(1)

Bir-Regolament ta’ Implimentazzjoni tal-Kunsill (UE) 248/2011 (2), il-Kunsill impona dazju anti-dumping definittiv fuq l-importazzjonijiet ta’ ċerti prodotti tal-fibra tal-ħġieġ (“GFR”, Glass Fibre Reinforcements) bil-filament kontinwu li joriġinaw mir-Repubblika tal-Poplu taċ-Ċina (“ir-RPĊ” jew “iċ-Ċina”, jew “il-pajjiż ikkonċernat”). Id-dazju, ibbażat fuq il-livell ta’ eliminazzjoni tad-dannu, varja minn 7,3 % sa 13,8 %.

(2)

Bir-Regolament ta’ Implimentazzjoni tal-Kummissjoni (UE) 1379/2014 (3), wara investigazzjoni antisussidji u rieżami interim parzjali tal-miżuri anti-dumping, il-Kummissjoni emendat id-dazju anti-dumping oriġinali għal valuri li jvarjaw minn 0 % sa 19,9 % u imponiet dazju kumpensatorju addizzjonali li jvarja minn 4,9 % sa 10,3 %. Il-miżuri kumpensatorji u anti-dumping ikkombinati li jirriżultaw varjaw minn 4,9 % sa 30,2 %.

(3)

Bir-Regolament ta’ Implimentazzjoni tal-Kummissjoni (UE) 2017/724 (4), wara rieżami ta’ skadenza tal-miżuri anti-dumping, il-Kummissjoni żammet dawn il-miżuri kif stabbilit fir-Regolament ta’ Implimentazzjoni (UE) 1379/2014.

(4)

Bir-Regolament ta’ Implimentazzjoni tal-Kummissjoni (UE) 2021/328 (5), wara rieżami ta’ skadenza tal-miżuri kumpensatorji, il-Kummissjoni ddeċidiet li żżomm dawn il-miżuri kif stabbilit fir-Regolament ta’ Implimentazzjoni (UE) 1379/2014.

(5)

Bir-Regolament ta’ Implimentazzjoni tal-Kummissjoni (UE) Nru 2023/1452 (6), wara rieżami ta’ skadenza tal-miżuri anti-dumping, il-Kummissjoni ddeċidiet li żżomm dawn il-miżuri kif stabbilit fir-Regolament ta’ Implimentazzjoni (UE) 1379/2014.

(6)

Il-miżuri kumpensatorji u anti-dumping ikkombinati li jirriżultaw għalhekk ivarjaw minn 4,9 % sa 30,2 %.

(7)

Hemm fis-seħħ ukoll miżuri fuq l-importazzjonijiet tal-GFR li joriġinaw mill-Eġittu, imposti mir-Regolament ta’ Implimentazzjoni tal-Kummissjoni (UE) 2020/870 (7) wara investigazzjoni antisussidji. Id-dazju fuq l-importazzjonijiet ta’ ċerti prodotti tal-fibra tal-ħġieġ bil-filament kontinwu li joriġinaw mill-Eġittu, ibbażat fuq il-livell tas-sussidjar, huwa ta’ 13,1 %.

(8)

Fit-30 ta’ Awwissu 2024, il-Kummissjoni bdiet rieżami interim parzjali, limitat għad-dannu, tal-miżuri antisussidji applikabbli għall-importazzjonijiet ta’ GFR li joriġinaw mir-Repubblika tal-Poplu taċ-Ċina. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (8).

(9)

Fis-17 ta’ Frar 2025, il-Kummissjoni bdiet proċediment anti-dumping li jikkonċerna l-importazzjonijiet tal-GFR li joriġinaw mill-Bahrain, mill-Eġittu u mit-Tajlandja. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (9).

(10)

Fit-30 ta’ Awwissu 2024, il-Kummissjoni Ewropea (“il-Kummissjoni”) bdiet rieżami interim tal-miżuri anti-dumping applikabbli għall-importazzjonijiet tal-GFR li joriġinaw mir-Repubblika tal-Poplu taċ-Ċina abbażi tal-Artikolu 11(3) tar-Regolament bażiku. Il-Kummissjoni ppubblikat Notifika tal-Bidu f’Il-Ġurnal Uffiċjali tal-Unjoni Ewropea (10) (“in-Notifika tal-Bidu”).

(11)

Il-Kummissjoni bdiet dan ir-rieżami wara talba ppreżentata fit-3 ta’ Ġunju 2024 minn Glass Fibre Europe (“l-applikant”). It-talba għal rieżami saret f’isem l-industrija tal-Unjoni tal-GFR skont it-tifsira tal-Artikolu 5(4) tar-Regolament bażiku. It-talba għal rieżami kien fiha evidenza ta’ bidliet ta’ natura dejjiema fl-istruttura tal-industriji tar-RPĊ u tal-Unjoni tal-GFR, kif ukoll id-dumping u d-dannu materjali li jirriżulta, li kienet suffiċjenti biex tiġġustifika l-bidu tal-investigazzjoni.

(12)

Fin-Notifika tal-Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament informat lill-applikant, lil produtturi magħrufa oħra tal-Unjoni, lill-produtturi esportaturi magħrufa fir-RPĊ kif ukoll lill-awtoritajiet tar-RPĊ, lil importaturi magħrufa, lill-utenti kif ukoll lill-assoċjazzjonijiet magħrufa li huma kkonċernati dwar il-bidu tal-investigazzjoni u stednithom jipparteċipaw.

(13)

Il-partijiet interessati kellhom opportunità jikkummentaw dwar il-bidu tal-investigazzjoni tar-rieżami u jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(14)

Il-Kummissjoni informat lill-partijiet interessati kollha bil-fatti u l-kunsiderazzjonijiet essenzjali li abbażi tagħhom kienet beħsiebha timponi dazju anti-dumping definittiv fuq l-importazzjonijiet tal-GFR li joriġinaw mir-RPĊ. Il-partijiet kollha ngħataw perjodu li fih setgħu jikkummentaw dwar id-divulgazzjoni. Il-kummenti sottomessi minn Glass Fibre Europe, Proxim, Jiangsu Changhai Composite Materials Holding Co., Ltd. u Jushi Group Co., Ltd. wara d-divulgazzjoni ġew indirizzati fit-taqsima rilevanti ta’ hawn taħt.

(15)

Il-partijiet li talbu li jinstemgħu ngħataw ukoll din l-opportunità. Saru seduti ta’ smigħ ma’ Glass Fibre Europe, Jiangsu Changhai Composite Materials Holding Co., Ltd. u Jushi Group Co., Ltd.

(16)

Wara d-divulgazzjoni msemmija fil-premessa (14), il-Kummissjoni sussegwentement għamlet divulgazzjoni finali addizzjonali lill-partijiet interessati kollha. Din id-divulgazzjoni addizzjonali kien fiha sejbiet u kunsiderazzjonijiet aġġornati. Il-partijiet ingħataw l-opportunità li jikkummentaw dwar din id-divulgazzjoni addizzjonali, u l-kummenti li waslu ġew indirizzati fit-taqsima rilevanti ta’ hawn taħt.

(17)

Ma wasal l-ebda kumment dwar il-bidu.

(18)

Fin-Notifika tal-Bidu, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(19)

Fin-Notifika tal-Bidu, il-Kummissjoni ddikjarat li kienet għażlet kampjun ta’ produtturi tal-Unjoni b’mod proviżorju. Il-Kummissjoni għażlet il-kampjun abbażi tal-akbar volum ta’ produzzjoni u bejgħ matul il-perjodu mill-1 ta’ Lulju 2023 sat-30 ta’ Ġunju 2024 irrapportat mill-produtturi tal-Unjoni fil-kuntest tal-analiżi tal-valutazzjoni permanenti ta’ qabel il-bidu. Il-kampjun kien jikkonsisti minn tliet produtturi tal-Unjoni li jirrappreżentaw aktar minn 60 % tal-volum totali stmat tal-produzzjoni u aktar minn 69 % tal-bejgħ totali stmat tal-prodott simili fl-Unjoni. Il-Kummissjoni stiednet lill-partijiet interessati biex jikkummentaw dwar il-kampjun proviżorju. Ma wasal l-ebda kumment. Il-kampjun tqies rappreżentattiv tal-industrija tal-Unjoni.

(20)

Sabiex tiddeċiedi jekk il-kampjunar kienx neċessarju u, jekk iva, sabiex tagħżel kampjun, il-Kummissjoni talbet lil importaturi mhux relatati jipprovdu l-informazzjoni speċifikata fin-Notifika tal-Bidu.

(21)

L-ebda importatur mhux relatat ma wieġeb għall-formola tal-kampjunar. Konsegwentement, il-Kummissjoni ddeċidiet li l-kampjunar ma kienx neċessarju.

(22)

Sabiex tiddeċiedi jekk il-kampjunar kienx neċessarju u, jekk iva, biex tagħżel kampjun, il-Kummissjoni talbet lill-produtturi esportaturi kollha fir-RPĊ jipprovdu l-informazzjoni speċifikata fin-Notifika tal-Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(23)

Erba’ produtturi esportaturi/gruppi fir-RPĊ ipprovdew l-informazzjoni mitluba u qablu li jiġu inklużi fil-kampjun. F’konformità mal-Artikolu 17(1) tar-Regolament bażiku, il-Kummissjoni għażlet kampjun magħmul minn żewġ produtturi esportaturi/gruppi abbażi tal-akbar volum rappreżentattiv ta’ esportazzjonijiet lejn l-Unjoni li seta’ jiġi investigat b’mod raġonevoli fiż-żmien disponibbli. F’konformità mal-Artikolu 17(2) tar-Regolament bażiku, il-produtturi esportaturi magħrufa u kkonċernati kollha, u l-awtoritajiet tar-RPĊ ġew ikkonsultati dwar l-għażla tal-kampjun. Il-kampjun inizjali kien jikkonsisti minn Jushi Group u Jiangsu Changhai Composite Materials Holding Co., Ltd (“Jiangsu Changhai”). Taishan Fiberglass Group, grupp ta’ produtturi esportaturi inizjalment mhux inkluż fil-kampjun, issottometta kummenti dwar ir-relazzjoni tiegħu ma’ waħda mill-kumpaniji inizjalment inklużi fil-kampjun, Jushi Group, permezz taċ-China National Building Materials Group (magħruf ukoll bħala “CNBM” jew “CNBM Group”).

(24)

Fl-20 ta’ Settembru 2024, il-Kummissjoni nnotifikat lill-partijiet interessati kollha li l-kampjun proviżorju kien inbidel, u li Taishan Fiberglass Group u Jushi Group kienu se jiġu ttrattati bħala kumpaniji relatati skont it-tifsira tal-Artikolu 127 tar-Regolament ta’ Implimentazzjoni tal-Kummissjoni (UE) 2015/2447 (11), u kienu se jitqiesu bħala parti mill-istess grupp, CNBM Group. Għalhekk, il-kampjun finali kien jikkonsisti minn CNBM Group u Jiangsu Changhai, li jirrappreżentaw 98 % tal-volum tal-esportazzjonijiet mir-RPĊ lejn l-Unjoni. Ma wasal l-ebda kumment dwar il-kampjun definittiv.

(25)

L-ebda kumpanija ma ressqet talba għal eżami individwali.

(26)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”).

(27)

Il-Kummissjoni ppubblikat online (12) l-kwestjonarji għall-produtturi esportaturi, l-utenti, l-importaturi mhux relatati u l-produtturi tal-Unjoni.

(28)

Waslu tweġibiet għall-kwestjonarju mit-tliet produtturi tal-Unjoni kollha magħżula fil-kampjun tal-produtturi tal-Unjoni, żewġ utenti u l-produtturi esportaturi Ċiniżi inklużi fil-kampjun u n-negozjanti relatati tagħhom fl-Unjoni.

(29)

Il-Kummissjoni fittxet u vverifikat l-informazzjoni kollha li hija qieset neċessarja għad-determinazzjoni tad-dumping, tad-dannu li jirriżulta u tal-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

(30)

L-investigazzjoni tad-dumping u tad-dannu kopriet il-perjodu mill-1 ta’ Lulju 2023 sat-30 ta’ Ġunju 2024 (“il-perjodu ta’ investigazzjoni tar-rieżami”). L-eżami tax-xejriet rilevanti għall-valutazzjoni tad-dannu kopra l-perjodu mill-1 ta’ Jannar 2021 sa tmiem il-perjodu ta’ investigazzjoni tar-rieżami (“il-perjodu kkunsidrat”).

(31)

Il-prodott taħt rieżami huwa trofof tal-fibra tal-ħġieġ imqattgħin, mhux itwal minn 50 mm; faxex tal-fibra tal-ħġieġ, għajr faxex tal-fibra tal-ħġieġ li huma imprenjati u miksija u li jkollhom telf mat-tqabbid bin-nar ta’ aktar minn 3 % (kif iddeterminat mill-Istandard tal-ISO 1887); u twapet magħmula minn filamenti tal-fibra tal-ħġieġ esklużi twapet tas-suf tal-ħġieġ, (“il-prodott taħt rieżami”), li attwalment jaqgħu taħt il-kodiċijiet NM 7019 11 00 , ex 7019 12 00 , 7019 14 00 u 7019 15 00 (il-kodiċijiet TARIC 7019 12 00 22, 7019 12 00 25, 7019 12 00 26, 7019 12 00 39). Il-kodiċijiet NM u TARIC huma pprovduti għall-fini ta’ informazzjoni biss mingħajr preġudizzju għal bidla sussegwenti fil-klassifikazzjoni tariffarja.

(32)

Il-prodott taħt rieżami huwa l-materja prima li ħafna drabi tintuża biex jissaħħu r-reżini termoplastiċi u li jibbiesu bis-sħana fl-industrija tal-materjali kompożiti. Il-materjali kompożiti li jirriżultaw (plastik imsaħħaħ bil-fibra tal-ħġieġ bil-filament) jintużaw f’għadd kbir ta’ industriji: l-industrija tal-karozzi, tal-elettriku/elettronika, l-irdieden tal-imtieħen tar-riħ, il-bini/kostruzzjoni, tankijiet/pajpijiet, oġġetti tal-konsum, ajruspazjali/militari, eċċ.

(33)

Il-prodott ikkonċernat huwa l-prodott taħt investigazzjoni u li joriġina mir-Repubblika tal-Poplu taċ-Ċina (“il-prodott ikkonċernat”).

(34)

L-investigazzjoni wriet li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(35)

F’dan l-istadju l-Kummissjoni ddeċidiet li, għaldaqstant, dawk il-prodotti huma prodotti simili fis-sens tal-Artikolu 1(4) tar-Regolament bażiku.

(36)

Wara d-divulgazzjoni, Glass Fibre Europe ppreżentat kummenti dwar l-ambitu tal-prodott tal-miżuri.

(37)

Dawn il-kummenti waslu wara l-iskadenza stabbilita għas-sottomissjoni tal-kummenti dwar id-divulgazzjoni finali. Barra minn hekk, ir-rieżami interim kien limitat għall-eżami tad-dumping u l-ħsara.

(38)

Peress li s-sottomissjonijiet waslu barra l-limitu ta’ żmien preskritt, il-Kummissjoni ma kkunsidrathomx u ċaħdet it-talba.

(39)

F’konformità mal-Artikolu 11(3) tar-Regolament bażiku, il-Kummissjoni analizzat jekk il-bidla fiċ-ċirkostanzi fir-rigward tad-dumping u tad-dannu setgħetx raġonevolment titqies li hija ta’ natura dejjiema.

(40)

Fit-talba, l-applikanti sostnew li l-bidliet dejjiema li jikkonċernaw id-dumping kienu relatati ma’ bidla sinifikanti fl-istruttura tal-industrija tal-GFR Ċiniża, żieda fil-volum tal-produzzjoni, fil-kapaċità tal-produzzjoni u fil-kapaċità tal-produzzjoni ta’ riżerva tal-prodott taħt rieżami fir-RPĊ, u l-kapaċità żejda massiva li tirriżulta u l-pressjoni ’l isfel fuq il-prezzijiet tal-esportazzjoni.

(41)

Il-Kummissjoni nnotat li f’kull rieżami ta’ skadenza mir-Regolament ta’ Implimentazzjoni (UE) 2017/724, id-data dwar il-kapaċità żejda tal-GFR fiċ-Ċina kkonfermat żieda sinifikanti fil-kapaċità żejda, minn 150 000 MT fl-2015 (13), sa 1,1 miljun MT fl-2021 (14).

(42)

Fid-dawl tad-data li tappoġġa l-argument ta’ żieda dejjiema fil-kapaċità tal-produzzjoni tal-industrija tal-GFR fir-RPĊ, l-evoluzzjoni tal-kapaċità tal-produtturi esportaturi li kkooperaw ġiet investigata u vverifikata. Il-produtturi esportaturi kollha li kkooperaw inklużi fil-kampjun irrapportaw żidiet fil-kapaċità tal-produzzjoni, li minn 1,5 miljun tunnellata fl-2016 saru 4,1 miljun tunnellata matul l-RIP (Review Investigation Period). Bejn l-2020 u l-2021, fl-eqqel tal-pandemija tal-COVID-19 u l-lockdowns, il-produtturi tal-GFR Ċiniżi setgħu jżidu l-output tal-produzzjoni tagħhom b’aktar minn miljun tunnellata f’sena waħda biss.

(43)

Huwa mfakkar li l-GTĊ ma kkooperax f’dan ir-rieżami. Għalhekk, il-Kummissjoni bbażat fuq l-informazzjoni li tinsab fit-talba għal rieżami biex tistabbilixxi d-domanda domestika Ċiniża għall-GFR. Abbażi ta’ dan, id-domanda domestika Ċiniża għall-GFR ammontat għal madwar 3,1 miljun tunnellata bejn l-2023 u l-2024, li tissarraf f’kapaċitajiet żejda ta’ mill-inqas miljun tunnellata meta mqabbla mad-data vverifikata sottomessa mill-produtturi esportaturi Ċiniżi inklużi fil-kampjun biss. Meta jitqiesu produtturi esportaturi Ċiniżi oħra, bħal Chongqing Polycomp International Corp., (15) Shandong Fiberglass Group Corp. Ltd (16) u Chongqing Sanlei Fiberglass Co. Ltd., (17) u ż-żidiet imħabbra fil-kapaċità tagħhom, il-kapaċitajiet żejda Ċiniżi jistgħu jkunu ogħla minn 2 miljun tunnellata.

(44)

Barra minn hekk, il-produtturi esportaturi kollha inklużi fil-kampjun irrapportaw investimenti reċenti fi fran u linji ta’ produzzjoni ġodda, bil-ftuħ ta’ żewġ impjanti tal-manifattura ġodda minn CNMB Group f’Taiyuan (18) u f’Huai’an (19), u żieda fil-kapaċità tal-manifattura b’aktar minn 800 000 tunnellata fis-sena.

(45)

Fin-Notifika tal-Bidu, il-Kummissjoni indikat li l-bidliet dejjiema li jikkonċernaw id-dannu kienu relatati ma’ bidliet sinifikanti fl-istruttura tal-industrija tal-Unjoni minħabba l-pressjoni aggressiva dejjem akbar tal-importazzjonijiet Ċiniżi f’termini ta’ kwantitajiet u prezzijiet ikkawżati mill-kapaċitajiet żejda tal-GFR Ċiniżi.

(46)

L-investigazzjoni kkonfermat li l-kapaċità żejda persistenti fiċ-Ċina, flimkien ma’ pprezzar aggressiv, xekklu b’mod sinifikanti t-tkabbir tal-industrija tal-Unjoni tal-GFR. Il-produtturi tal-Unjoni mmaniġġjaw biss żidiet limitati fil-kapaċità billi ottimizzaw il-faċilitajiet eżistenti. Wara l-implimentazzjoni ta’ miżuri kummerċjali addizzjonali fl-2014, l-esportazzjonijiet Ċiniżi komplew jeżerċitaw pressjoni fuq is-suq tal-Unjoni, u dan wassal għall-ħruġ ta’ diversi produtturi mis-suq. Fl-2009, matul il-perjodu ta’ investigazzjoni tal-investigazzjoni oriġinali, kien hemm 11-il produttur tal-GFR fl-Unjoni. Sal-2021, bil-bidu tal-perjodu kkunsidrat, dan l-għadd kien naqas għal għaxra. B’mod partikolari, P-D Glasseiden waqqfet il-produzzjoni fil-Ġermanja fl-2019. Aktar reċentement, Krosglass waqqfet il-produzzjoni tal-GFR f’Lulju 2023 biex tiffoka fuq attivitajiet downstream. Barra minn hekk, NEG NL iddikjarat falliment (20) prinċipalment minħabba ż-żieda fil-kostijiet tal-enerġija u t-tnaqqis fid-domanda mis-settur awtomobilistiku, li kien is-suq finali ewlieni għall-prodotti tal-ħġieġ tal-fibra ottika tiegħu. Dan l-għeluq addizzjonali b’hekk naqqas l-għadd ta’ produtturi għal tmienja biss. B’mod parallel, Electric Glass Fiber UK waqqfet il-produzzjoni tal-GFR (21) fl-2025. Filwaqt li mill-1 ta’ Jannar 2021 ir-Renju Unit ma baqax parti mill-Unjoni Ewropea, dan l-iżvilupp ma jbiddilx l-għadd ta’ produtturi tal-Unjoni, għalkemm inaqqas il-provvista reġjonali disponibbli u jifforma parti mill-bidliet dejjiema li jaffettwaw is-suq tal-Unjoni.

(47)

Meta wieħed iħares lejn l-evoluzzjoni tal-kapaċità tal-produzzjoni, filwaqt li l-kapaċità fis-suq tal-Unjoni ġiet ivvalutata biss għall-produtturi inklużi fil-kampjun fl-investigazzjoni oriġinali u ma tistax tintuża bħala punt ta’ referenza f’dan ir-rigward, il-kapaċità tal-produzzjoni tal-Unjoni ġiet stmata għal 725 960 tunnellata fl-2015 fir-rieżami ta’ skadenza tal-2017 tal-miżuri anti-dumping (22). B’kuntrast ma’ dan, fl-investigazzjoni kurrenti, il-kapaċità naqset minn 711 692 tunnellata fl-2021 għal 651 196 tunnellata fl-RIP (–9 %), jiġifieri madwar 10 % taħt il-livell tal-2015 li kien instab fl-investigazzjoni oriġinali. Anke meta l-produttur tar-Renju Unit ma jitqiesx fl-indikaturi ta’ wara l-Brexit, ix-xejra ’l isfel relatata mal-kapaċità tal-produzzjoni ġiet ikkonfermata.

(48)

Meta titqabbel id-data disponibbli mill-investigazzjoni oriġinali, il-bejgħ tal-industrija tal-Unjoni naqas minn 737 818-il tunnellata fl-2006 għal 520 064 tunnellata fil-perjodu ta’ investigazzjoni, bi tnaqqis tas-sehem mis-suq minn 75,1 % għal 69,5 % matul l-istess perjodu. B’kuntrast ma’ dan, fl-investigazzjoni kurrenti l-bejgħ tal-industrija tal-Unjoni naqas għal 337 898 tunnellata fl-RIP bi tnaqqis tas-sehem fis-suq għal 40 % fl-RIP. Dan juri li l-bejgħ tal-Unjoni issa laħaq livelli ferm inqas minn dawk ta’ nofs is-snin 2000 u, aktar importanti minn hekk, dak is-sehem mis-suq naqas b’madwar 30 punt perċentwali, li jindika erożjoni dejjiema tal-pożizzjoni tal-industrija tal-Unjoni.

(49)

Is-sitwazzjoni fis-suq tal-Unjoni ġiet affettwata wkoll mill-istabbiliment ta’ kumpaniji Ċiniżi li jipproduċu l-GFR f’pajjiżi terzi bħall-Eġittu u l-Bahrain (23). Wara l-istabbiliment tal-kumpaniji fl-Eġittu, il-Kummissjoni imponiet dazji kumpensatorji fuq l-importazzjonijiet tal-GFR mill-Eġittu (24) bl-għan li jiġu rrestawrati kundizzjonijiet ekwi fid-dawl tal-importazzjonijiet issussidjati li jikkawżaw dannu lill-industrija tal-Unjoni. Barra minn hekk, kien hemm żidiet addizzjonali tal-kapaċità fil-produzzjoni tal-GFR fl-Eġittu (25) u fil-Bahrain (26). Minkejja l-miżuri meħuda kontra l-importazzjonijiet tal-GFR mir-RPĊ, l-industrija tal-Unjoni baqgħet taħt pressjoni persistenti minn influssi rikorrenti ta’ GFR innegozjati b’mod inġust li ġejjin minn għadd dejjem akbar ta’ pajjiżi terzi, inklużi faċilitajiet ikkontrollati miċ-Ċina fil-Bahrain u fl-Eġittu, li żiedu s-sehem mis-suq tagħhom fis-suq tal-Unjoni b’mod sinifikanti. Fis-17 ta’ Frar 2025, il-Kummissjoni bdiet proċediment anti-dumping fir-rigward tal-importazzjonijiet tal-GFR li joriġinaw mill-Bahrain, mill-Eġittu u mit-Tajlandja (27).

