52011PC0330

MEMORANDUM TA’ SPJEGAZZJONI

Fil-Laqgħa Annwali tagħha fl-2010, l-ICCAT adottat Rakkomandazzjoni li temenda l-pjan ta’ rkupru għat-tonn fil-Lvant tal-Atlantiku u l-Mediterran.

Sabiex jinbena stokk mill-ġdid, il-pjan ta' rkupru tal-ICCAT ġie mmodifikat sabiex ikun previst tnaqqis ulterjuri fil-qabdiet totali permissibbli (TAC), tisħiħ tal-miżuri li jnaqqsu l-kapaċità tas-sajd kif ukoll rinfurzar tal-miżuri ta' kontroll, b'mod partikolari, fir-rigward tal-operazzjonijiet ta' trasferiment u tqegħid fil-gaġeġ. Dawn il-miżuri għandhom l-għan li jiżguraw l-effikaċja tal-pjan bil-mira li tinkiseb il-bijomassa li toffri r-rendiment massimu sostenibbli (Bmsy), b'mill-inqas 60 % probabbiltà.

Il-Komunità ilha Parti għall-ICCAT mill-1997 u r-Rakkomandazzjonijiet isiru vinkolanti fuq il-Partijiet Kontraenti li ma jsibu l-ebda oġġezzjoni għalihom. Bħala Parti Kontraenti għal din l-organizzazzjoni, l-Unjoni Ewropea għandha r-responsabbiltà li tapplika Rakkomandazzjonijiet adottati li ma tkun qajmet l-ebda oġġezzjoni għalihom.

L-għan ta’ din il-proposta huwa li tiġi trasposta fil-liġi tal-Unjoni r-rakkomandazzjoni tal-ICCAT li timmodifika l-pjan ta’ rkupru għat-tonn fil-Lvant tal-Atlantiku u fil-Mediterran.

Il-proposta ma għandha l-ebda implikazzjoni għall-baġit tal-Unjoni.

Il-bażi legali huwa l-Artikolu 43(2) tat-Trattat dwar il-Funzjonament tal-Unjoni Ewropea.

Il-Parlament Ewropew u l-Kunsill b’dan huma mitluba jadottaw din il-proposta mill-aktar fis possibbli.

2011/0144 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament (KE) Nru 302/2009 li jistabbilixxi pjan multiannwali għall-irkupru tat-tonn fil-Lvant tal-Atlantiku u fil-Mediterran

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea u, b’mod partikolari, l-Artikolu 43(2) tiegħu,

Wara li kkunsidraw il-proposta mill-Kummissjoni Ewropea[1],

Wara li kkunsidraw l-opinjoni tal-Kumitat Ekonomiku u Soċjali,

Filwaqt li jaġixxu skont il-proċedura leġiżlattiva ordinarja,

Billi:

(1) Il-Kummissjoni Internazzjonali għall-Konservazzjoni tat-Tonn tal-Atlantiku (ICCAT) adottat Rakkomandazzjoni 10-04 li temenda l-pjan multiannwali għall-irkupru tat-tonn. Sabiex jinbena l-istokk mill-ġdid, ir-rakkomandazzjoni tipprevedi tnaqqis ulterjuri fil-qabdiet totali permissibbli, tisħiħ tal-miżuri li jnaqqsu l-kapaċità tas-sajd kif ukoll rinfurzar tal-miżuri ta' kontroll, b'mod partikolari, fir-rigward tal-operazzjonijiet ta' trasferiment u tqegħid fil-gaġeġ.

(2) Ir-Rakkomandazzjoni hija vinkolanti għall-Unjoni u għalhekk għandha tiġi trasposta.

(3) Ċerti dispożizzjonijiet tar-Regolament (KE) Nru 302/2009[2] skadew u għandhom jitneħħew. Dispożizzjonijiet oħra għandhom jiġu aġġornati fir-rigward tat-tibdiliet fil-leġiżlazzjoni.

(4) Ir-Regolament (KE) Nru 302/2009 għandu għaldaqstant ikun emendat skont dan

ADOTTAW DAN IR-REGOLAMENT:

Artikolu 1

Ir-Regolament (KE) Nru 302/2009 huwa emendat kif ġej:

(1)          Fl-Artikolu 1, il-paragrafu 3 jinbidel b’dan li ġej:

“L-għan ta’ dak il-pjan ta’ rkupru għandu jkun li tinkiseb bijomassa li tikkorrispondi għar-rendiment massimu sostenibbli b’aktar minn 60 % probabbiltà.”

(2)          L-Artikolu 2 huwa emendat kif ġej:

(a)     Il-punt (d) jinbidel b’dan li ġej:

“(d) “bastiment awżiljarju” tfisser kull bastiment użat għat-trasport ta’ tonn mejjet (mhux ipproċessat) minn gaġġa jew nassa tat-tonn għal port innominat u/jew għal bastiment tal-ipproċessar;"

(b)     Il-punt (h) jinbidel b’dan li ġej:

"(h) “Operazzjonijiet ta’ trasferiment" tfisser:

(i)      kull trasferiment ta' tonn ħaj mix-xibka tal-bastiment tal-qbid għall-ġagga tat-trasport;

(ii)      kull trasferiment ta’ tonn ħaj mill-gaġġa tat-trasport għal gaġġa tat-trasport oħra;

(iii)     kull trasferiment ta’ gaġġa bit-tonn minn bastiment tal-irmonk għal bastiment tal-irmonk ieħor;

(iv)     kull trasferiment ta’ tonn mejjet mill-gaġġa tat-trasport għal bastiment awżiljarju;

(v)     kull trasferiment minn razzett tat-tonn jew nassa tat-tonn għal bastiment tal-ipproċessar, bastiment tat-trasport jew trasferiment ta’ gaġġa bit-tonn minn razzett għall-ieħor,

(vi)     kull trasferiment ta' tonn ħaj min-nassa għall-ġagga tat-trasport.”

(c)     Il-punt (l) jinbidel b'dan li ġej:

(l) "trobbija" tfisser it-tqegħid fil-gaġeġ tat-tonn għal perjodu itwal minn sitt xhur, bl-għan li tiżdied il-bijomassa;”

(d)     Jiżdied il-punt (q):

"(q)    “Stat Membru responsabbli” u “Stat Membru responsabbli għal” tfisser l-Istat Membru tal-bandiera jew l-Istat Membru li taħt il-ġurisdizzjoni tiegħu jinsabu n-nassa jew ir-razzett jew, jekk ir-razzett jew in-nassa jinsabu fl-ibħra internazzjonali, l-Istat Membru fejn huwa stabbilit l-operatur tan-nassa jew tar-razzett”.

