52012PC0038

MEMORANDUM TA’ SPJEGAZZJONI

1.           Il-kuntest tal-proposta

110 || · Raġunijiet u għanijiet tal-proposta B’segwitu għas-sentenzi tal-Qorti tal-Ġustizzja fl-hekk imsejħa każijiet “Open Skies”, fil-5 ta’ Ġunju 2003, il-Kunsill ta mandat lill-Kummissjoni biex tiftaħ negozjati ma’ pajjiżi terzi dwar il-bdil ta’ ċerti dispożizzjonijiet fi ftehimiet eżistenti bi ftehim fil-livell tal-Unjoni[1] (il-“mandat orizzontali”). L-għanijiet ta’ dawn il-ftehimiet huma li jagħtu aċċess mhux diskriminatorju lit-trasportaturi kollha tal-ajru tal-Unjoni Ewropea għar-rotot bejn l-Unjoni Ewropea u l-pajjiżi terzi, u sabiex il-ftehimiet bilaterali dwar is-servizzi tal-ajru bejn l-Istati Membri u l-pajjiżi terzi jinġiebu f’konformità mal-liġi tal-Unjoni.

120 || · Il-kuntest ġenerali Ir-relazzjonijiet fil-qasam tal-avjazzjoni internazzjonali bejn l-Istati Membri u l-pajjiżi terzi tradizzjonalment kienu rregolati permezz ta’ ftehimiet bilaterali dwar is-servizzi tal-ajru bejn l-Istati Membri u l-pajjiżi terzi, l-Annessi għal dawn il-ftehimiet u arranġamenti bilaterali jew multilaterali relatati oħra. Il-klawżoli tradizzjonali ta’ ħatra fil-ftehimiet bilaterali tal-Istati Membri dwar is-servizzi tal-ajru jiksru l-liġi tal-Unjoni. Dawn jippermettu lill-pajjiż terz li jirrifjuta, jirtira jew jissospendi l-permessi jew l-awtorizzazzjonijiet ta’ trasportatur tal-ajru li kien maħtur minn Stat Membru iżda li mhux sostanzjalment sjieda ta’ dak l-Istat Membru u effettivament ikkontrollat minnu jew miċ-ċittadini tiegħu. Instab li dan jikkostitwixxi diskriminazzjoni kontra t-trasportaturi Komunitarji stabbiliti fit-territorju ta’ Stat Membru iżda li jkunu sjieda u kkontrollati minn ċittadini ta’ Stat Membru ieħor. Dan imur kontra l-Artikolu 49 tat-Trattat dwar il-Funzjonament tal-Unjoni Ewropea li jiggarantixxi liċ-ċittadini ta’ Stati Membri, li jkunu eżerċitaw il-libertà tagħhom tal-istabbiliment tal-istess trattament fl-Istat Membru ospitanti bħal dak mogħti liċ-ċittadini ta’ dak l-Istat Membru.

130 || · Dispożizzjonijiet eżistenti fil-qasam tal-proposta Id-dispożizzjonijiet tal-Ftehim jieħdu post jew jikkumplimentaw id-dispożizzjonijiet eżistenti fil-ħmistax-il ftehim bilaterali dwar is-servizzi tal-ajru bejn l-Istati Membri u r-Repubblika Demokratika Soċjalista tas-Sri Lanka.

140 || · Konsistenza ma’ politiki u għanijiet oħrajn tal-Unjoni Il-Ftehim se jaqdi għan fundamentali tal-politika esterna dwar l-avjazzjoni tal-Unjoni billi jġib il-ftehimiet bilaterali eżistenti dwar is-servizzi tal-ajru konformi mal-liġi tal-Unjoni.

2.           Konsultazzjoni mal-partijiet interessati u l-valutazzjoni tal-impatt

|| · Konsultazzjoni mal-partijiet interessati

211 || Il-metodi ta’ konsultazzjoni, is-setturi ewlenin indirizzati u l-profil ġenerali ta’ dawk li jwieġbu Sew l-Istati Membri kif ukoll l-industrija ġew ikkonsultati matul in-negozjati.

212 || Sommarju tat-tweġibiet u ta’ kif tqiesu Il-kummenti li saru mill-Istati Membri u mill-industrija ġew ikkunsidrati.

3.           Elementi legali tal-proposta

305 || · Sommarju tal-azzjoni proposta Skont il-mekkaniżmi u d-direttivi fl-Anness għall-“mandat orizzontali”, il-Kummissjoni nnegozjat ftehim mar-Repubblika Demokratika Soċjalista tas-Sri Lanka li jissostitwixxi ċerti dispożizzjonijiet fil-ftehimiet bilaterali eżistenti dwar is-servizzi tal-ajru bejn l-Istati Membri u r-Repubblika Demokratika Soċjalista tas-Sri Lanka. L-Artikolu 2 tal-Ftehim jieħu post il-klawżoli tradizzjonali ta’ ħatra bi klawżola ta’ ħatra tal-UE, li tippermetti lit-trasportaturi kollha tal-ajru tal-UE li jibbenefikaw mid-dritt tal-istabbiliment. L-Artikolu 4 isolvi kunflitti potenzjali mar-regoli tal-KE dwar il-kompetizzjoni tal-Unjoni.

