52011PC0746

MEMORANDUM TA’ SPJEGAZZJONI

1.           KUNTEST TAL-PROPOSTA

Ir-Regolament (KE) Nru 1060/2009 dwar aġenziji li jiggradaw il-kreditu[1] (ir-Regolament CRA - credit rating agencies) daħal fis-seħħ b’mod sħiħ fis-7 ta’ Diċembru 2010. Huwa jitlob lill-aġenziji li jiggradaw il-kreditu (CRAs) biex jikkonformaw ma' regoli rigorużi ta’ kondotta sabiex inaqqsu l-konflitti ta’ interess possibbli, jiżguraw trasparenza suffiċjenti u ta’ kwalità għolja tal-klassifikazzjonijiet u l-proċess tal-klassifikazzjoni. Is-CRAs eżistenti kellhom japplikaw għar-reġistrazzjoni u jikkonformaw mar-rekwiżiti tar-Regolament sas-7 ta’ Settembru 2010.

Fil-11 ta’ Mejju 2011 ġiet adottata emenda għar-Regolament CRA[2] (ir-Regolament (UE) Nru 513/2011), fejn l-Awtorità Ewropea tat-Titoli u s-Swieq (AETS) tiġi fdata b’setgħat superviżorji esklussivi fuq is-CRAs irreġistrati fl-UE sabiex tiċċentralizza u tissimplifika r-reġistrazzjoni u s-superviżjoni tagħhom fil-livell Ewropew.

Madankollu, għadd ta’ kwistjonijiet relatati ma’ attivitajiet ta’ klassifikazzjoni tal-kreditu u l-użu tal-klassifikazzjonijiet ma ġewx indirizzati biżżejjed fir-Regolament CRA eżistenti. Waħda minn dawn il-kwistjonijiet hija r-riskju ta’ dipendenza eċċessiva fuq il-klassifikazzjonijiet ta’ kreditu minn parteċipanti fis-suq finanzjarju, inklużi impriżi għal investiment kollettiv f’titoli trasferibbli (UCITS) u fondi ta’ investiment alternattiv (AIFs)[3].

Il-Kummissjoni Ewropea rreferiet għal dawn il-kwistjonijiet fil-Komunikazzjoni tagħha tat-2 ta’ Ġunju 2010 ("Ir-regolazzjoni tas-servizzi finanzjarji għat-tkabbir sostenibbli")[4] u f’dokument ta’ konsultazzjoni tas-servizzi tal-Kummissjoni tal-5 ta’ Novembru 2011[5] fejn tħabbret il-ħtieġa għal reviżjoni mmirata tar-Regolament CRA, li qed issir permezz ta' din il-proposta.

Fit-8 ta’ Ġunju 2011, il-Parlament Ewropew ippubblika rapport mhux leġiżlattiv dwar is-CRAs[6]. Ir-rapport jappoġġja, fost l-oħrajn, il-ħtieġa li jissaħħaħ il-qafas regolatorju għall-aġenziji li jiggradaw il-kreditu u li jittieħdu miżuri sabiex jitnaqqas ir-riskju ta’ dipendenza eċċessiva fuq il-klassifikazzjonijiet.

F’laqgħa informali tal-ECOFIN tat-30 ta’ Ottubru 2010, il-Kunsill tal-Unjoni Ewropea rrikonoxxa li għandhom isiru aktar sforzi sabiex jiġu indirizzati għadd ta’ kwistjonijiet relatati mal-attivitajiet ta’ klassifikazzjoni tal-kreditu, inkluż ir-riskju ta’ dipendenza eċċessiva fuq il-klassifikazzjonijiet tal-kreditu u r-riskju ta’ konflitt ta’ interessi li jirriżultaw mill-mudell ta’ rimunerazzjoni tal-aġenziji ta’ klassifikazzjoni. Il-Kunsill Ewropew tat-23 ta’ Ottubru 2011 ikkonkluda li hemm bżonn ta’ progress fuq it-tnaqqis ta’ dipendenza eċċessiva fuq il-klassifikazzjonijiet tal-kreditu.

