This document is an excerpt from the EUR-Lex website
Document 52013DC0899
REPORT FROM THE COMMISSION TO THE EUROPEAN PARLIAMENT AND THE COUNCIL Evaluation of the Europass initiative Second evaluation of the Decision of the European Parliament and the Council on a single Community framework for the transparency of qualifications and competences (Europass)
RAPPORT TAL-KUMMISSJONI LILL-PARLAMENT EWROPEW U LILL-KUNSILL Evalwazzjoni tal-inizjattiva Europass It-tieni evalwazzjoni tad-Deċiżjoni tal-Parlament Ewropew u tal-Kunsill dwar qafas tal-Komunità uniku għat-trasparenza tal-kwalifiki u l-kompetenzi (Europass)
RAPPORT TAL-KUMMISSJONI LILL-PARLAMENT EWROPEW U LILL-KUNSILL Evalwazzjoni tal-inizjattiva Europass It-tieni evalwazzjoni tad-Deċiżjoni tal-Parlament Ewropew u tal-Kunsill dwar qafas tal-Komunità uniku għat-trasparenza tal-kwalifiki u l-kompetenzi (Europass)
/* COM/2013/0899 final */
RAPPORT TAL-KUMMISSJONI LILL-PARLAMENT EWROPEW U LILL-KUNSILL Evalwazzjoni tal-inizjattiva Europass It-tieni evalwazzjoni tad-Deċiżjoni tal-Parlament Ewropew u tal-Kunsill dwar qafas tal-Komunità uniku għat-trasparenza tal-kwalifiki u l-kompetenzi (Europass) /* COM/2013/0899 final */
1.
INTRODUZZJONI L-opportunitajiet ta’ tagħlim tal-lum
huma mingħajr limitu, mingħajr fruntieri u huma immedjati. L-individwi jistgħu
jitgħallmu u jiksbu ħiliet u kompetenzi ġodda mhux biss fl-ambjent
tradizzjonali ta’ klassi tal-iskola, iżda dejjem iktar barra minnha u bir-ritmu
tagħhom. Fil-klima preżenti ta’ tibdil ekonomiku u teknoloġiku mgħaġġel,
l-individwi jgħaddu wkoll minn diversi tranżizzjonijiet fil-ħajja professjonali
u akkademika tagħhom, jaqsmu fruntieri, jalternaw jew jikkombinaw ix-xogħol, l-edukazzjoni,
it-taħriġ ulterjuri jew il-volontarjat. Filwaqt li l-pressjoni
għall-impjegabbiltà u għal ħiliet aħjar qiegħda dejjem tikber, hemm il-ħtieġa ta’
sistemi tal-edukazzjoni u t-taħriġ iktar miftuħa u flessibbli, imfassla aħjar
għall-bżonnijiet u ċ-ċirkostanti tal-istudenti u tal-ħaddiema. Il-kwalifiki,
il-ħiliet u l-kompetenzi sħaħ tagħhom, għandhom jiġu rikonoxxuti b’mod faċli u
malajr, u għandhom ikunu tali li jinftiehmu minn min iħaddem u
mill-istabbilimenti tal-edukazzjoni u t-taħriġ fi kwalunkwe post fl-Ewropa. Fis-snin riċenti, fil-qafas ta' diversi
inizjattivi tal-programm Ewropa 2020 u
partikolarment fid-dawl tal-qgħad għoli persistenti,[1] il-Kummissjoni
enfasizzat l-importanza li tippermetti lill-istudenti u lill-ħaddiema
jippreżentaw b’mod ċar il-profili tal-ħiliet u tal-kwalifiki tagħhom miksuba kemm
f’ambjent formali, mhux formali jew informali. Dan iservi sabiex tiġi
ffaċilitata l-mobbiltà u jittejbu l-prospetti tal-impjieg u tat-tagħlim tul
il-ħajja. Dan l-għan huwa enfasizzat fil-Komunikazzjoni ‘Reviżjoni tal-Edukazzjoni’,[2] li fiha l-Kummissjoni
ħabbret xogħol esploratorju dwar iż-Żona Ewropea għall-Ħiliet u l-Kwalifiki
sabiex tiżgura li l-ħiliet u l-kwalifiki jkunu jistgħu jiġu rikonoxxuti b’mod
faċli madwar il-fruntieri. Il-Europass, stabbilit fl-2005[3],
jappoġġja dawn l-għanijiet billi jgħin lill-istudenti u lill-ħaddiema jindikaw aħjar
il-kompetenzi u l-għarfien tagħhom madwar l-Ewropa permezz ta’ għodod li
jirreġistraw u jrendu l-ħiliet u l-kwalifiki tagħhom trasparenti (ara t-taqsima 2 għal deskrizzjoni komprensiva). Filwaqt li l-għan
li għalih ġie stabbilit il-Europass qiegħed isir dejjem iktar rilevanti, xi
wħud mill-għodod preżenti tiegħu jeħtieġ jiġu adattati sabiex jindirizzaw
l-isfidi maħluqa mill-aspettattivi u l-ħtiġijiet tal-lum tal-istudenti u ta’
