52013DC0844

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar ir-rieżami konġunt tal-implimentazzjoni tal-Ftehim bejn l-Unjoni Ewropea u l-Istati Uniti tal-Amerika dwar l-ipproċessar u t-trasferiment ta' entrati fir-reġistru tal-ismijiet tal-passiġġieri lid-Dipartiment tas-Sigurtà Interna tal-Istati Uniti

Il-Ftehim preżenti bejn l-Istati Uniti tal-Amerika u l-Unjoni Ewropea dwar l-użu u t-trasferiment ta' entrati fir-reġistru tal-ismijiet tal-passiġġieri lid-Dipartiment tas-Sigurtà Interna tal-Istati Uniti daħal fis-seħħ fl-1 ta' Lulju 2012.

Il-Ftehim jipprovdi li għandu jsir l-ewwel rieżami konġunt sena wara li jidħol fis-seħħ u mbagħad b’mod regolari kif maqbul b’mod konġunt. Din ir-rieżami konġunt sar fit-8 u d-9 ta’ Lulju 2013 f’Washington. L-attenzjoni prinċipali tiegħu kienet fuq l-implimentazzjoni tal-Ftehim, b’attenzjoni partikolari għall-metodu tat-trażmissjoni tal-entrati fir-reġistri tal-ismijiet tal-passiġġieri (PNR) kif ukoll it-trasferiment ulterjuri tal-entrati fil-PNR kif stabbilit fl-artikoli relevanti tal-Ftehim, u skont il-premessa Nru 18 tal-Ftehim.

Ir-rieżami konġunt huwa bbażat fuq il-metodoloġija żviluppata bejn it-timijiet mill-UE u mill-Istati Uniti għall-ewwel rieżami konġunt tal-Ftehim PNR tal-2004, li sar f’Settembru 2005.  L-ewwel parti ta' din il-metodoloġija kienet tikkonsisti minn kwestjonarju mibgħut mill-Kummissjoni Ewropea lid-Dipartiment tas-Sigurtà Interna tal-Istati Uniti (DHS), qabel ir-rieżami konġunt. Id-DHS ipprovda t-tweġibiet bil-miktub għall-kwestjonarju qabel ir-rieżami konġunt. It-tieni parti kienet tikkonsisti minn żjara fil-post f'ċentru tal-operazzjonijiet tad-DHS mit-tim tal-UE. It-tielet parti kienet tikkonsisti minn laqgħa bejn rappreżentanti tad-DHS, tad-Dipartiment tal-Ġustizzja u tad-Dipartiment tal-Istat tal-Istati Uniti, it-tim tal-UE u mill-Uffiċċju tal-Privatezza tad-DHS, li ddiskutew fid-dettall l-implimentazzjoni tal-Ftehim.

Qabel ir-rieżami konġunt l-Uffiċċju tal-Privatezza tad-DHS wettaq rieżami intern tal-implimentazzjoni mid-DHS tal-Ftehim. Dan ir-rieżami sar biex jiġi ddeterminat jekk id-DHS hux qed jopera f'konformità mal-istandards u r-rappreżentanzi fil-Ftehim mal-UE.

It-tim tal-UE sab li d-DHS kien qed jimplimenta l-Ftehim f’konformità mal-kundizzjonijiet stipulati fih. Pereżempju d-DHS juża filtri effettivi biex tiġi eliminata dejta li ma jkollhiex rabta mal-Istati Uniti, kif ukoll dejta tal-PNR li ma tkunx taqa' fid-19-il kategorija deskritti fl-Anness ta’ dan il-Ftehim. Il-ħabi u t-tħassir ta’ dejta sensittiva jiġu rispettati u d-DHS iddikjara li qatt ma aċċessa dejta sensittiva għal finijiet operattivi.

Id-DHS jimplimenta wkoll l-impenji tiegħu fir-rigward tad-drittijiet tal-passiġġieri, b’mod partikolari fir-rigward tal-għoti tal-informazzjoni xierqa lill-passiġġieri u l-implimentazzjoni tad-dritt għal aċċess mingħajr eżenzjonijiet. Madankollu, dan għandu jiġi kkunsidrat kontra r-raba’ rakkomandazzjoni magħmula hawn taħt li tindirizza l-ħtieġa li jkun hemm trasparenza akbar fejn jidħlu l-mekkaniżmi ta’ rimedju disponibbli għall-passiġġieri.