(50)

Il-Kummissjoni stabbiliet ukoll li seħħew bidliet strutturali fis-swieq tal-enerġija tal-Unjoni. Għalkemm il-kostijiet tal-enerġija kienu naqsu mill-ogħla livell tagħhom fl-2022 sa tmiem l-RIP, dawn baqgħu ogħla mil-livelli prevalenti fil-bidu tal-perjodu kkunsidrat. Il-Kummissjoni qieset li huwa improbabbli li l-prezzijiet tal-gass jerġgħu lura jew jistabbilizzaw bis-sħiħ fil-livelli osservati sa nofs l-2021. Minn dik is-sena, il-biċċa l-kbira tal-Istati Membri li qabel kienu jibbażaw fuq l-importazzjonijiet tal-gass naturali mill-pipelines tar-Russja naqqsu tali dipendenza b’mod progressiv. Wara l-aggressjoni militari mhux ġustifikata tar-Russja kontra l-Ukrajna, l-Unjoni u l-Istati Membri tagħha saħħew u aċċelleraw miżuri biex jiddiversifikaw il-provvisti tal-enerġija u biex jeliminaw id-dipendenza fuq il-gass Russu. F’dan il-kuntest, ġew ippjanati jew qegħdin jinbnew mill-inqas 17-il terminal ġdid tal-LNG (28). Minħabba l-iskala tal-investiment meħtieġ għall-infrastruttura tal-LNG u l-impenn ċar tal-Unjoni li ttemm id-dipendenza fuq il-gass bil-pipeline Russu (29), il-Kummissjoni kkonkludiet li huwa improbabbli ħafna li l-Unjoni terġa’ tibda takkwista l-gass Russu fil-volumi u bil-prezzijiet li kienu jipprevalu qabel l-2021. Għaldaqstant, irid ikun mistenni li l-prezzijiet tal-gass se jibqgħu ogħla b’mod dejjiemi minn dawk li ġew osservati sal-ewwel nofs tal-2021.

(51)

Il-Kummissjoni nnotat li l-industrija tal-Unjoni topera f’kuntest ta’ obbligi ambjentali u relatati mal-enerġija dejjem aktar stretti. Fid-dokument ta’ pożizzjoni tiegħu tal-2023, l-applikant wissa li l-produtturi tal-GFR tal-Unjoni jiffaċċjaw kostijiet operazzjonali li qegħdin jiżdiedu marbuta mal-konformità ambjentali u tal-enerġija (30). F’dan ir-rigward, valutazzjoni reċenti taċ-ċiklu tal-ħajja li tkopri madwar 95 % tal-produzzjoni tal-Unjoni ta’ materjali tal-fibra tal-ħġieġ uriet li l-manifattura ta’ kilogramma ta’ drapp tinvolvi impronta ambjentali medja ta’ 2,2 kg ta’ emissjonijiet ta’ CO2 u 39 MJ ta’ konsum ta’ enerġija primarja (31). Bejn l-2015 u l-2021, il-konsum tal-enerġija fl-industrija kollha naqas bi 8 % u l-emissjonijiet ta’ gassijiet serra bi 3 %. Dawn iċ-ċifri jindikaw li, filwaqt li nkiseb xi progress, aktar tnaqqis se jirrikjedi investimenti sostanzjali addizzjonali. Barra minn hekk, il-Kummissjoni osservat li l-leġiżlazzjoni tal-Unjoni fil-qasam tal-protezzjoni ambjentali, inkluża d-Direttiva dwar l-Emissjonijiet Industrijali (id-Direttiva 2010/75/UE tal-Parlament Ewropew u tal-Kunsill (32) kif emendata bid-Direttiva (UE) 2024/1785 tal-Parlament Ewropew u tal-Kunsill (33)), kif ukoll miżuri oħra dwar il-klima u l-ekonomija ċirkolari li jiffurmaw parti mill-Patt Ekoloġiku Ewropew, hija mistennija li twassal għal kostijiet addizzjonali ta’ konformità għall-produtturi tal-Unjoni. Meħuda flimkien, dawn is-sejbiet jikkonfermaw li l-kostijiet ambjentali għall-industrija tal-Unjoni huma mistennija li jiżdiedu fis-snin li ġejjin. Dan jikkostitwixxi bidla dejjiema fl-istruttura tal-kostijiet tal-industrija tal-Unjoni.

(52)

Il-Kummissjoni tfakkar li l-prodott ikkonċernat jintuża prinċipalment bħala materjal tat-tisħiħ fil-produzzjoni tal-materjali kompożiti. Aktar minn 95 % tad-domanda tal-fibra tal-ħġieġ fl-Unjoni hija marbuta ma’ tali applikazzjonijiet tat-tisħiħ. Madankollu, f’dawn l-aħħar snin, is-suq tal-Unjoni tal-materjali kompożiti ċkien. Il-volumi tal-produzzjoni tal-plastik imsaħħaħ bil-fibra tal-ħġieġ fl-Ewropa naqsu b’9 % fl-2022 u bi 8 % addizzjonali fl-2023 (34), u dan wassal għal tnaqqis fl-output totali għal 2,4 miljun tunnellata fl-2024, livell li deher l-aħħar fl-2012. Fl-istess ħin, il-produzzjoni globali tal-materjali kompożiti espandiet b’madwar 6 % fl-2023, u dan issottolinja tnaqqis tas-sehem mis-suq tal-Unjoni. Dan it-tnaqqis għandu impatt dirett fuq id-domanda għall-forom bażiċi tal-fibra tal-ħġieġ koperti mir-rieżami kurrenti. Abbażi ta’ dan, il-Kummissjoni kkonkludiet li t-tnaqqis fid-domanda tal-Unjoni għall-materjali kompożiti, flimkien ma’ żieda fil-produzzjoni fid-dinja kollha u żieda fl-importazzjonijiet minn pajjiżi terzi, irrappreżentaw bidla dejjiema fiċ-ċirkostanzi tas-suq.

(53)

Fid-dawl ta’ dan ta’ hawn fuq, il-Kummissjoni kkonkludiet li mill-investigazzjoni oriġinali kien hemm bidliet fiċ-ċirkostanzi ta’ natura dejjiema, kemm fir-rigward tal-istruttura tal-industrija u tas-suq tal-GFR Ċiniżi kif ukoll tal-istruttura tal-industrija u tas-suq tal-Unjoni, li titqies bħala bidla rilevanti fiċ-ċirkostanzi skont it-tifsira tal-Artikolu 11(3) tar-Regolament bażiku.

(54)

Minħabba li kien hemm provi biżżejjed disponibbli fil-bidu tal-investigazzjoni li indikaw l-eżistenza ta’ distorsjonijiet sinifikanti fis-sens tal-Artikolu 2(6a)(b) tar-Regolament bażiku fir-rigward tar-RPĊ, il-Kummissjoni qieset li kien xieraq li tiftaħ l-investigazzjoni fir-rigward tal-produtturi esportaturi minn dan il-pajjiż b’kunsiderazzjoni tal-Artikolu 2(6a) tar-Regolament bażiku.

(55)

Konsegwentement, sabiex tiġbor id-data neċessarja għall-applikazzjoni eventwali tal-Artikolu 2(6a) tar-Regolament bażiku, fin-Notifika tal-Bidu, il-Kummissjoni stiednet lill-produtturi esportaturi kollha fir-RPĊ jipprovdu informazzjoni rigward l-inputs użati għall-produzzjoni tal-GFR. Żewġ kumpaniji/gruppi inklużi fil-kampjun issottomettew l-informazzjoni rilevanti.

(56)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, fil-punt 5.3.2 tan-Notifika tal-Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jissottomettu informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika tal-Bidu f’Il-Ġurnal Uffiċjali tal-Unjoni Ewropea.

(57)

Ma waslet l-ebda tweġiba għall-kwestjonarju mill-GTĊ u ma waslet l-ebda sottomissjoni dwar l-applikazzjoni tal-Artikolu 2(6a) tar-Regolament bażiku qabel l-iskadenza. Sussegwentement, il-Kummissjoni informat lill-GTĊ li hija kienet se tuża l-fatti disponibbli skont it-tifsira tal-Artikolu 18 tar-Regolament bażiku biex tiddetermina l-eżistenza tad-distorsjonijiet sinifikanti fir-RPĊ.

(58)

Fin-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, hija jista’ jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku bl-iskop li tiddetermina l-valur normali fuq il-bażi ta’ prezzijiet jew valuri referenzjarji mingħajr distorsjoni.

(59)

Fit-23 ta’ Jannar 2025, il-Kummissjoni informat permezz tal-ewwel nota (“l-Ewwel Nota”) lill-partijiet interessati dwar is-sorsi rilevanti li kienet beħsiebha tuża għad-determinazzjoni tal-valur normali. F’dik in-nota, il-Kummissjoni pprovdiet lista tal-fatturi kollha tal-produzzjoni (“FOP”, Factors of Production) bħall-materja prima, il-manodopera u l-enerġija użati fil-produzzjoni tal-GFR. Barra minn hekk, abbażi tal-kriterji li jiggwidaw l-għażla ta’ prezzijiet jew valuri referenzjarji mingħajr distorsjoni, il-Kummissjoni identifikat pajjiżi rappreżentattivi possibbli, jiġifieri l-Brażil, il-Messiku, it-Tajlandja u t-Turkija.

(60)

Fl-10 ta’ Lulju 2025, il-Kummissjoni indirizzat il-kummenti li rċeviet mingħand il-partijiet interessati dwar l-Ewwel Nota u informat lill-partijiet interessati dwar is-sorsi rilevanti li kienet beħsiebha tuża għad-determinazzjoni tal-valur normali, bit-Turkija bħala l-pajjiż rappreżentattiv permezz tat-tieni nota (“it-Tieni Nota”). Hija informat ukoll lill-partijiet interessati li kienet se tistabbilixxi l-kostijiet tal-bejgħ, ġenerali u amministrattivi (“SG&A”, Selling, General and Administrative) u l-profitt abbażi tal-informazzjoni disponibbli għall-kumpanija azzjonarja Şişe Ve Cam Fabrikalari A.Ş, produttur fil-pajjiż rappreżentattiv.

(61)

Il-Kummissjoni rċeviet kummenti dwar it-Tieni Nota minn Jushi Group, parti mis-CNBM Group, Glass Fibre Europe, Jiangsu Changhai u utent wieħed, PROXIM. Dawn il-kummenti ġew indirizzati taħt l-intestatura rispettiva fit-Taqsima 4.2.2 hawn taħt.

(62)

Wara li analizzat il-kummenti u l-informazzjoni li rċeviet sal-iskadenzi, il-Kummissjoni kkonkludiet li t-Turkija kienet pajjiż rappreżentattiv xieraq li minnu jinkisbu prezzijiet u kostijiet mingħajr distorsjoni għad-determinazzjoni tal-valur normali, bl-eċċezzjoni tal-pirofillit. Ir-raġunijiet sottostanti għal dik l-għażla huma deskritti aktar fid-dettall fit-Taqsima 4.2.2 hawn taħt.

(63)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(64)

Madankollu, skont l-Artikolu 2(6a)(a) tar-Regolament bażiku, “(f)il-każ li jiġi determinat … li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni” , u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” ( “kostijiet amministrattivi, tal-bejgħ u ġenerali” minn hawn ’il quddiem “SG&A ” ).

(65)

Kif spjegat aktar fid-dettall hawn taħt, f’din l-investigazzjoni l-Kummissjoni kkonkludiet li, abbażi tal-evidenza disponibbli u fid-dawl tan-nuqqas ta’ kooperazzjoni mill-GTĊ, l-applikazzjoni tal-Artikolu 2(6a) tar-Regolament bażiku kienet xierqa.

(66)

F’investigazzjonijiet reċenti dwar is-settur tal-fibra tal-ħġieġ fir-Repubblika tal-Poplu taċ-Ċina (“RPĊ”) (35), il-Kummissjoni sabet li kienu preżenti distorsjonijiet sinifikanti fis-sens tal-Artikolu 2(6a)(b) tar-Regolament bażiku.

(67)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (36). B’mod partikolari, il-Kummissjoni kkonkludiet li fis-settur tal-fibra tal-ħġieġ mhux biss għad hemm grad sostanzjali ta’ sjieda mill-Gvern taċ-Ċina (“GTĊ”) fis-sens tal-Artikolu 2(6a)(b), l-ewwel inċiż, tar-Regolament bażiku (37), iżda l-GTĊ huwa wkoll f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż tar-Regolament bażiku (38). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett ta’ distorsjoni addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (39). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tal-Artikolu 2(6a)(b), ir-raba’ inċiż, tar-Regolament bażiku, u b’hekk jiġġeneraw distorsjonijiet, b’mod partikolari meta ditti insolventi jinżammu għaddejjin u meta jiġu allokati drittijiet għall-użu tal-art fir-RPĊ (40). Bl-istess mod, il-Kummissjoni sabet distorsjonijiet tal-kostijiet tal-pagi fis-settur kimiku fis-sens tal-Artikolu 2(6a)(b), il-ħames inċiż, tar-Regolament bażiku (41), kif ukoll distorsjonijiet fis-swieq finanzjarji fis-sens tal-Artikolu 2(6a)(b), is-sitt inċiż, tar-Regolament bażiku, b’mod partikolari fir-rigward tal-aċċess għall-kapital mill-atturi korporattivi fir-RPĊ (42).

(68)

Bħal fl-investigazzjonijiet preċedenti tagħha dwar is-settur tal-fibra tal-ħġieġ fir-RPĊ, f’din l-investigazzjoni l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-Artikolu 2(6a), il-punt (b), tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fit-talba, u fid-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-Finijiet tal-Investigazzjonijiet għad-Difiża tal-Kummerċ (43) (“ir-Rapport”), li jibbaża fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti inkluż il-prodott taħt investigazzjoni. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti biex tikkonferma l-eżistenza ta’ distorsjonijiet sinifikanti fir-RPĊ, kif misjub ukoll mill-investigazzjonijiet preċedenti tagħha f’dan ir-rigward.

(69)

L-applikant allega li jeżistu distorsjonijiet sinifikanti fis-settur Ċiniż tat-Tisħiħ bil-Fibra tal-Ħġieġ. Huwa rrefera għar-Rapport u b’mod partikolari għall-fatt li s-sistema ekonomika tar-RPĊ hija “ekonomija tas-suq soċjalista” u r-rwol attiv tal-Partit Komunista Ċiniż (“CCP”, Chinese Communist Party) kemm fis-settur pubbliku kif ukoll f’dak privat fir-RPĊ.

(70)

B’mod aktar speċifiku, it-talba indikat li:

(71)

Bħala konklużjoni, it-talba ħadet il-pożizzjoni li l-prezzijiet jew il-kostijiet, inklużi l-kostijiet tal-materja prima, tal-enerġija u tal-manodopera mhumiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku. Abbażi ta’ dan, skont it-talba għal rieżami, f’dan il-każ mhuwiex xieraq li jintużaw prezzijiet u kostijiet domestiċi biex jiġi stabbilit il-valur normali.

(72)

Il-GTĊ la kkummenta u lanqas ma pprovda evidenza li tappoġġa jew li tirribatti l-evidenza eżistenti dwar il-fajl tal-każ u dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni. Il-Kummissjoni eżaminat jekk kienx xieraq li jintużaw prezzijiet u kostijiet domestiċi fiċ-Ċina, minħabba l-eżistenza ta’ distorsjonijiet sinifikanti fis-sens tal-Artikolu 2(6a), il-punt (b) tar-Regolament bażiku. Dik l-analiżi kopriet l-eżami tal-interventi sostanzjali tal-gvern fl-ekonomija taċ-Ċina b’mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott ikkonċernat.

(73)

Fis-settur tal-fibra tal-ħġieġ, għad hemm grad sostanzjali ta’ sjieda u kontroll mill-GTĊ fis-sens tal-Artikolu 2(6a)(b), l-ewwel inċiż, tar-Regolament bażiku. L-investigazzjoni kkonfermat li l-akbar tliet produtturi fis-settur tal-GFR, jiġifieri Jushi (50), Taishan Glassfiber (51) u CPIC (52), huma kompletament proprjetà tal-Istat jew inkella l-Istat għandu sehem ta’ kontroll fihom. Dawn it-tliet produtturi jirrappreżentaw madwar 70 % tal-kapaċità tal-produzzjoni tal-fibra tal-ħġieġ Ċiniża (53).

(74)

Barra minn hekk, l-interventi tas-CCP fit-teħid ta’ deċiżjonijiet operazzjonali saru n-norma, mhux biss fl-SOEs iżda wkoll f’kumpaniji privati (54), bis-CCP jasserixxi tmexxija fuq prattikament kull aspett tal-ekonomija tal-pajjiż. Tabilħaqq, l-influwenza tal-Istat permezz tal-istrutturi tas-CCP fil-kumpaniji tirriżulta effettivament f’sitwazzjoni fejn l-operaturi ekonomiċi jkunu taħt il-kontroll u s-superviżjoni tal-politiki tal-gvern, fid-dawl ta’ kemm l-istrutturi tal-Istat u tal-Partit kibru flimkien fiċ-Ċina.

(75)

L-investigazzjoni sabet li l-assoċjazzjoni nazzjonali tal-industrija li tkopri s-settur tal-fibra tal-ħġieġ hija l-Assoċjazzjoni tal-Industrija tal-Ħġieġ tal-Fibra taċ-Ċina ( “CFGIA” , China Fiber Glass Industry) (55). Is-CFGIA “taderixxi mat-tmexxija ġenerali tas-CCP, […] twettaq attivitajiet tal-Partit, u tipprovdi l-kundizzjonijiet neċessarji għall-attivitajiet tal-organizzazzjonijiet tal-Partit” (56). Barra minn hekk, “l-awtorità ta’ reġistrazzjoni u ġestjoni tal-Assoċjazzjoni hija l-Ministeru għall-Affarijiet Ċivili”  (57) u l-kundizzjonijiet biex wieħed ikun eliġibbli bħala rappreżentant tas-CFGIA jinkludu “l-adeżjoni mat-tmexxija tas-CCP, l-appoġġ tas-soċjaliżmu b’karatteristiċi Ċiniżi, l-implimentazzjoni b’mod determinat tal-linja, il-prinċipji u l-politiki tal-Partit, u l-pussess ta’ kwalitajiet politiċi tajbin”  (58).

(76)

Jushi, Taishan Glassfiber u CPIC huma membri tas-CFGIA (59).

(77)

Kemm l-intrapriżi pubbliċi kif ukoll dawk privati fis-settur tal-fibra tal-ħġieġ huma soġġetti għal superviżjoni u gwida politika. L-aħħar dokumenti ta’ politika Ċiniżi li jikkonċernaw is-settur tal-fibra tal-ħġieġ jikkonfermaw l-importanza kontinwa li l-GTĊ jattribwixxi lis-settur, inkluża l-intenzjoni li jintervjeni fis-settur biex jifformah f’konformità mal-politiki tal-gvern. Dan huwa muri mill-14-il FYP (Five-Year Plan) dwar l-Iżvilupp tal-Industrija tal-Materja Prima (60) li jelenka s-settur, b’mod partikolari l-fibri tal-ħġieġ għal skopijiet speċjali, fost il-materjali li għalihom l-innovazzjoni teknoloġika se tkun appoġġata minn politiki skont il-Pjan. Il-fibri tal-ħġieġ huma elenkati wkoll fost is-setturi mħeġġa taħt l-edizzjoni tal-2024 tal-Katalgu ta’ Gwida għall-Aġġustament Strutturali tal-Industrija (61), kif ukoll fil-Katalgu ta’ Gwida tal-Materjali Ġodda Ewlenin tal-2024 eliġibbli għall-iskemi tal-ewwel użu/dimostrazzjoni (62).

(78)

Eżempji simili tal-intenzjoni tal-awtoritajiet Ċiniżi li jwettqu superviżjoni u jiggwidaw l-iżviluppi tas-settur jistgħu jiġu osservati fil-livell provinċjali, bħal f’Shandong li, fir-rigward speċifiku tal-industrija tal-fibra tal-ħġieġ u tal-materjal kompożitu qiegħda tippjana li “trawwem b’mod attiv lill-intrapriżi ewlenin u prinċipali b’influwenza qawwija fuq il-marka u attrattività ta’ kummerċjalizzazzjoni, kapaċitajiet ta’ integrazzjoni b’saħħithom u effetti ta’ xprunar fuq il-ktajjen u r-raggruppamenti tal-industrija, u tappoġġa l-fużjonijiet u r-riorganizzazzjoni tal-intrapriżi transsettorjali, transreġjonali u bejn sjieda u oħra” u li “tiżviluppa fibri u prodotti tal-ħġieġ ta’ prestazzjoni għolja [u li] tħeġġeġ l-iżvilupp ta’ prodotti ultrafini, b’saħħa għolja, b’modulus għoli, reżistenti għall-alkali, b’livell baxx ta’ dielettriku, b’espansjoni baxxa, b’silika għolja, degradabbli, wiċċ trażversali b’forma speċjali u prodotti oħra tal-fibra tal-ħġieġ bi prestazzjoni għolja. L-enfasi fuq il-ħtiġijiet tal-informazzjoni elettronika, l-ajruspazju, l-enerġija l-ġdida, il-farms tal-bhejjem fuq skala kbira, is-serer agrikoli u oqsma oħra, ir-riċerka u l-iżvilupp u l-promozzjoni ta’ prodotti kompożiti termoplastiċi u li jibbiesu bis-sħana msaħħa bil-fibra tal-ħġieġ, u l-ispralli kompożiti tal-fibra tal-ħġieġ għal proġetti infrastrutturali” (63).

(79)

Bl-istess mod, il-Muniċipalità ta’ Chongqing, fejn tinsab is-CPIC, ippubblikat l-14-il FYP tagħha dwar l-Iżvilupp tal-Industriji Strateġiċi u Emerġenti (64) li jipprevedi “l-espansjoni tal-iskala tal-industrija tal-fibra u tal-materjali kompożitu ta’ prestazzjoni għolja” kif ukoll “l-aċċellerazzjoni tal-kostruzzjoni ta’ proġetti bħal-[…] linja ta’ produzzjoni tal-fibra tal-ħġieġ ta’ prestazzjoni għolja b’output annwali ta’ 150 000 tunnellata, u tal-bażi tal-produzzjoni ta’ fibra tal-ħġieġ u tal-materjali kompożiti ultrafini, sabiex tiżdied il-kapaċità tal-produzzjoni tal-fibra tal-ħġieġ u tal-materjali kompożiti ta’ prestazzjoni għolja”.

(80)

Barra minn hekk, l-enfasi fuq il-fibri tal-ħġieġ tista’ tidher fid-dokumenti tal-ippjanar anke fi provinċji oħra, bħal Guangxi (65), Hubei (66) jew Zhejiang (67).

(81)

Fir-rigward tal-fatt li l-GTĊ huwa f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż, tar-Regolament bażiku, il-Kummissjoni sabet li ħafna produtturi tal-GFR jenfasizzaw b’mod espliċitu l-attivitajiet tal-bini tal-Partit fuq is-siti web tagħhom jew għandhom membri tal-Partit fil-maniġment tal-kumpanija u jissottolinjaw l-affiljazzjoni tagħhom mas-CCP.

(82)

Pereżempju, il-President tal-Bord ta’ Jushi Group iservi fl-istess ħin bħala l-Viċi Segretarju tal-Kumitat tal-Partit (68). Barra minn hekk, Jushi ssemmi fuq is-sit web tagħha li “[m]inħabba t-tmexxija korretta tal-Kumitat tal-Partit tal-Grupp Nazzjonali tal-Materjali tal-Bini taċ-Ċina, […] il-Kumitat tal-Partit Jushi jimplimenta b’mod riżolut id-deċiżjonijiet tal-Kumitat Ċentrali tal-Partit [...] u dejjem jaderixxi mar-rwol ewlieni tal-Kumitat tal-Partit tal-kumpanija fl-istabbiliment tad-direzzjoni, fil-ġestjoni tas-sitwazzjoni ġenerali u fl-iżgurar tal-implimentazzjoni” (69) .

(83)

Barra minn hekk, l-Artikolu 195 tal-Artikoli ta’ Assoċjazzjoni ta’ Jushi jipprevedi b’mod espliċitu superviżjoni diretta tal-Partit fuq l-affarijiet korporattivi essenzjali, li skontu “il-kumitat tal-Partit tal-intrapriża għandu jiddiskuti u jiddeċiedi l-kwistjonijiet ewlenin tal-intrapriża f’konformità mar-regolamenti”, bir-responsabbiltajiet ewlenin tal-kumitat tal-Partit li jinvolvu l-kompiti biex “jiġu studjati u diskussi kwistjonijiet ewlenin tal-maniġment tan-negozju tal-kumpanija, u tiġi appoġġata l-laqgħa tal-azzjonisti, il-bord tad-diretturi, il-bord tas-superviżuri kif ukoll il-maniġment biex jeżerċitaw is-setgħat tagħhom skont il-liġi”, kif ukoll biex “jissaħħu t-tmexxija u l-kontroll fuq l-għażla u ċ-ċessjonarju tal-persunal tal-intrapriża, u jagħmlu xogħol tajjeb fil-bini tat-tim ta’ tmexxija tal-intrapriża, tat-tim cadre u tat-tim tat-talent”  (70).

(84)

Fir-rigward ta’ Taishan Fiberglass, il-President jokkupa wkoll il-pożizzjoni ta’ Segretarju tal-Kumitat tal-Partit (71). Barra minn hekk, il-Maniġer Ġenerali tal-kumpanija jservi wkoll bħala l-Viċi Segretarju tal-Kumitat tal-Partit (72) u jasserixxi li “huwa neċessarju li tkompli tingħata setgħa sħiħa lir-rwol ewlieni tal-bini tal-partit, li tingħaqad il-ħidma tal-membri tal-Partit, tal-cadres u tal-ħaddiema fil-livelli kollha, u li jiġu promossi r-riforma u l-iżvilupp u l-produzzjoni u l-operat tal-kumpanija għal livell ġdid (73).”

(85)

Fil-każ tas-CPIC, il-President tal-Bord tad-Diretturi għandu fl-istess ħin il-pożizzjoni ta’ Segretarju tal-Kumitat tal-Partit (74).

(86)

Barra minn hekk, fis-settur tal-GFR huma stabbiliti politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tal-Artikolu 2(6a)(b), it-tielet inċiż tar-Regolament bażiku. Filwaqt li l-politiki industrijali tipikament huma relatati ma’ diversi setturi aktar milli esklużivament mas-settur tal-GFR, huma soġġetti għal bosta pjanijiet, linji gwida, direttivi u dokumenti oħra ta’ politika maħruġa fil-livell nazzjonali, reġjonali u muniċipali (ara wkoll il-premessi minn (77) sa (80) hawn fuq). Dawk il-politiki xi drabi jmorru kontra l-forzi tas-suq.

