità
Ewropea ta’ Stabbiltà Finanzjarja (EFSF), li tippermetti li ssir analiżi
tas-self li l-Istati Membri jagħtu għal operazzjonijiet ta’
appoġġ lil Stati Membri oħra (fl-2012, primarjament
lill-Greċja, l-Irlanda u l-Portugall). Dan is-self intergovernattiv bilaterali u s-self
intergovernattiv fil-kuntest tal-EFSF żdied sostanzjalment fil-kuntest
tal-kriżi finanzjarja. Jiġi mnaqqas fil-kalkolu tal-aggregati tal-UE
28 u taż-żona tal-ewro għad-dejn tal-gvern ta’ Maastricht[10], peress li t-tnejn
jingħataw fuq bażi konsolidata. Minħabba din il-konsolidazzjoni,
l-aggregati taż-żona euro u l-UE28 mhumiex ugwali għas-somma
aritmetika tad-dejn tal-Istati Membri (jiġifieri s-self intergovernattiv
imsemmi hawn fuq bejn il-gvernijiet mhux inkluż, biex jiġi evitat li
jingħadd darbtejn). Għalhekk, iċ-ċifri rrappurtati
għas-snin 2011 u 2012 għall-Istati Membri jinkludu l-ammonti
fir-rigward tal-EFSF. 2.2. Il-konformità mar-regoli tal-kontabilità u l-konsistenza
tad-dejta tal-istatistika 2.2.1. Skambju ta' informazzjoni u kjarifiki Matul il-perjodu ta' notifika bejn l-iskadenza
għar-rappurtar tal-1 ta' Ottubru u l-pubblikazzjoni tad-dejta fil-21 ta'
Ottubru 2013, Eurostat ikkuntattja lill-awtoritajiet nazzjonali tal-istatistika
f'kull Stat Membru biex jitlob iktar informazzjoni u jiċċara
l-applikazzjoni tar-regoli tal-kontabilità għal tranżazzjonijiet speċifiċi.
Dan il-proċess involva bosta sensiliet ta' korrispondenza bejn Eurostat u
l-awtoritajiet nazzjonali. Intbagħtet l-ewwel sensiela ta’ talbiet
għall-kjarifika lill-pajjiżi kollha qabel l-4 ta’ Ottubru. It-tieni
sensiela ta’ talbiet intbagħtet lil 23 pajjiż u t-tielet sensiela lil
ħdax-il pajjiż. Ir-raba’ sensiela ta’ kjarifiki ntbagħtet li
erba’ Stati Membri. Eurostat talab lil xi pajjiżi biex jibagħtu
tabelli ta' notifika riveduti[11].
2.2.2. Żjarat ta' djalogu u metodoloġija Ir-Regolament (KE) Nru 479/2009, kif emendat,
jipprevedi ż-żjarat ta' djalogu u ta' metodoloġija.
Iż-żjarat ta’ djalogu, inklużi dawk l-hekk imsejħa
“upstream dialogue visits”[12],
fl-Istati Membri jitwettqu regolarment bil-għan li jirrevedu d-dejta
rrapportata, jistħarrġu l-kwistjonijiet metodoloġiċi,
jiddiskutu s-sorsi tal-istatistika u jivvalutaw il-konformità mar-regoli
relevanti tal-kontabbiltà, pereżempju fir-rigward tad-delimitazzjoni
tal-amministrazzjoni pubblika, iż-żmien tad-dokumentazzjoni u
l-klassifikazzjoni tat-tranżazzjonijiet u l-obbligazzjonijiet tal-gvern. Fil-każ li titqajjem kwistjoni importanti
speċifika mal-Istat Membru, li ma tistax tiġi riżolta ħlief
b’laqgħa fiżika mal-awtoritajiet ikkonċernati, tiġi
organizzata laqgħa ad hoc bi proċedura mqassra fl-Istat
Membru. Matul is-sena 2013, Eurostat wettaq dawn
iż-żjarat ta’ djalogu dwar il-EDP li ġejjin: Spanja (mill-24
sal-25 ta’ Jannar), ir-Renju Unit (mill-24 sal-25 ta’ Jannar), l-Italja (mill-4