Fil-livell internazzjonali, f’Ottubru 2010 il-Bord għall-Istabilità Finanzjarja (FSB -Financial Stability Board) ippubblika prinċipji sabiex titnaqqas id-dipendenza tal-awtoritajiet u tal-istituzzjonijiet finanzjarji fuq klassifikazzjonijiet esterni[7]. Il-prinċipji jitolbu li jitneħħew jew jinbidlu r-referenzi għal dawn il-klassifikazzjonijiet fil-leġiżlazzjoni fejn huma disponibbli standards alternattivi xierqa ta’ affidabbiltà kreditizja, kif ukoll li l-investituri jagħmlu l-valutazzjonijiet ta’ kreditu tagħhom stess. Dawk il-prinċipji kienu approvati mis-Summit tal-G 20 f’Seoul f’Novembru 2010.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Il-Kummissjoni Ewropea għamlet konsultazzjoni pubblika bejn il-5 ta’ Novembru 2010 u s-7 ta’ Jannar 2011, fejn ippreżentat diversi għażliet sabiex jiġu indirizzati l-kwistjonijiet identifikati, inkluża l-kwistjoni tad-dipendenza eċċessiva. Il-Kummissjoni rċeviet madwar 100 kontribuzzjoni minn partijiet interessati, li ttieħdu f’kunsiderazzjoni fit-tfassil ta’ din il-proposta. Sommarju tar-reazzjonijiet għad-dokument ta’ konsultazzjoni jinsab fuq

http://ec.europa.eu/internal_market/securities/docs/agencies/summary-responses-cra-consultation-20110704_en.pdf.

Fis-6 ta’ Lulju, is-servizzi tal-Kummissjoni organizzaw diskussjoni ‘round table’ sabiex jiksbu aktar feedback minn partijiet interessati rilevanti fuq dawn il-kwistjonijiet. Sommarju tad-diskussjoni ‘round table’ jista’ jinstab fuq

http://ec.europa.eu/internal_market/securities/docs/agencies/roundtable_en.pdf.

Ġiet prodotta valutazzjoni tal-impatt għal din il-proposta. Din tinsab fuq

http://ec.europa.eu/internal_market/securities/agencies/index_en.htm.

3.           ELEMENTI LEGALI TAL-PROPOSTA

3.1.        Bażi legali

Huwa meħtieġ, sabiex jitnaqqas ir-riskju tad-dipendenza eċċessiva tal-maniġers tal-UCITS u tal-AIFs fuq klassifikazzjonijiet tal-kreditu, li jiġu introdotti emendi għad-Direttiva 2009/65/KE tal-Parlament Ewropew u tal-Kunsill tat-13 ta’ Lulju 2009 dwar il-koordinazzjoni ta’ liġijiet, regolamenti u dispożizzjonijiet amministrattivi fir-rigward tal-impriżi ta’ investiment kollettiv f’titoli trasferibbli (UCITS)[8] u għad-Direttiva 2011/61/UE tal-Parlament Ewropew u tal-Kunsill tat-8 ta’ Ġunju 2011 dwar Maniġers ta’ Fondi ta’ Investiment Alternattivi[9]. B’mod parallel, il-Kummissjoni qiegħda tippreżenta proposta tar-Regolament għall-emenda tar-Regolament CRA, abbażi tal-Artikolu 114 tat-Trattat dwar il-Funzjonament tal-Unjoni Ewropea (TFUE).

Madankollu, dik il-proposta tar-Regolament mhijiex ser tkun l-istrument legali xieraq għall-emenda ta’ dawn id-direttivi. Minn naħa waħda, dawk l-emendi jinkludu dispożizzjonijiet li mhumiex direttament applikabbli u jeħtieġu traspożizzjoni fil-liġi nazzjonali. Min-naħa l-oħra, il-proposta għall-emendi tad-Direttiva 2009/65/KE u tad-Direttiva 2011/61/UE għandha minflok tkun ibbażata fuq l-Artikolu 53(1) tat-TFUE, li pprovda l-bażi legali għad-Direttiva msemmija l-aħħar. Id-Direttiva 2009/65/KE kienet ibbażata fuq l-Artikolu 95 korrispondenti tat-Trattat li jistabbilixxi l-Komunità Ewropea.

