52007DC0405

[pic] | KUMMISSJONI TAL-KOMUNITAJIET EWROPEJ |

Brussel 6.7.2007

KUMM(2007) 405 finali

L-EWWEL RAPPORT LILL-KUMITAT EWROPEW TAT-TITOLI U LILL-PARLAMENT EWROPEW

dwar il-konverġenza bejn l-Istandards Internazzjonali ta' Rapportaġġ Finanzjarju u l-Prinċipji Ġeneralment Aċċettati tal-Kontabilità (GAAPs) nazzjonali ta' pajjiżi terzi {SEG(2007) 968}

1. INTRODUZZJONI U BAżI LEGALI

Dan ir-rapport jiffoka fuq il-kalendarji tal-ħidma rispettivi previsti mill-awtoritajiet nazzjonali tal-Kanada, l-Ġappun u l-Istati Uniti ta' l-Amerika għall-konverġenza bejn l-Istandards Internazzjonali għar-Rapportaġġ Finanzjarju (IFRS) u l-Prinċipji tal-Kontabilità Ġeneralment Aċċettati nazzjonali tagħhom (GAAPs). Fih ukoll xi tagħrif preliminarju dwar l-isforzi għall-konverġenza minn xi pajjiżi terzi oħra.

Dan ir-rapport dwar l-iskedi taż-żmien ta' ħidma għal konverġenza huwa meħtieġ skond iż-żewġ miżuri legali adottati mill-Kummissjoni Ewropea fl-4 ta' Diċembru 2006[1] fir-rigward ta' l-użu mill-entitajiet tal-ħruġ tal-pajjiżi terzi ta' l-informazzjoni mħejjija skond ċerti standards ta' kontabilità aċċettati madwar id-dinja kollha.

Skond ir- Regolament 1606/2002 tal-Parlament Ewropew u tal-Kunsill tad-19 ta' Lulju 2002 (ir-"Regolament IAS") il-kumpaniji elenkati f'suq regolat ta' kwalunkwe Stat Membru u li huma rregolati mill-liġi ta' Stat Membru ta' l-Unjoni Ewropea għandhom japplikaw l-IFRS kif adottati mill-UE ('IFRS approvati') għall-kontijiet ikkonsolidati tagħhom għas-snin finanzjarji li jibdew minn Jannar 2005.

Ir-rekwiżit li jiġi użat l-IFRS iffirmat fl-Unjoni Ewropea ġie estiż għal entitajiet tal-ħruġ ta' pajjiżi terzi li jagħmlu offerta pubblika tat-titoli fl-UE bir-Regolament dwar il-Prospett[2] u għal entitajiet tal-ħruġ ta' pajjiżi terzi b'titoli nnegozjati f'suq regolat ta' l-UE bid-Direttiva dwar it-Trasparenza[3]. Skond dawn id-Direttivi l-entitajiet tal-ħruġ għandhom iħejju t-tagħrif finanzjaju tagħhom f'konformità ma' l-IFRS jew ma' l-istandards tal-kontabilità nazzjonali ta' pajjiż terz (GAAPs ta' pajjiżi terzi) li huma 'ekwivalenti' għall-IFRS approvati. Dawk ir-rekwiżiti għall-bidu kienu soġġetti għal eżenzjoni tranżizzjonali sa l-1 ta' Jannar 2007.

Sussegwentement, fid-dawl ta' l-isforzi ta' dawk li jfasslu l-istandards nazzjonali tal-kontabilità tal-Kanada, il-Ġappun, l-Istati Uniti ta' l-Amerika u ta' ġuriżdizzjonijiet oħra, u meta tqiesu l-isforzi pożittivi għal konverġenza ma' l-IFRS li kienu diġà għaddejjin, kien hemm qbil li din id-data tiġi postposta għal sentejn oħra. Għalhekk fl-4 ta' Diċembru 2006, il-Kummissjoni adottat żewġ miżuri legali msemmija skond liema l-entitajiet tal-ħruġ ta' pajjiżi terzi setgħu jibqgħu jużaw ċerti GAAPs ta' pajjiżi terzi, għall-finijiet tar-Regolament dwar il-Prospett, fil-prospetti kollha li daħlu qabel l-1 ta' Jannar 2009 u, għall-finijiet tad-Direttiva dwar it-Trasparenza, għas-snin finanzjarji kollha li jibdew qabel Jannar 2009[4].

Matul il-perjodu sa l-2009 il-Kummissjoni permezz ta' l-Artikolu 35 tar-Regolament dwar il-Prospett (kif emendat bir-Regolament (KE) Nru 1787/2006 u bl-Artikolu 2 tad-Deċiżjoni taħt id-Direttiva dwar it-Trasparenza teħtieġ li tinforma b'mod regolari lill-Kumitat Ewropew tat-Titoli u lill-Parlament Ewropew dwar il-progress lejn il-konverġenza u l-progress fir-rigward ta' l-eliminazzjoni tar-rekwiżiti ta' rikonċiljazzjoni li japplikaw għall-awtoritajiet tal-ħruġ ta' l-UE.

