31.5.2013   

MT

Il-Ġurnal Uffiċjali tal-Unjoni Ewropea

CE 153/1

—

wara li kkunsidra l-Artikolu 225 tat-Trattat dwar il-Funzjonament tal-Unjoni Ewropea,

—

wara li kkunsidra r-Regolament tal-Kunsill (KE) Nru 1346/2000 tas-29 ta' Mejju 2000 dwar proċedimenti ta' falliment (1) (ir-Regolament dwar il-proċedimenti ta' falliment),

—

wara li kkunsidra s-sentenzi tal-Qorti tal-Ġustizzja tal-Unjoni Ewropea tat-2 ta' Mejju 2006 (2), tal-10 ta' Settembru 2009 (3), u tal-21 ta' Jannar 2010 (4),

—

wara li kkunsidra l-Artikoli 42 u 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Affarijiet Legali u l-opinjonijiet tal-Kumitat għall-Affarijiet Ekonomiċi u Monetarji u l-Kumitat għall-Impjiegi u l-Affarijiet Soċjali (A7-0355/2011),

A.

billi differenzi bejn liġijiet nazzjonali dwar l-insolvenza joħolqu vantaġġi jew żvantaġġi kompetittivi u diffikultajiet għall-kumpaniji li jwettqu attivitajiet transkonfinali li jistgħu jikkostitwixxu ostakoli għar-ristrutturar ta' suċċess ta' kumpaniji insolventi; billi dawn id-differenzi jinkoraġġixxu t-tfittxija għall-aktar ġurisdizzjoni vantaġġjuża (forum-shopping); billi l-ħolqien ta' kundizzjonijiet ugwali jkun ta' benefiċċju għas-suq intern;

B.

billi għandhom jittieħdu miżuri għall-prevenzjoni tal-abbuż u ta' kwalunkwe tixrid tal-fenomenu tal-forum-shopping, u billi għandhom jiġu evitati proċedimenti ewlenin konkorrenti,

C.

billi anki jekk il-ħolqien ta' leġiżlazzjoni sostantiva dwar l-insolvenza fil-livell tal-UE mhuwiex possibbli, l-armonizazzjoni ta' ċerti oqsma tal-liġi dwar l-insolvenza hija vallapena u tista' tinkiseb;

D.

billi teżisti konverġenza progressiva fil-liġijiet nazzjonali dwar l-insolvenza tal-Istati Membri;

E.

billi r-Regolament dwar proċedimenti ta' falliment ġie adottat fl-2000 u issa ilu aktar minn disa' snin fis-seħħ; billi l-Kummissjoni għandha tippreżenta rapport dwar l-applikazzjoni tiegħu mhux aktar tard mill-1 ta' Ġunju 2012;

F.

billi r-Regolament dwar proċedimenti ta' falliment huwa r-riżultat ta' proċess ta' negozjati twil ħafna, u dan wassal għall-fatt li tħallew barra ħafna kwistjonijiet sensittivi u li l-approċċ fuq numru ta' kwistjonijiet kien diġà bla rilevanza fiż-żmien tal-adozzjoni tiegħu;

G.

billi, mid-dħul fis-seħħ tar-Regolament dwar proċedimenti ta' falliment, seħħew ħafna bidliet: 12-il Stat saru Membri tal-Unjoni, u l-fenomenu tal-gruppi ta' kumpaniji żdied b'mod kunsiderevoli;

H.

billi l-insolvenza tħalli impatt negattiv mhux biss fuq l-impriżi kkonċernati iżda wkoll fuq l-ekonomiji tal-Istati Membri, u billi l-objettiv għaldaqstant għandu jkun dak ta' salvagwardja tal-partijiet interessati ekonomiċi kollha, tal-kontribwenti u ta' min iħaddem kontra r-riperkussjonijiet tal-insolvenza;

I.

billi l-approċċ f'dak li jikkonċerna l-proċedimenti ta' insolvenza huwa kkonċentrat aktar fuq is-salvataġġ korporattiv bħala alternattiva għall-istralċ;

J.

