52012PC0332

MEMORANDUM TA’ SPJEGAZZJONI

1.           KUNTEST TAL-PROPOSTA

It-Trattat dwar il-Funzjonament tal-Unjoni Ewropea (TFUE) jagħmel distinzjoni bejn is-setgħat iddelegati lill-Kummissjoni biex tadotta atti mhux leġiżlattivi ta’ applikazzjoni ġenerali biex jissupplimentaw jew jemendaw ċerti elementi mhux essenzjali tal-att leġiżlattiv kif stipulat fl-Artikolu 290(1) tat-TFUE (atti ddelegati), u s-setgħat ikkonferiti lill-Kummissjoni biex tadotta kundizzjonijiet uniformi għall-implimentazzjoni tal-atti legalment vinkolanti tal-Unjoni kif stipulat fl-Artikolu 291(2) tat-TFUE (atti ta’ implimentazzjoni).

Fil-kuntest tal-allinjament tar-Regolament (KE) Nru 1005/2008 mar-regoli l-ġodda tat-TFUE, is-setgħat attwalment definiti mir-Regolament ġew ikklassifikati mill-ġdid f'setgħat iddelegati u ta’ implimentazzjoni.

Wara dan l-eżerċizzju, kien tħejja abbozz ta’ proposta għal emenda tar-Regolament (KE) Nru 1005/2008.

Skont l-Artikolu 290 tat-Trattat, il-Leġiżlatur jagħti lill-Kummissjoni l-kompitu li tlesti jew temenda ċerti elementi mhux essenzjali ta’ dak ir-Regolament. Il-Kummissjoni għandha jkollha s-setgħa li tadotta atti ddelegati biex tagħti eżenzjoni min-notifika ta' informazzjoni mill-bastimenti tas-sajd jew biex tistabbilixxi perjodi ta' notifika differenti, biex tiddetermina l-punti ta’ riferiment għall-ispezzjoni tal-operazzjonijiet tal-ħatt l-art u tat-trażbord imwettqa minn bastimenti tas-sajd ta’ pajjiżi terzi, biex tadatta l-iskema taċ-ċertifikazzjoni tal-qbid għal xi prodotti tas-sajd li jinkisbu minn bastimenti tas-sajd żgħar, inkluża l-possibbiltà li jintuża ċertifikat tal-qbid issimplifikat, biex temenda l-lista ta’ prodotti mhux inklużi fl-ambitu tar-Regolament, biex tadatta d-data ta' skadenza għall-preżentazzjoni taċ-ċertifikat tal-qbid għat-tip ta’ prodott tas-sajd, id-distanza sal-post tad-dħul jew il-mezzi tat-trasport użati, biex tistabbilixxi regoli għall-għoti, l-emendar u l-irtirar ta' ċertifikati ta' operaturi ekonomiċi approvati jew għas-sospensjoni jew ir-revoka tal-istatus ta’ operatur ekonomiku approvat u għall-kundizzjonijiet ta’ validità taċ-ċertifikati tal-operaturi ekonomiċi approvati, u biex tistabbilixxi kriterji tal-Unjoni għall-verifiki fil-kuntest tal-ġestjoni tar-riskju.

Skont l-Artikolu 291 tat-Trattat, il-Leġiżlatur jikkonferixxi setgħat ta’ implimentazzjoni lill-Kummissjoni biex jiżgura kundizzjonijiet uniformi għall-implimentazzjoni tar-Regolament (KE) Nru 1005/2008, speċifikament: l-istabbiliment ta’ formoli ta’ notifika minn qabel, l-istabbiliment ta’ proċeduri u formoli għad-dikjarazzjoni tal-ħatt l-art u tat-trażbord, l-adozzjoni, bi qbil mal-Istati tal-bandiera, ta' ċertifikati tal-qbid stabbiliti, ivvalidati jew ippreżentati permezz ta' mezzi elettroniċi jew abbażi ta’ sistemi elettroniċi ta’ traċċabiltà li jiżguraw l-istess livell ta' kontroll mill-awtoritajiet, id-determinazzjoni u l-modifika ta' lista ta' skemi ta' ċertifikazzjoni tal-qbid adottati mill-organizzazzjonijiet reġjonali tal-ġestjoni tas-sajd li jikkonformaw mar-Regolament IUU tal-UE, l-istabbiliment ta’ kundizzjonijiet komuni fl-Istati Membri kollha għall-proċeduri u l-formoli għall-applikazzjoni għaċ-ċertifikati tal-operaturi ekonomiċi approvati u l-ħruġ ta' dawn iċ-ċertifikati, ta' regoli dwar il-verifiki tal-operatur ekonomiku approvat u ta' regoli dwar l-iskambju tal-informazzjoni bejn l-operatur ekonomiku approvat u l-awtoritajiet tal-Istati Membri, bejn l-Istati Membri u bejn l-Istati Membri u l-Kummissjoni, l-istabbiliment ta' lista tal-bastimenti IUU tal-Unjoni, it-tneħħija ta' bastimenti mil-lista tal-bastimenti IUU tal-Unjoni, l-inklużjoni ta' listi tal-bastimenti IUU adottati minn organizzazzjonijiet reġjonali tal-ġestjoni tas-sajd fil-lista tal-bastimenti IUU tal-Unjoni, l-identifikazzjoni ta’ pajjiżi li ma jikkooperawx, l-inklużjoni ta' pajjiżi terzi identifikati fuq lista ta' pajjiżi terzi li ma jikkooperawx, it-tneħħija ta’ pajjiżi terzi mil-lista ta’ pajjiżi li ma jikkooperawx, l-adozzjoni ta’ miżuri ta’ emerġenza fir-rigward ta’ pajjiżi terzi f’ċirkustanzi speċifiċi, l-istabbiliment tal-format għall-preżentazzjoni tal-informazzjoni mill-Istati Membri rigward l-ilmiħ ta’ bastimenti tas-sajd u l-istabbiliment ta’ regoli dwar għajnuna reċiproka.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Ma kienx hemm bżonn ta’ konsultazzjoni ma’ partijiet interessati jew ta' valutazzjoni tal-impatt.