(87)

Pereżempju, il-Pjan ta’ Azzjoni ta’ 3 Snin ta’ Guangxi dwar l-Industriji Strateġiċi u Emerġenti jistabbilixxi b’mod amministrattiv il-volumi futuri tal-output fil-mira u r-rati ta’ tkabbir: “sal-2023, il-valur tal-output tal-industrija tal-materjali l-ġodda se jilħaq 133 biljun yuan, u l-valur miżjud se jilħaq 44 biljun yuan” (75).

(88)

Bl-istess mod, il-Pjan ta’ Azzjoni ta’ Chongqing għall-Iżvilupp ta’ Kwalità Għolja tar-Raggruppamenti tal-Industrija tal-Fibra u tal-Materjali Kompożiti (2023-2027) jistabbilixxi wkoll miri kwantitattivi: “sal-2027, l-iskala totali tal-industrija tal-fibra u tal-materjali kompożiti tal-belt se taqbeż RMB 50 biljun, il-produzzjoni u l-bejgħ tal-fibra tal-ħġieġ u tal-materjali kompożiti se jirrappreżentaw aktar minn 20 % tat-total nazzjonali, se jinħolqu sa żewġ kumpaniji u marki tal-fibra u tal-materjali kompożiti ta’ klassi dinjija, se jiġu introdotti għadd ta’ kumpaniji ta’ kwalità għolja, il-livell ta’ modernizzazzjoni tal-katina industrijali u tal-katina tal-provvista se jittejjeb b’mod sinifikanti, il-kapaċità tal-innovazzjoni u l-kwalità u l-effiċjenza se jittejbu b’mod sinifikanti, il-kostruzzjoni ta’ bażi nazzjonali importanti tal-industrija tal-fibra tal-ħġieġ u tal-materjali kompożiti se tiġi aċċellerata, u se jinħoloq raggruppament tal-industrija tal-fibra u tal-materjali kompożiti b’influwenza internazzjonali (76).” Sabiex tagħmel dan, il-Muniċipalità ta’ Chongqing tfittex li “taċċellera l-kostruzzjoni ta’ bażi nazzjonali importanti tal-industrija tal-fibra tal-ħġieġ u tal-materjali kompożiti u toħloq raggruppament tal-industrija tal-fibra u tal-materjali kompożiti b’influwenza internazzjonali (77) ”.

(89)

Fil-qosor, il-GTĊ għandu miżuri stabbiliti biex iħeġġeġ lill-operaturi jikkonformaw mal-objettivi tal-ordni pubbliku li jingħata appoġġ lill-industriji mħeġġa, inkluża l-produzzjoni tal-GFR. Tali miżuri jimpedixxu l-forzi tas-suq milli joperaw b’mod ħieles.

(90)

L-investigazzjoni preżenti ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u l-proprjetà fis-settur kimiku, skont l-Artikolu 2(6a)(b), ir-raba’ inċiż tar-Regolament bażiku, ma jaffettwax lill-manifatturi tal-prodott taħt investigazzjoni.

(91)

Barra minn hekk, il-prodott taħt investigazzjoni huwa affettwat ukoll mid-distorsjonijiet tal-kostijiet tal-pagi fis-sens tal-Artikolu 2(6a)(b), il-ħames inċiż, tar-Regolament bażiku, kif imsemmi hawn fuq fil-premessa (67). Dawk id-distorsjonijiet jaffettwaw is-settur kemm direttament (meta jipproduċi l-prodott taħt investigazzjoni jew l-inputs prinċipali), kif ukoll indirettament (meta jkollu aċċess għal inputs minn kumpaniji soġġetti għall-istess sistema tal-manodopera fir-RPĊ) (78).

(92)

Barra minn hekk, ma ġiet sottomessa l-ebda evidenza f’din l-investigazzjoni li turi li s-settur tal-GFR mhuwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż tar-Regolament bażiku. L-Opinjoni Gwida msemmija hawn fuq li tirrikjedi li “jittejbu l-politiki ta’ appoġġ, tissaħħaħ il-koordinazzjoni bejn il-politiki fiskali, finanzjarji, reġjonali, ta’ investiment, ta’ importazzjoni u ta’ esportazzjoni (...) mal-politiki tal-industrija [biex] tiġi żviluppata b’mod sħiħ il-pjattaforma ta’ kooperazzjoni nazzjonali bejn l-industrija u l-finanzi u [biex] titrawwem ir-rabta bejn l-intrapriżi u l-banek (79)” turi wkoll b’mod tajjeb ħafna dan it-tip ta’ intervent tal-gvern. Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(93)

Fl-aħħar nett, il-Kummissjoni tfakkar li sabiex il-prodott taħt investigazzjoni jiġi mmanifatturat, huma meħtieġa għadd ta’ inputs. Meta l-produtturi tal-prodott taħt investigazzjoni jixtru/jikkuntrattaw dawn l-inputs, il-prezzijiet li jħallsu (u li huma rreġistrati bħala l-kostijiet tagħhom) huma esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Huma jistgħu jissellfu flus li huma soġġetti għad-distorsjonijiet fis-settur finanzjarju/fl-allokazzjoni tal-kapital. Barra minn hekk, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(94)

B’konsegwenza ta’ dan, mhux biss il-prezzijiet tal-bejgħ domestiku tal-prodott taħt investigazzjoni mhumiex xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma affettwati wkoll minħabba li l-formazzjoni tal-prezzijiet tagħhom hija affettwata minn intervent sostanzjali tal-gvern, kif deskritt fil-Partijiet I u II tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu ġie mmanifatturat fir-RPĊ permezz tal-kombinament ta’ firxa ta’ fatturi tal-produzzjoni jiġi espost għal distorsjonijiet sinifikanti. L-istess japplika għall-input tal-input u l-bqija.

(95)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt investigazzjoni, inklużi l-kostijiet tal-materja prima, tal-art, tal-enerġija u tal-manodopera, mhumiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku, kif muri mill-impatt reali jew potenzjali ta’ wieħed jew aktar mill-elementi rilevanti elenkati fih.

(96)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(97)

Kif spjegat fil-premessi (59) u (60), il-Kummissjoni ħarġet żewġ noti għall-fajl dwar is-sorsi għad-determinazzjoni tal-valur normali: l-Ewwel Nota dwar il-fatturi tal-produzzjoni tat-23 ta’ Jannar 2025 u t-Tieni Nota dwar il-fatturi tal-produzzjoni tal-10 ta’ Lulju 2025.

(98)

Dawn in-noti ddeskrivew il-fatti u l-evidenza li fuqhom huma bbażati l-kriterji rilevanti, u indirizzaw ukoll il-kummenti li rċevew il-partijiet dwar dawk l-elementi u dwar is-sorsi rilevanti.

(99)

Fit-Tieni Nota, il-Kummissjoni informat lill-partijiet interessati bl-intenzjoni tagħha li tqis lit-Turkija bħala pajjiż rappreżentattiv xieraq f’dan il-każ, jekk l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku tiġi kkonfermata.

(100)

Fl-Ewwel Nota, il-Kummissjoni identifikat lill-Brażil, lill-Messiku, lit-Tajlandja, u lit-Turkija bħala pajjiżi b’livell simili ta’ żvilupp ekonomiku bħar-RPĊ skont il-Bank Dinji, jiġifieri kollha huma kklassifikati mill-Bank Dinji bħala pajjiżi “b’introjtu medju superjuri” abbażi tal-introjtu nazzjonali gross fejn il-produzzjoni tal-prodott taħt investigazzjoni kienet magħrufa li sseħħ.

(101)

Wara l-Ewwel Nota, Jushi Group u Jiangsu Changhai sostnew li t-Turkija ma tkunx pajjiż terz xieraq biex jinħadem il-valur normali, minħabba r-rata għolja ta’ inflazzjoni, id-deprezzament tal-munita u l-ambjent regolatorju instabbli tagħha.

(102)

Il-Kummissjoni ċaħdet l-asserzjonijiet ibbażati fuq il-fatt li l-partijiet li ssottomettew ma wrewx kif id-deprezzament tal-Lira Torka u l-inflazzjoni għolja setgħu fil-fatt jaffettwaw il-prezzijiet tal-inputs akkwistati fit-Turkija, u jekk iva, x’kien ikun l-impatt reali fuq il-valur normali, li huwa kkalkolat f’CNY (Chinese Yuan).

(103)

Fil-kummenti tagħha dwar l-Ewwel Nota, Jiangsu Changhai sostniet li l-Malażja – pajjiż mhux identifikat fl-Ewwel Nota – jenħtieġ li titqies bħala pajjiż rappreżentattiv, peress li kienet disponibbli data finanzjarja għall-produttur tal-ħġieġ Xinyi Energy Smart (M) Sdn Bhd (81). L-għażla tal-Malażja ntlaqgħet ukoll minn Jushi Group, minħabba l-preżenza fil-pajjiż ta’ produttur ieħor tal-prodott ikkonċernat permezz tal-kumpanija Nippon Electric Glass (Malaysia) Sdn Bhd.

(104)

Il-Kummissjoni ċaħdet lill-Malażja bħala pajjiż rappreżentattiv possibbli. Xinyi Energy Smart (M) Sdn Bhd. hija sussidjarja ta’ manifattur ewlieni tal-ħġieġ Ċiniż (Xinyi Glass Holdings Ltd). L-evidenza pprovduta min Jushi Group kienet tikkonċerna informazzjoni biss fil-livell tal-kontijiet konsolidati għall-grupp Ġappuniż. Fi kwalunkwe każ, il-livell tal-importazzjonijiet fil-Malażja miċ-Ċina għall-materja prima ewlenija kien ivarja minn 40 % sa 79 %.

(105)

Wara t-Tieni Nota, PROXIM issottometta li t-Turkija ma kinitx pajjiż rappreżentattiv xieraq, minħabba l-istruttura tal-produzzjoni tal-GFR ta’ Şişecam Elyaf Sanayii A.Ş., kif ukoll l-iskala ta’ produzzjoni. Il-kumpanija sostniet ukoll li l-importazzjonijiet fit-Turkija mir-Russja u mill-Belarussja affettwaw il-kundizzjonijiet tas-suq tal-fatturi tal-produzzjoni, flimkien mal-inflazzjoni għolja tal-pajjiż, l-istatistika tax-xogħol skaduta u d-data mhux trasparenti dwar il-konsum tal-utilitajiet industrijali. Fid-dawl ta’ dan, il-kumpanija żiedet tgħid li t-Tajlandja jew il-Malażja tkun pajjiż rappreżentattiv alternattiv aktar xieraq.

(106)

Il-Kummissjoni enfasizzat li l-kummenti ta’ PROXIM kienu ġenerali u mhux sostanzjati. Fi kwalunkwe każ, l-istess kummenti dwar l-importazzjonijiet mir-Russja u mill-Belarussja (il-premessa (116)), dwar l-inflazzjoni (il-premessa (102)), l-istatistika dwar ix-xogħol (il-premessa (111)), u t-Tajlandja u l-Malażja bħala pajjiżi rappreżentattivi possibbli (il-premessi (104), (116) u (119)) diġà ġew indirizzati mill-Kummissjoni fit-tweġibiet tagħhom għall-kummenti ta’ partijiet oħra. Fir-rigward tal-asserzjoni li tikkonċerna data mhux trasparenti dwar l-utilitajiet industrijali, il-Kummissjoni għamlet disponibbli għall-partijiet kollha s-sorsi u l-metodoloġija użati għall-utilitajiet ikkalkolati. Għalhekk, dawn l-asserzjonijiet ġew miċħuda.

(107)

Għall-pajjiżi kkunsidrati u msemmija hawn fuq fil-premessa (100), il-Kummissjoni vverifikat ukoll id-data faċilment disponibbli, inkluża d-data dwar l-importazzjonijiet tal-fatturi tal-produzzjoni kif ukoll tad-data finanzjarja mill-manifatturi tal-prodott taħt investigazzjoni f’dawn il-pajjiżi rappreżentattivi potenzjali.

(108)

Fir-rigward tal-Ewwel Nota, Glass Fibre Europe sostniet li l-Kummissjoni kien jenħtieġ li tinkludi l-ispare parts fil-lista ta’ fatturi tal-produzzjoni. Il-Kummissjoni ċaħdet din l-asserzjoni, minħabba li kienet ġenerali u mhux sostanzjata. L-istess asserzjoni ġiet imtennija b’reazzjoni għat-Tieni Nota, mingħajr ma żdiedet l-ebda biċċa informazzjoni ġdida u għalhekk ġiet miċħuda.

(109)

Wara d-divulgazzjoni, GFE (Glass Fibre Europe) tenniet li kien jenħtieġ li l-ispare parts jiġu inklużi fil-fatturi tal-produzzjoni, peress li huma parti mill-kostijiet diretti tal-produzzjoni u jammontaw bejn 1-5 % tal-kostijiet tal-manifattura. Il-Kummissjoni enfasizzat li l-ispare parts ġew inklużi fl-ispejjeż ġenerali tal-manifattura fil-kostruzzjoni tal-valur normali. Għalhekk, l-asserzjoni ġiet miċħuda.

(110)

Wara l-Ewwel Nota, Jushi Group sostna li t-Turkija tkun pajjiż terz mhux xieraq minħabba data skaduta dwar il-kostijiet għall-kost lavorattiv, bl-argument li l-aġġustament ta’ din id-data bl-użu tal-Indiċi tal-Prezzijiet għall-Konsumatur ma jkunx xieraq peress li l-pagi Torok ma żdidux f’konformità mar-rata tal-inflazzjoni.

(111)

Il-kumpanija asseriet b’mod żbaljat li l-Kummissjoni użat l-Indiċi tal-Prezzijiet għall-Konsumatur li mhuwiex il-każ peress li użat l-Indiċi tal-Input tax-Xogħol, li huwa aktar preċiż. Barra minn hekk, ma nkiseb l-ebda tibdil sostanzjali fir-rata fis-siegħa wara l-aġġustament. Għalhekk, il-Kummissjoni ċaħdet dawn l-asserzjonijiet.

(112)

Fil-kummenti tiegħu għall-Ewwel Nota, Jushi Group żied jgħid li jenħtieġ li d-data dwar l-SG&A u d-data dwar il-profitt ta’ Türkiye Şişe Ve Cam Fabrikalari A.Ş ma jitqisux bħala sorsi xierqa fil-livell konsolidat, minħabba li l-produttur reali tal-prodotti tal-fibra tal-ħġieġ huwa s-sussidjarja tiegħu, Şişecam Elyaf Sanayii A.Ş. B’mod partikolari, skont Jaingsu Changhai, l-SG&A u l-profitt ikkalkolati mill-ġdid mill-kumpanija abbażi tad-data tal-2023 u tal-2024 juru li Türkiye Şişe Ve Cam Fabrikalari A.Ş ma kinitx profittabbli matul il-perjodu ta’ investigazzjoni tar-rieżami.

(113)

Il-Kummissjoni ċaħdet l-asserzjoni ta’ Jushi Group abbażi tal-fatt li s-segment tal-ħġieġ industrijali ta’ Türkiye Şişe Ve Cam Fabrikalari A.Ş kien jinkludi lil Şişecam Elyaf kif ukoll prodotti industrijali simili bi strutturi tal-kostijiet komparabbli.

(114)

Fir-rigward tal-asserzjoni sottomessa minn Jiangsu Changhai, il-Kummissjoni enfasizzat li l-metodoloġija użata għall-kalkolu tal-profittabbiltà ta’ Türkiye Şişe Ve Cam Fabrikalari A.Ş ippreżentat limitazzjonijiet sinifikanti fir-rigward tal-konsistenza fil-politiki kontabilistiċi bejn l-2023 u l-2024, u enfasizzat il-fatt li l-metodoloġija proposta ma kinitx tinkludi aġġustamenti finanzjarji ta’ tmiem is-sena bħad-deprezzament, il-provvedimenti, u l-konfigurazzjonijiet tat-taxxa li jistgħu ma jiġux inklużi fir-rapporti ta’ nofs is-sena. Għalhekk, il-Kummissjoni ċaħdet l-asserzjoni ta’ Jiangsu Changhai li Türkiye Şişe Ve Cam Fabrikalari A.Ş ma kinitx profittabbli matul il-perjodu ta’ investigazzjoni tar-rieżami.

(115)

Kemm fil-kummenti dwar l-Ewwel Nota kif ukoll dwar it-Tieni Nota, Jushi Group sostna li t-Tajlandja tkun pajjiż rappreżentattiv aktar xieraq. Il-kumpanija argumentat li hemm produzzjoni tal-prodott taħt investigazzjoni u data dwar il-kostijiet SG&A u l-profitt hija disponibbli għal żewġ produtturi, (82) u la hemm importazzjonijiet tal-FOPs mir-Russja u mill-Belarussja, u lanqas restrizzjonijiet fuq l-esportazzjoni tal-FOPs mit-Tajlandja. Barra minn hekk, it-Tajlandja ma tkunx tirrikjedi aġġustamenti għall-inflazzjoni abbażi tal-indiċi tal-prezzijiet għall-konsumatur.

(116)

Il-Kummissjoni enfasizzat li l-istatistika Tajlandiża dwar l-importazzjoni tal-fibra tal-ħġieġ tibbaża b’mod sinifikanti fuq l-inputs importati miċ-Ċina, speċjalment għall-materja prima ewlenija bħall-kawlina, ir-reżina epossidika, il-pirofillit u l-mineral tal-kriżantemu abjad, li jvarjaw minn 30 % sa 71 %, li jesponihom għal distorsjonijiet fil-kostijiet. Għalhekk, il-Kummissjoni ċaħdet din l-asserzjoni. L-asserzjoni li d-data miż-żewġ produtturi Tajlandiżi kienet aktar xierqa mid-data konsolidata awditjata ta’ Şişecam tqieset bħala mhux sostanzjata mill-Kummissjoni. Fir-rigward tal-asserzjoni dwar l-importazzjonijiet mir-Russja u mill-Belarussja, il-Kummissjoni ma stabbilietx li dawn ħolqu distorsjoni fil-prezzijiet tal-inputs fit-Tajlandja jew fit-Turkija. L-asserzjoni dwar ir-restrizzjonijiet fuq l-esportazzjoni kienet ġenerali u mhux sostanzjata. Għalhekk, il-Kummissjoni ċaħdet l-asserzjonijiet.

(117)

Barra minn hekk, id-data għall-elettriku u għall-gass naturali fit-Turkija kienet tirrifletti ċ-ċifri reali li jikkonċernaw il-perjodu ta’ investigazzjoni tar-rieżami u ma kienet tirrikjedi l-ebda aġġustament. Għalhekk, il-Kummissjoni sabet li l-asserzjoni li d-data Tajlandiża dwar l-utilitajiet hija aktar preċiża mid-data miksuba għat-Turkija ma kinitx ġustifikata.

(118)

Fit-Tieni Nota, Jushi Group ikkontesta li l-esponiment tat-Tajlandja għall-importazzjonijiet miċ-Ċina ma setax ikun kriterju fl-għażla ta’ pajjiż terz rappreżentattiv, li jissuġġerixxi li l-inputs b’perċentwal għoli ta’ importazzjonijiet miċ-Ċina jistgħu jiġu sostitwiti b’data dwar l-importazzjoni mit-Turkija jew minn pajjiżi oħra b’introjtu medju superjuri.

(119)

Jushi Group żied jgħid li l-kumpaniji Tajlandiżi kollha, inklużi dawk privati, huma meħtieġa jissottomettu r-rapporti finanzjarji awditjati tagħhom lill-awtoritajiet Tajlandiżi, li jagħmluhom disponibbli online (83). Jushi Group argumenta li dan, flimkien mal-fatt li ż-żewġ kumpaniji jkopru l-prodott ikkonċernat kollu u l-istess kategorija ġenerali ta’ prodotti (drappijiet biassjali, faxex tal-fibra minsuġin, polpa tat-tajjar u twapet tal-fibra sintetika) għamlu lit-Tajlandja pajjiż rappreżentattiv aktar xieraq meta mqabbel mat-Turkija.

(120)

Il-Kummissjoni tenniet li, l-ewwel nett, it-Tajlandja wriet grad ogħla ta’ dipendenza fuq l-importazzjonijiet miċ-Ċina. Tabilħaqq, fit-Turkija l-aktar erba’ fatturi tal-produzzjoni akkwistati miċ-Ċina, li jammontaw għal aktar minn 40 % tal-volumi totali tal-importazzjonijiet, kienu jirrappreżentaw biss madwar 1 % tal-kost totali tal-produzzjoni. Min-naħa l-oħra, it-Tajlandja akkwistat b’mod sinifikanti aktar materja prima miċ-Ċina, li tammonta wkoll għal aktar minn 40 % tal-volumi totali tal-importazzjonijiet, li rrappreżentaw aktar minn 20 % tal-kost totali tal-produzzjoni. Il-materja prima kollha nnegozjata fi kwantitajiet kbar miċ-Ċina u importata fit-Tajlandja, bl-eċċezzjoni tat-trab tal-manjeżju maħruq ħafif u tal-aġenti ta’ akkoppjament tas-silan, ġiet importata fi kwantitajiet aktar baxxi jew ma ġiet importata xejn fit-Turkija.

(121)

It-tieni, meta wieħed iqabbel id-data tas-suq, iċ-Ċina kienet l-akbar produttur u esportatur tal-fibra tal-ħġieġ madwar id-dinja. It-Turkija (84) rrappreżentat suq akbar tal-esportazzjoni tal-fibra tal-ħġieġ meta mqabbel mat-Tajlandja (85), b’livell ogħla ta’ esportazzjonijiet tal-prodott ikkonċernat. Barra minn hekk, iż-żewġ produtturi Tajlandiżi identifikati minn Jushi Group kellhom kapaċità tal-produzzjoni annwali rrapportata tal-fibra tal-ħġieġ ħafna iżgħar mill-kumpanija Torka. Il-kapaċità tal-produzzjoni annwali ta’ Wanda New Material (Thailand) Co. Ltd u Thai United Glass Fibre Co. Ltd kienet ta’ 20 000 tunnellata (86) u 2 500 tunnellata ta’ fibra tal-ħġieġ, (87) rispettivament. B’kuntrast ma’ dan, fl-2022, il-grupp Şişecam irrapporta kapaċità installata ta’ 70 000 tunnellata ta’ fibra tal-ħġieġ (88). Minħabba d-dipendenza aktar baxxa tat-Turkija fuq iċ-Ċina u suq akbar f’termini ta’ esportazzjonijiet, il-Kummissjoni ċaħdet l-asserzjoni li t-Tajlandja tkun pajjiż aktar rappreżentattiv.

(122)

Wara t-Tieni Nota, Group Jushi sostna li matul l-2024 Şişecam Elyaf Sanayii A.Ş., il-produttur tal-ħġieġ tal-fibra fil-grupp Türkiye Şişe Ve Cam Fabrikalari A.Ş group, ma kienx profittabbli, u argumenta li l-Kummissjoni jenħtieġ li tuża d-data tas-segment li għaliha jappartjeni Şişecam Elyaf Sanayii A.Ş., jiġifieri s-segment industrijali, għall-kalkolu tal-kostijiet SG&A u tal-profitt. Jiangsu Changhai talbet lill-Kummissjoni tuża r-rapporti finanzjarji aġġornati tal-2024, li kienu jinkludu aġġustamenti għall-inflazzjoni kemm għall-2024 kif ukoll għall-2023. Jiangsu Changhai sostniet li, fid-dikjarazzjonijiet konsolidati tal-grupp Şişe Ve Cam Fabrikalari A.Ş, l-ispejjeż amministrattivi u tal-kummerċjalizzazzjoni ġenerali kienu jinkludu l-kostijiet tat-trasport u tal-kummissjonijiet, kif ukoll l-ispejjeż tal-imballaġġ, u għalhekk il-Kummissjoni jenħtieġ li teskludi tali spejjeż mill-kalkolu tal-valur normali.

(123)

Il-Kummissjoni aċċettat l-asserzjoni ta’ Jushi Group u rrevediet il-kalkoli tal-kostijiet SG&A u tal-profitt ibbażati fuq is-segment industrijali minflok il-livell konsolidat. Il-Kummissjoni enfasizzat li l-asserzjoni li għamlet Jiangsu Changhai kienet tikkonċerna aġġustamenti fil-livell tal-grupp konsolidat, u ma kien hemm l-ebda diżaggregazzjoni tal-ispejjeż amministrattivi u tal-kummerċjalizzazzjoni ġenerali disponibbli fil-livell tas-segment tal-ħġieġ industrijali.

(124)

Fil-kummenti dwar l-Ewwel Nota, Jiangsu Changhai enfasizzat li l-kodiċi SA (Sistema Armonizzata) għall-pirofillit kien wiesa’ wisq u kien jinkludi diversi prodotti oħra taħt is-subintestatura 2530 90 mhux relatati mal-produzzjoni tal-GFR. Minħabba d-differenzi konsiderevoli fil-prezzijiet ibbażati fuq il-kontenut tal-aluminju tal-pirofillit, li l-kodiċi SA ma rriflettiex, Jiangsu Changhai pproponiet valur referenzjarju alternattiv ibbażat fuq rapport tas-suq (89) li ddistingwa bejn it-tipi ta’ gradi ta’ priofillit u l-kontenut tal-aluminju.

(125)

L-applikant sostna li, abbażi tal-informazzjoni li tinsab fir-rapport, il-prezzijiet tal-pirofillit b’alumina baxxa offruti mill-kumpanija Indoneżjana PT. Gunung Bale u Kaolin (Malaysia) Sdn ikunu l-aktar valur referenzjarju alternattiv xieraq għall-istabbiliment tal-prezz tal-pirofillit fiċ-Ċina.

(126)

Il-Kummissjoni aċċettat li tirrevedi l-valur referenzjarju tal-pirofillit u użat il-prezzijiet ta’ PT. Gunung Bale bħala valur referenzjarju, minħabba d-dipendenza aktar baxxa tal-Indoneżja fuq l-importazzjonijiet tal-pirofillit miċ-Ċina meta mqabbla mal-Malażja (inqas minn 5 % u madwar 80 %, rispettivament).