Għalhekk, jidher li huwa xieraq li l-abbozz tal-emendi għad-Direttiva 2009/65/KE u 2011/61/UE jiġu ppreżentati fi proposta għal Direttiva bbażata fuq l-Artikolu 53(1) tat-TFUE.

3.2.        Sussidjarjetà u proporzjonalità

Skont il-prinċipju tas-sussidjarjetà (l-Artikolu 5(3) tat-TUE), l-azzjoni fil-livell tal-UE għandha tittieħed biss fejn l-għanijiet previsti ma jkunux jistgħu jintlaħqu b’mod suffiċjenti mill-Istati Membri weħidhom u jistgħu għalhekk, minħabba l-iskala u l-effetti tal-azzjoni proposta, jintlaħqu aħjar mill-UE. In-negozju tal-aġenziji ta’ klassifikazzjoni tal-kreditu huwa globali u kien irregolat fil-livell tal-UE. Il-klassifikazzjonijiet użati minn aġenzija ta’ klassifikazzjoni tal-kreditu bbażata fi Stat Membru wieħed qegħdin jintużaw minn, u jibbażaw fuqhom il-parteċipanti tas-suq minn madwar l-UE kollha. Bl-istess mod, il-leġiżlazzjoni tal-UE stabbilixxiet qafas regolatorju prudenzjali għall-fondi ta’ investiment, kemm jekk UCITS jew AIFs, li jippermetti lill-fondi awtorizzati joperaw madwar l-UE. Il-fallimenti jew in-nuqqas ta’ qafas regolatorju fi Stat Membru speċifiku wieħed jistgħu jaffettwaw ħażin lill-parteċipanti tas-suq u lis-swieq finanzjarji madwar l-UE kollha. Għalhekk, hemm bżonn ta’ regoli regolatorji tajbin applikabbli madwar l-UE sabiex jipproteġu lill-investituri u lis-swieq minn nuqqasijiet possibbli. Għalhekk, kwalunkwe azzjoni oħra sabiex titnaqqas id-dipendenza eċċessiva tal-UCITS u tal-AIFs fuq klassifikazzjonijiet ta’ kreditu tista’ tinkiseb l-aħjar permezz ta’ azzjoni tal-UE.

L-emendi proposti huma wkoll proporzjonati, kif mitlub mill-Artikolu 5(4) tat-TUE. L-emendi ma jmorrux lil hinn minn dak li huwa meħtieġ sabiex jilħqu l-għanijiet tagħhom. Id-dispożizzjonijiet dwar it-tnaqqis tad-dipendenza fuq klassifikazzjonijiet tal-kreditu huma integrati fl-obbligu ġenerali għall-kumpaniji ta’ ġestjoni u ta’ investiment (fir-rigward tal-UCITS) u l-AIFMs (fir-rigward tal-AIFs) sabiex japplikaw proċessi jew sistemi ta’ ġestjoni tar-riskji. Id-dispożizzjonijiet proposti huma simili ħafna għal dawk li ġew proposti riċentament mill-Kummissjoni fir-rigward tal-istituzzjonijiet tal-kreditu[10].