3.           ELEMENTI LEGALI TAL-PROPOSTA

· Sommarju tal-azzjoni proposta

L-identifikazzjoni tas-setgħat ikkonferiti lill-Kummissjoni fir-Regolament tal-Kunsill (KE) Nru 1005/2008 u l-klassifikazzjoni ta’ dawn bħala setgħat iddelegati jew ta’ implimentazzjoni u l-adattament ta’ ċerti dispożizzjonijiet għall-proċeduri tat-teħid tad-deċiżjonijiet tat-Trattat ta’ Lisbona.

· Bażi legali

L-Artikolu 43(2) tat-Trattat dwar il-Funzjonament tal-Unjoni Ewropea,

· Prinċipju tas-sussidjarjetà

Il-proposta taqa’ fil-kompetenza esklussiva tal-Unjoni Ewropea.

· Prinċipju tal-proporzjonalità

Il-proposta qed temenda miżuri li diġà jeżistu fir-Regolament tal-Kunsill (KE) Nru 1005/2008, u għalhekk ma tqanqal l-ebda tħassib dwar il-prinċipju tal-proporzjonalità.

· Għażla ta’ strument

L-istrument propost: Regolament tal-Parlament Ewropew u tal-Kunsill.

Mezzi oħra ma jkunux xierqa minħabba r-raġuni li ġejja: Regolament irid jiġi emendat b’Regolament.

4.           IMPLIKAZZJONI BAĠITARJA

Din il-miżura ma tinvolvi l-ebda nefqa addizzjonali għall-Unjoni.

2012/0162 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament tal-Kunsill Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 43(2) tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġislattiv intbagħat lill-Parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew,

Filwaqt li jaġixxu skont il-proċedura leġiżlattiva ordinarja,

Billi:

(1)       Ir-Regolament tal-Kunsill (KE) Nru 1005/2008[1] tad-29 ta' Settembru 2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat jikkonferixxi setgħat lill-Kummissjoni sabiex timplimenta wħud mid-dispożizzjonijiet ta’ dak ir-Regolament u jirriserva ċerti setgħat ta’ implimentazzjoni lill-Kunsill.

(2)       Bħala konsegwenza tad-dħul fis-seħħ tat-Trattat ta’ Lisbona, jeħtieġ li ċerti setgħat ikkonferiti skont ir-Regolament (KE) Nru 1005/2008 jkunu allinjati mal-Artikoli 290 u 291 tat-Trattat dwar il-Funzjonament tal-Unjoni Ewropea.

(3)       Sabiex jiġu applikati wħud mid-dispożizzjonijiet tar-Regolament (KE) Nru 1005/2008, is-setgħa biex jiġu adottati atti skont l-Artikolu 290 tat-Trattat dwar il-Funzjonament tal-Unjoni Ewropea għandha tiġi ddelegata lill-Kummissjoni fir-rigward ta’ dan li ġej:

– l-eżenzjoni minn ċerti rekwiżiti ta’ informazzjoni imposti fuq bastimenti tas-sajd jew l-istabbiliment ta’ perjodi ta’ notifika differenti għal ċerti kategoriji ta' bastimenti tas-sajd,

– l-istabbiliment ta’ punti ta’ riferiment għall-ispezzjonijiet tal-operazzjonijiet tal-ħatt l-art u tat-trażbord imwettqa minn bastimenti tas-sajd ta' pajjiżi terzi,

– l-istabbiliment tal-lista ta' prodotti esklużi mill-ambitu tal-implimentazzjoni taċ-ċertifikat tal-qbid,

– l-adattament tal-iskema taċ-ċertifikazzjoni tal-qbid għal xi prodotti tas-sajd li jinkisbu minn bastimenti tas-sajd żgħar, inkluża l-possibilità li jintuża ċertifikat tal-qbid issimplifikat,

– l-adattament tad-data ta’ skadenza għall-preżentazzjoni taċ-ċertifikat tal-qbid, abbażi tat-tip ta' prodott tas-sajd, id-distanza sal-post tad-dħul fit-territorju tal-Unjoni jew il-mezzi tat-trasport użati,

– l-istabbiliment ta' regoli għall-għoti, l-emendar jew l-irtirar ta’ ċertifikati tal-operaturi ekonomiċi approvati, jew għas-sospensjoni jew ir-revoka tal-istatus ta’ operatur ekonomiku approvat u għall-kundizzjonijiet ta’ validità taċ-ċertifikati tal-operaturi ekonomiċi approvati, u

– l-istabbiliment ta’ kriterji tal-Unjoni għall-verifiki fil-kuntest tal-ġestjoni tar-riskju.