(127)

Wara t-Tieni Nota, Jushi Group sostna li l-Kummissjoni kien jenħtieġ li tuża l-prezz medju li bih wieħed mill-fornituri tiegħu xtara pirofillit ta’ grad baxx mingħand PT. Gunung Bale. Inkella, il-Kummissjoni jenħtieġ li ma żżidx il-kost medju tat-trasport mal-valur referenzjarju ta’ CNY 0,60/kg, peress li l-fattura sottomessa bħala evidenza indikat li t-trasport kien diġà inkluż fil-kost.

(128)

Il-Kummissjoni enfasizzat li fattura kummerċjali waħda mhux ivverifikata, flimkien ma’ ċertifikat ta’ awtorizzazzjoni li fih żbalji fl-ortografija tal-isem tal-fornitur tal-input ma kinux jikkostitwixxu informazzjoni li setgħet tippermetti lill-Kummissjoni tasal għal sejba raġonevolment preċiża, u ma ġietx sottomessa informazzjoni verifikabbli li setgħet tippermetti tali sejba. Għalhekk, il-Kummissjoni ddeċidiet li tinjora l-informazzjoni sottomessa minn Jushi Group u ċaħdet l-asserzjoni.

(129)

L-istess asserzjoni reġgħet saret wara d-divulgazzjoni finali, bl-argument li l-fattura sottomessa kopriet il-biċċa l-kbira tal-volum mixtri mingħand PT. GUNUNG BALE matul il-perjodu ta’ investigazzjoni, u li d-data li għaliha kienet tappartjeni l-fattura (jiġifieri l-volumi tax-xiri tal-pirofillit) kienet ġiet ivverifikata mill-Kummissjoni.

(130)

Il-Kummissjoni enfasizzat li l-valutazzjoni mwettqa fil-premessa (128) kienet għadha valida, u li għalkemm il-volumi tax-xiri kienu ġew ivverifikati fil-qafas tad-data dwar il-konsum tal-pirofillit, il-fattura kummerċjali sottomessa ma setgħetx tiġi vverifikata mill-Kummissjoni. Għalhekk, l-asserzjoni ġiet miċħuda.

(131)

Fil-kummenti dwar it-Tieni Nota, Jiangsu Changhai sostniet li l-prezzijiet mit-Turkija tad-dolomit u tal-ossidu tal-kalċju ma kinux rappreżentattivi minħabba l-volumi baxxi ta’ importazzjoni, u li l-prezzijiet fit-Turkija ta’ dawn iż-żewġ materji primi ma kinux jirriflettu t-tip użat fil-produzzjoni tal-GFR. B’appoġġ għall-asserzjoni tagħha, Jiangsu Changhai ssottomettiet żewġ rapporti minn Multimarket Insights (90) li fihom informazzjoni dwar gradi u applikazzjonijiet differenti tad-dolomit u tal-ossidu tal-kalċju.

(132)

Il-Kummissjoni rrifjutat il-valuri referenzjarji proposti dwar id-dolomit u l-ossidu tal-kalċju pprovduti minn Jiangsu Changhai, minħabba li ma kellhiex biżżejjed evidenza verifikabbli biex tistabbilixxi jekk il-valuri referenzjarji proposti kinux sodi u raġonevoli u għalhekk setgħux jitqiesu bħala valur referenzjarju alternattiv xieraq. Barra minn hekk, ir-rapporti sottomessi mill-produttur esportatur ma pprovdewx biżżejjed informazzjoni dwar is-sorsi użati biex jiġu stabbiliti l-firxiet differenti tal-prezzijiet għal tipi differenti ta’ dolomit u ossidu tal-kalċju. Fir-rigward tad-dolomit u tal-ossidu tal-kalċju, il-kumpanija sostniet fil-kummenti tagħha għar-rapporti tat-test tat-Tieni Nota li ma kinux verifikabbli mill-Kummissjoni, u r-rapporti tas-suq sottomessi minn Jiangsu Changhai ma pprovdew l-ebda sors dwar kif ġew ikkalkolati l-valuri għal gradi differenti ta’ dolomit u ossidu tal-kalċju.

(133)

B’kuntrast ma’ dan, il-valuri referenzjarji minn Multimarket Insights għall-pirofillit, (il-premessi (124) - (126)) ġew aċċettati mill-Kummissjoni, peress li l-prezzijiet referenzjarji huma faċilment disponibbli bħala parti mill-fajl tal-każ mhux kunfidenzjali u jista’ jiġi vverifikat matul iż-żjara ta’ verifika mal-produtturi esportaturi liema tip ta’ pirofillit intuża fil-proċess tal-produzzjoni tal-GFR u l-kontenut minerali tiegħu, u li jista’ jiġi aċċertat li l-valur referenzjarju mit-Turkija ma kienx jirrifletti dawn l-ispeċifiċitajiet. Barra minn hekk, il-Kummissjoni rċeviet ukoll kummenti mingħand l-ilmentatur li l-prezzijiet tal-pirofillit li jinsabu fir-rapport kienu raġonevoli u jirriflettu r-realtà tal-gradi differenti ta’ pirofillit użati fil-produzzjoni tal-GFR.

(134)

Wara d-divulgazzjoni finali, Jiangsu Changhai tenniet li l-parametri referenzjarji tal-importazzjoni Torok għad-dolomit u l-ossidu tal-kalċju ma kinux xierqa minħabba l-volumi baxxi ta’ importazzjoni ta’ din il-materja prima fit-Turkija, speċjalment fir-rigward tal-konsum tal-kumpanija ta’ kull waħda minn dawn iż-żewġ materji prima. F’dan ir-rigward, Jiangsu Changhai stiednet lill-Kummissjoni tirrieżamina d-data tal-industrija tal-Unjoni għal dawn iż-żewġ materji prima u tqabbel il-kostijiet tagħhom mal-parametru referenzjarju Tork. Alternattivament, il-Kummissjoni jenħtieġ li tittratta dawn iż-żewġ materji prima bħala oġġetti konsumabbli.

(135)

Il-Kummissjoni sabet li l-argument ta’ Jiangsu Changhai ma kienx sostanzjat u ma kienx ġustifikat. L-ewwel nett, Jiangsu Changhai naqset milli tistabbilixxi xi korrelazzjoni bejn il-kwantitajiet tal-importazzjoni u l-ipprezzar fis-sens li l-volum ta’ dawk l-importazzjonijiet jagħmel il-prezzijiet fihom infushom inadegwati sabiex jinstab prezz mingħajr distorsjoni. It-tieni nett, is-suġġeriment li kwantitajiet ta’ importazzjoni aktar baxxi neċessarjament jirriżultaw fi prezzijiet atipiċi jinjora r-realtajiet ekonomiċi ta’ kif jiġu stabbiliti l-prezzijiet. Il-produtturi esportaturi jistabbilixxu prezzijiet ibbażati fuq għadd kbir ta’ fatturi, aktar milli jiddependu fuq il-volumi globali tal-importazzjoni ta’ kwalunkwe pajjiż wieħed. Għalhekk, anki jekk il-kwantitajiet tal-importazzjoni huma baxxi, dan ma jfissirx b’mod inerenti li l-prezzijiet huma żbilanċjati jew mhux rappreżentattivi, jew li mhumiex prezzijiet tas-suq. Barra minn hekk, il-kumment ta’ Jiangsu Changhai jirrappreżenta ħażin il-prattika preċedenti tal-Kummissjoni li fi kwalunkwe każ mhijiex vinkolanti peress li kull każ jiġi vvalutat fuq il-merti tiegħu stess. Ir-referenza tagħha għal investigazzjoni preċedenti waħda (91) mhijiex kompluta u hija selettiva peress li tonqos milli ssemmi li f’dik l-investigazzjoni l-Kummissjoni warrbet l-użu ta’ ċerti parametri referenzjarji abbażi ta’ kunsiderazzjonijiet oħra għajr il-kwantità waħedha bħan-nomenklatura doganali li ma tippermettix li jiġu identifikati l-importazzjonijiet li jirriflettu l-prezzijiet tal-input attwali użati mill-produtturi esportaturi. Ma saret l-ebda dikjarazzjoni bħal din minn Jiangsu Changhai f’dan ir-rieżami, u lanqas ma ddikjaraw li l-parametri referenzjarji tal-importazzjoni Torok għad-dolomit u l-ossidu tal-kalċju ma kinux rappreżentattivi għal xi raġuni oħra. Għalhekk, dawn l-asserzjonijiet ġew miċħuda.

(136)

Fil-kummenti dwar l-Ewwel Nota, Jiangsu Changhai sostniet li l-materja prima kollha, ħlief il-pirofillit, kien jenħtieġ li tiġi kkategorizzata bħala materjali konsumabbli minħabba l-impatt baxx tagħha fuq il-kost tal-manifattura.

(137)

Il-Kummissjoni ċaħdet l-asserzjoni, abbażi tal-fatt li l-materja prima li jifdal kienet tammonta b’mod kumulattiv għal [20-30] % tal-kost tal-manifattura, u li l-valuri referenzjarji għal dik il-materja prima kienu disponibbli.

(138)

Wara t-Tieni Nota, Jiangsu Changhai sostniet li l-ossidu tal-kalċju, id-dolomit u l-materjali tal-ippakkjar jenħtieġ li jiġu ttrattati bħala materjali konsumabbli minħabba l-impatt baxx tagħhom fuq il-kost tal-produzzjoni, bl-argument li f’investigazzjonijiet preċedenti, (92) il-Kummissjoni kklassifikat il-materjali, inklużi l-materjali tal-imballaġġ, taħt materjali konsumabbli meta l-kost aggregat tagħhom kien jammonta għal madwar 4–7 % tal-kost tal-manifattura.

(139)

Il-Kummissjoni enfasizzat li l-ossidu tal-kalċju u d-dolomit flimkien diġà jikkostitwixxu aktar minn 4 % tal-kost tal-manifattura, u l-materjali tal-imballaġġ waħedhom kważi 7 % tal-kost tal-produzzjoni. Fl-investigazzjonijiet preċedenti, il-fatturi tal-produzzjoni li ġew raggruppati taħt materjali konsumabbli kellhom piż negliġibbli fil-kost totali tal-produzzjoni, u ma kienx possibbli li jinstabu valuri referenzjarji preċiżi għalihom, għall-kuntrarju ta’ din l-investigazzjoni. Minħabba l-impatt tal-fatturi tal-produzzjoni enfasizzati minn Jiangsu Changhai, u l-fatt li l-valuri referenzjarji għal dawk il-fatturi tal-produzzjoni jistgħu jintużaw biex jiġi stabbilit il-valur normali, il-Kummissjoni ċaħdet l-asserzjonijiet tagħhom.

(140)

Wara d-divulgazzjoni finali, Jiangsu Changhai tenniet li kien jenħtieġ li xi materja prima tiġi raggruppata taħt oġġetti konsumabbli, filwaqt li pproponiet li, għall-materja prima miksuba internazzjonalment jew permezz ta’ fornituri relatati inklużi taħt oġġetti konsumabbli, il-Kummissjoni tinkludi wkoll dawk li jinkisbu domestikament. Il-kumpanija żiedet ukoll li l-materjali kollha tal-imballaġġ jiġu raggruppati taħt oġġetti konsumabbli.

(141)

Il-Kummissjoni tenniet il-pożizzjoni tagħha li l-materjali tal-imballaġġ waħedhom huma kważi 7 % tal-kost tal-produzzjoni, mingħajr ma qieset il-materjali li diġà ġew inklużi taħt oġġetti konsumabbli. Minħabba l-eżistenza ta’ parametri referenzjarji raġonevoli għal dawn il-fatturi ta’ produzzjoni, l-asserzjoni ġiet miċħuda.

(142)

Jiangsu Changhai żiedet li, peress li l-kalkolu tal-valur normali jinkorpora l-kost tal-imballaġġ, biex jiġi żgurat tqabbil ġust f’konformità mal-Artikolu 2(10) tar-Regolament bażiku, il-Kummissjoni jenħtieġ li ma tnaqqasx il-konċessjonijiet għall-imballaġġ mill-prezz tal-esportazzjoni.

(143)

Il-Kummissjoni aċċettat din l-asserzjoni u rrevediet il-kalkoli għall-marġni ta’ Jushi Group.

(144)

Wara d-divulgazzjoni, Jushi Group enfasizza xi żbalji klerikali fil-kalkolu tal-ispejjeż tal-merkanzija u l-immaniġġar, it-tagħbija u l-ispejjeż anċillari fil-bini fil-pajjiż esportatur fil-kalkolu tal-marġni tad-dumping aggregat.

(145)

Il-Kummissjoni aċċettat l-asserzjoni u rrevediet il-kalkoli tal-marġni tad-dumping ta’ Jushi Group kif xieraq.

(146)

Wara t-Tieni Nota, Jushi Group issottometta diversi kummenti dwar fatturi speċifiċi tal-produzzjoni u valuri referenzjarji alternattivi li jistgħu jintużaw. L-ewwel nett, il-kumpanija sostniet li l-Kummissjoni kien jenħtieġ li toħroġ id-data dwar l-importazzjoni tat-trab tal-ġebla tal-franka fil-livell ta’ 6 ċifri mill-bażi ta’ data COMTRADE tan-NU, minflok b’4 ċifri, u talbet lill-Kummissjoni tuża l-prezz unitarju kkalkolat mill-kumpanija ta’ 2,01 CNY/kg minflok 2,5 CNY/kg.

(147)

Il-Kummissjoni enfasizzat li l-estrazzjoni pprovduta mill-kumpanija mill-bażi ta’ data COMTRADE tan-NU kienet tinkludi data li tkopri Awwissu 2024, perjodu barra mill-perjodu ta’ investigazzjoni tar-rieżami, u eskludiet kwalunkwe data għal Awwissu 2023. L-estrazzjoni fil-livell ta’ 6 ċifri li tkopri l-perjodu ta’ investigazzjoni tar-rieżami kkonfermat li l-valur referenzjarju korrett huwa ta’ 2,5 CNY/kg.

(148)

It-tieni, il-kumpanija sostniet li xi kodiċijiet speċifiċi mill-Atlas tal-Kummerċ Globali (GTA, Global Trade Atlas) għall-kawlina jenħtieġ li jintużaw għal entitajiet differenti, biex jirriflettu l-proċessi ta’ produzzjoni speċifiċi tal-kumpaniji differenti, li kienu jinvolvu tipi differenti ta’ kawlina, jew fil-forma ta’ trab tagħha jew fil-forma ta’ mineral tagħha.

(149)

Il-Kummissjoni aċċettat din l-asserzjoni u rrevediet il-kalkoli għal Jushi Group kif xieraq.

(150)

It-tielet, Jushi Group sostna li l-Kummissjoni kien jenħtieġ li tuża l-kodiċi tal-GTA 251990300019-Manjeżja Maħruqa Għalkollox Oħra (Sinterizzata), peress li kien l-uniku kodiċi rilevanti għall-proċess tal-produzzjoni tiegħu.

(151)

Il-Kummissjoni enfasizzat li t-talba ta’ Jushi Group kienet ġenerali u mhux sostanzjata, peress li ma pprovdiet l-ebda informazzjoni speċifika dwar liema tipi oħra ta’ manjeżja maħruqa ġew inklużi fil-kodiċi tal-GTA, u kif dan il-kodiċi kien aktar rilevanti fil-proċess tal-produzzjoni tiegħu vis-à-vis kodiċijiet oħra. Għalhekk, il-Kummissjoni ċaħdet din l-asserzjoni.

(152)

Ir-raba’, għat-trab tal-wollastonit, Jushi Group sostna li d-data dwar l-importazzjoni bbażata fuq il-kodiċi SA 2530 90 kienet wiesgħa wisq u ppropona li t-trab tal-pirofillit jintuża bħala valur referenzjarju u li jiżdied billi jiġu riflessi d-differenzjali tal-kostijiet li Jushi jġarrab għat-trab tal-wollastonit meta mqabbel mal-pirofillit. Jushi Group żied jgħid li l-istess metodoloġija tista’ tiġi applikata għal fatturi oħra tal-produzzjoni raggruppati taħt il-kodiċi HS 2530 90 .

(153)

Il-Kummissjoni enfasizzat li din il-metodoloġija ma kellha l-ebda ġustifikazzjoni fattwali għar-raġunijiet għaliex il-Kummissjoni jenħtieġ li tuża l-pirofillit bħala valur referenzjarju għall-wollastonit u għal materja prima oħra, u għaliex din tkun l-aktar metodoloġija preċiża. Għalhekk, il-Kummissjoni ċaħdet din l-asserzjoni.

(154)

Fl-aħħar nett, Jushi Group talab lill-Kummissjoni ma tinkludix l-iskart tal-fibra taħt materjali konsumabbli, minħabba li dan il-fattur tal-produzzjoni ġie rrapportat fil-kost tiegħu tat-tabelli tal-manifattura b’valur referenzjarju disponibbli, u li l-kumpanija pprovdiet ukoll informazzjoni dwar il-valur tal-bejgħ mill-ġdid tagħhom.

(155)

L-asserzjoni ġiet miċħuda minħabba li l-iskart tal-fibra kellu impatt negliġibbli fuq il-kost tal-produzzjoni. Barra minn hekk, meta mqabbla mal-valur medju tal-kumpanija għall-prodotti sekondarji, il-kodiċijiet tal-GTA ssuġġeriti minn Jushi Group bħala valur referenzjarju ma setgħux jirriflettu b’mod raġonevoli t-tip ta’ fibri ġġenerati mill-proċess tal-produzzjoni ta’ Jushi Group.

(156)

Wara d-divulgazzjoni, Jushi Group issottometta kummenti li jkopru l-manjeżju maħruq ħafif, il-wollastonit, l-iskart tal-fibra u t-trab tal-ġebla tal-franka.

(157)

Fir-rigward tal-premessi (150) u (151), wara d-divulgazzjoni finali, Jushi Group tenna dawk l-asserzjonijiet, u pprovda evidenza addizzjonali li l-kodiċi HS 2519 90 30 kien dak użat fil-proċess tal-produzzjoni tagħhom. Il-Kummissjoni użat il-prezz medju ponderat tal-parametri referenzjarji tal-kodiċijiet tal-GTA fil-livell ta’ 8 ċifri li jintemm fi “30”.

(158)

Fir-rigward tal-wollastonit (il-premessi (152) u (153)), Jushi Group tenna li l-prezz tal-importazzjoni ma kienx preċiż biżżejjed biex jirrifletti d-differenzi fil-prezzijiet bejn mhux biss bejn it-trab tal-wollastonit u t-trab pirofillit, iżda wkoll dwar it-trab tal-ispodumen u t-trab tal-lepidolit. Jushi Group ippropona li jiġu kkalkulati l-parametri referenzjarji għat-tliet trabijiet abbażi tad-differenzi fil-prezzijiet tal-grupp bejn it-trab tal-wollastonit, tal-ispodumen, u tal-lepidolit kontra l-parametru referenzjarju tal-pirofillit. Alternattivament, Jushi Group sostna li l-Kummissjoni jenħtieġ li tuża l-kodiċijiet GTA 2530 90 40 għall-ispodumen u l-lepidolit, u l-kodiċi 2530 90 50 għall-wollastonit, abbażi tal-importazzjonijiet Torok tal-wollastonit mill-Istati Uniti (93).

(159)

Il-Kummissjoni enfasizzat li ma setgħetx taċċetta kalkolu bbażat fuq id-data tal-kostijiet tal-kumpanija stess, peress li, f’konformità mal-Artikolu 2(6a)(b) tar-Regolament bażiku, ġie stabbilit fil-premessa (95) li mhuwiex xieraq li jintużaw il-kostijiet domestiċi fir-RPĊ minħabba l-eżistenza ta’ distorsjonijiet sinifikanti. Il-Kummissjoni aċċettat l-asserzjoni u estrapolat il-prezzijiet għall-ispodumen, il-lepidolit, u l-wollastonit fil-livell ta’ 8 ċifri mill-GTA.

(160)

Dwar il-fibra tal-iskart, il-Grupp Jushi sostna li l-fibra tal-iskart u tal-fdal tal-fibra dehru li ġew importati fit-Turkija skont il-kodiċi SA 7019 62 10  (94) (minflok il-kodiċi SA 7019 90 ), u l-Kummissjoni jenħtieġ li tuża l-prezzijiet medji tal-importazzjoni mit-Turkija biex tistabbilixxi parametru referenzjarju tal-fibra tal-iskart. Alternattivament, il-Kummissjoni jenħtieġ li tuża l-prezz tal-importazzjoni jew tal-esportazzjoni tal-UE. Jekk il-Kummissjoni ma tapplikax parametru referenzjarju għall-fibra tal-iskart, il-materja prima li tirrappreżenta kost saħansitra aktar baxx tal-produzzjoni jenħtieġ li tiġi raggruppata wkoll taħt oġġetti konsumabbli.

(161)

Mill-bidu nett, il-Kummissjoni enfasizzat li, fit-tabelli tal-konsum, għal tnejn mill-entitajiet tiegħu, Jushi Group kien issottometta li l-kodiċi SA tal-fibra tal-iskart applikabbli kien SA 7019 90 , u għal entità waħda ma ġie rrapportat l-ebda kodiċi SA, li jenfasizza d-diffikultà li jinstab kodiċi applikabbli għal dan il-fattur speċifiku tal-produzzjoni. It-tieni, il-Kummissjoni eżaminat il-kodiċi 7019 62 10 u nnotat li t-Turkija importat biss jew il-kodiċi SA 7019 62 (Drappijiet Oħrajn Magħqudin b’Mod Mekkaniku Magħmulin Minn Faxex tal-Fibra tal-Ħġieġ) (95) jew il-kodiċi SA 7019 62 90 (Drappijiet Oħrajn Magħqudin b’Mod Mekkaniku Magħmulin Minn Faxex tal-Fibra tal-Ħġieġ), u ma kienet disponibbli l-ebda informazzjoni għall-kodiċi SA 7019 62 10 . It-tielet, anki meta wieħed iħares lejn id-data mill-pajjiżi rappreżentattivi possibbli l-oħra identifikati fl-Ewwel Nota u fit-Tieni Nota, il-volumi tal-importazzjoni miċ-Ċina kienu jikkostitwixxu 90 % jew aktar tal-importazzjonijiet totali ta’ dan il-fattur tal-produzzjoni għall-biċċa l-kbira tal-pajjiżi. B’mod ġenerali, kemm għall-kodiċi SA 7019 90 (il-premessa (155)) kif ukoll għall-kodiċi 7019 62 ma kienx possibbli li jiġi stabbilit x’jaqa’ taħt dawn il-kodiċijiet, u għall-kodiċi 7019 62 10 ma kienx possibbli li jinstab parametru referenzjarju għalih. Għalhekk, il-Kummissjoni ċaħdet din l-asserzjoni.

(162)

Wara d-divulgazzjoni, Jushi Group argumenta li l-prezzijiet tal-importazzjoni mit-Turkija tat-trab tal-ġebla tal-franka u tal-ossidu tal-kalċju/trab tal-franka kalċinat dehru għoljin b’mod mhux raġonevoli minħabba l-volumi baxxi ta’ importazzjoni, u ssottometta li l-Kummissjoni jenħtieġ li tirrevedi l-parametri referenzjarji billi (a) tieħu l-prezz tal-esportazzjoni tat-Turkija u timmarkah għal dazji tal-importazzjoni xierqa; jew (b) tuża l-prezz medju tal-importazzjoni internazzjonali tal-GTA; (c) tuża l-prezz tal-importazzjoni fil-Brażil jew (d) tuża l-prezzijiet tal-importazzjoni tal-UE (jew il-prezzijiet tal-esportazzjoni).

(163)

Fir-rigward tal-ossidu tal-kalċju u t-trab tal-ġebla tal-franka, il-Kummissjoni diġà indirizzat kumment simili dwar il-korrelazzjoni bejn il-kwantitajiet tal-importazzjoni u l-prezzijiet fil-premessa (135).

(164)

Wara d-divulgazzjoni, GFE sostniet li l-użu ta’ prezz medju ponderat ta’ taħlita ta’ minerali tal-kawlina u tal-kawlina mitħuna mhuwiex xieraq, peress li tali taħlita ma teżistix fil-formulazzjonijiet attwali tal-lott. Fl-istess ħin, il-mineral tal-kawlina ma jistax jintuża direttament fil-produzzjoni tal-GFR, peress li jeħtieġ li jgħaddi minn passi intermedjarji bħat-tħin grezz u t-tħin fin. GFE argumentat li l-Kummissjoni jenħtieġ li tuża biss il-kodiċi doganali tal-kawlina mitħuna (250700200012) bħala materja prima għall-kostruzzjoni tal-valur normali. Il-Kummissjoni ċċarat li użat il-kost korrispondenti tal-mineral tal-kawlina jew tat-trab tal-kawlina skont il-proċessi ta’ produzzjoni speċifiċi tal-kumpaniji. Il-kostijiet tal-ipproċessar tal-mineral tal-kawlina fi trab tal-kawlina tqiesu fil-kost tal-enerġija u tal-manodopera permezz ta’ eżerċizzju ta’ riport. Għalhekk, l-asserzjoni ġiet miċħuda.

(165)

Wara li ġie stabbilit li t-Turkija kienet l-uniku pajjiż rappreżentattiv xieraq disponibbli, abbażi tal-elementi kollha ta’ hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-Artikolu 2(6a)(a), l-ewwel inċiż, tar-Regolament bażiku.

(166)

Fid-dawl tal-analiżi ta’ hawn fuq, it-Turkija ssodisfat il-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku sabiex titqies bħala pajjiż rappreżentattiv xieraq.

(167)

Fl-Ewwel Nota, il-Kummissjoni elenkat il-fatturi ta’ produzzjoni, bħall-materjali, l-enerġija u l-manodopera użati fil-produzzjoni tal-prodott taħt investigazzjoni mill-produtturi esportaturi u stiednet lill-partijiet interessati jikkummentaw u jipproponu informazzjoni disponibbli għall-pubbliku dwar il-valuri mingħajr distorsjoni għal kull wieħed mill-fatturi ta’ produzzjoni msemmija f’dik in-nota.