2. ID-DEFINIZZJONI TA' EKWIVALENZA

L-istabbiliment ta' definizzjoni xierqa ta' ekwivalenza, għall-fini li jiġi ddeterminat jekk il-GAAP ta' pajjiż terz huwiex ekwivalenti għall-IFRS, huwa element kruċjali fil-ħidma f'dan il-qasam. Skond ir-Regolament dwar il-Prospett u d-Deċiżjoni taħt id-Direttiva dwar it-Trasparenza, il-Kummissjoni teħtieġ tistabbilixxi definizzjoni ta' ekwivalenza, tifforma mekkaniżmu għall-ekwivalenza u mbagħad tiddetermina l-ekwivalenza tal-GAAPs ta' pajjiż terz skond kalendarju taż-żmien speċifikata. Dawn il-miżuri legali jirrikjedu li l-Kummissjoni tikkonsulta mas-CESR fuq kull waħda minn dawn il-kwistjonijiet. Wara l-ewwel konsultazzjoni, id-definizzjoni ta' ekwivalenza kif ġejja ġiet proposta mis-CESR:

Għall-finijiet ta' ekwivalenza, l-investituri għandhom ikunu jistgħu jieħdu deċiżjoni simili irrispettivament jekk jiġux ipprovduti b'rendikonti finanzjarji bbażati fuq l-IFRS jew fuq il-GAAP ta' pajjiż terz.

Din id-definizzjoni toħroġ mill-parir tas-CESR ta' Ġunju 2005 dwar l-ekwivalenza tal-GAAPs ta' l-Istati Uniti, tal-Kanada u l-Ġappun. F'dak il-parir is-CESR spjega li ekwivalenza ma tfissirx identika. Is-CESR bassar li xi diskrepanzi bejn il-GAAP ta' pajjiż terz u l-IAS/IFRS ma jagħtux lok għal deċiżjonijiet dwar investimenti li jvarjaw bejniethom. Biex tibda, il-Kummissjoni tikkunsidra li definizzjoni bħal din tipprovdi kriterju xieraq għad-definizzjoni ta' ekwivalenza.

3. L-UżU TAL-GAAPS TA' PAJJIżI TERZI FL-UNJONI EWROPEA

Is-CESR elenka l-GAAPs ta' pajjiżi terzi li bħalissa qed jintużaw mill-entitajiet tal-ħruġ li t-titoli tagħhom huma elenkati f'suq regolat fl-UE. Skond is-CESR, l-entitajiet tal-ħruġ ta' pajjiżi terzi jirrappreżentaw madwar 5.8% ta' l-għadd totali ta' l-entitajiet tal-ħruġ li għandhom it-titoli tagħhom imdaħħla għan-negozju fis-swieq regolati ta' l-UE.

Fit-tħejjija tat-tabella li ġejja, is-CESR indika li xi entitajiet tal-ħruġ setgħu ngħaddew aktar minn darba jekk kellhom titoli mdaħħla f'aktar minn pajjiż wieħed u/jew jekk daħlu forom differenti ta' titoli fl-istess Stat Membru jew fi Stati Membri varji.

Il-GAAP nazzjonali ta': | Għadd ta' entitajiet tal-ħruġ ta' pajjiżi terzi kkwotati f'suq regolat ta' l-UE permezz ta' l-użu ta' dan il-GAAP. |

L-Arġentina | 5 |

L-Awstralja | 17 |

Il-Brażil | 4 |

Il-Kanada | 45 |

Iċ-Ċili | 1 |

Iċ-Ċina | 20 |

Il-Kolumbja | 1 |

L-Eġittu | 10 |

Ħong Kong | 2 |

L-Indja | 70 |

L-Indoneżja | 2 |

L-Iżrael | 8 |

Il-Ġappun | 84 |

Il-Libanu | 3 |

Il-Malażja | 3 |

Il-Messiku | 2 |

Il-Marokk | 1 |

New Zealand | 2 |

il-Pakistan | 1 |

Il-Perù | 3 |

Il-Filippini | 3 |

Ir-Russja | 14 |

Singapor | 2 |

L-Afrika t’Isfel | 9 |

Il-Korea t’Isfel | 30 |

L-Iżvizzera | 4 |

It-Tajlandja | 4 |

It-Tuneżija | 1 |

It-Turkija | 7 |

L-Istati Uniti | 233 |

Il-Veneżwela | 1 |

Iż-Żambja | 1 |

Iż-Żimbabwe | 1 |

Total | 594 |

Sors : CESR

Din l-informazzjoni mhix kompluta minħabba li s-CESR ma setax iġib id-dejta rilevanti għas-swieq regolati kollha ta' l-UE.[5]

4. AġġORNAMENTI DWAR IL-KONVERġENZA TAL-GAAP TAL-KANADA, TAL-ĠAPPUN U TA' L-ISTATI UNITI LEJN L-IFRS

Il-GAAP ta' l-Istati Uniti

L-eliminazzjoni tar-rekwiżit ta' rikonċiljazzjoni għall-awtoritajiet tal-ħruġ tal-GAAP ta' l-Istati Uniti u ta' l-UE hija għan ewlieni tal-Kummissjoni. Is-SEC żviluppa Pjan ta' Direzzjoni li jiddeskrievi l-passi li jwasslu għat-tmiem tar-rekwiżit ta' rikonċiljazzjoni u indika li filwaqt, li huwa importanti li jsir progress sinifikanti fir-rigward ta' kwistjonijiet prijoritarji, mhuwiex neċessarji li jintlaħaq livell stabbilit għal konverġenza.

