This document is an excerpt from the EUR-Lex website
Document 52012DC0571
COMMUNICATION FROM THE COMMISSION TO THE COUNCIL AND THE EUROPEAN PARLIAMENT on the comprehensive risk and safety assessments ("stress tests") of nuclear power plants in the European Union and related activities
KOMUNIKAZZJONI MILL-KUMMISSJONI LILL-KUNSILL U LILL-PARLAMENT EWROPEW dwar ir-riskju komprensiv u l-valutazzjonijiet tas-sikurezza (“testijiet ta’ reżistenza”) tal-impjanti tal-enerġija nukleari fl-Unjoni Ewropea u attivitajiet relatati
KOMUNIKAZZJONI MILL-KUMMISSJONI LILL-KUNSILL U LILL-PARLAMENT EWROPEW dwar ir-riskju komprensiv u l-valutazzjonijiet tas-sikurezza (“testijiet ta’ reżistenza”) tal-impjanti tal-enerġija nukleari fl-Unjoni Ewropea u attivitajiet relatati
/* COM/2012/0571 final */
KOMUNIKAZZJONI MILL-KUMMISSJONI LILL-KUNSILL U LILL-PARLAMENT EWROPEW dwar ir-riskju komprensiv u l-valutazzjonijiet tas-sikurezza (“testijiet ta’ reżistenza”) tal-impjanti tal-enerġija nukleari fl-Unjoni Ewropea u attivitajiet relatati /* COM/2012/0571 final */
KOMUNIKAZZJONI MILL-KUMMISSJONI
LILL-KUNSILL U LILL-PARLAMENT EWROPEW dwar ir-riskju komprensiv u
l-valutazzjonijiet tas-sikurezza (“testijiet ta’ reżistenza”) tal-impjanti
tal-enerġija nukleari fl-Unjoni Ewropea u attivitajiet relatati 1. Introduzzjoni Fil-preżent hemm 132 reattur nukleari
joperaw fl-UE, iggruppati fuq 58 sit. Ir-rekord tas-sikurezza tagħhom
huwa tali li għalkemm fil-passat kien hemm inċidenti u għadu
jkun hemm, madankollu qatt ma kien hemm inċidenti maġġuri.
Filwaqt li r-rekord kumplessiv tas-sikurezza għalhekk huwa tajjeb,
il-fiduċja taċ-ċittadini tal-UE fl-industrija nukleari Ewropea
tiddependi fuq it-titjib kontinwu tal-qafas tas-sikurezza u s-sigurtà nukleari
tal-UE, sabiex ikun żgurat li dan jibqa’ l-iktar effettiv fid-dinja,
abbażi tal-ogħla standards tas-sikurezza. L-isfidi li jaffaċċaw is-sikurezza
nukleari u l-governanza tagħha ħarġu aktar fil-beraħ wara
l-aċċident tar-reatturi ta’ Fukushima fil-Ġappun wara t-terremot
u t-tsunami ta’ Marzu 2011. Dan l-avveniment wera li r-reatturi nukleari
jridu jkunu protetti anke minn aċċidenti li jkunu ġew ivvalutati
bħala improbabbli ħafna. L-avvenimenti f’Fukushima żvelaw
kwistjonijiet magħrufa sew u rikorrenti: disinn difettuż, sistemi
ta’ backup insuffiċjenti, żball uman, pjanijiet ta’ kontinġenza
inadegwati, u komunikazzjonijiet dgħajfa. L-UE trid
titgħallem mill-esperjenza ta’ Fukushima biex tkompli tnaqqas ir-riskju
tal-inċidenti nukleari fl-Ewropa. L-aċċident ta' Fukushima rriżulta
fi sforzi mingħajr preċedent biex tiġi rieżaminata s-sikurezza
tal-installazzjonijiet nukleari fl-Ewropa u madwar id-dinja. L-inizjattivi
ttieħdu fil-livelli nazzjonali, reġjonali u internazzjonali. Fl-UE, il-Kunsill Ewropew, f’Marzu tal-2011[1] ikkonkluda li “s-sikurezza
tal-impjanti nukleari kollha tal-UE għandha tiġi rieżaminata,
abbażi ta’ valutazzjoni tar-riskji u s-sikurezza komprensiva u trasparenti
(“testijiet ta’ reżistenza”); il-Grupp ta' Regolaturi Ewropew dwar
is-Sikurezza Nukleari (ENSREG) u l-Kummissjoni qed jiġu mistiedna
jiżviluppaw kemm jista' jkun malajr l-ambitu u l-modalitajiet ta' dawn
it-testijiet f'qafas koordinat fid-dawl tal-esperjenza mill-aċċident
fil-Ġappun u bl-involviment sħiħ tal-Istati Membri, permezz ta’
użu sħiħ tal-għarfien espert (notevolment
mill-Assoċjazzjoni tar-Regolaturi Nukleari tal-Ewropa tal-Punent);
il-valutazzjonijiet se jsiru minn awtoritajiet nazzjonali indipendenti u
permezz ta’ evalwazzjoni bejn il-pari; l-eżitu tagħhom u kwalunkwe
miżura sussegwenti neċessarja li se tittieħed għandhom
jiġu kondiviżi mal-Kummissjoni u fi ħdan l-ENSREG u
għandhom isiru disponibbli pubblikament.” Barra minn hekk, il-Kunsill
Ewropew talab lill-Kummissjoni biex tistieden lill-pajjiżi ġirien
tal-UE biex jipparteċipaw fil-proċess tat-testijiet ta’ reżistenza,
biex “iwettqu rieżami tal-qafas legali u regolatorju eżistenti
għas-sikurezza tal-installazzjonijiet nukleari" u biex
"sal-aħħar tal-2011 jipproponu kwalunkwe titjib li jista' jkun
neċessarju". Permezz tal-kooperazzjoni mill-qrib bejn
l-operaturi tal-impjanti, ir-regolaturi nukleari u l-Kummissjoni t-testijiet
ta’ reżistenza setgħu jitwettqu fl-2011 u l-2012. Il-Kummissjoni issa
tista’ tirreaġixxi għall-mandat tal-Kunsill Ewropew b’dan ir-rapport
li jidentifika l-konklużjonijiet u r-rakkomandazzjonijiet tal-Kummissjoni
bbażati fuq it-testijiet ta’ reżistenza u l-attivitajiet relatati.
Tikkunsidra wkoll id-dimensjoni internazzjonali tas-sikurezza u s-sigurtà
nukleari u tispjega kif il-qafas tas-sikurezza nukleari fl-UE jista’ jittejjeb,
billi tagħti importanza lin-natura dinamika tas-sikurezza nukleari:
it-titjib tas-sikurezza nukleari mhux eżerċizzju ta’ darba, irid
jiġi rieżaminat u aġġornat kontinwament. Fuq kollox,
tlaqqa’ l-fergħat kollha tal-eżerċizzju ta’ rieżami
bil-ħsieb li tiżviluppa proposti leġiżlattivi,
nonleġiżlattivi u ta’ proġetti. Dawn il-miżuri kollha
jfittxu li jtejbu s-sikurezza tal-impjanti u l-governanza relatata fil-livelli
tal-UE u nazzjonali, u li jippromwovu l-valuri tal-UE għas-sikurezza u
s-sigurtà nukleari fil-kuntest internazzjonali. Id-dettalji dwar is-sejbiet tekniċi u
l-metodoloġija tat-testijiet ta’ reżistenza jinsabu ppreżentati
fid-Dokument ta’ Ħidma tal-Persunal tal-Kummissjoni li jakkumpanjaha. 2. Il-proċess,
is-sejbiet ewlenin u s-segwitu immedjat għall-valutazzjonijiet tar-riskji
u s-sikurezza 2.1. Rieżami mingħajr
preċedent tas-sikurezza u s-sigurtà nukleari B'rispons għall-aċċident ta’
Fukushima u l-mandat sussegwenti mogħti mill-Kunsill Ewropew
lill-Kummissjoni, twettqu ħafna attivitajiet f’livelli differenti b’mod
parallel. Dawn jinsabu ppreżentati fil-qosor hawn taħt. Filwaqt li l-ENSREG u l-Kummissjoni żviluppaw
il-kamp ta’ applikazzjoni u l-modalitajiet tat-testijiet, il-valutazzjoni
tas-sikurezza tal-impjanti nukleari taqa’ taħt ir-responsabbiltà
tal-operaturi nukleari u r-regolaturi nazzjonali li pparteċipaw
fit-testijiet ta’ reżistenza fuq bażi volontarja. Il-Kummissjoni
ma tistax tiggarantixxi s-sikurezza u s-sigurtà nukleari tal-installazzjonijiet
nukleari, peress li r-responsabbiltà legali tibqa’ fil-livell nazzjonali. Il-konklużjonijiet
kollha f’din il-Komunikazzjoni jeħtieġ li jinqraw f’dan l-isfond. Il-valutazzjonijiet tas-sikurezza mmexxija minn ENSREG It-testijiet ta’ reżistenza ġew definiti
bħala rivalutazzjoni mmirata tal-marġnijiet tas-sikurezza tan-NPPs
fid-dawl tat-tagħlimiet mill-avvenimenti f'Fukushima marbuta ma’
avvenimenti naturali estremi li jisfidaw il-funzjonijiet tas-sikurezza
tal-impjanti. It-testijiet ġew organizzati billi ġiet ikkunsidrata
kif xieraq id-distribuzzjoni tal-kompetenzi fost il-partijiet interessati varji
fil-qasam tas-sikurezza nukleari[2].
L-erbatax-il Stat Membru kollha tal-UE li joperaw impjanti tal-enerġija
nukleari[3]
flimkien mal-Litwanja[4]
ipparteċipaw f’dawn il-valutazzjonijiet fuq bażi volontarja. Il-132
reattur nukleari[5]
li joperaw fl-UE huma bbażati fuq teknoloġiji u tipi differenti,
iżda fil-maġġoranza huma Reatturi tal-Ilma taħt Pressjoni
(PWR), Reatturi tal-Ilma Jagħli (BWR) jew reatturi mkessħa bil-gass.
