(1)

Bejn is-6 ta’ Marzu 2025 u s-17 ta’ April 2025, l-Ungerija kkonfermat u nnotifikat ħames tifqigħat tal-marda tal-ilsien u d-dwiefer. L-ispeċijiet affettwati kienu l-bhejjem tal-ifrat.

(2)

L-Ungerija, minnufih u b’mod effiċjenti, ħadet il-miżuri marbutin mas-saħħa tal-annimali u l-miżuri veterinarji kollha meħtieġa f’konformità mar-Regolament (UE) 2016/429 tal-Parlament Ewropew u tal-Kunsill (2), u mar-Regolament Delegat tal-Kummissjoni (UE) 2020/687 (3).

(3)

B’mod partikolari, l-Ungerija ħadet miżuri ta’ kontroll, ta’ monitoraġġ u ta’ prevenzjoni u stabbiliet żoni ta’ protezzjoni u ta’ sorveljanza (“iż-żoni regolati”) skont id-Deċiżjonijiet ta’ Implimentazzjoni tal-Kummissjoni (UE) 2025/496 (4), (UE) 2025/613 (5), (UE) 2025/654 (6), (UE) 2025/672 (7), (UE) 2025/696 (8), (UE) 2025/795 (9), (UE) 2025/827 (10) u (UE) 2025/1097 (11).

(4)

L-Ungerija għarrfet lill-Kummissjoni li l-miżuri tas-saħħa u l-miżuri veterinarji meħtieġa, li kienu ġew applikati biex jitrażżan u jinqered it-tixrid tal-marda, kienu laqtu għadd ta’ operaturi u li dawk l-operaturi kienu ġarrbu telf ta’ introjtu li ma kienx eliġibbli għall-kontribuzzjoni finanzjarja mill-Unjoni skont ir-Regolament (UE) 2021/690 tal-Parlament Ewropew u tal-Kunsill (12).

(5)

Fit-22 ta’ Awwissu 2025, il-Kummissjoni rċeviet talba formali mingħand l-Ungerija għall-finanzjament parzjali ta’ ċerti miżuri eċċezzjonali skont l-Artikolu 220(3) tar-Regolament (UE) Nru 1308/2013 għat-tifqigħat ikkonfermati bejn is-6 ta’ Marzu 2025 u s-17 ta’ April 2025.

(6)

L-implimentazzjoni tal-miżuri tas-saħħa tal-annimali u tal-miżuri veterinarji msemmijin fil-premessi 3 u 4, wasslet għat-telf tal-valur tan-nagħaġ tas-simna li ma setgħux jiġu skarnati u jinbiegħu bħala ħrief ħfief għall-ħabta tal-Għid minħabba restrizzjonijiet fuq il-moviment u wasslet għal telf ekonomiku kkawżat minn perjodi itwal ta’ trobbija u ta’ tismin tal-ħnieżer.

(7)

F’konformità mal-Artikolu 220(5) tar-Regolament (UE) Nru 1308/2013, il-finanzjament parzjali mill-Unjoni jeħtieġ ikun ekwivalenti għal 60 % tan-nefqa mġarrba mill-Ungerija għall-miżuri eċċezzjonali rilevanti ta’ appoġġ għas-suq. Jenħtieġ li l-Kummissjoni tiffissa l-kwantitajiet massimi eliġibbli għall-finanzjament għal kull miżura eċċezzjonali ta’ appoġġ għas-suq, wara li tiskrutinizza t-talba li rċeviet mingħand l-Ungerija b’rabta mat-tifqigħat.

(8)

Sabiex jiġi evitat kull riskju ta’ kumpens żejjed, jenħtieġ li l-ammonti massimi u l-ammont b’rata fissa tal-finanzjament parzjali jkunu bbażati fuq studji tekniċi u ekonomiċi jew fuq dokumenti tal-kontabbiltà u li dan jiġi ffissat f’livell xieraq għal kull annimal skont il-kategoriji.

(9)

Sabiex jiġi evitat kull riskju ta’ finanzjament doppju, jenħtieġ li t-telf li ġġarrab mill-benefiċjarji ma jkunx ġie kkumpensat b’għajnuna mill-Istat jew b’assigurazzjoni, u jenħtieġ li l-finanzjament parzjali mill-Unjoni skont dan ir-Regolament ikun limitat għall-annimali u għall-prodotti eliġibbli li għalihom ma tkun inkisbet l-ebda kontribuzzjoni finanzjarja mill-Unjoni skont ir-Regolament (UE) 2021/690.

