IL-KUNSILL TAL-UNJONI EWROPEA,

WARA LI KKUNSIDRA:

L-Artikolu 13 tal-Konvenzjoni dwar l-Assistenza Reċiproka f'Materji Kriminali bejn l-Istati Membri tal-Unjoni Ewropea tad-29 ta' Mejju 2000 u d-Deċiżjoni Kwadru tal-Kunsill 2002/465/JHA tat-13 ta' Ġunju 2002 dwar l-iskwadri ta' investigazzjoni konġunti.

Ir-Riżoluzzjoni tal-Kunsill 2022/C 44/01 dwar il-Mudell ta' Ftehim rivedut għall-istabbiliment ta' Skwadra ta' Investigazzjoni Konġunta.

FILWAQT LI JFAKKAR LI:

L-Artikolu 13 tal-Konvenzjoni tad-29 ta' Mejju 2000 dwar l-assistenza reċiproka f'materji kriminali bejn l-Istati Membri tal-Unjoni Ewropea (1)(“il-Konvenzjoni”) fih dispożizzjonijiet dwar l-iskwadri ta' investigazzjoni konġunti.

Fit-13 ta' Ġunju 2002, il-Kunsill adotta d-Deċiżjoni Kwadru 2002/465/JHA dwar l-iskwadri ta' investigazzjoni konġunti (2) (“id-Deċiżjoni Kwadru”).

FILWAQT LI JIEĦU NOTA LI:

L-Iskwadri ta' Investigazzjoni Konġunti (“SIK”) urew li huma waħda mill-aktar għodod ta' suċċess għall-kooperazzjoni transfruntiera f'materji kriminali fl-Unjoni Ewropea, li jippermettu lill-awtoritajiet kompetenti ta' żewġ Stati Membri jew aktar, u fejn xieraq pajjiżi terzi u/jew awtoritajiet ġudizzjarji internazzjonali, iwettqu investigazzjonijiet kriminali b'mod konġunt għal skop speċifiku u perjodu limitat.

L-għadd u l-kumplessità dejjem akbar ta' investigazzjonijiet kriminali transfruntieri, inkluż dawk relatati mal-kriminalità organizzata, it-terroriżmu u ċ-ċiberkriminalità, enfasizzaw il-ħtieġa dejjem akbar għal għodod siguri u effiċjenti li jippermettu l-iskambju rapidu ta' informazzjoni u evidenza bejn il-membri u l-parteċipanti tal-Iskwadri ta' Investigazzjoni Konġunti.

Ir-Regolament (UE) 2023/969 tal-Parlament Ewropew u tal-Kunsill, li daħal fis-seħħ fis-6 ta' Ġunju 2023, stabbilixxa l-Pjattaforma ta' Kollaborazzjoni tas-SIK sabiex tappoġġa, issaħħaħ u timmodernizza l-funzjonament tas-SIK. L-istabbiliment ta' dan l-ambjent diġitali sigur għandu l-għan li jiffaċilita l-kooperazzjoni u l-koordinazzjoni bejn l-awtoritajiet kompetenti li jipparteċipaw f'SIK billi jippermetti skambju sigur ta' informazzjoni u evidenza, komunikazzjoni sigura, traċċabbiltà tal-evidenza u appoġġ għall-proċess tal-evalwazzjoni ta' SIK.

Il-premessa 14 tar-Regolament (UE) 2023/969 tirrikonoxxi li ftehim dwar SIK għandu jkun prerekwiżit għall-użu tal-Pjattaforma ta' Kollaborazzjoni tas-SIK u li, sabiex jiġi żgurat l-użu effettiv tal-pjattaforma, il-kontenut tal-ftehimiet futuri kollha dwar SIK irid jiġi adattat biex iqis id-dispożizzjonijiet rilevanti tar-Regolament.

Barra minn hekk, il-Premessa 15 tal-istess Regolament tirrikonoxxi li n-Netwerk tas-SIK żviluppa mudell ta' ftehim biex jiffaċilita l-istabbiliment ta' SIK, u tipprevedi li l-kontenut ta' dak il-mudell ta' ftehim (u l-appendiċijiet tiegħu) għandu jiġi adattat biex iqis l-użu tal-Pjattaforma ta' Kollaborazzjoni tas-SIK u r-regoli li jirregolaw l-aċċess għaliha.

KONVINTI LI:

Diversi dispożizzjonijiet tar-Regolament (UE) 2023/969 jirrikjedu li elementi speċifiċi relatati mal-użu tal-Pjattaforma ta' Kollaborazzjoni tas-SIK ikunu riflessi fil-ftehim rilevanti dwar SIK. Dawn id-dispożizzjonijiet jindirizzaw, fost l-oħrajn, il-ħolqien ta' spazji ta' kollaborazzjoni fi ħdan il-pjattaforma, l-għoti ta' aċċess lill-utenti u r-regoli għal tali aċċess, il-ħatra ta' amministraturi tal-ispazju tas-SIK u kontrollur tad-data fir-rigward tad-data personali skambjata permezz tal-Pjattaforma ta' Kollaborazzjoni tas-SIK minn pajjiżi terzi jew awtoritajiet ġudizzjarji internazzjonali, u maħżuna fiha.

Għalhekk huwa xieraq li l-mudell ta' ftehim jiġi adattat f'konformità mar-Regolament billi jiġi introdott Artikolu 12 ġdid biex jassisti lill-partijiet tas-SIK jaqblu dwar dispożizzjonijiet li jirregolaw l-użu tal-Pjattaforma ta' Kollaborazzjoni tas-SIK. Dan l-Artikolu 12 il-ġdid huwa stabbilit fl-Anness. L-artikoli fil-mudell ta' ftehim dwar SIK li jiġu wara l-Artikolu 12 il-ġdid ser jiġu nnumerati mill-ġdid kif xieraq.

JINKORAĠĠIXXI

Lill-awtoritajiet kompetenti tal-Istati Membri li jixtiequ jistabbilixxu Skwadra ta' Investigazzjoni Konġunta mal-awtoritajiet kompetenti minn Stati Membri oħra, f'konformità mat-termini tad-Deċiżjoni Kwadru u l-Konvenzjoni, jew minn Stati mhux tal-UE, abbażi tal-istrumenti internazzjonali rilevanti, jużaw, fejn adatt, il-Mudell ta' Ftehim kif emendat b'din ir-Riżoluzzjoni sabiex jaqblu dwar il-modalitajiet għall-Iskwadra ta' Investigazzjoni Konġunta.