It-testijiet ta’ reżistenza inbdew b’awtovalutazzjonijiet li twettqu minn
operaturi nukleari u t-tħejjija ta’ rapporti nazzjonali minn regolaturi
nazzjonali f’konformità mar-responsabbiltajiet tan-NPPs. It-timijiet
tal-evalwazzjoni bejn il-pari li fil-biċċa l-kbira kienu
magħmula minn esperti mill-Istati Membri, bl-appoġġ
tal-Kummissjoni Ewropea, żaru 23 sit, fejn ikkunsidraw it-tip ta'
reattur kif ukoll il-lok ġeografiku. Iż-żjarat tat-timijiet
f’siti magħżula f’kull pajjiż ġew organizzati sabiex
isaħħu l-implimentazzjoni tat-testijiet ta’ reżistenza,
mingħajr ma jinterferixxu fir-responsabbiltajiet tal-awtoritajiet
nazzjonali fil-qasam tal-ispezzjonijiet tas-sikurezza nukleari, li organizzaw
spezzjonijiet ta’ kull impjant tal-enerġija nukleari (NPP) li jopera fl-UE
wara l-aċċident ta’ Fukushima. L-informazzjoni dwar kull NPP tinsab
fid-Dokument ta’ Ħidma tal-Persunal tal-Kummissjoni li jakkumpanjaha kif
ukoll ir-referenzi tiegħu għal informazzjoni magħmula
disponibbli mill-operaturi tal-impjanti, ir-regolaturi nazzjonali jew l-ENSREG
globalment. Wara l-preżentazzjoni tar-Rapport Interim
tal-Kummissjoni[6],
twettaq proċess estensiv ta’ evalwazzjoni bejn il-pari madwar l-UE kollha
minn Jannar sa April 2012. Dan ipproduċa rapport ġenerali mill-Bord
ta' Evalwazzjoni bejn il-Pari tal-ENSREG, approvat mill-ENSREG, u sbatax-il
rapport individwali nazzjonali[7]
b’rakkomandazzjonijiet dettaljati. F’Lulju, l-ENSREG qabel dwar Pjan ta’
Azzjoni bħala segwitu għall-implimentazzjoni tar-rakkomandazzjonijiet
tal-evalwazzjoni bejn il-pari. Huwa abbażi ta’ dan li s-sejbiet u
r-rakkomandazzjonijiet deskritti f’din il-Komunikazzjoni huma fformulati. Ħidma fuq is-sigurtà nukleari
mill-Kunsill (Grupp Ad Hoc dwar is-Sigurtà Nukleari, AHGNS) Ġie stabbilit grupp ġdid ad hoc
fil-Kunsill biex jindirizza kwistjonijiet marbutin mas-sigurtà tal-impjanti
tal-enerġija nukleari. Il-grupp iltaqa’ regolarment minn Settembru 2011, u
tmexxa mill-Presidenza Pollakka u l-Presidenza Daniża. Kien magħmul
minn esperti tas-sigurtà mill-Istati Membri u l-Kummissjoni kienet
assoċjata mill-qrib. Bil-kuntrarju
tal-valutazzjonijiet tas-sikurezza tal-ENSREG, l-AHGNS ma ħarisx lejn
l-installazzjonijiet individwali iżda vvaluta l-istat tas-sigurtà nukleari
fl-UE kollha kemm hi, billi ħares lejn il-metodoloġija
għall-evalwazzjoni u l-protezzjoni tal-impjanti tal-enerġija nukleari
inkluż il-miżuri ta' prevenzjoni. L-AHGNS ħeġġeġ l-iskambju
tal-prattiki eżistenti u identifika titjib metodoloġiku possibbli,
billi prinċipalment uża prattiki tajbin fil-gwida eżistenti
tal-Aġenzija Internazzjonali tal-Enerġija Atomika (IAEA). Ikkonkluda
xogħlu f’Mejju 2012. Involviment tal-pajjiżi ġirien tal-EU fil-proċess L-Isvizzera, l-Ukraina u l-Kroazja
pparteċipaw b’mod sħiħ fit-testijiet ta’ reżistenza tal-UE
u fil-proċess ta’ evalwazzjoni bejn il-pari, filwaqt li pajjiżi
ġirien oħrajn (eż. it-Turkija[8],
il-Bjelorussja u l-Armenja[9])
li qablu li jaħdmu abbażi tal-istess metodoloġija, qed
jaħdmu fuq skedi taż-żmien differenti. Il-Federazzjoni Russa
wkoll wettqet valutazzjonijiet mill-ġdid u identifikat miżuri ta’
titjib fl-NPPs tagħha, billi użat il-metodoloġija tagħha
stess. L-Isvizzera hija kompletament impenjata li ssegwi r-rakkomandazzjonijiet
tat-testjijet tal-istress, filwaqt li l-Ukraina inkludiet is-sejbiet
tat-testijiet ta’ reżistenza fil-programm ta’ modernizzazzjoni
tal-impjanti tal-enerġija nukleari tagħha. Il-Kummissjoni tapprezza
dawn l-isforzi biex jikkonverġu għall-approċċ tal-UE f’dan
il-qasam. Valutazzjoni tal-Kummissjoni tal-qafas istituzzjonali u legali Lil hinn mir-rieżami tas-sikurezza
tal-impjanti, il-Kummissjoni vvalutat l-arkitettura istituzzjonali u l-qafas legali
għas-sikurezza nukleari fl-Ewropa, billi kkunsidrat il-Pjan ta’ Azzjoni
tal-IAEA[10]
u l-eżitu tad-diskussjonijiet internazzjonali dwar il-Konvenzjoni
tas-Sikurezza Nukleari. Identifikat
lakuni u l-aqwa prattiki li jistgħu jiġu indirizzati jew inklużi
fil-leġiżlazzjoni tal-UE abbażi tal-bilanċ eżistenti
tal-kompetenzi, fl-estensjoni tal-kollaborazzjoni fost l-Istati Membri jew
fl-implimentazzjoni tal-programmi eżistenti tal-UE. Effetti ta’ kraxxjaturi tal-inġenji tal-ajru Fi ħdan dan l-eżerċizzju ta’ rieżami
ġew ikkunsidrati avvenimenti li jistgħu jaffettwaw kemm is-sikurezza
kif ukoll is-sigurtà tal-impjanti tal-enerġija nukleari, bħal meta
jikkraxxja inġenju tal-ajru. L-effetti ta’ kraxxjatura ta’
inġenju tal-ajru fuq is-sikurezza tal-impjanti tal-enerġija nukleari
huma koperti fl-ispeċifikazzjoni tat-testijiet ta’ reżistenza
tal-ENSREG. Fir-rigward tas-sigurtà, ir-rapport AHGNS jidentifika
prattiki tajbin li għandhom jiġu segwiti mill-Istati Membri
fil-prevenzjoni ta’ inġenji tal-ajru kkraxxjati apposta biex jagħmlu
l-ħsara. Fil-25 ta’ Settembru 2012,
il-Kummissjoni organizzat seminar "Is-Sikurezza tal-Impjanti
tal-Enerġija Nukleari kontra l-Impatti tal-Inġenji tal-Ajru” li
kien immirat lejn l-ammeljorament tas-sikurezza tal-impjanti u l-esplorazzjoni ta’
metodi alternattivi ta’ protezzjoni. Il-parteċipanti kienu
jinkludu awtoritajiet regolatorji tas-sikurezza tal-Istati Membri kif ukoll
kontribuzzjonijiet minn esperti Amerikani u Ġappuniżi. L-esperti
mistiedna kkunsidraw il-karatteristiki tal-impjanti eżistenti u d-disinji
l-ġodda separatament. Tħejjija għal emerġenza barra mis-sit Matul il-fażi tal-evalwazzjoni bejn il-pari
tat-testijiet ta’ reżistenza tas-sikurezza xi NGOs talbu li l-ambitu ta’
dawn it-testijiet ta’ reżistenza jiġi estiż
għat-tħejjija għal emerġenza barra mis-sit. Fl-UE,
47 impjant tal-enerġija nukleari b’111-il reattur għandhom aktar
minn 100 000 abitant jgħixu f’ċirku ta’ 30 km. Dan juri li
l-miżuri ta’ prevenzjoni barra mis-sit huma ta’ importanza primarja. Ir-responsabbiltà għal miżuri bħal dawn hija
kondiviża bejn diversi awtoritajiet nazzjonali, reġjonali u lokali. Il-Kummissjoni, bl-appoġġ tal-ENSREG,
qed tniedi studju mmirat li jipprovdi stampa tal-arranġamenti attwali,
billi jiffoka fuq ir-reġjuni transfruntieri fl-UE u li jagħmel
ir-rakkomandazzjonijiet skont il-bżonn. Ir-riżultati huma mistennija sal-aħħar tal-2013. Kooperazzjoni fil-qafas tal-organizzazzjonijiet internazzjonali Il-Partijiet Kontraenti tal-Konvenzjoni dwar
is-Sikurezza Nukleari kellhom Laqgħa Straordinarja f’Awwissu 2012 biex
jirrevedu l-effettività tagħha u l-adattament kontinwu. Il-Kummissjoni
ppreparat rapport f’isem il-Komunità Euratom[11]
u ngħatat mandat mill-Istati Membri fil-Kunsill biex tinnegozja titjib
fl-implimentazzjoni tal-Konvenzjoni kif ukoll proposti ta’ emendi li ġew
mitluba minn Partijiet Kontraenti oħrajn. 2.2. Sejbiet mill-valutazzjonijiet