Din il-proposta tissupplimenta l-proposta tal-Kummissjoni, ippreżentata b’mod parallel, għal Regolament li jemenda r-Regolament CRA, li fih dispożizzjonijiet oħrajn rigward, inter alia, it-tnaqqis tad-dipendenza eċċessiva mill-parteċipanti tas-suq fuq il-klassifikazzjonijiet tal-kreditu. Minbarra li tistabbilixxi dan il-prinċipju ġenerali dwar l-evitar tad-dipendenza eċċessiva, il-proposta għall-emenda tar-Regolament CRA tipprovdi għal xi miżuri li għandhom jiffaċilitaw il-kisba ta’ dak l-għan mill-investituri. Għalhekk, hija tipprevedi li l-investituri għandu jkollhom il-possibbiltà li jkollhom aċċess għal informazzjoni addizzjonali divulgata fis-suq mill-aġenziji ta’ klassifikazzjoni tal-kreditu u mill-emittenti ta’ strumenti ta’ finanzjament strutturati. L-aġenziji ta’ klassifikazzjoni tal-kreditu għandhom jiddivulgaw informazzjoni dwar il-metodoloġiji ta’ klassifikazzjoni tagħhom u s-suppożizzjonijiet sottostanti, dwar kwalunkwe bidliet proposti fil-metodoloġiji tagħhom jew dwar informazzjoni speċifika fuq ċerti tipi ta’ klassifikazzjonijiet tal-kreditu, bħal klassifikazzjonijiet sovrani. Il-klassifikazzjonijiet tal-kreditu maħruġa għandhom isiru wkoll faċilment paragunabbli għall-investituri grazzi għall-Indiċi Ewropew tal-Klassifikazzjoni (EURIX) li għandu jitħaddem mill-AETS u li jinkorpora skali ta’ klassifikazzjoni armonizzati. L-emittenti tal-istrumenti ta’ finanzjament strutturati għandhom jipprovdu aktar informazzjoni dwar il-prodotti tagħhom lis-suq, inkluża informazzjoni dwar il-kwalità tal-kreditu u r-rendiment tal-assi sottostanti individwali tal-istrument ta’ finanzjament strutturat, l-istruttura tat-tranżazzjoni tat-titolizzazzjoni, il-likwidità jew kwalunkwe kollateral li jappoġġja espożizzjoni għal titolizzazzjoni. Din l-informazzjoni addizzjonali għandha tiffaċilita li l-investituri, bħall-UCITS jew l-AIFs, ikunu jistgħu jagħmlu l-valutazzjonijiet tar-riskju tal-kreditu tagħhom stess u li ma jkollhomx bżonn jiddependu sistematikament u mekkanistikament fuq l-aġenziji ta’ klassifikazzjoni tal-kreditu sabiex jivvalutaw l-affidabbiltà kreditizja tal-istrumenti, b’mod partikolari l-istrumenti ta’ finanzjament strutturati, li jinvestu fihom.

3.3.        Spjegazzjoni tal-proposta

3.3.1.     Emenda tad-Direttiva 2009/65/KE dwar il-UCITS

Id-Direttiva 2009/65/KE tipprovdi għar-regolamentazzjoni tal-UCITS fil-livell tal-UE. UCITS li jissodisfaw ċerti kondizzjonijiet huma għalhekk permessi joperaw madwar l-Unjoni. L-Artikolu 51 ta’ din id-Direttiva stabbilixxa xi rekwiżiti prudenzjali fir-rigward tal-ġestjoni tar-riskji. Huwa jitlob b’mod partikolari li kumpanija ta’ ġestjoni jew ta’ investiment li tiġġestixxi l-UCITS għandha tapplika proċess ta’ ġestjoni tar-riskji li jagħtiha ċ-ċans timmonitorja u tkejjel fi kwalunkwe ħin ir-riskju tal-pożizzjonijiet u l-kontribuzzjoni tagħhom għall-profil tar-riskju globali tal-portafoll. Il-Kummissjoni rċeviet setgħat iddelegati biex tispeċifika, permezz ta’ atti ddelegati, il-kriterji għall-valutazzjoni tal-adegwatezza tal-proċess tal-ġestjoni tar-riskji applikat minn dawk li jiġġestixxu l-UCITS.

L-Artikolu 1 tal-proposta jemenda l-Artikolu 51 tad-Direttiva 2009/65/KE fir-rigward tal-proċess tal-ġestjoni tar-riskji:

– il-punt (1) jintroduċi rekwiżit għall-kumpanija ta’ ġestjoni jew ta’ investiment biex ma tiddependix biss jew mekkanistikament fuq klassifikazzjonijiet tal-kreditu esterni għall-valutazzjoni tal-affidabbiltà kreditizja tal-assi tal-UCITS. Il-klassifikazzjonijiet tal-kreditu esterni jistgħu jintużaw bħala fattur wieħed fost oħrajn f’dan il-proċess, iżda ma għandhomx jipprevalu;

– il-punt (2) jipproponi emendi korrispondenti fl-awtorizzazzjonijiet eżistenti lill-Kummissjoni sabiex tadotta atti ddelegati bil-għan li tispeċifika d-dispożizzjonijiet tal-Artikolu 51(1) tad-Direttiva 2009/65/KE.

