(1)

F’konformità mad-Deċiżjoni tal-Kunsill (UE) 2025/2307 (2), il-Konvenzjoni tan-Nazzjonijiet Uniti kontra l-Kriminalità Ċibernetika; It-Tisħiħ tal-Kooperazzjoni Internazzjonali għall-Ġlieda Kontra Ċerti Reati Mwettqa Permezz ta’ Sistemi tat-Teknoloġija tal-Informazzjoni u l-Komunikazzjoni u għall-Kondiviżjoni tal-Evidenza f’Forma Elettronika ta’ Reati Serji (il-“Konvenzjoni”) ġiet iffirmata f’isem l-Unjoni, f’Hanoi, Vjetnam fil-25 ta’ Ottubru 2025, soġġetta għall-konklużjoni ta’ dik il-Konvenzjoni.

(2)

Il-Konvenzjoni hija konformi mal-objettivi ta’ sigurtà tal-Unjoni kif imsemmija fl-Artikolu 67(3) tat-Trattat dwar il-Funzjonament tal-Unjoni Ewropea (TFUE), jiġifieri l-iżgurar ta’ livell għoli ta’ sigurtà permezz ta’ miżuri għall-prevenzjoni u l-ġlieda kontra l-kriminalità u permezz ta’ miżuri għall-koordinazzjoni u l-kooperazzjoni bejn il-pulizija u l-awtoritajiet ġudizzjarji u awtoritajiet kompetenti oħrajn, kif ukoll permezz tal-approssimazzjoni tal-liġijiet kriminali.

(3)

Il-Konvenzjoni tapplika għal investigazzjonijiet jew proċedimenti kriminali speċifiċi li jikkonċernaw reati kriminali stabbiliti f’konformità mal-Konvenzjoni kif ukoll għall-iskambju ta’ evidenza f’forma elettronika relatata ma’ reati serji (reati punibbli b’ċaħda massima tal-libertà ta’ mill-inqas erba’ snin jew piena aktar serja) u tippermetti biss l-iskambju ta’ informazzjoni għal tali finijiet.

(4)

Il-Konvenzjoni tarmonizza sett limitat ta’ reati definiti b’mod ċar, filwaqt li tippermetti l-flessibbiltà meħtieġa għall-Istati Partijiet biex jevitaw il-kriminalizzazzjoni ta’ mġiba leġittima.

(5)

Il-Konvenzjoni tistabbilixxi biss regoli minimi dwar ir-responsabbiltà ta’ persuni ġuridiċi għall-parteċipazzjoni fir-reati stabbiliti f’konformità mal-Konvenzjoni. Ma tirrikjedix li l- Stati Partijiet jadottaw tali miżuri li jkunu neċessarji biex tiġi stabbilita responsabbiltà ta’ persuni ġuridiċi b’mod li jkun inkonsistenti mal-prinċipji legali tagħhom.

(6)

Il-Konvenzjoni hija wkoll f’konformità mal-objettivi tal-Unjoni dwar il-protezzjoni tad-data personali, tal-privatezza u tad-drittijiet fundamentali f’konformità mal-Artikolu 16 tat-TFUE u l-Karta tad-Drittijiet Fundamentali tal-Unjoni Ewropea (il-“Karta”).

(7)

Il-Konvenzjoni tipprevedi kundizzjonijiet u salvagwardji robusti tad-drittijiet tal-bniedem, li huma parti mill-għan u l-iskop tal-Konvenzjoni u huma marbuta b’mod inseparabbli mas-setgħat u l-proċeduri previsti mill-Konvenzjoni. Bħala tali, dawk il-kundizzjonijiet u s-salvagwardji ma jistgħux ikunu soġġetti għal riżervi. Il-Konvenzjoni teskludi kwalunkwe interpretazzjoni li twassal għat-trażżin tad-drittijiet tal-bniedem jew tal-libertajiet fundamentali, b’mod partikolari l-libertajiet tal-espressjoni, tal-kuxjenza, tal-opinjoni, tar-reliġjon jew tat-twemmin, tal-għaqda paċifika u tal-assoċjazzjoni. Dawn is-salvagwardji jiżguraw ukoll li l-kooperazzjoni internazzjonali tista’ tiġi rrifjutata jekk tali kooperazzjoni internazzjonali tmur kontra l-liġijiet domestiċi tal-Istati Partijiet jew jekk tali ċaħda tkun neċessarja biex tiġi evitata xi forma ta’ diskriminazzjoni.

(8)

Fir-rigward tas-setgħat u l-proċeduri kemm fil-livell domestiku kif ukoll f’dak internazzjonali, il-Konvenzjoni tipprevedi kundizzjonijiet u salvagwardji orizzontali li jiżguraw il-protezzjoni tad-drittijiet tal-bniedem, f’konformità mal-obbligi tal-Istati Partijiet skont id-dritt internazzjonali dwar id-drittijiet tal-bniedem. L-Istati Partijiet għandhom ukoll jinkorporaw il-prinċipju tal-proporzjonalità fid-dritt domestiku tagħhom. Tali kundizzjonijiet u salvagwardji għandhom jinkludu, fost l-oħrajn, stħarriġ ġudizzjarju jew rieżami indipendenti ieħor, id-dritt għal rimedju effettiv, raġunijiet li jiġġustifikaw l-applikazzjoni u l-limitazzjoni tal-kamp ta’ applikazzjoni u d-durata ta’ tali setgħat u proċeduri.

