(1)

Skont ir-Regolament (KE) Nru 1924/2006, l-indikazzjonijiet dwar is-saħħa mogħtija fuq l-ikel huma pprojbiti sakemm ma jkunux awtorizzati mill-Kummissjoni f’konformità ma’ dak ir-Regolament u inklużi fil-lista tal-Unjoni tal-indikazzjonijiet dwar is-saħħa permessi.

(2)

Ir-Regolament (KE) Nru 1924/2006 jipprevedi wkoll li l-applikazzjonijiet għall-inklużjoni tal-indikazzjonijiet dwar is-saħħa fil-lista tal-Unjoni tal-indikazzjonijiet dwar is-saħħa permessi jistgħu jiġu ppreżentati mill-operaturi tan-negozji tal-ikel lill-awtorità nazzjonali kompetenti ta’ Stat Membru. L-awtorità nazzjonali kompetenti trid tgħaddi l-applikazzjonijiet validi lill-Awtorità Ewropea dwar is-Sigurtà fl-Ikel (“l-Awtorità”) għal valutazzjoni xjentifika, kif ukoll lill-Kummissjoni u lill-Istati Membri għall-informazzjoni.

(3)

Wara li tirċievi applikazzjoni, l-Awtorità trid tagħti opinjoni rigward l-indikazzjoni dwar is-saħħa kkonċernata.

(4)

Il-Kummissjoni trid tiddeċiedi dwar l-awtorizzazzjoni tal-indikazzjoni dwar is-saħħa filwaqt li tqis l-opinjoni mogħtija mill-Awtorità.

(5)

Wara l-applikazzjoni ta’ Edge Pharma Sp. z o.o. (“l-applikant”), ippreżentata skont l-Artikolu 18(1) tar-Regolament (KE) Nru 1924/2006, l-Awtorità kienet meħtieġa tagħti opinjoni dwar is-sostanzjar xjentifiku ta’ indikazzjoni dwar is-saħħa marbuta mas-citicoline u l-appoġġ tal-memorja (il-Mistoqsija Nru EFSA-Q-2022-00411). L-indikazzjoni li ppropona l-applikant kienet tgħid hekk: “It-teħid tas-citicoline jappoġġa l-funzjoni tal-memorja fil-persuni b’saħħithom ta’ età medja u anzjani li jkunu qed jiffaċċjaw indeboliment fil-memorja relatat mal-età”.

(6)

Fl-4 ta’ Lulju 2024, l-Awtorità ppubblikat opinjoni xjentifika (2) dwar dik l-indikazzjoni dwar is-saħħa.

(7)

Fl-opinjoni xjentifika tagħha, l-Awtorità kkonkludiet li, abbażi tad-data ppreżentata, ma ġietx stabbilita relazzjoni ta’ kawża u effett bejn il-konsum tal-melħ intern tas-citicoline (CDP-Choline) u t-titjib, iż-żamma jew it-tnaqqis fit-telf tal-memorja f’adulti b’saħħithom ta’ età medja jew anzjani li qed jiffaċċjaw indeboliment tal-memorja suġġettiva assoċjat mal-età. Għaldaqstant, billi l-indikazzjoni dwar is-saħħa mhijiex konformi mar-rekwiżiti tar-Regolament (KE) Nru 1924/2006 għall-inklużjoni fil-lista tal-Unjoni ta’ indikazzjonijiet dwar is-saħħa permessi, jenħtieġ li ma tiġix awtorizzata.

(8)

L-Awtorità għaddiet l-opinjoni xjentifika tagħha lill-Kummissjoni, lill-applikant u lill-Istati Membri. Wara li dik l-opinjoni ġiet ippubblikata, il-Kummissjoni ma rċeviet l-ebda kumment mill-applikant jew mill-membri tal-pubbliku skont l-Artikolu 16(6) tar-Regolament (KE) Nru 1924/2006.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,