(168)

Sussegwentement, fit-Tieni Nota, il-Kummissjoni ddikjarat li, sabiex tibni l-valur normali f’konformità mal-Artikolu 2(6a)(a) tar-Regolament bażiku, hija tuża l-GTA biex tistabbilixxi l-kost mingħajr distorsjoni tal-biċċa l-kbira tal-fatturi ta’ produzzjoni, b’mod partikolari l-materja prima. Għall-pirofillit, kif kopert fil-premessa (126), il-Kummissjoni użat il-prezzijiet tal-kumpanija Indoneżjana Pt. Gunung Bale (96). Barra minn hekk, il-Kummissjoni użat it-Turkstat u l-Eurostat biex tistabbilixxi l-kostijiet mingħajr distorsjoni tal-manodopera (97), tal-enerġija (98) u tal-gass naturali (99). Għall-ilma, il-Kummissjoni użat id-data ppubblikata mill-Uffiċċju tal-Investiment u l-Finanzi tal-Presidenza tar-Repubblika tat-Turkija (100).

(169)

Fit-Tieni Nota, il-Kummissjoni informat ukoll lill-partijiet interessati li minħabba l-għadd kbir ta’ fatturi ta’ produzzjoni tal-produtturi esportaturi inklużi fil-kampjun li pprovdew informazzjoni kompluta u l-piż negliġibbli ta’ xi materja prima fil-kost totali tal-produzzjoni, dawn il-partiti negliġibbli kienu raggruppati taħt “materjal konsumabbli”. Barra minn hekk, il-Kummissjoni informat li hija se tikkalkula l-perċentwal tal-materjali konsumabbli fuq il-kost totali tal-materja prima u se tapplika dan il-perċentwal għall-kost ikkalkulat mill-ġdid tal-materja prima meta tuża l-valuri referenzjarji mingħajr distorsjoni stabbiliti fil-pajjiż rappreżentattiv xieraq.

(170)

Meta titqies l-informazzjoni kollha ppreżentata mill-partijiet interessati u miġbura matul iż-żjarat ta’ verifika, il-fatturi ta’ produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Fatturi ta’ produzzjoni ta’ GFR

(171)

Il-Kummissjoni inkludiet valur għall-kostijiet ġenerali tal-manifattura sabiex tkopri l-kostijiet mhux inklużi fil-fatturi ta’ produzzjoni msemmija aktar ’il fuq. Sabiex tistabbilixxi dan l-ammont, il-Kummissjoni bbażat fuq id-data mill-produtturi esportaturi inklużi fil-kampjun.

(172)

Sabiex tistabbilixxi l-prezz mingħajr distorsjoni tal-materja prima kif ikkonsenjata sal-bieb ta’ produttur tal-pajjiż rappreżentattiv, il-Kummissjoni użat bħala bażi l-prezz medju ponderat tal-importazzjoni fil-pajjiż rappreżentattiv kif irrapportat fil-GTA. Prezz tal-importazzjoni fil-pajjiż rappreżentattiv ġie determinat bħala medja ponderata tal-prezzijiet unitarji tal-importazzjonijiet mill-pajjiżi terzi kollha bl-esklużjoni tar-RPĊ u l-pajjiżi li mhumiex membri tad-WTO elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (106). Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li kkonkludiet li mhuwiex xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsubin għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni.

(173)

Għall-pirofillit, kif spjegat fil-premessa (124), Jiangsu Changhai sostniet li l-kodiċi SA għall-pirofillit kien wiesa’ wisq u ma kienx jirrifletti d-differenza abbażi tal-kontenut tal-aluminju. Għalhekk, il-kumpanija ssottomettiet rapport tas-suq li jipprovdi data dwar il-pirofillit, ibbażat fuq l-applikazzjoni, ir-reġjun, u li jipprovdi wkoll prezzijiet għal kumpaniji speċifiċi u tipi speċifiċi ta’ pirofillit. L-applikant sostna li l-prezzijiet tal-pirofillit b’alumina baxxa - jiġifieri t-tip użat fil-proċess tal-produzzjoni tal-GFR – mill-kumpanija Indoneżjana PT. Gunung Bale u Kaolin (Malaysia) Sdn ikunu l-aktar valur referenzjarju alternattiv xieraq. Il-Kummissjoni aċċettat din l-asserzjoni u użat il-prezzijiet tal-fornitur tal-pirofillit PT. Gunung Bale, minħabba d-dipendenza aktar baxxa tal-Indoneżja fuq l-importazzjonijiet tal-pirofillit miċ-Ċina.

(174)

Wara d-divulgazzjoni, GFE sostniet li, għalkemm il-kostijiet tar-rodju u tal-platinu kienu riflessi fid-deprezzament, dawn il-kostijiet mhumiex kompluti, peress li l-metalli prezzjużi jistgħu jinżammu bħala assi jew mikrija, filwaqt li pproponiet metodoloġiji ta’ kalkolu differenti bbażati fuq jekk il-bushings li fihom il-platinu u r-rodju kinux proprjetà jew mikrija. Il-Kummissjoni enfasizzat li l-konsum tal-platinu/tar-rodju u l-pjanċa tat-tnixxija ġew ikkunsidrati fil-kostruzzjoni tal-valur normali taħt l-ispejjeż ġenerali tal-manifattura.

(175)

Wara d-divulgazzjoni finali, GFE żiedet li abbażi tas-sejbiet tal-premessa (42), jiġifieri li l-industrija Ċiniża żiedet il-kapaċitajiet tagħha minn 1,5 miljun tunnellata fl-2016 għal 4,1 miljun tunnellata fil-perjodu ta’ investigazzjoni tar-rieżami, il-Kummissjoni kien jenħtieġ li taħdem il-valur normali filwaqt li tqis il-kostijiet tal-impjant tal-GFR f’żoni ġodda u l-kostijiet ta’ deprezzament annwali li jirriżultaw. Il-Kummissjoni ċċarat li dawn il-kostijiet kienu diġà koperti fil-kostijiet tad-deprezzament. L-asserzjoni hija miċħuda bħala irrilevanti.

(176)

Għal għadd ta’ fatturi ta’ produzzjoni, il-kostijiet effettivi mġarrba mill-produtturi esportaturi li kkooperaw kienu jirrappreżentaw sehem negliġibbli tal-kostijiet totali tal-materja prima fil-perjodu ta’ investigazzjoni taħt rieżami. Peress li l-valur użat għal dawn ma kellu l-ebda impatt apprezzabbli fuq il-kalkoli tal-marġni tad-dumping, irrispettivament mis-sors użat, il-Kummissjoni ddeċidiet li tinkludi dawk il-kostijiet fil-materjali konsumabbli. Dan kien il-każ għall-arja kompressata, l-ossiġenu u l-fwar.

(177)

Il-Kummissjoni esprimiet il-kost tat-trasport imġarrab mill-produttur esportatur li kkoopera għall-provvista ta’ materja prima bħala perċentwal tal-kost reali ta’ tali materja prima u mbagħad applikat l-istess perċentwal għall-kost mingħajr distorsjoni tal-istess materja prima sabiex tikseb il-kost mingħajr distorsjoni tat-trasport. Il-Kummissjoni kkunsidrat li, fil-kuntest ta’ din l-investigazzjoni, il-proporzjon bejn il-materja prima tal-produttur esportatur u l-kostijiet tat-trasport irrapportati jista’ jintuża b’mod raġonevoli bħala indikazzjoni biex jiġu stmati l-kostijiet tat-trasport mingħajr distorsjoni tal-materja prima meta tiġi kkonsenjata lill-fabbrika tal-kumpanija.

(178)

Wara d-divulgazzjoni, Jushi Group argumenta li l-Kummissjoni kien jenħtieġ li żżid biss il-kostijiet reali tat-trasport irrapportati mal-kostijiet tal-materja prima mingħajr distorsjoni, u ma applikatx proporzjon, bħal fil-każ tat-tessuti tal-fibra tal-ħġieġ (107).

(179)

Il-Kummissjoni enfasizzat li l-metodoloġija użata tirrifletti l-istruttura tal-kostijiet tal-produttur esportatur, peress li l-proporzjon bejn il-kost tat-trasport u l-kost tal-materja prima jinżamm u jiġi applikat ulterjorment għall-parametru referenzjarju mingħajr distorsjoni. Il-Kummissjoni enfasizzat li ma setgħetx taċċetta kalkolu bbażat fuq id-data tal-kostijiet tal-kumpanija stess, peress li, f’konformità mal-Artikolu 2(6a)(b) tar-Regolament bażiku, ġie stabbilit fil-premessa (95) li mhuwiex xieraq li jintużaw il-kostijiet domestiċi fir-RPĊ minħabba l-eżistenza ta’ distorsjonijiet sinifikanti. Barra minn hekk, l-eżempju msemmi minn Jushi Group ma kienx neċessarjament jimplika li dak li ntuża kien il-kost reali, peress li l-“kostijiet tat-trasport domestiku għall-materja prima kollha ġew stmati abbażi tad-data vverifikata pprovduta mill-produtturi esportaturi li kkooperaw”. Fi kwalunkwe każ, il-Grupp Jushi naqas milli juri għaliex l-approċċ użat mill-Kummissjoni kellu jkun irraġonevoli. Għalhekk, din l-asserzjoni tqieset mhux ġustifikata.

(180)

TurkStat, Structure of Earnings Statistics, 2023 (108) tippubblika informazzjoni dettaljata dwar il-pagi f’setturi ekonomiċi differenti fit-Turkija. Il-Kummissjoni użat l-aħħar statistika disponibbli li tkopri l-2023, għall-attività ekonomika skont il-klassifikazzjoni NACE Rev.2. Il-valur ta’ kull xahar irrapportat għal tmiem l-2023 ġie aġġustat kif xieraq għall-inflazzjoni bl-użu tal-aġġustament tal-indiċi tal-kost lavorattiv kif ippubblikat minn TurkStat, Labour cost indices, 2009-2024 [2021=100] (109).

(181)

Il-prezz tal-elettriku għall-kumpaniji (utenti industrijali) fit-Turkija huwa ppubblikat mill-Eurostat: il-prezzijiet tal-elettriku għall-konsumaturi mhux domestiċi - data biannwali (mill-2007 ’il quddiem) (nrg_pc_205) (110) fl-istqarrijiet għall-istampa regolari tagħha. Il-Kummissjoni użat id-data dwar il-prezzijiet tal-elettriku industrijali fil-faxxa tal-konsum korrispondenti f’kWh li tkopri l-perjodu ta’ investigazzjoni tar-rieżami.

(182)

Wara d-divulgazzjoni, Jiangsu Changhai sostniet li l-Kummissjoni kien jenħtieġ li tuża l-faxxa tal-konsum tal-elettriku li tirrifletti l-użu tal-elettriku tal-kumpanija. Bl-istess mod, għall-gass naturali, il-kumpanija sostniet li, abbażi tal-użu tiegħu, il-Kummissjoni jenħtieġ li tapplika l-faxxa tal-konsum speċifika bbażata fuq l-użu, aktar milli l-medja tal-faxex kollha tal-konsum.

(183)

Il-Kummissjoni aċċettat dawn l-asserzjonijiet u wettqet aġġustamenti għall-parametru referenzjarju tal-elettriku u tal-gass naturali li jirriflettu l-profili tal-konsum reali tal-produtturi esportaturi Ċiniżi inklużi fil-kampjun.

(184)

Il-prezz tal-gass naturali għall-utenti industrijali fit-Turkija huwa ppubblikat mill-Eurostat - Prezzijiet tal-gass għall-konsumaturi mhux domestiċi - data biannwali (111). Il-Kummissjoni użat id-data dwar il-prezzijiet tal-gass industrijali fil-faxxa tal-konsum korrispondenti f’kWh li tkopri l-perjodu ta’ investigazzjoni.

(185)

Il-kost tal-ilma għall-użu industrijali huwa ppubblikat mill-Uffiċċju tal-Investiment u l-Finanzi tal-Presidenza tar-Repubblika tat-Turkija (112). Il-Kummissjoni użat prezz medju tal-industrija fir-reġjun ta’ Istanbul relatat maż-Żoni Industrijali Organizzati (OIZs, Organized Industrial Zones): Eskişehir OIZ; Balıkesir OIZ; Ankara Başkent OIZ u İzmir Aliağa OIZ.

(186)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(187)

L-ispejjeż ġenerali tal-manifattura mġarrba mill-produtturi esportaturi li kkooperaw ġew espressi bħala sehem mill-kostijiet tal-manifattura effettivament imġarrba mill-produtturi esportaturi. Dan il-perċentwal ġie applikat għall-kostijiet tal-manifattura mingħajr distorsjoni.

(188)

Sabiex tistabbilixxi ammont mingħajr distorsjoni u raġonevoli għall-kostijiet SG&A u għall-profitt, il-Kummissjoni bbażat fuq id-data finanzjarja għall-2023 għal Şişe Ve Cam Fabrikalari A.Ş kif estratta mir-rapporti annwali tal-kumpanija (113).

(189)

Abbażi ta’ dan ta’ hawn fuq, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku.

(190)

L-ewwel nett, il-Kummissjoni stabbiliet il-kostijiet tal-manifattura mingħajr distorsjoni. Il-Kummissjoni applikat il-kostijiet unitarji mingħajr distorsjoni għall-konsum effettiv tal-fatturi individwali tal-produzzjoni tal-produtturi esportaturi inklużi fil-kampjun. Dawn ir-rati ta’ konsum ġew ivverifikati matul il-verifika. Il-Kummissjoni mmultiplikat il-fatturi tal-użu bil-kostijiet mingħajr distorsjoni għal kull unità li ġew osservati fil-pajjiż rappreżentattiv.

(191)

Ladarba ġie stabbilit il-kost mingħajr distorsjoni tal-manifattura, il-Kummissjoni applikat il-kostijiet ġenerali tal-manifattura, il-kostijiet SG&A u l-profitt kif innutat fil-premessi minn (186) sa (188). Dawn ġew determinati abbażi tar-rapporti finanzjarji ta’ Şişe Ve Cam Fabrikalari A.Ş kif spjegat fil-premessa (188).

(192)

Imbagħad, il-Kummissjoni żiedet l-ispejjeż ġenerali tal-manifattura, kif spjegat fil-premessi (186) u (187) mal-kost mingħajr distorsjoni tal-manifattura sabiex tasal għall-kostijiet tal-produzzjoni mingħajr distorsjoni.

(193)

Mal-kostijiet tal-produzzjoni stabbiliti kif deskritt fil-premessa preċedenti, il-Kummissjoni applikat il-kostijiet SG&A u l-profitti ta’ Şişe Ve Cam Fabrikalari A.Ş. Il-kostijiet SG&A, espressi bħala perċentwal tal-Kost tal-Oġġetti Mibjugħin (“COGS”, Cost of Goods Sold) u applikati għall-kostijiet tal-produzzjoni mingħajr distorsjoni, ammontaw għal 22,7 %. Il-profitt, espress bħala perċentwal tas-COGS u applikat għall-kostijiet tal-produzzjoni mingħajr distorsjoni, ammonta għal 8,8 %.

(194)

Abbażi ta’ dan, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(195)

Wara d-divulgazzjoni finali, GFE sostniet li l-użu tad-data tan-negozju tal-ħġieġ industrijali ta’ Şişecam għad-determinazzjoni ta’ ammonti raġonevoli għall-kostijiet SG&A u għall-profitt ma kienx ġustifikat, peress li (a) il-Kummissjoni kien jenħtieġ li teskludi introjtu operatorju u introjtu finanzjarju ieħor min-negozju tal-ħġieġ ta’ Şişecam; (b) il-kostijiet SG&A ma kinux jirriflettu r-realtà ekonomika tal-produtturi tal-GFR; (c) il-profitt li nstab ta’ 8,8 % ma kienx biżżejjed għall-industriji intensivi fil-kapital bħall-GFR u għalhekk mhux raġonevoli, bl-argument li l-Kummissjoni jenħtieġ li tuża l-kostijiet SG&A u l-profitt tal-grupp kollu.

(196)

Wara d-divulgazzjoni finali, Jiangsu Changhai argumentat li s-segment tal-ħġieġ industrijali ta’ Şişe Ve Cam Fabrikalari A.Ş. kien fil-fatt mhux profittabbli fl-2023, peress li l-Qligħ Qabel l-Imgħax, it-Taxxi u d-Deprezzament huwa biss ir-riżultat tal-introjtu u l-profitt li sar minn attivitajiet ta’ investiment, ix-xiri ta’ assi tanġibbli u intanġibbli u d-dritt tal-użu tal-assi, mhux riżultat tal-attivitajiet operatorji ewlenin. Jiangsu Changhai talbet li tuża d-data aġġustata għall-inflazzjoni tal-2023 li tinsab fir-rapporti annwali tal-2024 ta’ Şişe Ve Cam Fabrikalari A.Ş., u li tnaqqas l-ispejjeż tat-trasport, tal-kummissjonijiet u tal-imballaġġ. Alternattivament, jekk il-Kummissjoni tibqa’ tuża d-data speċifika għas-segment, jenħtieġ li jiġi allokat sehem proporzjonali tal-ispejjeż SG&A fil-livell konsolidat lis-segment industrijali.

(197)

Fir-rigward tal-istabbiliment ta’ ammonti raġonevoli għall-kostijiet SG&A, il-Kummissjoni aċċettat l-asserzjoni ta’ Jiangsu Changhai li teskludi l-kostijiet tat-trasport, l-ispejjeż tal-imballaġġ u l-ispejjeż tal-kummissjoni tal-grupp kollu u tallokahom bl-użu tal-fatturat bħala koeffiċjent tal-allokazzjoni. Il-Kummissjoni rrevediet il-kalkolu tagħha tal-profitt għas-segment industrijali u kkonfermat li l-profitt ikkalkulat mill-ġdid, qabel it-taxxa għas-segment industrijali kien negattiv fl-2023.

(198)

Ir-rapporti finanzjarji kkonsolidati tal-grupp Şişecam ipprovdew il-profitt Şişecam Elyaf u l-kostijiet SG&A tas-segment tal-ħġieġ industrijali. Fir-rigward ta’ Şişecam Elyaf, il-kumpanija li tipproduċi l-fibra tal-ħġieġ, ir-rapporti finanzjarji disponibbli pubblikament għall-2023 taw il-bejgħ nett u l-profitt iżda ma inkludewx l-informazzjoin dwar l-oġġetti mibjugħa (COGS) u lanqas l-SG&A. Is-COGS kien disponibbli fil-livell tas-segment tal-industrija tal-ħġieġ tal-grupp Şişecam. B’hekk, biex tikkalkula l-perċentwal ta’ profitt ta’ Şişecam Elyaf, il-Kummissjoni allokat is-COGS tas-segment industrijali, li għalih tappartjeni Şişecam Elyaf, billi użat il-fatturat bħala koeffiċjent tal-allokazzjoni.

(199)

Fid-dawl ta’ dan ta’ hawn fuq, il-Kummissjoni kkonkludiet li jkun xieraq li jiġi stabbilit l-ammont raġonevoli għall-kostijiet SG&A abbażi tal-kostijiet SG&A kkalkulati mill-ġdid għas-segment industrijali bl-użu tad-data aġġustata għall-inflazzjoni tal-2023 inkluża fl-aħħar dikjarazzjoni annwali tal-grupp Tork. Il-Kummissjoni allokat l-ispejjeż finanzjarji netti tal-grupp Şişecam għas-segment bl-użu tal-fatturat bħala koeffiċjent tal-allokazzjoni, u kisbet kostijiet SG&A espressi bħala perċentwal tas-COGS ta’ 11,24 %.

(200)

Sabiex tikkalkola l-profitt espress bħala perċentwal tas-COGS, il-Kummissjoni qasmet il-profitt ta’ Şişecam Elyaf mis-COGS tas-segment industrijali allokat lil Şişecam Elyaf billi użat il-fatturat bħala koeffiċjent tal-allokazzjoni, kif spjegat fil-premessa (198). Dan ammonta għal 21,58 %.

(201)

Wara d-divulgazzjoni finali addizzjonali, GFE sostniet li l-Kummissjoni ma kellhiex taċċetta l-asserzjoni ta’ Jiangsu Changhai dwar il-kostijiet tat-trasport, l-ispejjeż tal-imballaġġ u l-kummissjoni u, fi kwalunkwe każ, kien jenħtieġ li ma tapplikax l-aġġustament għall-produtturi esportaturi kollha. Bl-istess mod, kwalunkwe asserzjoni oħra fir-rigward ta’ esportaturi għajr dak speċifiku li jagħmel asserzjoni partikolari kien jenħtieġ li ma tiġix applikata għall-produtturi esportaturi kollha fil-kampjun.

(202)

Il-Kummissjoni enfasizzat li s-sejbiet dwar il-kostijiet SG&A u l-profitt mill-kumpanija rappreżentattiva jikkonċernaw l-“ammonti raġonevoli” li għandhom jintużaw fil-kostruzzjoni tal-valur normali skont l-Artikolu 2(6a) tar-Regolament bażiku u japplikaw għall-produtturi esportaturi kollha inklużi fil-kampjun. Il-Kummissjoni ma tistax tapplika kostijiet SG&A differenti biss għall-kumpanija li ssottomettiet asserzjoni dwar l-aġġustamenti tal-kostijiet SG&A. Għalhekk, il-Kummissjoni ċaħdet dawn l-asserzjonijiet.

(203)

Wara d-divulgazzjoni finali addizzjonali, GFE sostniet ukoll li ma kien hemm l-ebda evidenza li l-kostijiet kollha tat-trasport japplikaw biss għal tranżazzjonijiet ’il barra, u li, jekk wieħed jassumi li kienu relatati kemm mal-kostijiet tat-tranżazzjonijiet deħlin kif ukoll ħerġin, l-aġġustament tal-Kummissjoni kien eċċessiv, peress li xi wħud mill-produtturi esportaturi Ċiniżi inklużi fil-kampjun irrapportaw kostijiet tat-trasport ħafna aktar baxxi fir-rapporti annwali tagħhom u għalhekk il-Kummissjoni kien jenħtieġ li taġġusta dawn il-kostijiet kif xieraq. Fl-aħħar nett, GFE argumentat li s-segment industrijali fir-rapporti finanzjarji ta’ Şişecam huwa magħmul minn prodotti f’diversi industriji differenti, u rraġunat li l-kostijiet tat-trasport u tal-imballaġġ għall-industrija tal-karozzi jridu jkunu ogħla milli għall-industrija tal-GFR.

(204)

Il-Kummissjoni ċaħdet dawn l-asserzjonijiet minħabba li l-valur normali kellu jiġi stabbilit fil-livell ta’ kif joħroġ mill-fabbrika, u għalhekk dawn il-kostijiet kellhom jitnaqqsu sabiex jiġu stabbiliti ammonti raġonevoli għall-SG&A u l-profitt fil-pajjiż rappreżentattiv. Barra minn hekk, il-fatt li l-kostijiet tat-trasport u tal-imballaġġ għall-industrija tal-karozzi jistgħu jkunu ogħla milli għall-industrija tal-GFR ma għandu l-ebda effett f’dan il-każ, peress li l-kostijiet tat-trasport u tal-imballaġġ ittieħdu għall-grupp kollu u ġew applikati proporzjonalment abbażi tal-fatturat tas-segment industrijali, u ma kien hemm l-ebda diżaggregazzjoni disponibbli għall-kostijiet tat-trasport speċifiċi għas-segment tal-ħġieġ industrijali.

(205)

Wara d-divulgazzjoni finali addizzjonali, Jiangsu Changhai kkuntestat il-kalkolu tal-profitt ta’ Şişecam Elyaf, bl-argument li r-rata tal-kostijiet SG&A applikata ma tirriflettix l-istruttura tal-kostijiet li ġġenerat il-profitt irrapportat, filwaqt li pproponiet li jiġi kkalkolat mill-ġdid il-profitt ta’ Şişecam Elyaf billi jiġi inkorporat il-proporzjon tal-kostijiet SG&A fuq is-COGS jew billi tiġi ddeterminata ċifra kkombinata għall-kostijiet SG&A u għall-profitt ibbażata fuq il-fatturat ta’ Şişecam Elyaf li minnu jitnaqqas is-COGS ikkalkulat mill-ġdid.

(206)

Il-Kummissjoni ssottolinjat li l-approċċ segwit għall-kalkolu tal-profitt kien iffokat fuq Şişecam Elyaf bħala kumpanija awtonoma, u b’hekk jirrifletti aktar mill-qrib il-profitt tal-produtturi tal-GFR fit-Turkija. Barra minn hekk, l-allokazzjoni tas-COGS fuq il-profitt tal-produttur tal-GFR segwiet l-istess loġika u allokazzjoni eżatti li Jiangsu Changhai kienet ipproponiet għall-kalkolu tal-kummissjonijiet, l-ispejjeż tal-imballaġġ u l-kostijiet tat-trasport, ittrasferiti mill-grupp globali għas-segment industrijali. L-istess metodoloġija diġà ġiet applikata wkoll qabel, bl-użu tal-istess grupp, segment industrijali u produttur tal-GFR, matul l-istess sena (jiġifieri l-2023), għall-kalkolu tal-kostijiet SG&A u tal-profitt ta’ wieħed mill-prodotti downstream tal-GFR (114). Għalhekk, il-Kummissjoni ċaħdet din l-asserzjoni.

(207)

Il-produtturi esportaturi inklużi fil-kampjun esportaw lejn l-Unjoni jew direttament lil konsumaturi indipendenti jew permezz ta’ kumpaniji relatati.

(208)

Għall-produtturi esportaturi li esportaw il-prodott ikkonċernat direttament lil klijenti indipendenti fl-Unjoni, il-prezz tal-esportazzjoni kien il-prezz li effettivament tħallas jew dak pagabbli għall-prodott ikkonċernat meta nbiegħ għall-esportazzjoni lejn l-Unjoni, f’konformità mal-Artikolu 2(8) tar-Regolament bażiku.