(9)

Il-Konvenzjoni tinkludi dispożizzjoni ddedikata dwar il-protezzjoni tad-data personali, li tiżgura li jridu jiġu applikati prinċipji importanti tal-protezzjoni tad-data, inkluż il-limitazzjoni tal-iskop, il-minimizzazzjoni tad-data, il-proporzjonalità u n-neċessità, f’konformità mal-Karta, qabel ma tkun tista’ tiġi pprovduta kwalunkwe data personali lil Stat Parti ieħor.

(10)

Bil-parteċipazzjoni tagħha fin-negozjati, f’isem l-Unjoni, il-Kummissjoni żgurat il-kompatibbiltà tal-Konvenzjoni mar-regoli rilevanti tal-Unjoni.

(11)

Għadd ta’ riżervi huma rilevanti biex tiġi żgurata l-kompatibbiltà tal-Konvenzjoni mad-dritt u l-politiki tal-Unjoni, kif ukoll l-applikazzjoni uniformi tal-Konvenzjoni fost l-Istati Membri fir-relazzjonijiet tagħhom ma’ Stati Partijiet mhux tal-UE, u l-applikazzjoni effettiva tal-Konvenzjoni.

(12)

Ir-riżervi huma mingħajr preġudizzju għal kwalunkwe riżerva oħra li l-Istati Membri jistgħu jkunu jixtiequ jagħmlu individwalment, fejn ikun permissibbli.

(13)

Minħabba li l-Konvenzjoni tipprevedi proċeduri li jtejbu l-aċċess transfruntier għall-evidenza f’forma elettronika u livell għoli ta’ salvagwardji, is-sħubija bħala parti għall-Konvenzjoni ser tippromwovi l-konsistenza fl-isforzi tal-Unjoni fil-ġlieda kontra il-kriminalità ċibernetika u forom oħrajn ta’ kriminalità fil-livell globali. Din ser tiffaċilita l-kooperazzjoni bejn l-Istati Partijiet membri tal-UE u l-Istati Partijiet mhux membri tal-UE, filwaqt li tiżgura livell għoli ta’ protezzjoni tal-individwi.

(14)

Konklużjoni rapida tal-Konvenzjoni mill-Unjoni ser tiżgura ulterjorment li l-Unjoni jkollha vuċi sinifikanti kmieni fl-implimentazzjoni ta’ dan il-qafas dinji ġdid għall-ġlieda kontra l-kriminalità ċibernetika.

(15)

Skont l-Artikolu 64(3) tagħha, il-Konvenzjoni hija soġġetta għal ratifika, aċċettazzjoni jew approvazzjoni mill-Istati u minn organizzazzjonijiet reġjonali għall-integrazzjoni ekonomika, bħall-Unjoni.

(16)

Jenħtieġ li l-Unjoni ssir parti għall-Konvenzjoni flimkien mal-Istati Membri tagħha, peress li l-Unjoni u l-Istati Membri tagħha għandhom kompetenzi fl-oqsma koperti mill-Konvenzjoni. Il-konklużjoni tal-Konvenzjoni mill-Unjoni hija mingħajr preġudizzju għall-kompetenza tal-Istati Membri fir-rigward tar-ratifika, l-aċċettazzjoni jew l-approvazzjoni tal-Konvenzjoni, f’konformità mal-proċeduri interni tagħhom. Jenħtieġ li l-Konvenzjoni tiġi konkluża f’isem l-Unjoni fir-rigward ta’ materji li jaqgħu fil-kompetenza tal-Unjoni sal-punt li l-Konvenzjoni tista’ taffettwa regoli komuni jew tbiddel il-kamp ta’ applikazzjoni tagħhom. Fil-qasam tal-kompetenzi kondiviżi, l-Istati Membri jżommu l-kompetenza tagħhom sa fejn il-Konvenzjoni ma taffettwax ir-regoli komuni jew tbiddel il-kamp ta’ applikazzjoni tagħhom.

(17)

F’konformità mal-Konvenzjoni, l-Unjoni għandha, fl-istrument ta’ ratifika, aċċettazzjoni, approvazzjoni jew adeżjoni tagħha, tiddikjara l-firxa tal-kompetenza tagħha fir-rigward tal-kwistjonijiet regolati mill-Konvenzjoni. L-Unjoni ddefiniet il-firxa tal-kompetenza tagħha fir-rigward tal-kwistjonijiet irregolati mill-Konvenzjoni fid-Dikjarazzjoni ta’ kompetenza tal-Unjoni Ewropea magħmula f’konformità mal-Artikolu 64(3) u (4) tal-Konvenzjoni tan-Nazzjonijiet Uniti kontra ċ-Ċiberkriminalità; It-Tisħiħ tal-Kooperazzjoni Internazzjonali għall-Ġlieda Kontra Ċerti Reati Mwettqa minn Mezzi ta’ Sistemi tat-Teknoloġija tal-Informazzjoni u l-Komunikazzjoni u għall-Kondiviżjoni tal-Evidenza f’Forma Elettronika ta’ Reati Serji (id-“Dikjarazzjoni ta’ kompetenza”).

(18)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (3) u ta opinjoni fl-4 ta’ Settembru 2025.

(19)

F’konformità mal-Artikoli 1 u 2 tal-Protokoll Nru 21 dwar il-pożizzjoni tar-Renju Unit u tal-Irlanda fir-rigward tal-ispazju ta’ libertà, sigurtà u ġustizzja, anness mat-Trattat dwar l-Unjoni Ewropea (TUE) u mat-TFUE, u mingħajr preġudizzju għall-Artikolu 4 ta’ dak il-Protokoll, l-Irlanda mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew soġġetta għall-applikazzjoni tagħha.

(20)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew soġġetta għall-applikazzjoni tagħha.

(21)

Il-Konvenzjoni, ir-riżervi mehmuża u d-Dikjarazzjoni ta’ kompetenza jenħtieġ li jiġu approvati,