(1)

Il-qafas ta’ riżoluzzjoni tal-Unjoni għall-istituzzjonijiet ta’ kreditu u d-ditti tal-investiment (“istituzzjonijiet”) ġie stabbilit wara l-kriżi finanzjarja globali tal-2008-2009 u bħala segwitu tal-Attributi Ewlenin ta’ Reġimi ta’ Riżoluzzjoni Effettivi għall-Istituzzjonijiet Finanzjarji ppubblikati l-ewwel darba mill-Bord għall-Istabbiltà Finanzjarja f’Ottubru 2011. Il-qafas ta’ riżoluzzjoni tal-Unjoni jikkonsisti fid-Direttiva 2014/59/UE tal-Parlament Ewropew u tal-Kunsill (4) u fir-Regolament (UE) Nru 806/2014 tal-Parlament Ewropew u tal-Kunsill (5). Iż-żewġ atti leġiżlattivi japplikaw għal istituzzjonijiet u għal entitajiet oħra li jaqgħu fil-kamp ta’ applikazzjoni ta’ dik id-Direttiva jew ta’ dak ir-Regolament (“entitajiet”). Il-qafas ta’ riżoluzzjoni tal-Unjoni għandu l-għan li jittratta b’mod ordnat il-fallimenti tal-istituzzjonijiet u tal-entitajiet billi jippreserva l-funzjonijiet kritiċi tagħhom u jevita t-theddid għall-istabbiltà finanzjarja, u fl-istess ħin jipproteġi d-depożitanti u l-fondi pubbliċi. Barra minn hekk, il-qafas ta’ riżoluzzjoni tal-Unjoni għandu l-għan li jrawwem l-iżvilupp tas-suq intern fil-qasam bankarju billi joħloq reġim armonizzat sabiex il-kriżijiet transfruntieri jiġu indirizzati b’mod ikkoordinat u billi jevita kwistjonijiet ta’ distorsjonijiet tal-kompetizzjoni u riskji ta’ inugwaljanza fit-trattament.

(2)

Bosta snin mill-implimentazzjoni tiegħu, il-qafas ta’ riżoluzzjoni tal-Unjoni ma jagħtix ir-riżultati kif maħsub fir-rigward ta’ xi wħud minn dawk l-objettivi. B’mod partikolari, filwaqt li l-istituzzjonijiet u l-entitajiet għamlu progress sinifikanti lejn ir-riżolvibbiltà u allokaw riżorsi sinifikanti għal dak il-għan, b’mod partikolari permezz tal-akkumulazzjoni tal-kapaċità ta’ assorbiment tat-telf u rikapitalizzazzjoni u l-mili tal-arranġamenti ta’ finanzjament ta’ riżoluzzjoni, rari jkun hemm min jirrikorri għall-qafas ta’ riżoluzzjoni tal-Unjoni. Minflok, il-fallimenti ta’ ċerti istituzzjonijiet u entitajiet iżgħar u ta’ daqs medju huma tipikament indirizzati l-aktar permezz ta’ miżuri nazzjonali mhux armonizzati. Il-flus tal-kontribwenti għadhom qed jintużaw minflok xbieki ta’ sikurezza ffinanzjati mill-industrija, bħal arranġamenti ta’ finanzjament ta’ riżoluzzjoni. Dik is-sitwazzjoni tidher li tirriżulta minn inċentivi inadegwati. Dawk l-inċentivi inadegwati huma r-riżultat tal-interazzjoni tal-qafas ta’ riżoluzzjoni tal-Unjoni mar-regoli nazzjonali, fejn id-diskrezzjoni wiesgħa tal-awtoritajiet ta’ riżoluzzjoni meta titwettaq il-valutazzjoni tal-interess pubbliku mhux dejjem tiġi eżerċitata b’mod li jirrifletti l-applikazzjoni maħsuba tal-qafas ta’ riżoluzzjoni tal-Unjoni. Fl-istess ħin, il-qafas ta’ riżoluzzjoni tal-Unjoni ftit ra użu minħabba r-riskju għad-depożitanti ta’ istituzzjonijiet iffinanzjati mid-depożiti li jkollhom iġarrbu telf biex jiġi żgurat li dawk l-istituzzjonijiet ikunu jistgħu jaċċessaw finanzjament estern f’riżoluzzjoni, b’mod partikolari fin-nuqqas ta’ obbligazzjonijiet oħrajn b’kapaċità ta’ rikapitalizzazzjoni interna. Fl-aħħar nett, il-fatt li hemm regoli inqas stretti dwar l-aċċess għall-finanzjament barra r-riżoluzzjoni milli fir-riżoluzzjoni skoraġġixxa l-applikazzjoni tal-qafas ta’ riżoluzzjoni tal-Unjoni favur soluzzjonijiet oħrajn, li spiss jinvolvu l-użu tal-flus tal-kontribwenti minflok l-użu tar-riżorsi proprji tal-istituzzjonijiet u tal-entitajiet jew tax-xbieki ta’ sikurezza ffinanzjati mill-industrija. Dik is-sitwazzjoni, min-naħa tagħha, tiġġenera riskji ta’ frammentazzjoni, riskji ta’ eżiti subottimali fl-immaniġġar tal-fallimenti tal-istituzzjonijiet u tal-entitajiet, b’mod partikolari fil-każ ta’ istituzzjonijiet u entitajiet iżgħar u ta’ daqs medju, u kostijiet ta’ opportunità minn riżorsi finanzjarji mhux użati. Għalhekk, jeħtieġ li tiġi żgurata applikazzjoni aktar effettiva u koerenti tal-qafas ta’ riżoluzzjoni tal-Unjoni u li jiġi żgurat li jkun jista’ jiġi applikat kull meta jkun fl-interess pubbliku, inkluż għal ċerti istituzzjonijiet iżgħar u ta’ daqs medju ffinanzjati primarjament permezz ta’ depożiti u li ma għandhomx biżżejjed obbligazzjonijiet suffiċjenti oħrajn b’kapaċità ta’ rikapitalizzazzjoni interna.

(3)

Wieħed mill-objettivi ewlenin tar-rieżami tad-Direttiva 2014/59/UE huwa li jiġu ssalvagwardjati aħjar il-flus tal-kontribwenti billi jiġi żgurat li l-qafas ta’ riżoluzzjoni jkun jista’ jiġi applikat kull meta jkun meħtieġ. L-użu tal-flus tal-kontribwenti jenħtieġ li, permezz tal-qafas rivedut, jitnaqqas b’mod sinifikanti sabiex jiġi żgurat li x-xbieki ta’ sikurezza ffinanzjati mill-industrija, inkluż l-arranġamenti ta’ finanzjament ta’ riżoluzzjoni, jintużaw aktar ta’ spiss u b’mod aktar effettiv.

(4)

L-intensità u l-livell ta’ dettall tal-ħidma ta’ ppjanar ta’ riżoluzzjoni meħtieġa fir-rigward tas-sussidjarji li ma ġewx identifikati bħala entitajiet ta’ riżoluzzjoni jvarjaw skont id-daqs tal-istituzzjonijiet u l-entitajiet ikkonċernati, il-profil tar-riskju tagħhom, ir-rwol tagħhom fil-forniment ta’ funzjonijiet kritiċi, il-linji tan-negozju ewlenin tagħhom, l-importanza tagħhom għall-kontinwità operazzjonali tal-grupp wara r-riżoluzzjoni u l-istrateġija ta’ riżoluzzjoni tal-grupp, u skont l-importanza tas-sussidjarja fl-Istat Membru fejn hija stabbilita, inkluż l-importanza sistemika potenzjali tagħha u l-impatt potenzjali tagħha fuq il-mezzi finanzjarji disponibbli tal-iskema ta’ garanzija tad-depożiti (DGS) fil-każ ta’ stralċ skont proċedimenti normali ta’ insolvenza. Għalhekk, jenħtieġ li l-awtoritajiet ta’ riżoluzzjoni jkunu jistgħu jikkunsidraw dawk il-fatturi meta jidentifikaw il-miżuri li għandhom jittieħdu fir-rigward ta’ tali sussidjarji u jsegwu approċċ proporzjonat, fejn xieraq.

(5)

Istituzzjoni jew entità li tkun qed tiġi stralċata skont il-liġi nazzjonali, wara determinazzjoni li l-istituzzjoni jew l-entità qed tfalli jew x’aktarx tfalli u konklużjoni mill-awtorità ta’ riżoluzzjoni li r-riżoluzzjoni tagħha mhijiex fl-interess pubbliku, fl-aħħar mill-aħħar tinsab miexja lejn il-ħruġ mis-suq. F’każijiet bħal dawn, ma jkunx aktar meħtieġ pjan għar-riżoluzzjoni ta’ dik l-istituzzjoni jew entità, irrispettivament minn jekk l-awtorità kompetenti tkunx diġà rtirat l-awtorizzazzjoni ta’ dik l-istituzzjoni jew dik l-entità. L-istess japplika fir-rigward ta’ istituzzjoni residwa taħt riżoluzzjoni wara t-trasferiment tal-assi, tad-drittijiet u tal-obbligazzjonijiet fil-kuntest ta’ strateġija ta’ trasferiment. Jixraq għalhekk li jiġi speċifikat li, f’sitwazzjonijiet bħal dawk, l-adozzjoni ta’ pjanijiet ta’ riżoluzzjoni mhijiex meħtieġa.

(6)

Jenħtieġ li l-proċedura għall-preżentazzjoni ta’ informazzjoni, minn entitajiet li huma parti minn grupp, lill-awtoritajiet ta’ riżoluzzjoni għat-tħejjija ta’ pjanijiet ta’ riżoluzzjoni tiġi allinjata mal-proċedura stabbilita fid-Direttiva 2014/59/UE għas-sottomissjoni ta’ informazzjoni għall-monitoraġġ tar-rekwiżit minimu għal fondi proprji u obbligazzjonijiet eliġibbli (MREL) biex jiġu evitati kostijiet u kumplessità bla bżonn.

(7)

L-awtoritajiet ta’ riżoluzzjoni bħalissa jistgħu jiddeċiedu li jipprojbixxu ċerti distribuzzjonijiet meta istituzzjoni jew entità, kemm jekk tkun entità ta’ riżoluzzjoni kif ukoll jekk le, tonqos milli tissodisfa r-rekwiżit ta’ ta’ riżerva kombinata meta jitqies flimkien mal-MREL. Madankollu, f’ċerti sitwazzjonijiet, istituzzjoni jew entità tista’ tkun meħtieġa tikkonforma mal-MREL fuq bażi differenti mill-bażi li fuqha dik l-istituzzjoni jew l-entità hija meħtieġa tikkonforma mar-rekwiżit ta’ riżerva kkombinat. Dik is-sitwazzjoni toħloq inċertezzi fir-rigward tal-kundizzjonijiet għall-eżerċitar tas-setgħat tal-awtoritajiet ta’ riżoluzzjoni biex jipprojbixxu d-distribuzzjonijiet u għall-kalkolu tal-Ammont Massimu Distribwibbli relatat mal-MREL. Għalhekk, jenħtieġ li jiġi stabbilit li, f’dawk il-każijiet, l-awtoritajiet ta’ riżoluzzjoni għandhom jeżerċitaw is-setgħa li jipprojbixxu ċerti distribuzzjonijiet abbażi tar-rekwiżit ta’ riżerva kkombinata stmat li jirriżulta mill-metodoloġija stabbilita fl-att delegat skont l-Artikolu 45c(4) tad-Direttiva 2014/59/UE. Sabiex jiġu żgurati t-trasparenza u ċ-ċertezza legali, jenħtieġ li l-awtoritajiet ta’ riżoluzzjoni jikkomunikaw ir-rekwiżit ta’ riżerva kkombinata stmat lill-istituzzjoni jew lill-entità, li mbagħad jenħtieġ li jagħmlu dak ir-rekwiżit ta’ riżerva kkombinata stmat disponibbli għall-pubbliku.

(8)

Ġew introdotti miżuri ta’ intervent bikri li jippermettu lill-awtoritajiet kompetenti jirrimedjaw id-deterjorament tas-sitwazzjoni finanzjarja u ekonomika ta’ istituzzjoni jew entità u jnaqqsu, sa fejn ikun possibbli, ir-riskju u l-impatt ta’ riżoluzzjoni possibbli. Madankollu, minħabba nuqqas ta’ ċertezza rigward l-iskattaturi għall-applikazzjoni ta’ dawk il-miżuri ta’ intervent bikri u d-duplikazzjonijiet parzjali ma’ miżuri superviżorji, il-miżuri ta’ intervent bikri rari ntużaw. Għalhekk, jenħtieġ li l-kundizzjonijiet għall-applikazzjoni ta’ dawk il-miżuri ta’ intervent bikri jiġu ssimplifikati u speċifikati aktar. Sabiex jitneħħew l-inċertezzi dwar il-kundizzjonijiet u t-twaqqit għat-tneħħija tal-korp maniġerjali ta’ istituzzjoni jew entità u l-ħatra ta’ amministraturi temporanji, jenħtieġ li dawk il-miżuri jiġu identifikati b’mod espliċitu bħala miżuri ta’ intervent bikri u jenħtieġ li l-applikazzjoni tagħhom tkun soġġetta għall-istess skattaturi. Taħt kundizzjonijiet speċifiċi, stralċ gradwali tal-attivitajiet jista’ jkun soluzzjoni kosteffettiva li tiffaċilita l-ħruġ mis-suq ta’ istituzzjoni jew entità b’mudell kummerċjali dgħajjef, u b’hekk jiġi evitat tnaqqis fit-tul li jwassal għall-falliment tal-istituzzjoni jew tal-entità. Jenħtieġ li l-awtoritajiet kompetenti jkollhom is-setgħa ta’ intervent bikri li jitolbu l-preżentazzjoni ta’ pjan li għandu jiġi implimentat fil-każ ta’ stralċ volontarju tal-attivitajiet ta’ istituzzjoni jew ta’ entità, filwaqt li jħallu d-deċiżjoni dwar l-implimentazzjoni ta’ tali pjan f’idejn l-istituzzjoni jew l-entità kkonċernata. Meta japplikaw setgħat ta’ intervent bikri, jenħtieġ li l-awtoritajiet kompetenti jkunu meħtieġa jagħżlu l-miżuri xierqa biex jindirizzaw sitwazzjoni speċifika f’konformità mal-prinċipju tal-proporzjonalità. Sabiex l-awtoritajiet kompetenti jkunu jistgħu jqisu r-riskji għar-reputazzjoni jew ir-riskji relatati mal-ħasil tal-flus jew mat-teknoloġija tal-informazzjoni u tal-komunikazzjoni, jenħtieġ li l-awtoritajiet kompetenti jivvalutaw il-kundizzjonijiet għall-applikazzjoni ta’ miżuri ta’ intervent bikri mhux biss abbażi ta’ indikaturi kwantitattivi, bħar-rekwiżiti tal-kapital jew tal-likwidità, il-livell ta’ ingranaġġ, is-self improduttiv jew il-konċentrazzjoni ta’ skoperturi, iżda wkoll abbażi ta’ skattaturi kwalitattivi. Jenħtieġ li l-proċess tat-teħid tad-deċiżjonijiet fir-rigward tal-miżuri ta’ intervent bikri jippermetti l-kunsiderazzjoni rapida tagħhom u, jekk ikun xieraq, l-applikazzjoni tagħhom, sabiex jiġi evitat kwalunkwe deterjorament ulterjuri tas-sitwazzjoni tal-istituzzjoni jew tal-entità.