(4)       Huwa importanti ħafna li l-Kummissjoni twettaq konsultazzjonijiet xierqa matul ix-xogħol ta’ tħejjija tagħha għall-adozzjoni tal-atti ddelegati, inkluż fil-livell ta' esperti. Il-Kummissjoni, meta tħejji u tfassal l-atti ddelegati, għandha tiżgura trasmissjoni simultanja, f’waqtha u xierqa tad-dokumenti rilevanti lill-Parlament Ewropew u lill-Kunsill.

(5)       Sabiex ikunu żgurati kundizzjonijiet uniformi għall-implimentazzjoni tar-Regolament tal-Kunsill (KE) Nru 1005/2008 is-setgħat ta’ implimentazzjoni għandhom jiġu kkonferiti fuq il-Kummissjoni skont l-Artikolu 291 tat-Trattat dwar il-Funzjonament tal-Unjoni Ewropea fir-rigward ta' dawn li ġejjin:

– l-istabbiliment ta’ formoli ta' notifika minn qabel,

– l-istabbiliment ta’ proċeduri u formoli għad-dikjarazzjoni tal-ħatt l-art u tat-trażbord,

– l-adozzjoni, bi qbil mal-Istati tal-bandiera, ta’ ċertifikati tal-qbid stabbiliti, ivvalidati jew ippreżentati permezz ta’ mezzi elettroniċi jew abbażi ta’ sistemi elettroniċi ta’ traċċabilità li jiżguraw l-istess livell ta’ kontroll mill-awtoritajiet,

– id-determinazzjoni u l-modifika ta' lista ta' skemi ta' ċertifikazzjoni tal-qbid adottati mill-organizzazzjonijiet reġjonali tal-ġestjoni tas-sajd li jikkonformaw mar-Regolament IUU tal-UE,

– l-istabbiliment ta’ kundizzjonijiet komuni fl-Istati Membri kollha għal proċeduri u formoli għall-applikazzjoni għaċ-ċertifikati tal-operaturi ekonomiċi approvati u l-ħruġ ta' dawn iċ-ċertifikati, ta' regoli dwar il-verifiki tal-operatur ekonomiku approvat u ta' regoli dwar l-iskambju tal-informazzjoni bejn l-operatur ekonomiku approvat u l-awtoritajiet tal-Istati Membri, bejn l-Istati Membri u bejn l-Istati Membri u l-Kummissjoni,

– l-istabbiliment ta' lista tal-bastimenti IUU tal-Unjoni,

– it-tneħħija ta' bastimenti mil-lista tal-bastimenti IUU tal-Unjoni,,

– l-inklużjoni ta' listi tal-bastimenti IUU adottati minn organizzazzjonijiet reġjonali tal-ġestjoni tas-sajd fil-lista tal-bastimenti IUU tal-Unjoni,

– l-identifikazzjoni ta’ pajjiżi li ma jikkooperawx,

– l-inklużjoni ta' pajjiżi terzi identifikati fuq lista ta' pajjiżi terzi li ma jikkooperawx,

– it-tneħħija ta’ pajjiżi terzi mil-lista ta’ pajjiżi li ma jikkooperawx,

– l-adozzjoni ta’ miżuri ta’ emerġenza fir-rigward ta’ pajjiżi terzi f’ċirkustanzi speċifiċi,

– l-istabbiliment tal-format għall-preżentazzjoni tal-informazzjoni mill-Istati Membri rigward l-ilmiħ ta’ bastimenti tas-sajd, u

– l-istabbiliment ta’ regoli dwar għajnuna reċiproka.   Fejn huwa meħtieġ il-kontroll tal-Istati Membri dawk is-setgħat għandhom jiġu eżerċitati skont ir-Regolament (UE) Nru 182/2011[2] tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni.

(6)       Bħala konsegwenza tad-dħul fis-seħħ tat-Trattat ta’ Lisbona, l-Artikolu 52 għandu jiġi mħassar. Dan l-Artikolu kien diġà użat għat-twaqqif tal-qafas legali għaċ-ċertifikat tal-qbid issimplifikat u għall-istabbiliment ta' arranġamenti amministrattivi ma’ pajjiżi terzi skont l-Artikoli 12(4) u 20(4). Għad hemm il-ħtieġa li jiġu pprovduti s-setgħat meħtieġa lill-Kummissjoni biex tadotta atti ddelegati għall-adattament ta’ skema ta’ ċertifikazzjoni tal-qbid għal ċerti prodotti tas-sajd li jinkisbu minn bastimenti tas-sajd żgħar, inkluża l-possibilità ta' użu ta' ċertifikat tal-qbid issimplifikat u setgħat ta’ implimentazzjoni għall-adozzjoni mill-Kummissjoni, bi qbil mal-Istati tal-bandiera, ta’ ċertifikati tal-qbid li huma stabbiliti, ivvalidati u ppreżentati permezz ta' mezzi elettroniċi inkella sostitwiti minn sistemi elettroniċi ta’ traċċabilità li jiżguraw l-istess livell ta' kontroll mill-awtoritajiet.

