52013PC0185

MEMORANDUM TA’ SPJEGAZZJONI

1.           KUNTEST TAL-PROPOSTA

L-Unjoni ilha Parti Kontraenti għall-Konvenzjoni Internazzjonali għall-Konservazzjoni tat-Tonn tal-Atlantiku (il-Konvenzjoni ICCAT) mill-14 ta’ Novembru 1997, wara l-adozzjoni tad-Deċiżjoni tal-Kunsill 86/238/KEE[1].

Il-Konvenzjoni ICCAT tipprovdi qafas għall-kooperazzjoni reġjonali fil-konservazzjoni u l-ġestjoni tat-tonn u l-ispeċijiet li jixbħu t-tonn fl-Oċean Atlantiku u l-ibħra li jmissu miegħu permezz tat-twaqqif ta’ Kummissjoni Internazzjonali għall-Konservazzjoni tat-Tonn tal-Atlantiku (ICCAT) u l-adozzjoni ta’ miżuri ta’ konservazzjoni u ġestjoni minn din il-Kummissjoni li jorbtu lill-Partijiet Kontraenti.

Fl-1998, l-ICCAT adottat ir-Riżoluzzjoni 98-18 dwar il-qabdiet ta' tonn mhux rapportati u mhux regolati minn bastimenti ta’ skala kbira li jużaw il-konzijiet fiż-Żona ta’ Konservazzjoni. Dik ir-Riżoluzzjoni tistabbilixxi proċeduri għall-identifikazzjoni ta’ pajjiżi li l-bastimenti tagħhom kienu stadu għat-tonn u għal speċijiet li jixbħu t-tonn b’mod li naqqas l-effettività tal-miżuri ta’ konservazzjoni u ġestjoni tal-ICCAT. Speċifikat ukoll miżuri li għandhom jittieħdu, li jinkludu, jekk meħtieġ, miżuri restrittivi tal-kummerċ mhux diskriminatorji, biex ma jkunx permess li l-bastimenti ta' dawk il-pajjiżi jkomplu dawn il-prattiki tas-sajd.

Mill-adozzjoni tar-Riżoluzzjoni 98-18, l-ICCAT identifikat il-Bolivja, il-Kambodja, il-Ginea Ekwatorjali, il-Ġeorġja u Sjerra Leone bħala pajjiżi li l-bastimenti tagħhom jistadu għat-tonn għajnu kbira tal-Atlantiku (Thunnus obesus) b’mod li jnaqqas l-effettività tal-miżuri ta’ konservazzjoni u ġestjoni u ssostanzjat dawn is-sejbiet b'dejta dwar il-qabdiet, il-kummerċ u l-attivitajiet tal-bastimenti. B’konsegwenza ta’ dan, l-ICCAT irrakkomandat li l-Partijiet Kontraenti jieħdu l-miżuri xierqa, konsistenti mad-dispożizzjonijiet tar-Riżoluzzjoni tal-1998, li tiddikjara li għandha tkun ipprojbita l-importazzjoni tat-tonn għajnu kbira tal-Atlantiku u l-prodotti tiegħu fi kwalunkwe forma mill-pajjiżi msemmija hawn fuq.

B'konsegwenza ta' dan, ġew ipprojbiti l-importazzjonijiet tat-tonn għajnu kbira tal-Atlantiku li joriġina fil-Bolivja, il-Kambodja, il-Ginea Ekwatorjali, il-Ġeorġja u Sjerra Leone fl-Unjoni Ewropea mir-Regolament (KE) Nru 827/2004[2]

Fl-14-il Laqgħa Speċjali fl-2004, l-ICCAT għarfet l-isforzi magħmula mill-Kambodja, il-Ginea Ekwatorjali u Sjerra Leone biex jindirizzaw it-tħassib tagħha u adottat rakkomandazzjonijiet biex tneħħi miżuri restrittivi tal-kummerċ fil-konfront ta’ dawk it-tliet pajjiżi.

B’konsegwenza ta’ dan, ir-Regolament (KE) Nru 827/2004 ġie emendat bir-Regolament (KE) Nru 919/2005[3], sabiex ikompli jipprojbixxi dawn l-importazzjonijiet biss mill-Bolivja u l-Ġeorġja, filwaqt li l-importazzjonijiet mill-Kambodja, il-Ginea Ekwatorjali u Sjerra Leone ġew awtorizzati mill-ġdid.