(9)

Sabiex tittejjeb iċ-ċertezza legali, jenħtieġ li jitneħħew il-miżuri ta’ intervent bikri stabbiliti fid-Direttiva 2014/59/UE li jikkoinċidu mas-setgħat eżistenti taħt il-qafas prudenzjali stabbilit fid-Direttivi 2013/36/UE (6) u (UE) 2019/2034 (7) tal-Parlament Ewropew u tal-Kunsill. Barra minn hekk, jeħtieġ li jiġi żgurat li l-awtoritajiet ta’ riżoluzzjoni jkunu kapaċi jħejju għar-riżoluzzjoni possibbli ta’ istituzzjoni jew entità. Għalhekk, jenħtieġ li l-awtorità kompetenti tinforma lill-awtoritajiet ta’ riżoluzzjoni dwar id-deterjorament tas-sitwazzjoni finanzjarja ta’ istituzzjoni jew ta’ entità kmieni biżżejjed, u jenħtieġ li l-awtoritajiet ta’ riżoluzzjoni jkollhom is-setgħat meħtieġa għall-implimentazzjoni tal-miżuri preparatorji. Huwa importanti li sabiex l-awtoritajiet ta’ riżoluzzjoni jkunu jistgħu jirreaġixxu malajr kemm jista’ jkun għal deterjorament tas-sitwazzjoni ta’ istituzzjoni jew ta’ entità, jenħtieġ li l-applikazzjoni minn qabel ta’ miżuri ta’ intervent bikri ma tkunx kundizzjoni għall-awtorità ta’ riżoluzzjoni biex tagħmel arranġamenti għall-kummerċjalizzazzjoni tal-istituzzjoni jew tal-entità jew biex titlob informazzjoni biex jiġi aġġornat il-pjan ta’ riżoluzzjoni u titħejja l-valwazzjoni. Meta tikkummerċjalizza istituzzjoni li hija membru ta’ skema ta’ protezzjoni istituzzjonali (IPS), jenħtieġ li l-awtorità ta’ riżoluzzjoni tikkunsidra miżuri li l-IPS tista’ tieħu qabel ir-riżoluzzjoni biex tevita r-riskju materjali li l-istituzzjoni tfalli jew issir li x’aktarx tfalli. Sabiex tiġi żgurata reazzjoni konsistenti, ikkoordinata, effettiva u f’waqtha għad-deterjorament tas-sitwazzjoni ta’ istituzzjoni jew ta’ entità u sabiex issir tħejjija kif suppost għal riżoluzzjoni possibbli, jeħtieġ li jittejbu l-interazzjoni u l-koordinazzjoni bejn l-awtoritajiet kompetenti u l-awtoritajiet ta’ riżoluzzjoni. Malli istituzzjoni jew entità tissodisfa l-kundizzjonijiet għall-applikazzjoni ta’ miżuri ta’ intervent bikri, jenħtieġ li l-awtoritajiet kompetenti u l-awtoritajiet ta’ riżoluzzjoni jżidu l-iskambji ta’ informazzjoni tagħhom, inkluż informazzjoni proviżorja, u jimmonitorjaw is-sitwazzjoni tal-istituzzjoni jew tal-entità b’mod konġunt.

(10)

Jeħtieġ li jiġu żgurati azzjoni f’waqtha u koordinazzjoni bikrija bejn l-awtorità kompetenti u l-awtorità ta’ riżoluzzjoni, filwaqt li istituzzjoni jew entità tkun għadha negozju avvjat, iżda jkun hemm riskju materjali li l-istituzzjoni jew l-entità tista’ tfalli. Għalhekk, jenħtieġ li l-awtorità kompetenti tinnotifika lill-awtorità ta’ riżoluzzjoni kmieni kemm jista’ jkun b’tali riskju. Jenħtieġ li dik in-notifika jkun fiha r-raġunijiet għall-valutazzjoni tal-awtorità kompetenti u ħarsa ġenerali mhux eżawrjenti tal-miżuri alternattivi tas-settur privat, l-azzjoni superviżorja jew il-miżuri ta’ intervent bikri li huma disponibbli biex jiġi evitat il-falliment tal-istituzzjoni jew tal-entità f’perjodu ta’ żmien raġonevoli. Tali notifika bikrija ma taffettwa l-ebda miżura alternattiva tas-settur privat, inkluż miżuri minn IPS, li tipprevjeni l-falliment jew il-falliment probabbli tal-istituzzjoni jew tal-entità f’perjodu ta’ żmien raġonevoli jew tippreġudika l-proċeduri biex jiġi ddeterminat jekk il-kundizzjonijiet għar-riżoluzzjoni humiex issodisfati. Jenħtieġ li n-notifika minn qabel mill-awtorità kompetenti lill-awtorità ta’ riżoluzzjoni ta’ riskju materjali li istituzzjoni jew entità qed tfalli jew x’aktarx tfalli, jew it-tmiem tal-perjodu ta’ żmien speċifikat għall-implimentazzjoni tal-miżuri sabiex jindirizzaw tali riskju materjali ma tkunx kundizzjoni, jew inkella neċessarjament timplika, determinazzjoni sussegwenti li istituzzjoni jew entità qed tfalli jew x’aktarx tfalli. Barra minn hekk, jekk fi stadju aktar tard l-istituzzjoni jew l-entità tiġi vvalutata bħala li qed tfalli jew x’aktarx tfalli u ma jkun hemm l-ebda soluzzjoni alternattiva biex jiġi evitat tali falliment f’perjodu ta’ żmien raġonevoli, l-awtorità ta’ riżoluzzjoni għandha tieħu deċiżjoni dwar jekk għandhiex tieħu azzjoni ta’ riżoluzzjoni. F’każ bħal dan, il-puntwalità tad-deċiżjoni li tiġi applikata azzjoni ta’ riżoluzzjoni għall-istituzzjoni jew l-entità tista’ tkun fundamentali għall-implimentazzjoni b’suċċess tal-istrateġija ta’ riżoluzzjoni, b’mod partikolari minħabba li intervent aktar bikri fl-istituzzjoni jew fl-entità jista’ jikkontribwixxi biex jiġu żgurati livelli suffiċjenti ta’ kapaċità ta’ assorbiment tat-telf u ta’ likwidità biex tiġi eżegwita dik l-istrateġija. Għalhekk, jixraq li l-awtorità ta’ riżoluzzjoni tkun tista’ tivvaluta, f’kooperazzjoni mill-qrib mal-awtorità kompetenti, x’jikkostitwixxi perjodu ta’ żmien raġonevoli biex jiġu implimentati miżuri alternattivi biex jiġi evitat il-falliment tal-istituzzjoni jew tal-entità. Sabiex jiġi żgurat eżitu f’waqtu u sabiex l-awtorità ta’ riżoluzzjoni tkun tista’ tħejji kif suppost għar-riżoluzzjoni potenzjali tal-istituzzjoni jew tal-entità, jenħtieġ li l-awtorità ta’ riżoluzzjoni u l-awtorità kompetenti jiltaqgħu regolarment, u jenħtieġ li l-awtorità ta’ riżoluzzjoni tiddeċiedi dwar il-frekwenza ta’ dawk il-laqgħat, skont iċ-ċirkostanzi tal-każ.

(11)

Il-qafas ta’ riżoluzzjoni huwa maħsub li jkollu l-potenzjal li jjiġi applikat għal kwalunkwe istituzzjoni jew entità, irrispettivament mid-daqs u l-mudell tan-negozju tagħha, jekk l-għodod disponibbli skont il-liġi nazzjonali ma jkunux adegwati għall-immaniġġar tal-falliment tagħha. Madankollu, xi objettivi tal-qafas jeħtieġ li jiġu speċifikati aktar biex tiżdied l-armonizzazzjoni u tiġi promossa l-konverġenza. L-objettiv tar-riżoluzzjoni li tiġi żgurata l-kontinwità tal-funzjonijiet kritiċi għandu l-għan li jissalvagwardja l-istabbiltà finanzjarja u l-ekonomija reali. Għalhekk jeħtieġ li jiġi żgurat li l-forniment ta’ funzjonijiet kritiċi ma jitwaqqafx. B’mod partikolari, jeħtieġ li jiġi ċċarat li, skont iċ-ċirkostanzi speċifiċi, jenħtieġ li l-awtoritajiet ta’ riżoluzzjoni jkunu jistgħu jikkonkludu li ċerti funzjonijiet ta’ istituzzjoni jew ta’ entità jitqiesu bħala kritiċi anke jekk it-twaqqif tagħhom ifixkel l-istabbiltà finanzjarja jew servizzi li huma essenzjali għall-ekonomija reali fil-livell reġjonali biss. Fir-rigward tat-teħid ta’ depożiti, l-awtoritajiet ta’ riżoluzzjoni għandhom jagħtu l-attenzjoni dovuta lir-riskju ta’ telf ta’ fiduċja tad-depożitanti li jżommu depożiti mhux koperti mid-Direttiva 2014/49/UE tal-Parlament Ewropew u tal-Kunsill (8). Jenħtieġ li l-fondi pubbliċi jiġu protetti billi tiġi mminimizzata d-dipendenza fuq l-għajnuna finanzjarja pubblika straordinarja, b’mod partikolari meta tiġi pprovduta mill-baġit ta’ Stat Membru. Id-depożitanti koperti mid-Direttiva 2014/49/UE, l-investituri koperti mid-Direttiva 97/9/KE tal-Parlament Ewropew u tal-Kunsill (9), il-fondi tal-klijenti u l-assi tal-klijenti għandhom jiġu protetti wkoll.

(12)

Matul l-istadju tal-ippjanar tar-riżoluzzjoni, meta jkun qed jiġi deċiż jekk istituzzjoni għandhiex tiġi allokata għar-riżoluzzjoni, jenħtieġ li l-fatt li istituzzjoni tkun soġġetta għal obbligi simplifikati, b’mod ġenerali, jintuża mill-awtoritajiet ta’ riżoluzzjoni bħala indikatur li r-riżoluzzjoni tagħha fil-każ ta’ falliment ma tkunx fl-interess pubbliku. Min-naħa l-oħra, il-fatt li l-istituzzjoni mhijiex soġġetta għal obbligi simplifikati jista’ jindika li r-riżoluzzjoni tagħha fil-każ ta’ falliment tkun fl-interess pubbliku.

(13)

L-istralċ ta’ entità taħt proċedimenti normali ta’ insolvenza jista’, f’xi każijiet, jipperikola l-istabbiltà finanzjarja u jinterrompi l-forniment ta’ funzjonijiet kritiċi. Dan jista’ jkun il-każ, pereżempju, meta l-insolvenza x’aktarx tirriżulta f’telf fuq sehem materjali ta’ depożiti jew diffikultajiet sinifikanti fil-kontinwità tal-aċċess għad-depożiti, u meta l-awtorità ta’ riżoluzzjoni tqis li dak it-telf jew dawk id-diffikultajiet jista’ jkollhom impatt sinifikanti fuq il-forniment ta’ funzjonijiet kritiċi, fuq l-istabbiltà finanzjarja permezz ta’ kontaġju jew fuq l-ekonomija reali. F’każijiet bħal dawn huwa probabbli ħafna li jkun hemm interess pubbliku fit-tqegħid tal-istituzzjoni jew tal-entità taħt riżoluzzjoni aktar milli fl-istralċ tagħha taħt proċeduri normali ta’ insolvenza. Il-valutazzjoni ta’ jekk ir-riżoluzzjoni ta’ istituzzjoni jew ta’ entità hijiex fl-interess pubbliku jenħtieġ li tkun tirrifletti wkoll, sa fejn ikun possibbli, id-differenza bejn, minn naħa, il-finanzjament ipprovdut permezz ta’ xbieki ta’ sikurezza ffinanzjati mill-industrija, jiġifieri l-arranġamenti ta’ finanzjament ta’ riżoluzzjoni jew id-DGSs, u, min-naħa l-oħra, il-finanzjament ipprovdut mill-Istati Membri mill-flus tal-kontribwenti. Finanzjament bħal dan ipprovdut mill-Istati Membri għandu riskju ogħla ta’ periklu morali u inċentiv aktar baxx għad-dixxiplina tas-suq. Għalhekk, meta jivvalutaw l-objettiv li tiġi mminimizzata d-dipendenza fuq appoġġ finanzjarju pubbliku straordinarju, jenħtieġ li l-awtoritajiet ta’ riżoluzzjoni jippreferu finanzjament permezz tal-arranġamenti ta’ finanzjament ta’ riżoluzzjoni jew id-DGSs għal finanzjament permezz ta’ ammont ugwali ta’ riżorsi mill-baġit tal-Istati Membri.

(14)

Meta jwettqu l-valutazzjoni tal-interess pubbliku, jenħtieġ li l-awtoritajiet ta’ riżoluzzjoni jivvalutaw jekk kwalunkwe wieħed mill-objettivi ta’ riżoluzzjoni jkunx f’riskju jekk l-istituzzjoni jew l-entità li qed tfalli tiġi stralċata skont proċedimenti normali ta’ insolvenza. Jenħtieġ li l-azzjoni ta’ riżoluzzjoni ma titqiesx li tkun neċessarja fl-interess pubbliku jekk l-ebda wieħed mill-objettivi tar-riżoluzzjoni ma jkun f’riskju kieku l-istituzzjoni jew l-entità kellha tiġi stralċata skont proċedimenti normali ta’ insolvenza. Jekk mill-inqas objettiv ta’ riżoluzzjoni wieħed jiġi vvalutat mill-awtorità ta’ riżoluzzjoni bħala f’riskju fil-każ ta’ stralċ skont proċedimenti normali ta’ insolvenza, jenħtieġ li l-eżitu tal-valutazzjoni tal-interess pubbliku jkun negattiv biss meta l-istralċ tal-istituzzjoni jew tal-entità li qed tfalli skont proċedimenti normali ta’ insolvenza jilħaq l-objettivi tar-riżoluzzjoni mhux biss bl-istess mod bħar-riżoluzzjoni iżda b’mod aktar effettiv.

(15)

Meta istituzzjoni jew entità li tkun qed tfalli ma titqiegħedx taħt riżoluzzjoni, jenħtieġ li din tiġi stralċata f’konformità mal-proċeduri disponibbli skont il-liġi nazzjonali. Tali proċeduri jistgħu jvarjaw sostanzjalment minn Stat Membru għall-ieħor. Filwaqt li huwa xieraq li tkun permessa biżżejjed flessibbiltà biex jintużaw il-proċeduri nazzjonali eżistenti, jenħtieġ li ċerti aspetti jiġu ċċarati biex jiġi żgurat li l-istituzzjonijiet jew l-entitajiet ikkonċernati joħorġu mis-suq.

(16)

Jenħtieġ li jiġi żgurat li l-awtorità kompetenti jew l-awtorità ta’ riżoluzzjoni tibda jew titlob il-bidu ta’ proċedura skont il-liġi nazzjonali għall-istralċ ta’ istituzzjoni jew entità li tiġi ddeterminata li qed tfalli jew li x’aktarx tfalli iżda li ma titqiegħedx taħt riżoluzzjoni. Meta l-istralċ volontarju tal-istituzzjoni jew tal-entità fuq deċiżjoni tal-azzjonisti jkun disponibbli skont il-liġi nazzjonali, jenħtieġ li tali għażla tibqa’ disponibbli u jenħtieġ li l-awtorità rilevanti tingħata s-setgħa li titlob il-bidu ta’ tali proċedura. Madankollu, jenħtieġ li jiġi żgurat li, fin-nuqqas ta’ azzjoni rapida mill-azzjonisti, l-awtorità nazzjonali rilevanti tieħu azzjoni.

(17)

Jenħtieġ li jiġi stabbilit ukoll li l-eżitu finali tal-proċeduri ta’ stralċ huwa t-terminazzjoni ta’ attivitajiet bankarji li jwasslu għall-ħruġ tal-istituzzjoni jew tal-entità li qed tfalli mis-suq. Skont il-liġi nazzjonali applikata, dak l-eżitu jista’ jinkiseb b’modi differenti. Dawk jistgħu jinkludu l-bejgħ tal-istituzzjoni jew l-entità jew partijiet minnha, il-bejgħ ta’ assi jew obbligazzjonijiet speċifiċi jew stralċ gradwali, inkluż ta’ pagamenti u teħid ta’ depożiti, bil-ħsieb li l-assi tagħha jinbiegħu gradwalment biex jitħallsu lura l-kredituri affettwati. Terminazzjoni ta’ attivitajiet bankarji tista’ teħtieġ ukoll, fost l-oħrajn, limitazzjoni fuq il-ħruġ ta’ obbligazzjonijiet ġodda biex ikopru biss il-ħtiġijiet ta’ rifinanzjament li jirriżultaw minn assi eżistenti sabiex il-maturità tal-obbligazzjonijiet ma tiġix estiża. Sabiex tittejjeb il-prevedibbiltà tal-proċeduri, jenħtieġ li dak l-eżitu jintlaħaq f’perjodu ta’ żmien raġonevoli.

