52006PC0501

[pic] | KUMMISSJONI TAL-KOMUNITAJIET EWROPEJ |

Brussel 21.9.2006

KUMM(2006) 501 finali

2005/0017 (COD)

KOMUNIKAZZJONI MILL-KUMMISSJONI LILL-PARLAMENT EWROPEW skond it-tieni sub-paragrafu ta’ l-Artikolu 251 (2) tat-Trattat KE li jikkonċerna

Pożizzjoni komuni deċiża mill-Kunsill fir-rigward ta’ l-adozzjoni ta’ Regolament tal-Parlament Ewropew u tal-Kunsill dwar il-ħolqien ta’ Istitut Ewropew għall-Ugwaljanza bejn l-Irġiel u n-Nisa

2005/0017 (COD)

KOMUNIKAZZJONI MILL-KUMMISSJONI LILL-PARLAMENT EWROPEWskond it-tieni sub-paragrafu ta’ l-Artikolu 251 (2) tat-Trattat KEli jikkonċerna

Pożizzjoni komuni deċiża mill-Kunsill fir-rigward ta’ l-adozzjoni ta’ Regolament tal-Parlament Ewropew u tal-Kunsill dwar il-ħolqien ta’ Istitut Ewropew għall-Ugwaljanza bejn l-Irġiel u n-Nisa (Test b’relevanza għall–EEA)

1. SFOND

Data ta’ komunikazzjoni tal-Proposta lill-PE u lill-Kunsill: COM (2005) 81 finali - 2005/0017 (COD): | 8.3.2005 |

Data ta’ l-opinjoni tal-Kumitat Ekonomiku u Soċjali Ewropew: | 27.9.2005 |

Data ta’ adozzjoni tal-Pożizzjoni tal-Parlament Ewropew fl-ewwel qari: | 14.3.2006 |

Data ta’ komunikazzjoni tal-Proposta emendata lill-PE u lill-Kunsill: | 8.5.2006 |

Data ta’ ftehim politiku fil-Kunsill dwar il-pożizzjoni komuni: | 1.6.2006 |

Data ta’ l-adozzjoni formali tal-pożizzjoni komuni tal-Kunsill: | 21.9.2006 |

2. GĦAN TAL-PROPOSTA TAL-KUMMISSJONI

L-ISTITUT PROPOST HUWA MAħSUB BħALA APPOġġ TEKNIKU KEMM GħALL-ISTATI MEMBRI KIF UKOLL GħALL-ISTITUZZJONIJIET KOMUNITARJI U NOTEVOLMENT IL-KUMMISSJONI, SABIEX JIżVILUPPA U JIżGURA MILL-AħJAR L-IMPLIMENTAZZJONI TAL-POLITIKA KOMUNITARJA TA’ L-UGWALJANZA BEJN L-IRġIEL U N-NISA FL-UNJONI EWROPEA. F’DAN IL-KUNTEST, SE JIżGURA L-ġABRA U L-ANALIżI TA’ FATTI OġġETTIVI, AFFIDABBLI U KOMPARABBLI FUQ LIVELL KOMUNITARJU, L-IżVILUPP TA’ GħODOD METODOLOġIċI XIERQA, NOTEVOLMENT GħALL-INTEGRAZZJONI TAL-PERSPETTIVA TA’ L-UGWALJANZA BEJN IS-SESSI FIL-POLITIKI KOMUNITARJI; SE JIFFAċILITA L-ISKAMBJU TAL-PRASSI TAJBA, ID-DJALOGU BEJN IL-PARTIJIET IKKONċERNATI U L-PROMOZZJONI TA’ L-GħARFIEN U SE JAGħTI VIżIBILITÀ AħJAR TA’ DIN IL-POLITIKA LIċ-ċITTADINI EWROPEJ.

