52012DC0385

WERREJ

RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI dwar l-implimentazzjoni tad-Direttiva 2003/59/KE fir-rigward tal-kwalifika inizjali u taħriġ perjodiku ta' sewwieqa ta' ċerti vetturi tat-triq għat-trasport ta' prodotti jew passiġġieri...................................................................... 3

1................ Tagħrif ġenerali........................................................................................................................................................ 3

1.1............. Introduzzjoni............................................................................................................................................................ 3

1.2............. Id-Direttiva 2003/59/KE – elementi bażiċi............................................................................................................ 3

1.3............. It-traspożizzjoni tad-Direttiva 2003/59/KE........................................................................................................... 3

2................ L-implimentazzjoni tad-Direttiva 2003/59/KE....................................................................................................... 4

2.1............. Kamp ta' applikazzjoni tad-Direttiva – Artikolu 1............................................................................................... 4

2.2............. Eżenzjonijiet – Artikolu 2........................................................................................................................................ 4

2.3............. Kwalifika u taħriġ – Artikolu 3............................................................................................................................... 5

2.3.1.......... Kwalifika inizjali obbligatorja................................................................................................................................. 5

2.3.1.1....... Sistema li tiġbor fiha kemm attendenza għall-kors kif ukoll eżami.................................................................... 5

2.3.1.2....... Sistema bl-eżamijiet................................................................................................................................................. 5

2.3.1.3....... Kwalifika inizjali aċċellerata.................................................................................................................................... 6

2.3.2.......... Taħriġ perjodiku obbligatorju................................................................................................................................ 7

2.3.3.......... Organizzazzjoni tat-taħriġ....................................................................................................................................... 7

2.3.4.......... Approvazzjoni taċ-ċentri ta' taħriġ........................................................................................................................ 7

2.4............. Drittijiet akkwiżiti – Artikolu 4............................................................................................................................... 8

2.5............. Kwalifika inizjali – Artikolu 5................................................................................................................................. 8

2.6............. CPC li jikkonferma l-kwalifika inizjali – Artikolu 6............................................................................................. 10

2.7............. Taħriġ perjodiku – Artikolu 7.............................................................................................................................. 10

2.8............. CPC li jikkonferma t-taħriġ perjodiku – Artikolu 8............................................................................................ 11

2.9............. Post ta' taħriġ – Artikolu 9................................................................................................................................... 11

2.10........... Kodiċi tal-Komuità – Artikolu 10........................................................................................................................ 12

2.11........... Ħtiġijiet minimi ta' kwalifika u taħriġ – Anness I............................................................................................... 13

3................ Konklużjonijiet u rakkomandazzjonijiet.............................................................................................................. 13

3.1............. Evalwazzjoni ġenerali tal-applikazzjoni tad-Direttiva 2003/59/KE.................................................................. 13

3.2............. Aspetti prinċipali li jridu jiġu mtejba u rakkomandazzjonijiet.......................................................................... 14

Anness....................................................................................................................................................................................... 15

RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

dwar l-implimentazzjoni tad-Direttiva 2003/59/KE fir-rigward tal-kwalifika inizjali u taħriġ perjodiku ta' sewwieqa ta' ċerti vetturi tat-triq għat-trasport ta' prodotti jew passiġġieri

1.           Tagħrif ġenerali

1.1.        Introduzzjoni

Skont l-Artikolu 13 tad-Direttiva 2003/59/KE[1], il-Kummissjoni għandha tibgħat rapport lill-Parlament Ewropew, lill-Kunsill, lill-Kumitat Soċjali u Ekonomiku Ewropew u lill-Kumitat tar-Reġjuni li jagħmel valutazzjoni inizjali tal-implimentazzjoni tad-Direttiva, b'mod partikolari dwar l-ekwivalenza tad-diversi sistemi ta' kwalifika inizjali msemmija fl-Artikolu 3 u l-effiċjenza tagħhom.

Dan ir-rapport huwa bbażat fuq it-tweġibiet mogħtija mill-Istati Membri u min-Norveġja dwar kwestjonarju mqassam lill-awtoritajiet nazzjonali fi Frar 2011.

Ħafna mill-Istati Membri wieġbu bis-sħiħ il-mistoqsijiet indirizzati. Madanakollu, xi wħud ma kellhomx id-dejta kollha neċessarja biex jipprovdu t-tagħrif kollu.

1.2.        Id-Direttiva 2003/59/KE – elementi bażiċi

Id-Direttiva 2003/59/KE dwar il-kwalifika inizjali u t-taħriġ perjodiku ta' sewwieqa ta' trakkijiet jew karozzi tal-linja ġiet adottata biex tiżgura livell komuni ta' taħriġ għal dawn is-sewwieqa bil-ħsieb li titjieb is-sikurezza fit-toroq tal-Ewropa.

Id-Direttiva tistabbilixxi l-kwalifika inizjali u t-taħriġ perjodiku obbligatorji għal sewwieqa professjonali li huma ċittadini tal-Istati Membri jew li qed jaħdmu għal impriża bbażata fl-Unjoni Ewropea. L-għan tagħhom huwa li jiżguraw li sewwieqa professjonali jkollhom il-kwalifiki neċessarji biex isuqu vettura. Il-kwalifika inizjali u t-taħriġ perjodiku huma attestati b'ċertifikat li jinħareġ lis-sewwieqa, imsejjaħ iċ-Ċertifikat ta' Kompetenza Professjonali (CPC).

It-taħriġ huwa organizzat miċ-ċentri ta' taħriġ approvati mill-Istati Membri.

1.3.        It-traspożizzjoni tad-Direttiva 2003/59/KE

Skont l-Artikolu 14, l-iskadenza għat-traspożizzjoni tad-Direttiva kienet l-10 ta' Settembru 2006.

L-iskadenza għall-implimentazzjoni tal-kwalifika inizjali kienet l-10 ta' Settembru 2008 għas-sewwieqa b'liċenzja tas-sewqan tal-kategoriji D1, D1+E, D jew D+E (karozzi tal-linja) u l-10 ta' Settembru 2009 għas-sewwieqa b' liċenzja tas-sewqan tal-kategoriji C1,C1+E,C jew C+E (tat-trakkijiet).

L-Istati Membri kollha ttrasponew u implimentaw id-Direttiva.

