52012DC0037

SOMMARJU EŻEKUTTIV

L-Iskema tal-Pensjonijiet tal-Uffiċjali u l-Aġenti l-Oħra tal-Unjoni Ewropea (minn issa 'l quddiem 'il-PSEO') tiffunzjona bħala fond nozzjonali bil-benefiċċji definiti. Minkejja li ma hemm l-ebda fond attwali ta' investiment, huwa kkunsidrat li l-ammont li kien ikun miġbur minn tali fond huwa rifless fl-obbligazzjoni tal-pensjoni ggarantita mill-Artikolu 83 tar-Regolament tal-Persunal u l-Atikolu 4(3) tat-TUE.

Il-PSEO issegwi prinċipju ta’ bilanċ attwarjali u r-rata tal-kontribuzzjoni tal-pensjoni hija l-mekkaniżmu li jżomm l-iskema bbilanċjata. Jekk il-valutazzjoni attwarjali, bbażata fuq parametri varji definiti mir-Regolamenti tal-Persunal, turi li jeħtieġ li tkun applikata rata tal-kontribuzzjoni għall-pensjoni differenti mir-rata fis-seħħ sabiex tkopri d-drittijiet għall-pensjoni miksuba f'sena partikolari, dik ir-rata tkun aġġustatat mill-Kunsill abbażi ta' proposta tal-Kummissjoni u rapport tal-Eurostat. Meta l-membri tal-persunal iħallsu l-kontribuzzjoni tal-pensjoni aġġustata b'din ir-rata, huma jiksbu drittijiet għall-pensjoni għal sena partikolari, li huma protetti minn prinċipju ta' drittijiet miksuba.

Il-PSEO hija skema mandatorja tal-pensjoni okkupazzjonali għall-impjegati taċ-ċivil tal-UE u bħala tali għandha tkun imqabbla ma' skemi tal-pensjonijiet għall-impjegati tas-servizz ċivili fl-Istati Membri u organizzazzjonijiet internazzjonali oħrajn, aktar milli mal-iskemi ġenerali ta' pensjoni nazzjonali għas-settur privat.

1. Il-parametri prinċipali li għandhom ikunu evalwati

L-aspetti kollha tal-iskema tal-pensjoni għandhom ikunu kkunsidrati fl-intier tagħhom, waqt li jitqisu wkoll l-aspetti speċifiċi tas-servizz ċivili tal-UE, sabiex ikunu żgurati pensjonijiet adegwati, sostenibbli u siguri għall-persunal tal-Istituzzjonijiet tal-UE.

Fir-rigward tal-età tal-pensjoni (eta' tal-irtirar normali, mandatorja u minima), l-Istituzzjonijiet tal-UE jidher li huma fi ħdan il-firxa tal-iskemi li jeżistu fl-Istati Membri għall-impjegati tas-servizz ċivili nazzjonali. Jekk il-Proposta tal-Kummissjoni tal-2011 dwar ir-reviżjoni tar-Regolamenti tal-Persunal (minn hawn 'il quddiem 'il-Proposta tal-Kummissjoni') tkun adottata mill-Kunsill u mill-Parlament, l-Istituzzjonijiet tal-UE ikunu konformi ma' dawk l-Istati Membri li huma l-iktar avvanzati fir-riforma tas-sistemi tagħhom tal-pensjonijiet u kompletament konformi mal-orjentazzjonijiet tal-Green Paper lejn sistemi Ewropej għal pensjonijiet adegwati, sostenibbli u siguri (minn hawn 'il quddiem 'il-Green paper'). Ħafna mill-Istati Membri għad jeħtiġilhom iwettqu riformi strutturali għal dan il-għan.

Il-PSEO hija jew konformi jew anki tikkompara b'mod inqas favorevoli (billi tagħti intitolamenti iktar baxxi) mal-iskemi tal-Istati Membri fir-rigward tar-rata ta' akkumulazzjoni, il-bażi għall-pensjonijiet, ir-rata ta' pensjoni massima possibbli għall-pesnjoni u r-rata ta' kontribuzzjonijiet tal-persunal. Il-pensjonijiet fil-PSEO huma aġġustati fl-istess livell bħar-remunerazzjoni fl-Istituzzjonijiet tal-UE. B'riżultat ta' dan, il-pensjonijiet imħallsa mill-PSEO tilfu 5.4%[1] tal-kapaċità tal-akkwist mill-2004.

Fir-rigward tal-progress tal-individwu fl-iskema tas-salarji, minkejja li għandha impatt fuq il-kostijiet tal-pensjoni, is-sistema tal-karrieri ma għandhiex tinbidel jekk l-għan tagħha huwa biss li jintlaħaq iffrankar fuq il-pensjonijiet. L-ewwel kunsiderazzjoni għandha tkun il-ħtieġa li jkun attirat, jinżamm u jkun immotivat il-persunal attiv tal-Istituzzjonijiet tal-UE. Dawn kienu l-kunsiderazzjonijiet li ttieħdu fil-bidla sħiħa tal-istruttura tal-karrieri fl-2004, li stabbilixxit struttura tal-karriera bbażata fuq il-mertu li tipprovdi inċentivi għall-prestazzjoni matul il-karriera kollha.

Il-Kummissjoni kkunsidrat ukoll għadd ta' aspetti oħra ta' politika relatati mal-pensjonijiet elenkati fit-talbiet tal-Kunsill, notevolment ir-rwol tal-pensjonijiet fil-pakkett ġenerali ta' kumpens għall-persunal tal-UE u li jkun żgurat provvediment ġust għall-pensjonijiet fil-futur mal-forza tax-xogħol tal-UE. Il-Kummissjoni waslet għall-konklużjoni li d-dispożizzjonijiet tal-PSEO huma aġġornati u konformi mal-għanijiet ta' politika tal-Istituzzjonijiet tal-UE, kif ukoll mal-orjentazzjonijiet tal-Green Paper.

2. Riflessjoni fuq bidliet possibbli fl-PSEO

Il-ħolqien possibbli ta' fond għall-pensjonijiet jista' jwassal għall-kostijiet addizzjonali, hekk kif il-valur tal-fond nozzjonali ikollu jkun trasferit għal fond ta' investiment. Madanakollu, meta jgħaddi ż-żmien, in-nefqa annwali baġitarja fuq il-pensjonijiet tonqos, għax il-pensjonijiet jitħallsu mill-fond. Inċentivi għall-provvediment ta' pensjoni privata jistgħu jkunu kkunsidrati, għalkemm ċerti kwistjonijiet bħall-kostijiet addizzjonali għall-maniġment u s-sigurtà tal-investiment għandhom ikunu indirizzati.

Il-ħolqien ta' kategorija ta' persunal b'kuntratt fl-2004 ġabet magħha, u se tkompli twassal għal, iffrankar kunsiderevoli. Madanakollu, huwa importanti wkoll li l-istess skema tal-pensjonijiet tinżamm għall-uffiċjali u għall-aġenti kuntrattwali sabiex il-pożizzjonijiet tal-aġenti kuntrattwali jibqgħu attraenti għall-persunal kwalifikat.

Għalhekk il-Kummissjoni tikkonkludi li l-parametri kollha tal-PSEO huma konformi mal-iskemi tal-pensjoni għall-impjegati tas-servizz ċivili nazzjonali tal-Istati Membri. Madanakollu, sabiex tikkonforma mal-orjetazzjonijiet tal-Green Paper, l-iskema ta' rtirar kmieni għandha tkun ristretta, u kemm l-età tal-irtirar normali u kif ukoll dik mandatorja għandhom ikunu posposti sa 65 u 67 rispettivament, hekk kif dispost fil-proposta tal-Kummissjoni.

Fl-aħħar nett, il-Kummissjoni vvalutat l-iffrankar addizzjonali li kieku jirriżulta mill-Proposta tal-Kummissjoni abbażi ta' tlett approċi: in-nefqa annwali għall-pensjonijiet, il-kost tas-servizz li jirrifletti l-kost annwali tad-drittijiet tal-pensjoni u jikkorrispondi għall-ammont li għandu jkun investit fil-fond għall-pensjonijiet li kieku kien jeżisti, u d-dovuti għall-pensjonijiet.

Il-miżuri spjegati fil-Proposta tal-Kummissjoni, jekk adottati, se jkollhom impatt kunsiderevoli f'termini ta' tnaqqis tal-kostijiet tal-pensjoni fuq meddha twila taż-żmien. B'riżultat ta' dawk il-miżuri, in-nefqa annwali għall-pensjonijiet kieku tonqos b'madwar EUR 500 miljun fuq meddha twila ta' żmien, u l-kost tas-servizzi, li jikkorrispondi għall-kost annwali tad-drittijiet tal-pensjoni akkwiżiti, jkun imnaqqas b'9,5% Dan ikollu impatt immedjat fuq l-obbligu tal-pensjonijiet għall-persunal attiv, li jonqos b'14,5%.

1. Introduzzjoni 1.1. Talba għar-rapport

Bħala parti mid-diskussjoni fil-Kunsill rigward ir-rapport tal-Kummissjoni fuq l-Anness XI (analiżi ta' nofs it-terminu)[2], il-Kunsill stieden lill-Kummissjoni biex tagħmel studju dwar l-implikazzjonijiet baġitarja fit-tul tal-kostijiet tal-pensjoni tal-persunal tal-Istituzzjonijiet u l-aġenziji kollha tal-UE. Fit-18 ta' Awwissu 2010 l-Kummissjoni ppreżentat studju tal-Eurostat dwar l-implikazzjonijiet baġitarji fuq terminu twil tal-kostijiet tal-pensjonijiet[3].

Eurostat fakkret il-prinċipji ewlenin tal-PSEO u enfasizzat li "huwa importanti li jkun apprezzat li n-nefqa il-ġdida tal-pensjoni dovuta lill-membru tal-persunal li qed jirtira llum diġà tħallset, taħt il-forma ta' kontribuzzjonijiet għall-pensjoni mħallsa matul il-perjodu ta' servizz ta' dak il-membru tal-persunal"[4]. Meta membri tal-persunal iħallsu l-kontribuzzjoni għall-pensjoni aġġustata b'din ir-rata, huma jiksbu drittijiet għall-pensjoni għal sena partikolari, li hija protetta mill-prinċipju ta' drittijiet akkwiżiti.

L-istudju msemmi hawn fuq indirizza x-xejriet maġġuri fin-nefqa għall-pensjoni tal-PSEO matul 50 sena (2010-2059) u wera li l-PSEO għadha ma mmaturatx. Dan huwa għaliex, minkejja li l-iskema ilha teżisti mill-1962, l-għadd ta' persunal kiber b'riżultat tat-tkabbir suċċessiv tal-UE, ta' kompiti ġodda għall-Istituzzjonijiet tal-UE u tat-tendenza kontinwa li jkunu stabbiliti korpi ġodda tal-UE. Konsegwentament, bejn l-2010 u l-2059, in-numru ta' benefiċjarji se jikber b'109%.

Konsegwenza oħra tal-fatt li l-iskema għadha mhux matura hija li n-nefqa annwali għall-pensjonijiet se tikber matul il-perjodu ta' projjezzjoni. In-nefqa totali għall-pensjoni (bi prezzijiet kostanti) se tiżdied minn EUR 1 235 miljun fl-2010 biex tilħaq il-pik tagħha fl-2045 b'EUR 2 490 miljun, qabel ma tinżel għal EUR 2 259 miljun fl-2059. In-nefqa għall-pensjoni hija għalhekk projjettata tikber iktar bil-mod minn numru ta' pensjonanti u imbagħad se tibda nieżla, prinċipalment minħabba l-effetti tar-riformi tal-2004 fir-Regolamenti tal-Persunal[5].

Eurostat ikkalkulat li l-iffrankar annwali għall-baġit tal-UE bejn l-2010 u l-2059 li rriżulta mir-riforma tal-2004 se jiżdied maż-żmien biex jilħaq EUR 1 047 miljun fl-2059. Dan ifisser li n-nefqa totali tal-pensjoni fl-2059, li hija issa projjettata li tikber bi 83% meta mqabbla mal-2010, kienet se tkun żdidet b'168% mingħajr ir-riforma tal-2004. L-iffrankar totali tal-kost matul 50 sena huwa projettat li jkun EUR 24 785 miljun. Dan jista' jkun saħansitra estimu baxx tal-iffrankar totali mir-riforma tal-2004, għax ma jikkunsidrax iffrankar mill-bidliet għall-pensjonijiet tal-invalidità u tas-superstiti.

Il-Kunsill ħa nota tal-istudju u talab lill-Kummissjoni tagħmel valutazzjoni tal-elementi kollha li għandhom impatt sinifikanti dwar il-kostijiet tal-pensjoni, u sejjaħ lill-Kummissjoni biex waqt il-valutazzjoni tagħha tikkunsidra għadd ta' aspetti ta' politika. Addizzjonalment, il-Kunsill talab lill-Kummissjoni biex sa' tmiem l-2011 tressaq proposti xierqa biex ikunu emendati r-Regolamenti tal-Persunal abbażi ta' din il-valutazzjoni.

L-istruttura tar-rapport preżenti hija konformi mat-talba tal-Kunsill imsemmija hawn fuq.

1.2. Green Paper lejn sistemi ta’ pensjonijiet Ewropej adegwati, sostenibbli u siguri

B'mod parallel mal-proċess imsemmi hawn fuq mibdi mill-Kunsill, il-Green Paper lejn sistemi Ewropej adegwati, sostenibbli u siguri[6], varat dibattitu Ewropew fuq l-isfidi ewlenin li qed jiffaċċaw is-sistemi tal-pensjoni jiġifieri. tixjiħ demografiku u il-kriżi ekonomika u finanzjarja. Hija ddefinit il-prioritajiet għall-immodernizzar tal-politiki tal-pensjoni fl-UE sabiex jinkisbu żewġ objettivi ġenerali predominanti, jiġifieri li jindirizzaw l-adegwatezza tal-pensjonijiet u l-iżgurar tas-sostenibbiltà. Dawn l-objettivi jistgħu jinkisbu, inter alia, billi:

– jinkiseb bilanċ sostenibbli bejn iż-żmien li wieħed ikun qatta' fix-xogħol u ż-żmien mgħoddi fl-irtirar;

– jitneħħew l-ostakoli għal mobilità fl-UE billi jissaħħaħ is-suq intern għall-pensjonijiet u titjieb il-mobilità tal-pensjonijiet;

– ikunu promossi pensjonijiet iktar siguri, u iktar trasparenti b'konoxxenza u informazzjoni aħjar.

