6.6.2013   

MT

Il-Ġurnal Uffiċjali tal-Unjoni Ewropea

C 161/60

1.1

Il-Kumitat Ekonomiku u Soċjali Ewropew (KESE) jemmen li hu importanti li terġa’ tinkiseb il-fiduċja tal-konsumaturi onlajn u tal-bejjiegħa onlajn fil-loġistika integrata użata għall-kummerċ elettroniku li hu partikolarment attraenti għal ħafna konsumaturi, minħabba l-importanza tas-suq diġitali u l-potenzjal kbir tiegħu għall-iżvilupp ekonomiku u għall-impjiegi.

1.2

Il-KESE jilqa’ l-inizjattiva tal-Kummissjoni li tistudja fil-fond il-kwistjonijiet tas-settur b’konsultazzjoni wiesgħa mal-partijiet interessati kollha permezz tal-Green Paper dwar suq integrat, li l-għan tagħha hu li jinħoloq suq integrat tal-loġistika għall-konsenja tal-pakketti relatati max-xiri onlajn u li jkun hemm żviluppi pożittivi fil-kummerċ elettroniku mhux biss B2C iżda wkoll B2B u C2C.

1.3

Il-KESE jitlob lill-Kummissjoni tfassal direttiva ffokata fuq sitt esiġenzi prijoritarji:

u tippreżenta rapport dwar ir-riżultati miksuba fil-livell tal-Istati Membri individwali u tal-konsenji transkonfinali.

1.4

Il-Kumitat iqis li għandhom jiġu indirizzati d-dgħufijiet tal-qafas regolatorju u jirrakkomanda li jinfetaħ djalogu strutturat bejn ir-rappreżentanti tas-soċjetà ċivili organizzata – speċjalment tal-organizzazzjonijiet tal-konsumaturi u tal-SMEs, tal-bejjiegħa onlajn u tal-operaturi tal-konsenji – sabiex jiġu vvalutati l-għażliet ta’ politika regolatorji u mhux regolatorji l-aktar adatti biex jiġu indirizzati s-sitt prijoritajiet ta’ hawn fuq.

1.5

Il-KESE jaħseb li hu importanti li l-korpi Ewropej tal-istandardizzazzjoni jingħataw impuls qawwi biex – b’parteċipazzjoni ugwali min-naħa tal-gruppi tal-utenti, tal-SMEs u tal-partijiet interessati l-oħra – iħejju standards tekniċi u regolatorji Ewropej li jiżguraw il-kwalità, l-affidabbiltà u s-sostenibbiltà tas-servizzi tal-loġistika integrata użati għall-kummerċ elettroniku u li jipprovdu garanziji soċjali u tas-sikurezza fl-istess servizzi. Huwa mixtieq ħafna li tinħoloq tikketta Ewropea tas-sikurezza u l-kwalità għas-sistemi tal-konsenja.

1.6

Sabiex jiġi garantit li s-servizzi tal-loġistika integrata tal-konsenji jkunu aċċessibbli, affidabbli u effikaċi, il-KESE jemmen li hemm bżonn l-intervent tal-programmi Ewropej tar-riċerka teknoloġika, l-ambjent u t-trasport, b’mod partikolari l-Galileo.

1.7

L-interoperabbiltà sħiħa bejn is-sistemi u l-pjattaformi tal-interkonnessjoni ma’ netwerk hija indispensabbli għall-kondiviżjoni tal-informazzjoni u l-koordinazzjoni bejn l-atturi kollha.

1.8

Bil-għan li tiġi żgurata kompetizzjoni ġusta u jiġi evitat l-abbuż minn pożizzjonijiet dominanti, il-KESE jirrakkomanda li jingħata appoġġ adegwat lill-SMEs innovattivi, li joħolqu l-impjiegi, permezz tal-attivazzjoni ta’ linji ta’ assistenza tal-BEI speċifikament għalihom.