tas-sikurezza u mir-rieżami istituzzjonali u legali Is-sejbiet huma deskritti fid-dettall fid-Dokument
ta’ Ħidma tal-Persunal tal-Kummissjoni li jakkumpanja din
il-Komunikazzjoni. Il-kunsiderazzjonijiet ewlenin għal kull
suġġett jingħataw fil-qosor fil-paragrafi li ġejjin. 2.2.1. Sejbiet dwar il-miżuri
ta’ sikurezza fl-NPPs eżistenti Abbażi tat-testijiet ta’ reżistenza,
ir-regolaturi nazzjonali kkonkludew li ma hemmx raġunijiet tekniċi li
jirrikjedu l-għeluq ta’ xi NPP fl-Ewropa, kif ukoll identifikaw serje ta’
prattiki tajba. Il-Kummissjoni ma
għandhiex is-setgħa li tagħmel valutazzjonijiet ta’ dan it-tip. Madankollu, prattikament in-NPPs kollha
jeħtieġ li jtejbu s-sikurezza, għaliex ġew identifikati
mijiet ta’ miżuri ta’ ammeljorament tekniku. Wara l-aċċidenti
ta’ Three Mile Island u Chernobyl, ġew maqbula globalment miżuri ta’
protezzjoni tal-impjanti nukleari. It-testijiet ta’ reżistenza wrew
madankollu li f’ħafna każijiet l-implimentazzjoni ta’ dawk
il-miżuri għadha pendenti. L-Anness jaċċenna r-rakkomandazzjonijiet
prinċipali identifikati fl-eżerċizzju tat-testijiet ta’
reżistenza. Fid-Dokument ta’ Ħidma tal-Persunal hemm provdut iktar
dettall dwar it-titjib meħtieġ u dwar il-prattiki t-tajba għal
kull NPP. Eżempji ta’ sejbiet sinifikanti: F’erbgħa
(4) reatturi (li jinsabu f’żewġ pajjiżi differenti), hemm inqas
minn siegħa (1) disponibbli għall-operaturi biex jirrestawraw
il-funzjonijiet tas-sikurezza fil-każ ta’ telf totali tal-enerġija
elettrika u/jew tal-provvista tal-ilma li tkessaħ is-sistema nukleari
(ultimate heat sink). F’għaxar
(10) reatturi, l-istrumentazzjoni sismika fuq is-sit għadha ma ġietx
installata. Erbgħa
(4) pajjiżi attwalment joperaw sistemi ta’ sikurezza addizzjonali li huma
kompletament indipendenti mis-sistemi ta’ sikurezza normali, li jinsabu
f’żoni li huma protetti sew kontra l-avvenimenti esterni (eż. sistemi
f’bunker jew sistemi ta’ sikurezza ħafna iżjed robusti). Pajjiż
ieħor, il-ħames wieħed, qed jikkunsidra din l-għażla. It-tagħmir
mobbli, speċjalment ġeneraturi li jaħdmu bid-diżil li huma
meħtieġa fil-każ ta’ telf totali tal-enerġija, avvenimenti
esterni jew sitwazzjonijiet ta’ aċċidenti severi, huma diġà
disponibbli f’seba’ (7) pajjiżi, u se jiġu installati f’ħafna
mill-oħrajn. Is-seminar dwar il-kraxxjaturi tal-inġenji
tal-ajru żvela l-eżistenza ta’ differenzi sinifikanti
fl-approċċi nazzjonali biex jindirizzaw il-valutazzjoni
tal-implikazzjonijiet tas-sikurezza fir-rigward tan-NPPs eżistenti u
ġodda: Ir-rekwiżiti tad-disinn għan-NPPs
ġodda jirrikjedu li – wara impatt ta’ inġenju tal-ajru kbir – ma jrid
ikun hemm l-ebda rilaxx barra mill-konteniment. Għal raġunijiet
storiċi, is-sitwazzjoni hija differenti għan-NPPs eżistenti, u
l-metodoloġiji applikati u l-implikazzjonijiet żviluppati mhumiex
neċessarjament koerenti u konsistenti madwar l-Istati Membri. Il-parteċipanti saħqu fuq il-bżonn
li tinżamm separazzjoni ċara fir-rigward tal-kwistjonijiet
tas-sigurtà minħabba l-livell differenti ta' responsabbiltà u trasparenza
istituzzjonali vis-à-vis il-pubbliku. 2.2.2. Sejbiet dwar il-proċeduri
u l-oqfsa tas-sikurezza It-testjijet tal-istress aċċennaw l-aqwa
prattiki kif ukoll in-nuqqasijiet tal-Istati Membri. Dawn jingħataw
fid-dettall fid-Dokument ta’ Ħidma tal-Persunal. Il-kwistjonijiet ewlenin
li ġejjin irriżultaw mit-testjiet tal-istress u minn rapporti
oħrajn dwar l-investigazzjonijiet ta’ Fukushima[12]: ·
Hemm nuqqas ta’ konsistenza fir-rigward
tal-valutazzjoni u l-ġestjoni ta’ perikli esterni għas-sikurezza
tal-impjanti. Pereżempju, il-gwida
tal-Aġenzija Internazzjonali tal-Enerġija Atomika
għat-tagħbiji siżmiċi jew il-linji giwda għal
għargħar mhumiex implimentati mill-Istati Membri kollha (l-ewwel
rakkomandazzjoni tal-Bord tal-evalwazzjoni bejn il-pari ta' ENSREG, ara 2.3.2).
·
L-ambitu u r-reqqa tal-Valutazzjoni
tas-Sikurezza Probabbilistika (PSA) użati biex
jikkaratterizzaw is-sikurezza tar-reatturi nukleari jvarjaw b’mod sinifikanti u
f’xi Stati Membri hemm ħtieġa urġenti biex jinġiebu
f’konformità mal-istandards internazzjonali aċċettati. ·
Il-Linji Gwida dwar il-Ġestjoni ta’
Aċċidenti Severi (SAMGs) li jkopru t-tipi ta’ sitwazzjonijiet
kollha jridu jkunu disponibbli għall-NPPs kollha. It-testijiet ta’
reżistenza urew li s-SAMGs jeħtieġ li jiġu
aġġornati u implimentati kompletament mill-aktar fis possibbli
f'għadd ta' Stati Membri. ·
Huwa meħtieġ titjib fil-kultura
tas-sikurezza. Hemm lakuni fl-iżgurar ta’
identifikazzjoni kompresiva u trasparenti u ġestjoni tal-kwistjonijiet
tas-sikurezza ewlenin. Lezzjoni kiefra minn Fukushima hija li l-periklu
tat-tsunami kien sottovalutat, l-aktar minħabba fatturi umani,
sistemiċi u organizzattivi. 2.2.3. Sejbiet dwar il-qafas legali
għas-sikurezza u l-implimentazzjoni tiegħu Ġew identifikati għadd ta’
dgħufijiet fil-qafas tas-sikurezza nukleari eżistenti fil-livell
Ewropew u tal-Istati Membri. ·
Is-sejbiet ewlenin huma marbuta mad-differenzi
kontinwi bejn l-Istati Membri li jirriżultaw fin-nuqqas ta’
approċċ konsistenti għar-regolamentazzjoni tas-sikurezza
nukleari. Ma jeżistux mekkaniżmi tal-UE kodifikati li
jaqblu dwar standards tekniċi u modi kif jitwettqu r-rieżamijiet
tas-sikurezza. Id-Direttiva dwar is-Sikurezza Nukleari ma għandhiex
dispożizzjonijiet dwar dan. ·
Id-dispożizzjonijiet li jkopru l-indipendenza
tal-awtoritajiet regolatorji nazzjonali u l-mezzi biex tkun żgurata
l-effettività tagħhom huma minimi u mhux neċessarjament
suffiċjenti għall-prevenzjoni ta' sitwazzjonijiet fejn
ir-responsabbiltà regolatorja hija maqsuma bejn diversi entitajiet jew hija
inkluża direttament fil-Ministeri (Ekonomija, Ambjent, eċċ.). Barra
minn hekk, il-katalgu eżistenti tal-kompetenzi regolatorji mhux
espliċitu b'mod suffiċjenti. ·
It-trasparenza hija essenzjali biex
jiġi żgurat li jintużaw l-aqwa prattiki tas-sikurezza possibbli,
kif muri mit-testijiet ta’ reżistenza. Madankollu, id-Direttiva
tas-Sikurezza Nukleari fiha biss rekwiżiti ġeneriċi dwar
l-informazzjoni pubblika. ·
Il-mekkaniżmi ta’ monitoraġġ u
verifika fil-livell tal-UE huma limitati
għall-evalwazzjoni bejn il-pari tal-qafas tas-sikurezza nukleari
nazzjonali. 2.3. Rakkomondazzjonijiet ewlenin
mit-testijiet ta’ reżistenza dwar is-sikurezza 2.3.1. Rakkomandazzjonijiet dwar
il-miżuri tas-sikurezza fl-NPPs eżistenti Id-Dokument ta’ Ħidma tal-Persunal jipprovdi deskrizzjoni
ġenerali dwar l-għadd ta’ miżuri tas-sikurezza
meħtieġa f’impjanti tal-enerġija nukleari individwali. Segwitu: Il-pajjiżi parteċipanti kollha bdew
jieħdu passi operattivi biex itejbu s-sikurezza tal-impjanti tagħhom.
