52008DC0403

[pic] | KUMMISSJONI TAL-KOMUNITAJIET EWROPEJ |

Brussel 26.6.2008

KUMM(2008) 403 finali

KOMUNIKAZZJONI TAL-KUMMISSJONI

dwar notifiki ta' posponimenti ta' skadenzi ta' kisba u eżenzjonijiet mill-obbligu li jiġu applikati ċerti valuri ta' limitu skond l-Artikolu 22 tad-Direttiva 2008/50/KE dwar il-kwalità ta' l-arja ta' l-ambjent u arja aktar nadifa għall-Ewropa

{SEC(2008)2132}

KOMUNIKAZZJONI TAL-KUMMISSJONI

dwar notifiki ta' posponimenti ta' skadenzi ta' kisba u eżenzjonijiet mill-obbligu li jiġu applikati ċerti valuri ta' limitu skond l-Artikolu 22 tad-Direttiva 2008/50/KE dwar il-kwalità ta' l-arja ta' l-ambjent u arja aktar nadifa għall-Ewropa

1. Daħla

1. L-Artikolu 22 tad-Direttiva 2008/50/KE tal-Parlament Ewropew u tal-Kunsill tal-21 ta' Mejju 2008 dwar il-kwalità ta' l-arja ta' l-ambjent u arja aktar nadifa għall-Ewropa[1], minn issa 'l quddiem imsejħa 'id-Direttiva l-ġdida', jagħti lill-Istati Membri l-possibbiltà li jinnotifikaw lill-Kummissjoni li, soġġetti għall-valutazzjoni tal-Kummissjoni, huma beħsiebhom jipposponu l-iskadenza li jiksbu l-konformità mal-valuri ta' limitu għad-diossidu tan-nitroġenu jew il-benżin f'żoni jew agglomerazzjonijiet fejn dawn il-valuri ta' limitu ma jistgħux jintlaħqu sa l-1 ta' Jannar 2010, jew li jilħqu l-kundizzjonijiet biex ikunu eżenti mill-obbligu li japplikaw il-valuri ta' limitu għall-partiċelli (PM10). Jekk il-Kummissjoni tqis li l-kundizzjonijiet għal posponiment jew eżenzjoni ma ntlaħqux, tista' tqajjem oġġezzjonijiet fi żmien disa' xhur minn meta taslilha n-notifika. L-Istati Membri għandhom l-oneru tal-prova li dawn il-kundizzjonijiet ntlaħqu u għalhekk iridu jipprovdu lill-Kummissjoni t-tagħrif kollu rilevanti meħtieġ minnha biex twettaq il-valutazzjoni.

2. L-għan ta' din il-Komunikazzjoni huwa li tiffaċilita t-tħejjija, s-sottomissjoni u l-valutazzjoni preċiża tan-notifiki, billi turi l-interpretazzjoni tal-Kummissjoni tal-kundizzjonijiet stabbiliti fl-Artikolu 22 u tipprovdi gwida lill-Istati Membri dwar it-tagħrif li jridu jipprovdu u l-format li jrid jintuża.

2. L-isfond

3. Il-biċċa l-kbira ta' l-Istati Membri għadhom ma laħqux il-valuri ta' limitu għall-PM10 minkejja li dawn kienu diġà saru obbligatorji fl-1 ta' Jannar 2005[2]. L-istimi jagħtu x'jifhem li konċentrazzjonijiet f'aktar minn 40% taż-żoni u agglomerazzjonijiet fil-Komunità ta' PM10 attwalment jaqbżu l-valur tal-limitu ta' kuljum ta' 50 µg/m3 għal aktar minn 35 jum kull sena kalendarja. F'aktar minn 15% ta' dawn, il-konċentrazzjonijiet jaqbżu wkoll il-valur ta' limitu ta' 40 µg/m3 għall-PM10. Valutazzjonijiet attwali, tendenzi u projezzjonijiet mudell jindikaw li tista' tinħoloq qagħda bħal din fl-2010, meta l-valuri ta' limitu għad-diossidu tan-nitroġenu jsiru obbligatorji[3]. Fir-rigward tal-benżin, li l-valuri ta' limitu tiegħu wkoll se jsiru obbligatorji fl-2010[4], il-projezzjonijiet juru li l-problema hija anqas gravi.

4. Filwaqt li ġew identifikati nuqqasijiet fl-implimentazzjoni tad-direttivi dwar il-kwalità ta' l-arja, li ġew ukoll diskussi ma' l-Istati Membri, l-iskala tal-problema turi li fatturi li jinsabu lilhinn mill-kontroll dirett jew immedjat ta' l-Istati Membri jistgħu jkunu parti mir-raġuni ta' non-konformità. L-adozzjoni u l-implimentazzjoni ta' miżuri tal-Komunità li jindirizzaw l-emissjonijiet f'ras il-għajn, bħall-implimentazzjoni progressiva ta' standards ta' emissjoni aktar stretti għal vetturi ġodda, qed jikkontribwixxu għat-titjib tal-kwalità ta' l-arja kemm illum il-ġurnata kif ukoll fil-ġejjieni. Madankollu, il-miżuri tal-Komunità waħedhom ma jistgħux jiżguraw konformità xierqa u fil-ħin mal-valuri limiti ma' l-UE kollha. Fil-biċċa l-kbira tal-każijiet, jeħtieġ li jkun hemm aktar azzjoni fil-livelli nazzjonali, reġjonali u lokali wkoll, b'mod partikolari f'żoni urbani fejn l-espożizzjoni tal-bniedem hija l-ogħla.

