13.9.2012   

MT

Il-Ġurnal Uffiċjali tal-Unjoni Ewropea

C 277/110

—

jilqa' l-għan li jinħolqu l-kundizzjonijiet meħtieġa sabiex l-infrastruttura eżistenti tintuża b'mod aktar effiċjenti, però jemmen li għandhom jittieħdu aktar passi biex tiġi sodisfatta t-talba dejjem tikber għall-kapaċitajiet. B'mod partikolari, huwa importanti li tiġi estiża l-infrastruttura tal-ajruporti mgħobbija b'aktar xogħol milli jifilħu, li jiġu kkunsidrati aktar il-kapaċitajiet liberi tal-ajruporti reġjonali, li jissokta b'mod kontinwu l-ħolqien ta’ Ajru Uniku Ewropew u li jiġu garantiti ħinijiet kompetittivi, anke matul il-lejl;

—

jiġbed l-attenzjoni għall-ħtieġa li titjieb ir-rabta intermodali bejn l-ajruporti u l-modi l-oħra tat-trasport. Dan iżid il-kompetittività u jiggarantixxi li r-reġjuni jkunu konnessi b'mod adegwat man-netwerk Ewropew u dinji tat-trasport bl-ajru;

—

jaqbel li, fil-kuntest tal-Approċċ Bilanċjat, għandha tingħażel l-aktar miżura kosteffiċjenti biex jintlaħqu l-objettivi tat-tnaqqis tal-istorbju, iżda jemmen li d-dritt ta’ skrutinju previst għall-Kummissjoni Ewropea jmur lil hinn mis-setgħa mogħtija lill-Kummissjoni skont il-prinċipju tas-sussidjarjetà. Ir-restrizzjonijiet operattivi għandhom jiġu stabbiliti mill-awtoritajiet reġjonali fid-dawl tas-sitwazzjoni lokali u tal-ispeċifiċitajiet lokali. Id-dritt ta’ skrutinju addizzjonali tal-Kummissjoni Ewropea la huwa meħtieġ u lanqas proporzjonat;

—

jilqa' l-fatt li l-aċċess għas-suq tas-servizzi ta’ groundhandling ser ikompli jinfetaħ u jiġi armonizzat. Dan iwassal għal aktar kompetizzjoni u, fl-aħħar mill-aħħar, għal servizzi ta’ groundhandling ta’ kwalità ogħla fl-ajruporti tal-UE. Però, sabiex jiġu evitati l-konsegwenzi negattivi fuq il-kundizzjonijiet tal-impjieg eżistenti, is-sikurezza tal-avjazzjoni u l-kapaċità tal-ajruporti, għandu jkun possibbli li jiġu kkunsidrati b'mod adatt l-ispeċifiċitajiet lokali fl-ajruporti;

—

jilqa' l-proposta tal-Kummissjoni Ewropea li tintroduċi strumenti bbażati fuq is-suq sabiex il-kapaċitajiet infrastrutturali skarsi tal-ajruporti traffikużi jintużaw aħjar, iżda jenfasizza li għandu jibqa' jiġi żgurat li r-reġjuni jkunu konnessi man-netwerk tat-trasport bl-ajru.

Relatur

Is-Sur WERNER (DE/ALDE), Segretarju tal-Istat fi ħdan il-Ministeru tal-Istat ta’ Sachsen għall-Affarijiet Ekonomiċi, ix-Xogħol u t-Trasport

Dokumenti ta’ referenza

1.

jaqbel mal-fehma li l-ajruporti huma parti indispensabbli minn netwerk tat-trasport modern u effiċjenti. F'ċerti reġjuni huma jagħtu kontributi importanti għall-iżvilupp ekonomiku, is-suq tax-xogħol u t-turiżmu. Fl-istess ħin, huma jsaħħu l-koeżjoni territorjali fi ħdan l-Unjoni Ewropea;

2.

jaqbel li l-istorbju mill-ajruplani hija problema għal għadd dejjem ikbar ta’ ċittadini Ewropej, speċjalment bil-lejl, u li għalhekk hemm bżonn strateġija għall-ġestjoni tal-istorbju biex jitnaqqsu l-effetti mhux mixtieqa;