sal-5 ta’ Frar), l-Estonja (mis-27 sat-28 ta’ Frar), il-Polonja (mis-6 sat-8
ta’ Marzu, żjara ta' djalogu upstream), il-Greċja (mill-20 sal-21 ta’
Marzu), il-Lussemburgu (il-15 ta’ Mejju), l-Isvezja (mill-4 sal-5 ta’
Ġunju), il-Ġermanja (mit-18 sal-21 ta’ Ġunju u mit-22 sal-25 ta’
Ottubru, żjarat ta’ djalogu upstream), ir-Rumanija (mid-19 sal-20 ta’
Ġunju), il-Polonja (mit-8 sad-9 ta’ Lulju), ir-Rumanija (mit-28 sat-30 ta’
Awwissu, żjara ta' djalogu upstream — segwitu), is-Slovenja (mit-12 sat-13
ta’ Settembru), il-Greċja (mill-24 sal-25 ta’ Settembru), il-Finlandja
(mit-18 sad-19 ta’ Novembru), il-Pajjiżi l-Baxxi (is-26 ta’ Novembru),
is-Slovenja (mis-27 sad-29 ta’ Novembru, żjara ta' djalogu upstream) u
s-Slovakkja (mit-28 sad-29 ta’ Novembru). Barra minn hekk, fl-2013 twettqu
żjarat ad hoc fil-Kroazja mill-14 sal-15 ta’ Marzu u fi Spanja
mill-20 sal-21 ta’ Marzu u mis-26 sas-27 ta’ Settembru. Fl-2013, Eurostat
wettaq żjara ta’ qabel l-adeżjoni mal-euro fil-Latvja mit-8 sad-9 ta’
April u żjara ta’ qabel l-adeżjoni fil-Kroazja mis-26 sas-27 ta’
Ġunju. Il-kwistjonijiet rikorrenti diskussi
fiż-żjarat inkludew il-klassifikazzjoni tal-unitajiet fi ħdan u
lil hinn mis-settur tal-amministrazzjoni pubblika (eż. rigward it-trasport
pubbliku, korporazzjonijiet pubbliċi, it-televiżjoni u r-radju,
l-isptarijiet u l-universitajiet), l-injezzjonijiet kapitali, is-Sħubijiet
Pubbliċi-Privati, għotjiet mill-baġit tal-UE, id-dokumentazzjoni
tal-garanziji, u l-kwalità ġenerali tal-ġestjoni tal-flussi upstream
tad-dejta. Is-sejbiet finali f’kull żjara ta’ djalogu, inkluż
deskrizzjoni tal-punti ta’ azzjoni maqbula, u s-sitwazzjoni attwali,
jintbagħtu lill-Kumitat Ekonomiku u Finanzjarju u jiġu ppubblikati
fil-websajt tal-Eurostat. L-implimentazzjoni ta’ dawn il-punti ta' azzjoni
twassal għal titjib fil-kwalità tad-dejta maż-żmien. Iż-żjarat ta' metodoloġija jsiru
biss f'każijiet fejn Eurostat jidentifika riskji jew problemi sinifikanti
fil-kwalità tad-dejta, speċjalment fejn din tirrigwarda l-metodi,
il-kunċetti jew il-klassifkazzjonijiet użati. Ma saru l-ebda
żjarat metoloġiċi bħal dawn matul l-2013. 2.2.3. Parir speċifiku minn Eurostat L-Istati Membri jikkonsultaw regolarment ma'
Eurostat biex jiċċaraw diversi kwistjonijiet tal-kontabilità
nazzjonali b’rabta ma' operazzjonijiet fil-futur jew fil-passat. Eurostat
jagħti l-pariri skont il-linji gwida eżistenti. Biex jikkonforma
mad-dispożizzjoni ta' trasparenza fir-Regolament (KE) 479/2009, kif
emendat, Eurostat jippubblika l-pariri tiegħu[13], ħlief jekk
l-Istat Membru kkonċernat iqajjem oġġezzjoni. Eurostat
ippubblika dawn il-pariri fl-2013: it-trattament kontabbli tal-Bank of England
Asset Purchase Facility Fund (BEAPPF) u l-flussi bejn il-Bank of England u HM
Treasury fir-Renju Unit, it-trattament statistiku ta’ bejgħ ta'
konċessjoni qabel il-privatizzazzjoni fil-Portugall, ir-rikapitalizzazzjoni