Fil-bidu ta' l-2006, il-Bord għall-Istandards Finanzjarji tal-Kontabilità ta' l-Istati Uniti (FASB) u l-Bord ta' l-Istandards Internazzjonali tal-Kontabilità (IASB) ikkonkludew Memorandum ta' Ftehim (MoU) li jispeċifika programm ta' ħidma għall-konverġenza bejn il-GAAP ta' l-Istati Uniti u l-IFRS. L-MoU jaqsam il-ħidma għall-konverġenza f'żewġ kategoriji skond iż-żmien mistenni għat-tlestija tagħhom. Fiż-żmien qasir l-għan tal-ħidma għall-konverġenza huwa li tintlaħaq konklużjoni sa l-2008 dwar jekk għandhomx jitneħħew id-diskrepanzi kbar f'għadd żgħir ta' oqsma prinċipali permezz ta' proġett wieħed jew aktar fuq il-medda qasira ta' l-istabbiliment ta' standards, u jekk iva, jekk għandhiex titlesta kompletament jew sostanzjalment il-ħidma f'dawn l-oqsma. Il-progress globali jidher li qed javvanza b'pass sodisfaċenti. Lil hinn mill-medda l-qasira, l-MoU għamlet provvediment għaż-żewġ Bordijiet sabiex jaħdmu flimkien u sabiex sa l-2008 jagħmlu progress sinifikanti f'oqsma prinċipali fejn il-prattiki preżenti huma meqjusa bħal "kandidati li jirrikjedu titjib." Jidher li l-ħidma fuq il-biċċa l-kbira tagħhom miexja 'l quddiem bil-pass li permezz tiegħu r-rekwiżiti fil-Pjan ta' Direzzjoni għandhom jintlaħqu fiż-żmien stipulat. Dan jinkludi l-proġett ta' Konsolidazzjonijiet.

Is-CESR ta tagħrif preliminarju dwar il-progress li sar fuq il-programmi ta' ħidma għall-konverġenza tal-Kanada, il-Ġappun u l-Istati Uniti, billi uża l-parir tas-CESR ta' 2005 bħala bażi u ta indikazzjoni kemm tas-sitwazzjoni preżenti kif ukoll ta' l-iżviluppi mistennija għall-2007/2008. Madankollu r-rapport tas-CESR[6] espressament jiddikjara li ma għandux jiġi kkunsidrat li jipprovdi xi evalwazzjoni jew valutazzjoni tal-progress dwar il-konverġenza f'dan l-istadju iżda minflok jagħti indikazzjoni tas-sitwazzjoni kurrenti skond l-informazzjoni miksuba permezz tas-sorsi pubbliċi.

Il-parir tekniku identifika d-differenza prinċipali fl-ambitu ta’ rendikonti għall-finijiet ta' konsolidazzjoni ( scope of consolidation ) (IAS 27) fejn issuġġerixxa rendikont supplimentari bħala rimedju. Il-proġett ta' Konsolidazzjonijiet huwa inkluż fil-programm ta' konverġenza, flimkien ma' dokument għad-diskussjoni mistenni għas-sajf ta' l-2007 u abbozz għad-diskussjoni fit-tieni nofs ta' l-2008.

Differenzi oħrajn potenzjalment sinifikanti li ġew identifikati mill-parir tekniku (jiġifieri differenzi fejn l-indikazzjoni kwantitattiva ta' l-impatt ġiet proposta bħala rimedju) kienu relatati ma': l-IFRS 3 – Tagħqid ta' negozji b'akkwist, l-IAS 28 – Investimenti f'Assoċjati (Uniformità ta' politiki dwar il-Kontabilità), l-IAS 36 - Tħassir ta' l-Assi, l-IAS 38 – Assi mhux tanġibbli (Kapitalizzazzjoni ta' l-ispejjeż ta' l-iżvilupp) u l-IAS 41 – Agrikoltura (Differenzi fil-kejl tal-valur ġust ta' entrati speċifiċi ta' l-agrikoltura. It-Tagħqid ta' Negozji b'akkwist huwa mdaħħal; fil-programmi ta' ħidma għall-konverġenza u l-istandards finali huma mistennija fl-2007. L-IAS 36 – Tħassir ta' l-assi u l-IAS 38 Assi mhux Tanġibbli huma wkoll inklużi fil-programmi ta' ħidma għall-konverġenza, iżda bħalissa qegħdin fl-istadju ta' riċerka mill-persunal u ma hemmx indikazzjoni ċara dwar l-iskeda taż-żmien. L-IAS 28 – Investiment f'Assoċjati u l-IAS 41- Agrikoltura bħalissa mhumiex inklużi fil-programm ta' konverġenza.

Fl-2006 is-SEC beda janalizza l-ewwel dħul ta' dikjarazzjonijiet finanzjarji mill-kumpaniji ta' l-UE li kienu bbażati fuq l-IFRS. L-uffiċjali tas-SEC minn dak iż-żmien bdew jiddeskrivu l-osservazzjonijiet tagħhom bħala "tfittxija għal informazzjoni" fejn l-affarijet ma kienux ċari għalihom. Il-mistoqsijiet iffokaw fuq il-preżentazzjoni kif ukoll l-iżvelar tat-tagħrif tal-kontijiet finanzjarji.

Is-CESR u s-SEC qablu dwar u ppubblikaw Pjan ta' Ħidma konġunt fit-2 ta' Awissu 2006. Dan il-Pjan ta' Ħidma huwa pass importanti lejn il-ksib ta kooperazzjoni ta' operat u ta' sorverljanza bejn ir-regolaturi biex jiżguraw infurzar konsistenti ta' l-IFRS u l-GAAP ta' l-Istati Uniti. Barra minn hekk, il-Kunsill għar-Rapportaġġ Finanzjarju (FRC), is-SEC u l-Awtorità għas-Servizzi Finanzjarji tar-Renju Unit (FSA) fil-25 ta' April 2007 iffirmaw protokoll għall-implimentazzjoni ta' dan il-Pjan ta' Ħidma bejn l-SEC u s-CESR kif jirrelata mat-taqsim ta' l-informazzjoni dwar l-applikazzjoni ta' l-IFRS mill-awtoritajiet ta' ħruġ illistjati fir-Renju Unit u fl-Istati Uniti.

