5.2.2016   

MT

Il-Ġurnal Uffiċjali tal-Unjoni Ewropea

C 45/106

—

wara li kkunsidra l-proposta tal-Kummissjoni lill-Parlament u lill-Kunsill (COM(2013)0090 – C7-0046/2013),

—

wara li kkunsidra l-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba (1) (FII tas-17 ta' Mejju 2006), u b'mod partikulari l-punt 28 tiegħu,

—

wara li kkunsidra r-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' aġġustament għall-globalizzazzjoni (2) (ir-Regolament FEG),

—

wara li kkunsidra l-proċedura ta' trilogu prevista fil-punt 28 tal-FII tas-17 ta' Mejju 2006,

—

wara li kkunsidra l-ittra tal-Kumitat għall-Impjiegi u l-Affarijiet Soċjali,

—

wara li kkunsidra r-rapport tal-Kumitat għall-Baġits (A7-0111/2013),

A.

billi l-Unjoni Ewropea stabbiliet strumenti leġiżlattivi u baġitarji xierqa biex jingħata appoġġ addizzjonali għall-ħaddiema li ngħataw is-sensja b'riżultat ta' bidliet strutturali kbar fl-andament tal-kummerċ dinji u biex jiġu megħjuna jerġgħu jintegraw ruħhom fis-suq tax-xogħol;

B.

billi l-kamp ta' applikazzjoni tal-Fond Ewropew ta' Aġġustament għall-Globalizzazzjoni (FEG) twessa' għall-applikazzjonijiet imressqa mill-1 ta' Mejju 2009 sal-30 ta' Diċembru 2011 biex jinkludi sostenn għall-ħaddiema li ngħataw is-sensja b'riżultat dirett tal-kriżi finanzjarja u ekonomika globali;

C.

billi l-assistenza finanzjarja tal-Unjoni lill-ħaddiema li ngħataw is-sensja għandha tkun dinamika u disponibbli kemm jista' jkun malajr u b'mod effiċjenti, skont id-Dikjarazzjoni Konġunta tal-Parlament Ewropew, il-Kunsill u l-Kummissjoni adottata waqt il-laqgħa ta' konċiljazzjoni tas-17 ta' Lulju 2008, u b'kunsiderazzjoni xierqa għall-FII tas-17 ta' Mejju 2006 dwar l-adozzjoni ta' deċiżjonijiet biex jiġi mmobilizzat il-FEG;

D.

billi l-Italja ressqet applikazzjoni EGF/2011/023 IT/Antonio Merloni għal kontribuzzjoni finanzjarja mill-FEG, bħala r-riżultat ta' sensji fil-kumpanija Antonio Merloni SpA fl-Italja u talbet l-assistenza għal 1 517-il sensja, kollha mmirati għall-miżuri kofinanzjati mill-FEG, matul il-perjodu ta' referenza ta' erba' xhur mit-23 ta' Awwissu 2011 sat-23 ta' Diċembru 2011;

E.

billi l-applikazzjoni tissodisfa l-kriterji ta' eliġibilità stabbiliti mir-Regolament dwar il-FEG;

1.

Jaqbel mal-Kummissjoni li l-kundizzjonijiet stabbiliti fl-Artikolu 2(a) tar-Regolament FEG huma sodisfatti u li, għalhekk, l-Italja għandha dritt għal kontribuzzjoni finanzjarja skont dak ir-Regolament;

2.

Jikkonstata b'dispjaċir li l-awtoritajiet Taljani ressqu l-applikazzjoni għall-kontribuzzjoni finanzjarja FEG fid-29 ta' Diċembru 2011, u li l-valutazzjoni tagħha saret disponibbli mill-Kummissjoni fl-20 ta' Frar 2013; jiddispjaċih għall-perjodu ta' valutazzjoni twil ta' 14-il xahar; jistieden lill-Kummissjoni tikkonkludi l-fażi ta' evalwazzjoni u fl-aħħar tippreżenta l-proposti għal deċiżjonijiet fir-rigward tal-erba' każi li għad fadal minn dawk mressqa fl-2011;

3.

