(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni tal-L-ċisteina, il-kloridrat monoidrat tal-L-ċisteina u l-kloridrat tal-L-ċisteina. L-applikazzjoni kienet akkumpanjata mid-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)

Dik l-applikazzjoni tikkonċerna l-awtorizzazzjoni tal-L-ċisteina, il-kloridrat monoidrat tal-L-ċisteina u l-kloridrat tal-L-ċisteina filwaqt li titlob li dawk l-addittivi jiġu kklassifikati fil-kategorija tal-addittivi “addittivi nutrittivi” u fil-grupp funzjonali “aċidi amminiċi, l-imlieħ u l-analogi tagħhom” u fil-kategorija tal-addittivi “addittivi sensorji” u fil-grupp funzjonali “komposti tat-togħma”. L-applikant talab li l-addittivi jiġu awtorizzati wkoll għall-użu fl-ilma tax-xorb. Madankollu, ir-Regolament (KE) Nru 1831/2003 ma jippermettix l-awtorizzazzjoni ta’ komposti tat-togħma għall-użu fl-ilma tax-xorb. Għalhekk, jenħtieġ li l-użu ta’ dawk l-addittivi fl-ilma tax-xorb ma jkunx permess sakemm ikunu kklassifikati fil-grupp funzjonali “komposti tat-togħma”. Wara, l-applikant irtira l-applikazzjoni għall-awtorizzazzjoni tal-L-ċisteina, il-kloridrat monoidrat tal-L-ċisteina u l-kloridrat tal-L-ċisteina fil-kategorija “addittivi nutrittivi” u fil-grupp funzjonali “aċidi amminiċi, l-imlieħ u l-analogi tagħhom”.

(4)

Fl-opinjoni tagħha tas-17 ta’ Settembru 2025 (2), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li, fil-kundizzjonijiet tal-użu proposti, il-L-ċisteina, il-kloridrat monoidrat tal-L-ċisteina u l-kloridrat tal-L-ċisteina huma sikuri għall-ispeċijiet kollha tal-annimali, kif ukoll għall-konsumaturi u għall-ambjent. L-Awtorità kkonkludiet ukoll li l-L-ċisteina mhijiex meqjusa bħala irritanti għall-ġilda jew għall-għajnejn, u lanqas bħala sensitizzatur tal-ġilda. Is-sustanzi L-ċisteina, kloridrat monoidrat tal-L-ċisteina u kloridrat tal-L-ċisteina huma meqjusa bħala korrużivi għall-għajnejn u għas-sistema respiratorja, iżda ma setgħet tintlaħaq l-ebda konklużjoni dwar il-potenzjal tagħhom ta’ irritazzjoni tal-ġilda. L-Awtorità kkonkludiet ukoll li, billi l-L-ċisteina, il-kloridrat monoidrat tal-L-ċisteina u l-kloridrat tal-L-ċisteina jintużaw fl-ikel bħala komposti tat-togħma, huwa mistenni li jistgħu jipprovdu funzjoni simili fl-għalf u mhix meħtieġa dimostrazzjoni ulterjuri tal-effikaċja. L-Awtorità ma qisitx li hemm il-ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq. L-Awtorità vverifikat ukoll ir-rapport dwar il-metodu tal-analiżi tal-addittivi tal-għalf fl-għalf li ġie ppreżentat mil-Laboratorju ta’ Referenza mwaqqaf bir-Regolament (KE) Nru 1831/2003.

(5)

Fid-dawl ta’ dan ta’ hawn fuq, il-Kummissjoni hija tal-fehma li l-L-ċisteina, il-kloridrat monoidrat tal-L-ċisteina u l-kloridrat tal-L-ċisteina jissodisfaw il-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-użu ta’ dawk is-sustanzi jiġi awtorizzat għall-ispeċijiet kollha tal-annimali. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti avversi fuq saħħet l-utenti tal-addittivi.

(6)

Il-Kummissjoni tqis li ma hemmx raġunijiet ta’ sikurezza li jirrikjedu l-iffissar ta’ kontenuti massimi għal-L-ċisteina, il-kloridrat monoidrat tal-L-ċisteina u l-kloridrat tal-L-ċisteina. Biex ikun jista’ jkun hemm kontroll aħjar, jenħtieġ li l-kontenut massimu rakkomandat jiġi indikat fuq it-tikketta tal-addittivi. Meta jinqabeż il-kontenut massimu rakkomandat, jenħtieġ li ċerta informazzjoni tiġi indikata fuq it-tikketta tal-premixxeli kkonċernati.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,