(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti u għat-tiġdid ta’ tali awtorizzazzjoni.

(2)

Preparat ta’ karvakrol, ċinnamaldeid u oleoreżina tal-bżar ħelu ġie awtorizzat għal perjodu ta’ 10 snin bħala addittiv tal-għalf għat-tiġieġ għas-simna bir-Regolament ta’ Implimentazzjoni tal-Kummissjoni (UE) 2015/1490 (2).

(3)

F’konformità mal-Artikolu 14(1) tar-Regolament (KE) Nru 1831/2003, ġiet sottomessa applikazzjoni għat-tiġdid tal-awtorizzazzjoni tal-preparat ta’ karvakrol, ċinnamaldeid u oleoreżina tal-bżar ħelu bħala addittiv tal-għalf għat-tiġieġ għas-simna, bit-talba li l-addittiv jiġi kklassifikat fil-kategorija tal-addittivi “addittivi żootekniċi” u fil-grupp funzjonali “addittivi żootekniċi oħra”. L-applikazzjoni kienet tinkludi proposta biex jiġu emendati l-kundizzjonijiet tal-awtorizzazzjoni oriġinali, li tikkonsisti fl-aġġustament tal-kontenut ta’ karvakrol għal 4,5 – 5,5 %, tal-kontenut ta’ ċinnamaldeid għal 2,7 – 3,3 % u tal-kontenut ta’ oleoreżina tal-bżar ħelu għal mill-inqas 2 % (bil-kontenut tas-somma ta’ kapsajċina u diidrokapsajċina ta’ 0,11 – 0,15 %). Mal-applikazzjoni ntbagħtu d-dettalji u d-dokumenti meħtieġa skont l-Artikolu 14(2) tar-Regolament (KE) Nru 1831/2003.

(4)

Fil-kuntest tal-applikazzjoni sottomessa f’konformità mal-Artikolu 14(1) tar-Regolament (KE) Nru 1831/2003, id-detentur tal-awtorizzazzjoni għall-addittiv tal-għalf ikkonċernat, Pancosma France S.A.S, ippropona wkoll li l-isem tad-detentur tal-awtorizzazzjoni għall-addittiv tal-għalf ikkonċernat jinbidel għal “ADM International Sarl, irrappreżentata fl-Unjoni minn ADM Specialty Ingredients (Europe) B.V.”.

(5)

Fl-opinjoni tagħha tad-19 ta’ Novembru 2025 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-applikant ipprovda evidenza li l-preparat ta’ karvakrol, ċinnamaldeid u oleoreżina tal-bżar ħelu għadu sikur għall-ispeċijiet fil-mira, għall-konsumaturi u għall-ambjent skont il-kundizzjonijiet tal-użu awtorizzati bħalissa. Fir-rigward tas-sikurezza tal-utent, ikkonkludiet ukoll li l-addittiv jenħtieġ li jitqies bħala irritant tal-ġilda, tal-għajnejn u tal-apparat respiratorju u sensitizzatur tal-ġilda. L-Awtorità ddikjarat li l-applikazzjoni għat-tiġdid tal-awtorizzazzjoni ma tinkludix proposta biex jiġu emendati jew issupplimentati l-kundizzjonijiet tal-awtorizzazzjoni oriġinali li jkollhom impatt fuq l-effikaċja tal-addittiv. Għalhekk, hija kkonkludiet li ma hemmx bżonn tiġi vvalutata l-effikaċja tal-addittiv fil-kuntest tat-tiġdid tal-awtorizzazzjoni. Hija ma dehrilhiex li hemm il-ħtieġa ta’ rekwiżiti speċifiċi ta’ monitoraġġ ta’ wara l-introduzzjoni fis-suq.

(6)

Il-Laboratorju ta’ Referenza stabbilit bir-Regolament (KE) Nru 1831/2003 deherlu li l-konklużjonijiet u r-rakkomandazzjonijiet milħuqa fil-valutazzjoni mwettqa fir-rigward tal-metodu ta’ analiżi tal-preparat ta’ karvakrol, ċinnamaldeid u oleoreżina tal-bżar ħelu bħala addittiv tal-għalf fil-kuntest tal-awtorizzazzjoni preċedenti huma validi u applikabbli għall-applikazzjoni attwali. Għaldaqstant, f’konformità mal-Artikolu 5(4), il-punt (c), tar-Regolament tal-Kummissjoni (KE) Nru 378/2005 (4), mhuwiex meħtieġ rapport ta’ evalwazzjoni tal-Laboratorju ta’ Referenza.

(7)

Fid-dawl ta’ dan ta’ hawn fuq, il-Kummissjoni jidhrilha li l-preparat ta’ karvakrol, ċinnamaldeid u oleoreżina tal-bżar ħelu jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dak l-addittiv tiġġedded. Barra minn hekk, il-Kummissjoni jidhrilha li jenħtieġ li jittieħdu miżuri protettivi xierqa biex jiġu evitati l-effetti avversi fuq saħħet l-utenti tal-addittiv. Barra minn hekk, f’konformità mal-kundizzjonijiet tal-użu rakkomandati mill-applikant u mal-konklużjoni tal-Awtorità fl-opinjoni tagħha tas-27 ta’ Jannar 2015 (5) li l-addittiv għandu l-potenzjal li jkun effikaċi fit-tiġieġ għas-simna fid-doża rakkomandata mill-applikant ta’ 100 mg/kg ta’ għalf komplet, jixraq li jiġi previst kontenut minimu ta’ 100 mg/kg ta’ għalf komplet.

(8)

Barra minn hekk, ADM International Sarl, irrappreżentata fl-Unjoni minn ADM Specialty Ingredients (Europe) B.V., jenħtieġ li tiġi ddeżinjata bħala d-detentur tal-awtorizzazzjoni tal-preparat ta’ karvakrol, ċinnamaldeid u oleoreżina tal-bżar ħelu.

(9)

B’konsegwenza tat-tiġdid tal-awtorizzazzjoni tal-preparat ta’ karvakrol, ċinnamaldeid u oleoreżina tal-bżar ħelu bħala addittiv tal-għalf, jenħtieġ li r-Regolament ta’ Implimentazzjoni (UE) 2015/1490 jitħassar.

(10)

Billi l-applikazzjoni immedjata tal-modifiki tal-kundizzjonijiet tal-awtorizzazzjoni tal-preparat ta’ karvakrol, ċinnamaldeid u oleoreżina tal-bżar ħelu mhijiex meħtieġa minħabba raġunijiet ta’ sikurezza, jixraq li jiġi previst perjodu tranżizzjonali biex il-partijiet interessati jħejju ruħhom ħallu jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,