2.           L-implimentazzjoni tad-Direttiva 2003/59/KE

2.1.        Kamp ta' applikazzjoni tad-Direttiva – Artikolu 1

Id-Direttiva tapplika għax-'xogħol ta' sewqan' magħmul mis-sewwieqa li huma ċittadini ta' Stat Membru jew ċittadini ta' pajjiżi terzi impjegati minn impriża stabbilita fi Stat Membru, u li jużaw vetturi li jeħtieġu liċenzja tas-sewqan tal-kategorija C jew D.

Huwa stmat li d-Direttiva tkopri s-sewwieqa ta' madwar sitt miljun vettura fl-Ewropa[2].

Il-kopertura tad-dejta li tikkonċerna l-għadd ta' sewwieqa minn pajjiżi terzi mhijiex kompluta jew biżżejjed. Meta din hija disponibbli, fil-maġġoranza tal-każijiet l-għadd huwa ħafna anqas meta mqabbel mal-popolazzjoni totali ta' sewwieqa[3].

Fil-maġġoranza tal-Istati Membri, iċ-Ċertifikati ta' Kompetenza Professjonali li jiċċertifikaw il-kwalifika inizjali maħruġa għal-liċenzji tas-sewqan C huma iktar komuni minn dawk maħruġa għal-liċenzji tas-sewqan D.

2.2.        Eżenzjonijiet – Artikolu 2

Id-Direttiva teskludi diversi kategoriji ta' sewwieqa mill-kamp ta' applikazzjoni tagħha[4].

Il-maġġoranza tal-Istati Membri japplikaw bis-sħiħ l-eżenzjonijet skont l-Artikolu 2. Madanakollu, ir-Rumanija ma tapplikax l-eżenzjonijiet imsemmija fl-Artikolu 2(e), (f) u (g). In-Norveġja tapplika l-eżenzjonijiet kollha barra dawk ta' 2(f): 'vetturi użati għal ġarr ta' passiġġieri jew prodotti, għal użu privat u mhux kummerċjali'.

Skont l-Artikolu 2(g), 'Din id-Direttiva m'għandhiex tapplika għal sewwieqa ta' vetturi li jġorru materjali jew tagħmir biex ikun użat mis-sewwieq waqt ix-xogħol tiegħu, bil-kundizzjoni li s-sewqan tal-vettura ma jkunx ix-xogħol ewlieni tas-sewwieq'. L-implimentazzjoni ta' din l-eżenzjoni wasslet, għal interpretazzjonijiet differenti ta' xi wħud mill-kategoriji ta' sewwieqa[5] (eż. sewwieqa ta' krejnijiet, mekkaniks li jsuqu vetturi li jġorru makkinarju agrikolu bil-ħsara, eċċ.): is-sewwieqa kkonċernati japplikaw biex ikunu eżentati iżda l-amministrazzjonijiet pubbliċi xorta jridu jinkluduhom mal-kamp ta' applikazzjoni tad-Direttiva. Jistgħu jkunu utli xi linji gwida biex jiċċaraw il-kwistjoni.

2.3.        Kwalifika u taħriġ – Artikolu 3

Skont l-Artikolu 3, is-sewqan huwa suġġett għal kwalifika inizjali u taħriġ perjodiku obbligatorji.

Is-sezzjoni 1 tal-Anness 1 tiddeskrivi s-suġġetti li jridu jkunu koperti mit-taħriġ.

Is-suġġetti huma organizzati madwar tliet temi prinċipali: 'Taħriġ avvanzat f'sewqan razzjonali msejjes fuq regolamenti ta' sigurtà', 'Applikazzjoni tar-regolamenti' u 'Saħħa, sigurtà tat-triq u tal-ambjent, servizz u loġistika'.

Dawn it-temi huma organizzati f'għanijiet abbażi tal-liċenzja tas-sewqan li jirreferu għaliha.

2.3.1.     Kwalifika inizjali obbligatorja

L-Istati Membri huma mistennija jistabbilixxu sistema ta' kwalifika inizjali li tikkonsisti jew f'attendenza għal kors flimkien ma' eżami jew, f'eżamijiet tat-teorija u l-prattika.

2.3.1.1.  Sistema li tiġbor fiha kemm attendenza għall-kors kif ukoll eżami

Bl-ewwel sistema, il-kwalifika inizjali trid tinkludi kors li jkopri s-suġġetti kollha mniżżla fis-Sezzjoni 1 tal-Anness 1. Kull sewwieq li jkun qed jitħarreġ irid isuq mill-anqas 20 siegħa waħdu f'vettura li tissodisfa r-rekwiżiti għal vetturi tat-testijiet kif imfisser fid-Direttiva 91/439/KEE[6]. It-taħriġ idum 280 siegħa. Għandu jkun enfasizzat li dan it-taħriġ ma għandux isir flimkien ma' taħriġ għal tipi oħra ta' kwalifiki (eż. għat-trasport ta' oġġetti perikolużi).

Fl-aħħar tat-taħriġ, l-awtoritajiet kompetenti jfasslu eżami bil-miktub jew orali għas-sewwieq. L-eżami jrid jinkludi mill-anqas mistoqsija waħda dwar kull għan għas-suġġetti mniżżla fis-sezzjoni 1 tal-Anness 1.

2.3.1.2.  Sistema bl-eżamijiet

Bit-tieni sistema, l-awtoritajiet kompetenti jorganizzaw eżamijiet teoriċi u prattiċi biex jivverifikaw jekk is-sewwieq li jkun qed jitħarreġ ikunx laħaq il-livell ta' għarfien meħtieġ fis-Sezzjoni 1 tal-Anness 1 għas-suġġetti u l-għanijiet imniżżla hemmhekk.

Kif imsemmi fil-punt 2.2 tal-Anness I, l-eżami tat-teorija għandu jikkonsisti mill-anqas f'żewġ taqsimiet: mistoqsijiet b'għażliet diversi, mistoqsijiet li jeħtieġu tweġiba diretta, jew taħlita tat-tnejn, u studju tal-każijiet. It-test tat-teorija għandu jieħu mill-anqas 4 sigħat.

L-eżami prattiku għandu jikkonsisti f'żewġ taqsimiet: test tas-sewqan ta' 90 minuta biex jivvaluta t-taħriġ fis-sewqan razzjonali, imsejjes fuq regolamenti tas-sikurezza, u test prattiku li jkopri mill-anqas il-ħila li titgħabba il-vettura (liċenzji tas-sewqan C u D), il-ħila li jiġu żgurati l-kumdità u s-sikurezza tal-passiġġieri (D), il-ħila li jiġu evitati r-riskji fiżiċi (C, D) u l-ħilali jiġu vvalutati s-sitwazzjonijiet ta' emerġenza (C, D).