Il-proposta hija konformi mal-Komunikazzjoni ta’ l-2002 dwar l-ifformular ta’ l-aġenziji regolatorji u l-abbozz ta’ Ftehim Interistituzzjonali dwar dawn l-aġenziji (propost fi Frar 2005 u li attwalment qiegħed jiġi diskuss) notevolment f’dak li għandu x’jaqsam mal-punti li ġejjin:

- il-Kunsill Amministrattiv limitat li huwa magħmul minn 6 rappreżentanti tal-Kunsill (u mhux iktar minn rappreżentant ta’ kull Stat Membru) u minn 6 rappreżentanti tal-Kummissjoni, kif ukoll minn 3 membri li jirrappreżentaw lil dawk li jħaddmu, impjegati, u NGOs fuq livell Ewropew mingħajr dritt għal vot;

- il-parità tan-numru tar-rappreżentanti tal-Kunsill u tal-Kummissjoni: l-Istitut huwa maħsub bħala appoġġ tekniku għall-istituzzjonijiet Komunitarji, notevolment għall-Kummissjoni u l-Istati Membri, u r-rappreżentanza konġunta fil-Kunsill Amministrattiv timmira għal bilanċ ġust bejn il-kisba ta’ l-għanijiet Komunitarji u l-konsiderazzjoni ta’ l-interessi nazzjonali;

- il-previżjoni ta’ Forum Konsultattiv fejn ikunu rappreżentati esperti mill-Istati Membri kollha (kif ukoll 3 membri rappreżentanti ta’ dawk li jħaddmu, ħaddiema, u NGOs fuq livell Ewropew), li l-ħidma tiegħu se tkun li jiffaċilita l-kooperazzjoni u l-iskambju ta’ informazzjoni bejn l-Istitut u l-istituzzjonijiet u l-organi kompetenti fl-Istati Membri;

- id-dispożizzjonijiet dwar il-proċeduri ta’ għażla tad-Direttur u ta’ l-estensjoni ta’ kuntratt tiegħu.

3. KUMMENTI FUQ IL-POŻIZZJONI KOMUNI

3.1. Rimarki ġenerali

Il-Kummissjoni tikkunsidra li l-pożizzjoni komuni tal-Kunsill, adottata b’mod unanimu, hija, b’mod ġenerali, konformi mal-proposta inizjali tal-Kummissjoni kif ukoll mal-proposta emendata, ħlief għal punt importanti dwar il-kompożizzjoni tal-Kunsill Amministrattiv ta’ l-Istitut.

Fil-fatt, il-Kunsill għamel titjib fit-test inizjali li ma jbiddilx is-sustanza tal-proposta tal-Kummissjoni. Huwa segwa wkoll, fil-parti l-kbira, il-proposta emendata tal-Kummissjoni u fil-pożizzjoni komuni kompla fuq il-maġġoranza ta’ l-emendi proposti mill-Parlament Ewropew, hekk kif ġew aċċettati mill-Kummissjoni fil-proposta emendata tagħha. Il-Kunsill m’aċċettax ċerti emendi, irrifjutati wkoll mill-Kummissjoni, li jolqtu kwistjonijiet orizzontali għall-aġenziji Komunitarji kollha, sabiex jitħares approċċ koerenti.

Fir-rigward tal-kwistjoni dwar il-kompożizzjoni tal-Kunsill Amministrattiv, il-Parlament Ewropew għażel kunsill amministrattiv, iktar limitat minn dak propost mill-Kummissjoni, magħmul minn 13-il membru (9 rappreżentanti tal-Kunsill, 1 tal-Kummissjoni u 3 rappreżentanti ta’ l-imsieħba soċjali u NGOs mingħajr dritt għal vot). Il-Kummissjoni aċċettat din il-proposta bil-kundizzjoni li, f’każijiet limitati ħafna fejn il-Kummissjoni hija marbuta bir-responsabbiltà, il-piż tal-vot tar-rappreżentant tagħha jkun imsaħħaħ sabiex jitħares il-bilanċ bejn iż-żewġ istituzzjonijiet. Il-Kummissjoni daħħlet ukoll fil-proposta emendata tagħha sistema ta’ rotazzjoni tal-membri tal-Kunsill Amministrattiv sabiex jiġi żgurat il-bilanċ ġeografiku bejn l-Istati Membri.