5. Huwa importanti li jiġi żgurat trattament indaqs f'dik li hija implimentazzjoni ta' leġiżlazzjoni tal-Komunità. Żoni fejn saru sforzi sinifikanti biex tintlaħaq konformità mal-valuri ta' limitu sad-data stabbilita m'għandhomx isibu ruħhom fi żvataġġ kompetittiv ma' żoni fejn, minkejja l-ħtieġa, ma sar ebda sforz.

6. Il-Kummissjoni se tivvaluta bir-reqqa kull notifika bi tqabbil mal-kundizzjonijiet stipulati fl-Artikolu 22 u tqajjem objezzjonijiet jekk dawn il-kundizzjonijiet ma ntlaħqux. Il-biċċa l-kbira tat-tagħrif meħtieġ għall-valutazzjoni tan-notifiki se jiġi mill-pjanijiet dwar il-kwalità ta' l-arja li jridu jintbagħtu man-notifika.

7. Prassi stabbilita sewwa ta' kif jintbagħat it-tagħrif minimu meħtieġ fil-pjanijiet dwar il-kwalità ta' l-arja hija ddefinita bid-Deċiżjoni tal-Kummissjoni 2004/224/KE ta' l-24 ta' Frar 2004 li tistabbilixxi arranġamenti għas-sottomissjoni ta' tagħrif dwar pjanijiet jew programmi meħtieġa skond id-Direttiva tal-Kunsill 96/62/KE fir-rigward ta' valuri ta' limitu għal ċerti sustanzi ta' tniġġis fl-arja ta' l-ambjent[5]. Minħabba l-ammont kbir ta' tagħrif li jrid jiġi pproċessat għall-fini tan-notifiki, format komuni huwa mezz importanti biex jiġi żgurat trattament effiċjenti u ndaqs waqt il-valutazzjoni tan-notifiki, u għalhekk qed jiġi rakkomandat li l-Istati Membri jużaw il-formoli stabbiliti fid-Dokumenti ta' Ħidma tas-Servizzi (SEC(...) ...) meta jibagħtu n-notifiki tagħhom. Dawn il-formoli huma bbażati fuq id-Deċiżjoni 2004/224/KE u jiddevjaw minn din id-Deċiżjoni sa fejn huwa meħtieġ biss biex jiżguraw li t-tagħrif essenzjali marbut mal-kundizzjonijiet speċifiċi għall-posponimenti jew l-eżenzjonijiet ikun kopert. Huma u jimtlew il-formoli, għandu jingħata biss tagħrif disponibbli b'mod raġonevoli għall-finijiet tal-pjan dwar il-kwalità ta' l-arja jew bħala elementi ta' sostenn biex jintlaħqu l-kundizzjonijiet fil-każi speċifiċi. Il-ħsieb huwa li l-Istati Membri ma jintalbux jiżviluppaw data ġdida, pereżempju permezz ta' mudelli. Ir-referenzi għall-formoli speċifiċi huma stabbiliti f'din il-gwida biex tiġi speċifikata l-ħolqa bejn it-tagħrif meħtieġ u l-kundizzjonijiet.

3. Proċedura ta' notifika

8. In-notifiki tal-bidu mistennija jikkonċernaw l-aktar il-PM10, li l-estensjonijiet potenzjali għalihom se jiġu fi tmiem tliet snin wara d-dħul fis-seħħ tad-Direttiva, jiġifieri fi […] ta' Ġunju 2011. Minħabba l-livelli eżistenti ta' non-konformità mal-valuri tal-limitu għall-PM10, huwa importanti li n-notifiki jintbagħtu kemm jista' jkun malajr wara li tidħol fis-seħħ id-Direttiva għal żoni u agglomerazzjonijiet fejn l-Istati Membri huma tal-fehma li l-kundizzjonijiet intlaħqu. Fit-tħejjija tan-notifiki, iżda, trid tingħata attenzjoni li jkun żgurat li d- data meħtieġa li tipprova l-konformità mal-kundizzjonijiet tkun kompluta.