2. Metodoloġija 2.1. Approċ kumparattiv

Sabiex ikun ivvalutat jekk il-PSEO hiex konformi mal-iskemi nazzjonali ta' pensjon, il-Kummissjoni użat approċ kumparattiv. Dan l-approċ kien jeħtieġ li tkun definita l-metodoloġija, jiġifieri li jkun definit kampjun kumparabbli, qafas ta' żmien u elementi kumparabbli tal-iskemi differenti tal-pensjonijiet għall-impjegati taċ-ċivil. Ovvjament, waqt il-valutazzjoni tal-elementi separati matul l-iskemi tal-pensjonijiet, għandna niftakru li huma inter-relatati u inter-dipendenti. Għalhekk, huwa biss billi ngħaqdu dawn l-elementi kollha flimkien li nistgħu nipprovdu l-istampa sħiħa ta' skema tal-pensjonijiet partikolari għall-impjegati taċ-ċivil. Fl-istess waqt jeħtiġilna li noqgħodu attenti għall-kumplesssità u l-karatteristiċi partikolari tal-iskemi tal-pensjonijiet li qed jiġu kkumparati.

Meta jkun qed jiġi definit il-qafas ta' żmien jeħtieġ li nżommu f'moħħna d-dinamiżmu u d-diversità tal-iskemi tal-pensjonijiet għall-impjegati taċ-ċivil. Ta' spiss kundizzjonijiet differenti japplikaw għall-impjegati taċ-ċivil skont l-età, id-dipartiment li jaħdmu fih jew il-ġurnata meta kienu bdew jagħtu s-servizz tagħhom (jew id-data tad-dħul tagħhom fis-suq tax-xogħol). Din id-diversità hija inerenti b'mod li r-riformi fl-iskema tal-pensjonijiet ikunu, xi drabi, introdotti b'riżultat tal-ħtieġa li jkunu ppreservati ċert drittijiet akkwiżiti. Sabiex ikun hemm riżultati kumparabbli, dan ir-rapport iqis is-sitwazzjoni preżenti għall-impjegati taċ-ċivil li jidħlu fis-servizz fl-2011 u miżuri tranżitorji li jiddaħħlu fis-seħħ.

2.2. Nikkumparaw kif xieraq

Il-PSEO hija skema obbligatorja okkupazzjonali għall-pensjoni għall-impjegati taċ-ċivil kollha tal-UE u bħala tali għandha tkun imqabbla mal-iskemi tal-pensjoni tal-impjegati taċ-ċivil fl-Istati Membri u organizzazzjonijiet internazjonali oħra aktar milli mal-iskemi nazzjonali ġenerali tal-pensjonijiet għas-settur privat. L-iskemi ġenerali tal-pensjonijiet huma ħafna drabi definiti mill-Istat u normalment ma japplikawx għall-impjegati taċ-ċivil.

Minkejja li f'dan ir-rapport il-Kummissjoni ma qablitx il-PSEO mal-iskema tal-pensjonijiet ta' organizzazzjonijiet internazzjonali oħra, hija tikkunsidra tali tqabbil kumpletament xieraq minħabba l-karatteristiċi simili tal-persunal u n-natura kumparabbli tax-xogħol. Il-Kummissjoni ma teskludix il-possibbiltà li tagħmel tali analiżi fil-futur.

Sabiex tivvaluta jekk il-PSEO hix konformi mal-iskemi tal-pensjonijiet tal-impjegati taċ-ċivil, il-Kummissjoni talbet lill-Istati Membri jirrispondu għall-kwestjonarju dwar l-iskemi tal-pensjonijiet tal-impjegati nazzjonali taċ-ċivili fil-gvern ċentrali. Sitta u għoxrin Stat Membru bagħtu r-risposti tagħhom, waqt li Franza naqset milli tagħmel dan minkejja bosta tfakkiriet. Dan ir-rapport huwa bbażat fuq ir-risposti mibgħuta mill-Istati Membri.

Meta tkun qed tiġi vvalutata l-PSEO, is-sitwazzjoni speċifika tal-persunal tal-UE għandha tkun ikkunsidrata: l-Istituzzjonijiet tal-UE prinċipalment jirrekluataw persunal espatrijat mis-27 Stat Membru li għandhom differenzi sinifikanti bejniethom fis-sistemi tal-pensjoni. Dan mhux il-każ għaċ-ċivil tal-Istati Membri. F'termini ta' organizzazzjonijiet internazzjonali oħra, in-Nazzjonijiet Uniti biss hija ta' daqs kumparabbli u għalhekk huwa diffiċċli li wieħed jikkumpara l-istess affarijiet. Minkejja li l-Kummissjoni tikkunsidra li l-iskemi tal-pensjoni tal-organizzazzjonijiet internazzjonali u l-iskemi nazzjonali tal-pensjoni oħrajn huma l-iktar xierqa għall-għanijiet ta' tqabbil, tali tqabbil għandu limitazzjonijiet inerenti, li huma sottolineati fir-rapport. Pereżempju, bosta skemi fl-Istati Membri huma skemi ta' pagament progressiv, waqt li l-PSEO topera bħala fond nozzjonali.

Il-komponenti kollha tal-iskema tal-pensjoni għandhom ikunu kkunsidrati flimkien, waqt li jitqiesu l-aspetti speċifiċi tas-servizz ċivili tal-UE, sabiex ikunu żgurati pensjonijiet adegwati, sostenibbli u siguri għall-persunal tal-Istituzzjonijiet tal-UE.

L-Istituzzjonijiet tal-UE jirreklutaw prinċipalment persunal espatrijat mis-27 Stat Membru, u jikkompetu fis-suq tax-xogħol internazzjonali ma' organizzazzjonijiet oħra internazzjonali, servizzi diplomatiċi, servizzi tal-gvern ċentrali, kumpaniji multinazzjonali, kumpaniji legali, konsulenti finanzjarji, etc. Huma jeħtieġ li jibqgħu impjegaturi attratenti sabiex iżommu l-bilanċ ġeografiku fost il-persunal u jkunu jistgħu jwettqu l-politiki sabiex jissodisfaw l-aspettativi taċ-ċittadini tal-UE u l-Istati Membri.

2.3. Skemi separati tal-pensjoni għall-impjegati taċ-ċivil

Hemm skemi ta' pensjoni okkupazzjonali separati għall-impjegati taċ-ċivil fl-organizzazzjonijiet internazzjonali kollha, f'madwar nofs il-pajjiżi tad-dinja u fil-maġġoranza tal-Istati Membri tal-UE. Skemi integrati huma universali fl-Istati l-Membri l-ġodda, minkejja li spiss b'regoli differenti għall-gruppi differenti ta' ħaddiema. Fl-Irlanda u Spanja, l-impjegati tas-servizz ċivili huma koperti mill-iskema nazzjonali tal-pensjonijiet, iżda għandhom l-arranġamenti tagħhom biex iżidu fuq l-introjtu tal-irtirar (pensjonijiet addizzjonali bil-benfiċċji addizzjonali għall-impjegati taċ-ċivil). Fir-Renju Unit, l-impjegati taċ-ċivil huma koperti minn parti mill-arranġamenti tal-pensjoni mandatorja li japplikaw għall-ħaddiema tas-settur privat.

Ir-raġunament wara l-provvediment tal-pensjonijiet għall-impjegati taċ-ċivil huwa kemmxejn differenti minn dak li hemm wara l-ħolqien tal-iskemi ġenerali tal-pensjonijiet, li l-għan tagħhom huwa li jiżguraw introjtu adegwat għall-irtirar. L-għanijiet proposti huma dawn li ġejjin: l-iżgurar tal-indipendenza tal-impjegati taċ-ċivil, li karriera fis-servizz pubbliku tkun attraenti, il-posponiment tal-kost tar-remunerazzjoni tal-impjegati pubbliċi għall-futur u l-iżgurar li d-dispożizzjonijiet tal-irtirar għall-impjegati pubbliċi l-iktar anzjani jkun politikament u soċjalment aċċettabbli.

Waqt li l-iskemi tal-pensjonijiet taċ-ċivil jikkondividu xi wħud mill-għanijiet tal-politika soċjali tal-programmi nazzjonali tal-pensjonijiet, huma jridu jakkomodaw ukoll il-politika tar-riżorsi umani tal-impjegatur. Għalhekk il-politika tal-pensjonijiet tas-servizz pubbliku tinvolvi wkoll kwistjonijiet ġenerali tar-remunerazzjoni u l-kumpens tas-servizz pubbliku[7].

3. L-iskema tal-pensjonijiet għall-uffiċjali ewropej (PSEO) 3.1. Il-kunċetti ewlenin 3.1.1. Referenzi legali

Skont l-Artikolu 83 tar-Regolament tal-Persunal

– il-benefiċċji mħallsa skont din l-iskema tal-pensjonijiet għandhom jkunu koperti mill-baġit tal-Unjoni,

– l-Istati Membri għandhom jiggarantixxu b'mod konġunt il-ħlas ta' tali benefiċċji,

– l-uffiċjali għandhom jikkontribwixxu għall-kost tal-iffinanzjar tal-iskema tal-pensjonijiet.

L-Artikolu 83a u l-Anness XII tar-Regolament tal-Persunal stabbilixxew ir-regoli attwarjali għall-komputazzjoni tar-rata ta’ kontribuzzjoni sabiex jiġi ggarantit il-bilanċ tal-iskema tal-pensjonijiet.

Il-benefiċċji mħallsa skont l-iskema huma mniżżla fil-Kapitolu 3 tat-Titolu V tar-Regolamenti tal-Persunal, kif ukoll f-Anness VII tagħhom.

3.1.2. Il-prinċipju tal-fond nozzjonali

Il-Komunità Ewropea tal-Faħam u l-Azzar (KEFA) kellha fond tal-pensjonijiet, iżda kien żmantellat u sostitut mill-fond nozzjonali meta kienu amalgamati l-Istituzzjonijiet tal-Komunitajiet fl-1967. Il-fond nozzjonali twaqqaf għall-Komunità Ekonomika Ewropea bl-adozzjoni tar-regolament tal-Persunal fl-1962.

Wieħed għandu jżomm quddiem għajnejh li l-PSEO ma toperax bħala skema fuq bażi ta' ħlas progressiv. Fi skema progressiva, ir-rata tal-kontribuzzjoni għall-pensjoni jew il-benefiċċji tal-pensjoni huma aġġustati sabiex ikun hemm bilanċ annwali bejn il-kontribut miġbur u n-nefqa għall-pensjonijet. Jekk il-bilanċ ma jistax jintlaħaq, il-baġit jiffinanzja d-differenza permezz tat-taxxi.

Dan mhux il-każ tal-PSEO, fejn il-kontribut għall-pensjoni ikopri l-kost tad-drittijiet għall-pensjoni akkwiżiti f'sena partikolari u mhu marbut bl-ebda mod man-nefqa fuq il-pensjonijiet għal dik is-sena. Meta l-PSEO jilħaq il-maturità, neċessarjament se jkun hemm distakk bejn il-kontribut għall-pensjoni u n-nefqa għall-pensjoni, li hu dovut għall-imgħax li hu applikat fuq il-kontribut miġbur sakemm ikollu jitħallas lura bħala benefiċċji tal-pensjoni.

Għalkemm ma hemm l-ebda fond ta' investiment attwali, huwa kkunsidrat li l-ammont li jkun inġabar għal tali fond, jkun investit fl-Istati Membri (abbażi tar-rati annwali medji tal-imgħax fuq id-dejn pubbliku għal terminu twil tal-Istati Membri) u jkun rifless fl-obbligu tal-pensjonijiet, li huma garantiti mill-Artikolu 83 tar-Regolamenti tal-Persunal u l-Artikolu 4(3) tat-TUE.

Fejn għandu x'jaqsam il-baġit, l-iskema tal-pensjonijiet ipproduċiet dħul nett fil-passat, minħabba li l-persunal attiv ħallas kontributi għal drittijiet tal-pensjonijiet li huma kisbu, waqt li ftit mill-persunal irtirat jew invalidu fil-fatt ħa l-benefiċċji. Id-dħul ikkonsista mill-kontribut tal-pensjoni mħallsa mill-persunal flimkien mal-kontribut tal-impjegatur, li madanakollu ma kienx imħallas f'fond, iżda kien biss rifless fl-obbligu tal-pensjoni.

Fuq terminu itwal, hekk kif persunal attiv joħroġ bil-pensjoni, se jkun hemm żieda inevitabbli fin-nefqa tal-pensjoni. Iż-żieda se tkompli sa madwar iż-żmien meta l-iskema tal-pensjoni tilħaq il-maturità – jiġifieri, sakemm in-numru ta' rtirati deċeduti fi kwalunkwe sena jibbilanċja in-numru ta' benefiċċjarji ġodda. L-ammonti li kieku kienu jkunu koperti mill-fond tal-pensjoni huma issa koperti (u se jibqgħu koperti) mill-baġit u għandhom impatt fuq l-obbligu tal-pensjoni.

Skont l-approċ tal-fond nozzjonali, il-kontributi tal-persunal ma ġewx imwarrba f'fond attwali tal-pensjonijiet, iżda minflok ġew kreditati fuq il-baġit tal-UE meta nġabru u ntefqu skont id-deċiżjonijiet tal-awtorità baġitarja, jiġifieri ma kinux assenjat għal xi qasam politiku partikolari. Fil-każ ta' dak li jifdal, li normalment tikkorispondi għall-parti tal-kontribut tal-impjegatur, kien deċiż li dan ma jinġabarx[8]; minflok, l-Istituzzjonijiet tal-UE daħlu responsabbli li jħallsu l-benefiċċji futuri tal-pensjonijiet (li għandhom ikunu inklużi fil-baġit tal-Unjoni) meta l-persunal jirtira. Skont l-Artikolu 83 tar-Regolamenti tal-Persunal, l-Istati Membri għandhom jiggarantixxu l-ħlas tal-benfiċċji b'mod konġunt. B’riżultat ta' dan il-baġit kien qiegħed, effettivament, jissellef dawn il-flus mill-membri tal-iskema, waqt li jagħti garanzija li jħallas benefiċċji futuri. Dan il-bilanċ tal-ammonti mislufa u l-ammonti mħallsa lura huwa rifless fl-obbligu tal-pensjoni.

Hekk kif il-membri tal-PSEO jilħqu l-età tal-irtirar, il-flus iridu jitħallsu lura lilhom bħala benefiċċji tal-irtirar. Għalhekk, in-nefqa relatat mal-pensjonijiet żdiedet gradwalment fil-passat, u din il-bixra se tkompli sa madwar iż-żmien meta l-iskema timmatura.

B'relazzjoni ma dan it-tkabbir fin-nefqa tal-pensjonijiet, huwa importanti li wieħed jifhem li n-nefqa ġdida tal-pensjonijiet dovuti lill-persunal li qed jirtira fil-preżent kienet diġà mħallsa[9] permezz tal kontributi għall-pensjonijiet imħallsa minn dawk il-membri tal-persunal matul il-perjodu ta' servizz tagħhom, u l-intitolment tal-pensjonijiet tagħhom li għandhom ikunu mħallsa minn meta jirtiraw huma koperti mill-obbligu tal-pensjonijiet.