Il-Kummissjoni jiddispjaċiha li l-Kunsill għażel favur Kunsill Amministrattiv kbir magħmul minn 31 membru li jinkludi rappreżentant wieħed għal kull Stat Membru. Hija tikkunsidra li Kunsill limitat huwa aħjar biex tiġi żgurata aħjar l-effikaċja ta’ l-Istitut, fir-rigward tad-daqs tiegħu u l-baġit limitat tiegħu kif ukoll in-natura teknika tiegħu. Il-Kummissjoni żammet il-pożizzjoni tagħha u għamlet dikjarazzjoni fil-minuti tal-Kunsill ta’ l-1 ta’ Ġunju 2006.

Il-Kummissjoni jiddispjaċiha wkoll li l-Kunsill irrifjuta l-proposta maħsuba biex tistabbilixxi livell minimu ta’ rappreżentanza skond is-sess (mill-inqas 40% ta’ irġiel u ta’ nisa) fil-Kunsill Amministrattiv, kif mitlub mill-Parlament Ewropew u mqajjem fil-proposta emendata tagħha (ara l-punt 3.2.2).

3.2. Kif ġew ikkunsidrati l-emendi tal-Parlament Ewropew

Il-Parlament Ewropew adotta 50 emenda li għandhom l-iskop li:

a) isaħħu ċ-ċarezza tat-test;

b) isaħħu/jippreċiżaw il-ħidmiet ta’ l-Istitut kif ukoll il-metodi ta’ ħidma tiegħu;

c) jolqtu l-kwistjonijiet orizzontali;

d) idaħħlu dettalji li, għalkemm kostruttivi, m’għandhomx lok f’Regolament.

Il-Kummissjoni aċċettat 40 minn dawn l-emendi, li minnhom 28 fl-integrità tagħhom u 12 wara modifika żgħira. Hija rrifjutat 10 li jirrigwardaw l-aħħar żewġ kategoriji (c u d).

Il-Kunsill segwa l-Kummissjoni u aċċetta l-maġġoranza ta’ l-emendi, kemm fl-integrità tagħhom, kif ukoll dawk emendati mill-Kummissjoni jew immodifikati xi ftit minnu stess (35 emenda b’kollox). Il-Kunsill irrifjuta 15-il emenda (5 emendi iktar mill-għaxra li ma ġewx aċċettati mill-Kummissjoni). Fost il-5 emendi rrifjutati tidher l-emenda dwar il-kompożizzjoni tal-Kunsill Amministrattiv. Il-Kummissjoni ma taqbilx ma’ dan ir-rifjut.

3.2.1. L-emendi tal-PE ikkunsidrati fl-integrità tagħhom, parzjalment jew fl-ispirtu tagħhom fil-proposta emendata tal-Kummissjoni u fil-Pożizzjoni Komuni tal-Kunsill

Il-Pożizzjoni Komuni tkompli fuq il-maġġoranza ta’ l-emendi aċċettati mill-Kummissjoni li jsaħħu ċ-ċarezza tat-test jew isaħħu/jippreċiżaw il-ħidmiet ta’ l-Istitut kif ukoll il-metodi ta’ ħidma tiegħu, bħalma huma( 2, 6, 9, 59/74, 18, 64/80, 65/81, 29, 35, 36, 38, 41, 42, 45, 53 u 55), jew emendati mill-Kummissjoni (3-parzjalment, 4, 5, 7, 8, 10, 59/74, 13, 15-parzjalment, 60/76-parzjalment , 61rev/77-parzjalment, 17, 20, 24, 25, 28, 29, 62/78, 63/79, 40 u 48-parzjalment).