1.9

Il-KESE jitlob bil-qawwa li jinħoloq netwerk Ewropew ta’ ċentri nazzjonali għas-soluzzjoni tal-problemi relatati mal-konsenji tal-kummerċ elettroniku li jkun faċli għall-utenti u li jsib soluzzjonijiet rapidi u bi ftit spejjeż għall-problemi tal-klijenti u tal-bejjiegħa onlajn, u li jitwaqqaf osservatorju Ewropew għall-monitoraġġ u s-sorveljanza tal-problemi fis-settur.

1.10

Fil-fehma tal-Kumitat għandha titwaqqaf sistema ta’ twissija rapida għall-konsenji tal-kummerċ elettroniku, bl-istess poteri tas-sistemi RAPEX u ICSMS, li tiffaċilita l-iskambju rapidu tal-informazzjoni bejn l-Istati Membri u l-Kummissjoni dwar miżuri li jittieħdu biex jipprevjenu jew jirrestrinġu l-kummerċjalizzazzjoni jew l-użu ta’ sistemi tal-konsenji tal-kummerċ elettroniku li joħolqu riskji serji għad-drittijiet tal-konsumaturi elettroniċi jew tal-bejjiegħa elettroniċi.

1.11

Il-KESE jemmen li biex jinkiseb suq integrat għall-konsenja tal-pakketti, hemm bżonn li jinħolqu impjiegi ta’ kwalità permezz ta’ dimensjoni soċjali soda u koerenti li terġa’ tiddefinixxi l-impjiegi attwali u toffri kwalifiki ġodda għalihom filwaqt li tiżgura kundizzjonijiet tax-xogħol ġusti u pagi deċenti, u permezz tal-ġlieda kontra x-xogħol mhux iddikjarat fil-qafas ta’ djalogu bejn l-imsieħba soċjali tas-settur fil-livell Ewropew, nazzjonali u territorjali.

1.12

Il-KESE jirrakkomanda li jinħoloq netwerk Ewropew ta’ ċentri nazzjonali għas-soluzzjoni tal-problemi relatati mal-konsenji tal-kummerċ elettroniku li jkun faċli għall-utenti u li jsib soluzzjonijiet rapidi u mingħajr spejjeż għall-problemi kollha tal-utenti u tal-bejjiegħa onlajn, u li jitwaqqaf osservatorju Ewropew għall-monitoraġġ tas-sistemi tal-konsenji tal-kummerċ elettroniku li kull tliet xhur jagħti rendikont tal-problemi li jinqalgħu fil-konsenji tal-kummerċ elettroniku.

1.13

Il-KESE jemmen li għandha tiġi organizzata konferenza interistituzzjonali dwar il-loġistika integrata l-ġdida għall-kummerċ elettroniku, bil-għan li jiġu promossi l-iżvilupp ekwu u sostenibbli tas-settur, l-iskambju tal-prattiki nazzjonali tajbin dwar il-kuntratti standard (1) u s-sistemi tal-kwalità u tal-arbitraġġ kif ukoll biex jiżdiedu l-kooperazzjoni u l-interoperabbiltà bejn l-atturi involuti kollha fil-livell nazzjonali u transkonfinali.

2.1

Il-kummerċ elettroniku fl-Ewropa kellu fatturat ta’ EUR 300 biljun fl-2012, jiġifieri żieda ta’ 20 % meta mqabbel mas-sena ta’ qabel (2), filwaqt li x-xiri onlajn żdied minn 20 % għal 37 % f’ħames snin (3); huwa stmat li l-konsumaturi ffrankaw madwar EUR 12-il biljun fis-sena.