(18)

Jenħtieġ li l-awtoritajiet kompetenti jingħataw is-setgħa li jirtiraw l-awtorizzazzjoni ta’ istituzzjoni jew ta’ entità biss abbażi tal-fatt li l-istituzzjoni jew l-entità qed tfalli jew x’aktarx tfalli iżda ma titqiegħedx taħt riżoluzzjoni. Jenħtieġ li l-awtoritajiet kompetenti jkunu jistgħu jirtiraw l-awtorizzazzjoni biex jappoġġaw l-objettiv ta’ stralċ tal-istituzzjoni jew tal-entità f’konformità mal-liġi nazzjonali, b’mod partikolari f’każijiet fejn il-proċeduri disponibbli skont il-liġi nazzjonali ma jkunux jistgħu jinbdew fil-mument li l-istituzzjoni jew l-entità tiġi ddeterminata li qed tfalli jew x’aktarx tfalli, inkluż il-każijiet fejn l-istituzzjoni jew l-entità tkun għadha mhux insolventi fuq il-karta bilanċjali. Sabiex jiġi żgurat aktar li l-objettiv tal-istralċ tal-istituzzjoni jew tal-entità jkun jista’ jintlaħaq, jenħtieġ li l-Istati Membri jiżguraw li l-irtirar ta’ awtorizzazzjoni mill-awtorità kompetenti jiġi inkluż ukoll fost il-kundizzjonijiet possibbli biex tinbeda mill-inqas waħda mill-proċeduri disponibbli skont il-liġi nazzjonali u hija applikabbli għal istituzzjonijiet jew entitajiet li qed ifallu jew li x’aktarx ifallu, iżda li ma tqiegħdux taħt riżoluzzjoni.

(19)

Fid-dawl tal-esperjenza miksuba fl-implimentazzjoni tar-Regolament (UE) Nru 806/2014 u tad-Direttivi 2014/49/UE u 2014/59/UE, jeħtieġ li jiġu speċifikati aktar il-kundizzjonijiet li taħthom jistgħu jingħataw b’mod eċċezzjonali l-miżuri ta’ naturaprekawzjonarja li jikkwalifikaw bħala appoġġ finanzjarju pubbliku straordinarju. Jenħtieġ li jiġi żgurat li l-miżuri ta’ prekawzjoni jittieħdu kmieni biżżejjed. Barra minn hekk, il-miżuri biex jiġi pprovdut salvataġġ għall-assi indeboliti, inkluż il-veikoli tal-immaniġġar tal-assi jew l-iskemi ta’ garanzija tal-assi, jistgħu jkunu effettivi u effiċjenti fl-indirizzar tal-kawżi ta’ diffikultà finanzjarja possibbli li jiffaċċjaw l-istituzzjonijiet u l-entitajiet u fil-prevenzjoni tal-falliment tagħhom u, għalhekk, jistgħu jikkostitwixxu miżuri ta’ prekawzjoni rilevanti. Għalhekk, jenħtieġ li jiġi speċifikat li tali miżuri ta’ prekawzjoni jistgħu jieħdu l-forma ta’ miżuri ta’ assi indeboliti.

(20)

Sabiex tiġi ppreservata d-dixxiplina tas-suq, jiġu protetti l-fondi pubbliċi u jiġu evitati d-distorsjonijiet tal-kompetizzjoni, jenħtieġ li l-miżuri ta’ prekawzjoni jibqgħu l-eċċezzjoni u jiġu applikati biss biex jiġu indirizzati sitwazzjonijiet ta’ tfixkil serju fis-suq u biex tiġi ppreservata l-istabbiltà finanzjarja, b’mod partikolari f’każ ta’ kriżi sistemika. Barra minn hekk, jenħtieġ li ma jintużawx miżuri ta’ prekawzjoni biex jiġi indirizzat it-telf imġarrab jew li x’aktarx jiġġarrab. L-aktar strument affidabbli biex jiġi kkwantifikat it-telf imġarrab jew li x’aktarx jiġġarrab huwa rieżami tal-kwalità tal-assi mill-Bank Ċentrali Ewropew (BĊE), mill-Awtorità Superviżorja Ewropea (l-Awtorità Bankarja Ewropea) (EBA), stabbilita bir-Regolament (UE) Nru 1093/2010 tal-Parlament Ewropew u tal-Kunsill (10), jew mill-awtoritajiet kompetenti nazzjonali. Jenħtieġ li l-awtoritajiet kompetenti jużaw tali rieżami, jew fejn adegwat, spezzjonijiet fuq il-post, sabiex jikkwantifikaw it-telf imġarrab jew li x’aktarx jiġġarrab meta tali rieżami jew spezzjonijiet jkunu jistgħu jitwettqu f’perjodu ta’ żmien raġonevoli. Fejn dan ma jkunx possibbli, jenħtieġ li l-awtoritajiet kompetenti jikkwantifikaw it-telf imġarrab jew li x’aktarx jiġġarrab bl-aktar mod affidabbli possibbli fiċ-ċirkostanzi prevalenti, fejn xieraq abbażi tal-karta bilanċjali tal-istituzzjoni jew tal-entità, dment li l-karta bilanċjali tikkonforma mar-regoli u l-istandards kontabilistiċi applikabbli, kif ikkonfermat minn awditur estern indipendenti. Jenħtieġ li l-kunsiderazzjoni li istituzzjoni jew entità hija solventi, għall-finijiet ta’ miżuri ta’ appoġġ fil-forma ta’ rikapitalizzazzjoni prekawzjonarja u ta’ garanziji mill-Istat ta’ obbligazzjonijiet maħruġa ġodda tkun ibbażata fuq valutazzjoni li tħares ’il quddiem dwar jekk l-istituzzjoni jew l-entità tistax tikkonforma mar-rekwiżiti ta’ fondi proprji stabbiliti fir-Regolament (UE) Nru 575/2013 (11) jew fir-Regolament (UE) 2019/2033 (12) tal-Parlament Ewropew u tal-Kunsill, u r-rekwiżit ta’ fondi proprji addizzjonali stabbilit fid-Direttiva 2013/36/UE jew (UE) 2019/2034.

(21)

L-għan tar-rikapitalizzazzjoni prekawzjonarja huwa li tappoġġa l-istituzzjonijiet u l-entitajiet vijabbli identifikati bħala li x’aktarx jiltaqgħu ma’ diffikultajiet temporanji fil-futur qrib u li tipprevjeni s-sitwazzjoni tagħhom milli tiddeterjora aktar. Sabiex jiġi evitat li jingħataw sussidji pubbliċi lil negozji li diġà ma jagħmlux profitt, jenħtieġ li miżuri ta’ prekawzjoni fil-forma ta’ akkwist ta’ strumenti ta’ fondi proprji jew ta’ strumenti kapitali oħrajn jew permezz ta’ miżuri ta’ assi indeboliti ma jingħatawx f’ammont li jaqbeż l-ammont meħtieġ biex jiġu koperti d-defiċits ta’ kapital kif identifikati fix-xenarju avvers ta’ test tal-istress jew eżerċizzju ekwivalenti. Sabiex jiġi żgurat li l-finanzjament pubbliku fl-aħħar mill-aħħar jitwaqqaf, jenħtieġ li dawk il-miżuri ta’ prekawzjoni jkunu wkoll limitati fiż-żmien u jkun fihom skeda ta’ żmien ċara għat-terminazzjoni tagħhom (“strateġija ta’ ħruġ mill-miżura ta’ appoġġ”). L-istrumenti perpetwi, inkluż il-kapital tal-Grad 1 ta’ Ekwità Komuni, jenħtieġ li jintużaw biss f’ċirkostanzi eċċezzjonali u jkunu soġġetti għal ċerti limiti kwantitattivi minħabba li min-natura tagħhom ma humiex adattati sew għall-konformità mal-kundizzjoni li jkunu temporanji. Jenħtieġ li l-awtoritajiet kompetenti jitolbu pjan ta’ rimedju ta’ darba mill-istituzzjonijiet u l-entitajiet li jonqsu milli jikkonformaw mat-termini tal-istrateġija ta’ ħruġ mill-miżura ta’ appoġġ. Sabiex jiġi żgurat il-ħruġ mis-suq minn istituzzjonijiet jew entitajiet li juru li mhumiex vijabbli, jenħtieġ li awtorità rilevanti tiddetermina jekk l-istituzzjoni jew l-entità hijiex qed tfalli jew x’aktarx tfalli meta l-awtorità kompetenti ma tkunx sodisfatta bil-pjan ta’ rimedju jew meta l-istituzzjoni jew l-entità tonqos milli tikkonforma mal-pjan ta’ rimedju.

(22)

Jenħtieġ li l-miżuri ta’ prekawzjoni jkunu limitati għall-ammont li l-istituzzjoni jew l-entità jkollha bżonn biex iżżomm is-solvenza tagħha fil-każ ta’ avveniment ta’ xenarju avvers f’test tal-istress jew f’eżerċizzju ekwivalenti. Fil-każ ta’ miżuri ta’ prekawzjoni fil-forma ta’ miżuri ta’ assi indeboliti, jenħtieġ li l-istituzzjoni jew l-entità riċeventi tkun tista’ tuża l-ammont mogħti biex tkopri t-telf fuq l-assi ttrasferiti jew flimkien ma’ akkwiżizzjoni ta’ strumenti kapitali, sakemm ma jinqabiżx l-ammont globali tad-defiċit identifikat. Huwa meħtieġ ukoll li jiġi żgurat li miżuri ta’ prekawzjoni fil-forma ta’ miżuri ta’ assi indeboliti jikkonformaw mar-regoli eżistenti dwar l-għajnuna mill-Istat u mal-aħjar prattiki, li jreġġgħu lura l-vijabbiltà fit-tul tal-istituzzjoni jew tal-entità, li l-għajnuna mill-Istat tkun limitata għall-minimu meħtieġ u li jiġu evitati d-distorsjonijiet tal-kompetizzjoni. Għal dawk ir-raġunijiet, jenħtieġ li l-awtoritajiet ikkonċernati, fil-każ ta’ miżuri ta’ prekawzjoni fil-forma ta’ miżuri ta’ assi indeboliti, iqisu l-gwida speċifika, inkluż il-pjan ta’ azzjoni tal-Kummissjoni dwar kif jistgħu jiġu stabbiliti kumpaniji nazzjonali tal-ġestjoni tal-assi u l-komunikazzjoni tal-Kummissjoni tas-16 ta’ Diċembru 2020 dwar l-indirizzar ta’ self improduttiv wara l-pandemija tal-COVID-19. Jenħtieġ li l-miżuri ta’ prekawzjoni fil-forma ta’ miżuri ta’ assi indeboliti dejjem ikunu soġġetti għall-kundizzjoni prevalenti li jkunu temporanji. Il-garanziji pubbliċi mogħtija għal perjodu speċifikat b’rabta mal-assi indeboliti tal-istituzzjoni jew tal-entità kkonċernata huma mistennija jiżguraw konformità aħjar ma’ dik il-kundizzjoni milli jiżguraw it-trasferimenti ta’ tali assi lil entità appoġġata pubblikament.

(23)

Sabiex jiġi kopert il-ksur materjali tar-rekwiżiti prudenzjali, jeħtieġ li jiġu speċifikati aktar il-kundizzjonijiet għad-determinazzjoni li l-kumpaniji azzjonarji qed ifallu jew x’aktarx ifallu. Jenħtieġ li ksur ta’ dawk ir-rekwiżiti minn kumpanija azzjonarja jkun materjali meta t-tip u l-firxa ta’ tali ksur ikunu komparabbli ma’ ksur li, kieku twettaq minn istituzzjoni ta’ kreditu, kien jiġġustifika l-irtirar tal-awtorizzazzjoni mill-awtorità kompetenti f’konformità mal-Artikolu 18 tad-Direttiva 2013/36/UE.

(24)

L-Istati Membri jista’ jkollhom, skont il-liġi nazzjonali, setgħat biex jissospendu l-obbligi ta’ ħlas jew ta’ konsenja li jistgħu jinkludu depożiti eliġibbli. Meta s-sospensjoni tal-obbligi ta’ ħlas jew ta’ konsenja ma tkunx relatata direttament maċ-ċirkostanzi finanzjarji tal-istituzzjoni ta’ kreditu, id-depożiti jistgħu ma jkunux disponibbli għall-finijiet tad-Direttiva 2014/49/UE. B’konsegwenza ta’ dan, jista’ jkun li d-depożitanti ma jkunux jistgħu jaċċessaw id-depożiti tagħhom għal perjodu estiż. Sabiex tinżamm il-fiduċja u l-fiduċja tad-depożitanti fis-settur bankarju u biex tinżamm l-istabbiltà finanzjarja, jenħtieġ li l-Istati Membri jiżguraw li d-depożitanti jkollhom aċċess għal ammont xieraq ta’ kuljum mid-depożiti tagħhom, sabiex ikopru, b’mod partikolari, l-għoli tal-ħajja, jekk id-depożiti tagħhom isiru inaċċessibbli minħabba sospensjoni tal-pagamenti għal raġunijiet oħrajn għajr dawk li jwasslu għall-iżborż lid-depożitanti. Jenħtieġ li tali proċedura tibqa’ eċċezzjonali, u jenħtieġ li l-Istati Membri jiżguraw li d-depożitanti jkollhom aċċess għal ammonti xierqa ta’ kuljum.

(25)

Sabiex tiżdied iċ-ċertezza legali, u fid-dawl tar-rilevanza potenzjali tal-obbligazzjonijiet li jirriżultaw minn avvenimenti inċerti futuri, inkluż l-eżitu ta’litigazzjoni pendenti fiż-żmien tar-riżoluzzjoni, jeħtieġ li jiġi stabbilit it-trattament li jenħtieġ jirċievu dawk l-obbligazzjonijiet għall-finijiet tal-applikazzjoni tal-għodda tar-rikapitalizzazzjoni interna. Jenħtieġ li l-awtoritajiet ta’ riżoluzzjoni jagħmlu distinzjoni bejn obbligazzjonijiet ibbażati fuq obbligi preżenti li jirriżultaw minn avvenimenti passati li ser jirriżultaw f’telf iżda li t-twaqqit jew l-ammont tagħhom huwa inċert u obbligazzjonijiet li jistgħu jirriżultaw fil-futur iżda li ma jirriżultawx f’telf jew li jistgħu jirriżultaw fil-futur biss jekk iseħħ avveniment inċert.

(26)

Jenħtieġ li jiġi speċifikat ukoll li l-obbligazzjonijiet ta’ twaqqit jew ammont inċert, meta dawk l-obbligazzjonijiet ikunu bbażati fuq obbligi preżenti li jirriżultaw minn avvenimenti passati li ser jirriżultaw f’telf, għandhom jiġu ttrattati bl-istess mod bħal obbligazzjonijiet oħrajn. Jenħtieġ li tali obbligazzjonijiet ikollhom kapaċità ta’ rikapitalizzazzjoni interna, sakemm ma jissodisfawx wieħed mill-kriterji speċifiċi biex jiġu esklużi mill-kamp ta’ applikazzjoni tal-għodda ta’ rikapitalizzazzjoni interna. Minħabba r-rilevanza potenzjali ta’ dawk l-obbligazzjonijiet f’riżoluzzjoni u biex tiġi żgurata ċ-ċertezza fl-applikazzjoni tal-għodda ta’ rikapitalizzazzjoni interna, jenħtieġ li jiġi speċifikat li huma parti mill-obbligazzjonijiet b’kapaċità ta’ rikapitalizzazzjoni interna u li, b’riżultat ta’ dan, l-għodda ta’ rikapitalizzazzjoni interna tista’ tiġi applikata għalihom. Sabiex tiġi żgurata l-applikazzjoni effettiva tal-għodda ta’ rikapitalizzazzjoni interna għal obbligazzjonijiet ta’ twaqqit jew ammont inċert, jenħtieġ li l-awtorità ta’ riżoluzzjoni jkollha s-setgħa li tnaqqas, inkluż li tnaqqas għal żero, l-ammont prinċipali dovut fir-rigward ta’ tali obbligazzjonijiet u li tikkonverti tali obbligazzjonijiet f’ishma jew strumenti ta’ sjieda oħra. Madankollu, it-tnaqqis jew il-konverżjoni jistgħu jidħlu fis-seħħ biss jekk u ladarba l-obbligazzjoni ta’ twaqqit jew ammont inċert tiġi ddeterminata b’mod konklużiv f’termini ta’ twaqqit u ammont.