3.

jappoġġja l-għan tal-Kummissjoni Ewropea li tiżviluppa u tuża bl-aħjar mod possibbli l-potenzjal tat-trasport bl-ajru, u speċjalment dak tat-tkabbir previst f'dan l-qasam;

4.

jenfasizza li l-UE tista' tippromovi l-investiment fil-modernizzazzjoni tan-netwerks tal-ajruporti u l-bini ta’ ajruporti ġodda, l-aktar permezz ta’ strumenti finanzjarji innovattivi, sabiex tiggarantixxi tkabbir ekonomiku fit-tul fi ħdanha kif ukoll it-titjib tar-relazzjonijiet ekonomiċi tagħha mal-bqija tad-dinja;

5.

huwa tal-fehma li d-diskrepanza bejn il-kapaċità tal-infrastruttura tal-ajruporti u l-bżonnijiet dejjem akbar tal-ivvjaġġar u t-trasport qed tiżdied. Xi ajruporti Ewropej diġà għandhom aktar xogħol milli jifilħu għalih jew inkella qed jaħdmu fil-limiti tal-kapaċità tagħhom. Mhux dejjem ikun possibbli, speċjalment fl-ajruporti fejn isiru ħafna konnessjonijiet tat-titjiriet (hub airports), li jinħolqu biżżejjed kapaċitajiet ġodda daqskemm titlob id-domanda għalihom. Għal din ir-raġuni, huwa mistenni li fis-snin li ġejjin il-limitazzjonijiet tal-kapaċitajiet ser ikomplu jiggravaw;

6.

jilqa' l-għan li jsiru sforzi kontra l-limitazzjonijiet dejjem jiżdiedu tal-kapaċitajiet, u li jinħolqu l-kundizzjonijiet meħtieġa sabiex l-infrastruttura eżistenti tintuża b'mod aktar effiċjenti. Madankollu, il-Kumitat jiġbed l-attenzjoni għall-fatt li l-miżuri proposti fil-pakkett tal-ajruporti mhumiex biżżejjed biex jintlaħaq dan il-għan;

7.

jisħaq li bosta ajruporti reġjonali għandhom biżżejjed kapaċitajiet infrastrutturali sabiex itaffu b'mod effettiv il-piż tal-ajruporti b'limitazzjonijiet tal-kapaċitajiet, u b'hekk tkun tista' tittejjeb il-konnessjoni tar-reġjuni;

8.

jinnota li għandhom jittieħdu aktar passi biex jiġu koperti l-kapaċitajiet meħtieġa, li dejjem qed jiżdiedu. B'mod partikolari, huwa importanti li tiġi estiża l-infrastruttura tal-ajruporti mgħobbija b'aktar xogħol milli jifilħu, li jiġu kkunsidrati aktar il-kapaċitajiet liberi tal-ajruporti reġjonali, li jissokta b'mod kontinwu l-ħolqien ta’ Ajru Uniku Ewropew u li jiġu garantiti ħinijiet kompetittivi, anke matul il-lejl. Barra minn hekk, l-ajruporti reġjonali ż-żgħar għandhom jiġu appoġġjati b'mod sinifikanti sabiex jikkomplementaw lill-ajruporti l-kbar u jiġu ottimizzati l-infrastrutturi eżistenti;

9.

jiġbed l-attenzjoni għall-ħtieġa li titjieb ir-rabta intermodali bejn l-ajruporti u l-modi l-oħra tat-trasport. Dan iżid il-kompetittività u jiggarantixxi li r-reġjuni jkunu konnessi b'mod adegwat man-netwerk Ewropew u dinji tat-trasport bl-ajru;

10.

jemmen li l-allokazzjoni aktar effiċjenti tas-slots hija opportunità adatta sabiex jintużaw aħjar il-kapaċitajiet infrastrutturali skarsi tal-ajruporti traffikużi. Jilqa' l-approċċ tal-Kummissjoni Ewropea li tintroduċi strumenti bbażati fuq is-suq għal dan il-għan, iżda hawnhekk għandu jibqa' jiġi żgurat li r-reġjuni jkunu konnessi man-netwerk tat-trasport bl-ajru;