9. Fir-rigward tad-dijossidu tan-nitroġenu u l-benżin, il-valuri ta' limitu ma jistgħux jinqabżu mill-1 ta' Jannar 2010, l-aktar tard. Fejn il-kundizzjonijiet jintlaħqu, l-iskadenza biex tinkiseb il-konformità tista' tiġi posposta sa meta jkun meħtieġ biex tinkiseb il-konformità mal-valuri tal-limitu, iżda mhux aktar tard mill-2015. L-għan għandu jkun li l-perjodu ta' posponiment jinżamm qasir kemm jista' jkun. Jekk eċċedenza tal-valuri tal-limitu għad-dijossidu tan-nitroġenu jew il-benżin isseħħ għall-ewwel darba biss fl-2011 jew aktar tard, il-posponiment ta' l-iskadenza ma jkunx aktar possibbli. F'każi bħal dawn japplika t-tieni sottoparagrafu ta' l-Artikolu 23(1) tad-Direttiva l-ġdida.

10. Deċiżjonijiet ta' posponiment jew eżenzjoni japplikaw għal żoni jew agglomerazzjonijiet individwali. In-notifiki jridu, iżda, jintbagħtu uffiċjalment lill-Kummissjoni mir-Rappreżentant Permanenti ta' l-Istat Membru kkonċernat[6] jiġifieri mhux direttament mill-awtoritajiet reġjonali jew lokali kkonċernati.

11. In-notifika ta' eżenzjoni jew posponiment lill-Kummissjoni u l-valutazzjoni sussegwenti mill-Kummissjoni ta' din in-notifika mhumiex soġġetti għall-kundizzjoni li l-Artikolu 22 tad-Direttiva 2008/50/KE irid l-ewwel jiġi traspost fil-liġi nazzjonali.

12. Il-Kummissjoni se jkollha disa' xhur biex tivvaluta n-notifiki u dawn jibdew mill-jum wara r-reġistrazzjoni uffiċjali mill-Kummissjoni ta' notifika uffiċjali u kompluta. Ittra li tikkonferma r-reġistrazzjoni uffiċjali tan-notifika tal-bidu se tintbagħat lill-Istat Membru kkonċernat. Fejn meħtieġ, tintbagħat ittra li fiha jiġi speċifikat kull tagħrif li l-Kummissjoni tikkunsidra nieqes u li għalhekk ikun għad irid jintbagħat fi żmien skadenza speċifikata, u wara dan jibda l-perjodu ta' valutazzjoni. Jekk it-tagħrif mitlub ma jintbagħatx sa l-iskadenza stabbilita, il-Kummissjoni tirriżerva d-dritt li tqajjem objezzjonijiet kontra l-aspetti tan-notifika li mhumiex sostanzjati biżżejjed u, għal raġunijiet ta' ċertezza ġuridika, ikun xi jkun il-każ, fi żmien disa' xhur mir-reġistrazzjoni uffiċjali tan-notifika inizjali. Il-Kummissjoni tista' wkoll tadotta deċiżjoni f'każi fejn ma jitqajmux objezzjonijiet.

13. Tista' tintbagħat notifika waħda għal bosta żoni u għal bosta sustanzi ta' tniġġis. Iżda, kull żona u sustanza ta' tniġġis se tiġi vvalutata individwalment. Huwa għalhekk importanti li t-tagħrif pprovdut mill-Istat Membru jintrabat mingħajr ambigwità maż-żona u s-sustanza ta' tniġġis ikkonċernati. L-istess jista' jingħad f'każijiet fejn miżura waħda meħuda fuq livell nazzjonali tista' tindirizza bosta żoni u tinfluwenza konċentrazzjonijiet ta' bosta sustanzi ta' tniġġis.

4. Kundizzjonijiet u ħtiġijiet ta' tagħrif għal estensjoni

4.1. Sena ta' referenza

14. Fir-rigward ta' notifiki dwar il-PM10 huwa xieraq, fil-prinċipju, li l-ewwel sena ta' eċċedenza, jiġifieri l-2005, tittieħed bħala s-sena ta' referenza biex jiġi vvalutat jekk il-kundizzjonijiet humiex sodisfatti. Jekk jitqies li huwa aktar xieraq, tista' tittieħed sena aktar 'il quddiem (pereżempju l-2007) bħala s-sena ta' referenza li minnha jsiru projezzjonijiet biex jintwera li se tinkiseb il-konformità sa Ġunju ta' l-2011. L-istess sena trid imbagħad tittieħed ukoll bħala s-sena ta' referenza fil-pjan mehmuż dwar il-kwalità ta' l-arja. Iżda, biex jintwera li l-miżuri kollha xierqa ttieħdu biex tinkiseb il-konformità sa l-iskadenza inizjali, huwa essenzjali li tintuża biss data rilevanti għall-ispjegazzjoni ta' l-eċċedenza fl-2005.

15. Għal notifiki dwar id-dijossidu tan-nitroġenu jew il-benżin mibgħuta qabel l-iskadenza inizjali għall-ksib tal-konformità (l-2010), is-sena 2008 se titqies is-sena ta' referenza. Għal notifiki mibgħuta wara l-iskadenza inizjali għall-ksib tal-konformità, l-Istati Membri għandhom jużaw l-2010 bħala s-sena ta' referenza.

