17.12.2013   

MT

Il-Ġurnal Uffiċjali tal-Unjoni Ewropea

C 370/1

1.

Ir-Regolament Finanzjarju huwa parti importanti tal-qafas legali li japplika għal kull wieħed mill-Fondi Ewropej għall-Iżvilupp (FEŻ). Id-dispożizzjonijiet tiegħu (neċessarjament tekniċi u dettaljati) għandhom jiġu rispettati jekk il-fondi FEŻ għandhom jintnefqu sew; in-nuqqas ta' applikazzjoni tad-dispożizzjonijiet tiegħu ifisser li sar żball fit-tranżazzjoni tal-FEŻ ikkonċernata. Huwa għaldaqstant mixtieq ħafna li t-test tar-Regolament ikun trasparenti u faċli għall-utent kemm jista' jkun.

2.

Il-memorandum 1-7 ta' spjegazzjoni tal-Kummissjoni jiddikjara li l-objettiv prinċipali fit-tħejjija ta' din il-proposta kien l-allinjament tad-dispożizzjonijiet tar-Regolament Finanzjarju tal-FEŻ ma' dawk tar-Regolament Finanzjarju ġenerali (12) u mar-regoli ta' applikazzjoni tiegħu (13).

3.

Il-proposta fiha bosta referenzi għar-Regolament Finanzjarju ġenerali, u tindika liema mill-artikoli tiegħu għandhom japplikaw. Madankollu, hija spiss iżżid aktar dispożizzjonijiet jew referenzi għal dispożizzjonijiet fir-Regolament Finanzjarju ġenerali li ma għandhomx japplikaw (ara pereżempju l-artikoli diskussi taħt “Osservazzjonijiet speċifiċi”, il-paragrafi 8 sa 24). Ċerti dispożizzjonijiet tar-Regolament Finanzjarju ġenerali għandhom japplikaw mhux direttament iżda ‘mutatis mutandis’ u ċerti termini għandhom jinqraw bħala li għandhom tifsira differenti minn dak li japplika fir-Regolament Finanzjarju ġenerali (ara l-lista fl-Artikolu 2(4) tal-proposta).

4.

L-abbozz ta' Regolament Finanzjarju li jirriżulta ma huwa xejn faċli għall-utent. Mhuwiex dokument awtonomu. Huwa impossibbli li wieħed jifhmu mingħajr ma jirreferi għar-Regolament Finanzjarju ġenerali u għar-regoli ta' applikazzjoni tiegħu. Din il-kumplessità twassal għal riskju sinifikanti ta' inċertezza legali. Id-dokument kif ippreżentat attwalment ikun diffiċli biex jintuża mill-maniġers, mill-benefiċjarji u mill-awdituri. Għaldaqstant hemm riskju sinifikanti li d-dispożizzjonijiet tiegħu jiġu interpretati b'mod skorrett u li jsiru żbalji.

5.

Il-Qorti jiddispjaċiha li l-Kummissjoni ma pproduċietx abbozz ta' regolament trasparenti u awtonomu mfassal biex ikun mill-aktar ċar għall-utenti u biex jimminimizza r-riskju ta' żball permezz ta' fehim skorrett.

6.

Il-Qorti jiddispjaċiha wkoll li, minkejja s-suġġerimenti tal-Qorti fl-Opinjonijiet tagħha Nru 12/2002, Nru 2/2007 u Nru 9/2007, il-Kummissjoni ma ħaditx l-opportunità li tipproponi Regolament Finanzjarju uniku, applikabbli għall-FEŻ kollha attwali u futuri li, bħar-Regolament Finanzjarju ġenerali, ikun jista' jiġi emendat kull meta jinħass il-bżonn. Miżura ta' dan it-tip kieku tiżgura l-kontinwità, mingħajr ir-riskju li tiġi interrotta l-implimentazzjoni tal-FEŻ, u tista' tkun mistennija li tissimplifika l-ġestjoni.