11.

jappoġġja l-proposta li jiġu riveduti r-regoli u l-proċeduri fir-rigward tal-introduzzjoni ta’ restrizzjonijiet operattivi relatati mal-istorbju. L-għan li jiġi armonizzat il-mod kif jiġi applikat l-Approċċ Bilanċjat għandu jwassal għal livell ogħla ta’ protezzjoni għal dawk milqutin mill-istorbju tal-inġenji tal-ajru b'konformità mad-Direttiva 2002/49/KE tal-25 ta’ Ġunju 2002 li tirrigwardja l-istudju u l-amministrazzjoni tal-ħsejjes ambjentali;

12.

jilqa' l-għan li jkompli jiġi liberalizzat is-suq tas-servizzi ta’ groundhandling. Dan iwassal għal aktar kompetizzjoni u, fl-aħħar mill-aħħar, għal servizzi ta’ kwalità ogħla. Sabiex jiġu evitati l-konsegwenzi negattivi fuq il-kundizzjonijiet tal-impjieg eżistenti, is-sikurezza tal-avjazzjoni u l-kapaċità tal-ajruporti, għandu jkun possibbli li jiġu kkunsidrati b'mod adatt l-ispeċifiċitajiet lokali fl-ajruporti. Barra minn hekk, irid jiġi żgurat li r-regoli f'dan il-qasam ma jwasslux biex il-kumpaniji li jipprovdu dawn is-servizzi jiġu ttrattati b'mod inugwali. L-għan tal-Kummissjoni Ewropea li tevita d-distorsjonijiet tal-kompetizzjoni jista' jintlaħaq biss jekk jiġu applikati l-istess kundizzjonijiet għall-partijiet interessati kollha;

13.

jinsab imħasseb dwar il-proposti tal-Kummissjoni u l-proposta aktar ġenerali ta’ “Aproċċ Ġenerali” tal-Kunsill biex jiġu regolati t-tariffi tal-infrastruttura tal-groundhandling b'konformità mad-dispożizzjonijiet tad-Direttiva dwar l-imposti tal-ajruporti (Direttiva 2009/12/KE) u lil hinn minnhom. Dawn it-tariffi tipikament jinkludu persentaġġ żgħir ħafna tad-dħul ġenerali tal-ajruporti, b'mod partikolari fl-ajruporti reġjonali li jaqbżu bl-eżatt il-limitu ġdid propost ta’ żewġ miljun passiġġier fis-sena, u jikkostitwixxu ammonti żgħar f'termini assoluti. L-ispejjeż amministrattivi jistgħu jaqbżu sew kwalunkwe benefiċċju potenzjali peress li l-ajruporti diġà huma obbligati jistabbilixxu tariffi bħal dawn b'mod oġġettiv u trasparenti;

14.

jisħaq fuq l-importanza tal-Avjazzjoni Ġenerali għat-trasport bl-ajru fl-UE. Din tippermetti lill-intraprendituri li joħolqu l-ġid u l-impjiegi sabiex wieħed jivvjaġġa bi flessibbiltà massima, u żżid is-setgħa ekonomika tar-reġjuni periferiċi u ta’ dawk ultraperiferiċi. Dan huwa partikolarment importanti meta tiġi kkunsidrata l-kwistjoni tas-slots u l-aċċessibbiltà tal-ajruporti;

15.

jilqa' l-għan li jiġu speċifikati l-proċeduri u r-regoli fir-rigward tal-introduzzjoni ta’ restrizzjonijiet operattivi relatati mal-istorbju u li tiżdied it-trasparenza fil-proċess ta’ evalwazzjoni. Dan jikkontrobatti l-applikazzjoni mhux uniformi tad-Direttiva fl-Istati Membri, minbarra li joffri livell komparabbli ta’ protezzjoni mill-istorbju lil dawk milqutin mill-istorbju tal-inġenji tal-ajru. Madankollu, il-Kumitat jinnota li l-abbozz ta’ Regolament għadu mhuwiex konformi mad-Direttiva 2002/49/KE li tirrigwardja l-istudju u l-amministrazzjoni tal-ħsejjes ambjentali, b'mod partikolari b'rabta mal-valutazzjoni tal-istorbju u l-analiżi tal-kosteffikaċja, u għalhekk joħloq piż amministrattiv kbir, li min-naħa tiegħu jwassal għal spiża sinifikanti u jikkomprometti l-aċċettazzjoni min-naħa tal-pubbliku tat-trasport bl-ajru;