3.3.2.     Emenda tad-Direttiva 2011/61/KE dwar il-maniġers tal-AIFs

Bl-istess mod, id-Direttiva 2011/61/UE tipprovdi għar-regolamentazzjoni fil-livell tal-UE tal-maniġers tal-fondi ta’ investiment alternattivi (alternative investment funds - AIFs). L-AIFs li jissodisfaw ċerti kondizzjonijiet huma għalhekk permessi sabiex joperaw madwar l-Unjoni. L-Artikolu 15 tad-Direttiva 2011/61/UE stabbilixxa xi rekwiżiti prudenzjali fir-rigward tal-ġestjoni tar-riskji. B’mod partikolari, huwa jitlob li l-maniġer ta’ AIF għandu jimplimenta sistemi adegwati ta’ ġestjoni tar-riskji sabiex jidentifika, ikejjel, jiġġestixxi u jimmonitorja kif xieraq ir-riskji kollha rilevanti għal kull strateġija ta’ investiment tal-AIF u li għalihom huwa jew jista’ jkun espost kull AIF. Il-Kummissjoni rċeviet setgħat iddelegati biex tispeċifika, permezz ta’ atti ddelegati, is-sistemi tal-ġestjoni tar-riskji li għandhom jiġu applikati mill-maniġers tal-AIFs fir-rigward tar-riskji li huma jġarrbu f’isem l-AIFs li jiġġestixxu.

L-Artikolu 2 tal-proposta jemenda l-Artikolu 15 tad-Direttiva 2011/61/UE fir-rigward tas-sistemi ta’ ġestjoni tar-riskji:

– il-punt (1) jintroduċi rekwiżit għall-Maniġer tal-AIF biex ma jiddependix biss jew mekkanistikament fuq klassifikazzjonijiet tal-kreditu esterni għall-valutazzjoni tal-affidabbiltà kreditizja tal-assi tal-AIF. Il-klassifikazzjonijiet tal-kreditu esterni jistgħu jintużaw bħala fattur wieħed fost oħrajn f’dan il-proċess, iżda ma għandhomx jipprevalu;

– il-punt (2) jipproponi emendi korrispondenti fl-awtorizzazzjonijiet eżistenti lill-Kummissjoni sabiex tadotta atti ddelegati bil-għan li tispeċifika d-dispożizzjonijiet tal-Artikolu 15(1) tad-Direttiva 2011/61/UE.

3.3.3.     Traspożizzjoni

Il-proposta tipprovdi għal perjodu ta’ traspożizzjoni ta’ 12-il xahar.

4.           IMPLIKAZZJONI BAĠITARJA

Il-proposta tal-Kummissjoni ma għandha ebda impatt fuq il-baġit tal-Unjoni Ewropea.

2011/0360 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva 2009/65/KE dwar il-koordinazzjoni ta’ liġijiet, regolamenti u dispożizzjonijiet amministrattivi fir-rigward tal-impriżi ta’ investiment kollettiv f’titoli trasferibbli (UCITS) u d-Direttiva 2011/61/UE dwar Maniġers ta’ Fondi ta’ Investiment Alternattivi fir-rigward tad-dipendenza eċċessiva fuq il-klassifikazzjonijiet tal-kreditu

(Test b'rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 53(1) tiegħu,

Wara li kkunsidraw il-proposta mill-Kummissjoni Ewropea,

Wara trasmissjoni tal-abbozz tal-att leġiżlattiv lill-Parlamenti nazzjonali,

Wara li kkunsidraw l-opinjoni tal-Bank Ċentrali Ewropew[11],

Wara li kkunsidraw l-opinjoni tal-Kumitat Ekonomiku u Soċjali Ewropew[12],

Wara li aġixxew skont il-proċedura leġiżlattiva ordinarja,

Billi:

(1) Id-Direttiva 2009/65/KE tal-Parlament Ewropew u tal-Kunsill[13] tipprovdi għar-regolamentazzjoni fil-livell tal-Unjoni tal-impriżi ta’ investiment kollettiv f’titoli trasferibbli (UCITS). Bl-istess mod, id-Direttiva 2011/61/UE tal-Parlament Ewropew u tal-Kunsill[14] tipprovdi għar-regolamentazzjoni fil-livell tal-Unjoni tal-maniġers tal-fondi ta’ investiment alternattivi (AIFs). Iż-żewġ direttivi jistabbilixxu rekwiżiti prudenzjali fir-rigward tal-ġestjoni tar-riskji minn kumpaniji ta’ ġestjoni jew ta’ investiment li jiġġestixxu l-UCITS jew mill-maniġers tal-AIFs, rispettivament.

(2) Effett tal-kriżi finanzjarja kien li l-investituri, inklużi l-UCITS u l-AIFs, jiddependu b’mod eċċessiv fuq il-klassifikazzjonijiet tal-kreditu biex jagħmlu l-investimenti tagħhom fuq l-istrumenti tad-dejn, mingħajr ma neċessarjament iwettqu l-valutazzjonijiet tagħhom tal-affidabbiltà kreditizja tal-emittenti ta’ dawn l-istrumenti tad-dejn. Sabiex tittejjeb il-kwalità tal-investimenti magħmula mill-UCITS u mill-AIFs u, għalhekk, sabiex jiġu protetti l-investituri f’dawk il-fondi, huwa xieraq li l-persuni li jiġġestixxu l-UCITS u l-AIFs jintalbu jevitaw li jiddependu b’mod esklussiv u awtomatiku fuq klassifikazzjonijiet tal-kreditu esterni meta jivvalutaw ir-riskju involut fl-investimenti magħmula mill-UCITS u l-AIFs li jiġġestixxu. Il-prinċipju ġenerali dwar l-evitar ta’ dipendenza eċċessiva fuq klassifikazzjonijiet tal-kreditu esterni għandu għalhekk jiġi integrat fil-proċessi u s-sistemi tal-ġestjoni tar-riskji tal-maniġers tal-UCITS u tal-AIFs, u jiġi adattat għall-ispeċifiċitajiet tagħhom.

(3) Sabiex ikompli jiġi speċifikat il-prinċipju ġenerali dwar id-dipendenza eċċessiva li għandu jiġi introdott fid-Direttivi 2009/65/KE u 2011/61/UE, għandha tiġi ddelegata lill-Kummissjoni s-setgħa tal-adozzjoni ta’ atti skont l-Artikolu 290 tat-Trattat dwar il-Funzjonament tal-Unjoni Ewropea, b’mod partikolari sabiex ikun żgurat li l-maniġers tal-UCITS u tal-AIFs ikunu effettivament imwaqqfa milli jiddependu b’mod eċċessiv fuq klassifikazzjonijiet tal-kreditu esterni sabiex jivvalutaw l-affidabbiltà kreditizja tal-assi miżmuma mill-UCITS jew mill-AIFs. F’dan ir-rigward, huwa xieraq li jiġu emendati s-setgħat tal-Kummissjoni f’dawk id-Direttivi sabiex tadotta atti ddelegati fir-rigward tad-dispożizzjonijiet ġenerali rigward il-proċessi u s-sistemi tal-ġestjoni tar-riskji applikati mill-maniġers tal-UCITS u tal-AIFs. Huwa partikolarment importanti li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell tal-esperti.

(4) Il-miżuri rilevanti għandhom ikunu komplimentari għal dispożizzjonijiet oħrajn fir-Regolament (UE) Nru 1060/2009 tal-Parlament Ewropew u tal-Kunsill tas-16 ta’ Settembru 2009 dwar aġenziji li jiggradaw il-kreditu[15] kif emendat mir-Regolament (UE) Nru [xxx/xxxx] tal-Parlament Ewropew u tal-Kunsill ta’ [xxx xxx xxxx] li jemenda r-Regolament (UE) Nru 1060/2009[16]. Dawk id-dispożizzjonijiet jistabbilixxu l-għan ġenerali tat-tnaqqis tad-dipendenza eċċessiva mill-investituri fuq klassifikazzjonijiet tal-kreditu esterni u għandhom jiffaċilitaw il-kisba ta’ dak l-għan.