310 || · Bażi legali Art. 100(2) flimkien ma’ 218(5) u (8) tat-TFUE

329 || · Il-prinċipju tas-sussidjarjetà Il-proposta tissejjes kollha kemm hi fuq il-“mandat orizzontali” mogħti mill-Kunsill b’kunsiderazzjoni għall-kwistjonijiet koperti mil-liġi tal-Unjoni u l-ftehimiet bilaterali dwar is-servizzi tal-ajru.

|| · Il-prinċipju tal-proporzjonalità Il-Ftehim ser jemenda jew jikkomplementa d-dispożizzjonijiet fil-ftehimiet bilaterali dwar is-servizzi tal-ajru sa fejn ikun meħtieġ biss sabiex tkun żgurata l-konformità mal-liġi tal-Unjoni.

|| · Għażla tal-istrumenti

342 || Il-Ftehim bejn l-Unjoni u r-Repubblika Demokratika Soċjalista tas-Sri Lanka huwa l-aktar strument effiċjenti biex il-ftehimiet bilaterali eżistenti kollha dwar is-servizzi tal-ajru bejn l-Istati Membri u r-Repubblika Demokratika Soċjalista tas-Sri Lanka jikkonformaw mal-liġi tal-Unjoni.

4.           Implikazzjoni baġitarja

409 || Il-proposta ma għandha l-ebda implikazzjoni fuq il-baġit tal-Unjoni.

5.           Informazzjoni addizzjonali

510 || · Simplifikazzjoni

511 || Il-proposta tipprovdi għas-simplifikazzjoni tal-leġiżlazzjoni.

512 || Id-dispożizzjonijiet rilevanti tal-ftehimiet bilaterali dwar is-servizzi tal-ajru bejn l-Istati Membri u r-Repubblika Demokratika Soċjalista tas-Sri Lanka se jiġu ssostitwiti jew ikkumplementati minn dispożizzjonijiet fi ftehim waħdieni tal-Unjoni.

570 || · Spjegazzjoni dettaljata tal-proposta Skont il-proċedura standard għall-iffirmar u l-konklużjoni ta’ ftehimiet internazzjonali, il-Kunsill huwa mitlub japprova d-deċiżjonijiet dwar l-iffirmar u l-konklużjoni tal-Ftehim bejn l-Unjoni Ewropea u r-Repubblika Demokratika Soċjalista tas-Sri Lanka dwar ċerti aspetti tas-servizzi tal-ajru u jaħtar il-persuni awtorizzati biex jiffirmaw il-Ftehim f’isem l-Unjoni.

2012/0017 (NLE)

Proposta għal

DEĊIŻJONI TAL-KUNSILL

dwar l-iffirmar, f’isem l-Unjoni Ewropea, u applikazzjoni provviżorja tal-Ftehim dwar ċerti aspetti tas-servizzi tal-ajru bejn l-Unjoni Ewropea u r-Repubblika Demokratika Soċjalista tas-Sri Lanka

IL-KUNSILL TAL-UNJONI EWROPEA,

Wara li kkunsidra t-Trattat dwar il-funzjonament tal-Unjoni Ewropea, u b’mod partikolari l-Artikolu 100(2), flimkien mal-Artikolu 218(5) u (8), l-ewwel paragrafu tiegħu,

Wara li kkunsidra l-proposta mill-Kummissjoni Ewropea[2],

Billi:

(1) Bid-Deċiżjoni tiegħu tal-5 ta’ Ġunju 2003, il-Kunsill awtorizza lill-Kummissjoni sabiex tiftaħ negozjati ma’ pajjiżi terzi dwar is-sostituzzjoni ta’ ċerti dispożizzjonijiet fil-ftehimiet bilaterali eżistenti bi ftehim fil-livell tal-Unjoni,

(2) F’isem l-Unjoni, il-Kummissjoni nnegozjat Ftehim dwar ċerti aspetti tas-servizzi tal-ajru mar-Repubblika Demokratika Soċjalista tas-Sri Lanka (minn hawn ’il quddiem “il-Ftehim”) skont il-mekkaniżmi u d-direttivi fl-Anness għad-Deċiżjoni tal-Kunsill tal-5 ta’ Ġunju 2003,

(3) Soġġett għall-konklużjoni tiegħu f’data aktar tard, il-Ftehim għandu jiġi ffirmat u applikat provviżorjament mill-Unjoni.