16.

jistenna li bil-bidla tad-Direttiva attwali f'Regolament, il-miżuri tal-protezzjoni mill-istorbju jsiru aktar effettivi u jiġu evitati d-distorsjonijiet tal-kompetizzjoni fl-Unjoni Ewropea;

17.

jaqbel mal-Kummissjoni Ewropea li, fil-kuntest tal-Approċċ Bilanċjat, għandha tingħażel l-aktar miżura kosteffiċjenti biex jintlaħqu l-objettivi tat-tnaqqis tal-istorbju. Madankollu, anke s-saħħa u s-sigurtà tal-persuni li jgħixu viċin l-ajruporti għandhom jitqiesu kemm jista' jkun u mhux biss bħala għażla fakultattiva. B'dan il-mod l-Istati Membri jkunu jistgħu jsibu t-triq tan-nofs bejn il-konsegwenzi ekonomiċi tal-miżuri ta’ protezzjoni mill-istorbju u l-bżonnijiet ġustifikati ta’ protezzjoni li jkollhom dawk milqutin mill-istorbju tal-inġenji tal-ajru;

18.

fil-prinċipju, jappoġġja l-għan li jogħla l-limitu għall-inġenji tal-ajru marġinalment konformi. B'dan il-mod jiġi kkunsidrat il-progress tekniku fl-iżvilupp ta’ ajruplani inqas storbjużi. Però l-Kumitat jinnota li l-ajruplani tal-merkanzija jirrispettaw il-limitu aktar strett ta’ 10 EPNdB (Effective Perceived Noise in decibels, Storbju Effettivament Ipperċepit f'deċibel) b'mod anqas frekwenti mill-ajruplani tal-passiġġieri. Għaldaqstant, kwalunkwe projbizzjoni fuq l-“inġenji tal-ajru marġinalment konformi” taffettwa b'mod sproporzjonalment aktar lil-linji tal-ajru tal-merkanzija. Għalhekk, il-Kumitat jirrakkomanda li l-limitu jogħla iżda b'ammont aktar baxx fi żmien ta’ tranżizzjoni adatt. Jekk il-limitu jiżdied għal 8 EPNdB, l-istorbju diġà jonqos b'mod sostanzjali;

19.

huwa tal-fehma li hemm bżonn korp ta’ appell indipendenti fil-livell tal-Istati Membri;

20.

jilqa' l-applikazzjoni tal-Approċċ Bilanċjat sabiex jiġi mnaqqas jew limitat il-livell ta’ kemm in-nies jintlaqtu mill-istorbju. Dan jagħti lill-Istati Membri l-flessibbiltà neċessarja fil-ġlieda kontra l-istorbju. F'dan ir-rigward, il-Kumitat jaqbel mal-fehma tal-Kummissjoni Ewropea li r-restrizzjonijiet operattivi relatati mal-istorbju għandhom jiġu introdotti biss meta ma jkunx fadal aktar xi jsir;

21.

jappoġġja l-għan li jiġu speċifikati r-regoli għall-valutazzjoni tal-istorbju tal-inġenji tal-ajru u li l-proċess ta’ valutazzjoni jitfassal b'mod aktar trasparenti. Il-konsultazzjoni prevista ma’ dawk milqutin mill-istorbju twassal biex tiġi aċċettata aktar l-implimentazzjoni tal-miżuri għat-tnaqqis tal-istorbju. Madankollu, il-Kumitat jirrakkomanda li l-Istati Membri jingħataw biżżejjed libertà fir-rigward tal-kompożizzjoni tal-“forum għall-kooperazzjoni teknika” previst fl-abbozz ta’ Regolament. Jekk fl-Istati Membri jkunu diġà stabbiliti korpi simili, għandu jkun possibbli li dawn jiġu rikonoxxuti sabiex ma jinħolqux korpi addizzjonali;

