(a)

biex jipproġetta lilu nnifsu fis-sistema tan-Nazzjonijiet Uniti bħala medjatur onest bejn l-interessi u l-valuri ta’ gruppi msieħba differenti sabiex jippromwovi għarfien komuni u koeżjoni akbar fir-rigward tat-tliet pilastri marbutin flimkien mill-qrib li fuqhom isserraħ in-NU, jiġifieri l-paċi u s-sigurtà, l-iżvilupp soċjali u ekonomiku u d-drittijiet tal-bniedem;

(b)

biex ikun żgurat, flimkien mal-Kummissjoni li l-kwistjonijiet li jirrigwardaw l-aġenda multilaterali jiġu indirizzati sistematikament fid-djalogi bilaterali li l-UE u l-Istati Membri tal-UE jagħmlu ma’ pajjiżi u gruppi reġjonali oħrajn;

(c)

biex flimkien mal-amministrazzjoni l-ġdida tal-Istati Uniti jistudja bir-reqqa metodi li jsaħħu l-koperazzjoni taż-żewġ imsieħba, b’appoġġ għall-prijoritajiet komuni tagħhom fin-Nazzjonijiet Uniti;

(d)

biex irawwem id-dibattitu mibdi mis-Segretarju Ġenerali, Ban Ki-Moon, dwar l-implimentazzjoni tal-prinċipju tar-Responsabiltà ta’ Protezzjoni (R2P), sabiex jikseb kunsens imsaħħaħ dwaru u biex jiġi żviluppat approċċ aktar operazzjonali għal din il-kolonna ewlenija tal-prinċipji tan-NU filwaqt li jirreżisti tentattivi biex jonqos il-kamp ta’ applikazzjoni tagħha;

(e)

biex jiżgura li n-natura preventiva tal-R2P tkun enfasizzata b’mod xieraq fid-dibattitu msemmi hawn fuq u li tingħata attenzjoni xierqa sabiex tingħata għajnuna lil pajjiżi vulnerabbli u mhux stabbli ħalli jiżviluppaw il-kapaċità li jerfgħu responsabiltà bħal din, b’attenzjoni speċifika fuq il-parteċipanti reġjonali bħala l-iktar interlokaturi effettivi f’sitwazzjonijiet mhux stabbli;

(f)

biex jiżgura li l-prinċipju tal-R2P jiġi applikat f’każijiet ta’ kriżi fejn l-istat ikkonċernat jonqos milli jipproteġi lill-poplu tiegħu minn ġenoċidju, reati tal-gwerra, tindif etniku u reati kontra l-umanità;

(g)

biex jinkoraġġixxi lill-Unjoni Afrikana biex tiżviluppa aktar il-kapaċitajiet tal-immaniġġjar tal-kriżi tagħha u jistieden kemm lill-parteċipanti ewlenin tal-UE u tan-NU biex jappoġġjaw dawn l-isforzi u biex isaħħu l-koperazzjoni mal-Unjoni Afrikana fil-ħolqien tal-paċi u s-sigurtà fil-kontinent Afrikan;

(h)

biex iħeġġeġ lill-Istati Membri tal-UE biex jagħmlu l-isforzi neċessarji kollha sabiex in-negozjati dwar il-Konvenzjoni Komprensiva dwar it-Terroriżmu Internazzjonali jiġu konklużi;

(i)

biex b’mod ċar jiffavorixxi li r-riżoluzzjonijiet kollha diskussi u adottati fl-UNGA jkunu konformi mal-prinċipji tal-liġi internazzjonali umanitarja u biex jikkundanna b’mod ċar kull ksur ta’ dan, b’mod partikulari fir-rigward tas-sigurtà u tas-sikurezza tal-ħaddiema tan-NU u ta’ ħaddiema umanitarji oħrajn;

(j)

biex jistabbilixxi kuntatt ma’ gruppi reġjunali oħrajn sabiex jippromwovi aktar kuxjenza u għarfien dwar il-prinċipji eżistenti fid-Dikjarazzjoni appoġġjata mill-UE dwar l-orjentazzjoni sesswali u l-identità sesswali approvata mis-66 Stat Membru tan-NU;