(27)

Jeħtieġ li jiġi żgurat li obbligazzjoni li tista’ tirriżulta minn avveniment inċert jew obbligazzjoni ta’ twaqqit jew ammont inċert li hija bbażata fuq obbligazzjoni preżenti fiż-żmien tar-riżoluzzjoni ma tfixkilx l-effettività tal-istrateġija ta’ riżoluzzjoni u, b’mod partikolari, tal-għodda ta’ rikapitalizzazzjoni interna. Sabiex jintlaħaq dak l-objettiv, jenħtieġ li l-valwatur, bħala parti mill-valwazzjoni għall-finijiet ta’ riżoluzzjoni, jivvaluta t-tali obbligazzjonijiet u jikkwantifika l-valur potenzjali ta’ dawk l-obbligazzjonijiet bl-aħjar mod li hu kapaċil-valwatur. Sabiex jiġi żgurat li, wara l-proċess ta’ riżoluzzjoni, l-istituzzjoni jew l-entità tkun tista’ ssostni fiduċja suffiċjenti fis-suq għal ammont xieraq ta’ żmien, jenħtieġ li l-valwatur, meta jistabbilixxi l-ammont li bih l-obbligazzjonijiet b’kapaċità ta’ rikapitalizzazzjoni interna jeħtieġ li jiġu valwati b’mod negattiv jew ikkonvertiti biex jitreġġgħu lura l-proporzjonijiet ta’ kapital tal-istituzzjoni taħt riżoluzzjoni, iqis dak il-valur potenzjali. B’mod partikolari, jenħtieġ li l-awtorità ta’ riżoluzzjoni tapplika s-setgħat ta’ konverżjoni tagħha għall-obbligazzjonijiet b’kapaċità ta’ rikapitalizzazzjoni interna sa fejn ikun meħtieġ biex jiġi żgurat li r-rikapitalizzazzjoni tal-istituzzjoni taħt riżoluzzjoni tkun biżżejjed biex tkopri t-telf potenzjali li jista’ jiġi kkawżat minn obbligazzjoni li tista’ tirriżulta fil-futur minn avveniment inċert jew li hija bbażata fuq obbligazzjoni preżenti iżda li hija inċerta f’termini ta’ twaqqit jew ammont. Meta tivvaluta l-ammont li għandu jiġi valwat b’mod negattiv jew ikkonvertit, jenħtieġ li l-awtorità ta’ riżoluzzjoni tikkunsidra bir-reqqa l-impatt tat-telf potenzjali fuq l-istituzzjoni taħt riżoluzzjoni abbażi ta’ għadd ta’ fatturi, inkluż il-probabbiltà li l-avveniment jimmaterjalizza, il-perjodu ta’ żmien għall-materjalizzazzjoni tiegħu u l-ammont tal-obbligazzjoni.

(28)

F’ċerti ċirkostanzi, wara li l-arranġament ta’ finanzjament ta’ riżoluzzjoni jkun ipprovda kontribuzzjoni sa massimu ta’ 5 % tal-obbligazzjonijiet totali tal-istituzzjoni jew tal-entità, inkluż il-fondi proprji, l-awtoritajiet ta’ riżoluzzjoni jistgħu jużaw sorsi addizzjonali ta’ finanzjament biex jappoġġaw aktar l-azzjoni ta’ riżoluzzjoni tagħhom. Jenħtieġ li jiġi speċifikat b’mod aktar ċar f’liema ċirkostanzi l-arranġament ta’ finanzjament ta’ riżoluzzjoni jista’ jipprovdi aktar appoġġ meta l-obbligazzjonijiet kollha b’kapaċità ta’ rikapitalizzazzjoni interna li mhumiex depożiti eliġibbli, bi klassifikazzjoni ta’ prijorità aktar baxxa minn dik ta’ depożiti mhux koperti ta’ persuni fiżiċi u intrapriżi mikro, żgħar u ta’ daqs medju u li mhumiex esklużi b’mod diskrezzjonarju mir-rikapitalizzazzjoni interna jkunu ġew valwati negattivament jew ikkonvertiti bis-sħiħ.

(29)

Id-depożiti li jissodisfaw il-kundizzjonijiet biex jikkwalifikaw bħala obbligazzjonijiet eliġibbli jistgħu jintużaw għall-konformità mal-MREL. Madankollu, minħabba n-natura speċifika tad-depożiti, kif ukoll ir-rwol li għandhom fl-ekonomija reali u fis-sostenn tal-fiduċja fis-sistema bankarja, jenħtieġ li l-inklużjoni ta’ depożiti fl-ambitu tal-obbligazzjonijiet użati biex jissodisfaw l-MREL tkun soġġetta għal rekwiżiti aktar stretti, peress li jenħtieġ li r-riżorsi eliġibbli għall-MREL jkunu jistgħu jintużaw fl-intier tagħhom biex iġarrbu t-telf u jikkontribwixxu għar-rikapitalizzazzjoni ta’ istituzzjoni ta’ kreditu fil-każ tal-falliment tagħha. L-ewwel nett, kif inhu l-każ skont ir-regoli attwali, jenħtieġ li ma jkunx possibbli li d-depożiti użati għall-MREL jinżammu minn persuni fiżiċi jew minn intrapriżi mikro, żgħar u ta’ daqs medju. It-tieni, jenħtieġ li jiġi ċċarat li d-depożiti li jagħtu lis-sid tagħhom dritt għal rimborż bikri ma jistgħux ikunu eliġibbli għall-MREL, inkluż f’dawk il-każijiet fejn id-dispożizzjonijiet kuntrattwali jipprevedu li r-rimborż bikri jkun soġġett għall-ħlas ta’ penali. It-tielet, sabiex tiġi żgurata t-trasparenza u jiġu minimizzati r-riskji ta’ tqegħid mhux xieraq ta’ tali depożiti, jenħtieġ li d-dispożizzjonijiet kuntrattwali rilevanti jirreferu espressament għall-intenzjoni tal-istituzzjoni ta’ kreditu li tuża dawk id-depożiti għall-fini ta’ konformità mal-MREL, kif ukoll għall-fatt li ma jikkwalifikawx bħala depożiti eliġibbli u li, għalhekk, l-ebda parti minn dak id-depożitu mhu sertitħallas lura mid-DGS f’każ ta’ nuqqas ta’ disponibbiltà. Ir-raba’, jenħtieġ li l-użu ta’ depożiti fl-MREL, bħala regola, ma jkunx permess, sakemm l-awtoritajiet ta’ riżoluzzjoni ma jkunux preċedentement awtorizzaw l-inklużjoni tagħhom fir-riżorsi eliġibbli għall-MREL abbażi ta’ valutazzjoni li tali depożiti ma jkollhomx għalfejn jiġu protetti milli jġarrbu telf fil-każ ta’ riżoluzzjoni u ma jwasslux għal impediment sostantiv għar-riżolvibbiltà. Jenħtieġ li l-awtoritajiet ta’ riżoluzzjoni jkunu jistgħu jawtorizzaw l-użu ta’ depożiti biex jissodisfaw l-MREL fuq bażi ġenerali għal kull entità ta’ riżoluzzjoni, mingħajr valutazzjoni individwali ta’ kull depożitu, kif ukoll jillimitaw l-inklużjoni ta’ depożiti biex jissodisfaw l-MREL għal ammonti fissi. Depożiti strutturati, minkejja li huma obbligazzjonijiet b’derivattivi inkorporati, jistgħu jikkwalifikaw ukoll bħala obbligazzjonijiet eliġibbli ta’ istituzzjoni ta’ kreditu, dment li jiġu ssodisfati l-kundizzjonijiet l-oħra kollha.

(30)

Sabiex jiġu evitati effetti ta’ preċipizju, jeħtieġ li jiġu anterjorati d-depożiti eżistenti li jikkwalifikaw bħala obbligazzjonijiet eliġibbli. Għal depożiti meħuda qabel it-12 ta’ Mejju 2028, jenħtieġ li l-kriterji l-ġodda ta’ eliġibbiltà jiġu rinunzjati. Jenħtieġ li l-anterjorità tintemm fil-11 ta’ Mejju 2029.

(31)

Ir-Regolamenti (UE) 2019/876 (13) u (UE) 2019/877 (14) tal-Parlament Ewropew u tal-Kunsill u d-Direttiva (UE) 2019/879 tal-Parlament Ewropew u tal-Kunsill (15) implimentaw fil-liġi tal-Unjoni, “id-Dokument dwar il-Kundizzjonijiet tal-Kapaċità Totali ta’ Assorbiment tat-Telf (TLAC)” internazzjonali, ippubblikat mill-Bord għall-Istabilità Finanzjarja fid-9 ta’ Novembru 2015 (l-“istandard TLAC”), għall-banek globali sistemikament importanti, imsemmija fid-dritt tal-Unjoni bħala istituzzjonijiet globali sistemikament importanti (G-SIIs). Ir-Regolament (UE) 2019/877 u d-Direttiva (UE) 2019/879 emendaw ukoll l-MREL stabbilit fid-Direttiva 2014/59/UE u fir-Regolament (UE) Nru 806/2014. Jeħtieġ li jiġu allinjati d-dispożizzjonijiet dwar l-MREL stabbiliti fid-Direttiva 2014/59/UE mal-implimentazzjoni tal-istandard TLAC għall-G-SIIs fir-rigward ta’ ċerti obbligazzjonijiet li jistgħu jintużaw biex tiġi ssodisfata l-parti tal-MREL li għandha tiġi ssodisfata b’fondi proprji u obbligazzjonijiet subordinati oħrajn. B’mod partikolari, jenħtieġ li l-obbligazzjonijiet li jikklassifikaw pari passu ma’ ċerti obbligazzjonijiet esklużi jiġu inklużi fil-fondi proprji u fl-istrumenti eliġibbli subordinati tal-entitajiet ta’ riżoluzzjoni fejn l-ammont ta’ dawk l-obbligazzjonijiet esklużi fuq il-karta bilanċjali tal-entità ta’ riżoluzzjoni ma jaqbiżx il-5 % tal-ammont tal-fondi proprji u l-obbligazzjonijiet eliġibbli tal-entità ta’ riżoluzzjoni u ma jinħoloq l-ebda riskju relatat mal-prinċipju li “l-ebda kreditur ma jmur agħar” minn dik l-inklużjoni.

(32)

Għal ċerti entitajiet ta’ riżoluzzjoni, l-istrateġija ta’ riżoluzzjoni ppreferuta stabbilita fil-pjan ta’ riżoluzzjoni jew fil-pjan ta’ riżoluzzjoni tal-grupp tiddependi primarjament fuq it-trasferiment tan-negozju tal-istituzzjoni taħt riżoluzzjoni lil akkwirent privat jew lil istituzzjoni tranżitorja. F’każijiet bħal dawn, huwa possibbli li d-DGS tista’ tintalab tagħmel kontribuzzjoni għal azzjoni ta’ riżoluzzjoni, potenzjalment biex tiżgura l-protezzjoni ta’ ċerti depożiti li mhumiex koperti mid-DGS. Sabiex jiġi minimizzat il-periklu morali, jenħtieġ għalhekk li jiġi speċifikat li, meta l-pjan ta’ riżoluzzjoni jipprevedi l-applikazzjoni tal-għodda tal-bejgħ ta’ negozju jew tal-għodda tal-istituzzjoni tranżitorja u l-ħruġ tal-entità ta’ riżoluzzjoni mis-suq, jenħtieġ li l-MREL għall-entità ta’ riżoluzzjoni kkonċernata ma jiġix stabbilit f’livell taħt ċerti limiti. Meta l-applikazzjoni tar-regoli għall-kalibrazzjoni tal-MREL tirriżulta f’ammont ogħla minn dawk il-limiti, jenħtieġ li dak l-ammont ogħla jipprevali. Jenħtieġ li dawk il-limiti ma japplikawx għall-MREL stabbilit għall-entitajiet ta’ riżoluzzjoni li l-istrateġija ta’ riżoluzzjoni ppreferuta tagħhom tikkonsisti fl-applikazzjoni tal-għodda ta’ rikapitalizzazzjoni interna għall-finijiet tar-rikapitalizzazzjoni tagħha sa punt suffiċjenti biex tiġi restawrata l-kapaċità tagħha li tkompli twettaq l-attivitajiet li għalihom hija awtorizzata, anke meta l-istrateġija ta’ riżoluzzjoni ppreferuta tipprevedi l-applikazzjoni tal-għodda ta’ rikapitalizzazzjoni interna flimkien ma’ għodod oħra ta’ riżoluzzjoni, b’dawn tal-aħħar jintużaw b’mod anċillari.

(33)

Id-Direttiva 2014/59/UE ma tinkludix regoli ddedikati dwar arranġamenti tranżizzjonali u livelli fil-mira intermedji biex jintlaħaq l-MREL wara l-2024. Madankollu, hemm sitwazzjonijiet li fihom l-istituzzjonijiet jew l-entitajiet jenħtieġ li ma jkunux meħtieġa immedjatament jikkonformaw ma’ MREL ogħla stabbilit mill-awtorità ta’ riżoluzzjoni, inkluż dawk il-każijiet fejn iż-żieda tal-MREL tirriżulta minn bidliet materjali fl-istituzzjoni jew fl-entità minħabba, pereżempju, fużjonijiet jew akkwiżizzjonijiet, jew minn bidliet fl-istrateġija ta’ riżoluzzjoni ppreferuta. B’mod partikolari, meta l-istrateġija ta’ riżoluzzjoni ppreferuta tinbidel minn stralċ skont proċedimenti normali ta’ insolvenza għall-applikazzjoni ta’ azzjoni ta’ riżoluzzjoni, l-istituzzjoni jew l-entità tista’ ma tkunx tista’ tissodisfa minnufih bis-sħiħ l-MREL kif stabbilit mill-awtorità ta’ riżoluzzjoni. Għalhekk, jenħtieġ li l-awtoritajiet ta’ riżoluzzjoni jingħataw is-setgħa li jiddeterminaw perjodi ta’ tranżizzjoni xierqa għall-konformità mal-MREL. Barra minn hekk, jenħtieġ li l-awtoritajiet ta’ riżoluzzjoni jkollhom is-setgħa li jiddeterminaw livelli fil-mira intermedji vinkolanti għal tali istituzzjonijiet jew entitajiet, biex jiżguraw li dawn jibnu r-riżorsi eliġibbli għall-MREL tagħhom b’mod xieraq. Sabiex jiġu protetti l-aspettattivi leġittimi, jenħtieġ li l-perjodi ta’ tranżizzjoni ddeterminati preċedentement mill-awtoritajiet ta’ riżoluzzjoni abbażi tar-regoli applikabbli fid-data rilevanti ma jiġux affettwati mir-regoli l-ġodda.