4.2. Tqassim ta' għejun

16. L-Istati Membri jridu jipprovdu tagħrif dwar l-oriġini tat-tniġġis li jikkontribwixxi għall-eċċedenza. Tqassim kwantitattiv ta' l-għejun għall-qagħda ta' eċċedenza (jiġifieri eċċedenza tal-valur ta' limitu ta' kuljum jew ta’ kull sena) fis-sena ta' referenza huwa għalhekk meħtieġ għal kull żona jew agglomerazzjoni nnotifikata. Il-Kummissjoni tagħraf li l-livell ta' dettall disponibbli jista' jvarja bejn iż-żoni individwali u l-Istati Membri, iżda billi t-tqassim ta' l-għejun hija konsiderazzjoni ewlenija, kemm għad-determinazzjoni tat-tip u l-livell ta' mira tal-miżuri ta' tnaqqis ta' tniġġis, kif ukoll għall-valutazzjoni tal-Kummissjoni tal-kundizzjonijiet għall-posponimenti jew l-eżenzjonijiet, huma meħtieġa stimi tal-kontribut magħmul minn għejun individwali għall-eċċedenza.

17. It-tqassim ta' l-għejun irid, b'mod partikolari, jirrifletti l-kontribut reġjonali, urban u lokali fi ħdan l-Istat Membru, iżda wkoll il-kontributi transkonfinali. Fir-rigward tal-kontributi urbani u lokali, trid ssir qasma oħra sabiex jiġu identifikati xi għejun sinifikanti bħat-trasport (traffiku fuq it-triq u dak marittimu, fejn rilevanti), l-industrija (inkluża produzzjoni ta' sħana u enerġija), l-agrikoltura, għejun kummerċjali u residenzjali. Għall-PM10, huwa wkoll importanti li jiġu indikati għejun naturali sinifikanti[7].

18. L-Istati Membri jistgħu jagħżlu jekk jużawx id-dijossidu tan-nitroġenu jew l-ossidi tan-nitroġenu bħala bażi ta' tqassim ta' għejun, kif ikkunsidrat xieraq fir-rigward ta' l-eċċedenza, sakemm l-għażla tibqa' segwita b'mod konsistenti u tkun riflessa fil-kwantifikazzjoni ta' l-impatt ta' miżuri individwali jew gruppi ta' miżuri, billi titħalla ssir valutazzjoni xierqa tal-kundizzjonijiet mill-Kummissjoni.

4.3. Konformità matul l-estensjoni

19. Bi qbil ma' l-Artikolu 22(3) tad-Direttiva l-ġdida, il-konformità mal-valuri ta' limitu fiż-żoni u l-agglomerazzjonijiet li għalihom tapplika deċiżjoni ta' posponiment jew eżenzjoni se tkun ivvalutata fir-rigward tal-valuri ta' limitu flimkien ma' l-ogħla marġini ta' tolleranza stabbilit fl-Anness XI matul l-estensjoni.

20. Għall-2011, il-konformità mal-valuri ta' limitu annwali għall-PM10 se tiġi vvalutata bi tqabbil mal-valur ta' limitu flimkien mal-marġini ta' tolleranza għas-sena kalendarja kollha. Fir-rigward tal-valuri ta' limitu ta' kuljum, il-konformità għall-2011 se tkun ivvalutata fuq bażi ta' minn jum għal jum. B'mod aktar preċiż, l-għadd totali ta' eċċedenzi, kemm jekk tal-valur ta' limitu flimkien mal-marġini ta' tolleranza u kemm jekk tal-valur ta' limitu waħdu, ma jistax jaqbeż il-35 jum li huma permessi għal dik is-sena kalendarja.

4.4. L-ewwel kundizzjoni - miżuri biex tinkiseb konformità sad-data inizjali ta' ksib ta' konformità

21. L-Artikolu 22(1) tad-Direttiva l-ġdida jistipula li l-iskadenzi għall-kisba tal-valuri ta' limitu għad-dijossidu tan-nitroġenu u l-benżin jistgħu jiġu posposti fejn ma tistax tinkiseb konformità mal-valuri ta' limitu sad-data ta' ksib ta' konformità, jiġifieri l-1 ta' Jannar 2010. Biex jiġi ddeterminat jekk il-konformità tistax tinkiseb sa din id-data, l-Istati Membri huma mitluba jindikaw il-miżuri meħuda qabel l-2010 skond l-Artikolu 4(1) tad-Direttiva 1999/30/KE u l-Artikolu 3(1) tad-Direttiva 2000/69/KE, u jispjegaw ir-raġunijiet għaliex dawn il-miżuri ma wasslux għal konformità[8]. Mill-objettivi tal-leġiżlazzjoni in ġenerali dwar il-kwalità ta' l-arja wieħed jifhem li trid tittieħed azzjoni xierqa fil-perjodu ta' qabel id-data li fiha l-valuri ta' limitu jsiru obbligatorji. Huwa biss jekk jista' jiġi ppruvat li saru sforzi biex tinkiseb il-konformità li l-Istati Membri jistgħu jikklejmjaw, skond l-Artikolu 22(1), li l-konformità mal-valuri ta' limitu ma jistgħux jinkisbu sa l-iskadenzi.