3.2.2. L-emendi tal-PE ikkunsidrati fl-integrità tagħhom, parzjalment jew fl-ispirtu tagħhom fil-proposta emendata tal-Kummissjoni iżda mhux fil-Pożizzjoni Komuni tal-Kunsill

Dawn huma l-emendi li ġejjin:

L-emenda nru 66/82 (kompożizzjoni tal-Kunsill Amministrattiv): din l-emenda għall-Artikolu 10, il-paragrafu 1, tispeċifika Kunsill Amministrattiv limitat għal 13-il membru (9 tal-Kunsill – magħżula fuq il-bażi ta’ lista proposta mill-Kummissjoni u wara konsultazzjoni mal-Parlament Ewropew, wieħed biss tal-Kummissjoni, kif ukoll 3 rappreżentanti ta’ l-imsieħba soċjali u NGOs mingħajr dritt għal vot) [1] . Din il-pożizzjoni tal-Parlament Ewropew hija konformi mar-Riżoluzzjoni tiegħu ta’ l-1 ta’ Diċembru 2005 dwar l-abbozz ta’ Ftehim Interistituzzjonali dwar il-qafas operazzjonali ta’ aġenziji regolatorji futuri.

Il-Kummissjoni aċċettat din il-pożizzjoni tal-Parlament Ewropew bil-kundizzjoni li jitħares il-bilanċ bejn iż-żewġ istituzzjonijiet fil-każijiet fejn il-Kummissjoni hija marbuta bir-responsabbiltà (jiġifieri l-adozzjoni tal-programm ta’ ħidma u tal-baġit). Għal dan il-għan, il-Kummissjoni pproponiet li d-dispożizzjoni li ġejja tkun miżjuda ma’ l-Artikolu 10, il-paragrafu 7, (modalitajiet ta’ teħid ta’ deċiżjoni fi ħdan il-Kunsill Amministrattiv):

“Fil-każ ta’ deċiżjonijiet li jirreferu għall-Artikolu 10, il-paragrafu 5, il-punti a) u d) il-piż tal-vot tar-rappreżentant tal-Kummissjoni jkun ugwali għall-piż tal-voti tal-membri kollha maħtura mill-Kunsill fl-intier tiegħu” .

Hija pproponiet li l-emenda tkun akkumpanjata bil-premessa li ġejja:

“Sabiex tiġi żgurata l-effikaċja ta’ l-Istitut u filwaqt li jkun ikkunsidrat id-daqs tiegħu u n-natura teknika tiegħu, dan se jitmexxa minn Kunsill Amministrattiv limitat magħmul minn 9 rappreżentanti tal-Kunsill u minn rappreżentant wieħed tal-Kummissjoni, kif ukoll minn 3 rappreżentanti tal-partijiet interessati mingħajr dritt għal vot. Il-bilanċ bejn iż-żewġ istituzzjonijiet, il-Kunsill u l-Kummissjoni, irid jitħares fil-każijiet fejn il-Kummissjoni hija marbuta bir-responsabbiltà (notevolment waqt l-adozzjoni tal-programm ta’ ħidma u tal-baġit)”.

Il-Kummissjoni, filwaqt li tikkunsidra t-talba ta’ l-Istati Membri li jistgħu jsegwu l-approċċ tal-Kummissjoni favur Kunsill Amministrattiv limitat jekk il-bilanċ ġeografiku huwa rrispettat u l-fatt li l-kompożizzjoni tal-Kunsill Amministrattiv propost mill-Parlament Ewropew tippermetti, permezz ta’ sistema ta’ rotazzjoni, lir-rappreżentanti ta’ l-Istati Membri kollha biex jokkupaw siġġu fil-Kunsill Amministrattiv għal perjodu ta’ tliet mandati (9 x 3 = 27), ipproponiet din is-sistema ta’ rotazzjoni, kif miżjuda fl-emenda 66/82 :

“1. Il-Kunsill …. Il-lista stabbilita mill-Kummissjoni fuq il-bażi tal-proposti ta’ l-Istati Membri u li ssegwi sistema ta’ rotazzjoni skond l-ordni tal-presidenzi, hija kkomunikata ...”.

U din id-dispożizzjoni kienet akkumpanjata bil-premessa meħtieġa:

“Sabiex tiżgura l-bilanċ ġeografiku meħtieġ bejn l-Istati Membri, ir-rappreżentanti tal-Kunsill se jkunu maħtura għal kull mandat ta’ rotazzjoni skond l-ordni tal-presidenzi tal-Kunsill”.