(34)

L-istituzzjonijiet u l-entitajiet huma meħtieġa jinkludu rikonoxximent kuntrattwali tal-effetti tal-għodda tar-rikapitalizzazzjoni interna fi ftehimiet jew strumenti li joħolqu obbligazzjonijiet irregolati mil-liġijiet ta’ pajjiżi terzi, ħlief fejn ikun legalment jew b’xi mod ieħor imprattikabbli li jsir dan. Madankollu, l-esperjenza miksuba fl-applikazzjoni tal-qafas ta’ riżoluzzjoni wriet li r-rekwiżiti għal dawk it-termini kuntrattwali ta’ rikonoxximent tar-rikapitalizzazzjoni interna, kif ukoll il-proċedura għan-notifika u l-valutazzjoni tal-imprattikabbiltà tal-inklużjoni ta’ tali termini, huma wisgħin, kumplessi u ta’ piż bla bżonn biex jintlaħaq l-objettiv li tiġi żgurata r-riżolvibbiltà tal-istituzzjonijiet li jistgħu jkunu soġġetti għal azzjoni ta’ riżoluzzjoni. Għalhekk huwa xieraq li jiġi ristrett il-kamp ta’ applikazzjoni tar-rekwiżit għal strumenti ta’ fondi proprji u obbligazzjonijiet b’kapaċità ta’ rikapitalizzazzjoni interna, u b’hekk jiġu esklużi, b’mod partikolari, kuntratti li joħolqu obbligazzjonijiet li fil-futur jistgħu jirriżultaw minn xi avveniment inċert. Barra minn hekk, jenħtieġ li l-kamp ta’ applikazzjoni tal-istituzzjonijiet u l-entitajiet soġġetti għar-rekwiżit iqis l-istrateġija prevista fil-pjan ta’ riżoluzzjoni. Għal dik ir-raġuni, jenħtieġ li l-entitajiet ta’ likwidazzjoni u s-sussidjarji ta’ entitajiet ta’ riżoluzzjoni li mhumiex huma stess entitajiet ta’ riżoluzzjoni ma jkunux meħtieġa jinkludu fil-kuntratti tagħhom it-terminu ta’ rikonoxximent tar-rikapitalizzazzjoni interna, sakemm l-awtorità ta’ riżoluzzjoni ma titlobhomx jagħmlu dan. Fl-aħħar nett, filwaqt li r-raġunijiet biex l-istituzzjonijiet u l-entitajiet jinvokaw l-imprattikabbiltà tal-inklużjoni fil-kuntratti tagħhom tat-terminu ta’ rikonoxximent tar-rikapitalizzazzjoni interna ma jeħtiġux aġġustamenti, jenħtieġ li l-proċedura biex l-istituzzjonijiet u l-entitajiet jirrapportaw dawn is-sitwazzjonijiet lill-awtorità ta’ riżoluzzjoni tiġi ssimplifikata u inkorporata fir-rappurtar annwali għall-finijiet tal-ippjanar tar-riżoluzzjoni.

(35)

Sabiex jiġi ffaċilitat l-ippjanar tar-riżoluzzjoni, il-valutazzjoni tar-riżolvibbiltà u l-eżerċitar tas-setgħa li jiġu indirizzati jew jitneħħew l-impedimenti għar-riżolvibbiltà, kif ukoll biex jitrawwem l-iskambju ta’ informazzjoni, jenħtieġ li l-awtorità ta’ riżoluzzjoni ta’ istituzzjoni b’fergħat sinifikanti fi Stati Membri oħra tkun tista’ tistabbilixxi u tippresiedi kulleġġ ta’ riżoluzzjoni.

(36)

Billi l-għoti ta’ informazzjoni relatata mal-għadd aggregat ta’ klijenti li għalihom istituzzjoni jew entità tkun l-uniku sieħeb bankarju jew is-sieħeb bankarju prinċipali, li tinżamm mill-mekkaniżmi awtomatizzati ċentralizzati stabbiliti skont id-Direttiva (UE) 2015/849 tal-Parlament Ewropew u tal-Kunsill (16), tista’ tkun neċessarja u proporzjonata sabiex titwettaq il-valutazzjoni tal-interess pubbliku, jenħtieġ li l-awtoritajiet ta’ riżoluzzjoni jkunu jistgħu jirċievu dik l-informazzjoni każ b’każ. Jenħtieġ ukoll li t-twaqqit eżatt tal-aċċess indirett għall-informazzjoni mill-awtoritajiet ta’ riżoluzzjoni jiġi speċifikat ukoll.

(37)

Hemm interazzjonijiet bejn il-qafas ta’ riżoluzzjoni u l-qafas ta’ abbuż tas-suq. B’mod partikolari, filwaqt li l-azzjonijiet meħuda fir-riżoluzzjoni jew bi tħejjija għar-riżoluzzjoni jistgħu jikkwalifikaw bħala informazzjoni privileġġata skont ir-Regolament (UE) Nru 596/2014 tal-Parlament Ewropew u tal-Kunsill (17), id-divulgazzjoni prematura tagħhom tirriskja li tipperikola l-proċess ta’ riżoluzzjoni. Meta dawn l-azzjonijiet ikunu passi intermedji fi proċess fit-tul, ir-Regolament (UE) Nru 596/2014 ma jirrikjedix divulgazzjoni immedjata. F’każijiet oħra, l-istituzzjonijiet jew l-entitajiet jistgħu jieħdu passi biex jindirizzaw dik il-kwistjoni billi jdewmu d-divulgazzjoni ta’ informazzjoni privileġġata lill-pubbliku skont l-Artikolu 17(4) jew (5) ta’ dak ir-Regolament. Madankollu, jista’ jkun li mhux dejjem ikun hemm l-inċentivi t-tajbin fil-mument tar-riżoluzzjoni jew tat-tħejjija għar-riżoluzzjoni sabiex l-istituzzjoni jew l-entità tieħu l-inizjattiva għal dan id-dewmien. Biex jiġu evitati sitwazzjonijiet bħal dawn, jenħtieġ li l-awtoritajiet ta’ riżoluzzjoni jkollhom is-setgħa li jitolbu lil istituzzjoni jew entità tiżgura l-kunfidenzjalità ta’ informazzjoni privileġġata dwar it-tħejjija għar-riżoluzzjoni u dwar il-proċess ta’ riżoluzzjoni jew il-valwazzjoni negattiva u l-konverżjoni sakemm iqisu li dan ikun meħtieġ biex jintlaħqu l-objettivi tar-riżoluzzjoni. Jenħtieġ li l-istituzzjonijiet u l-entitajiet ikunu meħtieġa jiddivulgaw din l-informazzjoni privileġġata f’konformità mar-Regolament (UE) Nru 596/2014 biss ladarba jkunu ġew infurmati mill-awtorità ta’ riżoluzzjoni li l-iżgurar tal-kunfidenzjalità ma jkunux għadu meħtieġ biex jintlaħqu l-objettivi tar-riżoluzzjoni. Madankollu, meta l-kunfidenzjalità ma tibqax żgurata, jenħtieġ li l-istituzzjonijiet u l-entitajiet ikunu meħtieġa jiddivulgaw l-informazzjoni privileġġata lill-pubbliku malajr kemm jista’ jkun.

(38)

Jenħtieġ li tinżamm ukoll rabta adegwata bejn il-paga u l-prestazzjoni fil-każ ta’ riżoluzzjoni, b’mod partikolari meta t-telf x’aktarx li jiġi mgħoddi lill-arranġamenti ta’ finanzjament ta’ riżoluzzjoni. F’każijiet bħal dawn, kwalunkwe remunerazzjoni varjabbli tal-membri tal-korp maniġerjali u tal-maniġment superjuri tal-istituzzjoni taħt riżoluzzjoni li ma tkunx tħallset jew li ma tkunx ġiet vestita jenħtieġ li tiġi kkanċellata. Sakemm membru tal-korp maniġerjali jew tal-maniġment superjuri ma jagħtix prova li ma pparteċipax fi, jew ma kienx responsabbli għal, l-imġiba li rriżultat fi, jew ikkontribwiet għall-falliment tal-istituzzjoni taħt riżoluzzjoni, ir-remunerazzjoni varjabbli li ġiet vestita jew tħallset fl-24 xahar ta’ qabel id-deċiżjoni li tittieħed azzjoni ta’ riżoluzzjoni jenħtieġ li tiġi rritornata jew imħallsa lura.

(39)

Wara l-perjodu inizjali ta’ akkumulazzjoni għall-arranġamenti ta’ finanzjament ta’ riżoluzzjoni previst fid-Direttiva 2014/59/UE, il-mezzi finanzjarji disponibbli rispettivi tagħhom jistgħu jiffaċċjaw tnaqqis żgħir taħt il-livell fil-mira tagħhom, li jirriżulta b’mod partikolari minn żieda fid-depożiti koperti. Għalhekk, l-ammont ta’ kontribuzzjonijiet ex ante li x’aktarx jintalab f’dawk iċ-ċirkostanzi x’aktarx li jkun żgħir. Għaldaqstant, huwa possibbli li, wara xi snin, l-ammont ta’ dawk il-kontribuzzjonijiet ex ante ma jibqax proporzjonat meta mqabbel mal-kost tal-ġbir ta’ dawk il-kontribuzzjonijiet. Għalhekk, jenħtieġ li l-awtoritajiet ta’ riżoluzzjoni jkunu jistgħu jiddifferixxu l-ġbir tal-kontribuzzjonijiet ex ante sa tliet snin sakemm l-ammont li għandu jinġabar jilħaq ammont li jkun proporzjonat mal-kost tal-proċess tal-ġbir, dment li tali differiment ma jaffettwax materjalment il-kapaċità tal-awtoritajiet ta’ riżoluzzjoni li jużaw arranġamenti ta’ finanzjament ta’ riżoluzzjoni.

(40)

L-impenji ta’ pagament irrevokabbli huma wieħed mill-komponenti tal-mezzi finanzjarji disponibbli tal-arranġamenti ta’ finanzjament ta’ riżoluzzjoni. Għalhekk, huwa neċessarju li jiġu speċifikati ċ-ċirkostanzi li fihom jistgħu jissejħu dawk l-impenji ta’ pagament. F’każ li entità ma tibqax soġġetta għall-obbligu li tħallas kontribuzzjonijiet lil arranġament ta’ finanzjament ta’ riżoluzzjoni wara deċiżjoni li tirrinunzja l-awtorizzazzjoni tagħha, jenħtieġ li l-impenn ta’ pagament irrevokabbli jiġi kkanċellat. Sabiex jiġi żgurat li l-kanċellazzjoni tal-impenn ta’ pagament irrevokabbli ma twassalx għal sitwazzjoni meta l-mezzi finanzjarji disponibbli fl-arranġament ta’ finanzjament ta’ riżoluzzjoni jaqgħu taħt livell li l-awtorità ta’ riżoluzzjoni tqis adegwat, l-awtorità ta’ riżoluzzjoni jenħtieġ li jkollha s-setgħa li tiddetermina kontribuzzjoni li l-entità rilevanti jenħtieġ li tkun meħtieġa tħallas. Fid-deċiżjoni tagħha, jenħtieġ li l-awtorità ta’ riżoluzzjoni tqis kif xieraq il-ħtieġa li jinżammu kundizzjonijiet ekwivalenti ta’ kompetizzjoni bejn l-istituzzjonijiet parteċipanti kollha, inkluż l-entità li ma tibqax taqa’ fil-kamp ta’ applikazzjoni tal-Artikolu 1 tad-Direttiva 2014/59/UE. L-awtorità ta’ riżoluzzjoni hija meħtieġa tipprovdi raġunijiet dettaljati għad-deċiżjoni tagħha u tiddivulga dik id-deċiżjoni, inkluż ir-raġunament tagħha, fir-rapport annwali tagħha. Barra minn hekk, sabiex jiġu pprovduti aktar trasparenza u ċertezza fir-rigward tas-sehem tal-impenji ta’ pagament irrevokabbli fl-ammont totali ta’ kontribuzzjonijiet ex ante li għandhom jinġabru, jenħtieġ li l-awtorità ta’ riżoluzzjoni tiddetermina tali sehem fuq bażi annwali, soġġett għal-limiti applikabbli. L-awtorità kompetenti jenħtieġ li jkollha l-għan li tiżgura li kwalunkwe effett proċikliku ta’ impenji ta’ pagament irrevokabbli skont it-trattament kontabilistiku tagħhom jiġi mmitigat.

(41)

L-ammont annwali massimu ta’ kontribuzzjonijiet ex post straordinarji għall-arranġamenti ta’ finanzjament ta’ riżoluzzjoni li jistgħu jiġu eżerċitati bħalissa huwa limitat għal tliet darbiet l-ammont tal-kontribuzzjonijiet ex ante. Wara l-perjodu inizjali ta’ akkumulazzjoni previst fid-Direttiva 2014/59/UE, tali kontribuzzjonijiet ex ante ser jiddependu biss, f’ċirkostanzi oħra għajr l-użu tal-arranġamenti ta’ finanzjament ta’ riżoluzzjoni, fuq varjazzjonijiet fil-livell tad-depożiti koperti u, għalhekk, x’aktarx li jsiru żgħar. L-istabbiliment tal-ammont massimu ta’ kontribuzzjonijiet ex post straordinarji abbażi tal-kontribuzzjonijiet ex ante jista’ għaldaqstant ikollu l-effett li jillimita drastikament il-possibbiltà li l-arranġamenti ta’ finanzjament ta’ riżoluzzjoni jiġbru kontribuzzjonijiet ex post, u b’hekk titnaqqas il-kapaċità tagħhom għal azzjoni. Sabiex jiġi evitat tali eżitu, jenħtieġ li jiġi previst limitu differenti u jenħtieġ li l-ammont massimu ta’ kontribuzzjonijiet ex post straordinarji li jkunu jistgħu jiġu eżerċitati jiġi stabbilit għal tliet darbiet ta’ wieħed minn kull tmienja tal-livell fil-mira tal-arranġament ta’ finanzjament ta’ riżoluzzjoni kkonċernat.

(42)

Id-Direttiva 2014/59/UE armonizzat parzjalment il-klassifikazzjoni tad-depożiti skont il-liġijiet nazzjonali li jirregolaw il-proċedimenti normali ta’ insolvenza. Dawk ir-regoli pprevedew klassifikazzjoni tad-depożiti fuq tliet livelli, fejn id-depożiti koperti kellhom il-klassifikazzjoni tal-ogħla prijorità, segwiti minn depożiti eliġibbli ta’ persuni fiżiċi u intrapriżi mikro, żgħar u ta’ daqs medju ’l fuq mil-livell ta’ kopertura. Id-depożiti li jifdal, jiġifieri d-depożiti ta’ korporazzjonijiet kbar li jaqbżu l-livell ta’ kopertura u d-depożiti li ma humiex eliġibbli għal ripagament mid-DGS, kienu meħtieġa li jkollhom klassifikazzjoni ta’ prijorità aktar baxxa, iżda l-pożizzjoni tagħhom ma kinitx armonizzata mod ieħor. Fl-aħħar nett, il-pretensjonijiet tad-DGS ibbenefikaw mill-istess klassifikazzjoni ta’ prijorità ogħla bħad-depożiti koperti. Madankollu, dik l-armonizzazzjoni parzjali ma wrietx li hija l-aħjar soluzzjoni għall-protezzjoni tad-depożitanti. L-armonizzazzjoni parzjali ħolqot differenzi fit-trattament tad-depożitanti li jifdal fl-Istati Membri, b’mod partikolari minħabba li għadd dejjem akbar ta’ Stati Membri ddeċidew li jagħtu wkoll preferenza legali lid-depożiti li jifdal. Dawk id-differenzi ħolqu wkoll diffikultajiet fid-determinazzjoni tax-xenarju kontrofattwali ta’ insolvenza għall-gruppi transfruntiera matul il-valwazzjonijiet tar-riżoluzzjoni. Barra minn hekk, in-nuqqas ta’ preferenza għad-depożitanti ġenerali kellu l-potenzjal li joħloq problemi fir-rigward tal-konformità mal-prinċipju li “l-ebda kreditur ma jmur agħar”, b’mod partikolari meta d-depożiti li l-prijorità tagħhom ma tkunx ġiet armonizzata mid-Direttiva 2014/59/UE jiġu kklassifikati fl-istess livell bħall-pretensjonijiet superjuri. Għalhekk, jenħtieġ li l-klassifikazzjoni tad-depożiti fil-ġerarkija attwali tal-pretensjonijiet tiġi emendata.

