(1)

L-Artikolu 7b tar-Regolament (UE) Nru 648/2012 jirrikjedi li l-kontropartijiet li għandhom l-obbligu li jżommu kont attiv skont l-Artikolu 7a ta’ dak ir-Regolament jirrapportaw kull sitt xhur lill-awtoritajiet kompetenti tagħhom l-informazzjoni meħtieġa biex jivvalutaw jekk dawk il-kontropartijiet jikkonformawx mal-obbligi stipulati f’dak l-Artikolu 7a. Dawk l-obbligi huma, fost l-oħrajn, stipulati fl-Artikolu 7a(3), il-punti (a) sa (d), ta’ dak ir-Regolament. L-obbligi stipulati fl-Artikolu 7a(3), il-punti (a), (b) u (c) huma ta’ natura operazzjonali, filwaqt li l-obbligu stipulat fl-Artikolu 7a(3), il-punt (d), jirrikjedi li t-tranżazzjonijiet li jiġu kklerjati fil-kont attiv ikunu rappreżentattivi tal-kuntratti tad-derivattivi tar-rati tal-imgħax denominati f’euro jew zloty Pollakk jew derivattivi tar-rati tal-imgħax fuq terminu qasir denominati f’euro u li jiġu kklerjati f’servizz tal-ikklerjar ta’ importanza sistemika sostanzjali.

(2)

Sabiex jiġi żgurat li l-kontropartijiet b’aktar tranżazzjonijiet fil-portafolli tagħhom ikunu soġġetti għal kundizzjonijiet operazzjonali u rekwiżiti ta’ rapportar aktar stretti minn kontropartijiet b’inqas tranżazzjonijiet, dan ir-Regolament jipprevedi trattament differenti bejn il-kontropartijiet fir-rigward tal-obbligi stipulati fl-Artikolu 7a(3), il-punt (d) tar-Regolament (UE) Nru 648/2012. Il-punti (a) u (c) tal-Artikolu 7a(3) ta’ dak ir-Regolament jistipulaw rekwiżiti li huma speċifikati ulterjorment f’dan ir-Regolament. Madankollu, minħabba n-natura universali ta’ dawk ir-rekwiżiti, ma jkunx xieraq li ssir differenza bejniethom fir-rigward tad-daqs tal-portafolli tal-kontropartijiet differenti. Għall-Artikolu 7a(3), il-punt (b), tar-Regolament (UE) Nru 648/2012, kif ukoll għar-rekwiżiti ta’ rapportar stipulati fl-Artikolu 7b ta’ dak ir-Regolament, dan ir-Regolament jistipula standards minimi li jenħtieġ li japplikaw għall-kontropartijiet kollha. Ikun sproporzjonat li jkun meħtieġ trattament aktar strett għall-kontropartijiet b’aktar tranżazzjonijiet.

(3)

L-obbligu operazzjonali stipulat fl-Artikolu 7a(3), il-punt (a) tar-Regolament (UE) Nru 648/2012 jirrikjedi li l-kont attiv ikun funzjonali b’mod permanenti. Għal dak l-iskop, jenħtieġ li l-kontropartijiet ikkonċernati jkollhom fis-seħħ l-arranġamenti legali u tekniċi meħtieġa. Sabiex jiġu evitati kostijiet u piż bla bżonn għal dawn il-kontropartijiet, jenħtieġ li dawn jirrapportaw lill-awtoritajiet kompetenti tagħhom id-dokumentazzjoni li tagħti prova tal-konformità tagħhom mal-kundizzjonijiet operazzjonali, direttament jew indirettament permezz tal-membri tal-ikklerjar tagħhom, ivvalutata fil-kuntest tal-kontrolli tad-diliġenza dovuta tagħhom u l-proċeduri ta’ onboarding tagħhom meta jiftħu kontijiet tal-ikklerjar ġodda.