Fl-aħħarnett, il-Kummissjoni pproponiet li tnaqqas il-mandat tal-membri tal-Kunsill Amministrattiv minn ħames għal tliet snin sabiex tippermetti li r-rotazzjoni ta’ l-Istati Membri ssir fi żmien raġonevoli. L-Artikolu 10, il-paragrafu 2, ir-raba’ subparagrafu, huwa emendat bħala riżultat ta’ dan hekk kif ġej:

“Il-mandat huwa għal perjodu ta’ tliet snin li ma jiġġeddidx”.

Il-Kunsill, minkejja s-sistema ta’ rotazzjoni proposta, irrifjuta din l-emenda u żamm il-formola adottata waqt l-approċċ ġenerali f’Ġunju 2005 billi segwa l-pożizzjoni orizzontali tiegħu dwar il-kunsilli amministrattivi ta’ l-aġenziji Komunitarji (kunsill amministrattiv kbir b’rappreżentant wieħed għal kull Stat Membru, 3 rappreżentanti tal-Kummissjoni u 3 rappreżentanti ta’ l-imsieħba soċjali u NGOs mingħajr dritt għal vot, flimkien ma’ uffiċċju eżekuttiv ta’ 6 membri, minħabba d-daqs kbir tal-Kunsill Amministrattiv.

L-emendi 67/83 u 68/84 dwar il-Forum Konsultattiv: l-emenda 67/83 ta’ l-Artikolu 12, il-paragrafu 1, tillimita l-parteċipanti għall-Forum għar-rappreżentanti ta’ l-Istati Membri biss bit-tneħħija tal-parteċipazzjoni tat-3 rappreżentanti ta’ l-NGOs u l-imsieħba soċjali fuq livell Ewropew, billi huma membri mingħajr dritt għal vot fil-Kunsill Amministrattiv. Il-Kummissjoni, konformi ma’ l-emenda 66/82 dwar il-kompożizzjoni limitata tal-Kunsill Amministrattiv, aċċettat li l-Forum Konsultattiv jitnaqqas għar-rappreżentanti ta’ l-Istati Membri biss u tikkunsidra li l-parteċipazzjoni tat-3 partijiet interessati fil-Kunsill Amministrattiv biss hija biżżejjed. L-emenda 68/84 ta’ l-Artikolu 12, il-paragrafu 4 żżid li l-Forum se jgħin lid-Direttur biex jipprepara l-programmi ta’ attivitajiet annwali u f’perjodu medju ta’ l-Istitut. Fil-kuntest ta’ kunsill amministrattiv limitat fejn l-Istati Membri ma jkunux kollha rrappreżentati, huwa importanti li jissaħħaħ ir-rwol tal-Forum Konsultattiv li huwa magħmul minn rappreżentanti ta’ l-Istati Membri kollha. Il-Kunsill, li huwa favur ir-rappreżentanza ta’ l-Istati Membri kollha fil-Kunsill Amministrattiv, neħħa l-Forum Konsultattiv billi żied fost il-ħidmiet ta’ l-Istitut laqgħa annwali ta’ esperti ta’ l-Istati Membri fil-qasam ta’ l-ugwaljanza bejn in-nisa u l-irġiel, ara l-Artikolu 3.1 (e).

L-emenda 39 : din l-emenda ta’ l-Artikolu 10, il-paragrafu 2, is-subparagrafu 2 tispeċifika li t-tliet istituzzjonijiet għandhom jaraw li n-nisa u l-irġiel ikunu rrappreżentati b’mod ugwali u li jaraw li kemm in-nisa kif ukoll l-irġiel ma jkollhomx inqas minn 40% tas-siġġijiet fi ħdan il-Kunsill Amministrattiv. Il-Kummissjoni aċċettat din l-emenda, minħabba l-ħtieġa li jiġi żgurat li d-deċiżjonijiet meħuda fi ħdan il-Kunsill Amministrattiv jirriflettu l-bżonnijiet tas-soċjetà sħiħa. Il-Kunsill irrifjutaha, billi insista fuq id-diffikultà għall-Istati Membri biex jimplimentaw dan il-limitu minimu. Il-Kummissjoni ddispjaċiha b’dan ir-rifjut, kif hija stipulat fid-dikjarazzjoni tagħha annessa fil-minuti tal-Kunsill ta’ l-1 ta’ Ġunju 2006.