22. Għall-PM10, l-Istati Membri , skond l-Artikolu 22(2), iridu juru li ttieħdu l-miżuri kollha xierqa fil-livell nazzjonali, reġjonali u lokali biex tinkiseb il-konformità mal-valuri ta' limitu sa l-iskadenza inizjali stabbilita, jiġifieri l-1 ta' Jannar 2005. Irid għalhekk jingħata tagħrif dwar il-miżuri li ttieħdu bil-ħsieb li tinkiseb il-konformità sa din id-data. Biex il-Kummissjoni tkun tista' tiddetermina jekk dawn il-miżuri kinux xierqa, l-Istati Membri jridu jidentifikaw l-għejun ta' tniġġis li dawn il-miżuri kienu maħsuba jindirizzaw u jispjegaw sa fejn dawn il-miżuri fil-fatt ikkontribwew fit-tnaqqis tal-konċentrazzjonijiet. Iridu jingħataw spjegazzjonijiet dwar kull eċċedenza tal-valuri ta' limitu li tibqa'[9]. Dawn l-ispjegazzjonijiet iridu jinkludu tagħrif dwar jekk l-eċċedenza tistax tiġi attribwita lil xi kundizzjonijiet speċifiċi għall-eżenzjoni, jiġifieri karatteristiċi ta' dispersjoni speċifiċi għas-sit, kundizzjonijiet ta' klima ħżiena jew kontributi transkonfinali.

23. Fil-valutazzjoni tagħha, il-Kummissjoni se tqis ukoll l-impatt tat-traspożizzjoni korretta u l-implimentazzjoni tad-Direttivi elenkati fit-Taqsima 2 ta’ Parti B ta’ l-Anness XV[10] u tad-disponibbiltà f'waqtha tal-pjan jew programm skond l-Artikolu 8(3) tad-Direttiva tal-Kunsill 96/62/KE dwar il-valutazzjoni u l-ġestjoni tal-kwalità ta' l-arja ta' l-ambjent[11].

4.5. It-tieni kundizzjoni - miżuri biex tinkiseb il-konformità qabel l-iskadenza l-ġdida

24. L-Istati Membri jridu jipprovdu previżjonijiet realistiċi u affidabbli ta' kif il-konċentrazzjonijiet x'aktarx se jonqsu bil-ħsieb li tinkiseb konformità mal-valuri ta' limitu qabel l-iskadenza l-ġdida. Dawn il-previżjonijiet għandhom juru wkoll li l-eċċedenzi matul l-estensjoni se jibqgħu taħt il-valur ta' limitu flimkien mal-marġini ta' tollerenza stipulata fl-Anness XI tad-Direttiva.

25. Il-previżjonijiet iridu jkunu bbażati fuq tqabbil bejn il-valuri ta' limitu li jridu jinkisbu u l-livelli ta' bażi pproġettati għall-qagħda ta' eċċedenza f'żona jew agglomerazzjoni. Il-livell ta' bażi jrid juri stima tal-konċentrazzjonijiet sa l-iskadenza l-ġdida jekk ma jittiħdux miżuri oħra addizzjonali ta' tnaqqis, barra minn dawk meħuda biex tinkiseb il-konformità sa l-iskadenza inizjali u l-miżuri eżistenti, u dawk fil-pjan, tal-Komunità. Id-distakk bejn il-valur ta' limitu applikabbli u l-livell ta' bażi se jservi bħala indikatur għall-impatt u ż-żmien mistenni tal-miżuri addizzjonali meħtieġa biex jispiċċa dak id-distakk sa l-iskadenza l-ġdida[12].

26. Fl-identifikazzjoni tal-miżuri meħtieġa, iridu jitqiesu l-miżuri elenkati fit-Taqsima 3 tal-Parti B ta' l-Anness XV, kif stipulat fid-Direttiva. Jekk xi wħud minn dawk il-miżuri mhux se jiġu implimentati, minkejja li huma rilevanti għall-għejun identifikati, trid tingħata ġustifikazzjoni xierqa[13].