ADOTTA DIN ID-DEĊIŻJONI:

Artikolu 1

(1) L-iffirmar tal-Ftehim bejn l-Unjoni Ewropea u r-Repubblika Demokratika Soċjalista tas-Sri Lanka dwar ċerti aspetti tas-servizzi tal-ajru huwa b’dan approvat f’isem l-Unjoni, soġġett għall-konklużjoni tal-Ftehim.

It-test tal-Ftehim huwa mehmuż ma’ din id-Deċiżjoni.

(2) Is-Segretarjat Ġenerali tal-Kunsill għandu jistabbilixxi l-istrument tas-setgħat kollha biex jiffirma l-Ftehim, soġġett għall-konklużjoni tiegħu, għall-persuna/i indikata/i min-negozjatur tal-Ftehim.

Artikolu 2

Sa ma jidħol fis-seħħ, il-Ftehim għandu jiġi applikat provviżorjament, skont l-Artikolu 7(2) tal-Ftehim, mid-data meta jiġi ffirmat.

Artikolu 3

Din id-Deċiżjoni għandha tidħol fis-seħħ fid-data tal-adozzjoni tagħha.

Artikolu 4

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

Magħmula fi Brussel,

                                                                       Għall-Kunsill

                                                                       Il-President

ANNESS

FTEHIM

bejn l-Unjoni Ewropea u l-Gvern tar-Repubblika Demokratika Soċjalista tas-Sri Lanka

dwar ċerti aspetti tas-servizzi tal-ajru

L-UNJONI EWROPEA,

(minn hawn ’il quddiem “l-Unjoni”)

minn naħa, u

IL-GVERN TAR-REPUBBLIKA DEMOKRATIKA SOĊJALISTA TAS-SRI LANKA, (minn hawn ’il quddiem “is-Sri Lanka”),

min-naħa l-oħra,

(minn hawn ’il quddiem ‘il-Partijiet’)

FILWAQT LI JINNUTAW li ġew konklużi ftehimiet bilaterali dwar is-servizzi tal-ajru bejn diversi Stati Membri tal-Unjoni u s-Sri Lanka.

FILWAQT LI JAGĦRFU li dispożizzjonijiet tal-ftehim għal servizzi bilaterali tal-ajru bejn Stati Membri tal-Unjoni Ewropea u r-Repubblika Demokratika Soċjalista tas-Sri Lanka, li huma kontra l-liġi tal-Unjoni, iridu jinġiebu f’konformità sħiħa ma’ dawn sabiex tiġi stabbilita bażi legali tajba għas-servizzi tal-ajru bejn l-Unjoni u r-Repubblika Demokratika Soċjalista tas-Sri Lanka u biex tiġi ppreżervata l-kontinwità ta’ dawn is-servizzi tal-ajru,

FILWAQT LI JINNUTAW li l-Unjoni għandha l-kompetenza esklussiva fir-rigward ta’ bosta aspetti li jistgħu jiġu inklużi fi ftehimiet bilaterali dwar is-servizzi tal-ajru bejn l-Istati Membri tal-Unjoni u pajjiżi terzi,

FILWAQT LI JINNUTAW li, skont il-liġi tal-Unjoni, it-trasportaturi tal-ajru Komunitarji stabbiliti f’xi wieħed mill-Istati Membri għandhom id-dritt għal aċċess mhux diskriminatorju għar-rotot tal-ajru bejn l-Istati Membri tal-Unjoni u pajjiżi terzi,

FILWAQT LI KKUNSIDRAW il-ftehimiet bejn l-Unjoni u ċerti pajjiżi terzi li jipprovdu l-possibbiltà għaċ-ċittadini ta’ dawn il-pajjiżi terzi (pajjiżi elenkati fl-Anness 3) li jiksbu d-dritt tas-sjieda fi trasportaturi tal-ajru liċenzjati skont il-liġi tal-Unjoni,

FILWAQT LI JINNUTAW li, skont il-liġi tal-Unjoni, it-trasportaturi tal-ajru fil-prinċipju ma jistgħux jikkonkludu ftehimiet li jistgħu jaffettwaw il-kummerċ bejn l-Istati Membri tal-Unjoni u li jkollhom bħala l-għan jew l-effett tagħhom li jipprevjenu, jgħawġu jew jirrestrinġu l-kompetizzjoni.