tad-Dexia Group fil-Belġju, il-klassifikazzjoni ta' Sociedad de Activos de
Restructuracion (SAREB) fi Spanja, ir-reġistrazzjoni ta’ korrezzjonijiet
finanzjarji relatati mal-fondi tal-UE skont ir-Regolament 1083/2006 Art. 100(1)
fir-Rumanija, it-trattament statistiku tal-konċessjoni ta' 15-il sena
lill-ispettru tal-mowbajl fowns fl-Ungerija, it-trattament
tat-tranżazzjoni ta' proprjetà immobbli ta' LAK Invest fir-Reġjun
Fjamming fil-Belġju, ir-reġistrazzjoni tal-miżata ta’ garanzija
tal-IABF fl-Olanda, it-trattament tar-rifużjonijiet tat-taxxa,
il-ħlasijiet ta’ penali u ħlasijiet interim fil-każ dwar
it-taxxa ta’ Her Majesty’ s Revenue and Customs (HMRC) fir-Renju Unit,
ir-reġistrazzjoni tal-kanċellazzjoni ta’ ammonti pagabbli relatati
ma’ penali u multi li għandhom jitħallsu minn CFR Cai Ferate lil
fornituri privati tal-enerġija fir-Rumanija u l-klassifikazzjoni
tal-statistiska ta’ MyCSP Ltd. fir-Renju Unit. 2.2.4. Kwistjonijiet metodoloġiċi riċenti Bħas-soltu, Eurostat ivvaluta l-applikazzjoni
xierqa tar-regoli tal-ESA95, b’mod partikolari fid-dawl tal-aħħar
deċiżjonijiet tagħha skont l-Artikolu 10(2) tar-Regolament
(KE) Nru 479/2009. Dawn id-deċiżjonijiet kienu inklużi
fil-Manwal dwar id-Defiċit u d-Dejn tal-Gvern (MGDD), li l-aħħar
edizzjoni tiegħu kienet ippubblikata fi Frar 2013[14]. Il-verżjoni
l-ġdida tinkludi tliet kapitoli ġodda, li kienu s-suġġett
ta’ konsultazzjonijiet tal-Kumitat ta’ Statistika Monetarja, Finanzjarja u
l-Bilanċ tal-Pagamenti (CMFB): L-entitajiet Ewropej relatati
mal-kriżi tad-dejn sovran fiż-żona euro (l-EFSF u l-MES), self
b’interessi baxxi u l-bejgħ ta’ self b’interessi baxxi tal-gvern lil
partijiet terzi u l-permessi għall-iskambju tal-kwoti tal-emissjonijiet.
Ġew miżjuda wkoll kjarifiki żgħar f’kapitoli oħra
tal-MGDD. Wara l-aħħar (ir-raba’) laqgħa
f’Lulju 2013 tat-Task Force iddedikat għall- “adattament” tal-MGDD attwali
għall-ESA 2010 il-ġdid, ġie ffinalizzat abbozz tal-MGDD adattat
għall-metodoloġija tal-ESA 2010, u dan ġie pprovdut lill-Istati
Membri f’Awwissu 2013. F’Jannar 2013, Eurostat ippubblika
d-deċiżjoni tiegħu dwar “Ir-reġistrazzjoni statistika
ta’ self b’rata tal-imgħax baxx”[15]
u wkoll id-deċiżjoni dwar “Il-klassifikazzjoni tal-istatistika
tal-mekkaniżmu Ewropew ta’ Stabbiltà”[16],
wara li ġew magħrufa l-karatteristiċi finali tal-MES. F’Marzu 2013, Eurostat ippubblika
d-deċiżjoni tiegħu dwar il-“Kjarifika tal-kriterji
għar-reġistrazzjoni ta’ injezzjoni kapitali tal-gvern fil-banek”[17], wara ħtieġa
ta’ iktar kjarifika dwar il-kriterji marbuta mal-klassifikazzjoni ta’
injezzjoni kapitali fil-banek, notevolment fil-każ ta’ entitajiet li
joħorġu mis-suq. F’Lulju 2013, Eurostat ippubblika
d-deċiżjoni tiegħu dwar l-introduzzjoni ta’ “Suppliment dwar
obbligazzjonijiet kontinġenti u obbligazzjonijiet potenzjali
għall-kwestjonarju marbut mal-EDP”[18].