3.1.3. Il-prinċipju ta’ bilanċ attwarjali

Il-PSEO ssegwi l-prinċipju tal-bilanċ attwarjali. Il-kontribuzzjoni annwali mħallsa mill-persunal trid tkopri terz tad-drittijiet li l-persunal ikun kiseb matul sena partikolari. Id-drittijiet miksuba tal-impjegati taċ-ċivil tal-UE matul sena partikolari jikkorrispondu mal-pensjonijiet futuri li l-persunal se jirċievi wara l-irtirar, kif ukoll l-intitolament (taħt ċerti kundizzjonijiet) għall-benefiċċju ta’ invalidità, pensjoni għas-superstiti, u pensjoni tal-orfni. Fi kliem ieħor, il-kontribuzzjoni annwali hija maħsuba biex tiffinanzja terz tal-kost tas-servizz taħt l-iskema tal-pensjonijiet, jiġifieri sensiela ta’ pagamenti li se jinqalgħu fil-ġejjieni. Sabiex din il-komputazzjoni ssir possibbli, is-sensiela ta’ pagamenti għal impjegati taċ-ċivil Ewropej trid tiġi evalwata fil-valur preżenti tagħha (b’użu ta’ "rata ta’ tnaqqis" tar-rata tal-imgħax). Għaldaqstant, il-komputazzjoni hija valutazzjoni attwarjali.

F’termini tekniċi, il-metodu użat fil-komputazzjoni tar-rata ta’ kontribuzzjoni tal-pensjoni huwa dak preskritt mill-istandard internazzjonali tal-kontabbiltà IPSAS25[10] u msejjaħ “kreditu unitarju mbassar”. Is-somma tal-valuri attwarjali tad-drittijiet miksuba minn membri attivi tal-persunal, imsejħa “kost tas-servizz” fil-prattika attwarjali, hija mqabbla mat-total annwali tas-salarji bażiċi tagħhom sabiex tinħadem ir-rata ta’ kontribut.

Ir-rata ta' kontribut għall-pensjoni żżomm il-PSEO f'bilanċ. Jekk il-valutazzjoni attwarjali, ibbażata fuq parametri varji definiti mir-Regolamenti tal-Persunal, turi li jeħtieġ li tkun applikata rata tal-kontribuzzjoni għall-pensjoni differenti mir-rata fis-seħħ sabiex tkopri d-drittijiet tal-pensjoni miksuba f'sena partikolari, dik ir-rata tkun aġġustatat mill-Kunsill abbażi ta' proposta tal-Kummissjoni.

Il-kontribuzzjonijiet imħallsa matul is-sena attwali ma jiġux ikkalkolati sabiex ikopru l-pagamenti tal-pensjoni għas-sena attwali: huma jistgħu jkunu ogħla jew iktar baxxi. Il-prinċipju ta’ bilanċ attwarjali jiggarantixxi bilanċ għat-tul, mhux bilanċ għal kull sena: dan huwa kunċett differenti minn bilanċ tal-likwidità ta’ kull sena.

4. Analiżi kumparattiva tal-karatteristiċi ewlenin tal-iskemi tal-pensjoni tal-impjegati taċ-ċivil nazzjonali u l-impjegati taċ-ċivil Ewropej 4.1. L-età tal-pensjoni

Il-Green Paper tiddefinixxi "l-età normali għall-pensjoni" bħala l-"età li fiha membru tal-iskema tal-pensjoni jkun eliġibbli biex jirċievi l-benefiċċji sħaħ tal-pensjoni". L-"età mandatorja għall-irtirar" hija l-età li fiha l-kuntratt ta' impjieg jiskadi awtomatikament b'effett tal-età kronoloġika. L-"età effettiva" tal-irtirar hija dik li fiha individu atwalment jirtira. Bħala regola ġenerali, l-età effettiva tal-irtirar x'aktarx tkun iktar baxxa mill-età normali tal-pensjoni. Madanakollu, għal raġunijiet ta' disponibbiltà tad-dejta, l-età li fiha wieħed jitlaq mis-suq tax-xogħol hija spiss użatha minflok l-età effettiva tal-irtirar.

Pereżempju, fl-2008 l-età medja tat-tluq mill-forza lavorattiva fl-Istati Membri[11] varjat bejn il-55,5 fir-Rumanija, 59,3 fi Franza u l-Polonja għal 63,2 fil-Pajjiżi l-Baxxi u 63,8 fl-Isvezzja. L-età medja ta' tluq tal-Istati Membri kollha kienet 61,4. L-età effettiva tal-irtirar fl-Istituzzjonijiet Ewropej tvarja bejn il-61 u t-62 sena.

4.1.1. L-età normali tal-pensjoni

F'għadd ta' Stati Membri l-età normali tal-pensjoni għall-impjegati taċ-ċivil hija iktar baxxa minn dik tal-iskemi ġenerali.

It-tabella segwenti turi l-età normali tal-pensjoni għas-servizzi pubbliċi ċentrali tal-Istati Membri. [12]

NB: Franza mhux inkluża fit-tabella għax ma kinitx irċevuta l-ebda risposta għall-kwestjonarju.

Jekk wieħed iqis biss l-età tal-pensjoni tal-irġiel, għandu jkun issottolineat li l-maġġoranza tal-Istati Membri issettjaw l-età normali tal-pensjoni bejn il-61 u t-63 sena. Fi tliet Stati Membri għadha 60 u f'għaxra telgħet sa 65. F'sitt Stati Membri l-età normali tal-pensjoni hija iktar baxxa għan-nisa milli għall-irġiel u hija 61 jew inqas.

L-età normali tal-pensjoni għall-impjegati taċ-ċivil tal-UE telgħet minn 60 għal 63 (kemm għall-irġiel kif ukoll għan-nisa) fl-2004, b'dispożizzjonijiet trażizzjonali li japplikaw għall-persunal diġà impjegat (li jvarjaw minn 60 sa 63 skont l-età tal-impjegat ċivili fl-1 ta' Mejju 2004). L-età normali tal-pensjoni attwali ta' 63 hija bejn wieħed u ieħor konformi mal-etajiet standard eliġibbli għall-pensjoni għall-impjegati taċ-ċivil fl-Istati Membri. Jekk l-Istituzzjonijiet tal-UE jgħollu l-età normali tal-pensjoni għal 65, din tkun ogħla mill-età normali tal-pensjoni għall-impjegati taċ-ċivil fil-biċċa l-kbira tal-Istati Membri.

4.1.2. L-età mandatorja tal-irtirar

L-età madatorja tal-irtirar hija wkoll indikatur relevanti li għandu jkun osservat meta jkunu deskritti l-iskemi tal-pensjoni. Terz tal-Istati Membri stabbilixxew is-63 jew il-65 sena bħala l-età li fiha l-kuntratt ta' impjieg għall-impjegati taċ-ċivil jiskadi, u f'disa' Stati Membri ma hemm l-ebda limitu massimu tal-età għall-persunal f'impjieg pubbliku. Għandu jkun issottolineat li s-suġġeriment fil-Proposta tal-Kummissjoini hu li l-impjegati taċ-ċivil għandhom jitħallew jaħdmu sal-età massima ta' 67 jekk dan ikun fl-interess tas-servizz. Qabel, dan kien possibbli biss f'ċirkostanzi eċċezzjonali.

NB: Franza mhux inkluża fit-tabella għax ma kinitx irċevuta l-ebda risposta għall-kwestjonarju.

Iż-żieda fl-età mandatorja tal-irtirar se tqiegħed l-Istituzzjonijiet tal-UE fil-kategorija ta' dawk l-Istati Membri li fihom l-impjegati taċ-ċivil għandhom il-possibbiltà li jaħdmu għall-iktar tul ta' żmien, waqt li l-biċċa l-kbira tal-Istati Membri jeħtieġ li jimplimentaw riformi strutturali sabiex jinkoraġġixxu ħajja lavorattiva itwal

4.1.3. L-età tal-irtirar minima

Fir-rigward tal-irtirar kmieni, maġġoranza ta' Stati Membri għandhom eta' minima tal-pensjoni qrib it-58 sena. Madanakollu, għaxar Stati Membri mill-inqas għadhom joffru l-possibbiltà għall-impjegati taċ-ċivil li għandhom ċertu għadd minimu ta' snin ta' servizz li jitilqu mis-servizz qabel ma jagħlqu it-58. Dan huwa l-każ tar-Renju Unit, fejn l-impjegati taċ-ċivil jistgħu jirtiraw fl-età ta' 50 sena.

NB: Franza mhux inkluża fit-tabella għax ma kinitx irċevuta l-ebda risposta għall-kwestjonarju.

Fil-Proposta tagħha, il-Kummissjoni tissuġġerixxi miżuri li jirristrinġu l-aċċess għall-iskemi ta' rtirar kmieni u toroq oħra ta' ħruġ bikri mid-dinja tax-xogħol sabiex jippermettu lill-impjegati taċ-ċivili jibqgħu iktar jaħdmu. Partikolarment, l-għadd ta' membri tal-persunal li jistgħu jieħdu irtirar kmieni mingħajr tnaqqis fid-drittijiet tal-pensjoni ikun imnaqqas u l-età tal-irtirar kmieni tiżdied għal 58. Xi Stati Membri bdew riformi simili, waqt li oħrajn għad iridu jimplimentaw tali miżuri.

4.2. Ir-rata ta' akkumulazzjoni

Il-Green Paper tiddefinixxi r-rata ta' akkumulazzjoni bħala "ir-rata li biha jiġu akkumulati l-benfiċċji ta' pensjonijiet futuri. Hija użata fi skemi definiti tal-benfiċċji u bbażata fuq il-formola marbuta mal-iskema".

Meta jitqabblu r-rati ta' akkumulazzjoni li jeżistu fl-Istati Membri, huwa relevanti li jkunu mqabbla abbażi tal-istess waqt titqies il-bażi ħaġa li tikkomplika ħafna l-eżerċizzju kumpless.

L-ewwel ħaġa, fi kważi tnax-il Stat Membru, parti mill-pensjoni tista' titħallas taħt regoli differenti mir-rati ta' akkumulazzjoni.

Hemm firxa vasta ta' sitwazzjoijiet fi Stati Membri varji li japplikaw rati ta' akkumulazzjoni. Biex nagħtu ftit eżempji,fir-Renju Unit ir-rata ta' akkumulazzjoni tasal sa 2,30% tal-aħħar salarju, fil-Portugal hija bejn it-2,00% u t-2,30% ta' kull sena kalendarja relevanti, fil-Pajjiżi l-Baxxi hija ta' 2,05% tal-introjtu pensjonabbli u fil-Ġermanja, ir-rata takkumula 1,80% tas-salarju finali u l-allowances familjari għal kull sena ta' servizz.

Ir-rata ta' akkumulazzjoni kurrenti għall-uffiċjali u l-impjegati tal-Unjoni Ewropea hi ta' 1,90% tas-salarju bażiku finali għal kull sena ta' servizz; din ir-rata kienet tnaqqset minn 2% għal 1,9% fir-riforma tal-2004[13]. Dan il-livell huwa kompletament iġġustifikat mis-sitwazzjoni partikolari tal-persunal tal-UE. Għandu jkun ikkunsidrat li l-età medja tad-dħul fis-servizz ċivili Ewropew hi ta' 35 sena. Għalhekk, il-persunal għandu perjodu ta' żmien iqsar biex jikseb id-drittijiet għall-pensjoni milli jkollhom l-impjegati taċ-ċivil nazzjonali. Barra minn hekk, meta impjegati taċ-ċivil Ewropew jittrasferixxu d-drittijiet tagħhom tal-pensjoni mill-Istat Membru ma jitqisux l-għadd ta' snin maħduma iżda l-valur monetarju trasferit.

Hemm aspett ieħor li jagħmel is-sitwazzjoni iktar kumplessa meta jkunu mqabbla l-Istati Membri u l-Istituzzjonijiet tal-UE: ir-rata ta' akkumulazzjoni tista' tvarja wkoll skont l-età. Il-Finlandja toffri rata ta' akkumulazzjoni progressiva, li hija 1,5% mill-gwadann bejn l-eta ta' 18 u 52, 1,9% tal-gwadann bejn l-etajiet ta' 53 u 62 u 4,5% tal-gwadann bejn l-etajiet ta' 63 u 68. Dan jipprovdi inċentiv ċar lill-impjegati taċ-ċivil biex jaħdmu għall-iktar tul ta' żmien. L-Istituzzjonijiet tal-UE adottaw approċ simili billi ħolqu inċentiv ta' drittijiet addizzjonali tal-pensjoni għal xogħol wara li tintlaħaq l-età normali tal-irtirar (magħruf aħjar bħala "l-inċentiv ta' Barċelona").

It-tabella ta' hawn taħt turi r-rati ta' akkummulazzjoni fl-Istati Membri li jużaw rati ta' akkumulazzjoni biex jikkalkolaw il-pensjonijiet.

NB: Franza mhux inkluża fit-tabella għax ma kinitx irċevuta l-ebda risposta għall-kwestjonarju.

4.3. Bażi għall-pensjonijiet

L-Istati Membri japplikaw sistemi differenti ħafna meta jiġu għall-bażi tal-kalkolu tal-pensjoni ladarba uffiċjal jirtira. Xi Stati Membri bħal Ċipru, l-Irlanda jew ir-Renju Unit, jibbażaw il-pensjoni fuq l-aħħar salarju jew fuq is-salarji tal-aħħar sena. Fi Stati Membri oħra (pereżempju fil-Finlandja, l-Ungerija u s-Slovakja) il-medja tal-paga matul il-karriera kollha kemm hi titqies għall-kalkolu tal-pensjoni. Dan ifisser li l-progressjoni fil-karriera hija importanti ħafna għad-definizzjoni tal-bażi għall-pensjoni. Pereżempju, fis-sistemi li jqiesu l-aħħar snin tas-servizz bħala bażi u fejn it-tmiem tal-progressjoni fil-karriera huwa bil-mod ħafna, din għandha impatt limitat ħafna fuq il-pensjonijiet. L-effett huwa simili fis-sistemi li jużaw is-salarju medju tal-karriera, fejn id-differenza bejn is-salarju tal-bidu u dak finali hija żgħira.