(3)          L-Artikolu 4 huwa emendat kif ġej:

(a)     Il-paragrafu 4 jinbidel b'dan li ġej:

"4. Mhux aktar tard mill-15 ta’ Settembru ta’ kull sena, l-Istati Membri għandhom jibagħtu lill-Kummissjoni l-pjan tas-sajd annwali provviżorju relatat mas-sena ta' wara. Il-Kummissjoni għandha tibgħat il-pjan tas-sajd tal-Unjoni lis-Segretarjat tal-ICCAT għall-approvazzjoni tal-ICCAT.

Mhux aktar tard mill-31 ta’ Jannar ta’ kull sena, il-pjan tas-sajd annwali għandu jintbagħat mill-Istati Membri lill-Kummissjoni. Il-Kummissjoni għandha tibgħat dak il-pjan tas-sajd tal-Unjoni lis-Segretarjat tal-ICCAT sal-1 ta’ Marzu ta’ kull sena.”

(b)     Il-paragrafi 12 u 14 huma mħassra.

(4)          L-Artikolu 5 huwa emendat kif ġej:

(a)     Il-paragrafu 7 jinbidel b'dan li ġej:

"7. Bla ħsara għall-paragrafu 6, il-kapaċità tas-sajd imsemmija fil-paragrafi 2 u 4 u fl-Artikolu 9 għandha titnaqqas, sabiex telimina:

(a)     sal-bidu tal-2010, mill-inqas 25 %, għal kull Stat Membru, tad-diskrepanza bejn il-kapaċità tas-sajd tiegħu u l-kapaċità tas-sajd tiegħu proporzjonata mal-kwota tiegħu;

(b)     sal-bidu tal-2011, mill-inqas 75 %, għal kull Stat Membru, tad-diskrepanza bejn il-kapaċità tas-sajd tiegħu u l-kapaċità tas-sajd tiegħu proporzjonata mal-kwota tiegħu;

(c)     sal-bidu tal-2012, mill-inqas 95 %, għal kull Stat Membru, tad-diskrepanza bejn il-kapaċità tas-sajd tiegħu u l-kapaċità tas-sajd tiegħu proporzjonata mal-kwota tiegħu;

(d)     sal-bidu tal-2013, 100 %, għal kull Stat Membru, tad-diskrepanza bejn il-kapaċità tas-sajd tiegħu u l-kapaċità tas-sajd tiegħu proporzjonata mal-kwota tiegħu;

Il-kalkolu tat-tnaqqis fil-kapaċità tas-sajd għandu jkun ibbażat fuq ir-rati ta’ qbid għal kategoriji ta’ bastimenti, stmati mill-Kumitat Xjentifiku tal-ICCAT.

Dan ir-rekwiżit ta’ tnaqqis ma għandux japplika għal Stat Membru li juri li l-kapaċità tas-sajd tiegħu hija proporzjonata mal-kwota tiegħu.”

(b)     Il-paragrafu 9 jinbidel b’dan li ġej:

"9. Kull Stat Membru għandu jistabbilixxi pjan ta’ ġestjoni tal-kapaċità tas-sajd għall-perjodu 2010-2013. Dan il-pjan għandu jiġi ppreżentat lill-Kummissjoni sal-15 ta’ Awwissu 2009, u għandu jinkludi l-informazzjoni msemmija fil-paragrafi 2, 4, 6 u 7. Minbarra dan, il-pjan għandu jinkludi informazzjoni dettaljata dwar il-modi użati mill-Istat Membru biex jeliminaw il-kapaċità żejda flimkien mal-iskrappjar. Jekk meħtieġ, il-pjan għandu jiġi rivedut u ppreżentat fuq bażi annwali lill-Kummissjoni sal-15 ta’ Awwissu ta’ kull sena.

Il-Kummissjoni għandha tippreżenta l-pjan ta’ ġestjoni tal-Unjoni tal-kapaċita tas-sajd lill-ICCAT għad-diskussjoni u l-approvazzjoni."

(5)          L-Artikolu 7 huwa emendat kif ġej:

(a)     Il-paragrafu 2 jinbidel b'dan li ġej:

"2.      Is-sajd għat-tonn bil-purse seine għandu jkun ipprojbit fil-Lvant tal-Atlantiku u fil-Mediterran matul il-perjodu bejn il-15 ta’ Ġunju u l-15 ta’ Mejju.”

(b)     Il-paragrafu 6 huwa mħassar.

(6)          Fl-Artikolu 14, paragrafu 2, jiżdied is-subparagrafu li ġej:

“Ma għandha tiġi aċċettata l-ebda inklużjoni retroattiva ta’ bastiment tas-sajd fil-listi msemmija fil-paragrafu 1.”

(7)          Fl-Artikolu 18, il-paragrafu 1 jinbidel b’dan li ġej:

“1. Flimkien mal-konformità mal-Artikoli 14, 15, 23 u 24 tar-Regolament tal-Kunsill (KE) Nru 1224/2009 tal-20 ta’ Novembru 2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd[3], il-kaptan ta’ bastiment tal-qbid tal-Komunità għandu jdaħħal fil-ktieb ta’ abbord l-informazzjoni elenkata fl-Anness II fejn applikabbli."

(8)          Fl-Artikolu 19, il-paragrafu 1, jiżdied is-subparagrafu li ġej:

"Operazzjonijiet konġunti tas-sajd flimkien ma' PKK oħra mhux se jkunu permessi."