Il-kwestjonarju l-ġdid jinkludi tabelli dwar garanziji, sħubiji
pubbliċi privati (PPPs) li ma jidhrux fuq il-karta tal-bilanċ u self
mhux produttiv u ġie introdott fil-kuntest tad-Direttiva tal-Kunsill
2011/85/UE tat-8 ta’ Novembru 2011 dwar ir-rekwiżiti għal oqfsa
baġitarji tal-Istati Membri[19].
L-ewwel dejta se tiġi rilaxxata minn Eurostat f’Jannar 2015, flimkien
mad-dejta dwar l-obbligazzjonijiet totali ta’ unitajiet ikkontrollati tal-gvern
ikklassifikati barra l-amministrazzjoni pubblika. Wara konsultazzjoni CMFB inkonklussiva dwar
il-kwistjoni, f’Novembru 2013, Eurostat ippubblika d-deċiżjoni
tiegħu dwar ir-reġistrazzjoni ta’ “Trasferimenti
żbilanċjati ta’ obbligi tal-pensjoni lill-gvern taħt ESA 2010”. Minn Jannar 2013, Eurostat poġġa fuq
il-websajt tiegħu “L-inventarju tal-proċessi taż-EDP”.
L-għan ta’ dan id-dokument huwa li jiddeskrivi l-proċeduri u
l-prinċipji applikati fil-proċess ta’ verifika tad-dejta tal-EDP minn
Eurostat. 2.2.5. Konsistenza
mal-kontijiet korrispondenti tal-gvern L-iskadenzi għan-notifika
tal-1 ta' April u l-1 ta' Ottubru stipulati mir-Regolament
(KE) Nru 479/2009, kif emendat, ġew introdotti sabiex tkun
żgurata l-konsistenza mal-kontijiet korrispondenti annwali u ta' kull tliet
xhur tas-setturi tal-gvern, kif irrappurtat f'bosta tabelli ta'
trażmissjoni tal-ESA95. Eurostat sistematikament janalizza l-konsistenza
tan-notifiki tal-EDP mal-kontijiet settorjali korrispondenti tal-gvern.
Pereżempju, it-totali tal-infiq u d-dħul tal-gvern għandhom
ikunu konsistenti maċ-ċifri tad-defiċit irrappurtati . Il-konsistenza ġenerali tad-dejta tal-EDP
mal-kontijiet tal-gvern tal-ESA95 irrappurtati marret għall-aħjar
f’dawn l-aħħar snin, anki jekk għadha aħjar fil-każ
tad-dejta mhux finanzjarja milli għal dik finanzjarja. Fir-rappurtar ta’
Ottubru 2013, il-konsistenza bejn iċ-ċifri tal-EDP u t-tabelli
tal-ESA 2 u 25 (fil-livell annwali u dak ta' kull kwart) kienet kompluta
fil-każ tad-dejta mhux finanzjarja u d-dejn tal-gvern ta' kull kwart
(Tabella tal-ESA 28). Madankollu, għad jinħtieġu sforzi
mill-Istati Membri biex tiġi żgurata l-konsistenza bejn il-EDP u
t-tabelli tal-ESA fir-rigward tad-dejta finanzjarja. Feġġew
inkonsistenzi ċari bejn id-dejta tal-EDP u l-kontijiet finanzjarji ta’
kull kwart fir-rappurtar ta’ Ottubru 2013 fil-każ ta’ sitt Stati Membri, u
kien hemm inkonsistenzi bejn id-dejta tal-EDP u l-kontjiet finanzjarji annwali
tal-ESA fl-istokk tal-obbligazzjonijiet tal-krediti u l-avvanzi
kummerċjali f’iktar minn terz tal-Istati Membri. 2.3. Pubblikazzjoni 2.3.1. Il-pubblikazzjoni taċ-ċifri ewlenin u t-tabelli
dettaljati ta' rappurtar L-Artikolu 14(1) tar-Regolament (KE)
Nru 479/2009, kif emendat, jgħid: "Il-Kummissjoni (l-Eurostat)
għandha tipprovdi d-dejta attwali dwar l-iżbilanċ u d-dejn
tal-gvern għall-applikazzjoni tal-Protokoll dwar il-proċedura
tal-iżbilanċ eċċessiv, fi żmien tliet
ġimgħat wara l-iskadenza tat-termini perentorji tar-rappurtar […].