Fl-Istituzzjonijiet tal-UE l-bażi għall-pensjoni huwa s-salarju bażiku tal-aħħar grad li l-uffiċjal kien fih għal mill-inqas sena. Hemm raġunijiet importanti biex tinżamm din is-sistema. Fir-riforma tal-2004 tar-Regolamenti tal-Persunal, l-istruttura tal-karriera fl-Istituzzjonijiet tal-UE kienet rivitalizzata u imtawwla bl-introduzzjoni ta' gradi addizzjonali, sabiex jinħolqu inċetivi ta' prestazzjoni matul il-karriera kollha. Is-salarji fil-livell ta' dħul kienu konsegwentament imnaqqsa. Addizzjonalment, minħabba il-medja għolja tal-età tal-persunal reklutat, ikun impossibbli għal ħafna minnhom li jiprogressaw għall gradi ogħla jekk isegwu l-pass medju ta' avvanz fil-karriera. Għaldaqstant, il-bidla tal-bażi għall-pensjoni taffettwa iktar il-livell tal-pensjonijiet fl-Istituzzjonijiet tal-UE milli taffettwa s-servizzi nazzjonali b'għadd inqas ta' gradi, u tagħmel il-gradi ta' dħul saħansitra inqas attraenti għal persunal b'esperjenza. B'konsegwenza, l-Istituzzjonijiet tal-UE jkun jeħtiġilhom isibu soluzzjonijiet alternattivi li jaf ikollhom kostijiet akbar biex jattiraw persunal kwalifikat mill-Istati Membri kollha (pereżempju, billi jorganizzaw kompetizzjonijiet fi gradi ogħla għal persunal b'esperjenza, li b'riżultat iwasslu mhux biss għal pagi ogħla iżda għal pensjonijiet ogħla wkoll).

4.4. Rata massima tal-pensjoni

Ir-rata massima tal-pensjoni tillimita d-drittijiet tal-pensjoni li persuna tista' takkumula matul il-ħajja tax-xogħol tagħha. Minħabba li dan il-kunċett ma jeżistix f'xi Stati Membri, bħar-Repubblika Ċeka, il-Finlandja, ir-Rumanija, il-Latvja u l-Estonja, id-drittijiet tal-pensjoni tal-impjegati taċ-ċivil f'dawk l-Istati Membri jikkorrispondu mas-snin ta' servizz tagħhom, waqt li l-Istituzzjonijiet tal-UE u Stati Membri oħra stabbilixxew limitu. L-effett li jkun hemm tali limitu hu li persuna tista' tkun obbligata taħdem sakemm tilħaq l-età normali għall-irtirar mingħajr ma tikseb drittijiet addizzjonali tal-pensjoni, iżda xorta tkun obbligata tikkontribwixxi għall-iskema, jekk tkun laħqet ir-rata massima tal-pensjoni.

Ir-rati massimi tal-pensjoni jistgħu jvarjaw kunsiderevolment minn Stat Membru għall-ieħor. Pereżempju, minkejja li fi Franza[14] r-rata massima tal-pensjoni hi 75% tista' tittella' sa 80% b'riżultat ta' premiums varji. Il-Ġermanja għandha rata massima tal-pensjoni ta' 71,75% tas-salarju bażiku finali u l-allowances familjari. Xi Stati Membri stabbilew ir-rata fuq il-bażi tal-ogħla salarju matul il-karriera. Dan huwa l-każ tar-Renju Unit, fejn l-impjegati jistgħu jirċievu pensjoni massima ekwivalenti għal 66 jew 75% tal-ogħla salarji skont l-iskema tal-pensjoni. Fis-Slovenja u l-Awstrija, il-massimu hu ta' 80% tal-ogħla salarju matul għadd ta' snin.

Il-pensjoni massimma tal-irtirar għall-uffiċjali u l-impjegati oħra tal-Unjoni Ewropea hu 70% tas-salarju bażiku finali li jikkorrispondi mal-aħħar grad li l-uffiċjal jew l-impjegat okkupa għal mill-inqas sena. Sabiex jiksbu r-rata massima tal-pensjoni, l-impjegati taċ-ċivil tal-UE iridu jaħdmu mill-inqas 37 sena, u biż-żieda tal-età tal-irtirar għal 65 iridu jibdew fl-età ta' 28, sabiex jiksbu d-drittijiet massimi tal-pensjoni fis-servizz ċivili tal-UE. Minħabba li l-età medja ta' reklutaġġ fil-Kummissjoni Ewropea hi ta' 35, il-maġġoranza tal-persunal mhux se jkunu jistgħu jiksbu r-rata massima tal-pensjoni. Dan diġà huwa l-każ: id-dritijiet akkumulati tal-pensjoni għall-membri tal-persunal li rtiraw fl-2010 huma ekwivalenti għal 63% fil-medja u se jkunu madwar 57% tal-persunal reklutat wara l-1 ta' Mejju 2004.

L-unika possibbiltà li wieħed jirċievi pensjoni li teċċedi 70% tad-drittijet tal-pensjoni huwa jekk ċifra ta' sussitenza minima tkun applikata. Uffiċjal jew impjegat ieħor isir intitolat għal pensjoni ekwivalenti għas-salarju bażiku ta' uffiċjal fi grad 1 livell 1 wara 25 sena fis-servizz. Madanakollu, dan japplika biss għall-inqas kategoriji ta' persunal (għal iktar dettalji, ara l-kapitolu ta' dan ir-Rapport dwar l-użu tal-aġenti b'kuntratt u l-kundizzjonijiet tagħhom). F'xi Stati Membri r-rata massima tal-pensjoni hija stabbilita taħt is-70%, iżda hija applikata fuq bażi differenti. Fid-Danimarka, pereżempju, ir-rata massima tal-pensjoni possibbli hija fissa għal 57%, iżda tapplika biss għall-pensjoni statutorja u mhux għall-pensjoni tal-Istat, li hija dipendenti fuq it-tul tar-residenza fid-Danimarka. Persuna trid tkun għexet id-Danimarka għal 40 sena wara l-għeluq tal-15-il sena tagħha sabiex tkun intitolata għall-pensjoni sħiħa tal-Istat mid-Danimarka. Il-pensjoni tal-Istat tikkonsisti minn ammont bażiku u suppliment tal-pensjoni. L-ammont gross bażiku hu ta' 58 032 krona Daniża (EUR 7 780[15]) annwali. Is-suppliment tal-pensjoni għal persuni waħedhom hu ta' 58 416 krona Daniża (EUR 7 831 annwali, waqt li għal persuni miżżewġa jew li jikkoħabitaw is-suppliment tal-pensjoni hu ta' 27 276 krona Daniża (EUR 3 657)[16].

Għal skopijiet ta' tqabbil, ir-rati ta' sostituzzjoni teoretiċi[17] fl-Istati Membri jistgħu jintużaw bħala kumparatur. Dawn kienu żviluppati mis-Subgrupp tal-Indikaturi tal-Kumitat tal-Protezzjoni Soċjali. Fil-maġġoranza tal-Istati Membri r-rati ta' sostituzzjoni jistgħu jinsabu fil-firxa bejn 60% u 80% tal-gwadann aħħari. Ir-rata medjana tkun madwar 75%, jiġifieri r-rata applikata fir-Renju Unit.

4.5. Rata ta' kontribuzzjoni tal-persunal

Ir-rata tal-kontribuzzjoni tal-persunal hija l-parti mis-salarju tal-uffiċjali tal-UE li għandha titħallas biex tiffinanzja terz tal-kost attwarjali tal-iskema tal-pensjonijiet. Iż-żewġ terzi li jifdal għandhom ikunu iffinanzjati mill-kontribuzzjoni tal-impjegatur. Fil-prattika, l-Istituzzjonijiet tal-UE ma jħallsux il-parti korrispondenti tagħhom biex jiffinanzjaw l-iskema, iżda – b'kumpens ta' dan – il-ħlasijiet għall-pensjoni huma ggarantiti b'mod konġunt mill-Istati Membri (l-Artikolu 83 tar-RP) (ara 5.8).

Għal darb’oħra, tqabbil bejn l-Istati Membri huwa kumpless minħabba n-natura diversa tal-bażi li fuqha ikun jiddependi l-kontribut (li jinkludi s-salarju bażiku, il-gwadann gross, is-salarju reali, il-paga gross, eċċ).

Għandu jkun innutat li, f'xi Stati Membri, l-uffiċjali ma għandhom għalfejn jikkontribwixxu bl-ebda mod għall-iskema tal-pensjonijiet, minħabba li l-kontribuzzjonijiet kollha huma koperti mill-Istat u l-pensjonijiet tagħhom jitħallsu mill-baġit. Dan huwa l-każ fil-Bulgarija, l-Estonja, il-Ġermanja, l-Isvezzja, kif ukoll għal xi skemi tal-pensjoni fil-Belġu u fid-Danimarka.

Fil-livell tas-servizz ċivili Ewropew, għandu jkun mfakkar li r-rata totali tal-kontribuzzjoni għall-pensjoni hija meħtieġa sabiex iżżomm il-PSEO bbilanċjata u hija kkalkolata kull sena Il-parti li għandha titħallas mill-uffiċjali tal-UE (1/3 ta' din il-kontribuzzjoni totali ) hija aġġustata kif jixraq (skont l-Artikolu 83 tar-Regolamenti tal-Persunal). Pereżempju għas-sena 2009 ir-rata tal-kontribuzzjoni tal-pensjoni għall-uffiċjali tal-UE kienet stabbilita għal 10,9%, għal 11,3% għall-2010 u għal 11,6% tas-salarju bażiku għall-2011[18].

Fil-maġġoranza l-kbira tal-Istati Membri, ir-rata tal-kontribuzzjoni għall-pensjoni tal-persunal hija iktar baxxa mir-rata tal-PSEO. Ir-rata f'uħud mill-Istati Membri hija madwar 5% jew inqas (ir-Renju Unit, Ċipru, il-Litwanja u Spanja), waqt li oħrajn stabbilew ir-rata bejn 5% u 10% (il-Finlandja, il-Pajjiżi l-Baxxi, ir-Repubblika Ċeka, l-Irlanda, il-Greċja, is-Slovakja, il-Lussemburgu, l-Italja, il-Latvja, l-Ungerija u l-Polonja). Ir-rata tal-kontribuzzjoni għall-pensjoni hija ogħla minn tal-PSEO f'żewġ Stati Membri biss: L-Awstrija fejn tvarja bejn l-10,25% u t-12,55% u, fis-Slovenja, fejn l-ogħla limitu tagħha hu 15,5%.

NB: Franza mhux inkluża fit-tabella għax ma kinitx irċevuta l-ebda risposta għall-kwestjonarju..

4.6. Aġġustament annwali tal-pensjonijiet

Fattur determinanti ewlieni fid-dinamika tan-nefqa tal-pensjonijiet hija r-regola tal-indiċi. Kif sottolineat fir-Rapport Konġunt dwar il-pensjonijiet għall-2010, bosta pakketti ta' riforma kien fihom bidliet fl-indiċi tal-pensjonijiet matul l-irtirar. Il-kwistjoni tal-indiċi tista' tidher bħala għażla bejn pensjonijiet inizjali iktar baxxi plus indiċjar tal-gwadann u benefiċċju inizzjali ogħla plus indiċi tal-prezz. [19]

Bla dubju l-maġġoranza tal-Istati Membri (kollha minbarra l-Ungerija, il-Litwanja u xi skemi tal-pensjonijiet Daniżi u Pollakki)[20] qed jaġġustaw il-pensjonijiet fil-gvernijiet ċentrali biex jagħmluhom konformi ma' numru ta' indikaturi, bħal: l-Indiċi tal-Prezzijiet tal-Konsumatur (CPI), żidiet fil-pagi, tkabbir tal-PDG, jew it-tkabbir tad-dħul mit-taxxa soċjali. Xi Stati Membri jużaw indikatur waħdieni (CPI jew żidiet fil-pagi) biex jaġġustaw il-pensjonijiet, waqt li oħrajn jużaw indiċi peżat bbażat fuq żewġ indikaturi. Xi Stati Membri (is-Slovenja, id-Danimarka għall-iskema uffiċjali tal-pensjoni, l-Irlanda u l-Pajjiżi l-Baxxi) qed jaġġustaw il-pensjonijiet tagħhom abbażi tal-bidliet fil-pagi, waqt li bosta oħrajn qed jaġġustaw il-pensjonijiet skont il-prezzijiet u l-pagi (il-Belġju, Ċipru, ir-Repubblika Ċeka, il-Finlandja, il-Lussemburgu, is-Slovakja u xi skemi tal-pensjonijiet fil-Polonja).

Sa fejn għandhom x'jaqsmu l-Istituzzjonijiet tal-UE, il-pensjonijiet huma aġġustati skont l-istess methodu bħas-salarji tal-uffiċjali tal-UE. Dawn is-salarji huma aġġustati kull sena biex jirriflettu bidliet fil-kapaċità tal-akkwist tal-uffiċjali fil-gvern ċentrali tal-Istati Membri u tal-prezzijiet fi Brussell (l-Indiċi Internazzjonali ta’ Brussell).

Dan il-metodu huwa konformi mal-prattiċi ta’ kull Stat Membru għajr xi ftit li qed joħolqu indiċjar għax-xejra fil-pensjonijiet skont ix-xejra f'għadd relevanti ta’ indikaturi, kif spjegat hawn fuq. Għadd ta’ Stati Membri qed jaġġustaw il-pensjonijiet tagħhom jew abbażi tal-bidliet fil-pagi jew abbażi tal-indiċi magħqud li jinkludi l-bidliet fil-pagi. Madanakollu, il-biċċa l-kbira tas-sistemi huma indizjati mal-inflazzjoni jew abbażi tal-indiċi magħqud li jinkludi l-inflazzjoni. Fl-istess waqt il-metodu użat mill-Istituzzjonijiet tal-UE wassal għal aġġustamenti tas-salarji u l-pensjonijiet li huma taħt ir-rata tal-inflazzjoni. Matul il-perjodu 2004-2010, l-aġġustamenti tal-pensjonijiet kienu taħt ir-rata tal-inflazzjoni (b'1,8%).

Li kieku l-metodu għall-aġġustament tal-pensjoni kellu jinbidel u jintrabat mal-aġġustament tal-pensjonijiet ta’ uffiċjali fl-Istati Membri, huwa probabbli li r-riżultat kien ikun iktar favorevoli għall-pensjonanti tal-Istituzzjonijiet tal-UE milli hu skont il-metodu attwali, minħabba li l-biċċa l-kbira tal-Istati Membri jinidizzjaw il-pensjonijiet tagħhom mal-inflazzjoni.

Huwa xieraq li wieħed jissottolinea li l-aġġustament annwali tal-pensjonijiet ikun diġà meqjus meta l-persunal iħallas il-kontribuzzjoni għall-pensjoni. Għaldaqstant, in-nuqqas li jkunu aġġustati l-pensjonijiet attwali mħallsa jista' jkun sfidat legalment, minħabba li huwa vjolazzjoni ċara tad-drittijiet miksuba.