(5) Minħabba li l-għan ta’ din id-Direttiva, jiġifieri li tikkontribwixxi għat-tnaqqis tad-dipendenza eċċessiva tal-UCITS u l-AIFs fuq klassifikazzjonijiet tal-kreditu esterni meta jagħmlu l-investimenti tagħhom, ma jistax jinkiseb b’mod suffiċjenti fil-livell tal-Istati Membri u jista’ għalhekk, permezz tal-istruttura pan-Unjoni u l-impatt tal-attivitajiet tal-UCITS, tal-AIFs u tal-aġenziji ta’ klassifikazzjoni tal-kreditu, jinkiseb aħjar fil-livell tal-Unjoni, l-Unjoni tista’ tadotta miżuri skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju tal-proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-għanijiet.

(6) Għalhekk, id-Direttiva 2009/65/KE u d-Direttiva 2011/61/UE għandhom jiġu emendati kif xieraq,

ADOTTAW DIN ID-DIRETTIVA:

Artikolu 1

Emendi għad-Direttiva 2009/65/KE

L-Artikolu 51 tad-Direttiva 2009/65/KE huwa emendat kif ġej:

(1)          fil-paragrafu 1, l-ewwel subparagrafu huwa sostitwit b’li ġej:

'Kumpanija ta’ ġestjoni jew ta’ investiment għandha tapplika proċess ta’ ġestjoni tar-riskji li jippermettilha timmonitorja u tkejjel fi kwalunkwe ħin ir-riskju tal-pożizzjonijiet u l-kontribut tagħhom għall-profil ta’ riskju globali tal-portafoll. B’mod partikolari, hija ma għandhiex tiddependi biss jew mekkanistikament fuq klassifikazzjonijiet tal-kreditu esterni għall-valutazzjoni tal-affidabbiltà kreditizja tal-assi tal-UCITS.';

(2)          fil-paragrafu 4, il-punt (a) huwa sostitwit b’li ġej:

'(a)    kriterji għall-valutazzjoni tal-adegwatezza tal-proċess ta’ ġestjoni tar-riskji applikat mill-kumpanija ta’ ġestjoni skont l-ewwel subparagrafu tal-paragrafu 1. Dawn il-kriterji għandhom jiżguraw li l-kumpanija ta’ ġestjoni ma tkunx tista’ tiddependi biss jew mekkanistikament fuq klassifikazzjonijiet tal-kreditu esterni għall-valutazzjoni tal-affidabbiltà kreditizja tal-assi tal-UCITS;'.

Artikolu 2

Emendi għad-Direttiva 2011/61/UE

L-Artikolu 15 tad-Direttiva 2011/61/UE huwa emendat kif ġej:

(1)          fil-paragrafu 2, l-ewwel subparagrafu huwa sostitwit b’li ġej:

'L-AIFMs għandhom jimplimentaw sistemi adegwati ta’ ġestjoni tar-riskji sabiex jidentifikaw, ikejlu, jiġġestixxu u jimmonitorjaw kif xieraq ir-riskji kollha rilevanti għal kull strateġija ta’ investiment tal-AIF u li għalihom huwa jew jista’ jkun espost kull AIF. B’mod partikolari, l-AIFMs ma għandhomx jiddependu biss jew mekkanistikament fuq klassifikazzjonijiet tal-kreditu esterni għall-valutazzjoni tal-affidabbiltà kreditizja tal-assi tal-AIF.';

(2)          fil-paragrafu 5, il-punt (a) huwa sostitwit b’li ġej:

'(a)    is-sistemi tal-ġestjoni tar-riskji li għandhom jiġu applikati mill-AIFMs fir-rigward tar-riskji li huma jġarrbu f’isem l-AIFs li jiġġestixxu. Dawn is-sistemi ta’ ġestjoni tar-riskji għandhom jipprevjenu lill-AIFMs milli jiddependu biss jew mekkanistikament fuq klassifikazzjonijiet tal-kreditu esterni għall-valutazzjoni tal-affidabbiltà kreditizja tal-assi tal-AIF.'.