swieq tax-xogħol li qed jevolvu. Dan ir-rapport janalizza l-kisbiet
tal-qafas tal-Europass abbażi tal-evalwazzjoni esterna tal-Europass imwettqa
fl-2012.[4]
Huwa jenfasizza li l-għanijiet oriġinali għandhom jibqgħu rilevanti, b’mod
partikolari għall-Qafas Strateġiku 2020
għall-Edukazzjoni u t-Taħriġ għall-kooperazzjoni Ewropea (ET 2020).[5]
Il-Europass jappoġġja t-triq tal-istudenti u l-ħaddiema għat-tagħlim tul
il-ħajja jew għax-xogħol billi jippermetti li jiġu kkomparati ħiliet, kwalifiki
u eżiti ta’ tagħlim. Il-Europass, u b’mod partikolari, il-Europass CV, stabbilixxa
ruħu bħala prodott rikonoxxut tajjeb u fdat sew fejn jidħlu t-trasparenza u
r-rikonoxximent, kemm fl-Ewropa u kemm lil hinn minnha. Iċ-ċifri minn
Marzu 2013 jindikaw li mill-2005, ġew kompluti onlajn iktar minn 27 miljun Europass CV. Barra minn hekk,
l-għodod tal-Europass huma kosteffiċjenti u l-użu u d-disseminazzjoni tagħhom
evolvew konsiderevolment mill-ewwel evalwazzjoni tal-Europass, fl-2008. Dan ir-rapport jinnota wkoll
in-nuqqasijiet kurrenti tal-Europass biex jindirizza t-tibdil
fil-kundizzjonijiet tal-edukazzjoni, tat-taħriġ u tax-xogħol. Xi wħud
mill-għodod tiegħu ma jippromwovux modi flessibbli ta’ tagħlim u lanqas ma
jippermettu li jsir irrekordjar komprensiv tal-ħiliet miksuba permezz ta’
tagħlim mhux formali u informali, inkluż permezz ta’ tagħlim onlajn, kif iddikjarat
riċentiment fil-Komunikazzjoni tal-Kummissjoni ‘Niftħu l-Edukazzjoni’.[6] Id-dejta
tal-evalwazzjoni turi li ħafna mill-għodod Europass għadhom ma jilħqux
għalkollox gruppi ta’ utenti potenzjali. Bħalissa l-utenti tal-Europass
għandhom it-tendenza li jkunu żgħażagħ, nisa u edukati ħafna. Koordinazzjoni
aħjar mas-servizzi li jipprovdu gwida dwar il-karrieri u l-integrazzjoni
tagħhom fil-qafas tal-Europass, tippermetti li fil-mira jkun hemm gruppi kbar –
bħal persuni diżokkupati li għandhom ħiliet baxxi, li ħafna drabi għandhom
nuqqas ta’ ħila biex jikkompletaw id-dokumenti Europass jew li jsibuhom wisq
kumplessi u ta’ konfużjoni. Titjib neċessarju ieħor jinkludi konverġenza msaħħa ma’ għodod Ewropej ta’ referenza u interoperabbiltà
aħjar tal-għodod tal-IT tal-Europass mal-għodod tal-UE użati għat-tqabbil ta’
impjiegi. Sabiex jiġu indirizzati tali nuqqasijiet,
l-istruttura kurrenti tal-Europass għandha tinbidel radikalment u ssir servizz
iktar sempliċi, iktar orjentat lejn dak li qed jimmira u aġġornat, filwaqt li
jżomm l-għan oriġinali tiegħu ta’ komparabbiltà u trasparenza tal-ħiliet u
l-kwalifiki għat-titjib tal-mobbiltà ġeografika u okkupazzjonali tal-istudenti
u l-ħaddiema. Ir-reviżjoni mill-ġdid tal-Europass qed issir dejjem iktar
urġenti peress li jinsabu fil-proċess ta’ żvilupp diversi inizjattivi privati,
lokali u/jew nazzjonali b’għanijiet simili, b’mod partikolari f’format
elettroniku bħall-portafolji elettroniċi. Dawn il-kunsiderazzjonijiet se jkunu
kruċjali għat-tisħiħ tar-rwol tal-Europass fl-iżvilupp ta’ Żona Ewropea
għall-Ħiliet u l-Kwalifiki li permezz tagħha l-Kummissjoni se ssaħħaħ
is-sinerġiji bejn l-għodod Ewropej ta’ trasparenza u rikonoxximent
għall-kwalifiki tal-ħiliet. Għal dan l-għan, is-sejbiet ta’ dan ir-rapport se
jiġu kkombinati mar-riżultati tal-evalwazzjonijiet tal-Qafas Ewropew
tal-Kwalifiki u tal-Assigurazzjoni Ewropea tal-Kwalità fl-Edukazzjoni u
t-Taħriġ Vokazzjonali (VET) u tar-rapport tal-Progress dwar l-Assigurazzjoni
tal-Kwalità fl-Edukazzjoni Għolja. Flimkien se jappoġġjaw id-dibattitu pubbliku
li għandu jsir dwar iż-Żona Ewropea għall-Ħiliet u l-Kwalifiki fix-xitwa 2013/2014. 2.