Dan it-test għandu jieħu mill-anqas 30 minuta.

Ħmistax-il Stat Membru u n-Norveġja għażlu s-sistema tal-kors u l-eżami filwaqt li 11-il Stat Membru jħaddmu l-għażla tal-eżamijiet teoriċi u prattiċi.. Il-Ġermanja implimentat iż-żewġ sistemi fil-liġi nazzjonali u s-sewwieq jista' jagħżel (Tabella 1).

Tabella 1 – Is-sistema ta' kwalifika inizjali fl-Istati Membri u fin-Norveġja

Testijiet biss || L-Awstrija, il-Belġju, Ċipru, il-Greċja, l-Irlanda, il-Latvja, Malta, il-Pajjiżi l-Baxxi, il-Portugall, ir-Rumanija, ir-Renju Unit

Kors u test || Il-Bulgarija, ir-Repubblika Ċeka, id-Danimarka, l-Estonja, il-Finlandja, Franza, l-Ungerija, l-Italja, il-Litwanja, il-Lussemburgu, in-Norveġja, il-Polonja, is-Slovakkja, is-Slovenja, Spanja, l-Isvezja

It-tnejn || Il-Ġermanja

L-Istati Membri jikkooperaw ma' diversi organizzazzjonijiet li jżommu d-dejta għall-kwalifika inizjali u t-taħriġ perjodiku, bħal awtoritajiet nazzjonali u reġjonali[7], amministrazzjonijiet[8], aġenziji[9], direttorati[10], ministeri li għandhom x'jaqsmu mat-trasport u s-sikurezza fit-toroq[11], intrapriżi statali[12], u ċentri speċjali stabbiliti għal dan l-iskop[13].

2.3.1.3.  Kwalifika inizjali aċċellerata

Il-kwalifika inizjali tista' tkun aċċellerata, ibbażata fuq kors obbligatorju ta' 140 siegħa u eżami, u tiġi ċċertifikata miċ-CPC.

Kull sewwieq li jkun qed jitħarreġ irid isuq mill-anqas għaxar sigħat waħdu.

Fl-aħħar tat-taħriġ, l-awtoritajiet kompetenti ifasslu eżami bil-miktub jew orali għas-sewwieq. L-eżami jrid jinkludi mill-anqas mistoqsija waħda dwar kull għan għas-suġġetti mniżżla fis-Sezzjoni 1 tal-Anness 1.

Il-kwalifika inizjali aċċellerata, li tibqa' fakultattiva, hija offruta minn 19-il Stat Membru u min-Norveġja (ara Tabella 2).

Tabella 2 – Is-sistema ta' kwalifika inizjali aċċellerata fl-Istati Membri u fin-Norveġja

Stati Membri li joffru l-kwalifika inizjali aċċellerata || Il-Bulgarija, il-Belġju, ir-Repubblika Ċeka, id-Danimarka, l-Estonja, il-Finlandja, Franza, il-Ġermanja, l-Ungerija, l-Italja, il-Litwanja, il-Lussemburgu, il-Polonja, il-Portugall, ir-Rumanija, is-Slovakkja, is-Slovenja, Spanja, l-Isvezja, u n-Norveġja

Stati Membri li ma joffrux il-kwalifika inizjali aċċellerata || L-Awstrija, Ċipru, il-Greċja, l-Irlanda, il-Latvja, Malta, il-Pajjiżi l-Baxxi, u r-Renju Unit

Skont id-Direttiva, Stat Membru jista' wkoll jawtorizza sewwieq isuq fuq it-territorju tiegħu qabel ma jikseb CPC.

2.3.2.     Taħriġ perjodiku obbligatorju

L-Istati Membri huma mistennija jistabbilixxu sistema ta' taħriġ perjodiku bbażata fuq attendenza obbligatorja għal kors, iċċertifikat minn CPC.

2.3.3.     Organizzazzjoni tat-taħriġ

It-taħriġ huwa ġeneralment mogħti minn skejjel tas-sewqan, iżda jista' jkun mogħti wkoll minn korpi mingħajr skop ta' qligħ, skejjel jew kulleġġi vokazzjonali, skejjel tal-edukazzjoni għolja[14], jew skejjel sekondarji[15].

F'xi wħud mill-Istati Membri[16], it-taħriġ huwa parzjalment iffinanzjat mis-settur pubbliku.

2.3.4.     Approvazzjoni taċ-ċentri ta' taħriġ

Skont is-Sezzjoni 5 tal-Anness 1, iċ-ċentri ta' taħriġ li jagħtu l-kwalifika inizjali u t-taħriġ perjodiku jridu jkunu approvati mill-awtoritajiet kompetenti tal-Istati Membri. L-approvazzjoni tista' tingħata biss wara li ssir applikazzjoni bil-miktub. L-applikazzjoni trid tiġi akkumpanjata minn dokumenti dwar il-programm ta' taħriġ u l-metodi ta' tagħlim; il-kwalifiki tal-għalliema; il-post fejn isiru l-korsijiet, il-flotta ta' vetturi użati; u l-għadd ta' parteċipanti.

L-awtorità kompetenti għandha tagħti l-approvazzjoni bil-miktub, bil-kundizzjoni li t-taħriġ jingħata b'konformità mad-dokumenti li jakkumpanjaw l-applikazzjoni.

Hija intitolata tibgħat persuni awtorizzati biex ikunu preżenti waqt il-korsijiet ta' taħriġ.

2.4.        Drittijiet akkwiżiti – Artikolu 4

Id-Direttiva teżenta mir-rekwizit li jiksbu l-kwalifika inizjali lis-sewwieqa li għandhom liċenzja tas-sewqan tal-kategorija D maħruġa qabel Settembru 2008 u s-sewwieqa li għandhom liċenzja tas-sewqan tal-kategorija C maħruġa qabel Settembru 2009.

L-awtoritajiet tal-infurzar ma rrapurtaw l-ebda diffikultà kbira bir-rikonoxximent tad-drittijiet akkwiżiti ta' sewwieqa li huma ċittadini u dawk li mhumiex.

L-amministrazzjonijiet nazzjonali taw tagħrif lis-sistema tal-infurzar billi pereżempju jiċċirkolaw id-Direttiva u l-liġijiet ta' traspożizzjoni, jorganizzaw taħriġ u laqgħat ad hoc ma' uffiċjali tal-pulizija, jibagħtu ittri u atti amministrattivi, jippubblikaw gwidi fuq l-Internet, eċċ. F'xi wħud mill-Istati Membri, ir-regolamenti nħarġu għal konsultazzjoni pubblika, u l-pulizija kienet waħda mill-korpi konsultattivi fil-proċess ta' smigħ[17]. Barra minn hekk, l-awtorità tal-infurzar fir-Rumanija u fin-Norveġja hija wkoll il-korp li joħroġ iċ-CPC.