(209)

Għal bejgħ indirett, il-prezz tal-esportazzjoni ġie stabbilit abbażi tal-prezz li bih il-prodott importat reġa’ nbiegħ għall-ewwel darba lil klijenti indipendenti fl-Unjoni, skont l-Artikolu 2(9) tar-Regolament bażiku. Ġurisprudenza stabbilita tiċċara li l-aġġustamenti skont l-Artikolu 2(9) tar-Regolament bażiku jinkludu l-kostijiet imġarrba minn entità li tinsab barra mill-Unjoni Ewropea, dment li tali entità tidher li hija assoċjata mal-importatur jew mal-esportatur u li l-kostijiet inkwistjoni normalment jiġġarrbu minn importatur (115). F’dan il-kuntest, il-ġurisprudenza tqabbel dawn il-kostijiet ma’ dawk relatati mal-attivitajiet ta’ bejgħ imwettqa mis-sussidjarji peress li jnaqqsu l-ammont riċevut mill-produttur esportatur, sa fejn tipikament jiġġarrbu mill-importatur (116). Kif innotat mill-Qorti tal-Ġustizzja, dan l-approċċ huwa konformi mal-objettiv tal-Artikolu 2(9) tar-Regolament bażiku. Skont il-Qorti, dan l-għan ma jintlaħaqx jekk produttur esportatur ikun jista’ sempliċement jistruttura l-bejgħ tiegħu b’mod li jiżgura l-involviment, qabel l-importazzjoni tal-prodott ikkonċernat fl-Unjoni Ewropea, ta’ intermedjarju assoċjat miegħu li jassumi r-responsabbiltà għall-kostijiet normalment imġarrba minn importatur, b’tali mod li jżid il-prezz tal-esportazzjoni effettivament imħallas mill-importatur (117).

(210)

Il-Kummissjoni nnotat li n-negozjant relatat mal-produtturi esportaturi li jinsabu f’Hong Kong kien qed iġarrab kostijiet normalment imġarrba minn importatur, inklużi dawk relatati mal-fatturazzjoni ta’ klijenti mhux relatati li jinsabu fl-Unjoni. Għalhekk, aġġustament skont l-Artikolu 2(9) tar-Regolament bażiku għal dawn il-kostijiet (kostijiet SG&A) u profitt nominali kien ġustifikat.

(211)

Għall-produtturi esportaturi li esportaw il-prodott ikkonċernat lejn l-Unjoni permezz ta’ kumpaniji relatati li jaġixxu bħala importatur, il-prezz tal-esportazzjoni ġie stabbilit abbażi tal-prezz li bih il-prodott importat reġa’ nbiegħ għall-ewwel darba lil klijenti indipendenti fl-Unjoni, f’konformità mal-Artikolu 2(9) tar-Regolament bażiku. F’dan il-każ, saru aġġustamenti fil-prezz għall-kostijiet kollha mġarrba bejn l-importazzjoni u l-bejgħ mill-ġdid, inklużi l-ispejjeż SG&A, u għall-profitti akkumulati.

(212)

Fin-nuqqas ta’ kooperazzjoni ta’ importaturi mhux relatati f’dan il-każ, intuża profitt raġonevoli stabbilit għal 5 % fl-investigazzjoni dwar id-drappijiet tal-fibra tal-ħġieġ (“GFF, Glass Fibre Fabrics”) oriġinali (118) għal prodott tal-fibra tal-ħġieġ downstream biex jiġi stabbilit prezz tal-esportazzjoni affidabbli fil-livell tal-fruntiera tal-Unjoni.

(213)

L-Artikolu 2(10) tar-Regolament bażiku jirrikjedi li l-Kummissjoni tagħmel tqabbil ġust bejn il-valur normali u l-prezz tal-esportazzjoni fl-istess livell tal-kummerċ u li tagħmel konċessjonijiet għad-differenzi fil-fatturi li jaffettwaw il-prezzijiet u l-komparabbiltà tal-prezzijiet. Fil-każ inkwistjoni, il-Kummissjoni għażlet li tqabbel il-valur normali u l-prezz tal-esportazzjoni tal-produtturi esportaturi inklużi fil-kampjun fil-livell ta’ kif joħroġ mill-fabbrika. Kif spjegat aktar hawn taħt, meta jkun xieraq, il-valur normali u l-prezz tal-esportazzjoni ġew aġġustati sabiex: (i) jiġu nnettjati lura għal-livell ta’ kif joħroġ mill-fabbrika; u (ii) isiru konċessjonijiet għad-differenzi fil-fatturi li ġew asseriti, u murija, li jaffettwaw il-prezzijiet u l-komparabbiltà tal-prezzijiet.

(214)

Kif spjegat fil-premessa (194), il-valur normali ġie stabbilit fil-livell ta’ kif joħroġ mill-fabbrika bl-użu tal-kostijiet ta’ produzzjoni flimkien mal-ammonti għall-kostijiet SG&A u għall-profitt, li tqiesu raġonevoli għal dak il-livell ta’ kummerċ. Għalhekk, ma kien neċessarju l-ebda aġġustament biex il-valur normali jiġi nnettjat lura għal-livell ta’ kif joħroġ mill-fabbrika.

(215)

Sabiex il-prezz tal-esportazzjoni jiġi nnettjat lura għal-livell ta’ kif joħroġ mill-fabbrika, saru aġġustamenti minħabba: id-dazju doganali, imposti oħra fuq l-importazzjoni, il-merkanzija, l-assigurazzjoni, l-immaniġġar u t-tagħbija u spejjeż anċillari.

(216)

Saru konċessjonijiet għall-fatturi li ġejjin li jaffettwaw il-prezzijiet u l-komparabbiltà tal-prezzijiet: il-kost tal-kreditu, l-imposti bankarji u l-kummissjonijiet.

(217)

Għall-produtturi esportaturi li kkooperaw inklużi fil-kampjun, il-Kummissjoni qabblet il-valur normali medju ponderat ta’ kull tip tal-prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, f’konformità mal-Artikolu 2(11) u (12) tar-Regolament bażiku.

(218)

Minħabba r-rata għolja ta’ kooperazzjoni tal-produtturi esportaturi Ċiniżi, id-dazju għall-“kumpaniji l-oħrajn kollha” ġie stabbilit fil-livell tal-ogħla dazju li għandu jiġi impost fuq il-kumpaniji inklużi fil-kampjun jew fuq dawk li kkooperaw fl-investigazzjoni. Id-dazju tal-“kumpaniji l-oħrajn kollha” se jiġi applikat għal dawk il-kumpaniji li ma kkooperawx fl-investigazzjoni.

(219)

Chongqing Polycomp International Corporation kienet l-uniku produttur esportatur li ppreżenta ruħu matul l-eżerċizzju tal-kampjunar u ma kienx inkluż fil-kampjun. Ir-rata tad-dazju definittiv tiegħu hija stabbilita fil-medja ponderata tar-rati stabbiliti għall-produtturi esportaturi inklużi fil-kampjun li kkooperaw.

(220)

Il-marġnijiet tad-dumping definittivi espressi bħala perċentwal tal-prezz tal-kost, l-assigurazzjoni u n-nol (CIF, Cost, Insurance and Freight) fil-fruntiera tal-Unjoni, bid-dazju mhux imħallas, huma kif ġej:

(221)

Il-prodott simili kien immanifatturat minn għaxar produtturi fl-Unjoni fil-bidu tal-perjodu kkunsidrat, filwaqt li tnejn minnhom waqqfu l-produzzjoni matul l-RIP, kif imsemmi fil-premessa (46). Dawn jikkostitwixxu l-“industrija tal-Unjoni” fis-sens tal-Artikolu 4(1) tar-Regolament bażiku.

(222)

Il-produzzjoni totali tal-Unjoni matul l-RIP ġiet stabbilita fil-livell ta’ 504 019-il tunnellata. Il-Kummissjoni stabbiliet iċ-ċifra abbażi tal-informazzjoni disponibbli dwar l-industrija tal-Unjoni kif ipprovduta minn Glass Fibre Europe (“GFE”). Kif indikat fil-premessa (19), fil-kampjun intgħażlu impjanti tal-manifattura ta’ tliet produtturi tal-Unjoni, li jirrappreżentaw 60 % tal-produzzjoni totali tal-Unjoni tal-prodott simili.

(223)

Il-Kummissjoni stabbiliet il-konsum tal-Unjoni abbażi ta’ (i) il-volum tal-bejgħ tal-industrija tal-Unjoni fis-suq ħieles tal-Unjoni abbażi tad-data pprovduta mill-GFE u (ii) l-importazzjonijiet minn pajjiżi terzi abbażi tad-data estratta mill-Eurostat (Comext).

Tabella 2

Konsum tal-Unjoni (tunnellati)

(224)

Il-konsum totali tal-GFR fl-Unjoni naqas b’6 % matul il-perjodu kkunsidrat. Iż-żieda osservata fl-2022 kienet prinċipalment dovuta għall-irkupru ekonomiku wara t-tneħħija tal-miżuri tal-COVID-19 hekk kif l-utenti reġgħu bdew jagħmlu ordnijiet biex jerġgħu jaħżnu l-inventarji u reġgħu bdew il-produzzjoni. Madankollu, matul l-2023 id-domanda għall-GFR fl-Unjoni naqset filwaqt li fl-RIP irkuprat bi 2 %. It-tnaqqis fil-konsum u l-irkupru dgħajjef sussegwenti ġew attribwiti għal ordnijiet eċċessivi fis-snin preċedenti u nfiq tal-konsumatur aktar kawt minħabba l-klima ekonomika fl-RIP.

(225)

L-importazzjonijiet fl-Unjoni mir-RPĊ żviluppaw kif ġej:

Tabella 3

Volum tal-importazzjonijiet (f’tunnellati metriċi) u sehem mis-suq

(226)

Anke bil-miżuri stabbiliti, il-volum tal-importazzjonijiet mir-RPĊ żdied b’51 % matul il-perjodu kkunsidrat. Meta wieħed iqis l-evoluzzjoni tal-konsum, is-sehem mis-suq tal-importazzjonijiet Ċiniżi żdied minn 6 % fl-2021 għal 10 % fl-RIP.

(227)

Il-Kummissjoni stabbiliet il-prezzijiet tal-importazzjonijiet abbażi ta’ data tal-Eurostat. Il-prezz medju tal-importazzjonijiet fl-Unjoni mir-RPĊ żviluppa kif ġej:

Tabella 4

Prezzijiet tal-importazzjonijiet (EUR/ tunnellata)

(228)

Il-prezz medju tal-importazzjoni tal-prodott taħt rieżami fl-Unjoni inizjalment żdied bi 22 % fl-2022 minħabba kostijiet eċċezzjonalment għoljin tat-trasport li segwew it-tneħħija tal-miżuri tal-COVID-19. Sussegwentement, seta’ jiġi osservat tnaqqis sinifikanti fil-prezzijiet medji tal-importazzjoni. Fl-RIP, il-prezz medju tal-importazzjonijiet fl-Unjoni kien 28 % inqas milli fl-2021.

(229)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni billi qabblet:

(230)

Għall-produttur esportatur inkluż fil-kampjun Taishan Fiberglass Inc., il-bejgħ li sar skont ftehim ta’ provvista speċjali mal-produttur tal-Unjoni European Owens Corning Fiberglas SPRL ġie eskluż mill-kalkoli tat-twaqqigħ tal-prezz minħabba li l-prodott inkwistjoni—fibra tal-ħġieġ reżistenti għall-alkali użata għar-rinfurzar tas-siment—ma kinitx prodotta fl-Unjoni. Minflok, il-prodott huwa mmanifatturat esklużivament fiċ-Ċina u fil-Ġappun skont ftehim ta’ provvista li ilu jeżisti bejn dawn iż-żewġ kumpaniji, bi produzzjoni li tibbaża fuq it-teknoloġija u l-inputs proprjetarji ta’ European Owens Corning Fiberglas SPRL (eż. bushings).

(231)

It-tqabbil wera li, matul l-RIP, l-importazzjonijiet tal-prodott taħt rieżami li joriġina mir-RPĊ inbiegħu fl-Unjoni bi prezzijiet li waqqgħu l-prezzijiet tal-industrija tal-Unjoni, meta espressi bħala perċentwal ta’ dawn tal-aħħar, b’minn 16,64 % sa 30,68 %, anke meta ġew inklużi d-dazji anti-dumping u kumpensatorji applikabbli.

(232)

Minbarra t-twaqqigħ tal-prezz, kien hemm ukoll soppressjoni sinifikanti tal-prezzijiet skont it-tifsira tal-Artikolu 3(3) tar-Regolament bażiku. Minħabba l-pressjoni sinifikanti fuq il-prezzijiet ikkawżata mill-importazzjonijiet oġġett ta’ dumping bi prezz baxx mill-produtturi esportaturi Ċiniżi, l-industrija tal-Unjoni ma setgħetx tgħolli l-prezzijiet tagħha matul l-RIP f’konformità mal-iżvilupp tal-kostijiet tal-produzzjoni filwaqt li ppruvat tikseb livell raġonevoli ta’ profitt, kif stabbilit fit-Tabella 9 hawn taħt. Is-soppressjoni sinifikanti tal-prezzijiet ġiet ikkonfermata mid-data fit-Tabella 4 kif ukoll mill-bejgħ taħt il-prezz misjub abbażi tad-data pprovduta mill-produtturi esportaturi inklużi fil-kampjun.

(233)

Il-valutazzjoni tas-sitwazzjoni ekonomika tal-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat.

(234)

Kif imsemmi fil-premessa (19), il-kampjunar intuża għall-valutazzjoni tas-sitwazzjoni ekonomika tal-industrija tal-Unjoni.

(235)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tal-informazzjoni pprovduta mill-GFE. Il-Kummissjoni evalwat l-indikaturi mikroekonomiċi abbażi tad-data inkluża fit-tweġibiet għall-kwestjonarju mill-produtturi tal-Unjoni inklużi fil-kampjun.

(236)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(237)

L-indikaturi mikroekonomiċi huma: il-prezzijiet unitarji medji, il-kost unitarju, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti u l-kapaċità li jiġi ġġenerat il-kapital.

(238)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 5

Produzzjoni, il-kapaċità tal-produzzjoni u l-użu tal-kapaċità

(239)

Il-volum tal-produzzjoni fl-2022 żdied bi ftit meta mqabbel mal-2021 wara l-illaxkar tal-miżuri tal-COVID-19 li ffaċilitaw produzzjoni aktar stabbli. Barra minn hekk, fl-2022 diversi produtturi tal-Unjoni inklużi fil-kampjun żiedu l-volum tal-produzzjoni biex jakkumulaw inventarji ta’ prodotti lesti fid-dawl tal-bini mill-ġdid ippjanat ta’ fran. Madankollu, fl-2023 u l-RIP kien hemm tnaqqis sinifikanti fil-volum tal-produzzjoni peress li l-produtturi tal-Unjoni kienu qegħdin ibigħu inventarji akkumulati filwaqt li fl-istess ħin l-industrija tal-Unjoni kienet qiegħda tħabbat wiċċha ma’ tnaqqis fid-domanda u żieda fl-importazzjonijiet tal-GFR mir-RPĊ bi prezzijiet baxxi.

(240)

Il-kapaċità tal-produzzjoni naqset b’mod konsistenti matul il-perjodu kkunsidrat u tnaqqset b’9 %. Kif spjegat fil-premessa (46), it-tnaqqis fil-kapaċità tal-produzzjoni mill-2021 sa tmiem l-RIP kien dovut għall-fatt li xi produtturi tal-Unjoni waqqfu l-produzzjoni, bi Krosglass S.A. twaqqaf il-produzzjoni tal-GFR fil-Polonja u Electric Glass Fiber NL, B.V. tidħol fi proċedimenti ta’ falliment. Barra minn hekk, wara l-Brexit, NEG UK ġiet eskluża mill-industrija tal-Unjoni, u dan ikkontribwixxa wkoll għat-tnaqqis apparenti fil-kapaċità meta mqabbel mal-investigazzjoni tar-rieżami preċedenti.

(241)

L-użu tal-kapaċità naqas b’10 punti perċentwali matul il-perjodu kkunsidrat peress li l-volum tal-produzzjoni naqas aktar mill-kapaċità tal-produzzjoni.

(242)

Il-volum tal-bejgħ tal-industrija tal-Unjoni fis-suq ħieles u s-sehem mis-suq żviluppaw kif ġej matul il-perjodu kkunsidrat:

Tabella 6

Volum tal-bejgħ fis-suq ħieles u s-sehem mis-suq (tunnellati)

(243)

Fil-perjodu kkunsidrat, il-volum tal-bejgħ fis-suq ħieles tal-Unjoni (eskluż il-bejgħ kaptiv) u s-sehem mis-suq tal-produtturi tal-Unjoni esperjenzaw xejriet notevoli ’l isfel li jirriflettu tnaqqis fid-domanda flimkien ma’ żieda fl-importazzjonijiet mir-RPĊ bi prezzijiet baxxi. B’mod parallel, filwaqt li l-konsum tas-suq ħieles naqas b’6 %, il-volum tal-bejgħ tal-industrija tal-Unjoni naqas saħansitra aktar u b’hekk is-sehem mis-suq tal-industrija tal-Unjoni naqas minn 45 % fl-2021 għal 40 % fl-RIP.

(244)

Il-volum kaptiv żviluppa kif ġej matul il-perjodu kkunsidrat:

Tabella 7

Volum kaptiv fis-suq tal-Unjoni (tunnellati metriċi)

(245)

Il-volum kaptiv tal-industrija tal-Unjoni (magħmul minn trasferimenti kaptivi u bejgħ kaptiv fis-suq tal-Unjoni) fis-suq tal-Unjoni naqas b’10 % matul il-perjodu kkunsidrat. Filwaqt li l-bejgħ kemm fis-suq ħieles kif ukoll fis-suq kaptiv segwa xejra simili mill-2021 sa tmiem l-RIP, it-tnaqqis fil-bejgħ fis-suq kaptiv kien 7 punti perċentwali inqas milli fis-suq ħieles.

(246)

L-impjiegi u l-produttività żviluppaw kif ġej matul il-perjodu kkunsidrat:

Tabella 8

Impjiegi u produttività

(247)

Fil-perjodu kkunsidrat, l-għadd ta’ impjegati fl-industrija tal-Unjoni wera kemm żieda inizjali kif ukoll tnaqqis sussegwenti. Iż-żieda inizjali fl-2022 meta mqabbla mal-2021 kienet tikkorrispondi għaż-żieda fil-produzzjoni u fil-bejgħ wara l-illaxkar tar-restrizzjonijiet tal-COVID-19. Sussegwentement, l-industrija tal-Unjoni kellha tnaqqas l-impjiegi biex taġġusta għall-kundizzjonijiet tas-suq diffiċli u żżomm l-effiċjenza operazzjonali, u xi produtturi tal-Unjoni waqqfu l-produzzjoni tal-GFR għalkollox kif spjegat fil-premessa (46).

(248)

Il-produttività naqset bejn l-2021 u l-2023 minn 190 tunnellata / impjegat għal 166 tunnellata / impjegat qabel ma rpiljat fl-RIP għal 187 tunnellata / impjegat wara li l-impjieg naqas b’mod sinifikanti. It-titjib fl-effiċjenza segwa wkoll l-investiment imwettaq fuq il-fran minn diversi produtturi tal-GFR tal-Unjoni.

(249)

Il-marġnijiet kollha tad-dumping kienu ogħla b’mod sinifikanti mil-livell de minimis. L-impatt tad-daqs tal-marġnijiet reali tad-dumping fuq l-industrija tal-Unjoni ma kienx negliġibbli, meta wieħed iqis il-volum u l-prezzijiet tal-importazzjonijiet mill-pajjiż ikkonċernat.

(250)

Il-konsum ġenerali tal-Unjoni naqas b’6 % waqt il-perjodu kkunsidrat. Il-volum totali tal-bejgħ tal-industrija tal-Unjoni fis-suq tal-Unjoni naqas saħansitra aktar, b’16 %. B’hekk, l-industrija tal-Unjoni tilfet sehem mis-suq, għall-kuntrarju tas-sehem mis-suq tal-importazzjonijiet mill-pajjiż ikkonċernat li żdied matul il-perjodu kkunsidrat.

(251)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 9

Prezzijiet tal-bejgħ u kost tal-produzzjoni fl-Unjoni (EUR/tunnellata metrika)

(252)

Il-prezzijiet medji tal-bejgħ żdiedu fl-2022 meta mqabbla mal-2021 peress li l-produtturi tal-Unjoni inklużi fil-kampjun setgħu jgħaddu ż-żieda fil-kostijiet xprunata mill-inflazzjoni fuq il-klijenti minħabba żieda fid-domanda. Fl-2023 u fl-RIP il-prezzijiet medji tal-bejgħ naqsu b’riżultat ta’ domanda tas-suq globali aktar baxxa u pressjoni akbar fuq il-prezzijiet mill-importazzjonijiet mir-RPĊ.

(253)

Il-kostijiet tal-produzzjoni ta’ unità żdiedu b’26 % mill-2021 sal-2023 minħabba żieda fil-kostijiet lavorattivi u fil-materja prima. Barra minn hekk, il-kostijiet tal-enerġija kienu volatili, u kellhom impatt sinifikanti fuq l-industriji li jibbażaw ħafna fuq l-enerġija. Il-kost unitarju tal-produzzjoni naqas fl-RIP, iżda baqa’ ferm ogħla mil-livell tal-2021, bis-saħħa ta’ tnaqqis fil-prezzijiet tal-enerġija, effiċjenza enerġetika mtejba u strateġiji ta’ ġestjoni tal-kostijiet ta’ suċċess.

(254)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Kostijiet lavorattivi medji għal kull impjegat

(255)

Il-kost lavorattiv medju għal kull impjegat segwa xejra konsistenti ta’ żieda b’żieda ġenerali ta’ 11 % matul il-perjodu kkunsidrat. Iż-żieda kienet prinċipalment dovuta għall-pressjonijiet tas-suq tax-xogħol, hekk kif il-kumpaniji żiedu l-pagi biex iżommu u jattiraw impjegati f’suq tax-xogħol strett ta’ wara l-COVID ikkaratterizzat minn inflazzjoni għolja.

(256)

Il-livelli tal-istokks tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Inventarji

(257)

Iż-żieda fl-inventarji fl-2022 inizjalment kienet xprunata minn bini strateġiku tal-istokk b’antiċipazzjoni tal-bini mill-ġdid ippjanat tal-fran. Dan kien allinjat ma’ perjodu aktar bikri matul il-COVID-19 meta kien hemm żieda sinifikanti fil-kwistjonijiet tad-domanda u tal-katina tal-provvista li wassal lill-produtturi tal-Unjoni jordnaw b’mod eċċessiv il-materja prima biex jissodisfaw ir-rekwiżiti tal-produzzjoni. Wara t-tlestija tal-bini mill-ġdid tal-fran, l-inventarji naqsu hekk kif il-produtturi tal-Unjoni inklużi fil-kampjun irnexxielhom ibigħu l-istokks eżistenti fl-2023 u fl-RIP. Iż-żidiet fl-inventarji fl-2022 kienu dovuti għaż-żieda fil-bini tal-istokk b’antiċipazzjoni tal-għeluq matul il-bini mill-ġdid ippjanat tal-forn. Madankollu, ladarba sar il-bini mill-ġdid, kien hemm tnaqqis fl-inventarji hekk kif il-produtturi tal-Unjoni inklużi fil-kampjun irnexxielhom ibigħu dawk l-inventarji fl-2023 u l-RIP li jikkoinċidi ma’ tnaqqis fil-volum tal-produzzjoni

(258)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Profittabbiltà, fluss ta’ flus, investimenti u redditu fuq l-investimenti

(259)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta’ dak il-bejgħ. Filwaqt li l-industrija tal-Unjoni ġarrbet telf fl-2021, kien hemm żieda fil-profittabbiltà fl-2022 peress li l-produtturi tal-Unjoni inklużi fil-kampjun setgħu jgħaddu ż-żieda fil-kostijiet unitarji tal-produzzjoni lill-klijenti bis-saħħa ta’ kundizzjonijiet tas-suq favorevoli marbuta ma’ domanda għolja u kostijiet għoljin tat-trasport. Fl-2023 u fl-RIP, il-profittabbiltà, madankollu, naqset minħabba żieda fil-kostijiet li ma setgħetx tiġi kkumpensata b’żieda fil-prezzijiet tal-bejgħ minħabba żieda fil-volumi tal-importazzjoni bi prezzijiet oġġett ta’ dumping mir-RPĊ li waqqgħu l-prezzijiet tal-industrija tal-Unjoni.

(260)

L-investimenti żdiedu matul il-perjodu kkunsidrat. Dawn l-investimenti kienu prinċipalment relatati mal-bini mill-ġdid ta’ fran tal-produtturi tal-Unjoni inklużi fil-kampjun bl-għan li tiġi żgurata l-lonġevità tat-tagħmir. Dawn l-investimenti, li kienu ilhom li ġew ippjanati, seħħew fl-isfond ta’ kundizzjonijiet tas-suq mhux favorevoli prevalenti fl-2023 u fl-RIP.

(261)

Il-fluss tal-flus mill-2021 sal-RIP wera fluttwazzjonijiet sinifikanti xprunati minn kundizzjonijiet volatili tas-suq u limitazzjonijiet operazzjonali speċifiċi ta’ xi impjanti bħala riżultat tal-posponiment tal-bini mill-ġdid tal-fran. Matul il-perjodu kkunsidrat, l-2022 kienet l-unika sena li fiha l-produtturi kollha tal-Unjoni inklużi fil-kampjun kisbu profitti sinifikanti, eżawriti parzjalment fl-akkumulazzjoni ta’ inventarji fid-dawl tal-bini mill-ġdid ippjanat ta’ fran, u dan wassal għal fluss tal-flus pożittiv. Fl-2023 u matul l-RIP, minkejja li esperjenzaw telf kbir, il-flussi tal-flus baqgħu pożittivi. Din is-sitwazzjoni li tidher kontradittorja, b’mod partikolari evidenti fl-RIP, tista’ tiġi attribwita l-aktar għall-impatt pożittiv sinifikanti tal-fluss tal-flus li jirriżulta mit-tnaqqis fil-livelli tal-inventarju li kien ġie akkumulat fl-2022.

