52012PC0233

MEMORANDUM TA’ SPJEGAZZJONI

1.           Il-kuntest tal-proposta

· Ir-raġunijiet għall-proposta u għanijiet tagħha

Din il-proposta tikkonċerna l-applikazzjoni tar-Regolament tal-Kunsill (KE) Nru 1225/2009 tat-30 ta' Novembru 2009 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Komunità Ewropea ("ir-Regolament bażiku") fil-proċediment li għandu x'jaqsam mal-importazzjonijiet tal-madum taċ-ċeramika li joriġina mir-Repubblika Popolari taċ-Ċina.

· Il-kuntest ġenerali

Din il-proposta qiegħda ssir fil-kuntest tal-implimentazzjoni tar-Regolament bażiku u tirriżulta minn investigazzjoni li saret skont ir-rekwiżiti sostantivi u proċedurali stabbiliti fir-Regolament bażiku.

· Dispożizzjonijiet eżistenti fil-qasam tal-proposta

Ir-Regolament ta' Implimentazzjoni tal-Kunsill (UE) Nru 917/2011 li jimponi dazju antidumping definittiv u biex jinġabar definittivament id-dazju provviżorju impost fuq l-importazzjonijiet tal-madum taċ-ċeramika li joriġina mir-Repubblika Popolari taċ-Ċina.

· Konsistenza ma' politiki u għanijiet oħra tal-Unjoni

Mhux applikabbli.

2.           Il-konsultazzjoni mal-partijiet interessati u l-valutazzjoni tal-impatt

· Il-konsultazzjoni mal-partijiet interessati

Il-partijiet interessati kkonċernati bil-proċediment kellhom iċ-ċans jiddefendu l-interessi tagħhom matul l-investigazzjoni, skont id-dispożizzjonijiet tar-Regolament bażiku.

· Il-ġbir u l-użu tal-ispeċjalizzazzjoni

Ma kienx hemm bżonn ta' speċjalizzazzjoni esterna.

· Il-valutazzjoni tal-impatt

Din il-proposta tirriżulta mill-implimentazzjoni tar-Regolament bażiku.

Ir-Regolament bażiku ma jagħmilx dispożizzjonijiet għal valutazzjoni ġenerali tal-impatt iżda fih lista eżawrjenti ta' kundizzjonijiet li jeħtieġ li jiġu vvalutati.

3.           ELEMENTI ĠURIDIĊI TAL-PROPOSTA

· Is-sommarju tal-azzjoni proposta

Il-proposta mehmuża għal Regolament tal-Kunsill hija bbażata fuq is-sejba definittiva li produttur esportatur Ċiniż wieħed issodisfa l-kriterji kollha biex jingħata l-istatus ta' produttur esportatur ġdid, u għaldaqstant għandu jkun soġġett għad-dazju antidumping medju peżat ta' 30,6 %.

· Bażi legali

Ir-Regolament tal-Kunsill (KE) Nru 1225/2009 tat-30 ta' Novembru 2009 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Komunità Ewropea.

Ir-Regolament ta' Implimentazzjoni tal-Kunsill (UE) Nru 917/2011 li jimponi dazju antidumping definittiv u biex jinġabar definittivament id-dazju provviżorju impost fuq l-importazzjonijiet tal-madum taċ-ċeramika li joriġina mir-Repubblika Popolari taċ-Ċina.

· Il-prinċipju tas-sussidjarjetà

Il-proposta taqa' fil-kompetenza esklużiva tal-Unjoni Ewropea. Għaldaqstant, il-prinċipju tas-sussidjarjetà ma japplikax.

· Il-prinċipju tal-proporzjonalità

Il-proposta hija konformi mal-prinċipju tal-proporzjonalità għar-raġunijiet li ġejjin:

Il-forma tal-azzjoni hija deskritta fir-Regolament bażiku msemmi hawn fuq u ma tħallix lok għal deċiżjoni nazzjonali.

Mhix applikabbli indikazzjoni ta' kif il-piż finanzjarju u amministrattiv li jaqa' fuq l-Unjoni, il-gvernijiet nazzjonali, l-awtoritajiet reġjonali u lokali, l-operaturi ekonomiċi u ċ-ċittadini jitnaqqas kemm jista jkun u jkun proporzjonat mal-għan tal-proposta.

· L-għażla tal-istrumenti

L-istrumenti proposti: regolament.

Mezzi oħra ma jkunux xierqa minħabba r-raġuni li ġejja:

Mezzi oħrajn ma jkunux xierqa minħabba li r-Regolament bażiku ma jipprevedix għażliet alternattivi.

4.           L-IMPLIKAZZJONI BAĠITARJA

Il-proposta ma għandha l-ebda implikazzjoni għall-baġit tal-Unjoni.

2012/0117 (NLE)

Proposta għal

REGOLAMENT TAL-KUNSILL

li jemenda r-Regolament ta' Implimentazzjoni tal-Kunsill (UE) Nru 917/2011 li jimponi dazju antidumping definittiv u biex jinġabar definittivament id-dazju provviżorju impost fuq l-importazzjonijiet tal-madum taċ-ċeramika li joriġina mir-Repubblika Popolari taċ-Ċina, billi jżid kumpanija mal-lista ta' produtturi mir-Repubblika Popolari taċ-Ċina elenkati fl-Anness I

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (KE) Nru 1225/2009 tat-30 ta' Novembru 2009 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Komunità Ewropea[1] (ir-Regolament bażiku), u b'mod partikolari l-Artikolu 9 tiegħu,