Dawn il-miżuri jinkludu tagħmir mobbli addizzjonali
għall-prevenzjoni jew it-taffija ta' aċċidenti severi,
l-installazzjoni ta' tagħmir fiss iktar robust, u t-titjib
tal-ġestjoni ta' aċċidenti severi, flimkien ma' miżuri ta'
taħriġ xieraq tal-persunal. L-ispejjeż tat-titjib addizzjonali
tas-sikurezza huma stmati li jvarjaw bejn EUR 30 miljun u
EUR 200 miljun għal kull unità ta’ reattur. Għalhekk,
l-ispejjeż totali għall-132 reattur li joperaw fl-UE jistgħu
jkunu bejn EUR 10 biljun u EUR 25 biljun
għall-unitajiet kollha tan-NPP fl-UE fis-snin li ġejjin. Dawn
iċ-ċifri huma bbażati fuq stimi ppubblikati mill-awtorità
tas-sikurezza nukleari Franċiża (li tkopri iktar minn terz
tar-reatturi tal-UE) u huma suġġetti għal konferma fil-pjanijiet
ta' azzjoni nazzjonali. F’konformità mad-Dikjarazzjoni Konġunta
maħruġa mill-Kummissjoni u l-ENSREG
fil-25 ta’ April 2012[13],
l-ENSREG, f’Lulju, qablet dwar Pjan ta’ Azzjoni, li jimmira li jiżgura li
r-rakkomandazzjonijiet mill-proċess ta’ evalwazzjoni bejn il-pari
jiġu implimentati b’mod konsistenti u trasparenti. Din għandha
tkun prijorità għall-Istati Membri kollha affettwati. Minħabba
l-għadd kbir ta’ titjib rakkomandat, għandhom jiġu
żviluppati u applikati metodi u kriterji biex jiġġudikaw
l-importanza ta’ miżuri differenti, biex jipprijoritizzaw u jallokaw
il-fondi għal dawk l-oqsma li jrendu l-ikbar benefiċċji
tas-sikurezza. Fl-istess ħin, il-valutazzjoni li twettqet
fuq impjanti li qed jinbnew ikkunsidrat li l-probabbiltà li d-disinji
tar-reatturi ġodda, jiġu affetwati ħafna minn dawn
il-miżuri kollha ta’ ammeljorament tas-sikurezza, hija pjuttost baxxa.
Għalhekk, mhumiex probabbli żidiet kbar fl-ispejjeż
tal-investiment għal kapaċità ta' ġenerazzjoni nukleari
ġdida fl-Ewropa jekk jintgħażlu l-aqwa tekonoloġiji
disponibbli. Ir-responsabbiltà għall-implimentazzjoni
tal-mekkaniżmi ta’ monitoraġġ u verifika hija tal-Istati Membri. 2.3.2. Rakkomandazzjonijiet dwar
proċeduri u oqfsa Fir-rigward tas-sikurezza, il-Bord
tal-evalwazzjoni bejn il-pari tal-ENSREG identifika erba’ oqsma prinċipali
għal iktar titjib madwar l-Ewropa: ·
Għandha tiġi żviluppata gwida
Ewropea dwar il-valutazzjoni tal-perikli naturali, inkluż terremoti,
għargħar u kundizzjonijiet estremi tat-temp, u marġnijiet
tas-sikurezza, sabiex tiżdied il-konsistenza bejn l-Istati Membri. L-Assoċjazzjoni tar-Regolaturi Nukleari tal-Ewropa tal-Punent
(WENRA), billi tinvolvi l-aqwa għarfien espert disponibbli mill-Ewropa
(b’rabta mal-ewwel sejba taħt 2.2.2) tkun f'pożizzjoni tajba biex
twettaq dan il-kompitu. ·
Għandu jitwettaq Rieżami Perjodiku
tas-Sikurezza (PSR) ta’ kull NPP tal-inqas kull għaxar (10) snin, sabiex tinżamm u tittejjeb is-sikurezza tal-impjanti u biex dawn
jibqgħu robusti u ssir evalwazzjoni mill-ġdid tal-perikli naturali li
l-impjanti jistgħu jkunu suġġetti għalihom. ·
Għandhom jiġu implimentati miżuri
rikonoxxuti biex tiġi protetta l-integrità tal-konteniment bħala
l-aħħar barriera għall-protezzjoni tan-nies u l-ambjent kontra
r-rilaxxi radjuattivi. ·
Għandu jkun hemm prevenzjoni u/jew taffija
ta' aċċidenti li jirriżultaw minn perikli naturali sabiex
jiġu limitati l-konsegwenzi tagħhom.
Il-miżuri li għandhom jiġu kkunsidrati jinkludu tagħmir
f’bunker bħala prevenzjoni u ġestjoni ta’ aċċident sever,
tagħmir mobbli protett kontra perikli naturali estremi, ċentri ta’
rispons għal emerġenza protetti kontra perikli naturali estremi u
kontaminazzjoni, timijiet ta’ salvataġġ u tagħmir disponibbli
malajr biex jappoġġa l-operaturi lokali f’avvenimenti li jdumu
żmien twil. Segwitu: Il-Kummissjoni u r-regolaturi nazzjonali qablu li
se jiġu ppreparati u magħmula disponibbli pjanijiet ta' azzjoni
nazzjonali bl-iskedi għall-implimentazzjoni sal-aħħar
tal-2012. Il-metodoloġija tal-evalwazzjoni bejn il-pari se tiġi
applikata lilhom fil-bidu tal-2013 sabiex tivverifika li r-rakkomandazzjonijiet
tat-“testijiet ta’ reżistenza” ikunu qed jiġu implimentati b’mod
konsistenti b’mod trasparenti madwar l-Ewropa kollha. F’oqsma fejn huma
meħtieġa analiżi teknika u gwida addizzjonali r-regolaturi
nazzjonali se jikkollaboraw mill-qrib fil-qafas WENRA. L-okkorrenza ta’ inċidenti fl-impjanti
nukleari, anke fl-Istati Membri li normalment għandhom rekords
tas-sikurezza tajbin, tikkonferma l-ħtieġa għal rieżamijiet
bir-reqqa tas-sikurezza fuq bażi regolari u għall-valutazzjoni
tal-esperjenza operattiva, u taċċenna l-ħtieġa
għal kooperazzjoni mill-qrib u kondiviżjoni tal-informazzjoni
bejn l-operaturi, il-bejjiegħa, ir-regolaturi u l-istituzzjonijiet
Ewoprej, bħaċ-Ċentru tal-Approvazzjoni Ewoprew tal-Esperjenza
fl-Operat li huwa miżmum miċ-Ċentru Konġunt
tar-Riċerka tal-Kummissjoni (JRC). Barra minn hekk, l-ENSREG jista’ jkollu
rwol prinċipali biex jiżġgura li l-esperjenza u
l-konklużjonijiet minn kwalunkwe inċident nukleari jiġu
kondiviżi mill-ewwel u applikati b'mod konsistenti fi Stati Membri
oħrajn. Pereżempju, ir-riżultati ta’ investigazzjonijiet
riċenti fuq ir-reattur Doel 3 fil-Belġju żvelaw
il-ħtieġa li l-istatus tal-impjant jiġi kkontrollat kontinwament
b’tekniki tal-ogħla livell ta’ żvilupp tekniku u li l-informazzjoni
tiġi kondiviża kemm jista’ jkun possibbli. Barra minn hekk, il-Kummissjoni tirrakkomanda li
fir-rieżamijiet futuri tas-sikurezza tagħhom, ir-regolaturi
nazzjonali jinkludu analiżi aktar dettaljata fir-rigward
tal-effetti ta’ aċċidenti ta’ unitajiet multipli, li jikkunsidraw
ukoll kemm qdiemu t-tagħmir u l-materjali, il-protezzjoni tal-pixxini
tal-ħżin tal-fjuwil użat u l-possibbiltajiet li jonqos l-ammont
ta' fjuwil użat maħżun fil-pixxini sabiex jonqsu r-riskji dovuti
għat-telf ta' tkessiħ. Il-Kummissjoni tikkunsidra li l-estensjoni
tal-valutazzjoni tas-sikurezza għat-tħejjija għal
emerġenza barra mis-sit u l-arranġamenti ta’ rispons, hija
attività addizzjonali importanti biex tittejjeb is-sikurezza
taċ-ċittadini. Għalhekk, bħala l-ewwel pass, il-Kummissjoni
qed tniedi studju dwar ir-“Rieżami tat-Tħejjija Attwali għal
Emerġenza Nukleari Barra mis-Sit u l-Arranġamenti ta’ Rispons
fl-Istati Membri tal-UE u l-Pajjiżi Ġirien”. L-għan huwa li jsir
rieżami tat-tħejjija għal emerġenza nukleari barra mis-sit
u l-kapaċitajiet ta' rispons fl-Istati Membri tal-UE u l-pajjiżi
ġirien, biex jiġu identifikati l-inkonsistenzi u l-lakuni, u biex
jiġu żviluppati proposti (leġiżlattivi jew
nonleġiżlattivi) għal possibbiltà ta’ titjib. Fir-rigward tal-implikazzjonijiet tas-sikurezza
tal-kraxxjaturi tal-inġenji tal-ajru fuq impjanti tal-enerġija
nukleari, il-Kummissjoni tirrakkomanda lill-ENSREG biex jaħdem b’mod
urġenti fuq approċċ tas-sikurezza Ewropew sabiex jiżviluppa
metodoloġija koerenti u biex jasal għal standards komparattivi ta’
livell għoli madwar l-Unjoni Ewropea. 2.4. Sejbiet ewlenin u
rakkomandazzjonijiet mill-valutazzjonijiet tas-sigurtà[14] Ir-rapport finali tal-Grupp Ad Hoc tal-Kunsill
dwar is-Sigurtà Nukleari[15]
jippreżenta konklużjonijiet dwar ħames temi diskussi,
jiġifieri l-protezzjoni fiżika, inġenji tal-ajru kkraxxjati
apposta, ċiberattaki, l-ippjanar għal emerġenza nukleari, u
eżerċizzji u taħriġ. Minħabba l-fatt li s-sigurtà nazzjonali tibqa’ responsabbiltà
tal-Istati Membri u s-sensittività tas-suġġetti u l-kunfidenzjalità
ovvjament jimplikaw limitazzjonijiet stretti, ir-rapport fih diversi
rakkomandazzjonijiet lill-Istati Membri sabiex tissaħħaħ
is-sigurtà nukleari fl-UE. Dan
jaċċenna b’mod partikolari: ·
il-ħtieġa urġenti għall-Istati
Membri li s’issa għadhom ma għamlux dan biex ilestu r-ratifika
tal-Konvenzjoni emendata dwar il-Protezzjoni Fiżika tal-Materjali Nukleari; ·
il-valur miżjud tal-gwida u s-servizzi
tal-IAEA, inkluż il-missjonijiet tal-IPPAS[16] fuq bażi regolari
fl-Istati Membri kollha li għandhom impjanti tal-enerġija nukleari; ·
l-importanza ta’ kooperazzjoni regolari u
mill-qrib bejn l-Istati Membri u l-pajjiżi ġirien u ·
in-neċessità li jiġu ddefiniti
l-modalitajiet u l-fora għall-kontinwazzjoni tal-ħidma tal-UE fuq
is-sigurtà nukleari. 2.5. Rakkomandazzjonijiet biex
il-ħidmiet bejn il-kwistjonijiet tas-sikurezza u tas-sigurtà jintrabtu
flimkien Huma meħtieġa sforzi sostnuti biex
il-ħidmiet fuq is-sikurezza u s-sigurtà nukleari jintrabtu flimkien u
jiġu indirizzati l-lakuni possibbli. Pereżempju, la t-testijiet ta’
reżistenza tas-sikurezza u lanqas ir-rapport dwar is-sigurtà nukleari ma
jwieġbu l-mistoqsijiet rilevanti kollha dwar kwistjonijiet
bħall-kraxxjaturi tal-inġenji tal-ajru jew ir-reżistenza tal-impjanti
tal-enerġija nukleari għal avvenimenti esterni. Madankollu,
it-testijiet ta’ reżistenza irnexxielhom ikopru sa estent konsiderevoli
l-effetti tal-kraxxjaturi tal-inġenji tal-ajru permezz ta' ħidma
bir-reqqa li saret fuq it-telf tal-enerġija elettrika ta’ stazzjoni u
t-telf tat-tkessiħ ta’ impjant. Filwaqt li dan huwa qasam fejn
il-kompetenza hija kondiviża bejn awtoritajiet differenti, il-Kummissjoni
għandha l-intenzjoni li tkompli tirriċerka dan il-qasam permezz ta'
sessjonijiet ta' smigħ ta' esperti dedikati għal dan l-għan.