L-emenda nru 26 : din l-emenda ta’ l-Artikolu 3, il-paragrafu 1, tintroduċi punt ġdid quater dwar id-djalogu li l-Istitut irid jiżviluppa fuq livell internazzjonali ma’ l-organizzazzjonijiet responsabbli għall-promozzjoni ta’ l-ugwaljanza bejn l-irġiel u n-nisa. Din il-kooperazzjoni hija diġà speċifikata fl-Artikolu 8, il-paragrafu 1, iżda l-Parlament Ewropew xtaq jagħtiha iktar valur billi jintegraha wkoll fil-ħidmiet. Il-kooperazzjoni ma’ l-organizzazzjonijiet fuq livell internazzjonali hija importanti iżda m’għandhiex tkun żbilanċjata minħabba d-daqs u l-baġit ta’ l-Istitut fl-ewwel fażi tal-bidu tiegħu.

F’dan il-kuntest, il-Kummissjoni aċċettatha wara tibdil biex tiffaċilita l-ħidma u tagħmilha konformi ma’ l-aġenziji l-oħra: bħala riżultat ta’ dan, it-test jinbidel bil-forma li ġejja ispirata mill-Aġenzija Ewropea għas-Sigurtà u s-Saħħa fuq ix-Xogħol: “tiġbor u tagħmel disponibbli informazzjoni dwar kwistjonijiet ta’ ugwaljanza tas-sessi minn u għal pajjiżi terzi u organizzazzjonijiet internazzjonali ( collect and make available information on gender equality issues from and to third countries and international organisations )”. Il-Kunsill ma żammx din l-emenda, l-anqas kif kienet mibdula mill-Kummissjoni, billi kkunsidra li l-Artikoli 4(3) u 8 jkopru biżżejjed dan l-aspett.

Barra minn hekk, xi elementi ta’ l-emendi li ġejjin ġew irrifjutati mill-Kunsill:

L-emendi 3 u 60/76 (dwar il-ħidmiet ta’ l-Istitut): l-emenda 3 tal-premessa 10 hija magħmula minn żewġ żidiet li jsaħħu ċ-ċarezza tat-test kif ukoll bit-tibdil tal-kelma “ġabra” għall-kelma “dokumentazzjoni” ta’ informazzjoni u ta’ fatti, sabiex ikun ċar li l-Istitut se jenfasizza fuq l-analiżi ta’ l-informazzjoni u l-fatti miġbura minn istituti u ċentri ta’ riċerka oħrajn fuq il-livell ta’ l-Istati Membri u ta’ l-EUROSTAT, li se jagħtih valur miżjud evidenti; fl-istess linja, l-emenda 60/76 ta’ l-Artikolu 3, il-paragrafu 1, il-punt a) tneħħi l-kliem “ġabra, reġistru”, sabiex tenfasizza notevolment l-analiżi u mhux il-ġabra. Dawn l-emendi ġew aċċettati mill-Kummissjoni, minħabba li biex tkun analizzata l-informazzjoni, din l-ewwel trid tinġabar, anke jekk il-kelma “ġabra” titneħħa sabiex issir enfasi fuq l-analiżi; barra minn hekk id-dokumentazzjoni hija msemmija b’mod espliċitu fil-premessa 10 permezz ta’ l-emenda 3. Il-Kunsill ma segwiex il-Kummissjoni u rrifjuta t-tneħħija tal-kelma “ġabra” fil-premessa 10 u fl-Artikolu 3 billi enfasizza li l-ġabra ta’ fatti hija pass importanti li diġà jinsab fil-ħidmiet ta’ aġenziji simili oħrajn.