(10)

Jenħtieġ li l-livell u d-durata tal-miżuri eċċezzjonali ta’ appoġġ għas-suq previsti f’dan ir-Regolament ikunu limitati għal dak li huwa strettament meħtieġ biex jiġi appoġġat is-suq. B’mod partikolari, jenħtieġ li l-miżuri eċċezzjonali ta’ appoġġ għas-suq japplikaw biss għall-produzzjoni tal-laħam tan-nagħaġ u tal-laħam tal-majjal mill-azjendi li jinsabu fiż-żoni rregolati u għad-durata tal-miżuri tas-saħħa tal-annimali u l-miżuri veterinarji stabbiliti fil-leġiżlazzjoni tal-Unjoni u fil-leġiżlazzjoni tal-Ungerija li huma rilevanti għat-tifqigħat.

(11)

Sabiex tkun żgurata l-flessibbiltà f’każ li l-għadd ta’ annimali eliġibbli għall-kumpens ikun ivarja mill-għadd massimu stabbilit f’dan ir-Regolament, li huwa bbażat fuq stimi, il-kumpens jista’ jiġi aġġustat b’ċerti limiti, dejjem jekk jitħares l-ammont massimu tan-nefqa ffinanzjata b’mod parzjali mill-Unjoni.

(12)

Peress li l-għajnuna mill-Unjoni hija stabbilita bl-euro, jeħtieġ li tiġi żgurata applikazzjoni uniformi u simultanja, u jeħtieġ ukoll li tiġi ffissata data għall-konverżjoni tal-ammont allokat lill-Istati Membri li għadhom ma adottawx l-euro bħala l-munita nazzjonali tagħhom, kif inhu l-każ għall-Ungerija. Billi dan ir-Regolament ma jipprevedix skadenza għall-preżentazzjoni tal-applikazzjonijiet għall-għajnuna, jixraq li għall-finijiet tal-Artikolu 30(3) tar-Regolament Delegat tal-Kummissjoni (UE) 2022/127 (13) titqies id-data tad-dħul fis-seħħ ta’ dan ir-Regolament bħala l-avveniment operattiv għar-rata tal-kambju fir-rigward tal-ammonti stabbiliti f’dan ir-Regolament.

(13)

Sabiex tiġi żgurata l-effettività ta’ din il-miżura eċċezzjonali, jenħtieġ li l-benefiċjarji jirċievu malajr l-appoġġ finanzjarju ta’ emerġenza. Barra minn hekk, jenħtieġ li jiġu żgurati monitoraġġ f’waqtu tal-baġit kif ukoll segwitu aġġornat u użu effiċjenti tar-riżerva għall-agrikoltura, biex b’hekk tiġi massimizzata d-disponibbiltà tagħha u tissaħħaħ il-kapaċità ta’ rispons fil-pront għall-kriżijiet emerġenti. Għalhekk jixraq li tiġi definita data ta’ eliġibbiltà għall-Ungerija biex tħallas dan l-appoġġ lill-benefiċjarji. Kwalunkwe pagament li jsir wara din id-data jenħtieġ li jitqies ineliġibbli għall-finanzjament mill-Unjoni.

(14)

Għalhekk, jenħtieġ li l-Unjoni tiffinanzja n-nefqa mġarrba mill-Ungerija skont din il-miżura eċċezzjonali biss meta tali nefqa ssir sa ċerta data ta’ eliġibbiltà. Għaldaqstant, jenħtieġ li l-appoġġ għal din il-miżura eċċezzjonali jitħallas sal-31 ta’ Awwissu 2026.

(15)

Peress li l-ebda pagament li jsir wara l-31 ta’ Awwissu 2026 ma jrid jitqies eliġibbli taħt kwalunkwe ċirkostanza, ma jridx japplika l-Artikolu 5(2) tar-Regolament Delegat (UE) 2022/127, li jipprevedi tnaqqis proporzjonali tal-pagamenti ta’ kull xahar li jsiru wara l-iskadenza.

(16)

Jenħtieġ li l-Ungerija twettaq verifiki ex ante biex jiġu żgurati l-eliġibbiltà u l-korrettezza tal-pagamenti.

(17)

Sabiex ikun żgurat li l-Ungerija timplimenta l-miżuri stabbiliti f’dan ir-Regolament minnufih, jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(18)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,

(a)

l-eliġibbiltà tal-applikant li jkun ippreżenta t-talba għall-appoġġ;

(b)

għal kull applikant eliġibbli: l-eliġibbiltà, il-kwantità u l-valur tat-telf reali tal-produzzjoni;

(c)

li l-ebda applikant eliġibbli ma jkun irċieva finanzjament minn sorsi oħra bħala kumpens għat-telf imsemmi fl-Artikolu 2 ta’ dan ir-Regolament.