2.2

Il-vantaġġi tal-kummerċ elettroniku jistgħu jitkejlu f’termini ta’ ffrankar u rapidità tat-tranżazzjoni, ta’ internazzjonalità, ta’ kompletezza, ta’ veloċità tal-informazzjoni, u ta’ kontenut tas-servizz b’rabta ma’ dak li jkun ġie negozjat. Però d-disponibbiltà fiżika tal-biċċa l-kbira tal-prodotti, minbarra dawk diġitali, għadha marbuta mal-kapaċità li jiġu ġestiti l-proċessi loġistiċi tal-ipproċessar u l-imballaġġ, it-traċċabbiltà, l-identifikazzjoni, l-immaniġġar, il-ħżin u t-trasport tal-pakketti.

2.3

L-istrateġija tal-Kummissjoni “għall-bini ta’ fiduċja fis-Suq Uniku Diġitali tal-kummerċ elettroniku u tas-servizzi online” (4) tidentifika “ħames ostakoli prinċipali għas-Suq Uniku Diġitali u tipproponi pjan ta’ azzjoni biex jitneħħew”. Fosthom hemm “is-sistemi ta’ pagament u ta’ kunsinna […] inadegwati”; barra minn hekk, “10 % tal-persuni bħalissa ma jixtrux online (5) għaliex huma mħassba dwar l-ispejjeż tas-servizzi tal-kunsinna, partikolarment fir-rigward tal-kunsinna transkonfinali, u dwar il-kwalità tas-servizz”. F’dan ir-rigward il-Kummissjoni tisħaq li:

2.4

Is-sistemi tal-loġistika tradizzjonali użati fil-katina tal-konsenja issa qdiemu u hemm ir-riskju li jnaqqsu l-veloċità tal-proċess ta’ tixrid u żvilupp tal-kummerċ elettroniku, speċjalment rigward it-tranżazzjonijiet transnazzjonali, filwaqt li l-iżvilupp aċċellerat tat-teknoloġiji ġodda joffri possibbiltajiet ġodda ta’ konverġenza.

2.5

L-iżvilupp tal-kummerċ elettroniku min-negozju għall-konsumatur (B2C) fil-każ tal-prodotti li ma jistgħux jiġu fornuti onlajn jew diġitalizzati wassal għal tkabbir konsiderevoli fil-konsenji medji u żgħar lejn numru kbir ħafna ta’ destinazzjonijiet mhux rikorrenti li huma diffiċli biex jiġu ppjanati, b’servizz dejjem aktar imfassal speċifikament fuq l-esiġenzi tal-klijent individwali.

2.6

Il-veloċità tal-ġbir tal-informazzjoni u tal-konklużjoni tat-tranżazzjonijiet bis-saħħa ta’ interfaċċja dejjem aktar diretta bejn il-produtturi u l-konsumaturi toħloq aspettattivi akbar f’termini ta’ rapidità u affidabbiltà tal-konsenji, u dan ipoġġi pressjoni kbira fuq l-effiċjenza u l-ispejjeż tas-sistema tal-loġistika.

2.7

Il-Kumitat jemmen li hu importanti li terġa’ tinkiseb il-fiduċja tal-konsumatur onlajn, li t-tħassib prinċipali tiegħu jinkludi li ma ssirx il-konsenja, il-ħsara jew it-telf ta’ dak li jkun ordna u l-possibbiltà li jirkupra flusu lura speċjalment fit-tranżazzjonijiet transkonfinali, kif ukoll il-fiduċja tal-bejjiegħ onlajn minħabba n-nuqqas ta’ netwerk strutturat ibbażat fuq l-esiġenzi speċifiċi tal-operaturi tas-settur, in-nuqqas ta’ interoperabbiltà u n-nuqqas ta’ qafas regolatorju adegwat.

