(1)

Ir-riżoluzzjonijiet tal-Assemblea Ġenerali tan-Nazzjonijiet Uniti dwar id-dekolonizzazzjoni tat-territorju ta' Ġibiltà (“Ġibiltà”) jelenkaw lil Ġibiltà bħala “Territorju Mhux Awtonomu Amministrat mir-Renju Unit tal-Gran Brittanja u l-Irlanda ta' Fuq” bl-applikazzjoni tal-Kapitolu XI tal-Karta tan-Nazzjonijiet Uniti.

(2)

F'konformità mal-Artikolu 774(3) tal-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta' Fuq, min-naħa l-oħra (1), (il-“Ftehim dwar il-Kummerċ u l-Kooperazzjoni”) u f'konformità mad-Dikjarazzjoni tal-Kunsill Ewropew u tal-Kummissjoni dwar il-kamp ta' applikazzjoni territorjali tal-ftehimiet futuri inkluża fil-minuti tal-laqgħa tal-Kunsill Ewropew tal-25 ta' Novembru 2018, il-Ftehim dwar il-Kummerċ u l-Kooperazzjoni la japplika għal Ġibiltà u lanqas ma għandu effetti f'dak it-territorju. Kif previst f'dik id-Dikjarazzjoni, “dan ma jipprekludix il-possibbiltà li jkun hemm ftehimiet separati bejn l-Unjoni u r-Renju Unit fir-rigward ta' Ġibiltà” u, “mingħajr preġudizzju għall-kompetenzi tal-Unjoni u b'rispett sħiħ għall-integrità territorjali tal-Istati Membri tagħha kif garantita mill-Artikolu 4(2) tat-Trattat dwar l-Unjoni Ewropea, dawk il-ftehimiet separati ser jirrikjedu qbil minn qabel mir-Renju ta' Spanja”.

(3)

Fil-31 ta' Diċembru 2020, ir-Renju ta' Spanja (“Spanja”) esprima x-xewqa tiegħu li l-Unjoni tistabbilixxi arranġament wiesa' u bbilanċjat fir-rigward ta' Ġibiltà bbażat fuq il-qafas politiku maqbul bejn Spanja u r-Renju Unit tal-Gran Brittanja u l-Irlanda ta' Fuq (ir-“Renju Unit”) għal ftehim dwar Ġibiltà.

(4)

Fil-5 ta' Ottubru 2021, il-Kunsill awtorizza lill-Kummissjoni biex tiftaħ negozjati mar-Renju Unit għal ftehim fir-rigward ta' Ġibiltà.

(5)

In-negozjati tlestew fit-12 ta' Diċembru 2025. Dawn irriżultaw fil-Ftehim fir-rigward ta' Ġibiltà bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta' Fuq, min-naħa l-oħra (“il-Ftehim”).

(6)

Il-Ftehim, jew kwalunkwe attività jew miżura meħuda fl-applikazzjoni jew bħala riżultat tiegħu, ma jimplika l-ebda modifika tal-pożizzjoni legali ta’ Spanja fir-rigward tas-sovranità u l-ġurisdizzjoni fir-rigward ta' Ġibiltà.

(7)

Peress li l-awtoritajiet ta' Ġibiltà għandhom karattru lokali u jeżerċitaw esklussivament kompetenzi interni, jenħtieġ li kwalunkwe parteċipazzjoni ta' dawk l-awtoritajiet fl-applikazzjoni ta-Ftehim titqies li twettqet esklużivament fil-kompetenzi interni ta' Ġibiltà, sakemm ma jkunx previst speċifikament mod ieħor.

(8)

Il-Ftehim jistabbilixxi l-bażi għat-tneħħija tal-ostakli fiżiċi kollha bejn l-Unjoni u Ġibiltà u jippromwovi prosperità kondiviża u relazzjonijiet mill-qrib u kostruttivi fir-rigward ta' Ġibiltà u ż-żona kontigwa fi Spanja, li jinvolvu drittijiet u obbligi reċiproċi, azzjonijiet komuni u proċeduri speċjali.