FILWAQT LI JAGĦRFU li d-dispożizzjonijiet fil-ftehimiet bilaterali dwar is-servizzi tal-ajru konklużi bejn l-Istati Membri tal-Unjoni u s-Sri Lanka li i) jirrikjedu jew jiffavorixxu l-adozzjoni ta’ ftehimiet bejn impriżi, deċiżjonijiet minn assoċjazzjonijiet ta’ impriżi jew prattiki miftiehma li jipprevjenu, jgħawġu jew jirrestrinġu l-kompetizzjoni bejn it-trasportaturi tal-ajru fuq ir-rotot rilevanti; jew (ii) isaħħu l-effetti ta’ kwalunkwe ftehim, deċiżjoni jew prattika miftiehma ta’ dan it-tip; jew iii) jiddelegaw lit-trasportaturi tal-ajru jew lill-operaturi ekonomiċi privati oħra r-responsabbiltà għat-teħid ta’ miżuri li jipprevjenu, jgħawġu jew jirrestrinġu l-kompetizzjoni bejn it-trasportaturi tal-ajru fuq ir-rotot rilevanti jistgħu jrendu r-regoli tal-kompetizzjoni applikabbli għall-impriżi ineffettivi.

FILWAQT LI JAGĦRFU li fejn Stat Membru jkun ħatar trasportatur tal-ajru li l-kontroll regolatorju tiegħu f’dak li għandu x’jaqsam mas-sorveljanza ta-sigurtà huwa eżerċitat u miżmum minn Stat Membru ieħor, id-drittijiet tas-Sri Lanka skont id-dispożizzjonijiet tas-Sigurtà tal-Ftehim bejn l-Istat Membru li ħatar it-trasportatur u s-Sri Lanka, għandhom japplikaw bl-istess mod fir-rigward ta’ dak l-Istat Membru l-ieħor,

FILWAQT LI JINNUTAW li l-istrumenti ta’ ftehim bilaterali dwar is-servizzi tal-ajru elenkati fl-Anness 1 huma msejsa fuq il-prinċipju ġenerali li t-trasportaturi tal-ajru maħtura tal-partijiet għandu jkollhom opportunitajiet ġusti u ndaqs fl-operat tas-servizzi maqbula fuq ir-rotot speċifikati.

FILWAQT LI JINNUTAW li mhuwiex għan ta’ dan il-ftehim li jiżdied il-volum totali ta’ traffiku tal-ajru bejn l-Unjoni u s-Sri Lanka, sabiex jiġi affettwat il-bilanċ bejn trasportaturi tal-ajru tal-Unjoni u trasportaturi tal-ajru tas-Sri Lanka, jew li jiġu nnegozjati emendi għad-dispożizzjonijiet li diġà jeżistu ta’ ftehimiet bilaterali għal servizzi tal-ajru dwar drittijiet tat-traffiku.

FTIEHMU KIF ĠEJ:

ARTIKOLU 1

Dispożizzjonijiet ġenerali

(1) Għall-finijiet ta’ dan il-Ftehim, l-“Istati Membri” għandha tfisser l-Istati Membri tal-Unjoni Ewropea u t-“Trattati tal-UE” għandha tfisser it-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea.

(2) Ir-referenzi f’kull wieħed mill-ftehimiet elenkati fl-Anness 1 għaċ-ċittadini tal-Istat Membru li huwa parti minn dak il-ftehim għandhom jinftehmu bħala referenzi għaċ-ċittadini tal-Istati Membri.

(3) Ir-referenzi f’kull wieħed mill-ftehimiet elenkati fl-Anness 1 għat-trasportaturi tal-ajru jew għal-linji tal-ajru tal-Istat Membru li huwa parti minn dak il-ftehim għandhom jinftehmu bħala referenzi għat-trasportaturi tal-ajru jew għal-linji tal-ajru maħtura minn dak l-Istat Membru.

(4) L-għoti ta’ drittijiet tat-traffiku se jkompli jsir permezz ta’ arranġamenti bilaterali.

ARTIKOLU 2

Ħatra minn Stat Membru

(1) Id-dispożizzjonijiet fil-paragrafi 2 u 3 ta’ dan l-Artikolu għandhom jieħdu post id-dispożizzjonijiet korrispondenti fl-artikoli elenkati fl-Anness 2(a) u (b) rispettivament, f’dak li għandu x’jaqsam mal-ħatra tat-trasportaturi tal-ajru mill-Istat Membru kkonċernat, l-awtorizzazzjonijiet u l-permessi tiegħu mogħtija mis-Sri Lanka, u r-rifjut, ir-revoka, is-sospensjoni jew il-limitazzjoni tal-awtorizzazzjonijiet jew il-permessi tat-trasportaturi tal-ajru, rispettivament.