billi l-liġi dwar l-insolvenza għandha tkun strument għas-salvataġġ ta' kumpaniji fil-livell tal-Unjoni; billi salvataġġ bħal dan, meta dan ikun possibbli, huwa fl-interess tad-debitur, tal-kredituri u tal-impjegati;

K.

billi l-proċedimenti ta' insolvenza ma għanhomx jintużaw b'abbuż minn kreditur biex jevita azzjoni konġunt għall-irkupru tad-dejn, u billi jeħtieġ għalhekk li jiġu introdotti salvagwardji proċedurali adegwati;

L.

billi għandu jiġi stabbiliti qafas ġuridiku li jkun aktar adatt għall-każijiet tal-kumpaniji li huma temporanjament insolventi;

M.

billi fil-Komunikazzjoni tagħha tat-3 ta' Marzu 2010 bit-titolu “Ewropa 2020: Strateġija għal tkabbir intelliġenti, sostenibbli u inklussiv” (COM (2010) 2020), il-Kummissjoni, fir-rigward tal-lakuni u d-diffikultajiet li qed jostakolaw il-ksib ta' suq uniku għas-seklu 21, iddikjarat kif ġej: “L-aċċess tal-impriżi ta' daqs żgħir u medju għandu jittejjeb. L-intraprenditorija għandha tiġi żviluppata permezz ta' inizjattivi ta' politika konkreti, fosthom simplifikazzjoni tal-liġi tal-kumpaniji (il-proċeduri ta' falliment, l-istatut ta' kumpaniji privata, eċċ.), u inizjattivi li jippermettu lill-imprendituri biex jerġgħu jibdew wara l-falliment ta' negozju”;

N.

billi l-liġi dwar l-insolvenza għandha tistabbilixxi wkoll regoli għall-istralċ ta' kumpanija bl-anqas mod dannuż u bl-aktar mod favorevoli għall-parteċipanti kollha ladarba jkun jidher ċar li s-salvataġġ korporattiv x'aktarx mhux se jirnexxi jew ma rnexxiex;

O.

billi f'kull każ speċifiku, ir-raġunijiet għall-insolvenza ta' impriża jridu jiġu eżaminati, jiġifieri għandu jiġi aċċertat jekk id-diffikultajiet finanzjarji tal-impiżi humiex biss tranżitorji jew jekk l-impriża hijiex kompletament insolventi; billi prinċipalment dan jirrigwarda l-istabbiliment tal-assi kollha ta' debitur u l-obbligazzjonijiet tiegħu, sabiex tiġi valutata l-kapaċità tiegħu ta' solvenza jew ta' insolvenza;

P.

billi l-gruppi ta' kumpaniji huma fenomenu komuni iżda l-insolvenza tagħhom għadha ma ġietx indirizzata fil-livell tal-Unjoni; billi l-insolvenza ta' grupp ta' kumpaniji x'aktarx tirriżulta fil-ftuħ ta' diversi proċedimenti ta' insolvenza separati f'ġurisdizzjonijiet differenti fir-rigward ta' kull membru tal-grupp insolventi; billi sakemm dawn il-proċedimenti ma jistgħux jiġu kkoordinati, huwa improbabbli li l-grupp jista' jiġi ristrutturat fit-totalità tiegħu u jista' jkun li jkollu jinqasam f'diversi partijiet, u dan jinvolvi telf għall-kredituri, l-azzjonisti u l-impjegati,

Q.

billi f'każ tal-insolvenza ta' gruppi ta' impriżi, huwa diffiċli li ssir riabilitazzjoni minħabba r-regolamenti differenti tal-Istati Membri fl-UE u b'hekk qegħdin ikunu pperikolati eluf ta' postijiet tax-xogħol,

R.

billi l-interkonnessjoni tar-reġistri nazzjonali tal-insolvenza li twassal għall-ħolqien ta' bażi tad-data tal-UE aċċessibbli u komprensiva tal-proċedimenti ta' insolvenza tkun tippermetti lill-kredituri, lill-azzjonisti, lill-impjegati u lill-qrati jiddeterminaw jekk infetħux proċedimenti ta' insolvenza fi Stat Membru ieħor u jaċċertaw id-dati ta' skadenza u d-dettalji għat-tressiq tal-pretensjonijiet; billi dan jippromwovi l-amministrazzjoni kosteffikaċi u jżid it-trasparenza filwaqt li jirrispetta l-protezzjoni tad-data;