3.1

Il-Green Paper tal-Kummissjoni tistabbilixxi tliet linji ta’ azzjoni sabiex issolvi l-problemi u tegħleb l-isfidi li jiffaċċjaw il-konsumaturi u l-bejjiegħa onlajn, bil-għan li tappoġġja t-tkabbir tal-kummerċ elettroniku u tiggarantixxi li ċ-ċittadini u l-SMEs kollha ta’ kull reġjun fl-Ewropa jkollhom aċċess għall-vantaġġi tiegħu bis-saħħa ta’ sistema tal-konsenji sostenibbli u effiċjenti fil-livell nazzjonali, Komunitarju u internazzjonali:

4.1

Il-KESE jilqa’ l-inizjattiva tal-Kummissjoni biex jinħoloq suq integrat tal-loġistika għall-konsenja tal-pakketti relatati max-xiri onlajn u biex ikun hemm żviluppi pożittivi fil-kummerċ elettroniku mhux biss B2C iżda wkoll B2B u C2C, sabiex b’hekk tittejjeb kemm jista’ jkun il-fiduċja fost l-operaturi involuti kollha b’mod partikolari ċ-ċittadini Ewropej, u jiġu garantiti l-aċċessibbiltà, l-affidabbiltà, it-trasparenza, l-effikaċja u r-rispett sħiħ u l-protezzjoni tad-drittijiet reċiproċi.

4.2

Il-Kumitat iqis li l-qafas regolatorju fih nuqqasijiet li jridu jiġu indirizzati:

4.3

Fil-fehma tal-Kumitat, huwa fundamentali li l-qafas regolatorju jiġi adattat biex joffri lill-konsumaturi Ewropej vantaġġi soċjoekonomiċi akbar f’termini ta’ awtonomija, prattiċità, trasparenza u kompetizzjoni u jipprovdilhom aċċess għal firxa usa’ ta’ prodotti u servizzi, u biex lill-intrapriżi – b’mod partikolari l-SMEs – joffrilhom opportunitajiet kbar li jipprovdu prodotti u servizzi innovattivi, ta’ kwalità għolja u qrib il-konsumatur fis-suq intern Ewropew onlajn kollu, filwaqt li jsaħħilhom il-pożizzjoni tagħhom u jagħtihom il-possibbiltà li jibqgħu kompetittivi fl-ekonomija globali.

4.4

Jeħtieġ li dawk li jieħdu d-deċiżjonijiet politiċi jistabbilixxu miri kwalitattivi u kwantitattivi fuq il-bażi tal-prinċipju SMART (specific, measurable, achievable, realistic and timely). Sabiex jiġu ġestiti b’mod effikaċi l-inizjattivi u jiġi evalwat l-impatt prattiku tagħhom, jeħtieġ fuq kollox li l-progress miksub ikun jista’ jitkejjel u jitqabbel ma’ miri realistiċi (8). B’dan il-mod titjieb il-fiduċja tal-konsumaturi, tal-operaturi u tal-intrapriżi u jitjiebu wkoll il-kundizzjonijiet tax-xogħol f’settur li tradizzjonalment jirrikjedi ħafna ħaddiema.

4.5

Il-KESE jaħseb li hu importanti li s-CEN-CENELEC-ETSI (9) jingħataw impuls qawwi biex – b’parteċipazzjoni ugwali min-naħa tal-gruppi tal-utenti, tal-SMEs u tal-partijiet interessati l-oħra – iħejju standards tekniċi u regolatorji Ewropej li jiżguraw il-kwalità, l-affidabbiltà u s-sostenibbiltà tas-servizzi tal-loġistika integrata użati għall-kummerċ elettroniku u li jipprovdu garanziji soċjali u tas-sikurezza fl-istess servizzi, abbażi ta’ kalendarju preċiż permezz ta’ kampanja adegwata ta’ informazzjoni fuq l-internet u l-mezzi tax-xandir. Il-KESE jqis li wieħed mill-passi hu li tinħoloq tikketta Ewropea tas-sikurezza u l-kwalità għas-sistemi tal-konsenja (bħall-VeriSign Secured Seal għall-pagamenti onlajn), liema tikketta tingħata min-netwerk Ewropew taċ-ċentri għas-soluzzjoni tal-problemi.

