(1)

Sabiex jiġu żgurati miżuri ta’ politika makroprudenzjali nazzjonali effettivi u konsistenti, huwa importanti li jiġi kkumplimentat l-għarfien meħtieġ skont id-dritt tal-Unjoni b’reċiproċità volontarja.

(2)

Il-qafas dwar ir-reċiproċità volontarja għal miżuri tal-politika makroprudenzjali stabbilit fir-Rakkomandazzjoni BERS/2015/2 tal-Bord Ewropew dwar ir-Riskju Sistemiku (5) għandu l-għan li jiżgura li l-miżuri kollha tal-politika makroprudenzjali bbażati fuq skopertura attivati fi Stat Membru wieħed ikunu rreċiprokati fl-Istati Membri l-oħrajn.

(3)

Fit-30 ta’ April 2025, l-Awtorità Superviżorja Finanzjarja Żvediża (Finansinspektionen), li taġixxi bħala awtorità maħtura għall-fini tal-Artikolu 458 tar-Regolament (UE) Nru 575/2013, innotifikat lill-Bord Ewropew dwar ir-Riskju Sistemiku (BERS) bl-intenzjoni tagħha li testendi l-perjodu ta’ applikazzjoni ta’ żewġ miżuri nazzjonali aktar stretti eżistenti, f’konformità mal-Artikolu 458(2), il-punt (d)(iv), tar-Regolament (UE) Nru 575/2013.

(4)

B’mod partikolari, Finansinspektionen innotifikat lill-BERS bl-intenzjoni li: (a) biex jiġi estiż mill-31 ta’ Diċembru 2025 għal perjodu ta’ sentejn jew sakemm ir-riskji makroprudenzjali jew sistemiċi ma jibqgħux jeżistu, il-limitu minimu tal-ponderazzjoni tar-riskju medju ponderat skont l-iskopertura ta’ 25 % applikabbli bħalissa għall-iskoperturi Żvediżi għall-ipoteki fil-livell tal-konsumatur; u (b) li jiġi estiż mit-30 ta’ Settembru 2025 għal perjodu ta’ sentejn jew sakemm ir-riskji makroprudenzjali jew sistemiċi ma jibqgħux jeżistu, (i) il-limitu minimu tal-ponderazzjoni tar-riskju medju applikabbli bħalissa ta’ 35 %, li japplika fil-livell tal-portafoll għal skoperturi korporattivi ggarantiti minn proprjetajiet kummerċjali, u (ii) il-limitu minimu tal-ponderazzjoni tar-riskju medju applikabbli bħalissa ta’ 25 %, li japplika fil-livell tal-portafoll għal skoperturi korporattivi ggarantiti minn proprjetajiet residenzjali. Il-miżuri nazzjonali aktar stretti eżistenti japplikaw kemm fuq bażi individwali kif ukoll fuq bażi konsolidata għall-istituzzjonijiet ta’ kreditu kollha awtorizzati fl-Iżvezja li jużaw l-approċċ ibbażat fuq klassifikazzjonijiet interni (IRB) għall-kalkolu tar-rekwiżiti kapitali regolatorji.

(5)

Il-Bord Ġenerali tal-BERS preċedentement iddeċieda li jinkludi dawn il-miżuri fil-lista ta’ miżuri ta’ politika makroprudenzjali li huwa rrakkomandat li jiġu reċiprokati skont ir-Rakkomandazzjoni BERS/2015/2 (6).

(6)

In-notifiki li waslu mingħand Finansinspektionen fit-30 ta’ April 2025 jinkludu talba lill-BERS biex jirrakkomanda r-reċiproċità tal-miżuri ta’ politika makroprudenzjali, skont l-Artikolu 458(8) tar-Regolament (UE) Nru 575/2013, fuq bażi individwali, subkonsolidata u konsolidata.

(7)

Ir-reċiproċità ta’ miżuri makroprudenzjali attivata mill-awtoritajiet ta’ Stati Membri oħra, fuq bażi konsolidata, subkonsolidata, u individwali, irrispettivament minn jekk l-iskoperturi kkonċernati humiex miżmuma permezz ta’ sussidjarji jew fergħat, jew jirriżultawx minn self transkonfinali dirett, tillimita t-tixrid u l-arbitraġġ regolatorju, tindirizza r-riskji sistemiċi u b’hekk tippromwovi l-effettività ġenerali tal-politika makroprudenzjali billi tiżgura li r-riskji miżjuda jiġu indirizzati mhux biss fl-Istat Membru li introduċa miżura makroprudenzjali iżda wkoll fi Stati Membri oħra fejn il-gruppi bankarji huma esposti għal dawk ir-riskji miżjuda. Ir-rikonoxximent għandu għalhekk ikollu wkoll l-għan li jiżgura li gruppi bankarji esposti għal dawk ir-riskji sistemiċi jkunu reżiljenti biżżejjed. Għalhekk, il-miżuri makroprudenzjali li jirriżultaw minn deċiżjoni li jiġu rikonoxxuti l-miżuri makroprudenzjali ta’ Stati Membri oħra għandhom b’mod ġenerali jiġu applikati fuq bażi konsolidata, subkonsolidata, u individwali.