F’oqsma oħra tas-sigurtà nukleari, jeħtieġ li jiġu
kkunsidrati proġetti speċifiċi taħt il-Pjan ta’ Azzjoni
CBRN tal-UE u azzjonijiet dwar iċ-ċibersigurtà f’kollaborazzjoni
mill-qrib mal-Istati Membri. ENSREG qabel fil-pjan ta’ azzjoni tiegħu li
se jkompli jikkollabora dwar il-kwistjoni tal-kraxxjaturi tal-inġenji
tal-ajru sa fejn jippermettu l-kompetenzi legali tar-regolaturi nazzjonali. 3. Tisħiħ tal-Qafas
tas-Sikurezza Nukleari tal-UE 3.1. Implimentazzjoni tal-qafas
leġislattiv eżistenti għas-sikurezza nukleari Id-data ta’ skadenza għall-Istati Membri
tal-UE biex ilestu t-traspożizzjoni tad-Direttiva dwar is-Sikurezza
Nukleari[17]
fil-livell nazzjonali kienet it-22 ta’Lulju 2011. Il-Kummissjoni
Ewropea bdiet proċeduri ta' ksur kontra tnax-il Stat Membru li ma kkonformawx
ma’ din l-iskadenza[18].
S’issa, żewġ Stati Membri[19]
għadhom ma lestewx il-miżuri tat-traspożizzjoni tagħhom.
Il-Kummissjoni issa se tibda analiżi fil-fond tal-kwalità tal-miżuri
tat-traspożizzjoni magħmula mill-Istati Membri. 3.2. Titjib fil-qafas leġiżlattiv
għas-sikurezza nukleari 3.2.1. Rieżami tad-Direttiva
dwar is-Sikurezza Nukleari Huwa kruċjali li jkun żgurat li
l-esperjenza mill-aċċident ta’ Fukushima u l-konklużjonijiet
tat-testijiet ta’ reżistenza jiġu implimentanti kif suppost u b’mod
konsistenti fl-UE u li jiġu riflessi fil-qafas leġiżlattiv.
It-testijiet ta’ reżistenza, ir-rapporti mill-Ġappun u l-ħidma
tal-komunità internazzjonali fl-IAEA kkonfermaw li mhux biss hemm differenzi
sinifikanti bejn l-Istati Membri, iżda wkoll lakuni fl-iżgurar
tal-identifikazzjoni u l-ġestjoni komprensivi u trasparenti
tal-kwistjonijiet ewlenin tas-sikurezza. Barra minn hekk, ġew identifikati għadd
ta’ dgħufijiet fil-qafas eżistenti tas-sikurezza nukleari tal-UE (ara
t-taqsima 2.2.3). Sabiex tindirizzahom, id-Direttiva dwar is-Sikurezza Nukleari
tirrikjedi rieżami fil-qasam li ġej: (1)
Proċeduri u oqfsa tas-sikurezza. Il-kamp ta’ applikazzjoni tad-Direttiva dwar is-Sikurezza Nukleari
eżistenti huwa limitat għal prinċipji kumplessivi li jiffukaw
l-aktar fuq l-iffissar tad-distribuzzjoni tal-kompetenzi fost l-operaturi
nukleari, ir-regolaturi nazzjonali u istanzi nazzjonali oħrajn, u
għalhekk ma jistax jindirizza l-kwistjonijiet tas-sikurezza teknika
identifikati fl-aċċident nukleari ta’ Fukushima u t-testijiet ta’ reżistenza.
Ir-rakkomandazzjonijiet tal-qafas prinċipali li jirriżultaw
mit-testijiet ta’ reżistenza (eż. l-evalwazzjoni mill-ġdid
perjodika tal-perikli esterni, l-implimentazzjoni ta’ tekniki rikonoxxuti biex
jiġi minimizzat l-impatt tal-aċċidenti, eċċ.) jeħtieġ
li jiġu tradotti fil-mekkaniżmi maqbula, ankrati fid-Direttiva
riveduta li fuqha l-awtoritajiet regolatorji nazzjonali jistgħu
jibbażaw id-deċiżjonijiet indipendenti tagħhom. Huwa
meħtieġ titjib fit-tħejjija u r-rispons għal emerġenza
nukleari jew radjoloġika serja. Id-Direttiva riveduta għandha
tinkludi dispożizzjonijiet li jirrikjedu lill-Istati Membri li jkollhom
fis-seħħ tħejjija għal emerġenza fuq is-sit xierqa u
miżuri ta’ rispons. Is-sikurezza ta’ installazzjonijiet nukleari
ġodda għandha tingħata attenzjoni speċifika. Filwaqt li
d-Direttiva riveduta tista’ tiddefinixxi parametri bażiċi u
għanijiet tas-sikurezza, ir-rwol tal-ENSREG fil-provvediment ta’ gwida
għall-implimentazzjoni tagħhom jeħtieġ li jiġi
ddefinit kif juru l-iżviluppi riċenti fir-reattur f’Doel. Dawk
l-avvenimenti għal darb’oħra aċċennaw il-ħtieġa
għal djalogu bejn l-operaturi u l-awtoritajiet tas-sikurezza sabiex
jikkondividu u jimplimentaw l-aqwa prattiki u t-teknoloġija tal-ogħla
livell ta’ żvilupp tekniku. Għar-reatturi l-ġodda, għandhom
jiġu kkunsidrati fid-Direttiva l-għanijiet tas-sikurezza tal-WENRA. (2)
Rwol u mezzi tal-awtoritajiet regolatorji
nukleari. Id-dispożizzjonijiet attwali dwar
is-separazzjoni regolatorja u l-effettività tal-awtoritajiet regolatorji
nazzjonali jeħtieġ li jissaħħu sabiex jiżguraw
l-indipendenza effettiva ta' dawn l-awtoritajiet u jiggarantixxu li
għandhom il-mezzi ta' azzjoni xierqa. (3)
Ftuħ u Trasparenza.