Artikolu 3

Traspożizzjoni

1.           L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva sa mhux aktar tard minn XX XXXX [12-il xahar mid-data tad-dħul fis-seħħ tad-direttiva]. Huma għandhom minnufih jikkomunikaw lill-Kummissjoni t-test ta’ dawk id-dispożizzjonijiet flimkien ma’ tabella ta’ korrelazzjoni bejn dawk id-dispożizzjonijiet u din id-Direttiva.

Meta l-Istati Membri jadottaw dawk id-dispożizzjonijiet, dawn għandu jkollhom referenza għal din id-Direttiva jew ikunu akkumpanjati minn referenza bħal din fl-okkażjoni tal-pubblikazzjoni uffiċjali tagħhom. L-Istati Membri għandhom jistabbilixxu kif għandha ssir din ir-referenza.

2.           L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert minn din id-Direttiva.

Artikolu 4

Dħul fis-seħħ

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 5

Destinatarji

Din id-Direttiva hija indirizzata lill-Istati Membri.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               Ir-Regolament (KE) Nru 1060/2009 tal-Parlament Ewropew u tal-Kunsill tas-16 ta’ Settembru 2009 dwar aġenziji li jiggradaw il-kreditu, ĠU L 302, 17.11.2009.

[2]               Ir-Regolament (UE) Nru 513/2011 tal-Parlament Ewropew u tal-Kunsill tal-11 ta’ Mejju 2011 li jemenda r-Regolament (KE) Nru 1060/2009 dwar aġenziji li jiggradaw il-kreditu, ĠU L 145, 31.5.2011.

[3]               Id-dipendenza eċċessiva fuq klassifikazzjonijiet tal-kreditu esterni sseħħ meta l-istituzzjonijiet finanzjarji u l-investituri istituzzjonali jiddependu biss jew mekkanistikament fuq klassifikazzjonijiet maħruġa minn aġenziji ta’ klassifikazzjoni tal-kreditu, filwaqt li jittraskuraw id-diliġenza dovuta tagħhom u l-obbligi interni tal-ġestjoni tar-riskji. Id-dipendenza eċċessiva fuq klassifikazzjonijiet tal-kreditu tista’ twassal għal imġiba tal-massa mill-atturi finanzjarji, eż. il-bejgħ parallel ta’ darba tal-istrumenti tad-dejn wara li dak l-istrument ikun ġie degradat taħt il-grad tal-investiment, li jista’ jaffettwa l-istabbiltà finanzjarja – partikolarment meta l-ftit aġenziji kbar ta’ klassifikazzjoni jiżbaljaw b’mod kollettiv fil-valutazzjonijiet tagħhom.

[4]               COM(2010)301 finali.

[5]               Disponibbli fuq http://ec.europa.eu/internal_market/consultations/2010/cra_en.htm.

[6]               http://www.europarl.europa.eu/oeil/FindByProcnum.do?lang=en&procnum=INI/2010/2302.

[7]               http://www.financialstabilityboard.org/publications/r_101027.pdf

[8]               ĠU L 302, 17.11.2009, p.32.

[9]               ĠU L 174, 1.7.2011, p.1.

[10]             Proposta tal-Kummissjoni tal-20 ta’ Lulju 2011 għal Direttiva tal-Parlament Ewropew u tal-Kunsill dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u l-impriżi ta’ investiment u li temenda d-Direttiva 2002/87/KE tal-Parlament Ewropew u tal-Kunsill dwar is-superviżjoni supplimentari ta’ istituzzjonijiet ta’ kreditu dwar impriżi ta’ assigurazzjoni u ditti tal-investiment f’konglomerat finanzjarju, COM(2011) 453 finali. Ara l-punt (b) tal-Artikolu 77.

[11]             ĠU Ċ , , p. .

[12]             ĠU Ċ , , p. .

[13]             ĠU L 302, 17.11.2009, p.32.

[14]             ĠU L 174, 1.7.2011, p.1.

[15]             ĠU L 302, 17.11.2009, p. 1.

[16]             ĠU L […], […], p. […].