27. Fil-valutazzjoni tal-previżjonijiet, irid jitqies ukoll l-impatt potenzjali, fiż-żona kkonċernata, ta' miżuri eżistenti u oħrajn ippjanati mill-Komunità, u l-Istati Membri huma mitluba jinkludu l-valutazzjoni tagħhom ta' dan l-impatt fil-livell ta' bażi. Il-miżuri ppjanati tal-Komunità huma dawk li jidhru fl-Istqarrija maħruġa mill-Kummissjoni ppubblikata flimkien mad-Direttiva. Il-Kummissjoni beħsiebha tivvaluta l-kwantifikazzjoni pprovduta mill-Istati Membri u, fejn meħtieġ, is-suppożizzjonijiet li hemm wara din il-kwantifikazzjoni, u twettaq il-valutazzjoni tagħha stess ta' dan il-kriterju fuq din il-bażi. Fir-rigward tal-miżuri eżistenti, il-valutazzjoni se tiffoka fuq l-istatus ta' l-implimentazzjoni tad-Direttivi elenkati fil-Parti B ta' l-Anness XV[14].

4.6. Kundizzjoni speċifika għall-PM 10 : karatteristiċi ta' dispersjoni speċifiċi għas-sit, kundizzjonijiet ta' klima ħżiena jew kontributi transkonfinali

4.6.1 Karatteristiċi ta' dispersjoni speċifiċi għas-sit

28. Il-karatteristiċi ta' dispersjoni speċifiċi għas-sit huma fatturi li jaffettwaw id-dispersjoni tas-sustanzi ta' tniġġis fuq skala lokali, prinċipalment fil-livell ta' triq. Il-bini lokali jew strutturi topografiċi fuq skala żgħira jwasslu għal sustanzi ta' tniġġis li jinħelsu lokalment, jakkumulaw f'żona limitata, u jwasslu għal konċentrazzjonijiet għolja. Żoni bħal dawn jinsabu normalment fl-hekk imsejħa "street canjons". Il-kundizzjonijiet ta' dispersjoni speċifiċi għas-sit jistgħu jiġu kklejmjati biss fejn jista' jiġi ppruvat li l-eċċedenza sseħħ lokalment f'żoni speċifiċi bħal dawn u mhux bnadi oħra, bħal fl-isfond urban jew matul toroq, f’żona jew agglomerazzjoni bl-istess kwalità ta' arja, fejn id-densità tal-bini hija anqas.

29. F'żoni fejn hemm sitwazzjonijiet bħal dawn li ġejjin, huwa kkunsidrat li jeżistu karatteristiċi ta' dispersjoni speċifiċi għas-sit:

(a) serje ta' binjiet b'ħafna sulari tul iż-żewġ naħat tat-triq;

(b) il-medja ta' l-għoli tal-bini fuq tul ta' mill-inqas 100 metru trid tkun akbar mill-wisa' kollha tat-triq diviża b'1.5[15].

30. Biex jiġi ppruvat li l-eċċedenza hija limitata għal żona li fiha hemm karatteristiċi ta' dispersjoni speċifiċi għas-sit, trid tintuża data minn stazzjonijiet ta' kontroll tat-traffiku urban barra minn dik iż-żona jew, fejn xieraq, ir-riżultati minn mudelli ta' dispersjoni fuq skala żgħira[16]. Għandha tkun ipprovduta mappa taż-żona li turi l-istazzjonijiet differenti ta' kejl u ż-żona ta' eċċedenza, fejn din tkun disponibbli[17].

31. Jekk jintużaw indikaturi oħra biex jiġi ppruvat li l-eċċedenza hija limitata għal żona li fiha hemm karatteristiċi ta' dispersjoni speċifiċi għas-sit, iridu jingħataw ir-raġunijiet, u jrid jiġi ppruvat li l-użu ta' dawk l-indikaturi jipproduċi riżultati ekwivalenti.

4.6.2 Kundizzjonijiet ta' klima ħżiena

32. Jitqies li jeżistu kundizzjonijiet ta' klima ħżiena meta l-kundizzjonijiet meteoroloġiċi fuq medda twila ta' żmien u l-kundizzjonijiet topografiċi jaffettwaw id-dilwizzjoni tas-sustanzi ta' tniġġis meħlusa lokalment, u b'hekk iġibu konċentrazzjonijiet għoljin.

33. F'żoni fejn tista' tiġi ppruvata l-preżenza ta' fatturi bħal dawn, jitqies li jeżistu kundizzjonijiet ta' klima ħżiena:

(a) it-topografija lokali sa dik reġjonali, jiġifieri lokazzjonijiet f'widien jew dawk imdawra b'muntanji għoljin;

(b) dilwizzjoni żgħira ta' sustanzi ta' tniġġis meħlusa lokalment minħabba veloċitajiet baxxi tar-riħ;

(c) taħlit vertikali, jiġifieri dilwizzjoni, li jiġi minn parametri meteoroloġiċi marbuta ma' turbolenza mekkanika u termali ta' l-atmosfera;

(d) mases ta' arja li jiġu mill-oċean flok mill-kontinent; mases ta' arja kontinentali huma normalment marbuta ma’ kundizzjonijiet ta' dispersjoni ħżiena (inverżjoni ta' temperatura u veloċità baxxa tar-riħ).