22.

huwa tal-fehma li l-metodu ta’ valutazzjoni tal-istorbju msemmi fl-Anness I tal-abbozz ta’ Regolament, li huwa bbażat fuq ir-Rapport tal-ECAC Dok 29 bit-titolu “Metodu Standard ta’ Kkomputar ta’ Profili tal-Istorbju madwar l-Ajruporti Ċivili”, mhuwiex adatt biex iżid it-trasparenza fil-proċedura tal-valutazzjoni tal-istorbju. L-introduzzjoni ta’ metodu ta’ valutazzjoni addizzjonali twassal biex tintilef il-komparabbiltà, pereżempju, mad-Direttiva dwar il-ħsejjes ambjentali jew mar-regoli nazzjonali dwar il-kalkolazzjoni tal-istorbju, u toħloq ukoll piż burokratiku mhux meħtieġ. Għalhekk, il-valutazzjoni tal-istorbju għandha ssir skont id-Direttiva li tirrigwardja l-istudju u l-amministrazzjoni tal-ħsejjes ambjentali (Direttiva 2002/49/KE);

23.

jemmen li d-dritt ta’ skrutinju previst għall-Kummissjoni Ewropea, jiġifieri li din tkun tista' tirrevedi r-restrizzjonijiet operattivi qabel ma jiddaħħlu u – jekk ikun hemm bżonn – twaqqafhom, imur lil hinn mis-setgħa mogħtija lill-Kummissjoni skont il-prinċipju tas-sussidjarjetà. Ir-restrizzjonijiet operattivi għandhom jiġu stabbiliti mill-awtoritajiet reġjonali fid-dawl tas-sitwazzjoni lokali u tal-ispeċifiċitajiet lokali. Id-dritt ta’ skrutinju addizzjonali tal-Kummissjoni Ewropea la huwa meħtieġ u lanqas proporzjonat. Barra minn hekk, dan bl-ebda mod ma jikkontribwixxi biex jintlaħaq l-għan tar-Regolament li jitnaqqas in-numru ta’ persuni milqutin mill-istorbju tal-inġenji tal-ajru;

24.

jemmen li d-definizzjoni tal-kunċetti ta’ “inġenji tal-ajru” u ta’ “inġenji tal-ajru marġinalment konformi”, l-aġġornament tal-limiti massimi ta’ storbju u tal-proċedura ta’ ċertifikazzjoni kif ukoll il-bidla fil-metodu u r-rapport tekniku huma parti essenzjali mill-kontenut tar-Regolament. F'dan ir-rigward, dawn il-punti mhumiex adegwati sabiex is-setgħa għall-adozzjoni ta’ atti delegati skont l-Artikolu 290 tat-Trattat dwar il-Funzjonament tal-Unjoni Ewropea tiġi delegata lill-Kummissjoni;

25.

jaqbel mal-Kummissjoni Ewropea li s-servizzi ta’ groundhandling għandhom rwol ewlieni fil-katina tal-avjazzjoni. Servizzi ta’ groundhandling effiċjenti u ta’ kwalità jagħtu kontribut essenzjali sabiex tiġi garantita sistema tal-avjazzjoni effiċjenti u kompetittiva;

26.

jilqa' l-fatt li l-aċċess għas-suq tas-servizzi ta’ groundhandling ser ikompli jinfetaħ u jiġi armonizzat. F'dan il-kuntest, huwa mistenni li l-kwalità tas-servizzi ta’ groundhandling offruti fl-ajruporti tal-Unjoni tkompli titjieb. Dan huwa ta’ benefiċċju, bl-istess mod, għal-linji tal-ajru, l-ispedituri u l-passiġġieri. Bil-għan li jiġu evitati impatti neġattivi fuq il-kundizzjonijiet tax-xogħol eżistenti, is-sikurezza tal-avjazzjoni u l-kapaċità tal-ajruport, għandu jkun possibbli li jitqiesu b'mod adatt l-ispeċifiċitajiet lokali tal-ajruporti;

27.