(7)       Bħala konsegwenza tad-dħul fis-seħħ tat-Trattat ta' Lisbona, jeħtieġ li tiġi adattata d-dispożizzjoni dwar miżuri temporanji li tipprovdi għar-referenza ta' ċerti miżuri tal-Kummissjoni lill-Kunsill taħt ċerti kundizzjonijiet.

(8)       Id-dispożizzjonijiet tar-Regolament (KE) Nru 1005/2008 dwar l-istabbiliment ta' lista ta' pajjiżi terzi li ma jikkooperawx u t-tneħħija ta' pajjiżi terzi minn dik il-lista jikkonferixxu setgħat tat-teħid tad-deċiżjonijiet fuq il-Kunsill. Bħala konsegwenza tad-dħul fis-seħħ tat-Trattat ta' Lisbona jeħtieġ li dawk id-dispożizzjonijiet jiġu allinjati mal-proċeduri l-ġodda applikabbli għall-Politika Komuni tas-Sajd.

(9)       Ir-Regolment (KE) Nru 1005/2008 għandu għaldaqstant jiġi emendat skont dan,

ADOTTAW DAN IR-REGOLAMENT:

Artikolu 1

Ir-Regolament (KE) Nru 1005/2008 huwa emendat kif ġej:

1.           l-Artikolu 6 huwa emendat kif ġej:

a) jiżdied il-paragrafu 1a li ġej:

“1a) il-Kummissjoni tista' tistabbilixxi formola għan-notifika minn qabel imsemmija fil-paragrafu 1 hawn fuq permezz ta' atti ta’ implimentazzjoni skont il-proċedura ta' eżami msemmija fl-Artikolu 54(2).

b) il-paragrafu 3 huwa sostitwit b’dan li ġej:

"3. Il-Kummissjoni, skont il-proċedura msemmija fl-Artikolu 54a, għandu jkollha s-setgħa li tadotta atti li jeżentaw ċerti kategoriji ta' bastimenti tas-sajd ta' pajjiżi terzi mill-obbligu stipulat fil-paragrafu 1 għal perjodu limitat u li jiġġedded, jew tagħmel provvediment għal perjodu ta' notifika ieħor li jqis, fost oħrajn, it-tip ta' prodott tas-sajd, id-distanza bejn iż-żoni tas-sajd, il-postijiet tal-ħatt l-art u l-portijiet fejn il-bastimenti inkwistjoni huma rreġistrati jew elenkati.

2.           fl-Artikolu 8, il-paragrafu 3 huwa sostitwit b’dan li ġej:

"3. Il-proċeduri u l-formoli għad-dikjarazzjoni tal-ħatt l-art u tat-trażbord għandhom jiġu ddeterminati permezz ta' atti ta’ implimentazzjoni. Dawk l-atti ta’ implimentazzjoni għandhom jiġu adottati skont il-proċedura ta' eżami msemmija fl-Artikolu 54(2)."

3.           fl-Artikolu 9, il-paragrafu 1 huwa ssostitwit b’dan li ġej:

"1. L-Istati Membri għandhom iwettqu spezzjonijiet fil-portijiet magħżula tagħhom ta' mill-anqas 5 % tal-operazzjonijiet tal-ħatt l-art u tat-trażbord minn bastimenti tas-sajd ta' pajjiżi terzi kull sena, skont il-punti ta’ riferiment iddeterminati abbażi tal-ġestjoni tar-riskju, mingħajr preġudizzju għal-limiti massimi ogħla adottati minn organizzazzjonijiet reġjonali tal-ġestjoni tas-sajd. Il-Kummissjoni għandha tingħata s-setgħa, skont l-Artikolu 54a, li tadotta atti ddelegati li jiddeterminaw dawk il-punti ta’ riferiment. "

4.           l-Artikolu 12 huwa emendat kif ġej:

a) jiżdied il-paragrafu 4a:

"4a il-Kummissjoni għandha, permezz ta’ atti ta’ implimentazzjoni, tadotta ċ-ċertifikati tal-qbid stabbiliti fil-qafas tal-kooperazzjoni stabbilit fl-Artikolu 20(4). Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2).

b) Il-paragrafu 5 huwa sostitwit b’dan li ġej:

"5. Il-lista fl-Anness I ta' prodotti esklużi mill-ambitu tal-implimentazzjoni taċ-ċertifikat tal-qbid tista’ tiġi rriveduta kull sena. Il-Kummissjoni għandha tingħata s-setgħa, skont l-Artikolu 54a, li tadotta atti ddelegati li jemendaw il-lista fuq il-bażi ta':