L-awtoritajiet tal-infurzar jistgħu jużaw diversi mezzi biex jivverifikaw id-drittijiet akkwiżiti tas-sewwieqa li huma ċittadini u ta' dawk li mhumiex, b'mod partikolari billi jiċċekkjaw id-data meta nħarġet il-liċenzja tas-sewqan jew l-awtentiċità tagħha. Jistgħu jikkuntattjaw ukoll l-awtorità tal-ħruġ jew jikkonsultaw, meta din tkun disponibbli, il-bażi ta' dejta li għandha d-dejta għall-kwalifika inizjali u għat-taħriġ perjodiku.

Skont l-Istati Membri, dan l-aspett tad-Direttiva ma joħloq l-ebda problema kbira. Madanakollu, tfeġġ diffikultà meta tiġġedded il-liċenzja tas-sewqan u ma jkunx għad baqa' fiha d-data ta' meta nħarġet għall-ewwel darba. Hemm ukoll inċertezza dwar kif għandhom jiġu infurzati r-regolamenti minħabba li d-diversi Stati Membri u n-Norveġja jinsabu fi stadji differenti tal-applikazzjoni tad-Direttiva. Din is-sitwazzjoni tolqot biss lil ftit sewwieqa u tiġi solvuta faċilment permezz tal-iskambju dirett ta' tagħrif bejn l-awtoritajiet nazzjonali.

2.5.        Kwalifika inizjali – Artikolu 5

Id-Direttiva tistabbilixxi l-età minima għas-sewqan ta' vetturi maħsuba għat-trasport ta' prodotti jew passiġġieri, b'konformità mal-kriterji differenti bħall-kategorija tal-liċenzja tas-sewqan, it-tul tat-taħriġ biex tinkiseb il-kwalifika inizjali, u d-distanza vvjaġġata.

Tabella 3 – Sommarju tar-rekwiżiti li jikkonċernaw il-kwalifika inizjali għal sewwieqa ġodda (Art. 5)

Il-vettura || Rekwiżit għall-liċenzja || Rekwiżit taċ-CPC || L-età

Trasport ta' oġġetti || C — C+E || Normali || 18

C1 — C1+E || Aċċellerat || 18

C — C+E || Aċċellerat || 21

Trasport ta' passiġġieri || D — D+E Fuq servizzi u rotta regolari ≤ 50 km || Normali || 18 Fit-territorju tagħhom

Aċċellerat || 21

D — D+E || Normali || 21

20 sena jekk fit-territorju tagħhom. Tista' titnaqqas għal 18-il sena meta ma jkunx hemm passiġġieri.

Aċċellerat || 23

|| D1 — D1+E || Normali || 18 Fit-territorju tagħhom

|| || Aċċellerat || 21

Il-fatt li tinkiseb kwalifika inizjali ma jeħtieġx li l-liċenzja tas-sewqan korrispondenti tinkiseb minn qabel.

Għalhekk, fi 13-il Stat Membru u fin-Norveġja[18], il-kwalifika inizjali tista' tkun magħquda ma' taħriġ biex tinkiseb il-liċenzja tas-sewqan (ara t-Tabella 4).

Tabella 4 – Taħlita ta' taħriġ għal-liċenzja tas-sewqan C jew D u tal-kwalifika inizjali fl-Istati Membri u fin-Norveġja

Stati Membri li jgħaqqdu t-taħriġ għal-liċenzja tas-sewqan C jew D u l-kwalifika inizjali || L-Awstrija, il-Belġju, id-Danimarka, l-Estonja, il-Ġermanja, il-Greċja, l-Irlanda, il-Latvja, il-Litwanja, Malta, il-Pajjiżi l-Baxxi (parzjalment), in-Norveġja, l-Isvezja, ir-Renju Unit

Stati Membri li ma jgħaqqdu t-taħriġ għal-liċenzja tas-sewqan C jew D u l-kwalifika inizjali || Il-Bulgarija, ir-Repubblika Ċeka, il-Finlandja, Franza, l-Ungerija, l-Italja, il-Lussemburgu, il-Polonja, il-Portugall, ir-Rumanija, is-Slovakkja, is-Slovenja, Spanja

Xi wħud mill-Istati Membri li jgħaqqdu t-taħriġ għal-liċenzja tas-sewqan u l-kwalifika inizjali għażlu li jgħaqqdu t-taħriġ għal-liċenzji tas-sewqan C u D kemm mal-kwalifika inizjali kif ukoll mal-kwalifika inizjali aċċellerata, filwaqt li oħrajn jeħtieġu li s-sewwieqa li jkunu qed jitħarrġu, jiksbu ċertu grad ta' progress fil-programm tal-liċenzja tas-sewqan qabel ma jibdew il-kwalifika inizjali.

Il-maġġoranza tal-Istati Membri ma jippermettux il-ħruġ ta' CPC qabel ma tinkiseb il-liċenzja tas-sewqan relattiva. Madanakollu, il-Belġju jaċċetta dan bħala taħriġ magħqud, l-Awstrija teħtieġ biss l-eżami tat-teorija biex wieħed jgħaddi minn qabel, u l-Litwanja teħtieġ li s-sewwieq ikollu biss liċenzja tas-sewqan tal-kategorija B. Għalkemm, ġeneralment, in-Norveġja teħtieġ liċenzja tas-sewqan qabel ma jinħareġ iċ-CPC, teżenta s-sewwieqa li jkunu qed jagħmlu apprentistat jew taħriġ vokazzjonali.

2.6.        CPC li jikkonferma l-kwalifika inizjali – Artikolu 6

L-Istati Membri joħorġu ċ-CPC lis-sewwieqa li attendew it-taħriġ u għaddew mill-eżami jew li għaddew mill-eżamijiet tat-teorija u l-prattika, skont is-sistema li jkunu għażlu.

Jekk Stat Membru jkun għażel is-sistema li tikkonsisti f'kors u eżami, jew il-kwalifika inizjali aċċellerata, il-kors ta' taħriġ ikopri s-suġġetti mniżżla f'Sezzjoni 1 tal-Anness 1 tad-Direttiva. Dan jiġi segwit b'test bil-miktub jew orali.