huwa favur ir-regolamentazzjoni dwar it-trasferiment tal-persunal bejn il-fornituri tas-servizzi. F'dan il-kuntest jitlob li jiġi verifikat jekk id-dispożizzjonijiet tal-Artikolu 4(5) tar-Regolament (KE) 1370/2007 jippermettux li l-awtoritajiet kontraenti japplikaw, mingħajr l-ebda att ta’ implimentazzjoni ieħor mill-Istati Membri, il-possibbiltà li jittrasferixxu persunal kif jiġi determinat fil-livell nazzjonali, u jekk jistgħux jiġu definiti parametri oħra rigward it-trasferiment tal-ħaddiema;

28.

jinnota li għad ma ġewx stabbiliti b'mod adegwat id-dispożizzjonijiet kollha għall-proċedura ta’ awtorizzazzjoni. B'mod partikolari hemm bżonn ta’ titjib fir-rigward ta’ kif jiġi stabbilit it-twettiq fil-ħin tad-diversi fażijiet tal-proċedura, dispożizzjoni speċjali li bis-saħħa tagħha jitneħħa l-effett imprattikabbli tal-ilmenti sospiżi, il-kompetenza fl-implimentazzjoni tal-proċedura ta’ awtorizzazzjoni u l-kriterji ta’ attribuzzjoni;

29.

jaqbel mal-fehma tal-Kummissjoni Ewropea li l-ajruporti għandhom rwol deċiżiv fil-kordinament tal-fornituri ta’ servizzi ta’ groundhandling. Madankollu, il-Kumitat jinnota li l-ajruporti jistgħu jaqdu dan ir-rwol biss jekk fl-Istati Membri jiġu żgurati l-kundizzjonijiet legali meħtieġa għal dan il-għan. Barra minn hekk, dawn il-kompiti joħolqu spejjeż addizzjonali li l-ajruporti jsibuha diffiċli biex ikopruhom permezz tas-suq;

30.

jenfasizza li jekk ikompli jinfetaħ is-suq, dan m'għandux ikolllu impatt negattiv fuq is-sigurtà tal-avjazzjoni. Sabiex jiġi garantit livell għoli ta’ sigurtà fl-ajruporti tal-Unjoni, jeħtieġ li l-persunal jitħarreġ u jkompli jitħarreġ b'mod adegwat;

31.

jemmen li huwa importanti li t-taħriġ ikun twil biżżejjed biex jiggarantixxi servizzi ta’ groundhandling ta’ kwalità. Peress li s-servizzi ta’ groundhandling jeħtieġu approvazzjoni li tkun rikonoxxuta fl-Istati Membri kollha, il-Kumitat jirrakkomanda li t-taħriġ jitfassal b'tali mod li jinħolqu standards komparabbli tal-kwalifiki. Hawnhekk iridu jitqiesu wkoll il-kosteffiċjenza u t-tħeġġiġ tal-impjiegi;

32.

josserva li s-subkuntrattar huwa riżervat għall-fornituri terzi biss. L-operaturi tal-ajruporti u l-utenti tal-ajruporti mhux ser jingħataw din il-possibbiltà. Fil-fehma tal-Kumitat, dan jirrappreżenta diskriminazzjoni li xxekkel il-kompetizzjoni u mhuwiex kompatibbli mal-għan tal-abbozz ta’ Regolament li tissaħħaħ il-kompetizzjoni. Is-subkuntrattar għandu jiġi permess għall-fornituri kollha tas-servizzi ta’ groundhandling skont regoli speċifiċi;

33.

jemmen li r-reviżjoni tar-Regolament tagħti kontribut importanti biex il-kapaċitajiet infrastrutturali skarsi jintużaw b'mod aktar effiċjenti. Peress li t-traffiku tal-ajru huwa mbassar li jiżdied filwaqt li l-infrastruttura tal-ajruporti mhijiex qed tikber bl-istess rata, il-linji tal-ajru qed jiffaċċjaw dejjem aktar limitazzjonijiet biex jissodisfaw b'mod suffiċjenti d-domanda għas-servizzi tat-trasport. Dan huwa ostaklu għall-iżvilupp ekonomiku tat-trasport bl-ajru u, b'hekk, għar-reġjuni;