Dik il-fornitura ta’ dejta għandha titwettaq permezz ta’ pubblikazzjoni.” Id-dejta dwar id-defiċit u d-dejn tal-gvern
ġiet ippubblikata fit-22 ta' April[20]
u l-21 ta' Ottubru[21]
2013 flimkien mat-tabelli ta' rappurtar, kif notifikat mill-Istati Membri. Minn
Frar 2012 'l hawn, Eurostat qed jippubblika regolarment stqarrija
għall-istampa fuq id-dejn ta’ Maastricht ta’ kull kwart, f’madwar T+115
jum. Minn Frar 2012 'l hawn, Eurostat qed jippubblika “Statistics in Focus” fuq
id-defiċit tal-amministrazzjoni pubblika ta’ kull tliet xhur. Eurostat ippubblika wkoll fil-websajt tiegħu
l-istatistika finanzjarja governattiva annwali u ta’ kull tliet xhur li fuqha
tissejjes id-dejta tal-EDP, flimkien ma’ nota dwar l-aġġustamenti
bejn l-istokk u l-fluss[22].
Barra minn hekk, Eurostat ippubblika l-informazzjoni pprovduta mill-Istati
Membri dwar l-inverventi governattivi fil-kuntest tal-kriżi finanzjarja[23] u d-dejta dwar is-self
intergovernattiv. Eurostat ippubblika wkoll nota dwar l-istokk ta’
obbligazzjonijiet ta’ avvanzi u krediti kummerċjali[24]. Skont ir-Regolament (KE) Nru 479/2009,
kif emendat, l-Istati Membri għandhom jagħmlu pubblika d-dejta reali
tagħhom dwar id-defiċit u d-dejn. L-Istati Membri kollha jippubblikaw
ċifri dwar id-defiċit u d-dejn fil-livell nazzjonali.
Il-biċċa l-kbira tal-Istati Membri rrapportaw lil Eurostat il-prassi
li jippubblikaw it-tabelli kollha tar-rappurtar tagħhom. Ħames Stati
Membri jippubblikaw biss xi tabelli tar-rapporti, u Stat Membru wieħed,
Franza, ma jippubblikax it-tabelli tal-EDP fil-livell nazzjonali. 2.3.2. Riżervi dwar il-kwalità tad-dejta Eurostat esprima riżerva dwar id-dejta
rrapportata fin-notifika tal-EDP ta’ Ottubru 2013 għal Stat Membru
wieħed. L-Awstrija: Eurostat
qed jesprimi riżerva dwar il-kwalità tad-dejta rrappurtata mill-Awstrija,
minħabba xi inċertezzi dwar l-impatt statistiku
tal-konklużjonijiet tar-rapport tal-Uffiċċju Federali tal-Verifika
dwar il-Land ta' Salzburg, ippubblikat fid-9 ta’ Ottubru 2013. Ir-rapport
żvela nuqqasijiet rigward il-ġestjoni finanzjarja u l-kompletezza
tal-kontijiet pubbliċi tal-Land ta’ Salzburg. L-implikazzjonijiet
statistiċi tal-verifika tad-dejta tal-EDP qed jiġu investigati
mill-uffiċċju tal-istatistika tal-Awstrija b'kollaborazzjoni ma'
Eurostat, sabiex jiġu ċċarati l-impatti preċiżi fuq
l-2012 u wkoll fuq is-snin preċedenti. Jista' jkun li dan se jwassal
għal reviżjoni ‘l fuq tad-dejn tal-gvern sa massimu ta’ nofs
persentaġġ tal-PDG, b’aktar reviżjonijiet minuri
lid-defiċit tal-gvern, abbażi tal-informazzjoni disponibbli f’dan
il-punt. 2.3.3. Emendi fid-dejta rrappurtata Eurostat ma emendax id-dejta rappurtata
mill-Istati Membri fin-notifiki tal-EDP ta’ April u Ottubru 2013. 2.3.4. Il-pubblikazzjoni tal-metadejta (inventarji[25]) Ir-Regolament (KE) 479/2009, kif emendat,