F'April 2007, fil-qafas tas-Summit UE-US regolari ta' kull sena, iż-żewġ naħat qablu li jitteħdu l-passi lejn il-konverġenza, l-ekwivalenza jew ir-rikonoxximent reċiproku, fejn xieraq, ta' standards regolatorji bbażati fuq il-prinċipji ta' kwalità għolja. B'mod partikolari, ser jingħata attenzjoni fuq il-promozzjoni ta' kundizzjonijiet għall-Istati Uniti. Il-GAAP u l-IFRS għandhom jiġu rikonoxxuti fiż-żewġ ġurisdizzjonijeit. Bħala konferma ta' dan il-ftehim, il-President ta' l-Istati Uniti ta' l-Amerika, il-President tal-Kunsill Ewropew u l-President tal-Kummissjoni fit-30 ta' April iffirmaw ftehim li kien fih din id-dikjarazzjoni fir-rigward tar-rappurtaġġ finanzjarju:

"Swieq Finanzjarji . Il-promozzjoni u l-ksib ta' kundizzjonijiet għall-Prinċipji tal-Kontabilità Ġeneralment Aċċettati ta' l-Istati Uniti u l-Istandards Internazzjonali dwar ir-Rapportaġġ Finanzjarju biex jiġu rikonoxxuti fiż-żewġ ġurisdizzjonijiet mingħajr il-ħtieġa ta' rikonċiljazzjoni sa l-2009 jew possibilment qabel[7]. "

Wara stqarrija għall-istampa f'April[8], is-SEC, fl-20 ta' Ġunju 2007 ħabbar il-proposta tiegħu li jippermetti li dikjarazzjonijiet finanzjarji bbażati fuq l-IFRS ta' l-awtaritajiet ta' ħruġ barranin jiġu ffajljati mingħajr ir-rekwiżit ta' rikonċiljazzjoni[9]. Il-perjodu għad-dħul ta' kummenti kien stabbilit għal 75 ġurnata mid-data tal-pubblikazzjoni fir-Reġistru Federali.

L-istess stqarrija għall-istampa kienet indikat wkoll il-possibilità li s-SEC jagħti lill-kumpaniji bbażati fl-Istati Uniti l-għażla li jużaw l-IFRS għad-dikjarazzjonijiet finanzjarji tagħhom minflok il-GAAP ta' l-Istati Uniti.

Il-GAAP Ġappuniż

F'Marzu 2005 il-Bord għall-Istandards tal-Kontabilità tal-Ġappun (ASBJ) u l-IASB nedew proġett konġunt (għall-konverġenza) bil-għan aħħari li tinkiseb konverġenza bejn il-GAAP Ġappuniż u l-IFRS. Matul il-proġett l-ASBJ aċċellera l-analiżi tiegħu ta' l-istandards tal-kontabilità Ġappuniżi biex inaqqsu d-differenzi bejn iż-żewġ GAAPs. Permezz ta' dan il-metodu l-ASBJ u l-IASB identifikaw “proġetti fuq medda qasira” u “proġetti fit-tul”. Proġetti fuq medda qasira huma skedati biek jitlestew sal-bidu ta' l-2008. Għal proġetti li jdumu aktar fit-tul bħar-rikonoxximent tad-dħul, ir-rapportaġġ dwar il-prestazzjoni (il-preżentazzjoni tal-kontijiet finanzjarji), l-assi mhux tanġibbli (inkluż l-ispejjeż ta' l-R&D), rendikonti għall-finijiet ta' konsolidazzjoni (inkluż ta' Entitajiet bi Skopijiet Speċjali "SPEs"), it-tħassir ta' l-assi fissi u l-benefiċċji ta' l-irtirar, l-ASBJ iddeċieda li jibda proġetti (ta' riċerka) għall-allinjament tal-ħidma li saret fil-proġetti ta' l-IASB u l-FASB.

Fuq it-talba tal-Kummissjoni, is-CESR ta tagħrif preliminarju dwar il-progress li sar fuq il-programmi ta' ħidma għall-konverġenza u ta indikazzjoni kemm tas-sitwazzjoni preżenti kif ukoll ta' l-iżviluppi mistennija għall-2007/2008. Ħarsa ġenerali tal-kwistjonijiet li ġew identifikati mis-CESR jew li għalihom hemm proġett ta' konverġenza tingħata f'anness 2 ta' dan ir-rapport.

Tlieta minn sitta u għoxrin kwistjoni identifikati mis-CESR fl-2005 ġew ikklassifikati bħala li jirrikjedu kontijiet supplimentari. It-tliet kwistjonijiet u l-progress mistenni tagħhom fir-rigward tal-konverġenza huma kif ġej:

1. Tagħqid ta' negozji b'akkwist (bil-metodu tal-ġbir ta' l-interessi)

Tnieda Tim tal-Proġett f'Diċembru 2006. Rapport dwar ir-riċerka għandu jinħareġ fit-tielet kwart ta' l-2007. Skond id-diskussjoni li toħroġ minn dan ir-rapport dwar ir-riċerka, tista' toħroġ karta għad-diskussjoni fir-raba' kwart ta' l-2007. Rapport riċenti mill-Borża ta' Tokjo juri li l-metodu tal-ġbir ta' l-interessi ma kien użat għal l-ebda tagħqid ta' negozji matul l-ewwel nofs tas-sena finanzjarja li ntemmet fit-30 ta' Settembru 2006.