(a)     l-ispezzjonijiet ta' bastimenti tas-sajd ta' pajjiżi terzi fil-portijiet tal-Istati Membri;

(b)     l-implimentazzjoni ta’ skema ta’ ċertifikazzjoni tal-qbid għall-importazzjoni u l-esportazzjoni ta’ prodotti tas-sajd;

(c)     l-implimentazzjoni tas-sistema ta’ twissija tal-Unjoni;

(d)     l-identifikazzjoni ta' bastimenti tas-sajd involuti f' sajd IUU;

(e)     l-identifikazzjoni ta' ċittadini li jappoġġaw jew huma involuti f'sajd IUU;

(f)      l-implimentazzjoni ta’ dispożizzjonijiet adottati f’ċerti organizzazzjonijiet reġjonali tal-ġestjoni tas-sajd li jikkonċernaw ilmiħ ta' bastimenti tas-sajd;

(g)     ir-rapporti mill-Istati Membri."

c) għandu jiżdied il-paragrafu 6 li ġej:

"6. Il-Kummissjoni għandha tingħata s-setgħa, skont l-Artikolu 54a, li tadotta atti ddelegati li jadattaw skema ta’ ċertifikazzjoni tal-qbid għal prodotti tas-sajd li jinkisbu minn bastimenti żgħar tas-sajd inkluż, jekk meħtieġ, kampjun għal ċertifikat issimplifikat tal-qbid."

5.           fl-Artikolu 13, il-paragrafu 1 huwa sostitwit b’dan li ġej:

1. Dokumenti tal-qbid, u kull dokument relatat, ivvalidati b'konformità mal-iskemi tad-dokumentazzjoni tal-qbid adottati minn organizzazzjoni reġjonali tal-ġestjoni tas-sajd li huma rikonoxxuti bħala konformi mar-rekwiżiti stabbiliti f'dan ir-Regolament, għandhom jiġu aċċettati bħala ċertifikati tal-qbid fir-rigward tal-prodotti tas-sajd minn speċijiet li għalihom ikunu japplikaw dawn l-iskemi tad-dokumentazzjoni tal-qbid u jkunu soġġetti għar-rekwiżiti ta' ċċekkjar u verifika imposti fuq l-Istat Membru tal-importazzjoni skont l-Artikoli 16 u 17 u għad-dispożizzjonijiet dwar ir-rifjut ta' importazzjoni stabbiliti fl-Artikolu 18. Il-lista ta' dawn l-iskemi tad-dokumentazzjoni tal-qbid għandha tkun iddeterminata permezz ta’ atti ta’ implimentazzjoni. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2).

6.           L-Artikolu 16 huwa emendat kif ġej:

a) il-paragrafu 1 huwa sostitwit b'dan li ġej:

"1. Iċ-ċertifikat tal-qbid ivvalidat għandu jintbagħat mill-importatur lill-awtoritajiet kompetenti tal-Istat Membru fejn il-prodott ikun intenzjonat li jiġi importat qabel id-data ta’ skadenza li inizjalment tkun stabbilita għal tal-anqas tlett ijiem ta' xogħol qabel il-ħin mistenni tal-wasla fil-post tad-dħul fit-territorju tal-Unjoni. Din id-data ta’ skadenza ta' tlett ijiem ta' xogħol tista' tiġi adattata, permezz ta’ atti ddelegati adottati skont l-Artikolu 54a, skont it-tip ta' prodott tas-sajd, id-distanza għall-post ta' dħul fit-territorju tal-Unjoni jew il-mezzi tat-trasport użati. Dawk l-awtoritajiet kompetenti għandhom, abbażi tal-ġestjoni tar-riskju, jiċċekkjaw iċ-ċertifikat tal-qbid fid-dawl tal-informazzjoni pprovduta fin-notifika rċevuta mill-Istat tal-bandiera skont l-Artikoli 20 u 22.

b) il-paragrafu 3 huwa sostitwit b’dan li ġej:

“3. Il-kriterji għall-għoti tal-istatus ta' operatur ekonomiku approvat għal importatur mill-awtoritajiet kompetenti ta' Stat Membru għandhom jinkludu:

(a)     l-istabbiliment tal-importatur fit-territorju ta' dak l-Istat Membru;

(b)     għadd u volum suffiċjenti ta' operazzjonijiet ta' importazzjoni li jiġġustifikaw l-implimentazzjoni tal-proċedura msemmija fil-paragrafu 2;

(c)     rekord xieraq ta' konformità mar-rekwiżiti ta' miżuri ta' konservazzjoni u ta' ġestjoni;

(d)     sistema sodisfaċenti ta' ġestjoni ta’ rekords kummerċjali, u fejn meħtieġ, ta' trasport u pproċessar, li tippermetti li jitwettqu l-iċċekkjar u l-verifiki adattati għall-finijiet ta' dan ir-Regolament;

(e)     l-eżistenza ta' faċilitajiet fir-rigward tat-twettiq ta' dawk il-kontrolli u l-verifiki;

(f)      fejn xieraq, standards prattiċi ta' kompetenza jew kwalifiki professjonali relatati direttament mal-attivitajiet imwettqin; kif ukoll

(g)     fejn xieraq, prova ta' solvenza finanzjarja.