4.5.1

Il-KESE jirrakkomanda li jinħoloq netwerk Ewropew ta’ ċentri nazzjonali għas-soluzzjoni tal-problemi relatati mal-konsenji tal-kummerċ elettroniku li jkun faċli għall-utenti u li jsib soluzzjonijiet rapidi u mingħajr spejjeż għall-problemi kollha tal-utenti u tal-bejjiegħa onlajn, u li jitwaqqaf osservatorju Ewropew għall-monitoraġġ tas-sistemi tal-konsenji tal-kummerċ elettroniku li kull tliet xhur jagħti rendikont tal-problemi li jinqalgħu fil-konsenji tal-kummerċ elettroniku.

4.5.2

Il-KESE jitlob bil-qawwa li tinħoloq sistema ta’ twissija rapida, bħas-sistemi RAPEX (10) u ICSMS (11), li wara li tivverifika l-abbużi rappurtati liċ-ċentri nazzjonali għas-soluzzjoni tal-problemi relatati mal-konsenji tal-kummerċ elettroniku, tkun tista’ twaqqaf il-prattiki kummerċjali qarrieqa fis-settur, tibblokka l-websajt u tippenalizza lill-operaturi tal-konsenji sakemm tinsab soluzzjoni għall-problema li tkun effikaċi, faċli għall-utenti u mingħajr spejjeż.

4.6

Sabiex jiġi garantit li s-servizzi integrati tal-loġistika tal-konsenji jkunu aċċessibbli, affidabbli u effikaċi, il-KESE jemmen li hemm bżonn li:

4.7

Is-settur tal-konsenja tal-pakketti jirrikjedi ħafna ħaddiema, speċjalment lil hinn mill-UE, iżda bi kwalifiki professjonali baxxi. F’ħafna pajjiżi tal-UE, il-kundizzjonijiet tax-xogħol tal-impjegati huma kkaratterizzati minn kuntratti prekarji, ħinijiet tax-xogħol twal ħafna u pagi baxxi u l-possibbiltajiet ta’ aċċess għat-taħriġ vokazzjonali kontinwu huma limitati. Din is-sitwazzjoni hi r-riżultat tal-proċessi ta’ esternalizzazzjoni li l-kumpaniji tal-konsenja wettqu permezz ta’ kooperattivi jew aġenti individwali li, għalkemm jaħdmu għal operatur tal-konsenji u jużaw il-brand u l-uniformi tiegħu, huma s-sidien tal-vann tat-trasport (it-taparsi ħaddiema għal rashom) (15).

4.8

Il-KESE jemmen li biex jinħoloq suq intern integrat għall-konsenja tal-pakketti, huwa essenzjali li jkun hemm dimensjoni soċjali soda u koerenti, li jiġu garantiti impjiegi ta’ kwalità u taħriġ kontinwu u li jiġi miġġieled ix-xogħol mhux iddikjarat. Għaldaqstant, il-Kumitat jirrakkomanda lill-Istati Membri biex jiżguraw, anke permezz tan-negozjati kollettivi, li l-ħaddiema jkunu impjegati direttament mal-kumpaniji tal-konsenja tal-pakketti u jkollhom kundizzjonijiet tax-xogħol ġusti u deċenti fis-settur kollu.

4.9

Għalhekk, il-Kumitat iqis li sabiex jiġi żviluppat is-settur tal-konsenja tal-pakketti u tal-loġistika, huwa ta’ importanza strateġika li jinħoloq djalogu settorjali strutturat fil-livell Ewropew, nazzjonali u territorjali kemm bejn l-imsieħba soċjali li jirrappreżentaw is-settur kif ukoll bejn ir-rappreżentanti tas-soċjetà ċivili organizzata – speċjalment tal-organizzazzjonijiet tal-konsumaturi u tal-SMEs, tal-bejjiegħa onlajn u tal-operaturi tal-konsenji – bil-għan li jippromovu l-kooperazzjoni, il-fiduċja reċiproka u s-sostenibbiltà u l-interoperabbiltà totali tal-iżvilupp tas-suq għall-konsenja tal-ordnijiet li jsiru onlajn.