7.

Il-kumplessità fir-regoli ta' nfiq hija sors ta' piż amministrattiv u ta' żbalji għal-legalità u r-regolarità. L-Artikolu 11 fih miżura ta' simplifikazzjoni li potenzjalment tista' tkun ta' benefiċċju: għall-għotjiet, għandha tingħata kunsiderazzjoni għall-użu ta' somom ta' darba, rati fissi u spejjeż għal kull unità.

8.

L-Artikolu 17 jipprovdi, fost l-oħrajn, li għandhom japplikaw id-dispożizzjonijiet tar-Regolament Finanzjarju ġenerali dwar ‘ġestjoni indiretta’. Madankollu, il-paragrafi 3 u 4 tal-Artikolu 17 jintroduċu elementi li jmorru lil hinn minn dawk id-dispożizzjonijiet.

9.

Il-paragrafu 3 jipprovdi li l-‘entitajiet inkarigati’ jistgħu jafdaw ulterjorment kompiti ta' implimentazzjoni tal-baġit lil organizzazzjonijiet oħra bl-istess mod, u b'hekk, fil-fatt, joħolqu kaskata ta' relazzjonijiet ta' fiduċja. Din is-setgħa tapplika fuq firxa wiesgħa ħafna, u tippermetti lil stati tal-AKP u l-PTEE jafdaw il-kompiti tal-implimentazzjoni tal-baġit lil korpi rregolati mil-liġi privata fuq il-bażi ta' kuntratt ta' servizz. Mhuwiex ċar għalfejn din id-dispożizzjoni ddaħħlet fil-proposta. Hemm riskju sinifikanti li din toskura u potenzjalment tiffrustra l-applikazzjoni tad-dispożizzjonijiet tal-Artikolu 60(1) tar-Regolament Finanzjarju ġenerali. Dawn jiddikjaraw, fost l-oħrajn, li entitajiet u persuni fdati bi dmirijiet tal-implimentazzjoni tal-baġit ‘għandhom jiggarantixxu livell ta’ protezzjoni tal-interessi finanzjarji tal-Unjoni ekwivalenti għal dak mitlub taħt dan ir-Regolament meta jamministraw il-fondi tal-Unjoni...’.

10.

It-test tal-premessa 9 tal-proposta jirreferi għal din id-dispożizzjoni, u jiġġustifikaha permezz ta' referenza għar-‘regolament dwar Regoli ta' Implimentazzjoni Komuni’. Madankollu, analiżi tal-proposta għar-Regolament ta' Implimentazzjoni tal-11-il FEŻ (14) ma żvelat ebda ġustifikazzjoni espliċita għal tali varjazzjonijiet mid-dispożizzjonijiet tar-Regolament Finanzjarju ġenerali.

11.

Il-Qorti tirrakkomanda li l-Kunsill jeżamina l-ġustifikazzjoni għall-inklużjoni tal-paragrafu 3: b'mod partikolari jekk xi vantaġġ mill-inklużjoni tagħha jkunux aktar bil-qabda mir-riskji li jiġi oskurat min ikollu r-responsabbiltà għall-infiq sew tal-flejjes tal-FEŻ.

12.

L-Artikolu 36 tal-abbozz ta' regolament jipprevedi, b'mod wiesa', li d-dispożizzjonijiet tal-akkwist pubbliku tar-Regolament Finanzjarju ġenerali għandhom japplikaw għax-xiri pubbliku appoġġat mill-FEŻ. L-ewwel żewġ linji tal-paragrafu 5 jipprevedu li fil-każ ta' nuqqas ta' konformità ma' dawn il-proċeduri, in-nefqa ma tkunx eliġibbli għal finanzjament tal-FEŻ.

13.

Madankollu l-aħħar sitt kelmiet tal-Artikolu 36(5) jikkwalifikaw dan il-prinċipju permezz ta' referenza għall-prinċipju ta' proporzjonalità.