(k)

biex jitlob lis-Segretarju Ġenerali tan-NU biex jinforma lill-65 Sessjoni tal-Assemblea Ġenerali tan-NU dwar il-konformità tal-Istati Membri mal-projbizzjoni tal-piena tal-mewt għaż-żgħażagħ, inkluża l-informazzjoni dwar l-għadd ta’ żgħażagħ li wettqu reati li bħalissa huma kkundannati għall-piena tal-mewt, u l-għadd ta’ żgħażagħ li ġew iġġustizzjati f’dawn l-aħħar 5 snin;

(l)

biex iniedi dibattitu, qabel ir-reviżjoni tal-2011 tal-HCR, li jenfasizza l-kumplimentarità bejn it-Tielet Kumitat, korp intergovernementali tal-UNGA li għandu sħubija universali, u l-HRC, li l-kompożizzjoni tiegħu hi limitata u li l-mandat tiegħu huwa aktar operazzjonali;

(m)

jistieden lill-Istati Membri sabiex jikkunsidraw mill-ġdid il-parteċipazzjoni tagħhom fil-Konferenza ta’ reviżjoni ta’ Durban f’Ġinevra f’April 2009 jekk il-ksur tal-“linji l-ħomor” kollha msemmija fl-abbozz tad-dokument ta’ riżultat tal-20 ta’ Frar 2009 jiġi kkonfermat fin-negozjati sussegwenti fil-preparazzjoni għall-Konferenza;

(n)

biex jippromwovi u jappoġġja l-isforzi li jiżguraw li s-sistema ta’ sanzjonijiet tan-Nazzjonijiet Uniti fil-konfront tat-terroriżmu tkun suġġetta għal proċeduri trasparenti u ġusti, b’mod partikulari billi tiġi introdotta proċedura effikaċi ta’ notifika u billi tiġi stabbilita reviżjoni ġudizzjarja indipendenti, li tkun konformi mal-każistika tal-Qorti tal-Ġustizzja tal-Komunitajiet Ewropej;

(o)

biex iħeġġeġ lill-Kunsill tas-Sigurtà u lilll-Kumitat tiegħu ta’ Kontra t-Terroriżmu ħalli jikkoperaw mal-korpi relevanti tad-drittijiet tal-bniedem tan-NU, sabiex jimmoniterjaw b’mod kontinwu l-konformità mal-obbligazzjonijiet skont id-drittijiet internazzjonali tal-bniedem u l-liġi tar-refuġjati u dik umanitarja;

(p)

biex jinsisti li l-membri kollha tan-NU jirratifikaw l-Istatut ta’ Ruma tal-Qorti Kriminali Internazzjonali (ICC), bil-membri tal-Kunsill tas-Sigurtà minn ta’ quddiem, u, fl-isfond tal-konferenza ta’ reviżjoni tal-ICC tal-2009, biex jappoġġja b’mod attiv l-isforzi biex jintlaħaq ftehim dwar id-definizzjoni pendenti tar-reat ta’ aggressjoni u l-kundizzjonijiet li skonthom il-Qorti tista’ teżerċita l-ġurisdizzjoni tagħha, kif stipulat fl-Artikolu 5(2) tal-Istatut ta’ Ruma;

(q)

biex jinkuraġġixxi l-proċess li għadu għaddej ħalli jikseb konsistenza bejn il-progress miksub fil-livell tal-pajjiż fl-implimentazzjoni tar-riforma “Delivering as One” u l-prattiki kummerċjali differenti applikati mill-kwartieri ġenerali tal-aġenziji u l-programmi tan-NU, li sa issa ostakolaw koperazzjoni u koordinazzjoni aktar mill-qrib fil-prattika;

(r)

biex jiżviluppa l-koordinazzjoni tal-UE, inkluża l-koordinazzjoni tad-donatur, fir-relazzjonijiet ta’ aġenziji, fondi u programmi tan-NU fil-livell tal-kwartieri ġenerali kif ukoll fil-livell tal-pajjiż, inkluż bil-parteċipazzjoni f’fondi li għandhom aktar minn donatur wieħed u li huma mmexxija min-NU, u biex jestendi wkoll għall-aġenziji u għall-programmi tan-NU id-djalogu mas-Segretarjat tan-NU li diġà huwa stabbilit sew;