Dan il-fatt għandu jkollu impatt fuq il-kunsiderazzjoni mill-ġdid tal-metodu tal-ġbir ta' l-interessi.

2. L-għażla ta' kumpaniji għall-finijiet ta' konsolidazzjoni (żvelar u konsolidazzjoni aħjar ta' SPEs)

Ġie stabbilit kumitat tekniku għal din il-kwistjoni u bdew bid-deliberazzjonijiet dwarha.

Fir-rigward tad-deliberazzjonijiet dwar l-iżvelar, l-ASBJ ħareġ il-"Gwida għal Żvelar dwar Ċerti Entitajiet bi Skop Speċjali" fit-23 ta' Marzu 2007 b'effett għas-snin finanzjajri li jibdew minn jew wara l-1 ta' April 2007. Fir-rigward tad-deliberazzjonijiet dwar l-għażla ta' kumpaniji għall-finijiet ta' konsolidazzjoni, dokument għad-diskussjoni għandu jinħareġ fi tmiem l-2007.

Wieħed għandu jinnota li l-progress lejn il-konverġenza sar ukoll f'oqsma oħra:

- Fil-qasam ta' l-IAS 2 Inventarji u għall-kwistjoni ta' l-użu tal-metodu LIFO (l-ewwel ta' l-aħħar ( last-in-first-out )) l-ABSJ stabbilixxa tim tal-proġett f'Jannar 2007 bil-għan li sal-bidu ta' l-2008 tkun ittieħdet deċiżjoni.

- Fir-rigward ta' l-IAS 36 Tħassir ta' l-Assi l-ASBJ f'Jannar 2007 tnieda tim tal-proġett. It-tim tal-proġett għandu l-għan li jippreżenta rapport dwar ir-riċerka lill-Bord ta' l-ASBJ sa timiem l-2007.

- Fir-rigward tad-deliberazzjonijiet dwar l-IAS 28 Assi Mhux Tanġibbli u l-kwistjoni dwar il-kapitalizzazzjoni ta' l-ispejjeż ta' l-iżvilupp, l-ASBJ huwa mistenni li joħroġ dokument għad-diskussjoni sa tmiem l-2007.

- L-uniformità ta' politiki dwar il-kontabilità (sussidjarji barranin u kumpaniji assoċjati)

Wara l-ħruġ ta' Nru. 18 tat-Task Force dwar Kwistjonijiet Prattiċi (PITF) (Mejju 2006), il-politiki dwar il-kontabilità applikabbli għal sussidjarji barranin għandhom jissieħbu sostanzjalment ma' dawk applikabbli għal kumpaniji prinċipali. Il-PITF Nru. 18 għandu jiġi applikat minn April 2008 (imħeġġa l-applikazzjoni minn qabel) Fir-rigward tal-kumpaniji assoċjati, l-ASBJ nieda tim tal-proġett f'Jannar 2007. Sa tmiem l-2007 jista' jinħareġ abbozz għad-diskussjoni bbażat fuq id-deliberazjzonijiet.

Fl-ewwel żewġ sessjonijiet dwar il-kontabilità bejn l-esperti tal-Kummissjoni Ewropea u dawk tal-FSA Ġappuniż, ġie diskuss il-progress tal-programm ta' ħidma. Skond il-Pjan tal-Proġett f'Jannar 2008, 7 minn 16-il proġett jew subproġett se jkunu waslu għall-istatus finali tal-proġett u 2 (possibilment 5) minnhom se jkunu fil-fażi ta' deliberazzjoni viċin il-finalizzazzjoni fuq il-livell tal-Bord.

Il-GAAP Kanadiż

F'Jannar 2006, il-Bord għall-Istandards tal-Kontabilità tal-Kanada (AcSB) iddeċieda li jittrasferixxi r-rapportaġġ finanzjarju għal intrapriżi li jinżammu pubblikament responsabbli lill-IFRS. Id-definizjoni ta' intrapriżi li jinżammu pubblikament responsabbli bħalissa tinkludi kumpaniji kkwotati u entitajiet li jiġbru fondi mill-pubbliku, bħal banek u kumpaniji ta' assigurazzjoni.

Il-Pjan ta' Implimentazzjoni ta' l-AcSB għall-inkorprazzjoni ta' l-IFRS fil-GAAP li ġie ippublikat fit-30 ta' Ġunju 2006 jassumi li l-IFRS jiġu implimentati mill-1 ta' Jannar 2011. Dan il-limitu taż-żmien għandu jiġi ffinalizzat sal-31 ta' Marzu wara li tkun saret analiżi tal-progress li bħalissa għaddejja.

5. IL-ħIDMA GħALL-KONVERġENZA MINN TERZI PAJJIżI OħRAJN

Il-GAAP Ċiniż

Fi Frar 2006, il-Ministeru tal-Finanzi tar-Repubblika tal-Poplu taċ-Ċina (l-'MoF') ħabbar uffiċjalment il-ħruġ ta' l-Istandard tal-Kontabilità għall-Intrapriżi Kummerċjali (l-'ASBE'). Dawn l-ASBEs ikopru kważi s-suġġetti kollha li hemm preżentement fl-IFRS ta' bħalissa, għalkemm xi eċċezzjonijiet għall-IFRSs ġew innotati. Dawn l-istandards, li daħlu fis-seħħ mill-1 ta' Jannar 2007, huma mandatorji għall-intrapriżi Ċiniżi kollha kkwotati. Intrapriżi Ċiniżi oħrajn huma mħeġġa biex japplikaw dawn l-istandards huma wkoll.