34. Il-karatteristiċi tal-klima ġenerali, bħat-temperatura, il-preċipitazzjoni jew is-silġ, li ma jinfluwenzawx direttament id-dispersjoni tas-sustanzi ta' tniġġis iżda li jistgħu jwasslu għal attivitajiet speċifiċi mill-bniedem u b'hekk jinfluwenzaw il-livell ta' l-emissjonijiet, bħat-tisħin fid-djar, il-ġenerazzjoni tal-kurrent għat-tisħin jew il-kondizzjonament ta' l-arja, jew l-użu ta' tajers bl-istadds, ma jitqisux bħala kundizzjonijiet ta' klima ħżiena għall-fini tad-Direttiva l-ġdida.

35. L-akkumulu ta' tniġġis f'żoni affettwati minn kundizzjonijiet ta' klima ħżiena ġeneralment iseħħ f'temp sabiħ. Indikazzjoni ta' medja annwali baxxa ta' veloċità tar-riħ, taħt 1.5 m/s f'żoni bħal dawn, hija għalhekk xierqa biex jiġi ppruvat li din il-kundizzjoni hija sodisfatta. Jistgħu jintużaw ukoll indikaturi oħra apparti mill-veloċità medja tar-riħ, sakemm tingħata ġustifikazzjoni.

36. Biex jikklejmjaw kundizzjonijiet ta' klima ħżiena, l-Istati Membri jridu juru li l-valuri ta' limitu ta' kuljum jinqabżu l-aktar meta jkun hemm il-kundizzjonijiet ta' klima ħżiena deskritti . Din il-korrelazzjoni tista' tiġi ppruvata mill-konċentrazzjonijiet ta' PM10 u mill-veloċitajiet medji tar-riħ imkejla fi ġranet meta l-valur ta' limitu jinqabeż, ta' l-inqas għas-sena ta' referenza[18].

4.6.3 Kontributi transkonfinali

37. Il-kontributi transkonfinali jseħħu fejn il-kundizzjonijiet topografiċi u meteoroloġiċi jippermettu l-ġarr ta' tniġġis antropoġeniku li joriġina minn barra l-Istat Membru, u b'hekk jiffurmaw konċentrazzjonijiet għolja. Dawn il-kontributi jistgħu joriġinaw jew qrib ħafna ta' żoni u agglomerazzjonijiet qrib ta' fruntiera nazzjonali (tniġġis transkonfinali ta' medda qasira) jew minn distanzi aktar 'il bogħod ta' madwar 100 kilometru jew aktar (tniġġis transkonfinali ta' medda twila).

38. It-tniġġis transkonfinali ta' medda twila jseħħ l-aktar fi pjanuri jew art mhux muntanjuża ta' sikwit soġġetta għal akkumulu ta' sustanzi ta' tniġġis li jiġu trasferiti bil-fenomenu ta' l- advection fil-mases kontinentali ta' l-arja. Konċentrazzjonijiet għolja fil-baċiri naturali jew widien jew għar-rdoss tal-muntanji ġeneralment mhumiex affettwati minn dawn il-kontributi.

39. It-tniġġis jista' joriġina minn sors wieħed lilhinn mill-fruntiera, minn Stat Membru wieħed jew minn aktar Stati Membri flimkien, mit-traffiku marittimu jew minn għejn barra mill-Komunità.

40. L-Istati Membri li jikklejmjaw kontribut transkonfinali jridu jindikaw jekk sarux konsultazzjonijiet ma' l-Istat Membru fejn ikun oriġina t-tniġġis, skond l-Artikolu 8(6) tad-Direttiva 96/62/KE (Artikolu 25 tad-Direttiva l-ġdida). Jekk ma jseħħu ebda konsultazzjonijiet bħal dawn, minkejja li l-għajn tat-tniġġis tkun magħrufa, l-Istat Membru kkonċernat jista' jitqies li ma jkunx ħa l-miżuri kollha xierqa biex jilħaq l-iskadenza oriġinali. Jekk it-tniġġis joriġina f'bosta Stati Membri jew f'pajjiżi terzi u jkun ċar li ma setgħux jinstabu soluzzjonijiet effettivi b'konsultazzjonijiet bilaterali, id-dritt ta' l-Istat Membru għal estensjoni ma jkunx affettwat min-nuqqas ta' konsultazzjonijiet[19].

41. Kontributi transkonfinali jistgħu jiġu vvalutati jew b' kejl jew permezz ta' mudelli. Valutazzjonijiet bħal dawn, fejn xieraq, iridu jkunu supplementati b'analiżi tat-trajettorja b'lura u bi tqassim ta' għejun ta' eċċedenzi individwali. Metodi bħal dawn li ġejjin urew li huma effiċjenti fil-prova tal-kontributi transkonfinali:

(a) mudelli ta' dispersjoni fl-atmosfera b'riżoluzzjoni xierqa spazjali u temporali ta' kuljum;

(b) analiżi ta' data ta' kejl ta' kuljum, li tidentifika kontributi transkonfinali permezz ta' kejl minn siti ta' monitoraġġ rappreżentattivi, pereżempju siti rurali ta' sfond li jinsabu favur ir-riħ fl-erja ta' madwar iż-żona jew l-agglomerazzjoni li fiha tkun instabet l-eċċedenza;

(c) Mudell EMEP[20].