(2) Malli tirċievi ħatra mingħand Stat Membru, is-Sri Lanka għandha tagħti l-awtorizzazzjonijiet u l-permessi meħtieġa bl-anqas dewmien proċedurali, sakemm:

(a) it-trasportatur tal-ajru jkun stabbilit, skont it-Trattati tal-UE, fit-territorju tal-Istat Membru li jkun qed jaħtru u għandu Liċenzja Operattiva valida skont il-liġi tal-Unjoni; kif ukoll

(b) kontroll effettiv regolatorju tat-trasportatur tal-ajru jiġi eżerċitat u miżmum mill-Istat Membru responsabbli mill-ħruġ taċ-Ċertifikat tal-Operatur tal-Ajru tiegħu u l-awtorità ajrunawtika rilevanti tkun identifikata b’mod ċar fil-ħatra; kif ukoll

(c) it-trasportatur tal-ajru jkun sjieda, direttament jew permezz ta’ sehem azzjonarju maġġoritarju, u jkun ikkontrollat effettivament mill-Istati Membri u/jew miċ-ċittadini tal-Istati Membri, u/jew mill-istati l-oħra elenkati fl-Anness 3 u/jew miċ-ċittadini ta’ stati oħra bħal dawn u għandu, il-ħin kollu jkun ikkontrollat b’mod effettiv minn tali stat u/jew ċittadini.

(3) Is-Sri Lanka tista’ tirrifjuta, tirrevoka, tissospendi jew tillimita l-awtorizzazzjonijiet jew il-permessi ta’ trasportatur tal-ajru maħtur minn Stat Membru meta:

(a) it-trasportatur tal-ajru ma jkunx stabbilit, skont it-Trattati tal-UE, fit-territorju tal-Istat Membru li jkun qed jaħtru jew ma għandux Liċenzja Operattiva valida f’konformità mal-leġiżlazzjoni tal-liġi tal-Unjoni; jew

(b) ma jiġix eżerċitat jew miżmum kontroll regolatorju effettiv tat-trasportatur tal-ajru mill-Istat Membru responsabbli għall-ħruġ taċ-Ċertifikat tal-Operatur tal-Ajru tiegħu, jew l-awtorità ajrunawtika rilevanti ma tkunx identifikata b’mod ċar fil-ħatra; jew

(c) it-trasportatur tal-ajru ma jkunx sjieda, direttament jew permezz ta’ sjieda maġġoritarja, u ma jkunx ikkontrollat effettivament mill-Istati Membri u/jew miċ-ċittadini tal-Istati Membri, u/jew mill-istati l-oħra elenkati fl-Anness 3 u/jew miċ-ċittadini ta’ dawn l-istati l-oħra; jew

(d) it-trasportatur tal-ajru jkun diġà awtorizzat li jopera skont ftehim bilaterali bejn is-Sri Lanka u xi Stat Membru ieħor u billi jeżerċita d-drittijiet tat-traffiku skont dan il-Ftehim fuq rotta li tinkludi punt f’dak l-Istat Membru l-ieħor, dan ikun qed jevita r-restrizzjonijiet fuq id-drittijiet tat-traffiku imposti minn dak il-ftehim l-ieħor; jew

(e) it-trasportatur tal-ajru maħtur ikollu diġà Ċertifikat tal-Operatur tal-Ajru maħruġ minn Stat Membru li s-Sri Lanka ma tkunx laħqet ftehim bilaterali miegħu dwar is-servizzi tal-ajru u liema Stat Membru jkun ċaħad id-drittijiet tat-traffiku għas-Sri Lanka.

Waqt li teżerċita d-dritt tagħha skont dan il-paragrafu, is-Sri Lanka ma għandhiex tiddiskrimina bejn it-trasportaturi tal-ajru tal-Komunità abbażi tan-nazzjonalità.

ARTIKOLU 3

Sikurezza

(1) Id-dispożizzjonijiet fil-paragrafu 2 ta’ dan l-Artikolu għandhom jikkomplementaw id-dispożizzjonijiet korrispondenti fl-artikoli elenkati fl-Anness 2(c).

(2) Fejn Stat Membru jkun maħtur trasportatur tal-ajru li l-kontroll regolatorju tiegħu huwa mħaddem u miżmum minn Stat Membru ieħor, id-drittijiet tas-Sri Lanka skont id-dispożizzjonijiet ta’ sikurezza tal-ftehim bejn l-Istat Membru li ħatar it-trasportatur tal-ajru u s-Sri Lanka għandhom japplikaw b’mod ugwali fir-rigward tal-adozzjoni, it-tħaddim jew iż-żamma tal-istandards tas-sikurezza minn dak l-Istat Membru l-ieħor u fir-rigward tal-awtorizzazzjoni għall-operat ta’ dak it-trasportatur tal-ajru.

ARTIKOLU 4

Il-kompatibbiltà mar-regoli tal-kompetizzjoni

(1) Minkejja kull dispożizzjoni oħra għall-kuntrarju, xejn f’kull wieħed mill-ftehimiet elenkati fl-Anness 1 ma għandu (i) jeħtieġ jew jiffavorixxi l-adozzjoni ta’ ftehimiet bejn impriżi, deċiżjonijiet minn assoċjazzjonijiet ta’ impriżi jew prattiki miftiehma li jipprevjenu jew jgħawġu l-kompetizzjoni; (ii) isaħħu l-effetti ta’ kwalunkwe ftehim, deċiżjoni jew prattika kkonċertata bħal din; jew (iii) jiddelega għand operaturi ekonomiċi privati r-responsabbiltà għat-teħid ta’ miżuri li jipprevjenu, jgħawġu jew jirrestrinġu l-kompetizzjoni.