jispeċifika li l-inventarji tal-EDP huma fost l-informazzjoni
tal-istatistika li għandha tingħata mill-Istati Membri biex
tippermetti lil Eurostat jivverifika l-konformità mar-regoli tal-ESA95. Barra
minn hekk, jistipula li l-pubblikazzjoni nazzjonali ta' dawn l-inventarji hija
mandatorja. Eurostat ippubblika l-inventarji tal-Istati Membri kollha,
bl-eċċezzjoni tal-Kroazja li ssieħbet mal-UE fl-1 ta’ Lulju
2013. Minbarra l-Lussemburgu u l-Pajjiżi l-Baxxi, l-Istati Membri kollha
rrappurtaw li ppubblikaw l-inventarji tal-EDP tagħhom fuq livell
nazzjonali. Fl-2012, Eurostat daħħal format
ġdid tal-inventarju tal-EDP, li involva bidliet strutturali u rrikjeda
informazzjoni aktar dettaljata (pereżempju, fir-rigward tal-proċeduri
tal-kompilazzjoni, id-deliminazzjoni tas-settur tal-amministrazzjoni pubblika,
tranżazzjonijiet speċifiċi, ġestjoni tal-kwalità, u sorsi
tad-dejta upstream, eċċ.). L-inventarji l-ġodda tal-EDP se
jiġu ppubblikati minn Eurostat sa tmiem l-2013. 3. Konklużjonijiet Eurostat jagħraf li kien hemm titjib
ġenerali fil-konsistenza u l-kompletezza tad-dejta rrappurtata.
Madankollu, għad baqa' xi kwistjonijiet, u l-Istati Membri għandhom
jagħmlu sforzi akbar biex itejbu l-kopertura u l-kwalità tal-krediti
kummerċjali rrapportati u l-kompletezza tad-dejta dwar il-livelli
governattivi subnazzjonali. B’mod partikolari, dan hu l-każ
għall-Belġju, id-Danimarka, il-Ġermanja, l-Irlanda, il-Greċja,
Franza, il-Kroazja, l-Italja, Ċipru, Malta, il-Pajjiżi l-Baxxi,
l-Awstrija u r-Renju Unit. Fl-2013, Eurostat esprima riżerva dwar
id-dejta rrapportata fin-notifika tal-EDP ta’ Ottubru 2013 għall-Awstrija.
Kollox ma’ kollox, Eurostat jikkonkludi li fl-2013
kompla jsir progress fil-kwalità tar-rappurtar tad-dejta fiskali. B'mod
ġenerali, l-Istati Membri pprovdew informazzjoni aħjar, kemm
fit-tabelli tan-notifika tal-EDP kif ukoll f'sottomissjonijiet ta' statistika
relevanti oħrajn. [1] ĠU
L 145, 10.6.2009, p. 1. [2] COM(2013) 88 finali. [3] ĠU
L 310, 30.11.1996, p. 1. [4] L-Artikolu 3(1)
u (3) tar-Regolament (KE) Nru 479/2009, kif emendat. [5] Ara
l-istqarrijiet mal-minuti tal-Kunsill tat-22 ta' Novembru 1993: https://webgate.ec.europa.eu/fpfis/mwikis/gfs/images/e/e7/Statements_9817.en93.pdf
[6] L-għoti
tad-dejta ppjanata fit-tabelli tal-EDP barra mit-tabelli 1 u 2A mhux
espliċitament mitlub fir-Regolament tal-Kunsill (KE) Nru 479/2009,
kif emendat. [7] It-tabelli
ta' notifika tal-EDP irrapportati mill-Istati Membri jinsabu fil-websajt
tal-Eurostat. Ara: http://epp.eurostat.ec.europa.eu/portal/page/portal/government_finance_statistics/excessive_deficit/edp_notification_tables
[8] Dan
il-kwestjonarju jinkludi tlettax-il taqsima li jirrikjedu informazzjoni
kwantitattiva u, kultant, kwalitattiva f'bosta oqsma bħalma huma
t-tranżazzjonijiet fit-taxxi u l-kontribuzzjonijiet soċjali u mal-UE,