It-trasparenza tad-deċiżjonijiet regolatorji u l-provvista regolari
tal-informazzjoni lill-pubbliku mingħand l-operaturi nukleari għandha
tiġi estiża u speċifikata, pereżempju billi jitqeigħdu
l-obbligi fuq id-detenturi tal-liċenzjam jew billi tiġi
speċifikata t-tip ta' informazzjoni li għandha tiġi pprovduta,
bħala minimu,lill-pubbliku minn awtorità regolatorja kompetenti. (4)
Monitoraġġ u verifika. Id-dispożizzjonijiet dwar il-monitoraġġ u l-verifika,
pereżempju permezz tal-użu estiż tal-evalwazzjonijiet bejn
il-pari, għandhom jiġu estiżi għal oqsma oħra apparti
r-rieżami tal-qafas regolatorju nazzjonali. 3.2.2. Assigurazzjoni u
Responsabbiltà Nukleari L-analiżi tad-dispożizzjonijiet
għall-kumpens tal-vittmi f’każ ta’ inċidenti jew
aċċidenti nukleari mhi koperta xejn fil-qafas leġiżlattiv
attwali tal-UE. Fir-realtà, dan ma kienx parti mill-proċess tat-testijiet
ta’ reżistenza. Madankollu, l-Artikolu 98 tat-Trattat Euratom
jipprovdi għal Direttivi tal-Kunsill li jistabbilixxu miżuri
vinkolanti dwar din il-kwistjoni. Għalhekk, abbażi ta’ valutazzjoni
tal-impatt, il-Kummissjoni se tanalizza sa fejn għandha tittejjeb
is-sitwazzjoni ta’ vittmi potenzjali ta’ aċċident nukleari fl-Ewropa,
fi ħdan il-limiti tal-kompetenza tal-UE. Il-Kummissjoni beħsieba
tipproponi leġiżlazzjoni vinkolanti fil-qasam tal-assigurazzjoni u
r-responsabbiltà nukleari. F’dan il-kuntest, il-kumpens għal ħsara
lill-ambjent naturali għandu jiġi indirizzat ukoll. 3.2.3. Rieżami
tal-leġiżlazzjoni dwar l-ikel u l-għalf Il-ġestjoni tal-ikel u l-għalf li
jiġi kontaminat b’riżultat ta’ emerġenza nukleari hija koperta
mid-Direttiva dwar l-Istandards Bażiċi tas-Sikurezza (96/29/Euratom),
u hija suġġetta għal dispożizzjonijiet speċifiċi
fir-rigward tat-tqegħid tagħhom fis-suq fir-Regolament tal-Kunsill
(Euratom) Nru 3954/87 li jistabbilixxi livelli massimi permissibli ta’
kontaminazzjoni. Il-leġiżlazzjoni li ssemmiet l-aħħar saret
is-suġġett ta’ proċedura ta’ riformulazzjoni[20]. Madankollu, il-Kummissjoni
issa għandha l-intenzjoni li tirtira l-proposta għal riformulazzjoni
u li ġġib dan ir-Regolament f’konformità mar-Regolament
tal-Komitoloġija[21]
l-ġdid li daħal fis-seħħ f’Marzu 2011. L-esperjenza miksuba mill-avvenimenti ta’
Fukushima u Chernobyl urew ħtieġa li jsir divrenzjar bejn
l-istrumenti li jirregolaw l-importazzjoni tal-ikel minn pajjiżi terzi u
dawk għat-tqegħid fis-suq tal-ikel fil-każ ta’ aċċident
fi ħdan l-UE. Abbażi ta’
din l-esperjenza, ir-Regolament jeħtieġ li jiġi rivedut sabiex
jipprovdi iktar għodod flessibbli li jippermettu reazzjonijiet
speċifiċi u mmirati għal kwalunkwe aċċident nukleari
jew emerġenza radjoloġika (fl-UE, fil-viċinanza tal-UE jew
f'pajjiż remot). 3.3. Tisħiħ
tar-riżorsi umani u tat-taħriġ L-iżgurar
tad-disponibbiltà ta’ forza tax-xogħol bl-esperjenza għandha tkun
prijorità għolja, kemm jekk pajjiż ikun għażel li jkompli
juża l-enerġija nukleari, kemm jekk għażel li jwaqqaf
l-użu tagħha gradwalment kif ukoll jekk għażel li jibda
juża dan is-sors tal-enerġija għall-ewwel darba. Fil-livell Ewropew iċ-Ċentru
Konġunt tar-Riċerka tal-KE, f’kooperazzjoni mar-regolaturi
tas-sikurezza nukleari tal-UE u t-TSOs, jimmanniġja l-inizjattiva ta’
Feedback dwar l-Esperjenza Operattiva. Iċ-Ċentru Konġunt
tar-Riċerka se jiftaħ dawn l-attivitajiet għall-awtoritajiet
regolatorji nukleari nazzjonali kollha, li jixtiequ jipparteċipaw, sabiex
jistabbilixxi Laboratorju Ewropew tas-Sikurezza Nukleari permanenti
għat-titjib kontinwu tas-sikurezza. Dan il-laboratorju se jipprovdi
appoġġ xjentifiku u tekniku għal ħidma effettiva
għat-titjib kontinwu tas-sikurezza nukleari b’mod partikolari permezz ta’
analiżi u valutazzjonijiet tal-inċidenti, li jistgħu jiġu
identifikati mill-Kummissjoni jew mill-ENSREG. Fl-azzjonijiet ta’ riċerka u innovazzjoni
tal-Euratom, (Orizzont 2020), għandha tiġi ddedikata attenzjoni
speċjali lit-tagħlimiet minn Fukushima, u hija meħtieġa
koordinazzjoni aħjar bejn l-azzjonijiet nazzjonali, Ewropej u
internazzjonali f’dan il-qasam. Għandhom jiġu mħeġġa
aktar skambji tal-aqwa prattiki bħala mod ta' titjib kontinwu u
armonizzazzjoni tal-kultura tas-sikurezza nukleari. 3.4. Bini tal-kooperazzjoni
internazzjonali Il-Kummissjoni se tkompli
tħeġġeġ lill-pajjiżi ġirien tal-UE kollha permezz
ta’ inċentivi u strumenti xierqa biex jikkondividu r-riżultati
tat-testijiet ta’ reżistenza tagħhom, jipparteċipaw
fl-evalwazzjonijiet bejn il-pari u jiżguraw li l-esperjenzi
fl-implimentazzjoni tar-rakkomandazzjonijiet jiġu kondiviżi biex
tittejjeb is-sikurezza nukleari kemm fl-UE kif ukoll fil-fruntieri tagħha.
Bħalissa qed jiġi kkunsidrat self tal-Euratom lill-Ukraina, sabiex
tħaffef il-pass fl-implimentazzjoni tal-programm tagħha
tal-ammeljorament tas-sikurezza komprensiva. Qed isiru wkoll kuntatti biex tiġi
żviluppata kooperazzjoni bilaterali dwar it-testijiet ta’ reżistenza
u kwistjonijiet regolatorji mal-Ġappun. Abbozz ta’ Memorandum ta’ Qbil
għal kooperazzjoni aħjar dwar is-sikurezza nukleari diġà
ġie sottomess lill-IAEA. B’mod aktar ġenerali, il-Kummissjoni se
taħdem mas-Servizz Ewropew għall-Azzjoni Esterna (EEAS) sabiex
tagħmel l-aħjar użu tal-istrumenti ta’ kooperazzjoni esterna
eżistenti fil-qasam, b’mod partikolari l-Istrument għall-Kooperazzjoni
dwar is-Sikurezza Nukleari, l-Istrument għall-Istabbiltà fil-komponent
tagħha ta’ taffija tar-riskji Kimiċi, Bijoloġiċi,
Radjuloġiċi u Nukleari u l-Istrument għal Qabel l-Adeżjoni. 3.5. Titjib fil-qafas legali
globali għas-sikurezza nukleari Permezz tal-IAEA, l-istrumenti prinċipali li
jirregolaw is-sikurezza nukleari huma l-istandards u l-konvenzjonijiet
tas-sikurezza maqbula internazzjonalment, b’mod partikolari l-Konvenzjoni dwar
is-Sikurezza Nukleari (CNS) u l-Konvenzjoni dwar in-Notifika Bikrija ta'
Emerġenza Nukleari, li l-Komunità Euratom hija Parti Kontraenti fiha. Il-laqgħa straordinarja tal-Konvenzjoni dwar
is-Sikurezza Nukleari f’Awwissu 2012 qablet li tistabbilixxi grupp ta’
ħidma li l-kompitu tiegħu jkun li fl-2014 jirrapporta dwar lista ta'
azzjonijiet li jsaħħu l-Konvenzjoni u dwar proposti biex tiġi
emendata, jekk ikun hemm bżonn. Il-maġġoranza
tan-nazzjonijiet parteċipanti f’dan il-grupp ta’ ħidma
aċċennaw il-ħtieġa li jiġu kkunsidrati l-istandards
tas-sikurezza tal-IAEA, l-indipendenza u l-effettività regolatorja, l-użu
estiż tal-evalwazzjonijiet bejn il-pari kif ukoll il-ftuħ u
t-trasparenza mtejba. Il-Kummissjoni
se tikkunsidra dawn il-prinċipji u l-objettivi b’mod sħiħ. L-impenn kontinwu tal-Istati Membri u
l-istituzzjonijiet tal-UE huwa meħtieġ biex ikun żgurat li
l-leġiżlazzjoni tal-UE tkun riflessa sa fejn huwa possibbli
fir-rieżamijiet futuri tal-qafas internazzjonali tas-sikurezza nukleari.