(2) Id-dispożizzjonijiet fil-ftehimiet elenkati fl-Anness 1 li mhumiex kompatibbli mal-paragrafu 1 ta’ dan l-Artikolu ma għandhomx jiġu applikati.

ARTIKOLU 5

L-Annessi għal dan il-Ftehim

L-Annessi għal dan il-Ftehim għandhom jiffurmaw parti integrali minnu.

ARTIKOLU 6

Evalwazzjoni, reviżjoni jew emendi

Il-Partijiet jistgħu, f’kull ħin, jevalwaw, jirrevedu jew jemendaw dan il-Ftehim b’kunsens reċiproku.

ARTIKOLU 7

Id-dħul fis-seħħ u l-applikazzjoni provviżorja

(1) Dan il-Ftehim għandu jidħol fis-seħħ meta l-Partijiet ikunu nnotifikaw lil xulxin bil-miktub li l-proċeduri interni rispettivi tagħhom li jkunu meħtieġa għad-dħul fis-seħħ tiegħu jkunu tlestew.

(2) Minkejja paragrafu 1, il-Partijiet jaqblu li japplikaw provviżorjament dan il-Ftehim mid-data li jiġi ffirmat sakemm jidħol fis-seħħ.

(3) Dan il-Ftehim għandu japplika għall-ftehimiet u l-arranġamenti l-oħra elenkati fl-Anness 1 inklużi dawk li, fid-data tal-iffirmar ta’ dan il-Ftehim, ma jkunux għadhom daħlu fis-seħħ u li ma jkunux qed jiġu applikati provviżorjament.

ARTIKOLU 8

It-terminazzjoni

(1) Fil-każ li ftehim elenkat fl-Anness 1 jiġi tterminat, id-dispożizzjonijiet kollha ta’ dan il-Ftehim li għandhom x’jaqsmu mal-ftehim ikkonċernat elenkat fl-Anness 1 għandhom jiġu tterminati fl-istess ħin.

(2) Fil-każ li l-ftehimiet kollha elenkati fl-Anness 1 jiġu tterminati, dan il-Ftehim għandu jiġi tterminat fl-istess ħin.

B’XHIEDA TA’ DAN, il-firmatarji, awtorizzati kif jixraq, iffirmaw dan il-Ftehim.

Magħmul fi [...] f’żewġ kopji, fil-[...] jum ta’ [..., ...] bil-lingwa Sinhala, Bulgara, Ċeka, Daniża, Olandiża, Ingliża, Estonjana, Finlandiża, Franċiża, Ġermaniża, Griega, Ungeriża, Taljana, Latvjana, Litwana, Maltija, Pollakka, Portugiża, Rumena, Slovakka, Slovena, Spanjola u Svediża, bit-testi kollha jkunu ugwalment awtentiċi.

GĦALL-UNJONI EWROPEA:           GĦALL-GVERN TAR-REPUBBLIKA DEMOKRATIKA SOĊJALISTA TAS-SRI LANKA:  

Anness 1

Lista ta’ ftehimiet imsemmija fl-Artikolu 1 ta’ dan il-Ftehim

Ftehimiet tas-servizzi tal-ajru u ftehimiet oħra bejn is-Sri Lanka u l-Istati Membri kif modifikati jew emendati li, dakinhar tal-iffirmar ta’ dan il-Ftehim, kienu ġew konklużi, iffirmati jew mibdija;

– Ftehim dwar it-Trasport bl-Ajru bejn il-Gvern Federali Awstrijak u l-Gvern tar-Repubblika Demokratika Soċjalista tas-Sri Lanka magħmul f’Colombo fil-15 ta’ Frar 1978, minn hawn ’il quddiem imsejjaħ “Il-Ftehim bejn is-Sri Lanka u l-Awstrija” fl-Anness 2;

– Ftehim bejn il-Gvern tar-Renju tal-Belġju u l-Gvern tar-Repubblika Demokratika Soċjalista tas-Sri Lanka dwar it-Trasport bl-Ajru magħmul fi Brussell fil-15 ta’ Diċembru 1998, minn hawn ’il quddiem imsejjaħ “Il-Ftehim bejn is-Sri Lanka u l-Belġju” fl-Anness 2;

– Ftehim dwar it-Trasport bl-Ajru bejn il-Gvern tar-Repubblika ta’ Ċipru u l-Gvern tar-Repubblika Demokratika Soċjalista tas-Sri Lanka mibdi f’Colombo fil-15 ta’ Novembru 2002, minn hawn ’il quddiem imsejjaħ il-“Ftehim bejn is-Sri Lanka u Ċipru” fl-Anness 2;