EŻITI U IMPATT Il-Europass, stabbilit fl-2005 huwa portafoll ta’ ħames dokumenti
differenti li għandu l-għan li jinkludi deskrizzjonijiet tal-kisbiet
tat-tagħlim kollha tad-detentur, il-kwalifiki uffiċjali, l-esperjenza ta’
xogħol, il-ħiliet u l-kompetenzi miġbura matul is-snin. Żewġ dokumenti li huma
parti mill-Europass huma għodod ta’ awtodikjarazzjoni: il-Curriculum Vitae (CV)
Ewropew[7]
u l-Passaport tal-Lingwi tal-Europass,[8]
u tlieta huma maħruġa minn korpi tal-edukazzjoni u tat-taħriġ: is-Suppliment
tal-Europass tad-Diplomi,[9]
is-Suppliment tal-Europass taċ-Ċertifikati[10] u
d-dokument tal-Europass tal-Mobbiltà.[11]
Id-dokumenti kollha għandhom isem komuni (Europass) u logo. Il-Europass huwa
disponibbli mingħajr ħlas u f’27 lingwa,
f’format elettroniku aċċessibbli fuq il-portal tal-Europass.[12] Mill-2012, l-individwi jistgħu jiġbru d-dokumenti
Europass kollha fil-Passaport Ewropew tal-Ħiliet, folder elettroniku faċli biex
jintuża li jgħin lid-detenturi jibnu inventarju personali u modulari tal-ħiliet
u l-kwalifiki personali miġbura matul ħajjithom. 2.1 Nilħqu udjenzi ġodda Id-dokumenti Europass kollha huma meqjusa
suċċess — sa punti li jvarjaw minn xulxin — billi jagħmlu l-ħiliet,
il-kompetenzi u l-kwalifiki iktar komparabbli fil-pajjiżi u s-setturi kollha,
kif ukoll jagħmlu l-proċessi tal-għażla iktar faċli għal min iħaddem u
għall-istituzzjonijiet tal-edukazzjoni. Ir-rikonoxximent internazzjonali
tad-dokumenti hija r-raġuni ewlenija għall-utenti aħħarin biex jagħżlu
l-Europass. Il-Europass huwa meqjus bħala prodott b’saħħtu b’valur miżjud
Ewropew sinifikanti, li jilħaq udjenza wiesgħa u mmirata. Pereżempju
l-partijiet ikkonċernati u r-rappreżentanti nazzjonali tal-EURES[13] jissuġġerixxu li s-CV
u s-Supplimenti tad-Diplomi u ċ-Ċertifikati huma l-iktar dokumenti utli
tal-Europass għall-utenti kurrenti tal-EURES. Is-CV hija meqjusa bħala l-iktar strument
utli, apprezzat u magħruf mill-għodod kollha tal-Europass. L-użu tagħha ra
tkabbir kostanti – fl-2012 biss, inħolqu
tnax-il darba iktar CVs mill-2006. Skont
ma hu indikat, sa Marzu 2013, minn meta
ġie mniedi l-Europass kienu nħolqu aktar minn 27
miljun CV. Madankollu, is-Suppliment tad-Diplomi u s-Suppliment taċ-Ċertifikati
huma meqjusa bħala għodod importanti li jgħinu lill-istituzzjonijiet edukattivi
biex imexxu u jistrutturaw il-programmi edukattivi tagħhom b’mod aktar effettiv
billi jagħmlu użu mill-istandards internazzjonali. Minkejja dan, il-biċċa
l-kbira tal-għodod tal-Europass għadhom ma jilħqux gruppi kbar ta’ utenti
potenzjali. Fl-2012 biss, inħolqu biss 115 000
Passaport Ewropew Lingwistiku u tqassmu biss 80
000 dokument tal-Mobbiltà tal-Europass. Il-partijiet
ikkonċernati — inklużi min iħaddem u t-trejdunjins — utenti
aħħarin u utenti potenzjali jaqblu li l-għodod tal-Europass jikkontribwixxu b’mod
pożittiv għall-mobbiltà għat-tagħlim tul il-ħajja jew fis-suq tax-xogħol. 58 % ta’ dawk
li wieġbu stħarriġ imwettaq taħt l-evalwazzjoni esterna[14] ħassew li
s-CV għenithom sabiex jiġu mistiedna għal intervista għal impjieg, taħriġ jew
xogħol volontarju / ikunu magħżula minn qabel għal pożizzjoni ta’ impjieg,
taħriġ jew xogħol volontarju; 46 % ħassew
li għenithom sabiex jiġu aċċettati għal programmi ta’ tagħlim tul il-ħajja (e.ż.
Erasmus), korsijiet tal-lingwa eċċ. B’mod
partikolari, il-Europass jagħti kontribut utli għat-tibdil tal-impjieg jew
tal-lokalità: 60.4 % ta’ dawk li wieġbu rrikonoxxew il-kontribut
tal-Europass għal dan l-iżvilupp. Id-dokumenti Europass jissodisfaw
il-bżonnijiet tal-maġġoranza vasta (madwar 80 %)
tal-utenti tiegħu, irrispettivament mill-età jew mill-kisbiet edukattivi. Madankollu, l-iktar li jużaw il-Europass
huma l-gradwati. 40 % tal-utenti
aħħarin għandhom impjieg u 37 %
jinsabu fl-edukazzjoni u t-taħriġ. Il-Europass għandu rwol importanti wkoll
kemm fil-mobbiltà transnazzjonali kif ukoll fil-mobbiltà nazzjonali: iktar minn
40 % tal-individwi domestikament
mobbli issa jużaw id-dokumenti Europass. L-utenti tal-Europass għandhom
it-tendenza li jkunu żgħażagħ, nisa u edukati ħafna: kważi 60 % għandhom diploma fl-edukazzjoni
għolja. In-nisa jammontaw għal 59.4 % tal-utenti tal-Europass. L-iktar grupp diffiċli li jintlaħaq huwa
dak magħmul minn persuni diżokkupati u li għandhom ħiliet baxxi, kif ukoll
il-voluntiera, li jammontaw għal 12.8 % u 1.1 % tal-utenti tal-Europass
rispettivament. Id-dejta (Tabella 1)
turi li numru kbir ta’ persuni li għandhom ħiliet baxxi jew li huma diżokkupati
li ma jużawx il-Europass, ħafna drabi ma għandhomx il-ħila li jikkompletaw
id-dokumenti jew isibuhom wisq ikkumplikati u ta’ konfużjoni. Gwida mmirata
għal dawn il-gruppi tista’ ttejjeb l-aċċess tagħhom għal dokumenti Europass. Tabella. 1:
Utenti tal-Europass skont l-istatus tal-edukazzjoni/tax-xogħol[15] Status tal-edukazzjoni/tax-xogħol || Dokumenti Europass kollha || CV Europass || LP Europass || CS Europass || DS Europass || MD Europass Edukazzjoni jew taħriġ || 37.3 % || 30.2 % || 26.3 % || 20.1 % || 19.5 % || 30.5 % Arranġament volontarju || 1.1 % || 1.5 % || 1.5 % || 1.1 % || 1.1 % || 1.0 % Impjieg (inqas minn ħames snin) || 19.5 % || 20.2 % || 21.1 % || 31.4 % || 25.8 % || 32.4 % Impjieg (iktar minn ħames snin) || 20.8 % || 26.4 % || 32.0 % || 29.1 % || 35.2 % || 12.3 % Diżokkupati/ qed ifittxu impjieg || 12.8 % || 15.9 % || 12.5 % || 9.9 % || 14.4 % || 12.6 % Oħrajn || 8.5 % || 5.8 % || 6.6 % || 8.4 % || 4.0 % || 11.2 % Total || 100 % || 100 % || 100 % || 100 % || 100 % || 100 % Sors: Evalwazzjoni Europass 2012
mill-PPMI. Kif jidher fit-Tabella 2, iż-żgħażagħ li wieġbu (taħt l-20 sena sa 35
sena) huma l-ikbar utenti tad-dokument Europass, possibbilment minħabba li huma
iktar miftuħa għall-mobbiltà (bejn lokalitajiet, impjiegi u setturi
professjonali). Tabella. 2:
Utenti tal-Europass skont l-età [16] Età || Dokumenti Europass kollha || CV Europass || LP Europass || DS Europass || CS Europass || MD Europass <20 || 9 % || 9 % || 10 % || 2 % || 11 % || 10 % 21-25 || 41 % || 40 % || 35 % || 35 % || 42 % || 49 % 26-35 || 30 % || 32 % || 31 % || 40 % || 27 % || 31 % 36-49 || 14 % || 15 % || 18 % || 18 % || 17 % || 7 % 50+ || 5 % || 5 % || 6 % || 4 % || 5 % || 3 % Sors: 2012 Evalwazzjoni Europass
mill-PPMI. Il-perċentwali ġew approssimati. Il-Europass
għandu wkoll ‘impatt pedagoġiku’ fuq il-proprjetarju ta’ dawn id-dokumenti.