(9)          L-Artikolu 22 jinbidel b'dan li ġej:

“Artikolu 22

Operazzjonijiet ta’ trasferiment

1.       Qabel kull operazzjoni ta’ trasferiment, il-kaptan ta’ bastiment tal-qbid jew tal-irmonk jew operatur ta’ razzett jew nassa fejn joriġina t-trasferiment konċernat għandu jibgħat notifika qabel it-trasferiment lill-awtoritajiet kompetenti tal-Istat Membru responsabbli rispettiv li tindika:

a)      l-isem tal-bastiment tal-qbid, tar-razzett jew tan-nassa u n-numru tar-reġistru ICCAT;

b)      il-ħin stmat tat-trasferiment,

c)      l-istima tal-kwantitajiet ta’ tonn li għandhom jiġu trasferiti,

d)      informazzjoni dwar il-pożizzjoni (latitudini/lonġitudini) fejn ikun se jsir it-trasferiment u n-numri identifikabbli tal-gaġeġ;

e)      l-isem tal-bastiment tal-irmonk li qiegħed jirċievi, l-għadd ta’ gaġeġ irmunkati u n-numru tar-reġistru ICCAT fejn xieraq;

f)       il-port, ir-razzett jew il-gaġġa ta’ destinazzjoni tat-tonn.

2.       L-Istat Membru responsabbli għandu jassenja u jikkomunika lill-kaptan tal-bastiment tas-sajd, lill-operatur tan-nassa jew tar-razzett, kif xieraq, numru ta' awtorizzazzjoni għal kull operazzjoni ta’ trasferiment. L-operazzjoni ta’ trasferiment ma għandhiex tibda mingħajr awtorizzazzjoni minn qabel.

L-awtorizzazzjoni għandha tinħareġ mill-awtoritajiet tal-Istat Membru responsabbli, skont sistema unika tal-innumerar li tinkludi t-tliet ittri tal-kodiċi tal-PKK, erba' numri li juru s-sena u tliet ittri li jindikaw l-awtorizzazzjoni (AUT) segwiti minn numri sekwenzjali. Jekk l-awtorizzazzjoni tiġi rrifjutata, AUT għandha tinbidel b’NEG (mingħajr awtorizzazzjoni).

L-Istat Membru responsabbli għandu jikkomunika l-awtorizzazzjoni jew ir-rifjut ta' awtorizzazzjoni fi żmien 48 siegħa mill-preżentazzjoni tan-notifika ta’ qabel it-trasferiment. Ma għandux jawtorizza t-trasferiment jekk malli jirċievi n-notifika ta’ qabel it-trasferiment, iqis li:

a)      il-bastiment tal-qbid jew in-nassa ddikjarati li qabdu l-ħut ma jkollhomx biżżejjed kwota;

b)      il-kwantità tal-ħut ma ġietx irrappurtata kif suppost mill-bastiment tal-qbid jew in-nassa li nqabdet biha jew ma kinitx awtorizzata li tinżamm fil-gaġeġ u ma tqisitx għall-konsum tal-kwota applikabbli;

c)      il-bastiment tal-qbid iddikjarat li qabad il-ħut mhuwiex awtorizzat jistad għat-tonn, jew

d)      il-bastiment tal-irmonk iddikjarat biex jirċievi t-trasferiment tal-ħut mhuwiex reġistrat "fir-reġistru ICCAT tal-bastimenti tas-sajd l-oħra" msemmija fl-Artikolu 14 jew mhuwiex mgħammar b’Sistema ta’ Monitoraġġ tal-Bastimenti.

F’każ li ma jiġix awtorizzat it-trasferiment:

a)      l-Istat Membru responsabbli għall-bastiment tal-qbid għandu joħroġ ordni ta’ rilaxx u jinforma lill-kaptan tal-bastiment tal-qbid li t-trasferiment mhuwiex awtorizzat u għandu jipproċedi bir-rilaxx tal-ħut fil-baħar;

b)      il-kaptan tal-bastiment tal-qbid, l-operatur tar-razzett jew l-operatur tan-nassa, kif xieraq, għandu jirrilixxa l-ħut fil-baħar;

c)      ir-rilaxx tat-tonn fil-baħar għandu jiġi rreġistrat b’vidjokamera u osservat minn osservatur reġjonali tal-ICCAT li għandu jħejji u jippreżenta rapport flimkien mal-vidjo rreġistrat lis-Segretarjat tal-ICCAT.

3.       Il-kaptan ta’ bastiment tal-qbid jew tal-irmonk, l-operatur tan-nassa jew l-operatur tar-razzett għandu jimla u jibgħat id-dikjarazzjoni tat-trasferiment tal-ICCAT lill-awtoritajiet kompetenti tal-Istat Membru responsabbli, fi tmiem l-operazzjoni tat-trasferiment, skont il-format stabbilit fl-Anness VIIIa.

Il-formoli tad-dikjarazzjoni ta’ trasferiment għandhom jiġu nnumerati mill-awtoritajiet tal-Istat Membru responsabbli għall-bastiment, għar-razzett jew għan-nassa minn fejn joriġina dan it-trasferiment. Is-sistema ta’ nnumerar għandha tinkludi t-3 ittri tal-kodiċi tal-PKK, segwiti minn 4 numri li juru s-sena u 3 numri sekwenzjali segwiti minn 3 ittri ITD (PKK-20**/xxx/ITD).

Id-dikjarazzjoni oriġinali tat-trasferiment għandha takkumpanja t-trasferiment tal-ħut. Għandha tinżamm kopja tad-dikjarazzjoni mill-kaptan tal-bastiment tal-qbid, l-operatur tan-nassa, il-kaptan tal-bastiment tal-irmonk jew l-operatur tar-razzett.

4.       Il-kaptani tal-bastimenti li jwettqu operazzjonijiet tat-trasferiment (inklużi l-bastimenti tal-irmonk), għandhom jirrappurtaw fil-ktieb ta’ abbord ta’ kuljum tagħhom, il-piż u l-għadd ta’ ħut trasferit, kif ukoll l-isem, il-bandiera u n-numru tal-ICCAT tal-bastiment tal-qbid, l-isem tal-bastimenti l-oħra involuti u n-numru tal-ICCAT tagħhom, id-data u l-pożizzjoni tat-trasferiment kif ukoll ir-razzett ta' destinazzjoni. Il-ktieb ta’ abbord għandu jinkludi d-dettalji tat-trasferimenti kollha mwettqa matul l-istaġun tas-sajd. Il- ktieb ta’ abbord ta’ kuljum għandu jinżamm abbord u jkun aċċessibbli fi kwalunkwe ħin għall-finijiet ta' kontroll.

5.       L-awtorizzazzjoni għat-trasferiment mill-Istat Membru responsabbli ma tippreġudikax l-awtorizzazzjoni tal-operazzjoni tat-tqegħid fil-gaġeġ.