L-emenda 15 : din l-emenda ta’ l-Artikolu 3, il-paragrafu 1, il-punt b) timmira li ssaħħaħ il-kooperazzjoni ma’ l-EUROSTAT u d-dipartimenti nazzjonali ta’ l-istatistika. Il-Kunsill irrifjuta l-parti dwar il-kooperazzjoni ta’ l-Istitut mad-dipartimenti nazzjonali ta’ l-istatistika, billi jippreferi li dawn il-kuntatti jsiru biss permezz ta’ l-EUROSTAT.

L-emenda 48 : Din l-emenda ta’ l-Artikolu 11, il-paragrafu 4 tispeċifika li d-Direttur jista’ jissejjaħ f’kull ħin mill-Kunsill u l-Parlament Ewropew biex ikun mismugħ dwar kull kwistjoni marbuta ma’ l-attivitajiet ta’ l-Istitut. Il-Kunsill irrifjuta l-parti li tirreferi għall-Kunsill, bl-argument li jekk l-Istati Membri kollha huma rrappreżentati fil-Kunsill Amministrattiv, ma tkunx meħtieġa l-informazzjoni tal-Kunsill.

L-emenda 61rev/77 : din l-emenda ta’ l-Artikolu 3, il-paragrafu 1, il-punt c) tispeċifika tliet żidiet: it-tixrid u l-promozzjoni ta’ l-użu ta’ l-għodod metodoloġiċi; li l-għodod metodoloġiċi jkunu ta’ appoġġ mhux biss għall-politiki Komunitarji iżda wkoll għall-politiki nazzjonali li jirriżultaw minnhom kif ukoll s-sostenn ta’ l-integrazzjoni tad-dimensjoni ta’ l-ugwaljanza bejn is-sessi fl-istituzzjonijiet u l-organi Komunitarji kollha. Il-Kunsill irrifjuta l-promozzjoni ta’ l-użu ta’ l-għodod metodoloġiċi, billi jaħseb li dawn ġejjin minn organizzazzjonijiet politiċi.

3.3. Dispożizzjonijiet ġodda introdotti mill-Kunsill u li jikkorrispondu għall-pożizzjonijiet tal-Kummissjoni

Il-Kunsill laqa’ b’mod favorevoli ħafna l-proposta tal-Kummissjoni, ħlief għall-kwistjoni tal-kompożizzjoni tal-Kunsill Amministrattiv u l-kwistjoni konnessa mal-Forum Konsultattiv.

Għall-kumplament, huwa daħħal xi tibdil żgħir bl-iskop li tittejjeb iċ-ċarezza tat-test, notevolment fl-Artikolu 2 (dwar l-għanijiet), fl-Artikolu 5 (definizzjoni ta’ l-indipendenza ta’ l-Istitut), eċċ.

3.4. Problemi li nqalgħu mill-adozzjoni tal-Pożizzjoni Komuni

Mil-laqgħa tiegħu ta’ l-1 ta’ Ġunju 2006, il-Kunsill wasal għal ftehim politiku li jimmira għal Pożizzjoni Komuni bl-unanimità, inkluża l-kwistjoni tal-kompożizzjoni tal-Kunsill Amministrattiv. Il-Kummissjoni żammet il-pożizzjoni tagħha li reġgħet tqajmet fil-proposta emendata tagħha u jiddispjaċiha bir-rifjut tal-pożizzjoni tal-Kummissjoni u tal-Parlament Ewropew favur kunsill amministrattiv limitat. Il-Kummissjoni ddispjaċiha wkoll bir-rifjut tal-Kunsill tal-limitu minimu meħtieġ għal rappreżentanza skond is-sessi fil-Kunsill Amministrattiv (40%). Il-Kummissjoni għamlet dikjarazzjoni dwar dawn iż-żewġ punti mqajma fil-minuti tal-Kunsill (ara l-Anness).

4. KONKLUŻJONI

Bażikament, il-Kummissjoni tikkunsidra li l-Pożizzjoni Komuni tal-Kunsill,, hija konformi mal-proposta tagħha u li hija tikkunsidra l-emendi proposti mill-PE fl-ewwel qari kif ukoll il-proposta emendata tal-Kummissjoni.