L-Istati Membri għandhom jikkomunikaw lill-Kummissjoni l-isem u l-indirizz tal-operaturi ekonomiċi approvati malajr kemm jista' jkun wara li jkunu taw dan l-istatus. Il-Kummissjoni għandha tpoġġi din l-informazzjoni għad-dispożizzjoni tal-Istati Membri permezz ta' mezzi elettroniċi.”

c) għandhom jiżdiedu l-paragrafi 4 u 5 li ġejjin:

"4. Abbażi tal-kriterji stabbiliti fil-paragrafu 3, il-Kummissjoni għandha tingħata s-setgħa, skont l-Artikolu 54a, li tadotta atti ddelegati li jistabbilixxu:

(a)     regoli dwar is-sospensjoni jew ir-revoka tal-istatus ta’ operatur ekonomiku approvat,

(b)     regoli dwar il-kundizzjonijiet tal-validità taċ-ċertifikati tal-operaturi ekonomiċi approvati,

(c)     regoli dwar l-għoti, l-emendar jew l-irtirar taċ-ċertifikati tal-operaturi ekonomiċi approvati.

5. Il-Kummissjoni għandha tadotta atti ta’ implimentazzjoni skont il-proċedura ta' eżami msemmija fl-Artikolu 54(2) rigward:

(a)     proċeduri u formoli għall-applikazzjoni għal ċertifikati ta' operaturi ekonomiċi approvati u l-ħruġ tagħhom,

(b)     regoli dwar kif għandhom jitwettqu l-verifiki ta’ operaturi ekonomiċi approvati,

(c)     regoli dwar l-iskambju ta’ informazzjoni bejn l-operatur ekonomiku approvat u l-awtoritajiet fl-Istati Membri, bejn l-Istati Membri u bejn l-Istati Membri u l-Kummissjoni."

7.           fl-Artikolu 17, il-paragrafu 3 huwa sostitwit b’dan li ġej:

"3. Il-verifiki għandhom ikunu ffukati fuq ir-riskju identifikat abbażi ta' kriterji żviluppati fil-livell nazzjonali jew fil-livell tal-Unjoni skont il-ġestjoni tar-riskju. L-Istati Membri għandhom jinnotifikaw l-kriterji nazzjonali tagħhom lill-Kummissjoni fi żmien 30 jum ta' xogħol wara d-29 ta' Ottubru 2008 u jaġġornaw din l-informazzjoni. Il-Kummissjoni għandha tingħata s-setgħa, skont l-Artikolu 54a, biex tadotta atti ddelegati li jiddeterminaw il-kriterji tal-Unjoni li jippermettu analiżi tar-riskju f’waqtha u valutazzjoni globali tal-informazzjoni rilevanti ta’ kontroll.

8.           fl-Artikolu 27, il-paragrafu 1 huwa sostitwit b’dan li ġej:

"1. Il-Kummissjoni għandha tistabbilixxi lista ta' bastimenti IUU tal-Unjoni permezz ta' atti ta’ implimentazzjoni adottati skont il-proċedura ta' eżami msemmija fl-Artikolu 54(2). Il-lista għandha tinkludi l-bastimenti tas-sajd li fir-rigward tagħhom, lil hinn mill-miżuri meħuda skont l-Artikoli 25 u 26 u abbażi tal-kriterji li jinsabu fl-istess dispożizzjonijiet, l-informazzjoni miksuba skont dan ir-Regolament tistabbilixxi li dawn kienu mdaħħlin f’sajd IUU kif imsemmi fl-Artikolu 3 u li l-Istati tal-bandiera tagħhom ma kinux ikkonformaw ma’ talbiet uffiċjali msemmija fl-Artikolu 26(2)(b) u (c) u l-Artikolu 26(3)(b) u (c), b 'reazzjoni għal tali sajd IUU. "

9.           fl-Artikolu 28, il-paragrafu 1 huwa sostitwit b’dan li ġej:

"1. Il-Kummissjoni għandha tneħħi bastiment tas-sajd mil-lista ta’ bastimenti IUU tal-Unjoni permezz ta' atti ta’ implimentazzjoni adottati skont il-proċedura ta' eżami msemmija fl-Artikolu 54(2), jekk l-Istat tal-bandiera tal-bastiment tas-sajd juri li:

(a)     il-bastiment ma kien involut f'ebda attività ta' sajd IUU li għaliha jkun tqiegħed fuq il-lista; jew

(b)     ġew applikati sanzjonijiet proporzjonali, dissważivi u effettivi bi tweġiba għall-attivitajiet tas-sajd IUU inkwistjoni, speċjalment għall-bastimenti tas-sajd li jtajru bandiera ta' Stat Membru skont ir-Regolament (KE) Nru 1224/2009.”