– Ftehim bejn il-Gvern tar-Repubblika Ċeka u l-Gvern tar-Repubblika Demokratika Soċjalista tas-Sri Lanka dwar Servizzi tal-Ajru, magħmul fi Praga fl-20 ta’ April 2004, minn hawn ’il quddiem imsejjaħ “il-Ftehim bejn is-Sri Lanka u r-Repubblika Ċeka” fl-Anness 2;

– Ftehim bejn il-Gvern tad-Danimarka u l-Gvern ta’ Ceylon dwar Servizzi tal-Ajru magħmul f’Colombo fid-29 ta’ Mejju 1959, minn hawn ’il quddiem imsejjaħ “il-Ftehim bejn is-Sri Lanka u d-Danimarka” fl-Anness 2;

– Ftehim bejn ir-Repubblika ta’ Franza u Ceylon dwar it-Trasport bl-Ajru magħmul f’Colombo fit-18 ta’ April 1966, minn hawn ’il quddiem imsejjaħ “il-Ftehim bejn is-Sri Lanka u Franza” fl-Anness 2;

– Ftehim dwar it-Trasport bl-Ajru bejn ir-Repubblika Federali tal-Ġermanja u r-Repubblika tas-Sri Lanka magħmul f’Colombo fl-24 ta’ Lulju 1973, minn hawn ’il quddiem imsejjaħ “il-Ftehim bejn is-Sri Lanka u l-Ġermanja” fl-Anness 2;

– Ftehim fuq it-Trasport bl-Ajru bejn il-Gvern tar-Repubblika Ellenika u l-Gvern tar-Repubblika Demokratika Soċjalista tas-Sri Lanka mibdi f’Ateni fil-5 ta’ Novembru 2002, minn hawn ’il quddiem imsejjaħ “il-Ftehim bejn is-Sri Lanka u l-Greċja” fl-Anness 2;

– Ftehim bejn il-Gvern tar-Repubblika Taljana u l-Gvern ta’ Ceylon dwar Servizzi tal-Ajru magħmul f’Colombo fl-1 ta’ Ġunju 1959, minn hawn ’il quddiem imsejjaħ “il-Ftehim bejn is-Sri Lanka u l-Italja” fl-Anness 2;

– Ftehim bejn il-Gvern tar-Renju tal-Pajjiżi l-Baxxi u l-Gvern ta’ Ceylon għal Servizzi tal-Ajru bejn u ’l hinn mit-territorji rispettivi tagħhom magħmul f’Colombo fl-14 ta’ Settembru 1953, minn hawn ’il quddiem imsejjaħ “il-Ftehim bejn is-Sri Lanka u l-Pajjiżi l-Baxxi” fl-Anness 2;

– Ftehim bejn il-Gvern tar-Repubblika Popolari Pollakka u l-Gvern tar-Repubblika Demokratika Soċjalista tas-Sri Lanka għal Servizzi tal-Ajru bejn u ’l hinn mit-territorji rispettivi tagħhom magħmul f’Colombo fis-26 ta’ Jannar 1982 minn hawn ’il quddiem imsejjaħ “il-Ftehim bejn is-Sri Lanka u l-Polonja” fl-Anness 2;

– Ftehim bejn ir-Repubblika Soċjalista tar-Rumanija u l-Gvern tar-Repubblika Demokratika Soċjalista tas-Sri Lanka dwar Servizzi tal-Ajru magħmul f’Colombo fid-29 ta’ Awwissu 1980 minn hawn ’il quddiem imsejjaħ “il-Ftehim bejn is-Sri Lanka u r-Rumanija” fl-Anness 2;

– Ftehim bejn il-Gvern tal-Isvezja u l-Gvern ta’ Ceylon dwar Servizzi tal-Ajru magħmul f’Colombo fid-29 ta’ Mejju 1959 minn hawn ’il quddiem imsejjaħ “il-Ftehim bejn is-Sri Lanka u l-Isvezja” fl-Anness 2;

– Ftehim bejn il-Gvern tar-Renju Unit tal-Gran Brittanja u l-Irlanda ta’ Fuq u l-Gvern tar-Repubblika Demokratika Soċjalista tas-Sri Lanka dwar Servizzi tal-Ajru magħmul f’Colombo fit-22 ta’ April 1998, kif emendat, minn hawn ’il quddiem imsejjaħ “il-Ftehim bejn is-Sri Lanka u r-Renju Unit” fl-Anness 2.

