(1)

Fit-2 ta’ April 2026, ġiet ippreżentata talba lill-Kummissjoni għar-reġistrazzjoni ta’ inizjattiva taċ-ċittadini Ewropej intitolata “Il-konnettività mill-ġdid tan-natura permezz tal-ħolqien ta’ kurituri Ewropej għall-bijodiversità”.

(2)

L-għan tal-inizjattiva kif espress mill-organizzaturi huwa li tistieden lill-Kummissjoni tippreżenta proposta bbażata fuq l-Artikolu 192(1) tat-Trattat dwar il-Funzjonament tal-Unjoni Ewropea (TFUE) “biex ikun hemm konnettività mill-ġdid tan-natura fl-Ewropa permezz ta’ qafas ta’ koordinazzjoni għall-konnettività ekoloġika bejn l-ekosistemi tal-ilmijiet ’il ġewwa mill-kosta u dawk tal-art” u “tingħeleb il-frammentazzjoni tal-ekosistema u jiġu sostnuti l-bijodiversità u r-reżiljenza”. Skont l-organizzaturi, jenħtieġ li l-qafas regolatorju: “jippromvowi għodod komuni: kriterji tekniċi, monitoraġġ integrat u kondiviżjoni tad-data għall-immappjar tal-kurituri ekoloġiċi”; “jiżgura koordinazzjoni transfruntiera aħjar: għall-iffaċilitar tal-kooperazzjoni bejn l-Istati Membri f’ġieħ il-konnettività fil-kontinent kollu”; u “jirrinforza Natura 2000: għat-tisħiħ tal-koerenza bejn is-siti u żoni protetti oħra, filwaqt li jiġi evitat l-iżolament tal-ħabitats u tal-ispeċijiet”.

(3)

Il-Kummissjoni tqis li, abbażi tal-Artikolu 192(1) tat-TFUE, tista’ tadotta proposta għal direttiva biex tgħaqqad mill-ġdid in-natura fl-Ewropa permezz ta’ qafas ta’ koordinazzjoni għall-konnettività ekoloġika bejn l-ekosistemi terrestri u tal-ilmijiet ’il ġewwa mill-kosta u biex tegħleb il-frammentazzjoni tal-ekosistema, filwaqt li ssostni l-bijodiversità u r-reżiljenza.

(4)

Għal din ir-raġuni, il-Kummissjoni hija tal-fehma li l-ebda parti mill-inizjattiva ma taqa’ manifestament barra mill-qafas tas-setgħat tal-Kummissjoni li tippreżenta proposta għal att legali tal-Unjoni għall-fini tal-implimentazzjoni tat-Trattati.

(5)

Dik il-konklużjoni ma taffettwax il-valutazzjoni dwar jekk il-kundizzjonijiet sostantivi konkreti meħtieġa biex il-Kummissjoni taġixxi, inkluża l-konformità mal-prinċipji tal-proporzjonalità u tas-sussidjarjetà u l-kompatibbiltà mad-drittijiet fundamentali, ikunux issodisfati f’dan il-każ.

(6)

Il-grupp ta’ organizzaturi pprovda evidenza xierqa li jissodisfa r-rekwiżiti stipulati fl-Artikolu 5(1) u (2) tar-Regolament (UE) 2019/788 u ħatar il-persuni ta’ kuntatt f’konformità mal-Artikolu 5(3), l-ewwel subparagrafu ta’ dak ir-Regolament.

(7)

L-inizjattiva la hija manifestament abbużiva, frivola jew vessatorja u lanqas ma tmur manifestament kontra l-valuri tal-Unjoni kif stabbiliti fl-Artikolu 2 tat-Trattat dwar l-Unjoni Ewropea jew kontra d-drittijiet minquxin fil-Karta tad-Drittijiet Fundamentali tal-Unjoni Ewropea.

(8)

Għalhekk, jenħtieġ li l-inizjattiva intitolata “Il-konnettività mill-ġdid tan-natura permezz tal-ħolqien ta’ kurituri Ewropej għall-bijodiversità” tiġi rreġistrata.

(9)

Il-konklużjoni li l-kundizzjonijiet għar-reġistrazzjoni skont l-Artikolu 6(3) tar-Regolament (UE) 2019/788 huma ssodisfati, ma timplikax li l-Kummissjoni b’xi mod jew ieħor tikkonferma l-korrettezza fattwali tal-kontenut tal-inizjattiva, li hija r-responsabbiltà unika tal-grupp ta’ organizzaturi tal-inizjattiva. Il-kontenut tal-inizjattiva jesprimi biss il-fehmiet tal-grupp ta’ organizzaturi, u bl-ebda mod ma jista’ jitqies li jirrifletti l-fehmiet tal-Kummissjoni.