4.7. Il-possibbiltà ta’ ħolqien ta’ fond għall-pensjonijiet reali

Kif kien diġà spjegat, il-PSEO topera bħala fond nozzjonali u dan ifisser li ma hemm l-ebda fond ta' investiment fil-verità. Prefinanzjament ikbar, b'mod jew ieħor, kien rispons politiku popolari min naħa tal-Istati Membri għall-isfida demografika[21]. Madanakollu, huwa importanti li jkun innutat li, għall-biċċa l-kbira taċ-ċittadini Ewropej, skema progressiva (PAYG (pay-as-you-go)) hi u tibqa' dejjem l-iktar kwistjoni importanti fil-provvediment ġenerali tal-pensjonijiet.

Sa ftit ilu, skemi prefinanzjati tal-pensjoni kellhom rwol sinifikanti fid-Danimarka, l-Irlanda, il-Pajjiżi l-Baxxi, l-Isvezzja u r-Renju Unit, fejn il-limitazzjoni inizjali fuq il-provvediment pubbliku progressiv għall-pensjoni bażika u fissa għal kulħadd instigat it-tkabbiir tal-provvediment privat, jew bħala pensjonijiet okkupazzjonali kollettivi jew kuntratti tal-assigurazzjoni għall-pensjoni individwali.

Madanakollu, fl-aħħar għaxar snin tar-riformi tal-pensjonijiet, għadd ta’ pajjiżi espandew ir-rwol tal-iskemi privati eżistenti (pereżempju id-Danimarka, il-Ġermanja) jew introduċew elementi ġodda tal-pensjonijiet prefinanzjati u ġestiti privatament fis-sistemi ta’ pensjonijiet statutorji tagħhom (il-Bulgarija, l-Estonja, il-Latvja, l-Ungerija, il-Polonja, ir-Rumanija, is-Slovakja, l-Isvezzja). Uħud mir-riformi treġġgħu parzjalment lura (pereżempju fil-Latvja u il-Polonja) jew treġġgħu lura kompletament (pereżempju l-Ungerija) fid-dawl tal-kriżi, iżda l-kontribuzzjoni mill-iskemi prefinanzjati għall-introjtu tal-pensjonanti se tiżdied hekk kif l-iskemi jimmaturaw.

Il-proporzjoni tal-introjtu tal-pensjoni li ġej minn skemi prefinanzjati pproġettati għall pensjonant ipotetiku li jirtira fl-2008 u fl-2048[22]

Maġġoranza kbira tal-iskemi tal-pensjonijiet fl-Istati Membri huma wkoll mhux iffinanzjati, dan ifisser li l-kontribuzzjonijiet għall-pensjoni mhumiex trasferiti għal fond. Xi Stati Membri (l-Awstrija, il-Latvja, il-Portugal, is-Slovakja, il-PajjiI l-Baxxi, l-Isvezzja, il-Polonja u d-Danimarka) għandhom skemi parzjalment iffinanzjati.

Is-sitwazzjoni hija differenti f'organizzazzjonijiet internazzjonali oħra, li jew għandhom fond għall-pensjonijiet sħiħ jew għaddejin minn perjodu ta’ tranżizzjoni wara li introduċew fond għall-pensjonijiet.

Wieħed jista' jaħseb f'erba' possibbiltajiet għall-ħolqien ta’ fond għall-pensjonijiet attwali għall-Istituzzjoinijiet tal-UE. Kull tabela hawn taħt tippreżenta f'kolonna I il-kost tas-servizz (jiġifieri l-kontribuzzjoni annwali tal-impjegatur għall-fond maħluq ġdid), fil-kolonna II tidher in-nefqa annwali għall-pensjonijiet fir-rigward tal-fond nozzjonali fil-qafas tal-iskema kurrenti tal-pensjonijiet u l-kolonna III t-total annwali taż-żewġ kostijiet ("il-kost totali fl-Intestatura V"). Analiżi tal-kostijiet totali annwali fuq termini twal, kif ukoll l-għażliet differenti għall-perjodu 2013-2020, hija ta’ għajnuna biex ikunu vvalutati l-punti favur u dawk kontra kull xenarju.

– Xenarju Nru 1 It-trasferiment tal-valur tal-fond nozzjonali għall-fond attwali Dan ix-xenarju huwa sa ċertu punt ipotetiku, minħabba li l-ewwel sena tkun tinvolvi kostijiet enormi minħabba li l-ekwivalenti tal-obbiligi tal-pensjoni ikun jeħtieġ li jkunu trasferit għall-fond attwali. Fin-snin segwenti l-kontribuzzjoni tal-impjegatur tibqa' baxxa u stabbli (madwar EUR 800 miljun) u jkollha tkun imħallsa fil-fond flimkien mal-kontribuzzjoni tal-persunal (madwar EUR 400 miljun). Fuq terminu qasir u matul il-perjodu 2013-2020, din l-għażla hija l-iktar waħda li tiswa għall-baġit tal-UE. Madanakollu, hija għandha impatt kunsiderevoli fuq l-obbligi tal-pensjoni, għax l-ammont fil-fond tal-pensjoni ikopri l-obbligi tal-pensjoni.

– Xenarju Nru 2 Persunal irreklutat ġdid ikun kopert mill-fond għall-pensjonijiet, waqt li l-persunal attwali jkompli jkun kopert mill-iskema għall-pensjonijiet kurrenti. Skont din l-ipoteżi n-nefqa annwali tal-pensjonijiet kif ukoll in-nefqa tal-pensjonijiet fil-perjodu 2013-2020 relatata mal-fond nozzjonali ser tibqa l-istess daqslikieku l-ebda fond għall-pensjoni ma nħalaq. Il-persunal attwali fil-fatt ikompli jkun kopert mill-iskema kurrenti tal-pensjonijiet u huwa preżunt li kwazi l-ebda persuna ġdida ma tirtira qabel l-2020. Il-kontribuzzjoni annwali tal-impjegatur lejn il-fond tiżdied skont l-għadd ta’ persunal ġdid kopert mill-fond għall-pensjonijiet kurrenti. Dan in-numru jidher għoli fl-ewwel ftit snin minħabba bidliet kbar ta' persunal b'kuntratt u dak temporanju.

Dan ix-xenarju għalhekk jinvolvi kost ogħla mill-iskema tal-pensjoni kurrenti f'termini qosra u medji (EUR 13 520 miljun matul il-perjodu 2013-2020 minflok EUR 12 600 miljun). Madanakollu, il-kost jonqos b'mod sinifikanti meta jgħddi ż-żmien, meta l-fond tal-pensjoni jilħaq il-maturità.

– Xenarju Nru 3: Drittijiet tal-pensjoni jkunu koperti mill-fond reali tal-pensjoni, waqt li drittijiet passati tal-pensjoni jkunu koperti mill-fond nozzjonali

Skont din l-assunzjoni, in-nefqa annwali għall-pensjoni tal-iskema kurrenti tal-pensjoni tkun inqas minn-nefqa tal-pensjoni prevista sal-2020 jekk ma jinħoloq l-ebda fond reali. Il-kontribuzzjoni tal-impjegatur lejn il-fond reali tibqa stabbli (għal madwar EUR 800 miljun fis-sena), iżda matul il-perjodu 2013-2020 tkun ħafna iktar milli fix-Xenarju nru 2 (EUR 6,4 biljun meta mqabbla ma' EUR 920 miljun)

Għalhekk dan ix-xenarju jinvolvi kost saħansitra ogħla fuq terminu medju minn Xenarju nru 2 spjegat hawn fuq, minkejja li t-tranżizzjoni tkun iktar rapida.

– Xenarju Nru 4: Fond reali li jkopri terz tad-drittijiet kollha akkwiżiti ġodda,, koperti mill-kontribuzzjonijiet għall-pensjoni tal-persunal. Iż-żewġ terzi tad-drittijiet tal-pensjoni li jifdal, flimkien mad-drittijiet kollha akkwiżiti għall-pensjoni fil-passat, ikomplu jkunu koperti mill-fond nozzjonali. Dan ix-xenarju jkun jinvolvi t-trasferiment tal-kontribuzzjonijiet tal-pensjonijiet tal-persunal lill-fond ta' investiment u, minħabba li terz tal-kostijiet tal-pensjoni jkunu parzjalment koperti minn dan il-fond fil-futur, in-nefqa fuq il-pensjonijiet tonqos b'terz fuq terminu twil.

Skont din is-suppożizzjoni, sal-2020, in-nefqa fuq il-pensjoni taħt l-iskema tal-fond nozzjonali, li tkopri żewġ terzi tad-drittijiet ġodda akkwiżti tal-pensjonijiet, tkun ħarira inqas min-nefqa prevista għall-pensjonijiet jekk ma ssir l-ebda bidla (EUR 12 100 miljun meta mqabbla ma' EUR 12 600 miljun). Ma jkun hemm l-ebda kontribuzzjoni tal-impjegatur lejn il-fond reali, minħabba li terz tad-drittijiet ġodda akkwiżiti ikunu koperti kompletament mill-kontribuzzjonijiet tal-persunal għall-pensjoni.

Għalhekk, f'terminu qasir u dak medju, ix-Xenarju nru 4 jkun l-inqas li jiswa mix-xenarji kollha għall-baġit tal-UE. Madanakollu, fuq terminu twil, il-kost totali fl-intestatura V jkun darbtejn dak tax-xenarji l-oħra (EUR 1650 miljun meta mqabbla ma' EUR 800 miljun).

4.8. Inċentivi għad-dipożizzjoni ta' pensjoni privata

Illum il-ġurnata, skemi privati għall-pensjoni qegħdin dejjem aktar jintużaw f'għadd ta' Stati Membri biex jiksbu l-objettivi ta' adegwatezza u sostenibbiltà. Fil-Green paper tagħha, il-Kummissjoni indikat l-importanza li jkunu pprovduti opportunitajiet suffiċjenti għal intitolamenti kumplimentarji: bħal li jkun possibbli għan-nies li jkollhom ħajja lavorattiva itwal u li jiżdied l-aċċess għal skemi tal-pensjoni supplimentari. Addizzjonalment, il-Kummissjoni ssottolineat il-ħtieġa li jidħol fis-seħħ qafas xieraq għal tfaddil kumplimentari għall-irtirar, li s-suċċess tiegħu jiddependi l-iktar fuq miżuri li jżidu l-kost-effikaċja u s-sigurtà tal-iskemi supplimentari tal-pensjonijiet.

Xi Stati Membri introduċew miżuri biex jikkumplimentaw l-iskema progressiva tal-pensjonijiet tagħhom bi skemi privati prefinanzjati. Madanakollu, l-kriżi enfassizzat il-vulnerabbiltà tal-iskemi prefinanzjati tal-pensjoni għall-kriżi finanzjarja u tnaqqis fir-ritmu ekonomiku, u l-ħtieġa li jkun revedut il-qafas regolatorju sabiex jiggarantixxi s-sigurtà tal-pensjonjiet privati. Ta' min wieħed jinnota wkoll li l-iskema tal-pensjonijiet tan-NATO hija kompletament ġestita minn fondi privati. Il-persunal jista' jagħżel li jinvesti l-parteċipazzjoni tiegħu f'ekwità, fond ta' bonds jew kontanti u jista' jagħżel li jagħmel kontribuzzjonijiet addizzjonali għall-iskema sa 2% tas-salarju bażiku.

Fir-rigward tal-Istituzzjonijiet tal-UE, li kieku kellha tinqabad it-triq għall-introduzzjoni ta' skema tal-pensjoni privata, supplimentari u volontarja jew mandatorja, ikun essenzjali li jkun żgurat li jkun hemm qafas adattat għal tali skema. Skont każistika kostanti, l-Istituzzjonijiet tal-UE, li jaġixxu mhux biss bħala impjegatur iżda wkoll bħala awtorità pubblika, għandhom id-dover li jieħdu ħsieb il-persunal tagħhom. Għalhekk huwa importanti li ssir valutazzjoni bir-reqqa tal-impatt potenzjali fuq il-baġit tal-UE f'każ ta' inadegwatezza jew falliment tal-iskema privata tal-pensjonijiet.

Jekk tittieħed deċiżjoni biex ikunu introdotti tali inċentivi, l-awtorizzazzjoni ta' tnaqqis tat-taxxa għal dawk li jinvestu fi skemi tal-pensjonijiet privati tista' tkun ikkunsidrata possibbiltà, għax tinvolvi piż relattivament baxx fuq il-baġit tal-UE meta mqabbla mal-għażliet l-oħra, bħall pereżempju l-issussidjar tal-persunal fi skemi privati tal-pensjonijiet. L-Istituzzjonijiet tal-UE jistgħu jipproponu skemi privati tal-pensjonijiet li wieħed jista' jipparteċipa fihom jew le, flimkien mal-atturi privati.

Li kieku l-iskemi privati tal-pensjonijiet kellhom jinvestu parzjalment fl-ekwità, pereżempju kif inhu l-każ tal-Fond Konġunt tal-Persunal għall-Pensjoni tan-Nazzjonijiet Uniti[23] jew in-NATO, fejn il-persunal jista' jagħżel li jinvesti l-parteċipazzjoni tiegħu f'ekwità, u fondi ta' bonds jew f'kontanti, ir-rata ta' redditu fuq l-investiment tista tkun mistennija tkun ogħla mir-rata ta' redditu fil-PSEO, iżda tkun ukoll assoċjata ma' riskju ogħla.

Tali skema għandha numru ta' żvantaġġi li jridu jkunu kkunsidrati, prinċipalment il-kost addizzjonali għall-ġestjoni tal-investiment u s-sigurtà tal-investiment u, għaldaqstant, pensjonijiet futuri.

5. Aspetti oħra li għandhom impatt importanti fuq l-iskemi tal-pensjonijiet tal-impjegati taċ-ċivil 5.1. L-użu tal-aġenti kuntrattwali u l-kundizzjonijiet tagħhom

Il-maġġoranza l-kbira tal-Istati Membri jiddifferenzjaw bejn l-impjegati taċ-ċivil u impjegati pubbliċi oħra. Fil-biċċa l-kbira tal-Istati Membri hemm regoli differenti għall-impjegati taċ-ċivil fir-rigward tal-istatus legali tagħhom, proċeduri ta' reklutaġġ, sigurta ta' xogħol, karriera u sistemi tas-salarji. Madanakollu, fil-biċċa l-kbira tal-Istati Membri, l-impjegati taċ-ċivili u impjegati oħra pubbliċi għandhom regoli simili jew l-istess meta jiġu għad-djalogu soċjali, regoli etiċi, regoli dixxiplinarji u partikolarment is-sistemi tal-pensjoni. Skont il-pubblikazzjoni Civil Services in the EU of 27, Reform Outcomes and the Future of the Civil Service, l-Istati Membri li għandhom skema separata għall-pensjonijiet tal-impjegati taċ-ċivil u impjegati pubbliċi oħra huma l-Ġermanja, il-Litwanja, l-Estonja, Ċipru, il-Belġju, Franza, il-Greċja, il-Lussemburgu, Spanja, l-Awstrija, il-Pajjiżi l-Baxxi u d-Danimarka. Il-15 li jifdal għandhom l-istess skema tal-pensjonijiet kemm għall-impjegati taċ-ċivil kif ukoll għall-impjegati pubbliċi l-oħra[24].