Anness 2

Lista tal-Artikoli fil-ftehimiet elenkati fl-Anness 1 u msemmija fl-Artikoli 2 sa 4 ta’ dan il-Ftehim

(a) Ħatra minn Stat Membru:

– Artikolu 3, tal-Ftehim bejn is-Sri Lanka u l-Awstrija;

– Artikolu 3, tal-Ftehim bejn is-Sri Lanka u l-Belġju;

– Artikolu 4, tal-Ftehim bejn is-Sri Lanka u Ċipru;

– Artikolu 3, tal-Ftehim bejn is-Sri Lanka u r-Repubblika Ċeka;

– Artikolu 2, tal-Ftehim bejn is-Sri Lanka u d-Danimarka;

– Artikolu 3, tal-Ftehim bejn is-Sri Lanka u Franza;

– Artikolu 3, paragrafu 4 tal-Ftehim bejn is-Sri Lanka u l-Ġermanja;

– Artikolu 3, tal-Ftehim bejn is-Sri Lanka u l-Greċja;

– Artikolu 4, Paragrafi 1 sa 3 tal-Ftehim bejn is-Sri Lanka u l-Italja;

– Artikolu 2, tal-Ftehim bejn is-Sri Lanka u l-Pajjiżi l-Baxxi;

– Artikolu 3, tal-Ftehim bejn is-Sri Lanka u l-Polonja;

– Artikolu 3, tal-Ftehim bejn is-Sri Lanka u r-Rumanija;

– Artikolu 2, tal-Ftehim bejn is-Sri Lanka u l-Isvezja;

– Artikolu 4, tal-Ftehim bejn is-Sri Lanka u r-Renju Unit;

(b) Ir-rifjut, ir-revoka, is-sospensjoni jew il-limitazzjoni tal-awtorizzazzjonijiet jew tal-permessi:

– Artikolu 4, tal-Ftehim bejn is-Sri Lanka u l-Awstrija;

– Artikolu 5, tal-Ftehim bejn is-Sri Lanka u l-Belġju;

– Artikolu 5, tal-Ftehim bejn is-Sri Lanka u Ċipru;

– Artikolu 4, tal-Ftehim bejn is-Sri Lanka u r-Repubblika Ċeka;

– Artikolu 6, tal-Ftehim bejn is-Sri Lanka u d-Danimarka;

– Artikolu 3, paragrafu 4 u Artikolu 4, tal-Ftehim bejn is-Sri Lanka u Franza;

– Artikolu 4, paragrafu 1, tal-Ftehim bejn is-Sri Lanka u l-Ġermanja;

– Artikolu 4, tal-Ftehim bejn is-Sri Lanka u l-Greċja;

– Artikolu 4, Paragrafi 4 sa 6 tal-Ftehim bejn is-Sri Lanka u l-Italja;

– Artikolu 3, tal-Ftehim bejn is-Sri Lanka u l-Pajjiżi l-Baxxi;

– Artikolu 3, tal-Ftehim bejn is-Sri Lanka u r-Rumanija;

– Artikolu 6, tal-Ftehim bejn is-Sri Lanka u l-Isvezja;

– Artikolu 5, tal-Ftehim bejn is-Sri Lanka u r-Renju Unit;

(c) Sikurezza:

– Artikolu 7, tal-Ftehim bejn is-Sri Lanka u l-Awstrija;

– Artikolu 7, tal-Ftehim bejn is-Sri Lanka u l-Belġju;

– Artikolu 10, tal-Ftehim bejn is-Sri Lanka u Ċipru;

– Artikolu 7, tal-Ftehim bejn is-Sri Lanka u r-Repubblika Ċeka;

– Artikolu 4, tal-Ftehim bejn is-Sri Lanka u d-Danimarka;

– Artikolu 7, tal-Ftehim bejn is-Sri Lanka u l-Greċja;

– Artikolu 7, tal-Ftehim bejn is-Sri Lanka u l-Polonja;

– Artikolu 7, tal-Ftehim bejn is-Sri Lanka u r-Rumanija;

– Artikolu 4, tal-Ftehim bejn is-Sri Lanka u l-Isvezja;

Anness 3

Lista ta' stati oħra msemmija fl-Artikolu 2 ta' dan il-Ftehim

(a) Ir-Repubblika tal-Islanda (skont il-Ftehim dwar iż-Żona Ekonomika Ewropea);

(b) Il-Prinċipat tal-Liechtenstein (skont il-Ftehim dwar iż-Żona Ekonomika Ewropea);

(c) Ir-Renju tan-Norveġja (skont il-Ftehim dwar iż-Żona Ekonomika Ewropea);

(d) Il-Konfederazzjoni Svizzera (skont il-Ftehim bejn il-Komunità Ewropea u l-Konfederazzjoni Svizzera dwar it-Trasport bl-Ajru).

[1]               Id-Deċiżjoni tal-Kunsill 11323/03 tal-5 ta’ Ġunju 2003 (dokument ristrett)

[2]               ĠU C , , p. .