Barra minn hekk, waqt it-22 laqgħa annwali regolari, l-ICCAT għarfet l-isforzi magħmula u l-azzjonijiet meħuda mill-Bolivja u l-Ġeorġja u adottat ir-Rakkomandazzjoni 11-19 li tneħħi l-projbizzjonijiet fuq l-importazzjoni tat-tonn għajnu kbira tal-Atlantiku u l-prodotti tiegħu li kienu ġew imposti fuq dawk iż-żewġ pajjiżi.

Għalhekk jeħtieġ li jitħassar ir-Regolament (KE) Nru 827/2004 kif emendat mir-Regolament (KE) Nru 919/2005.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U TAL-VALUTAZZJONIJIET TAL-IMPATT

Mhux applikabbli.

3.           ELEMENTI LEGALI TAL-PROPOSTA

L-ICCAT adottat it-tneħħija tal-projbizzjonijiet fuq l-importazzjoni tat-tonn għajnu kbira tal-Atlantiku u l-prodotti tiegħu li kienu imposti fuq il-Bolivja u l-Ġeorġja, il-korp internazzjonali li tiegħu l-Unjoni Ewropea hija Parti Kontraenti. Sabiex tirrispetta l-impenji internazzjonali tagħha, l-Unjoni Ewropea għandha ddaħħal fis-seħħ deċiżjoni bħal din fil-liġi tal-Unjoni u għalhekk tħassar r-Regolament (KE) Nru 827/2004. Minħabba li din il-proposta tittratta l-politika kummerċjali komuni, il-bażi legali tagħha għandha tkun l-Artikolu 207 tat-Trattat dwar il-Funzjonament tal-Unjoni Ewropea.

4.           IMPLIKAZZJONI BAĠITARJA

Mhux applikabbli

5.           ELEMENTI FAKULTATTIVI

Mhux applikabbli

2013/0097 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jħassar ir-Regolament tal-Kunsill (KE) Nru 827/2004 li jipprojbixxi l-importazzjoni tat-tonn alalunga mill-Atlantiku (Thunnus obesus) li joriġina fil-Bolivja, l-Kambodja, il-Ginea Ekwatorjali, Ġeorġja u Sjerra Leone u li jħassar ir-Regolament (KE) Nru 1036/2001

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 207(2) tiegħu,

Wara li kkunsidraw il-proposta tal-Kummissjoni Ewropea,

Wara li l-att leġiżlattiv intbagħat lill-Parlamenti nazzjonali,

Filwaqt li jaġixxu skont il-proċedura leġiżlattiva ordinarja,

Billi:

(1)       L-Unjoni Ewropea ilha Parti Kontraenti għall-Konvenzjoni Internazzjonali għall-Konservazzjoni tat-Tonn tal-Atlantiku (il-Konvenzjoni ICCAT) mill-14 ta’ Novembru 1997, wara l-adozzjoni tad-Deċiżjoni tal-Kunsill 86/238/KEE[4].

(2)       Il-Konvenzjoni ICCAT tipprovdi qafas għall-kooperazzjoni reġjonali fil-konservazzjoni u l-ġestjoni tat-tonn u l-ispeċijiet li jixbħu t-tonn fl-Oċean Atlantiku u l-ibħra li jmissu miegħu permezz tal-istabbiliment ta’ Kummissjoni Internazzjonali għall-Konservazzjoni tat-Tonn tal-Atlantiku (ICCAT) u l-adozzjoni ta’ miżuri ta’ konservazzjoni u ġestjoni minn din il-Kummissjoni li jorbtu lill-Partijiet Kontraenti.