Ir-riforma tal-2004 tar-Regolamenti tal-Persunal stabbilit kategorija ta' aġenti kuntrattwali fl-Istituzzjonijiet tal-UE. Minn dakinhar l-aġenti kuntrattwali kkontribwew għax-xogħol tal-Istituzzjonijiet billi wettqu kompiti amministrattivi ta' sostenn u billi pprovdew ħiliet addizzjonali. Fl-aħħar tal-2009, kien hemm total ta' madwar 9000 aġent kuntrattwalli għall-Istituzzjonijiet u l-aġenziji kollha, u madwar żewġ terzi minnhom kienu impjegati mill-Kummissjoni. Skont ir-Regolament tal-Persunal, l-istess skema tal-pensjonijiet tapplika għall-uffiċjali u l-aġenti kuntrattwali. Dan huwa konformi mas-sitwazzjoni fil-maġġoranza tal-Istati Membri li għandhom l-istess skemi għall-uffiċjali u l-impjegati l-oħra tas-servizz pubbliku.

Fir-rigward tad-dispożizzjonijiet fuq iċ-ċifra ta' sussitenza minima[25], dawn jirreferu għas-salarju bażiku ta' uffiċjali fi grad 1 livell 1. Uffiċjal jew impjegat ieħor jikseb 4% taċ-ċifra ta' sussistenza minima għal kull sena ta' servizz, jiġifieri wara 25 sena ta' servizz il-ensjoni tal-irtirar ta' uffiċjal jew impjegat ieħor ma tistax tkun inqas miċ-ċifra ta' sussitenza minima. Minkejja li japplikaw l-istess dispożizzjonijiet għall-uffiċjali u l-persunal temporanju, aġenti kuntrattwali, partikolarment dawk fil-gradi l-iktar baxxi jibbenefikaw aktar minn din id-dispożizzjoni, minħabba li l-intitolamenti tagħhom huma ġeneralment iktar baxxi. Pereżempju, aġent kuntrattwali fil-grupp ta' funzjoni I jista' jkun intitolat għal pensjoni ekwivalenti għaċ-ċifra ta' sussistenza minima, li tkun teċċedi s-70% tas-salarju finali tiegħu. Madanakollu, fi kwalunkwe każ dan huwa biss l-eċċezzjoni għar-regola li l-intitolament massimu tal-pensjoni ikun stabbilit għal 70% tas-salarju finali.

Is-sostituzzjoni ta' uffiċjali b'aġenti kuntrattwali, minkejja li mhux relatat direttament mal-kost tal-pensjoni, għandha impatt maġġuri fuq il-kost ġenerali tal-pensjonijiet minħabba li tillimita s-salarji finali li fuqhom huma kkalkolati l-benefiċċji tal-pensjoni. Dan minħabba li l-aġenti kuntrattwali għandhom skeda iktar baxxa tas-salarji u durata tal-kuntratti iqsar meta mqabbla mal-uffiċjali.

L-istudju tal-2010 tal-Eurostat juri li l-introduzzjoni tal-kategoriji tal-persunal kuntrattwali fl-2004 se tiġġenera ffrankar annwali kunsiderevoli (EUR 300 miljun fl-2059).

Iż-żamma tal-istess skema tal-pensjonijiet għall-uffiċjali u l-aġenti kuntrattwali hija importanti sabiex tkun preservata l-attrazzjoni tal-pożizzjonijiet tal-aġenti kuntrattwali, biex jkun attirat persunal ikkwalifikat. Huwa diġà diffiċli li jinkiseb bilanċ ġeografiku bejn in-nazzjonalitajiet differenti, u l-proposta ta' skema tal-pensjoni inqas attraenti għall-aġenti kuntrattwali tnaqqas ulterjorment l-abbiltà tal-istituzjonijiet li jilħqu bilanċ ġeografiku għal din il-kategorija ta' persunal.

5.2. Il-Progressjoni individwali fl-iskema tas-salarji.

Ir-riforma tal-2004 tar-Regolamenti tal-Persunal introduċiet bidliet fl-istruttura tal-karriera. Minkeja li mhux relatata direttament mal-kost tal-pensjoni, xorta għandha impatt fuq il-kost ġenerali tal-pensjonijiet għax tillimita s-salarji finali li fuqhom huma kkalkolati il-benefiċċji tal-pensjonijiet. Dawn jinkludu salarji iktar baxxi fil-livel tad-dħul flimkien ma' żvilupp itwal tal-karriera li jinvolvi iktar gradi, iżda promozzjonijiet iktar mgħaġġla. Skont l-istudju tal-Eurostat tal-2010, dan l-aspett tar-riformi tal-2004 se jiġġenera ffrankar annwali ta' EUR 94 miljun fl-2059.

Ir-ristrutturar tal-fluss tal-karriera fil-grupp ta' funzjoni AST ipprovdut għalih fil-proposta tal-Kummissjoni se jiġġenera ffrankar addizzjonali fuq terminu twil. Fil-futur, uffiċjali AST responsabbli għall-attivitajiet amministrattivi, tekniċi jew taħriġ li jeħtieġu ċertu ammont ta' awtonomija (dan jeskludi kompiti segretarjali), li jixtiequ jipprogressaw għall-ogħla żewġ gradi (Assistenti Anzjani), se jkollhom juru li għandhom livell xieraq ta' kompetenzi esperti u kwalifiki fejn għandu x'jaqsam il-ġestjoni tal-persunal, l-implimentazzjoni baġitarja u/jew il-kordinazzjoni waqt proċedura ta' selezzjoni. X'aktarx ikun hemm struttura ġdida tal-karriera għall-persunal segretarjali reklutat ġdid b'karriera lineari, kif ukoll rata ta' promozzjoni aktar baxxa milli fil-karriera tal-AST u sitt gradi biss.

Madanakollu, anke jekk il-progressjoni ta' individwu fl-iskema tas-salarji għandha impatt fuq il-kostijiet tal-pensjoni, dan l-aspett huwa biss sekondarju meta tiġi biex taħseb kif għandha tiġi tirrivitalizzata s-sistema tal-karriera fl-Istituzzjonijiet tal-UE. Ikun kunċettwalment ħażin li kieku kellha tinbidel is-sistema tal-karriera bil-għan biss li jinkiseb iffrankar fuq il-pensjonijiet, waqt li jkun injorat il-fatt li għandha impatt qawwi fuq il-persunal attiv fl-Istituzzjonijiet tal-UE.

5.3. Distakk bejn il-benefiċċji lill-impjegati tas-servizz pubbliku u l-pensjonijiet tas-settur privat.

Fi kważi l-Istati Membri kollha, l-impjegati taċ-ċivil huma suġġetti għal reġim separat, u skema tal-pensjonijiet separata hija ħafna drabi parti minn dan ir-reġim. Jista' jkun hemm għadd ta' raġunijiet għal tali skemi speċjali, kif ukoll benefiċċji tal-pensjoni li possibbilment huma ogħla mill-iskema tal-pensjonijiet ġenerali. Primarjament, il-benefiċċji tal-pensjonijiet għandhom ikunu kkunsidrati bħala parti diferita tas-salarju tal-impjegat taċ-ċivil li se titħallas meta jirtira, u bħala komponent importanti ta' pakkett kumprensiv offrut lill-impjegati tas-sevizz ċivili. It-tieni, il-benefiċċji tal-pensjoni ogħla fis-serviz ċivili jippermettu li jkun attirat persunal bi kwalifiki għolja, anke f'każijiet fejn qed ikunu mħallsa pagi ogħla fis-settur privat għal xogħol kumparabbli b'livell simili ta' responsabbiltajiet.

Billi jkunu offruti benefiċċji ogħla tal-pensjoni, l-Istati Membri jistgħu jqisu l-fatt, li għal ċertu profili ta' xogħol, il-livell tas-salarji huwa inqas milli fis-settur privat u għalhekk irid ikun ikkumpensat b'livell ogħla ta' sigurtà soċjali. Madanakollu, kif tindika l-Green Paper, l-Istati Membri huma ġeneralment responsabbli għat-tfassil u l-organizzazzjoni tas-sistemi tagħhom tal-pensjoni u għall-provvediment tal-pensjoni. Id-distakk bejn il-benefiċċji għall-impjegati tas-servizz pubbliku u l-livell tal-pensjonijiet tas-settur privat huwa l-kwistjoni soprastanti li għandha tkun ikkunsidrata mill-Istati Membri. Huma responsabbli għar-ristrutturar tal-iskemi tal-pensjoni b'manjiera li tiżgura li dawn l-iskemi tal-pensjoni huma adegwati, sostenibbli u siguri.

Fir-rigward tal-kwistjoni dwar jekk hemmx distakk bejn il-benefiċċji tal-pensjoni tal-persunal tal-UE u dawk imħallsa fis-suq privat, huwa importanti li wieħed jirrealizza li, kif spjegat hawn fuq, il-kumparaturi ewlenin tal-benefiċċji tal-pensjoni tal-impjegati taċ-ċivil tal-UE, li huma espatrijati, huma dawk li jirreklutaw persunal kumparabbli u li għandhom struttura simili ta' karriera u salarju, jiġifieri organizzazzjonijiet internazzjonali oħrajn, servizzi diplomatiċi nazzjonali, u servizz tal-gvern ċentrali fl-Istati Membri. Fir-rigward tas-settur privat, it-tqabbil għandu jkun ibbażat mhux biss fuq il-pensjonijiet iżda għandu jkun ħafna usa' u jinkludi aspetti oħra, bħal-livelli ġenerali tas-salarji u l-progressjoni tal-karriera, minħabba d-distakk enormi bejn is-settur privat u dak pubbliku f'dan ir-rigward.

Fl-aħħar nett, m'għandhux jintesa li bosta kumpaniji privati multinazzjonali għandhom fondi supplimentari għall-pensjonijiet u joffru benefiċċji addizzjonali għall-pensjonijiet bħala mod biex jattiraw u jżommu impjegati kwalifikati.

5.4. Il-kostijiet biex l-Istituzzjonijiet tal-UE jipprovdu l-pensjonijiet

L-istudju tal-2010 tal-Eurostat wera' li l-PSEO għadha ma mmaturatx, u li l-għadd ta' pensjonanti u n-nefqa tal-pensjoni mistennija jiżdiedu sa tali żmien meta l-iskema tal-pensjoni tilħaq il-maturità Minħabba li l-PSEO topera bħala fond nozzjonali, il-persunal iħallas għad-drittijiet tal-pensjoni li huwa jikseb f'sena partikolari mill-kontribuzzjoni għall-pensjoni, li tkopri terz tal-kost attwarjali ta' dawk id-drittijiet tal-pensjoni. Din il-kontribuzzjoni, flimkien mal-kontribuzzjonijiet tal-impjegatur li mhux imħallsa, hija kkunsidrata bħala investita f'bonds ta' terminu twil maħruġa mill-Istati Membri. Għall-għan ta' tqabbil, dan ikun l-iktar approċ konservattiv li jista' jkun adottat għal fond privat għall-pensjonijiet, li jagħti redditu baxx meta mqabbel ma' fond imħallat.

Fil-valutazzjoni tal-bilanċ attwarjali tal-PSEO li sar fl-2010, Eurostat ikkalkolat li l-kost totali tas-servizz, li għandu jitħallas lill-fond biex ikopri d-drittijiet tal-pensjoni akkwiżiti fl-2011 għandu jkun ta' EUR 1 206 miljun. L-impjegati taċ-ċivil tal-UE se jħallsu terz ta' dan l-ammont, jiġifieri EUR 402 miljun, li jikkorrispondi għal 11% tas-salarji bażiċi tagħhom. Għaldaqstant, il-porzjoni li għandu jkun kopert mill-impjegatur fl-2011 hu ta' EUR 804 miljun. Sakemm ma jkunx hemm xi bidla sinifikanti fil-parametri l-oħra, il-kost totali tad-drittijiet tal-pensjoni, u għalhekk il-kontribuzzjoni tal-impjegatur, x'aktarx li tibqa’ l-istess.

5.5. Ir-rwol tal-pensjonijiet fil-pakkett ġenerali ta' kumpens tal-persunal tal-UE

Meta jkunu qed jiġu offruti impjieg, nies ikbar fl-età li jkunu qed ifittxu impjieg x'aktarx li se jagħtu iktar kunsiderazzjoni lir-rwol tal-pensjoni fil-pakkett ta' kumpens minn kandidati iżgħar. Barra minn hekk, kandidati li preċedentament ħadmu fis-settur privat jew pubbliku ikunu kisbu ċerta espejenza u sensitività fit-trattament tal-kwistjonijiet tal-irtirar. Kandidati li jitilqu minn sistema li huma familjari magħha biex jidħlu f'waħda ġdida x'aktarx li joqogħdu b'seba' għajnejn fuq is-sistema l-ġdida. Fl-aħħar nett, kandidati li jagħtu importanza lis-sigurta (tax-xogħol) u lill-karriera prevedibbli aktar milli lil salarji għoljin f'impjieg inqas stabbli se joqgħodu iktar attenti għal-iskema tal-pensjoni. L-uffiċjal tipiku reklutat ġdid mill-Istituzzjonijiet tal-UE x'aktarx li jaqa' f'waħda minn dawn il-kategoriji.

Minħabba li l-Istituzzjonijiet tipikament jimpjegaw nies li jkunu bdew il-karriera tagħhom x'imkien ieħor u li għalhekk ikollhom medja ta' 35 sena, l-importanza tas-sistema tal-pensjoni fil-pakkett ġenerali ta' kumpens hija maħsuba li hi ogħla minn , pereżempju, impjegati pubbliċi fl-Istati Membri li jibdew il-karrieri tagħhom fl-amministrazzjoni pubblika immedjatament wara li jiggradwaw. Il-fatt li kważi r-rekluti l-ġodda kollha preċedentament ħadmu x'imkien ieħor huwa ppruvat wkoll mill-għadd ta' trasferimenti lill-PSEO tad-drittijiet tal-pensjoni akkwiżiti barra mill-Istituzzjonijiet. Fuq medja, l-uffiċjali li kienu f'impjieg attiv fil-31 ta' Diċembru 2009 ittrasferew 1,6 sena ta' drittijiet akkwiżiti lill-PSEO, li rriżultaw minn perjodu ħafna itwal ta' ħidma fl-Istati Membri.