10.         fl-Artikolu 30, il-paragrafu 1 huwa sostitwit b’dan li ġej:

"1. Barra mill-bastimenti tas-sajd imsemmija fl-Artikolu 27, il-bastimenti tas-sajd inklużi fil-listi ta' bastimenti IUU adottati mill-organizzazzjonijiet reġjonali tal-ġestjoni tas-sajd għandhom ikunu inklużi fil-lista ta’ bastimenti IUU tal-Unjoni permezz ta’ atti ta’ implimentazzjoni. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2). It-tneħħija ta' dawn il-bastimenti mil-lista ta' bastimenti IUU tal-Unjoni għandha tkun irregolata bid-deċiżjonijiet meħuda fir-rigward tagħhom mill-organizzazzjoni reġjonali rilevanti tal-ġestjoni tas-sajd.

11.         fl-Artikolu 31, il-paragrafu 1 huwa sostitwit b’dan li ġej:

"1. Il-Kummissjoni għandha, permezz ta’ atti ta’ implimentazzjoni, tidentifika l-pajjiżi terzi li hija tikkunsidra bħala pajjiżi terzi li ma jikkooperawx fil-ġlieda kontra s-sajd IUU abbażi tal-kriterji elenkati f'dan l-Artikolu. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2)."

12.         fl-Artikolu 33, il-paragrafu 1 huwa sostitwit b’dan li ġej:

"1. Il-Kummissjoni għandha, permezz ta’ atti ta’ implimentazzjoni, tinkludi pajjiżi terzi identifikati skont l-Artikolu 31(1) fuq lista ta' pajjiżi terzi li ma jikkooperawx. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2)."

13.         fl-Artikolu 34, il-paragrafu 1 huwa sostitwit b’dan li ġej:

"1. Il-Kummissjoni għandha, permezz ta’ atti ta’ implimentazzjoni, tneħħi pajjiż terz mil-lista ta' pajjiżi terzi li ma jikkooperawx jekk il-pajjiż terz ikkonċernat juri li s-sitwazzjoni li tat lok għall-elenkar tiegħu tkun ġiet rettifikata. Deċiżjoni għat-tneħħija għandha tikkunsidra wkoll jekk il-pajjiżi terzi identifikati kkonċernati ħadux miżuri konkreti biex ikunu jistgħu jiksbu titjib li jdum fit-tul tas-sitwazzjoni. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2)."

14.         l-Artikolu 36 huwa sostitwit b’dan li ġej:

"Artikolu 36

Miżuri temporanji

1. Jekk ikun hemm evidenza li l-miżuri adottati minn xi pajjiż terz ikunu qed ifixklu l-miżuri ta' konservazzjoni u ġestjoni adottati minn organizzazzjoni reġjonali tal-ġestjoni tas-sajd, il-Kummissjoni tista’ tistabbilixxi, permezz ta' atti ta’ implimentazzjoni u f'konformità mal-obbligi internazzjonali tagħha, miżuri temporanji li ma jdumux iktar minn sitt xhur biex jittaffew l-effetti ta' tali miżuri ta' dawn il-pajjiżi terzi. Il-Kummissjoni tista’ tieħu deċiżjoni ġdida biex testendi dawk il-miżuri ta’ emerġenza għal mhux aktar minn sitt xhur.

2. Il-miżuri temporanji msemmija fil-paragrafu 1 jistgħu jipprovdu li:

(a)     bastimenti tas-sajd awtorizzati li jistadu u li jtajru l-bandiera tal-pajjiż terz ikkonċernat m'għandhomx jingħataw aċċess għall-portijiet tal-Istati Membri, ħlief f'każ ta' force majeure jew jekk ikunu jinsabu f’diffikultà kif imsemmi fl-Artikolu 4(2) għal servizzi strettament neċessarji sabiex jiġu rrimedjati dawk is-sitwazzjonijiet;

(b)     bastimenti tas-sajd li jtajru l-bandiera ta' Stat Membru m'għandhomx jitħallew ikunu involuti f'operazzjonijiet konġunti tas-sajd ma' bastimenti li jtajru l-bandiera tal-pajjiż terz ikkonċernat;

(c)     bastimenti tas-sajd li jtajru l-bandiera ta' Stat Membru m'għandhomx jiġu awtorizzati jistadu f'ilmijiet marittimi taħt il-ġurisdizzjoni tal-pajjiż terz ikkonċernat, mingħajr preġudizzju għad-dispożizzjonijiet stabbiliti fi ftehimiet bilaterali dwar is-sajd;

(d)     il-provvista ta' ħut ħaj għall-akkwakultura fl-ilmijiet marittimi taħt il-ġurisdizzjoni tal-pajjiż terz ikkonċernat m'għandux ikun awtorizzat;

(e)     il-ħut ħaj li jinqabad minn bastimenti tas-sajd li jtajru l-bandiera tal-pajjiż terz ikkonċernat m'għandhomx ikunu aċċettati għall-finijiet tal-akkwakultura f’ilmijiet marittimi taħt il-ġurisdizzjoni ta' Stat Membru.