6.       Il-kaptan tal-bastiment tal-qbid, l-operatur tar-razzett jew l-operatur tan-nassa, li jittrasferixxi t-tonn għandu jiżgura li l-attivitajiet tat-trasferiment jiġu mmonitorjati permezz ta’ vidjokamera fl-ilma.

Kull reġistrazzjoni bil-vidjo tat-trasferimenti għandha tiġi prodotta f’żewġ kopji. Għandha tintbagħat kopja lill-osservatur reġjonali u oħra lill-osservatur tal-PKK, jew l-osservatur nazzjonali, fejn applikabbli, abbord il-bastiment tal-irmonk. Il-kopja mibgħuta lill-osservatur(i) tal-PKK għandha takkumpanja d-dikjarazzjoni ta' trasferiment u l-qabdiet assoċjati li hija relatata magħhom. Fil-bidu u/jew tmiem ta' kull vidjo, għandu jintwera n-numru tad-dikjarazzjoni ta' trasferiment tal-ICCAT. Il-ħin u d-data tal-vidjo għandhom jintwerew kontinwament matul kull reġistrazzjoni bil-vidjo. L-Istati Membri għandhom jipprovdu kopji tar-reġistrazzjonijiet bil-vidjo lill-Kumitat Xjentifiku tal-ICCAT fuq talba tal-Kummissjoni.

7.       L-osservatur reġjonali tal-ICCAT abbord il-bastiment tal-qbid, kif imsemmi fil-Programm tal-Osservatur Reġjonali tal-ICCAT stabbilit fl-Anness VII, għandu jirreġistra l-attivitajiet ta’ trasferiment imwettqa u jirrapporta dwarhom, jivverifika l-pożizzjoni tal-bastiment tal-qbid meta impenjat f’operazzjoni tat-trasferiment, josserva l-qabdiet trasferiti u jagħmel stima tagħhom u jivverifika entrati li saru fin-notifika ta’ qabel it-trasferiment kif imsemmi fil-paragrafu 2 u fid-dikjarazzjoni tat-trasferiment tal-ICCAT kif imsemmi fil-paragrafu 3.

F’każijiet fejn l-istima tal-osservatur reġjonali tkun mill-inqas 10 % ogħla fin-numru u/jew fil-piż medju milli ddikjarati mill-kaptan tal-bastiment tal-qbid, għandha tibda investigazzjoni mill-Istat Membru responsabbli għall-bastiment tal-qbid li għandha tintemm qabel il-ħin tat-tqegħid fil-gaġeġ fir-razzett. Sakemm joħorġu r-riżultati ta’ din l-investigazzjoni, ma għandux jiġi awtorizzat tqegħid fil-gaġeġ u t-taqsima tal-qbid tad-dokument ta' qbid tat-tonn ma għandhiex tiġi validata.

8.       L-osservatur reġjonali tal-ICCAT għandu jiffirma, b’isem miktub b’mod ċar u b'numru tal-ICCAT, id-dikjarazzjoni ta' trasferiment tal-ICCAT u għandu jivverifika li d-dikjarazzjoni ta' trasferiment tal-ICCAT imtliet u ntbagħtet kif suppost lill-kaptan tal-bastiment tal-irmonk.

L-operatur tan-nassa tat-tonn għandu jimla u jibgħat lill-awtoritajiet kompetenti tal-Istat Membru tiegħu, fi tmiem l-operazzjoni tat-trasferiment lejn il-bastimenti tas-sajd, id-dikjarazzjoni tat-trasferiment tal-ICCAT, skont il-format li jidher fl-Anness IV.”

(10)        L-Artikolu 24 jinbidel b'dan li ġej:

“Artikolu 24

Operazzjonijiet ta’ tqegħid fil-gaġeġ

1.       L-Istat Membru responsabbli għar-razzett għandu jippreżenta fi żmien ġimgħa mill-ikkompletar tal-operazzjoni tat-tqegħid fil-gaġeġ, rapport dwar it-tqegħid fil-gaġeġ, validat minn osservatur, lill-Istat Membru jew PKK, li l-bastimenti li jtajru l-bandiera tagħhom ikunu stadu għat-tonn, kif ukoll lill-Kummissjoni. Il-Kummissjoni għandha tibgħat minnufih dik l-informazzjoni lis-Segretarjat tal-ICCAT. Dan ir-rapport għandu jkun fih l-informazzjoni inkluża fid-dikjarazzjoni dwar it-tqegħid fil-gaġeġ imsemmija fir-Rakkomandazzjoni ICCAT [06-07] dwar it-trobbija tat-tonn.

2.       Qabel kwalunkwe operazzjoni ta’ tqegħid fil-gaġeġ, l-Istat Membru tal-bandiera jew il-PKK tal-bandiera tal-bastiment tal-qbid għandu jkun infurmat mill-awtorità kompetenti tal-Istat Membru responsabbli għar-razzett tat-tqegħid fil-gaġeġ bil-kwantitajiet maqbuda mill-bastimenti tal-qbid li jtajru l-bandiera tiegħu.

3.       L-Istat Membru responsabbli għall-bastiment tal-qbid għandu jitlob lill-Istat Membru, jew lill-PKK, responsabbli għar-razzett biex jipproċedi bis-sekwestru tal-qbid u bir-rilaxx tal-ħut fil-baħar, skont il-proċedura deskritta fl-Artikolu 22(2), jekk mal-informazzjoni riċevuta jqis li:

a)      il-bastiment tal-qbid li ddikjara li qabad il-ħut ma kellux kwota biżżejjed għat-tonn li tqiegħed fil-gaġġa;

b)      il-kwantità tal-ħut ma kinitx ġiet irrappurtata kif suppost mill-bastiment tal-qbid u ma tqisitx għall-kalkolu tal-kwota applikabbli;

c)      il-bastiment tal-qbid li ddikjara li qabad il-ħut mhuwiex awtorizzat li jistad għat-tonn.

4.       L-operazzjoni ta’ tqegħid fil-gaġeġ ma għandhiex tibda qabel ma jkun hemm l-awtorizzazzjoni minn qabel mill-PKK jew l-Istat Membru tal-bandiera tal-bastiment tal-qbid.

It-tonn għandu jitqiegħed fil-gaġeġ qabel il-31 ta’ Lulju sakemm l-Istat Membru, jew il-PKK, responsabbli għar-razzett li jirċievi l-ħut jipprovdi raġunijiet validi inkluż force majeure, li għandhom jakkumpanjaw ir-rapport tat-tqegħid fil-gaġeġ meta jiġi ppreżentat.