S.

billi l-pjanijiet ta' likwidazzjoni (“living wills”) transfruntieri għandhom ikunu eżegwibbli ġuridikament fil-każ ta' istituzzjonijiet finanzjarji u li għandhom jiġu kkunsidrati għall-kumpaniji kollha sistemikament rilevanti, anke jekk mhumiex istituzzjonijiet finanzjarji, bħala pass importanti fil-proċess biex jintlaħaq qafas transfruntier xieraq tal-insolvenza;

T.

billi d-dispożizzjonijiet għall-proċedimenti ta' insolvenza jridu jippermettu arranġamenti speċjali għas-separazzjoni ta' unitajiet vijabbli li jipprovdu servizzi essenzjali, bħal sistemi ta' ħlas u mekkaniżmi oħra definiti fil-pjanijiet ta' likwidazzjoni u, billi, f'dan ir-rigward, l-Istati Membri għandhom ukoll jiżguraw li d-dritt tagħhom dwar il-fallimenti jinkludu dispożizzjonijiet adegwati li jippermettu arranġamenti speċjali fil-livell tal-UE għas-separazzjoni tal-konglomerati transfruntieri insolventi f'unitajiet vijabbli;

U.

billi l-proċedimenti ta' insolvenza għandhom iqisu t-trasferimenti fi ħdan il-grupp, bil-għan li jiġi żgurat li, meta jkun xieraq, l-attiv ikun rekuperabbli f'livell transfruntier, sabiex jinkiseb riżultat ekwu;

V.

billi xi kumpaniji ta' investiment, b'mod partikolari l-kumpaniji tal-assigurazzjoni, ma jistgħux jiġu xolti b'mod improvviżat u jeħtieġu riżultat li jikseb distribuzzjoni ekwa tal-attiv maż-żmien; billi t-trasferimenti kummerċjali, "run-off" kif ukoll it-tkomplija tal-operazzjonijiet ma għandhomx jiġu mxekkla u jistgħu jitolbu trattament prijoritarju;

W.

billi d-deċiżjoni li jiġu inklużi gruppi sħaħ minflok entitajiet ġuridiċi individwali fi proċedimenti ta' insolvenza, għandha tkun orjentata lejn ir-riżultati u għandhom jiġu kkunsidrati konsegwenzi possibbli, bħar-rikors awtomatiku għal strumenti ta' likwidazzjoni differenti jew l-impatt fuq skemi ta' garanzija li jkopru diversi marki fi ħdan grupp wieħed;

X.

billi jkun xieraq li d-definizzjoni ta' proċeduri ta' "bail-in" armonizzati u l-istandards għall-konglomerati transfruntieri tiġi eżaminata, inkluż b'mod partikolari l-kapitalizzazzjoni tad-dejn (debt-to-equity swaps);

Y.

billi għalkemm il-liġi tal-impjiegi taqa' taħt ir-responsabbiltà tal-Istati Membri, il-liġi dwar l-insolvenza jista' jkollha impatt fuq il-liġi tal-impjiegi, u billi fil-kuntest tal-globalizzazzjoni li qiegħda tinfirex, u anke tal-kriżi ekonomika, il-kwistjoni ta' nuqqasijiet fil-qasam tal-insolvenza għandhom jitqiesu mill-perspettiva ġuridika dwar l-impjiegi, peress li definizzjonijiet differenti ta' "impjieg" u "impjegat" fl-Istati Membri ma għandhomx jikkompromettu d-drittijiet tal-impjegati fil-każ ta' insolvenza; billi, madankollu, kwalunkwe dibattitu dwar il-kwistjoni speċifika tal-insolvenza ma għandux awtomatikament jintuża bħala pretest għar-regolamentazzjoni tal-liġi tal-impjiegi fil-livell tal-UE;

Z.