3. Il-miżuri temporanji għandu jkollhom effett immedjat. Dawn għandhom jiġu nnotifikati lill-Istati Membri u lill-pajjiż terz ikkonċernat u ppubblikati f'Il-Ġurnal Uffiċjali tal-Unjoni Ewropea."

15.         fl-Artikolu 49, il-paragrafu 1 huwa sostitwit b’dan li ġej:

"1. Stati Membri li jiksbu informazzjoni ddokumentata b’mod xieraq rigward bastimenti tas-sajd li jintlemħu għandhom jittrasmettu din l-informazzjoni mingħajr dewmien lill-Kummissjoni jew lill-korp maħtur minnha fil-format iddeterminat permezz ta' atti ta’ implimentazzjoni. Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2)."

16.         fl-Artikolu 51, il-paragrafu 3 huwa sostitwit b’dan li ġej:

"3. Il-Kummissjoni għandha tingħata s-setgħa biex tadotta, permezz ta' atti ta’ implimentazzjoni, regoli dwar l-assistenza reċiproka fir-rigward ta’:

(a)     il-kooperazzjoni amministrattiva bejn l-Istati Membri, il-pajjiżi terzi, il-Kummissjoni u l-korp magħżul minnha, inkluż il-ħarsien tad-dejta personali u użu tal-informazzjoni u l-protezzjoni tas-segretezza professjonali u kummerċjali,

(b)     l-ispejjeż għall-eżekuzzjoni ta’ talbiet għall-għajnuna,

(c)     in-nomina ta' awtorità waħdanija tal-Istati Membri,

(d)     il-komunikazzjoni ta' miżuri ta' segwitu meħuda mill-awtoritajiet nazzjonali wara l-iskambju ta' informazzjoni,

(e)     it-talba għall-għajnuna, inklużi talbiet għal informazzjoni, talbiet għal miżuri u talbiet għal notifiki amministrattivi u l-istabbiliment ta’ dati ta’ skadenzi għal tweġibiet,

(f)      l-informazzjoni mingħajr talba minn qabel u

(g)     ir-relazzjonijiet tal-Istati Membri mal-Kummissjoni u ma' pajjiżi terzi.

Dawk l-atti ta’ implimentazzjoni għandhom jiġu adottati skont il-proċedura ta’ eżami msemmija fl-Artikolu 54(2)."

17.         L-Artikolu 52 huwa mħassar.

18.         L-Artikolu 54 huwa sostitwit b’dan li ġej:

"Artikolu 54 Proċedura tal-Kumitat

1. Il-Kummissjoni għandha tkun megħjuna mill-Kumitat għas-Sajd u l-Akkwakultura stabbilit mill-Artikolu 30 tar-Regolament (KE) Nru 2371/2002. Dak il-kumitat għandu jkun kumitat fit-tifsira tar-Regolament (UE) Nru 182/2011.

2. Meta ssir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.”

19.         għandu jiddaħħal l-Artikolu 54a li ġej:

"Artikolu 54a

Eżerċizzju tad-delega

1.       Is-setgħa tal-adozzjoni ta’ atti ddelegati hija mogħtija lill-Kummissjoni suġġetta għall-kundizzjonijiet stabbiliti f’dan l-Artikolu.

2.       Id-delega tas-setgħat hija msemmija fl-Artikoli 6(3), 9(1), 12(5), 12(6), 16(1), 16(4) u 17(3), u għandha tingħata għal perjodu ta’ żmien indeterminat.

3.       Id-delega ta’ setgħa msemmija fl-Artikoli 6(3), 9(1), 12(5), 12(6), 16(1), 16(4) u 17(3) tista' tiġi rrevokata fi kwalunkwe żmien mill-Parlament Ewropew jew mill-Kunsill. Deċiżjoni ta’ revoka għandha ttemm id-delega ta’ setgħa speċifikata f’dik id-Deċiżjoni. Din għandha tidħol fis-seħħ fil-jum ta’ wara l-pubblikazzjoni tad-Deċiżjoni f’Il-Ġurnal Uffiċjali tal-Unjoni Ewropea jew f’data iktar tard speċifikata fiha. Din ma għandhiex taffettwa l-validità ta’ kwalunkwe att iddelegat li jkun diġà fis-seħħ.

4.       Hekk kif tadotta att iddelegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

5.       Att iddelegat adottat skont l-Artikoli 6(3), 9(1), 12(5), 12(6), 16(1), 16(4) u 17(3) għandu jidħol fis-seħħ biss jekk ma tkun saret l-ebda oġġezzjoni jew mill-Parlament Ewropew jew mill-Kunsill fi żmien xahrejn min-notifika ta' dak l-att lill-Parlament Ewropew u lill-Kunsill jew jekk, qabel ma jagħlaq dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li ma mhumiex se joġġezzjonaw. Dak il-perjodu għandu jkun estiż b'xahrejn fuq l-inizjattiva tal-Parlament Ewropew jew tal-Kunsill."

Artikolu 2

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               ĠU L 286, 29.10.2008.

[2]               ĠU L 55, 28.2.2011, p.13