Fattur ieħor tar-rekluti l-ġodda mal-Istituzzjonijiet, li huwa wkoll marbut mal-fatt li huma relattivament ikbar, huwa li ħafna minnhom bdew familja jew kienu fi żmien li jagħmlu dan fiż-żmien li ġew reklutati. Is-sitwazzjoni individwali tagħhom x'aktarx li tixpruna lill-applikanti jikkunsidraw bir-reqqa l-benefiċċji soċjali, inkluż il-pensjoni, u biex iqabbluhom mal-alternattivi l-oħra tagħhom.

Minkejja li l-Kummissjoni ma għamlet l-ebda riċerka speċifika fuq dan is-suġġett, li jidher ukoll diffiċċli li jkun ivvalutat metodoloġikament, huwa raġonevoli li jkun konkluż li l-pensjoni għandha rwol sinifikanti fid-deċiżjoni ta' impjegati futuri biex jagħżlu l-Istituzzjonijiet tal-UE bħala karriera.

5.6. Reklutaġġ futur u bżonnijiet ta' żamma tal-Istituzzjonijiet tal-UE

Għalkemm il-bżonnijiet ta' reklutaġġ għall-uffiċjali għall-2011-2013 fil-Kummissjoni huma stmati bħala 1 393 uffiċjal AD u 1 251 uffiċjal AST[26], bħala parti mill-Qafas Finanzjarju maħsub għall-2014-2020 il-Kummissjoni qed tipproponi li tnaqqas il-persunal minn kull Istituzzjoni tal-UE b'5% matul il-perjodu 2013-2017; dan se jsir parzjalment billi ma jkunx sostitwit persunal li jirtira jew dawk li l-kuntratt tagħhom jiskadi.

Għandu jingħad li hemm żbilanċ ġeħgrafiku dejjem jikber bejn il-persunal b'nazzjonalitajiet differenti tal-Istati Membri differenti u dan huwa partikolarment viżibbli fil-każ ta' ċertu nazzjonalitajiet. Dan huwa prinċipalment ikkawżat mill-fatt li l-Istituzzjonijiet tal-UE qed jiffaċċaw l-isfida li joffru kundizzjonijiet tax-xogħol suffiċjentament attrattivi lill-impjegati potenzjali aħjar minn dawk offruti minn dawk l-Istati Membri.

Il-benefiċċji tal-pensjoni żgur li għandhom ikunu kkunsidrati bħala parti mill-pakkett li jippermetti lill-kandidati l-iktar kwalifikati li jkunu reklutati u miżmuma mill-Istati Membri inkluż dawk il-pajjiżi bl-ogħla salarji u l-iktar suq tax-xogħol kompetittiv.

5.7. L-iżgurar li l-provvediment futur tal-pensjoni jkun ġust mal-forza lavorattiva kollha tal-UE

L-iżgurar li l-provvediment futur tal-pensjoni ikun ġust mal-forza lavorattiva kollha hija kwistjoni kunċettwali ffaċċjata mill-Istati Membri meta jirriformaw l-iskemi tagħhom tal-pensjoni. Huma jeħtieġ li jipproteġu d-drittijiet akkwiżiti u, fl-istess waqt, jiżguraw li l-benfiċċji tal-pensjoni u l-piż li jkunu pprovduti dawn il-benefiċċji jkun distribwit b'mod ġust mal-ġenerazzjonijiet differenti.

Sa ċertu punt, l-Istituzzjonijiet tal-UE qed jiffaċċaw l-istess kwistjonijiet. Wara r-riforma tar-Regolament tal-Persunal fl-2004, issa hemm sett ta' regoli kemmxejn differenti li japplikaw għall-persunal reklutat qabel id-data effettiva tar-riforma tal-2004 u wara dik id-data, għax il-membri tal-persunal li kienu diġà tal-post huma koperti minn miżuri ta' trażizzjoni. Dan kien f'konformità mal-prinċipju tad-drittijiet akkwiżiti u n-nondiskriminazzjoni.

Skont il-patti tal-proposta tal-Kummissjoni, il-persunal reklutat qabel id-dħul fis-seħħ ta' din il-proposta se jkun kopert minn tranżizzjoni simili bħal dik tal-2004 fir-rigward taż-żieda tal-età tal-pensjoni normali. Din it-tranżizzjoni se tirriżulta f'konsistenza akbar bejn is-sitwazzjoni tal-kollegi reklutati qabel l-2004 u dawk reklutati wara l-2004.

5.8. Il-kondiviżjoni tar-riskju bejn l-Istituzzjonijiet tal-UE (l-impjegatur) u l-impjegati

Il-PSEO mhux direttament esposta għal riskji ta' investiment għax il-kontribuzzjonijiet ma jitħallsux f'fond reali; għalhekk il-kapital mhux investit. L-Artikolu 10 tal-Anness XII tar-Regolamenti tal-Persunal jindika li "ir-rati ta’ imgħax li għandhom jitqiesu għal kalkoli attwarjali għandhom ikunu bbażati fuq il-medja osservata tar-rati annwali tal-imgħax fuq id-dejn pubbliku tal-Istati Membri fuq perjodu twil…”. Għalhekk daqslikieku l-kontribuzzjonijiet tħallsu f'fond nozzjonali u l-kapital korrispondenti kien investit f'bonds tal-Istati Membri. Dan huwa probabbilment l-iktar investiment konservattiv disponibbli, li jfisser li r-rata ta' redditu hija pjuttost baxxa.

Li kieku s-sistema tal-pensjoni kellha tkun ristrutturata b'tali mod li jkun inkluż element ta' riskju, jista' jkun li l-persunal tal-Istituzzjonijiet tal-UE jkunu lest jaċċetta riskju ogħla bi skambju għal rata ta' redditu ogħla li twassal għall-ħtieġa ta' rata ta' kontribuzzjoni iktar baxxa biex l-iskema tal-pensjoni tibqa' bbilanċjata. Madanakollu, minħabba li l-istituzzjonijiet għandhom id-dover li jieħdu ħsieb il-persunal tagħhom, il-kwistjoni li jkunu pprovduti riżorsi addizzjonali fil-każ ta' falliment tal-fond biex jitħallsu l-pensjonijiet tibqa'.

Il-piż finanzjarju tal-kontribuzzjoni lejn is-sistema tal-pensjoni mhux riskju f'dan is-sens. Terz ta' dan il-piż jintrefa' mill-persunal tal-Istituzzjonijiet; Iż-żewġ terzi li jifdal huma koperti mill-baġit tal-UE li għalih iħallsu l-kontribwenti fiskali tal-UE.

L-Istati Membri joperaw sistemi differenti f'dan ir-rigward. Mhux ħaġa rari għall-uffiċjali pubbliċi li ma jikkontribwixxu xejn għall-pensjonijiet tagħhom. L-Istati Membri resqu l-informazzjoni segwenti dwar kif huwa kondiviż il-piż bejn l-impjegatur u l-impjegati:

Il-proporzjoni tal-kontribuzzjoni għall-pensjoni imħallsa mill-impjegat u mill-impjegatur fl-iskemi tal-pensjoni applikabbli għall-impjegati taċ-ċivil mal-gvern ċentrali tal-Istati Membri

Stat Membru || Kontribuzzjoni mħallsa mill-impjegat (%) || Kontribuzzjoni mħallsa mill-impjegatur (%)

AT || 33,3% || 66,7%

BE || 0%[27] || 100%

BG || Mhux speċifikat. || Mhux speċifikat.

CY || Mhux speċifikat. || Mhux speċifikat.

CZ || 23.2% || 76.8%

DE || 0% || 100%

DK || 0% || 100%

EE || 0% || 100%

EL || 33,3% || 66,7%

ES || 16,6% || 83,4%

FI || minn 18,2% sa 22% skont l-età || minn 81,8% sa 78%

HU || 28.4% || 71.6%

IE || Mhux speċifikat. || Mhux speċifikat.

IT || 26,7% || 73,3%

LT || 11,4% || 88,6%

LU || 50% || 50%

LV || 27,2% || 72.8%

MT || 33,3% || 66,7%

NL || 30% || 70%

PL || 50% jew 20% jew 100%, skont l-iskema || 50% jew 80% jew 0%, skont l-iskema

PT || 40% jew 33,3%, skont l-iskema || 60% jew 66,7%, skont l-iskema

RO || minn 25,4% sa 33,5% || minn 74,6% sa 66,5%

SE || 0% || 100%

SI || 63,6% || 36,4%

SK || 29,2% || 70,8%

UK || 7.4% jew 15.6%, || 92.6% jew 84.4%,

NB: Franza mhux inkluża fit-tabella għax ma kinitx irċevuta l-ebda risposta għall-kwestjonarju.

5.9. Politika usa' għall-persunal tal-UE u l-HR biex tinkoraġġixxi ħajja lavorattiva itwal u tfaddil adegwat għall-irtirar

Fil-proposta tagħha il-Kummissjoni ssuġġeriet li tiżdied l-età normali tal-pensjoni u li titjib il-possibbiltà ta' ħidma lil hinn mill-età tal-pensjoni. Il-Kummissjoni se tikkunsidra l-miżuri tar-riżorsi umani li jgħinu nies anzjani biex jaħdmu, addizzjonalment ma' dawk il-miżuri li diġà huma spjegati fir-Regolamenti tal-Persunal, pereżempju l-possibbiltà li jaħdmu part-time biex jippreparaw għall-irtirar, suġġett għall-ħlas ta' suppliment żgħir. Uħud minn dawn il-miżuri ma jeħtiġux xi bidla fir-Regolamenti tal-Persunal u jkunu implimentati mill-Istituzzjonijiet tal-UE.

6. Tfaddil li jirriżulta mill-proposta tal-Kummissjoni

Waqt li l-iffrankar fil-kost tal-pensjoni mir-riforma tal-2004 tar-Regolamenti tal-Persunal se jkompli jikber maż-żmien, il-proposta tal-Kummissjoni, jekk tkun adottata, twassal għall-iktar iffrankar. Għadd ta' bidliet għar-Regolamenti tal-Persunal ssuġġeriti mill-Kummissjoni jillimitaw direttament il-kost tal-pensjonijiet. Dawn jinkludu: iż-żieda tal-età normali tal-pensjoni minn 63 għal 65, il-posponiment effettiv tal-età mandatorja għall-irtirar sa 67, u l-limitar tal-aċċess għall-irtirar bikri billi jogħllu l-età minima tal-irtirar minn 55 għal 58.

Kienu ssuġġeriti wkoll bidliet fir-Regolament tal-Persunal li, waqt li mhumiex direttament relatati mal-kost tal-pensjoni, għandhom impatt fuq il-kost ġenerali tal-pensjoni billi jillimitaw is-salarji finali li fuqhom huma kkalkolati l-benefiċċji tal-pensjoni. Il-karrieri ta' uffiċjali AST, li jagħmlu xogħol segretarjali jkunu reveduti u llimitati bil-ħolqien ta' grupp ta' funzjoni ġdid (AST/SC). Għall-uffiċjali AST, l-aċċess għall-ogħla gradi tal-AST (AST 10 u 11) jkun limitat billi jintrabat ma' livell ogħla ta' responsabbiltajiet. It-tnaqqis tal-persunal b'5% issuġġerit jirriżulta f'għadd inqas ta' benefiċjarji futuri u jnaqqas ukoll il-kostijiet futuri tal-pensjoni.

Analiżi tal-impatt ta' dawn il-bidliet turi li l-proposta tal-Kummissjoni se tnaqqas b'mod sinifikanti l-kost tal-pensjonijiet maż-żmien. Il-Kummissjoni tippreżenta l-iffrankar relatat mal-pensjoni minn tlett angoli: l-impatt fuq in-nefqa għall-pensjonijiet fuq tul ta' żmien, l-impatt fuq il-kost tas-servizz li jrid ikun iffinanzjat kull sena u l-impatt fuq l-obbligi tal-pensjoni.

It-tlett approċi huma kumplimentari. Il-valutazzjoni tal-iffrankar fuq il-pensjoni fuq żmien twil tiffoka fuq iż-żmien meta jitħallsu l-pensjonijiet (Approċ tal-Fluss tal-Flus) Il-Kost tas-servizz jiffoka fuq iż-żmien meta d-drittijiet tal-pensjoni jkunu akkwiżiti u ffinanzjati (il-Metodu tal-Kreditu għall-Unità tal-Proġett). Fl-aħħar nett, l-obbligu tal-pensjoni jiffoka fuq id-drittijiet tal-pensjoni kumulati f'data ta' referenza (normalment il-31 ta' Diċembru ta' kull sena).

6.1. L-Impatt fit-tul taż-żmien tal-Proposta tal-Kummissjoni dwar in-nefqa fuq il-pensjoni

Jekk il-metodoloġija u l-assunzjonijiet tal-istudju tal-Eurostat tal-2010 kellhom jintużaw biex jitkejjel l-effet tal-proposta tal-Kummissjoni (inkluż it-tnaqqis tal-persunal b'5%) in-nefqa annwali għall-pensjoni tiżdied iktar bil-mod matul il-perjodu ta' projjezzjoni (2013-2059)[28]. Din is-simulazzjoni turi li, jekk il-proposta tal-Kummissjoni tidħol fis-seħħ fl-1 ta’ Jannar 2013, in-nefqa annwali għall-pensjoni wara l-2060 tonqos b'EUR 500 miljun addizzjonali. Dan izid mal-iffrankar ta' EUR 1 047 miljun li ħarġu mir-riforma tal-2004 tar-Regolamenti tal-Persunal, li jwasslu għal iffrankar totali fuq il-pensjonijiet ta’ EUR 1 550 miljun fl-2059. Dan ifisser li l-proposta tal-Kummissjoni, li kieku kienet fis-seħħ mill-2013, tirriżulta fi ffrankar ulterjuri ta’ madwar 50% tan-nefqa annwali għall-pensjoni.

It-tabella ta’ hawn taħt turi l-iffrankar totali stmat fin-nefqa annwali għall-pensjoni fl-2059 (bi prezzijiet kostanti) iġġenerati mir-riforma tal-2004 u mill-proposta tal-Kummissjoni, jekk din tidħol fis-seħħ fl-1 ta' Jannar 2013.