Wara li kkunsidra r-Regolament ta' Implimentazzjoni tal-Kunsill (UE) Nru 917/2011[2] li jimponi dazju antidumping definittiv u biex jinġabar definittivament id-dazju provviżorju impost fuq l-importazzjonijiet tal-madum taċ-ċeramika li joriġina mir-Repubblika Popolari taċ-Ċina ("ir-Regolament ta' Implimentazzjoni tal-Kunsill (UE) Nru 917/2011") u b'mod partikolari l-Artikolu 3 tiegħu,

Wara li kkunsidra l-proposta mressqa mill-Kummissjoni Ewropea ("il-Kummissjoni") wara li kkonsultat mal-Kumitat Konsultattiv,

Billi:

A. IL-PROĊEDURA PREĊEDENTI

(1)       Bir-Regolament ta' Implimentazzjoni (UE) Nru 917/2011, il-Kunsill impona dazju antidumping definittiv fuq l-importazzjonijiet lejn l-Unjoni tal-madum taċ-ċeramika li joriġina mir-Repubblika Popolari taċ-Ċina ("iċ-Ċina"). Minħabba n-numru kbir ta' produtturi esportaturi fiċ-Ċina li kkoperaw fl-investigazzjoni li wasslet għall-impożizzjoni tad-dazju antidumping ("l-investigazzjoni oriġinali"), intgħażel kampjun ta' produtturi esportaturi Ċiniżi u ġew imposti rati individwali tad-dazju li jvarjaw minn 26,3 % għal 36,5 % fuq il-kumpaniji inklużi fil-kampjun, filwaqt li kumpaniji oħra li kkoperaw imma li mhumiex inklużi fil-kampjun ingħataw rata tad-dazju ta' 30,6 %. Ġiet imposta rata tad-dazju ta' 69,7 % fuq il-kumpaniji Ċiniżi l-oħra kollha.

(2)       L-Artikolu 3 tar-Regolament ta' Implimentazzjoni tal-Kunsill (UE) Nru 917/2011 jistipula li fejn xi produttur esportatur ġdid fiċ-Ċina jagħti biżżejjed evidenza lill-Kummissjoni li:

· ma esportax lejn l-Unjoni l-prodotti deskritti fl-Artikolu 1(1) ta' dak ir-Regolament matul il-perjodu ta' investigazzjoni (l-1 ta' April 2009 sal-31 ta' Marzu 2010) ("il-perjodu tal-investigazzjoni") (l-ewwel kriterju);

· mhu relatat mal-ebda wieħed mill-esportaturi jew produtturi fiċ-Ċina li huma soġġetti għall-miżuri antidumping imposti minn dan ir-Regolament (it-tieni kriterju); u

· filfatt esporta lejn l-Unjoni l-prodotti kkonċernati wara l-perjodu tal-investigazzjoni li fuqu huma bbażati l-miżuri, jew daħal f'obbligu kuntrattwali irrevokabbli biex jesporta kwantità sinifikanti lejn l-Unjoni (it-tielet kriterju);

għalhekk l-Artikolu 1(2) ta' dan ir-Regolament jista' jiġi emendat billi l-produttur esportatur il-ġdid jingħata r-rata tad-dazju applikabbli, jiġifieri 30,6 %, għall-kumpaniji li jikkoperaw u li mhumiex inklużi fil-kampjun.

B. TALBA TA' PRODUTTUR ESPORTATUR ĠDID

(3)       Kumpanija Ċiniża ("l-applikant") applikat biex tingħata l-istess trattament bħall-kumpaniji li kkoperaw fl-investigazzjoni oriġinali u li mhumiex inklużi fil-kampjun ("trattament lil produttur esportatur ġdid").

(4)       Sar eżami biex jiġi stabbilit jekk l-applikant jissodisfax il-kriterji għall-għoti ta' trattament ta' produttur esportatur ġdid kif stipulati fl-Artikolu 3 tar-Regolament ta' Implimentazzjoni tal-Kunsill (UE) Nru 917/2011.

(5)       Intbagħat kwestjonarju lill-applikant li kien intalab jagħti evidenza biex juri li huwa ssodisfa t-tliet kriterji msemmija hawn fuq.

(6)       L-evidenza mogħtija mill-produttur esportatur Ċiniż tqieset biżżejjed biex turi li huwa jissodisfa l-kriterji stipulati fl-Artikolu 3 tar-Regolament ta' Implimentazzjoni tal-Kunsill (UE) Nru 917/2011. Għalhekk dan il-produttur esportatur jista' jingħata r-rata tad-dazju applikabbli għall-kumpaniji li jikkoperaw u li mhumiex inklużi fil-kampjun, (jiġifieri 30,6 %) u minħabba f'hekk ismu jista' jiżdied mal-lista ta' produtturi esportaturi fl-Anness I tar-Regolament ta' Implimentazzjoni tal-Kunsill (UE) Nru 917/2011.

(7)       L-applikant u l-industrija tal-Unjoni ġew mgħarrfa bis-sejbiet tal-eżami u ngħataw l-opportunità li jibagħtu l-kummenti tagħhom.

(8)       L-argumenti u s-sottomissjonijiet kollha li għamlu l-partijiet interessati ġew analizzati u ngħataw l-attenzjoni mistħoqqa fejn meħtieġ,

ADOTTA DAN IR-REGOLAMENT:

Artikolu 1

Il-kumpanija li ġejja għandha tiżdied mal-lista ta' produtturi mir-Repubblika Popolari taċ-Ċina elenkati fl-Anness I tar-Regolament ta' Implimentazzjoni tal-Kunsill (UE) Nru 917/2011.

Isem || Kodiċi addizzjonali TARIC

Onna Ceramic Industries (iċ-Ċina) Co., Ltd. || B293

Artikolu 2

Dan ir-Regolament għandu jidħol fis-seħħ l-għada tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 343, 22.12.2009, p. 51.

[2]               ĠU L 238, 15.9.2011, p. 1.