(43)

Jenħtieġ li l-klassifikazzjoni tad-depożiti tkun armonizzata bis-sħiħ permezz tal-implimentazzjoni ta’ preferenza għad-depożitanti ġenerali, fejn id-depożiti kollha jibbenefikaw minn klassifikazzjoni ta’ prijorità ogħla fuq il-pretensjonijiet ordinarji mhux garantiti, b’eċċezzjonijiet limitati. Preferenza għad-depożitanti ġenerali ser tikkontribwixxi għat-tisħiħ tal-fiduċja tad-depożitanti u biex jiġi evitat aktar ir-riskju ta’ assalti bankarji. Il-protezzjoni mtejba tad-depożitanti hija allinjata wkoll mar-rwol ċentrali li għandhom id-depożiti fl-ekonomija reali, bħala l-għodda primarja għat-tfaddil u għall-pagamenti, kif ukoll fl-attività bankarja, fejn id-depożiti jirrappreżentaw sors importanti ta’ finanzjament u huma xprunatur ewlieni ta’ fiduċja fis-sistema bankarja, li ssir ta’ rilevanza partikolari fi żminijiet ta’ stress fis-suq. Barra minn hekk, preferenza għad-depożitanti ġenerali ttejjeb ir-riżolvibbiltà tal-istituzzjonijiet ta’ kreditu billi żżid il-kapaċità tagħhom li jikkonformaw mar-rekwiżiti għall-aċċess għall-arranġamenti ta’ finanzjament ta’ riżoluzzjoni u tnaqqas l-ammont ta’ finanzjament meħtieġ minn dawk l-arranġamenti, minħabba r-riskju aktar baxx ta’ ksur tal-prinċipju li “l-ebda kreditur ma jmur agħar” fejn tingħata rikapitalizzazzjoni interna għad-dejn ordinarju mhux garantit. B’mod partikolari, it-tneħħija ta’ depożiti mill-klassi ta’ insolvenza ta’ pretensjonijiet ordinarji mhux garantiti żżid il-kapaċità ta’ rikapitalizzazzjoni interna tal-pretensjonijiet ordinarji mhux garantiti li jifdal billi timminimizza r-riskju ta’ ksur tal-prinċipju li “l-ebda kreditur ma jmur agħar”. Billi titnaqqas il-probabbiltà li d-depożiti jiġu valwati b’mod negattiv jew ikkonvertiti biex jiġi żgurat l-aċċess għall-arranġamenti ta’ finanzjament ta’ riżoluzzjoni, il-preferenza għad-depożitanti ġenerali tikkontribwixxi sabiex l-għodda tar-rikapitalizzazzjoni interna ssir aktar effettiva u kredibbli u twassal għal żieda fit-trasparenza u fiċ-ċertezza legali tal-qafas ta’ riżoluzzjoni. Il-preferenza għad-depożitanti ġenerali tikkontribwixxi wkoll għall-kredibbiltà tal-istrateġiji ta’ trasferiment f’riżoluzzjoni, minħabba li tissimplifika l-inklużjoni tal-kuntratt ta’ depożitu kollu fil-perimetru tal-obbligazzjonijiet li għandhom jiġu ttrasferiti lil xerrej privat jew lil istituzzjoni tranżitorja, għall-benefiċċju tar-relazzjoni mal-klijenti u l-valur ta’ franchise tal-istituzzjoni taħt riżoluzzjoni. Fl-aħħar nett, armonizzazzjoni sħiħa tal-klassifikazzjoni tal-insolvenza tad-depożitanti tkun ta’ benefiċċju mill-perspettiva transfruntiera u ta’ kundizzjonijiet ekwi.

(44)

Huwa xieraq li ċerti depożiti mhux eliġibbli jiġu esklużi mill-preferenza għad-depożitanti ġenerali. B’mod partikolari, jenħtieġ li d-depożiti meħuda minn istituzzjoni ta’ kreditu biex jintużaw għall-konformità mal-MREL ma jibbenefikawx minn preferenza legali, peress li dan ikun inkompatibbli mal-prinċipju ġenerali li jenħtieġ li l-obbligazzjonijiet inklużi fl-MREL iġarrbu telf u jikkontribwixxu għar-rikapitalizzazzjoni ta’ istituzzjoni ta’ kreditu fil-każ tal-falliment tagħha. Jenħtieġ li l-klassifikazzjoni ta’ prijorità ta’ dawn id-depożiti ma tiġix armonizzata mid-Direttiva 2014/59/UE u minflok jenħtieġ li tiġi ddeterminata f’konformità mad-dispożizzjonijiet statutorji u kuntrattwali applikabbli. Barra minn hekk, jenħtieġ li l-klassifikazzjoni ma tvarjax matul id-durata tad-depożitu, la skont jekk l-awtorità ta’ riżoluzzjoni tkunx awtorizzat l-inklużjoni tiegħu fir-riżorsi eliġibbli għall-MREL u lanqas skont il-maturità residwa tiegħu.

(45)

Jenħtieġ li tinżamm il-klassifikazzjoni attwali tad-depożiti fuq tliet livelli, peress li tipproteġi b’mod qawwi l-pretensjonijiet tad-DGSs u konsegwentement il-mezzi ta’ finanzjament tagħhom. Madankollu, fid-dawl tal-emendi għad-Direttiva 2014/49/UE introdotti bid-Direttiva (UE) 2026/804 tal-Parlament Ewropew u tal-Kunsill (18) li jinkludu d-depożiti ta’ ċerti awtoritajiet pubbliċi fil-kamp ta’ applikazzjoni tal-ħlas lura mid-DGS, huwa xieraq li l-parti ta’ dawk id-depożiti li taqbeż il-livell ta’ kopertura jkollha l-istess klassifikazzjoni ta’ prijorità bħal dik tad-depożiti eliġibbli ta’ persuni fiżiċi u ta’ intrapriżi mikro, żgħar u ta’ daqs medju ’l fuq mil-livell ta’ kopertura.

(46)

L-arranġamenti ta’ finanzjament ta’ riżoluzzjoni jistgħu jintużaw biex jappoġġaw l-applikazzjoni tal-għodda tal-bejgħ ta’ negozju jew tal-għodda tal-istituzzjoni tranżitorja fejn sett ta’ assi, drittijiet u obbligazzjonijiet tal-istituzzjoni taħt riżoluzzjoni jiġu ttrasferiti lil riċevitur. F’dak il-każ, l-arranġament ta’ finanzjament ta’ riżoluzzjoni jista’ jkollu pretensjoni kontra l-istituzzjoni jew l-entità residwa fl-istralċ sussegwenti tagħha taħt proċedimenti normali ta’ insolvenza. Dan jista’ jseħħ meta l-arranġament ta’ finanzjament ta’ riżoluzzjoni jintuża b’konnessjoni mat-telf li l-kredituri kieku kienu jġarrbu, inkluż taħt il-forma ta’ garanziji għal assi u obbligazzjonijiet jew il-kopertura tad-differenza bejn l-assi u l-obbligazzjonijiet ittrasferiti. Sabiex jiġi żgurat li l-azzjonisti u l-kredituri li tħallew lura fl-istituzzjoni jew l-entità residwa effettivament jassorbu t-telf tal-istituzzjoni taħt riżoluzzjoni u jtejbu l-possibbiltà ta’ ripagamenti f’insolvenza għax-xibka ta’ sikurezza speċifika għar-riżoluzzjoni, jenħtieġ li dawk il-pretensjonijiet tal-arranġament ta’ finanzjament ta’ riżoluzzjoni kontra l-istituzzjoni jew l-entità residwa, u l-pretensjonijiet li jirriżultaw minn spejjeż raġonevoli mġarrba kif suppost, jikklassifikaw f’insolvenza ’l fuq mill-pretensjonijiet tad-depożitaturi u tad-DGSs. Billi l-kumpens imħallas lill-azzjonisti u lill-kredituri permezz ta’ arranġamenti ta’ finanzjament ta’ riżoluzzjoni minħabba ksur tal-prinċipju li “l-ebda kreditur ma jmur agħar” għandu l-għan li jikkumpensahom għar-riżultati tal-azzjoni ta’ riżoluzzjoni, jenħtieġ li dak il-kumpens ma jagħtix lok għal pretensjonijiet minn dawk l-arranġamenti.

(47)

Sabiex tiġi żgurata flessibbiltà suffiċjenti u sabiex ikun aktar faċli li d-DGS jintervjenu f’appoġġ għall-użu tal-għodod ta’ riżoluzzjoni, meta dawn iwasslu għall-ħruġ mis-suq tal-istituzzjoni taħt riżoluzzjoni, jenħtieġ li jiġu speċifikati ċerti aspetti tal-użu tad-DGS f’riżoluzzjoni. B’mod partikolari, jenħtieġ li jiġi speċifikat li l-fondi tad-DGS tista’ tintuża biex jiġu appoġġati tranżazzjonijiet ta’ trasferiment li jinkludu depożiti, inkluż depożiti eliġibbli ogħla mil-livell ta’ kopertura pprovdut mid-DGS ikkonċernata, kif ukoll id-depożiti mhux eliġibbli inklużi fil-preferenza għad-depożitanti ġenerali, f’ċerti każijiet u b’kundizzjonijiet ċari. Jenħtieġ li l-kontribuzzjoni ta’ DGS tkun immirata biex tkopri n-nuqqas fil-valur tal-assi ttrasferiti lil xerrej jew istituzzjoni tranżitorja meta mqabbel mal-valur tad-depożiti ttrasferiti. Meta kontribuzzjoni tkun meħtieġa mix-xerrej bħala parti mit-tranżazzjoni biex tiġi żgurata n-newtralità tal-kapital tiegħu u tiġi ppreservata l-konformità mar-rekwiżiti kapitali tax-xerrej, jenħtieġ li d-DGS tikkontribwixxi wkoll għal dak il-għan. Jenħtieġ li l-appoġġ ipprovdut minn DGS għal azzjoni ta’ riżoluzzjoni jieħu l-forma ta’ flus kontanti jew forom oħra, bħal garanziji jew ftehimiet dwar il-kondiviżjoni tat-telf li jistgħu jimminimizzaw l-impatt tal-appoġġ fuq il-mezzi finanzjarji disponibbli ta’ dik id-DGS, filwaqt li fl-istess ħin jippermettu l-kontribuzzjoni tad-DGS biex tilħaq l-iskopijiet tagħha.

(48)

Jenħtieġ li l-kontribuzzjoni tad-DGS f’riżoluzzjoni tkun soġġetta għal ċerti limiti. L-ewwel nett, l-ammont totali tal-kontribuzzjoni tad-DGS fi kwalunkwe każ ta’ riżoluzzjoni jenħtieġ li ma jaqbiżx l-ammont ta’ depożiti koperti fl-istituzzjoni ta’ kreditu kkonċernata. It-tieni, jenħtieġ li jiġi żgurat li kwalunkwe intervent mid-DGS f’azzjoni ta’ riżoluzzjoni li tiddependi primarjament fuq l-għodda tar-rikapitalizzazzjoni interna għall-finijiet tar-rikapitalizzazzjoni tal-istituzzjoni taħt riżoluzzjoni u tal-kontinwazzjoni tal-attivitajiet tagħha ma jaqbiżx it-telf li d-DGS iġġarrab f’insolvenza jekk tħallas lid-depożitanti koperti u tissurroga għall-pretensjonijiet tagħhom fuq l-assi tal-istituzzjoni. It-tielet, meta d-DGS tintuża b’appoġġ għal azzjoni ta’ riżoluzzjoni li tikkonsisti prinċipalment fit-trasferiment tan-negozju lil akkwirent jew lil istituzzjoni tranżitorja, l-ammont tal-kontribuzzjoni tad-DGS jenħtieġ li ma jaqbiżx is-62,5 % tal-livell fil-mira tagħha, sakemm l-awtorità deżinjata skont id-Direttiva 2014/49/UE ma tagħżilx li ma tapplikax dak il-limitu biex jiġu evitati effetti negattivi fuq l-istabbiltà finanzjarja jew biex jiġi ppreservat l-aċċess tad-depożitanti għad-depożiti tagħhom. Jenħtieġ li l-EBA toħroġ linji gwida dwar il-kundizzjonijiet għad-diżapplikazzjoni ta’ dak il-limitu. Ir-raba’, jenħtieġ li l-ammont tal-kontribuzzjoni tad-DGS ma jaqbiżx id-differenza bejn l-assi ttrasferiti u d-depożiti u l-obbligazzjonijiet ittrasferiti bl-istess klassifikazzjoni ta’ prijorità jew bi klassifikazzjoni ta’ prijorità ogħla f’insolvenza minn dawk id-depożiti. Dan jiżgura li l-kontribuzzjoni tad-DGS tintuża biss għall-fini li tiġi evitata l-impożizzjoni ta’ telf fuq id-depożitanti, meta xieraq, u mhux għall-protezzjoni tal-kredituri li jikklassifikaw taħt id-depożiti f’insolvenza. Madankollu, meta rilevanti, il-kontribuzzjoni tista’ tinkludi wkoll ammont meħtieġ biex tiġi żgurata n-newtralità kapitali tal-entità riċeventi.

(49)

Jenħtieġ li jiġi speċifikat li d-DGS għandha tkun tista’ tikkontribwixxi biss għal trasferiment ta’ obbligazzjonijiet għajr depożiti koperti fil-kuntest ta’ riżoluzzjoni jekk l-awtorità ta’ riżoluzzjoni tikkonkludi, każ b’każ, li d-depożiti inklużi fil-preferenza għad-depożitanti ġenerali għajr depożiti koperti ma jistgħux jiġu rikapitalizzati internament, u lanqas jitħallew fl-istituzzjoni residwa taħt riżoluzzjoni li ser tiġi stralċata, u jekk il-kundizzjonijiet għall-użu tal-arranġamenti ta’ finanzjament ta’ riżoluzzjoni ma jiġux issodisfati permezz ta’ kontribuzzjonijiet mill-azzjonisti u l-kredituri. B’mod partikolari, jenħtieġ li l-awtorità ta’ riżoluzzjoni titħalla tevita l-allokazzjoni tat-telf għal dawk id-depożiti fejn l-esklużjoni tkun strettament meħtieġa u proporzjonata biex tiġi ppreservata l-kontinwità tal-funzjonijiet kritiċi u tal-linji ta’ negozju ewlenin jew fejn meħtieġ biex jiġu evitati kontaġju mifrux u instabbiltà finanzjarja, li jistgħu jikkawżaw tfixkil serju fl-ekonomija tal-Unjoni jew ta’ Stat Membru. Jenħtieġ li l-istess raġunijiet japplikaw għall-inklużjoni fit-trasferiment lil xerrej jew lil istituzzjoni tranżitorja ta’ obbligazzjonijiet b’kapaċità ta’ rikapitalizzazzjoni interna oħra bi klassifikazzjoni ta’ prijorità aktar baxxa minn dik tad-depożiti koperti. F’dak il-każ, jenħtieġ li t-trasferiment ta’ dawk l-obbligazzjonijiet b’kapaċità ta’ rikapitalizzazzjoni interna ma jkunx appoġġat mill-kontribuzzjoni tad-DGS. Jekk ikun meħtieġ kwalunkwe appoġġ finanzjarju estern għat-trasferiment ta’ dawk l-obbligazzjonijiet b’kapaċità ta’ rikapitalizzazzjoni interna, jenħtieġ li dak l-appoġġ jiġi pprovdut permezz tal-arranġament ta’ finanzjament ta’ riżoluzzjoni.

(50)

Minħabba l-possibbiltà li d-DGS tintuża f’riżoluzzjoni, jeħtieġ li jiġu speċifikati aktar il-kundizzjonijiet li taħthom il-kontribuzzjoni tad-DGS tista’ tgħodd għall-konformità mar-rekwiżiti għall-aċċess għall-arranġamenti ta’ finanzjament ta’ riżoluzzjoni. Jenħtieġ li dik il-possibbiltà tkun disponibbli biss għal istituzzjonijiet ta’ kreditu b’valur totali ta’ assi ugwali għal jew inqas minn EUR 80 biljun u fil-kuntest ta’ azzjoni ta’ riżoluzzjoni li tiddependi primarjament fuq l-applikazzjoni tal-għodda tal-bejgħ ta’ negozju jew l-għodda tal-istituzzjoni tranżitorja. Sabiex jiġi żgurat li r-riżoluzzjoni tkompli tiġi ffinanzjata primarjament mir-riżorsi interni tal-istituzzjoni ta’ kreditu u jiġu mminimizzati d-distorsjonijiet tal-kompetizzjoni, l-użu tal-kontribuzzjoni tad-DGS biex jiġi żgurat l-aċċess għall-arranġamenti ta’ finanzjament ta’ riżoluzzjoni jenħtieġ li jkun possibbli biss għall-istituzzjonijiet ta’ kreditu li għalihom, fl-24 xahar preċedenti qabel ma tittieħed azzjoni ta’ riżoluzzjoni, il-pjan ta’ riżoluzzjoni jew il-pjan ta’ riżoluzzjoni tal-grupp ma jipprevedix l-istralċ tagħhom b’mod ordnat f’każ ta’ falliment, minħabba li l-MREL iddeterminat mill-awtoritajiet ta’ riżoluzzjoni għal dawk l-istituzzjonijiet ta’ kreditu ġie stabbilit f’livell li jinkludi kemm l-assorbiment tat-telf kif ukoll l-ammonti ta’ rikapitalizzazzjoni. Jenħtieġ li l-MREL stabbilit mill-awtorità ta’ riżoluzzjoni għall-istituzzjonijiet ta’ kreditu b’valur totali tal-assi fuq bażi individwali ogħla minn EUR 30 biljun jikkonforma mal-livelli minimi tal-MREL għal istituzzjonijiet u entitajiet bi strateġiji ta’ riżoluzzjoni preferuti li jipprevedu primarjament l-użu ta’ għodod ta’ trasferiment f’riżoluzzjoni, anki jekk il-pjan ta’ riżoluzzjoni jew il-pjan ta’ riżoluzzjoni tal-grupp rispettiv kien ippreveda azzjonijiet differenti u għalhekk l-MREL ta’ dawk l-istituzzjonijiet ta’ kreditu ma kienx soġġett għal dawk il-livelli minimi. Barra minn hekk, jenħtieġ li l-kontribuzzjoni tad-DGS tkun preċeduta mill-kontribuzzjoni ta’ fondi proprji u obbligazzjonijiet eliġibbli lejn l-assorbiment tat-telf u r-rikapitalizzazzjoni sal-massimu possibbli. Fl-aħħar nett, jenħtieġ li jkun possibbli l-Istati Membri jirrikjedu li l-istituzzjoni taħt riżoluzzjoni ma tridx tkun kisret l-MREL tagħha, inkluż il-miri intermedji vinkolanti, f’ċertu perjodu qabel l-azzjoni ta’ riżoluzzjoni, mingħajr preġudizzju għall-ksur tekniku fuq terminu qasir tal-MREL.