(4)

Sabiex jiġi żgurat li l-ewwel kundizzjoni operazzjonali tiġi ssodisfata u li l-kont attiv ikun funzjonali b’mod permanenti, jenħtieġ li l-kontropartijiet ikunu meħtieġa juru li għandhom l-arranġamenti legali u tekniċi li jappoġġaw il-forniment ta’ servizzi tal-ikklerjar fil-kuntratti tad-derivattivi rilevanti ma’ CCP tal-UE, direttament jew permezz ta’ membru tal-ikklerjar. Dawn il-kontropartijiet jenħtieġ li jirrapportaw lill-awtoritajiet kompetenti tagħhom id-dokumentazzjoni li tagħti prova tal-konformità tagħhom mal-kundizzjonijiet operazzjonali, direttament jew indirettament permezz tal-membri tal-ikklerjar tagħhom, bħala parti mill-kontrolli tad-diliġenza dovuta normali tagħhom u l-proċeduri ta’ onboarding tagħhom meta jiftħu kontijiet tal-ikklerjar ġodda, sabiex jiġi evitat l-iġġenerar ta’ kostijiet u piż bla bżonn għall-kontropartijiet.

(5)

L-Artikolu 7a(3), il-punt (b) tar-Regolament (UE) Nru 648/2012 jirrikjedi li l-kontropartijiet ikollhom sistemi u riżorsi disponibbli biex ikunu jistgħu joperaw il-kont attiv, anki fi żmien qasir, għal volumi kbar tal-kuntratti tad-derivattivi. L-Artikolu 7a(3), il-punt (c) ta’ dak ir-Regolament jirrikjedi li t-tranżazzjonijiet ġodda kollha fil-kuntratti tad-derivattivi jkunu jistgħu jiġu kklerjati fil-kont attiv f’kull mument Għalhekk, jenħtieġ li l-kontropartijiet ikollhom is-sistemi interni u r-riżorsi ddedikati meħtieġa biex jimmonitorjaw l-iskoperturi tagħhom, u l-arranġamenti interni biex jużaw il-kont meta jiżdiedu l-volumi tal-ikklerjar, inkluża l-possibbiltà li jivvalutaw kwalunkwe ostaklu legali jew operazzjonali potenzjali li jista’ jipprevjenihom milli jwettqu onboarding ta’ ammont sinifikanti ta’ tranżazzjonijiet addizzjonali, jew ifixkel il-kapaċità tagħhom li jagħmlu dan.

(6)

L-Artikolu 7a(4), ir-raba’ subparagrafu, tar-Regolament (UE) Nru 648/2012 jirrikjedi li l-konformità mar-rekwiżiti stipulati fl-Artikolu 7a(3), il-punti (a), (b) u (c) ta’ dak ir-Regolament tiġi ttestjata għall-istress mill-inqas darba fis-sena. Għal dak l-iskop, jenħtieġ li l-kontropartijiet iwettqu testijiet tekniċi u funzjonali fuq il-konnettività tal-IT tagħhom mas-CCP awtorizzata, jew mal-membri tal-ikklerjar u l-klijenti tagħhom li jipprovdu servizzi ta’ kklerjar tal-klijenti. Sabiex jikkonfermaw il-kapaċità operazzjonali tal-kont attiv tagħhom u l-kapaċità tiegħu li jiflaħ għal żidiet kbar ta’ volumi fi żmien qasir, jenħtieġ li l-kontropartijiet juru lill-awtorità nazzjonali kompetenti tagħhom li jkunu wettqu dawk it-testijiet tekniċi u funzjonali.

(7)