34.

jemmen li, f'każijiet fejn l-awtorità indipendenti ta’ superviżjoni tintalab tieħu deċiżjoni dwar il-livell ta’ tariffi għall-użu ta’ infrastruttura ċentralizzata, il-korp ta’ ġestjoni tal-infrastruttura ċentralizzata għandu jkun intitolat għal irkupru mill-utenti fil-livell propost inizjalment, sakemm l-awtorità indipendenti ta’ superviżjoni tagħmel id-deċiżjoni finali tagħha. Dan jista' jnaqqas l-inċentiv li wieħed iqajjem sfidi vessatorji għad-deċiżjonijiet dwar il-livell ta’ tariffi;

35.

jilqa', fil-prinċipju, l-introduzzjoni ta’ strumenti bbażati fuq is-suq għall-allokazzjoni tas-slots. Dan jiżgura li s-slots jingħataw lil-linji tal-ajru li jkunu jistgħu jużawhom bl-aħjar mod. Għandu jibqa' jiġi żgurat li r-reġjuni jkunu konnessi man-netwerk tat-trasport bl-ajru;

36.

jinnota li ma ġewx ippreżentati l-konsegwenzi kollha tal-kummerċ tas-slots. B'mod partikolari, il-Kummissjoni Ewropea ma ssemmix kif il-kummerċ tas-slots ser jaffettwa l-ajruporti reġjonali u, b'hekk, il-konnettività reġjonali;

37.

jemmen li huwa possibbli li l-linji tal-ajru jagħtu preferenza lit-trasport fuq distanzi twal meta jiġu biex jużaw is-slots li jkollhom f'hub airports traffikużi wisq. Dan idgħajjef il-konnessjoni tal-ajruporti reġjonali mal-hub airports. Għalhekk, il-Kumitat jitlob li jiġu previsti miżuri adatti biex jiżguraw li r-reġjuni jkunu konnessi man-netwerk dinji tat-trasport bl-ajru;

38.

huwa kuntent bl-intenzjoni li tissaħħaħ l-indipendenza tal-kordinaturi tal-ajruporti. L-abbozz ta’ Regolament jippermetti lil-linji tal-ajru li fil-futur jittrasferixxu s-slots tagħhom, anke bi ħlas. It-trasferiment irid jiġi approvat u kkonfermat mill-kordinatur tal-ajruporti. Għaldaqstant, fil-fehma tal-Kumitat, huwa aktar u aktar importanti li l-kordinatur tal-ajruporti jieħu d-deċiżjonijiet tiegħu b'mod indipendenti u oġġettiv;

39.

huwa tal-fehma li ma jagħmilx sens li s-slots jiġu allokati mingħajr ħlas jekk dawn imbagħad ikunu jistgħu jinbiegħu. B'mod partikolari, il-kummerċ tas-slots tal-linji tal-ajru għandu jiġi approvat biss jekk dawn jagħtu prova li qabel kienu użaw is-slots b'mod regolari;

40.

jemmen li l-bidla fir-regola dwar l-użu minimu tas-slots hija aċċettabbli. Din il-miżura żżid il-pressjoni biex is-slots miksuba jintużaw aktar bis-sħiħ. Fl-istess ħin, wieħed għandu jiżgura li jiġu kkunsidrati l-avvenimenti eċċezzjonali (bħal strajks u rmied tal-vulkani). Huwa mistenni li fil-ġejjieni jkun hemm aktar slots li jitqiegħdu lura fil-pool tas-slots jew li jinbiegħu lil linja tal-ajru oħra. B'hekk isir aktar faċli li linji tal-ajru oħrajn jiksbu aċċess għas-suq ta’ ajruporti traffikużi wisq;

41.

jilqa' l-possibbiltà li, bis-saħħa ta’ sistema ta’ imposti, l-ajruporti jistgħu jinfluwenzaw ir-ritorn kemm jista' jkun bikri ta’ slots mhux meħtieġa jew riżervati. Dan jiżgura li s-slots ma jiġux blokkjati, iżda jkunu jistgħu jintużaw minn linji tal-ajru oħrajn;

