52007PC0485

[pic] | KUMMISSJONI TAL-KOMUNITAJIET EWROPEJ |

Brussel 30.8.2007

KUMM(2007) 485 finali

2005/0042A (COD)

OPINJONI TAL-KUMMISSJONI skond l-Artikolu 251 (2), it-tielet subparagrafu, il-punt (c) tat-Trattat tal-KE, dwar l-emendi tal-Parlament Ewropew għall-pożizzjoni komuni tal-Kunsill rigward il-proposta għal

Deċiżjoni tal-Parlament Ewropew u tal-Kunsill li tistabbilixxi t-tieni Programm ta' azzjoni tal-Komunità fil-qasam tas-Saħħa (2007-2013)

LI TEMENDA L-PROPOSTA TAL-KUMMISSJONIskond l-Artikolu 250(2) tat-Trattat tal-KE

2005/0042A (COD)

OPINJONI TAL-KUMMISSJONI skond l-Artikolu 251 (2), it-tielet subparagrafu, il-punt (c) tat-Trattat tal-KE, dwar l-emendi tal-Parlament Ewropew għall-pożizzjoni komuni tal-Kunsill rigward il-proposta għal

Deċiżjoni tal-Parlament Ewropew u tal-Kunsill li tistabbilixxi t-tieni Programm ta' azzjoni tal-Komunità fil-qasam tas-Saħħa (2007-2013)

Proċedura ta' Kodeċiżjoni It-Tieni Qari

1. Daħla

L-Artikolu 251(2), it-tielet subparagrafu, il-punt (c) tat-Trattat tal-KE jipprevedi li l-Kummissjoni għandha tressaq opinjoni dwar l-emendi proposti mill-Parlament Ewropew fit-tieni qari. Il-Kummissjoni tistipula l-opinjoni tagħha dwar l-emendi proposti mill-Parlament f'dan li ġej.

2. Sfond

Il-proposta COM (2005)115 finali[1] ntbagħtet lill-Parlament Ewropew u lill-Kunsill fil-15 ta' April 2005 skond il-proċedura tal-kodeċiżjoni skond l-Artikolu 251 tat-Trattat tal-KE.

Il-Kumitat tar-Reġjuni ta l-opinjoni tiegħu fis-16 ta' Frar 2006[2].

Il-Kumitat Ekonomiku u Soċjali Ewropew ta l-Opinjoni tiegħu fl-14 ta' Frar 2006[3].

Il-Parlament Ewropew ta l-opinjoni tiegħu ma' l-ewwel qari fis-16 ta' Marzu 2006.

Il-proposta emendata COM (2006)234 finali[4] skond l-Artikolu 250 (2) tat-Trattat tal-KE ntbagħtet lill-Parlament Ewropew u lill-Kunsill fl-24 ta' Mejju 2006.

Wara l-opinjoni tal-Parlament Ewropew u skond l-Artikolu 251(2) tat-Trattat tal-KE, wara ftehim politiku tat-30 ta' Novembru 2006, il-Kunsill adotta Pożizzjoni Komuni fit-22 ta' Marzu 2007[5]. Il-Komunikazzjoni tal-Kummissjoni dwar il-Pożizzjoni Komuni COM(2007) 150 ġiet adottata fit-23 ta’ Marzu 2007.

Il-Parlament Ewropew adotta l-pożizzjoni tiegħu mat-tieni qari fl-10 ta' Lulju 2007.

3. L-għan tal-proposta

Il-programm għandu l-għan li jikkontribwixxi għall-ħarsien u s-sikurezza taċ-ċittadini permezz ta' azzjonijiet speċifiċi fil-qasam tas-saħħa. Huwa jippermetti lill-UE li tikkomplementa, tappoġġja u żżid il-valur lill-politiki ta' l-Istati Membri u għalhekk jikkontribwixxi għal aktar solidarjetà u prosperità fl-UE billi jħares u jippromwovi s-saħħa u s-sikurezza tal-bniedem u jtejjeb is-saħħa pubblika. Il-programm għall-2007-2013 se jkollu tliet għanijiet ewlenin: li jtejjeb is-sikurezza tas-saħħa taċ-ċittadini, li jippromwovi s-saħħa u li jiġġenera u jxnadar it-tagħrif u l-għarfien dwar is-saħħa.

Dawn l-għanijiet għandhom jinkisbu permezz ta' taħlita ta' azzjonijiet u strumenti, skond il-prijoritajiet stipulati fil-pjanijiet annwali ta' ħidma.

4. L-opinjoni tal-Kummissjoni dwar l-emendi mill-Parlament Ewropew

4.1. Ġenerali

Fl-10 ta' Lulju 2007, il-Parlament Ewropew adotta pakkett ta' kompromess li dwaru kien hemm qbil mal-Kunsill bil-ħsieb li jintlaħaq ftehim fit-tieni qari.

Instabu mezzi sabiex tingħata reazzjoni għal dak li esprima ruħu dwaru l-Parlament fir-rigward tat-test tal-Programm, billi saru modifiki għat-test, filwaqt li baqa' rifless l-ispirtu tal-proposta modifikata tal-Kummissjoni.

Il-Kummissjoni taċċetta l-emenda kollha. Il-konklużjoni tal-pakkett tal-kompromess ġie ffaċilitat b'dikjarazzjoni trilaterali li tikkwota r-regoli ta' flessibilità baġitarja għal programmi ta' l-UE skond il-Ftehim Interistituzzjonali (l-Artikolu 37) favur il-programm ta' saħħa (ara l-Anness).

4.2 Proposta Emendata

Skond l-Artikolu 250(2) tat-Trattat tal-KE, il-Kummissjoni temenda l-proposta tagħha kif stabbilit hawn fuq.

ANNESS

DIKJARAZZJONI TRILATERALI FIR-RIGWARD TAT-TIENI PROGRAMM TAS-SAĦĦA TAL-KOMUNITÀ 2007-2013

Il-Parlament Ewropew, Il-Kunsill u l-Kummissjoni:

- jaqblu fil-fehma li t-tieni Programm ta' azzjoni tal-Komunità fil-qasam tas-Saħħa (2007-2013) irid jingħata mezzi finanzjarji li jippermettu bis-sħiħ għall-implimentazzjoni tiegħu;

- jirtiraw l-Artikolu 37 tal-Ftehim Interistituzzjonali dwar dixxiplina baġitarja u ġestjoni finanzjarja sana[6] filwaqt li ddikjaraw li l-awtorità baġitarja u l-Kummissjoni jintrabtu li ma jiskorrux b'aktar minn 5 % mill-baġit sakemm ma jinqalgħux ċirkustanzi ġodda, oġġettivi u li jifirxu fit-tul ta' żmien li għalihom jingħataw raġunijiet speċifiċi. Kull żieda li tirriżulta minn varjazzjoni tali trid tibqa' fi ħdan il-limitu massimu ta' l-intestatura kkonċernata;

- jassiguraw ir-rieda tagħhom li jivvalutaw f'mod korrett il-ħtiġijiet u ċ-ċirkustanzi speċifiċi tal-Programm tas-Saħħa fil-proċedura baġitarja annwali.

[1] ĠU C 172, 12.7.2005

[2] ĠU C 192, 16.08.2006

[3] ĠU C 88, 11.04.2006

[4] ĠU C 303, 13.12.2006

[5] ĠU C 103E, 08.05.2007

[6] ĠU C 139 14.6.2006