L-Artikolu 7a(3), il-punt (d), tar-Regolament (UE) Nru 648/2012 jirrikjedi li l-kontropartijiet jiżguraw li t-tranżazzjonijiet li jiġu kklerjati fil-kont attiv ikunu rappreżentattivi tal-kuntratti tad-derivattivi tar-rati tal-imgħax denominati f’euro jew zloty Pollakk jew derivattivi tar-rati tal-imgħax fuq terminu qasir denominati f’euro u li jiġu kklerjati f’servizz tal-ikklerjar ta’ importanza sistemika sostanzjali. Skont l-Artikolu 7a(8), it-tieni subparagrafu, l-ESMA trid tiżgura tali rappreżentanza billi tagħżel massimu ta’ tliet klassijiet differenti ta’ kuntratti tad-derivattivi, soġġetti għal limitu ta’ erba’ firxiet ta’ maturità, u billi tispeċifika l-firxiet differenti tad-daqs tat-tranżazzjonijiet, soġġetti għal limitu ta’ tliet firxiet ta’ daqsijiet tat-tranżazzjonijiet. L-għażla ta’ klassijiet ta’ kuntratti tad-derivattivi jenħtieġ li tiżgura li l-kontijiet attivi kkonċernati jaqbdu l-massimu tal-klassijiet ta’ derivattivi b’rati tal-imgħax diġà soġġetti għall-obbligu tal-ikklerjar. Jenħtieġ ukoll li tevita li d-derivattivi jiġu aggregati f’kategoriji li ma jikkondividux karatteristiċi komuni u essenzjali, filwaqt li fl-istess ħin jingħata lok għall-possibbiltà li titfassal aħjar ir-rappreżentanza relatata tat-tranżazzjonijiet ikklerjati fil-kontijiet attivi għal kull suq speċifiku, filwaqt li jitqiesu d-daqs, il-likwidità, it-tkabbir u l-livell ta’ attività tagħhom ta’ kull servizz tal-ikklerjar meqjus ta’ importanza sistemika sostanzjali meta mqabbel mal-attività tas-CCPs tal-Unjoni. Fl-aħħar nett, il-metodoloġija għall-għażla tal-klassijiet ta’ kuntratti tad-derivattivi jenħtieġ li tkun flessibbli u tibqa’ valida fil-futur, filwaqt li tindirizza l-iżviluppi tas-suq u tadatta għall-evoluzzjoni tal-grad ta’ importanza sistemika tas-CCPs ta’ pajjiżi terzi u tiżgura li r-riskji relatati għall-istabbiltà finanzjarja għall-Unjoni jew għal wieħed jew aktar mill-Istati Membri tagħha jkunu mitigati biżżejjed. Għal dik ir-raġuni, wara li jitqiesu l-klassijiet ta’ derivattivi diġà soġġetti għall-obbligu tal-ikklerjar, il-likwidità rispettiva u l-importanza relattiva tagħhom, jenħtieġ li jiġu definiti tliet klassijiet għad-derivattivi tar-rati tal-imgħax OTC denominati f’euro, żewġ klassijiet għad-derivattivi tar-rati tal-imgħax OTC denominati fi zloty Pollakk u żewġ klassijiet għad-derivattivi tar-rati tal-imgħax fuq terminu qasir denominati f’euro.

(8)

Sabiex tiġi żgurata distribuzzjoni bilanċjata tat-tranżazzjonijiet, il-firxiet ta’ maturità u l-firxiet tat-tranżazzjonijiet tal-aktar subkategoriji rilevanti għal kull klassi ta’ derivattivi, l-għadd tal-aktar subkategoriji rilevanti, u d-durata tal-perjodu ta’ referenza għal kull servizz tal-ikklerjar meqjusa ta’ importanza sistemika sostanzjali jenħtieġ li jkunu bbażati fuq il-likwidità rispettiva u d-distribuzzjoni tipika fost il-parteċipanti fis-suq. Meta jitqies li l-univers tat-tranżazzjonijiet tipiċi jvarja b’mod sinifikanti bejn il-klassijiet tad-derivattivi kkunsidrati, huwa xieraq li l-kontropartijiet jingħataw mandat biex jagħżlu ħames subkategoriji l-aktar rilevanti għal kull waħda mit-tliet klassijiet magħżula ta’ derivattivi tar-rati tal-imgħax denominati f’euro, subkategorija waħda l-aktar rilevanti għal kull waħda miż-żewġ klassijiet magħżula ta’ derivattivi tar-rati tal-imgħax denominati fi zloty Pollakk u erba’ subkategoriji l-aktar rilevanti għal kull waħda miż-żewġ klassijiet magħżula ta’ derivattivi tar-rati tal-imgħax fuq terminu qasir denominati f’euro.