(51)

Jekk il-kontribuzzjoni magħmula mill-azzjonisti u l-kredituri tal-istituzzjoni taħt riżoluzzjoni permezz ta’ tnaqqis, valwazzjoni negattiva jew konverżjoni tal-obbligazzjonijiet tagħhom jew permezz tat-telf li huma mistennija jġarrbu fl-istralċ tal-entità residwa, miżjuda mal-kontribuzzjoni magħmula mid-DGS, tammonta għal mill-inqas 8 % tal-obbligazzjonijiet totali tal-istituzzjoni inkluż il-fondi proprji, jenħtieġ li l-awtorità ta’ riżoluzzjoni tkun tista’ tuża l-arranġament ta’ finanzjament ta’ riżoluzzjoni sabiex tipprovdi finanzjament ulterjuri meta dan ikun meħtieġ sabiex tiġi żgurata riżoluzzjoni effettiva f’konformità mal-objettivi tar-riżoluzzjoni. F’każijiet bħal dawn, jenħtieġ li l-kontribuzzjoni tad-DGS tkun limitata għall-ammont meħtieġ biex ikun permess aċċess għall-arranġament ta’ finanzjament ta’ riżoluzzjoni. Barra minn hekk, għal istituzzjoni ta’ kreditu b’valur totali tal-assi fuq bażi individwali ta’ bejn EUR 30 biljun u EUR 80 biljun, jenħtieġ li l-kontribuzzjoni tad-DGS ma taqbiżx it-2,5 % tal-obbligazzjonijiet totali inkluż il-fondi proprji tal-istituzzjoni ta’ kreditu fuq bażi individwali.

(52)

F’ċirkostanzi straordinarji, jista’ jiġri li l-kontribuzzjoni tal-arranġament ta’ finanzjament ta’ riżoluzzjoni ta’ 5 % tal-obbligazzjonijiet totali inkluż il-fondi proprji ma tkunx biżżejjed biex tkopri l-ħtiġijiet ta’ finanzjament ta’ azzjoni ta’ riżoluzzjoni partikolari. F’każijiet bħal dawn, u meta dik il-kontribuzzjoni tkun ġiet permessa mill-intervent tad-DGS, jenħtieġ li d-DGS tagħmel kontribuzzjoni addizzjonali, taħt ċerti kundizzjonijiet, ugwali għall-ammont ta’ telf li d-depożiti koperti kienu jġarrbu li kieku ma kinux protetti. Jenħtieġ li l-kost ta’ dik il-kontribuzzjoni addizzjonali ma għandux jaqbeż it-telf li d-DGS kienet iġġarrab fix-xenarju ipotetiku ta’ stralċ skont proċedimenti normali ta’ insolvenza u l-ħlas lura ta’ depożiti koperti. Barra minn hekk, jenħtieġ li l-ammont totali tal-kontribuzzjoni inizjali u tal-kontribuzzjoni addizzjonali tad-DGS ma jaqbiżx l-ammont ta’ depożiti koperti fl-istituzzjoni ta’ kreditu kkonċernata. Flimkien mal-kontribuzzjoni addizzjonali tad-DGS, jenħtieġ li l-awtorità ta’ riżoluzzjoni tkun tista’ tfittex aktar finanzjament minn sorsi ta’ finanzjament alternattivi, meta jiġu ssodisfati l-kundizzjonijiet għal dak il-finanzjament.

(53)

Meta l-fondi tad-DGS jintużaw fl-applikazzjoni tal-għodda tal-bejgħ ta’ negozju jew tal-għodda tal-istituzzjoni tranżitorja, b’mod iżolat jew flimkien ma’ kontribuzzjonijiet mill-arranġament ta’ finanzjament ta’ riżoluzzjoni, jenħtieġ li l-entità residwa li jifdal wara t-trasferiment tal-assi, tad-drittijiet u tal-obbligazzjonijiet tiġi stralċata b’mod ordnat f’konformità mal-liġi nazzjonali applikabbli, skont l-Artikolu 37(6) tad-Direttiva 2014/59/UE. Barra minn hekk, meta l-fondi tad-DGS jintużaw b’appoġġ għall-għodda tal-istituzzjoni tranżitorja, jenħtieġ li l-operazzjonijiet tal-istituzzjoni tranżitorja jiġu tterminati f’konformità mal-Artikolu 41(3), (5) u (6) tad-Direttiva 2014/59/UE.

(54)

Biex jiġi ffaċilitat il-proċess tal-adozzjoni ta’ aspetti tekniċi ħafna tar-rekwiżiti ta’ rappurtar, u jittejbu l-implimentazzjoni u l-monitoraġġ tagħhom mill-awtoritajiet ta’ riżoluzzjoni, jenħtieġ li l-mandati mogħtija lill-EBA biex tiżviluppa standards tekniċi ta’ implimentazzjoni jiġu riveduti biex tiġi żgurata l-konsistenza fil-kamp ta’ applikazzjoni u l-kontenut tad-diversi mandati li jinsabu fid-Direttiva 2014/59/UE. Jenħtieġ li dawk il-mandati jiġu allinjati wkoll mad-dispożizzjonijiet li jirregolaw ir-rappurtar u d-divulgazzjoni tal-informazzjoni superviżorja stabbiliti fir-Regolament (UE) Nru 575/2013. Jenħtieġ li dawk l-emendi għall-mandati eżistenti jiffaċilitaw rieżamijiet futuri tal-istandards tekniċi ta’ implimentazzjoni u li ma jkunux maħsuba biex jaffettwaw l-obbligi ta’ rappurtar u divulgazzjoni li huma attwalment applikabbli. Jenħtieġ li l-Kummissjoni tingħata s-setgħa tadotta dawk l-istandards tekniċi ta’ implimentazzjoni żviluppati mill-EBA permezz ta’ atti ta’ implimentazzjoni skont l-Artikolu 291 tat-Trattat dwar il-Funzjonament tal-Unjoni Ewropea (TFUE) u f’konformità mal-Artikolu 15 tar-Regolament (UE) Nru 1093/2010. Jenħtieġ li l-kamp ta’ applikazzjoni tal-istandards tekniċi regolatorji eżistenti dwar l-istima tar-rekwiżiti ta’ fondi proprji addizzjonali u tar-rekwiżit ta’ riżerva kombinata għall-entitajiet ta’ riżoluzzjoni jiġi estiż biex jinkludi entitajiet li ma ġewx identifikati bħala entitajiet ta’ riżoluzzjoni, fejn dawk ir-rekwiżiti ma jkunux ġew stabbiliti fuq l-istess bażi bħall-MREL. Jenħtieġ li l-Kummissjoni tingħata s-setgħa tissupplimenta d-Direttiva 2014/59/UE billi tadotta dawk l-istandards tekniċi regolatorji żviluppati mill-EBA permezz ta’ atti delegati skont l-Artikolu 290 TFUE u f’konformità mal-Artikoli 10 sa 14 tar-Regolament (UE) Nru 1093/2010.

(55)

Sabiex tippermetti integrazzjoni akbar tar-rappurtar u d-divulgazzjonijiet relatati mal-MREL, jenħtieġ li l-EBA tippubblika d-divulgazzjonijiet tal-istituzzjonijiet u l-entitajiet b’mod ċentralizzat, filwaqt li tirrispetta d-dritt tal-istituzzjonijiet u l-entitajiet kollha li jippubblikaw id-data u l-informazzjoni huma stess. Jenħtieġ li tali divulgazzjonijiet ċentralizzati jippermettu lill-EBA tippubblika d-divulgazzjonijiet ta’ istituzzjonijiet żgħar u mhux kumplessi, abbażi tal-informazzjoni rrappurtata minn dawk l-istituzzjonijiet lill-awtoritajiet kompetenti u ta’ riżoluzzjoni u, għalhekk, jenħtieġ li jnaqqsu b’mod sinifikanti l-piż amministrattiv li għalih huma soġġetti l-istituzzjonijiet żgħar u mhux kumplessi. Fl-istess ħin, jenħtieġ li ċ-ċentralizzazzjoni tad-divulgazzjonijiet ma jkollha l-ebda impatt fuq l-ispejjeż għal istituzzjonijiet u entitajiet oħra, u jenħtieġ li żżid it-trasparenza u tnaqqas l-ispiża tal-aċċess għall-informazzjoni prudenzjali għall-parteċipanti fis-suq. Jenħtieġ li tali trasparenza miżjuda tiffaċilita l-komparabbiltà tad-data fost l-istituzzjonijiet u l-entitajiet u tippromwovi d-dixxiplina fis-suq. Iċ-ċentralizzazzjoni tad-divulgazzjonijiet relatati mar-riżoluzzjoni tiżgura allinjament mal-proċedura applikabbli għad-divulgazzjonijiet superviżorji kif stabbilit fir-Regolament (UE) Nru 575/2013 biex jiġi żgurat li l-obbligi kollha ta’ divulgazzjoni jiġu ttrattati b’mod simili.

(56)

Fid-dawl tar-rwol tagħha fit-tisħiħ tal-konverġenza tal-prattiki tal-awtoritajiet, jenħtieġ li l-EBA timmonitorja u tirrapporta dwar il-prattiki u l-metodoloġiji interni adottati mill-awtoritajiet ta’ riżoluzzjoni meta tiddeċiedi jekk istituzzjoni jew entità għandhiex tiġi mmarkata għal riżoluzzjoni jew stralċ taħt proċedimenti normali ta’ insolvenza, fid-dawl tal-objettivi tar-riżoluzzjoni u ta’ jekk ir-riżoluzzjoni tkunx fl-interess pubbliku. Jenħtieġ li l-EBA timmonitorja u tirrapporta wkoll dwar il-progress li jkun sar mill-awtoritajiet ta’ riżoluzzjoni biex tittejjeb ir-riżolvibbiltà tal-istituzzjonijiet u l-gruppi u dwar l-azzjonijiet u t-tħejjijiet tal-awtoritajiet ta’ riżoluzzjoni biex tiġi żgurata implimentazzjoni effettiva tal-għodod u s-setgħat ta’ riżoluzzjoni. F’dawk ir-rapporti, jenħtieġ li l-EBA tivvaluta wkoll il-livell ta’ trasparenza tal-miżuri meħuda mill-awtoritajiet ta’ riżoluzzjoni lejn il-partijiet ikkonċernati esterni rilevanti u l-firxa tal-kontribut tagħhom għat-tħejjija għar-riżoluzzjoni u għar-riżolvibbiltà tal-istituzzjonijiet u l-gruppi.

(57)

Fil-kuntest tal-kompiti tal-EBA li tikkontribwixxi biex tiżgura reġim koerenti u kkoordinat għall-immaniġġar u r-riżoluzzjoni tal-kriżijiet fl-Unjoni, jenħtieġ li l-EBA tikkoordina u tissorvelja eżerċizzji ta’ simulazzjoni tal-immaniġġar tal-kriżijiet madwar l-Unjoni kollha. Jenħtieġ li dawk is-simulazzjonijiet ikopru l-koordinazzjoni u l-kooperazzjoni bejn l-awtoritajiet kompetenti u l-awtoritajiet ta’ riżoluzzjoni matul id-deterjorament tas-sitwazzjoni finanzjarja tal-istituzzjonijiet u tal-entitajiet, l-ittestjar tal-applikazzjoni tas-sett ta’ għodod fl-ippjanar tal-irkupru u tar-riżoluzzjoni, l-intervent bikri, u r-riżoluzzjoni b’mod olistiku. Jenħtieġ li dawk l-eżerċizzji ta’ simulazzjoni tal-kriżijiet jikkunsidraw b’mod partikolari d-dimensjoni transfruntiera fl-interazzjoni bejn l-awtoritajiet rilevanti u l-applikazzjoni tal-għodod u s-setgħat disponibbli. Fejn rilevanti, jenħtieġ li l-eżerċizzji ta’ simulazzjoni tal-kriżijiet ikopru wkoll l-adozzjoni u l-implimentazzjoni ta’ skemi ta’ riżoluzzjoni fl-unjoni bankarja, skont ir-Regolament (UE) Nru 806/2014.

(58)

Minkejja r-regoli attwalment applikabbli dwar is-segretezza professjonali, jenħtieġ li jittejbu l-iskambji ta’ informazzjoni bejn l-awtoritajiet ta’ riżoluzzjoni u l-awtoritajiet tat-taxxa. Jenħtieġ li dawn l-iskambji jsiru f’konformità mal-liġi nazzjonali. Meta dik l-informazzjoni toriġina fi Stat Membru ieħor, jenħtieġ li tiġi skambjata biss bil-kunsens espress tal-awtorità rilevanti li tkun iddivulgatha.

(59)

Id-Direttiva (UE) 2019/879 emendat id-Direttiva 2014/59/UE biex tintroduċi regoli ddedikati biex jiġi żgurat li l-klijenti mhux professjonali ma jinvestux b’mod eċċessiv fi strumenti li huma eliġibbli għall-MREL ta’ istituzzjonijiet u entitajiet. Iż-żamma eċċessiva ta’ strumenti tal-MREL minn klijenti mhux professjonali tista’ tkun ta’ detriment għar-riżolvibbiltà ta’ istituzzjoni jew entità u tista’ toħloq problemi għall-istabbiltà finanzjarja. Dan jista’ jkun partikolarment problematiku meta l-klijenti mhux professjonali jkunu wkoll depożitanti tal-istituzzjoni emittenti, peress li dawk id-depożitanti huma partikolarment vulnerabbli għat-tqegħid mhux xieraq tal-istrumenti proprji tal-istituzzjoni. Għalhekk, jenħtieġ li l-awtoritajiet jiżguraw li l-bejjiegħa, l-istituzzjonijiet u l-entitajiet jikkonformaw mal-miżuri adottati mill-Istati Membri li jittrasponu d-Direttiva (UE) 2019/879 biex jiżguraw il-protezzjoni tal-klijenti mhux professjonali. Meta dawk il-miżuri ma jkunux qed jiġu applikati b’mod xieraq, jenħtieġ li l-awtoritajiet jinfurzaw dawk ir-regoli. Għalhekk huwa xieraq li jiġu introdotti setgħat iddedikati fid-Direttiva 2014/59/UE biex jiġu indirizzati n-nuqqasijiet ta’ konformità mar-regoli ddedikati dwar il-protezzjoni tal-klijenti mhux professjonali, flimkien mas-setgħat eżistenti fid-Direttiva 2014/65/UE. Barra minn hekk, bl-użu tar-rappurtar eżistenti għall-ippjanar ta’ riżoluzzjoni u għall-finijiet tal-MREL, jenħtieġ li l-awtoritajiet ta’ riżoluzzjoni jivvalutaw in-natura tal-bażi tal-investituri fl-istrumenti eliġibbli għall-MREL meta jwettqu l-valutazzjoni tar-riżolvibbiltà tal-istituzzjonijiet u l-entitajiet u, fejn meħtieġ, jirrikjedu li l-istituzzjoni jew l-entità tindirizza jew tneħħi kwalunkwe impediment li jinstab. Fl-aħħar nett, jenħtieġ li l-EBA, f’koordinazzjoni mal-Awtorità Superviżorja Ewropea (l-Awtorità Ewropea tat-Titoli u s-Swieq) (ESMA) stabbilita bir-Regolament (UE) Nru 1095/2010 tal-Parlament Ewropew u tal-Kunsill (19), tirrapporta dwar il-miżuri adottati mill-Istati Membri biex jipproteġu lill-klijenti mhux professjonali fir-rigward tal-istrumenti ta’ dejn li jkunu eliġibbli għall-MREL skont id-Direttiva 2014/59/UE, filwaqt li tqabbel u tivvaluta kwalunkwe impatt potenzjali fuq l-operazzjonijiet transfruntieri. Abbażi ta’ dan, il-Kummissjoni tista’ tadotta proposta leġiżlattiva biex tiżgura protezzjoni aktar effettiva tal-klijenti mhux professjonali.