(s)

biex jippromwovi dibattitu dwar il-Konferenza tal-Partijiet li jmiss għall-Konvenzjoni ta’ Qafas tan-NU dwar il-Bidla fil-Klima (COP15) f’Kopenħagen f’Diċembru 2009 sabiex jinħoloq kunsens dwar l-adozzjoni ta’ ftehima internazzjonali ġdida dwar il-Bidla fil-Klima għall-perjodu ta’ wara l-2012 u biex din il-ftehima tiġbor mumentum warajha; f’dan il-kuntest, biex jiġbor appoġġ għal pakkett finanzjarju u teknoloġiku immirat lejn pajjiżi li qed jiżviluppaw sabiex l-approvazzjoni tagħhom għal ftehima vinkolanti ġdida tiġi faċilitata;

(t)

biex japprova l-adozzjoni, mill-UNGA li jmiss, ta’ struttura aktar koerenti għal governanza ambjentali globali, kif propost mill-Kunsill Governattiv/Forum Globali Ministerjali dwar l-Ambjent tal-Programm Ambjentali tan-NU, sistema ta’ governanza li tkun kapaċi tħabbat wiċċha mal-isfidi ferm kbar li għad iridu jiġu;

(u)

biex imexxi d-dibattitu attwali dwar il-governanza globali, inkluża l-governanza ekonomika u finanzjarja, bil-għan li jsaħħaħ il-mandati u jtejjeb il-prattiċi tal-Fond Monetarju Internazzjonali (IMF) u tal-Bank Dinji, filwaqt li fl-istess ħin jerġa’ jagħti l-ħajja mill-ġdid lill-ECOSOC;

(v)

biex juża n-negozjati intergovernamentali li ġejjin dwar ir-riforma tal-Kunsill tas-Sigurtà, abbażi tar-regoli ta’ proċedura tal-Assemblea Ġenerali tan-NU, bħala opportunità biex issir enfasi fuq punti ta’ konverġenza u biex jinkiseb progress tanġibbli fir-rigward tal-kjarifika tal-kompetenzi tal-Kunsill tas-Sigurtà fir-rigward ta’ korpi oħrajn tan-NU, iż-żieda ta’ membri ġodda permanenti u mhux permanenti – possibbilment fuq bażi temporanja – sabiex itejbu r-rappreżentanza u l-leġittimità tal-Kunsill tas-Sigurtà, u r-reviżjoni ta’ metodi ta’ ħidma tal-Kunsill tas-Sigurtà;

(w)

biex jenfasizza li l-Unjoni Ewropea ser tibqa’ timmira fit-tul biex ikollha post fil-Kunsill tas-Sigurtà;

(x)

biex jippromwovi kundizzjonijiet għas-suċċess tal-Konferenza ta’ Reviżjoni tal-Partijiet tat-Trattat tan-Nonproliferazzjoni tal-Armi Nukleari (NPT) fl-2010, speċjalment billi jendorsja u jippromwovi l-Mudel tal-Konvenzjoni dwar l-Armi Nukleari propost; biex jikseb kunses dwar it-Trattat propost dwar il-Waqfien tal-Użu ta’ Materjal Fissili; biex jaħdem sabiex tinkiseb l-adozzjoni, mill-Konferenza dwar id-Diżarm, ta’ programm sostantiv ta’ ħidma sabiex dik l-entità tibda topera; sabiex jitratta, b’mod multilaterali u bilaterali, mal-Istati Membri tan-NU sabiex jerġgħu iniedu r-ratifika tat-Trattat Kompresniv dwar il-Projbizzjoni tat-Testijiet Nukleari; u, fl-aħħarnett, sabiex iħeġġeġ aktar sforzi lejn it-tnedija ta’ negozjati dwar Trattat dwar il-Kummerċ tal-Armi;

(y)

biex jagħmel użu sħiħ mill-importanza finanzjarja li għandu fin-NU sabiex jiżgura li l-baġit għall-2010-2011 jindirizza aħjar il-ħtiġijiet operazzjonali l-aktar bżonjużi ta’ din l-organizzazzjoni, u biex jipprovdu lis-Segretaju Ġenerali tan-NU b’aktar diskrezzjoni fl-allokazzjoni ta’ riżorsi umani skont tali ħtiġijiet u fid-dawl tad-deċiżjonijiet operazzjonali meħuda mill-korpi relevanti tan-NU, b’mod partikulari mill-Kunsill tas-Sigurtà u mill-UNGA;