(9)

It-tneħħija tal-ostakli fiżiċi bejn l-Unjoni u Ġibiltà hija mingħajr preġudizzju għar-responsabbiltajiet ta’ Spanja fuq il-fruntieri esterni tagħha skont id-dritt tal-Unjoni.

(10)

Il-Kummissjoni, f'konformità mal-Artikolu 17(1) tat-Trattat dwar l-Unjoni Ewropea (“TUE”), għandha tirrappreżenta lill-Unjoni u tesprimi l-pożizzjonijiet tal-Unjoni kif stabbiliti mill-Kunsill f'konformità mat-Trattati. Il-Kunsill għandu jeżerċita l-funzjonijiet tiegħu ta' tfassil ta' politiki u ta' koordinazzjoni kif previst fl-Artikolu 16(1) TUE billi jistabbilixxi l-pożizzjonijiet li jridu jittieħdu f'isem l-Unjoni fil-Kunsill ta' Kooperazzjoni u fil-Kumitati Speċjalizzati stabbiliti mill-Ftehim. Barra minn hekk, fejn il-Kunsill ta' Kooperazzjoni jew il-Kumitati Speċjalizzati stabbiliti bil-Ftehim jintalbu jadottaw atti b'effetti legali, il-pożizzjonijiet li għandhom jittieħdu f'isem l-Unjoni f'dawk il-korpi konġunti għandhom ikunu stabbiliti f'konformità mal-proċedura stipulata fl-Artikolu 218(9) tat-Trattat dwar il-Funzjonament tal-Unjoni Ewropea (“TFUE”).

(11)

Jenħtieġ li kull Stat Membru jkun jista' jibgħat rappreżentant wieħed biex jakkumpanja lir-rappreżentant tal-Kummissjoni, bħala parti mid-delegazzjoni tal-Unjoni, fil-laqgħat tal-Kunsill ta' Kooperazzjoni u ta' Kumitati Speċjalizzati stabbiliti skont il-Ftehim.

(12)

Il-Parlament Ewropew irid jiġi infurmat immedjatament u bis-sħiħ, kif previst fl-Artikolu 218(10) TFUE sabiex ikun jista' jeżerċita bis-sħiħ il-prerogattivi tiegħu skont it-Trattati.

(13)

Spanja, bħala l-Istat ġar fiż-żona Schengen inkarigat mit-twettiq ta' kontroll tal-fruntieri esterni fil-port u l-ajruport ta' Ġibiltà, tista', wara evalwazzjoni tal-implimentazzjoni tat-Tieni Parti tal-Ftehim, dwar iċ-ċirkolazzjoni tal-persuni, titlob lill-Unjoni biex ittemm il-Ftehim.

(14)

Jenħtieġ li l-awtoritajiet ta' Spanja jkunu l-awtoritajiet kompetenti fl-Unjoni għall-finijiet tal-applikazzjoni tad-dispożizzjonijiet tal-Ftehim relatati mad-dwana. Fil-każ eċċezzjonali msemmi fil-punt 2 tal-Appendiċi 1 tal-Anness 21 tal-Ftehim, jenħtieġ li l-awtoritajiet tar-Repubblika Portugiża jkunu l-awtoritajiet kompetenti fl-Unjoni għall-finijiet tal-applikazzjoni tad-dispożizzjonijiet tal-Ftehim relatati mad-dwana.

(15)

Jenħtieġ li l-awtoritajiet ta' Spanja jipprovdu l-valutazzjoni tal-funzjonament tal-arranġamenti amministrattivi bilaterali rilevanti, li ser ikunu parti mill-evalwazzjoni mill-Kunsill ta' Kooperazzjoni stabbilit mill-Ftehim tal-implimentazzjoni tat-Tieni Parti tal-Ftehim wara perijodu ta' 4 snin.