billi l-objettiv tad-Direttiva 2008/94/KE tal-Parlament Ewropew u tal-Kunsill tat-22 ta' Ottubru 2008 dwar il-protezzjoni tal-impjegati fil-każ tal-insolvenza ta' min iħaddimhom (5) huwa li jiġi żgurat livell minimu ta' protezzjoni għall-impjegati f'każ ta' insolvenza, filwaqt li tinżamm flessibbiltà adegwata għall-Istati Membri; billi d-differenzi bejn l-Istati Membri fir-rigward tal-implimentazzjoni jeżistu u dawn id-differenti għandhom jiġi kkunsidrati;

AA.

billi d-Direttiva 2008/94/KE tinkludi espliċitament fl-ambitu tagħha l-impjegati part-time, l-impjegati b'kuntratt għal perjodu fiss u l-impjegati b'relazzjoni ta' impjieg temporanja; billi għandha wkoll tingħata aktar protezzjoni fil-każ ta' insolvenza lill-impjegati li qegħdin fuq kuntratti mhux standard;

AB.

billi n-nuqqas attwali ta' armonizzazzjoni fir-rigward tal-klassifikazzjoni tal-kredituri jnaqqas il-previdibbiltà tal-eżiti tal-proċedimenti ġudizzjarji; billi jeħtieġ li tiżdied il-prijorità tal-pretensjonijiet tal-impjegati meta mqabbla mal-pretensjoni ta' kredituri oħrajn;

AC.

billi l-kamp ta' applikazzjoni tad-Direttiva 2008/94/KE, b'mod partikolari t-tifsira ta' “pretensjonijiet pendenti”, hija wiesgħa wisq, peress li għadd ta' Stati Membri japplikaw definizzjoni dejqa ta' remunerazzjoni (eż. bl-esklużjoni ta' ħlas dovut għal sensja, bonus, arranġamenti ta' rimborż, eċċ.) u dan jista' jirriżulta f'għadd kunsiderevoli ta' pretensjonijiet mhux sodisfatti;

AD.

billi l-Istati Membri huma kompetenti li jiddefinixxu "remunerazzjoni" u "paga", sakemm huma konformi mal-prinċipji ġenerali ta' ugwaljanza u nondiskriminazzjoni bejn ħaddiema, bir-riżultat li kwalunkwe sitwazzjoni ta' insolvenza li tippreġudika potenzjalment lil dawn tal-aħħar għandha titqies għall-iskop li jingħatalhom kumpens b'konformità mal-objettiv soċjali tad-Direttiva 2008/94/KE u l-livelli minimi ta' kumpens li għad iridu jiġu stabbiliti;

AE.

billi, minħabba l-kuntratti ta' impjieg fl-UE kollha u d-diversità ta' tali kuntratti fost l-Istati Membri, attwalment mhuwiex possibbli tinstab definizzjoni ta' “impjegat” fuq livell Ewropea;

AF.

billi, kemm jista' jkun, għandhom ikunu evitati eżenzjonijiet mill-ambitu ta' applikazzjoni tad-Direttiva 2008/94/KE;

AG.

billi l-azzjoni leġiżlattiva rikjesta f'din ir-riżoluzzjoni għandha tkun imsejsa fuq valutazzjonijiet dettaljati tal-impatt, kif rikjest mill-Parlament;

1.

Jitlob lill-Kummissjoni tippreżenta, fuq il-bażi tal-Artikolu 50, l-Artikolu 81(2) jew l-Artikolu 114 tat-Trattat dwar il-Funzjonament tal-Unjoni Ewropea, proposta jew aktar dwar qafas tal-UE tal-insolvenza korporattiva, skont ir-rakkomandazzjonijiet dettaljati stabbiliti fl-Anness, sabiex tiġi żgurata parità tal-kundizzjonijiet ugwali, ibbażata fuq analiżi fil-fond tal-alternattivi vijabbli kollha;

2.

Jikkonferma li r-rakkomandazzjonijiet jirrispettaw id-drittijiet fundamentali u l-prinċipju tas-sussidjarjetà;

3.

Iqis li l-implikazzjonijiet finanzjarji tal-proposta mitluba għandhom ikunu koperti bl-allokazzjonijiet baġitarji xierqa;

4.

Jagħti istruzzjonijiet lill-President tiegħu biex jgħaddi din ir-riżoluzzjoni u r-rakkomandazzjonijiet dettaljati annessi magħha lill-Kummissjoni u lill-Kunsill.