Il-kondiviżjoni ta' dejta ma' aġenziji domestiċi oħrajn ssir mid-DHS skont dan il-Ftehim. Il-kondiviżjoni ssir każ b’każ, tiġi rreġistrata u ssir fuq il-bażi ta’ fehim bil-miktub. Il-kondiviżjoni tad-dejta ma' pajjiżi terzi hija wkoll interpretata b’mod strett, u hija wkoll konformi mal-Ftehim.

Bħala rakkomandazzjoni ġenerali, qed issir ir-rakkomandazzjoni li jsir rieżami ieħor tal-Ftehim mill-Uffiċċju tal-Privatezza tad-DHS qabel ir-rieżami konġunt li jmiss.  Iż-żewġ naħat jissuġġerixxu li jiġi organizzat ir-rieżami li jmiss matul l-ewwel nofs tal-2015.

Qed issir ukoll ir-rakkomandazzjoni li kemm jista' jkun malajr issir il-qalba sħiħa għall-metodu “push” u f’kull każ mhux aktar tard mill-1 ta’ Lulju 2014, kif mitlub fl- Artikolu 15(4) tal-Ftehim.  

Qed issir ukoll ir-rakkomandazzjoni li l-Istati Uniti u l-UE jaħdmu flimkien biex jippromwovu l-użu ta’ standards ta’ trasmissjoni komuni, b’mod partikolari l-istandard PNRGOV kif żviluppat mill-IATA, il-linji tal-ajru, u l-Gvern. F’dan ir-rigward ikun pożittiv kieku d-diskussjonijiet fl-IATA dwar standard komuni “push” iwasslu wkoll għal standard komuni għal “push” ad hoc.

Minkejja l-implimentazzjoni tal-Ftehim, għad hemm il-bżonn ta' xi titjib. L-ewwel nett, dan jikkonċerna meta jibda l-perjodu ta’ sitt xhur li jiskatta d-depersonalizzazzjoni tal-PNR skont l-Artikolu 8(1) tal-Ftehim. Bħalissa, jitqies li dan il-perjodu jkun beda biss malli jsir l-aktar aġġornament riċenti fil-PNR fis-Sistema Awtomatika ta' Individwazzjoni tad-DHS (Automated Targeting System -ATS) li ġġorr il-PNR, mhux meta l-PNR jiddaħħal fl-ATS. Qed issir ir-rakkomandazzjoni li l-perjodu jitqies li jkun beda fil-jum li fih il-PNR jiddaħħal fl-ATS (l-hekk imsejħa ATS Load Date) li huwa l-ewwel jum li fih id-dejta tinħażen fl-ATS, minflok ma titkompla l-prattika attwali, li tittardja l-bidu tal-perjodu ta’ sitt xhur (sakemm isir l-aħħar aġġornament tal-PNR fl-ATS).

It-tieni, għandha tingħata attenzjoni partikolari għall-użu tal-metodu ad hoc "pull". Qed issir ir-rakkomandazzjoni li d-DHS, minbarra r-reġistru li għandu bħalissa, iżomm reġistrazzjoni aħjar bir-raġunijiet li għalihom jiġi applikat il-metodu "pull" ad hoc f'kull każ, ħaġa li tippermetti valutazzjoni aħjar tal-proporzjonalità u awditjar aktar effettiv tal-użu tiegħu, li hu maħsub bħala eċċezzjoni għar-regola. 

It-tielet, id-DHS qed jintalab jirrispetta l-impenn tiegħu sabiex jiżgura r-reċiproċità u b’mod proattiv jikkondividi entrati individwali fil-PNR individwali u l-informazzjoni analitika li toriġina mid-dejta tal-PNR mal-Istati Membri tal-UE u fejn ikun xieraq mal-Europol u l-Eurojust.