L-MoF u l-IASB irrikonoxxew li l-konverġenza hija proċess li għadu għaddej. L-MoF identifika għadd ta' kwistjonijiet dwar il-kontabilità li jista' jkun il-każ li jgħinu jagħtu tagħrif lill-IASB biex isib soluzzjonijiet għall-proġetti ta' l-IFRS li hemm bħalissa fil-qasam ta' l-iżvelar ta' tranżazzjonijiet ma' parti relatata – b'mod partikolari l-'eżenzjoni għall-intrapriżi kkontrollati mill-istat' – (l-IASB ippubblika Abbozz għad-Diskussjoni fit-22 ta' Frar 2007), it-tagħqid ta' negozji ta' entitajiet taħt l-istess kontroll, u l-kejl tal-valur ġust.

F'Novembru 2006 il-Ministeru tal-Finanzi taċ-Ċina ħareġ pubblikazzjoni limitata ta' gwida għall-implimentazzjoni dwar 32 mit-38 Standard tal-Kontabilità għall-Intrapriżi Kummerċjali (l-ASBEs) li kien adotta fi Frar 2006, u li daħlu fis-seħħ għar-rapporti finanzjarji ta' l-2007 tal-kumpaniji Ċiniżi kkwotati. Il-gwida ta' l-MOF hija bħalissa disponibbli biss biċ-Ċiniż.

Il-GAAP ta' l-Indja

F'Marzu 2006, il-Prim Ministru Indjan ħabbar li l-gvern tiegħu se jdaħħal leġiżlazzjoni komprensiva ġdida għall-kumpaniji li tinkludi allinjament ta' l-istandards tal-kontabilità ta' l-Indja ma' l-IFRS. Il-liġi ġdida għandha tissostitwixxi l-liġi Indjana għall-kumpaniji li ilha eżistenti għal 50 sena u għandha l-għan li tippromwovi aktar trasparenza u tmexxija effiċjenti.

L-Istitut ta' Chartered Accountants ta' l-Indja (ICAI) stabbilixxa task force biex jesplora l-possibilità li jiġu adottati l-Istandards Internazzjonali għar-Rapportaġġ Finanzjarju, mingħajr modifiki, bħall-istandards ta' l-Indja. Dan għandu jiżviluppa dokument ta' kunċett għall-adozzjoni ta' l-IFRS fl-Indja.

Il-GAAP Russu

Id-deċiżjoni tal-Gvern li l-Kumpaniji Russi kkwotati jersqu lejn l-IFRS ittieħdet fl-2002. Skond dan il-pjan, mill-2004 il-kumpaniji kkwotati fir-Russja kellhom iħejju l-kontijiet kkonsolidati finanzjarji tagħhom bl-IFRS. Il-kontijiet finanzjarji ta' kumpaniji individwali tal-membri tal-grupp jibqgħu jsiru bil-GAAP Russu. Il-banek, inkluż il-banek individwali kellhom iħejju l-kontijiet finanzjarji tagħhom bl-IFRS flimkien mal-kontijiet bil-GAAP Russu. Bħalissa, il-banek biss huma meħtieġa jħejju l-kontijiet ikkonsolidati tagħhom bl-IFRS u l-kontijiet individwali bil-GAAP lokali. Ma sar ebda progress mill-2005 fir-rigward tar-rekwiiżit li l-kumpaniji kkwotati jħejju l-kontijiet tagħhom bl-IFRS; il-kumpaniji qegħdin iħejju l-kontijiet tagħhom bil-GAAP lokali (Russu), li għad fih ċerti diskrepanzi li jvarjaw mill-IFRS. Flimkien mal-GAAP statutorju, ċerti kumpaniji kkwotati jirrapportaw ukoll bl-IFRS (jew bil-GAAP ta' l-Istati Uniti) fuq bażi volontarja.

6. KONKLUżJONIJIET

F'dan l-ewwel rapport il-Kummissjoni hija mħeġġa bl-iskedi taż-żmien ta' l-awtoritajiet tal-Kanada, il-Ġappun u l-Istati Uniti fir-rigward tal-ħidma li qiegħda ssir skond il-programmi ta' konverġenza.

Fir-rigward ta' l-Istati Uniti, il-Kummissjoni tinnota l-progress li sar fuq il-konveġenza. Minbarra dan il-Kummissjoni tilqa' d-dikjarazzjonijiet li saru mill-uffiċjali tas-SEC li jispjegaw li mhumiex qegħdin "ifittxu jimponu l-interpretazzjonijiet ta' l-IFRS"[10] u tinnota li l-analiżi tagħhom tal-kontijiet finanzjarji bl-IFRS li ddaħħlu fl-ewwel sena mill-entitajiet tal-ħruġ Ewropej iffokat fuq kwistjonijiet ta' preżentazzjoni u żvelar. Wara li fit-30 ta' April intlaħaq ftehim bejn l-Istati Unitu u l-UE, il-Kummissjoni tilqa' wkoll it-tħabbira tas-SEC dwar tibdiliet proposti fir-regoli sabiex jitħallew jiġu ffajljati kontijiet finanzjarji bbażati fuq l-IFRS mingħajr ir-rekwiżit ta' rikonċiljazzjoni. Il-Kummissjoni tikkunsidra ta' importanza kbira l-ħidma tas-SEC fil-Pjan ta' Direzzjoni għat-tneħħija tar-rekwiżit ta' rikonċiljazzjoni mal-GAAP ta' l-Istati Uniti u dan se jkun punt ċentrali prinċipali fir-rapport tal-Kummisjoni f'April 2008. Issa li l-iskedi taż-żmien ta' l-UE u ta' l-Istati Uniti ġew allinjati, it-tnejn għandhom il-possibilità li jissorveljaw mill-qrib l-iżviluppi fil-ġuriżdizzjoni l-oħra. F'dan il-kuntest, hemm ħtieġa ċara għat-tisħiħ tal-kooperazzjoni bejn il-Kummissjoni Ewropea u s-SEC. Għandu jkun hemm laqgħat regolari bejn l-uffiċjali tal-Kummissjoni u tas-SEC biex jistabbilixxu perjodi ta' waqfien u janalizzaw l-iżviluppi.