Il-Kummissjoni se tkompli bl-isforzi tagħha biex dan isir possibbli. 4. Rinfurzar tas-sigurtà
nukleari Il-Kummissjoni tappoġġa s-sejbiet u
r-rakkomandazzjonijiet aċċennati fir-rapport finali tal-AHGNS. Il-Kummissjoni se tuża l-kompetenzi u
l-programmi eżistenti biex tħeġġeġ lill-Istati Membri
jkomplu jagħmlu aktar progress fl-implimentazzjoni ta’ miżuri
speċifiċi, sabiex tikkontribwixxi għall-ħidma dwar
il-kwistjonijiet tas-sigurtà nukleari. B’mod partikolari, il-Kummissjoni se tkompli l-ħidma mal-Istati
Membri fuq: –
it-tnaqqis tat-theddida tal-inċidenti
Kimiċi, Bijoloġiċi, Radjuloġiċi, Nukleari (CBRN) ta’
oriġini intenzjonata, inkluż atti ta’ terroriżmu u detezzjoni
ta’ materjali radjuattivi u nukleari, permezz tal-implimentazzjoni tal-Pjan ta'
Azzjoni CBRN tal-UE u l-ġestjoni ta’ programmi dwar is-sigurtà CBRN; –
ir-rieżami tad-Direttiva 2008/114/KE dwar
l-identifikazzjoni u l-indikazzjoni tal-Infrastruttura Kritika Ewropea[22], prevista fl-2013; –
il-Kummissjoni se tħejji proposta
leġiżlattiva dwar netwerk u sigurtà tal-informazzjoni
sal-aħħar tas-sena. Skont il-proposta l-operaturi f’ċerti
setturi kritiċi li jiddependu ħafna fuq l-ICT se jkunu
meħtieġa jiżguraw is-sigurtà tas-sistemi tal-informazzjoni
tagħhom u jirrapportaw ksur serju tas-sigurtà lill-awtoritajiet
pubbliċi. L-utilitajiet tal-elettriku b’operazzjonijiet nukleari se jkunu
suġġetti għal dawn ir-rekwiżiti; –
l-adozzjoni tal-proposta għar-rieżami
tal-Mekkaniżmu tal-Protezzjoni Ċivili tal-Unjoni[23] li jiffaċilita
l-kooperazzjoni bejn l-Istati Membri fl-intervenzjonijiet ta’ assistenza
tal-protezzjoni ċivili fil-każ ta' emerġenzi maġġuri,
inkluż aċċidenti radjoloġiċi u nukleari kif ukoll
il-prevenzjoni u l-azzjonijiet ta' tħejjija (eż. valutazzjonijiet
tar-riskju u pjanijiet ta’ ġestjoni tar-riskju, moduli CVRN,
taħriġ u eżerċizzji għal diżastri fuq skala
kbira, żvilupp tax-xenarju u l-ippjanar ta’ kontinġenza); –
ir-ratifika veloċi tal-Konvenzjoni emendata
dwar il-Protezzjoni Fiżika tal-Materjali Nukleari mill-Istati Membri
kollha. Il-Kummissjoni se tlesti l-proċess ta’ ratifika mill-Euratom kif
maqbul mill-Kunsill fl-2006 ladarba l-Istati Membri jkunu lestew
il-proċeduri interni tagħhom. Il-Kummissjoni tikkunsidra wkoll li għad
fadal ħtieġa li jiġu indirizzati aspetti aktar espliċiti li
jinsabu fl-interfaċċa bejn is-sikurezza u s-sigurtà nukleari. Barra l-UE, l-Istrument għall-Istabbiltà –
il-programm taċ-Ċentri ta’ Eċċellenza CBRN tal-UE – se
jtejjeb il-kapaċitajiet istituzzjonali ta’ pajjiżi u reġjuni
magħżula kontra riskji kimiċi, bijoloġiċi,
radjuloġiċi u nukleari. 5. Konklużjonijiet u
t-Triq 'il Quddiem It-testjijet tal-istress nukleari tal-UE kienu
eżerċizzju mingħajr preċedent f’termini ta’ estent,
kollaborazzjoni u impenn tal-partijiet kollha involuti. Intużaw
internazzjonalment bħala bażi jew bħala punt ta’ riferiment
għall-valutazzjoni tas-sikurezza tal-impjanti tal-enerġija nukleari[24]. Id-disponibbilità pubblika
tar-rapporti kollha marbuta mas-sikurezza u l-parteċipazzjoni ta’
pajjiżi mhux nukleari għamlu l-eżerċizzju eżempju
tat-trasparenza. It-testijiet ta’ reżistenza issa huma lesti.
Madankollu, l-impatt tagħhom ma għandux jiġi kkunsidrat bħala
eżerċizzju ta’ darba, iżda bħala proċess kontinwu
għat-titjib tas-sikurezza nukleari, f’kollaborazzjoni mill-qrib
mal-awtoritajiet regolatorji nazzjonali fil-kuntest ta’ ENSREG u l-IAEA. L-UE
trid tfittex li tiżviluppa approċċ komprensiv Ewropew għas-sikurezza,
li jinkludi rieżami tal-leġiżlazzjoni Euratom speċifika
dwar is-sikurezza nukleari, ikkumplimentat minn strumenti
leġiżlattivi jew nonleġiżlattivi dwar ir-responsabbiltà
nukleari, dwar it-tħejjija u r-rispons għal emerġenza, u billi
ssegwi azzjonijiet fil-qasam tas-sigurtà nukleari. B’dan il-mod,
iċ-ċittadini fl-UE kollha jistgħu jkunu fiduċjużi li
l-enerġija nukleari prodotta fl-UE hija suġġetta
għall-iżjed kundizzjonijiet tas-sikurezza stretti fid-dinja. It-testijiet ta’ reżistenza u l-attivitajiet
relatati huma kisba maġġuri għall-UE u l-awtoritajiet
regolatorji fl-Istati Membri u wasslu għal riżultati tanġibbli: ·
Ġie identifikat titjib sinifikanti u
tanġibbli fl-impjanti tal-pajjiżi parteċipanti kollha, u dawn
qed jiġu implimentati jew ippjanati. ·
Id-dgħufijiet fl-oqfsa u l-proċeduri, kif
ukoll il-lakuni fl-arranġamenti legali, ġew identifikati u
fil-preżent qed jitfasslu l-proposti biex dawn jittejbu. ·
Inbnew l-ewwel rabtiet bejn l-awtoritajiet
responsabbli mis-sikurezza u dawk responsabbli mis-sigurtà. It-titjib
tad-djalogu bejniethom dwar suġġetti fl-interfaċċa
tas-sikurezza/sigurtà huwa essenzjali biex iwieġeb għat-tħassib
taċ-ċittadini. Bil-ħsieb li tiżgura segwitu kif suppost
għat-testijiet ta’ reżistenza, il-Kummissjoni: ·
tistieden lill-Kunsill Ewropew biex jorbot
lill-Istati Membri u biex jitlob lill-pajjiżi terzi parteċipanti biex
jimplimentaw ir-rakkomandazzjonijiet tat-testijiet ta’ reżistenza malajr.
Il-Kummissjoni se tiżgura l-ftuħ u t-trasparenza matul is-segwitu
għall-proċess tat-testijiet ta’ reżistenza iżda, taħt
il-leġiżlazzjoni attwali, mhux se tkun legalment responsabbli
mill-valutazzjoni tal-operat tas-sikurezza tan-NPPs. Tipproponi li l-Kunsill
Ewropew jeżamina l-istatus tal-implimentazzjoni tar-rakkomandazzjonijiet
sa Ġunju 2014, abbażi ta’ rapport konsolidat mill-Kummissjoni, li
għandu jiġi abbozzat f’kooperazzjoni mill-qrib ma’ ENSREG. Tistieden
lill-Istati Membri jieħdu azzjoni mingħajr dewmien biex jimplimentaw
ir-rakkomandazzjonijiet kollha tat-testijiet ta’ reżistenza, skont
l-iskeda tal-pjan ta’ azzjoni ta’ ENSREG u bil-għan li
l-maġġoranza vasta tat-titjib tas-sikurezza meħtieġ
tiġi implimentata sal-2015; ·
se tippreżenta rieżami ambizzjuż
tad-Direttiva dwar is-Sikurezza Nukleari tal-UE, li se tiġi sottomessa
lill-Parlament Ewropew u lill-Kunsill sal-bidu tal-2013 l-aktar tard, wara
konsultazzjoni mal-esperti xjentifiċi u tekniċi tal-Istati Membri kif
previst permezz tal-Artikolu 31 tat-Trattat Euratom. Qed tiġi
kkunsidrata l-preżentazzjoni ta’ proposta oħra dwar l-assigurazzjoni
nukleari u r-responsabbiltà u din se ssegwi fl-2013, bħall-proposta dwar
il-livelli massimi permessi ta' kontaminazzjoni radjuattiva għall-ikel u
l-għalf. ·
se tesplora proposti fil-programm tal-Euratom
Orizzont 2020 bil-għan li tiffaċilita l-iskambju bejn l-Istati
Membri ta’ persunal li jaħdem fil-qasam nukleari; ·
se tipproponi lill-Kunsill mandat biex
tipparteċipa b’mod attiv fil-grupp ta’ ħidma dwar l-effettività u
t-trasparenza fil-qafas tal-IAEA fejn tfittex titjib tal-Konvenzjoni dwar
is-Sikurezza Nukleari u tipprepara proposta konġunta Ewropea
għal-laqgħa tar-rieżami li jmiss f’Marzu 2014; il-Kummissjoni se
żżomm kostanti wkoll id-djalogu li jinsab għaddej
mal-pajjiżi l-oħrajn biex tiżgura l-konverġenza massima
tal-proposti Ewropej; ·
se tkompli tħeġġeġ
l-attivitajiet xjentifiċi li jimmiraw għal iktar armonizzazzjoni
tal-valutazzjonijiet tas-sikurezza u l-prattiki nukleari fl-UE; ·
se tkompli tikkontribwixxi għar-rinfurzar
tal-bini tas-sigurtà nukleari kif jixraq fuq il-ħidma eżistenti
tas-CBRN, billi tuża kooperazzjoni rinfurzata tal-Istati Membri u
l-istituzzjonijiet tal-UE kif meħtieġ kif ukoll l-istrumenti ta’
kooperazzjoni esterna b’kollaborazzjoni mill-qrib mal-EEAS; LISTA TA’ ABBREVJAZZJONIJIET AHGNS Grupp
ad-hoc dwar is-Sigurtà Nukleari BWR Reattur tal-Ilma
Jagħli CBRN Kimiku, Bijoloġiku,
Radjuloġiku, Nukleari CNS Konvenzjoni dwar
is-Sikurezza Nukleari EEAS Servizz Ewropew