Jikkonstata li l-istabbilimenti produttivi ta' Antonio Merloni SpA, industrija li tipproduċi apparat elettroniku domestiku, kienu jinsabu fir-reġjuni Taljani tal-Marche u l-Umbria, partikolarment fil-provinċji ta' Ancona u Perugia; josserva li fl-2002, Antonio Merloni SpA, il-ħames l-akbar produttur ta' apparat elettriku domestiku fl-Unjoni, biddel l-istrateġija ta' bejgħ tiegħu u beda jbigħ il-prodotti tiegħu direttament permezz tal-marki tiegħu stess fl-2006; jikkonstata li, bħala konsegwenza tal-kriżi ekonomika globali, il-kumpanija għaddiet minn diffikultajiet finanzjarji, li komplew jiħraxu mill-fatt li l-kundizzjonijiet biex jingħata aċċess għall-kreditu finanzjarju saru aktar stretti f'daqqa; jikkonstata li t-tnaqqis fil-produzzjoni, li segwa l-andament negattiv f'livell Ewropew, flimkien mar-restrizzjonijiet finanzjarji, ikkawża l-għeluq tal-attivitajiet kummerċjali ta' Antonio Merloni SpA; jikkonstata li total ta' 2 217-il ħaddiema ngħataw s-sensja, li minnhom 700 ġew impjegati minn QA Group SpA; josserva li din l-applikazzjoni, għalhekk, tkopri l-1 517-il ħaddiem li sfaw qiegħda minħabba l-għeluq ta' Antonio Merloni SpA;

4.

Jikkonsata li, f'Ottubru 2008, diġà kien ġie ddikjarat li Antonio Merloni SpA hi insolventi, u li l-bejgħ tal-assi tagħha u r-reintegrazzjoni ta' 700 ħaddiem ġew konklużi biss f'Diċembru 2011; jinnota li preċedentement l-awtoritajiet Taljani ressqu t-talba oriġinali tagħhom għal assistenza mill-FEG fl-2009; jikkonstata, madankollu, li l-applikazzjoni kellha titressaq mill-ġdid lejn l-aħħar tal-2011 peress li l-ħaddiema ngħataw is-sensja formalment biss wara li l-assi nbiegħu u l-proċedimenti amministrattivi ġew konklużi;

5.

Ifakkar li l-FEG diġà ta appoġġ lil ħaddiema mogħtija s-sensja fis-settur tal-manifattura ta' apparat elettroniku domestiku (każ EGF/2009/010 LT/Snaigė) (3);

6.

Jenfasizza l-fatt li fis-snin ta' qabel il-kriżi, il-provinċji ta' Ancona u Perugia kienu jirreġistraw rata ta' qgħad iktar baxxa mill-medja nazzjonali; jikkonstata li fl-2009, il-qgħad żdied b'40 % meta mqabbel mas-sena preċedenti filwaqt li fl-2010, ir-rata ta' qgħad baqgħet stabbli f'Perugia u niżlet f'Ancona, speċjalment minħabba t-tnaqqis fir-rata ta' attività, pjuttost milli żieda fl-impjieg; josserva li fl-2009, il-PDG reġjonali naqas bi kważi 3 % u l-fatturat tal-industrija ċkien b'14,6 % fil-Marche u b'16,4 % fl-Umbria, meta mqabbel mas-snin preċedenti; jikkonstata li dan it-tiċkin wassal għal żieda fis-sigħat tal-Cassa Integrazione Guadagni (4) fis-setturi tal-manifattura bi 368 % fil-Marche u b'444 % fl-Umbria; josserva li l-1 517-il sensja ta' Antonio Merloni SpA koperti minn din l-applikazzjoni komplew jaggravaw is-sitwazzjoni;

7.

Jilqa' pożittivament il-fatt li, biex il-ħaddiema jingħataw assistenza ta' malajr, l-awtoritajiet Taljani ddeċidew li jniedu l-implimentazzjoni tal-miżuri fid-29 ta' Marzu 2012, ferm qabel id-deċiżjoni finali dwar l-għoti tal-appoġġ tal-FEG għall-pakkett koordinat propost; jiddeplora, madankollu, il-fatt li l-FEG seta jintervjeni biss kważi tliet snin u nofs wara li ġiet ddikjarata l-insolvenza tal-kumpanija;

8.

Jikkonstata li l-pakkett koordinat ta' servizzi personalizzati għall-kofinanzjament jinkludi l-miżuri għar-reintegrazzjoni tal-1 517-il ħaddiem fl-impjieg bħal gwida professjonali, l-għajnuna biex jinstab impjieg, il-promozzjoni tal-imprenditorija, it-taħriġ vokazzjonali u aġġronament tal-ħiliet, gwida għal dawk li għandhom iktar minn 50 sena, konċessjoni biex jinstab impjieg, benefiċċju għal min jingħata xogħol, kontribuzzjoni għall-ispejjeż tal-ivvjaġġar u kontribuzzjoni għall-ispejjeż għat-tibdil tar-residenza;

9.

Jilqa' b'sodisfazzjon il-fatt li s-saħb soċjali ġew kkonsultati dwar it-tfassil tal-miżuri tal-pakkett EGF ikkoordinat u li tali miżuri saru parti mill-pjan soċjali “Accordo di Programma” ffirmat mill-Ministeru għall-Iżvilupp Ekonomiku u mir-reġjuni kkonċernati u li l-implimentazzjoni tas-sostenn mill-FEG se tkun sorveljata minn grupp ta' koordinament;

10.