42. Biex jiġu kklejmjati kontributi transkonfinali bħala kawża għall-eċċedenza jrid jiġi ppruvat li, f'każijiet fejn il-limitu annwali jinqabeż, ġaladarba jitnaqqas il-kontribut transkonfinali, il-konċentrazzjoni medja annwali tinsab taħt il-valur ta' limitu. Jekk jinqabeż il-valur ta' limitu ta' kuljum, irid jiġi ppruvat li, ġaladarba jitnaqqas il-kontribut transkonfinali fi ġranet speċifiċi, il-konċentrazzjonijiet medji ta' kuljum jibqgħu taħt il-valur ta' limitu[21].

43. Jekk jintużaw indikaturi oħra biex jiġi ppruvat li l-kontributi transkonfinali huma l-kawża ta' l-eċċedenza, iridu jingħataw ir-raġunijiet u jrid jiġi ppruvat li l-użu ta' dawn l-indikaturi jipproduċi riżultati ekwivalenti.

5. Pjan dwar il-kwalità ta' l-arja u rekwiżiti ta' tagħrif addizzjonali

44. In-notifiki jridu jkunu akkumpanjati minn pjan dwar il-kwalità ta' l-arja għaż-żona jew l-agglomerazzjoni kkonċernata. Il-pjan irid ikun konformi mar-rekwiżiti stabbiliti fl-Artikolu 23 u f'Parti A ta' l-Anness XV. It-tagħrif mitlub skond id-Direttiva l-ġdida jixbah fil-biċċa l-kbira lil dak mitlub skond id-Direttiva 96/62/KE. Bħala konsegwenza, l-Istati Membri li diġà għandhom pjan jew programm fis-seħħ jistgħu jużawh għall-finijiet tan-notifika, sakemm jilħaq il-kriterji stabbiliti fil-Parti A ta' l-Anness XV u jkun aġġornat kif xieraq biex jiġi żgurat li l-konformità mal-valuri ta' limitu tinkiseb qabel l-iskadenza l-ġdida.

[1] ĠU L 152, 11.06.2008, p. 1.

[2] Id-Direttiva tal-Kunsill 1999/30/KE dwar il-valuri ta' limitu tad-dijossidu tal-kubrit, tad-dijossidu tan-nitroġenu u l-ossidi tan-nitroġenu, materji f' partiċelli u ċomb fl-arja ambjentali (ĠU L 163, 29.6.1999, p. 4).

[3] Id-Direttiva 2000/69/KE tal-Parlament Ewropew u tal-Kunsill dwar il-valuri ta' limitu għall-benżin u l-monossidu tal-karbonju fl-arja ta' l-ambjent (ĠU L 313, 13.12.2000, p. 12).

[4] Idem

[5] ĠU L 68, 6.3.2004, p. 27.

[6] In-notifika trid tiġi mmarkata “Air quality time extension – Directive 2008/50/EC” u biex tkun valida bħala notifika uffiċjali trid tkun indirizzata lil: European Commission, Secretariat-General, 1049 Brussels. Barra minn hekk, kopja elettronika tan-notifika għandha tintbagħat bl-imejl lill-mejlboks: ENV-AIRQUALITYTIMEEXTENSION@ec.europa.eu

[7] Ara l-Formola 3A f'SEC (..) ...

[8] Ara l-Formola 5A, inkluż l-Anness, u l-Formola 7, inkluż l-Anness A; għall-PM10 ara wkoll il-Formola 10, u għad-diossidu tan-nitroġenu u l-benżin innotfikati qabel l-2010, ara l-Formola 4A.

[9] Ara l-Formola 3B u 4A (kif xieraq).

[10] Ara l-Formola 8 u, skond kif xieraq, l-Anness tal-Formola 8 u l-Formola 9.

[11] ĠU L 296, 21.11.1996, p. 55.

[12] Ara l-Formola 4B u l-Formola 5B, inkluż l-Anness.

[13] Ara l-Formola 6.

[14] Ara l-Formola 9.

[15] Ġestjoni u xandir ta' metadejta skond id-Deċiżjoni 97/101/KE dwar l-iskambju ta' tagħrif.

[16] Ara l-Formola 10.

[17] Ara l-Anness tal-Formola 2.

[18] Ara l-Formola 10.

[19] Ara l-Formola 10.

[20] Mudell żviluppat mill-Programm ta' Kooperazzjoni għall-Monitoraġġ u l-Valutazzjoni tat-Trażmissjoni fuq Medda twila ta' Sustanzi ta' tniġġis ta' l-Arja fl-Ewropa (EMEP).

[21] Ara l-Formoli 3A u 10.