Jekk Stat Membru jagħżel l-eżamijiet biss, is-sewwieqa iridu jgħaddu mill-eżamijiet tat-teorija u l-prattika kif deskritti fil-punt 2.2 tal-Anness 1.

L-Istati Membri ma rrappurtaw l-ebda diffikultà li tikkonċerna l-implimentazzjoni tal-Artikolu.

2.7.        Taħriġ perjodiku – Artikolu 7

It-taħriġ perjodiku għandu jippermetti lis-sewwieqa jaġġornaw l-għarfien essenzjali għal xogħolhom. Jimmira li jespandi u jirrevedi xi wħud mis-suġġetti deskritti fis-sezzjoni 1 tal-Anness I.

It-taħriġ perjodiku għandu jieħu 35 siegħa kull ħames snin, mogħtija f'sessjonijiet ta' mill-anqas seba' sigħat, kif imsemmi f'Sezzjoni 4 tal-Anness I.

Il-maġġoranza tal-Istati Membri jippermettu li s-sewwieqa jattendu sessjoni waħda ta' seba' sigħat. Madanakollu, jiffissaw rekwiżiti speċifiċi prinċipalment dwar il-perjodu ta' żmien li fih il-35 siegħa ta' taħriġ għandhom jitlestew.

Għal xi Stati Membri, dan il-perjodu jista' jkun ta' 6 jew 3 xhur, sena jew saħansitra ġimgħa[19]. Stati Membri oħrajn speċifikaw ukoll l-għadd ta' sessjonijiet ta' 7 sigħat li fihom huwa maqsum it-taħriġ: eż. żewġ sessjonijiet tal-kors ta' 7 sigħat, żewġ moduli separati li jinkludu 3 ijiem ta' taħriġ għal 7 sigħat u jumejn ta' taħriġ għal 7 sigħat, 5 ijiem konsekuttivi jew żewġ sessjonijiet ta' 3 ijiem u jumejn, rispettivament[20], eċċ.

2.8.        CPC li jikkonferma t-taħriġ perjodiku – Artikolu 8

L-Istati Membri joħorġu ċ-CPC lis-sewwieqa li jkunu lestew it-taħriġ perjodiku.

It-taħriġ perjodiku jrid isir mis-sewwieqa l-ġodda fi żmien ħames snin wara li jiksbu ċ-CPC għall-kwalifika inizjali, u mis-sewwieqa li għandhom id-drittijiet akkwiżiti, skont l-iskeda ffissata mill-Istat Membru tagħhom.

Id-Direttiva teżenta mir-rekwizit li jiksbu kwalifika inizjali lis-sewwieqa li għandhom liċenzja tas-sewqan tal-kategorija D maħruġa qabel Settembru 2008 u s-sewwieqa li għandhom liċenzja tas-sewqan tal-kategorija C maħruġa qabel Settembru 2009. Għas-sewwieqa li għandhom dawn id-drittijiet akkwiżiti, l-Istati Membri adottaw skedi nazzjonali li jlestu l-ewwel kors ta' taħriġ perjodiku sad-dati ta' skadenza tal-2015 (liċenzja tas-sewqan tal-kategorija D) u l-2016 (liċenzja tas-sewqan tal-kategorija C).

Ġie miftiehem ir-rikonoxximent reċiproku tal-perjodi ta' tranżizzjoni deċiżi mill-Istati Membri[21]. Għalhekk, sad-dati ta' skadenza tal-2015 (vettura tal-kategorija D) u l-2016 (vettura tal-kategorija C), is-sewwieqa ma jistgħux ikunu ppenalizzati fi kwalunkwe Stat Membru talli li ma lestewx it-taħriġ perjodiku.

L-Istati Membri għażlu kriterji differenti biex jistabbilixxu l-iskedi nazzjonali tagħhom għat-taħriġ perjodiku tas-sewwieqa li għandhom id-drittijiet akkwiżiti. Dawn jistgħu jkunu bbażati pereżempju fuq id-data ta' meta nħarġet il-liċenzja tas-sewqan, jum għeluq snin is-sewwieq, id-data ta' skadenza tal-liċenzja tas-sewqan, l-età tas-sewwieq, jew in-numru tal-liċenzja tas-sewqan.

L-iskedi nazzjonali huma inklużi fl-Anness.

2.9.        Post ta' taħriġ – Artikolu 9

Is-sewwieqa li huma ċittadini ta' Stat Membru tal-UE jridu jiksbu l-kwalifika inizjali fl-Istat Membru fejn huma normalment residenti, filwaqt li s-sewwieqa li huma ċittadini ta' pajjiżi terzi jridu jiksbu l-kwalifika fl-Istat Membru fejn hu stabbilit l-impjegatur tagħhom jew fl-Istat Membru fejn kisbu l-permess tax-xogħol.

Is-sewwieqa għandhom jagħmlu t-taħriġ perjodiku fl-Istat Membru fejn huma normalment residenti jew fejn jaħdmu.

Fir-rigward tar-rikonoxximent tat-taħriġ preċedenti għas-sewwieqa li jbiddlu l-pajjiż ta' residenza jew il-pajjiż fejn jaħdmu, il-maġġoranza tal-Istati Membri jeħtieġu ċertifikat jew evidenza tat-taħriġ li diġà sar[22].

L-Istati Membri ma rrappurtaw l-ebda diffikultà li tikkonċerna l-implimentazzjoni ta' dan l-Artikolu. Madanakollu, f'xi każijiet iżolati, mhux dejjem jirrikonoxxu taħriġ preċedenti li jkun segwit b'mod parzjali fi Stat Membru ieħor u jaċċettaw biss taħriġ li jitlesta fit-territorju tagħhom.

2.10.      Kodiċi tal-Komuità – Artikolu 10

L-awtoritajiet kompetenti jniżżlu l-kodiċi 95, li jservi bħala prova ta' konformità mar-rekwiżiti tat-taħriġ, jew fil-liċenzja tas-sewqan jew f'karta ta' kwalifika seperata tas-sewwieq.

13-il Stat Membru għażlu li jniżżlu l-kodiċi fil-karta ta' kwalifika tas-sewwieq u 12-il Stat Membru li jniżżluh fil-liċenzja tas-sewqan. Fil-Finlandja, huma possibbli ż-żewġ għażliet, filwaqt li fil-Lussemburgu l-kodiċi huwa mmarkat fuq il-liċenzja tas-sewqan u wkoll fuq il-karta tas-sewwieqa li mhumiex residenti biss.