Ifakkar fl-importanza tat-titjib fl-impjegabilità tal-ħaddiema kollha permezz ta' taħriġ adattat u r-rikonoxximent tal-ħiliet u l-kompetenzi miksuba tul il-karriera professjonali tal-ħaddiem u l-aċċess indaqs għall-FEG indipendentement mit-tip ta' kuntratt ta' impjieg u relazzjoni ta' impjieg li jista' jkollu; jistenna li t-taħriġ offrut fil-pakkett koordinat jiġi adattat mhux biss għal-livell u għall-bżonnijiet tal-ħaddiema ssensjati iżda wkoll għall-ambjent kummerċjali reali;

11.

Jitlob lill-Kummissjoni tkompli tispeċifika fil-proposti futuri t-tipi ta' taħriġ li għandhom jingħataw permezz ta' vawċer, f'liema setturi hu probabbli li l-ħaddiema jsibu impjieg u jekk it-taħriġ offrut hux allinjat mal-prospetti ekonomiċi u l-bżonnijiet tas-suq tax-xogħol fil-ġejjieni fir-reġjuni milqutin mis-sensji; jilqa' pożittivament, madankollu, ir-rabta stretta bejn il-vawċer u t-triq miftiehma ta' kull ħaddiem lejn ir-reintegrazzjoni;

12.

Jistieden lill-awtoritajiet Taljani jisfruttaw il-potenzjal sħiħ tal-appoġġ mill-FEG u jinkoraġġixxu lill-ammont massimu ta' ħaddiema jieħdu sehem fil-miżuri; ifakkar li l-interventi bikrin mill-FEG fl-Italja batew minn rata relattivament baxxa ta' implimentazzjoni baġitarja prinċipalment minħabba r-rati baxxi ta' parteċipazzjoni;

13.

Jilqa' pożittivament il-fatt li, fil-pakkett koordinat ta' servizzi personalizzati, hemm modulu “Gwida għal dawk li għandhom iktar minn 50 sena” maħsub għall-impjegati anzjani, li jirrappreżentaw 12 % tal-forza tax-xogħol fil-mira;

14.

Jilqa' pożittivament il-fatt li l-kontribuzzjoni għall-ispejjeż ta' residenza għandhom jitħallsu biss bħala kontribuzzjoni ta' darba malli tiġi ppreżentata l-prova tan-nefqa mġarrba;

15.

Jieħu nota tal-fatt li EUR 5 684 000 mill-valur totali tal-pakkett tas-servizzi li jammonta għal EUR 7 451 972 huma ddedikati għal diversi inċentivi finanzjarji u allowances, inkluża l-faċilitazzjoni tal-mobilità tal-ħaddiema li ngħataw is-sensja; jirrakkomanda li jiġi ddedikat ammont proporzjonat għall-miżuri relatati mat-taħriġ fil-mobilizzazzjonijiet tal-futur;

16.

Jindika li l-akbar parti mill-ispejjeż tas-servizzi personalizzati għandha tiġi impenjata għall-“Konċessjoni biex jinstab impjieg” (EUR 2 000 għal kull ħaddiem għall-ġranet ta' parteċipazzjoni fil-miżuri tal-FEG), li hi ekwivalenti għall-allowance għall-għajxien Taljana “CIGS” għal finijiet ta' semplifikazzjoni; itenni, għalhekk, li l-appoġġ mill-FEG għandu l-ewwel nett jingħata għal programmi ta' taħriġ minflok ma jikkontribwixxi direttament għal allowances finanzjarji li jkunu r-responsabilità tal-Istati Membri bis-saħħa tad-dritt nazzjonali; jirrakkomanda li, fil-każijiet futuri ta' mobilizzazzjoni ta' dak il-Fond, miżuri ta' dan it-tip għandhom jiġu skoraġġuti;

17.

Jinnota li l-“Benefiċċju għal min jingħata xogħol” hu relattivament għoli (EUR 5 000 għal kull ħaddiem); jilqa' pożittivament il-fatt li l-miżuri ta' dan it-tip se jitħallsu biss lil dawk l-impjegaturi li jiggarantixxu kuntratti permanenti għall-ħaddiema fil-mira, u jistenna li l-Kummissjoni tipprovdi l-informazzjoni rilevanti dettaljata rigward il-kundizzjonijiet kuntrattwali għal dawn il-ħaddiema;

18.

Jikkonstata li l-informazzjoni mogħtija dwar il-pakkett koordinat ta' servizzi personalizzati għall-finanzjament mill-FEG tinkludi informazzjoni dwar il-komplementarjetà ma' azzjonijiet finanzjati mill-Fondi Strutturali; itenni l-appell tiegħu lill-Kummissjoni biex tippreżenta evalwazzjoni komparattiva ta' dik id-data fir-rapporti annwali tagħha sabiex ikun żgurat ir-rispett sħiħ tar-regolamenti eżistenti u li ma jkunx hemm duplikazzjoni tas-servizzi ffinanzjati mill-Unjoni;

19.