(z)

biex, fil-kuntest tad-diskussjonijiet dwar reviżjoni tal-gradi ta’ evalwazzjoni għall-allokazzjoni tal-ispejjeż tan-Nazzjonijiet Uniti, jistabbilixxi rabta ċara bejn rappreżentazzjoni aħjar fost il-korpi tan-NU u tqassim aktar ġust tal-piż finanzjarju;

(aa)

biex jiżviluppa politika tal-persunal tal-UE fin-NU aktar koordinata mill-qrib, bil-għan li tinkisb aktar trasparenza u effikaċja fil-proċeduri ta’ reklutaġġ u biex jiġi żgurat li l-kundizzjonijiet ta’ reklutaġġ jibqgħu biżżejjed attraenti għaċ-ċittadini tal-UE;

(ab)

biex jeżerċita sens ta’ tmexxija globali biex iqanqal azzjoni internazzjonali għall-kisba tal-wegħidiet tal-MDGs fid-dawl tal-evidenz dejjem tiżdied li d-dinja għadha lura ferm mil-wegħdiet li saru fir-rigward tal-MDGs;

(ac)

sabiex jappoġġa l-inizjattiva tal-‘Grupp ta’ Ħidma għall-MDG’ li jimmonitorja l-impenji globali dwar l-għajnuna, il-kummerċ, it-tnaqqis tad-dejn u l-aċċess għal mediċini u teknoloġiji essenzjali;

(ad)

sabiex jappella għall-organizzazzjoni, b’urġenza, tal-konferenza ta’ livell għoli tan-NU dwar il-kriżi finanzjarja u ekonomika dinjija u l-impatt tagħha fuq l-iżvilupp, kif kien miftiehem waqt il-Konferenza ta’ Doha dwar il-Finanzjament għall-Iżvilupp li saret fl-2008;

(ae)

sabiex ikompli d-diskussjonijiet dwar l-inizjattiva “Business Call to Action” u l-impenji għall-fondi u għall-appoġġ favur l-isforzi għall-MDG, inklużi kif flimkien ma’ dawn tista’ tiżdied bl-istess rata r-responsabilità min-naħa tas-settur korporattiv;

(af)

sabiex, pari passu ma’ dawn l-inizjattivi kollha, jaderixxi mal-prinċipji eżistenti fid-Dikjarazzjoni ta’ Pariġi dwar l-Effettività tal-Għajnuna, u mal-Aġenda ta’ Akkra għall-Azzjoni, sabiex tittejjeb il-kwalità u d-distribuzzjoni tal-għajnuna;

(ag)

sabiex juża l-okkażjoni tal-64 UNGA sabiex isir rapport dwar il-livell sa fejn intlaħqu l-punti ta’ riferenza stipulati fl-Aġenda tal-UE għall-Azzjoni dwar l-MDGs;

(ah)

sabiex jistieden lill-Kummissjoni biex tirrapporta dwar il-progress li sar fl-implimentazzjoni tal-kuntratti tal-MDGs u biex tħeġġeġ lid-donaturi l-oħra biex jipprovdu aktar għajnuna min-naħa tagħhom, fis-sura ta’ appoġġ baġitarju, fuq bażi prevedibbli u fit-tul;

(ai)

biex iħeġġeġ lill-Istati Membri tal-UE jkomplu jimxu mal-impenn tagħhom ta’ multilateriżmu effikaċi billi jiżguraw li ssir ir-ratifika sistematika u mgħaġġla tal-konvenzjonijiet u tat-trattati tan-NU;

(aj)

biex jappoġġja d-deċiżjoni meħuda mill-UNGA fir-riżoluzzjoni tagħha dwar il-“Koperazzjoni bejn in-Nazzjonijiet Uniti u l-Unjoni Interparlamentari” imsemmija hawn li tipprevedui punt separat dwar il-koperazzjoni bejn l-Organizzazzjoni tan-Nazzjonijiet Uniti, il-parlamenti nazzjonali u l-Unjoni Interparlamentari fl-aġenda proviżorja tal-65 UNGA, sakemm it-titolu tal-punt jinkludi ukoll referenza għal “assemblei parlamentari reġjonali”, u jippromwovi dibattitu dwar kif il-membri parlamentari, il-parlamenti nazzjonali u l-assemblei parlamentari reġjonali jista’ jkollhom rwol aktar attiv fin-Nazzjonijiet Uniti;