Ir-raba’, qed jingħata l-parir li tiġi pprovduta aktar trasparenza dwar il-mekkaniżmi ta’ rimedju disponibbli skont il-liġi tal-Istati Uniti. Tali trasparenza għandha tippermetti li l-passiġġieri li ma jkunux ċittadini jew residenti legali tal-Istati Uniti jikkontestaw id-deċiżjonijiet tad-DHS relatati mal-użu tad-dejta tal-PNR, b’mod partikolari meta l-użu ta’ tali dejta jkun jista’ jikkontribwixxi għal rakkomandazzjoni biex trasportatur jiċħad l-imbark. 

Fl-aħħar nett, id-DHS implimentata wkoll miżuri li jmorru lil hinn mir-rekwiżiti tal-Ftehim. Id-DHS jipprevedi li jinnotifika lill-Kummissjoni Ewropea fi żmien 48 siegħa wara aċċess għal entrati sensittivi fil-PNR. Id-DHS daħħal proċedura ġdida biex f'kull kwart jissorvelja u jeżamina l-implimentazzjoni tal-ATS u janalizza x-xenarji, l-analiżi u r-regoli kollha mmirati lejn l-ivvjaġġar biex jaċċerta li jkunu proporzjonati sabiex jiġi minimizzat l-impatt fuq id-drittijiet ċivili u l-privatezza ta' vjaġġaturi bona fide, u sabiex tiġi evitata diskriminazzjoni kontra l-vjaġġaturi. 

Minkejja l-Artikolu 23(1) dwar evalwazzjoni konġunta tal-Ftehim erba’ snin wara d-dħul tiegħu fis-seħħ, valutazzjoni preliminari dwar jekk il-PNR hux qiegħed jaqdi l-iskop li jkun ta' appoġġ fil-ġlieda kontra t-terroriżmu u reati oħra li huma fin-natura tagħhom transnazzjonali wriet li l-PNR jipprovdi lid-DHS bil-possibbiltà li jwettaq valutazzjonijiet ta’ qabel it-tluq tal-passiġġieri kollha sa 96 siegħa qabel, ħaġa li tagħti lid-DHS żmien biżżejjed biex jagħmel il-verifiki kollha tal-isfond qabel il-wasla ta’ passiġġier u biex jipprepara r-reazzjoni tiegħu. Dan l-ipproċessar jappoġġa wkoll id-DHS meta jkun qed jiddeċiedi jekk passiġġier għandux jimbarka fuq ajruplan jew le. Jagħti wkoll lid-DHS l-opportunità biex jagħmel valutazzjonijiet ta’ riskju fuq il-bażi ta’ regoli mmirati bbażati fuq kuntest sabiex jiġu identifikati l-individwi "mhux magħrufa" li jkunu potenzjalment ta' riskju għoli. Il-PNR jipprovdi wkoll il-possibbiltà li jsiru assoċjazzjonijiet bejn il-passiġġieri u jiġu identifikati kriminali li jkunu jappartjenu għall-istess grupp ta’ kriminalità organizzata. Skont id-DHS, il-PNR jintuża wkoll b’suċċess fl-identifikazzjoni ta’ xejriet ta' kif għandhom mnejn iġibu ruħhom il-kriminali meta jivvjaġġaw, pereżempju billi jifhem liema huma r-rotot li jużaw.

Ir-rapport tar-rieżami konġunt, anness ma’ din il-Komunikazzjoni, jikkonsisti minn tliet kapitoli. Il-Kapitolu 1 jagħti ħarsa ġenerali lejn l-isfond tar-rieżami u l-iskop u l-aspetti proċedurali tal-eżerċizzju. Il-Kapitolu 2 jippreżenta r-riżultati ewlenin tar-rieżami konġunt u l-kwistjonijiet li għad iridu jiġu indirizzati mid-DHS. Dan il-Kapitolu huwa ssupplimentat mill-Anness A li fih il-kwestjonarju u t-tweġibiet tad-DHS għalih. Fl-aħħar nett, il-Kapitolu 3 jippreżenta l-konklużjonijiet ġenerali tal-eżerċizzju. L-Anness B jippreżenta l-kompożizzjoni tat-timijiet tal-UE u tal-Istati Uniti li wettqu l-eżerċizzju ta’ rieżami.