(262)

Ir-redditu fuq l-investimenti huwa l-profitt f’perċentwal tal-valur kontabilistiku nett tal-investimenti. Ir-redditu fuq l-investiment żviluppa f’konformità mal-profittabbiltà. L-ewwel żdied fl-2022 qabel ma ddeterjora fl-2023 u saħansitra aktar fl-RIP, li għamilha aktar diffiċli għall-industrija tal-Unjoni biex tiġbor il-kapital u tikber.

(263)

Matul il-perjodu kkunsidrat, l-industrija tal-Unjoni kienet profittabbli biss fl-2022, u wara reġgħet bdiet tagħmel telf. Fl-2023 u fl-RIP, is-sitwazzjoni ta’ telf tal-industrija tal-Unjoni kkoinċidiet ma’ żieda fl-importazzjonijiet mir-RPĊ bi prezzijiet taħt il-prezzijiet medji tal-bejgħ u l-kostijiet tal-produzzjoni tal-industrija tal-Unjoni.

(264)

L-industrija tal-Unjoni setgħet iżżid il-livell tal-prezzijiet tagħha fl-2022 biex tikseb sitwazzjoni profittabbli. Madankollu, fl-2023 u fl-RIP, id-differenza bejn il-prezzijiet tal-bejgħ tal-industrija tal-Unjoni u l-prezzijiet tal-importazzjonijiet mir-RPĊ żdiedet. Il-prezzijiet tal-Unjoni żdiedu b’10 % matul il-perjodu kkunsidrat filwaqt li l-prezzijiet tal-importazzjonijiet mir-RPĊ naqsu bi 28 % matul l-istess perjodu. Konsegwentement, il-prezzijiet tal-importazzjonijiet tal-prodott taħt rieżami mir-RPĊ segwew xejra opposta għal dik tal-industrija tal-Unjoni. B’riżultat ta’ dan, minkejja li l-industrija tal-Unjoni kienet imġiegħla tbigħ b’telf, hija tilfet sehem mis-suq għall-importazzjonijiet mir-RPĊ bejn l-2021 u l-RIP.

(265)

Kważi l-indikaturi kollha tad-dannu wrew xejra negattiva ġenerali matul il-perjodu kkunsidrat. Il-produzzjoni, il-kapaċità tal-produzzjoni, l-użu tal-kapaċità, il-profittabbiltà, ir-redditu fuq l-investimenti kollha ddeterjoraw, f’konformità mat-tnaqqis fil-volumi tal-bejgħ u fis-sehem mis-suq. Fl-2022, l-Unjoni setgħet tirkupra sa ċertu punt hekk kif id-domanda għall-GFR żdiedet wara t-tneħħija tal-miżuri tal-COVID-19. Madankollu, fl-2023 u fl-RIP minħabba ż-żieda fil-volum tal-importazzjoni bi prezzijiet dejjem jonqsu, is-sitwazzjoni tal-industrija tal-Unjoni kompliet tmur għall-agħar kif muri miż-żieda fit-telf tagħha.

(266)

Kif stabbilit hawn fuq, indikaturi ekonomiċi oħra bħar-redditu fuq l-investiment kienu negattivi matul il-perjodu kkunsidrat bl-eċċezzjoni tas-sena 2022. Dan affettwa l-kapaċità tal-industrija tal-Unjoni li tiffinanzja lilha nnifisha u li tiġbor il-kapital, u b’hekk impedixxa t-tkabbir tagħha u saħansitra hedded is-sopravivenza tagħha fuq terminu medju sa twil.

(267)

Abbażi ta’ dak li ntqal hawn fuq, il-Kummissjoni kkonkludiet li l-industrija tal-Unjoni ġarrbet dannu materjali skont it-tifsira tal-Artikolu 3(5) tar-Regolament bażiku.

(268)

F’konformità mal-Artikolu 3(6) tar-Regolament bażiku, ġie eżaminat jekk l-importazzjonijiet oġġett ta’ dumping mir-RPĊ ikkawżawx dannu materjali lill-industrija tal-Unjoni.

(269)

F’konformità mal-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħra setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kull dannu possibbli kkawżat minn fatturi għajr l-importazzjonijiet oġġett ta’ dumping mill-pajjiż ikkonċernat ma kienx attribwit għall-importazzjonijiet oġġett ta’ dumping. Il-fatturi kkunsidrati mill-Kummissjoni kienu importazzjonijiet minn pajjiżi terzi għajr ir-RPĊ, il-prestazzjoni tal-esportazzjoni tal-industrija tal-Unjoni, iż-żieda fil-kost tal-materja prima u l-kost tal-enerġija fuq l-industrija tal-Unjoni u t-tnaqqis fid-domanda.

(270)

Il-Kummissjoni eżaminat l-evoluzzjoni tal-volum tal-importazzjonijiet mill-pajjiż ikkonċernat u l-impatt tagħhom fuq l-industrija tal-Unjoni kif meħtieġ mill-Artikolu 3(6) tar-Regolament bażiku.

(271)

L-investigazzjoni wriet li, minkejja l-miżuri anti-dumping u kumpensatorji fis-seħħ u t-tnaqqis fil-konsum, il-volum tal-importazzjonijiet oġġett ta’ dumping li jwaqqgħu l-prezzijiet tal-industrija tal-Unjoni mir-RPĊ żdied kemm f’termini assoluti kif ukoll relattivi matul il-perjodu kkunsidrat. Meta wieħed iqis l-2021 bħala sena ta’ referenza, il-volum tal-importazzjoni żdied b’51 % filwaqt li s-sehem mis-suq tal-importazzjonijiet li joriġinaw mir-RPĊ żdied minn 6 % fl-2021 għal 10 % fl-RIP.

(272)

Fl-istess ħin, l-industrija tal-Unjoni rat is-sehem mis-suq tagħha jonqos b’ħames punti perċentwali matul il-perjodu kkunsidrat.

(273)

Il-prezzijiet unitarji medji tal-importazzjonijiet oġġett ta’ dumping naqsu bi 28 % bejn l-2021 u l-RIP u kienu aktar baxxi minn dawk tal-industrija tal-Unjoni matul l-istess perjodu.

(274)

L-industrija tal-Unjoni kienet profittabbli fl-2022 u saret industrija li tagħmel it-telf wara, li kkoinċida mat-tnaqqis sinifikanti fil-prezzijiet tal-importazzjonijiet mir-RPĊ. Anke wara li naqqset il-prezz tal-bejgħ tagħha fl-2023 u fl-RIP, l-industrija tal-Unjoni naqset milli żżomm is-sehem mis-suq tagħha. Dan it-tnaqqis fil-prezz sar għad-detriment tal-profittabbiltà, u dan wassal għal sitwazzjoni ta’ telf.

(275)

Abbażi ta’ dan ta’ hawn fuq, ġie konkluż li l-livell tal-prezz tal-importazzjonijiet oġġett ta’ dumping mir-RPĊ, kellu impatt negattiv konsiderevoli fuq is-sitwazzjoni ekonomika tal-industrija tal-Unjoni u għalhekk kellu rwol deċiżiv fid-dannu materjali mġarrab mill-industrija tal-Unjoni.

(276)

Id-deterjorament tas-sitwazzjoni ekonomika tal-industrija tal-Unjoni kkoinċida ma’ żieda fil-preżenza ta’ importazzjonijiet oġġett ta’ dumping mir-RPĊ. F’kuntest ta’ suq li qiegħed jiċkien, iż-żieda fis-sehem mis-suq tal-importazzjonijiet mir-RPĊ flimkien mal-prezzijiet tal-bejgħ medji baxxi tagħhom kellhom impatt negattiv fuq is-sitwazzjoni finanzjarja tal-industrija tal-Unjoni. Għalkemm l-industrija tal-Unjoni kienet kapaċi tirkupra fl-2022, ma setgħetx iżżid il-prezzijiet tal-bejgħ tagħha b’mod suffiċjenti biex tkopri bis-sħiħ iż-żieda fil-kostijiet tal-produzzjoni, minħabba ż-żieda fil-preżenza ta’ importazzjonijiet oġġett ta’ dumping tal-GFR mir-RPĊ. Għalhekk, il-Kummissjoni kkonkludiet li ż-żieda fl-importazzjonijiet mir-RPĊ bi prezzijiet oġġett ta’ dumping ikkoinċidiet mad-deterjorament sinifikanti tas-sitwazzjoni tal-industrija tal-Unjoni fl-2023, li kompliet fl-RIP.

(277)

Fid-dawl tal-kunsiderazzjonijiet ta’ hawn fuq, il-Kummissjoni stabbiliet li d-dannu materjali mġarrab mill-industrija tal-Unjoni kien ikkawżat mill-importazzjonijiet oġġett ta’ dumping mir-RPĊ skont it-tifsira tal-Artikolu 3(6) tar-Regolament bażiku.

(278)

L-importazzjonijiet tal-GFR minn pajjiżi terzi għajr ir-RPĊ oriġinaw prinċipalment mill-Eġittu, mill-Malażja u mir-Renju Unit.

(279)

Il-volum tal-importazzjonijiet fl-Unjoni kif ukoll is-sehem mis-suq u x-xejriet tal-prezzijiet għall-importazzjonijiet tal-GFR minn pajjiżi terzi oħra żviluppaw kif ġej:

Tabella 13

Importazzjonijiet minn pajjiżi terzi

(280)

Ix-xejra fl-importazzjonijiet Malażjani lejn l-Unjoni mill-2021 sal-RIP uriet tnaqqis sinifikanti kemm fil-volum kif ukoll fis-sehem mis-suq, flimkien ma’ fluttwazzjonijiet fl-ipprezzar. Il-volumi tal-importazzjoni naqsu drastikament minn 136 086 tunnellata metrika fl-2021 għal 76 909 tunnellati metriċi fl-2023, qabel irkupru minuri għal 84 827 tunnellata sal-RIP. B’mod korrispondenti, is-sehem mis-suq tal-importazzjonijiet Malażjani naqas minn 15 % għal 9 % qabel ma tjieb bi ftit għal 10 %. Għalkemm il-prezz medju għal kull tunnellata metrika inizjalment żdied bi 32 % fl-2022, kien hemm tnaqqis sinifikanti fl-2023 u fl-RIP.

(281)

Il-volumi u s-sehem mis-suq tal-importazzjonijiet tal-GFR li joriġinaw mill-Eġittu baqgħu stabbli fost fluttwazzjoni sinifikanti tal-prezzijiet, speċjalment meta mqabbla mal-prezzijiet medji tal-Unjoni. Il-volumi ta’ importazzjonijiet Eġizzjani wrew żieda żgħira ta’ madwar 5 % mill-2021 sal-2022, tnaqqis ta’ madwar 10 % fl-2023 u ritorn għal livelli kważi oriġinali mill-RIP, filwaqt li zammew sehem mis-suq kostanti ta’ 12 % li kiber bi ftit għal 13 % fl-RIP. Il-prezzijiet tal-importazzjonijiet Eġizzjani baqgħu aktar baxxi kemm mill-prezzijiet medji tal-industrija tal-Unjoni kif ukoll mill-prezzijiet tal-importazzjonijiet Ċiniżi.

(282)

L-importazzjonijiet tal-GFR mir-Renju Unit fl-Unjoni bejn l-2021 u l-RIP urew żieda fil-volum, u sehem mis-suq relattivament stabbli. Il-volumi tal-importazzjonijiet mir-Renju Unit żdiedu mill-2021 sal-2022, qabel ma naqsu b’madwar 12 % fl-2023 u b’5 % oħra sal-RIP. Is-sehem mis-suq żdied minn 4 % għal 6 % matul l-2022 u l-2023, u naqas bi ftit għal 5 % fl-RIP. Il-prezz medju għal kull tunnellata metrika mir-Renju Unit kien f’livelli simili jew ogħla mill-prezz medju tal-industrija tal-Unjoni, u ogħla mill-prezz tal-importazzjonijiet mir-RPĊ. Il-prezzijiet tal-importazzjonijiet mir-Renju Unit l-ewwel żdiedu b’31 % mill-2021 sal-2022 u komplew jiżdiedu għal EUR 1 397 fl-2023, qabel tnaqqis żgħir għal EUR 1 273 fl-RIP.

(283)

L-importazzjonijiet tal-GFR minn pajjiżi terzi, esklużi dawk speċifikati qabel, fl-Unjoni matul il-perjodu kkunsidrat esperjenzaw żieda fil-volum u fis-sehem mis-suq li żdiedu minn 18 % għal 20 %. Madankollu, il-prezzijiet medji minn dawn il-pajjiżi kienu ogħla mill-prezzijiet tal-importazzjonijiet mir-RPĊ.

(284)

L-analiżi tad-data dwar l-importazzjoni għall-GFR li toriġina minn pajjiżi terzi oħra turi stampa mħallta. L-importazzjonijiet mill-Malażja naqsu b’mod sinifikanti f’termini assoluti u relattivi matul il-perjodu kkunsidrat filwaqt li kellhom prezz taħt il-prezzijiet tal-industrija tal-Unjoni. L-importazzjonijiet li joriġinaw mill-Eġittu baqgħu stabbli filwaqt li kellhom ukoll prezz taħt il-prezzijiet medji tal-industrija tal-Unjoni. L-importazzjonijiet mir-Renju Unit, għalkemm żdiedu, daħlu fl-Unjoni bi prezzijiet ogħla fl-2023 u fl-RIP. Il-volumi tal-importazzjonijiet minn pajjiżi terzi oħra mhux imsemmija hawn fuq żdiedu f’termini assoluti u relattivi matul il-perjodu kkunsidrat. Kollox ma’ kollox, ma kien hemm l-ebda importazzjoni sinifikanti minn pajjiżi terzi li żiedu s-sehem mis-suq tagħhom filwaqt li żammew prezzijiet inqas minn dawk tal-industrija tal-Unjoni matul il-perjodu kkunsidrat, u b’mod partikolari fl-RIP.

(285)

Fid-dawl ta’ dan ta’ hawn fuq, il-Kummissjoni kkonkludiet li l-importazzjonijiet minn pajjiżi terzi oħra ma naqqsux ir-rabta kawżali bejn id-dannu mġarrab mill-industrija tal-Unjoni u l-importazzjonijiet oġġett ta’ dumping mir-RPĊ.

(286)

Il-volum tal-esportazzjonijiet tal-industrija tal-Unjoni żviluppa kif ġej matul il-perjodu kkunsidrat:

Tabella 14

Prestazzjoni tal-esportazzjoni tal-produtturi tal-Unjoni

(287)

Mill-2021, l-esportazzjonijiet tal-industrija tal-Unjoni żdiedu gradwalment, għalkemm baqgħu żgħar meta mqabbla mal-bejgħ totali. Dawn l-esportazzjonijiet kienu fil-biċċa l-kbira magħmula minn prodotti ta’ speċifikazzjonijiet tekniċi ogħla, li kienu jipproteġuhom minn kompetizzjoni diretta fil-prezzijiet. Konsegwentement, l-Unjoni setgħet tikseb prezzijiet ogħla għal dawn il-prodotti tal-GFR fis-swieq internazzjonali meta mqabbla mas-suq tal-Unjoni. Dan irrifletta enfasi strateġika fuq swieq niċċa barra mill-pajjiż.

(288)

Għalhekk, iż-żieda fil-bejgħ għall-esportazzjoni ma naqqsitx ir-rabta kawżali bejn l-importazzjonijiet oġġett ta’ dumping mill-pajjiż ikkonċernat u d-dannu mġarrab mill-industrija tal-Unjoni. Għall-kuntrarju, il-bejgħ għall-esportazzjoni ppermetta lill-industrija tal-Unjoni ttejjeb is-sitwazzjoni finanzjarja ġenerali tagħha bis-saħħa taż-żieda fil-volum tal-bejgħ u l-livelli tal-prezzijiet miksuba, li kienu ogħla milli fis-suq tal-Unjoni.

(289)

Il-prezz medju tal-enerġija tal-industrija tal-Unjoni żviluppa kif ġej matul il-perjodu kkunsidrat:

Tabella 15

Prezzijiet tal-enerġija u tal-materja prima fl-Unjoni

(290)

Ix-xejra fil-prezzijiet tal-enerġija fl-Unjoni matul il-perjodu kkunsidrat uriet żieda sinifikanti u stabbilizzazzjoni eventwali. Iż-żieda qawwija fl-2022, meta mqabbla mal-2021, ġiet aggravata mill-konsegwenzi tat-tensjonijiet ġeopolitiċi li jaffettwaw il-provvista tal-enerġija prinċipalment minħabba l-gwerra ta’ aggressjoni mhux ġustifikata u mhux provokata tar-Russja kontra l-Ukrajna. Iż-żieda qawwija fil-prezzijiet tal-enerġija kellha impatt sinifikanti fuq il-kostijiet tal-produzzjoni tal-produtturi tal-Unjoni inklużi fil-kampjun. Sal-2023, il-prezzijiet tal-enerġija naqsu.

(291)

L-investigazzjoni żvelat li l-kost tal-materja prima ewlenija żdied b’mod sostanzjali fl-2022, u kkontribwixxa għal żieda sinifikanti fil-prezz tal-bejgħ ta’ unità peress li l-industrija tal-Unjoni setgħet tgħaddi dawn il-kostijiet lill-klijenti. Għall-kuntrarju, filwaqt li fl-2023 il-kostijiet tal-materja prima komplew jiżdiedu, il-prezz tal-bejgħ unitarju naqas peress li l-industrija tal-Unjoni ma setgħetx tgħaddi dawn il-kostijiet addizzjonali lill-klijenti. Fl-RIP, filwaqt li l-kostijiet tal-materja prima naqsu meta mqabbla mal-kostijiet osservati fis-snin 2023 u 2022, il-prezzijiet tas-suq tal-Unjoni komplew jonqsu minħabba li l-industrija tal-Unjoni ma setgħetx iżżomm jew iżżid il-prezzijiet tagħha minħabba l-pressjoni fuq il-prezzijiet mill-importazzjonijiet oġġett ta’ dumping miċ-Ċina.

(292)

Abbażi ta’ dan, il-Kummissjoni kkonkludiet li l-evoluzzjoni tal-prezzijiet tal-enerġija u tal-kostijiet tal-materja prima ma naqqsitx ir-rabta kawżali bejn l-importazzjonijiet oġġett ta’ dumping u d-deterjorament tas-sitwazzjoni ekonomika tal-industrija tal-Unjoni.

(293)

Kif innotat fil-premessa (245), il-bejgħ kemm fis-suq ħieles kif ukoll f’dak kaptiv wera xejra simili matul il-perjodu kkunsidrat, bil-bejgħ kaptiv jesperjenza tnaqqis aktar bil-mod, b’mod speċifiku ta’ 7 punti perċentwali inqas. Għalhekk, il-bejgħ kaptiv ma setax jitqies bħala fattur li dgħajjef ir-relazzjoni kawżali bejn l-importazzjonijiet oġġett ta’ dumping u l-effett tagħhom fuq l-industrija tal-Unjoni.

(294)

Għalkemm kien hemm xi tnaqqis fid-domanda, kif spjegat fil-premessa (171), l-importazzjonijiet Ċiniżi żiedu s-sehem mis-suq tagħhom minn 6 % fl-2021 għal 10 % fl-RIP, filwaqt li l-volum tal-bejgħ u s-sehem mis-suq tal-industrija tal-Unjoni naqsu. Barra minn hekk, l-investigazzjoni kkonkludiet ukoll dwar it-twaqqigħ tal-prezzijiet u s-soppressjoni tal-prezzijiet mill-importazzjonijiet Ċiniżi.

(295)

Abbażi ta’ dan, il-Kummissjoni kkonkludiet li t-tnaqqis fid-domanda ma naqqasx ir-rabta kawżali bejn l-importazzjonijiet oġġett ta’ dumping u d-deterjorament tas-sitwazzjoni ekonomika tal-industrija tal-Unjoni

(296)

Kien hemm deterjorament ġenerali tas-sitwazzjoni finanzjarja tal-industrija tal-Unjoni fl-2023 u fl-RIP. Dawn iċ-ċirkostanzi negattivi ħabtu fiż-żmien ma’ żieda fis-sehem mis-suq tal-importazzjonijiet tal-GFR mir-RPĊ, li saru bi prezzijiet oġġett ta’ dumping li waqqgħu l-prezzijiet u l-kostijiet tal-industrija tal-Unjoni minkejja l-eżistenza ta’ dazji anti-dumping u kumpensatorji.

(297)

Ġew analizzati wkoll fatturi oħra li setgħu jikkawżaw dannu lill-industrija tal-Unjoni. F’dan ir-rigward, instab li l-importazzjonijiet minn pajjiżi terzi oħra, il-prestazzjoni tal-esportazzjoni tal-industrija tal-Unjoni, iż-żieda fil-prezzijiet tal-enerġija, l-iżvilupp fis-suq kaptiv u t-tnaqqis fid-domanda ma naqqsux ir-rabta kawżali stabbilita bejn l-importazzjonijiet oġġett ta’ dumping u d-dannu mġarrab mill-industrija tal-Unjoni.

(298)

L-investigazzjoni stabbiliet li l-industrija tal-Unjoni ġarrbet dannu materjali kkawżat mill-importazzjonijiet oġġett ta’ dumping mir-RPĊ matul l-RIP. Kif spjegat fil-premessa (52), matul l-RIP żewġ produtturi tal-Unjoni waqqfu għalkollox il-produzzjoni tal-GFR minħabba kundizzjonijiet mhux favorevoli tas-suq.

(299)

L-emenda tal-miżuri tippermetti lill-industrija tal-Unjoni żżomm u/jew terġa’ tikseb is-sehem mis-suq tagħha, iżżid il-produzzjoni u l-użu tal-kapaċità, iżżid il-prezzijiet biex tkopri l-kost tal-produzzjoni u tikseb livell ta’ profittabbiltà li jkun mistenni f’kundizzjonijiet normali ta’ kompetizzjoni. Abbażi ta’ dan, l-industrija tal-Unjoni jkollha bżonn terġa’ lura għal sitwazzjoni sostenibbli li tippermettilha tagħmel investimenti futuri.

(300)

Iż-żamma tal-miżuri fl-istess livell x’aktarx twassal għal aktar telf tas-sehem mis-suq u deterjorament tal-profittabbiltà, li sar negattiv fl-2023 u fl-RIP. Dan possibbilment jikkawża għeluq addizzjonali ta’ faċilitajiet ta’ produzzjoni u sensji u b’hekk jipperikola l-vijabbiltà tal-industrija tal-Unjoni.

(301)

Għalhekk, il-Kummissjoni kkonkludiet li l-emenda tal-miżuri anti-dumping fuq l-importazzjonijiet tal-GFR li joriġinaw mir-RPĊ tkun fl-interess tal-industrija tal-Unjoni.

(302)

L-ebda importatur mhux relatat ma ppreżenta ruħu u kkoopera f’din l-investigazzjoni billi ppreżenta tweġiba għall-kwestjonarju.

(303)

Matul l-investigazzjoni żewġ utenti biss, Amiblu Holding GmbH u F.S. Fehrer Automotive GmbH, ippreżentaw ruħhom u pprovdew tweġibiet għall-kwestjonarju b’nuqqasijiet kbar. Il-Kummissjoni talbet lill-partijiet ikkonċernati biex jipprovdu l-informazzjoni pendenti; madankollu, huma ma kkonformawx ma’ din it-talba fiż-żmien preskritt.

(304)

Mal-bidu, utent ieħor, PROXIM, esprima oġġezzjonijiet għall-emenda potenzjali tal-miżuri. PROXIM asserixxa li ħafna utenti ma kinux jafu bl-investigazzjoni, u dan waqqafhom milli jissottomettu l-kwestjonarju fil-perjodu ta’ żmien magħżul.

(305)

Madankollu, il-Kummissjoni ħadet il-passi kollha neċessarji biex tiżgura li l-utenti magħrufa u l-importaturi mhux relatati kollha msemmija fit-talba jiġu nnotifikati kif xieraq. Barra minn hekk, ġiet ippubblikata Notifika tal-Bidu f’Il-Ġurnal Uffiċjali, li tinforma lill-partijiet interessati kollha dwar l-investigazzjoni. Ġew ippubblikati wkoll kwestjonarji maħsubin għall-utenti u l-importaturi fuq is-sit web tal-każ (119).

(306)

Fis-sottomissjoni tagħhom, l-utenti Tolnatext Fonalfeldolgozo es Müszakiszovet-gyàrto Bt. (“Tolnatext”) u Dr. Günther Kast GmbH & Co., li huma parti mill-Grupp KAST, asserew li l-implimentazzjoni ta’ miżuri kummerċjali addizzjonali taffettwa b’mod negattiv katina tal-provvista effiċjenti. Skont Tolnatext, minkejja li huma protetti mill-miżuri eżistenti, il-produtturi tal-Unjoni ma żidux il-kapaċità tagħhom li jfornu lis-suq tal-Unjoni bil-GFR biex jissodisfaw b’mod adegwat id-domandi tal-utenti. Barra minn hekk, huma nnotaw li ċerti faxex tal-fibra bħal faxex tal-fibra b’livell baxx ta’ tex ma jiġux prodotti fl-Unjoni, u, għal xi wħud, l-ispeċifikazzjonijiet tekniċi meħtieġa mill-utenti ma jiġux issodisfati mill-produtturi tal-Unjoni, u dan jagħmel lill-utenti dipendenti ħafna fuq id-disponibbiltà ta’ prodotti speċifikati minn sorsi alternattivi. Fl-aħħar nett, l-utenti fl-Unjoni ntlaqtu b’mod negattiv mit-tnaqqis fir-rifużjoni tat-taxxa fuq l-esportazzjoni tar-RPĊ u b’oligopolju dejjem aktar ikkonċentrat ta’ ftit produtturi tal-Unjoni. Kummenti simili ġew sottomessi minn PROXIM fis-sottomissjoni tiegħu dwar it-Tieni Nota tal-FOP.