L-individwi huma inkoraġġiti jirrevedu l-ħiliet u l-kompetenzi tagħhom u li
jikkomunikawhom b’mod iktar ċar. Dan jgħin lil dawk li qed ifittxu impjieg biex
jiffukaw fuq dawk il-ħiliet u l-kompetenzi li huma l-iktar imfittxija
f’impjiegi vakanti. 2.2 Niffaċilitaw modi flessibbli ta’ tagħlim L-istħarriġ juri aspettattiva dejjem
tikber mill-partijiet ikkonċernati għal Europass biex jadatta għall-bżonnijiet li
jinbidlu tal-utenti tiegħu. Il-Europass għandu jippermetti l-ħiliet u
l-kwalifiki kollha ta’ individwu, u jinkorpora s-setturi kollha tal-edukazzjoni
u t-taħriġ u tipi ta’ esperjenza ta’ tagħlim, sabiex ikunu dokumentati b’mod
sħiħ u faċli. Simplifikazzjoni u aġġornament tal-qafas kollu, flimkien ma’
koerenza interna iktar b’saħħitha, b’mod ċar jintlaqgħu sabiex jindirizzaw modi
fl-edukazzjoni u taħriġ moderni, flessibbli u orjentati lejn l-istudenti.
Kwistjonijiet bħall-importanza akbar tat-tagħlim mhux formali u informali
għall-kisba ta’ ħiliet u kwalifiki ġodda jew għodod bħal ‘badges’ miftuħa,
iġġenerati minn fornituri onlajn tal-edukazzjoni bħalissa mhumiex indirizzati
mill-Europass. Fl-edukazzjoni u t-taħriġ formali,
bħalissa l-Europass għandu żewġ dokumenti supplimentari separati, kull wieħed
ikopri settur edukattiv speċifiku u sistema ta’ krediti differenti. Dan
il-format jista’ jtellef il-permeabbiltà rrakkomandata ta’ modi ta’ tagħlim.
Il-ħolqien ta’ struttura komuni għal dawn is-supplimenti sabiex ikopru
l-livelli u t-tipi kollha ta’ edukazzjoni u taħriġ (skejjel, edukazzjoni u
taħriġ vokazzjonali, edukazzjoni għolja u edukazzjoni adulta) se jiffaċilita
fehim komuni tal-kwalifiki, irrispettivament mis-settur inkwistjoni. L-istudenti
u l-ħaddiema mbagħad ikunu jistgħu jippreżentaw il-ħiliet tagħhom b’mod iktar
faċli meta japplikaw għal tagħlim ulterjuri f’settur ieħor. Mudell komuni li
jevita diverġenza jagħmel ukoll is-supplimenti eħfef biex jinqraw minn min
iħaddem. Bħalissa, il-Europass ma għandux għodda
li tippermetti l-irrekordjar komprensiv tal-ħiliet u l-kompetenzi akkwistati
permezz ta’ kwalunkwe esperjenza ta’ tagħlim mhux formali u informali (inkluż
onlajn). Id-dokument attwali tal-Mobbiltà tal-Europass sa issa kellu użu limitat
u jista’ jkun applikat biss f’kuntest strett ta’ mobbiltà internazzjonali. Fl-aħħar nett, l-uniku dokument ta’
awtodikjarazzjoni tal-Europass li jissupplimenta s-CV — il-Passaport tal-Lingwi
— intuża minn numru limitat ħafna ta’ persuni. L-utenti u min iħaddem iħossu li
s-CV għandha, minnha nnifisha, tagħti stampa komprensiva tal-ħiliet personali,
bħal-lingwi u kompetenzi fl-ICT, mingħajr il-bżonn ta’ dokumenti
awtodikjaratorji supplimentari prodotti mid-detenturi tas-CV. Dan it-titjib għandu jagħmel il-qafas
kollu iktar faċli u iktar sempliċi sabiex jintuża. It-tfassil mill-ġdid
tal-Europass jista’ jirrikjedi reviżjoni tal-bażi ġuridika attwali tiegħu,
peress li d-Deċiżjoni attwali ma tippermettix sostituzzjoni, tibdil jew
tneħħija ta’ ebda wieħed mill-ħames dokumenti li jsejsu l-Europass. 2.3 Noħolqu iktar sinerġiji ma’ inizjattivi Ewropej oħra Strumenti Ewropej oħra bħall-Qafas
Ewropew tal-Kwalifiki (il-QEK),[17]
is-Sistema Ewropea ta’ Krediti għal Edukazzjoni u Taħriġ Professjonali (ECVET)[18] u s-Sistema Ewropea għat-Trasferiment
ta’ Krediti (ECTS)[19]
ġew implimentati flimkien mal-Europass fl-aħħar deċennju sabiex jiġi appoġġjat
il-moviment tal-istudenti u l-ħaddiema. Huma jikkontribwixxu għall-mobbiltà
reali Ewropea u permezz tagħhom, l-għarfien, il-ħiliet u l-kompetenzi ta’
persuna jistgħu jiġu miftiehma b’mod ċar u jiġu rikonoxxuti malajr. Dawn l-istrumenti ma ġewx żviluppati
f’iżolament minn xulxin u huma kumplimentarji għall-Europass. L-integrazzjoni gradwali