5.       L-Istat Membru responsabbli għar-razzett għandu jieħu l-miżuri neċessarji sabiex jipprojbixxi t-tqegħid fil-gaġeġ għat-trobbija jew it-tismin ta' tonn li mhuwiex akkumpanjat minn dokumentazzjoni preċiża, kompleta u validata meħtieġa mill-ICCAT, inkluża dik meħtieġa minn dan ir-Regolament u r-Regolament (UE) Nru 640/2010 tal-Parlament Ewropew u tal-Kunsill tas-7 ta’ Lulju 2010 li jistabbilixxi programm ta’ dokumentazzjoni tal-qbid għat-tonn Thunnus thynnus u li jemenda r-Regolament tal-Kunsill (KE) Nru 1984/2003[4].

6.       L-awtorizzazzjoni għat-tqegħid fil-gaġeġ għandha tingħata jew tiġi rrifjutata mill-Istat Membru, jew mill-PKK responsabbli, kif xieraq, fi żmien 48 siegħa mill-preżentazzjoni tal-informazzjoni msemmija fil-paragrafu 3. F’każ li t-tqegħid fil-gaġeġ ma jkunx awtorizzat, l-Istat Membru, jew il-PKK, responsabbli għall-bastiment tal-qbid għandu joħroġ ordni tar-rilaxx lill-Istat Membru, jew lill-PKK, responsabbli għall-bastiment tal-irmonk u/jew lill-Istat Membru, jew lill-PKK, responsabbli għar-razzett, kif xieraq, skont il-proċeduri stipulati fl-Artikolu 22(2).

7.       L-Istat Membru responsabbli għar-razzett għandu jiżgura li l-attivitajiet ta’ tqegħid fil-gaġeġ jiġu mmonitorjati permezz ta’ vidjokamera fl-ilma.

Għandha tiġi prodotta reġistrazzjoni waħda bil-vidjo għal kull operazzjoni ta' tqegħid fil-gaġeġ. Fil-bidu jew tmiem ta' kull vidjo, għandu jintwera n-numru tad-dikjarazzjoni ta' trasferiment tal-ICCAT. Il-ħin u d-data tal-vidjo għandhom jintwerew kontinwament matul kull reġistrazzjoni bil-vidjo.

8.       F’każijiet fejn hemm differenza ta' aktar minn 10 %, jew fil-piż medju u/jew fin-numru bejn l-istima tal-osservatur reġjonali u tal-operatur tar-razzett, għandha tibda investigazzjoni mill-Istat Membru responsabbli għar-razzett b'kooperazzjoni mal-Istat tal-bandiera tal-bastiment tal-qbid. Id-differenza għandha tiġi kkalkolata skont in-numru u/jew il-piż medju. Sakemm joħorġu r-riżulati ta’ din l-investigazzjoni, ma għandux isir ħsad u t-taqsima tat-trobbija tad-dokument tal-qbid tat-tonn ma għandhiex tiġi validata.

Jekk l-investigazzjoni ma tintemmx fi żmien 10 ijiem ta’ xogħol jew jekk l-eżitu tal-investigazzjoni tindika li l-għadd jew il-piż medju tat-tonn jissupera l-10 % ta’ dak iddikjarat mill-operatur tar-razzett, il-PKK jew l-Istat Membru tal-bandiera, responsabbli għall-bastiment tal-qbid għandu joħroġ ordni tar-rilaxx għall-kwantitajiet żejda.

L-Istat Membru responsabbli għar-razzett għandu jiżgura li l-ordni tar-rilaxx titwettaq mill-operatur tar-razzett fi żmien 48 siegħa mill-wasla tal-osservatur reġjonali. Ir-rilaxx għandu jitwettaq skont il-proċeduri stipulati fl-Artikolu 22(2).

F’każ li l-istima finali fil-ħin tat-tqegħid fil-gaġeġ fir-razzett tkun ikbar mill-istima finali fil-ħin tal-ewwel trasferiment mill-bastiment tal-qbid, l-Istat Membru, jew il-PKK, responsabbli għall-bastiment tal-qbid għandu jiddeċiedi fuq l-ammont li se jittieħed (jew jitnaqqas) mill-kwota finali, li għandu jiġi vvalidat fid-dokument(i) konċernat(i) tal-qbid tat-tonn.

9.       L-Istati Membri għandhom jibdew studji pilota dwar kif jistgħu jagħmlu stima aħjar tal-għadd u l-piż tat-tonn fil-mument tal-qbid u tat-tqegħid fil-gaġeġ, inkluż l-użu ta' sistemi sterjoskopiċi, u jirrappurtaw ir-riżultati lill-Kumitat Xjentifiku ICCAT. Għandu jiġi stabbilit programm tat-teħid tal-kampjuni u/jew programm alternattiv fil-ħin tat-tqegħid fil-gaġeġ sabiex jitjiebu l-istimi tal-għadd u tal-piż tal-ħut fil-gaġeġ.”

(11)        Fl-Artikolu 25(1), jiżdiedu s-subparagrafi li ġejjin:

“It-trasmissjoni ta’ dejta VMS minn bastimenti tas-sajd inklużi fir-"reġistru ICCAT tal-bastimenti tal-qbid awtorizzati li jistadu għat-tonn” lill-ICCAT għandha tibda mill-inqas 15-il ġurnata qabel il-ftuħ tal-istaġuni tas-sajd u għandha tkompli mill-inqas sa 15-il ġurnata wara l-għeluq tal-istaġuni tas-sajd sakemm ma tintbagħatx talba minn qabel lill-Kummissjoni sabiex bastiment jitneħħa mir-reġistru tal-bastimenti tal-ICCAT.

Għall-finijiet ta' kontroll, it-trasmissjoni ta' dejta VMS mill-bastimenti tas-sajd awtorizzati li jistadu għat-tonn ma għandhiex tiġi interrotta meta il-bastiment ikun fil-port sakemm ma jkunx hemm sistema ta’ dikjarazzjoni ta’ dħul u ħruġ mill-port.

Il-bastimenti tas-sajd inklużi "fir-reġistru ICCAT tat-tonn tal-bastimenti l-oħra" għandhom jibgħatu d-dejta tal-VMS lill-ICCAT matul il-perjodu kollu tal-awtorizzazzjoni”.