(307)

L-investigazzjoni ddeterminat li dawn l-asserzjonijiet ma kinux fondati. Kif enfasizzat fil-premessa (260), l-industrija tal-Unjoni għamlet investimenti sostanzjali minkejja kundizzjonijiet tas-suq diffiċli. Madankollu, espansjoni ulterjuri tal-kapaċità teħtieġ impenji kapitali fit-tul, li jibbażaw fuq iż-żamma ta’ kundizzjonijiet ekwi fejn il-produtturi kompetittivi jistgħu jantiċipaw redditu ġust fuq l-investimenti. L-industrija tal-Unjoni kienet iffaċċjata wkoll b’importazzjonijiet inġusti minn pajjiżi oħra bħall-Eġittu (120) u kundizzjonijiet tas-suq diffiċli, inklużi l-impatti tal-pandemija tal-COVID-19.

(308)

Il-GFR huwa fil-biċċa l-kbira prodott standardizzat. Minkejja diversi differenzi fid-dehra u differenzi potenzjali fl-applikazzjonijiet finali, it-tipi differenti kollha tal-GFR għandhom l-istess karatteristiċi fiżiċi, kimiċi u tekniċi bażiċi u essenzjalment jintużaw għall-istess skopijiet. Għalhekk, l-utenti tal-GFR jistgħu jibdlu s-sorsi tal-provvista peress li sorsi alternattivi ta’ provvista huma disponibbli barra mir-RPĊ, inklużi l-Malażja, l-Eġittu, ir-Renju Unit u sorsi oħra. Barra minn hekk, l-industrija tal-Unjoni għandha l-kapaċità, il-kompetenza u t-teknoloġija għall-produzzjoni ta’ ħafna tipi meħtieġa bħal faxex tal-fibra b’livell baxx ta’ tex. L-industrija tal-Unjoni ilha tagħmel investiment fl-innovazzjoni u ħadmet b’mod konsistenti mal-industriji downstream fl-isforzi tar-R&Ż (riċerka u żvilupp) biex il-prodotti jitfasslu b’mod effettiv. Sfortunatament, kif innotat fil-premessa (327), investimenti bħal dawn mhux dejjem setgħu jsiru minħabba l-kompetizzjoni ħarxa marbuta mal-importazzjonijiet oġġett ta’ dumping mir-RPĊ.

(309)

Anke bit-tnaqqis fir-rifużjoni tat-taxxa fuq l-esportazzjoni tar-RPĊ f’Novembru 2024, fis-suq tal-Unjoni komplew jidħlu volumi kbar ta’ importazzjonijiet. Dan issuġġerixxa li l-bidla fir-rifużjonijiet waħedha ma kellhiex impatt sinifikanti fuq id-dinamika tas-suq. Ġie analizzat it-tħassib dwar il-konċentrazzjoni tas-suq. F’dan ir-rigward, il-Kummissjoni nnotat li, b’mod ġenerali, il-korpi regolatorji jiskrutinizzaw bir-reqqa l-fużjonijiet u l-akkwiżizzjonijiet biex jipprevjenu mġiba antikompetittiva. Tali kwistjonijiet, madankollu, jaqgħu barra mill-ambitu ta’ din l-investigazzjoni kummerċjali. Abbażi ta’ dan, dawn l-asserzjonijiet ġew miċħuda.

(310)

L-utent OPTIPLAN GmbH issottometta l-kummenti wara l-iskadenza speċifikata fin-Notifika tal-Bidu, li tirrikjedi li l-partijiet interessati kollha jippreżentaw il-fehmiet, l-informazzjoni u l-evidenza ta’ sostenn tagħhom fi żmien 37 jum mill-pubblikazzjoni tan-Notifika. Fis-sottomissjoni tiegħu OPTIPLAN sostna li żieda fid-dazji anti-dumping u kumpensatorji kkombinati jkollha impatt fuq l-attivitajiet tiegħu peress li tfixkel il-katina tal-provvista tiegħu minħabba l-provvista limitata u l-ħtieġa li tikkwalifika fornituri ġodda. OPTIPLAN sostna wkoll li miżuri ogħla jżidu wkoll il-kostijiet tiegħu.

(311)

Filwaqt li OPTIPLAN ma pprovda l-ebda evidenza biex jappoġġa l-asserzjoni tiegħu relatata man-nuqqas ta’ provvista, il-Kummissjoni tirreferi għall-premessa (307) fejn din il-kwistjoni diġà hija indirizzata. Fin-nuqqas ta’ tweġiba għall-kwestjonarju minn OPTIPLAN, l-asserzjoni relatata mal-kostijiet ma setgħetx tiġi vvalutata. Għalhekk, dawn il-kummenti ġew miċħuda.

(312)

Wara d-divulgazzjoni, PROXIM argumenta li l-Kummissjoni ma qisitx kif xieraq is-sitwazzjoni u l-argumenti tal-utenti tal-Unjoni tar-rinforzi tal-fibra tal-ħġieġ (GFR). Hu sostna li l-utenti jinsabu f’pożizzjoni kompetittiva ferm aktar diffiċli mill-produtturi tal-Unjoni, partikolarment dawk li huma integrati vertikalment. PROXIM sostna wkoll li l-Kummissjoni naqset milli tipprovdi assistenza adegwata lill-utenti biex tiffaċilita l-parteċipazzjoni effettiva tagħhom fl-investigazzjoni, li rriżulta f’li t-tħassib tagħhom ma jiġix rifless kif xieraq fis-sejbiet.

(313)

Il-Kummissjoni fakkret li l-utenti magħrufa u l-importaturi mhux relatati kollha identifikati fit-talba ġew infurmati kif xieraq dwar il-bidu tar-rieżami. Notifika tal-Bidu ġiet ippubblikata fil-Ġurnal Uffiċjali, kwestjonarji għall-utenti u l-importaturi saru disponibbli online, u l-partijiet kollha ġew mistiedna jipprovdu kummenti u jitolbu seduti ta’ smigħ. Diversi utenti, inkluż PROXIM, fil-fatt għamlu sottomissjonijiet, u l-partijiet li talbu seduta ta’ smigħ ingħataw waħda. Għalhekk, il-Kummissjoni kkonkludiet li l-utenti ngħataw kull opportunità li jipparteċipaw, u li l-argumenti tagħhom tqiesu f’konformità mar-rekwiżiti proċedurali.

(314)

PROXIM argumenta wkoll li, skont informazzjoni disponibbli għall-pubbliku, fl-aħħar tal-2024 il-Gvern tar-Repubblika tal-Poplu taċ-Ċina naqqas il-livell tar-rifużjonijiet tat-taxxa fuq l-esportazzjoni għal ċerti kategoriji ta’ prodotti minerali mhux metalliċi, inklużi linji tariffarji potenzjalment rilevanti għall-GFR, minn 13 % għal 9 %. Fil-fehma tiegħu, dan l-iżvilupp naqqas b’mod effettiv il-livell ta’ sussidjar min-naħa tar-RPĊ u kien jenħtieġ li jitqies meta ġie stabbilit il-livell ta’ miżuri kumpensatorji.

(315)

Fir-rigward tar-referenza għat-tnaqqis tar-rifużjoni tat-taxxa fuq l-esportazzjoni tar-RPĊ fl-aħħar tal-2024, il-Kummissjoni nnotat li volumi kbar ta’ importazzjonijiet sussidjati mir-RPĊ komplew jidħlu fis-suq tal-Unjoni anki wara dan it-tnaqqis fir-rifużjoni. Kif stabbilit fl-investigazzjoni, il-bidla fir-rifużjoni ma biddlitx materjalment id-dinamika tas-suq, li baqgħet ikkaratterizzata minn twaqqigħ tal-prezzijiet u soppressjoni sinifikanti tal-prezzijiet mill-importazzjonijiet Ċiniżi. Barra minn hekk, il-bidla fir-rifużjoni seħħet wara l-perjodu ta’ investigazzjoni tar-rieżami u għalhekk ma setgħetx titqies fid-determinazzjoni tal-livell ta’ sussidjar f’dan il-proċediment.

(316)

Barra minn hekk, PROXIM sostna li l-livell attwali ta’ miżuri jirriskja li joħloq dannu lill-industriji downstream fl-Unjoni billi jżid il-kostijiet tagħhom meta mqabbla mal-kompetituri barra mill-Unjoni. B’mod partikolari, indika r-riskju ta’ kompetittività mnaqqsa tal-utenti tal-Unjoni u r-rilokazzjoni possibbli ta’ attivitajiet downstream barra mill-Unjoni. Għalhekk, PROXIM talab li l-Kummissjoni tiżgura approċċ aktar bilanċjat bejn il-protezzjoni tal-produtturi tal-Unjoni u l-interessi tal-utenti tal-Unjoni, sabiex jiġi evitat dannu sproporzjonata lil dawn tal-aħħar.

(317)

Fir-rigward tal-asserzjoni li l-miżuri jżidu l-kostijiet tal-utenti u jnaqqsu l-kompetittività tagħhom meta mqabbla ma’ operaturi barra mill-Unjoni, il-Kummissjoni sabet li kwalunkwe impatt fuq il-kostijiet huwa mistenni li jkun limitat minħabba s-sehem moderat tar-rinforzi tal-fibra tal-ħġieġ fil-kostijiet totali tal-produzzjoni u d-disponibbiltà ta’ sorsi alternattivi ta’ provvista. Il-Kummissjoni kkonkludiet li l-miżuri la jaffettwaw materjalment il-kompetittività tal-utenti tal-Unjoni u lanqas ma jwasslu għal rilokazzjoni ta’ attivitajiet downstream. Għalhekk, il-Kummissjoni ċaħdet din l-asserzjoni.

(318)

Abbażi tal-informazzjoni disponibbli għall-Kummissjoni u fin-nuqqas ta’ tweġiba sinifikattiva mill-utenti u mill-importaturi, ma kien hemm l-ebda evidenza li tikkontradixxi l-konklużjoni li kwalunkwe impatt negattiv tal-miżuri fuq l-importaturi u l-utenti mhux relatati huwa mistenni li jkun limitat u mhux se jegħleb l-effett pożittiv tal-miżuri fuq il-produtturi tal-Unjoni.

(319)

Il-kumpaniji li jfornu reżina epossidika lill-industrija tal-Unjoni Olin Epoxy & Chemicals International (l-Istati Uniti), Westlake Epoxy BV (in-Netherlands) u Spolek pro chemickou a hutní výrobu, akciová společnost (iċ-Ċekja), esprimew l-appoġġ tagħhom għall-implimentazzjoni tal-miżuri. Huma enfasizzaw l-importanza li l-komponenti u l-materjali ewlenin kollha f’din il-katina tal-valur ikunu jinsabu fl-Unjoni biex tiġi żgurata r-reżiljenza f’setturi strateġiċi. Huma asserew ukoll li ż-żamma ta’ tali preżenza se tagħti spinta lill-katina tal-provvista u ssaħħaħ il-kapaċità tal-Unjoni li tkun innovattiva u tirrispondi b’mod effettiv għad-domandi tas-suq.

(320)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti li jwasslu għall-konklużjoni li ma kienx fl-interess tal-Unjoni li jiġu emendati l-miżuri fuq l-importazzjonijiet tal-GFR li joriġinaw miċ-Ċina.

(321)

Kif konkluż fil-premessa (267), l-industrija tal-Unjoni kienet qed iġġarrab dannu materjali fil-perjodu ta’ investigazzjoni tar-rieżami. Konsegwentement, il-livell kurrenti tal-miżuri ma għadux biżżejjed biex jikkontrobatti d-dumping li qiegħed jikkawża dannu.

(322)

Abbażi tal-konklużjonijiet li waslet għalihom il-Kummissjoni dwar id-dumping, id-dannu, il-kawżalità u l-interess tal-Unjoni, huwa evidenti li l-miżuri eżistenti mhumiex qegħdin jiksbu r-riżultati maħsuba fit-tneħħija tad-dannu. Għalhekk, il-livell ta’ miżuri eżistenti jenħtieġ li jiġi emendat biex ikun hemm prevenzjoni ta’ dannu kkawżat lill-industrija tal-Unjoni minn oġġetti ta’ dumping.

(323)

Sabiex tiddetermina l-livell tal-miżuri, il-Kummissjoni eżaminat jekk dazju aktar baxx mill-marġni tad-dumping ikunx biżżejjed sabiex jitneħħa d-dannu kkawżat mill-importazzjonijiet oġġett ta’ dumping lill-industrija tal-Unjoni.

(324)

Id-dannu jitneħħa jekk l-industrija tal-Unjoni tkun tista’ tikseb profitt fil-mira billi tbigħ bi prezz fil-mira fis-sens tal-Artikoli 7(2c) u 7(2d) tar-Regolament bażiku.

(325)

F’konformità mal-Artikolu 7(2c) tar-Regolament bażiku, għall-istabbiliment tal-profitt fil-mira, il-Kummissjoni qieset il-fatturi li ġejjin: il-livell ta’ profittabbiltà qabel iż-żieda fl-importazzjonijiet mill-pajjiż taħt investigazzjoni, il-livell ta’ profittabbiltà meħtieġ biex ikopri l-kostijiet u l-investimenti kollha, ir-riċerka u l-iżvilupp (R&Ż) u l-innovazzjoni u l-livell ta’ profittabbiltà li għandu jkun mistenni f’kundizzjonijiet normali ta’ kompetizzjoni. Jenħtieġ li tali marġni ta’ profitt ma jkunx anqas minn 6 %.

(326)

Fir-rigward tal-livell ta’ profittabbiltà qabel iż-żieda fl-importazzjonijiet mir-RPĊ, il-Kummissjoni eżaminat il-profitt miksub mill-produtturi tal-Unjoni inklużi fil-kampjun fuq perjodu ta’ 10 snin. Ġie nnotat li l-importazzjonijiet miċ-Ċina kienu preżenti fis-suq tal-Unjoni matul l-10 snin kollha u għalhekk ma kienx possibbli li jiġi stabbilit marġni ta’ profitt abbażi ta’ kwalunkwe waħda minn dawn is-snin qabel iż-żieda fl-importazzjonijiet mir-RPĊ. Barra minn hekk, is-sena 2022 instabet li kienet influwenzata ħafna mill-irkupru ekonomiku ta’ wara l-COVID-19 u ma dehritx xierqa biex jiġi stabbilit il-profitt fil-mira. Għalhekk, tqies li s-sena 2016 kienet xierqa peress li kienet l-aktar sena reċenti meta l-industrija tal-Unjoni operat taħt kundizzjonijiet normali tas-suq wara l-impożizzjoni tal-miżuri anti-dumping u kumpensatorji fl-2014. Fis-sena 2016, l-industrija tal-Unjoni għamlet profitt ta’ 12,28 % filwaqt li l-importazzjonijiet mir-RPĊ kienu jammontaw għal 8 % tal-konsum tal-Unjoni (121).

(327)

L-industrija tal-Unjoni pprovdiet evidenza li l-livell tagħha ta’ investimenti, riċerka u żvilupp (R&Ż) u innovazzjoni matul il-perjodu kkunsidrat kienu jkunu ogħla f’kundizzjonijiet normali ta’ kompetizzjoni. Il-Kummissjoni vverifikat din l-informazzjoni matul iż-żjarat ta’ verifika fuq il-post billi vverifikat ir-rekords interni tal-kumpanija relatati mal-pjanijiet ta’ investiment, mad-deċiżjonijiet ta’ ġestjoni u mar-rapporti finanzjarji. Instab li l-asserzjonijiet tal-industrija tal-Unjoni kienu ġustifikati. Sabiex tirrifletti dan fil-profitt fil-mira, il-Kummissjoni kkalkolat id-differenza bejn l-ispejjeż tal-investimenti, tar-R&Ż u tal-innovazzjoni (“IRI” - investments, R&D and innovation) f’kundizzjonijiet normali ta’ kompetizzjoni kif ipprovduti mill-Industrija tal-Unjoni u vverifikati mill-Kummissjoni bl-ispejjeż reali tal-IRI matul il-perjodu kkunsidrat. Abbażi ta’ informazzjoni vverifikata dwar investimenti li ma setgħux jiġu implimentati matul il-perjodu kkunsidrat, il-marġnijiet ta’ profitt fil-mira żdiedu b’bejn 0,26 % u 1,99 % skont il-produtturi inklużi fil-kampjun.

(328)

Għalhekk, il-profitt fil-mira li ġie stabbilit f’din l-investigazzjoni u f’konformità mal-Artikolu 7(2c) tar-Regolament bażiku varja bejn 12,54 % u 14,27 % skont is-sitwazzjoni li nstabet f’kull waħda mill-kumpaniji inklużi fil-kampjun.

(329)

Abbażi ta’ dan, il-Kummissjoni kkalkolat prezz mhux dannuż tal-prodott simili għall-industrija tal-Unjoni billi applikat il-marġnijiet ta’ profitt fil-mira rispettivi għall-kost tal-produzzjoni tal-produtturi tal-Unjoni inklużi fil-kampjun matul il-perjodu ta’ investigazzjoni tar-rieżami.

(330)

F’konformità mal-Artikolu 7(2d) tar-Regolament bażiku, bħala pass finali, il-Kummissjoni vvalutat il-kostijiet futuri li jirriżultaw mill-Ftehimiet Ambjentali Multilaterali, u l-protokolli tagħhom, li l-Unjoni hija parti minnhom, li l-industrija tal-Unjoni se ġġarrab matul il-perjodu tal-applikazzjoni tal-miżura. Abbażi tal-informazzjoni sottomessa, li kienet appoġġata mill-għodod ta’ rapportar u l-previżjonijiet tal-kumpaniji, il-Kummissjoni stabbiliet li ma kien hemm l-ebda kost addizzjonali ta’ konformità ma’ tali konvenzjonijiet matul l-RIP.

(331)

Il-Kummissjoni mbagħad iddeterminat il-livell tal-marġni tad-dannu abbażi ta’ tqabbil tal-prezz medju ponderat tal-importazzjoni tal-produtturi esportaturi inklużi fil-kampjun li kkooperaw fil-pajjiż ikkonċernat, bid-dazji anti-dumping u kumpensatorji esklużi, bil-prezz medju ponderat mhux dannuż tal-prodott simili mibjugħ mill-produtturi tal-Unjoni inklużi fil-kampjun fis-suq tal-Unjoni matul il-perjodu ta’ investigazzjoni. Kwalunkwe differenza li tirriżulta minn dan it-tqabbil ġiet espressa bħala perċentwal tal-valur CIF medju ponderat tal-importazzjoni. Kif spjegat fil-premessa (230), fil-każ tal-produttur esportatur inkluż fil-kampjun Taishan Fiberglass Inc., il-bejgħ li sar skont il-ftehim ta’ provvista speċjali mal-produttur tal-Unjoni European Owens Corning Fiberglas SPRL ġie eskluż mill-kalkoli tal-marġni tad-dannu.

(332)

Il-livell ta’ eliminazzjoni tad-dannu għal “kumpaniji oħra li kkooperaw” u għall-“importazzjonijiet l-oħrajn kollha li joriġinaw mir-RPĊ” huwa definit bl-istess mod bħall-marġni tad-dumping għal dawn il-kumpaniji u l-importazzjonijiet (ara l-premessi (218) u (219)).

(333)

Wara d-divulgazzjoni, Glass Fibre Europe indikat ċerti żbalji klerikali fil-kalkolu tal-marġni tad-dannu. Mar-rieżami ta’ dawk il-kummenti, il-Kummissjoni identifikat u kkoreġiet l-iżbalji fil-kalkoli, li rriżulta f’aġġustament għall-marġni tad-dannu li ġie ddivulgat lill-produtturi esportaturi Ċiniżi li kkooperaw.

(334)

F’konformità mal-Artikolu 24(1) u l-Artikolu 15(2) tar-Regolament (UE) 2016/1037 tal-Parlament Ewropew u tal-Kunsill (122) u sabiex jiġi evitat l-għadd doppju, il-Kummissjoni l-ewwel imponiet id-dazju kumpensatorju definittiv stabbilit. Id-dazji kumpensatorji baqgħu l-istess, bl-eċċezzjoni tad-dazju kumpensatorju ta’ Jiangsu peress li għal din il-kumpanija d-dazju (4,9 %) ġie stabbilit fil-livell tal-marġni tad-dannu fl-investigazzjoni oriġinali. Dan kien segwit mid-dazju anti-dumping definittiv li kien fadal, li kien jikkorrispondi għall-marġni tad-dumping rilevanti mnaqqas bl-ammont tad-dazju kumpensatorju, u fil-każ ta’ Jiangsu mnaqqas bl-ammont tal-marġni tas-sussidju (5,8 %). Billi l-investigazzjoni stabbiliet li l-marġnijiet tad-dumping kienu aktar baxxi mill-marġnijiet tad-dannu, għandhom jiġu imposti dazji anti-dumping fil-livell tal-marġnijiet tad-dumping. Peress li l-marġni tad-dumping tnaqqas bl-ammont kollu ta’ sussidjar, ma kien hemm l-ebda kwistjoni ta’ għadd doppju.

(335)

Abbażi ta’ dak li ntqal hawn fuq, ir-rati li bihom se jiġu imposti tali dazji huma stabbiliti kif ġej:

(336)

Ir-rati tad-dazju anti-dumping tal-kumpaniji individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. Għalhekk, dawn jirriflettu s-sitwazzjoni li nstabet matul dawn l-investigazzjonijiet fir-rigward ta’ dawn il-kumpaniji. B’hekk, dawn ir-rati tad-dazju huma applikabbli esklużivament għall-importazzjonijiet tal-prodott taħt investigazzjoni li joriġina mill-pajjiż ikkonċernat u mmanifatturat mill-entitajiet legali msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija speċifikament fil-parti operattiva ta’ dan ir-Regolament, inklużi l-entitajiet relatati ma’ dawk imsemmija speċifikament, ma jistgħux jibbenefikaw minn dawn ir-rati u jenħtieġ li jkunu soġġetti għar-rata tad-dazju applikabbli għall-“importazzjonijiet l-oħrajn kollha li joriġinaw mir-Repubblika tal-Poplu taċ-Ċina”.

(337)

Kumpanija tista’ titlob l-applikazzjoni ta’ dawn ir-rati ta’ dazju individwali jekk sussegwentement tibdel l-isem tal-entità tagħha. It-talba trid tiġi indirizzata lill-Kummissjoni (123). It-talba jrid ikun fiha l-informazzjoni rilevanti kollha li tippermetti li jintwera li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, jiġi ppubblikat regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(338)

Sabiex jiġu mminimizzati r-riskji ta’ ċirkomvenzjoni minħabba d-differenza fir-rati tad-dazju, huma meħtieġa miżuri speċjali biex tiġi żgurata l-applikazzjoni xierqa tad-dazji anti-dumping individwali. L-applikazzjoni tad-dazji anti-dumping individwali hija applikabbli biss mal-preżentazzjoni ta’ fattura kummerċjali valida lill-awtoritajiet doganali tal-Istati Membri. Il-fattura trid tikkonforma mar-rekwiżiti stipulati fl-Artikolu 1(3) ta’ dan ir-Regolament. Sakemm tiġi ppreżentata tali fattura, l-importazzjonijiet jenħtieġ li jkunu soġġetti għad-dazju anti-dumping u kumpensatorju applikabbli għall-“importazzjonijiet l-oħrajn kollha li joriġinaw mir-Repubblika tal-Poplu taċ-Ċina”.

(339)

Filwaqt li l-preżentazzjoni ta’ din il-fattura hija meħtieġa biex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, din ma hijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, jenħtieġ li l-awtoritajiet doganali tal-Istati Membri jwettqu l-kontrolli tas-soltu tagħhom u jistgħu, bħal fil-każijiet l-oħrajn kollha, jirrikjedu dokumenti addizzjonali (dokumenti tat-trasport, eċċ.) bl-għan li jivverifikaw l-preċiżjoni tad-dettalji li jinsabu fid-dikjarazzjoni u jiżguraw li l-applikazzjoni sussegwenti tar-rata tad-dazju tkun ġustifikata, f’konformità mad-dritt doganali.

(340)

Jekk l-esportazzjonijiet minn waħda mill-kumpaniji li jibbenefikaw minn rati ta’ dazju individwali aktar baxxi jiżdiedu b’mod sinifikanti fil-volum, b’mod partikolari wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri fis-sens tal-Artikolu 13(1) tar-Regolament bażiku. F’tali ċirkostanzi, tista’ tinbeda investigazzjoni antiċirkomvenzjoni, dment li jiġu ssodisfati l-kundizzjonijiet sabiex din issir. Din l-investigazzjoni tista’, fost l-oħrajn, teżamina l-ħtieġa tat-tneħħija ta’ rata/rati tad-dazju individwali u l-impożizzjoni konsegwenti ta’ dazju għall-pajjiż kollu.

(341)

Sabiex jiġi żgurat infurzar xieraq tad-dazji, id-dazji għall-importazzjonijiet l-oħrajn kollha li joriġinaw mir-Repubblika tal-Poplu taċ-Ċina jenħtieġ li japplikaw mhux biss għall-produtturi esportaturi li ma kkooperawx f’din l-investigazzjoni, iżda wkoll għall-produtturi li ma kellhomx esportazzjonijiet lejn l-Unjoni matul il-perjodu ta’ investigazzjoni.

(342)

Il-produtturi esportaturi li ma esportawx il-prodott ikkonċernat lejn l-Unjoni matul l-RIP jenħtieġ li jkunu jistgħu jitolbu lill-Kummissjoni biex ikunu soġġetti għar-rata tad-dazju anti-dumping għall-kumpaniji li kkooperaw mhux inklużi fil-kampjun. Il-Kummissjoni jenħtieġ li tilqa’ talba bħal din dment li jiġu ssodisfati tliet kundizzjonijiet. Il-produttur esportatur il-ġdid ikollu juri li: (i) ma esportax il-prodott ikkonċernat lejn l-Unjoni matul il-PI (perjodu ta’ investigazzjoni); (ii) mhuwiex relatat ma’ produttur esportatur li għamel dan; u (iii) esporta l-prodott ikkonċernat wara dan jew daħal f’obbligu kuntrattwali irrevokabbli sabiex jagħmel dan fi kwantitajiet sostanzjali.

(343)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,