14.

Id-dispożizzjoni proposta ddgħajjef ir-regola ġenerali li, biex ikun eliġibbli, l-infiq għandu jiġi mġarrab b'konformità mad-dispożizzjonijiet tal-akkwist. Il-prinċipju ta' proporzjonalità huwa rilevanti fl-istadju fejn jiġu ddeterminati l-konsegwenzi tan-nuqqas ta' rispett tar-regoli tal-akkwist (pereżempju l-irkupru ta' assistenza finanzjarja). Billi l-prinċipju ta' proporzjonalità huwa prinċipju ġenerali tal-liġi, mhuwiex meħtieġ li wieħed jirreferi għalih fid-dispożizzjonijiet tal-Artikolu 36.

15.

Il-Qorti tirrakkomanda li l-Kunsill iħassar l-aħħar sitt kelmiet tal-Artikolu 36(5).

16.

Skont l-Artikolu 37 tal-proposta d-dispożizzjonijiet tar-Regolament Finanzjarju ġenerali dwar l-għotjiet japplikaw b'mod wiesa' għall-kontribuzzjonijiet finanzjarji mill-FEŻ. Madankollu l-paragrafu 3 fih dispożizzjoni addizzjonali li tenfasizza l-ħtieġa li l-Kummissjoni tieħu inkunsiderazzjoni l-ħtiġijiet u l-kuntesti speċifiċi meta tiddefinixxi l-modalitajiet. Mhuwiex ċar għalfejn tinħass il-ħtieġa li din id-dispożizzjoni tiġi inkluża fir-Regolament Finanzjarju l-ġdid tal-FEŻ meta jidher li ma hemmx dispożizzjoni ekwivalenti fir-Regolament Finanzjarju ġenerali.

17.

Il-Qorti tirrakkomanda li l-Kunsill jeżamina jekk hemmx ġustifikazzjoni tajba għall-inklużjoni ta' tali dispożizzjoni u jekk id-dispożizzjoni hijiex definita b'mod ċar biżżejjed.

18.

L-ewwel paragrafu tal-Artikolu 39 tal-proposta jipprevedi li l-Artikolu 186 tar-Regolament Finanzjarju ġenerali għandu japplika għall-pagamenti tal-FEŻ għall-appoġġ tal-baġit. Dak l-Artikolu tar-Regolament Finanzjarju ġenerali jipprevedi li deċiżjonijiet għall-finanzjament li taħthom jitħallas l-appoġġ għall-baġit għandhom jagħtu dettalji tal-objettivi u r-riżultati mistennijin tiegħu, u li l-pagament għandu jiddependi fuq il-progress fl-issodisfar tal-kundizzjonijiet (il-paragrafu 2); li l-ftehimiet finanzjarji għandhom jipprevedu r-rimborż ta' nfiq irregolari (il-paragrafu 3); u li l-Kummissjoni għandha tappoġġa f'pajjiżi terzi benefiċjarji l-iżvilupp tal-kontroll parlamentari u tal-kapaċitajiet ta’ verifika (tal-awditjar) u żżid it-trasparenza u l-aċċess pubbliku għall-informazzjoni (il-paragrafu 4).

19.

It-tieni sas-seba' paragrafi tal-Artikolu 39 tal-proposta jikkonsistu f'sensiela ta' prinċipji u prattiki relatati mal-appoġġ għall-baġit mill-FEŻ. Dawn jinkludu dikjarazzjonijiet ġenerali ta' politika (it-tieni u r-raba' paragrafi), dikjarazzjonijiet mill-ġdid jew verżjonijiet ipparafrażati ta' xi wħud mid-dispożizzjonijiet tal-Artikolu 186 tar-Regolament Finanzjarju ġenerali (it-tielet, il-ħames u s-sitt paragrafi) u referenza oskura għal links bejn il-PTEE u l-Istati Membri kkonċernati (is-seba' paragrafu).