(8)

Wara t-talba minn Finansinspektionen lill-BERS u sabiex: (a) jiġi prekluż li jseħħu effetti transkonfinali negattivi fil-forma ta’ tixrid u arbitraġġ regolatorju li jistgħu jiġu kkawżati mill-implimentazzjoni tal-miżura tal-politika makroprudenzjali applikata fl-Iżvezja skont l-Artikolu 458(2), il-punt (d)(iv) tar-Regolament (UE) Nru 575/2013; u (b) jinżammu kundizzjonijiet ekwi fost l-istituzzjonijiet ta’ kreditu taż-ŻEE, il-Bord Ġenerali tal-BERS iddeċieda li jkompli jinkludi dawn il-miżuri fil-lista ta’ miżuri tal-politika makroprudenzjali li huma rrakkomandati li jiġu reċiprokati taħt ir-Rakkomandazzjoni BERS/2015/2 u għar-rakkomandazzjoni tar-reċiproċità tal-miżuri fuq bażi konsolidata, subkonsolidata, u individwali.

(9)

Ir-Rakkomandazzjoni BERS/2015/2, kif emendata bir-Rakkomandazzjoni BERS/2017/4 tal-BERS (7), tirrakkomanda li l-awtorità rilevanti li tattiva miżura ta’ politika makroprudenzjali għandha, meta tippreżenta talba għal reċiproċità lill-BERS, tipproponi limitu ta’ materjalità li taħtu l-iskopertura ta’ fornitur individwali ta’ servizzi finanzjarji għar-riskju makroprudenzjali identifikat fil-ġurisdizzjoni fejn il-miżura ta’ politika makroprudenzjali tiġi applikata mill-awtorità ta’ attivazzjoni tista’ titqies bħala mhux materjali. Il-BERS jista’ jirrakkomanda livell limitu differenti jekk jitqies neċessarju.

(10)

F’konformità man-notifiki riċevuti, il-livell limitu ta’ materjalità fil-livell tal-istituzzjoni għar-reċiproċità tal-limitu medju attwali tal-ponderazzjoni tar-riskju ta’ 25 % fuq l-iskoperturi Żvediżi għall-ipoteki fil-livell tal-konsumatur jenħtieġ li jinżamm għal SEK 5 biljun. Għal-limitu minimu medju attwali tal-ponderazzjoni tar-riskju ta’ 35 % applikat fil-livell tal-portafoll għal skoperturi korporattivi ggarantiti minn proprjetajiet kummerċjali u għal-limitu minimu attwali tal-ponderazzjoni tar-riskju ta’ 25 % applikat fil-livell tal-portafoll għal skoperturi korporattivi ggarantiti minn proprjetajiet residenzjali, jenħtieġ li jinżamm ukoll il-limitu ta’ materjalità attwali fil-livell tal-istituzzjonijiet ta’ SEK 5 biljun. Iż-żewġ limiti għandhom jiġu vvalutati fil-livell konsolidat, subkonsolidat u individwali.

(11)

Din l-emenda għar-Rakkomandazzjoni BERS/2015/2 ma taffettwax il-kontinwità tar-rakkomandazzjoni għar-reċiproċità tal-miżuri makroprudenzjali nazzjonali attivati mill-awtoritajiet Żvediżi, kif stabbilit fir-Rakkomandazzjoni BERS/2023/4 (8). L-emendi attwali għar-Rakkomandazzjoni BERS/2015/2 jirriflettu li r-reċiproċità issa hija rakkomandata fuq bażi individwali, subkonsolidata u konsolidata. Għalhekk, il-perjodu tranżitorju standard ta’ tliet xhur wara l-pubblikazzjoni ta’ din ir-Rakkomandazzjoni f’Il-Ġurnal Uffiċjali tal-Unjoni Ewropea huwa applikabbli biss għall-miżuri, jew l-emendi għalihom, li l-awtoritajiet nazzjonali se jadottaw biex jirreċiprokaw iż-żewġ limiti minimi tal-ponderazzjoni tar-riskju fuq bażi individwali, subkonsolidata u konsolidata.

(12)

Għalhekk, ir-Rakkomandazzjoni BERS/2015/2 għandha tiġi emendata kif meħtieġ,