u r-referenza għall-QEK, l-ECVET u l-ECTS fil-Europass hi
mistennija sseħħ hekk kif timxi 'l quddiem l-implimentazzjoni ta’ dawn
l-istrumenti. Ir-Rakkomandazzjoni Ewropea dwar il-QEK speċifikat li mill-2012, iċ-ċertifikati tal-kwalifiki, id-diplomi
u d-dokumenti Europass ġodda kollha maħruġa mill-awtoritajiet kompetenti
kellhom jinkludu referenza ċara għal-livell xieraq tal-QEK. Xi pajjiżi (CZ, DK,
EE, FR u IE) diġà bdew jirrekordjaw dawn il-livelli fid-dokumenti Europass
rilevanti (is-Suppliment tad-Diplomi u ċ-Ċertifikati) iżda jeħtieġ li jkun hemm
sforzi addizzjonali mill-bqija tal-pajjiżi. Minkejja l-kumplimentarjetà ta’ dawn
l-inizjattivi, xorta għad hemm fejn titjieb il-koerenza sabiex l-għodod u
s-servizzi differenti jiġu offruti b’mod ikkoordinat. Bħalissa l-utenti mhumiex
offruti aċċess faċli li jinftiehem u koerenti għal dawn l-istrumenti. Filwaqt
li kważi l-għodod Ewropej kollha ta’ trasparenza u mobbiltà għandhom il-portal
tagħhom u xi wħud għandhom punti ta’ konverġenza (bħall-għodda onlajn tas-CV li
tgħin lill-utenti tal-EURES biex joħolqu s-CV Europass tagħhom fuq il-websajt
tal-EURES), huma mhumiex konnessi biżżejjed. Dan jagħmilha iktar diffiċli
għall-utenti potenzjali biex jaċċessaw informazzjoni rilevanti, dokumenti u
servizzi. Hija meħtieġa iktar interoperabbiltà
tal-Europass ma’ għodod oħra tal-UE użati għat-tqabbil tal-impjiegi, inkluż
mal-EURES. Bl-istess mod, is-sinerġiji, bejn il-Europass u l-Youthpass, għodda
li ttejjeb ir-rikonoxximent tal-eżiti tat-tagħlim ta’ żgħażagħ li jieħdu parti
fi proġetti appoġġjati mill-Programm tal-UE Żgħażagħ fl-Azzjoni, jeħtieġ li
jitjiebu sabiex jiġu evitati koinċidenzi potenzjali. Eżempju ieħor hija
d-deċiżjoni li tirrikonoxxi kwalifika professjonali fi Stat Membru li
tawtorizza aċċess għal professjoni rregolata[20].
Id-detenturi tal-kwalifika għandhom ikunu jistgħu jamalgamaw mal-Europass
id-deċiżjoni ta’ rikonoxximent, fuq il-karta jew b’mod elettroniku, inkluż meta
din tinkiseb permezz tal-proċedura ġdida tal-Karta Professjonali Ewropea. 2.4 Insegwu governanza effiċjenti
u sostenibbli L-użu u
s-sensibilizzazzjoni ta’ għodod Europass differenti kibru b’mod kostanti mit-tnedija
tal-inizjattiva fl-2005. Il-portal
Europass huwa ħafna drabi responsabbli għaż-żieda fl-użu u s-sensibilizzazzjoni
ta’ dawn l-għodod ta’ trasparenza. Il-portal wera li għamel suċċess fir-rigward
ta' persuni li jżuruh, l-użu u s-sodisfazzjon tal-utent. L-għadd ta’ żjarat ilu
jiżdied kull sena minn madwar 3 miljuni
fl-2006 għal kważi 15-il miljun fl-2012.
Madwar 88 % tal-utenti li ġew
mistħarrġa qablu li l-portal Europass huwa faċli biex jintuża u huwa ċar. 60 % ħassew li żviluppi futuri tal-portal
għandhom, b’mod partikolari jinkludu informazzjoni u pariri dwar il-mobbiltà
transnazzjonali, ir-rikonoxximent tal-kwalifiki u t-tfittxija għall-impjiegi. Flimkien
mal-portal tal-internet tal-Europass, iċ-Ċentri Nazzjonali tal-Europass (NECs) huma
l-muturi ewlenin għall-implimentazzjoni tal-Europass. L-NECs kienu
operazzjonali fil-pajjiżi kollha tal-UE, kif ukoll fl-Iżlanda u fin-Norveġja,
min-nofs l-2005 (2007 għall-Bulgarija u r-Rumanija u 2011 għall-Kroazja), fil-Liechtenstein mill-2006, fit-Turkija mill-2008, u fl-Iżvizzera mill-2011.
Il-missjoni tagħhom ta’ sensibilizzazzjoni dwar il-Europass u li jipprovdu
l-informazzjoni neċessarja kollha lill-partijiet interessati kollha hija
meqjusa sodisfaċenti. Il-maġġoranza tal-NECs
jikkooperaw b’mod regolari ma’ korpi oħra, bħall-Eurogwida u ċ-ċentri NARIC, l-aġenziji
EURES, l-aġenziji nazzjonali LLP, il-Eurodesk u Europe Direct, għalkemm tali
kooperazzjoni tista’ tiġi msaħħa u s-sinerġiji jistgħu jiġu sfruttati aħjar.