20.

Għaldaqstant it-test jidher li jmur lil hinn minn dak li huwa xieraq f'Regolament Finanzjarju (definit fil-premessa 3 bħala ‘r-regoli dettaljati għall-implimentazzjoni finanzjarja’). Huwa wkoll sors ta' konfużjoni potenzjali fis-sens li, fuq naħa waħda huwa jgħid li qed japplika d-dispożizzjonijiet korrispondenti fir-Regolament Finanzjarju ġenerali filwaqt li, fuq in-naħa l-oħra, huwa jipparafraża xi wħud minn dawk id-dispożizzjonijiet.

21.

Il-Qorti għamlet għadd ta' rakkomandazzjonijiet f'rapporti reċenti rigward l-użu tal-appoġġ għall-baġit (15), inkluża b'mod partikolari l-ħtieġa li jiġu ssettjati kriterji oġġettivament verifikabbli, u fejn possibbli kwantifikati, u li l-progress jiġi mmonitorjat bi tqabbil magħhom. F'dan is-sens, it-test jista' jissaħħaħ b'mod utli. Xi partijiet mit-test inkluż fl-abbozz attwali (pereżempju r-referenzi għal ‘differenzazzjoni’ u ‘fatturi prinċipali li jiddeterminaw’ fir-raba' paragrafu), jistgħu fuq naħa waħda jiġu interpretati bħala ġustifikazzjoni għat-teħid ta' ħarsa relattivament laxka lejn il-ħtieġa li l-pagamenti tal-appoġġ għall-baġit ikunu kundizzjonali b'mod rigoruż.

22.

Il-Qorti tirrakkomanda li l-Kunsill jeżamina dan l-artikolu tal-proposta fid-dawl tal-kunsiderazzjonijiet stipulati hawn fuq.

23.

L-Artikolu 48(6) jistipula li l-‘awtoritajiet nazzjonali ta' verifika (tal-awditjar) tal-Istati AKP u l-PTEE għandhom ikunu mħeġġa sabiex jipparteċipaw fil-ħidma tal-Qorti tal-Awdituri’. Il-Qorti tinnota li r-Regolament Finanzjarju ġenerali ma fih ebda dispożizzjonijiet simili li japplikaw għall-azzjonijiet esterni ffinanzjati mill-baġit ġenerali. Il-Qorti ssegwi standards internazzjonali tal-awditjar matul it-twettiq ta' xogħolha, inklużi standards li jirrigwardaw l-użu minn xogħol awdituri oħra. Filwaqt li l-Qorti tista' tixtieq tistieden lil awtoritajiet nazzjonali tal-awditjar biex josservaw xogħolha, mhuwiex xieraq għar-Regolament Finanzjarju tal-FEŻ li joħloq obbligu għall-Qorti li tħeġġeġ, inġenerali, il-parteċipazzjoni tagħhom f'xogħolha.

24.

Il-Qorti tirrakkomanda lill-Kunsill biex jemenda dan il-paragrafu sabiex iħeġġeġ lill-awtoritajiet nazzjonali tal-awditjar tal-Istati tal-AKP u l-PTEE biex jikkooperaw mal-Qorti, fuq stedina tagħha.

25.

L-Artikolu 62 tal-proposta jelenka għadd ta' aspetti ta' FEŻ preċedenti li għalihom ikun japplika r-Regolament Finanzjarju propost għall-11-il FEŻ. Il-Qorti tirrakkomanda li l-Kunsill iqis jekk huwiex xieraq l-applikazzjoni tar-Regolament Finanzjarju futur tal-FEŻ tkun limitata għall-oqsma msemmija fil-lista (għaldaqstant bl-esklużjoni tal-applikazzjoni tiegħu għal punti li mhumiex imsemmija, bħall-appoġġ għall-baġit).