(12)        L-Artikolu 26 jinbidel b'dan li ġej:

“Artikolu 26

Ir-reġistrazzjoni u r-rappurtar ta’ attiviatjiet ta’ qbid fin-nases

“1.     Il-qabdiet bin-nassa għandhom jiġu reġistrati wara t-tmiem ta’ kull operazzjoni ta’ sajd b'nases tat-tonn u għandhom jiġu trasmessi, flimkien mal-kwantitajiet stmati li fadal fin-nassa, b'mezz elettroniku jew b'mezz ieħor fi zmien 48 siegħa wara t-tmiem ta’ kull operazzjoni ta’ sajd lill-awtorità kompetenti tal-Istat Membru responsabbli għan-nassa.

2.       Malli jirċievi r-reġistrazzjoni tal-qabda, kull Stat Membru għandu jgħaddiha, flimkien mal-kwantitajiet stmati li fadal fin-nassa, b’mezz elettroniku lill-Kummissjoni. Il-Kummissjoni għandha minnufih tgħaddi l-informazzjoni lis-Segretarjat tal-ICCAT.”

(13)        Fl-Artikolu 29, il-paragrafu 2, jiżdied is-subparagrafu li ġej:

“Meta, f’kwalunkwe ħin, aktar minn 15-il bastiment ta' Stat Membru huma impenjati f'attivitajiet ta' sajd għat-tonn f'żona tal-Konvenzjoni tal-ICCAT, dak l-Istat Membru għandu jkollu bastiment ta’ spezzjoni fiż-żona tal-Konvenzjoni, jew jikkoopera ma’ Stat Membru jew PKK ieħor sabiex jopera bastiment ta’ spezzjoni b’mod konġunt.”

(14)        Fl-Artikolu 30, il-paragrafu 1 jinbidel b’dan li ġej:

"1. Kull Stat Membru għandu jiżgura kopertura ta’ osservatur nazzjonali fuq bastimenti tiegħu li huma attivi fis-sajd għat-tonn għal mill-inqas:

a)      100 % tal-bastimenti attivi tal-qbid bil-purse seine b’tul ta’ 24 m jew inqas fl-2011;

b)      100 % tal-bastimenti attivi tal-qbid bil-purse seine b’tul ta’ 20 m jew inqas fl-2012;

c)      20 % tal-bastimenti attivi tat-tkarkir pelaġiku (b’tul ta’ aktar minn 15 m);

d)      20 % tal-bastimenti attivi tas-sajd bil-konz (b’tul ta’ aktar minn 15 m);

e)      20 % tal-bastimenti attivi tas-sajd bil-lixka (b’tul ta’ aktar minn 15 m);

f)       100 tan-nases għat-tonn matul il-proċess tal-ħsad;

g)      100 % tal-bastimenti tal-irmonk.”

(15)        L-Artikolu 31 huwa emendat kif ġej:

(a)     Il-paragrafu 1 jinbidel b'dan li ġej:

“1. Kull Stat Membru għandu jiżgura preżenza ta’ osservatur reġjonali ICCAT fuq:

a)      il-bastimenti kollha tas-sajd bil-purse seine b’tul ta’ aktar minn 24 m matul l-istaġun kollu tas-sajd tal-2011;

b)      il-bastimenti kollha tas-sajd bil-purse seine b’tul ta’ aktar minn 20 m matul l-istaġun tas-sajd tal-2012;

c)      il-bastimenti kollha tas-sajd bil-purse seine irrispettivament mit-tul tagħhom matul l-istaġun kollu tas-sajd mill-2013 'il quddiem.

Bastimenti msemmija f’(a), (b) u (c) li jistadu bil-purse seine mingħajr osservatur reġjonali tal-ICCAT ma għandhomx jiġu awtorizzati jistadu jew joperaw fis-sajd għat-tonn.”

(b)     Fil-paragrafu 2 jiżdied is-subparagrafu li ġej:

"F’każ li t-tonn jinħasad mill-gaġeġ u jiġi kkummerċjalizzat bħala prodott frisk, l-osservatur reġjonali li josserva l-ħsad jista’ jkun ċittadin tal-Istat Membru responsabbli għar-razzett.”

(16)        L-Artikolu 32 jinbidel b'dan li ġej:

“Artikolu 32

Aċċess għar-reġistrazzjonijiet bil-vidjo

1.       Kull Stat Membru għandu jiżgura li r-reġistrazzjonijiet bil-vidjo msemmija fl-Artikoli 22(6) u 24(7), huma disponibbli għall-ispetturi u l-osservaturi tal-ICCAT.

2.       Kull Stat Membru responsabbli għal razzett għandu jiżgura li r-reġistrazzjonijiet bil-vidjo msemmija fl-Artikoli 22(6) u 24(7), huma disponibbli għall-ispetturi u l-osservaturi tal-Unjoni.

3.       Kull Stat Membru għandu jieħu l-miżuri neċessarji biex jevita kull bdil, editjar jew manipulazzjoni tar-reġistrazzjoni bil-vidjo oriġinali.”

(17)        Għandu jiddaħħal l-Artikolu 33a li ġej:

“Artikolu 33a

It-trasmissjoni tal-pjan ta’ spezzjoni tal-Unjoni lill-ICCAT

Mhux aktar tard mill-15 ta’ Settembru ta’ kull sena, l-Istati Membri għandhom jibagħtu l-pjan ta’ spezzjoni għas-sena ta' wara lill-Kummissjoni. Il-Kummissjoni għandha tibgħat il-pjan ta’ spezzjoni tal-Unjoni lis-Segretarjat tal-ICCAT għall-approvazzjoni tal-ICCAT.

(18)        Fl-Artikolu 34, il-paragrafu 1 jinbidel b’dan li ġej:

"1.      Il-kummerċ domestiku, il-ħatt l-art, l-importazzjonijiet, l-esportazzjonijiet, it-tqegħid fil-gaġeġ għat-tismin jew it-trobbija tat-tonn, l-esportazzjonijiet mill-ġdid u t-trażbord tat-tonn tal-Lvant tal-Atlantiku u tal-Mediterran li mhumiex akkumpanjati minn dokumentazzjoni preċiża, kompleta u validata, meħtieġa mill-ICCAT, inkluża dik meħtieġa minn dan ir-Regolament u r-Regolament (UE) Nru 640/2010 tal-Parlament Ewropew u tal-Kunsill tas-7 ta’ Lulju 2010 li jistabbilixxi programm ta’ dokumentazzjoni tal-qbid għat-tonn Thunnus thynnus u li jemenda r-Regolament tal-Kunsill (KE) Nru 1984/2003 [5]għandhom ikunu pprojbiti”

(19)        L-Anness III jinbidel bit-test tal-Anness I ta' dan ir-Regolament.