Jitlob lill-istituzzjonijiet involuti jagħmlu l-isforzi neċessarji biex itejbu l-arranġamenti proċedurali u baġitarji sabiex jaċċeleraw il-mobilizzazzjoni tal-FEG; japprezza l-proċedura mtejba li ddaħħlet fis-seħħ mill-Kummissjoni, wara t-talba tal-Parlament biex jitħaffef ir-rilaxx tal-għotjiet, bl-għan li tiġi ppreżentata lill-awtorità baġitarja l-valutazzjoni tal-Kummissjoni dwar l-eliġibilità ta' applikazzjoni FEG flimkien mal-proposta biex jiġi mobilizzat il-FEG; jittama li jiġi integrat aktar titjib proċedurali fir-Regolament dwar il-FEG (2014-2020) il-ġdid u li jinkisbu effiċjenza, trasparenza u viżibilità akbar tal-FEG;

20.

Jisħaq dwar l-importanza ta' kooperazzjoni tajba u rapida bejn il-Kummissjoni u l-Istati Membri fit-tħejjija ta' applikazzjonijiet skont ir-regolament ġdid dwar il-FEG li daqt jidħol fis-seħħ;

21.

Ifakkar fl-impenn min-naħa tal-istituzzjonijiet biex jiżguraw proċedura rapida u bla xkiel għall-adozzjoni tad-deċiżjonijiet dwar il-mobilizzazzjoni tal-FEG, biex jingħata appoġġ individwali ta' darba u limitat fiż-żmien, orjentat lejn l-għajnuna favur il-ħaddiema li ngħataw is-sensja minħabba l-globalizzazzjoni u l-kriżi ekonomika; jenfasizza r-rwol li jista' jiżvolġi l-FEG fir-reintegrazzjoni fis-suq tax-xogħol ta' ħaddiema li jkunu ngħataw is-sensja;

22.

Jenfasizza li, skont l-Artikolu 6 tar-Regolament dwar il-FEG, għandu jkun żgurat li l-FEG jappoġġa r-reintegrazzjoni fl-impjieg ta' ħaddiema individwali li jkunu ngħataw is-sensja; jenfasizza, barra minn hekk, li l-assistenza FEG tista' tikkofinanzja biss miżuri attivi għas-suq tax-xogħol li jwasslu għal impjieg sostenibbli u fit-tul; itenni li l-assistenza mill-FEG ma għandhiex tieħu post azzjonijiet li huma l-kompetenza tal-kumpaniji skont id-dritt nazzjonali jew ftehimiet kollettivi, u lanqas ma għandha tissostitwixxi miżuri għar-ristrutturar ta' kumpaniji jew setturi;

23.

Jilqa' pożittivament il-fatt li wara talbiet mill-Parlament, il-baġit tal-2013 juri approprjazzjonijiet ta' pagament li jammontaw għal EUR 50 000 000 fil-linja baġitarja 04 05 01 tal-FEG; ifakkar li l-FEG nħoloq bħala strument speċifiku separat, bl-objettivi u bl-iskadenzi tiegħu stess u, għalhekk, jistħoqqlu allokazzjoni speċifika, li tevita kemm jista' jkun trasferimenti minn linji baġitarji oħra, kif ġara fil-passat, li tista' tkun ta' ħsara għall-ilħuq tal-objettivi politiċi tal-FEG;

24.

Jiddispjaċih bid-deċiżjoni tal-Kunsill li jimblokka l-proroga tad-“deroga marbuta mal-kriżi” li tippermetti l-għoti ta' assistenza finanzjarja lill-ħaddiema li ngħataw is-sensja minħabba l-kriżi ekonomika attwali u mhux biss lil dawk li tilfu l-impjieg tagħhom minħabba bidliet fl-andament kummerċjali globali u li tippermetti żieda fir-rata tal-kofinanzjament tal-Unjoni ta' 65 % tal-kostijiet tal-programm, għall-applikazzjonijiet imressqa wara l-iskadenza tal-30 ta' Diċembru 2011; jitlob lill-Kunsill jerġa' jintroduċi din il-miżura mingħajr dewmien;

25.

Japprova d-deċiżjoni annessa ma' din ir-riżoluzzjoni;

26.

Jagħti istruzzjonijiet lill-President tiegħu biex jiffirma din id-deċiżjoni flimkien mal-President tal-Kunsill u biex jiżgura li tiġi ppubblikata f'Il-Ġurnal Uffiċjali tal-Unjoni Ewropea;

27.

Jagħti istruzzjonijiet lill-President tiegħu biex jgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.