(3)       Fl-1998, l-ICCAT adottat ir-Riżoluzzjoni 98-18 dwar il-qabdiet ta' tonn mhux rapportati u mhux regolati minn bastimenti ta’ skala kbira li jużaw il-konzijiet fiż-żona ta’ Konservazzjoni. Dik ir-Riżoluzzjoni tistabbilixxi proċeduri għall-identifikazzjoni ta’ pajjiżi li l-bastimenti tagħhom kienu stadu għat-tonn u għal speċijiet li jixbħu t-tonn b’mod li naqqas l-effettività tal-miżuri ta’ konservazzjoni u ġestjoni tal-ICCAT. Din speċifikat ukoll miżuri li għandhom jittieħdu, li jinkludu, jekk meħtieġ, miżuri restrittivi tal-kummerċ mhux diskriminatorji, biex ma jkunx permess li l-bastimenti ta' dawk il-pajjiżi jkomplu prattiki bħal dawn ta' sajd.

(4)       Wara l-adozzjoni tar-Riżoluzzjoni 98-18, l-ICCAT identifikat il-Bolivja, il-Kambodja, il-Ginea Ekwatorjali, il-Ġeorġja u Sjerra Leone bħala pajjiżi li l-bastimenti tagħhom jistadu għat-tonn għajnu kbira tal-Atlantiku (Thunnus obesus) b’mod li jnaqqsu l-effettività tal-miżuri ta’ konservazzjoni u ġestjoni u ssostanzjat dawn is-sejbiet b'dejta dwar il-qabdiet, il-kummerċ u l-attivitajiet tal-bastimenti.

(5)       B’konsegwenza ta’ dan, l-ICCAT irrakkomandat li l-Partijiet Kontraenti jieħdu l-miżuri xierqa, konsistenti mad-dispożizzjonijiet tar-Riżoluzzjoni tal-1998, li tgħid li l-importazzjoni tat-tonn għajnu kbira tal-Atlantiku u l-prodotti tiegħu fi kwalunkwe forma mill-pajjiżi msemmija hawn fuq ikunu pprojbiti.

(6)       L-importazzjonijiet tat-tonn għajnu kbira tal-Atlantiku li joriġina fil-Bolivja, il-Kambodja, il-Ginea Ekwatorjali, il-Ġeorġja u Sjerra Leone fl-Unjoni Ewropea ġew ipprojbiti mir-Regolament (KE) Nru 827/2004[5]

(7)       Fl-14-il Laqgħa Speċjali fl-2004, l-ICCAT għarfet l-isforzi magħmula mill-Kambodja, il-Ginea Ekwatorjali u Sjerra Leone biex jindirizzaw it-tħassib tagħha u adottat rakkomandazzjonijiet biex tneħħi miżuri restrittivi tal-kummerċ fil-konfront ta’ dawk it-tliet pajjiżi.

(8)       B’konsegwenza ta’ dan, ir-Regolament (KE) Nru 827/2004 ġie emendat bir-Regolament (KE) Nru 919/2005[6], sabiex ikompli jipprojbixxi dawn l-importazzjonijiet biss mill-Bolivja u l-Ġeorġja, filwaqt li l-importazzjonijiet mill-Kambodja, il-Ginea Ekwatorjali u Sjerra Leone ġew permessi mill-ġdid.

(9)       Waqt it-22 laqgħa annwali regolari tagħha, l-ICCAT għarfet l-azzjonijiet meħuda mill-Bolivja u l-Ġeorġja u adottat ir-Rakkomandazzjoni 11-19 u neħħiet il-projbizzjonijiet fuq l-importazzjoni tat-tonn għajnu kbira tal-Atlantiku u l-prodotti tiegħu li kienu imposti fuq dawk iż-żewġ pajjiżi li kien fadal.

(10)     Għalhekk, ir-Regolament (KE) Nru 827/2004 għandu jiġi mħassar.

ADOTTAW DAN IR-REGOLAMENT:

Artikolu 1

Ir-Regolament (KE) Nru 827/2004 huwa mħassar.

Artikolu 2

Dan ir-Regolament għandu jidħol fis-seħħ fis-seba' jum ta' wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               ĠU L 162, 18.6.1986, p. 33.

[2]               ĠU L 127, 29.4.2004, p. 21.

[3]               ĠU L 156, 18.6.2005, p. 1.

[4]               ĠU L 162, 18.6.1986, p. 33.

[5]               ĠU L 127, 29.4.2004, p. 21.

[6]               ĠU L 156, 18.6.2005, p. 1.