(9)

Sabiex jiġi evitat li l-kontropartijiet jiġu mġiegħla jikklerjaw ċerti prodotti derivattivi fl-Unjoni li ma jikklerjawx f’servizz tal-ikklerjar ta’ importanza sistemika sostanzjali, jenħtieġ li l-kontropartijiet jiddeterminaw l-aktar subkategoriji rilevanti għal kull klassi ta’ kuntratti tad-derivattivi skont l-attività tal-ikklerjar tagħhom f’kull klassi ta’ derivattivi soġġetta għall-kont attiv.

(10)

Sabiex jiġi żgurat li l-awtoritajiet kompetenti jkollhom l-informazzjoni meħtieġa biex jivvalutaw il-konformità mar-rekwiżit tal-kont attiv stabbilit fl-Artikolu 7a tar-Regolament (UE) Nru 648/2012, jenħtieġ li l-kontropartijiet jikkalkulaw l-attivitajiet u l-iskoperturi għar-riskju tagħhom fil-kategoriji tad-derivattivi kkonċernati u jipprovdu lill-awtorità kompetenti tagħhom data aggregata dwar dawk il-kategoriji, inkluż tqassim tad-data skont is-CCP. Dak ir-rapport jenħtieġ li jkun fih ukoll informazzjoni li tippermetti lill-awtorità kompetenti tivvaluta kif il-kontropartijiet jissodisfaw il-kundizzjonijiet operazzjonali u l-obbligu ta’ rappreżentanza tar-rekwiżit tal-kont attiv, inkluż l-għadd ta’ tranżazzjonijiet ikklerjati fil-kontijiet attivi tal-kontropartijiet u s-subkategoriji magħżula.

(11)

Skont l-Artikolu 7b tar-Regolament (UE) Nru 648/2012, il-kontropartijiet jridu jirrapportaw lill-awtorità kompetenti tagħhom l-informazzjoni meħtieġa biex jivvalutaw il-konformità ma’ dak l-obbligu u jridu jagħmlu dan kull sitt xhur. Madankollu, sabiex jiġi żgurat li l-awtoritajiet kompetenti jkunu jistgħu jivvalutaw jekk il-kontropartijiet ikkonċernati jikkonformawx mar-rekwiżit tal-kont attiv mill-bidu tal-operazzjonijiet tagħhom, jenħtieġ li l-ewwel rapport ikopri l-perjodu minn meta l-kontropartijiet isiru soġġetti għar-rekwiżiti ta’ rapportar dwar il-kont attiv sad-data tar-rapportar li jkun imiss.

(12)

Sabiex jiġi żgurat rapportar effettiv, huwa meħtieġ li jiġu stabbiliti mudelli għal dawk ir-rapporti.

(13)

Dan ir-Regolament huwa bbażat fuq l-abbozz ta’ standards tekniċi regolatorji ppreżentat lill-Kummissjoni mill-Awtorità Ewropea tat-Titoli u s-Swieq (ESMA, European Securities and Markets Authority).

(14)

Qabel ma ppreżentat l-abbozz tal-istandards tekniċi li fuqu huwa bbażat dan ir-Regolament, l-ESMA kkonsultat lill-Awtorità Bankarja Ewropea (EBA, European Banking Authority), lill-Awtorità Ewropea tal-Assigurazzjoni u l-Pensjonijiet tax-Xogħol (EIOPA, European Insurance and Occupational Pension Authority), lill-Bord Ewropew dwar ir-Riskju Sistemiku (BERS), u lill-membri tas-Sistema Ewropea ta’ Banek Ċentrali (SEBĊ). L-ESMA wettqet konsultazzjonijiet pubbliċi miftuħa dwar dawk l-abbozzi ta’ standards tekniċi regolatorji, analizzat il-kostijiet u l-benefiċċji potenzjali relatati, filwaqt li qieset l-aġenda ta’ simplifikazzjoni kumplessiva tal-Kummissjoni, b’mod partikolari fir-rigward tar-rekwiżiti ta’ rapportar, u talbet il-parir tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (2),