għall-Azzjoni Esterna ENSREG Grupp ta' Regolaturi Ewropew dwar is-Sikurezza Nukleari IAEA Aġenzija Internazzjonali tal-Enerġija Atomika ICT Teknoloġiji tal-Informazzjoni u l-Komunikazzjoni INSC Strument għall-Kooperazzjoni dwar is-Sikurezza Nukleari IPPAS Servizz Konsultattiv Internazzjonali dwar
il-Protezzjoni Fiżika JRC Ċentru Konġunt tar-Riċerka tal-Kummissjoni Ewropea NPP Impjant tal-Enerġija Nukleari SAM Ġestjoni ta’ Aċċident Sever SAMG Linji Gwida għall-Ġestjoni ta’ Aċċident Sever TSO Organizzazzjoni tas-Sikurezza Teknika PSA Valutazzjoni tas-Sikurezza Probabbilistika PSR Rieżamijiet Perjodiċi tas-Sikurezza WENRA Assoċjazzjoni tar-Regolaturi Nukleari tal-Ewropa tal-Punent Anness[25]
Sommarju
tar-Rakkomandazzjonijiet Prinċipali għal Titjib matul it-Testijiet
ta’ Reżistenza fl-Impjanti tal-Enerġija Nukleari tal-Istati Membri
tal-UE Għat-terremoti
għandhom jintużaw każijiet tas-sikurezza kontra periklu estern
li jikkorrispondu għal probabbiltà ta’ eċċess ta’ inqas minn
darba kull 10 000 sena. (L-adattabbiltà ta’ sit ta’ kostruzzjoni ta’
NPP għandha tiġi vvalutata abbażi ta’ analiżi sismika li
tikkunsidra l-aktar terremot sever f’dawn l-aħħar 10 000 sena.) Għall-għargħar għandhom
jintużaw każijiet tas-sikurezza kontra periklu estern li
jikkorrispondu għal probabbiltà ta’ eċċess ta’ inqas minn darba
kull 10 000 sena. (L-adattabbiltà ta’ sit ta’ kostruzzjoni ta’
NPP għandha tiġi vvalutata abbażi ta’ analiżi sismika li
tikkunsidra l-aktar għargħar sever f’dawn l-aħħar
10 000 sena.) Għandu jintuża terremot li fuqu jigi
bbażat id-disinn tal-impjant (Design Basis Earthquake) li jikkorrispondi
għal aċċelerazzjoni massima fuq l-art ta’ 0.1 g bħala
minimu. Id-disinn ta’ NPP irid ikun kapaċi
jirreżisti għal terremot li mill-inqas jipproduċi
aċċelerazzjoni massima fuq l-art ta’ 0.1 g bħala minimu. Il-mezzi meħtieġa fil-ġlieda kontra
l-aċċidenti għandhom jinħażnu f’postijiet li jkollhom
protezzjoni adegwata kontra avvenimenti esterni. L-istrumentazzjoni sismika fuq is-sit għandha
tiġi installata jew imtejba. Il-ħin disponibbli għall-operatur
għar-restawr tal-funzjonijiet tas-sikurezza fil-każ ta’ telf totali
tal-enerġija elettrika u/jew tal-provvista tal-ilma li żżomm
sistema nukleari kiesħa għandu jkun iktar minn siegħa (1),
(mingħajr intervent uman). Il-Proċeduri tal-Operat ta’ Emerġenza
għandhom ikopru l-istati tal-impjanti kollha (minn stat ta’ provvista ta’
enerġija massima għal stat kompletament mitfi). Il-Linji Gwida tal-Ġestjoni ta’
Aċċident Sever għandhom jiġu implimentati u għandhom
ikopru l-istati kollha tal-impjant (minn stat ta’ provvista ta’ enerġija
massima għal stat kompletament mitfi). Għandu jkun hemm implimentati miżuri
passivi ta’ prevenzjoni kontra splużjonijiet tal-idroġenu (jew
gassijiet kombustibbli oħrajn) fil-każ ta’ aċċident sever,
(bħal Rikombinaturi Katalitiċi Passivi (Passive Autocatalytic Recombiners) jew alternattivi rilevanti
oħrajn). Għandu jkun hemm implimentati Sistemi ta’ Konteniment Permezz ta’ Vventjar b’Filtri (Containment Filtered Venting Systems), sabiex jiġi llimitat
l-ammont ta’ radjuattività rilaxxata barra mill-konteniment fil-każ ta’
aċċident. Għandha tkun disponibbli Kamra tal-Kontroll
ta’ Emerġenza sekondarja fil-każ li l-Kamra tal-Kontroll
Prinċipali ma tibqax aċċessibbli b’konsegwenza ta’ rilaxxi
radjuloġiċi ta’ aċċident sever, ta’ nirien fil-Kamra
tal-Kontroll Prinċipali jew minħabba perikli esterni estremi. [1] EUCO 10/11 (il-paragrafu 31) [2] Skont l-Artikolu 6 tad-Direttiva dwar is-Sikurezza
Nukleari, ir-responsabbiltà primarja tas-sikurezza nukleari hija f’idejn
id-"detentur tal-liċenzja" (jiġifieri l-operatur
tal-impjant) taħt is-superviżjoni tal-awtorità regolatorja nazzjonali
kompetenti. L-Istati Membri huma responsabbli għall-istabbilment u
ż-żamma ta’ qafas nazzjonali leġiżlattiv, regolatorju u
organizzattiv għas-sikurezza nukleari. Taħt it-Trattat Euratom,
il-Kummissjoni tista’ tagħmel proposti leġiżlattivi biex
toħloq qafas leġiżlattiv tal-UE għas-sikurezza nukleari,
mingħajr madankollu ma tkun tista’ tissostitwixxi r-responsabbiltà
tagħha għal dik tal-Istati Membri. Bidla f’din is-sitwazzjoni tkun
tirrikjedi emenda fil-leġiżlazzjoni eżistenti. [3] Il-Belġju, il-Bulgarija, ir-Repubblika Ċeka,
il-Finlandja, Franza, il-Ġermanja, l-Ungerija, il-Pajjiżi l-Baxxi,
ir-Rumanija, ir-Repubblika Slovakka, is-Slovenja, Spanja, l-Isvezja, ir-Renju
Unit. [4] Fejn l-NPP Ignalina qed jiġi dekummissjonat. [5] Bħala total, it-testijiet ta’ reżistenza twettqu fuq il-132 reattur
li joperaw fl-UE, 13-il reattur tal-UE li l-operat tagħhom twaqqaf
f’fażijiet minn mindu nbdew it-testijiet ta’ reżistenza, 15-il
reattur fl-Ukraina, u ħames (5) reatturi fil-Konfederazzjoni Svizzera. [6] COM 784 finali, 24.11.2011. [7] 14-il Stat Membru li joperaw l-impjanti
tal-enerġija nukleari (il-Belġju, il-Bulgarija, ir-Repubblika
Ċeka, il-Finlandja, Franza, il-Ġermanja, l-Ungerija, il-Pajjiżi
l-Baxxi, ir-Rumanija, ir-Repubblika Slovakka, is-Slovenja, Spanja, l-Isvezja, ir-Renju
Unit), il-Litwanja (fejn l-unitajiet Ignalina qed jiġu dekummissjonati
taħt il-liċenzji tal-operat) u l-Isvizzera u l-Ukraina bħala
pajjiżi ġirien tal-UE. [8] Ir-rapport tat-testijiet ta’ reżistenza ġie
sottomess lill-Kummissjoni f’Mejju 2012. [9] Assistenza finanzjarja u teknika mill-Istrument tal-UE
għall-Kooperazzjoni fis-Sikurezza Nukleari. Huwa mistenni rapport fil-bidu
tal-2013. [10] http://www.iaea.org/newscenter/focus/actionplan/reports/actionplanns130911.pdf
[11] C(2012) 3196 final, 10.5.2012 [12] "Investigation Committee on the Accident at Fukushima
Nuclear Power Stations of Tokyo Electric Power Company", rapport finali
Lulju 2012 (http://icanps.go.jp/) u "The Fukushima Nuclear Accident
Independent Investigation Commission", rapport finali Lulju 2012
(http://www.naiic.jp/en/2012/) [13] http://www.ensreg.eu/sites/default/files/EC%20ENSREG%20Joint%20Statement%2026%20April%202012%20-Final%20to%20publish.pdf [14] Din it-taqsima hija bbażata fuq ir-Rapport Finali
tal-Grupp Ad-hoc tal-Kunsill dwar is-Sigurtà Nukleari (AHGNS). [15] http://register.consilium.europa.eu/pdf/en/12/st10/st10616.en12.pdf,
31.5.2012. [16] Servizz Konsultattiv Internazzjonali dwar
il-Protezzjoni Fiżika. [17] Id-Direttiva tal-Kunsill 2009/71/Euratom
tal-25 ta’ Ġunju 2009 li tistabbilixxi qafas Komunitarju
għas-sigurtà tal-installazzjonijiet nukleari. [18] L-Awstrija, il-Belġju, Ċipru, id-Danimarka,
l-Estonja, il-Greċja, l-Italja, il-Latvja, il-Polonja, il-Portugall,
is-Slovakkja u r-Renju Unit [19] Il-Polonja u l-Portugall. [20] COM(2010) 184 finali, 27.4.2010. [21] Ir-Regolament (UE) Nru 182/2011. [22] Id-Direttiva
tal-Kunsill 2008/114/KE tat-8 ta’ Diċembru 2008 dwar
l-identifikazzjoni u l-indikazzjoni tal-Infrastruttura Kritika Ewropea u
l-valutazzjoni tal-ħtieġa għat-titjib tal-ħarsien
tagħhom, ĠU L 345, 23.12.2008, p. 75-82. [23] Il-Proposta COM/2011/0934 li qed
tiġi nnegozjata fil-Parlament u l-Kunsill biex tħassar 2007/779/KE,
Euratom: Deċiżjoni tal-Kunsill li tistabbilixxi Mekkaniżmu
tal-Protezzjoni Ċivili tal-Komunità (imfassla mill-ġdid). [24] Pereżempju l-forum
Latin-Amerikan tar-regolaturi nukleari, (FORO), il-Federazzjoni Russa u
l-Ġappun segwew mill-qrib it-testijiet ta’ reżistenza tal-UE u
użaw parti mill-ispeċifikazzjonijiet. [25] Il-kwistjonijiet elenkati
għandhom jinqraw flimkien mad-Dokument ta’ Ħidma tal-Persunal
tal-Kummissjoni li jakkumpanjah fejn huma spjegati f’iktar dettall u huma
marbutin mal-impjanti tal-enerġija nukleari fejn ġew osservati.