Tabella: Analiżi tal-impatt tal-proposta tal-Kummissjoni u r-riforma tal-2004 (EUR miljun) fuq in-nefqa annwali għall-pensjoni fuq terminu twil (2059)

Punt || Prezzijiet tal-2008

Impatt totali tar-riforma tal-2004 || 1047

- Ko-effiċjenti tal-korrezzjoni || 120

- Stabbiliment tal-istatut tal-aġenti kuntrattwali fl-2004 || 300

- Progressjoni tas-salarji minħabba anzjanità u promozzjonijiet || -227

- Salarju fil-livell tad-dħul || 321

- Rata li biha l-pensjoni issir dovuta || 106

- Tabella tal-irtirar || 426

Impatt totali tal-proposta tal-Kummissjoni || 500

Impatt totali tal-proposta tal-Kummissjoni u r-riforma tal-2004 || 1547

6.2. Impatt tal-proposta tal-Kummissjoni fuq il-kost tas-servizz

Ir-rata tal-kontribuzzjoni għall-pensjoni hija kkalkolata annwalment sabiex tiffinanzja id-drittijiet tal-pensjoni li ser jkunu akkwiżiti fis-sena segwenti (kost tas-servizz), hi meta hi d-data minn meta l-pensjoni korrispondenti ser titħallas. Il-kost tas-servizz jirrapreżenta l-ammont li jitħallas fil-fond tal-pensjoni, li kieku kien jeżisti.

Madanakollu, il-kost tas-servizz jista' biss ikejjel dawk l-aspetti tal-proposta tal-Kummissjoni li direttament inaqqsu l-kost tal-pensjoni, jiġifieri li l-età normali tal-pensjoni titla' minn 63 għal 65, il-posponiment tal-età mandatorja tal-irtirar sa 67 u l-limitar tal-aċċess għall-irtirar kmieni billi l-età tal-irtirar minima titla' minn 55 sa 58[29]. Fatturi oħra li indirettament jillimitaw il-kost ġenerali tal-pensjonijiet (ara hawn fuq) qed jitħallew fil-ġenb.

Li kieku l-proposta tal-Kummissjoni kienet fis-seħħ[30], il-kost tas-servizz kien ikun 9,5% inqas mill-kost attwalment ikkalkolat fil-31 ta' Diċembru 2010[31], jiġifieri ikun EUR 1 092 miljun minflok EUR 1 206 miljun. Madanakollu, dan l-iffrankar ikun jidher biss fuq terminu twil, ladarba l-parametri l-ġodda jkunu applikati għall-membri attivi kollha. L-iffrankar x'aktarx ikun negliġibbli fuq terminu qasir ħafna u ser jiżdied gradwalment kull sena biex jilħaq madwar 9,5% b'riżultat tal-implimentazzjoni tal-miżuri tranżizzjonali.

Il-kalkolu tal-kost tas-servizz attwali huwa bbażat fuq l-assunzjoni li l-persunal reklutat qabel ir-riforma tal-2004 tar-Regolamenti tal-Persunal u wara dik ir-riforma se jirtira fl-etajiet ta' 63 u 64 rispettivament. Dan kien imqabbel mal-kost tas-servizz ikkalkolat fuq l-assunzjonijiet li joħorġu mill-proposta tal-Kummissjoni (l-età minima tal-irtirar ta' 65 assunta u l-età massima tal-irtirar ta' 67 assunta). Bidliet għall-età minima tal-irtirar, penali għall-irtirar kmieni u inċentivi għall-irtirar tard ġew ukoll ikkunsidrati.

6.3. Impatt tal-proposta tal-Kummissjoni fuq l-obbligu tal-PSEO

Il-proposta tal-Kummissjoni jkollha impatt fuq l-obbligu tal-PSEO għax il-parametri tal-kalkoli jkollhom ikunu aġġornati skont dan[32]. L-obbligu gross tal-PSEO fil-31 ta' Diċembru 2010 kien ivvalutat għal EUR 37 702 miljun, inkluż allowances familjari u l-effett tal-koeffiċjenti ta' korrezzjoni.

Iż-żieda fl-età normali tal-pensjoni minn 63 sa 65 tipprovdi inċentiv ikbar għall-irtirar tard (xogħol sal-età ta' 67) u aċċess limitat għall-irtirar kmieni (billi l-età minima għall-irtirar tittella' minn 55 għal 58) mistenni jnaqqas l-obbligu tal-PSEO.

Il-miżuri ta’ hawn fuq biss għandhom impatt fuq l-obbligu tal-membri kontribwenti, li kien evalwat għal EUR 21 246 miljun fil-31 ta' Diċembru 2010 (56% tat-total tal-obbligu PSEO).

L-iffrankar fuq il-kost tal-pensjoni ġġenerat mill-proposta tal-Kummissjoni fuq livell individwali jiddependi mill-età tal-persuna. Iffrankar ogħla ser jsir minn persunal żgħir taħt it-30 sena fl-1 ta’ Mejju 2013, waqt li, il-miżuri tranżizzjonali jfissru li mhux ser jkun hemm iffrankar relatat ma' persunal li għandhom 59 sena jew iżjed.

Is-simulazzjonijiet juru li l-proposta tal-Kummissjoni tnaqqas l-obbligu tal-membri kontribwenti kollha b'14,5%; dan ifisser li l-obbligu fil-31 ta’ Diċembru 2010 ikun ta’ EUR 18 166 miljun minflok iċ-ċifra attwali ta’ EUR 21 246 miljun.

7. Konklużjonijiet

Wara li kkunsidrat dan ta' hawn fuq, il-Kummissjoni waslet għall-konklużjonijiet segwenti:

– Fir-rigward tar-rata ta' akkumulazzjoni, il-bażi tal-pensjoni, ir-rata massima possibbli tal-pensjoni u r-rata tal-kontribuzzjoni tal-persunal, il-PSEO hija konformi mal-iskemi tal-Istat Membri. Sa fejn għandhom x'jaqsmu xi aspetti, bħal-livell tal-kontribuzzjoni tal-persunal għall-pensjoni, il-PSEO hija fost l-iskemi tal-Istat Membri fejn ir-rata hija l-ogħla. Sa fejn għandhom x'jaqsmu l-kwistjonijiet ta’ hawn fuq, il-PSEO wkoll hija konformi mal-Green Paper.

– L-Istituzzjonijiet tal-UE jaqgħu fil-firxa tal-iskemi tal-Istati Membri għall-uffiċjali nazzjonali fir-rigward tal-età normali tal-pensjoni. Madanakollu, sabiex ikunu konformi bis-sħiħ mal-orjenatzzjonijiet tal-Green Paper, il-miżuri li huma spjegati fil-proposta tal-Kummissjoni jridu jkunu implimentati. Partikolarment dan jinvolvi r-restrizzjoni tal-irtirar kmieni billi tittella' l-età minima tal-irtirar għal 58 u jitnaqqas l-għadd ta' rtirar bikri mingħajr tnaqqis tad-drittijiet tal-pensjoni għal 5%, li jkunu żgurati ħajjiet lavorattivi itwal billi tittella' l-età tal-pensjoni għal 65 u billi tkun posposta l-età mandatorja tal-irtirar għal 67. Dawn il-miżuri jagħmlu l-Kummissjoni konformi mal-Istati Membri l-iktar avvanzati, waqt li ħafna minnhom jeħtieġ li jagħmlu riformi simili.

– Jekk deċiżjoni tittieħed biex tikkunsidra l-istabbiliment ta’ fond reali tal-pensjoni, tali miżura tirriżulta f'nefqa ikbar fuq l-iskema tal-pensjoni fuq terminu qasir u dak medju. Madanakollu, hija tnaqqas il-kostijiet tal-pensjoni fuq terminu twil, għax in-nefqa tal-pensjoni tkun parzjalment jew kompletament iffinanzjata mill-fond ta' pensjoni, skont is-soluzzjoni adottata.

– Il-miżuri fil-proposta tal-Kummissjoni, jekk adottati, ikollhom impatt kunsiderevoli fit-tnaqqis tal-kostijiet tal-pensjonu fuq terminu twil. Maż-żmien, in-nefqa annwali għall-pensjoni taqa; b'madwar EUR 500 miljun, u il-kost tas-servizz - li jirrifletti l-ammont li għandu jkun investit fil-fond reali tal-pensjoni li kieku kien jeżisti- jitnaqqas b'9,5%. Huma jkollhom impatt immedjat fuq il-porzjoni tagħhom tal-obbligu tal-pensjoni għall-persunal attiv, li jinżel b'14,5%.

[1]               Din iċ-ċifra tikkunsidra id-Deċiżjoni tal-Kunsill (2011/866/UE) tad-19 ta' Diċembru 2011 biex ma taddottax il-proposta tal-Kummissjoni biex jaġġusta ir-remunerazzjoni u l-pensjonijiet.

[2]               (COM(2008)443).

[3]               SEC(2010)989.

[4]               SEC (2010) 989, p.3.

[5]               Minn hawn 'il quddiem 'ir-riforma tal-2004'

[6]               SEC (2010/830).

[7]               Robert Palacios, Edward Whitehouse. Civil-service Pension Schemes Around the World. Mejju 2006. Dokument ta' diskussjoni dwar il-PS Nru 0602 Bank Dinji.

[8]               Bl-eċċezzjoni tal-aġenziji li jiffinanzjaw lilhom infushom, li jħallsu il-parti tal-impjegatur tal-kontribut lill-baġit tal-UE.

[9]               Persunal attiv ħallas il-kontributi għad-drittijiet tal-pensjoni li kiseb.

[10]             L-Istandard Internazzjonali tal-Kontabbiltà għas-Settur Pubbliku (IPSAS) 25 Huwa ekwivalenti għall-Istandard Internazzjonali tal-Kontabbiltà (IAS) 19 użat fis-settur privat.

[11]             Sors: Green paper

[12]             Fit-tabelli segwenti, "F" tirrapreżenta "Femminili" u "M" tirrapreżenta "Maskili".

[13]             Għall-persunal reklutat qabel l-1 ta' Mejju 2004 r-rata ta' akkumulazzjoni hi ta'2%.

[14]             Fir-rigward ta' Franza, minħabba li d-dejta ma saritx disponibbli għall-Eurostat, id-dejta inkluża f'dan ir-rapport issegwi l-portal segwenti tal-awtorità pubblika Franċiża. http://www.info-retraite.fr/index.php?id=144

[15]             Iċ-ċifri f'Euro huma kkalkolati bir-rata tal-kambju tal-1 ta' Lulju 2011, 1€=7,4592 DKK.

[16]             https://www.workindenmark.dk/Find%20information/Til%20arbejdstagere/Naar%20du%20 arbejder%20i%20Danmark/Pension/Folkepension.aspx

[17]             Ir-rati ta' sostituzzjoni juru l-livell tal-pensjonijiet bħal persentaġġ tal-gwadann preċeddenti ta' individwu

fil-mument li beda jieħu l-pensjoni.

[18]             Il-Kummissjoni pproponiet rata ta' kontribuzzjoni għall-pensjoni ta' 11,0% għall-2012.

[19]             Ir-Rapport Konġunt dwar il-Pensjonijiet 2010 mill-Kumitat tal-Politika Ekonomika, il-Kumitat tal-Protezzjoni Soċjali u s-Servizzi tal-Kummissjoni, p. 25 u 26.

[20]             Id-Danimark: skema għall-pensjonijiet tas-Suq tax-xogħol;; il-Polonja: Skema ġdida tal-pensjoni: OPF

[21]             Skemi ffinanzjati huma skemi tal-pensjonijiet li l-wegħdiet ta’ benefiċċju tagħhom huma appoġġjati minn fond ta’ assi mwarrba u investiti għall-iskop li jissodisfaw l-obbligi tal-iskema għall-ħlas tal-benefiċċji meta jinqalgħu.

[22]             Sors: Kalkoli tas-Subgrupp tal-Indikaturi tal-Kumitat għall-Protezzjoni Soċjali. Il-kalkoli huma bbażati fuq ir-rati ta’ sostituzzjoni teoretiċi għal individwi li jaħdmu fis-settur privat, li għandhom karriera ta’ 40 sena mingħajr interruzzjoni (mill-età ta' 25 sa 65), u gwadann medju fl-ekonomija. Il-proporzjoni tal-introjtu li ġej minn skemi tal-pensjonijiet iffinanzjati b'mod mandatorju probabbli se jkun inqas minn dak preżentat fiċ-ċifra għal għadd ta' Stati Membri, fejn ir-rati ta’ kontribuzzjoni għall-iskemi ffinanzjati tnaqqsu (temporanjament jew permanentament) fid-dawl tal-kriżi ekonomika riċenti.

[23]             http://www.unjspf.org/UNJSPF_Web/page.jsp?role=info&page=Invest&lang=eng

[24]             Ara Civil Services in the EU of 27, Reform Outcomes and the Future of the Civil Service, ta' C. Demmke, u T. Moilanen, Edizzjoni Peter Lang, 2010, p. 98. Ara wkoll it-Tabella 13 p. 99.

[25]             L-Artikolu 77, premessa 4 tar-Regolament tal-Persunal jiddikjara li l-ammont tal-pensjoni tal-irtirar m'għandux ikun inqas minn 4% taċ-ċifra minima tas-sussistenza għal kull sena ta' servizz.

[26]             Rapport dwar ir-Riżorsi Umani 2011, p. 43

[27]             Jekk jogħġbok innota li fil-Belġju kontribuzzjoni b'rata ta' 7,5% hija mħallsa mill-impjegat biex tkun iffinanzjata biss il-pensjoni tas-superstiti.

[28]             Għandu jkun innutat li l-istudju tal-Eurostat tal-2010 dwar l-implikazzjonijiet baġitarji fuq terminu twil tal-kostijiet tal-pensjoni ma ġiex aġġornat. L-iffrankar fuq il-pensjonijiet preżentati f'din il-parti kienu kkalkolati b'metodoloġija simplifikata.

[29]             L-impatt tagħhom fuq il-kost annwali tas-servizz, espress f'persentaġġi, huwa rapreżentattiv tal-kost tas-servizz matul il-karriera kollha (jiġifieri il-pensjonijiet totali li jridu jitħallsu sakemm persuna tmut), jekk assunzjonijiet oħra jibqgħu mhux mibdula (ceteris paribus).

[30]             Simulazzjoni bbażata fuq popolazzjoni attiva fil-31.12.2010, li teskludi kwalunkwe impatt minħabba bidla fuq l-istruttura tal-popolazzjoni.

[31]             Valutazzjoni tal-pensjoni fil-31.12.2010 abbażi tal-parametri u l-assunzjonijiet tar-Regolamenti tal-Persunal fis-seħħ mill-2004.

[32]             L-obbligu tal-PSEO imsejjaħ ukoll "Obbligu ta' Benefiċċju Definit" (DBO) huwa ddeterminat bili jkun skontat il-ħruġ futur tal-flus attribwit tas-servizzi tal-passat bl-użu ta’ rata ta’ skont ibbażata fuq ir-rati tal-imgħax tal-bonds tal-gverm denominati fil-valuta li fiha l-benefiċċji jitħallsu, u b'patti ta' maturità li jqarrbu dawk tal-PSEO. L-obbligu jikkorrispondi għad-drittijiet tal-pensjoni akkwiżiti mill-persunal attiv (kontribuzzjonijiet għall-pensjoni) u għal trasferimenti minn skemi oħra tal-pensjoni.