(16)

Il-funzjonament xieraq tal-Ftehim jirrikjedi li Spanja u r-Renju Unit jikkonkludu pjan ta' implimentazzjoni u ċerti arranġamenti amministrattivi. Fin-nuqqas ta' dak il-pjan u dawk l-arranġamenti, il-partijiet rispettivi tal-Ftehim ma jistgħux jiġu applikati. Għalhekk ikun meħtieġ li tiġi prevista s-sospensjoni tal-partijiet rispettivi tal-Ftehim għall-perijodu ta' żmien li matulu l-pjan ta' implimentazzjoni jew l-arranġamenti amministrattivi jiġu sospiżi jew itterminati minn Spanja. Sabiex jiġu rispettati l-prerogattivi tal-Kunsill skont it-Trattati, jenħtieġ li Spanja tinforma lill-Kummissjoni u lill-Kunsill minn qabel u jenħtieġ li tqis il-fehmiet espressi qabel tipproċedi b’tali sospensjoni jew terminazzjoni tal-pjan ta' implimentazzjoni jew ta' kwalunkwe arranġament amministrattiv.

(17)

Skont l-Artikolu 218(7) TFUE, huwa xieraq li l-Kummissjoni tiġi awtorizzata tiddeċiedi dwar il-pożizzjonijiet li għandhom jittieħdu, f'isem l-Unjoni, fil-Kumitati Speċjalizzati stabbiliti skont il-Ftehim fir-rigward tal-estensjoni tal-applikazzjoni tal-atti ġuridiċi tal-Unjoni għar-Renju Unit, fir-rigward ta' Ġibiltà, bil-ħsieb li tiġi żgurata, sa fejn ikun possibbli, l-applikazzjoni simultanja ta' dawk l-atti ġuridiċi fl-Unjoni u fir-Renju Unit, fir-rigward ta' Ġibiltà.

(18)

Huwa xieraq ukoll li l-Kummissjoni tiġi awtorizzata, skont l-Artikolu 218(7) TFUE, tapprova, f'isem l-Unjoni, ċerti modifiki tekniċi għall-Ftehim. Għal deċiżjonijiet oħra adottati mill-Kumitati Speċjalizzati, jenħtieġ li l-pożizzjonijiet li għandhom jittieħdu f'isem l-Unjoni jiġu stabbiliti f'konformità mal-proċedura stabbilita fl-Artikolu 218(9) TFUE.

(19)

Bil-ħsieb li l-Unjoni tkun tista' tieħu azzjoni rapida u effettiva biex tipproteġi l-interessi tagħha f'konformità mal-Ftehim, u f'konformità mal-kundizzjonijiet stipulati fid-dispożizzjonijiet korrispondenti tal-Ftehim, jenħtieġ li l-Kummissjoni tingħata s-setgħa li tieħu miżuri ta' riekwilibriju u ta' rimedju u li tiddeċiedi dwar is-sospensjoni mmirata ta' obbligi speċifiċi skont il-Ftehim jew kwalunkwe ftehim supplimentari, f'każijiet ta' ksur ta' ċerti dispożizzjonijiet tal-Ftehim jew ta' nuqqas ta' ssodisfar ta' ċerti kundizzjonijiet, b'mod partikolari fl-oqsma taċ-ċirkolazzjoni ta' persuni, tal-ġlieda kontra l-ħasil tal-flus u l-finanzjament tat-terroriżmu, tal-għajnuna mill-Istat, tat-tassazzjoni indiretta u tal-kummerċ tal-merkanzija, u tat-trasport bit-triq. Jenħtieġ li s-sospensjoni tal-Ftehim kollu jew ta' parti minnu jew ta' kwalunkwe ftehim supplimentari, lil hinn mis-sospensjoni mmirata ta' obbligi speċifiċi, tiġi deċiża f'konformità mal-Artikolu 218(9) TFUE.

(20)

Meta titqies is-sitwazzjoni speċifika ħafna ta' Spanja, li hija l-Istat Membru ġar u li għandha rwol sinifikanti fl-implimentazzjoni tal-Ftehim, huwa xieraq li jiġi previst li l-Kummissjoni tikkonsulta lil Spanja qabel ma tadotta d-deċiżjonijiet imsemmija f'din id-Deċiżjoni u qabel ma tagħmel il-proposti xierqa lill-Kunsill.