Madankollu, il-Kummissjonijiddispjaċiha li l-Kunsill qatagħha b’mod unanimu favur Kunsill Amministrattiv, magħmul minn ta’ l-anqas 31 membruu akkumpanjat minn Uffiċċju eżekuttiv ta’ 6 membri. Dawn l-istrutturi tqal m’humiex ġustifikati għal aġenzija li se tiddisponi minn staff ta’ 15-il persuna fl-2007(30 fl-2013) u baġit annwali ta’ madwar 7.5 miljun euro. Barra minn hekk, il-Kummissjoni tikkunsidra li l-Forum Konsultattiv, imneħħi mill-Kunsill, jippermetti lil kull Stat Membru li jikkontribwixxi għall-preparazzjoni u l-implimentazzjoni tal-programm ta’ ħidma u biex l-Istitut u l-Istati Membri jkunu iktar konxji tal-ħtiġijiet tiegħu stess.

Il-Kummissjoni jiddispjaċiha wkoll bir-rifjut tal-Kunsill tal-limitu minimu meħtieġ għal rappreżentanza skond is-sessi fil-Kunsill Amministrattiv (40%). Dawn il-punti varji ġew inklużi fi Stqarrija tal-Kummissjoni dwar ir-rapport tal-Kunsill ta’ l-1 ta’ Ġunju 2006.

ANNESS

Il-Kunsill għall-Impjiegi, il-Politika Soċjali, is-Saħħa u l-Affarijiet tal-Konsumatur

it-2 ta’ Ġunju 2006

Istitut Ewropew għall-Ugwaljanza tas-Sessi

Dikjarazzjoni tal-Kummissjoni

Il-Kummissjoni jiddispjaċiha li l-Kunsill għamel għażla għal Kunsill Amministrattiv kbir magħmul minn rappreżentant wieħed għal kull Stat Membru, tliet rappreżentanti mill-Kummissjoni, u tliet membri mingħajr dritt għal vot. Il-Kummissjoni ma taqbilx mal-Kunsill u hija favur Kunsill Amministrattiv ta’ daqs limitat.

Il-Kummissjoni tfakkar li, f’konformità mar-Riżoluzzjoni leġiżlattiva tal-Parlament Ewropew ta’ l-14 ta’ Marzu 2006 dwar il-proposta li tistabbilixxi Istitut Ewropew għall-Ugwaljanza bejn is-Sessi u b’mod partikolari l-emenda 66/82 dwar il-kompożizzjoni tal-Kunsill Amministrattiv, il-Proposta emendata tagħha [COM(2006)209] għamlet provvediment għal Kunsill Amministrattiv magħmul minn tlettax-il membru: disa’ membri maħtura mill-Kunsill kif ukoll rappreżentant wieħed tal-Kummissjoni u tliet membri mingħajr dritt għal vot li jkunu maħtura mill-Kummissjoni biex jirrappreżentaw il-gruppi tal-partijiet interessati relevanti.

Il-Kummissjoni tikkunsidra, f’konformità mar-Riżoluzzjoni tal-Parlament Ewropew ta’ l-1 ta’ Diċembru 2005 dwar l-abbozz tal-Ftehim Interistituzzjonali dwar Qafas għall-Aġenziji Regolatorji Ewropej, li Kunsill Amministrattiv ta’ daqs limitat jiżgura ħidma aħjar ta’ l-Istitut għall-Ugwaljanza bejn is-Sessi, filwaqt li jkunu kkunsidrati l-missjoni u d-daqs tiegħu.

Il-Kummissjoni jiddispjaċiha wkoll li l-Kunsill m’aċċettax il-proposta li t-tliet istituzzjonijiet iridu jiżguraw li la n-nisa u lanqas l-irġiel ma jkunu inqas minn 40% tal-membri tal-Kunsill Amministrattiv.

[1] Din l-għażla hija ispirata mill-Aġenzija ta’ Sigurtà fl-Ikel, maħluqa fl-2002, li għandha Kunsill Amministrattiv limitat magħmul minn 18-il membru (14-il rappreżentant tal-Kunsill, 1 biss tal-Kummissjoni u 3 rappreżentanti tal-partijiet interessati mingħajr dritt għal vot).