Konverġenza msaħħa ta’ dawn il-korpi twassal għal strutturi ssimplifikati u
servizzi aħjar eqreb għall-istudenti u l-ħaddiema, li jiffaċilitaw l-aċċess
għall-Europass, b’mod partikolari minn dawk il-gruppi li bħalissa jibbenefikaw l-inqas
minnu. Madankollu, l-isforzi mill-NECs biex jippromwovu l-għodod Europass fost
fornituri ta’ servizzi tal-impjieg privati wrew li kellhom inqas suċċess. Ħafna
minn dawn il-fornituri huma lesti biss jippromwovu l-użu ta’ dokumenti Europass
għal gwadann finanzjarju. Is-Cedefop għandu
rwol ċar fis-suċċess tal-Europass. Minbarra l-immaniġġjar effettiv tal-portal
Europass u l-provvediment ta’ appoġġ għall-NECs, huwa jikkontribwixxi bil-ħila
esperta tiegħu għall-iżvilupp kunċettwali tal-qafas tal-Europass. Fl-2012, il-Kummissjoni pprovdiet appoġġ
finanzjarju li jammonta għal total ta’ € 2 250 000 għall-NECs permezz
tal-Programm Tagħlim tul il-Ħajja. B’mod ġenerali, l-evalwazzjoni esterna kellha
żieda fil-livelli tal-effiċjenza fl-aspetti kollha tal-Europass analizzati
mqabbla mal-evalwazzjoni tal-2008.
Filwaqt li l-finanzjament ipprovdut mill-UE[21]
u s-sorsi nazzjonali ma kellhomx żieda sinifikanti matul il-perjodu 2008-2011,
l-għadd ta’ dokumenti Europass maħluqa onlajn u maħruġa, u l-għadd ta’ żjarat
tal-portal, żdiedu b’mod kostanti mingħajr ebda sinjal ta’ tnaqqis
fil-popolarità tal-għodod Europass. Ġiet
osservata effiċjenza ikbar kemm f’termini tal-attivitajiet promozzjonali
mill-NECs kif ukoll fl-użu ta’ diversi għodod tal-Europass. L-ispiża totali
tal-Europass (mill-baġits nazzjonali, tal-Kummissjoni u tas-Cedefop) mit-tnedija
tiegħu hija ta’ madwar € 31.5 miljun. Abbażi ta’ 54 miljun CV Europass maħruġa mill-2005 (28 miljun maħluqa
onlajn u 27 miljun imniżżlin
mill-internet), l-ispiża medja ta’ CV waħda prodotta hija madwar € 0.58, li hija madwar erba’
darbiet inqas minn dak stmat fl-2008 (€ 2.1). Minħabba
l-prezz tant baxx għal kull dokument u l-livell għoli ta’ sodisfazzjon
tal-utent, l-evalwazzjoni tikkonkludi li l-implimentazzjoni tal-Europass
tipprovdi valur tajjeb għall-flus. Madankollu, probabbilment il-Europass mhux
se jibqa’ sostenibbli mingħajr it-tkomplija tal-appoġġ finanzjarju Ewropew.
Il-biċċa l-kbira tal-NECs mhux se jkunu jistgħu jkomplu joperaw mingħajr finanzjament
tal-UE, peress li ma ġew identifikati ebda sorsi ta’ finanzjament alternattiv
vijabbli għall-Europass u mhux mistenni li jkun hemm finanzjament pubbliku
addizzjonali. Ma hemm ebda inċentiv speċifiku għal atturi privati sabiex jiġu
involuti, minħabba li l-Europass ma jipprovdi ebda benefiċċju finanzjarju
immedjat. 3.
KONKLUŻJONIJIET Fl-isfond ta’
forza tax-xogħol li qed tiċkien u tkabbir ekonomiku minimu, waħda mill-iktar
sfidi urġenti għall-Istati Membri hija l-immodernizzar tas-sistemi
tal-edukazzjoni u tat-taħriġ tagħhom u t-titjib tal-provvista ta’ ħiliet sabiex
tissodisfa aħjar il-bżonnijiet tas-suq tax-xogħol. Il-Europass għandu jgħin
sabiex jiġu indirizzati dawn l-isfidi u għandu jissaħħaħ skont dan fis-snin li
ġejjin. Is-sejbiet u
r-rakkomandazzjonijiet tal-evalwazzjoni esterna jikkonfermaw li l-Europass
għandu jżomm ir-rwol qawwi tiegħu ta’ promozzjoni tal-mobbiltà u
l-komparabbiltà tal-ħiliet u l-kwalifiki. It-titjib propost jinkludi wkoll
razzjonalizzazzjoni aħjar u l-inklużjoni tad-dokumenti Europass sabiex titjieb
il-konverġenza ma’ għodod ta’ referenza Ewropej oħra u servizzi ta’ gwida
orjentati lejn il-mira marbuta mal-istrumenti Europass, biex b’hekk jiġu
appoġġjati l-mobbiltà transnazzjonali, ir-rikonoxximent tal-kwalifiki u
t-tfittxija ta’ impjiegi. Fuq kollox, il-Europass jeħtieġ li jsir għodda iktar
flessibbli u faċli biex tintuża, li għandu jisfrutta l-potenzjal ta’
teknoloġiji moderni sabiex jevolvi b’mod kostanti mal-bżonnijiet tal-utenti.