(20)        L-Anness VI huwa emendat kif ġej:

(a)     Fil-paragrafu 1, jiżdied il-punt q) li ġej:

“q) trażbord fuq il-baħar”.

(b)     Il-paragrafu 2 jinbidel b'dan li ġej:

“2.     Fil-każ ta’ kwalunkwe tlugħ abbord jew spezzjoni fuq bastiment tas-sajd li matulha l-ispetturi awtorizzati josservaw attività jew kundizzjoni li tista’ tikkostitwixxi infrazzjoni serja, kif definita fil-paragrafu 1, l-awtoritajiet tal-Istat tal-bandiera tal-bastimenti ta' spezzjoni għandhom jinnotifikaw minnufih l-awtoritajiet tal-Istat tal-bandiera tal-bastiment tas-sajd, direttament kif ukoll permezz tas-Segretarjat tal-ICCAT. F’tali sitwazzjonijiet spettur għandu jinforma wkoll, fejn possibbli, lill-awtoritajiet kompetenti tal-Istat tal-bandiera, kif notifikat lis-Segretarjat tal-ICCAT, u lil kwalunkwe bastiment ta’ spezzjoni tal-Istat tal-bandiera tal-bastiment tas-sajd li huwa magħruf li jinsab fil-viċinanzi.

L-ispetturi tal-ICCAT għandhom jirreġistraw l-ispezzjonijiet imwettqa u l-infrazzjonijiet identifikati (jekk hemm) fil-ktieb ta’ abbord tal-bastiment tas-sajd.”

(c)     fl-ewwel subparagrafu tal-paragrafu 3, il-kelma “minnufih” hija mibdula bi “fi żmien 72 siegħa”;

(d)     Il-paragrafu 7 jinbidel b’dan li ġej:

“7. Soġġett għall-arranġamenti miftiehma fl-ambitu il-paragrafu 12 ta’ dan l-Anness, bastiment impenjat f’dak il-mument fis-sajd għat-tonn jew ħut simili għat-tonn fiż-żona tal-Konvenzjoni ’l barra mill-ilmijiet li huma fl-ambitu tal-ġuriżdizzjoni nazzjonali tiegħu għandu jieqaf hekk kif jingħata s-sinjal xieraq fil-Kodiċi Internazzjonali tas-Sinjali minn bastiment li għandu spettur fuqu sakemm ma jkunx attwalment qed iwettaq operazzjonijiet ta’ sajd, fejn jekk dan ikun il-każ, għandu jieqaf minnufih hekk kif ikun temm tali operazzjonijiet. Il-kaptan tal-bastiment għandu jippermetti lill-ispettur, li jista’ jkun akkumpanjat minn xhud, li jitla’ abbord u, f’dan ir-rigward, huwa għandu jipprovdi sellum biex jitla’ (jitilgħu) abbord. Il-kaptan għandu jippermetti lill-ispettur jagħmel tali eżami tal-qabda jew tal-irkaptu u ta’ kwalunkwe dokument rilevanti li l-ispettur jikkunsidra meħtieġ biex jivverifika l-osservanza tar-rakkomandazzjonijiet tal-Kummissjoni ICCAT li huma fis-seħħ fir-rigward tal-Istat tal-bandiera tal-bastiment konċernat u l-ispettur jista’ jitlob għal kwalunkwe spjegazzjoni meqjusa bħala meħtieġa.

Grupp ta’ spezzjoni għandu jikkonsisti b'mhux iktar minn żewġ spetturi tal-ICCAT sakemm spetturi addizjonali ma jkunux iġġustifikati miċ-ċirkostanzi. Assistent jista’ jakkumpanja l-grupp għall-finijiet ta' taħriġ biss."

(21)        Fl-Anness VII, il-paragrafu 1 huwa mħassar.

(22)        It-test fl-Anness II għal dan ir-Regolament huwa mdaħħal bħala l-Anness VIIIa

Artikolu 2

Dan ir-Regolament għandu jidħol fis-seħħ fis-seba’ jum wara l-pubblikazzjoni tiegħu f' Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament f’kull Stat Membru.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

Anness I

“Anness III

Nru tad-Dokument:                                                           Dikjarazzjoni tat-trażbord tal-ICCAT

Bastiment tal-ġarr Isem tal-bastiment u l-kodiċi tar-radju: Bandiera: Nru tal-awtorizzazzjoni tal-Istat tal-Bandiera Nru tar-Reġistru Nazzjonali Nru tar-Reġistru tal-ICCAT Nru tal-IMO || || Bastiment tas-Sajd L-isem tal-bastiment u l-kodiċi tar-radju, Bandiera: Nru tal-awtorizzazzjoni tal-Istat tal-Bandiera Nru tar-Reġistru Nazzjonali Nru tar-Reġistru tal-ICCAT Identifikazzjoni esterna: Nru tal-folja tal-ktieb ta’ abbord. || Destinazzjoni finali: Port Pajjiż Stat: ||

|| || || ||

                                Jum          Xahar       Siegħa Sena              |2_|0_|__|__|           Isem il-Kaptan tal-Bastiment tas-Sajd |__________| Isem il-Kaptan tal-Bastiment tal-Ġarr:  KOORDINATI TAT-TRAŻBORD

Tluq         |__|__|     |__|__|     |__|__| minn            |__________|

Ritorn      |__|__|     |__|__|     |__|__|     sa             |__________|          Firma:| __________|               Firma:      |__________|

Trażbord. |__|__|     |__|__|     |__|__|     |__________|

Għat-trażbord, indika l-piż f’kilogrammi jew l-unità użata (eż. kaxxa, qoffa) u l-piż li nħatt l-art f’kilogrammi ta’ din l-unità: |___| kilogrammi