Bl-istess mod, progress kostanti lejn l-eliminazzjoni tal-ħtieġa ta' rikonċiljażzzjoni jiddependi b'mod sinifikanti fuq il-fiduċja u l-komunikazzjoni li teżisti fost ir-regolaturi. Il-kooperazzjoni u l-qsim ta' informazzjoni fost ir-regolaturi jeħtieġ li jittejbu, u għalhekk il-Kummissjoni tappoġġja bis-sħiħ il-pjan ta' ħidma tas-SEC u s-CESR, li jinkludi djalogu dwar l-implimentazzjoni ta' l-IFRS. Billi jirrikonoxxu li l-IFRS huma standards bbażati fuq prinċipji, ir-regolaturi għandhom iqisu bis-sħiħ il-pożizzjonijiet tal-kontropartijiet internazzjonali tagħhom fir-rigward ta' l-applikazzjoni u l-infurzar ta' l-IFRS, u għandhom jipprovaw bis-serjetà biex jevitaw konklużjonijiet konfliġġenti.

Fir-rigward tal-Ġappun, qed tintlaqa' tajjeb it-tnedija f'Ottubru 2006 tal-"Pjan għal Proġett ta' l-ASBJ" li jiffoka fuq proġetti relatati speċifikament mal-konverġenza. Fit-tnedija tal-Pjan għal Proġett ta' l-ASBJ saret enfasi primarja fuq it-tfassil tad-direzzjoni tal-ħidma li għandha titlesta sa tmiem l-2007, kif ukoll dwar il-kjarifika tal-prospetti dwar l-istatus tal-konverġenza mill-bidu ta' l-2008. Prijorità ngħatat għal inizjattivi fir-rigward ta' 26 kwistjonijiet li rimedji għalihom ingħataw mis-CESR fil-parir tagħhom lill-Kummissjoni fl-2005. Il-Kummissjoni hija mħeġġa minn dawn l-iżviluppi pożittivi iżda tenfasizza li hemm il-ħtieġa li jinżamm ir-ritmu ta', (u f'ċerti oqsma dan għandu wkoll jitħaffef) lejn l-attivitajiet għal konverġenza. Sabiex jiksbu l-għanijiet kif stipulati fil-programm ta' ħidma, l-awtoritajiet Ġappuniżi jridu jżommu għoli ħafna l-livell ta' attività għal konverġenza u kif ukoll jipprovdu tagħrif eżatt u komplet dwar il-progress, inkluż kwalunkwe dewmien li jista' jkun hemm. Il-programm huwa wieħed ambizzjuż iżda l-kisba ta' l-għanijiet tiegħu tikkostitwixxi bażi importanti fit-teħid tad-deċiżjoni dwar l-ekwivalenza.

Il-Kummissjoni tilqa' b’sodisfazzjon it-tħabbira tal-Kanada, fl-2006, dwar l-adozzjoni ta' l-IFRS għar-rapportaġġ finanzjarju ta' l-intrapriżi Kanadiżi li huma pubblikament responsabbli kif ukoll l-indikazzjoni ta' l-1 ta' Jannar 2011 bħala d-data għal bidla bħal din. Il-Kummissjoni tafda li din id-data jew ukoll aktar kmieni u l-limitu taż-żmien għat-trasferiment lejn l-IFRS għall-inkorporazzjoni tal-GAAP Kanadiż fl-IFRS jiġi kkonfermat fl-2008.

Fir-rigward taċ-Ċina, il-ħruġ ta' l-ASBEs li jkopru kważi s-suġġetti kollha li hemm preżentement fl-IFRS (għalkemm ġew innotati xi eċċezzjonijiet għall-IFRSs) qed jintlaqa' bħala pass pożittiv. Il-Kummissjoni tħeġġeġ l-awtoritajiet Ċiniżi biex jissoktaw bil-ħidma għall-konverġenza u tilqa' l-ħruġ ta' skeda taż-żmien iddettaljata li tistabbilixxi l-istadji prinċipali previsti li għandhom jintlaħqu fil-futur qarib.

Fl-Indja, id-deċiżjoni għall-allinjament tar-regoli ma' l-IFRS flimken ma' task force li għadu kif ġie stabbilit biex jesplora l-possibilità għall-adozzjoni ta' l-IFRS bis-sħiħ jagħti kuraġġ. Il-Kummissjoni tkun tilqa' b’sodisfazzjon aktar tagħrif dwar dawn il-pjanijiet għall-adozzjoni ta' l-IFRS mingħajr modifiki u b'mod speċjali fir-rigward tal-perjodi taż-żmien biex jintlaħqu xi stadji prinċipali li jistgħu jiġu previsti fil-futur qarib.