In-Norveġja tniżżel il-kodiċi 95 fiċ-ċertifikat ta' kompetenza professjonali. Fil-futur, se jitniżżel ukoll fil-liċenzja tas-sewqan (Tabella 5).

Tabella 5 – Kodiċi 95

Stati membri li jniżżlu l-kodiċi 95 fil-liċenzja tas-sewqan || L-Awstrija, il-Belġju, il-Ġermanja, il-Greċja, l-Italja, il-Latvja, il-Litwanja, il-Lussemburgu, Malta, il-Pajjiżi l-Baxxi, il-Polonja, is-Slovenja

Stati membri li jniżżlu l-kodiċi 95 fil-karta ta' kwalifika tas-sewwieq || Il-Bulgarija, Ċipru, ir-Repubblika Ċeka, id-Danimarka, l-Estonja, Franza, l-Ungerija, l-Irlanda, il-Portugall, ir-Rumanija, is-Slovakkja, Spanja, l-Isvezja, ir-Rneju Unit

P || Iż-żewġ għażliet huma disponibbli

Il-Lussemburgu || Il-kodiċi huwa mmarkat fuq il-liċenzja tas-sewqan. Huwa mniżżel fuq il-karta għas-sewwieqa li mhumiex residenti biss.

In-Norveġja || Il-kodiċi 95 huwa mniżżel fiċ-ċertifikat ta' kompetenza professjonali. Fil-futur, se jitniżżel ukoll fil-liċenzja tas-sewqan

2.11.      Ħtiġijiet minimi ta' kwalifika u taħriġ – Anness I

Kif imsemmi hawn fuq (sezzjoni 3.3), is-Sezzjoni 1 tal-Anness I tniżżel is-suġġetti li jridu jitqiesu mill-Istati Membri meta jistabbilixxu l-kwalifika inizjali u t-taħriġ perjodiku għas-sewwieqa.

Is-Sezzjoni 2, li tikkonċerna l-kwalifika inizjali obbligatorja skont l-Artikolu 3(1)(a), teħtieġ li kull sewwieq li jkun qed jitħarreġ isuq mill-anqas 20 siegħa waħdu akkumpanjat minn għalliem. Għas-sewwieqa li jġorru prodotti u jixtiequ jwessgħu l-kwalifiki tagħhom sabiex iġorru l-passiġġieri, jew viċe-versa, peress li diġà għandhom CPC, jeħtieġu biss li jirrepetu l-partijiet speċifiċi għall-kwalifika l-ġdida u jsuqu għal 5 sigħat. Għall-kwalifika inizjali aċċellerata, is-sewwieqa li jkunu qed jitħarrġu jridu jsuqu għal 10 u 2.5 sigħat rispettivament.

Skont is-Sezzjoni 2, (punt 2.1) tal-Anness I, kull sewwieq jista' jsuq għal mhux aktar minn 8 sigħat mill-20 siegħa meħtieġa fuq art speċjali jew fuq simulatur ta' kwalità għolja. Għall-kwalifika inizjali aċċellerata, is-sewwieqa li jkunu qed jitħarrġu jistgħu jsuqu għal mhux aktar minn 4 mill-10 sigħat meħtieġa fuq art speċjali jew fuq simulatur ta' kwalità għolja.

Għall-maġġoranza tal-Istati Membri, ma hemmx il-ħtieġa li s-sewwieqa li jkunu qed jitħarrġu, isuqu fuq art speċjali jew fuq simulatur. Madanakollu, uħud jipprovdu għal din l-għażla.

F'kelma waħda, l-Istati Membri ma ffaċċjaw l-ebda problema kbira biex japplikaw l-Anness I. Kienu rrappurtati xi kwistjonijiet mill-Awstrija u mis-Slovenja dwar il-ħtieġa għal taħriġ prattiku jew dwar is-suffiċjenza tal-lezzjonijiet tat-teorija. Barra minn hekk, ta' min jinnota li l-Belġju jikkunsidra li l-Anness I huwa orjentat iktar lejn is-sewwieqa involuti fi trasport internazzjonali milli dawk li jsuqu distanzi żgħar.

3.           Konklużjonijiet u rakkomandazzjonijiet

3.1.        Evalwazzjoni ġenerali tal-applikazzjoni tad-Direttiva 2003/59/KE

Bl-adozzjoni tad-Direttiva 2003/59/KE, il-leġiżlatur ikkontribwixxa għall-iżgurar ta' livell komuni ta' taħriġ għas-sewwieqa professjonali fl-Unjoni Ewropea bil-ħsieb li tittejjeb b'mod ġenerali s-sikurezza fit-toroq.

Skont ir-riżultati tal-evalwazzjoni, hemm diversi differenzi fost l-Istati Membri fl-applikazzjoni tad-Direttiva 2003/59/KE.

L-ewwelnett, id-Direttiva tippermetti lill-Istati Membri jagħżlu jekk il-kwalifika inizjali jkollix kors u test jew tinvolvi testijiet biss. It-taħriġ perjodiku jista' wkoll ivarja fl-istruttura, peress li jrid jittieħed bħala kors waħdu f'ċerti Stati Membri filwaqt li f'oħrajn il-35 siegħa jistgħu jkunu mifruxa fuq snin differenti.

It-tieninett, il-programmi ta' taħriġ u l-metodi ta' tagħlim mhumiex standardizzati: il-kontenut tal-kors ma jaqbilx bejn l-Istati Membri kif jiġri bl-istess mod li bih jiġi pprovdut it-taħriġ, eż. f'xi Stati Membri huwa permess l-użu ta' moduli kkompjuterizzati flimkien mat-tagħlim tradizzjonali.

Barra minn hekk, ir-rekwiżiti għall-għalliema u l-postijiet fejn isiru l-korsijiet ma jaqblux bejn Stat Membru għal ieħor.

Fl-aħħarnett, l-għadd ta' sewwieqa għal kull klassi, il-flotta ta' vetturi u d-disponibbiltà ta' simulatur ta' kwalità għolja jiddependu miċ-ċentru ta' ttestjar.

Madanakollu, l-ekwivalenza tas-sistemi ta' kwalifika u l-effiċjenza fl-iżgurar tal-kwalifika meħtieġa huma garantiti mis-sistemi ta' taħriġ nazzjonali, li jridu jissodisfaw ir-rekwiżiti fl-Anness 1 fir-rigward tas-suġġetti minimi li jridu jiġu mgħallma u l-istruttura tat-testijiet. Il-monitoraġġ taċ-ċentri ta' taħriġ mill-awtoritajiet nazzjonali jagħti wkoll kontribuzzjoni importanti biex ikun żgurat li t-taħriġ huwa konformi mal-għanijiet tad-Direttiva.