Port || Il-baħar Lat.Lonġ. || Speċi || Għadd ta’ unitajiet ta’ ħut || Tip ta’ Prodott Ħaj || Tip ta’ Prodott Sħiħ || Tip ta’ Prodott Imnaddaf || Tip ta’ Prodott Mingħajr ir-ras || Tip ta’ Prodott Fi fletti || Tip ta’ Prodott || Trażbordi ulterjuri Data: |__________| Post/Pożizzjoni: |__________| Nru ta' awtorizzazzjoni PK Firma tal-Kaptan tal-bastiment ta’ trasferiment: Isem tal-bastiment li jirċievi: Bandiera Nru tar-Reġistru tal-ICCAT Nru tal-IMO Firma tal-kaptan Data: |__________|Post/Pożizzjoni: |__________| Nru ta' Awtorizzazzjoni PK Firma tal-Kaptan tal-bastiment ta’ trasferiment: Isem tal-bastiment li jirċievi: Bandiera Nru tar-Reġistru tal-ICCAT Nru tal-IMO Firma tal-kaptan

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

|| || || || || || || || || ||

Firma tal-osservatur tal-ICCAT (fejn applikabbli)

Obbligi f’każ ta’ trażbord:

     1.        L-oriġinali tad-dikjarazzjoni tat-trażbord trid tiġi pprovduta lill-bastiment (tal-ipproċessar/tat-trasport) li jirċievi.

     2.        Il-kopja tad-dikjarazzjoni dwar it- trażbord trid tinżamm mill-bastiment tal-qbid jew nassa korrispondenti.

     3.        Operazzjonijiet ulterjuri ta’ trażbord għandhom jiġu awtorizzati mill-Parti Kontraenti (PK) rilevanti li tkun awtorizzat lill-bastiment biex jopera.

     4.        L-oriġinal tad-dikjarazzjoni tat-trażbord irid jinżamm mill-bastiment li jirċievi li jżomm il-ħut sal-wasla fil-post tal-ħatt l-art.

     5.        L-operazzjoni ta' trażbord għandha tiġi rreġistrata fil-ktieb ta' abbord ta' kwalunkwe bastiment involut fl-operazzjoni.”

Anness II

"Anness VIIIa

Nru tad-Dokument: ||                 Dikjarazzjoni tat-Trasferiment tal-ICCAT || Anness 4 ||

1 - TRASFERIMENT TAT-TONN ĦAJ DESTINAT GĦAT-TROBBIJA || ||

Isem il-bastiment tas-sajd   Kodiċi : Bandiera: Nru tal-awtorizzazzjoni tat-trasferiment tal-Istat tal-Bandiera Nru tar-Reġistru tal-ICCAT Identifikazzjoni esterna: Numru tal-ktieb ta’ abbord Numru tal-operazzjoni konġunta tas-sajd || Isem tan-nassa: Nru tar-Reġistru tal-ICCAT || Isem il-bastiment tal-irmonk: Kodiċi : Bandiera: Nru tar-Reġistru tal-ICCAT: Identifikazzjoni esterna: || Isem ir-razzett ta’ destinazzjoni: Nru tar-Reġistru tal-ICCAT:

2 – TRASFERIMENT WARA L-ĦSAD

Isem tar-razzett: Nru tar-Reġistru tal-ICCAT || Isem tan-nassa: Nru tar-Reġistru tal-ICCAT || Isem il-bastiment tat-trasport Bandiera: Nru tar-Reġistru tal-ICCAT Identifikazzjoni esterna: || Isem il-bastiment tal-ipproċessar u l-ġarr: Kodiċi : Bandiera: Nru tar-Reġistru tal-ICCAT: Identifikazzjoni esterna:

3 - INFORMAZZJONI DWAR IT-TRASFERIMENT

Data:_ _ / _ _ / _ _ _ _ || Post jew pożizzjoni:                   Port :                          Lat:                               Lonġ

Numru ta’ individwi || Piż totali f’kg          || Speċi:

Tip ta’ prodott:       Ħaj  Sħiħ  Imnaddaf  Oħrajn (Speċifika):

Isem u firma tal-kaptan tal-bastiment tas-sajd/operatur tan-nassa/operatur tar-razzett: || Isem u firma tal-kaptan tal-bastiment li qed jirċievi (tal-irmonk/tal-ipproċessar/tal-ġarr):

4 – TRASFERIMENT TAL-ĦUT MEJJET LIL BASTIMENT AWŻILJARJU

Isem il-bastiment awżiljarju || Bandiera: || Kwantità f’Kg || Numru ta’ individwi

Data:_ _ / _ _ / _ _ _ _ || Pożizzjoni:                              Lat:                                     Lonġ || Port tal-ħatt l-art:

5 – TRASFERIMENTI ULTERJURI

Data:_ _ / _ _ / _ _ _ _ || Post jew pożizzjoni: Port:                     Lat:                       Lonġ

Isem tal-bastiment tal-irmonk: ||  Kodiċi : || Bandiera: || Nru tar-Reġistru tal-ICCAT

Nru tal-awtorizzazzjoni tat-trasferiment tal-Istat tar-razzett || Identifikazzjoni esterna: || Isem u firma tal-kaptan tal-bastiment li qed jirċievi:

Data:_ _ / _ _ / _ _ _ _ || Post jew pożizzjoni: Port:                     Lat:                       Lonġ

Isem tal-bastiment tal-irmonk: ||  Kodiċi : || Bandiera: || Nru tar-Reġistru tal-ICCAT

Nru tal-awtorizzazzjoni tat-trasferiment tal-Istat tar-razzett || Identifikazzjoni esterna: || Isem u firma tal-kaptan tal-bastiment li qed jirċievi:

Data:_ _ / _ _ / _ _ _ _ || Post jew pożizzjoni: Port:                     Lat:                       Lonġ

Isem tal-bastiment tal-irmonk: ||  Kodiċi : || Bandiera: || Nru tar-Reġistru tal-ICCAT

Nru tal-awtorizzazzjoni tat-trasferiment tal-Istat tat-trobbija || Identifikazzjoni esterna: || Isem u firma tal-kaptan tal-bastiment li qed jirċievi:

"

[1]               ĠU C , , p. .

[2]               ĠU L 96, 15.04.2009, p.1

[3]               ĠU L 343, 22.12.2009, p. 1

[4]               ĠU L 194, 24.07.2010, p.1

[5]               ĠU L 194, 24.07.2010, p.1