Fir-rigward tar-Russja, diskussjonijiet riċenti ma' l-awtoritajiet Russi jikkonfermaw li d-deċiżjonijiet tal-Gvern li l-Kumpaniji Russi kkwotati jimxu lejn l-IFRS u li jġibu l-GAAP Russu f'konformità ma' l-istandards internazzjonali għadhom fuq l-aġenda. Il-Kummissjoni tispera li l-ostakli ta' bħalissa li qed iżommu dan il-ħidma jiġu solvuti. Il-Kummissjoni tixtieq tilqa' aktar kjarifiki fir-rigward tal-possibiltajiet li l-ħidma terġa’ tibda malajr u, ladarba l-ħidma tkun inbdiet mill-ġdid, il-perjodi taż-żmien biex il-GAAP Russu jiġi konformi ma' l-IFRS.

Il-Kummissjoni ser tkompli tissorvelja mill-qrib u tinforma fuq bażi regolari l-Kumitat Ewropew tat-Titoli u l-Parlament Ewropew dwar il-progress għall-konverġenza fir-rigward tal-GAAP Kanadiż, Ġappuniż u ta' l-Istati Uniti, kif meħtieġ bl-Artikolu 35(5A) tar-Regolament dwar il-Prospett u l-Artikolu 2(2) tad-Deċiżjoni taħt id-Direttiva dwar it-Trasparenza. Il-kwistjonijiet relatati mal-konverġenza jidhru fid-diskussjonijiet tad-Djalogi Regolatorji u hemm kuntatti regolari fuq il-livell tal-persunal bejn il-Kummissjoni u l-awtoritajiet tal-pajjiżi terzi kkonċernati. Il-Kummissjoni ser tkompli tinforma fuq bażi regolari l-Kumitat Ewropew tat-Titoli u l-Parlament Ewropew dwar l-iżvilupp fid-diskussjonijiet regolatorji u l-ammont ta' progress li sar fir-rigward tal-konverġenza ma' l-IFRS fil-pajjiżi terzi l-oħrajn imsemmija fl-Artikolu 35(5A(c)) tar-Regolament dwar il-Prospett u l-Artikolu 1 (c) tad-Deċiżjoni taħt id-Direttiva dwar it-Trasparenza. Tagħrif regolari bħal dan huwa obbligu skond l-Artikolu 35(5B) tar-Regolament dwar il-Prospett u l-Artikolu 2(3) tad-Deċiżjoni taħt id-Direttiva dwar it-Trasparenza.

L-UE hija l-akbar ġuriżdizzjoni li tagħmel użu mill-IFRS u għandha interess qawwi li timxi 'l quddiem lejn standards dinjin. Il-Kummissjoni għalhekk tilqa' l-inizjattivi kollha li jgħinu jwittu t-triq sabiex l-IFRS isiru standards globali.

Annessi: Il-Pjan ta' Direzzjoni IASB - FASB, il-Pjan għal Proġett dwar l-iżvilupp ta' l-Istandards tal-Kontabilità tal-Ġappun, il-programm ta' ħidma għall-konverġenza tal-Kanada.

[1] Ir-Regolament tal-Kummissjoni (KE) Nru 1787/2006 ta' l-4 ta' Diċembru 2006 u d-Deċiżjoni tal-Kummissjoni (KE) Nru 2006/891 ta' l-4 ta' Diċembru 2006 (id-"Deċiżjoni skond id-Direttiva dwar it-Trasparenza").

[2] Ir-Regolament tal-Kummissjoni (KE) Nru 809/2004 tad-29 ta' April 2004 (ir-"Regolament dwar il-Prospett"). Dan ir-Regolament jimplimenta d-Direttiva 2003/71/KE tal-Parlament Ewropew u tal-Kunsill ta' l-4 ta' Novembru 2003 (‘Id-Direttiva dwar il-Prospett').

[3] Id-Direttiva 2004/109/KE tal-Parlament Ewropew u tal-Kunsill tal-15 ta' Diċembru 2004 (id-"Direttiva dwar it-Trasparenza").

[4] Ara l-Art. 1 tad-Deċiżjoni tal-Kummissjoni 2006/891/KE u l-Art. 35(5A) tar-Regolament dwar il-Prospett, kif emendat bir-Regolament tal-Kummissjoni (KE) 1787/2006/KE.

[5] Il-membri tas-CESR identifikaw ukoll madwar 130 entitajiet tal-ħruġ ta' pajjiżi terzi permezz ta' l-użu tal-GAAP nazzjonali ta' l-Istati Membri ( eż. UK GAAP).

[6] Il-parir tas-CESR lill-Kummissjoni Ewropea dwar il-programmi ta' ħidma ta' dawk li jfasslu l-istandards Kanadiżi, Ġappuniżi, u ta' l-Istati Uniti, id-definizzjoni ta' ekwivalenza u l-lista tal-GAAPs ta' pajjiżi terzi li jintużaw bħalissa fis-Swieq Kapitali ta' l-UE (is-6 ta' Marzu 2007).

[7] Qafas għall-Avvanz ta' l-Integrazzjoni Ekonomika Transatlantika Bejn l-Unjoni Ewropea u l-Istati Unit ta' l-Amerika - Anness 2 Proġetti ta' Prijorità Lighthouse

[8] Stqarrija għall-Istamp tas-SEC 2007-72 ta' l-24 ta' April 2007.

[9] Laqgħa miftuħa tas-SEC fl-20 ta' Ġunju 2007.

[10] Diskors li sar minn John A. White, Direttur, Division of Corporate Finance (SEC), Londra, 15 ta' Jannar 2007