Għandu jżomm utenti eżistenti u jattira oħrajn ġodda, b’mod partikolari
individwi li għandhom ħiliet baxxi. Sabiex jintlaħaq dan, jista’ jkun meħtieġ
bażi ġuridiku ġdid tal-Europass, li jippermetti aġġornamenti u aġġustamenti
regolari ta’ dawn l-għodod. Bl-għan li
jiżdied l-appoġġ tal-Europass għall-istudenti u l-ħaddiema li jippreżentaw
il-ħiliet u l-kompetenzi tagħhom, għandhom jiġu kkunsidrati b’mod partikolari
l-iżviluppi li ġejjin: • Sinerġiji mtejba
bejn il-Europass u inizjattivi Ewropej oħra — Minkejja s-suċċess ġenerali
tal-Europass, il-gwida dwar l-użu tal-għodod Europass tista’ tittejjeb u
tissaħħaħ permezz ta’ koordinazzjoni aħjar ma’ servizzi li jipprovdu gwida
tal-karrieri u trasparenza u rikonoxximent tal-kwalifiki, sabiex tilħaq udjenzi
ikbar u tiġġenera valur miżjud ikbar. Dan jidher li huwa partikolarment
rilevanti għal gruppi li għandhom diffikultà ikbar biex jużaw il-Europass, bħal
dawk li għandhom ħiliet baxxi u dawk diżokkupati. Fi ħdan Żona Ewropea futura
għall-Ħiliet u l-Kwalifiki, il-Europass jista’ jiffoka fuq il-provvediment ta’
servizzi tal-informazzjoni u għodod interattivi għat-trasparenza tal-ħiliet u
l-kwalifiki, li jlaqqgħu flimkien in-netwerks Ewropej differenti, is-servizzi
tal-informazzjoni u għodod oħra li bħalissa huma kkonċernati mill-ħiliet u
l-kwalifiki flimkien taħt punt ta’ dħul uniku. Dan jippermetti lill-istudenti u
lill-ħaddiema jagħmlu użu aħjar mill-għodod tat-trasparenza u r-rikonoxximent,
li jsiru magħrufa aħjar ukoll fost istituzzjonijiet u negozji u għaldaqstant ikunu
iktar effettivi. L-ippuljar ta’ dawn ir-riżorsi għandu jikseb kisbiet
effiċjenti u jippermetti l-integrazzjoni tar-riżorsi mal-kontrapartijiet
tagħhom fil-livell nazzjonali. Barra minn hekk, dan probabbilment
jikkontribwixxi għal promozzjoni u implimentazzjoni usa’ tal-għodod Europass fost
il-partijiet differenti ikkonċernati fin-netwerk uniku amalgamat tas-servizz li
jirriżulta. ·
Il-Europass bħala strument li jiffaċilita modi flessibbli
ta’ tagħlim — Hemm bżonn ċar li jiġu adattati l-għodod
Europass kurrenti għal modi ta’ tagħlim iktar flessibbli u iktar orjentati lejn
l-istudenti, li jissodisfaw il-bżonnijiet ta’ individwi. Il-qafas mibdul
radikalment għandu jkun flessibbli biżżejjed biex jintegra kif xieraq żviluppi
u tekniki ġodda dwar l-edukazzjoni u t-taħriġ, inkluż fl-ICT. Bħalissa, hemm żewġ
setturi fejn dawn il-bżonnijiet jidhru iktar urġenti: a) Il-Europass għandu żewġ għodod differenti
li jipprovdu informazzjoni supplimentari dwar eżiti ta’ tagħlim: is-Suppilment
tad-Diplomi għal kwalifiki ta’ edukazzjoni għolja u s-Suppliment taċ-Ċertifikati
għal taħriġ vokazzjonali. Huwa utli li wieħed jesplora jekk dokument uniku
jistax jiffaċilita fehim komuni tal-kwalifiki maħruġa minn kwalunkwe settur
tal-edukazzjoni u tat-taħriġ u jistax jistimola l-interoperabbiltà tas-sistemi
Ewropej tat-trasferiment tal-krediti, bħall-ECTS u l-ECVET, bejn livelli ta’
edukazzjoni u taħriġ u fil-pajjiżi kollha. b) L-irrekordjar ta’ ħiliet miksuba permezz
ta’ esperjenza ta’ tagħlim mhux formali jew informali, inkluż permezz ta’
edukazzjoni onlajn: illum, id-dokument tal-Mobbiltà tal-Europass biss
jipprevedi l-irrekordjar ta’ ħiliet akkwistati f’ambjent mhux formali barra
mill-pajjiż. F’konformità mar-Rakkomandazzjoni tal-Kunsill dwar il-validazzjoni
ta’ tagħlim mhux formali u informali, il-Europass għandu jiġi rivedut sabiex
jippermetti l-identifikazzjoni u d-dokumentazzjoni ta’ ħiliet, inklużi awditi
tal-ħiliet, miksuba permezz ta’ tagħlim mhux formali u informali, kemm permezz
tal-mobbiltà kif ukoll mingħajrha. Abbażi tax-xogħol preparatorju li diġà sar
mill-Kummissjoni dwar dokument potenzjali ġdid “Esperjenza Europass”, din
il-karatteristika ġdida għandha tappoġġja l-linji gwida Ewropej dwar
il-validazzjoni ta’ tagħlim mhux formali u informali. Dawn il-karatteristiki
ġodda jkunu rilevanti wkoll għall-inizjattivi ta’ garanziji u apprentistat
għaż-żgħażagħ.[22]
Għandu jiġi esplorat ukoll il-mod li bih
għandhom jiġu rreġistrati ċertifikati ġġenerati mill-mekkaniżmu Youthpass
fil-Europass sabiex jiġu evitati koinċidenzi. Huwa meħtieġ ukoll xogħol
ulterjuri sabiex jiġi analizzat kif għodod ta’ trasparenza bħal ‘badges’
miftuħa maħluqa mill-proċessi ġodda ta’ ċertifikazzjoni dwar tagħlim diġitali
għandhom jiġu integrati fil-Europass jew bħala suppliment tiegħu. Fl-aħħar nett,
ħiliet ICT funzjonali u avvanzati għandhom ikunu iktar viżibbli fis-CV Europass. ·
Intejbu l-interoperabbiltà tal-Europass
mal-għodod tal-UE użati għat-tqabbil tal-impjiegi –Standards
tekniċi differenti bħalissa jipprevjenu konverġenza mtejba fost xi għodod
tal-UE użati minn dawk li qed ifittxu x-xogħol. Huma meħtieġa sforzi ulterjuri
sabiex l-għodda tas-CV Europass u l-Passaport Ewropew ġdid dwar il-Ħiliet ikollhom
ħolqa mal-bażi tad-dejta tas-CV EURES u ma’ għodod ta’ servizzi privati ta’
impjieg, gwida u ċentri ta’ validazzjoni kif ukoll għodod ta’ valutazzjoni
tal-ħiliet. Għandha tiġi esplorata wkoll l-amalgamazzjoni tad-deċiżjoni li
tirrikonoxxi kwalifika professjonali fi Stat Membru, inkluż meta tkun inkisbet
permezz tal-proċedura tal-Karta Professjonali Ewropea, mal-Europass. Kif semmejna, il-Komunikazzjoni
‘Reviżjoni tal-Edukazzjoni’ enfasizzat ir-rwol tal-edukazzjoni u l-ħiliet bħala
assi strateġiċi ewlenija għat-tkabbir ekonomiku, il-kompetittività u l-impjieg.