ix-xiri ta' tagħmir militari, il-garanziji tal-gvern,
il-kanċellazzjonijiet tad-dejn, l-injezzjonijiet ta' kapital li
jagħmel il-gvern f'korporazzjonijiet pubbliċi, Sħubijiet
Pubbliċi Privati eċċ. [9] Ara:
http://epp.eurostat.ec.europa.eu/portal/page/portal/government_finance_statistics/documents/Background_note_fin_crisis_Oct_2013_final.pdf
[10] Skont il-Protokoll dwar il-proċedura ta’ defiċit
eċċessiv anness mat-Trattat tal-KE, id-dejn tal-gvern huwa d-dejn
gross konsolidat tas-settur tal-amministrazzjoni pubblika sħiħ li
jkun pendenti fi tmiem is-sena (f’valur nominali). Skont
ir-Regolament 479/2009, kif emendat, dan jinkludi l-kategoriji li
ġejjin: munita u depożiti (AF.2), titoli minbarra ishma (AF.3)
eskluż id-derivattivi finanzjarji (AF.34), u self (AF.4). [11] Ara
t-taqsima 2.1. [12] Filwaqt li ż-żjarat ta' djalogu standard huma
maħsuba sabiex jirrevedu d-dejta reali u s-sorsi, sabiex jiġu
eżaminati kwistjonijiet metodoloġiċi u sabiex tiġi
vvalutata l-konformità mar-regoli tal-kontabilità, l-għan
taż-żjarat "upstream" huwa li jirrevedu l-kwalità tas-sorsi
tad-dejta primarji tal-kontabilità pubblika u l-proċessi ta’ rappurtar. [13] Ara:
http://epp.eurostat.ec.europa.eu/portal/page/portal/government_finance_statistics/methodology/advice_member_states [14] Ara:
http://epp.eurostat.ec.europa.eu/portal/page/portal/product_details/publication?p_product_code=KS-RA-13-001.
[15] Ara: http://epp.eurostat.ec.europa.eu/portal/page/portal/government_finance_statistics/documents/ESTAT-decision-low_inter_rate_loans-annex_2013-01-16.pdf
[16] Ara: http://epp.eurostat.ec.europa.eu/portal/page/portal/government_finance_statistics/documents/Eurostat_Decision_on_ESM.pdf
[17] Ara: http://epp.eurostat.ec.europa.eu/portal/page/portal/government_finance_statistics/documents/ESTAT-decision-Criteria_for_classif_of_gov_capital_injec.pdf
[18] Ara: http://epp.eurostat.ec.europa.eu/portal/page/portal/government_finance_statistics/documents/ESTAT_decision-Suppl_on_conting_liab_EDP_Q.pdf
[19] ĠU L 306, 23.11.2011, p. 41. [20] Ara:http://epp.eurostat.ec.europa.eu/cache/ITY_PUBLIC/2-22042013-AP/EN/2-22042013-AP-EN.PDF
[21] Ara:http://epp.eurostat.ec.europa.eu/cache/ITY_PUBLIC/2-21102013-AP/EN/2-21102013-AP-EN.PDF
[22] Ara: http://epp.eurostat.ec.europa.eu/portal/page/portal/product_details/publication?p_product_code=STOCK_FLOW_2013_OCT
[23] Ara:
http://epp.eurostat.ec.europa.eu/portal/page/portal/government_finance_statistics/documents/Background_note_fin_crisis_Oct_2013_final.pdf
[24] Ara:
http://epp.eurostat.ec.europa.eu/portal/page/portal/government_finance_statistics/documents/Note_on_AF.71L-Oct_2013.pdf
[25] L-inventarji
tal-metodi, il-proċeduri u l-għejun użati għall-ġbir
tad-dejta reali dwar id-defiċit u d-dejn u l-kontijiet korrispondenti
tal-gvern.