3.2.        Aspetti prinċipali li jridu jiġu mtejba u rakkomandazzjonijiet

Abbażi tar-riżultati li jikkonċernaw l-applikazzjoni tad-Direttiva, xi ftit kwistjonijiet speċifiċi jistgħu jiġu mtejba.

Fir-rigward tal-eżenzjonijiet imniżżla fl-Artikolu 2 tad-Direttiva, il-fatt li diversi Stati Membri japplikaw eżenzjonijiet differenti jista' joħloq problemi għat-traffiku transkonfinali fi ħdan l-UE.

Għalkemm il-Kummissjoni ma għandha l-ebda għarfien ta' dawn il-każijiet, is-sewwieqa professjonali u l-impriżi għadhom ikunu konxji tad-differenzi bejn l-Istati Membri li jikkonċernaw l-applikazzjoni tal-Artikolu 2 tad-Direttiva.

Għalhekk, jista' jkun neċessarju għall-Kummissjoni li toħroġ xi linji gwida, fuq perjodu ta' żmien medju, sabiex tiċċara l-iskop tal-eżenzjonijiet skont l-Artikolu 2.

Fir-rigward tad-differenzi nazzjonali fit-tfassil tal-iskedi tat-taħriġ perjodiku, l-iskambju ta' skedi nazzjonali għandu jgħin biex jegħleb kwalunkwe diffikultà li l-awtoritajiet tal-infurzar jistgħu jiffaċċjaw meta jiċċekkjaw is-sewwieqa minn barra l-pajjiż. Dan jista' jsir fil-Kumitat stabbilit skont l-Artikolu 12.

Peress li d-Direttiva ma tkoprix din il-kwistjoni, huwa essenzjali li tinżamm kooperazzjoni mill-qrib bejn l-Istati Membri, b'mod partikolari fil-Kumitat ta' Taħriġ ta' Sewwieqa Professjonali.

F'dan l-isfond, ġiet stabbilita mill-Kummissjoni lista ta' punti ta' kuntatt nazzjonali sabiex tiġi ffaċilitata l-kooperazzjoni bejn l-Istati Membri.

Fl-aħħar, jidher li fil-futur jkun utli li jiġu involuti mill-qrib imsieħba soċjali u jiġu kkonsultati fuq bażi regolari.

Anness

Skedi nazzjonali għall-implimentazzjoni ta' taħriġ perjodiku għas-sewwieqa bi drittijiet akkwiżiti (dati ta' skadenza biex jattendu l-ewwel kors)

L-Awstrija || Kat. D: 10.9.2013 Kat. C: 10.9.2014

Il-Belġju || Kat. D: 10.9.2015 Kat. C: 10.9.2016

Il-Bulgarija || Kat. D liċenzja tas-sewqan maħruġa: qabel il-31.12.1970: 31.12.2009 mill-1.1.1971 sal-31.12.1980: 31.12.2010 mill-1.1.1981 sal-31.12.1990: 31.12. 2011 mill-1.1.1991 sal-31.12.2000: 31.12. 2012 mill-1.1.2001 sal-10.09.2008: 10.9.2013

Kat. C liċenzja tas-sewqan maħruġa: qabel il-31.12.1970: 31.12.2010 mill-1.1.1971 sal-31.12.1980: 31.12.2011 mill-1.1.1981 sal-31.12.1990: 31.12.2012 mill-1.1.1991 sal-31.12. 2000: 31.12.2013 mill-1.1.2001 sal-10.9.2009: 10.9.2014

Ċipru || Kollha: 26.1.2012

Ir-Repubblika Ċeka || Kollha: 1.8.2011

Id-Danimarka || Kat. D: Data tat-twelid                                       Dati ta' skadenza 1, 2 jew 3                                                 30 .6.2009 4, 5 jew 6                                                 31 .12. 2009 7, 8 jew 9                                                 30.6.2010 10, 11 jew 12                                           31.12.2010 13, 14 jew 15                                           30.6.2011 16, 17 jew 18                                           31.12.2011 19, 20 jew 21                                           30.6.2012 22, 23 jew 24                                           31.12.2012 25, 26 jew 27                                           30.6.2013 28, 29, 30 jew 31    31.12.2013 Kat. C: Data tat-twelid                                        Dati ta' skadenza 1, 2 jew 3                                                  30 .6.2010 4, 5 jew 6                                                  31.12.2010 7, 8 jew 9                                                  30.6.2011 10, 11 jew 12                                            31.12.2011 13, 14 jew 15                                            30.6.2012 16, 17 jew 18                                            31 .12.2012 19, 20 jew 21                                            30 .6.2013 22, 23 jew 24                                            31.12.2013 25, 26 jew 27                                            30 .6.2014 28, 29, 30 jew 31                                      31.12.2014

L-Estonja || Kollha: 1.9.2011

Il-Finlandja || Kat. D: 10.9.2013 Kat. C: 10.9.2014

Franza || Kat. D: 10.9.2011 Kat. C: 10.9.2012

Il-Ġermanja || Kat. D: 10.9.2015 Kat. C: 10 .9.2016

Il-Greċja || Kat. D: 10.9.2013 Kat. C: 10.9.2014

L-Ungerija || Kat. D: 10.9.2013 Kat. C: 10.9.2014

L-Irlanda || Kat. D: 10.9.2009 Kat. C: 10.9.2010

L-Italja || Kat. D: 10.9.2013 Kat. C: 10.9.2014

Il-Latvja || Kat. D: 10.9.2013 Kat. C: 10.9.2014

Il-Litwanja || Kat. D: 10.9.2013 Kat. C: 10.9.2014

Il-Lussemburgu || Kat. D: 10.9.2015 Kat. C: 10.9.2016

Malta || Kat. D: 9.9.2013 Kat. C: 9.9.2014

Il-Pajjiżi l-Baxxi || Kat. D: 10.9.2015 Kat. C: 10.9.2016

Il-Polonja || Kollha: 12.9.2014

Il-Portugall || Kat. D: sewwieqa li attwalment għandhom: 30 sena: sal-10.9.2011 bejn 31 u 40 sena: sal-10.9.2012 bejn 41 u 50 sena: sal-10.9.2013 iktar minn 50 sena: sal-10.9.2015 Kat. C: sewwieqa li attwalment għandhom: 30 sena: sal-10.9.2012 bejn 31 u 40 sena: sal-10.9.2013 bejn 41 u 50 sena: sal-10.9.2014 50 sena: sal-10.9.2016