Waħda mill-proposti ta’ ‘Reviżjoni tal-Edukazzjoni’ hija li jiġu esplorati
iktar is-sinerġiji u l-konverġenza ta’ għodod tal-UE eżistenti għat-trasparenza
u r-rikonoxximent ta’ ħiliet u kwalifiki bil-għan li tiġi ffurmata Żona Ewropea
ta’ Ħiliet u Kwalifiki, li tippermetti li kulħadd jiċċaqlaq b’mod liberu u
jkollu l-kompetenzi u l-kwalifiki tiegħu rikonoxxuti malajr għal tagħlim
ulterjuri u jkunu jinftiehmu u vvalutati b’mod adegwat minn min iħaddem. Il-Kummissjoni se
tiddiskuti l-konklużjonijiet ippreżentati f’dan ir-rapport mal-partijiet
ikkonċernati rilevanti matul dibattitu pubbliku dwar iż-Żona Ewropea ta’ Ħiliet
u Kwalifiki fix-xitwa 2013/2014. Abbażi tal-konklużjonijiet ta’ dan
id-dibattitu dwar il-qafas tal-Europass u dwar Valutazzjoni tal-Impatt,
il-Kummissjoni tista’ tikkunsidra li tipproponi reviżjoni tal-bażi ġuridika
kurrenti tal-Europass— Deċiżjoni 2241/2004/KE tal-Parlament Ewropew u tal-Kunsill
tal-15 ta’ Diċembru 2004. [1] COM(2010) 478 finali, COM(2010)
682 finali, COM(2010) 245 finali/2, COM(2012)
173 finali, COM(2012) 485 finali. [2] COM(2012) 669 finali. [3] Deċiżjoni 2241/2004/KE tal-Parlament Ewropew u tal-Kunsill
tal-15 ta’ Diċembru 2004, magħrufa f’dan ir-rapport bħala
“id-Deċiżjoni”. [4]Ara l-Artikolu 15
tad-Deċiżjoni. Ir-rapport kurrenti jiffoka fuq is-sejbiet tat-tieni
evalwazzjoni tal-Europass, imwettqa fl-2012
mill-Public Policy and Management Institute (PPMI). Ara http://ec.europa.eu/dgs/education_culture/evalreports/index_en.htm#trainingHeader. [5] ĠU 2009/C 119/02. [6] COM(2013) 654 final. [7] Mudell għad-deskrizzjoni tal-curriculum vitae tad-detentur. [8] Għodda ta’ awtodikjarazzjoni għall-ħiliet lingwistiċi, li tuża skala
ta’ referenza tal-profiċjenza lingwistika tal-Qafas Ewropew Komuni
tar-Referenza għal-Lingwi. [9] Jelenka l-kisbiet tad-detenturi ta’ diploma jew lawrji tal-edukazzjoni
għolja, inklużi s-suġġetti studjati u l-gradi miksuba. [10] Deskrizzjoni tal-kontenut ta’ kwalifiki vokazzjonali sabiex jiġi
ssupplimentat ċertifikat ta’ edukazzjoni jew taħriġ vokazzjonali diġà maħruġ. [11] Dokument maħruġ minn awtoritajiet edukazzjonali jew tat-taħriġ li
jirrekordja l-esperjenzi tax-xogħol u tal-edukazzjoni f’pajjiżi Ewropej oħra. [12] Il-portal ġie żviluppat, ospitat u mmaniġġjat mis-Cedefop f’isem
il-Kummissjoni. Ara http://europass.cedefop.europa.eu/mt/home. [13] https://ec.europa.eu/eures/home.jsp?lang=mt&langChanged=true. [14] http://ec.europa.eu/dgs/education_culture/evalreports/training/2013/europass_en.pdf Id-dejta f’dan
ir-rapport ġiet misluta minn evalwazzjoni esterna. [15] L-akronimi jfissru: CV: Curriculum Vitae; LP: Passaport tal-Lingwa;
MD: Dokument tal-Mobbiltà; DS: Suppliment tad-Diplomi; CS: Suppliment
taċ-Ċertifikati. [16] idem. [17] http://ec.europa.eu/education/lifelong-learning-policy/eqf_en.htm. [18] http://ec.europa.eu/education/lifelong-learning-policy/ecvet_en.htm. [19] http://ec.europa.eu/education/lifelong-learning-policy/ects_en.htm. [20] Direttiva 2005/36/KE [21] Il-kontribuzzjoni tal-UE tammonta sa 50 %
tal-ispejjeż operattivi taċ-ċentri nazzjonali tal-Europass. [22] Ara wkoll http://ec.europa.eu/social/main.jsp?catId=1006.