(60)

Il-valutazzjoni tal-impatt ta’ kwalità għolja hija kruċjali għall-iżvilupp ta’ proposti leġiżlattivi tajbin u bbażati fuq l-evidenza, filwaqt li l-fatti u l-evidenza huma kruċjali biex jinformaw id-deċiżjonijiet meħuda matul il-proċedura leġiżlattiva. Għal dik ir-raġuni, jenħtieġ li l-EBA, il-Bord Uniku ta’ Riżoluzzjoni u l-BĊE jipprovdu lill-Kummissjoni, fuq talba tagħha, bl-informazzjoni kollha li teħtieġ għall-kompiti relatati mal-iżvilupp tal-politika tagħha, inkluż it-tħejjija ta’ valutazzjonijiet tal-impatt u t-tħejjija u n-negozjar ta’ proposti leġiżlattivi. Meta dik l-informazzjoni ma tkunx disponibbli għall-EBA, il-Bord Uniku ta’ Riżoluzzjoni jew il-BĊE, jenħtieġ li din tiġi pprovduta mill-awtoritajiet ta’ riżoluzzjoni, l-awtoritajiet kompetenti u membri oħra tas-Sistema Ewropea ta’ Banek Ċentrali.

(61)

Meta titqies il-ħtieġa li tiġi protetta l-istabbiltà finanzjarja u li tittieħed azzjoni malajr, jenħtieġ li l-awtoritajiet ta’ riżoluzzjoni ma jkunux soġġetti għall-proċeduri għall-akkwist fir-rigward ta’ kuntratti pubbliċi għal servizzi ta’ valwazzjoni għall-finijiet ta’ riżoluzzjoni u ta’ valutazzjoni ta’ jekk l-azzjonisti u l-kredituri kinux jirċievu trattament aħjar li kieku l-istituzzjoni taħt riżoluzzjoni daħlet fi proċedimenti normali ta’ insolvenza. Għalhekk jenħtieġ li s-servizzi pprovduti jiġu esklużi mill-kamp ta’ applikazzjoni tad-Direttiva 2014/24/UE tal-Parlament Ewropew u tal-Kunsill (20). Rigward is-servizzi legali li l-awtoritajiet ta’ riżoluzzjoni jista’ jkollhom bżonn, ċerti servizzi legali diġà huma esklużi mill-kamp ta’ applikazzjoni ta’ dik id-Direttiva u oħrajn huma inklużi fil-lista ta’ servizzi stabbilita fl-Anness XIV ta’ dik id-Direttiva li għalihom japplikaw limiti ogħla u regoli armonizzati eħfef.

(62)

Billi l-objettiv ta’ din id-Direttiva, jiġifieri li jittejbu l-effettività u l-effiċjenza tal-qafas ta’ rkupru u riżoluzzjoni għall-istituzzjonijiet u l-entitajiet, ma jistgħux jintlaħqu b’mod suffiċjenti mill-Istati Membri minħabba r-riskji li l-approċċi nazzjonali diverġenti jistgħu jinvolvu għall-integrità tas-suq intern, iżda pjuttost jistgħu, billi jiġu emendati r-regoli li diġà huma stabbiliti fil-livell tal-Unjoni, jintlaħqu aħjar fil-livell tal-Unjoni, l-Unjoni tista’ tadotta miżuri f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jintlaħaq dak l-objettiv.

(63)

Għalhekk jenħtieġ li d-Direttivi 2014/59/UE u 2014/24/UE jiġu emendati kif xieraq,

(1)

l-Artikolu 2(1) huwa emendat kif ġej:

(2)

fl-Artikolu 5, il-paragrafi 2, 3 u 4 huma sostitwiti b’dan li ġej:

(3)

fl-Artikolu 6(5), l-ewwel subparagrafu huwa sostitwit b’dan li ġej:

“Fejn l-awtorità kompetenti tivvaluta li hemm defiċjenzi materjali fil-pjan ta’ rkupru, jew impedimenti materjali għall-implimentazzjoni tiegħu, hija għandha tinnotifika lill-istituzzjoni jew lill-intrapriża prinċipali tal-grupp bil-valutazzjoni tagħha u titlob li l-istituzzjoni tippreżenta, fi żmien tliet xhur, li jista’ jiġi estiż b’xahar bl-approvazzjoni tal-awtorità, pjan rivedut li juri kif dawk id-defiċjenzi jew l-impedimenti ser jiġu indirizzati.”

(4)

fl-Artikolu 8(2), it-tielet subparagrafu huwa sostitwit b’dan li ġej:

“L-EBA tista’, fuq it-talba ta’ awtorità kompetenti, tgħin lill-awtoritajiet kompetenti jaslu għal deċiżjoni konġunta f’konformità mal-Artikolu 31(2), il-punt (c) tar-Regolament (UE) Nru 1093/2010.”

(5)

l-Artikolu 10 huwa emendat kif ġej:

(6)

fl-Artikolu 11, il-paragrafu 3 huwa sostitwit b’dan li ġej:

(7)

l-Artikolu 12 huwa emendat kif ġej:

(8)

l-Artikolu 13 huwa emendat kif ġej:

(9)

fl-Artikolu 15, jiżdied il-paragrafu li ġej:

(10)

fl-Artikolu 16a, jiżdied il-paragrafu li ġej:

(11)

l-Artikolu 17 huwa emendat kif ġej:

(12)

l-Artikolu 18 huwa emendat kif ġej:

(13)

l-Artikoli 27 u 28 huma sostitwiti b’dan li ġej:

(*1)  Ir-Regolament (UE) Nru 600/2014 tal-Parlament Ewropew u tal-Kunsill tal-15 ta’ Mejju 2014 dwar is-swieq tal-istrumenti finanzjarji u li jemenda r-Regolament (UE) Nru 648/2012 (ĠU L 173, 12.6.2014, p. 84, ELI: http://data.europa.eu/eli/reg/2014/600/oj).”;"

(14)

l-Artikolu 29 huwa emendat kif ġej:

(15)

l-Artikolu 30 huwa emendat kif ġej:

(16)

jiddaħħal l-Artikolu li ġej fit-Titolu III:

(17)

fl-Artikolu 31(2), il-punt (c) huwa sostitwit b’dan li ġej:

;

(18)

l-Artikolu 32 huwa emendat kif ġej:

(19)

l-Artikoli 32a u 32b huma sostitwiti b’dawn li ġejjin:

(20)

jiddaħħal l-artikolu li ġej:

(21)

fl-Artikolu 33 il-paragrafu 2 huwa sostitwit b’dan li ġej:

(22)

l-Artikolu 33a huwa emendat kif ġej:

(23)

l-Artikolu 35 huwa emendat kif ġej:

(24)

fl-Artikolu 36, jiddaħħal il-paragrafu li ġej:

(25)

l-Artikolu 37 huwa emendat kif ġej:

(26)

l-Artikolu 40 huwa emendat kif ġej:

(27)

fl-Artikolu 42(5), il-punt (b) huwa sostitwit b’dan li ġej:

;

(28)

l-Artikolu 44 huwa emendat kif ġej:

(29)

fl-Artikolu 44a, jiżdied il-paragrafu li ġej:

(30)

fl-Artikolu 45, il-paragrafu 1 huwa sostitwit b’dan li ġej:

(31)

l-Artikolu 45b huwa emendat kif ġej:

(32)

l-Artikolu 45c huwa emendat kif ġej:

(33)

fl-Artikolu 45d(1), il-formulazzjoni introduttorja hijaa sostitwita b’dan li ġej:

“Ir-rekwiżit imsemmi fl-Artikolu 45(1) għal entità ta’ riżoluzzjoni li hija entità G-SII għandu jikkonsisti f’dan li ġej:”

(34)

l-Artikolu 45f huwa emendat kif ġej:

(35)

l-Artikolu 45 g huwa sostitwit b’dan li ġej:

(36)

l-Artikolu 45i huwa emendat kif ġej:

(37)

fl-Artikolu 45j, il-paragrafu 2 huwa sostitwit b’dan li ġej:

(38)

fl-Artikolu 45 l(3), it-tieni subparagrafu huwa sostitwit b’dan li ġej:

“Ir-rapport imsemmi fil-paragrafu 2 għandu jkopri tliet snin kalendarji u għandu jiġi ppreżentat lill-Kummissjoni sal-31 ta’ Diċembru tas-sena kalendarja ta’ wara l-aħħar sena koperta mir-rapport. L-obbligu msemmi fil-paragrafu 2 ma għandux jibqa’ japplika wara li jiġi ppreżentat it-tieni rapport.”

(39)

l-Artikolu 45 m huwa emendat kif ġej:

(40)

fl-Artikolu 46(2), l-ewwel subparagrafu huwa sostitwit b’dan li ġej:

“Il-valutazzjoni msemmija fil-paragrafu 1 ta’ dan l-Artikolu għandha tistabbilixxi l-ammont li bih l-obbligazzjonijiet ta’ rikapitalizzazzjoni interna jeħtieġ li jiġu valwati negattivament jew ikkonvertiti għall-finijiet li ġejjin:

(41)

l-Artikolu 47(1) huwa emendat kif ġej:

(42)

l-Artikolu 52 huwa emendat kif ġej:

(43)

l-Artikolu 53 huwa emendat kif ġej:

(44)

l-Artikolu 55 huwa emendat kif ġej:

(45)

l-Artikolu 59 huwa emendat kif ġej:

(46)

l-Artikolu 63 huwa emendat kif ġej:

(47)

fl-Artikolu 71a, il-paragrafu 3 huwa sostitwit b’dan li ġej:

(48)

fl-Artikolu 74(2), il-punt (a) huwa sostitwit b’dan li ġej:

;

(49)

L-Artikolu 75 huwa sostitwit b’dan li ġej:

(50)

fl-Artikolu 84, jiddaħħal il-paragrafu li ġej:

(51)

jiżdiedu l-Artikoli li ġejjin fil-Kapitolu VIII:

(*4)  Id-Direttiva (UE) 2015/849 tal-Parlament Ewropew u tal-Kunsill tal-20 ta’ Mejju 2015 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, li temenda r-Regolament (UE) Nru 648/2012 tal-Parlament Ewropew u tal-Kunsill, u li tħassar id-Direttiva 2005/60/KE tal-Parlament Ewropew u tal-Kunsill u d-Direttiva tal-Kummissjoni 2006/70/KE (ĠU L 141, 5.6.2015, p. 73, ELI: http://data.europa.eu/eli/dir/2015/849/oj).”;"

(52)

l-Artikolu 88 huwa emendat kif ġej:

(53)

l-Artikolu 91 huwa emendat kif ġej:

(54)

fl-Artikolu 92(3), it-tieni subparagrafu huwa sostitwit b’dan li ġej:

“L-EBA tista’, fuq it-talba tal-awtorità ta’ riżoluzzjoni, tgħin lill-awtoritajiet ta’ riżoluzzjoni jilħqu deċiżjoni konġunta f’konformità mal-Artikolu 31(2), il-punt (c), tar-Regolament (UE) Nru 1093/2010.”

(55)

fl-Artikolu 96(3), il-punt (b) huwa sostitwit b’dan li ġej:

;

(56)

fl-Artikolu 98, il-paragrafu 1 huwa emendat kif ġej:

(57)

fl-Artikolu 101, jiżdied il-paragrafu li ġej:

(58)

fl-Artikolu 102(3), l-ewwel subparagrafu huwa sostitwit b’dan li ġej:

“Jekk il-mezzi finanzjarji disponibbli ma jkunux biżżejjed biex jintlaħaq il-livell fil-mira speċifikat fil-paragrafu 1 ta’ dan l-Artikolu, il-kontribuzzjonijiet ex ante miġbura f’konformità mal-Artikolu 103 għandhom jerġgħu jibdew sakemm jintlaħaq il-livell fil-mira. L-awtoritajiet ta’ riżoluzzjoni jistgħu jiddifferixxu l-ġbir tal-kontribuzzjonijiet ex ante miġbura f’konformità mal-Artikolu 103 għal massimu ta’ tliet snin biex jiżguraw li l-ammont li għandu jinġabar jilħaq ammont li jkun proporzjonat għall-kostijiet tal-proċess tal-ġbir, dment li tali differiment ma jaffettwax materjalment il-kapaċità tal-awtorità ta’ riżoluzzjoni li tuża l-arranġamenti ta’ finanzjament ta’ riżoluzzjoni skont l-Artikolu 101. Meta l-mezzi finanzjarji disponibbli jammontaw għal inqas minn żewġ terzi tal-livell fil-mira, il-kontribuzzjonijiet għandhom jiġu stabbiliti f’livell li jippermetti li jintlaħaq il-livell fil-mira f’perjodu ta’ żmien raġonevoli li ma għandux jaqbeż is-sitt snin.”

(59)

l-Artikolu 103 huwa emendat kif ġej:

(60)

fl-Artikolu 104(1), it-tieni subparagrafu huwa sostitwit b’dan li ġej:

“L-ammont totali ta’ kontribuzzjonijiet ex post straordinarji ma għandux jaqbeż tliet darbiet 12,5 % tal-livell fil-mira speċifikat fl-Artikolu 102.”

(61)

fl-Artikolu 107(3), il-punt (d) huwa sostitwit b’dan li ġej:

;

(62)

l-Artikolu 108 huwa emendat kif ġej:

(63)

l-Artikolu 109 huwa sostitwit b’dan li ġej:

(64)

fl-Artikolu 111(1), jiżdiedu l-punti li ġejjin:

;

(65)

l-Artikolu 128 huwa sostitwit b’dan li ġej:

(66)

jiddaħħlu l-Artikoli li ġejjin:

(*5)  Ir-Regolament (UE) Nru 806/2014 tal-Parlament Ewropew u tal-Kunsill tal- 15 ta’ Lulju 2014 li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta’ kreditu u ċerti ditti tal-investiment fil-qafas ta’ Mekkaniżmu Uniku ta’ Riżoluzzjoni u Fond Uniku għar-Riżoluzzjoni u li jemenda r-Regolament (UE) Nru 1093/2010 (ĠU L 225, 30.7.2014, p. 1, ELI: http://data.europa.eu/eli/reg/2014/806/oj)."

(*6)  Id-Direttiva (UE) 2026/806 tal-Parlament Ewropew u tal-Kunsill tat-30 ta’ Marzu 2026 li temenda d-Direttiva 2014/59/UE fir-rigward ta’ miżuri ta’ intervent bikri, kundizzjonijiet għar-riżoluzzjoni u l-finanzjament ta’ azzjoni ta’ riżoluzzjoni u d-Direttiva 2014/24/UE fir-rigward tas-servizzi ta’ valwazzjoni f’riżoluzzjoni (ĠU L L, 2026/806, 20.4.2026, ELI: http://data.europa.eu/eli/dir/2026/806/oj).”;"

(67)

fl-Anness, it-Taqsima B, jiddaħħal dan il-punt li ġej:

“(k)

servizzi ta’ valwazzjoni msemmija fl-Artikoli 36 u 74 tad-Direttiva 2014/59/UE tal-Parlament Ewropew u tal-Kunsill (*7).