(21)

Kull meta l-Unjoni tkun meħtieġa taġixxi sabiex tikkonformamal-Ftehim, tali azzjoni għandha tittieħed f'konformità mat-Trattati, filwaqt li jiġu rrispettati l-limiti tas-setgħat mogħtija lil kull istituzzjoni tal-Unjoni. Hija għalhekk il-Kummissjoni li trid tipprovdi lir-Renju Unit bl-informazzjoni jew in-notifiki meħtieġa mill-Ftehim, ħlief fejn il-Ftehim jirreferi għal istituzzjonijiet, korpi, uffiċċji u aġenziji speċifiċi oħra tal-Unjoni, u li trid tikkonsulta mar-Renju Unit dwar kwistjonijiet speċifiċi. Hija wkoll il-Kummissjoni li trid tirrappreżenta lill-Unjoni quddiem it-tribunal tal-arbitraġġ meta jkun ġie ppreżentat xi tilwim għall-arbitraġġ f'konformità mal-Ftehim.

(22)

Fid-dawl tal-karattru eċċezzjonali u uniku tal-Ftehim, li – bħal fil-każtal-Ftehim dwar il-Kummerċ u l-Kooperazzjoni – huwa konsegwenza tal-ħruġ tar-Renju Unit mill-Unjoni, il-Kunsill b'dan qed jiddeċiedi li jagħmel użu, b'mod eċċezzjonali, mill-possibbiltà li l-Unjoni teżerċita l-kompetenza esterna tagħha fir-rigward tar-Renju Unit, fir-rigward ta' Ġibiltà. L-eżerċizzju tal-kompetenza tal-Unjoni permezz tal-Ftehim huwa mingħajr preġudizzju għall-kompetenzi rispettivi tal-Unjoni u tal-Istati Membri b'rabta ma' kwalunkwe negozjar li għaddej jew futur dwar ftehimiet internazzjonali, jew dwar l-iffirmar jew il-konklużjoni tagħhom ma' kwalunkwe pajjiż terz ieħor, jew b'rabta ma' kwalunkwe negozjar futur dwar kwalunkwe ftehim supplimentari, jew dwar l-iffirmar jew il-konklużjoni tiegħu, imsemmi fl-Artikolu 4 tal-Ftehim.

(23)

Għalhekk, jenħtieġ li l-Ftehim jiġi ffirmat f'isem l-Unjoni, li jsiru d-Dikjarazzjoni Konġunta dwar l-interpretazzjoni tal-kategorija ta’ persuni li jivvjaġġaw bl-iskop li jwettqu attività bi ħlas kif previst fl-Artikolu 41(2) tal-Ftehim, id-Dikjarazzjoni Politika Konġunta dwar il-ġlieda kontra r-reġimi tat-taxxa dannużi u d-Dikjarazzjoni Konġunta tal-Unjoni Ewropea u tar-Renju Unit relatata mal-Artikolu 152(1) tal-Ftehim u li jenħtieġ li jiġi approvat it-test propost mill-Kummissjoni għal dikjarazzjoni dwar is-supplimentazzjoni tal-konnettività tat-trasport bit-triq ta’ Ġibiltà.

(24)

Billi jneħħi l-ostakli fiżiċi kollha għaċ-ċirkolazzjoni ta' persuni u l-moviment tal-oġġetti bejn l-Unjoni u Ġibiltà, il-Ftehim ser jillimita t-tfixkil għall-individwi, in-negozji u partijiet ikkonċernati oħra li joperaw fiż-żona kkawżat mill-użu sħiħ tas-Sistema ta' Dħul/Ħruġ. Għalhekk jenħtieġ li jiġi applikat fuq bażi provviżorja, sa meta jidħol fis-seħħ..

(25)

L-iffirmar tal-Ftehim fir-rigward ta' kwistjonijiet li jaqgħu taħt it-Trattat li jistabbilixxi l-Komunità Ewropea tal-Enerġija Atomika huwa soġġett għal proċedura separata,