42.

jagħraf l-importanza tad-dispożizzjoni dwar ir-“regoli lokali” biex jiġi żgurat li l-qafas regolatorju jippermetti biżżejjed flessibbiltà f'dawk ir-reġjuni u l-ajruporti tagħhom b'ċirkostanzi speċifiċi li jirrikjedu attenzjoni mistħoqqa. F'tali ċirkostanzi, l-input reġjonali huwa meħtieġ biex jiġi żgurat użu ottimu u effiċjenti tal-kapaċità tal-ajruporti individwali;

43.

iqis li d-dritt propost li l-Kummissjoni Ewropea taħtar b'mod individwali “ajruport li huwa parti min-netwerk”, fejn tista' titlob lill-Istati Membri biex jittrattaw ajruporti individwali b'mod distint u separat, imur lil hinn mis-setgħat tagħha skont il-prinċipju tas-sussidjarjetà;

44.

jinsab imħasseb dwar l-introduzzjoni tal-kunċett ta’ “operatur tan-netwerk” mill-Kummissjoni Ewropea u b'mod partikolari l-allokazzjoni proposta ta’ setgħat sinifikanti u wiesgħa lil din l-entità fl-assenza ta’ definizzjoni ċara tal-governanza tal-entità.

1

L-ajruplani tal-merkanzija jirrispettaw il-limitu ta’ 10 EPNdB, propost fl-abbozz ta’ Regolament, b'mod anqas frekwenti mill-ajruplani tal-passiġġieri. Għaldaqstant, kwalunkwe projbizzjoni fuq l-“inġenji tal-ajru marġinalment konformi” taffettwa b'mod sproporzjonalment aktar lil-linji tal-ajru tal-merkanzija.

2

L-introduzzjoni ta’ fażi ta’ tranżizzjoni adatta tagħti l-opportunità lil-linji tal-ajru li jippjanaw u jwettqu l-modernizzazzjoni meħtieġa fil-flotot tagħhom skont il-kundizzjonijiet tan-negozju.

1

Ir-restrizzjonijiet operattivi għandhom jiġu imposti biss mill-Istati Membri, kif isir bħalissa. Il-Kunsill diġà esprima l-opinjoni tiegħu dwar din il-kwistjoni u ħassar l-artikolu rilevanti mill-proposta tal-Kummissjoni. It-tneħħija tal-artikolu ta’ hawn fuq hija wkoll konsistenti mal-punt 23 ta’ din l-Opinjoni.

2

L-Artikolu 10, kif inhu miktub bħalissa, jista' jixħet dubju fuq il-ftehimiet ta’ medjazzjoni reġjonali. Ħafna drabi dawn il-ftehimiet bejn l-ajruporti, ir-reġjun ikkonċernat u ċ-ċittadini jintlaħqu wara bosta snin ta’ negozjati diffiċli u eżawrjenti. Il-Bundesrat Ġermaniż, il-Bundesrat Awstrijak, is-Senat Franċiż u l-Ewwel Kamra tal-Pajjiżi l-Baxxi kkonkludew li d-dritt ta’ skrutinju mogħti lill-Kummissjoni fl-Artikolu 10 jikser il-prinċipju tas-sussidjarjetà.

1

Il-projbizzjoni tas-subkuntrattar għall-ajruporti u l-utenti tal-ajruport twassal għad-diskriminazzjoni tagħhom meta mqabblin mal-fornituri l-oħra ta’ servizzi ta’ groundhandling, u xxekkel il-kompetizzjoni. Dan mhuwiex kompatibbli mal-għan tal-abbozz ta’ Regolament li tissaħħaħ il-kompetizzjoni.

2

Ir-rekwitiżi marbutin mal-affidabbiltà u l-kwalità tas-servizz għandhom jiġu sodisfatti mis-subkuntratturi kollha bl-istess mod kif iridu jiġu sodisfatti mill-entitajiet kontraenti. Barra minn hekk, l-ajruporti għandhom ikunu jistgħu jirrestrinġu n-numru ta’ subkuntratturi f'każ li l-ispazju jkun limitat.