Ir-Rumanija || Is-sistema ilha fis-seħħ mill-2003

Is-Slovenja Is-Slovakkja || Kat. D: 1.10.2008 Kat. C: 1.10.2009 Kat. D: 10.9.2013 Kat. C: 10 .9.2014

Spanja || a) Kat. D liċenzja tas-sewqan li tispiċċa bi: 1 jew 2: 10.9.2011 3 jew 4: 10.9.2012 5 jew 6: 10.9.2013 7 jew 8: 10.9.2014 9 jew 0: 10.9.2015 b) Kat. C liċenzja tas-sewqan li tispiċċa bi: 1 jew 2: 10.9.2012 3 jew 4: 10.9.2013 5 jew 6: 10.9.2014 7 jew 8: 10.9.2015 9 jew 0: 10.9.2016

L-Isvezja || Kat. D: 10.9.2015 Kat. C: 10.9. 2016

Ir-Renju Unit || Kat. D: 9.9.2013 Kat. C: 9.9.2014

In-Norveġja || Kat. D liċenzja tas-sewqan li tiskadi bejn l-10.9.2011 u l-10.9.2015: data ta' skadenza tal-liċenzja. Kat. D data ta' skadenza tal-liċenzja tas-sewqan: 2008: 2011 2009: 2012 2010: 2013 2011: 10.9.2011 mill-11.9. 2015: 2015 2016: 2014 2017: 2015 2018: 2014 Kat. C liċenzja tas-sewqan li tiskadi bejn l-10.9.2012 u l-10.9.2016: data ta' skadenza tal-liċenzja. Kat. C data ta' skadenza tal-liċenzja tas-sewqan: 2009: 2012 2010: 2013 2011: 2014 qabel l-10.9.2012: 2012 mill- 11.9.2016: 2016 2017: 2015 2018: 2016

[1]               ĠU L 226, 10/09/2003, pp. 4-17, kif emendat.

[2]               Skont il-valutazzjoni tal-impatt, 'On measures enhancing the effectiveness and efficiency of the tachograph system', SEC 2011(948), DĠ MOVE.

[3]               Xi stimi pprovduti mill-awtoritajiet nazzjonali: 510 minn 15 000 fl-Ungerija, bejn 100 u 200 minn 11 000 fil-Polonja, 190 minn 3 042 fil-Portugall, 185 minn 9 571 fir-Rumanija, 24 minn 9 638 fis-Slovakkja, 23 minn 10 136 fir-Renju Unit, l-ebda wieħed minn 8 606 fil-Bulgarija, 3 minn 615 fil-Litwanja.

[4]               Skont l-Artikolu 2, id-Direttiva ma tapplikax għal sewwieqa ta':   (a) vetturi b'veloċità massima awtorizzata li ma taqbiżx il-45 km fis-siegħa;                (b) vetturi użati minn jew taħt il-kontroll tal-forzi armati, protezzjoni ċivili, servizz tat-tifi tan-nar u forzi responsabbli għaż-żamma tal-ordni pubbliku;     (c) vetturi li jkunu qed isirulhom testijiet fit-triq għal skopijiet ta' żvilupp tekniku, tiswija jew manutenzjoni, jew vetturi ġodda jew mibnija mill-ġdid li għadhom ma bdewx jintużaw;           (d) vetturi użati f'każijiet ta' emerġenza jew għal xogħol ta' salvataġġ;        (e) vetturi użati għal lezzjonijiet tas-sewqan għal kull persuna li tkun tixtieq tikseb liċenzja tas-sewqan jew CPC, kif provdut fl-Artikolu 6 u l-Artikolu 8(1);                (f) vetturi użati għal ġarr ta' passiġġieri jew prodotti, għal użu privat u mhux kummerċjali;     (g) vetturi li jġorru materjali jew tagħmir biex ikun użat mis-sewwieq waqt ix-xogħol tiegħu, bil-kundizzjoni li s-sewqan tal-vettura ma jkunx ix-xogħol ewlieni tas-sewwieq.

[5]               Dan it-tagħrif mhux ġej mill-kwestjonarji mibgħuta lura mill-Istati Membri iżda ġie kkomunikat lill-Kummissjoni minn xi awtoritajiet nazzjonali.

[6]               ĠU L 237, 24.8.1991, pp. 1-24.

[7]               L-Awstrija, id-Danimarka, l-Ungerija, l-Irlanda u r-Rumanija.

[8]               In-Norveġja.

[9]               Il-Finlandja u l-Isvezja.

[10]             Il-Greċja, l-Italja u l-Latvja.

[11]             Ċipru, ir-Repubblika Ċeka, il-Lussemburgu u l-Polonja.

[12]             Il-Litwanja.

[13]             Is-Slovenja.

[14]             Pereżempju, dan jiġri fil-Bulgarija.

[15]             Dan huwa l-każ tal-Isvezja.

[16]             Minbarra l-Lussemburgu, fejn it-taħriġ inizjali huwa ffinanzjat mis-settur pubbliku, f'ħafna Stati Membri l-aġenziji nazzjonali għall-impjiegi jagħtu xi tip ta' finanzjament għat-taħriġ.

[17]             Dan huwa l-każ ta' Malta u n-Norveġja.

[18]             In-Norveġja teħtieġ li s-sewwieqa li jkunu qed jitħarrġu, jiksbu ċertu grad ta' progress fil-programm tal-liċenzja tas-sewqan qabel ma jibdew il-programm ta' kwalifika inizjali.

[19]             Id-Danimarka, in-Norveġja, Franza u l-Latvja rispettivament.

[20]             Il-Lussemburgu, ir-Rumanija u Franza rispettivament.

[21]             Il-ftehim intlaħaq fil-laqgħa tal-Kumitat fis-27 ta' Mejju 2009. Intbagħtet nota maħruġa mis-servizzi tal-Kummissjoni lill-membri kollha tal-Kumitat għal aktar tagħrif.

[22]             Fil-Lussemburgu, il-Ministru tat-Trasport jiddeċiedi abbżi ta' każ b'każ, wara li jqis l-opinjoni tal-kummissjoni responsabbli fil-Ministeru tal-Iżvilupp Sostenibbli u l-Infrastruttura. F'Malta, l-awtoritajiet jagħmlu verifika u jsir skambju ta' dejta mal-awtorità kompetenti tal-Istat Membru tas-sewwieq.